༢༠. ཝཱི་ས་ཏི་མ་ཝ་གྒོ
༡. ཨ་ས་ཉྩི་ཙྩ་ཀ་ཐཱ་ཝ་ཎྞ་ནཱ
༨༥༧-༨༦༢. ཨི་དཱ་ནི ཨ་ས་ཉྩི་ཙྩ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཨཱ་ན་ནྟ་རི་ཡ་ཝ་ཏྠཱུ་ནི ནཱ་མ ག་རཱུ་ནི བྷཱ་རི་ཡཱ་ནི, ཏ་སྨཱ ཨ་ས་ཉྩི་ཙྩཱ་པི ཏེ་སུ ཝ་ཏྠཱུ་སུ ཝི་ཀོ་པི་ཏེ་སུ ཨཱ་ན་ནྟ་རི་ཀོ ཧོ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ཨ་ས་ཉྩི་ཙྩཱཏི པུ་ཙྪཱ ས་ཀ་ཝཱ་དི་སྶ, ལ་དྡྷི་ཝ་སེ་ན པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་སྨཱ ཨཱ་ན་ནྟ་རི་ཡ་ཀ་མྨཾ ནཱ་མ ཀ་མྨ་པ་ཐ་པྤ་ཏྟཾ. ཡ་དི ཙ ཨ་ས་ཉྩི་ཙྩ ཀ་མྨ་པ་ཐ་བྷེ་དོ སི་ཡཱ, ཨ་ཝ་སེ་སཱ པཱ་ཎཱ་ཏི་པཱ་ཏཱ་ད་ཡོ་པི ཨ་ས་ཉྩི་ཙྩ བྷ་ཝེ་ཡྻུ’’ནྟི ཙོ་ད་ན་ཏྠཾ ཨ་ས་ཉྩི་ཙྩ་པཱ་ཎཾ ཧ་ནྟྭཱཏི་ཨཱ་དི་མཱ་ཧ. ཨི་ཏ་རོ ཏ་ཐཱ་རཱུ་པཱ་ཡ ལ་དྡྷི་ཡཱ ཨ་བྷཱ་ཝེ་ན པ་ཊི་ཀྑི་པ་ཏི. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ན ཝ་ཏྟ་བྦཾ མཱ་ཏུ་གྷཱ་ཏ་ཀོཏི པུ་ཙྪཱ པ་ར་ཝཱ་དི་སྶ, རོ་ག་པ་ཊི་ཀཱ་རཱ་དི་ཀཱ་ལེ ཨ་ས་ཉྩི་ཙྩ གྷཱ་ཏཾ ས་ནྡྷཱ་ཡ པ་ཊི་ཉྙཱ ས་ཀ་ཝཱ་དི་སྶ. ན་ནུ མཱ་ཏཱ ཛཱི་ཝི་ཏཱ ཝོ་རོ་པི་ཏཱཏི པ་ཉྷེ་པི ཨ་ས་ཉྩི་ཙྩ ཝོ་རོ་པི་ཏཾ ས་ནྡྷཱ་ཡ པ་ཊི་ཉྙཱ ས་ཀ་ཝཱ་དི་སྶེ་ཝ. ཨེ་ཝཾ ཨ་དྷི་པྤཱ་ཡཾ པ་ན ཨ་གྒ་ཧེ་ཏྭཱ ཧ་ཉྩཱི་ཏི ལ་དྡྷི་པ་ཏི་ཊྛཱ་པ་ནཾ ཨི་ཏ་ར་སྶ. ཏཾ ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛི་ཏ་མེ་ཝ. པི་ཏུ་གྷཱ་ཏ་ཀཱ་དཱི་སུ་པི ཨེ་སེ་ཝ ན་ཡོ. ས་ངྒྷ་བྷེ་ད་ཀེ པ་ན དྷ་མྨ་ས་ཉྙིཾ ས་ནྡྷཱ་ཡ ས་ངྒྷ་བྷེ་དོ ཨཱ་ན་ནྟ་རི་ཀོཏི པུ་ཙྪཱ ས་ཀ་ཝཱ་དི་སྶ, ‘‘ས་ངྒྷཾ ས་མ་གྒཾ བྷེ་ཏྭཱ་ན, ཀ་པྤཾ ནི་ར་ཡ་མྷི པ་ཙྩ་ཏཱི’’ཏི ཝ་ཙ་ནཾ ཨ་ཡོ་ནི་སོ ག་ཧེ་ཏྭཱ པ་ཊི་ཉྙཱ པ་ར་ཝཱ་དི་སྶ. པུ་ན ས་བྦེཏི པུ་ཊྛོ ས་ཀ་པ་ཀྑེ དྷ་མྨ་ས་ཉྙིཾ ས་ནྡྷཱ་ཡ པ་ཊི་ཀྑི་པ་ཏི, པ་ར་པ་ཀྑེ དྷ་མྨ་ས་ཉྙིཾ ས་ནྡྷཱ་ཡ པ་ཊི་ཛཱ་ནཱ་ཏི. དྷ་མྨ་ས་ཉྙཱིཏི པ་ཉྷ་དྭ་ཡེ་པི ཨེ་སེ་ཝ ན་ཡོ. ན་ནུ ཝུ་ཏྟཾ བྷ་ག་ཝ་ཏཱཏི སུ་ཏྟཾ ཨེ་ཀ་ནྟེ་ནེ་ཝ དྷ་མྨ་ཝཱ་དི་སྶ ཨཱ་ན་ནྟ་རི་ཀ་བྷཱ་ཝ་ད་སྶ་ན་ཏྠཾ ཝུ་ཏྟཾ. ཨཱ་པཱ་ཡི་ཀོ ནེ་ར་ཡི་ཀོཏི གཱ་ཐཱ་ཡ་པི ཨ་དྷ་མྨ་ཝཱ་དཱི་ཡེ་ཝ ཨ་དྷི་པྤེ་ཏོ. ཨི་ཏ་རོ པ་ན ཨ་དྷི་པྤཱ་ཡཾ ཨ་གྒ་ཧེ་ཏྭཱ ལ་དྡྷིཾ པ་ཏི་ཊྛ་པེ་ཏི. སཱ ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛི་ཏཱ་ཡེ་ཝཱ་ཏི.
ཨ་ས་ཉྩི་ཙྩ་ཀ་ཐཱ་ཝ་ཎྞ་ནཱ.
༢. ཉཱ་ཎ་ཀ་ཐཱ་ཝ་ཎྞ་ནཱ
༨༦༣-༨༦༥. ཨི་དཱ་ནི ཉཱ་ཎ་ཀ་ཐཱ ནཱ་མ ཧོ་ཏི. ཏ་ཏྠ དུ་ཝི་དྷཾ ཉཱ་ཎཾ – ལོ་ཀི་ཡ་ཉྩ ལོ་ཀུ་ཏྟ་ར་ཉྩ. ལོ་ཀི་ཡཾ ས་མཱ་པ་ཏྟི་ཉཱ་ཎ་མྤི ཧོ་ཏི དཱ་ནཱ་དི་ཝ་སེ་ན པ་ཝ་ཏྟཾ ཀ་མྨ་སྶ་ཀ་ཏ་ཉཱ་ཎ་མྤི; ལོ་ཀུ་ཏྟ་རཾ ས་ཙྩ་པ་རི་ཙྪེ་ད་ཀཾ མ་གྒ་ཉཱ་ཎ་མྤི ཕ་ལ་ཉཱ་ཎ་མྤི. ཨི་མཾ པ་ན ཝི་བྷཱ་གཾ ཨ་ཀ་ཏྭཱ ‘‘ས་ཙྩ་པ་རི་ཙྪེ་ད་ཀ་མེ་ཝ ཉཱ་ཎཾ ན ཨི་ཏ་རཾ, ཏ་སྨཱ ན་ཏྠི པུ་ཐུ་ཛྫ་ན་སྶ ཉཱ་ཎ’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. པ་ཉྙཱཏི་ཨཱ་དི ཉཱ་ཎ་ཝེ་ཝ་ཙ་ན་ད་སྶ་ན་ཏྠཾ ཝུ་ཏྟཾ. ཏེ་ནེ་ཏཾ དཱི་པེ་ཏི – ཡ་དི ཏ་སྶ ཉཱ་ཎཾ ན་ཏྠི, པ་ཉྙཱ་ད་ཡོ་པི ན་ཏྠི. ཨ་ཐ པ་ཉྙཱ་ད་ཡོ ཨ་ཏྠི, ཉཱ་ཎ་མྤི ཨ་ཏྠི. ཀ་སྨཱ? པ་ཉྙཱ་དཱི་ནཾ ཉཱ་ཎ་ཏོ ཨ་ན་ཉྙ་ཏྟཱ་ཏི. པ་ཋ་མཾ ཛྷཱ་ནནྟི་ཨཱ་དི ས་མཱ་པ་ཏྟི་ཉཱ་ཎ་སྶ ད་སྶ་ན་ཏྠཾ ཝུ་ཏྟཾ. དཱ་ནཾ ད་དེ་ཡྻཱཏི་ཨཱ་དི ཀ་མྨ་སྶ་ཀ་ཏ་ཉཱ་ཎ་སྶ. དུ་ཀྑཾ པ་རི་ཛཱ་ནཱ་ཏཱིཏི ལོ་ཀུ་ཏྟ་ར་མ་གྒ་ཉཱ་ཎ་མེ་ཝ དཱི་པེ་ཏི, ན ཙ ལོ་ཀུ་ཏྟ་ར་མེ་ཝ ཉཱ་ཎ་ནྟི.
ཉཱ་ཎ་ཀ་ཐཱ་ཝ་ཎྞ་ནཱ.
༣. ནི་ར་ཡ་པཱ་ལ་ཀ་ཐཱ་ཝ་ཎྞ་ནཱ
༨༦༦. ཨི་དཱ་ནི ནི་ར་ཡ་པཱ་ལ་ཀ་ཐཱ ནཱ་མ ཧོ་ཏི. ཏ་ཏྠ ‘‘ནི་ར་ཡེ ནེ་ར་ཡི་ཀ་ཀ་མྨཱ་ནེ་ཝ ནི་ར་ཡ་པཱ་ལ་རཱུ་པ་ཝ་སེ་ན ཝ་དྷེ་ནྟི, ན་ཏྠི ནི་ར་ཡ་པཱ་ལཱ ནཱ་མ ས་ཏྟཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏ་ཏྠ ནི་ར་ཡ་པཱ་ལཱ ན སི་ཡུཾ, ཀ་མྨ་ཀཱ་ར་ཎཱ་པི ན བྷ་ཝེ་ཡྻུཾ. ཀཱ་ར་ཎི་ཀེ་སུ ཧི ས་ཏི ཀཱ་ར་ཎཱ’’ཏི ཙོ་དེ་ཏུཾ ན་ཏྠི ནི་ར་ཡེ་སཱུཏི་ཨཱ་དི་མཱ་ཧ.
༨༦༧-༨༦༨. ཨ་ཏྠི མ་ནུ་སྶེ་སཱུཏི པ་ཙྩ་ཀྑེ་ན ཉཱ་པ་ན་ཏྠཾ. ཡ་ཐཱ ཧི མ་ནུ་སྶེ་སུ ས་ཏི ཀཱ་ར་ཎི་ཀེ་སུ ཀཱ་ར་ཎཱ, ཨེ་ཝཾ ཏ་ཏྠཱ་པཱི་ཏི ཨ་ཡ་མེ་ཏྠ ཨ་དྷི་པྤཱ་ཡོ. ཨ་ཏྠི ནི་ར་ཡེ་སཱུཏི པུ་ཙྪཱ པ་ར་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ན ཝེ་སྶ་བྷཱུ ནོ་པི ཙ པེ་ཏྟི་རཱ་ཛཱཏི པ་ར་ཝཱ་དི་ནཱ ས་ཀ་ས་མ་ཡ་ཏོ སུ་ཏྟཾ ཨཱ་བྷ་ཏཾ. ཏཾ པ་ན སཱ་ས་ནཱ་ཝ་ཙ་རི་ཀ་ནྟི ས་ཀ་ཝཱ་དི་ནཱ ཨ་ནུ་ཉྙཱ་ཏཾ. ཏ་ཏྠ ཝེ་སྶ་བྷཱུཏི ཨེ་ཀོ དེ་ཝོ. པེ་ཏྟི་རཱ་ཛཱཏི པེ་ཏྟི་ཝི་ས་ཡེ པེ་ཏ་མ་ཧི་དྡྷི་ཀོ. སོ་མཱད་ཡོ པཱ་ཀ་ཊཱ ཨེ་ཝ. ཨི་དཾ ཝུ་ཏྟཾ ཧོ་ཏི – ཨ་ཏྟ་ནོ ཀ་མྨེ་ཧི ཨི་ཏོ པ་ཎུ་ནྣཾ པ་ར་ལོ་ཀཾ པ་ཏྟཾ པུ་རི་སཾ ན ཨེ་ཏེ ཝེ་སྶ་བྷཱུ་ཨཱ་ད་ཡོ ཧ་ན་ནྟི. ཡེ་ཧི པ་ན སོ ཀ་མྨེ་ཧི ཏ་ཏྠ པ་ཎུ་ནྣོ, ཏཱ་ནི ས་ཀཱ་ནི ཀ་མྨཱ་ནི་ཡེ་ཝ ནཾ ཏ་ཏྠ ཧ་ན་ནྟཱི་ཏི ཀ་མྨ་སྶ་ཀ་ཏཾ དཱི་པེ་ཏི, ན ནི་ར་ཡ་པཱ་ལཱ་ནཾ ཨ་བྷཱ་ཝཾ. ས་ཀ་ཝཱ་དི་ནཱ པ་ན ཏ་མེ་ནཾ, བྷི་ཀྑ་ཝེཏི ཨཱ་བྷ་ཏཱ་ནི སུ་ཏྟ་པ་དཱ་ནི ནཱི་ཏ་ཏྠཱ་ནེ་ཝཱ་ཏི.
ནི་ར་ཡ་པཱ་ལ་ཀ་ཐཱ་ཝ་ཎྞ་ནཱ.
༤. ཏི་ར་ཙྪཱ་ན་ཀ་ཐཱ་ཝ་ཎྞ་ནཱ
༨༦༩-༨༧༡. ཨི་དཱ་ནི ཏི་ར་ཙྪཱ་ན་ཀ་ཐཱ ནཱ་མ ཧོ་ཏི. ཏ་ཏྠ དེ་ཝེ་སུ ཨེ་རཱ་ཝ་ཎཱ་ད་ཡོ དེ་ཝ་པུ་ཏྟཱ ཧ་ཏྠི་ཝ་ཎྞཾ ཨ་སྶ་ཝ་ཎྞཾ ཝི་ཀུ་བྦ་ནྟི, ན་ཏྠི ཏ་ཏྠ ཏི་ར་ཙྪཱ་ན་ག་ཏཱ. ཡེ་སཾ པ་ན ཏི་ར་ཙྪཱ་ན་ཝ་ཎྞི་ནོ དེ་ཝ་པུ་ཏྟེ དི་སྭཱ ‘‘ཨ་ཏྠི དེ་ཝེ་སུ ཏི་ར་ཙྪཱ་ན་ག་ཏཱ’’ཏི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི དེ་ཝ་ཡོ་ནི་ཡཾ ཏི་ར་ཙྪཱ་ན་ག་ཏཱ སི་ཡུཾ, ཏི་ར་ཙྪཱ་ན་ཡོ་ནི་ཡ་མྤི དེ་ཝཱ སི་ཡུ’’ནྟི ཙོ་དེ་ཏུཾ ཨ་ཏྠི ཏི་ར་ཙྪཱ་ན་ག་ཏེ་སཱུཏི་ཨཱ་དི་མཱ་ཧ. ཀཱི་ཊཱཏི་ཨཱ་དི ཡེ་སཾ སོ ཨ་བྷཱ་ཝཾ ཨི་ཙྪ་ཏི, ཏེ ད་སྶེ་ཏུཾ ཝུ་ཏྟཾ. ཨེ་རཱ་ཝ་ཎོཏི པ་ཉྷེ ཏ་སྶ ཨ་ཏྠི་ཏཱ་ཡ པ་ཊི་ཉྙཱ ས་ཀ་ཝཱ་དི་སྶ, ན ཏི་ར་ཙྪཱ་ན་ག་ཏ་སྶ. ཧ་ཏྠི་བ་ནྡྷཱཏི་ཨཱ་དི ‘‘ཡ་དི ཏ་ཏྠ ཧ་ཏྠི་ཨཱ་ད་ཡོ སི་ཡུཾ, ཧ་ཏྠི་བ་ནྡྷཱ་ད་ཡོ་པི སི་ཡུ’’ནྟི ཙོ་ད་ན་ཏྠཾ ཝུ་ཏྟཾ. ཏ་ཏྠ ཡཱ་ཝ་སི་ཀཱཏི ཡ་ཝ་སྶ དཱ་ཡ་ཀཱ. ཀཱ་ར་ཎི་ཀཱཏི ཧ་ཏྠཱ་ཙ་རི་ཡཱ་ད་ཡོ, ཡེ་ཧི ཏེ ནཱ་ནཱ་ཝི་དྷཾ ཀཱ་ར་ཎཾ ཀ་རེ་ཡྻུཾ. བྷ་ཏྟ་ཀཱ་ར་ཀཱཏི ཧ་ཏྠི་ཨཱ་དཱི་ནཾ བྷ་ཏྟ་ར་ནྡྷ་ཀཱ. ན ཧེ་ཝནྟི ཏ་ཐཱ ཨ་ནི་ཙྪ་ནྟོ པ་ཊི་ཀྑི་པ་ཏཱི་ཏི.
ཏི་ར་ཙྪཱ་ན་ཀ་ཐཱ་ཝ་ཎྞ་ནཱ.
༥. མ་གྒ་ཀ་ཐཱ་ཝ་ཎྞ་ནཱ
༨༧༢-༨༧༥. ཨི་དཱ་ནི མ་གྒ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ‘‘པུ་བྦེ་ཝ ཁོ པ་ན་སྶ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨཱ་ཛཱི་ཝོ སུ་པ་རི་སུ་དྡྷོ ཧོ་ཏཱི’’ཏི (ཨ. ནི. ༣.༤༣༡) ཨི་ད་ཉྩེ་ཝ སུ་ཏྟཾ ས་མྨཱ་ཝཱ་ཙཱ་ཀ་མྨ་ནྟཱ་ཛཱི་ཝཱ་ན་ཉྩ ཙི་ཏྟ་ཝི་པྤ་ཡུ་ཏྟ་ཏཾ ནི་སྶཱ་ཡ ‘‘ནི་པྤ་རི་ཡཱ་ཡེ་ན པ་ཉྩ་ངྒི་ཀོ་ཝ མ་གྒོ’’ཏི ལ་དྡྷི, སེ་ཡྻ་ཐཱ་པི མ་ཧི་སཱ་ས་ཀཱ་ནཾ, ཏེ ས་ནྡྷཱ་ཡ པ་ཉྩ་ངྒི་ཀོཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ས་མྨཱ་ཝཱ་ཙཱ མ་གྒ་ངྒཾ, སཱ ཙ ན མ་གྒོ་ཏིཨཱ་དི པ་ར་ས་མ་ཡ་ཝ་སེ་ན ཝུ་ཏྟཾ. པ་ར་ས་མ་ཡ་སྨི་ཉྷི ས་མྨཱ་ཝཱ་ཙཱ་ད་ཡོ མ་གྒ་ངྒ་ནྟི ཨཱ་ག་ཏཱ. རཱུ་པ་ཏྟཱ པ་ན མ་གྒོ ན ཧོ་ཏཱི་ཏི ཝ་ཎྞི་ཏཱ. ས་མྨཱ་དི་ཊྛི མ་གྒ་ངྒནྟི་ཨཱ་དི མ་གྒ་ངྒ་སྶ ཨ་མ་གྒ་ཏཱ ནཱ་མ ན་ཏྠཱི་ཏི ད་སྶ་ན་ཏྠཾ ཝུ་ཏྟཾ. པུ་བྦེ་ཝ ཁོ པ་ན་སྶཱཏི སུ་ཏྟེ པ་རི་སུ་དྡྷ་སཱི་ལ་སྶ མ་གྒ་བྷཱ་ཝ་ནཱ ནཱ་མ ཧོ་ཏི, ན ཨི་ཏ་ར་སྶཱ་ཏི ཨཱ་ག་མ་ནི་ཡ་པ་ཊི་པ་དཱ་ཡ ཝི་སུ་དྡྷི་བྷཱ་ཝ་ད་སྶ་ན་ཏྠཾ ‘‘ཀཱ་ཡ་ཀ་མྨཾ ཝ་ཙཱི་ཀ་མྨཾ ཨཱ་ཛཱི་ཝོ སུ་པ་རི་སུ་དྡྷོ ཧོ་ཏཱི’’ཏི ཝུ་ཏྟཾ, ན ཨི་མེ་ཧི ཝི་ནཱ པ་ཉྩ་ངྒི་ཀ་བྷཱ་ཝ་ད་སྶ་ན་ཏྠཾ. ཏེ་ནེ་ཝཱ་ཧ ‘‘ཨེ་ཝ་མ་སྶཱ་ཡཾ ཨ་རི་ཡོ ཨ་ཊྛ་ངྒི་ཀོ མ་གྒོ བྷཱ་ཝ་ནཱ་པཱ་རི་པཱུ་རིཾ ག་ཙྪ་ཏཱི’’ཏི. ས་ཀ་ཝཱ་དི་ནཱ ཨཱ་བྷ་ཏ་སུ་ཏྟཾ ནཱི་ཏ་ཏྠ་མེ་ཝཱ་ཏི.
མ་གྒ་ཀ་ཐཱ་ཝ་ཎྞ་ནཱ.
༦. ཉཱ་ཎ་ཀ་ཐཱ་ཝ་ཎྞ་ནཱ
༨༧༦-༨༧༧. ཨི་དཱ་ནི ཉཱ་ཎ་ཀ་ཐཱ ནཱ་མ ཧོ་ཏི. ཏ་ཏྠ དྷ་མྨ་ཙ་ཀྐ་པྤ་ཝ་ཏྟ་ནེ དྭཱ་ད་སཱ་ཀཱ་ར་ཉཱ་ཎཾ ས་ནྡྷཱ་ཡ ‘‘དྭཱ་ད་ས་ཝ་ཏྠུ་ཀཾ ཉཱ་ཎཾ ལོ་ཀུ་ཏྟ་ར’’ནྟི ཡེ་སཾ ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ས་ཙེ ཏཾ དྭཱ་ད་ས་ཝ་ཏྠུ་ཀཾ, དྭཱ་ད་ས་ཧི མ་གྒ་ཉཱ་ཎེ་ཧི བྷ་ཝི་ཏ་བྦ’’ནྟི ཙོ་དེ་ཏུཾ དྭཱ་ད་སཱཏི་ཨཱ་དི་མཱ་ཧ. ཨི་ཏ་རོ མ་གྒ་སྶ ཨེ་ཀ་ཏྟཾ ས་ནྡྷཱ་ཡ པ་ཊི་ཀྑི་པ་ཏི, ཨེ་ཀེ་ཀ་སྨིཾ ས་ཙྩེ ས་ཙྩ་ཉཱ་ཎ་ཀི་ཙྩ་ཉཱ་ཎ་ཀ་ཏ་ཉཱ་ཎཱ་ནཾ ཝ་སེ་ན ཉཱ་ཎ་ནཱ་ན་ཏྟཾ ས་ནྡྷཱ་ཡ པ་ཊི་ཛཱ་ནཱ་ཏི. དྭཱ་ད་ས སོ་ཏཱ་པ་ཏྟི་མ་གྒཱཏི་ཨཱ་དཱི་སུ་པི ཨེ་སེ་ཝ ན་ཡོ. ན་ནུ ཝུ་ཏྟཾ བྷ་ག་ཝ་ཏཱཏི སུ་ཏྟཾ ས་དྡྷིཾ པུ་བྦ་བྷཱ་ག་པ་ར་བྷཱ་གེ་ཧི ཉཱ་ཎ་ནཱ་ན་ཏྟཾ དཱི་པེ་ཏི, ན ཨ་རི་ཡ་མ་གྒ་སྶ དྭཱ་ད་ས ཉཱ་ཎ་ཏཾ. ཏ་སྨཱ ཨ་སཱ་དྷ་ཀ་ནྟི.
ཉཱ་ཎ་ཀ་ཐཱ་ཝ་ཎྞ་ནཱ.
ཝཱི་ས་ཏི་མོ ཝ་གྒོ.
ཙ་ཏུ་ཏྠ་པ་ཎྞཱ་ས་ཀོ ས་མ་ཏྟོ.