༡༣. ཏེ་ཝི་ཛྫ་སུ་ཏྟ་ཝ་ཎྞ་ནཱ
༥༡༨. ཨེ་ཝཾ མེ སུ་ཏཾ…པེ… ཀོ་ས་ལེ་སཱུཏི ཏེ་ཝི་ཛྫ་སུ་ཏྟཾ. ཏ་ཏྲཱ་ཡཾ ཨ་ནུ་ཏྟཱ་ན་པ་ད་ཝ་ཎྞ་ནཱ. མ་ན་སཱ་ཀ་ཊནྟི ཏ་སྶ གཱ་མ་སྶ ནཱ་མཾ. ཨུ་ཏྟ་རེ་ན མ་ན་སཱ་ཀ་ཊ་སྶཱཏི མ་ན་སཱ་ཀ་ཊ་ཏོ ཨ་ཝི་དཱུ་རེ ཨུ་ཏྟ་ར་པ་སྶེ. ཨ་མྦ་ཝ་ནེཏི ཏ་རུ་ཎ་ཨ་མྦ་རུ་ཀྑ་ས་ཎྜེ, ར་མ་ཎཱི་ཡོ ཀི་ར སོ བྷཱུ་མི་བྷཱ་གོ, ཧེ་ཊྛཱ ར་ཛ་ཏ་པ་ཊྚ་ས་དི་སཱ ཝཱ་ལི་ཀཱ ཝི་པྤ་ཀི་ཎྞཱ, ཨུ་པ་རི མ་ཎི་ཝི་ཏཱ་ནཾ ཝི་ཡ གྷ་ན་སཱ་ཁཱ་པ་ཏྟཾ ཨ་མྦ་ཝ་ནཾ. ཏ་སྨིཾ བུ་དྡྷཱ་ནཾ ཨ་ནུ་ཙྪ་ཝི་ཀེ པ་ཝི་ཝེ་ཀ་སུ་ཁེ ཨ་མྦ་ཝ་ནེ ཝི་ཧ་ར་ཏཱི་ཏི ཨ་ཏྠོ.
༥༡༩. ཨ་བྷི་ཉྙཱ་ཏཱ ཨ་བྷི་ཉྙཱ་ཏཱཏི ཀུ་ལ་ཙཱ་རི་ཏྟཱ་དི་ས་མྤ་ཏྟི་ཡཱ ཏ་ཏྠ ཏ་ཏྠ པ་ཉྙཱ་ཏཱ. ཙ་ངྐཱིཏི་ཨཱ་དཱི་ནི ཏེ་སཾ ནཱ་མཱ་ནི. ཏ་ཏྠ ཙ་ངྐཱི ཨོ་པཱ་སཱ་ད་ཝཱ་སི་ཀོ. ཏཱ་རུ་ཀྑོ ཨི་ཙྪཱ་ན་ངྒ་ལ་ཝཱ་སི་ཀོ. པོ་ཀྑ་ར་སཱ་ཏཱི ཨུ་ཀྐ་ཊྛ་ཝཱ་སི་ཀོ. ཛཱ་ཎུ་སོ་ཎཱི སཱ་ཝ་ཏྠི་ཝཱ་སི་ཀོ. ཏོ་དེ་ཡྻོ ཏུ་དི་གཱ་མ་ཝཱ་སི་ཀོ. ཨ་ཉྙེ ཙཱཏི ཨ་ཉྙེ ཙ བ་ཧུ་ཛ་ནཱ. ཨ་ཏྟ་ནོ ཨ་ཏྟ་ནོ ནི་ཝཱ་ས་ཊྛཱ་ནེ་ཧི ཨཱ་ག་ནྟྭཱ མ་ནྟ་ས་ཛ྄ཛྷཱ་ཡ་ཀ་ར་ཎ་ཏྠཾ ཏ་ཏྠ པ་ཊི་ཝ་ས་ནྟི. མ་ན་སཱ་ཀ་ཊ་སྶ ཀི་ར ར་མ་ཎཱི་ཡ་ཏཱ་ཡ ཏེ བྲཱ་ཧྨ་ཎཱ ཏ་ཏྠ ན་དཱི་ཏཱི་རེ གེ་ཧཱ་ནི ཀཱ་རེ་ཏྭཱ པ་རི་ཀྑི་པཱ་པེ་ཏྭཱ ཨ་ཉྙེ་སཾ བ་ཧཱུ་ནཾ པ་ཝེ་ས་ནཾ ནི་ཝཱ་རེ་ཏྭཱ ཨ་ནྟ་ར་ནྟ་རཱ ཏ་ཏྠ ག་ནྟྭཱ ཝ་ས་ནྟི.
༥༢༠-༥༢༡. ཝཱ་སེ་ཊྛ་བྷཱ་ར་དྭཱ་ཛཱ་ནནྟི ཝཱ་སེ་ཊྛ་སྶ ཙ པོ་ཀྑ་ར་སཱ་ཏི་ནོ ཨ་ནྟེ་ཝཱ་སི་ཀ་སྶ, བྷཱ་ར་དྭཱ་ཛ་སྶ ཙ ཏཱ་རུ་ཀྑ་ནྟེ་ཝཱ་སི་ཀ་སྶ. ཨེ་ཏེ ཀི་ར དྭེ ཛཱ་ཏི་ས་མྤ་ནྣཱ ཏི་ཎྞཾ ཝེ་དཱ་ནཾ པཱ་ར་གཱུ ཨ་ཧེ་སུཾ. ཛ་ངྒྷ་ཝི་ཧཱ་རནྟི ཨ་ཏི་ཙི་ར་ནི་ས་ཛྫ་པ་ཙྩ་ཡཱ ཀི་ལ་མ་ཐ་ཝི་ནོ་ད་ན་ཏྠཱ་ཡ ཛ་ངྒྷ་ཙཱ་རཾ. ཏེ ཀི་ར དི་ཝ་སཾ ས་ཛ྄ཛྷཱ་ཡཾ ཀ་ཏྭཱ སཱ་ཡ་ནྷེ ཝུ་ཊྛཱ་ཡ ནྷཱ་ནཱི་ཡ་ས་མྦྷཱ་ར་ག་ནྡྷ་མཱ་ལ་ཏེ་ལ་དྷོ་ཏ་ཝ་ཏྠཱ་ནི གཱ་ཧཱ་པེ་ཏྭཱ ཨ་ཏྟ་ནོ པ་རི་ཛ་ན་པ་རི་ཝུ་ཏཱ ནྷཱ་ཡི་ཏུ་ཀཱ་མཱ ན་དཱི་ཏཱི་རཾ ག་ནྟྭཱ ར་ཛ་ཏ་པ་ཊྚ་ཝ་ཎྞེ ཝཱ་ལི་ཀཱ་ས་ཎྜེ ཨ་པ་རཱ་པ་རཾ ཙ་ངྐ་མིཾ་སུ. ཨེ་ཀཾ ཙ་ངྐ་མ་ནྟཾ ཨི་ཏ་རོ ཨ་ནུ་ཙ་ངྐ་མི, པུ་ན ཨི་ཏ་རཾ ཨི་ཏ་རོ་ཏི. ཏེ་ན ཝུ་ཏྟཾ ‘‘ཨ་ནུ་ཙ་ངྐ་མ་ནྟཱ་ནཾ ཨ་ནུ་ཝི་ཙ་ར་ནྟཱ་ན’’ནྟི. མ་གྒཱ་མ་གྒེཏི མ་གྒེ ཙ ཨ་མ་གྒེ ཙ. ཀ་ཏ་མཾ ནུ ཁོ པ་ཊི་པ་དཾ པཱུ་རེ་ཏྭཱ ཀ་ཏ་མེ་ན མ་གྒེ་ན ས་ཀྐཱ སུ་ཁཾ བྲ་ཧྨ་ལོ་ཀཾ ག་ནྟུ་ནྟི ཨེ་ཝཾ མ་གྒཱ་མ་གྒཾ ཨཱ་ར་བྦྷ ཀ་ཐཾ ས་མུ་ཊྛཱ་པེ་སུ་ནྟི ཨ་ཏྠོ. ཨ་ཉྫ་སཱ་ཡ་ནོཏི ཨུ་ཛུ་མ་གྒ་སྶེ་ཏཾ ཝེ་ཝ་ཙ་ནཾ, ཨ་ཉྫ་སཱ ཝཱ ཨུ་ཛུ་ཀ་མེ་ཝ ཨེ་ཏེ་ན ཨཱ་ཡ་ནྟི ཨཱ་ག་ཙྪ་ནྟཱི་ཏི ཨ་ཉྫ་སཱ་ཡ་ནོ ནི་ཡྻཱ་ནི་ཀོ ནི་ཡྻཱ་ཏཱིཏི ནི་ཡྻཱ་ཡ་ནྟོ ནི་ཡྻཱ་ཏི, ག་ཙྪ་ནྟོ ག་ཙྪ་ཏཱི་ཏི ཨ་ཏྠོ.
ཏ་ཀྐ་ར་སྶ བྲ་ཧྨ་ས་ཧ་བྱ་ཏཱ་ཡཱཏི ཡོ ཏཾ མ་གྒཾ ཀ་རོ་ཏི པ་ཊི་པ་ཛྫ་ཏི, ཏ་སྶ བྲ་ཧྨུ་ནཱ ས་དྡྷིཾ ས་ཧ་བྷཱ་ཝཱ་ཡ, ཨེ་ཀ་ཊྛཱ་ནེ པཱ་ཏུ་བྷཱ་ཝཱ་ཡ ག་ཙྪ་ཏཱི་ཏི ཨ་ཏྠོ. ཡྭཱ་ཡནྟི ཡོ ཨ་ཡཾ. ཨ་ཀྑཱ་ཏོཏི ཀ་ཐི་ཏོ དཱི་པི་ཏོ. བྲཱ་ཧྨ་ཎེ་ན པོ་ཀྑ་ར་སཱ་ཏི་ནཱཏི ཨ་ཏྟ་ནོ ཨཱ་ཙ་རི་ཡཾ ཨ་པ་དི་ས་ཏི. ཨི་ཏི ཝཱ་སེ་ཊྛོ ས་ཀ་མེ་ཝ ཨཱ་ཙ་རི་ཡ་ཝཱ་དཾ ཐོ་མེ་ཏྭཱ པ་གྒ་ཎྷི་ཏྭཱ ཝི་ཙ་ར་ཏི. བྷཱ་ར་དྭཱ་ཛོ་པི ས་ཀ་མེ་ཝཱ་ཏི. ཏེ་ན ཝུ་ཏྟཾ ‘‘ནེ་ཝ ཁོ ཨ་ས་ཀྑི ཝཱ་སེ་ཊྛོ’’ཏི་ཨཱ་དི.
ཏ་ཏོ ཝཱ་སེ་ཊྛོ ‘‘ཨུ་བྷི་ནྣ་མྤི ཨ་མྷཱ་ཀཾ ཀ་ཐཱ ཨ་ནི་ཡྻཱ་ནི་ཀཱ་ཝ, ཨི་མ་སྨི་ཉྩ ལོ་ཀེ མ་གྒ་ཀུ་ས་ལོ ནཱ་མ བྷོ་ཏཱ གོ་ཏ་མེ་ན ས་དི་སོ ན་ཏྠི, བྷ་ཝ་ཉྩ གོ་ཏ་མོ ཨ་ཝི་དཱུ་རེ ཝ་ས་ཏི, སོ ནོ ཏུ་ལཾ ག་ཧེ་ཏྭཱ ནི་སི་ནྣ་ཝཱ་ཎི་ཛོ ཝི་ཡ ཀ་ངྑཾ ཚི་ནྡི་སྶ་ཏཱི’’ཏི ཙི་ནྟེ་ཏྭཱ ཏ་མ་ཏྠཾ བྷཱ་ར་དྭཱ་ཛ་སྶ ཨཱ་རོ་ཙེ་ཏྭཱ ཨུ་བྷོ་པི ག་ནྟྭཱ ཨ་ཏྟ་ནོ ཀ་ཐཾ བྷ་ག་ཝ་ཏོ ཨཱ་རོ་ཙེ་སུཾ. ཏེ་ན ཝུ་ཏྟཾ ‘‘ཨ་ཐ ཁོ ཝཱ་སེ་ཊྛོ…པེ… ཡྭཱ་ཡཾ ཨ་ཀྑཱ་ཏོ བྲཱ་ཧྨ་ཎེ་ན ཏཱ་རུ་ཀྑེ་ནཱ’’ཏི.
༥༢༢. ཨེ་ཏྠ བྷོ གོ་ཏ་མཱཏི ཨེ་ཏ་སྨིཾ མ་གྒཱ་མ་གྒེ. ཝི་གྒ་ཧོ ཝི་ཝཱ་དོཏི་ཨཱ་དཱི་སུ པུ་བྦུ་པྤ་ཏྟི་ཀོ ཝི་གྒ་ཧོ. ཨ་པ་ར་བྷཱ་གེ ཝི་ཝཱ་དོ. དུ་ཝི་དྷོ་པི ཨེ་སོ ནཱ་ནཱ་ཨཱ་ཙ་རི་ཡཱ་ནཾ ཝཱ་ད་ཏོ ནཱ་ནཱ་ཝཱ་དོ.
༥༢༣. ཨ་ཐ ཀི་སྨིཾ པ་ན ཝོཏི ཏྭ་མྤི ཨ་ཡ་མེ་ཝ མ་གྒོ་ཏི ཨ་ཏྟ་ནོ ཨཱ་ཙ་རི་ཡ་ཝཱ་ད་མེ་ཝ པ་གྒ་ཡ྄ཧ ཏི་ཊྛ་སི, བྷཱ་ར་དྭཱ་ཛོ་པི ཨ་ཏྟ་ནོ ཨཱ་ཙ་རི་ཡ་ཝཱ་ད་མེ་ཝ, ཨེ་ཀ་སྶཱ་པི ཨེ་ཀ་སྨིཾ སཾ་ས་ཡོ ན་ཏྠི. ཨེ་ཝཾ ས་ཏི ཀི་སྨིཾ ཝོ ཝི་གྒ་ཧོ་ཏི པུ་ཙྪ་ཏི.
༥༢༤. མ་གྒཱ་མ་གྒེ, བྷོ གོ་ཏ་མཱཏི མ་གྒེ བྷོ གོ་ཏ་མ ཨ་མ་གྒེ ཙ, ཨུ་ཛུ་མ་གྒེ ཙ ཨ་ནུ་ཛུ་མ་གྒེ ཙཱ་ཏི ཨ་ཏྠོ. ཨེ་ས ཀི་ར ཨེ་ཀ་བྲཱ་ཧྨ་ཎ་སྶཱ་པི མ་གྒཾ ‘‘ན མ་གྒོ’’ཏི ན ཝ་ད་ཏི. ཡ་ཐཱ པ་ན ཨ་ཏྟ་ནོ ཨཱ་ཙ་རི་ཡ་སྶ མ་གྒོ ཨུ་ཛུ་མ་གྒོ, ན ཨེ་ཝཾ ཨ་ཉྙེ་སཾ ཨ་ནུ་ཛཱ་ནཱ་ཏི, ཏ་སྨཱ ཏ་མེ་ཝ་ཏྠཾ དཱི་པེ་ནྟོ ‘‘ཀི་ཉྩཱ་པི བྷོ གོ་ཏ་མཱ’’ཏི་ཨཱ་དི་མཱ་ཧ.
ས་བྦཱ་ནི ཏཱ་ནཱིཏི ལི་ངྒ་ཝི་པ་ལླཱ་སེ་ན ཝ་ད་ཏི, ས་བྦེ ཏེ་ཏི ཝུ་ཏྟཾ ཧོ་ཏི. བ་ཧཱུ་ནཱིཏི ཨ་ཊྛ ཝཱ ད་ས ཝཱ. ནཱ་ནཱ་མ་གྒཱ་ནཱིཏི མ་ཧ་ནྟཱ་མ་ཧ་ནྟ་ཛ་ངྒྷ་མ་གྒ་ས་ཀ་ཊ་མ་གྒཱ་དི་ཝ་སེ་ན ནཱ་ནཱ་ཝི་དྷཱ་ནི སཱ་མ་ནྟཱ གཱ་མ་ན་དཱི་ཏ་ལཱ༹་ཀ་ཁེ་ཏྟཱ་དཱི་ཧི ཨཱ་ག་ནྟྭཱ གཱ་མཾ པ་ཝི་ས་ན་མ་གྒཱ་ནི.
༥༢༥-༥༢༦. ‘‘ནི་ཡྻ་ནྟཱིཏི ཝཱ་སེ་ཊྛ ཝ་དེ་སཱི’’ཏི བྷ་ག་ཝཱ ཏི་ཀྑ་ཏྟུཾ ཝ་ཙཱི་བྷེ་དཾ ཀ་ཏྭཱ པ་ཊི་ཉྙཾ ཀཱ་རཱ་པེ་སི. ཀ་སྨཱ? ཏི་ཏྠི་ཡཱ ཧི པ་ཊི་ཛཱ་ནི་ཏྭཱ པ་ཙྪཱ ནི་གྒ་ཡ྄ཧ་མཱ་ནཱ ཨ་ཝ་ཛཱ་ན་ནྟི. སོ ཏ་ཐཱ ཀཱ་ཏུཾ ན ས་ཀྑི་སྶ་ཏཱི་ཏི.
༥༢༧-༥༢༩. ཏེ་ཝ ཏེ་ཝི་ཛྫཱཏི ཏེ ཏེ་ཝི་ཛྫཱ. ཝ་ཀཱ་རོ ཨཱ་ག་མ་ས་ནྡྷི་མ་ཏྟཾ. ཨ་ནྡྷ་ཝེ་ཎཱིཏི ཨ་ནྡྷ་པ་ཝེ་ཎཱི, ཨེ་ཀེ་ན ཙ་ཀྑུ་མ་ཏཱ ག་ཧི་ཏ་ཡ་ཊྛི་ཡཱ ཀོ་ཊིཾ ཨེ་ཀོ ཨ་ནྡྷོ ག་ཎྷ་ཏི, ཏཾ ཨ་ནྡྷཾ ཨ་ཉྙོ ཏཾ ཨ་ཉྙོ་ཏི ཨེ་ཝཾ པ་ཎྞཱ་ས་ས་ཊྛི ཨ་ནྡྷཱ པ་ཊི་པཱ་ཊི་ཡཱ གྷ་ཊི་ཏཱ ཨ་ནྡྷ་ཝེ་ཎཱི་ཏི ཝུ་ཙྩ་ཏི. པ་ར་མྤ་ར་སཾ་ས་ཏྟཱཏི ཨ་ཉྙ་མ་ཉྙཾ ལ་གྒཱ, ཡ་ཊྛི་གཱ་ཧ་ཀེ་ན་པི ཙ་ཀྑུ་མ་ཏཱ ཝི་ར་ཧི་ཏཱ་ཏི ཨ་ཏྠོ. ཨེ་ཀོ ཀི་ར དྷུ་ཏྟོ ཨ་ནྡྷ་ག་ཎཾ དི་སྭཱ ‘‘ཨ་སུ་ཀ་སྨིཾ ནཱ་མ གཱ་མེ ཁ་ཛྫ་བྷོ་ཛྫཾ སུ་ལ་བྷ’’ནྟི ཨུ་སྶཱ་ཧེ་ཏྭཱ ‘‘ཏེ་ན ཧི ཏ་ཏྠ ནོ སཱ་མི ནེ་ཧི, ཨི་དཾ ནཱ་མ ཏེ དེ་མཱ’’ཏི ཝུ་ཏྟེ, ལ་ཉྫཾ ག་ཧེ་ཏྭཱ ཨ་ནྟ་རཱ་མ་གྒེ མ་གྒཱ ཨོ་ཀྐ་མྨ མ་ཧ་ནྟཾ ག་ཙྪཾ ཨ་ནུ་པ་རི་ག་ནྟྭཱ པུ་རི་མ་སྶ ཧ་ཏྠེ་ན པ་ཙྪི་མ་སྶ ཀ་ཙྪཾ ག་ཎྷཱ་པེ་ཏྭཱ ‘‘ཀི་ཉྩི ཀ་མྨཾ ཨ་ཏྠི, ག་ཙྪ་ཐ ཏཱ་ཝ ཏུ་མྷེ’’ཏི ཝ་ཏྭཱ པ་ལཱ་ཡི, ཏེ དི་ཝ་ས་མྤི ག་ནྟྭཱ མ་གྒཾ ཨ་ཝི་ནྡ་མཱ་ནཱ ‘‘ཀུ་ཧིཾ ནོ ཙ་ཀྑུ་མཱ, ཀུ་ཧིཾ མ་གྒོ’’ཏི པ་རི་དེ་ཝི་ཏྭཱ མ་གྒཾ ཨ་ཝི་ནྡ་མཱ་ནཱ ཏ་ཏྠེ་ཝ མ་རིཾ་སུ. ཏེ ས་ནྡྷཱ་ཡ ཝུ་ཏྟཾ ‘‘པ་ར་མྤ་ར་སཾ་ས་ཏྟཱ’’ཏི. པུ་རི་མོ་པཱིཏི པུ་རི་མེ་སུ ད་ས་སུ བྲཱ་ཧྨ་ཎེ་སུ ཨེ་ཀོ་པི. མ་ཛ྄ཛྷི་མོ་པཱིཏི མ་ཛ྄ཛྷི་མེ་སུ ཨཱ་ཙ་རི་ཡ་པཱ་ཙ་རི་ཡེ་སུ ཨེ་ཀོ་པི. པ་ཙྪི་མོ་པཱིཏི ཨི་དཱ་ནི ཏེ་ཝི་ཛྫེ་སུ བྲཱ་ཧྨ་ཎེ་སུ ཨེ་ཀོ་པི. ཧ་སྶ་ཀ་ཉྙེ་ཝཱཏི ཧ་སི་ཏ་བྦ་མེ་ཝ. ནཱ་མ་ཀ་ཉྙེ་ཝཱཏི ལཱ་མ་ཀཾ་ཡེ་ཝ. ཏ་དེ་ཏཾ ཨ་ཏྠཱ་བྷཱ་ཝེ་ན རི་ཏྟ་ཀཾ, རི་ཏྟ་ཀ་ཏྟཱ་ཡེ་ཝ ཏུ་ཙྪ་ཀཾ. ཨི་དཱ་ནི བྲ་ཧྨ་ལོ་ཀོ ཏཱ་ཝ ཏི་ཊྛ་ཏུ, ཡོ ཏེ་ཝི་ཛྫེ་ཧི ན དི་ཊྛ་པུ་བྦོ་ཝ. ཡེ་པི ཙ་ནྡི་མ་སཱུ་རི་ཡེ ཏེ་ཝི་ཛྫཱ པ་སྶ་ནྟི, ཏེ་ས་མྤི ས་ཧ་བྱ་ཏཱ་ཡ མ་གྒཾ དེ་སེ་ཏུཾ ན་པྤ་ཧོ་ནྟཱི་ཏི ད་སྶ་ན་ཏྠཾ ‘‘ཏཾ ཀིཾ མ་ཉྙ་སཱི’’ཏི་ཨཱ་དི་མཱ་ཧ.
༥༣༠. ཏ་ཏྠ ཡ་ཏོ ཙ་ནྡི་མ་སཱུ་རི་ཡཱ ཨུ་གྒ་ཙྪ་ནྟཱིཏི ཡ་སྨིཾ ཀཱ་ལེ ཨུ་གྒ་ཙྪ་ནྟི. ཡ་ཏྠ ཙ ཨོ་གྒ་ཙྪ་ནྟཱིཏི ཡ་སྨིཾ ཀཱ་ལེ ཨ་ཏྠ་མེ་ནྟི, ཨུ་གྒ་མ་ན་ཀཱ་ལེ ཙ ཨ་ཏྠ་ངྒ་མ་ན་ཀཱ་ལེ ཙ པ་སྶ་ནྟཱི་ཏི ཨ་ཏྠོ. ཨཱ་ཡཱ་ཙ་ནྟཱིཏི ‘‘ཨུ་དེ་ཧི བྷ་ཝཾ ཙ་ནྡ, ཨུ་དེ་ཧི བྷ་ཝཾ སཱུ་རི་ཡཱ’’ཏི ཨེ་ཝཾ ཨཱ་ཡཱ་ཙ་ནྟི. ཐོ་མ་ཡ་ནྟཱིཏི ‘‘སོ་མྨོ ཙ་ནྡོ, པ་རི་མ་ཎྜ་ལོ ཙ་ནྡོ, ས་པྤ་བྷོ ཙ་ནྡོ’’ཏི་ཨཱ་དཱི་ནི ཝ་ད་ནྟཱ པ་སཾ་ས་ནྟི. པ་ཉྫ་ལི་ཀཱཏི པ་གྒ་ཧི་ཏ་ཨ་ཉྫ་ལི་ཀཱ. ན་མ་སྶ་མཱ་ནཱཏི ‘‘ན་མོ ན་མོ’’ཏི ཝ་ད་མཱ་ནཱ.
༥༣༡-༥༣༢. ཡཾ པ་སྶ་ནྟཱིཏི ཨེ་ཏྠ ཡནྟི ནི་པཱ་ཏ་མ་ཏྟཾ. ཀིཾ པ་ན ན ཀི་རཱཏི ཨེ་ཏྠ ཨི་དྷ པ་ན ཀིཾ ཝ་ཏྟ་བྦཾ. ཡ་ཏྠ ཀི་ར ཏེ་ཝི་ཛྫེ་ཧི བྲཱ་ཧྨ་ཎེ་ཧི ན བྲ་ཧྨཱ ས་ཀྑི་དི་ཊྛོ་ཏི ཨེ་ཝ་མ་ཏྠོ ད་ཊྛ་བྦོ.
ཨ་ཙི་ར་ཝ་ཏཱི་ན་དཱི་ཨུ་པ་མཱ་ཀ་ཐཱ
༥༤༢. ས་མ་ཏི་ཏྟི་ཀཱཏི ས་མ་བྷ་རི་ཏཱ. ཀཱ་ཀ་པེ་ཡྻཱཏི ཡ་ཏྠ ཀ་ཏྠ་ཙི ཏཱི་རེ ཋི་ཏེ་ན ཀཱ་ཀེ་ན ས་ཀྐཱ པཱ་ཏུ་ནྟི ཀཱ་ཀ་པེ་ཡྻཱ. པཱ་རཾ ཏ་རི་ཏུ་ཀཱ་མོཏི ན་དིཾ ཨ་ཏི་ཀྐ་མི་ཏྭཱ པ་ར་ཏཱི་རཾ ག་ནྟུ་ཀཱ་མོ. ཨ་ཝ྄ཧེ་ཡྻཱཏི པ་ཀྐོ་སེ་ཡྻ. ཨེ་ཧི པཱ་རཱ་པཱ་རནྟི ཨ་མྦྷོ པཱ་ར ཨ་པཱ་རཾ ཨེ་ཧི, ཨ་ཐ མཾ ས་ཧ་སཱ་ཝ ག་ཧེ་ཏྭཱ ག་མི་སྶ་སི, ཨ་ཏྠི མེ ཨ་ཙྩཱ་ཡི་ཀ་ཀ་མྨ་ནྟི ཨ་ཏྠོ.
༥༤༤. ཡེ དྷ་མྨཱ བྲཱ་ཧྨ་ཎ་ཀཱ་ར་ཀཱཏི ཨེ་ཏྠ པ་ཉྩ་སཱི་ལ་ད་ས་ཀུ་ས་ལ་ཀ་མྨ་པ་ཐ་བྷེ་དཱ དྷ་མྨཱ བྲཱ་ཧྨ་ཎ་ཀཱ་ར་ཀཱ་ཏི ཝེ་དི་ཏ་བྦཱ, ཏ་བྦི་པ་རཱི་ཏཱ ཨ་བྲཱ་ཧྨ་ཎ་ཀཱ་ར་ཀཱ. ཨི་ནྡ་མ་ཝ྄ཧཱ་ཡཱ་མཱཏི ཨི་ནྡཾ ཨ་ཝ྄ཧཱ་ཡཱ་མ པ་ཀྐོ་སཱ་མ. ཨེ་ཝཾ བྲཱ་ཧྨ་ཎཱ་ནཾ ཨ་ཝ྄ཧཱ་ཡ་ན་སྶ ནི་ར་ཏྠ་ཀ་ཏཾ ད་སྶེ་ཏྭཱ པུ་ན་པི བྷ་ག་ཝཱ ཨ་ཎྞ་ཝ་ཀུ་ཙྪི་ཡཾ སཱུ་རི་ཡོ ཝི་ཡ ཛ་ལ་མཱ་ནོ པ་ཉྩ་ས་ཏ་བྷི་ཀྑུ་པ་རི་ཝུ་ཏོ ཨ་ཙི་ར་ཝ་ཏི་ཡཱ ཏཱི་རེ ནི་སི་ནྣོ ཨ་པ་ར་མྤི ན་དཱི་ཨུ་པ་མཾ་ཡེ་ཝ ཨཱ་ཧ་ར་ནྟོ ‘‘སེ་ཡྻ་ཐཱ་པཱི’’ཏི་ཨཱ་དི་མཱ་ཧ.
༥༤༦. ཀཱ་མ་གུ་ཎཱཏི ཀཱ་མ་ཡི་ཏ་བྦ་ཊྛེ་ན ཀཱ་མཱ, བ་ནྡྷ་ན་ཊྛེ་ན གུ་ཎཱ. ‘‘ཨ་ནུ་ཛཱ་ནཱ་མི བྷི་ཀྑ་ཝེ, ཨ་ཧ་ཏཱ་ནཾ ཝ་ཏྠཱ་ནཾ དི་གུ་ཎཾ ས་ངྒྷཱ་ཊི’’ནྟི (མ་ཧཱ་ཝ. ༣༤༨) ཨེ་ཏྠ ཧི པ་ཊ་ལ་ཊྛོ གུ་ཎ་ཊྛོ. ‘‘ཨ་ཙྩེ་ནྟི ཀཱ་ལཱ ཏ་ར་ཡ་ནྟི ར་ཏྟི་ཡོ, ཝ་ཡོ་གུ་ཎཱ ཨ་ནུ་པུ་བྦཾ ཛ་ཧ་ནྟཱི’’ཏི ཨེ་ཏྠ རཱ་ས་ཊྛོ གུ་ཎ་ཊྛོ. ‘‘ས་ཏ་གུ་ཎཱ ད་ཀྑི་ཎཱ པཱ་ཊི་ཀ་ངྑི་ཏ་བྦཱ’’ཏི (མ. ནི. ༣.༣༧༩) ཨེ་ཏྠ ཨཱ་ནི་སཾ་ས་ཊྛོ གུ་ཎ་ཊྛོ. ‘‘ཨ་ནྟཾ ཨ་ནྟ་གུ་ཎཾ (ཁུ. པཱ. ༣.༡) ཀ་ཡི་རཱ མཱ་ལཱ་གུ་ཎེ བ་ཧཱུ’’ཏི (དྷ. པ. ༥༣) ཙ ཨེ་ཏྠ བ་ནྡྷ་ན་ཊྛོ གུ་ཎ་ཊྛོ. ཨི་དྷཱ་པི ཨེ་སེ་ཝ ཨ་དྷི་པྤེ་ཏོ. ཏེ་ན ཝུ་ཏྟཾ ‘‘བ་ནྡྷ་ན་ཊྛེ་ན གུ་ཎཱ’’ཏི. ཙ་ཀྑུ་ཝི་ཉྙེ་ཡྻཱཏི ཙ་ཀྑུ་ཝི་ཉྙཱ་ཎེ་ན པ་སྶི་ཏ་བྦཱ. ཨེ་ཏེ་ནུ་པཱ་ཡེ་ན སོ་ཏ་ཝི་ཉྙེ་ཡྻཱ་དཱི་སུ་པི ཨ་ཏྠོ ཝེ་དི་ཏ་བྦོ. ཨི་ཊྛཱཏི པ་རི་ཡི་ཊྛཱ ཝཱ ཧོ་ནྟུ, མཱ ཝཱ, ཨི་ཊྛཱ་ར་མྨ་ཎ་བྷཱུ་ཏཱ་ཏི ཨ་ཏྠོ. ཀ་ནྟཱཏི ཀཱ་མ་ནཱི་ཡཱ. མ་ནཱ་པཱཏི མ་ན་ཝ་ཌྜྷ་ན་ཀཱ. པི་ཡ་རཱུ་པཱཏི པི་ཡ་ཛཱ་ཏི་ཀཱ. ཀཱ་མཱུ་པ་ས་ཉྷི་ཏཱཏི ཨཱ་ར་མྨ་ཎཾ ཀ་ཏྭཱ ཨུ་པྤ་ཛྫ་མཱ་ནེ་ན ཀཱ་མེ་ན ཨུ་པ་ས་ཉྷི་ཏཱ. ར་ཛ་ནཱི་ཡཱཏི ར་ཉྫ་ནཱི་ཡཱ, རཱ་གུ་པྤ་ཏྟི་ཀཱ་ར་ཎ་བྷཱུ་ཏཱ་ཏི ཨ་ཏྠོ.
ག་དྷི་ཏཱཏི གེ་དྷེ་ན ཨ་བྷི་བྷཱུ་ཏཱ ཧུ་ཏྭཱ. མུ་ཙྪི་ཏཱཏི མུ་ཙྪཱ་ཀཱ་ར་པྤ་ཏྟཱ་ཡ ཨ་དྷི་མ་ཏྟ་ཀཱ་ཡ ཏ་ཎྷཱ་ཡ ཨ་བྷི་བྷཱུ་ཏཱ. ཨ་ཛ྄ཛྷོ་པ་ནྣཱཏི ཨ་དྷི་ཨོ་པ་ནྣཱ ཨོ་གཱ་ལ༹ྷཱ ‘‘ཨི་དཾ སཱ་ར’’ནྟི པ་རི་ནི་ཊྛཱ་ན་པྤ་ཏྟཱ ཧུ་ཏྭཱ. ཨ་ནཱ་དཱི་ན་ཝ་ད་སྶཱ་ཝི་ནོཏི ཨཱ་དཱི་ན་ཝཾ ཨ་པ་སྶ་ནྟཱ. ཨ་ནི་སྶ་ར་ཎ་པ་ཉྙཱཏི ཨི་ད་མེ་ཏྠ ནི་སྶ་ར་ཎ་ནྟི, ཨེ་ཝཾ པ་རི་ཛཱ་ན་ན་པ་ཉྙཱ་ཝི་ར་ཧི་ཏཱ, པ་ཙྩ་ཝེ་ཀྑ་ཎ་པ་རི་བྷོ་ག་ཝི་ར་ཧི་ཏཱ་ཏི ཨ་ཏྠོ.
༥༤༨. ཨཱ་ཝ་ར་ཎཱཏི་ཨཱ་དཱི་སུ ཨཱ་ཝ་ར་ནྟཱི་ཏི ཨཱ་ཝ་ར་ཎཱ. ནི་ཝཱ་རེ་ནྟཱི་ཏི ནཱི་ཝ་ར་ཎཱ. ཨོ་ན་ནྡྷ་ནྟཱི་ཏི ཨོ་ནཱ་ཧ་ནཱ. པ་རི་ཡོ་ན་ནྡྷ་ནྟཱི་ཏི པ་རི་ཡོ་ནཱ་ཧ་ནཱ. ཀཱ་མ་ཙྪ་ནྡཱ་དཱི་ནཾ ཝི་ཏྠཱ་ར་ཀ་ཐཱ ཝི་སུ་དྡྷི་མ་གྒ་ཏོ ག་ཧེ་ཏ་བྦཱ.
༥༤༩-༥༥༠. ཨཱ་ཝུ་ཏཱ ནི་ཝུ་ཏཱ ཨོ་ན་དྡྷཱ པ་རི་ཡོ་ན་དྡྷཱཏི པ་དཱ་ནི ཨཱ་ཝ་ར་ཎཱ་དཱི་ནཾ ཝ་སེ་ན ཝུ་ཏྟཱ་ནི. ས་པ་རི་གྒ་ཧོཏི ཨི་ཏྠི་པ་རི་གྒ་ཧེ་ན ས་པ་རི་གྒ་ཧོ་ཏི པུ་ཙྪ་ཏི. ཨ་པ་རི་གྒ་ཧོ བྷོ གོ་ཏ་མཱཏི་ཨཱ་དཱི་སུ་པི ཀཱ་མ་ཙྪ་ནྡ་སྶ ཨ་བྷཱ་ཝ་ཏོ ཨི་ཏྠི་པ་རི་གྒ་ཧེ་ན ཨ་པ་རི་གྒ་ཧོ. བྱཱ་པཱ་ད་སྶ ཨ་བྷཱ་ཝ་ཏོ ཀེ་ན་ཙི ས་དྡྷིཾ ཝེ་ར་ཙི་ཏྟེ་ན ཨ་ཝེ་རོ. ཐི་ན་མི་དྡྷ་སྶ ཨ་བྷཱ་ཝ་ཏོ ཙི་ཏྟ་གེ་ལ་ཉྙ་ས་ངྑཱ་ཏེ་ན བྱཱ་པ་ཛྫེ་ན ཨ་བྱཱ་པ་ཛྫོ. ཨུ་དྡྷ་ཙྩ་ཀུ་ཀྐུ་ཙྩཱ་བྷཱ་ཝ་ཏོ ཨུ་དྡྷ་ཙྩ་ཀུ་ཀྐུ་ཙྩཱ་དཱི་ཧི སཾ་ཀི་ལེ་སེ་ཧི ཨ་སཾ་ཀི་ལི་ཊྛ་ཙི་ཏྟོ སུ་པ་རི་སུ་དྡྷ་མཱ་ན་སོ. ཝི་ཙི་ཀི་ཙྪཱ་ཡ ཨ་བྷཱ་ཝ་ཏོ ཙི་ཏྟཾ ཝ་སེ ཝ་ཏྟེ་ཏི. ཡ་ཐཱ ཙ བྲཱ་ཧྨ་ཎཱ ཙི་ཏྟ་ག་ཏི་ཀཱ ཧོ་ནྟཱི་ཏི, ཙི་ཏྟ་སྶ ཝ་སེ་ན ཝ་ཏྟ་ནྟི, ན ཏཱ་དི་སོ་ཏི ཝ་ས་ཝ་ཏྟཱི.
༥༥༢. ཨི་དྷ ཁོ པ་ནཱཏི ཨི་དྷ བྲ་ཧྨ་ལོ་ཀ་མ་གྒེ. ཨཱ་སཱི་དི་ཏྭཱཏི ཨ་མ་གྒ་མེ་ཝ ‘‘མ་གྒོ’’ཏི ཨུ་པ་ག་ནྟྭཱ. སཾ་སཱི་ད་ནྟཱིཏི ‘‘ས་མ་ཏ་ལ’’ནྟི ས་ཉྙཱ་ཡ པ་ངྐཾ ཨོ་ཏི་ཎྞཱ ཝི་ཡ ཨ་ནུ་པྤ་ཝི་ས་ནྟི. སཾ་སཱི་དི་ཏྭཱ ཝི་སཱ་རཾ པཱ་པུ་ཎ་ནྟཱིཏི ཨེ་ཝཾ པ་ངྐེ ཝི་ཡ སཾ་སཱི་དི་ཏྭཱ ཝི་སཱ་རཾ ཨ་ངྒ་མ་ངྒ་སཾ་བྷ་ཉྫ་ནཾ པཱ་པུ་ཎ་ནྟི. སུ་ཀྑ་ཏ་རཾ མ་ཉྙེ ཏ་ར་ནྟཱིཏི མ་རཱི་ཙི་ཀཱ་ཡ ཝ་ཉྩེ་ཏྭཱ ‘‘ཀཱ་ཀ་པེ་ཡྻཱ ན་དཱི’’ཏི ས་ཉྙཱ་ཡ ‘‘ཏ་རི་སྶཱ་མཱ’’ཏི ཧ་ཏྠེ་ཧི ཙ པཱ་དེ་ཧི ཙ ཝཱ་ཡ་མ་མཱ་ནཱ སུ་ཀྑ་ཏ་ར་ཎཾ མ་ཉྙེ ཏ་ར་ནྟི. ཏ་སྨཱ ཡ་ཐཱ ཧ་ཏྠ་པཱ་དཱ་དཱི་ནཾ སཾ་བྷ་ཉྫ་ནཾ པ་རི་བྷ་ཉྫ་ནཾ, ཨེ་ཝཾ ཨ་པཱ་ཡེ་སུ སཾ་བྷ་ཉྫ་ནཾ པ་རི་བྷ་ཉྫ་ནཾ པཱ་པུ་ཎ་ནྟི. ཨི་དྷེ་ཝ ཙ སུ་ཁཾ ཝཱ སཱ་ཏཾ ཝཱ ན ལ་བྷ་ནྟི. ཏ་སྨཱ ཨི་དཾ ཏེ་ཝི་ཛྫཱ་ནཾ བྲཱ་ཧྨ་ཎཱ་ནནྟི ཏ་སྨཱ ཨི་དཾ བྲ་ཧྨ་ས་ཧ་བྱ་ཏཱ་ཡ མ་གྒ་དཱི་པ་ཀཾ ཏེ་ཝི་ཛྫ་ཀཾ པཱ་ཝ་ཙ་ནཾ ཏེ་ཝི་ཛྫཱ་ནཾ བྲཱ་ཧྨ་ཎཱ་ནཾ. ཏེ་ཝི་ཛྫཱ་ཨི་རི་ཎནྟི ཏེ་ཝི་ཛྫཱ་ཨ་ར་ཉྙཾ ཨི་རི་ཎནྟི ཧི ཨ་གཱ་མ་ཀཾ མ་ཧཱ་ཨ་ར་ཉྙཾ ཝུ་ཙྩ་ཏི. ཏེ་ཝི་ཛྫཱ་ཝི་ཝ་ནནྟི པུ་པྥ་ཕ་ལེ་ཧི ཨ་པ་རི་བྷོ་ག་རུ་ཀྑེ་ཧི ས་ཉྪ་ནྣཾ ནི་རུ་ད་ཀཾ ཨ་ར་ཉྙཾ. ཡ་ཏྠ མ་གྒ་ཏོ ཨུ་ཀྐ་མི་ཏྭཱ པ་རི་ཝ་ཏྟི་ཏུ་མྤི ན ས་ཀྐཱ ཧོ་ནྟི, ཏཾ ས་ནྡྷཱ་ཡཱ་ཧ ‘‘ཏེ་ཝི་ཛྫཱ་ཝི་ཝ་ན་ནྟི་པི ཝུ་ཙྩ་ཏཱི’’ཏི. ཏེ་ཝི་ཛྫཱ་བྱ་ས་ནནྟི ཏེ་ཝི་ཛྫཱ་ནཾ པ་ཉྩ་ཝི་དྷ་བྱ་ས་ན་ས་དི་ས་མེ་ཏཾ. ཡ་ཐཱ ཧི ཉཱ་ཏི་རོ་ག་བྷོ་ག དི་ཊྛི སཱི་ལ་བྱ་ས་ན་པྤ་ཏྟ་སྶ སུ་ཁཾ ནཱ་མ ན་ཏྠི, ཨེ་ཝཾ ཏེ་ཝི་ཛྫཱ་ནཾ ཏེ་ཝི་ཛྫ་ཀཾ པཱ་ཝ་ཙ་ནཾ ཨཱ་ག་མྨ སུ་ཁཾ ནཱ་མ ན་ཏྠཱི་ཏི ད་སྶེ་ཏི.
༥༥༤. ཛཱ་ཏ་སཾ་ཝ་ཌྜྷོཏི ཛཱ་ཏོ ཙ ཝ་ཌྜྷི་ཏོ ཙ, ཡོ ཧི ཀེ་ཝ་ལཾ ཏ་ཏྠ ཛཱ་ཏོ་ཝ ཧོ་ཏི, ཨ་ཉྙ་ཏྠ ཝ་ཌྜྷི་ཏོ, ཏ་སྶ ས་མ་ནྟཱ གཱ་མ་མ་གྒཱ ན ས་བྦ་སོ པ་ཙྩ་ཀྑཱ ཧོ་ནྟི, ཏ་སྨཱ ཛཱ་ཏ་སཾ་ཝ་ཌྜྷོ་ཏི ཨཱ་ཧ. ཛཱ་ཏ་སཾ་ཝ་ཌྜྷོ་པི ཡོ ཙི་ར་ནི་ཀྑ་ནྟོ, ཏ་སྶ ན ས་བྦ་སོ པ་ཙྩ་ཀྑཱ ཧོ་ནྟི. ཏ་སྨཱ ‘‘ཏཱ་ཝ་དེ་ཝ ཨ་ཝ་ས་ཊ’’ནྟི ཨཱ་ཧ, ཏ་ངྑ་ཎ་མེ་ཝ ནི་ཀྑ་ནྟ་ནྟི ཨ་ཏྠོ. ད་ནྡྷཱ་ཡི་ཏ་ཏྟནྟི ཨ་ཡཾ ནུ ཁོ མ་གྒོ, ཨ་ཡཾ ན ནུ་ཁོ་ཏི ཀ་ངྑཱ་ཝ་སེ་ན ཙི་རཱ་ཡི་ཏ་ཏྟཾ. ཝི་ཏྠཱ་ཡི་ཏ་ཏྟནྟི ཡ་ཐཱ སུ་ཁུ་མཾ ཨ་ཏྠ་ཛཱ་ཏཾ ས་ཧ་སཱ པུ་ཙྪི་ཏ་སྶ ཀ་སྶ་ཙི ས་རཱི་རཾ ཐ་དྡྷ་བྷཱ་ཝཾ ག་ཎྷཱ་ཏི, ཨེ་ཝཾ ཐ་དྡྷ་བྷཱ་ཝ་གྒ་ཧ་ཎཾ. ན ཏྭེ་ཝཱཏི ཨི་མི་ནཱ ས་བྦ་ཉྙུ་ཏ་ཉྙཱ་ཎ་སྶ ཨ་པྤ་ཊི་ཧ་ཏ་བྷཱ་ཝཾ ད་སྶེ་ཏི. ཏ་སྶ ཧི པུ་རི་ས་སྶ མཱ་རཱ་ཝ་ཊྚ་ནཱ་དི་ཝ་སེ་ན སི་ཡཱ ཉཱ་ཎ་སྶ པ་ཊི་གྷཱ་ཏོ. ཏེ་ན སོ ད་ནྡྷཱ་ཡེ་ཡྻ ཝཱ ཝི་ཏྠཱ་ཡེ་ཡྻ ཝཱ. ས་བྦ་ཉྙུ་ཏ་ཉྙཱ་ཎཾ པ་ན ཨ་པྤ་ཊི་ཧ་ཏཾ, ན ས་ཀྐཱ ཏ་སྶ ཀེ་ན་ཙི ཨ་ནྟ་རཱ་ཡོ ཀཱ་ཏུ་ནྟི དཱི་པེ་ཏི.
༥༥༥. ཨུ་ལླུ་མྤ་ཏུ བྷ་ཝཾ གོ་ཏ་མོཏི ཨུ་དྡྷ་ར་ཏུ བྷ་ཝཾ གོ་ཏ་མོ. བྲཱ་ཧྨ་ཎིཾ པ་ཛནྟི བྲཱ་ཧྨ་ཎ་དཱ་ར་ཀཾ, བྷ་ཝཾ གོ་ཏ་མོ མ་མ བྲཱ་ཧྨ་ཎ་པུ་ཏྟཾ ཨ་པཱ་ཡ་མ་གྒ་ཏོ ཨུ་དྡྷ་རི་ཏྭཱ བྲ་ཧྨ་ལོ་ཀ་མ་གྒེ པ་ཏི་ཊྛ་པེ་ཏཱུ་ཏི ཨ་ཏྠོ. ཨ་ཐ་སྶ བྷ་ག་ཝཱ བུ་དྡྷུ་པྤཱ་དཾ ད་སྶེ་ཏྭཱ ས་དྡྷིཾ པུ་བྦ་བྷཱ་ག་པ་ཊི་པ་དཱ་ཡ མེ་ཏྟཱ་ཝི་ཧཱ་རཱ་དི་བྲ་ཧྨ་ལོ་ཀ་གཱ་མི་མ་གྒཾ དེ་སེ་ཏུ་ཀཱ་མོ ‘‘ཏེ་ན ཧི ཝཱ་སེ་ཊྛཱ’’ཏི་ཨཱ་དི་མཱ་ཧ. ཏ་ཏྠ ‘‘ཨི་དྷ ཏ་ཐཱ་ག་ཏོ’’ཏི་ཨཱ་དི སཱ་མ་ཉྙ་ཕ་ལེ ཝི་ཏྠཱ་རི་ཏཾ. མེ་ཏྟཱ་ས་ཧ་ག་ཏེ་ནཱ་ཏི་ཨཱ་དཱི་སུ ཡཾ ཝ་ཏྟ་བྦཾ, ཏཾ ས་བྦཾ ཝི་སུ་དྡྷི་མ་གྒེ བྲ་ཧྨ་ཝི་ཧཱ་ར་ཀ་མྨ་ཊྛཱ་ན་ཀ་ཐཱ་ཡཾ ཝུ་ཏྟཾ. སེ་ཡྻ་ཐཱ་པི ཝཱ་སེ་ཊྛ བ་ལ་ཝཱ ས་ངྑ་དྷ་མོཏི་ཨཱ་དི པ་ན ཨི་དྷ ཨ་པུ་བྦཾ. ཏ་ཏྠ བ་ལ་ཝཱཏི བ་ལ་ས་མྤ་ནྣོ. ས་ངྑ་དྷ་མོཏི ས་ངྑ་དྷ་མ་ཀོ. ཨ་པྤ་ཀ་སི་རེ་ནཱཏི ཨ་ཀི་ཙྪེ་ན ཨ་དུ་ཀྑེ་ན. དུ་བྦ་ལོ ཧི ས་ངྑ་དྷ་མོ ས་ངྑཾ དྷ་མ་ནྟོ་པི ན ས་ཀྐོ་ཏི ཙ་ཏ་སྶོ དི་སཱ ས་རེ་ན ཝི་ཉྙཱ་པེ་ཏུཾ, ནཱ་སྶ ས་ངྑ་ས་དྡོ ས་བྦ་ཏོ ཕ་ར་ཏི. བ་ལ་ཝ་ཏོ པ་ན ཝི་པྥཱ་རི་ཀོ ཧོ་ཏི, ཏ་སྨཱ ‘‘བ་ལ་ཝཱ’’ཏི་ཨཱ་དི་མཱ་ཧ. མེ་ཏྟཱ་ཡ ཙེ་ཏོ་ཝི་མུ་ཏྟི་ཡཱཏི ཨེ་ཏྠ མེ་ཏྟཱ་ཏི ཝུ་ཏྟེ ཨུ་པ་ཙཱ་རོ་པི ཨ་པྤ་ནཱ་པི ཝ་ཊྚ་ཏི, ‘‘ཙེ་ཏྟོ་ཝི་མུ་ཏྟཱི’’ཏི ཝུ་ཏྟེ པ་ན ཨ་པྤ་ནཱ་ཝ ཝ་ཊྚ་ཏི. ཡཾ པ་མཱ་ཎ་ཀ་ཏཾ ཀ་མྨནྟི པ་མཱ་ཎ་ཀ་ཏཾ ཀ་མྨཾ ནཱ་མ ཀཱ་མཱ་ཝ་ཙ་རཾ ཝུ་ཙྩ་ཏི. ཨ་པྤ་མཱ་ཎ་ཀ་ཏཾ ཀ་མྨཾ ནཱ་མ རཱུ་པཱ་རཱུ་པཱ་ཝ་ཙ་རཾ. ཏ་ཉྷི པ་མཱ་ཎཾ ཨ་ཏི་ཀྐ་མི་ཏྭཱ ཨོ་དི་སྶ་ཀ་ཨ་ནོ་དི་སྶ་ཀ་དི་སཱ་ཕ་ར་ཎ་ཝ་སེ་ན ཝ་ཌྜྷེ་ཏྭཱ ཀ་ཏ་ཏྟཱ ཨ་པྤ་མཱ་ཎ་ཀ་ཏ་ནྟི ཝུ་ཙྩ་ཏི. ན ཏཾ ཏ་ཏྲཱ་ཝ་སི་སྶ་ཏི ན ཏཾ ཏ་ཏྲཱ་ཝ་ཏི་ཊྛ་ཏཱིཏི ཏཾ ཀཱ་མཱ་ཝ་ཙ་ར་ཀ་མྨཾ ཏ་སྨིཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཀ་མྨེ ན ཨོ་ཧཱི་ཡ་ཏི, ན ཏི་ཊྛ་ཏི. ཀིཾ ཝུ་ཏྟཾ ཧོ་ཏི – ཏཾ ཀཱ་མཱ་ཝ་ཙ་ར་ཀ་མྨཾ ཏ་སྶ རཱུ་པཱ་རཱུ་པཱ་ཝ་ཙ་ར་ཀ་མྨ་སྶ ཨ་ནྟ་རཱ ལ་གྒི་ཏུཾ ཝཱ ཋཱ་ཏུཾ ཝཱ རཱུ་པཱ་རཱུ་པཱ་ཝ་ཙ་ར་ཀ་མྨཾ ཕ་རི་ཏྭཱ པ་རི་ཡཱ་དི་ཡི་ཏྭཱ ཨ་ཏྟ་ནོ ཨོ་ཀཱ་སཾ ག་ཧེ་ཏྭཱ པ་ཏི་ཊྛཱ་ཏུཾ ན ས་ཀྐོ་ཏི. ཨ་ཐ ཁོ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཀ་མྨ་མེ་ཝ ཀཱ་མཱ་ཝ་ཙ་རཾ མ་ཧོ་གྷོ ཝི་ཡ པ་རི་ཏྟཾ ཨུ་ད་ཀཾ ཕ་རི་ཏྭཱ པ་རི་ཡཱ་དི་ཡི་ཏྭཱ ཨ་ཏྟ་ནོ ཨོ་ཀཱ་སཾ ག་ཧེ་ཏྭཱ ཏི་ཊྛ་ཏི. ཏ་སྶ ཝི་པཱ་ཀཾ པ་ཊི་བཱ་ཧི་ཏྭཱ ས་ཡ་མེ་ཝ བྲ་ཧྨ་ས་ཧ་བྱ་ཏཾ ཨུ་པ་ནེ་ཏཱི་ཏི. ཨེ་ཝཾ་ཝི་ཧཱ་རཱིཏི ཨེ་ཝཾ མེ་ཏྟཱ་དི་ཝི་ཧཱ་རཱི.
༥༥༩. ཨེ་ཏེ མ་ཡཾ བྷ་ཝ་ནྟཾ གོ་ཏ་མནྟི ཨི་དཾ ཏེ་སཾ དུ་ཏི་ཡཾ ས་ར་ཎ་ག་མ་ནཾ. པ་ཋ་མ་མེ་ཝ ཧེ་ཏེ མ་ཛ྄ཛྷི་མ་པ་ཎྞཱ་ས་ཀེ ཝཱ་སེ་ཊྛ་སུ་ཏྟཾ སུ་ཏྭཱ ས་ར་ཎཾ ག་ཏཱ, ཨི་མཾ པ་ན ཏེ་ཝི་ཛྫ་སུ་ཏྟཾ སུ་ཏྭཱ དུ་ཏི་ཡ་མྤི ས་ར་ཎཾ ག་ཏཱ. ཀ་ཏི་པཱ་ཧ་ཙྩ་ཡེ་ན པ་བྦ་ཛི་ཏྭཱ ཨ་གྒ་ཉྙ་སུ་ཏྟེ ཨུ་པ་ས་མྤ་ད་ཉྩེ་ཝ ཨ་ར་ཧ་ཏྟ་ཉྩ ཨ་ལ་ཏྠུཾ. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
ཨི་ཏི སུ་མ་ངྒ་ལ་ཝི་ལཱ་སི་ནི་ཡཱ དཱི་གྷ་ནི་ཀཱ་ཡ་ཊྛ་ཀ་ཐཱ་ཡཾ
ཏེ་ཝི་ཛྫ་སུ་ཏྟ་ཝ་ཎྞ་ནཱ ནི་ཊྛི་ཏཱ.