༡༠. སུ་བྷ་སུ་ཏྟ་ཝ་ཎྞ་ནཱ
སུ་བྷ་མཱ་ཎ་ཝ་ཀ་ཝ་ཏྠུ་ཝ་ཎྞ་ནཱ
༤༤༤. ཨེ་ཝཾ མེ སུ་ཏཾ…པེ… སཱ་ཝ་ཏྠི་ཡནྟི སུ་བྷ་སུ་ཏྟཾ. ཏ་ཏྲཱ་ཡཾ ཨ་ནུ་ཏྟཱ་ན་པ་ད་ཝ་ཎྞ་ནཱ. ཨ་ཙི་ར་པ་རི་ནི་བྦུ་ཏེ བྷ་ག་ཝ་ཏཱིཏི ཨ་ཙི་རཾ པ་རི་ནི་བྦུ་ཏེ བྷ་ག་ཝ་ཏི, པ་རི་ནི་བྦཱ་ན་ཏོ ཨུ་དྡྷཾ མཱ་ས་མ་ཏྟེ ཀཱ་ལེ. ནི་དཱ་ན་ཝ་ཎྞ་ནཱ་ཡཾ ཝུ་ཏྟ་ན་ཡེ་ནེ་ཝ བྷ་ག་ཝ་ཏོ པ་ཏྟ་ཙཱི་ཝ་རཾ ཨཱ་དཱ་ཡ ཨཱ་ག་ནྟྭཱ ཁཱི་ར་ཝི་རེ་ཙ་ནཾ པི་ཝི་ཏྭཱ ཝི་ཧཱ་རེ ནི་སི་ནྣ་དི་ཝ་སཾ ས་ནྡྷཱ་ཡེ་ཏཾ ཝུ་ཏྟཾ. ཏོ་དེ་ཡྻ་པུ་ཏྟོཏི ཏོ་དེ་ཡྻ་བྲཱ་ཧྨ་ཎ་སྶ པུ་ཏྟོ, སོ ཀི་ར སཱ་ཝ་ཏྠི་ཡཱ ཨ་ཝི་དཱུ་རེ ཏུ་དི་གཱ་མོ ནཱ་མ ཨ་ཏྠི, ཏ་སྶ ཨ་དྷི་པ་ཏི་ཏྟཱ ཏོ་དེ་ཡྻོ་ཏི ས་ངྑྱཾ ག་ཏོ. མ་ཧ་དྡྷ་ནོ པ་ན ཧོ་ཏི པ་ཉྩ་ཙ་ཏྟཱ་ལཱི་ས་ཀོ་ཊི་ཝི་བྷ་ཝོ, པ་ར་མ་མ་ཙྪ་རཱི – ‘‘ད་ད་ཏོ བྷོ་གཱ་ནཾ ཨ་པ་རི་ཀྑ་ཡོ ནཱ་མ ན་ཏྠཱི’’ཏི ཙི་ནྟེ་ཏྭཱ ཀ་སྶ་ཙི ཀི་ཉྩི ན དེ་ཏི, པུ་ཏྟ་མྤི ཨཱ་ཧ –
‘‘ཨ་ཉྫ་ནཱ་ནཾ ཁ་ཡཾ དི་སྭཱ, ཝ་མྨི་ཀཱ་ན་ཉྩ ས་ཉྩ་ཡཾ;
མ་དྷཱུ་ན་ཉྩ ས་མཱ་ཧཱ་རཾ, པ་ཎྜི་ཏོ གྷ་ར་མཱ་ཝ་སེ’’ཏི.
ཨེ་ཝཾ ཨ་དཱ་ན་མེ་ཝ སི་ཀྑཱ་པེ་ཏྭཱ ཀཱ་ཡ་སྶ བྷེ་དཱ ཏ་སྨིཾ་ཡེ་ཝ གྷ་རེ སུ་ན་ཁོ ཧུ་ཏྭཱ ནི་བྦ་ཏྟོ. སུ་བྷོ ཏཾ སུ་ན་ཁཾ ཨ་ཏི་ཝི་ཡ པི་ཡཱ་ཡ་ཏི. ཨ་ཏྟ་ནོ བྷུ་ཉྫ་ན་ཀ་བྷ་ཏྟཾ་ཡེ་ཝ བྷོ་ཛེ་ཏི, ཨུ་ཀྑི་པི་ཏྭཱ ཝ་ར་ས་ཡ་ནེ ས་ཡཱ་པེ་ཏི. ཨ་ཐ བྷ་ག་ཝཱ ཨེ་ཀ་དི་ཝ་སཾ ནི་ཀྑ་ནྟེ མཱ་ཎ་ཝེ ཏཾ གྷ་རཾ པི་ཎྜཱ་ཡ པཱ་ཝི་སི. སུ་ན་ཁོ བྷ་ག་ཝ་ནྟཾ དི་སྭཱ བྷུ་ཀྐཱ་རཾ ཀ་རོ་ནྟོ བྷ་ག་ཝ་ཏོ ས་མཱི་པཾ ག་ཏོ. ཏ་ཏོ ནཾ བྷ་ག་ཝཱ ཨ་ཝོ་ཙ ‘‘ཏོ་དེ་ཡྻ ཏྭཾ པུ་བྦེ་པི མཾ ‘བྷོ, བྷོ’ཏི པ་རི་བྷ་ཝི་ཏྭཱ སུ་ན་ཁོ ཛཱ་ཏོ, ཨི་དཱ་ནི་པི བྷུ་ཀྐཱ་རཾ ཀ་ཏྭཱ ཨ་ཝཱི་ཙིཾ ག་མི་སྶ་སཱི’’ཏི. སུ་ན་ཁོ ཏཾ ཀ་ཐཾ སུ་ཏྭཱ ཝི་པྤ་ཊི་སཱ་རཱི ཧུ་ཏྭཱ ཨུ་དྡྷ་ན་ནྟ་རེ ཚཱ་རི་ཀཱ་ཡ ནི་པ་ནྣོ, མ་ནུ་སྶཱ ནཾ ཨུ་ཀྑི་པི་ཏྭཱ ས་ཡ་ནེ ས་ཡཱ་པེ་ཏུཾ ནཱ་ས་ཀྑིཾ་སུ.
སུ་བྷོ ཨཱ་ག་ནྟྭཱ ‘‘ཀེ་ནཱ་ཡཾ སུ་ན་ཁོ ས་ཡ་ནཱ ཨོ་རོ་པི་ཏོ’’ཏི ཨཱ་ཧ. མ་ནུ་སྶཱ ‘‘ན ཀེ་ན་ཙཱི’’ཏི ཝ་ཏྭཱ ཏཾ པ་ཝ་ཏྟིཾ ཨཱ་རོ་ཙེ་སུཾ. མཱ་ཎ་ཝོ སུ་ཏྭཱ ‘‘མ་མ པི་ཏཱ བྲ་ཧྨ་ལོ་ཀེ ནི་བྦ་ཏྟོ, ས་མ་ཎོ པ་ན གོ་ཏ་མོ མེ པི་ཏ་རཾ སུ་ན་ཁཾ ཀ་རོ་ཏི ཡཾ ཀི་ཉྩི ཨེ་ས མུ་ཁཱ་རཱུ་ལ༹ྷཾ བྷཱ་ས་ཏཱི’’ཏི ཀུ་ཛ྄ཛྷི་ཏྭཱ བྷ་ག་ཝ་ནྟཾ མུ་སཱ་ཝཱ་དེ་ན ཙོ་དེ་ཏུ་ཀཱ་མོ ཝི་ཧཱ་རཾ ག་ནྟྭཱ ཏཾ པ་ཝ་ཏྟིཾ པུ་ཙྪི. བྷ་ག་ཝཱ ཏ་སྶ ཏ་ཐེ་ཝ ཝ་ཏྭཱ ཨ་ཝི་སཾ་ཝཱ་ད་ན་ཏྠཾ ཨཱ་ཧ – ‘‘ཨ་ཏྠི པ་ན ཏེ, མཱ་ཎ་ཝ, པི་ཏ་རཱ ན ཨ་ཀྑཱ་ཏཾ དྷ་ན’’ནྟི. ཨ་ཏྠི, བྷོ གོ་ཏ་མ, ས་ཏ་ས་ཧ་སྶ་གྒྷ་ནི་ཀཱ སུ་ཝ་ཎྞ་མཱ་ལཱ, ས་ཏ་ས་ཧ་སྶ་གྒྷ་ནི་ཀཱ སུ་ཝ་ཎྞ་པཱ་དུ་ཀཱ, ས་ཏ་ས་ཧ་སྶ་གྒྷ་ནི་ཀཱ སུ་ཝ་ཎྞ་པཱ་ཏི, ས་ཏ་ས་ཧ་སྶ་ཉྩ ཀ་ཧཱ་པ་ཎ་ནྟི. ག་ཙྪ ཏཾ སུ་ན་ཁཾ ཨ་པྤོ་ད་ཀཾ མ་དྷུ་པཱ་ཡཱ་སཾ བྷོ་ཛེ་ཏྭཱ ས་ཡ་ནཾ ཨཱ་རོ་པེ་ཏྭཱ ཨཱི་ས་ཀཾ ནི་དྡཾ ཨོ་ཀྐ་ནྟ་ཀཱ་ལེ པུ་ཙྪ, ས་བྦཾ ཏེ ཨཱ་ཙི་ཀྑི་སྶ་ཏི, ཨ་ཐ ནཾ ཛཱ་ནེ་ཡྻཱ་སི – ‘‘པི་ཏཱ མེ ཨེ་སོ’’ཏི. སོ ཏ་ཐཱ ཨ་ཀཱ་སི. སུ་ན་ཁོ ས་བྦཾ ཨཱ་ཙི་ཀྑི, ཏ་དཱ ནཾ – ‘‘པི་ཏཱ མེ’’ཏི ཉ་ཏྭཱ བྷ་ག་ཝ་ཏི པ་ས་ནྣ་ཙི་ཏྟོ ག་ནྟྭཱ བྷ་ག་ཝ་ནྟཾ་ཙུ་དྡ་ས པ་ཉྷེ པུ་ཙྪི་ཏྭཱ ཝི་སྶ་ཛྫ་ན་པ་རི་ཡོ་སཱ་ནེ བྷ་ག་ཝ་ནྟཾ ས་ར་ཎཾ ག་ཏོ, ཏཾ ས་ནྡྷཱ་ཡ ཝུ་ཏྟཾ ‘‘སུ་བྷོ མཱ་ཎ་ཝོ ཏོ་དེ་ཡྻ་པུ་ཏྟོ’’ཏི. སཱ་ཝ་ཏྠི་ཡཾ པ་ཊི་ཝ་ས་ཏཱིཏི ཨ་ཏྟ་ནོ བྷོ་ག་གཱ་མ་ཏོ ཨཱ་ག་ནྟྭཱ ཝ་ས་ཏི.
༤༤༥-༤༤༦. ཨ་ཉྙ་ཏ་རཾ མཱ་ཎ་ཝ་ཀཾ ཨཱ་མ་ནྟེ་སཱིཏི ས་ཏྠ་རི པ་རི་ནི་བྦུ་ཏེ ‘‘ཨཱ་ན་ནྡ་ཏྠེ་རོ ཀི་ར་སྶ པ་ཏྟ་ཙཱི་ཝ་རཾ ག་ཧེ་ཏྭཱ ཨཱ་ག་ཏོ, མ་ཧཱ་ཛ་ནོ ཏཾ ད་སྶ་ན་ཏྠཱ་ཡ ཨུ་པ་ས་ངྐ་མ་ཏཱི’’ཏི སུ་ཏྭཱ ‘‘ཝི་ཧཱ་རཾ ཁོ པ་ན ག་ནྟྭཱ མ་ཧཱ་ཛ་ན་མ་ཛ྄ཛྷེ ན ས་ཀྐཱ སུ་ཁེ་ན པ་ཊི་ས་ནྠཱ་རཾ ཝཱ ཀཱ་ཏུཾ, དྷ་མྨ་ཀ་ཐཾ ཝཱ སོ་ཏུཾ གེ་ཧཾ ཨཱ་ག་ཏཾ་ཡེ་ཝ ནཾ དི་སྭཱ སུ་ཁེ་ན པ་ཊི་ས་ནྠཱ་རཾ ཀ་རི་སྶཱ་མི, ཨེ་ཀཱ ཙ མེ ཀ་ངྑཱ ཨ་ཏྠི, ཏ་མྤི ནཾ པུ་ཙྪི་སྶཱ་མཱི’’ཏི ཙི་ནྟེ་ཏྭཱ ཨ་ཉྙ་ཏ་རཾ མཱ་ཎ་ཝ་ཀཾ ཨཱ་མ་ནྟེ་སི. ཨ་པྤཱ་བཱ་དྷནྟི་ཨཱ་དཱི་སུ ཨཱ་བཱ་དྷོཏི ཝི་ས་བྷཱ་ག་ཝེ་ད་ནཱ ཝུ་ཙྩ་ཏི, ཡཱ ཨེ་ཀ་དེ་སེ ཨུ་པྤ་ཛྫི་ཏྭཱ ཙ་ཏྟཱ་རོ ཨི་རི་ཡཱ་པ་ཐེ ཨ་ཡ་པ་ཊྚེ་ན ཨཱ་བ་ནྡྷི་ཏྭཱ ཝི་ཡ ག་ཎྷ་ཏི, ཏ་སྶཱ ཨ་བྷཱ་ཝཾ པུ་ཙྪཱ་ཏི ཝ་ད་ཏི. ཨ་པྤཱ་ཏ་ངྐོཏི ཀི་ཙྪ་ཛཱི་ཝི་ཏ་ཀ་རོ རོ་གོ ཝུ་ཙྩ་ཏི, ཏ་སྶཱ་པི ཨ་བྷཱ་ཝཾ པུ་ཙྪཱ་ཏི ཝ་ད་ཏི. གི་ལཱ་ན་སྶེ་ཝ ཙ ཨུ་ཊྛཱ་ནཾ ནཱ་མ ག་རུ་ཀཾ ཧོ་ཏི, ཀཱ་ཡེ བ་ལཾ ན ཧོ་ཏི, ཏ་སྨཱ ནི་གྒེ་ལ་ཉྙ་བྷཱ་ཝ་ཉྩ བ་ལ་ཉྩ པུ་ཙྪཱ་ཏི ཝ་ད་ཏི. ཕཱ་སུ་ཝི་ཧཱ་རནྟི ག་མ་ན་ཋཱ་ན་ནི་ས་ཛྫ་ས་ཡ་ནེ་སུ ཙ་ཏཱུ་སུ ཨི་རི་ཡཱ་པ་ཐེ་སུ སུ་ཁ་ཝི་ཧཱ་རཾ པུ་ཙྪཱ་ཏི ཝ་ད་ཏི. ཨ་ཐ་སྶ པུ་ཙྪི་ཏ་བྦཱ་ཀཱ་རཾ ད་སྶེ་ནྟོ ‘‘སུ་བྷོ’’ཏི་ཨཱ་དི་མཱ་ཧ.
༤༤༧. ཀཱ་ལ་ཉྩ ས་མ་ཡ་ཉྩ ཨུ་པཱ་དཱ་ཡཱཏི ཀཱ་ལ་ཉྩ ས་མ་ཡ་ཉྩ པ་ཉྙཱ་ཡ ག་ཧེ་ཏྭཱ ཨུ་པ་དྷཱ་རེ་ཏྭཱ་ཏི ཨ་ཏྠོ. ས་ཙེ ཨ་མྷཱ་ཀཾ སྭེ ག་མ་ན་ཀཱ་ལོ བྷ་ཝི་སྶ་ཏི, ཀཱ་ཡེ བ་ལ་མ་ཏྟཱ ཙེ་ཝ ཕ་རི་སྶ་ཏི, ག་མ་ན་པ་ཙྩ་ཡཱ ཙ ཨ་ཉྙོ ཨ་ཕཱ་སུ་ཝི་ཧཱ་རོ ན བྷ་ཝི་སྶ་ཏི, ཨ་ཐེ་ཏཾ ཀཱ་ལ་ཉྩ ག་མ་ན་ཀཱ་ར་ཎ་ས་མ་ཝཱ་ཡ་ས་ངྑཱ་ཏཾ ས་མ་ཡ་ཉྩ ཨུ་པ་དྷཱ་རེ་ཏྭཱ – ‘‘ཨ་པི ཨེ་ཝ ནཱ་མ སྭེ ཨཱ་ག་ཙྪེ་ཡྻཱ་མཱ’’ཏི ཝུ་ཏྟཾ ཧོ་ཏི.
༤༤༨. ཙེ་ཏ་ཀེ་ན བྷི་ཀྑུ་ནཱཏི ཙེ་ཏི་ར་ཊྛེ ཛཱ་ཏ་ཏྟཱ ཙེ་ཏ་ཀོ་ཏི ཨེ་ཝཾ ལ་དྡྷ་ནཱ་མེ་ན. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡནྟི བྷོ, ཨཱ་ན་ནྡ, ད་ས་བ་ལ་སྶ ཀོ ནཱ་མ ཨཱ་བཱ་དྷོ ཨ་ཧོ་སི, ཀིཾ བྷ་ག་ཝཱ པ་རི་བྷུ་ཉྫི. ཨ་པི ཙ ས་ཏྠུ པ་རི་ནི་བྦཱ་ནེ་ན ཏུ་མྷཱ་ཀཾ སོ་ཀོ ཨུ་ད་པཱ་དི, ས་ཏྠཱ ནཱ་མ ན ཀེ་ཝ་ལཾ ཏུ་མྷཱ་ཀཾ་ཡེ་ཝ པ་རི་ནི་བྦུ་ཏོ, ས་དེ་ཝ་ཀ་སྶ ལོ་ཀ་སྶ མ་ཧཱ་ཛཱ་ནི, ཀོ དཱ་ནི ཨ་ཉྙོ མ་ར་ཎཱ མུ་ཙྩི་སྶ་ཏི, ཡ་ཏྲ སོ ས་དེ་ཝ་ཀ་སྶ ལོ་ཀ་སྶ ཨ་གྒ་པུ་གྒ་ལོ པ་རི་ནི་བྦུ་ཏོ, ཨི་དཱ་ནི ཀཾ ཨ་ཉྙཾ དི་སྭཱ མ་ཙྩུ་རཱ་ཛཱ ལ་ཛྫི་སྶ་ཏཱི་ཏི ཨེ་ཝ་མཱ་དི་ནཱ ན་ཡེ་ན མ་ར་ཎ་པ་ཊི་སཾ་ཡུ་ཏྟཾ ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཐེ་ར་སྶ ཧི་ཡྻོ པཱི་ཏ་བྷེ་ས་ཛྫཱ་ནུ་རཱུ་པཾ ཨཱ་ཧཱ་རཾ ད་ཏྭཱ བྷ་ཏྟ་ཀི་ཙྩཱ་ཝ་སཱ་ནེ ཨེ་ཀ་མ་ནྟཾ ནི་སཱི་དི.
ཨུ་པ་ཊྛཱ་ཀོ ས་ནྟི་ཀཱ་ཝ་ཙ་རོཏི ཨུ་པ་ཊྛཱ་ཀོ ཧུ་ཏྭཱ ས་ནྟི་ཀཱ་ཝ་ཙ་རོ, ན ར་ནྡྷ་ག་ཝེ་སཱི. ན ཝཱི་མཾ་ས་ནཱ་དྷི་པྤཱ་ཡོ. ས་མཱི་པ་ཙཱ་རཱིཏི ཨི་དཾ པུ་རི་མ་པ་ད་སྶེ་ཝ ཝེ་ཝ་ཙ་ནཾ. ཡེ་སཾ སོ བྷ་ཝཾ གོ་ཏ་མོཏི ཀ་སྨཱ པུ་ཙྪ་ཏི? ཏ་སྶ ཀི་ར ཨེ་ཝཾ ཨ་ཧོ་སི ‘‘ཡེ་སུ དྷ་མྨེ་སུ བྷ་ཝཾ གོ་ཏ་མོ ཨི་མཾ ལོ་ཀཾ པ་ཏི་ཊྛ་པེ་སི, ཏེ ཏ་སྶ ཨ་ཙྩ་ཡེ་ན ན་ཊྛཱ ནུ ཁོ, དྷ་ར་ནྟི ནུ ཁོ, ས་ཙེ དྷ་ར་ནྟི, ཨཱ་ན་ནྡོ ཛཱ་ནི་སྶ་ཏི, ཧ་ནྡ ནཾ པུ་ཙྪཱ་མཱི’’ཏི, ཏ་སྨཱ པུ་ཙྪི.
༤༤༩. ཨ་ཐ་སྶ ཐེ་རོ ཏཱི་ཎི པི་ཊ་ཀཱ་ནི ཏཱི་ཧི ཁ་ནྡྷེ་ཧི ས་ངྒ་ཧེ་ཏྭཱ ད་སྶེ་ནྟོ ‘‘ཏི་ཎྞཾ ཁོ’’ཏི་ཨཱ་དི་མཱ་ཧ. མཱ་ཎ་ཝོ ས་ངྑི་ཏྟེ་ན ཀ་ཐི་ཏཾ ཨ་ས་ལླ་ཀྑེ་ནྟོ – ‘‘ཝི་ཏྠཱ་ར་ཏོ པུ་ཙྪི་སྶཱ་མཱི’’ཏི ཙི་ནྟེ་ཏྭཱ ‘‘ཀ་ཏ་མེ་སཾ ཏི་ཎྞ’’ནྟི་ཨཱ་དི་མཱ་ཧ.
སཱི་ལ་ཀྑ་ནྡྷ་ཝ་ཎྞ་ནཱ
༤༥༠-༤༥༣. ཏ་ཏོ ཐེ་རེ་ན ‘‘ཨ་རི་ཡ་སྶ སཱི་ལ་ཀྑ་ནྡྷ་སྶཱ’’ཏི ཏེ་སུ ད་སྶི་ཏེ་སུ པུ་ན ‘‘ཀ་ཏ་མོ པ་ན སོ, བྷོ ཨཱ་ན་ནྡ, ཨ་རི་ཡོ སཱི་ལ་ཀྑ་ནྡྷོ’’ཏི ཨེ་ཀེ་ཀཾ པུ་ཙྪི. ཐེ་རོ་པི་སྶ བུ་དྡྷུ་པྤཱ་དཾ ད་སྶེ་ཏྭཱ ཏ་ནྟི་དྷ་མྨཾ དེ་སེ་ནྟོ ཨ་ནུ་ཀྐ་མེ་ན བྷ་ག་ཝ་ཏཱ ཝུ་ཏྟ་ན་ཡེ་ནེ་ཝ ས་བྦཾ ཝི་སྶ་ཛྫེ་སི. ཏ་ཏྠ ཨ་ཏྠི ཙེ་ཝེ་ཏྠ ཨུ་ཏྟ་རི་ཀ་ར་ཎཱི་ཡནྟི ཨེ་ཏྠ བྷ་ག་ཝ་ཏོ སཱ་ས་ནེ ན སཱི་ལ་མེ་ཝ སཱ་རོ, ཀེ་ཝ་ལ་ཉྷེ་ཏཾ པ་ཏི་ཊྛཱ་མ་ཏྟ་མེ་ཝ ཧོ་ཏི. ཨི་ཏོ ཨུ་ཏྟ་རི པ་ན ཨ་ཉྙ་མྤི ཀ་ཏྟ་བྦཾ ཨ་ཏྠི ཡེ་ཝཱ་ཏི ད་སྶེ་སི. ཨི་ཏོ བ་ཧི་དྡྷཱཏི བུ་དྡྷ་སཱ་ས་ན་ཏོ བ་ཧི་དྡྷཱ.
ས་མཱ་དྷི་ཀྑ་ནྡྷ་ཝ་ཎྞ་ནཱ
༤༥༤. ཀ་ཐ་ཉྩ, མཱ་ཎ་ཝ, བྷི་ཀྑུ ཨི་ནྡྲི་ཡེ་སུ གུ་ཏྟ་དྭཱ་རོ ཧོ་ཏཱིཏི ཨི་ད་མཱ་ཡ་སྨཱ ཨཱ་ན་ནྡོ ‘‘ཀ་ཏ་མོ པ་ན སོ, བྷོ ཨཱ་ན་ནྡ, ཨ་རི་ཡོ ས་མཱ་དྷི་ཀྑ་ནྡྷོ’’ཏི ཨེ་ཝཾ ས་མཱ་དྷི་ཀྑ་ནྡྷཾ པུ་ཊྛོ་པི ཡེ ཏེ ‘‘སཱི་ལ་ས་མྤ་ནྣོ ཨི་ནྡྲི་ཡེ་སུ གུ་ཏྟ་དྭཱ་རོ ས་ཏི་ས་མྤ་ཛ་ཉྙེ་ན ས་མ་ནྣཱ་ག་ཏོ ས་ནྟུ་ཊྛོ’’ཏི ཨེ་ཝཾ སཱི་ལཱ་ན་ནྟ་རཾ ཨི་ནྡྲི་ཡ་སཾ་ཝ་རཱ་ད་ཡོ སཱི་ལ་ས་མཱ་དྷཱི་ནཾ ཨ་ནྟ་རེ ཨུ་བྷི་ནྣ་མྤི ཨུ་པ་ཀཱ་ར་ཀ་དྷ་མྨཱ ཨུ་དྡི་ཊྛཱ, ཏེ ནི་དྡི་སི་ཏྭཱ ས་མཱ་དྷི་ཀྑ་ནྡྷཾ ད་སྶེ་ཏུ་ཀཱ་མོ ཨཱ་ར་བྷི. ཨེ་ཏྠ ཙ རཱུ་པ་ཛ྄ཛྷཱ་ནཱ་ནེ་ཝ ཨཱ་ག་ཏཱ་ནི, ན ཨ་རཱུ་པ་ཛ྄ཛྷཱ་ནཱ་ནི, ཨཱ་ནེ་ཏྭཱ པ་ན དཱི་པེ་ཏ་བྦཱ་ནི. ཙ་ཏུ་ཏྠ་ཛ྄ཛྷཱ་ནེ་ན ཧི ཨ་ས་ངྒ་ཧི་ཏཱ ཨ་རཱུ་པ་ས་མཱ་པ་ཏྟི ནཱ་མ ན་ཏྠི་ཡེ་ཝ.
༤༧༡-༤༨༠. ཨ་ཏྠི ཙེ་ཝེ་ཏྠ ཨུ་ཏྟ་རི་ཀ་ར་ཎཱི་ཡནྟི ཨེ་ཏྠ བྷ་ག་ཝ་ཏོ སཱ་ས་ནེ ན ཙི་ཏྟེ་ཀ་གྒ་ཏཱ་མ་ཏྟ་ཀེ་ནེ་ཝ པ་རི་ཡོ་སཱ་ན་པྤ་ཏྟི ནཱ་མ ཨ་ཏྠི, ཨི་ཏོ་པི ཨུ་ཏྟ་རི པ་ན ཨ་ཉྙཾ ཀ་ཏྟ་བྦཾ ཨ་ཏྠི ཡེ་ཝཱ་ཏི ད་སྶེ་ཏི. ན་ཏྠི ཙེ་ཝེ་ཏྠ ཨུ་ཏྟ་རི་ཀ་ར་ཎཱི་ཡནྟི ཨེ་ཏྠ བྷ་ག་ཝ་ཏོ སཱ་ས་ནེ ཨི་ཏོ ཨུ་ཏྟ་རི ཀཱ་ཏ་བྦཾ ནཱ་མ ན་ཏྠི་ཡེ་ཝ, ཨ་ར་ཧ་ཏྟ་པ་རི་ཡོ་སཱ་ན་ཉྷི བྷ་ག་ཝ་ཏོ སཱ་ས་ན་ནྟི ད་སྶེ་ཏི. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཨི་ཏི སུ་མ་ངྒ་ལ་ཝི་ལཱ་སི་ནི་ཡཱ དཱི་གྷ་ནི་ཀཱ་ཡ་ཊྛ་ཀ་ཐཱ་ཡཾ
སུ་བྷ་སུ་ཏྟ་ཝ་ཎྞ་ནཱ ནི་ཊྛི་ཏཱ.