༢༡. ཨེ་ཀ་ཝཱི་ས་ཏི་མ་ཝ་གྒོ
༡. སཱ་ས་ན་ཀ་ཐཱ་ཝ་ཎྞ་ནཱ
༨༧༨. ཨི་དཱ་ནི སཱ་ས་ན་ཀ་ཐཱ ནཱ་མ ཧོ་ཏི. ཏ་ཏྠ ཏི་སྶོ ས་ངྒཱི་ཏི་ཡོ ས་ནྡྷཱ་ཡ ‘‘སཱ་ས་ནཾ ན་ཝཾ ཀ་ཏ’’ནྟི ཙ ‘‘ཨ་ཏྠི ཀོ་ཙི ཏ་ཐཱ་ག་ཏ་སྶ སཱ་ས་ནཾ ན་ཝཾ ཀ་རོ་ཏཱི’’ཏི ཙ ‘‘ལ་བྦྷཱ ཏ་ཐཱ་ག་ཏ་སྶ སཱ་ས་ནཾ ན་ཝཾ ཀཱ་ཏུ’’ནྟི ཙ ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ཏཱི་སུ་པི ཀ་ཐཱ་སུ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ས་ཏི་པ་ཊྛཱ་ནཱཏི་ཨཱ་དི སཱ་ས་ནཾ ནཱ་མ ས་ཏི་པ་ཊྛཱ་ནཱ་ད་ཡོ ཙེ་ཝ ཨ་རི་ཡ་དྷ་མྨཱ, ཀུ་ས་ལཱ་དཱི་ན་ཉྩ དེ་ས་ནཱ. ཏ་ཏྠ ཡེ་སཾ བྷ་ག་ཝ་ཏཱ དེ་སི་ཏཱ ས་ཏི་པ་ཊྛཱ་ནཱ་ད་ཡོ, ཋ་པེ་ཏྭཱ ཏེ ཨ་ཉྙེ་སཾ ཝཱ ས་ཏི་པ་ཊྛཱ་ནཱ་དཱི་ནཾ ཀ་ར་ཎེ་ན ཨ་ཀུ་ས་ལཱ་དཱི་ནཾ ཝཱ ཀུ་ས་ལཱ་དི་བྷཱ་ཝ་ཀ་ར་ཎེ་ན སཱ་ས་ནཾ ན་ཝཾ་ཀ་ཏཾ ནཱ་མ བྷ་ཝེ་ཡྻ, ཀིཾ ཏཾ ཨེ་ཝཾ ཀ་ཏཾ ཀེ་ན་ཙི, ཨ་ཏྠི ཝཱ ཀོ་ཙི ཨེ་ཝཾ ཀ་རོ་ཏི, ལ་བྦྷཱ ཝཱ ཨེ་ཝཾ ཀཱ་ཏུ་ནྟི ཏཱི་སུ་པི པུ་ཙྪཱ་སུ ཙོ་ད་ན་ཏྠཾ ཝུ་ཏྟཾ. སེ་སཾ ས་བྦ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
སཱ་ས་ན་ཀ་ཐཱ་ཝ་ཎྞ་ནཱ.
༢. ཨ་ཝི་ཝི་ཏྟ་ཀ་ཐཱ་ཝ་ཎྞ་ནཱ
༨༧༩-༨༨༠. ཨི་དཱ་ནི ཨ་ཝི་ཝི་ཏྟ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྶ པུ་གྒ་ལ་སྶ ཡོ དྷ་མྨོ པ་ཙྩུ་པྤ་ནྣོ, སོ ཏེ་ན ཨ་ཝི་ཝི་ཏྟོ ནཱ་མཱ་ཏི ཨི་དཾ ས་ཀ་ས་མ་ཡེ ས་ནྣི་ཊྛཱ་ནཾ. ཡ་སྨཱ པ་ན པུ་ཐུ་ཛྫ་ནེ་ན ཏེ་དྷཱ་ཏུ་ཀཱ དྷ་མྨཱ ཨ་པ་རི་ཉྙཱ་ཏཱ, ཏ་སྨཱ སོ ཨེ་ཀ་ཀྑ་ཎེ་ཡེ་ཝ ས་བྦེ་ཧི་པི ཏེ་དྷཱ་ཏུ་ཀེ་ཧི དྷ་མྨེ་ཧི ཨ་ཝི་ཝི་ཏྟོ་ཏི ཡེ་སཾ ལ་དྡྷི, སེ་ཡྻ་ཐཱ་པི ཏེ་ས་ཉྙེ་ཝ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཕ་སྶེ་ཧཱིཏི་ཨཱ་དི ས་བྦེ་སཾ ཕ་སྶཱ་དཱི་ནཾ ཨེ་ཀ་ཀྑ་ཎེ པ་ཝ་ཏྟི་དོ་ས་ད་སྶ་ན་ཏྠཾ ཝུ་ཏྟཾ. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཨ་ཝི་ཝི་ཏྟ་ཀ་ཐཱ་ཝ་ཎྞ་ནཱ.
༣. ས་ཉྙོ་ཛ་ན་ཀ་ཐཱ་ཝ་ཎྞ་ནཱ
༨༨༡-༨༨༢. ཨི་དཱ་ནི ས་ཉྙོ་ཛ་ན་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཨ་ར་ཧཱ ས་བྦཾ བུ་དྡྷ་ཝི་ས་ཡཾ ན ཛཱ་ནཱ་ཏི, ཏ་སྨཱ ཏ་སྶ ཏ་ཏྠ ཨ་ཝི་ཛྫཱ་ཝི་ཙི་ཀི་ཙྪཱ་ཧི ཨ་པྤ་ཧཱི་ནཱ་ཧི བྷ་ཝི་ཏ་བྦ་ནྟི ས་ཉྙཱ་ཡ ‘‘ཨ་ཏྠི ཀི་ཉྩི ས་ཉྙོ་ཛ་ནཾ ཨ་པྤ་ཧཱ་ཡ ཨ་ར་ཧ་ཏྟ་པྤ་ཏྟཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཏྠི ཀི་ཉྩི ས་ཀྐཱ་ཡ་དི་ཊྛཱིཏི་ཨཱ་དི ཨ་ར་ཧ་ཏོ ས་བྦ་སཾ་ཡོ་ཛ་ན་པྤ་ཧཱ་ན་ད་སྶ་ན་ཏྠཾ ཝུ་ཏྟཾ. ས་བྦཾ བུ་དྡྷ་ཝི་ས་ཡནྟི པ་ཉྷ་དྭ་ཡེ ཨ་ར་ཧ་ཏོ ས་བྦ་ཉྙུ་ཏ་ཉྙཱ་ཎཱ་བྷཱ་ཝེ་ན པ་ཊི་སེ་དྷོ ཀ་ཏོ, ན ཨ་ཝི་ཛྫཱ་ཝི་ཙི་ཀི་ཙྪཱ་ནཾ ཨ་པྤ་ཧཱ་ནེ་ན. ཨི་ཏ་རོ པ་ན ཏེ་སཾ ཨ་པྤ་ཧཱི་ན་ཏཾ ས་ནྡྷཱ་ཡ ཏེ་ན ཧཱིཏི ལ་དྡྷིཾ པ་ཏི་ཊྛ་པེ་ཏི. སཱ ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛི་ཏཱ་ཝ ཧོ་ཏཱི་ཏི.
ས་ཉྙོ་ཛ་ན་ཀ་ཐཱ་ཝ་ཎྞ་ནཱ.
༤. ཨི་དྡྷི་ཀ་ཐཱ་ཝ་ཎྞ་ནཱ
༨༨༣-༨༨༤. ཨི་དཱ་ནི ཨི་དྡྷི་ཀ་ཐཱ ནཱ་མ ཧོ་ཏི. ཏ་ཏྠ ཨི་དྡྷི ནཱ་མེ་སཱ ཀ་ཏྠ་ཙི ཨི་ཛ྄ཛྷ་ཏི, ཀ་ཏྠ་ཙི ན ཨི་ཛ྄ཛྷ་ཏི, ཨ་ནི་ཙྩཱ་དཱི་ནཾ ནི་ཙྩཱ་དི་ཀ་ར་ཎེ ཨེ་ཀ་ནྟེ་ནེ་ཝ ན ཨི་ཛ྄ཛྷ་ཏི. ས་བྷཱ་ག་ས་ནྟ་ཏིཾ པ་ན པ་རི་ཝ་ཏྟེ་ཏྭཱ ཝི་ས་བྷཱ་ག་ས་ནྟ་ཏི་ཀ་ར་ཎེ ཝཱ ས་བྷཱ་ག་ས་ནྟ་ཏི་ཝ་སེ་ནེ་ཝ ཙི་ར་ཏ་ར་པྤ་ཝ་ཏྟ་ནེ ཝཱ ཡེ་སཾ ཨ་ཏྠཱ་ཡ ཀ་རི་ཡ་ཏི, ཏེ་སཾ པུ་ཉྙཱ་དཱི་ནི ཀཱ་ར་ཎཱ་ནི ནི་སྶཱ་ཡ ཀ་ཏྠ་ཙི ཨི་ཛ྄ཛྷ་ཏི, བྷི་ཀྑཱུ་ནཾ ཨ་ཏྠཱ་ཡ པཱ་ནཱི་ཡ་སྶ ས་པྤི་ཁཱི་རཱ་དི་ཀ་ར་ཎེ ཝི་ཡ མ་ཧཱ་དྷཱ་ཏུ་ནི་དྷཱ་ནེ དཱི་པཱ་དཱི་ནཾ ཙི་ར་ས་ནྟཱ་ན་པྤ་ཝ་ཏྟ་ནེ ཝི་ཡ ཙཱ་ཏི ཨི་དཾ ས་ཀ་ས་མ་ཡེ ས་ནྣི་ཊྛཱ་ནཾ. ཡཾ པ་ན ཨཱ་ཡ་སྨཱ པི་ལི་ནྡ་ཝ་ཙྪོ ར་ཉྙོ པཱ་སཱ་དཾ སུ་ཝ་ཎྞ་ནྟྭེ་ཝ ཨ་དྷི་མུ་ཙྩི, ཏཾ ནི་སྶཱ་ཡ ཡེ་སཾ ‘‘ཨ་ཏྠི ཨ་དྷི་པྤཱ་ཡ་ཨི་དྡྷཱི’’ཏི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ ཨ་ཏྠི ཨ་དྷི་པྤཱ་ཡ་ཨི་དྡྷཱིཏི པུ་ཙྪཱ ས་ཀ་ཝཱ་དི་སྶ. ཏ་ཏྠ ཨ་དྷི་པྤཱ་ཡ་ཨི་དྡྷཱིཏི ཨ་དྷི་པྤཱ་ཡ་ཨི་དྡྷི, ཡ་ཐཱ་དྷི་པྤཱ་ཡཾ ཨི་ཛ྄ཛྷ་ན་ཨི་དྡྷཱི་ཏི ཨ་ཏྠོ. ཨཱ་མ་ནྟཱཏི ལ་དྡྷི་མ་ཏྟེ ཋ་ཏྭཱ པ་ཊི་ཉྙཱ པ་ར་ཝཱ་དི་སྶ. ཨ་ཐ ནཾ ཨ་ནི་ཙྩཱ་དཱི་ནཾ ནི་ཙྩཱ་དི་ཏཱ་ཡ ཨ་ནུ་ཡུ་ཉྫི་ཏུཾ ནི་ཙྩ་པ་ཎྞཱ རུ་ཀྑཱ ཧོ་ནྟཱུཏི་ཨཱ་དི་མཱ་ཧ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝ. ལ་དྡྷི་པ་ཏི་ཊྛཱ་པ་ནེ སུ་ཝ་ཎྞོ ཙ པ་ནཱ་སཱིཏི ར་ཉྙོ པུ་ཉྙཱུ་པ་ནི་སྶ་ཡེ་ན ཨཱ་སི, ན ཀེ་ཝ་ལཾ ཐེ་ར་སྶ ཨ་དྷི་པྤཱ་ཡེ་ནེ་ཝ. ཏ་སྨཱ ཨ་སཱ་དྷ་ཀ་མེ་ཏ་ནྟི.
ཨི་དྡྷི་ཀ་ཐཱ་ཝ་ཎྞ་ནཱ.
༥. བུ་དྡྷ་ཀ་ཐཱ་ཝ་ཎྞ་ནཱ
༨༨༥. ཨི་དཱ་ནི བུ་དྡྷ་ཀ་ཐཱ ནཱ་མ ཧོ་ཏི. ཏ་ཏྠ ཋ་པེ་ཏྭཱ ཏ་སྨིཾ ཏ་སྨིཾ ཀཱ་ལེ ས་རཱི་ར་ཝེ་མ་ཏྟ་ཏཾ ཨཱ་ཡུ་ཝེ་མ་ཏྟ་ཏཾ པ་བྷཱ་ཝེ་མ་ཏྟ་ཏ་ཉྩ སེ་སེ་ཧི བུ་དྡྷ་དྷ་མྨེ་ཧི བུ་དྡྷཱ་ནཾ བུ་དྡྷེ་ཧི ཧཱི་ནཱ་ཏི་རེ་ཀ་ཏཱ ནཱ་མ ན་ཏྠི. ཡེ་སཾ པ་ན ཨ་ཝི་སེ་སེ་ནེ་ཝ ཨ་ཏྠཱི་ཏི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ ཨ་ཏྠི བུ་དྡྷཱ་ནནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ བུ་དྡྷ་དྷ་མྨེ་ཧི ཨ་ནུ་ཡུ་ཉྫི་ཏུཾ ས་ཏི་པ་ཊྛཱ་ན་ཏོཏི་ཨཱ་དི་མཱ་ཧ. ཨི་ཏ་རོ ཏེ་སཾ ཝ་སེ་ན ཧཱི་ནཱ་ཏི་རེ་ཀ་ཏཾ ཨ་པ་སྶ་ནྟོ པ་ཊི་ཀྑི་པ་ཏི་ཡེ་ཝཱ་ཏི.
བུ་དྡྷ་ཀ་ཐཱ་ཝ་ཎྞ་ནཱ.
༦. ས་བྦ་དི་སཱ་ཀ་ཐཱ་ཝ་ཎྞ་ནཱ
༨༨༦. ཨི་དཱ་ནི ས་བྦ་དི་སཱ་ཀ་ཐཱ ནཱ་མ ཧོ་ཏི. ཏ་ཏྠ ཙ་ཏཱུ་སུ དི་སཱ་སུ ཧེ་ཊྛཱ ཨུ་པ་རཱི་ཏི ས་མ་ནྟ་ཏོ ལོ་ཀ་དྷཱ་ཏུ་ས་ནྣི་ཝཱ་སཾ, ས་བྦ་ལོ་ཀ་དྷཱ་ཏཱུ་སུ ཙ བུ་དྡྷཱ ཨ་ཏྠཱི་ཏི ཨ་ཏྟ་ནོ ཝི་ཀ་པྤ་སི་པྤཾ ཨུ་པྤཱ་དེ་ཏྭཱ ‘‘ས་བྦ་དི་སཱ་སུ བུ་དྡྷཱ ཏི་ཊྛ་ནྟཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. པུ་ར་ཏྠི་མཱ་ཡཱཏི པུ་ཊྛོ ས་ཀྱ་མུ་ནིཾ ས་ནྡྷཱ་ཡ པ་ཊི་ཀྑི་པ་ཏི. པུ་ན པུ་ཊྛོ ལ་དྡྷི་ཝ་སེ་ན ཨ་ཉྙ་ལོ་ཀ་དྷཱ་ཏུ་ཡཾ ཋི་ཏཾ ས་ནྡྷཱ་ཡ པ་ཊི་ཛཱ་ནཱ་ཏི. ཀི་ནྣཱ་མོ སོ བྷ་ག་ཝཱཏི་ཨཱ་དི ‘‘ས་ཙེ ཏྭཾ ཛཱ་ནཱ་སི, ནཱ་མཱ་དི་ཝ་སེ་ན ནཾ ཀ་ཐེ་ཧཱི’’ཏི ཙོ་ད་ན་ཏྠཾ ཝུ་ཏྟཾ. ཨི་མི་ནཱ ཨུ་པཱ་ཡེ་ན ས་བྦ་ཏྠ ཨ་ཏྠོ ཝེ་དི་ཏ་བྦོ་ཏི.
ས་བྦ་དི་སཱ་ཀ་ཐཱ་ཝ་ཎྞ་ནཱ.
༧. དྷ་མྨ་ཀ་ཐཱ་ཝ་ཎྞ་ནཱ
༨༨༧-༨༨༨. ཨི་དཱ་ནི དྷ་མྨ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ རཱུ་པཱ་ད་ཡོ རཱུ་པཱ་དི་ས་བྷཱ་ཝེ་ན ནི་ཡ་ཏཱ ན ཏཾ ས་བྷཱ་ཝཾ ཝི་ཛ་ཧ་ནྟི, ཏ་སྨཱ ས་བྦ་དྷ་མྨཱ ནི་ཡ་ཏཱ་ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ན་ཉྩེ་ཝ ཨེ་ཀ་ཙྩཱ་ན་ཉྩ ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ས་བྦེ དྷ་མྨཱཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ས་ཙེ ཏེ ནི་ཡ་ཏཱ, མི་ཙྪ་ཏྟ་ནི་ཡ་ཏཱ ཝཱ སི་ཡུཾ ས་མྨ་ཏྟ་ནི་ཡ་ཏཱ ཝཱ, ཨི་ཏོ ཨ་ཉྙོ ནི་ཡཱ་མོ ནཱ་མ ན་ཏྠཱི’’ཏི ཙོ་དེ་ཏུཾ མི་ཙྪ་ཏྟ་ནི་ཡ་ཏཱཏི་ཨཱ་དི་མཱ་ཧ. ཏ་ཏྠ པ་ཊི་ཀྑེ་པོ ཙ པ་ཊི་ཉྙཱ ཙ པ་ར་ཝཱ་དི་སྶ. རཱུ་པཾ རཱུ་པ་ཊྛེ་ནཱཏི་ཨཱ་དི ཡེ་ན་ཏྠེ་ན ནི་ཡ་ཏཱ་ཏི ཝ་ད་ཏི, ཏ་སྶ ཝ་སེ་ན ཙོ་དེ་ཏུཾ ཝུ་ཏྟཾ. ཏ་ཏྲཱ་ཡཾ ཨ་དྷི་པྤཱ་ཡོ – རཱུ་པ་ཉྷི རཱུ་པ་ཊྛེ་ན ནི་ཡ་ཏ་ནྟི རཱུ་པཾ རཱུ་པ་མེ་ཝ, ན ཝེ་ད་ནཱ་དི་ས་བྷཱ་ཝ་ནྟི ཨ་དྷི་པྤཱ་ཡེ་ན ཝ་ཏྟ་བྦཾ, ཨི་ཏོ ཨ་ཉྙ་ཐཱ ན ཝ་ཏྟ་བྦཾ. ཀ་སྨཱ? རཱུ་པ་ཊྛ་ཏོ ཨ་ཉྙ་སྶ རཱུ་པ་སྶ ཨ་བྷཱ་ཝཱ. རཱུ་པ་ས་བྷཱ་ཝོ ཧི རཱུ་པ་ཊྛོ, རཱུ་པ་ས་བྷཱ་ཝོ ཙ རཱུ་པ་མེ་ཝ, ན རཱུ་པ་ཏོ ཨ་ཉྙོ. ཝེ་ད་ནཱ་དཱི་ཧི པ་ན་སྶ ནཱ་ན་ཏྟ་པ་ཉྙཱ་པ་ན་ཏྠཾ ཨེ་ས ཝོ་ཧཱ་རོ ཧོ་ཏཱི་ཏི. ཏ་སྨཱ ‘‘རཱུ་པཾ རཱུ་པ་ཊྛེ་ན ནི་ཡ་ཏ’’ནྟི ཝ་ད་ནྟེ་ན རཱུ་པཾ ནི་ཡ་ཏ་ནྟི ཝུ་ཏྟཾ ཧོ་ཏི. ནི་ཡ་ཏ་ཉྩ ནཱ་མ མི་ཙྪ་ཏྟ་ནི་ཡ་ཏཾ ཝཱ སི་ཡཱ ས་མྨ་ཏྟ་ནི་ཡ་ཏཾ ཝཱ, ཨི་ཏོ ཨ་ཉྙོ ནི་ཡཱ་མོ ནཱ་མ ན་ཏྠཱི་ཏི. ཨ་ཐ ཀ་སྨཱ པ་ཊི་ཛཱ་ནཱ་ཏཱི་ཏི? ཨ་ཏྠ་ནྟ་ར་ཝ་སེ་ན. རཱུ་པཾ རཱུ་པ་ཊྛེ་ན ནི་ཡ་ཏནྟི ཨེ་ཏྠ ཧི རཱུ་པཾ རཱུ་པ་མེ་ཝ, ན ཝེ་ད་ནཱ་དི་ས་བྷཱ་ཝ་ནྟི ཨ་ཡ་མ་ཏྠོ. ཏ་སྨཱ པ་ཊི་ཛཱ་ནཱ་ཏི. ཨི་ཏོ ཨ་ཉྙ་ཐཱ པ་ན་སྶ ནི་ཡ་ཏ་ཏྟཾ ན་ཏྠཱི་ཏི པུ་ན ཏེ་ནེ་ཝ ན་ཡེ་ན ཙོ་དེ་ཏུཾ མི་ཙྪ་ཏྟ་ནི་ཡ་ཏནྟི་ཨཱ་དི་མཱ་ཧ. ཏཾ ས་བྦཾ ཨུ་ཏྟཱ་ན་ཏྠ་མེ་ཝ. ཏེ་ན ཧི རཱུ་པནྟི ལ་དྡྷི་པི ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛི་ཏཱ་ཝ ཧོ་ཏཱི་ཏི.
དྷ་མྨ་ཀ་ཐཱ་ཝ་ཎྞ་ནཱ.
༨. ཀ་མྨ་ཀ་ཐཱ་ཝ་ཎྞ་ནཱ
༨༨༩-༨༩༡. ཨི་དཱ་ནི ཀ་མྨ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་སྨཱ དི་ཊྛ་དྷ་མྨ་ཝེ་ད་ནཱི་ཡཱ་དཱི་ནི དི་ཊྛ་དྷ་མྨ་ཝེ་ད་ནཱི་ཡ་ཊྛཱ་དཱི་ཧི ནི་ཡ་ཏཱ་ནི, ཏ་སྨཱ ས་བྦེ ཀ་མྨཱ ནི་ཡ་ཏཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཏེ་ས་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. དི་ཊྛ་དྷ་མྨ་ཝེ་ད་ནཱི་ཡ་ཊྛེ་ན ནི་ཡ་ཏནྟི ཨེ་ཏྠ དི་ཊྛ་དྷ་མྨ་ཝེ་ད་ནཱི་ཡཾ དི་ཊྛ་དྷ་མྨ་ཝེ་ད་ནཱི་ཡ་ཊྛ་མེ་ཝ. ས་ཙེ དི་ཊྛེ་ཝ དྷ་མྨེ ཝི་པཱ་ཀཾ དཱ་ཏུཾ ས་ཀྐོ་ཏི དེ་ཏི, ནོ ཙེ ཨ་ཧོ་སི་ཀ་མྨཾ ནཱ་མ ཧོ་ཏཱི་ཏི ཨི་མ་མ་ཏྠཾ ས་ནྡྷཱ་ཡ པ་ཊི་ཉྙཱ ས་ཀ་ཝཱ་དི་སྶ. མི་ཙྪ་ཏྟ་ས་མྨ་ཏྟ་ནི་ཡཱ་མ་ཝ་སེ་ན པ་ནེ་ཏཾ ཨ་ནི་ཡ་ཏ་མེ་ཝཱ་ཏི ས་བྦཾ ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦ་ནྟི.
ཀ་མྨ་ཀ་ཐཱ་ཝ་ཎྞ་ནཱ.
ཨེ་ཀ་ཝཱི་ས་ཏི་མོ ཝ་གྒོ.