༡༨. ཨ་ཊྛཱ་ར་ས་མ་ཝ་གྒོ
༡. མ་ནུ་སྶ་ལོ་ཀ་ཀ་ཐཱ་ཝ་ཎྞ་ནཱ
༨༠༢-༨༠༣. ཨི་དཱ་ནི མ་ནུ་སྶ་ལོ་ཀ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཏ་ཐཱ་ག་ཏོ ལོ་ཀེ, ཛཱ་ཏོ ལོ་ཀེ སཾ་ཝ་ཌྜྷོ, ལོ་ཀཾ ཨ་བྷི་བྷུ་ཡྻ ཝི་ཧ་ར་ཏི ཨ་ནུ་པ་ལི་ཏྟོ ལོ་ཀེ་ནཱ’’ཏི (སཾ. ནི. ༣.༩༤) སུ་ཏྟཾ ཨ་ཡོ་ནི་སོ ག་ཧེ་ཏྭཱ ‘‘བྷ་ག་ཝཱ ཏུ་སི་ཏ་བྷ་ཝ་ནེ ནི་བྦ་ཏྟོ ཏ་ཏྠེ་ཝ ཝ་ས་ཏི, ན མ་ནུ་སྶ་ལོ་ཀཾ ཨཱ་ག་ཙྪ་ཏི, ནི་མྨི་ཏ་རཱུ་པ་མ་ཏྟ་ཀཾ པ་ནེ་ཏྠ ད་སྶེ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཏ་ར་ཧི ཝེ་ཏུ་ལླ་ཀཱ་ནཾ་ཡེ་ཝ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ པུ་ཊྛོ་ཀཱ་སེ་ན ཙེ་ཝ སུ་ཏྟ་སཱ་དྷ་ནེ་ན ཙ ས་ཉྙཱ་པེ་ཏུཾ ན་ནུ ཨ་ཏྠཱིཏི་ཨཱ་དི་མཱ་ཧ. ལོ་ཀེ ཛཱ་ཏོཏི པ་ར་ཝཱ་དཱི ཏུ་སི་ཏ་པུ་རཾ ས་ནྡྷཱ་ཡ ཝ་ད་ཏི. ས་ཏྠཱ་རཱ པ་ནེ་ཏཾ མ་ནུ་སྶ་ལོ་ཀ་ཉྙེ་ཝ ས་ནྡྷཱ་ཡ ལོ་ཀཾ ཝུ་ཏྟཾ. ལོ་ཀཾ ཨ་བྷི་བྷུ་ཡྻཱཏི པ་ར་ཝཱ་དཱི མ་ནུ་སྶ་ལོ་ཀཾ ཨ་བྷི་བྷ་ཝི་ཏྭཱ་ཏི དི་ཊྛི་ཡཱ ཝ་ད་ཏི, ས་ཏྠཱ པ་ན ཨཱ་ར་མྨ་ཎ་ལོ་ཀཾ ཨ་བྷི་བྷ་ཝི་ཏྭཱ ཝི་ཧཱ་སི. ཨ་ནུ་པ་ལི་ཏྟོ ལོ་ཀེ་ནཱཏི པ་ར་ཝཱ་དཱི མ་ནུ་སྶ་ལོ་ཀེ་ན ཨ་ནུ་པ་ལི་ཏྟ་ཏཾ་ཝ ས་ནྡྷཱ་ཡ ཝ་ད་ཏི, ས་ཏྠཱ པ་ན ལོ་ཀ་དྷ་མྨེ་སུ ཀི་ལེ་སེ་ཧི ཨ་ནུ་པ་ལི་ཏྟོ ཝི་ཧཱ་སི. ཏ་སྨཱ ཨ་སཱ་དྷ་ཀ་མེ་ཏ་ནྟི.
མ་ནུ་སྶ་ལོ་ཀ་ཀ་ཐཱ་ཝ་ཎྞ་ནཱ.
༢. དྷ་མྨ་དེ་ས་ནཱ་ཀ་ཐཱ་ཝ་ཎྞ་ནཱ
༨༠༤-༨༠༦. ཨི་དཱ་ནི དྷ་མྨ་དེ་ས་ནཱ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཏུ་སི་ཏ་པུ་རེ ཋི་ཏོ བྷ་ག་ཝཱ དྷ་མྨ་དེ་ས་ན་ཏྠཱ་ཡ ཨ་བྷི་ནི་མྨི་ཏཾ པེ་སེ་སི, ཏེ་ན ཙེ་ཝ ཏ་སྶ ཙ དེ་ས་ནཾ ས་མྤ་ཊི་ཙྪི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན དྷ་མྨོ དེ་སི་ཏོ, ན བུ་དྡྷེ་ན བྷ་ག་ཝ་ཏཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཝེ་ཏུ་ལླ་ཀཱ་ན་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏེ་ན དྷ་མྨོ དེ་སི་ཏོ, སྭེ་ཝ ས་ཏྠཱ བྷ་ཝེ་ཡྻཱ’’ཏི ཙོ་དེ་ཏུཾ ཨ་བྷི་ནི་མྨི་ཏོ ཛི་ནོཏི་ཨཱ་དི་མཱ་ཧ. ཨི་ཏ་རོ ཏ་ཐཱ ཨ་ས་མྤ་ཊི་ཙྪ་ནྟོ པ་ཊི་ཀྑི་པ་ཏི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
དྷ་མྨ་དེ་ས་ནཱ་ཀ་ཐཱ་ཝ་ཎྞ་ནཱ.
༣. ཀ་རུ་ཎཱ་ཀ་ཐཱ་ཝ་ཎྞ་ནཱ
༨༠༧-༨༠༨. ཨི་དཱ་ནི ཀ་རུ་ཎཱ་ཀ་ཐཱ ནཱ་མ ཧོ་ཏི. ཏ་ཏྠ པི་ཡཱ་ཡི་ཏཱ་ནཾ ཝ་ཏྠཱུ་ནཾ ཝི་པ་ཏྟི་ཡཱ ས་རཱ་གཱ་ནཾ རཱ་ག་ཝ་སེ་ན ཀ་རུ་ཎཱ་པ་ཏི་རཱུ་པི་ཀཾ པ་ཝ་ཏྟིཾ དི་སྭཱ ‘‘རཱ་གོ་ཝ ཀ་རུ་ཎཱ ནཱ་མ, སོ ཙ བྷ་ག་ཝ་ཏོ ན་ཏྠི, ཏ་སྨཱ ན་ཏྠི བུ་དྡྷ་སྶ བྷ་ག་ཝ་ཏོ ཀ་རུ་ཎཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཀ་རུ་ཎཱ ནཱ་མེ་སཱ ནི་ཀྐི་ལེ་ས་ཏཱ་ཡ ཙེ་ཝ ས་ཏྟཱ་ར་མྨ་ཎ་ཏཱ་ཡ ཙ ཙེ་ཏོ་ཝི་མུ་ཏྟི་ཏཱ་ཡ ཙ ཨེ་ཀཱ་ད་སཱ་ནི་སཾ་ས་ཏཱ་ཡ ཙ མེ་ཏྟཱ་དཱི་ཧི ས་མཱ་ན་ཛཱ་ཏི་ཀཱ, ཏ་སྨཱ ཡ་དི བྷ་ག་ཝ་ཏོ ཀ་རུ་ཎཱ ན་ཏྠི, མེ་ཏྟཱ་ད་ཡོ་པི་སྶ ན སི་ཡུ’’ནྟི ཙོ་ད་ན་ཏྠཾ ན་ཏྠི བུ་དྡྷ་སྶ བྷ་ག་ཝ་ཏོ མེ་ཏྟཱཏི་ཨཱ་དི་མཱ་ཧ. ཨཱ་ཀཱ་རུ་ཎི་ཀོཏི པ་ཉྷེ ཏ་ཐཱ་རཱུ་པཾ ཝོ་ཧཱ་རཾ ཨ་པ་སྶ་ནྟོ པ་ཊི་ཀྑི་པ་ཏི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཀ་རུ་ཎཱ་ཀ་ཐཱ་ཝ་ཎྞ་ནཱ.
༤. ག་ནྡྷ་ཛཱ་ཏ་ཀ་ཐཱ་ཝ་ཎྞ་ནཱ
༨༠༩. ཨི་དཱ་ནི ག་ནྡྷ་ཛཱ་ཏ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ བུ་དྡྷེ བྷ་ག་ཝ་ཏི ཨ་ཡོ་ནི་སོ པེ་མ་ཝ་སེ་ན ‘‘བྷ་ག་ཝ་ཏོ ཨུ་ཙྩཱ་ར་པ་སྶཱ་ཝོ ཨ་ཉྙེ ག་ནྡྷ་ཛཱ་ཏེ ཨ་ཏི་ཝི་ཡ ཨ་དྷི་ག་ཎྷཱ་ཏི, ན་ཏྠི ཏ་ཏོ ཙ སུ་ག་ནྡྷ་ཏ་རཾ ག་ནྡྷ་ཛཱ་ཏ’’ནྟི ལ་དྡྷི, སེ་ཡྻ་ཐཱ་པི ཨེ་ཀ་ཙྩཱ་ནཾ ཨ་ནྡྷ་ཀཱ་ན་ཉྩེ་ཝ ཨུ་ཏྟ་རཱ་པ་ཐ་ཀཱ་ན་ཉྩ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ག་ནྡྷ་ཛཱ་ཏ་ཀ་ཐཱ་ཝ་ཎྞ་ནཱ.
༥. ཨེ་ཀ་མ་གྒ་ཀ་ཐཱ་ཝ་ཎྞ་ནཱ
༨༡༠-༨༡༡. ཨི་དཱ་ནི ཨེ་ཀ་མ་གྒ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ བུ་དྡྷེ བྷ་ག་ཝ་ཏི ཨ་ཡོ་ནི་སོ པེ་མ་ཝ་སེ་ནེ་ཝ ‘‘བྷ་ག་ཝཱ སོ་ཏཱ་པ་ནྣོ ཧུ་ཏྭཱ ས་ཀ་དཱ་གཱ་མཱི, ས་ཀ་དཱ་གཱ་མཱི ཧུ་ཏྭཱ ཨ་ནཱ་གཱ་མཱི, ཨ་ནཱ་གཱ་མཱི ཧུ་ཏྭཱ ཨ་ར་ཧ་ཏྟཾ ས་ཙྪཱ་ཀཱ་སི, ཨེ་ཀེ་ནེ་ཝ པ་ན ཨ་རི་ཡ་མ་གྒེ་ན ཙ་ཏྟཱ་རི ཕ་ལཱ་ནི ས་ཙྪཱ་ཀཱ་སཱི’’ཏི ལ་དྡྷི, སེ་ཡྻ་ཐཱ་པི ཏེ་ས་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ཙ་ཏཱུ་ཧི ཕ་ལེ་ཧི ས་དྡྷིཾ ཨུ་པྤ་ནྣཱ་ནཾ ཙ་ཏུ་ནྣཾ ཕ་སྶཱ་དཱི་ནཾ ཨེ་ཀ་ཏོ ས་མོ་དྷཱ་ན་ཝ་སེ་ན ཙོ་དེ་ཏུཾ ཙ་ཏུ་ནྣཾ ཕ་སྶཱ་ནནྟི་ཨཱ་དི་མཱ་ཧ. སོ་ཏཱ་པ་ཏྟི་མ་གྒེ་ནཱཏི་ཨཱ་དི ‘‘ཀ་ཏ་ར་མ་གྒེ་ན ས་ཙྪི་ཀ་རོ་ཏཱི’’ཏི པུ་ཙྪ་ན་ཏྠཾ ཝུ་ཏྟཾ. ཨ་ར་ཧ་ཏྟ་མ་གྒེ་ནཱཏི ཙ ཝུ་ཏྟེ ཏེ་ན ས་ཀྐཱ་ཡ་དི་ཊྛི་ཨཱ་དཱི་ནཾ པ་ཧཱ་ནཱ་བྷཱ་ཝ་ཝ་སེ་ན ཙོ་དེ་ཏི. བྷ་ག་ཝཱ སོ་ཏཱ་པ་ནྣོཏི བུ་དྡྷ་བྷཱུ་ཏ་སྶ སོ་ཏཱ་པ་ནྣ་བྷཱ་ཝོ ན་ཏྠཱི་ཏི པ་ཊི་ཀྑི་པ་ཏི. པ་ར་ཏོ པ་ཉྷ་དྭ་ཡེ་པི ཨེ་སེ་ཝ ན་ཡོ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ཨེ་ཀ་མ་གྒ་ཀ་ཐཱ་ཝ་ཎྞ་ནཱ.
༦. ཛྷཱ་ན་ས་ངྐ་ནྟི་ཀ་ཐཱ་ཝ་ཎྞ་ནཱ
༨༡༣-༨༡༦. ཨི་དཱ་ནི ཛྷཱ་ན་ས་ངྐ་ནྟི་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ‘‘ཨི་དྷ, བྷི་ཀྑ་ཝེ, བྷི་ཀྑུ ཝི་ཝི་ཙྩེ་ཝ ཀཱ་མེ་ཧི པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ དུ་ཏི་ཡཾ ཛྷཱ་ནཾ, ཏ་ཏི་ཡཾ ཛྷཱ་ནཾ, ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི’’ཏི (སཾ. ནི. ༥.༩༢༣-༩༣༤) ཨི་མཾ པ་ཊི་པཱ་ཊི་དེ་ས་ནཾ ནི་སྶཱ་ཡ ‘‘ཏ་སྶ ཏ་སྶ ཛྷཱ་ན་སྶ ཨུ་པ་ཙཱ་ར་པྤ་ཝ་ཏྟིཾ ཝི་ནཱ་ཝ ཛྷཱ་ནཱ ཛྷཱ་ནཾ ས་ངྐ་མ་ཏཱི’’ཏི ལ་དྡྷི, སེ་ཡྻ་ཐཱ་པི མ་ཧི་སཱ་ས་ཀཱ་ན་ཉྩེ་ཝ ཨེ་ཀ་ཙྩཱ་ན་ཉྩ ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏེ དུ་ཏི་ཡ་ཛ྄ཛྷཱ་ནཱུ་པ་ཙཱ་རཾ ཨ་པྤ་ཏྭཱ ཨུ་པྤ་ཊི་པཱ་ཊི་ཡཱ པ་ཋ་མ་ཛ྄ཛྷཱ་ནཱ དུ་ཏི་ཡ་ཛ྄ཛྷཱ་ན་མེ་ཝ ས་ངྐ་མ་ཏི, པ་ཋ་མ་ཏོ ཏ་ཏི་ཡཾ, དུ་ཏི་ཡ་ཏོ ཙ་ཏུ་ཏྠ་མྤི ས་ངྐ་མེ་ཡྻཱ’’ཏི ཙོ་དེ་ཏུཾ པ་ཋ་མཱ ཛྷཱ་ནཱཏི་ཨཱ་དི་མཱ་ཧ. ཡཱ པ་ཋ་མ་སྶཱཏི་ཨཱ་དི ‘‘ཡ་དི པ་ཋ་མ་ཏོ ཨ་ན་ནྟ་རཾ དུ་ཏི་ཡཾ, དུ་ཏི་ཡཱ་དཱི་ཧི ཝཱ ཏ་ཏི་ཡཱ་དཱི་ནི ས་མཱ་པ་ཛྫ་ཏི, ཨེ་ཀཱ་ཝ་ཛྫ་ནེ་ན ས་མཱ་པ་ཛྫེ་ཡྻཱ’’ཏི ཙོ་ད་ན་ཏྠཾ ཝུ་ཏྟཾ. ཀཱ་མེ ཨཱ་དཱི་ན་ཝ་ཏོཏི པ་ཋ་མཾ ཀཱ་མེ ཨཱ་དཱི་ན་ཝ་ཏོ མ་ན་སི ཀ་རོ་ཏོ པ་ཙྪཱ ཨུ་པྤ་ཛྫ་ཏི. ཛྷཱ་ན་ཀྑ་ཎེ པ་ནེ་ས ནི་མི་ཏྟ་མེ་ཝ མ་ན་སི ཀ་རོ་ཏི. ཏ་ཉྙེ་ཝ པ་ཋ་མནྟི ‘‘ཡ་དི པུ་རི་མ་ཛ་ཝ་ན་ཏོ པ་ཙྪི་མ་ཛ་ཝ་ནཾ ཝི་ཡ ཨ་ན་ནྟ་རཾ ཨུ་པྤ་ཛྫེ་ཡྻ, ཋ་པེ་ཏྭཱ པུ་རི་མ་པ་ཙྪི་མ་བྷཱ་ཝཾ ལ་ཀྑ་ཎ་ཏོ ཏ་ཉྙེ་ཝ ཏཾ བྷ་ཝེ་ཡྻཱ’’ཏི ཙོ་དེ་ཏུཾ པུ་ཙྪ་ཏི. ཨི་མི་ནཱ ཨུ་པཱ་ཡེ་ན ས་བྦ་ཏྠ ཨ་ཏྠོ ཝེ་དི་ཏ་བྦོ. ཝི་ཝི་ཙྩེ་ཝ ཀཱ་མེ་ཧཱིཏི་ཨཱ་དཱི་ཧི པ་ཊི་པཱ་ཊི་ཡཱ ཛྷཱ་ནཱ་ནཾ དེ་སི་ཏ་བྷཱ་ཝཾ དཱི་པེ་ཏི, ན ཨ་ན་ནྟ་རུ་པྤ་ཏྟིཾ, ཏ་སྨཱ ཨ་སཱ་དྷ་ཀ་ནྟི.
ཛྷཱ་ན་ས་ངྐ་ནྟི་ཀ་ཐཱ་ཝ་ཎྞ་ནཱ.
༧. ཛྷཱ་ན་ནྟ་རི་ཀ་ཀ་ཐཱ་ཝ་ཎྞ་ནཱ
༨༡༧-༨༡༨. ཨི་དཱ་ནི ཛྷཱ་ན་ནྟ་རི་ཀ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ས་མ་ཡེ ‘‘པ་ཉྩ་ཀ་ན་ཡེ པ་ཉྩ ཛྷཱ་ནཱ་ནི ཝི་བྷ་ཏྟཱ་ནི, ཀེ་ཝ་ལཾ ཏ་ཡོ ས་མཱ་དྷཱི ཨུ་དྡི་ཊྛཱ’’ཏི ཨ་ཝི་ཏ་ཀྐ་ཝི་ཙཱ་ར་མ་ཏྟ་སྶ ས་མཱ་དྷི་ནོ ཨོ་ཀཱ་སཾ ཨ་ཛཱ་ན་ནྟཱ་ནཾ ‘‘པ་ཋ་མ་སྶ ཙ དུ་ཏི་ཡ་སྶ ཙ ཛྷཱ་ན་སྶ ཨ་ནྟ་རེ ཛྷཱ་ན་ནྟ་རི་ཀཱ ནཱ་མ ཨེ་སཱ’’ཏི ལ་དྡྷི, སེ་ཡྻ་ཐཱ་པི ས་མྨི་ཏི་ཡཱ་ན་ཉྩེ་ཝ ཨེ་ཀ་ཙྩཱ་ན་ཉྩ ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཛྷཱ་ན་མྤི ཙེ་ཏ་སི་ཀཱ དྷ་མྨཱ, ཕ་སྶཱ་ད་ཡོ་པི, ཏ་སྨཱ ཡ་དི ཛྷཱ་ན་ནྟ་རི་ཀཱ ནཱ་མ བྷ་ཝེ་ཡྻ, ཕ་སྶ་ནྟ་རི་ཀཱ་དཱི་ཧི་པི བྷ་ཝི་ཏ་བྦ’’ནྟི ཙོ་ད་ན་ཏྠཾ ཨ་ཏྠི ཕ་སྶ་ནྟ་རི་ཀཱཏི་ཨཱ་དི་མཱ་ཧ.
དུ་ཏི་ཡ་སྶ ཙ ཛྷཱ་ན་སྶཱཏི ‘‘ཡ་དི ཛྷཱ་ན་ནྟ་རི་ཀཱ ནཱ་མ བྷ་ཝེ་ཡྻ, དུ་ཏི་ཡ་ཏ་ཏི་ཡཱ་དཱི་ནི་པི ཛྷཱ་ནཱ་ནེ་ཝ, ཏེ་ས་མྤི ཨ་ནྟ་རི་ཀཱ་ཡ བྷ་ཝི་ཏ་བྦ’’ནྟི ཙོ་ད་ན་ཏྠཾ ཝུ་ཏྟཾ. སོ ཀེ་ཝ་ལཾ ལ་དྡྷི་ཡཱ ཨ་བྷཱ་ཝེ་ན པ་ཊི་ཀྑི་པ་ཏི ཙེ་ཝ པ་ཊི་ཛཱ་ནཱ་ཏི ཙ. པ་ཋ་མ་སྶ ཙཱཏི པུ་ཊྛོ ལ་དྡྷི་ཝ་སེ་ན པ་ཊི་ཛཱ་ནཱ་ཏི.
༨༡༩. ས་ཝི་ཏ་ཀྐོ ས་ཝི་ཙཱ་རོཏི་ཨཱ་དི ‘‘ཏི་ཎྞ་མྤི ས་མཱ་དྷཱི་ནཾ ས་མཱ་དྷི་བྷཱ་ཝེ ས་མཱ་ནེ ཨ་ཝི་ཏ་ཀྐོ ཝི་ཙཱ་ར་མ་ཏྟོ་ཝ ས་མཱ་དྷི ཛྷཱ་ན་ནྟ་རི་ཀོ, ན ཨི་ཏ་རོ་ཏི ཀོ ཨེ་ཏྠ ཝི་སེ་ས་ཧེ་ཏཱུ’’ཏི ཙོ་ད་ན་ཏྠཾ ཝུ་ཏྟཾ.
༨༢༠-༨༢༢. དྭི་ནྣཾ ཛྷཱ་ནཱ་ནཾ པ་ཊུ་པྤ་ནྣཱ་ནནྟི པ་ཋ་མ་དུ་ཏི་ཡཱ་ནི ས་ནྡྷཱ་ཡ པུ་ཙྪ་ཏི. ཨི་ཏ་རོ ‘‘ཏེ་སཾ པ་ཙྩུ་པྤ་ནྣཱ་ནཾ་ཡེ་ཝ ཨ་ནྟ་རེ ཨ་ཝི་ཏ་ཀྐོ ཝི་ཙཱ་ར་མ་ཏྟོ ས་མཱ་དྷི ཛྷཱ་ན་ནྟ་རི་ཀོ ནཱ་མ ཧོ་ཏཱི’’ཏི ལ་དྡྷི་ཡཱ པ་ཊི་ཛཱ་ནཱ་ཏི. པ་ཋ་མཾ ཛྷཱ་ནཾ ནི་རུ་དྡྷནྟི པུ་ཊྛོ ཏི་ཎྞཾ ཨེ་ཀ་ཀྑ་ཎེ པ་ཝ་ཏྟི ན ཡུ་ཏྟཱ་ཏི པ་ཊི་ཛཱ་ནཱ་ཏི. ཨ་ཝི་ཏ་ཀྐོ ཝི་ཙཱ་ར་མ་ཏྟོ ས་མཱ་དྷི པ་ཋ་མཾ ཛྷཱ་ནནྟི ཙ་ཏུ་ཀྐ་ན་ཡ་ཝ་སེ་ན པུ་ཙྪ་ཏི. ས་ཀ་ཝཱ་དཱི ཏ་སྨིཾ ན་ཡེ ཏ་སྶ ཨ་བྷཱ་ཝཱ པ་ཊི་ཀྑི་པ་ཏི. ན་ནུ ཏ་ཡོ ས་མཱ་དྷཱིཏི ཨེ་ཏྠཱ་ཡ་མ་དྷི་པྤཱ་ཡོ – ཡ་ཐཱ ཏེ་སུ ཏཱི་སུ ས་མཱ་དྷཱི་སུ དྭེ ས་མཱ་དྷཱི ཛྷཱ་ནཱ་ནེ་ཝ, ན ཛྷཱ་ན་ནྟ་རི་ཀཱ, ཨེ་ཝཾ ཨི་ཏ་རེ་ན་པི ཛྷཱ་ནེ་ནེ་ཝ བྷ་ཝི་ཏ་བྦཾ, ན ཛྷཱ་ན་ནྟ་རི་ཀཱ་ཡཱ་ཏི.
ཛྷཱ་ན་ནྟ་རི་ཀ་ཀ་ཐཱ་ཝ་ཎྞ་ནཱ.
༨. ས་མཱ་པ་ནྣོ ས་དྡཾ སུ་ཎཱ་ཏཱི་ཏི་ཀ་ཐཱ་ཝ་ཎྞ་ནཱ
༨༢༣-༨༢༥. ཨི་དཱ་ནི ས་མཱ་པ་ནྣོ ས་དྡཾ སུ་ཎཱ་ཏཱི་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་སྨཱ པ་ཋ་མ་སྶ ཛྷཱ་ན་སྶ ས་དྡོ ཀ་ཎྜ་ཀོ ཝུ་ཏྟོ བྷ་ག་ཝ་ཏཱ, ཡ་དི ཙ ས་མཱ་པ་ནྣོ ཏཾ ན སུ་ཎེ་ཡྻ, ཀ་ཐཾ ཀ་ཎྜ་ཀོ སི་ཡཱ. ཏ་སྨཱ ས་མཱ་པ་ནྣོ ས་དྡཾ, སུ་ཎཱ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཙ་ཀྑུ་ནཱ རཱུ་པཾ པ་སྶ་ཏཱིཏི་ཨཱ་དི ‘‘ས་མཱ་པ་ནྣ་སྶ ཏཱ་ཝ པ་ཉྩ་དྭཱ་ར་པྤ་ཝ་ཏྟཾ ན་ཏྠི, ཏ་སྨིཾ ཨ་ས་ཏི ཡ་དི སོ ས་དྡཾ སུ་ཎེ་ཡྻ, རཱུ་པ་མྤི པ་སྶེ་ཡྻཱ’’ཏི ཙོ་ད་ན་ཏྠཾ ཝུ་ཏྟཾ. ས་དྡོ ཀ་ཎྜ་ཀོཏི ཝི་ཀྑེ་པ་ཀ་ར་ཏྟཱ ཝུ་ཏྟཾ. ཨོ་ལཱ༹་རི་ཀེ་ན ཧི ས་དྡེ་ན སོ་ཏེ གྷ་ཊྚི་ཏེ པ་ཋ་མ་ཛ྄ཛྷཱ་ན་ཏོ ཝུ་ཊྛཱ་ནཾ ཧོ་ཏི, ཏེ་ནེ་ཏཾ ཝུ་ཏྟཾ, ཏ་སྨཱ ཨ་སཱ་དྷ་ཀཾ. དུ་ཏི་ཡ་སྶ ཛྷཱ་ན་སྶཱཏི་ཨཱ་དི ‘‘ཡ་ཐཱ ཨ་ཉྙོ་པི ཀ་ཎྜ་ཀོ ཨ་ནྟོ་ས་མཱ་པ་ཏྟི་ཡཾ ན་ཏྠི, ཨེ་ཝཾ ས་དྡ་སྶ་ཝ་ན་མྤཱི’’ཏི བོ་དྷ་ན་ཏྠཾ ཝུ་ཏྟཾ, ཏཾ ས་བྦཾ ཨུ་ཏྟཱ་ན་ཏྠ་མེ་ཝཱ་ཏི.
ས་མཱ་པ་ནྣོ ས་དྡཾ སུ་ཎཱ་ཏཱི་ཏི་ཀ་ཐཱ་ཝ་ཎྞ་ནཱ.
༩. ཙ་ཀྑུ་ནཱ་རཱུ་པཾ་པ་སྶ་ཏཱི་ཏི་ཀ་ཐཱ་ཝ་ཎྞ་ནཱ
༨༢༦-༨༢༧. ཨི་དཱ་ནི ཙ་ཀྑུ་ནཱ རཱུ་པཾ པ་སྶ་ཏཱི་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཙ་ཀྑུ་ནཱ རཱུ་པཾ དི་སྭཱ’’ཏི ཝ་ཙ་ནཾ ནི་སྶཱ་ཡ ‘‘པ་སཱ་ད་ཙ་ཀྑུ་མེ་ཝ རཱུ་པཾ པ་སྶ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཙ་ཀྑུ་ནཱ རཱུ་པཾ པ་སྶེ་ཡྻ, རཱུ་པེ་ན རཱུ་པཾ པ་སྶེ་ཡྻཱ་ཏཱི’’ཏི ཙོ་དེ་ཏུཾ རཱུ་པེ་ན རཱུ་པཾ པ་སྶ་ཏཱིཏི ཨཱ་ཧ. ཨི་ཏ་རོ རཱུ་པཱ་ཡ་ཏ་ནཾ ས་ནྡྷཱ་ཡ པ་ཊི་ཀྑི་པི་ཏྭཱ པུ་ན པུ་ཊྛོ ཙ་ཀྑུ་མེ་ཝ ས་ནྡྷཱ་ཡ པ་ཊི་ཛཱ་ནཱ་ཏི. པ་ཊི་ཝི་ཛཱ་ནཱ་ཏཱིཏི ཨེ་ཏྠ ཨ་ཡ་མ་དྷི་པྤཱ་ཡོ – པ་སྶ་ཏཱི་ཏི ཧི མ་ཡཾ པ་ཊི་ཛཱ་ན་ནཾ ས་ནྡྷཱ་ཡ པུ་ཙྪཱ་མ, ན ཙ་ཀྑཱུ་པ་སཾ་ཧཱ་ར་མ་ཏྟཾ. ཏ་སྨཱ ཝ་དེ་ཧི ཏཱ་ཝ ‘‘ཀིཾ ཏེ ཙ་ཀྑུ་མཱ རཱུ་པེ་ན རཱུ་པཾ པ་ཊི་ཝི་ཛཱ་ནཱ་ཏཱི’’ཏི. ཨི་ཏ་རོ པུ་རི་མ་ན་ཡེ་ནེ་ཝ པ་ཊི་ཀྑི་པ་ཏི ཙེ་ཝ པ་ཊི་ཛཱ་ནཱ་ཏི ཙ. ཨ་ཐ ནཾ ‘‘ཨེ་ཝཾ ས་ནྟེ རཱུ་པཾ མ་ནོ་ཝི་ཉྙཱ་ཎཾ ཨཱ་པ་ཛྫ་ཏི, ཏ་ཉྷི པ་ཊི་ཝི་ཛཱ་ནཱ་ཏི ནཱ་མཱ’’ཏི ཙོ་དེ་ཏུཾ རཱུ་པཾ མ་ནོ་ཝི་ཉྙཱ་ཎནྟི ཨཱ་ཧ. ཨི་ཏ་རོ ལེ་སཾ ཨ་ལ་བྷ་ནྟོ པ་ཊི་ཀྑི་པ་ཏེ་ཝ. ཨ་ཏྠི ཙ་ཀྑུ་སྶ ཨཱ་ཝ་ཊྚ་ནཱཏི་ཨཱ་དི ‘‘ཡ་དི ཙ་ཀྑུ པ་ཊི་ཝི་ཛཱ་ན་ན་ཊྛེ་ན པ་སྶ་ཏི, ཙ་ཀྑུ་ཝི་ཉྙཱ་ཎ་སྶ ཝི་ཡ ཏ་སྶཱ་པི ཨཱ་ཝ་ཛྫ་ནཱ་ཡ བྷ་ཝི་ཏ་བྦ’’ནྟི ཙོ་དེ་ཏུཾ པུ་ཙྪ་ཏི. ཨི་ཏ་རོ ཡ་སྨཱ ན ཨཱ་ཝ་ཛྫ་ན་པ་ཊི་བ་དྡྷཾ ཙ་ཀྑུ, ན ཏཾ ཨཱ་ཝ་ཛྫ་ནཱ་ན་ནྟ་རཾ ཨུ་པྤ་ཛྫ་ཏི, ཏ་སྨཱ ན ཧེ་ཝནྟི པ་ཊི་ཀྑི་པ་ཏི. སོ་ཏེ་ན ས་དྡནྟི་ཨཱ་དཱི་སུ་པི ཨེ་སེ་ཝ ན་ཡོ. ཨི་དྷ, བྷི་ཀྑ་ཝེ, བྷི་ཀྑུ ཙ་ཀྑུ་ནཱ རཱུ་པཾ པ་སྶ་ཏཱིཏི ས་ས་མྦྷཱ་ར་ཀ་ཐཱ་ན་ཡེ་ན ཝུ་ཏྟཾ. ཡ་ཐཱ ཧི ཨུ་སུ་ནཱ ཝི་ཛ྄ཛྷ་ནྟོ་པི ‘‘དྷ་ནུ་ནཱ ཝི་ཛ྄ཛྷ་ཏཱི’’ཏི ཝུ་ཙྩ་ཏི, ཨེ་ཝཾ ཙ་ཀྑུ་ཝི་ཉྙཱ་ཎེ་ན པ་སྶ་ནྟོ་པི ‘‘ཙ་ཀྑུ་ནཱ པ་སྶ་ཏཱི’’ཏི ཝུ་ཏྟོ, ཏ་སྨཱ ཨ་སཱ་དྷ་ཀ་མེ་ཏཾ. སེ་སེ་སུ་པི ཨེ་སེ་ཝ ན་ཡོ་པི.
ཙ་ཀྑུ་ནཱ རཱུ་པཾ པ་སྶ་ཏཱི་ཏི་ཀ་ཐཱ་ཝ་ཎྞ་ནཱ.
ཨ་ཊྛཱ་ར་ས་མོ ཝ་གྒོ.