༡༣-༡༨. ཨ་ནུ་ལོ་མ་པ་ཙྩ་ནཱི་ཡ་པ་ཊྛཱ་ན་ཝ་ཎྞ་ནཱ

༡. ཨི་དཱ་ནི ཀུ་ས་ལཱ་དཱི་སུ དྷ་མྨེ་སུ པ་ཙྩ་ཡ་དྷ་མྨཾ ཨ་པྤ་ཊི་ཀྑི་པི་ཏྭཱ པ་ཙྩ་ཡུ་པྤ་ནྣ་སྶ ཀུ་ས་ལཱ་དི་བྷཱ་ཝ་པ་ཊི་ཀྑེ་པ་ཝ་སེ་ན དྷ་མྨཱ་ནཾ ཨ་ནུ་ལོ་མ་པ་ཙྩ་ནཱི་ཡ་ཏཱ་ཡ ལ་དྡྷ་ནཱ་མཾ ཨ་ནུ་ལོ་མ་པ་ཙྩ་ནཱི་ཡ་པ་ཊྛཱ་ནཾ ད་སྶེ་ཏུཾ ཀུ་ས་ལཾ དྷ་མྨཾ པ་ཊི་ཙྩ ན ཀུ་ས་ལོ དྷ་མྨོ ཨུ་པྤ་ཛྫ་ཏི ཧེ་ཏུ་པ་ཙྩ་ཡཱཏི་ཨཱ་དི ཨཱ་ར་དྡྷཾ. ཏ་ཏྠ ཀུ་ས་ལཾ དྷ་མྨཾ པ་ཊི་ཙྩཱཏི ཀུ་ས་ལ་སྶ པ་ཙྩ་ཡ་བྷཱ་ཝཾ ཨ་ནུ་ཛཱ་ནཱ་ཏི. ན ཀུ་ས་ལོ དྷ་མྨོ ཨུ་པྤ་ཛྫ་ཏཱིཏི ཀུ་ས་ལ་སྶེ་ཝ ཨུ་པྤ་ཏྟིཾ ཝཱ་རེ་ཏི. ཏ་སྨཱ ‘‘ཀུ་ས་ལེ ཁ་ནྡྷེ པ་ཊི་ཙྩ ཙི་ཏྟ་ས་མུ་ཊྛཱ་ནཾ རཱུ་པ’’ནྟི་ཨཱ་དི་ནཱ ན་ཡེ་ན ཝི་སྶ་ཛྫ་ནཾ ད་སྶི་ཏཾ, ཏཾ ས་བྦཾ པཱ་ལི༹ཾ ཨོ་ལོ་ཀེ་ཏྭཱ སཱ་དྷུ་ཀཾ ས་ལླ་ཀྑེ་ཏ་བྦཾ. ཡ་མྤི ཡེ་ན ས་དི་སཾ, ཡ་ཉྩ ཡ་ཏྠ ལ་བྦྷ་ཏི, ཡོ ཙ ཡེ་སཾ ཝི་སྶ་ཛྫ་ནཱ་ནཾ ཡེ་སུ པ་ཙྩ་ཡེ་སུ ག་ཎ་ན་པ་རི་ཙྪེ་དོ, སོ ས་བྦོ པཱ་ལི༹་ཡཾ ད་སྶི་ཏོ, ཏ་སྨཱ པཱ་ལི༹་ཡེ་ཝ ཨེ་ཏྠ ཨ་ཏྠོ. ཡ་ཐཱ ཙེ་ཏྠ, ཨེ་ཝཾ དུ་ཀ་པ་ཊྛཱ་ནཱ་དཱི་སུ་པཱི་ཏི.

ཨེ་ཏྟཱ་ཝ་ཏཱ –

ཏི་ཀ་ཉྩ པ་ཊྛཱ་ན་ཝ་རཾ དུ་ཀུ་ཏྟ་མཾ,

དུ་ཀཾ ཏི་ཀ་ཉྩེ་ཝ ཏི་ཀཾ དུ་ཀ་ཉྩ;

ཏི་ཀཾ ཏི་ཀ་ཉྩེ་ཝ དུ་ཀཾ དུ་ཀ་ཉྩ,

ཚ ཨ་ནུ་ལོ་མ་པ་ཙྩ་ནཱི་ཡ་མྷི ན་ཡཱ སུ་ག་མྦྷཱི་རཱ་ཏི. –

ཨ་ཊྛ་ཀ་ཐཱ་ཡཾ ཝུ་ཏྟ་གཱ་ཐཱ་ཡ དཱི་པི་ཏཱ དྷ་མྨཱ་ནུ་ལོ་མ་པ་ཙྩ་ནཱི་ཡ་པ་ཊྛཱ་ནེ ཚ ན་ཡཱ ནི་དྡི་ཊྛཱ ཧོ་ནྟི. པ་ཙྩ་ཡ་ཝ་སེ་ན པ་ནེ་ཏྠ ཨེ་ཀེ་ཀ་སྨིཾ པ་ཊྛཱ་ནེ ཨ་ནུ་ལོ་མཱ་ད་ཡོ ཙ་ཏྟཱ་རོ ཙ་ཏྟཱ་རོ ན་ཡཱ་ཏི ཨེ་ཀེ་ན པ་རི་ཡཱ་ཡེ་ན ཙ་ཏུ་ཝཱི་ས་ཏི་ན་ཡ་པ་ཊི་མ་ཎྜི་ཏཾ ཨ་ནུ་ལོ་མ་པ་ཙྩ་ནཱི་ཡ་པ་ཊྛཱ་ན་ཉྙེ་ཝ ཝེ་དི་ཏ་བྦཾ.

ཨ་ནུ་ལོ་མ་པ་ཙྩ་ནཱི་ཡ་པ་ཊྛཱ་ན་ཝ་ཎྞ་ནཱ.