༡༩. ཨེ་ཀཱུ་ན་ཝཱི་ས་ཏི་མ་ཝ་གྒོ
༡. ཀི་ལེ་ས་པ་ཛ་ཧ་ན་ཀ་ཐཱ་ཝ་ཎྞ་ནཱ
༨༢༨-༨༣༡. ཨི་དཱ་ནི ཀི་ལེ་ས་པ་ཛ་ཧ་ན་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་སྨཱ ཀི་ལེ་ས་པ་ཧཱ་ནཾ ནཱ་མ ཨ་ཏྠི, པ་ཧཱི་ན་ཀི་ལེ་ས་སྶ ཙ ཨ་ཏཱི་ཏཱ་པི ཀི་ལེ་སཱ པ་ཧཱི་ནཱ་ཝ ཧོ་ནྟི, ཨ་ནཱ་ག་ཏཱ་པི, པ་ཙྩུ་པྤ་ནྣཱ་པི, ཏ་སྨཱ ཨ་ཏཱི་ཏེ་པི ཀི་ལེ་སེ པ་ཛ་ཧ་ཏི, ཨ་ནཱ་ག་ཏེ་པི, པ་ཙྩུ་པྤ་ནྣེ་པཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ཨ་ཏཱི་ཏེཏི་ཨཱ་དི་པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ན་ཏྠི ཀི་ལེ་སེ ཛ་ཧ་ཏཱིཏི ཨི་མ་སྨིཾ པ་ན པ་ར་ཝཱ་དི་སྶ པ་ཉྷེ ཡ་སྨཱ ཀ་ཙ་ཝ་རཾ པ་ཛ་ཧ་ནྟ་སྶ ཀ་ཙ་ཝ་རེ ཚ་ཌྜ་ན་ཝཱ་ཡཱ་མོ ཝི་ཡ ཀི་ལེ་སེ པ་ཛ་ཧ་ནྟ་སྶ ན ཨ་ཏཱི་ཏཱ་དི་བྷེ་དེ་སུ ཀི་ལེ་སེ་སུ ཝཱ་ཡཱ་མོ ཨ་ཏྠི, ནི་བྦཱ་ནཱ་ར་མྨ་ཎེ པ་ན ཨ་རི་ཡ་མ་གྒེ པ་ཝ་ཏྟི་ཏེ ཀི་ལེ་སཱ ཨ་ནུ་པྤ་ནྣཱ་ཡེ་ཝ ནུ་པྤ་ཛྫ་ནྟཱི་ཏི པ་ཧཱི་ནཱ ནཱ་མ ཧོ་ནྟི, ཏ་སྨཱ ན ཧེ་ཝནྟི པ་ཊི་ཀྑི་པ་ཏི. ཏེ་ན ཧི ཨ་ཏཱི་ཏེ ཀི་ལེ་སེ པ་ཛ་ཧ་ཏཱིཏི་ཨཱ་དི པ་ན ཡ་སྨཱ ‘‘ན་ཏྠི ཀི་ལེ་ས་པ་ཛ་ཧ་ནཱ’’ཏི ན ཝ་ཏྟ་བྦཾ, ཏ་སྨཱ ཨ་ཏཱི་ཏཱ་དི་བྷེ་དེ པ་ཛ་ཧ་ཏཱི་ཏི ཚ་ལེ་ན ཝུ་ཏྟཾ.
ཀི་ལེ་ས་པ་ཛ་ཧ་ན་ཀ་ཐཱ་ཝ་ཎྞ་ནཱ.
༢. སུ་ཉྙ་ཏ་ཀ་ཐཱ་ཝ་ཎྞ་ནཱ
༨༣༢. ཨི་དཱ་ནི སུ་ཉྙ་ཏ་ཀ་ཐཱ ནཱ་མ ཧོ་ཏི. ཏ་ཏྠ སུ་ཉྙ་ཏཱཏི དྭེ སུ་ཉྙ་ཏཱ ཁ་ནྡྷཱ་ན་ཉྩ ཨ་ན་ཏྟ་ལ་ཀྑ་ཎཾ ནི་བྦཱ་ན་ཉྩ. ཏེ་སུ ཨ་ན་ཏྟ་ལ་ཀྑ་ཎཾ ཏཱ་ཝ ཨེ་ཀ་ཙྩཾ ཨེ་ཀེ་ན པ་རི་ཡཱ་ཡེ་ན སི་ཡཱ ས་ངྑཱ་ར་ཀྑ་ནྡྷ་པ་རི་ཡཱ་པ་ནྣཾ, ནི་བྦཱ་ནཾ, ཨ་པ་རི་ཡཱ་པ་ནྣ་མེ་ཝ. ཨི་མཾ པ་ན ཝི་བྷཱ་གཾ ཨ་གྒ་ཧེ་ཏྭཱ ‘‘སུ་ཉྙ་ཏཱ ས་ངྑཱ་ར་ཀྑ་ནྡྷ་པ་རི་ཡཱ་པ་ནྣཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ནི་མི་ཏྟནྟི ས་བྦ་ནི་མི་ཏྟ་ར་ཧི་ཏཾ ནི་བྦཱ་ནཾ. ‘‘ཨ་པྤ་ཎི་ཧི་ཏོ’’ཏི་པི ཏ་སྶེ་ཝ ནཱ་མཾ. ཀ་སྨཱ པ་ནེ་ཏཾ ཨཱ་བྷ་ཏ་ནྟི? ཨ་ཝི་བྷ་ཛྫ་ཝཱ་དཱི་ཝཱ་དེ དོ་སཱ་རོ་པ་ན་ཏྠཾ. ཡ་སྶ ཧི ཨ་ཝི་བྷ་ཛི་ཏྭཱ ‘‘ཨེ་ཀ་དེ་སེ་ནེ་ཝ སུ་ཉྙ་ཏཱ ས་ངྑཱ་ར་ཀྑ་ནྡྷ་པ་རི་ཡཱ་པ་ནྣཱ’’ཏི ལ་དྡྷི, ཏ་སྶ ནི་བྦཱ་ན་མྤི ས་ངྑཱ་ར་ཀྑ་ནྡྷ་པ་རི་ཡཱ་པ་ནྣ་ནྟི ཨཱ་པ་ཛྫ་ཏི. ཨི་མ་སྶ དོ་ས་སྶཱ་རོ་པ་ན་ཏྠཾ ‘‘ཨ་ནི་མི་ཏྟཾ ཨ་པྤ་ཎི་ཧི་ཏ’’ནྟི ཨཱ་བྷ་ཏཾ. ཨི་ཏ་རོ ཏ་སྶ པ་རི་ཡཱ་པ་ནྣ་བྷཱ་ཝཾ ཨ་ནི་ཙྪ་ནྟོ པ་ཊི་ཀྑི་པ་ཏི. ས་ངྑཱ་ར་ཀྑ་ནྡྷོ ན ཨ་ནི་ཙྩོཏི་ཨཱ་དི ནི་བྦཱ་ན་ས་ངྑཱ་ཏཱ་ཡ སུ་ཉྙ་ཏཱ་ཡ ཨ་ནི་ཙྩ་བྷཱ་ཝཱ་པ་ཏྟི་དོ་ས་ད་སྶ་ན་ཏྠཾ ཝུ་ཏྟཾ.
༨༣༣. ས་ངྑཱ་ར་ཀྑ་ནྡྷ་སྶ སུ་ཉྙ་ཏཱཏི ‘‘ཡ་དི ཨ་ཉྙ་སྶ ཁ་ནྡྷ་སྶ སུ་ཉྙ་ཏཱ ཨ་ཉྙ་ཀྑ་ནྡྷ་པ་རི་ཡཱ་པ་ནྣཱ, ས་ངྑཱ་ར་ཀྑ་ནྡྷ་སུ་ཉྙ་ཏཱ་ཡ་པི སེ་ས་ཀྑ་ནྡྷ་པ་རི་ཡཱ་པ་ནྣཱ་ཡ བྷ་ཝི་ཏ་བྦ’’ནྟི ཙོ་ད་ན་ཏྠཾ ཝུ་ཏྟཾ. ས་ངྑཱ་ར་ཀྑ་ནྡྷ་སྶ སུ་ཉྙ་ཏཱ ན ཝ་ཏྟ་བྦཱཏི་ཨཱ་དི ‘‘ཡ་དི ས་ངྑཱ་ར་ཀྑ་ནྡྷ་སུ་ཉྙ་ཏཱ སེ་ས་ཀྑ་ནྡྷ་པ་རི་ཡཱ་པ་ནྣཱ ན ཧོ་ཏི, སེ་ས་ཀྑ་ནྡྷ་སུ་ཉྙ་ཏཱ་པི ས་ངྑཱ་ར་ཀྑ་ནྡྷ་པ་རི་ཡཱ་པ་ནྣཱ ན ཧོ་ཏཱི’’ཏི པ་ཊི་ལོ་མ་ད་སྶ་ན་ཏྠཾ ཝུ་ཏྟཾ.
༨༣༤. སུ་ཉྙ་མི་དཾ, བྷི་ཀྑ་ཝེ, ས་ངྑཱ་རཱཏི སུ་ཏྟཾ པ་ར་ས་མ་ཡ་ཏོ ཨཱ་བྷ་ཏཾ. ཏ་ཏྠ ས་ངྑཱ་རཱཏི ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི ཨཱ་ག་ཏ་ཊྛཱ་ནེ ཝི་ཡ པ་ཉྩ་ཀྑ་ནྡྷཱ, ཏེ ཙ ཨ་ཏྟ་ཏྟ་ནི་ཡ་སུ་ཉྙ་ཏྟཱ སུ་ཉྙ་ཏཱ་ཏི སཱ་ས་ནཱ་ཝ་ཙ་རཾ ཧོ་ཏི, ན ཝི་རུ་ཛ྄ཛྷ་ཏི, ཏ་སྨཱ ཨ་ནུ་ཉྙཱ་ཏཾ. ཡ་སྨཱ པ་ནེ་ཏཾ ན སུ་ཉྙ་ཏཱ་ཡ ས་ངྑཱ་ར་ཀྑ་ནྡྷ་པ་རི་ཡཱ་པ་ནྣ་བྷཱ་ཝཾ དཱི་པེ་ཏི, ཏ་སྨཱ ཨ་སཱ་དྷ་ཀ་ནྟི.
སུ་ཉྙ་ཏ་ཀ་ཐཱ་ཝ་ཎྞ་ནཱ.
༣. སཱ་མ་ཉྙ་ཕ་ལ་ཀ་ཐཱ་ཝ་ཎྞ་ནཱ
༨༣༥-༨༣༦. ཨི་དཱ་ནི སཱ་མ་ཉྙ་ཕ་ལ་ཀ་ཐཱ ནཱ་མ ཧོ་ཏི. ཏ་ཏྠ མ་གྒ་ཝཱི་ཐི་ཡ་མྤི ཕ་ལ་ས་མཱ་པ་ཏྟི་ཝཱི་ཐི་ཡ་མྤི ཨ་རི་ཡ་མ་གྒ་སྶ ཝི་པཱ་ཀ་ཙི་ཏྟཾ སཱ་མ་ཉྙ་ཕ་ལཾ ནཱ་མཱ་ཏི ས་ཀ་ས་མ་ཡེ ས་ནྣི་ཊྛཱ་ནཾ. ཡེ་སཾ པ་ན ཏ་ཐཱ ཨ་གྒ་ཧེ་ཏྭཱ ‘‘ཀི་ལེ་ས་པ་ཧཱ་ན་ཉྩེ་ཝ ཕ་ལུ་པྤ་ཏྟི ཙ སཱ་མ་ཉྙ་ཕ་ལཾ, ཏ་སྨཱ ཨ་ས་ངྑ་ཏ’’ནྟི ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཧེ་ཊྛཱ ཝུ་ཏྟ་ན་ཡ་ཏྟཱ ཡ་ཐཱ པཱ་ལི༹་མེ་ཝ ནི་ཡྻཱ་ཏཱི་ཏི.
སཱ་མ་ཉྙ་ཕ་ལ་ཀ་ཐཱ་ཝ་ཎྞ་ནཱ.
༤. པ་ཏྟི་ཀ་ཐཱ་ཝ་ཎྞ་ནཱ
༨༣༧-༨༤༠. ཨི་དཱ་ནི པ་ཏྟི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡཾ ཡཾ པ་ཊི་ལ་བྦྷ་ཏི, ཏ་སྶ ཏ་སྶ པ་ཊི་ལཱ་བྷོ པ་ཏྟི ནཱ་མ. སཱ ཙ ཨ་ས་ངྑ་ཏཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ན་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མི་དྷཱ་པི ཧེ་ཊྛཱ ཝུ་ཏྟ་ན་ཡ་ཏྟཱ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི. ན ཝ་ཏྟ་བྦནྟི་ཨཱ་དི ཡཱ་ཡ ལ་དྡྷི་ཡཱ པ་ཏྟི ཨ་ས་ངྑ་ཏཱ་ཏི མ་ཉྙ་ཏི, ཏཾ པ་ཀཱ་སེ་ཏུཾ ཝུ་ཏྟཾ. ཏ་ཏྠ ས་ཀ་ཝཱ་དཱི ‘‘ན ཧེ་ཝཾ ཝ་ཏྟ་བྦེ’’ཏི པ་ཊི་ཀྑི་པ་ནྟོ ཀེ་ཝ་ལཾ པ་ཏྟི་ཡཱ རཱུ་པཱ་དི་བྷཱ་ཝཾ ན ས་མྤ་ཊི་ཙྪ་ཏི. ན ཧི པ་ཏྟི ནཱ་མ ཀོ་ཙི དྷ་མྨོ ཨ་ཏྠི, ན པ་ན ཨ་ས་ངྑ་ཏ་བྷཱ་ཝཾ ཨ་ནུ་ཛཱ་ནཱ་ཏི. ཨི་ཏ་རོ པ་ན པ་ཊི་ཀྑེ་པ་མ་ཏྟེ་ནེ་ཝ ཨ་ས་ངྑ་ཏཱ་ཏི ལ་དྡྷིཾ པ་ཏི་ཊྛ་པེ་ཏི, སཱ ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛི་ཏཱ་ཡེ་ཝཱ་ཏི.
པ་ཏྟི་ཀ་ཐཱ་ཝ་ཎྞ་ནཱ.
༥. ཏ་ཐ་ཏཱ་ཀ་ཐཱ་ཝ་ཎྞ་ནཱ
༨༤༡-༨༤༣. ཨི་དཱ་ནི ཏ་ཐ་ཏཱ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ‘‘རཱུ་པཱ་དཱི་ནཾ ས་བྦ་དྷ་མྨཱ་ནཾ རཱུ་པཱ་དི་ས་བྷཱ་ཝ་ཏཱ་ས་ངྑཱ་ཏཱ ཏ་ཐ་ཏཱ ནཱ་མ ཨ་ཏྠི, སཱ ཙ ས་ངྑ་ཏེ་སུ རཱུ་པཱ་དཱི་སུ ཨ་པ་རི་ཡཱ་པ་ནྣ་ཏྟཱ ཨ་ས་ངྑ་ཏཱ’’ཏི ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མི་དྷཱ་པི ཧེ་ཊྛཱ ཝུ་ཏྟ་ན་ཡ་ཏྟཱ པཱ་ཀ་ཊ་མེ་ཝཱ་ཏི.
ཏ་ཐ་ཏཱ་ཀ་ཐཱ་ཝ་ཎྞ་ནཱ.
༦. ཀུ་ས་ལ་ཀ་ཐཱ་ཝ་ཎྞ་ནཱ
༨༤༤-༨༤༦. ཨི་དཱ་ནི ཀུ་ས་ལ་ཀ་ཐཱ ནཱ་མ ཧོ་ཏི. ཏ་ཏྠ ཨ་ན་ཝ་ཛྫ་མྤི ཀུ་ས་ལཾ ཨི་ཊྛ་པཱ་ཀ་མྤི. ཨ་ན་ཝ་ཛྫཾ ནཱ་མ ཀི་ལེ་ས་ཝི་པྤ་ཡུ་ཏྟཾ. ཨ་ཡཾ ན་ཡོ ཋ་པེ་ཏྭཱ ཨ་ཀུ་ས་ལཾ ས་བྦ་དྷ་མྨེ བྷ་ཛ་ཏི. ཨི་ཊྛ་ཝི་པཱ་ཀཾ ནཱ་མ ཨཱ་ཡ་ཏིཾ ཨུ་པ་པ་ཏྟི་པ་ཝ་ཏྟེ་སུ ཨི་ཊྛ་ཕ་ལ་ནི་པྥཱ་ད་ཀཾ པུ་ཉྙཾ. ཨ་ཡཾ ན་ཡོ ཀུ་ས་ལ་ཏྟི་ཀེ ཨཱ་དི་པ་ད་མེ་ཝ བྷ་ཛ་ཏི. ཡེ་སཾ པ་ན ཨི་མཾ ཝི་བྷཱ་གཾ ཨ་གྒ་ཧེ་ཏྭཱ ཨ་ན་ཝ་ཛྫ་བྷཱ་ཝ་མ་ཏྟེ་ནེ་ཝ ནི་བྦཱ་ནཾ ཀུ་ས་ལ་ནྟི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ, ཏེ་སཾ ཨི་ཊྛ་ཝི་པཱ་ཀ་ཊྛེ་ན ནི་བྦཱ་ན་སྶ ཀུ་ས་ལ་ཏཱ་བྷཱ་ཝཾ དཱི་པེ་ཏུཾ པུ་ཙྪཱ ས་ཀ་ཝཱ་དི་སྶ, ཨ་ཏྟ་ནོ ལ་དྡྷི་ཝ་སེ་ན པ་ཊི་ཉྙཱ ཨི་ཏ་ར་སྶ. སེ་ས་མི་དྷཱ་པི ཧེ་ཊྛཱ ཝུ་ཏྟ་ན་ཡ་ཏྟཱ ཨུ་ཏྟཱ་ན་ཏྠ་མེ་ཝཱ་ཏི.
ཀུ་ས་ལ་ཀ་ཐཱ་ཝ་ཎྞ་ནཱ.
༧. ཨ་ཙྩ་ནྟ་ནི་ཡཱ་མ་ཀ་ཐཱ་ཝ་ཎྞ་ནཱ
༨༤༧. ཨི་དཱ་ནི ཨ་ཙྩ་ནྟ་ནི་ཡཱ་མ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ‘‘ས་ཀིཾ ནི་མུ་གྒོ ནི་མུ་གྒོ་ཝ ཧོ་ཏཱི’’ཏི (ཨ. ནི. ༧.༡༥) སུ་ཏྟཾ ནི་སྶཱ་ཡ ‘‘ཨ་ཏྠི པུ་ཐུ་ཛྫ་ན་སྶ ཨ་ཙྩ་ནྟ་ནི་ཡཱ་མ་ཏཱ’’ཏི ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨུ་ཏྟ་རཱ་པ་ཐ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. མཱ་ཏུ་གྷཱ་ཏ་ཀོཏི་ཨཱ་དི ‘‘ནི་ཡ་ཏ་མི་ཙྪཱ་དི་ཊྛི་ཀ་སྶ ཙ མཱ་ཏུ་གྷཱ་ཏ་ཀཱ་དཱི་ན་ཉྩ ས་མཱ་ནེ མི་ཙྪ་ཏྟ་ནི་ཡཱ་མེ མཱ་ཏུ་གྷཱ་ཏ་ཀཱ་དཱི་ཧི་པི ཏེ ཨ་ཙྩ་ནྟ་ནི་ཡ་ཏེ་ཧི བྷ་ཝི་ཏ་བྦ’’ནྟི ཙོ་ད་ན་ཏྠཾ ཝུ་ཏྟཾ. ཨི་ཏ་རོ ‘‘ནི་ཡ་ཏ་མི་ཙྪཱ་དི་ཊྛི་ཀོ སཾ་སཱ་ར་ཁཱ་ཎུ་ཀོ བྷ་ཝ་ནྟ་རེ་པི ནི་ཡ་ཏོ་ཝ ཨི་མེ པ་ན ཨེ་ཀ་སྨི་ཉྙེ་ཝ ཨ་ཏྟ་བྷཱ་ཝེ’’ཏི ལ་དྡྷི་ཡཱ ན ཧེ་ཝནྟི པ་ཊི་ཀྑི་པ་ཏི.
༨༤༨. ཝི་ཙི་ཀི་ཙྪཱ ཨུ་པྤ་ཛྫེ་ཡྻཱཏི ‘‘ཨ་ཡཾ ནི་ཡ་ཏོ ཝཱ ནོ ཝཱ’’ཏི ཨེ་ཝཾ ཨུ་པྤ་ཛྫེ་ཡྻཱ་ཏི པུ་ཙྪ་ཏི. ཨི་ཏ་རོ ཨ་ནུ་པྤ་ཏྟི་ཀཱ་ར་ཎཾ ཨ་པ་སྶ་ནྟོ པ་ཊི་ཛཱ་ནཱ་ཏི. ནུ་པྤ་ཛྫེ་ཡྻཱཏི པུ་ཊྛོ པ་ན ཡཾ དི་ཊྛིཾ ཨཱ་སེ་ཝ་ནྟོ ནི་ཡཱ་མཾ ཨོ་ཀྐ་ནྟོ, ཏ་ཏྠ ཨ་ནུ་པྤ་ཏྟིཾ ས་ནྡྷཱ་ཡ པ་ཊི་ཛཱ་ནཱ་ཏི. ཏ་ཏོ པ་ཧཱི་ནཱཏི པུ་ཊྛོ མ་གྒེ་ན ཨ་པྤ་ཧཱི་ན་ཏྟཱ པ་ཊི་ཀྑི་པ་ཏི, ཏཾ དི་ཊྛིཾ ཨཱ་ར་བྦྷ ཨ་ས་མུ་དཱ་ཙཱ་ར་ཏོ པ་ཊི་ཛཱ་ནཱ་ཏི. ཨ་ཐ ནཾ ཡ་སྨཱ པ་ཧཱ་ནཾ ནཱ་མ ཝི་ནཱ ཨ་རི་ཡ་མ་གྒེ་ན ན་ཏྠི, ཏ་སྨཱ ཏ་སྶ ཝ་སེ་ན ཙོ་དེ་ཏུཾ སོ་ཏཱ་པ་ཏྟི་མ་གྒེ་ནཱཏི་ཨཱ་དི་མཱ་ཧ. སོ ཨེ་ཀ་མ་གྒེ་ནཱ་པི ཨ་པྤ་ཧཱི་ན་ཏྟཱ པ་ཊི་ཀྑི་པ་ཏི. པུ་ན ཀ་ཏ་མེ་ནཱཏི པུ་ཊྛོ མི་ཙྪཱ་མ་གྒཾ ས་ནྡྷཱ་ཡ ཨ་ཀུ་ས་ལེ་ནཱཏི་ཨཱ་དི་མཱ་ཧ.
༨༤༩. ཨུ་ཙྪེ་ད་དི་ཊྛི ཨུ་པྤ་ཛྫེ་ཡྻཱཏི དུ་ཏི་ཡ་ནི་ཡཱ་མུ་པྤ་ཏྟིཾ པུ་ཙྪ་ཏི. ཨི་ཏ་རོ ཡ་སྨཱ ‘‘ཡེ་པི ཏེ ཨོ་ཀྐ་ལཱ ཝ་ཡ་བྷི་ཉྙཱ ན་ཏྠི་ཀ་ཝཱ་དཱ ཨ་ཀི་རི་ཡ་ཝཱ་དཱ ཨ་ཧེ་ཏུ་ཀ་ཝཱ་དཱ’’ཏི (མ. ནི. ༣.༡༤༣) ཝ་ཙ་ན་ཏོ ཏི་སྶོ་པི ནི་ཡ་ཏ་མི་ཙྪཱ་དི་ཊྛི་ཡོ ཨེ་ཀ་སྶ ཨུ་པྤ་ཛྫ་ནྟི, ཏ་སྨཱ པ་ཊི་ཛཱ་ནཱ་ཏི.
༨༥༠. ཨ་ཐ ནཾ ‘‘ན ཙ ནཱ་མ སོ ཨ་ཙྩ་ནྟ་ནི་ཡཱ་མོ’’ཏི ཙོ་དེ་ཏུཾ ཧ་ཉྩཱིཏི་ཨཱ་དི་མཱ་ཧ. ཨ་ཙྩ་ནྟ་ནི་ཡ་ཏ་སྶ ཧི དུ་ཏི་ཡ་ནི་ཡཱ་མོ ནི་ར་ཏྠ་ཀོ. ནུ་པྤ་ཛྫེ་ཡྻཱཏི པ་ཉྷེ ཡཾ ས་སྶ་ཏ་དི་ཊྛི་ཡཱ ས་སྶ་ཏ་ནྟི ག་ཧི་ཏཾ, ཏ་དེ་ཝ ཨུ་ཙྪི་ཛྫི་སྶ་ཏཱི་ཏི ག་ཧེ་ཏྭཱ ཨ་ནུ་པྤ་ཏྟིཾ ས་ནྡྷཱ་ཡ པ་ཊི་ཛཱ་ནཱ་ཏི. པ་ཧཱི་ནཱཏི པུ་ཊྛོ མ་གྒེ་ན ཨ་པྤ་ཧཱི་ན་ཏྟཱ པ་ཊི་ཀྑི་པ་ཏི, ཝུ་ཏྟ་ན་ཡེ་ན ཨ་ནུ་པྤ་ཛྫ་ན་ཏོ པ་ཊི་ཛཱ་ནཱ་ཏི. ས་སྶ་ཏ་དི་ཊྛི ཨུ་པྤ་ཛྫེ་ཡྻཱཏི་ཨཱ་དཱི་སུ་པི ཨེ་སེ་ཝ ན་ཡོ. སེ་སཾ ཝི་ཙི་ཀི་ཙྪཱ་ཝཱ་རེ ཝུ་ཏྟ་ན་ཡ་མེ་ཝ.
༨༥༡-༨༥༢. ན ཝ་ཏྟ་བྦནྟི པུ་ཙྪཱ པ་ར་ཝཱ་དི་སྶ, སུ་ཏྟ་སྶ ཨ་ཏྠི་ཏཱ་ཡ པ་ཊི་ཉྙཱ ས་ཀ་ཝཱ་དི་སྶ. ན པ་ན སོ བྷ་ཝ་ནྟ་རེ་པི ནི་མུ་གྒོ་ཝ. ཨི་མ་སྨི་ཉྙེ་ཝ ཧི བྷ་ཝེ ཨ་བྷ་བྦོ སོ ཏཾ དི་ཊྛིཾ པ་ཛ་ཧི་ཏུ་ནྟི ཨ་ཡ་མེ་ཏྠ ཨ་དྷི་པྤཱ་ཡོ, ཏ་སྨཱ ཨ་སཱ་དྷ་ཀ་མེ་ཏ་ནྟི. ས་བྦ་ཀཱ་ལཾ ཨུ་མྨུ་ཛྫི་ཏྭཱ ནི་མུ་ཛྫ་ཏཱིཏི་ཨཱ་དི ཝ་ཙ་ན་མ་ཏྟེ ཨ་བྷི་ནི་ཝེ་སཾ ཨ་ཀ་ཏྭཱ ཨ་ཏྠོ པ་རི་ཡེ་སི་ཏ་བྦོ་ཏི ད་སྶ་ན་ཏྠཾ ཝུ་ཏྟ་ནྟི.
ཨ་ཙྩ་ནྟ་ནི་ཡཱ་མ་ཀ་ཐཱ་ཝ་ཎྞ་ནཱ.
༨. ཨི་ནྡྲི་ཡ་ཀ་ཐཱ་ཝ་ཎྞ་ནཱ
༨༥༣-༨༥༦. ཨི་དཱ་ནི ཨི་ནྡྲི་ཡ་ཀ་ཐཱ ནཱ་མ ཧོ་ཏི. ཏ་ཏྠ ལོ་ཀི་ཡཱ ས་དྡྷཱ ས་དྡྷཱ ཨེ་ཝ ནཱ་མ, ན ས་དྡྷི་ནྡྲི་ཡཾ. ཏ་ཐཱ ལོ་ཀི་ཡཾ ཝཱི་རི་ཡཾ…པེ… ས་ཏི… ས་མཱ་དྷི… པ་ཉྙཱ པ་ཉྙཱ་ཡེ་ཝ ནཱ་མ, ན པ་ཉྙི་ནྡྲི་ཡ་ནྟི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ན་ཉྩེ་ཝ མ་ཧི་སཱ་ས་ཀཱ་ན་ཉྩ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ན་ཏྠི ལོ་ཀི་ཡཱ ས་དྡྷཱཏི་ཨཱ་དི ཡ་སྨཱ ལོ་ཀི་ཡཱ་པི ས་དྡྷཱ་ད་ཡོ་ཝ དྷ་མྨཱ ཨ་དྷི་པ་ཏི་ཡ་ཊྛེ་ན ཨི་ནྡྲི་ཡཾ, ན ས་དྡྷཱ་དཱི་ཧི ཨ་ཉྙཾ ས་དྡྷི་ནྡྲི་ཡཱ་དི ནཱ་མ ཨ་ཏྠི, ཏ་སྨཱ ལོ་ཀི་ཡཱ་ན་མྤི ས་དྡྷཱ་དཱི་ན་ཉྙེ་ཝ ས་དྡྷི་ནྡྲི་ཡཱ་དི་བྷཱ་ཝ་ད་སྶ་ན་ཏྠཾ ཝུ་ཏྟཾ. ཨ་ཏྠི ལོ་ཀི་ཡོ མ་ནོཏི་ཨཱ་དི ཡ་ཐཱ ཏེ ལོ་ཀི་ཡཱ་པི མ་ནཱ་ད་ཡོ དྷ་མྨཱ མ་ནི་ནྡྲི་ཡཱ་དཱི་ནི, ཨེ་ཝཾ ལོ་ཀི་ཡཱ ས་དྡྷཱ་ད་ཡོ་པི ས་དྡྷི་ནྡྲི་ཡཱ་ནཱི་ཏི ཨུ་པ་མཱ་ཡ ཏ་སྶ་ཏྠ་སྶ ཝི་བྷཱ་ཝ་ན་ཏྠཾ ཝུ་ཏྟཾ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ཨི་ནྡྲི་ཡ་ཀ་ཐཱ་ཝ་ཎྞ་ནཱ.
ཨེ་ཀཱུ་ན་ཝཱི་ས་ཏི་མོ ཝ་གྒོ.