༡༩-༢༤. པ་ཙྩ་ནཱི་ཡཱ་ནུ་ལོ་མ་པ་ཊྛཱ་ན་ཝ་ཎྞ་ནཱ
༡. ཨི་དཱ་ནི ཀུ་ས་ལཱ་དཱི་སུ དྷ་མྨེ་སུ པ་ཙྩ་ཡ་དྷ་མྨཾ པ་ཊི་ཀྑི་པི་ཏྭཱ པ་ཙྩ་ཡུ་པྤ་ནྣ་སྶ ཀུ་ས་ལཱ་དི་བྷཱ་ཝཾ ཨ་པྤ་ཊི་ཀྑེ་པ་ཝ་སེ་ན དྷ་མྨཱ་ནཾ པ་ཙྩ་ནཱི་ཡཱ་ནུ་ལོ་མ་ཏཱ་ཡ ལ་དྡྷ་ནཱ་མཾ པ་ཙྩ་ནཱི་ཡཱ་ནུ་ལོ་མ་པ་ཊྛཱ་ནཾ ད་སྶེ་ཏུཾ ན་ཀུ་ས་ལཾ དྷ་མྨཾ པ་ཊི་ཙྩ ཨ་ཀུ་ས་ལོ དྷ་མྨོ ཨུ་པྤ་ཛྫ་ཏི ཧེ་ཏུ་པ་ཙྩ་ཡཱཏི་ཨཱ་དི ཨཱ་ར་དྡྷཾ. ཏ་ཏྠ ན་ཀུ་ས་ལཾ དྷ་མྨཾ པ་ཊི་ཙྩཱཏི ཀུ་ས་ལ་སྶ པ་ཙྩ་ཡ་བྷཱ་ཝཾ ཝཱ་རེ་ཏི. ཨ་ཀུ་ས་ལོ དྷ་མྨོ ཨུ་པྤ་ཛྫ་ཏཱིཏི ཨ་ཀུ་ས་ལ་སྶ ཨུ་པྤ་ཏྟིཾ ཨ་ནུ་ཛཱ་ནཱ་ཏི. ན་ཀུ་ས་ལ་ཉྷི ཨ་ཀུ་ས་ལཾ ཨ་བྱཱ་ཀ་ཏཾ ཝཱ, ཏ་ཉྩ ས་ཧ་ཛཱ་ཏ་པ་ཙྩ་ཡཾ ཀ་ཏྭཱ ཨུ་པྤ་ཛྫ་མཱ་ནོ ཀུ་ས་ལོ ནཱ་མ ན་ཏྠི, ཏ་སྨཱ ཨ་ཀུ་ས་ལཱ་བྱཱ་ཀ་ཏ་ཝ་སེ་ན དེ་ས་ནཱ ཀ་ཏཱ. ཏ་ཏྠ ‘‘ཨ་ཀུ་ས་ལཾ ཨེ་ཀཾ ཁ་ནྡྷཾ པ་ཊི་ཙྩ ཏ་ཡོ ཁ་ནྡྷཱ’’ཏི ཨེ་ཝཾ ན་ཀུ་ས་ལཾ དྷ་མྨཾ པ་ཊི་ཙྩ ཝི་སྶ་ཛྫ་ནཾ ཝེ་དི་ཏ་བྦཾ. ཨ་བྱཱ་ཀ་ཏོ དྷ་མྨོ ཨུ་པྤ་ཛྫ་ཏི ཧེ་ཏུ་པ་ཙྩ་ཡཱཏི ཨ་ཡཾ པ་ན པ་ཉྷོ ‘‘ཝི་པཱ་ཀཱ་བྱཱ་ཀ་ཏཾ ཀི་རི་ཡཱ་བྱཱ་ཀ་ཏཾ ཨེ་ཀཾ ཁ་ནྡྷཾ པ་ཊི་ཙྩ ཏ་ཡོ ཁ་ནྡྷཱ ཙི་ཏྟ་ས་མུ་ཊྛཱ་ན་ཉྩ རཱུ་པ’’ནྟི ཝི་སྶ་ཛྫི་ཏོ་ཝ. ཨི་ཏི ས་བྦ་པ་ཉྷེ་སུ ཨ་ཝི་སྶ་ཛྫི་ཏ་སྶ ཨ་ཏྠཱ་ནུ་རཱུ་པཾ ཝི་སྶ་ཛྫི་ཏ་སྶ ཙ པཱ་ལི༹་ཨཱ་ག་ཏ་མེ་ཝ ཝི་སྶ་ཛྫ་ནཾ. ཨེ་ཀེ་ཀ་སྨི་ཉྩ ཏི་ཀ་དུ་ཀེ ཝཱ་ར་པྤ་བྷེ་ད་པ་ཙྩ་ཡ་ག་ཎ་ན་ཝི་དྷཱ་ནཾ ས་བྦཾ ཧེ་ཊྛཱ ཝུ་ཏྟ་ན་ཡཱ་ནུ་སཱ་རེ་ནེ་ཝ ཝེ་དི་ཏ་བྦཾ.
ཨེ་ཏྟཱ་ཝ་ཏཱ ཙ –
ཏི་ཀ་ཉྩ པ་ཊྛཱ་ན་ཝ་རཾ དུ་ཀུ་ཏྟ་མཾ,
དུ་ཀཾ ཏི་ཀ་ཉྩེ་ཝ ཏི་ཀཾ དུ་ཀ་ཉྩ;
ཏི་ཀཾ ཏི་ཀ་ཉྩེ་ཝ དུ་ཀཾ དུ་ཀ་ཉྩ,
ཚ པ་ཙྩ་ནཱི་ཡཱ་ནུ་ལོ་མ་མྷི ན་ཡཱ སུ་ག་མྦྷཱི་རཱ་ཏི. –
ཨ་ཊྛ་ཀ་ཐཱ་ཡཾ ཝུ་ཏྟ་གཱ་ཐཱ་ཡ དཱི་པི་ཏཱ. དྷ་མྨ་པ་ཙྩ་ནཱི་ཡཱ་ནུ་ལོ་མ་པ་ཊྛཱ་ནེ ཚ ན་ཡཱ ནི་དྡི་ཊྛཱ ཧོ་ནྟི. པ་ཙྩ་ཡ་ཝ་སེ་ན པ་ནེ་ཏྠ ཨེ་ཀེ་ཀ་སྨིཾ པ་ཊྛཱ་ནེ ཨ་ནུ་ལོ་མཱ་ད་ཡོ ཙ་ཏྟཱ་རོ ཙ་ཏྟཱ་རོ ན་ཡཱ་ཏི ཨེ་ཀེ་ན པ་རི་ཡཱ་ཡེ་ན ཙ་ཏུ་ཝཱི་ས་ཏི་ན་ཡ་པ་ཊི་མ་ཎྜི་ཏཾ པ་ཙྩ་ནཱི་ཡཱ་ནུ་ལོ་མ་པ་ཊྛཱ་ན་ཉྙེ་ཝ ཝེ་དི་ཏ་བྦཾ.
པ་ཙྩ་ནཱི་ཡཱ་ནུ་ལོ་མ་པ་ཊྛཱ་ན་ཝ་ཎྞ་ནཱ.
ཨེ་ཝཾ དྷ་མྨཱ་ནུ་ལོ་མཱ་དི་ཝ་སེ་ན ཙ་ཏཱུ་སུ ཝཱ་རེ་སུ ཨེ་ཀེ་ཀ་སྨིཾ ཙ་ཏུ་ཝཱི་ས་ཏི་ཡཱ ཙ་ཏུ་ཝཱི་ས་ཏི་ཡཱ ན་ཡཱ་ནཾ ཝ་སེ་ན ཚ་ནྣ་ཝུ་ཏི ན་ཡཱ ཧོ་ནྟི. ཏ་ཏྠ པ་ཙྩ་ཡ་ན་ཡེ ཨ་གྒ་ཧེ་ཏྭཱ ཨེ་ཀེ་ཀ་སྨིཾ པ་ཊྛཱ་ནེ ཏི་ཀ་དུ་ཀཱ་དཱི་ན་ཉྙེ་ཝ ཚ་ནྣཾ ཚ་ནྣཾ ན་ཡཱ་ནཾ ཝ་སེ་ནེ་ཏཾ ཙ་ཏུ་ཝཱི་ས་ཏི་ན་ཡ་པ་ཊི་མ་ཎྜི་ཏཾ ས་མ་ནྟ་པ་ཊྛཱ་ན་མ་ཧཱ་པ་ཀ་ར་ཎཾ ཝེ་དི་ཏ་བྦཾ. ཀེ་ཙི པ་ན ‘‘ཀུ་ས་ལཱ་ར་མྨ་ཎོ དྷ་མྨོ ཨ་ཀུ་ས་ལཱ་ར་མྨ་ཎོ དྷ་མྨོ’’ཏི་ཨཱ་དི་ནཱ ན་ཡེ་ན ཨཱ་ར་མྨ་ཎ་མཱ་ཏི་ཀཾ ནཱ་མ ཋ་པེ་ཏྭཱ ‘‘ཀུ་ས་ལཱ་ར་མྨ་ཎོ དྷ་མྨོ ཀུ་ས་ལཱ་ར་མྨ་ཎ་སྶ དྷ་མྨ་སྶ ཧེ་ཏུ་པ་ཙྩ་ཡེ་ན པ་ཙྩ་ཡོ’’ཏི་ཨཱ་དི་ནཱ ན་ཡེ་ན ཨཱ་ར་མྨ་ཎ་པ་ཊྛཱ་ནཾ ནཱ་མ ད་སྶེ་ཏྭཱ ཨ་པ་ར་མྤི ཕ་སྶཱ་དཱི་ནཾ ཝ་སེ་ན་པི ཕ་སྶ་པ་ཊྛཱ་ནཾ ནཱ་མ ཨུ་དྡྷ་རི་ཏྭཱ ད་སྶེ་ནྟི. ཏཾ ནེ་ཝ པཱ་ལི༹་ཡཾ ན ཨ་ཊྛ་ཀ་ཐཱ་སུ ས་ནྡི་སྶ་ཏཱི་ཏི ཨི་དྷ ན ཝི་ཙཱ་རི་ཏཾ. ས་ངྒཱི་ཏི་ཨཱ་རུ་ལ༹ྷ་པཱ་ལི༹་ཝ་སེ་ནེ་ཝ པ་ནེ་ཏྠ ཝ་ཎྞ་ནཱ ཀ་ཏཱ་ཏི ཝེ་དི་ཏ་བྦཱ.
ཨེ་ཏྟཱ་ཝ་ཏཱ ཙ –
ས་མྨཱུ་ལ༹ྷཱ ཡ་ཏྠ པ་ཛཱ, ཏ་ནྟཱ་ཀུ་ལཱ་དི་བྷཱ་ཝ་མཱ་པ་ནྣཱ;
ནེ་ཀ་ཝི་དྷ་དུ་ཀྑ་ག་ཧ་ནཾ, སཾ་སཱ་རཾ ནཱ་ཏི་ཝ་ཏྟ་ནྟི.
པ་ཙྩ་ཡ་བྷེ་དེ ཀུ་ས་ལོ, ལོ་ཀེ ག་རུ་ཏ་མྤི པ་ཙྩ་ཡཱ་ཀཱ་རཾ;
ཨ་ཏི་ནི་པྤུ་ཎ་ག་མྦྷཱི་རཾ, ཛ་ཝ་ན་བྦྷཱུ་མིཾ བུ་དྡྷ་ཉཱ་ཎ་སྶ.
ཀུ་ས་ལཱ་དི་དྷ་མྨ་བྷེ་དཾ, ནི་སྶཱ་ཡ ན་ཡེ་ཧི ཝི་ཝི་དྷ་ག་ཎ་ནེ་ཧི;
ཝི་ཏྠཱ་རེ་ནྟོ ས་ཏྟ་མ-མ་བྷི་དྷ་མྨ་པྤ་ཀ་ར་ཎཾ ས་ཏྠཱ.
སུ་ཝི་ཧི་ཏ་ས་ནྣི་ཊྛཱ་ནོ, པ་ཊྛཱ་ནཾ ནཱ་མ ཡཾ པ་ཀཱ་སེ་སི;
ས་དྡྷཱ་ཡ ས་མཱ་ར་དྡྷཱ, ཡཱ ཨ་ཊྛ་ཀ་ཐཱ མ་ཡཱ ཏ་སྶ.
ཨཱ་ཙ་རི་ཡཱ་ནཾ ཝཱ་དཾ, ཨ་ཝི་ཧཱ་ཡ ཝི་བྷ་ཛྫ་ཝཱ་དི་སི་སྶཱ་ནཾ;
ཨ་ཏི་བ་ཧུ་ཝི་དྷ་ནྟ་རཱ་ཡེ, ལོ་ཀ་མྷི ཨ་ན་ནྟ་རཱ་ཡེ་ན.
སཱ ཨེ་ཝཾ ཨ་ཛྫ ཀ་ཏཱ, ཙུ་དྡ་ས་མ་ཏྟེ་ཧི བྷཱ་ཎ་ཝཱ་རེ་ཧི;
ཨ་ཏྠཾ པ་ཀཱ་ས་ཡ་ནྟཱི, པ་ཊྛཱ་ན་ཝ་ར་སྶ ས་ཀ་ལ་སྶ.
ས་ནྣི་ཊྛཱ་ནཾ པ་ཏྟཱ ཡ་ཐེ་ཝ ནི་ཊྛཾ ཏ་ཐཱ བ་ཧུ་ཛ་ན་སྶ;
ས་མྤཱ་པུ་ཎ་ནྟུ སཱི་གྷཾ, ཀ་ལྱཱ་ཎཱ ས་བྦ་ས་ངྐ་པྤཱ.
ཨེ་ཏྟཱ་ཝ་ཏཱ –
ས་ཏྟ་པྤ་ཀ་ར་ཎཾ ནཱ་ཐོ, ཨ་བྷི་དྷ་མྨ་མ་དེ་ས་ཡི;
དེ་ཝཱ་ཏི་དེ་ཝོ དེ་ཝཱ་ནཾ, དེ་ཝ་ལོ་ཀ་མྷི ཡཾ པུ་རེ.
ཏ་སྶ ཨ་ཊྛ་ཀ་ཐཱ ཨེ་སཱ, ས་ཀ་ལ་སྶཱ་པི ནི་ཊྛི་ཏཱ;
ཙི་ར་ཊྛི་ཏ་ཏྠཾ དྷ་མྨ་སྶ, ནི་ཊྛ་པེ་ནྟེ་ན ཏཾ མ་ཡཱ.
ཡཾ པ་ཏྟཾ ཀུ་ས་ལཾ ཏ་སྶ, ཨཱ་ནུ་བྷཱ་ཝེ་ན པཱ་ཎི་ནོ;
ས་བྦེ ས་དྡྷ་མྨ་རཱ་ཛ་སྶ, ཉ་ཏྭཱ དྷ་མྨཾ སུ་ཁཱ་ཝ་ཧཾ.
པཱ་པུ་ཎ་ནྟུ ཝི་སུ་དྡྷཱ་ཡ, སུ་ཁཱ་ཡ པ་ཊི་པ་ཏྟི་ཡཱ;
ཨ་སོ་ཀ་མ་ནུ་པཱ་ཡཱ་སཾ, ནི་བྦཱ་ན་སུ་ཁ་མུ་ཏྟ་མཾ.
ཙི་རཾ ཏི་ཊྛ་ཏུ ས་དྡྷ་མྨོ, དྷ་མྨེ ཧོ་ནྟུ ས་གཱ་ར་ཝཱ;
ས་བྦེ་པི ས་ཏྟཱ ཀཱ་ལེ་ན, ས་མྨཱ དེ་ཝོ པ་ཝ་སྶ་ཏུ.
ཡ་ཐཱ ར་ཀྑིཾ་སུ པོ་རཱ་ཎཱ, སུ་རཱ་ཛཱ་ནོ ཏ་ཐེ་ཝི་མཾ;
རཱ་ཛཱ ར་ཀྑ་ཏུ དྷ་མྨེ་ན, ཨ་ཏྟ་ནོ་ཝ པ་ཛཾ པ་ཛ་ནྟི.
པ་ཊྛཱ་ན་པྤ་ཀ་ར་ཎ-ཨ་ཊྛ་ཀ་ཐཱ ནི་ཊྛི་ཏཱ.
ནི་ཊྛི་ཏཱ ཙ པ་ཉྩ་པ་ཀ་ར་ཎ་ཊྛ་ཀ་ཐཱ་ཏི.
ནི་ག་མ་ན་ཀ་ཐཱ
པ་ར་མ་ཝི་སུ་དྡྷ་ས་དྡྷཱ་བུ་དྡྷི་ཝཱི་རི་ཡ་པ་ཊི་མ་ཎྜི་ཏེ་ན སཱི་ལཱ་ཙཱ་ར་ཛྫ་ཝ་མ་དྡ་ཝཱ་དི་གུ་ཎ་ས་མུ་ད་ཡ་ས་མུ་དི་ཏེ་ན ས་ཀ་ས་མ་ཡ་ས་མ་ཡ་ནྟ་ར་ག་ཧ་ན་ཛ྄ཛྷོ་གཱ་ཧ་ཎ་ས་མ་ཏྠེ་ན པ་ཉྙཱ་ཝེ་ཡྻ་ཏྟི་ཡ་ས་མ་ནྣཱ་ག་ཏེ་ན ཏི་པི་ཊ་ཀ་པ་རི་ཡ་ཏྟི་པྤ་བྷེ་དེ སཱ་ཊྛ་ཀ་ཐེ ས་ཏྠུ་སཱ་ས་ནེ ཨ་པྤ་ཊི་ཧ་ཏ་ཉཱ་ཎ་པྤ་བྷཱ་ཝེ་ན མ་ཧཱ་ཝེ་ཡྻཱ་ཀ་ར་ཎེ་ན ཀ་ར་ཎ་ས་མྤ་ཏྟི་ཛ་ནི་ཏ་སུ་ཁ་ཝི་ནི་གྒ་ཏ་མ་དྷུ་རོ་དཱ་ར་ཝ་ཙ་ན་ལཱ་ཝ་ཎྞ་ཡུ་ཏྟེ་ན ཡུ་ཏྟ་མུ་ཏྟ་ཝཱ་དི་ནཱ ཝཱ་དཱི་ཝ་རེ་ན མ་ཧཱ་ཀ་ཝི་ནཱ པ་བྷི་ནྣ་པ་ཊི་ས་མྦྷི་དཱ་པ་རི་ཝཱ་རེ ཚ་ལ༹་བྷི་ཉྙཱ་དི་པྤ་བྷེ་ད་གུ་ཎ་པ་ཊི་མ་ཎྜི་ཏེ ཨུ་ཏྟ་རི་མ་ནུ་སྶ་དྷ་མྨེ སུ་པྤ་ཏི་ཊྛི་ཏ་བུ་དྡྷཱི་ནཾ ཐེ་ར་ཝཾ་ས་པྤ་དཱི་པཱ་ནཾ ཐེ་རཱ་ནཾ མ་ཧཱ་ཝི་ཧཱ་ར་ཝཱ་སཱི་ནཾ ཝཾ་སཱ་ལ་ངྐཱ་ར་བྷཱུ་ཏེ་ན ཝི་པུ་ལ་ཝི་སུ་དྡྷ་བུ་དྡྷི་ནཱ བུ་དྡྷ་གྷོ་སོཏི ག་རཱུ་ཧི ག་ཧི་ཏ་ནཱ་མ་དྷེ་ཡྻེ་ན ཐེ་རེ་ན ཀ་ཏཱ ཨ་ཡཾ ས་ཀ་ལ་སྶ་པི ཨ་བྷི་དྷ་མྨ་པི་ཊ་ཀ་སྶ ཨ་ཊྛ་ཀ་ཐཱ –
ཏཱ་ཝ ཏི་ཊྛ་ཏུ ལོ་ཀ་སྨིཾ, ལོ་ཀ་ནི་ཏྠ་ར་ཎེ་སི་ནཾ;
ད་སྶེ་ནྟཱི ཀུ་ལ་པུ་ཏྟཱ་ནཾ, ན་ཡཾ པ་ཉྙཱ་ཝི་སུ་དྡྷི་ཡཱ.
ཡཱ་ཝ བུ་དྡྷོ་ཏི ནཱ་མ་མྤི, སུ་དྡྷ་ཙི་ཏྟ་སྶ ཏཱ་དི་ནོ;
ལོ་ཀ་མྷི ལོ་ཀ་ཛེ་ཊྛ་སྶ, པ་ཝ་ཏྟ་ཏི མ་ཧེ་སི་ནོ་ཏི.
ཨ་བྷི་དྷ་མྨ་པི་ཊ་ཀ-ཨ་ཊྛ་ཀ་ཐཱ ནི་ཊྛི་ཏཱ.