པི་ཡ་ཝི་པྤ་ཡོ་ག་ནི་དྡེ་སོ

༢༠༠. པི་ཡ་ཝི་པྤ་ཡོ་གནི་དྡེ་སོ ཝུ་ཏྟ་པ་ཊི་པ་ཀྑ་ན་ཡེ་ན ཝེ་དི་ཏ་བྦོ. མཱ་ཏཱ ཝཱཏི་ཨཱ་དི པ་ནེ་ཏྠ ཨ་ཏྠ་ཀཱ་མེ ས་རཱུ་པེ་ན ད་སྶེ་ཏུཾ ཝུ་ཏྟཾ. ཏ་ཏྠ མ་མཱ་ཡ་ཏཱི་ཏི མཱ་ཏཱ. པི་ཡཱ་ཡ་ཏཱི་ཏི པི་ཏཱ. བྷ་ཛ་ཏཱི་ཏི བྷཱ་ཏཱ. ཏ་ཐཱ བྷ་གི་ནཱི. མེ་ཏྟཱ་ཡ་ནྟཱི་ཏི མི་ཏྟཱ, མི་ན་ནྟཱི་ཏི ཝཱ མི་ཏྟཱ; ས་བྦ་གུ་ཡ྄ཧེ་སུ ཨ་ནྟོ པ་ཀྑི་པ་ནྟཱི་ཏི ཨ་ཏྠོ. ཀི་ཙྩ་ཀ་ར་ཎཱི་ཡེ་སུ ས་ཧ་བྷཱ་ཝ་ཊྛེ་ན ཨ་མཱ ཧོ་ནྟཱི་ཏི ཨ་མ་ཙྩཱ. ཨ་ཡཾ ཨ་མྷཱ་ཀཾ ཨ་ཛ྄ཛྷ་ཏྟི་ཀོ་ཏི ཨེ་ཝཾ ཛཱ་ན་ནྟི ཉཱ་ཡ་ནྟཱི་ཏི ཝཱ ཉཱ་ཏཱི. ལོ་ཧི་ཏེ་ན ས་མྦ་ནྡྷཱ་ཏི སཱ་ལོ་ཧི་ཏཱ. ཨེ་ཝ་མེ་ཏཱ་ནི པ་དཱ་ནི ཨ་ཏྠ་ཏོ ཝེ་དི་ཏ་བྦཱ་ནི. ཨ་ཡཾ ཝུ་ཙྩ་ཏཱིཏི ཨ་ཡཾ པི་ཡེ་ཧི ཝི་པྤ་ཡོ་གོ ནཱ་མ ཀ་ཐི་ཡ་ཏི. སོ ཨི་ཊྛ་ཝ་ཏྠུ་ཝི་ཡོ་ག་ལ་ཀྑ་ཎོ, སོ་ཀུ་པྤཱ་ད་ན་ར་སོ, བྱ་ས་ན་པ་ཙྩུ་པ་ཊྛཱ་ནོ.

སོ ཨ་ཏྠ་ཏོ ཨེ་ཀོ དྷ་མྨོ ནཱ་མ ན་ཏྠི. ཀེ་ཝ་ལཾ པི་ཡ་ཝི་པྤ་ཡུ་ཏྟཱ་ནཾ དུ་ཝི་དྷ་སྶཱ་པི དུ་ཀྑ་སྶ ཝ་ཏྠུ་བྷཱ་ཝ་ཏོ དུ་ཀྑོ་ཏི ཝུ་ཏྟོ. ཨི་ཊྛཱ་ནི ཧི ཝ་ཏྠཱུ་ནི ཝི་ཡུ་ཛྫ་མཱ་ནཱ་ནི ས་རཱི་ར་སྶ སོ་ས་ན་མི་ལཱ་པ་ནཱ་དི་བྷཱ་ཝེ་ན ཀཱ་ཡི་ཀ་མྤི དུ་ཀྑཾ ཨུ་པྤཱ་དེ་ནྟི, ‘ཡ་མྤི ནོ ཨ་ཧོ་སི, ཏ་མྤི ནོ ན་ཏྠཱི’ཏི ཨ་ནུ་སོ་ཙཱ་པ་ན་ཏོ མཱ་ན་ས་མྤི. ཏེ་ནེ་ཏཾ ཝུ་ཙྩ་ཏི –

ཉཱ་ཏི་དྷ་ནཱ་དི་ཝི་ཡོ་གཱ, སོ་ཀ་ས་ར་ས་མ་པྤི་ཏཱ ཝི་ཏུ་ཛྫ་ནྟི;

བཱ་ལཱ ཡ་ཏོ ཏ་ཏོ ཡཾ, དུ་ཀྑོ་ཏི མ་ཏོ པི་ཡ་ཝི་ཡོ་གོ་ཏི.