སོ་ཎ་ད་ཎྜ་པ་རི་ཝི་ཏ་ཀྐ་ཝ་ཎྞ་ནཱ

༣༠༦-༣༠༨. ཏི་རོ་ཝ་ན་ས་ཎྜ་ག་ཏ་སྶཱཏི ཨ་ནྟོ་ཝ་ན་ས་ཎྜེ ག་ཏ་སྶ, ཝི་ཧཱ་ར་བྦྷ་ནྟ་རཾ པ་ཝི་ཊྛ་སྶཱ་ཏི ཨ་ཏྠོ. ཨ་ཉྫ་ལིཾ པ་ཎཱ་མེ་ཏྭཱཏི ཨེ་ཏེ ཨུ་བྷ་ཏོ་པ་ཀྑི་ཀཱ, ཏེ ཨེ་ཝཾ ཙི་ནྟ་ཡིཾ་སུ – ‘‘ས་ཙེ ནོ མི་ཙྪཱ་དི་ཊྛི་ཀཱ ཙོ་དེ་སྶ་ནྟི – ‘ཀ་སྨཱ ཏུ་མྷེ ས་མ་ཎཾ གོ་ཏ་མཾ ཝ་ནྡི་ཏྠཱ’ཏི? ཏེ་སཾ – ‘ཀིཾ ཨ་ཉྫ་ལི་མ་ཏྟ་ཀ་ར་ཎེ་ནཱ་པི ཝ་ནྡ་ནཾ ནཱ་མ ཧོ་ཏཱི’ཏི ཝ་ཀྑཱ་མ. ས་ཙེ ནོ ས་མྨཱ་དི་ཊྛི་ཀཱ ཙོ་དེ་སྶ་ནྟི – ‘ཀ་སྨཱ ཏུ་མྷེ བྷ་ག་ཝ་ནྟཾ ན ཝ་ནྡི་ཏྠཱ’ཏི. ‘ཀིཾ སཱི་སེ་ན བྷཱུ་མི་ཡཾ པ་ཧ་ར་ནྟེ་ནེ་ཝ ཝ་ནྡ་ནཾ ནཱ་མ ཧོ་ཏི, ན་ནུ ཨ་ཉྫ་ལི་ཀ་མྨ་མྤི ཝ་ནྡ་ནཾ ཨེ་ཝཱ’ཏི ཝ་ཀྑཱ་མཱ’’ཏི. ནཱ་མ་གོ་ཏྟནྟི ‘‘བྷོ, གོ་ཏ་མ, ཨ་ཧཾ ཨ་སུ་ཀ་སྶ པུ་ཏྟོ ད་ཏྟོ ནཱ་མ, མི་ཏྟོ ནཱ་མ, ཨི་དྷཱ་ག་ཏོ’’ཏི ཝ་ད་ནྟཱ ནཱ་མཾ སཱ་ཝེ་ནྟི ནཱ་མ. ‘‘བྷོ, གོ་ཏ་མ, ཨ་ཧཾ ཝཱ་སེ་ཊྛོ ནཱ་མ, ཀ་ཙྩཱ་ནོ ནཱ་མ, ཨི་དྷཱ་ག་ཏོ’’ཏི ཝ་ད་ནྟཱ གོ་ཏྟཾ སཱ་ཝེ་ནྟི ནཱ་མ. ཨེ་ཏེ ཀི་ར ད་ལི་དྡཱ ཛི་ཎྞཱ ཀུ་ལ་པུ་ཏྟཱ ‘‘པ་རི་ས་མ་ཛ྄ཛྷེ ནཱ་མ་གོ་ཏྟ་ཝ་སེ་ན པཱ་ཀ་ཊཱ བྷ་ཝི་སྶཱ་མཱ’’ཏི ཨེ་ཝ་མ་ཀཾ་སུ. ཡེ པ་ན ཏུ་ཎྷཱི་བྷཱུ་ཏཱ ནི་སཱི་དིཾ་སུ, ཏེ ཀེ་རཱ་ཊི་ཀཱ ཙེ་ཝ ཨ་ནྡྷ་བཱ་ལཱ ཙ. ཏ་ཏྠ ཀེ་རཱ་ཊི་ཀཱ – ‘‘ཨེ་ཀཾ དྭེ ཀ་ཐཱ་ས་ལླཱ་པེ་པི ཀ་རོ་ནྟོ ཝི་སྶཱ་སི་ཀོ ཧོ་ཏི, ཨ་ཐ ཝི་སྶཱ་སེ ས་ཏི ཨེ་ཀཾ དྭེ བྷི་ཀྑཱ ཨ་དཱ་ཏུཾ ན ཡུ་ཏྟ’’ནྟི ཏ་ཏོ ཨ་ཏྟཱ་ནཾ མོ་ཙེ་ཏྭཱ ཏུ་ཎྷཱི ནི་སཱི་ད་ནྟི. ཨ་ནྡྷ་བཱ་ལཱ ཨ་ཉྙཱ་ཎ་ཏཱ་ཡེ་ཝ ཨ་ཝ་ཀྑི་ཏྟ་མ་ཏྟི་ཀཱ་པི་ཎྜོ ཝི་ཡ ཡ་ཏྠ ཀ་ཏྠ་ཙི ཏུ་ཎྷཱི་བྷཱུ་ཏཱ ནི་སཱི་ད་ནྟི.