༨. ལོ་མ་ས་ཀ་ངྒི་ཡ་ཏྠེ་ར་ཨ་པ་དཱ་ན་ཝ་ཎྞ་ནཱ
ཨ་ཊྛ་མཱ་པ་དཱ་ནེ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་ཀཾ ཨཱ་ཡ་སྨ་ཏོ ལོ་མ་ས་ཀ་ངྒི་ཡ་ཏྠེ་ར་སྶ ཨ་པ་དཱ་ནཾ. ཨ་ཡ་མྤི པུ་རི་མ་བུ་དྡྷེ་སུ ཀ་ཏཱ་དྷི་ཀཱ་རོ ཏ་ཏྠ ཏ་ཏྠ བྷ་ཝེ ཝི་ཝ་ཊྚཱུ་པ་ནི་སྶ་ཡཱ་ནི པུ་ཉྙཱ་ནི ཨུ་པ་ཙི་ན་ནྟོ ཀ་སྶ་པ་སྶ བྷ་ག་ཝ་ཏོ ཀཱ་ལེ བྲཱ་ཧྨ་ཎ་ཀུ་ལེ ནི་བྦ་ཏྟོ ས་དྡྷོ པ་ས་ནྣོ ཨ་ཧོ་སི. ཨ་པ་རོ ཙ་ནྡ་ནོ ནཱ་མ ཏ་སྶ ས་ཧཱ་ཡོ ཙཱ་སི. ཏེ དྭེ་པི ས་ཏྠུ ས་ནྟི་ཀེ དྷ་མྨཾ སུ་ཏྭཱ པ་ས་ནྣ་མཱ་ན་སཱ པ་བྦ་ཛི་ཏྭཱ ཡཱ་ཝ་ཛཱི་ཝཾ སཱི་ལཾ ར་ཀྑི་ཏྭཱ སུ་པ་རི་སུ་དྡྷ་སཱི་ལཱ ཏ་ཏོ ཙུ་ཏཱ དེ་ཝ་ལོ་ཀེ ནི་བྦ་ཏྟི་ཏྭཱ ཨེ་ཀཾ བུ་དྡྷ་ནྟ་རཾ དི་བྦ་སུ་ཁཾ ཨ་ནུ་བྷ་ཝིཾ་སུ. ཏེ་སུ ཨ་ཡཾ ཨི་མ་སྨིཾ བུ་དྡྷུ་པྤཱ་དེ སཱ་ཀི་ཡ་ཀུ་ལེ ནི་བྦ་ཏྟི་ཏྭཱ ཨ་པ་རོ ཙ་ནྡ་ནོ དེ་ཝ་པུ་ཏྟོ ཧུ་ཏྭཱ ཏཱ་ཝ་ཏིཾ་ས་བྷ་ཝ་ནེ ནི་བྦ་ཏྟི. ཨ་ཐ སོ ས་ཀྱ་ཀུ་ལ་པྤ་སཱ་ད་ཀེ་ན ཀཱ་ལུ༹་དཱ་ཡི་ནཱ ཨཱ་རཱ་དྷི་ཏེ་ན བྷ་ག་ཝ་ཏཱ ས་ཀྱ་རཱ་ཛཱུ་ནཾ མཱ་ན་མ་དྡ་ནཱ་ཡ ཀ་ཏཾ ཝེ་སྶ་ནྟ་ར་དྷ་མྨ་དེ་ས་ནཱ་ཡཾ (ཛཱ. ༢.༢༢.༡༦༥༥ ཨཱ་ད་ཡོ) པོ་ཀྑ་ར་ཝ་སྶ་ཨི་དྡྷི་པཱ་ཊི་ཧཱ་རི་ཡཾ དི་སྭཱ པ་ས་ནྣ་མཱ་ན་སོ པ་བྦ་ཛི་ཏྭཱ མ་ཛ྄ཛྷི་མ་ནི་ཀཱ་ཡེ ཝུ་ཏྟཾ བྷ་དྡེ་ཀ་ར་ཏྟསུ་ཏྟ་ནྟ་དེ་ས་ནཾ སུ་ཏྭཱ ཨ་ར་ཉྙ་ཝཱ་སཾ ཝ་ས་ནྟོ བྷ་དྡེ་ཀ་ར་ཏྟ་སུ་ཏྟ་ནྟ་དེ་ས་ནཱ་ནུ་སཱ་ས་ནཾ (མ. ནི. ༣.༢༨༦ ཨཱ་ད་ཡོ) ས་རི་ཏྭཱ ཏ་ད་ནུ་སཱ་རེ་ན ཉཱ་ཎཾ པེ་སེ་ཏྭཱ ཀ་མྨ་ཊྛཱ་ནཾ མ་ན་སི ཀ་རི་ཏྭཱ ཨ་ར་ཧ་ཏྟཾ པཱ་པུ་ཎི.
༢༢༥. ཨ་ར་ཧ་ཏྟཾ པ་ཏྭཱ ཨ་ཏྟ་ནོ པུ་བྦ་ཀ་མྨཾ ས་རི་ཏྭཱ ས་ཉྫཱ་ཏ་སོ་མ་ན་སྶོ པུ་བྦ་ཙ་རི་ཏཱ་པ་དཱ་ནཾ པ་ཀཱ་སེ་ནྟོ ཨི་མ་མྷི བྷ་དྡ་ཀེ ཀ་པྤེཏི་ཨཱ་དི་མཱ་ཧ. ཏ་ཏྠ ཀ་པྤོ ཏཱ་ཝ ཙ་ཏུ་བྦི་དྷོ – སཱ་ར་ཀ་པྤོ, ཝ་ར་ཀ་པྤོ, མ་ཎྜ་ཀ་པྤོ, བྷ་དྡ་ཀ་པྤོ་ཏི. ཏེ་སུ ཡ་སྨིཾ ཀ་པྤེ ཨེ་ཀོ བུ་དྡྷོ ཨུ་པྤ་ཛྫ་ཏི, ཨ་ཡཾ སཱ་ར་ཀ་པྤོ ནཱ་མ. ཡ་སྨིཾ དྭེ ཝཱ ཏ་ཡོ ཝཱ བུ་དྡྷཱ ཨུ་པྤ་ཛྫ་ནྟི, ཨ་ཡཾ ཝ་ར་ཀ་པྤོ ནཱ་མ. ཡ་སྨིཾ ཙ་ཏྟཱ་རོ བུ་དྡྷཱ ཨུ་པྤ་ཛྫ་ནྟི, ཨ་ཡཾ མ་ཎྜ་ཀ་པྤོ ནཱ་མ. ཡ་སྨིཾ པ་ཉྩ བུ་དྡྷཱ ཨུ་པྤ་ཛྫ་ནྟི, ཨ་ཡཾ བྷ་དྡ་ཀ་པྤོ ནཱ་མ. ཨ་ཉྙ་ཏྠ པ་ན –
‘‘སཱ་ར་ཀ་པྤོ མ་ཎྜ་ཀ་པྤོ, སཱ་ར་མ་ཎྜ་ཀ་པྤོ ཏ་ཐཱ;
ཝ་ར་ཀ་པྤོ བྷ་དྡ་ཀ་པྤོ, ཀ་པྤཱ པ་ཉྩ་ཝི་དྷཱ སི་ཡུཾ.
‘‘ཨེ་ཀོ དྭེ ཏ་ཡོ ཙ་ཏྟཱ་རོ, པ་ཉྩ བུ་དྡྷཱ ཡ་ཐཱ་ཀྐ་མཾ;
ཨེ་ཏེ་སུ པ་ཉྩ་ཀ་པྤེ་སུ, ཨུ་པྤ་ཛྫ་ནྟི ཝི་ནཱ་ཡ་ཀཱ’’ཏི. –
ཨེ་ཝཾ པ་ཉྩ ཀ་པྤཱ ཝུ་ཏྟཱ. ཏེ་སུ ཨ་ཡཾ ཀ་པྤོ ‘‘ཀ་ཀུ་ས་ནྡྷོ ཀོ་ཎཱ་ག་མ་ནོ ཀ་སྶ་པོ གོ་ཏ་མོ མེ་ཏྟེ་ཡྻོ’’ཏི པ་ཉྩ་བུ་དྡྷ་པ་ཊི་མ་ཎྜི་ཏ་ཏྟཱ བྷ་དྡ་ཀ་པྤོ ནཱ་མ ཛཱ་ཏོ.
ཏ་སྨཱ ཨི་མ་སྨིཾ བྷ་དྡ་ཀ་པྤ་མྷི ཀ་སྶ་པོ ནཱ་ཡ་ཀོ ཨུ་པྤ་ཛྫཱི་ཏི ས་མྦ་ནྡྷོ. སེ་སཾ ཨུ་ཏྟཱ་ན་ཏྠ་མེ་ཝཱ་ཏི.
ལོ་མ་ས་ཀ་ངྒི་ཡ་ཏྠེ་ར་ཨ་པ་དཱ་ན་ཝ་ཎྞ་ནཱ ས་མ་ཏྟཱ.