༢༢. བཱ་ཝཱི་ས་ཏི་མ་ཝ་གྒོ
༡. པ་རི་ནི་བྦཱ་ན་ཀ་ཐཱ་ཝ་ཎྞ་ནཱ
༨༩༢. ཨི་དཱ་ནི པ་རི་ནི་བྦཱ་ན་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་སྨཱ ཨ་ར་ཧཱ ས་བྦ་ཉྙུ་ཝི་ས་ཡེ ཨ་པྤ་ཧཱི་ན་སཾ་ཡོ་ཛ་ནོ་ཝ པ་རི་ནི་བྦཱ་ཡ་ཏི, ཏ་སྨཱ ཨ་ཏྠི ཀི་ཉྩི སཾ་ཡོ་ཛ་ནཾ ཨ་པྤ་ཧཱ་ཡ པ་རི་ནི་བྦཱ་ན’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཧེ་ཊྛཱ ཝུ་ཏྟ་ན་ཡ་མེ་ཝཱ་ཏི.
པ་རི་ནི་བྦཱ་ན་ཀ་ཐཱ་ཝ་ཎྞ་ནཱ.
༢. ཀུ་ས་ལ་ཙི་ཏྟ་ཀ་ཐཱ་ཝ་ཎྞ་ནཱ
༨༩༤-༨༩༥. ཨི་དཱ་ནི ཀུ་ས་ལ་ཙི་ཏྟ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཨ་ར་ཧཱ ས་ཏི་ཝེ་པུ་ལླ་པྤ་ཏྟོ པ་རི་ནི་བྦཱ་ཡ་ནྟོ་པི ས་ཏོ ས་མྤ་ཛཱ་ནོ་ཝ པ་རི་ནི་བྦཱ་ཏི, ཏ་སྨཱ ཀུ་ས་ལ་ཙི་ཏྟོ པ་རི་ནི་བྦཱ་ཡ་ཏཱི་ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ཡ་སྨཱ ཀུ་ས་ལ་ཙི་ཏྟོ ནཱ་མ པུ་ཉྙཱ་བྷི་ས་ངྑཱ་རཱ་བྷི་ས་ངྑ་ར་ཎཱ་དི་ཝ་སེ་ན ཧོ་ཏི, ཏ་སྨཱ ཏེ་ན་ཏྠེ་ན ཙོ་དེ་ཏུཾ ཨ་ར་ཧཱ པུ་ཉྙཱ་བྷི་ས་ངྑཱ་རནྟི་ཨཱ་དི་མཱ་ཧ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ས་ཏོ ས་མྤ་ཛཱ་ནོཏི ཨི་དཾ ཛ་ཝ་ན་ཀྑ་ཎེ ཀི་རི་ཡ་ས་ཏི་ས་མྤ་ཛ་ཉྙཱ་ནཾ ཝ་སེ་ན ཨ་ས་མྨོ་ཧ་མ་ར་ཎ་དཱི་པ་ན་ཏྠཾ ཝུ་ཏྟཾ, ན ཀུ་ས་ལ་ཙི་ཏྟ་དཱི་པ་ན་ཏྠཾ. ཏ་སྨཱ ཨ་སཱ་དྷ་ཀ་ནྟི.
ཀུ་ས་ལ་ཙི་ཏྟ་ཀ་ཐཱ་ཝ་ཎྞ་ནཱ.
༣. ཨཱ་ནེ་ཉྫ་ཀ་ཐཱ་ཝ་ཎྞ་ནཱ
༨༩༦. ཨི་དཱ་ནི ཨཱ་ནེ་ཉྫ་ཀ་ཐཱ ནཱ་མ ཧོ་ཏི. ཏ་ཏྠ བྷ་ག་ཝཱ ཙ་ཏུ་ཏྠ་ཛ྄ཛྷཱ་ནེ ཋི་ཏོ པ་རི་ནི་བྦཱ་ཡཱི་ཏི ས་ལླ་ཀྑེ་ཏྭཱ ‘‘ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. པ་ཀ་ཏི་ཙི་ཏྟེཏི བྷ་ཝ་ངྒ་ཙི་ཏྟེ. ས་བྦེ ཧི ས་ཉྙི་ནོ ས་ཏྟཱ བྷ་ཝ་ངྒ་ཙི་ཏྟེ ཋ་ཏྭཱ བྷ་ཝ་ངྒ་པ་རི་ཡོ་སཱ་ནེ་ན ཙུ་ཏི་ཙི་ཏྟེ་ན ཀཱ་ལཾ ཀ་རོ་ནྟི. ཨི་ཏི ནཾ ཨི་མི་ནཱ ཨ་ཏྠེ་ན ཙོ་དེ་ཏུཾ ཨེ་ཝ་མཱ་ཧ. ཏ་ཏྠ ཀི་ཉྩཱ་པི ཙ་ཏུ་ཝོ་ཀཱ་ར་བྷ་ཝེ ཨ་ར་ཧ་ཏོ པ་ཀ་ཏི་ཙི་ཏྟ་མྤི ཨཱ་ནེ་ཉྫཾ ཧོ་ཏི, ཨ་ཡཾ པ་ན པ་ཉྷོ པ་ཉྩ་ཝོ་ཀཱ་ར་བྷ་ཝ་ཝ་སེ་ན ཨུ་དྡྷ་ཊོ. ཏ་སྨཱ ནོ ཙ ཝ་ཏ རེ ཝ་ཏྟ་བྦེཏི ཨཱ་ཧ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཨཱ་ནེ་ཉྫ་ཀ་ཐཱ་ཝ་ཎྞ་ནཱ.
༤. དྷ་མྨཱ་བྷི་ས་མ་ཡ་ཀ་ཐཱ་ཝ་ཎྞ་ནཱ
༨༩༧. ཨི་དཱ་ནི དྷ་མྨཱ་བྷི་ས་མ་ཡ་ཀ་ཐཱ ནཱ་མ ཧོ་ཏི. ཏ་ཏྠ ཨ་ཏཱི་ཏ་བྷ་ཝེ སོ་ཏཱ་པ་ནྣཾ མཱ་ཏུ་ཀུ་ཙྪི་ཡཾ ཝ་སི་ཏྭཱ ནི་ཀྑ་ནྟཾ དི་སྭཱ ‘‘ཨ་ཏྠི ག་བྦྷ་སེ་ཡྻཱ་ཡ དྷ་མྨཱ་བྷི་ས་མ་ཡོ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏ་ཏྠ དྷ་མྨཱ་བྷི་ས་མ་ཡོ ཨ་ཏྠི, དྷ་མྨཱ་བྷི་ས་མ་ཡ་སྶ ཀཱ་ར་ཎེ་ཧི དྷ་མྨ་དེ་ས་ནཱ་དཱི་ཧི བྷ་ཝི་ཏ་བྦ’’ནྟི ཙོ་དེ་ཏུཾ ཨ་ཏྠི ག་བྦྷ་སེ་ཡྻཱ་ཡ དྷ་མྨ་དེ་ས་ནཱཏི་ཨཱ་དི་མཱ་ཧ. སུ་ཏྟ་སྶཱཏི་ཨཱ་དི བྷ་ཝ་ངྒ་ཝཱ་རཾ ས་ནྡྷཱ་ཡ ཝུ་ཏྟཾ. ག་བྦྷ་སེ་ཡྻཱ་ཡ ཧི ཡེ་བྷུ་ཡྻེ་ན བྷ་ཝ་ངྒ་མེ་ཝ པ་ཝ་ཏྟ་ཏི. ཏེ་ནེ་ཝ ས་ཏྟོ ཀི་རི་ཡ་མ་ཡ་པྤ་ཝ་ཏྟཱ་བྷཱ་ཝཱ སུ་ཏྟོ, བྷཱ་ཝ་ནཱ་ནུ་ཡོ་ག་སྶ ཨ་བྷཱ་ཝཱ པ་མ་ཏྟོ, ཀ་མྨ་ཊྛཱ་ན་པ་རི་གྒཱ་ཧ་ཀཱ་ནཾ ས་ཏི་ས་མྤ་ཛ་ཉྙཱ་ནཾ ཨ་བྷཱ་ཝཱ མུ་ཊྛ་སྶ་ཏི ཨ་ས་མྤ་ཛཱ་ནོ ནཱ་མ ཧོ་ཏི, ཏ་ཐཱ་རཱུ་པ་སྶ ཀུ་ཏོ དྷ་མྨཱ་བྷི་ས་མ་ཡོ་ཏི?
དྷ་མྨཱ་བྷི་ས་མ་ཡ་ཀ་ཐཱ་ཝ་ཎྞ་ནཱ.
༥-༧. ཏི་སྶོ་པི་ཀ་ཐཱ་ཝ་ཎྞ་ནཱ
༨༩༨-༩༠༠. ཨི་དཱ་ནི ཏི་སྶོ་པི་ཀ་ཐཱ ནཱ་མ ཧོ་ནྟི. ཏ་ཏྠ ཨ་ཙི་ར་ཛཱ་ཏཱ་ནཾ པ་ན སོ་ཏཱ་པ་ནྣཱ་ནཾ ཨ་ར་ཧ་ཏྟ་པྤ་ཏྟིཾ སུ་པྤ་ཝཱ་སཱ་ཡ ཙ ཨུ་པཱ་སི་ཀཱ་ཡ ས་ཏྟ་ཝ་སྶི་ཀཾ ག་བྦྷཾ དི་སྭཱ ‘‘ཨ་ཏྠི ག་བྦྷ་སེ་ཡྻཱ་ཡ ཨ་ར་ཧ་ཏྟ་པྤ་ཏྟཱི’’ཏི ཙ སུ་པི་ནེ ཨཱ་ཀཱ་ས་ག་མ་ནཱ་དཱི་ནི དི་སྭཱ ‘‘ཨ་ཏྠི དྷ་མྨཱ་བྷི་ས་མ་ཡོ’’ཏི ཙ ‘‘ཨ་ཏྠི ཏ་ཏྠ ཨ་ར་ཧ་ཏྟ་པྤ་ཏྟཱི’’ཏི ཙ ཨི་དྷཱ་པི ཡེ་སཾ ལ་དྡྷི་ཡོ, སེ་ཡྻ་ཐཱ་པི ཏེ་ས་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ པུ་རི་མ་ཀ་ཐཱ ས་དི་ས་མེ་ཝཱ་ཏི.
ཏི་སྶོ་པི་ཀ་ཐཱ་ཝ་ཎྞ་ནཱ.
༨. ཨ་བྱཱ་ཀ་ཏ་ཀ་ཐཱ་ཝ་ཎྞ་ནཱ
༩༠༡-༩༠༢. ཨི་དཱ་ནི ཨ་བྱཱ་ཀ་ཏ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཨ་ཏྠེ་སཱ, བྷི་ཀྑ་ཝེ, ཙེ་ཏ་ནཱ, སཱ ཙ ཁོ ཨ་བྦོ་ཧཱ་རི་ཀཱ’’ཏི (པཱ་རཱ. ༢༣༥) ཝ་ཙ་ན་ཏོ ‘‘ས་བྦཾ སུ་པི་ན་ག་ཏ་སྶ ཙི་ཏྟཾ ཨ་བྱཱ་ཀ་ཏ’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ན་ཉྙེ་ཝ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ པཱ་ལི༹་མེ་ཝ ནི་ཡྻཱ་ཏི. སུ་པི་ན་ག་ཏ་སྶ ཙི་ཏྟཾ ཨ་བྦོ་ཧཱ་རི་ཀནྟི ཨི་དཾ ཨཱ་པ་ཏྟིཾ ས་ནྡྷཱ་ཡ ཝུ་ཏྟཾ. སུ་པི་ན་ག་ཏ་སྶ ཧི པཱ་ཎཱ་ཏི་པཱ་ཏཱ་དི་ཝ་སེ་ན ཀི་ཉྩཱ་པི ཨ་ཀུ་ས་ལ་ཙི་ཏྟཾ པ་ཝ་ཏྟ་ཏི, ཝ་ཏྠུ་ཝི་ཀོ་པ་ནཾ པ་ན ན་ཏྠཱི་ཏི ན ས་ཀྐཱ ཏ་ཏྠ ཨཱ་པ་ཏྟིཾ པ་ཉྙ་པེ་ཏུཾ. ཨི་མི་ནཱ ཀཱ་ར་ཎེ་ན ཏཾ ཨ་བྦོ་ཧཱ་རི་ཀཾ, ན ཨ་བྱཱ་ཀ་ཏ་ཏྟཱ་ཏི.
ཨ་བྱཱ་ཀ་ཏ་ཀ་ཐཱ་ཝ་ཎྞ་ནཱ.
༩. ཨཱ་སེ་ཝ་ན་པ་ཙྩ་ཡ་ཀ་ཐཱ་ཝ་ཎྞ་ནཱ
༩༠༣-༩༠༥. ཨི་དཱ་ནི ཨཱ་སེ་ཝ་ན་པ་ཙྩ་ཡ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ས་བྦེ དྷ་མྨཱ ཁ་ཎི་ཀཱ, ན ཀོ་ཙི མུ་ཧུ་ཏྟ་མྤི ཋ་ཏྭཱ ཨཱ་སེ་ཝ་ན་པ་ཙྩ་ཡཾ ཨཱ་སེ་ཝ་ཏི ནཱ་མ. ཏ་སྨཱ ན་ཏྠི ཀི་ཉྩི ཨཱ་སེ་ཝ་ན་པ་ཙྩ་ཡ་ཏཱ. ཨཱ་སེ་ཝ་ན་པ་ཙྩ་ཡ་ཏཱ་ཡ ཨུ་པྤ་ནྣཾ པ་ན ན ཀི་ཉྩི ཨ་ཏྠཱི་ཏི ཡེ་སཾ ལ་དྡྷི, སེ་ཡྻ་ཐཱ་པི ཏེ་ས་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ སུ་ཏྟ་ཝ་སེ་ནེ་ཝ པ་ཉྙཱ་པེ་ཏུཾ ན་ནུ ཝུ་ཏྟཾ བྷ་ག་ཝ་ཏཱ པཱ་ཎཱ་ཏི་པཱ་ཏོཏི་ཨཱ་དི ཨཱ་བྷ་ཏཾ. ཏཾ ས་བྦཾ ཨུ་ཏྟཱ་ན་ཏྠ་མེ་ཝཱ་ཏི.
ཨཱ་སེ་ཝ་ན་པ་ཙྩ་ཡ་ཀ་ཐཱ་ཝ་ཎྞ་ནཱ.
༡༠. ཁ་ཎི་ཀ་ཀ་ཐཱ་ཝ་ཎྞ་ནཱ
༩༠༦-༩༠༧. ཨི་དཱ་ནི ཁ་ཎི་ཀ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ས་བྦ་ས་ངྑ་ཏ་དྷ་མྨཱ ཨ་ནི་ཙྩཱ, ཏ་སྨཱ ཨེ་ཀ་ཙི་ཏྟ་ཀྑ་ཎི་ཀཱ་ཡེ་ཝ. ས་མཱ་ནཱ་ཡ ཧི ཨ་ནི་ཙྩ་ཏཱ་ཡ ཨེ་ཀོ ལ་ཧུཾ བྷི་ཛྫ་ཏི, ཨེ་ཀོ ཙི་རེ་ནཱ་ཏི ཀོ ཨེ་ཏྠ ནི་ཡཱ་མོ་ཏི ཡེ་སཾ ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་པ་ར་སེ་ལི་ཡཱ་ནཾ; ཏེ ས་ནྡྷཱ་ཡ ཨེ་ཀ་ཙི་ཏྟ་ཀྑ་ཎི་ཀཱཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཙི་ཏྟེ མ་ཧཱ་པ་ཐ་ཝཱིཏི་ཨཱ་དཱི་སུ ཏེ་སཾ ཏ་ཐཱ ས་ཎྛཱ་ནཾ ཨ་པ་སྶ་ནྟོ པ་ཊི་ཀྑི་པ་ཏི. ཙ་ཀྑཱ་ཡ་ཏ་ནནྟི་ཨཱ་དི ‘‘ཡ་དི ས་བྦེ ཨེ་ཀ་ཙི་ཏྟ་ཀྑ་ཎི་ཀཱ བྷ་ཝེ་ཡྻུཾ, ཙ་ཀྑཱ་ཡ་ཏ་ནཱ་དཱི་ནི ཙ་ཀྑུ་ཝི་ཉྙཱ་ཎཱ་དཱི་ཧི ས་དྡྷིཾ་ཡེ་ཝ ཨུ་པྤ་ཛྫི་ཏྭཱ ནི་རུ་ཛ྄ཛྷེ་ཡྻུ’’ནྟི ཙོ་ད་ན་ཏྠཾ ཝུ་ཏྟཾ. ཨི་ཏ་རོ པ་ན ཨ་ནྟོ་མཱ་ཏུ་ཀུ་ཙྪི་ག་ཏ་སྶ ཝི་ཉྙཱ་ཎུ་པྤ་ཏྟིཾ ས་ནྡྷཱ་ཡ པ་ཊི་ཀྑི་པ་ཏི, པ་ཝ་ཏྟཾ ས་ནྡྷཱ་ཡ ལ་དྡྷི་ཝ་སེ་ན པ་ཊི་ཛཱ་ནཱ་ཏི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི. ཏེ་ན ཧི ཨེ་ཀ་ཙི་ཏྟ་ཀྑ་ཎི་ཀཱཏི ཡ་སྨཱ ནི་ཙྩཱ ན ཧོ་ནྟི, ཏ་སྨཱ ཨེ་ཀ་ཙི་ཏྟ་ཀྑ་ཎི་ཀཱ་ཏི ཨ་ཏྟ་ནོ རུ་ཙི་ཡཱ ཀཱ་ར་ཎཾ ཝ་ད་ཏི. ཏཾ ཨ་ཝུ་ཏྟ་ས་དི་ས་མེ་ཝཱ་ཏི.
ཁ་ཎི་ཀ་ཀ་ཐཱ་ཝ་ཎྞ་ནཱ.
བཱ་ཝཱི་ས་ཏི་མོ ཝ་གྒོ.