༩. དྷ་མྨ་ཡ་མ་ཀཾ
༡. པ་ཎྞ་ཏྟི་ཨུ་དྡེ་ས་ཝཱ་ར་ཝ་ཎྞ་ནཱ
༡-༡༦. ཨི་དཱ་ནི ཏེ་ས་ཉྙེ་ཝ མཱུ་ལ་ཡ་མ་ཀེ དེ་སི་ཏཱ་ནཾ ཀུ་ས་ལཱ་དི་དྷ་མྨཱ་ནཾ མཱ་ཏི་ཀཾ ཋ་པེ་ཏྭཱ ཙི་ཏྟ་ཡ་མ་ཀཱ་ན་ནྟ་རཾ དེ་སི་ཏ་སྶ དྷ་མྨ་ཡ་མ་ཀ་སྶ ཝ་ཎྞ་ནཱ ཧོ་ཏི. ཏ་ཏྠ ཁ་ནྡྷ་ཡ་མ་ཀེ ཝུ་ཏྟ་ན་ཡེ་ནེ་ཝ པཱ་ལི༹་ཝ་ཝ་ཏྠཱ་ནཾ ཝེ་དི་ཏ་བྦཾ. ཡ་ཐཱ ཧི ཏ་ཏྠ པ་ཎྞ་ཏྟི་ཝཱ་རཱ་ད་ཡོ ཏ་ཡོ མ་ཧཱ་ཝཱ་རཱ, ཨ་ཝ་སེ་སཱ ཨ་ནྟ་ར་ཝཱ་རཱ ཙ ཧོ་ནྟི, ཏ་ཐཱ ཨི་དྷཱ་པི. ‘‘ཡོ ཀུ་ས་ལཾ དྷ་མྨཾ བྷཱ་ཝེ་ཏི, སོ ཨ་ཀུ་ས་ལཾ དྷ་མྨཾ པ་ཛ་ཧ་ཏཱི’’ཏི ཨཱ་ག་ཏ་ཏྟཱ པ་ནེ་ཏྠ པ་རི་ཉྙཱ་ཝཱ་རོ, བྷཱ་ཝ་ནཱ་ཝཱ་རོ ནཱ་མཱ་ཏི ཝེ་དི་ཏ་བྦོ. ཏ་ཏྠ ཡ་སྨཱ ཨ་བྱཱ་ཀ་ཏོ དྷ་མྨོ ནེ་ཝ བྷཱ་ཝེ་ཏ་བྦོ, ན པ་ཧཱ་ཏ་བྦོ, ཏ་སྨཱ ཏཾ པ་ད་མེ་ཝ ན ཨུ་དྡྷ་ཊཾ. པ་ཎྞ་ཏྟི་ཝཱ་རེ པ་ནེ་ཏྠ ཏི་ཎྞཾ ཀུ་ས་ལཱ་དི་དྷ་མྨཱ་ནཾ ཝ་སེ་ན པ་ད་སོ་དྷ་ན་ཝཱ་རོ, པ་ད་སོ་དྷ་ན་མཱུ་ལ་ཙ་ཀྐ་ཝཱ་རོ, སུ་དྡྷ་དྷ་མྨ་ཝཱ་རོ, སུ་དྡྷ་དྷ་མྨ་མཱུ་ལ་ཙ་ཀྐ་ཝཱ་རོ་ཏི ཨི་མེ་སུ ཙ་ཏཱུ་སུ ཝཱ་རེ་སུ ཡ་མ་ཀ་ག་ཎ་ནཱ ཝེ་དི་ཏ་བྦཱ.
༡. པ་ཎྞ་ཏྟི་ནི་དྡེ་ས་ཝཱ་ར་ཝ་ཎྞ་ནཱ
༡༧-༣༢. པ་ཎྞ་ཏྟི་ཝཱ་ར་ནི་དྡེ་སེ པ་ན ཀུ་ས་ལཱ ཀུ་ས་ལ་དྷ་མྨཱཏི ཀུ་ས་ལཱ་ནཾ ཨེ་ཀ་ནྟེ་ན ཀུ་ས་ལ་དྷ་མྨ་ཏྟཱ ‘‘ཨཱ་མ་ནྟཱ’’ཏི ཝུ་ཏྟཾ. སེ་ས་ཝི་སྶ་ཛྫ་ནེ་སུ་པི ཨེ་སེ་ཝ ན་ཡོ. ཨ་ཝ་སེ་སཱ དྷ་མྨཱ ན ཨ་ཀུ་ས་ལཱ དྷ་མྨཱཏི ཨ་ཝ་སེ་སཱ དྷ་མྨཱ ཨ་ཀུ་ས་ལཱ ན ཧོ་ནྟི, དྷ་མྨཱ པ་ན ཧོ་ནྟཱི་ཏི ཨ་ཏྠོ. ཨི་མི་ནཱ ན་ཡེ་ན ས་བྦ་ཝི་སྶ་ཛྫ་ནཱ་ནི ཝེ་དི་ཏ་བྦཱ་ནི.
པ་ཎྞ་ཏྟི་ཝཱ་ར་ཝ་ཎྞ་ནཱ.
༢. པ་ཝ་ཏྟི་ཝཱ་ར་ཝ་ཎྞ་ནཱ
༣༣-༣༤. པ་ཝ་ཏྟི་ཝཱ་རེ པ་ནེ་ཏྠ པ་ཙྩུ་པྤ་ནྣ་ཀཱ་ལེ པུ་གྒ་ལ་ཝཱ་ར་སྶ ཨ་ནུ་ལོ་མ་ན་ཡེ ‘‘ཡ་སྶ ཀུ་ས་ལཱ དྷ་མྨཱ ཨུ་པྤ་ཛྫ་ནྟི, ཏ་སྶ ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི; ཡ་སྶ ཝཱ པ་ན ཨ་ཀུ་ས་ལཱ དྷ་མྨཱ ཨུ་པྤ་ཛྫ་ནྟི, ཏ་སྶ ཀུ་ས་ལཱ དྷ་མྨཱ ཨུ་པྤ་ཛྫ་ནྟཱི’’ཏི ཀུ་ས་ལ་དྷ་མྨ་མཱུ་ལ་ཀཱ་ནི དྭེ ཡ་མ་ཀཱ་ནི, ཨ་ཀུ་ས་ལ་དྷ་མྨ་མཱུ་ལ་ཀཾ ཨེ་ཀ་ནྟི ཏཱི་ཎི ཡ་མ་ཀཱ་ནི ཧོ་ནྟི. ཏ་སྶ པ་ཊི་ལོ་མ་ན་ཡེ་པི ཨོ་ཀཱ་ས་ཝཱ་རཱ་དཱི་སུ་པི ཨེ་སེ་ཝ ན་ཡོ. ཨེ་ཝ་མེ་ཏྠ ས་བྦ་ཝཱ་རེ་སུ ཏི་ཎྞཾ ཏི་ཎྞཾ ཡ་མ་ཀཱ་ནཾ ཝ་སེ་ན ཡ་མ་ཀ་ག་ཎ་ནཱ ཝེ་དི་ཏ་བྦཱ. ཨ་ཏྠ་ཝི་ནི་ཙྪ་ཡེ པ་ནེ་ཏྠ ཨི་དཾ ལ་ཀྑ་ཎཾ – ཨི་མ་སྶ ཧི དྷ་མྨ་ཡ་མ་ཀ་སྶ པ་ཝ་ཏྟི་མ་ཧཱ་ཝཱ་རེ ‘‘ཨུ་པྤ་ཛྫ་ནྟི ནི་རུ་ཛ྄ཛྷ་ནྟཱི’’ཏི ཨི་མེ་སུ ཨུ་པྤཱ་ད་ནི་རོ་དྷེ་སུ ཀུ་ས་ལཱ་ཀུ་ས་ལ་དྷ་མྨཱ ཏཱ་ཝ ཨེ་ཀ་ནྟེ་ན པ་ཝ་ཏྟི་ཡཾ་ཡེ་ཝ ལ་བྦྷ་ནྟི, ན ཙུ་ཏི་པ་ཊི་ས་ནྡྷཱི་སུ. ཨ་བྱཱ་ཀ་ཏ་དྷ་མྨཱ པ་ན པ་ཝ་ཏྟེ ཙ ཙུ་ཏི་པ་ཊི་ས་ནྡྷཱི་སུ ཙཱ་ཏི ཏཱི་སུ་པི ཀཱ་ལེ་སུ ལ་བྦྷ་ནྟི. ཨེ་ཝ་མེ་ཏྠ ཡཾ ཡ་ཏྠ ཡ་ཏྠ ལ་བྦྷ་ཏི, ཏ་སྶ ཝ་སེ་ན ཏ་ཏྠ ཏ་ཏྠ ཝི་ནི་ཙྪ་ཡོ ཝེ་དི་ཏ་བྦོ.
ཏ་ཏྲི་དཾ ན་ཡ་མུ་ཁཾ – ཀུ་ས་ལཱ་ཀུ་ས་ལཱ་ནཾ ཏཱ་ཝ ཨེ་ཀ་ཀྑ་ཎེ ཨ་ནུ་པྤ་ཛྫ་ན་ཏོ ‘‘ནོ’’ཏི པ་ཊི་སེ་དྷོ ཀ་ཏོ. ཨ་བྱཱ་ཀ་ཏཱ ཙཱཏི ཙི་ཏྟ་ས་མུ་ཊྛཱ་ན་རཱུ་པ་ཝ་སེ་ན ཝུ་ཏྟཾ.
༣༥-༣༦. ཡ་ཏྠ ཀུ་ས་ལཱ དྷ་མྨཱ ནུ་པྤ་ཛྫ་ནྟཱིཏི ཨ་ས་ཉྙ་བྷ་ཝཾ ས་ནྡྷཱ་ཡ ཝུ་ཏྟཾ. ཏེ་ནེ་ཝེ་ཏྠ ‘‘ཨཱ་མ་ནྟཱ’’ཏི ཝི་སྶ་ཛྫ་ནཾ ཀ་ཏཾ. ཨུ་པྤ་ཛྫ་ནྟཱིཏི ཨི་ད་མྤི ཨ་ས་ཉྙ་བྷ་ཝཾ་ཡེ་ཝ ས་ནྡྷཱ་ཡ ཝུ་ཏྟཾ. ཨ་བྱཱ་ཀ་ཏཱ་ནཾ པ་ན ཨ་ནུ་པྤ་ཏྟི་ཊྛཱ་ན་སྶ ཨ་བྷཱ་ཝཱ ‘‘ན་ཏྠཱི’’ཏི པ་ཊི་ཀྑེ་པོ ཀ་ཏོ.
༤༩. དུ་ཏི་ཡེ ཨ་ཀུ་ས་ལེཏི བྷ་ཝཾ ཨ་སྶཱ་དེ་ཏྭཱ ཨུ་པྤ་ནྣེ་སུ ནི་ཀ་ནྟི་ཛ་ཝ་ནེ་སུ དུ་ཏི་ཡེ ཛ་ཝ་ན་ཙི་ཏྟེ. དུ་ཏི་ཡེ ཙི་ཏྟེ ཝ་ཏྟ་མཱ་ནེཏི པ་ཊི་ས་ནྡྷི་ཏོ དུ་ཏི་ཡེ བྷ་ཝ་ངྒ་ཙི་ཏྟེ ཝ་ཏྟ་མཱ་ནེ ས་ཧ ཝཱ པ་ཊི་ས་ནྡྷི་ཡཱ བྷ་ཝ་ངྒཾ ཝི་པཱ་ཀ་ཝ་སེ་ན ཨེ་ཀ་མེ་ཝ ཀ་ཏྭཱ བྷ་ཝ་ནི་ཀ་ནྟི་ཡཱ ཨཱ་ཝ་ཛྫ་ན་ཙི་ཏྟེ. ཏ་ཉྷི ཀི་རི་ཡ་ཙི་ཏྟ་ཏྟཱ ཨ་བྱཱ་ཀ་ཏ་ཛཱ་ཏི་ཡཾ ཝི་པཱ་ཀ་ཏོ དུ་ཏི་ཡཾ ནཱ་མ ཧོ་ཏི.
༥༧. ཡ་སྶ ཙི་ཏྟ་སྶ ཨ་ན་ནྟ་རཱ ཨ་གྒ་མ་གྒནྟི གོ་ཏྲ་བྷུ་ཙི་ཏྟཾ ས་ནྡྷཱ་ཡ ཝུ་ཏྟཾ. ཀུ་ས་ལཱ དྷ་མྨཱ ཨུ་པྤ་ཛྫི་སྶ་ནྟཱིཏི ཏེ ཨ་གྒ་མ་གྒ་དྷ་མྨེ་ཡེ་ཝ ས་ནྡྷཱ་ཡ ཝུ་ཏྟཾ.
༧༩. ཡ་སྶ ཙི་ཏྟ་སྶ ཨ་ན་ནྟ་རཱ ཨ་གྒ་མ་གྒཾ པ་ཊི་ལ་བྷི་སྶ་ནྟི, ཏ་སྶ ཙི་ཏྟ་སྶ ཨུ་པྤཱ་ད་ཀྑ་ཎེཏི ཨི་དཾ ཙི་ཏྟ་ཛཱ་ཏི་ཝ་སེ་ན ཝུ་ཏྟཾ. ཏ་ཛྫཱ་ཏི་ཀ་སྶ ཧི ཨེ་ཀཱ་ཝ་ཛྫ་ནེ་ན ཨུ་པྤ་ནྣ་སྶ ཏ་ཏོ ཨོ་རི་མ་ཙི་ཏྟ་སྶ ཨུ་པྤཱ་ད་ཀྑ་ཎེ་པི ཨེ་ཏཾ ལ་ཀྑ་ཎཾ ལ་བྦྷ་ཏེ་ཝ.
༩༩. ནི་རོ་དྷ་ཝཱ་རེ་པི ཀུ་ས་ལཱ་ཀུ་ས་ལཱ་ནཾ ཨེ་ཀ་ཏོ ཨ་ནི་རུ་ཛ྄ཛྷ་ན་ཏོ ‘‘ནོ’’ཏི ཝུ་ཏྟཾ. ཨི་མི་ནཱ ན་ཡ་མུ་ཁེ་ན ས་བྦ་ཏྠ ཝི་ནི་ཙྪ་ཡོ ཝེ་དི་ཏ་བྦོ་ཏི.
དྷ་མྨ་ཡ་མ་ཀ་ཝ་ཎྞ་ནཱ ནི་ཊྛི་ཏཱ.