༡༡. ཀེ་ཝ་ཊྚ་སུ་ཏྟ་ཝ་ཎྞ་ནཱ
ཀེ་ཝ་ཊྚ་ག་ཧ་པ་ཏི་པུ་ཏྟ་ཝ་ཏྠུ་ཝ་ཎྞ་ནཱ
༤༨༡. ཨེ་ཝཾ མེ སུ་ཏཾ…པེ… ནཱ་ལ༹་ནྡཱ་ཡནྟི ཀེ་ཝ་ཊྚ་སུ་ཏྟཾ. ཏ་ཏྲཱ་ཡཾ ཨ་པུ་བྦ་པ་ད་ཝ་ཎྞ་ནཱ. པཱ་ཝཱ་རི་ཀ་མྦ་ཝ་ནེཏི པཱ་ཝཱ་རི་ཀ་སྶ ཨ་མྦ་ཝ་ནེ. ཀེ་ཝ་ཊྚོཏི ཨི་དཾ ཏ་སྶ ག་ཧ་པ་ཏི་པུ་ཏྟ་སྶ ནཱ་མཾ. སོ ཀི་ར ཙ་ཏྟཱ་ལཱི་ས་ཀོ་ཊི་དྷ་ནོ ག་ཧ་པ་ཏི་མ་ཧཱ་སཱ་ལོ ཨ་ཏི་ཝི་ཡ ས་དྡྷོ པ་ས་ནྣོ ཨ་ཧོ་སི. སོ ས་དྡྷཱ་དྷི་ཀ་ཏྟཱ་ཡེ་ཝ ‘‘ས་ཙེ ཨེ་ཀོ བྷི་ཀྑུ ཨ་ཌྜྷ་མཱ་ས་ནྟ་རེ་ན ཝཱ མཱ་ས་ནྟ་རེ་ན ཝཱ སཾ་ཝ་ཙྪ་རེ་ན ཝཱ ཨཱ་ཀཱ་སེ ཨུ་པྤ་ཏི་ཏྭཱ ཝི་ཝི་དྷཱ་ནི པཱ་ཊི་ཧཱ་རི་ཡཱ་ནི ད་སྶེ་ཡྻ, ས་བྦོ ཛ་ནོ ཨ་ཏི་ཝི་ཡ པ་སཱི་དེ་ཡྻ. ཡཾ་ནཱུ་ནཱ་ཧཾ བྷ་ག་ཝ་ནྟཾ ཡཱ་ཙི་ཏྭཱ པཱ་ཊི་ཧཱ་རི་ཡ་ཀ་ར་ཎ་ཏྠཱ་ཡ ཨེ་ཀཾ བྷི་ཀྑུཾ ཨ་ནུ་ཛཱ་ནཱ་པེ་ཡྻ’’ནྟི ཙི་ནྟེ་ཏྭཱ བྷ་ག་ཝ་ནྟཾ ཨུ་པ་ས་ངྐ་མི་ཏྭཱ ཨེ་ཝ་མཱ་ཧ.
ཏ་ཏྠ ཨི་དྡྷཱཏི ས་མི་དྡྷཱ ཕཱི་ཏཱཏི ནཱ་ནཱ་བྷ་ཎྜ་ཨུ་སྶ་ནྣ་ཏཱ་ཡ ཝུ་དྡྷི་པྤ་ཏྟཱ. ཨཱ་ཀི་ཎྞ་མ་ནུ་སྶཱཏི ཨཾ་ས་ཀཱུ་ཊེ་ན ཨཾ་ས་ཀཱུ་ཊཾ པ་ཧ་རི་ཏྭཱ ཝི་ཡ ཝི་ཙ་ར་ནྟེ་ཧི མ་ནུ་སྶེ་ཧི ཨཱ་ཀི་ཎྞཱ. ས་མཱ་དི་ས་ཏཱུཏི ཨཱ་ཎཱ་པེ་ཏུ ཋཱ་ན་ནྟ་རེ ཋ་པེ་ཏུ. ཨུ་ཏྟ་རི་མ་ནུ་སྶ་དྷ་མྨཱཏི ཨུ་ཏྟ་རི་མ་ནུ་སྶཱ་ནཾ དྷ་མྨ་ཏོ, ད་ས་ཀུ་ས་ལ་ས་ངྑཱ་ཏ་ཏོ ཝཱ མ་ནུ་སྶ་དྷ་མྨ་ཏོ ཨུ་ཏྟ་རི. བྷི་ཡྻོ་སོ་མ་ཏྟཱ་ཡཱཏི པ་ཀ་ཏི་ཡཱ་པི པ་ཛྫ་ལི་ཏ་པ་དཱི་པོ ཏེ་ལ་སྣེ་ཧཾ ལ་བྷི་ཏྭཱ ཝི་ཡ ཨ་ཏི་རེ་ཀ་པྤ་མཱ་ཎེ་ན ཨ་བྷི་པྤ་སཱི་དི་སྶ་ཏི. ན ཁོ ཨ་ཧནྟི བྷ་ག་ཝཱ རཱ་ཛ་ག་ཧ་སེ་ཊྛི་ཝ་ཏྠུ་སྨིཾ སི་ཀྑཱ་པ་དཾ པ་ཉྙ་པེ་སི, ཏ་སྨཱ ‘‘ན ཁོ ཨ་ཧ’’ནྟི་ཨཱ་དི་མཱ་ཧ.
༤༨༢. ན དྷཾ་སེ་མཱིཏི ན གུ་ཎ་ཝི་ནཱ་ས་ནེ་ན དྷཾ་སེ་མི, སཱི་ལ་བྷེ་དཾ པཱ་པེ་ཏྭཱ ཨ་ནུ་པུ་བྦེ་ན ཨུ་ཙྩ་ཊྛཱ་ན་ཏོ ཨོ་ཏཱ་རེ་ནྟོ ནཱི་ཙ་ཊྛཱ་ནེ ན ཋ་པེ་མི, ཨ་ཐ ཁོ ཨ་ཧཾ བུ་དྡྷ་སཱ་ས་ན་སྶ ཝུ་དྡྷིཾ པ་ཙྩཱ་སཱི་ས་ནྟོ ཀ་ཐེ་མཱི་ཏི ད་སྶེ་ཏི. ཏ་ཏི་ཡ་མྤི ཁོཏི ཡཱ་ཝ་ཏ་ཏི་ཡཾ བུ་དྡྷཱ་ནཾ ཀ་ཐཾ པ་ཊི་བཱ་ཧི་ཏྭཱ ཀ་ཐེ་ཏུཾ ཝི་ས་ཧ་ནྟོ ནཱ་མ ན་ཏྠི. ཨ་ཡཾ པ་ན བྷ་ག་ཝ་ཏཱ ས་དྡྷིཾ ཝི་སྶཱ་སི་ཀོ ཝི་སྶཱ་སཾ ཝ་ཌྜྷེ་ཏྭཱ ཝ་ལླ་བྷོ ཧུ་ཏྭཱ ཨ་ཏྠ་ཀཱ་མོ་སྨཱི་ཏི ཏི་ཀྑ་ཏྟུཾ ཀ་ཐེ་སི.
ཨི་དྡྷི་པཱ་ཊི་ཧཱ་རི་ཡ་ཝ་ཎྞ་ནཱ
༤༨༣-༤༨༤. ཨ་ཐ བྷ་ག་ཝཱ ཨ་ཡཾ ཨུ་པཱ་ས་ཀོ མ་ཡི པ་ཊི་བཱ་ཧ་ནྟེ་པི པུ་ན་པྤུ་ནཾ ཡཱ་ཙ་ཏི་ཡེ་ཝ. ‘‘ཧ་ནྡ་སྶ པཱ་ཊི་ཧཱ་རི་ཡ་ཀ་ར་ཎེ ཨཱ་དཱི་ན་ཝཾ ད་སྶེ་མཱི’’ཏི ཙི་ནྟེ་ཏྭཱ ‘‘ཏཱི་ཎི ཁོ’’ཏི་ཨཱ་དི་མཱ་ཧ. ཏ་ཏྠ ཨ་མཱ་ཧཾ བྷི་ཀྑུནྟི ཨ་མུཾ ཨ་ཧཾ བྷི་ཀྑུཾ. ག་ནྡྷཱ་རཱིཏི ག་ནྡྷཱ་རེ་ན ནཱ་མ ཨི་སི་ནཱ ཀ་ཏཱ, ག་ནྡྷཱ་ར་ར་ཊྛེ ཝཱ ཨུ་པྤ་ནྣཱ ཝི་ཛྫཱ. ཏ་ཏྠ ཀི་ར བ་ཧཱུ ཨི་ས་ཡོ ཝ་སིཾ་སུ, ཏེ་སུ ཨེ་ཀེ་ན ཀ་ཏཱ ཝི་ཛྫཱ་ཏི ཨ་དྷི་པྤཱ་ཡོ. ཨ་ཊྚཱི་ཡཱ་མཱིཏི ཨ་ཊྚོ པཱི་ལི༹་ཏོ ཝི་ཡ ཧོ་མི. ཧ་རཱ་ཡཱ་མཱིཏི ལ་ཛྫཱ་མི. ཛི་གུ་ཙྪཱ་མཱིཏི གཱུ་ཐཾ དི་སྭཱ ཝི་ཡ ཛི་གུ་ཙྪཾ ཨུ་པྤཱ་དེ་མི.
ཨཱ་དེ་ས་ནཱ་པཱ་ཊི་ཧཱ་རི་ཡ་ཝ་ཎྞ་ནཱ
༤༨༥. པ་ར་ས་ཏྟཱ་ནནྟི ཨ་ཉྙེ་སཾ ས་ཏྟཱ་ནཾ. དུ་ཏི་ཡཾ ཏ་སྶེ་ཝ ཝེ་ཝ་ཙ་ནཾ. ཨཱ་དི་ས་ཏཱིཏི ཀ་ཐེ་ཏི. ཙེ་ཏ་སི་ཀནྟི སོ་མ་ན་སྶ་དོ་མ་ན་སྶཾ ཨ་དྷི་པྤེ་ཏཾ. ཨེ་ཝ་མྤི ཏེ མ་ནོཏི ཨེ་ཝཾ ཏ་ཝ མ་ནོ སོ་མ་ན་སྶི་ཏོ ཝཱ དོ་མ་ན་སྶི་ཏོ ཝཱ ཀཱ་མ་ཝི་ཏ་ཀྐཱ་དི་ས་མྤ་ཡུ་ཏྟོ ཝཱ. དུ་ཏི་ཡཾ ཏ་སྶེ་ཝ ཝེ་ཝ་ཙ་ནཾ. ཨི་ཏི་པི ཏེ ཙི་ཏྟནྟི ཨི་ཏི ཏ་ཝ ཙི་ཏྟཾ, ཨི་ད་ཉྩི་ད་ཉྩ ཨ་ཏྠཾ ཙི་ནྟ་ཡ་མཱ་ནཾ པ་ཝ་ཏྟ་ཏཱི་ཏི ཨ་ཏྠོ. མ་ཎི་ཀཱ ནཱ་མ ཝི་ཛྫཱཏི ཙི་ནྟཱ་མ་ཎཱི་ཏི ཨེ་ཝཾ ལ་དྡྷ་ནཱ་མཱ ལོ་ཀེ ཨེ་ཀཱ ཝི་ཛྫཱ ཨ་ཏྠི. ཏཱ་ཡ པ་རེ་སཾ ཙི་ཏྟཾ ཛཱ་ནཱ་ཏཱི་ཏི དཱི་པེ་ཏི.
ཨ་ནུ་སཱ་ས་ནཱི་པཱ་ཊི་ཧཱ་རི་ཡ་ཝ་ཎྞ་ནཱ
༤༨༦. ཨེ་ཝཾ ཝི་ཏ་ཀྐེ་ཐཱཏི ནེ་ཀྑ་མྨ་ཝི་ཏ་ཀྐཱ་ད་ཡོ ཨེ་ཝཾ པ་ཝ་ཏྟེ་ནྟཱ ཝི་ཏ་ཀྐེ་ཐ. མཱ ཨེ་ཝཾ ཝི་ཏ་ཀྐ་ཡི་ཏྠཱཏི ཨེ་ཝཾ ཀཱ་མ་ཝི་ཏ་ཀྐཱ་ད་ཡོ པ་ཝ་ཏྟེ་ནྟཱ མཱ ཝི་ཏ་ཀྐ་ཡི་ཏྠ. ཨེ་ཝཾ མ་ན་སི ཀ་རོ་ཐཱཏི ཨེ་ཝཾ ཨ་ནི་ཙྩ་ས་ཉྙ་མེ་ཝ, དུ་ཀྑ་ས་ཉྙཱ་དཱི་སུ ཝཱ ཨ་ཉྙ་ཏ་རཾ མ་ན་སི ཀ་རོ་ཐ. མཱ ཨེ་ཝནྟི ‘‘ནི་ཙྩ’’ནྟི་ཨཱ་དི་ནཱ ན་ཡེ་ན མཱ མ་ན་སི ཀ་རི་ཏྠ. ཨི་ད་ནྟི ཨི་དཾ པ་ཉྩ་ཀཱ་མ་གུ་ཎི་ཀ་རཱ་གཾ པ་ཛ་ཧ་ཐ. ཨི་དཾ ཨུ་པ་ས་མྤ་ཛྫཱཏི ཨི་དཾ ཙ་ཏུ་མ་གྒ་ཕ་ལ་པྤ་བྷེ་དཾ ལོ་ཀུ་ཏྟ་ར་དྷ་མྨ་མེ་ཝ ཨུ་པ་ས་མྤ་ཛྫ པཱ་པུ་ཎི་ཏྭཱ ནི་པྥཱ་དེ་ཏྭཱ ཝི་ཧ་ར་ཐ. ཨི་ཏི བྷ་ག་ཝཱ ཨི་དྡྷི་ཝི་དྷཾ ཨི་དྡྷི་པཱ་ཊི་ཧཱ་རི་ཡནྟི ད་སྶེ་ཏི, པ་ར་སྶ ཙི་ཏྟཾ ཉ་ཏྭཱ ཀ་ཐ་ནཾ ཨཱ་དེ་ས་ནཱ་པཱ་ཊི་ཧཱ་རི་ཡནྟི. སཱ་ཝ་ཀཱ་ན་ཉྩ བུ་དྡྷཱ་ན་ཉྩ ས་ཏ་ཏཾ དྷ་མྨ་དེ་ས་ནཱ ཨ་ནུ་སཱ་ས་ནཱི་པཱ་ཊི་ཧཱ་རི་ཡ་ནྟི.
ཏ་ཏྠ ཨི་དྡྷི་པཱ་ཊི་ཧཱ་རི་ཡེ་ན ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ མ་ཧཱ་མོ་གྒ་ལླཱ་ན་སྶ ཨཱ་ཙི་ཎྞཾ, ཨཱ་དེ་ས་ནཱ་པཱ་ཊི་ཧཱ་རི་ཡེ་ན ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ དྷ་མྨ་སེ་ནཱ་པ་ཏི་སྶ. དེ་ཝ་ད་ཏྟེ སཾ་གྷཾ བྷི་ནྡི་ཏྭཱ པ་ཉྩ བྷི་ཀྑུ་ས་ཏཱ་ནི ག་ཧེ་ཏྭཱ ག་ཡཱ་སཱི་སེ བུ་དྡྷ་ལཱི་ལཱ༹་ཡ ཏེ་སཾ དྷ་མྨཾ དེ་ས་ནྟེ ཧི བྷ་ག་ཝ་ཏཱ པེ་སི་ཏེ་སུ དྭཱི་སུ ཨ་གྒ་སཱ་ཝ་ཀེ་སུ དྷ་མྨ་སེ་ནཱ་པ་ཏི ཏེ་སཾ ཙི་ཏྟཱ་ཙཱ་རཾ ཉ་ཏྭཱ དྷ་མྨཾ དེ་སེ་སི, ཐེ་ར་སྶ དྷ་མྨ་དེ་ས་ནཾ སུ་ཏྭཱ པ་ཉྩ་ས་ཏཱ བྷི་ཀྑཱུ སོ་ཏཱ་པ་ཏྟི་ཕ་ལེ པ་ཏི་ཊྛ་ཧིཾ་སུ. ཨ་ཐ ནེ་སཾ མ་ཧཱ་མོ་གྒ་ལླཱ་ནོ ཝི་ཀུ་བྦ་ནཾ ད་སྶེ་ཏྭཱ ད་སྶེ་ཏྭཱ དྷ་མྨཾ དེ་སེ་སི, ཏཾ སུ་ཏྭཱ ས་བྦེ ཨ་ར་ཧ་ཏྟ་ཕ་ལེ པ་ཏི་ཊྛ་ཧིཾ་སུ. ཨ་ཐ དྭེ་པི མ་ཧཱ་ནཱ་གཱ པ་ཉྩ བྷི་ཀྑུ་ས་ཏཱ་ནི ག་ཧེ་ཏྭཱ ཝེ་ཧཱ་སཾ ཨ་བྦྷུ་གྒ་ནྟྭཱ ཝེ་ལུ༹་ཝ་ན་མེ་ཝཱ་ག་མིཾ་སུ. ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ པ་ན བུ་དྡྷཱ་ནཾ ས་ཏ་ཏཾ དྷ་མྨ་དེ་ས་ནཱ, ཏེ་སུ ཨི་དྡྷི་པཱ་ཊི་ཧཱ་རི་ཡ་ཨཱ་དེ་ས་ནཱ་པཱ་ཊི་ཧཱ་རི་ཡཱ་ནི ས་ཨུ་པཱ་ར་མྦྷཱ་ནི ས་དོ་སཱ་ནི, ཨ་དྡྷཱ་ནཾ ན ཏི་ཊྛ་ནྟི, ཨ་དྡྷཱ་ནཾ ཨ་ཏི་ཊྛ་ན་ཏོ ན ནི་ཡྻ་ནྟི. ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ ཨ་ནུ་པཱ་ར་མྦྷཾ ནི་དྡོ་སཾ, ཨ་དྡྷཱ་ནཾ ཏི་ཊྛ་ཏི, ཨ་དྡྷཱ་ནཾ ཏི་ཊྛ་ན་ཏོ ནི་ཡྻཱ་ཏི. ཏ་སྨཱ བྷ་ག་ཝཱ ཨི་དྡྷི་པཱ་ཊི་ཧཱ་རི་ཡ་ཉྩ ཨཱ་དེ་ས་ནཱ་པཱ་ཊི་ཧཱ་རི་ཡ་ཉྩ ག་ར་ཧ་ཏི, ཨ་ནུ་སཱ་ས་ནཱི་པཱ་ཊི་ཧཱ་རི་ཡཾ་ཡེ་ཝ པ་སཾ་ས་ཏི.
བྷཱུ་ཏ་ནི་རོ་དྷེ་ས་ཀ་ཝ་ཏྠུ་ཝ་ཎྞ་ནཱ
༤༨༧. བྷཱུ་ཏ་པུ་བྦནྟི ཨི་དཾ ཀ་སྨཱ བྷ་ག་ཝ་ཏཱ ཨཱ་ར་དྡྷཾ. ཨི་དྡྷི་པཱ་ཊི་ཧཱ་རི་ཡ་ཨཱ་དེ་ས་ནཱ་པཱ་ཊི་ཧཱ་རི་ཡཱ་ནཾ ཨ་ནི་ཡྻཱ་ནི་ཀ་བྷཱ་ཝ་ད་སྶ་ན་ཏྠཾ, ཨ་ནུ་སཱ་ས་ནཱི་པཱ་ཊི་ཧཱ་རི་ཡ་སྶེ་ཝ ནི་ཡྻཱ་ནི་ཀ་བྷཱ་ཝ་ད་སྶ་ན་ཏྠཾ. ཨ་པི ཙ ས་བྦ་བུ་དྡྷཱ་ནཾ མ་ཧཱ་བྷཱུ་ཏ་པ་རི་ཡེ་ས་ཀོ ནཱ་མེ་ཀོ བྷི་ཀྑུ ཧོ་ཏི་ཡེ་ཝ. ཡོ མ་ཧཱ་བྷཱུ་ཏེ པ་རི་ཡེ་ས་ནྟོ ཡཱ་ཝ བྲ་ཧྨ་ལོ་ཀཱ ཝི་ཙ་རི་ཏྭཱ ཝི་སྶ་ཛྫེ་ཏཱ་རཾ ཨ་ལ་བྷི་ཏྭཱ ཨཱ་ག་མྨ བུ་དྡྷ་མེ་ཝ པུ་ཙྪི་ཏྭཱ ནི་ཀྐ་ངྑོ ཧོ་ཏི. ཏ་སྨཱ བུ་དྡྷཱ་ནཾ མ་ཧ་ནྟ་བྷཱ་ཝ་པྤ་ཀཱ་ས་ན་ཏྠཾ, ཨི་ད་ཉྩ ཀཱ་ར་ཎཾ པ་ཊི་ཙྪ་ནྣཾ, ཨ་ཐ ནཾ ཝི་ཝ་ཊཾ ཀ་ཏྭཱ དེ་སེ་ནྟོ་པི བྷ་ག་ཝཱ ‘‘བྷཱུ་ཏ་པུ་བྦ’’ནྟི་ཨཱ་དི་མཱ་ཧ.
ཏ་ཏྠ ཀ་ཏྠ ནུ ཁོཏི ཀི་སྨིཾ ཋཱ་ནེ ཀིཾ ཨཱ་ག་མྨ ཀིཾ པ་ཏྟ་སྶ ཏེ ཨ་ན་ཝ་སེ་སཱ ཨ་པྤ་ཝ་ཏྟི་ཝ་སེ་ན ནི་རུ་ཛ྄ཛྷ་ནྟི. མ་ཧཱ་བྷཱུ་ཏ་ཀ་ཐཱ པ་ནེ་སཱ ས་བྦཱ་ཀཱ་རེ་ན ཝི་སུ་དྡྷི་མ་གྒེ ཝུ་ཏྟཱ, ཏ་སྨཱ སཱ ཏ་ཏོ་ཝ ག་ཧེ་ཏ་བྦཱ.
༤༨༨. དེ་ཝ་ཡཱ་ནི་ཡོ མ་གྒོཏི པཱ་ཊི་ཡེ་ཀྐོ དེ་ཝ་ལོ་ཀ་ག་མ་ན་མ་གྒོ ནཱ་མ ན་ཏྠི, ཨི་དྡྷི་ཝི་དྷ་ཉཱ་ཎ་སྶེ་ཝ པ་ནེ་ཏཾ ཨ་དྷི་ཝ་ཙ་ནཾ. ཏེ་ན ཧེ་ས ཡཱ་ཝ བྲ་ཧྨ་ལོ་ཀཱ་པི ཀཱ་ཡེ་ན ཝ་སཾ ཝ་ཏྟེ་ནྟོ དེ་ཝ་ལོ་ཀཾ ཡཱ་ཏི. ཏ་སྨཱ ‘‘ཏཾ དེ་ཝ་ཡཱ་ནི་ཡོ མ་གྒོ’’ཏི ཝུ་ཏྟཾ. ཡེ་ན ཙཱ་ཏུ་མ་ཧཱ་རཱ་ཛི་ཀཱཏི ས་མཱི་པེ ཋི་ཏ་མྤི བྷ་ག་ཝ་ནྟཾ ཨ་པུ་ཙྪི་ཏྭཱ དྷ་མྨ་ཏཱ་ཡ ཙོ་དི་ཏོ དེ་ཝ་ཏཱ མ་ཧཱ་ནུ་བྷཱ་ཝཱ་ཏི མ་ཉྙ་མཱ་ནོ ཨུ་པ་ས་ངྐ་མི. མ་ཡ་མྤི ཁོ, བྷི་ཀྑུ, ན ཛཱ་ནཱ་མཱཏི བུ་དྡྷ་ཝི་ས་ཡེ པ་ཉྷཾ པུ་ཙྪི་ཏཱ དེ་ཝ་ཏཱ ན ཛཱ་ན་ནྟི, ཏེ་ནེ་ཝ་མཱ་ཧཾ་སུ. ཨ་ཐ ཁོ སོ བྷི་ཀྑུ ‘‘མ་མ ཨི་མཾ པ་ཉྷཾ ན ཀ་ཐེ་ཏུཾ ན ལ་བྦྷཱ, སཱི་གྷཾ ཀ་ཐེ་ཐཱ’’ཏི ཏཱ དེ་ཝ་ཏཱ ཨ་ཛ྄ཛྷོ་ཏྠ་ར་ཏི, པུ་ན་པྤུ་ནཾ པུ་ཙྪ་ཏི, ཏཱ ‘‘ཨ་ཛ྄ཛྷོ་ཏྠ་ར་ཏི ནོ ཨ་ཡཾ བྷི་ཀྑུ, ཧ་ནྡ ནཾ ཧ་ཏྠ་ཏོ མོ་ཙེ་སྶཱ་མཱ’’ཏི ཙི་ནྟེ་ཏྭཱ ‘‘ཨ་ཏྠི ཁོ བྷི་ཀྑུ ཙ་ཏྟཱ་རོ མ་ཧཱ་རཱ་ཛཱ་ནོ’’ཏི་ཨཱ་དི་མཱ་ཧཾ་སུ. ཏ་ཏྠ ཨ་བྷི་ཀྐ་ནྟ་ཏ་རཱཏི ཨ་ཏི་ཀྐ་མྨ ཀ་ནྟ་ཏ་རཱ. པ་ཎཱི་ཏ་ཏ་རཱཏི ཝ་ཎྞ་ཡ་ས་ཨི་སྶ་རི་ཡཱ་དཱི་ཧི ཨུ་ཏྟ་མ་ཏ་རཱ ཨེ་ཏེ་ན ན་ཡེ་ན ས་བྦ་ཝཱ་རེ་སུ ཨ་ཏྠོ ཝེ་དི་ཏ་བྦོ.
༤༩༡-༤༩༣. ཨ་ཡཾ པ་ན ཝི་སེ་སོ – ས་ཀྐོ ཀི་ར དེ་ཝ་རཱ་ཛཱ ཙི་ནྟེ་སི ‘‘ཨ་ཡཾ པ་ཉྷོ བུ་དྡྷ་ཝི་ས་ཡོ, ན ས་ཀྐཱ ཨ་ཉྙེ་ན ཝི་སྶ་ཛྫི་ཏུཾ, ཨ་ཡ་ཉྩ བྷི་ཀྑུ ཨ་གྒིཾ པ་ཧཱ་ཡ ཁ་ཛྫོ་པ་ན་ཀཾ དྷ་མ་ནྟོ ཝི་ཡ, བྷེ་རིཾ པ་ཧཱ་ཡ ཨུ་ད་རཾ ཝཱ་དེ་ནྟོ ཝི་ཡ ཙ, ལོ་ཀེ ཨ་གྒ་པུ་གྒ་ལཾ ས་མྨཱ་ས་མྦུ་དྡྷཾ པ་ཧཱ་ཡ དེ་ཝ་ཏཱ པུ་ཙྪ་ནྟོ ཝི་ཙ་ར་ཏི, པེ་སེ་མི ནཾ ས་ཏྠུ་ས་ནྟི་ཀ’’ནྟི. ཏ་ཏོ པུ་ན་དེ་ཝ སོ ཙི་ནྟེ་སི ‘‘སུ་དཱུ་ར་མྤི ག་ནྟྭཱ ས་ཏྠུ ས་ནྟི་ཀེ་ཝ ནི་ཀྐ་ངྑོ བྷ་ཝི་སྶ་ཏི. ཨ་ཏྠི ཙེ་ཝ པུ་གྒ་ལོ ནཱ་མེ་ས, ཐོ་ཀཾ ཏཱ་ཝ ཨཱ་ཧི་ཎྜ་ནྟོ ཀི་ལ་མ་ཏུ པ་ཙྪཱ ཛཱ་ནི་སྶ་ཏཱི’’ཏི. ཏ་ཏོ ཏཾ ‘‘ཨ་ཧ་མྤི ཁོ’’ཏི་ཨཱ་དི་མཱ་ཧ. བྲ་ཧྨ་ཡཱ་ནི་ཡོ་པི དེ་ཝ་ཡཱ་ནི་ཡ་ས་དི་སོ་ཝ. དེ་ཝ་ཡཱ་ནི་ཡ་མ་གྒོ་ཏི ཝཱ བྲ་ཧྨ་ཡཱ་ནི་ཡ་མ་གྒོ་ཏི ཝཱ དྷ་མྨ་སེ་ཏཱུ་ཏི ཝཱ ཨེ་ཀ་ཙི་ཏྟ་ཀྑ་ཎི་ཀ་ཨ་པྤ་ནཱ་ཏི ཝཱ ས་ནྣི་ཊྛཱ་ནི་ཀ་ཙེ་ཏ་ནཱ་ཏི ཝཱ མ་ཧ་གྒ་ཏ་ཙི་ཏྟ་ནྟི ཝཱ ཨ་བྷི་ཉྙཱ་ཉཱ་ཎ་ནྟི ཝཱ ས་བྦ་མེ་ཏཾ ཨི་དྡྷི་ཝི་དྷ་ཉཱ་ཎ་སྶེ་ཝ ནཱ་མཾ.
༤༩༤. པུ་བྦ་ནི་མི་ཏྟནྟི ཨཱ་ག་མ་ན་པུ་བྦ་བྷཱ་གེ ནི་མི་ཏྟཾ སཱུ་རི་ཡ་སྶ ཨུ་ད་ཡ་ཏོ ཨ་རུ་ཎུ་གྒཾ ཝི་ཡ. ཏ་སྨཱ ཨི་དཱ་ནེ་ཝ བྲ་ཧྨཱ ཨཱ་ག་མི་སྶ་ཏི, ཨེ་ཝཾ མ་ཡཾ ཛཱ་ནཱ་མཱ་ཏི དཱི་པ་ཡིཾ་སུ. པཱ་ཏུ་ར་ཧོ་སཱིཏི པཱ་ཀ་ཊོ ཨ་ཧོ་སི. ཨ་ཐ ཁོ སོ བྲ་ཧྨཱ ཏེ་ན བྷི་ཀྑུ་ནཱ པུ་ཊྛོ ཨ་ཏྟ་ནོ ཨ་ཝི་ས་ཡ་བྷཱ་ཝཾ ཉ་ཏྭཱ ས་ཙཱ་ཧཾ ‘‘ན ཛཱ་ནཱ་མཱི’’ཏི ཝ་ཀྑཱ་མི, ཨི་མེ མཾ པ་རི་བྷ་ཝི་སྶ་ནྟི, ཨ་ཐ ཛཱ་ན་ནྟོ ཝི་ཡ ཡཾ ཀི་ཉྩི ཀ་ཐེ་སྶཱ་མི, ཨ་ཡཾ མེ བྷི་ཀྑུ ཝེ་ཡྻཱ་ཀ་ར་ཎེ་ན ཨ་ནཱ་ར་དྡྷ་ཙི་ཏྟོ ཝཱ་དཾ ཨཱ་རོ་པེ་སྶ་ཏི. ‘‘ཨ་ཧ་མ་སྨི བྷི་ཀྑུ བྲ་ཧྨཱ’’ཏི་ཨཱ་དཱི་ནི པ་ན མེ བྷ་ཎ་ནྟ་སྶ ན ཀོ་ཙི ཝ་ཙ་ནཾ ས་དྡ་ཧི་སྶ་ཏི. ཡཾ་ནཱུ་ནཱ་ཧཾ ཝི་ཀྑེ་པཾ ཀ་ཏྭཱ ཨི་མཾ བྷི་ཀྑུཾ ས་ཏྠུ་ས་ནྟི་ཀཾ་ཡེ་ཝ པེ་སེ་ཡྻ་ནྟི ཙི་ནྟེ་ཏྭཱ ‘‘ཨ་ཧ་མ་སྨི བྷི་ཀྑུ བྲ་ཧྨཱ’’ཏི་ཨཱ་དི་མཱ་ཧ.
༤༩༥-༤༩༦. ཨེ་ཀ་མ་ནྟཾ ཨ་པ་ནེ་ཏྭཱཏི ཀ་སྨཱ ཨེ་ཝ་མ་ཀཱ་སི? ཀུ་ཧ་ཀ་ཏྟཱ. བ་ཧི་དྡྷཱ པ་རི་ཡེ་ཊྛིནྟི ཏེ་ལ་ཏྠི་ཀོ ཝཱ་ལི་ཀཾ ནི་པྤཱི་ལི༹་ཡ་མཱ་ནོ ཝི་ཡ ཡཱ་ཝ བྲ་ཧྨ་ལོ་ཀཱ བ་ཧི་དྡྷཱ པ་རི་ཡེ་ས་ནཾ ཨཱ་པ་ཛྫ་ཏི.
༤༩༧. ས་ཀུ་ཎནྟི ཀཱ་ཀཾ ཝཱ ཀུ་ལ་ལཾ ཝཱ. ན ཁོ ཨེ་སོ, བྷི་ཀྑུ, པ་ཉྷོ ཨེ་ཝཾ པུ་ཙྪི་ཏ་བྦོཏི ཨི་དཾ བྷ་ག་ཝཱ ཡ་སྨཱ པ་དེ་སེ་ནེ་ས པ་ཉྷོ པུ་ཙྪི་ཏ་བྦོ, ཨ་ཡ་ཉྩ ཁོ བྷི་ཀྑུ ཨ་ནུ་པཱ་དི་ནྣ་ཀེ་པི ག་ཧེ་ཏྭཱ ནི་པྤ་དེ་ས་ཏོ པུ་ཙྪ་ཏི, ཏ་སྨཱ པ་ཊི་སེ་དྷེ་ཏི. ཨཱ་ཙི་ཎྞཾ ཀི་རེ་ཏཾ བུ་དྡྷཱ་ནཾ, པུ་ཙྪཱ་མཱུ་ལ༹ྷ་སྶ ཛ་ན་སྶ པུ་ཙྪཱ་ཡ དོ་སཾ ད་སྶེ་ཏྭཱ པུ་ཙྪཾ སི་ཀྑཱ་པེ་ཏྭཱ པུ་ཙྪཱ་ཝི་སྶ་ཛྫ་ནཾ. ཀ་སྨཱ? པུ་ཙྪི་ཏུཾ ཨ་ཛཱ་ནི་ཏྭཱ པ་རི་པུ་ཙྪ་ནྟོ དུ་ཝི་ཉྙཱ་པ་ཡོ ཧོ་ཏི. པ་ཉྷཾ སི་ཀྑཱ་པེ་ནྟོ པ་ན ‘‘ཀ་ཏྠ ཨཱ་པོ ཙཱ’’ཏི་ཨཱ་དི་མཱ་ཧ.
༤༩༨. ཏ་ཏྠ ན གཱ་དྷ་ཏཱིཏི ན པ་ཏི་ཊྛཱ་ཏི, ཨི་མེ ཙ་ཏྟཱ་རོ མ་ཧཱ་བྷཱུ་ཏཱ ཀིཾ ཨཱ་ག་མྨ ཨ་པྤ་ཏི་ཊྛཱ བྷ་ཝ་ནྟཱི་ཏི ཨ་ཏྠོ. ཨུ་པཱ་དི་ནྣཾ་ཡེ་ཝ ས་ནྡྷཱ་ཡ པུ་ཙྪ་ཏི. དཱི་གྷ་ཉྩ ར་སྶ་ཉྩཱཏི ས་ཎྛཱ་ན་ཝ་སེ་ན ཨུ་པཱ་དཱ་རཱུ་པཾ ཝུ་ཏྟཾ. ཨ་ཎུཾ ཐཱུ་ལནྟི ཁུ་དྡ་ཀཾ ཝཱ མ་ཧ་ནྟཾ ཝཱ, ཨི་མི་ནཱ་པི ཨུ་པཱ་དཱ་རཱུ་པེ ཝ་ཎྞ་མ་ཏྟ་མེ་ཝ ཀ་ཐི་ཏཾ. སུ་བྷཱ་སུ་བྷནྟི སུ་བྷ་ཉྩ ཨ་སུ་བྷ་ཉྩ ཨུ་པཱ་དཱ་རཱུ་པ་མེ་ཝ ཀ་ཐི་ཏཾ. ཀིཾ པ་ན ཨུ་པཱ་དཱ་རཱུ་པཾ སུ་བྷ་ནྟི ཨ་སུ་བྷ་ནྟི ཨ་ཏྠི? ན་ཏྠི. ཨི་ཊྛཱ་ནི་ཊྛཱ་ར་མྨ་ཎཾ པ་ནེ་ཝ ཀ་ཐི་ཏཾ. ནཱ་མ་ཉྩ རཱུ་པ་ཉྩཱཏི ནཱ་མ་ཉྩ དཱི་གྷཱ་དི་བྷེ་དཾ རཱུ་པ་ཉྩ. ཨུ་པ་རུ་ཛ྄ཛྷ་ཏཱིཏི ནི་རུ་ཛ྄ཛྷ་ཏི, ཀིཾ ཨཱ་ག་མྨ ཨ་སེ་ས་མེ་ཏཾ ན་པྤ་ཝ་ཏྟ་ཏཱི་ཏི.
ཨེ་ཝཾ པུ་ཙྪི་ཏ་བྦཾ སི་ཡཱ་ཏི པུ་ཙྪཾ ད་སྶེ་ཏྭཱ ཨི་དཱ་ནི ཝི་སྶ་ཛྫ་ནཾ ད་སྶེ་ནྟོ ཏ་ཏྲ ཝེ་ཡྻཱ་ཀ་ར་ཎཾ བྷ་ཝ་ཏཱི་ཏི ཝ་ཏྭཱ – ‘‘ཝི་ཉྙཱ་ཎ’’ནྟི་ཨཱ་དི་མཱ་ཧ.
༤༩༩. ཏ་ཏྠ ཝི་ཉྙཱ་ཏ་བྦ་ནྟི ཝི་ཉྙཱ་ཎཾ ནི་བྦཱ་ན་སྶེ་ཏཾ ནཱ་མཾ, ཏ་དེ་ཏཾ ནི་ད་སྶ་ནཱ་བྷཱ་ཝ་ཏོ ཨ་ནི་ད་སྶ་ནཾ. ཨུ་པྤཱ་ད་ནྟོ ཝཱ ཝ་ཡ་ནྟོ ཝཱ ཋི་ཏ་སྶ ཨ་ཉྙ་ཐ་ཏྟ་ནྟོ ཝཱ ཨེ་ཏ་སྶ ན་ཏྠཱི་ཏི ཨ་ན་ནྟཾ. པ་བྷནྟི པ་ནེ་ཏཾ ཀི་ར ཏི་ཏྠ་སྶ ནཱ་མཾ, ཏ་ཉྷི པ་པ་ནྟི ཨེ་ཏྠཱ་ཏི པ་པཾ, པ་ཀཱ་ར་སྶ པ་ན བྷ་ཀཱ་རོ ཀ་ཏོ. ས་བྦ་ཏོ པ་བྷ་མ་སྶཱ་ཏི ས་བྦ་ཏོ་པ་བྷཾ. ནི་བྦཱ་ན་སྶ ཀི་ར ཡ་ཐཱ མ་ཧཱ་ས་མུ་དྡ་སྶ ཡ་ཏོ ཡ་ཏོ ཨོ་ཏ་རི་ཏུ་ཀཱ་མཱ ཧོ་ནྟི, ཏཾ ཏ་དེ་ཝ ཏི་ཏྠཾ, ཨ་ཏི་ཏྠཾ ནཱ་མ ན་ཏྠི. ཨེ་ཝ་མེ་ཝ ཨ་ཊྛ་ཏིཾ་སཱ་ཡ ཀ་མྨ་ཊྛཱ་ནེ་སུ ཡེ་ན ཡེ་ན མུ་ཁེ་ན ནི་བྦཱ་ནཾ ཨོ་ཏ་རི་ཏུ་ཀཱ་མཱ ཧོ་ནྟི, ཏཾ ཏ་དེ་ཝ ཏི་ཏྠཾ, ནི་བྦཱ་ན་སྶ ཨ་ཏི་ཏྠཾ ནཱ་མ ན་ཏྠི. ཏེ་ན ཝུ་ཏྟཾ ‘‘ས་བྦ་ཏོ་པ་བྷ’’ནྟི. ཨེ་ཏྠ ཨཱ་པོ ཙཱཏི ཨེ་ཏྠ ནི་བྦཱ་ནེ ཨི་དཾ ནི་བྦཱ་ནཾ ཨཱ་ག་མྨ ས་བྦ་མེ་ཏཾ ཨཱ་པོ་ཏི་ཨཱ་དི་ནཱ ན་ཡེ་ན ཝུ་ཏྟཾ ཨུ་པཱ་དི་ནྣ་ཀ དྷ་མྨ་ཛཱ་ཏཾ ནི་རུ་ཛ྄ཛྷ་ཏི, ཨ་པྤ་ཝ་ཏྟཾ ཧོ་ཏཱི་ཏི.
ཨི་དཱ་ནི་སྶ ནི་རུ་ཛ྄ཛྷ་ནཱུ་པཱ་ཡཾ ད་སྶེ་ནྟོ ‘‘ཝི་ཉྙཱ་ཎ་སྶ ནི་རོ་དྷེ་ན ཨེ་ཏྠེ་ཏཾ ཨུ་པ་རུ་ཛ྄ཛྷ་ཏཱི’’ཏི ཨཱ་ཧ. ཏ་ཏྠ ཝི་ཉྙཱ་ཎནྟི ཙ་རི་མ་ཀ་ཝི་ཉྙཱ་ཎ་མྤི ཨ་བྷི་ས་ངྑཱ་ར་ཝི་ཉྙཱ་ཎ་མྤི, ཙ་རི་མ་ཀ་ཝི་ཉྙཱ་ཎ་སྶཱ་པི ཧི ནི་རོ་དྷེ་ན ཨེ་ཏྠེ་ཏཾ ཨུ་པ་རུ་ཛ྄ཛྷ་ཏི. ཝི་ཛ྄ཛྷཱ་ཏ་དཱི་པ་སི་ཁཱ ཝི་ཡ ཨ་པ་ཎྞ་ཏྟི་ཀ་བྷཱ་ཝཾ ཡཱ་ཏི. ཨ་བྷི་ས་ངྑཱ་ར་ཝི་ཉྙཱ་ཎ་སྶཱ་པི ཨ་ནུ་པྤཱ་ད་ནི་རོ་དྷེ་ན ཨ་ནུ་པྤཱ་ད་ཝ་སེ་ན ཨུ་པ་རུ་ཛ྄ཛྷ་ཏི. ཡ་ཐཱ་ཧ ‘‘སོ་ཏཱ་པ་ཏྟི་མ་གྒ་ཉཱ་ཎེ་ན ཨ་བྷི་ས་ངྑཱ་ར་ཝི་ཉྙཱ་ཎ་སྶ ནི་རོ་དྷེ་ན ཋ་པེ་ཏྭཱ ས་ཏྟ་བྷ་ཝེ ཨ་ན་མ་ཏ་གྒེ སཾ་སཱ་རེ ཡེ ཨུ་པྤ་ཛྫེ་ཡྻུཾ ནཱ་མ་ཉྩ རཱུ་པ་ཉྩ ཨེ་ཏྠེ་ཏེ ནི་རུ་ཛ྄ཛྷ་ནྟཱི’’ཏི ས་བྦཾ ཙཱུ་ལ༹་ནི་དྡེ་སེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
ཨི་ཏི སུ་མ་ངྒ་ལ་ཝི་ལཱ་སི་ནི་ཡཱ དཱི་གྷ་ནི་ཀཱ་ཡ་ཊྛ་ཀ་ཐཱ་ཡཾ
ཀེ་ཝ་ཊྚ་སུ་ཏྟ་ཝ་ཎྞ་ནཱ ནི་ཊྛི་ཏཱ.