༡. མཱུ་ལ་ཡ་མ་ཀཾ
ཨུ་དྡེ་ས་ཝཱ་ར་ཝ་ཎྞ་ནཱ
༡. མཱུ་ལ་ཡ་མ་ཀཾ, ཁ་ནྡྷ་ཡ་མ་ཀཾ, ཨཱ་ཡ་ཏ་ན་ཡ་མ་ཀཾ, དྷཱ་ཏུ་ཡ་མ་ཀཾ, ས་ཙྩ་ཡ་མ་ཀཾ, ས་ངྑཱ་ར་ཡ་མ་ཀཾ, ཨ་ནུ་ས་ཡ་ཡ་མ་ཀཾ, ཙི་ཏྟ་ཡ་མ་ཀཾ, དྷ་མྨ་ཡ་མ་ཀཾ, ཨི་ནྡྲི་ཡ་ཡ་མ་ཀ་ནྟི ཨི་མེ་སཾ ད་ས་ནྣཾ ཡ་མ་ཀཱ་ནཾ ཝ་སེ་ན ཨི་དཾ པ་ཀ་ར་ཎཾ ད་ས་ཝི་དྷེ་ན ཝི་བྷ་ཏྟ་ནྟི ཧི ཝུ་ཏྟཾ. ཏ་ཏྠ ཡེ་སཾ ད་ས་ནྣཾ ཡ་མ་ཀཱ་ནཾ ཝ་སེ་ན ཨི་དཾ པ་ཀ་ར་ཎཾ ད་ས་ཝི་དྷེ་ན ཝི་བྷ་ཏྟཾ, ཏེ་ས་ཉྩེ་ཝ ཨི་མ་སྶ ཙ པ་ཀ་ར་ཎ་སྶ ནཱ་མ་ཏྠོ ཏཱ་ཝ ཨེ་ཝཾ ཝེ་དི་ཏ་བྦོ – ཀེ་ན་ཊྛེ་ན ཡ་མ་ཀ་ནྟི? ཡུ་ག་ལ༹་ཊྛེ་ན. ཡུ་ག་ལ༹་ཉྷི ཡ་མ་ཀ་ནྟི ཝུ་ཙྩ་ཏི – ‘ཡ་མ་ཀ་པཱ་ཊི་ཧཱ་རི་ཡཾ, ཡ་མ་ཀ་སཱ་ལཱ’ཏི་ཨཱ་དཱི་སུ ཝི་ཡ. ཨི་ཏི ཡུ་ག་ལ༹་ས་ངྑཱ་ཏཱ་ནཾ ཡ་མ་ཀཱ་ནཾ ཝ་སེ་ན དེ་སི་ཏ་ཏྟཱ ཨི་མེ་སུ ད་ས་སུ ཨེ་ཀེ་ཀཾ ཡ་མ་ཀཾ ནཱ་མ. ཨི་མེ་སཾ པ་ན ཡ་མ་ཀཱ་ནཾ ས་མཱུ་ཧ་བྷཱ་ཝ་ཏོ ས་བྦ་མྤེ་ཏཾ པ་ཀ་ར་ཎཾ ཡ་མ་ཀ་ནྟི ཝེ་དི་ཏ་བྦཾ.
ཏ་ཏྠ མཱུ་ལ་ཝ་སེ་ན པུ་ཙྪཱ་ཝི་སྶ་ཛྫ་ནཾ ཀ་ཏྭཱ དེ་སི་ཏ་ཏྟཱ ད་ས་ནྣཾ ཏཱ་ཝ ས་བྦ་པ་ཋ་མཾ མཱུ་ལ་ཡ་མ་ཀ་ནྟི ཝུ་ཏྟཾ. ཏ་སྶ ཨུ་དྡེ་ས་ཝཱ་རོ, ནི་དྡེ་ས་ཝཱ་རོ་ཏི དྭེ ཝཱ་རཱ ཧོ་ནྟི. ཏེ་སུ ཨུ་དྡི་ཊྛཱ་ནུ་ཀྐ་མེ་ན ནི་དྡི་སི་ཏ་བྦ་ཏྟཱ ཨུ་དྡེ་ས་ཝཱ་རོ པ་ཋ་མོ. ཏ་སྶ ཡེ ཀེ་ཙི ཀུ་ས་ལཱ དྷ་མྨཱ, ས་བྦེ ཏེ ཀུ་ས་ལ་མཱུ་ལཱ; ཡེ ཝཱ པ་ན ཀུ་ས་ལ་མཱུ་ལཱ, ས་བྦེ ཏེ དྷ་མྨཱ ཀུ་ས་ལཱཏི ཨི་དཾ ཡ་མ་ཀཾ ཨཱ་དི. ཏ་སྶ ཀུ་ས་ལཱ་ཀུ་ས་ལ་མཱུ་ལ་ས་ངྑཱ་ཏཱ་ནཾ དྭི་ནྣཾ ཨ་ཏྠཱ་ནཾ ཝ་སེ་ན ཨ་ཏྠ་ཡ་མ་ཀ་ནྟི ཝཱ, ཏེ་ས་ཉྙེ་ཝ ཨ་ཏྠཱ་ནཾ ཝ་སེ་ན ཨ་ནུ་ལོ་མ་པ་ཊི་ལོ་མ་ཏོ པ་ཝ་ཏྟ་པཱ་ལི༹་དྷ་མྨ་ཝ་སེ་ན དྷ་མྨ་ཡ་མ་ཀ་ནྟི ཝཱ, ཨ་ནུ་ལོ་མ་པ་ཊི་ལོ་མ་ཏོ པ་ཝ་ཏྟ་པུ་ཙྪཱ་ཝ་སེ་ན པུ་ཙྪཱ་ཡ་མ་ཀ་ནྟི ཝཱ ཏི་དྷཱ ཡ་མ་ཀ་བྷཱ་ཝོ ཝེ་དི་ཏ་བྦོ. སེ་སེ་སུ་པི ཨེ་སེ་ཝ ན་ཡོ.
ཨི་དཱ་ནི ཨི་མེ་སཾ ཡ་མ་ཀཱ་ནཾ ཝ་སེ་ན དེ་སི་ཏེ ཨི་མ་སྨིཾ མཱུ་ལ་ཡ་མ་ཀེ ཨུ་དྡེ་ས་ཝཱ་ར་སྶ ཏཱ་ཝ ན་ཡ་ཡ་མ་ཀ་པུ་ཙྪཱ་ཨ་ཏྠ་ཝཱ་ར་པྤ་བྷེ་ད་ཝ་སེ་ན པཱ་ལི༹་ཝ་ཝ་ཏྠཱ་ན་མེ་ཝ ཨེ་ཝཾ ཝེ་དི་ཏ་བྦཾ – ཀུ་ས་ལ་ཏྟི་ཀ་མཱ་ཏི་ཀཱ་ཡ ཧི ‘ཀུ་ས་ལཱ དྷ་མྨཱ’ཏི ཨི་དཾ ཨཱ་དི་པ་དཾ ནི་སྶཱ་ཡ མཱུ་ལ་ན་ཡོ, མཱུ་ལ་མཱུ་ལ་ན་ཡོ, མཱུ་ལ་ཀ་ན་ཡོ, མཱུ་ལ་མཱུ་ལ་ཀ་ན་ཡོ་ཏི ཨི་མེ ཙ་ཏྟཱ་རོ ན་ཡཱ ཧོ་ནྟི. ཏེ་སཾ ཨེ་ཀེ་ཀ་སྨིཾ ན་ཡེ མཱུ་ལ་ཡ་མ་ཀཾ, ཨེ་ཀ་མཱུ་ལ་ཡ་མ་ཀཾ, ཨ་ཉྙ་མ་ཉྙ་མཱུ་ལ་ཡ་མ་ཀ་ནྟི ཏཱི་ཎི ཏཱི་ཎི ཡ་མ་ཀཱ་ནི. ཨེ་ཝཾ ཙ་ཏཱུ་སུ ན་ཡེ་སུ དྭཱ་ད་ས ཡ་མ་ཀཱ་ནི, ཨེ་ཀེ་ཀ་སྨིཾ ཡ་མ་ཀེ ཨ་ནུ་ལོ་མ་པ་ཊི་ལོ་མ་ཝ་སེ་ན དྭེ དྭེ པུ་ཙྪཱ་ཏི ཙ་ཏུ་ཝཱི་ས་ཏི པུ་ཙྪཱ, ཨེ་ཀེ་ཀཱ་ཡ པུ་ཙྪཱ་ཡ ས་ནྣི་ཊྛཱ་ན་སཾ་ས་ཡ་ཝ་སེ་ན དྭེ དྭེ ཨ་ཏྠཱ་ཏི ཨ་ཊྛ་ཙ་ཏྟཱ་ལཱི་ས ཨ་ཏྠཱ་ཏི.
ཏ་ཏྠ ཡེ ཀེ་ཙི ཀུ་ས་ལཱ དྷ་མྨཱཏི ཀུ་ས་ལེ་སུ ‘‘ཀུ་ས་ལཱ ནུ ཁོ, ན ཀུ་ས་ལཱ ནུ ཁོ’’ཏི ས་ནྡེ་ཧཱ་བྷཱ་ཝ་ཏོ ཨི་མ་སྨིཾ པ་དེ ས་ནྣི་ཊྛཱ་ན་ཏྠོ ཝེ་དི་ཏ་བྦོ. ས་བྦེ ཏེ ཀུ་ས་ལ་མཱུ་ལཱཏི ‘‘ས་བྦེ ཏེ ཀུ་ས་ལཱ དྷ་མྨཱ ཀུ་ས་ལ་མཱུ་ལཱ ནུ ཁོ, ན་ནུ ཁོ’’ཏི ཨེ་ཝཾ ཝི་མ་ཏི་ཝ་སེ་ན པུ་ཙྪི་ཏ་ཏྟཱ ཨི་མ་སྨིཾ པ་དེ སཾ་ས་ཡ་ཏྠོ ཝེ་དི་ཏ་བྦོ. སོ ཙ ཁོ ཝེ་ནེ་ཡྻཱ་ནཾ སཾ་ས་ཡ་ཊྛཱ་ནེ སཾ་ས་ཡ་དཱི་པ་ན་ཏྠཾ ཝུ་ཏྟོ, ཏ་ཐཱ་ག་ཏ་སྶ པ་ན སཾ་ས་ཡོ ནཱ་མ ན་ཏྠི. ཨི་ཏོ པ་རེ་སུ་པི པུ་ཙྪཱ་པ་དེ་སུ ཨེ་སེ་ཝ ན་ཡོ.
ཡ་ཐཱ ཙ ཀུ་ས་ལ་པ་དཾ ནི་སྶཱ་ཡ ཨི་མེ ཙ་ཏྟཱ་རོ ན་ཡཱ, ཨེ་ཀེ་ཀ་སྨིཾ ན་ཡེ ཏི་ཎྞཾ ཏི་ཎྞཾ ཡ་མ་ཀཱ་ནཾ ཝ་སེ་ན དྭཱ་ད་ས ཡ་མ་ཀཱ་ནི, ཨེ་ཀེ་ཀ་སྨིཾ ཡ་མ་ཀེ དྭི་ནྣཾ དྭི་ནྣཾ པུ་ཙྪཱ་ནཾ ཝ་སེ་ན ཙ་ཏུ་ཝཱི་ས་ཏི པུ་ཙྪཱ; ཨེ་ཀེ་ཀཱ་ཡ པུ་ཙྪཱ་ཡ དྭི་ནྣཾ དྭི་ནྣཾ ཨ་ཏྠཱ་ནཾ ཝ་སེ་ན ཨ་ཊྛ་ཙ་ཏྟཱ་ལཱི་ས ཨ་ཏྠཱ ཙ ཧོ་ནྟི. ཨ་ཀུ་ས་ལ་པ་དཾ ནི་སྶཱ་ཡ་པི ཏ་ཐེ་ཝ. ཨ་བྱཱ་ཀ་ཏ་པ་དཾ ནི་སྶཱ་ཡ་པི ཏ་ཐེ་ཝ. ཏཱི་ཎི་པི པ་དཱ་ནི ཨེ་ཀ་ཏོ ཀ་ཏྭཱ ནི་དྡི་ཊྛཾ ནཱ་མ་པ་དཾ ནི་སྶཱ་ཡ་པི ཏ་ཐེ་ཝཱ་ཏི ཀུ་ས་ལ་ཏྟི་ཀ་མཱ་ཏི་ཀཱ་ཡ ཙ་ཏཱུ་སུ པ་དེ་སུ ས་བྦེ་པི སོ་ལ༹་ས ན་ཡཱ, ཨ་ཊྛ་ཙ་ཏྟཱ་ལཱི་ས ཡ་མ་ཀཱ་ནི, ཚ་ནྣ་ཝུ་ཏི པུ་ཙྪཱ, དྭེ་ན་ཝུ་ཏི་ས་ཏཾ ཨ་ཏྠཱ ཙ ཨུ་དྡེ་ས་ཝ་སེ་ན ཝུ་ཏྟཱ་ཏི ཝེ་དི་ཏ་བྦཱ. ཨེ་ཏྟཱ་ཝ་ཏཱ མཱུ་ལ་ཝཱ་རོ ནཱ་མ པ་ཋ་མཾ ཨུ་དྡི་ཊྛོ ཧོ་ཏི.
ཏ་ཏོ པ་རཾ ཡེ ཀེ་ཙི ཀུ་ས་ལཱ དྷ་མྨཱ, ས་བྦེ ཏེ ཀུ་ས་ལ་ཧེ་ཏཱུཏི་ཨཱ་ད་ཡོ ཏ་སྶེ་ཝ མཱུ་ལ་ཝཱ་ར་སྶ ཝེ་ཝ་ཙ་ན་ཝ་སེ་ན ན་ཝ ཝཱ་རཱ ཨུ་དྡི་ཊྛཱ. ཨི་ཏི མཱུ་ལ་ཝཱ་རོ, ཧེ་ཏུ་ཝཱ་རོ, ནི་དཱ་ན་ཝཱ་རོ, ས་མྦྷ་ཝ་ཝཱ་རོ, པ་བྷ་ཝ་ཝཱ་རོ, ས་མུ་ཊྛཱ་ན་ཝཱ་རོ, ཨཱ་ཧཱ་ར་ཝཱ་རོ, ཨཱ་ར་མྨ་ཎ་ཝཱ་རོ, པ་ཙྩ་ཡ་ཝཱ་རོ, ས་མུ་ད་ཡ་ཝཱ་རོ་ཏི ས་བྦེ་པི ད་ས ཝཱ་རཱ ཧོ་ནྟི. ཏ་ཏྠ མཱུ་ལ་ཝཱ་རེ ཨཱ་ག་ཏ་པ་རི་ཙྪེ་དེ་ནེ་ཝ སེ་སེ་སུ་པི ན་ཡཱ་ད་ཡོ ཝེ་དི་ཏ་བྦཱ་ཏི ས་བྦེ་སུ་པི ད་ས་སུ ཝཱ་རེ་སུ ས་ཊྛི་ས་ཏ་ན་ཡཱ, ཨ་སཱི་ཏི་ཨ་དྷི་ཀཱ་ནི ཙ་ཏྟཱ་རི ཡ་མ་ཀ་ས་ཏཱ་ནི, ས་ཊྛི་ཨ་དྷི་ཀཱ་ནི ན་ཝ་པུ་ཙྪཱ་ས་ཏཱ་ནི, ཝཱི་སཱ་དྷི་ཀཱ་ནི ཨེ་ཀཱུ་ན་ཝཱི་ས་ཏི ཨ་ཏྠ་ས་ཏཱ་ནི ཙ ཨུ་དྡི་ཊྛཱ་ནཱི་ཏི ཝེ་དི་ཏ་བྦཱ་ནི. ཨེ་ཝཾ ཏཱ་ཝ ཨུ་དྡེ་ས་ཝཱ་རེ ན་ཡ་ཡ་མ་ཀ་པུ་ཙྪཱ་ཨ་ཏྠ་ཝཱ་ར་པྤ་བྷེ་ད་ཝ་སེ་ན པཱ་ལི༹་ཝ་ཝ་ཏྠཱ་ན་མེ་ཝ ཝེ་དི་ཏ་བྦཾ.
མཱུ་ལཾ ཧེ་ཏུ ནི་དཱ་ན་ཉྩཱཏི གཱ་ཐཱ ད་ས་ནྣ་མྤི ཝཱ་རཱ་ནཾ ཨུ་དྡཱ་ན་གཱ་ཐཱ ནཱ་མ. ཏ་ཏྠ མཱུ་ལཱ་དཱི་ནི ས་བྦཱ་ནི་པི ཀཱ་ར་ཎ་ཝེ་ཝ་ཙ་ནཱ་ནེ་ཝ. ཀཱ་ར་ཎ་ཉྷི པ་ཏི་ཊྛཱ་ན་ཊྛེ་ན མཱུ་ལཾ. ཨ་ཏྟ་ནོ ཕ་ལ་ནི་པྥཱ་ད་ན་ཏྠཾ ཧི་ནོ་ཏི པ་ཝ་ཏྟ་ཏཱི་ཏི ཧེ་ཏུ. ‘ཧ་ནྡ, ནཾ ག་ཎྷཱ་ཐཱ’ཏི ད་སྶེ་ནྟཾ ཝི་ཡ ཨ་ཏྟ་ནོ ཕ་ལཾ ནི་དེ་ཏཱི་ཏི ནི་དཱ་ནཾ. ཨེ་ཏ་སྨཱ ཕ་ལཾ ས་མྦྷོ་ཏཱི་ཏི ས་མྦྷ་ཝོ. པ་བྷ་ཝ་ཏཱི་ཏི པ་བྷ་ཝོ. ས་མུ་ཊྛཱ་ཏི ཨེ་ཏྠ ཕ་ལཾ, ཨེ་ཏེ་ན ཝཱ ས་མུ་ཊྛཱ་ཏཱི་ཏི ས་མུ་ཊྛཱ་ནཾ. ཨ་ཏྟ་ནོ ཕ་ལཾ ཨཱ་ཧ་ར་ཏཱི་ཏི ཨཱ་ཧཱ་རོ. ཨ་པྤ་ཊི་ཀྑི་པི་ཏ་བྦེ་ན ཨ་ཏྟ་ནོ ཕ་ལེ་ན ཨཱ་ལ་མྦི་ཡ་ཏཱི་ཏི ཨཱ་ལ་མྦ་ཎཾ. ཨེ་ཏཾ པ་ཊི་ཙྩ ཨ་པྤ་ཊི་ཀྑི་པི་ཏྭཱ ཕ་ལཾ ཨེ་ཏི པ་ཝ་ཏྟ་ཏཱི་ཏི པ་ཙྩ་ཡོ. ཨེ་ཏ་སྨཱ ཕ་ལཾ ས་མུ་དེ་ཏཱི་ཏི ས་མུ་ད་ཡོ. ཨེ་ཝ་མེ་ཏེ་སཾ པ་དཱ་ནཾ ཝ་ཙ་ན་ཏྠོ ཝེ་དི་ཏ་བྦོ.
ཨུ་དྡེ་ས་ཝཱ་ར་ཝ་ཎྞ་ནཱ.
ནི་དྡེ་ས་ཝཱ་ར་ཝ་ཎྞ་ནཱ
༥༠. ཨི་དཱ་ནི ཡེ་ཀེ་ཙི ཀུ་ས་ལཱ དྷ་མྨཱཏི་ཨཱ་དི་ནཱ ན་ཡེ་ན ནི་དྡེ་ས་ཝཱ་རོ ཨཱ་ར་དྡྷོ. ཏ་ཏྠ ཡེ ཀེ་ཙཱིཏི ཨ་ན་ཝ་སེ་ས་ཝ་ཙ་ནཾ. ཀུ་ས་ལཱ དྷ་མྨཱཏི ཀུ་ས་ལ་ཏྟི་ཀ་སྶ པ་ད་བྷཱ་ཛ་ནེ ཝུ་ཏྟ་ལ་ཀྑ་ཎཱ ཨ་ན་ཝ་ཛྫ་སུ་ཁ་ཝི་པཱ་ཀཱ ཀུ་ས་ལ་ས་བྷཱ་ཝཱ. ས་བྦེ ཏེ ཀུ་ས་ལ་མཱུ་ལཱཏི ཀིཾ ཏེ ས་བྦེ་ཡེ་ཝ ཀུ་ས་ལ་མཱུ་ལཱ་ཏི པུ་ཙྪ་ཏི. ཏཱི་ཎེ་ཝ ཀུ་ས་ལ་མཱུ་ལཱ་ནཱིཏི ན ཏེ ས་བྦེ ཀུ་ས་ལ་མཱུ་ལཱ་ནི, ཨ་ལོ་བྷཱ་དཱི་ནི པ་ན ཏཱི་ཎི ཨེ་ཝ ཀུ་ས་ལ་མཱུ་ལཱ་ནཱི་ཏི ཨ་ཏྠོ. ཨ་ཝ་སེ་སཱ ཀུ་ས་ལཱ དྷ་མྨཱ ན ཀུ་ས་ལ་མཱུ་ལཱཏི ཨ་ཝ་སེ་སཱ ཕ་སྶཱ་ད་ཡོ ཀུ་ས་ལཱ དྷ་མྨཱ ཀུ་ས་ལ་མཱུ་ལཱ་ནི ནཱ་མ ན ཧོ་ནྟི. ཨ་ཐ ཝཱ ཨ་ཝ་སེ་སཱ ཕ་སྶཱ་ད་ཡོ ཀུ་ས་ལཱ དྷ་མྨཱ་ཡེ་ཝ ནཱ་མ, ན ཀུ་ས་ལ་མཱུ་ལཱ་ནཱི་ཏི་པི ཨ་ཏྠོ. ཡེ ཝཱ པ་ན ཀུ་ས་ལ་མཱུ་ལཱཏི ཡེ ཝཱ པ་ན པ་ཋ་མ་པུ་ཙྪཱ་ཡ དུ་ཏི་ཡ་པ་དེ་ན ཀུ་ས་ལ་མཱུ་ལཱ་ཏི ཏ་ཡོ ཨ་ལོ་བྷཱ་ད་ཡོ ག་ཧི་ཏཱ. ས་བྦེ ཏེ དྷ་མྨཱ ཀུ་ས་ལཱཏི ཀིཾ ཏེ ས་བྦེ ཏ་ཡོ་པི དྷ་མྨཱ ཀུ་ས་ལཱ་ཏི པུ་ཙྪ་ཏི. ཨཱ་མ་ནྟཱཏི ས་བྦེ་ས་མྤི ཀུ་ས་ལ་མཱུ་ལཱ་ནཾ ཀུ་ས་ལ་བྷཱ་ཝཾ ས་མྤ་ཊི་ཙྪ་ནྟོ ཨཱ་ཧ. ཨ་ཡཾ ཏཱ་ཝ མཱུ་ལ་ན་ཡེ མཱུ་ལ་ཡ་མ་ཀ་སྶ ཨ་ཏྠོ. ཨི་མི་ནཱ ཨུ་པཱ་ཡེ་ན ས་བྦ་པུ་ཙྪཱ་སུ ཝི་སྶ་ཛྫ་ན་ན་ཡོ ཝེ་དི་ཏ་བྦོ. ཡཾ པ་ན ཡ་ཏྠ ཝི་སེ་ས་མ་ཏྟཾ ཨ་ཏྠི, ཏ་དེ་ཝ ཝ་ཎྞ་ཡི་སྶཱ་མ.
༥༡. ཨེ་ཀ་མཱུ་ལ་ཡ་མ་ཀེ ཏཱ་ཝ ས་བྦེ ཏེ ཀུ་ས་ལ་མཱུ་ལེ་ན ཨེ་ཀ་མཱུ་ལཱཏི ག་ཎ་ན་ཊྛེ་ན ཨེ་ཀ་མཱུ་ལ་ཀཾ ཨ་གྒ་ཧེ་ཏྭཱ ས་མཱ་ན་ཊྛེ་ན ག་ཧེ་ཏ་བྦཱ. ཨ་ཡ་ཉྷེ་ཏྠ ཨ་ཏྠོ – ས་བྦེ ཏེ ཀུ་ས་ལ་མཱུ་ལེ་ན ས་མཱ་ན་མཱུ་ལཱ. ཡཾ ཕ་སྶ་སྶ མཱུ་ལཾ, ཏ་དེ་ཝ ཝེ་ད་ནཱ་དཱི་ན་ནྟི. ཨ་ཐ ནེ་སཾ ཏ་ཐཱ་བྷཱ་ཝཾ ས་མྤ་ཊི་ཙྪ་ནྟོ ཨཱ་མ་ནྟཱཏི ཨཱ་ཧ. ཀུ་ས་ལ་ས་མུ་ཊྛཱ་ནནྟི ཀུ་ས་ལ་ཙི་ཏྟ་ས་མུ་ཊྛཱ་ན་རཱུ་པཾ ད་སྶི་ཏཾ. ཨེ་ཀ་མཱུ་ལནྟི ཨ་ལོ་བྷཱ་དི་ནཱ ཀུ་ས་ལ་མཱུ་ལེ་ན ས་མཱ་ན་མཱུ་ལཾ. ཡ་ཐེ་ཝ ཧི ཕ་སྶཱ་དཱི་ནཾ ཨ་ལོ་བྷཱ་ད་ཡོ ཧེ་ཏུ་པ་ཙྩ་ཡ་ཏྟཱ མཱུ་ལཾ, ཏ་ཐཱ ཏཾ ས་མུ་ཊྛཱ་ན་རཱུ་པ་སྶཱ་པི, ཀུ་ས་ལ་ལ་ཀྑ་ཎཱ་བྷཱ་ཝེ་ན པ་ན ཏཾ ན ཀུ་ས་ལཾ.
༥༢. ཨ་ཉྙ་མ་ཉྙ་ཡ་མ་ཀེ ‘ཡེ་ཀེ་ཙི ཀུ་ས་ལཱ’ཏི ཨ་པུ་ཙྪི་ཏྭཱ ཡེ་ཀེ་ཙི ཀུ་ས་ལ་མཱུ་ལེ་ན ཨེ་ཀ་མཱུ་ལཱཏི པུ་ཙྪཱ ཀ་ཏཱ. ཀ་སྨཱ? ཨི་མི་ནཱ་པི བྱ་ཉྫ་ནེ་ན ཏ་སྶེ་ཝ་ཏྠ་སྶ ས་མྦྷ་ཝ་ཏོ. ཀུ་ས་ལ་མཱུ་ལཱ་ནཱིཏི ཨི་དཾ པུ་རི་མ་སྶ ཝི་སེ་ས་ནཾ. ‘མཱུ་ལཱ་ནི ཡཱ་ནི ཨེ་ཀ་ཏོ ཨུ་པྤ་ཛྫ་ནྟཱི’ཏི ཧི ཝུ་ཏྟཾ, ཏཱ་ནི པ་ན ཀུ་ས་ལ་མཱུ་ལཱ་ནི་པི ཧོ་ནྟི ཨ་ཀུ་ས་ལ་ཨ་བྱཱ་ཀ་ཏ་མཱུ་ལཱ་ནི་པི, ཨི་དྷ ཀུ་ས་ལ་མཱུ་ལཱ་ནཱི་ཏི ཝི་སེ་ས་ད་སྶ་ན་ཏྠ་མི་དཾ ཝུ་ཏྟཾ. ཨ་ཉྙ་མ་ཉྙ་མཱུ་ལཱ་ནི ཙཱཏི ཨ་ཉྙ་མ་ཉྙཾ ཧེ་ཏུ་པ་ཙྩ་ཡེ་ན པ་ཙྩ་ཡཱ ཧོ་ནྟཱི་ཏི ཨ་ཏྠོ. ཏ་སྶེ་ཝ པ་ཊི་ལོ་མ་པུ་ཙྪཱ་ཡ ‘ས་བྦེ ཏེ དྷ་མྨཱ ཀུ་ས་ལ་མཱུ་ལེ་ན ཨེ་ཀ་མཱུ་ལཱ’ཏི ཨ་ཝ་ཏྭཱ ས་བྦེ ཏེ དྷ་མྨཱ ཀུ་ས་ལཱཏི ཝུ་ཏྟཾ. ཀ་སྨཱ? ཨ་ཏྠ་ཝི་སེ་སཱ་བྷཱ་ཝ་ཏོ. ཀུ་ས་ལ་མཱུ་ལེ་ན ཨེ་ཀ་མཱུ་ལཱ་ཏི ཧི པུ་ཙྪཱ་ཡ ཀ་ཏཱ་ཡ ‘མཱུ་ལཱ་ནི ཡཱ་ནི ཨེ་ཀ་ཏོ ཨུ་པྤ་ཛྫ་ནྟཱི’ཏི ཧེ་ཊྛཱ ཝུ་ཏྟ་ན་ཡེ་ནེ་ཝ ཝི་སྶ་ཛྫ་ནཾ ཀཱ་ཏ་བྦཾ བྷ་ཝེ་ཡྻ, ཨེ་ཝ་ཉྩ ས་ཏི ཨ་ཏྠ་ཝི་སེ་སཱ་བྷཱ་ཝོ ཧོ་ཏི. ཏ་སྨཱ ཏ་ཐཱ ཨ་ཀ་ཏྭཱ ཨེ་ཝཾ པུ་ཙྪཱ ཀ་ཏཱ. ཨི་མི་ནཱ ཨུ་པཱ་ཡེ་ན མཱུ་ལ་མཱུ་ལ་ན་ཡཱ་དཱི་སུ་པི ཨ་ཉྙ་མ་ཉྙ་མཱུ་ལ་ཡ་མ་ཀེ པུ་ཙྪཱ་ཝི་སེ་སོ ཝེ་དི་ཏ་བྦོ.
༥༣-༥༥. མཱུ་ལ་མཱུ་ལ་ན་ཡེ ས་བྦེ ཏེ ཀུ་ས་ལ་མཱུ་ལ་མཱུ་ལཱཏི ས་བྦེ ཏེ ཀུ་ས་ལ་མཱུ་ལ་ས་ངྑཱ་ཏཱ མཱུ་ལཱ་ཏི པུ་ཙྪ་ཏི. ཨེ་ཀ་མཱུ་ལ་མཱུ་ལཱཏི ས་མཱ་ན་ཊྛེ་ན ཨེ་ཀ་མེ་ཝ མཱུ་ལ་མཱུ་ལཾ ཨེ་ཏེ་ས་ནྟི ཨེ་ཀ་མཱུ་ལ་མཱུ་ལཱ. ཨ་ཉྙ་མ་ཉྙ་མཱུ་ལ་མཱུ་ལཱཏི ཨ་ཉྙ་མ་ཉྙ་སྶ མཱུ་ལཾ ཨ་ཉྙ་མ་ཉྙ་མཱུ་ལཾ, ཨ་ཉྙ་མ་ཉྙ་མཱུ་ལཾ ཧེ་ཏུ་པ་ཙྩ་ཡ་ཊྛེ་ན མཱུ་ལཾ ཨེ་ཏེ་ས་ནྟི ཨ་ཉྙ་མ་ཉྙ་མཱུ་ལ་མཱུ་ལཱ.
༥༦. མཱུ་ལ་ཀ་ན་ཡེ ཀུ་ས་ལ་མཱུ་ལ་ཀཱཏི ཧེ་ཏུ་པ་ཙྩ་ཡ་ཊྛེ་ན ཀུ་ས་ལཾ མཱུ་ལཾ ཨེ་ཏེ་ས་ནྟི ཀུ་ས་ལ་མཱུ་ལ་ཀཱ.
༥༧-༦༡. མཱུ་ལ་མཱུ་ལ་ཀ་ན་ཡེ ཀུ་ས་ལ་མཱུ་ལ་མཱུ་ལ་ཀཱཏི ཀུ་ས་ལཱ་ནཾ མཱུ་ལཾ ཀུ་ས་ལ་མཱུ་ལཾ. ཧེ་ཏུ་པ་ཙྩ་ཡ་ཊྛེ་ནེ་ཝ ཀུ་ས་ལ་མཱུ་ལཾ མཱུ་ལཾ ཨེ་ཏེ་ས་ནྟི ཀུ་ས་ལ་མཱུ་ལ་མཱུ་ལ་ཀཱ་ཏི. ཨ་ཡཾ ཏཱ་ཝ ཀུ་ས་ལ་པ་དཾ ནི་སྶཱ་ཡ ན་ཡ་ཡ་མ་ཀ་པུ་ཙྪཱ་སུ ཝི་སེ་ས་ཏྠོ.
༦༢-༧༣. ཨ་ཀུ་ས་ལ་པ་དཱདཱི་སུ་པི ཨེ་སེ་ཝ ན་ཡོ. ཨ་ཡཾ པ་ན ཝི་སེ་སོ, ཨ་ཧེ་ཏུ་ཀཾ ཨ་ཀུ་ས་ལནྟི ཝི་ཙི་ཀི་ཙྪཱ་ཡ ཙེ་ཝ ཨུ་དྡྷ་ཙྩེ་ན ཙ ས་མྤ་ཡུ་ཏྟཾ མོ་ཧཾ ས་ནྡྷཱ་ཡ ཝུ་ཏྟཾ.
༧༤-༨༥. ཨ་ཧེ་ཏུ་ཀཾ ཨ་བྱཱ་ཀ་ཏནྟི ཨ་ཊྛཱ་ར་ས ཙི་ཏྟུ་པྤཱ་དཱ རཱུ་པཾ, ནི་བྦཱ་ན་ཉྩ. ཨ་བྱཱ་ཀ་ཏ་མཱུ་ལེ་ན ན ཨེ་ཀ་མཱུ་ལནྟི ཨི་དྷ པ་ན ཋ་པེ་ཏྭཱ ས་ཧེ་ཏུ་ཀ་ཨ་བྱཱ་ཀ་ཏ་ས་མུ་ཊྛཱ་ནཾ རཱུ་པཾ, སེ་སཾ ལ་བྦྷ་ཏི. ས་ཧེ་ཏུ་ཀ་ཨ་བྱཱ་ཀ་ཏ་ས་མུ་ཊྛཱ་ནཾ རཱུ་པཾ ཨ་བྱཱ་ཀ་ཏ་མཱུ་ལེ་ན ཨེ་ཀ་མཱུ་ལཾ ཧོ་ཏི, ཏཾ ཨ་བྦོ་ཧཱ་རི་ཀཾ ཀ་ཏྭཱ ཨེ་ཀ་ཏོ ལ་བྦྷ་མཱ་ན་ཀ་ཝ་སེ་ནེ་ཝ ཙེ་ཏཾ ཝི་སྶ་ཛྫ་ནཾ ཀ་ཏཾ.
༨༦-༩༧. ནཱ་མཱ དྷ་མྨཱཏི ནཱ་མ་ས་ངྑཱ་ཏཱ དྷ་མྨཱ. ཏེ ཨ་ཏྠ་ཏོ ཙ་ཏྟཱ་རོ ཨ་རཱུ་པི་ནོ ཁ་ནྡྷཱ, ནི་བྦཱ་ན་ཉྩ. ན་ཝེ་ཝ ནཱ་མ་མཱུ་ལཱ་ནཱིཏི ཀུ་ས་ལཱ་ཀུ་ས་ལ་ཨ་བྱཱ་ཀ་ཏ་མཱུ་ལ་ཝ་སེ་ན ན་ཝ མཱུ་ལཱ་ནི. ཨ་ཧེ་ཏུ་ཀཾ ནཱ་མཾ ནཱ་མ་མཱུ་ལེ་ན ན ཨེ་ཀ་མཱུ་ལནྟི ཨ་ཧེ་ཏུ་ཀཾ ས་བྦ་མྤི ཨ་ཊྛཱ་ར་ས ཙི་ཏྟུ་པྤཱ་ད་ཝི་ཙི་ཀི་ཙྪུ་དྡྷ་ཙྩ་ས་མྤ་ཡུ་ཏྟ་མོ་ཧ་ནི་བྦཱ་ན་ས་ངྑཱ་ཏཾ ནཱ་མཾ ནཱ་མ་མཱུ་ལེ་ན ན ཨེ་ཀ་མཱུ་ལཾ. ན ཧི ཏཾ ཏེ་ན ས་དྡྷིཾ ཨུ་པྤ་ཛྫ་ཏི. ས་ཧེ་ཏུ་ཀཾ ནཱ་མཾ ནཱ་མ་མཱུ་ལེ་ནཱཏི པ་དེ་པི ས་ཧེ་ཏུ་ཀཾ ནཱ་མཾ ནཱ་མ་མཱུ་ལེ་ནཱ་ཏི ཨ་ཏྠོ. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
མཱུ་ལ་ཝཱ་ར་ཝ་ཎྞ་ནཱ.
༩༨-༩༩. ཧེ་ཏུ་ཝཱ་རཱ་དཱི་སུ་པི ཨི་མི་ནཱ་ཝུ་པཱ་ཡེ་ན ཨ་ཏྠོ ཝེ་དི་ཏ་བྦོ. མཱུ་ལཾ ཧེ་ཏུ ནི་དཱ་ན་ཉྩཱཏི་གཱ་ཐཱ ཡ་ཐཱ་ནི་དྡི་ཊྛཱ་ནཾ ད་ས་ནྣ་མྤི ཝཱ་རཱ་ནཾ པུ་ན ཨུ་དྡཱ་ན་ཝ་སེ་ནེ་ཝ ཝུ་ཏྟཱ་ཏི.
མཱུ་ལ་ཡ་མ་ཀ་ཝ་ཎྞ་ནཱ.