༡༧. ས་ཏྟ་ར་ས་མ་ཝ་གྒོ
༡. ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡ་ཀ་ཐཱ་ཝ་ཎྞ་ནཱ
༧༧༦-༧༧༩. ཨི་དཱ་ནི ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ཨ་ར་ཧ་ཏོ དཱ་ན་སཾ་ཝི་བྷཱ་ག་ཙེ་ཏི་ཡ་ཝ་ནྡ་ནཱ་དཱི་ནི ཀ་མྨཱ་ནི དི་སྭཱ ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཨ་ར་ཧཱ ནཱ་མ པ་ཧཱི་ན་པུ་ཉྙ་པཱ་པོ, སོ ཡ་དི པུ་ཉྙཾ ཀ་རེ་ཡྻ, པཱ་པ་མྤི ཀ་རེ་ཡྻཱ’’ཏི ཙོ་དེ་ཏུཾ ཨ་པུ་ཉྙཱུ་པ་ཙ་ཡོཏི ཨཱ་ཧ. ཨི་ཏ་རོ པཱ་ཎཱ་ཏི་པཱ་ཏཱ་དི་ཀི་རི་ཡཾ ཨ་པ་སྶ་ནྟོ པ་ཊི་ཀྑི་པ་ཏི. པུ་ཉྙཱ་བྷི་ས་ངྑཱ་རནྟི་ཨཱ་དཱི་སུ བྷ་ཝ་གཱ་མི་ཀ་མྨཾ ཨ་ར་ཧ་ཏོ ན་ཏྠཱི་ཏི པ་ཊི་ཀྑི་པ་ཏི. དཱ་ནཾ ད་དེ་ཡྻཱཏི་ཨཱ་དཱི་སུ ཀི་རི་ཡ་ཙི་ཏྟེ་ན དཱ་ནཱ་དི་པ་ཝ་ཏྟི་ས་བྦྷཱ་ཝ་ཏོ ས་ཀ་ཝཱ་དཱི པ་ཊི་ཛཱ་ནཱ་ཏི. ཨི་ཏ་རོ ཙི་ཏྟཾ ཨ་ནཱ་དི་ཡི་ཏྭཱ ཀི་རི་ཡཱ་པ་ཝ་ཏྟི་མ་ཏྟ་ད་སྶ་ནེ་ནེ་ཝ ལ་དྡྷིཾ པ་ཏི་ཊྛ་པེ་ཏི. སཱ པ་ན ཨ་ཡོ་ནི་སོ པ་ཏི་ཊྛཱ་པི་ཏ་ཏྟཱ ཨ་པྤ་ཏི་ཊྛཱ་པི་ཏཱ ཧོ་ཏཱི་ཏི.
ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི་ཀ་ཐཱ་ཝ་ཎྞ་ནཱ.
༢. ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ་ཝ་ཎྞ་ནཱ
༧༨༠. ཨི་དཱ་ནི ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘ནཱ་ཧཾ, བྷི་ཀྑ་ཝེ, ས་ཉྩེ་ཏ་ནི་ཀཱ་ནཾ ཀ་མྨཱ་ནཾ ཀ་ཏཱ་ནཾ ཨུ་པ་ཙི་ཏཱ་ནཾ ཨ་པ་ཊི་སཾ་ཝེ་དི་ཏྭཱ བྱ་ནྟཱི་བྷཱ་ཝཾ ཝ་དཱ་མཱི’’ཏི (ཨ. ནི. ༡༠.༢༡༧) སུ་ཏྟ་སྶ ཨ་ཏྠཾ ཨ་ཡོ་ནི་སོ ག་ཧེ་ཏྭཱ ‘‘ཨ་ར་ཧ་ཏཱ ནཱ་མ ས་བྦ་ཀ་མྨ་ཝི་པཱ་ཀཾ པ་ཊི་སཾ་ཝེ་ད་ཡི་ཏྭཱ་ཝ པ་རི་ནི་བྦཱ་ཡི་ཏ་བྦཾ, ཏ་སྨཱ ན་ཏྠི, ཨ་ར་ཧ་ཏོ ཨ་ཀཱ་ལ་མ་ཙྩཱུ’’ཏི ཡེ་སཾ ལ་དྡྷི, སེ་ཡྻ་ཐཱ་པི རཱ་ཛ་གི་རི་ཀཱ་ན་ཉྩེ་ཝ སི་དྡྷ་ཏྠི་ཀཱ་ན་ཉྩ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ས་ཙེ ཏ་སྶ ན་ཏྠི ཨ་ཀཱ་ལ་མ་ཙྩུ, ཨ་ར་ཧ་ནྟ་གྷཱ་ཏ་ཀེ་ན ནཱ་མ ན བྷ་ཝི་ཏ་བྦ’’ནྟི ཙོ་དེ་ཏུཾ ན་ཏྠི ཨ་ར་ཧ་ནྟ་གྷཱ་ཏ་ཀོཏི ཨཱ་ཧ. ཨི་ཏ་རོ ཨཱ་ན་ནྟ་རི་ཡ་ཀ་མྨ་སྶ ཙེ་ཝ ཏཱ་དི་སཱ་ན་ཉྩ པུ་གྒ་ལཱ་ནཾ ས་བྦྷཱ་ཝ་ཏོ པ་ཊི་ཀྑི་པ་ཏི.
༧༨༡. ཝི་སཾ ན ཀ་མེ་ཡྻཱཏི པ་ཉྷེ ‘‘ཡཱ་ཝ པུ་བྦེ ཀ་ཏ་ཀ་མྨཾ པ་རི་ཀྑ་ཡཾ ན ག་ཙྪ་ཏི, ཏཱ་ཝ ན ཀ་མ་ཏཱི’’ཏི ལ་དྡྷི་ཡཱ པ་ཊི་ཀྑི་པ་ཏི. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏི.
༧༨༢. ནཱ་ཧཾ, བྷི་ཀྑ་ཝེཏི སུ་ཏྟཾ ཨི་དཾ ས་ནྡྷཱ་ཡ ཝུ་ཏྟཾ – ས་ཉྩེ་ཏ་ནི་ཀཱ་ནཾ ཀ་མྨཱ་ནཾ ཀ་ཏཱ་ནཾ ཝི་པཱ་ཀཾ ཨ་པ་ཊི་སཾ་ཝེ་དི་ཏྭཱ ཨ་ཝི་ནྡི་ཏྭཱ ཨ་ན་ནུ་བྷ་ཝི་ཏྭཱ བྱ་ནྟཱི་བྷཱ་ཝཾ ཏེ་སཾ ཀ་མྨཱ་ནཾ པ་རི་ཝ་ཊུ་མ་པ་རི་ཙྪི་ནྣ་བྷཱ་ཝཾ ན ཝ་དཱ་མི, ཏ་ཉྩ ཁོ དི་ཊྛ་དྷ་མྨ་ཝེ་ད་ནཱི་ཡཱ་ནཾ དི་ཊྛེ་ཝ དྷ་མྨེ, ན ཏ་ཏོ པ་རཾ, ཨུ་པ་པ་ཛྫ་ཝེ་ད་ནཱི་ཡཱ་ནཾ ཨ་ན་ནྟ་རཾ ཨུ་པ་པ་ཏྟིཾ ཨུ་པ་པ་ཛྫི་ཏྭཱ་ཝ ན ཏ་ཏོ པ་རཾ, ཨ་པ་རཱ་པ་རི་ཡ་ཝེ་ད་ནཱི་ཡཱ་ནཾ ཡ་དཱ ཝི་པཱ་ཀོ་ཀཱ་སཾ ལ་བྷ་ནྟི, ཏ་ཐཱ་རཱུ་པེ ཨ་པ་རཱ་པ་རེ ཝཱ པ་རི་ཡཱ་ཡེ. ཨེ་ཝཾ ས་བྦ་ཐཱ་པི སཾ་སཱ་ར་པ་ཝ་ཏྟེ ས་ཏི ལ་དྡྷ་ཝི་པཱ་ཀ་ཝཱ་རེ ཀ་མྨེ ན ཝི་ཛྫ་ཏེ་སོ ཛ་ག་ཏི་པྤ་དེ་སོ, ཡ་ཏྠ་ཊྛི་ཏོ མུ་ཙྩེ་ཡྻ པཱ་པ་ཀ་མྨཱ་ཏི. ཨེ་ཝཾ ས་ནྟེ ཡ་དེ་ཏཾ ‘‘ཨ་ལ་དྡྷ་ཝི་པཱ་ཀ་ཝཱ་ར་མྤི ཀ་མྨཾ ཨ་ཝ་སྶཾ ཨ་ར་ཧ་ཏོ པ་ཊི་སཾ་ཝེ་དི་ཏ་བྦ’’ནྟི ཀ་པྤ་ནཱ་ཝ་སེ་ན ‘‘ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ’’ཏི ལ་དྡྷི་པ་ཏི་ཊྛཱ་པ་ནཾ ཀ་ཏཾ, ཏཾ དུ་ཀྐ་ཊ་མེ་ཝཱ་ཏི.
ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ་ཝ་ཎྞ་ནཱ.
༣. ས་བྦ་མི་དཾ ཀ་མྨ་ཏོ་ཏི་ཀ་ཐཱ་ཝ་ཎྞ་ནཱ
༧༨༣. ཨི་དཱ་ནི ས་བྦ་མི་དཾ ཀ་མྨ་ཏོ་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཀ་མྨུ་ནཱ ཝ་ཏྟ་ཏི ལོ་ཀོ’’ཏི སུ་ཏྟཾ ནི་སྶཱ་ཡ ‘‘ས་བྦ་མི་དཾ ཀ་མྨ་ཀི་ལེ་ས་ཝི་པཱ་ཀ་ཝ་ཊྚཾ ཀ་མྨ་ཏོ་ཝ ཧོ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི རཱ་ཛ་གི་རི་ཀཱ་ན་ཉྩེ་ཝ སི་དྡྷ་ཏྠི་ཀཱ་ན་ཉྩ; ཏེ ས་ནྡྷཱ་ཡ ས་བྦ་མི་དནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཨེ་ཝཾ ས་ནྟེ ཀ་མྨ་མྤི ཀ་མྨ་ཏོ ཨཱ་པ་ཛྫ་ཏཱི’’ཏི ཙོ་དེ་ཏུཾ ཀ་མྨ་མྤི ཀ་མྨ་ཏོཏི ཨཱ་ཧ. ཨི་ཏ་རོ ཡ་དི ཀ་མྨ་མྤི ཀ་མྨ་ཏོ་ཝ ནཱ་མ ཏཾ ཀ་མྨཾ ཝི་པཱ་ཀོ་ཡེ་ཝ སི་ཡཱ་ཏི པ་ཊི་ཀྑི་པ་ཏི. པུ་བྦེ་ཀ་ཏ་ཧེ་ཏཱུཏི ‘‘ཡ་དི ས་བྦ་མི་དཾ ཀ་མྨ་ཏོ, པུ་བྦེ་ཀ་ཏ་ཧེ་ཏུ་ནཱ ཏེ་ན བྷ་ཝི་ཏ་བྦ’’ནྟི ཙོ་དེ་ཏུཾ པུ་ཙྪ་ཏི, ཨི་ཏ་རོ པུ་བྦེ་ཀ་ཏ་ཧེ་ཏུ་ཝཱ་ད་བྷ་ཡེ་ན པ་ཊི་ཀྑི་པ་ཏི.
༧༨༤. ཀ་མྨ་ཝི་པཱ་ཀ་ཏོཏི ‘‘ཡ་དི ས་བྦ་མི་དཾ ཀ་མྨ་ཏོ, ཡཾ ཨ་ཏཱི་ཏ་བྷ་ཝེ པ་ཝ་ཏྟ་སྶ ཧེ་ཏུ་བྷཱུ་ཏཾ ཀ་མྨཾ, ཏ་མྤི པུ་རི་མ་ཏ་རེ བྷ་ཝེ ཀ་མྨ་ཏོ་ཏི ཀ་མྨ་ཝི་པཱ་ཀོ ས་མྤ་ཛྫ་ཏི, ཏེ་ན ཏེ ས་བྦ་མི་དཾ ཀ་མྨ་ཝི་པཱ་ཀ་ཏོ ཨཱ་པ་ཛྫ་ཏཱི’’ཏི ཙོ་དེ་ཏུཾ པུ་ཙྪ་ཏི. ཨི་ཏ་རོ བཱི་ཛ་ཏོ ཨཾ་ཀུ་ར་སྶེ་ཝ པ་ཙྩུ་པྤ་ནྣ་པ་ཝ་ཏྟ་སྶ ཀ་མྨ་ཏོ ནི་བྦ་ཏྟིཾ ས་ནྡྷཱ་ཡ པ་ཊི་ཀྑི་པ་ཏི. དུ་ཏི་ཡཾ པུ་ཊྛོ ཏ་སྶཱ་པི ཀ་མྨ་སྶ བཱི་ཛ་སྶ པུ་རི་མ་བཱི་ཛ་ཏོ ཝི་ཡ པུ་རི་མ་ཀ་མྨ་ཏོ པ་ཝ་ཏྟ་ཏྟཱ པ་ཊི་ཛཱ་ནཱ་ཏི. པཱ་ཎཾ ཧ་ནེ་ཡྻཱཏི་ཨཱ་དི ‘‘ཡ་དི ས་བྦཾ ཀ་མྨ་ཝི་པཱ་ཀ་ཏོ, པཱ་ཎཱ་ཏི་པཱ་ཏཱ་དཱི་ནི ཀ་མྨ་ཝི་པཱ་ཀེ་ནེ་ཝ ཀ་རེ་ཡྻཱ’’ཏི ཙོ་དེ་ཏུཾ ཝུ་ཏྟཾ. ཨི་ཏ་རོ དུ་སྶཱི་ལྱ་ཙེ་ཏ་ནཱ་པི པུ་རི་མ་ཀ་མྨ་ནི་བྦ་ཏྟཱ ཨེ་ཀེ་ན པ་རི་ཡཱ་ཡེ་ན ཝི་པཱ་ཀོ་ཡེ་ཝཱ་ཏི ལ་དྡྷི་ཡཱ པ་ཊི་ཛཱ་ནཱ་ཏི. ཨ་ཐ ནཾ ‘‘ཡ་དི ཏེ པཱ་ཎཱ་ཏི་པཱ་ཏོ ཀ་མྨ་ཝི་པཱ་ཀ་ཏོ ནི་བྦ་ཏྟ་ཏི, པཱ་ཎཱ་ཏི་པཱ་ཏོ ཝི་ཡ ཝི་པཱ་ཀོ་པི ས་ཕ་ལོ ཨཱ་པ་ཛྫ་ཏཱི’’ཏི ཙོ་དེ་ཏུཾ ས་ཕ་ལོཏི ཨཱ་ཧ. ཨི་ཏ་རོ པཱ་ཎཱ་ཏི་པཱ་ཏ་སྶ ནི་ར་ཡ་སཾ་ཝ་ཏྟ་ནི་ཀཱ་དི་བྷཱ་ཝ་ཏོ ས་ཕ་ལ་ཏཾ པ་སྶ་ནྟོ པ་ཊི་ཛཱ་ནཱ་ཏི. ཀ་མྨ་ཝི་པཱ་ཀ་སྶ པ་ན ཨི་དཾ ནཱ་མ ཕ་ལ་ནྟི ཝུ་ཏྟ་ཊྛཱ་ནཾ ཨ་པ་སྶ་ནྟོ པ་ཊི་ཀྑི་པ་ཏི. ཨ་དི་ནྣཱ་དཱ་ནཱ་དཱི་སུ་པི ཨེ་སེ་ཝ ན་ཡོ. གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རོ ས་ཕ་ལོཏི དེ་ཡྻ་དྷ་མྨ་ཝ་སེ་ན དཱ་ན་ཕ་ལཾ པུ་ཙྪ་ཏི. ཀ་མྨུ་ནཱ ཝ་ཏྟ་ཏཱིཏི སུ་ཏྟཾ ‘‘ན་ཏྠི ཀ་མྨ’’ནྟི ཨ་ཀ་མྨ་ཝཱ་དི་ཏཾ པ་ཊི་ཀྑི་པི་ཏྭཱ ‘‘ཨ་ཏྠི ཀ་མྨ’’ནྟི ཀ་མྨ་ཝཱ་དི་ཏཾ ཀ་མྨ་སྶ་ཀ་ཏཾ དཱི་པེ་ཏི. ན ས་བྦ་སྶེ་ཝ ཀ་མྨ་ཏོ ནི་བྦ་ཏྟིཾ, ཏ་སྨཱ ཨ་སཱ་དྷ་ཀ་ནྟི.
ས་བྦ་མི་དཾ ཀ་མྨ་ཏོ་ཏི་ཀ་ཐཱ་ཝ་ཎྞ་ནཱ.
༤. ཨི་ནྡྲི་ཡ་བ་དྡྷ་ཀ་ཐཱ་ཝ་ཎྞ་ནཱ
༧༨༦-༧༨༧. ཨི་དཱ་ནི ཨི་ནྡྲི་ཡ་བ་དྡྷ་ཀ་ཐཱ ནཱ་མ ཧོ་ཏི. ཏ་ཏྠ དུ་ཝི་དྷཾ དུ་ཀྑཾ – ཨི་ནྡྲི་ཡ་བ་དྡྷཾ, ཨ་ནི་ནྡྲི་ཡ་བ་དྡྷ་ཉྩ. ཨི་ནྡྲི་ཡ་བ་དྡྷཾ དུ་ཀྑ་ཝ་ཏྠུ་ཏཱ་ཡ དུ་ཀྑཾ, ཨ་ནི་ནྡྲི་ཡ་བ་དྡྷཾ ཨུ་ད་ཡ་བྦ་ཡ་པ་ཊི་པཱི་ལ༹་ན་ཊྛེ་ན ‘‘ཡ་ད་ནི་ཙྩཾ ཏཾ དུ་ཀྑ’’ནྟི ས་ངྒ་ཧི་ཏ་ཏྟཱ དུ་ཀྑཾ. ཨི་མཾ ཝི་བྷཱ་གཾ ཨ་གྒ་ཧེ་ཏྭཱ ‘‘ཡ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི, ཏཾ ཨི་ནྡྲི་ཡ་བ་དྡྷ་མེ་ཝ དུ་ཀྑཾ, ན ཨི་ཏ་ར’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ, ཏེ་སཾ ཨི་ཏ་ར་སྶཱ་པི དུ་ཀྑ་བྷཱ་ཝཾ ད་སྶེ་ཏུཾ ཨི་ནྡྲི་ཡ་བ་དྡྷ་ཉྙེ་ཝཱཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་སྨཱ བྷ་ག་ཝ་ཏཱ ‘ཡ་ད་ནི་ཙྩཾ ཏཾ དུ་ཀྑ’ནྟི ཝུ་ཏྟཾ, ཏ་སྨཱ ཨི་ནྡྲི་ཡ་བ་དྡྷེ་ནེ་ཝ ཏེ་ན ཨ་ནི་ཙྩེ་ན བྷ་ཝི་ཏ་བྦ’’ནྟི ཙོ་དེ་ཏུཾ ཨི་ནྡྲི་ཡ་བ་དྡྷ་ཉྙེ་ཝ ཨ་ནི་ཙྩནྟི་ཨཱ་དི་མཱ་ཧ. ན་ནུ ཨ་ནི་ནྡྲི་ཡ་བ་དྡྷཾ ཨ་ནི་ཙྩནྟི ན་ནུ པ་ཐ་ཝཱི་པ་བྦ་ཏ་པཱ་སཱ་ཎཱ་དི ཨ་ནི་ནྡྲི་ཡ་བ་དྡྷ་མྤི ཨ་ནི་ཙྩ་ནྟི ཨ་ཏྠོ.
༧༨༨. ན ཝ་ཏྟ་བྦཾ ཨི་ནྡྲི་ཡ་བ་དྡྷ་ཉྙེ་ཝ དུ་ཀྑནྟི པ་ཉྷེ ཨཱ་མ་ནྟཱཏི པ་ཊི་ཉྙཱ ས་ཀ་ཝཱ་དི་སྶ. ཨ་ནི་ནྡྲི་ཡ་བ་དྡྷ་ཉྷི དུ་ཀྑ་དོ་མ་ན་སྶཱ་ནཾ ཨཱ་ར་མྨ་ཎཾ ཧོ་ཏི. ཨུ་ཎྷ་ཀཱ་ལ་སྨི་ཉྷི ཨ་གྒི སཱི་ཏ་ཀཱ་ལེ ཙ ཝཱ་ཏོ དུ་ཀྑ་སྶ ཨཱ་ར་མྨ་ཎཾ, ནི་ཙྩ་མྤི བྷོ་ག་ཝི་ནཱ་སཱ་ད་ཡོ དོ་མ་ན་སྶ་སྶ. ཏ་སྨཱ ཝི་ནཱ་པི ཨ་ནི་ཙྩ་ཊྛེ་ན ཨ་ནི་ནྡྲི་ཡ་བ་དྡྷཾ དུ་ཀྑ་ནྟི ཝ་ཏྟ་བྦཾ. ཀ་མྨ་ཀི་ལེ་སེ་ཧི པ་ན ཨ་ནི་བྦ་ཏྟ་ཏྟཱ དུ་ཀྑཾ ཨ་རི་ཡ་ས་ཙྩ་ནྟི ན ཝ་ཏྟ་བྦཾ, ཏ་ཐཱ མ་གྒེ་ན ཨ་པ་རི་ཉྙེ་ཡྻ་ཏྟཱ. ཡ་སྨཱ པ་ན ཏི་ཎ་ཀ་ཊྛཱ་དི་ནི་རོ་དྷོ ཝཱ ཨུ་ཏུ་བཱི་ཛཱ་དི་ནི་རོ་དྷོ ཝཱ དུ་ཀྑ་ནི་རོ་དྷཾ ཨ་རི་ཡ་ས་ཙྩཾ ནཱ་མ ན ཧོ་ཏི, ཏ་སྨཱ ཨི་ནྡྲི་ཡ་བ་དྡྷཾ དུ་ཀྑ་ཉྩེ་ཝ ཨ་རི་ཡ་ས་ཙྩ་ཉྩ, ཨི་ཏ་རཾ པ་ན དུ་ཀྑ་མེ་ཝཱ་ཏི ཨི་དཾ ནཱ་ན་ཏྟཾ ད་སྶེ་ཏུཾ པ་ཊི་ཛཱ་ནཱ་ཏི. ཡ་ཐཱ ཨི་ནྡྲི་ཡ་བ་དྡྷ་སྶཱཏི་ཨཱ་དི་ཝ་ཙ་ནཾ ཨི་ནྡྲི་ཡ་བ་དྡྷ་སྶ པ་རི་ཉྙཱ་ཡ བྲ་ཧྨ་ཙ་རི་ཡ་ཝཱ་སཾ པ་རི་ཉྙཱ་ཏ་སྶ པུ་ན ཨ་ནུ་པྤ་ཏྟིཾ དཱི་པེ་ཏི. ཏེ་ནེ་ཝེ་ཏྠ ས་ཀ་ཝཱ་དི་ནཱ པ་ཊི་ཀྑེ་པོ ཀ་ཏོ. ‘‘ཡ་ད་ནི་ཙྩཾ ཏཾ དུ་ཀྑ’’ནྟི ཝ་ཙ་ནེ་ན པ་ན ས་ངྒ་ཧི་ཏ་སྶ ཨ་ནི་ནྡྲི་ཡ་བ་དྡྷ་སྶ དུ་ཀྑ་བྷཱ་ཝཾ པ་ཊི་སེ་དྷེ་ཏུཾ ན ས་ཀྐཱ་ཏི, ཏ་སྨཱ ཨ་སཱ་དྷ་ཀ་ནྟི.
ཨི་ནྡྲི་ཡ་བ་དྡྷ་ཀ་ཐཱ་ཝ་ཎྞ་ནཱ.
༥. ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ་ཝ་ཎྞ་ནཱ
༧༨༩-༧༩༠. ཨི་དཱ་ནི ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་སྨཱ ཨ་རི་ཡ་མ་གྒོ ‘དུ་ཀྑ་ནི་རོ་དྷ་གཱ་མི་ནི་པ་ཊི་པ་དཱ’ཏི ཝུ་ཏྟོ, ཏ་སྨཱ ཋ་པེ་ཏྭཱ ཨ་རི་ཡ་མ་གྒཾ ཨ་ཝ་སེ་སཱ ས་ངྑཱ་རཱ དུ་ཀྑཱ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཨེ་ཝཾ ས་མུ་ད་ཡ་སྶཱ་པི དུ་ཀྑ་བྷཱ་ཝོ ཨཱ་པ་ཛྫ་ཏཱི’’ཏི ཙོ་དེ་ཏུཾ དུ་ཀྑ་ས་མུ་ད་ཡོ་པཱིཏི ཨཱ་ཧ. ཨི་ཏ་རོ ཧེ་ཏུ་ལ་ཀྑ་ཎཾ ས་ནྡྷཱ་ཡ པ་ཊི་ཀྑི་པ་ཏི. པུ་ན པུ་ཊྛོ པ་ཝ་ཏྟ་པ་རི་ཡཱ་པ་ནྣ་བྷཱ་ཝཾ ས་ནྡྷཱ་ཡ པ་ཊི་ཛཱ་ནཱ་ཏི. ཏཱི་ཎེ་ཝཱཏི པ་ཉྷེ་སུ སུ་ཏྟ་ཝི་རོ་དྷ་བྷ་ཡེ་ན པ་ཊི་ཀྑི་པ་ཏི, ལ་དྡྷི་ཝ་སེ་ན པ་ཊི་ཛཱ་ནཱ་ཏི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ་ཝ་ཎྞ་ནཱ.
༦. ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི་ཀ་ཐཱ་ཝ་ཎྞ་ནཱ
༧༩༡-༧༩༢. ཨི་དཱ་ནི ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘པ་ར་མ་ཏྠ་ཏོ མ་གྒ་ཕ་ལཱ་ནེ་ཝ ས་ངྒྷོ, མ་གྒ་ཕ་ལེ་ཧི ཨ་ཉྙོ ས་ངྒྷོ ནཱ་མ ན་ཏྠི, མ་གྒ་ཕ་ལཱ་ནི ཙ ན ཀི་ཉྩི པ་ཊི་གྒ་ཎྷ་ནྟི, ཏ་སྨཱ ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨེ་ཏ་ར་ཧི མ་ཧཱ་པུ་ཉྙ་ཝཱ་དཱི་ས་ངྑཱ་ཏཱ་ནཾ ཝེ་ཏུ་ལླ་ཀཱ་ནཾ; ཏེ ས་ནྡྷཱ་ཡ ན ཝ་ཏྟ་བྦནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ས་ངྒྷོ ན པ་ཊི་གྒ་ཎྷེ་ཡྻ, ན ནཾ ས་ཏྠཱ ཨཱ་ཧུ་ནེ་ཡྻཱ་ཏི་ཨཱ་དཱི་ཧི ཐོ་མེ་ཡྻཱ’’ཏི ཙོ་དེ་ཏུཾ ན་ནུ ས་ངྒྷོ ཨཱ་ཧུ་ནེ་ཡྻོཏི་ཨཱ་དི་མཱ་ཧ. ས་ངྒྷ་སྶ དཱ་ནཾ དེ་ནྟཱིཏི ‘‘ཡེ ཏེ ས་ངྒྷ་སྶ དེ་ནྟི, ཏེ པ་ཊི་གྒཱ་ཧ་ཀེ་སུ ཨ་ས་ཏི ཀ་སྶ ད་དེ་ཡྻུ’’ནྟི ཙོ་ད་ན་ཏྠཾ ཝུ་ཏྟཾ. ཨཱ་ཧུ་ཏིཾ ཛཱ་ཏ་ཝེ་དོ ཝཱཏི སུ་ཏྟཾ པ་ར་ས་མ་ཡ་ཏོ ཨཱ་ག་ཏཾ. ཏ་ཏྠ མ་ཧཱ་མེ་གྷནྟི མེ་གྷ་ཝུ་ཊྛིཾ ས་ནྡྷཱ་ཡ ཝུ་ཏྟཾ. ཝུ་ཊྛི་ཉྷི མེ་ད་ནཱི པ་ཊི་གྒ་ཎྷཱ་ཏི, ན མེ་གྷ་མེ་ཝ. མ་གྒོ པ་ཊི་གྒ་ཎྷཱ་ཏཱི་ཏི ‘‘མ་གྒ་ཕ་ལཱ་ནི ས་ངྒྷོ’’ཏི ལ་དྡྷི་ཡཱ ཝ་ད་ཏི, ན ཙ མ་གྒ་ཕ་ལཱ་ནེ་ཝ ས་ངྒྷོ. མ་གྒ་ཕ་ལ་པཱ་ཏུ་བྷཱ་ཝ་པ་རི་སུ་དྡྷེ པ་ན ཁ་ནྡྷེ ཨུ་པཱ་དཱ་ཡ པ་ཉྙ་ཏྟཱ ཨ་ཊྛ པུ་གྒ་ལཱ ས་ངྒྷོ, ཏ་སྨཱ ཨ་སཱ་དྷ་ཀ་མེ་ཏ་ནྟི.
ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི་ཀ་ཐཱ་ཝ་ཎྞ་ནཱ.
༧. ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ་ཝ་ཎྞ་ནཱ
༧༩༣-༧༩༤. ཨི་དཱ་ནི ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ ནཱ་མ ཧོ་ཏི. ཏ་ཏྠ ‘‘མ་གྒ་ཕ་ལཱ་ནེ་ཝ ས་ངྒྷོ ནཱ་མ, ན ཙ ཏཱ་ནི ད་ཀྑི་ཎཾ ཝི་སོ་དྷེ་ཏུཾ ས་ཀྐོ་ནྟི, ཏ་སྨཱ ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཏེ་ས་ཉྙེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨཱ་ཧུ་ནེ་ཡྻོཏི་ཨཱ་དི ‘‘ཡ་དི ས་ངྒྷོ ད་ཀྑི་ཎཾ ཝི་སོ་དྷེ་ཏུཾ ན ས་ཀྐུ་ཎེ་ཡྻ, ན ནཾ ས་ཏྠཱ ཨེ་ཝཾ ཐོ་མེ་ཡྻཱ’’ཏི ད་སྶ་ན་ཏྠཾ ཝུ་ཏྟཾ. ཝི་སོ་དྷེ་ཏཱིཏི མ་ཧ་པྥ་ལཾ ཀ་རོ་ཏི. ས་ངྒྷ་སྨི་ཉྷི ཨ་པྤཾ དི་ནྣཾ བ་ཧུ ཧོ་ཏི, བ་ཧུ དི་ནྣཾ བ་ཧུ་ཏ་རཾ. ད་ཀྑི་ཎེ་ཡྻཱཏི ད་ཀྑི་ཎཱ་ར་ཧཱ ད་ཀྑི་ཎཱ་ཡ ཨ་ནུ་ཙྪ་ཝི་ཀཱ, ད་ཀྑི་ཎཾ ཝི་སོ་དྷེ་ཏུཾ ས་མ་ཏྠཱ་ཏི ཨ་ཏྠོ. ད་ཀྑི་ཎཾ ཨཱ་རཱ་དྷེ་ནྟཱིཏི ས་མྤཱ་དེ་ནྟི, ཨ་པྤ་མ་ཏྟི་ཀཱ་ཡ་པི ད་ཀྑི་ཎཱ་ཡ མ་ཧ་ནྟཾ ཕ་ལཾ པཱ་པུ་ཎ་ནྟཱི་ཏི ཨ་ཏྠོ. སེ་སཾ ཧེ་ཊྛཱ ཝུ་ཏྟ་ན་ཡ་མེ་ཝཱ་ཏི.
ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ་ཝ་ཎྞ་ནཱ.
༨. ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ་ཝ་ཎྞ་ནཱ
༧༩༥-༧༩༦. ཨི་དཱ་ནི ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ ནཱ་མ ཧོ་ཏི. ཏ་ཏྲཱ་པི ‘‘མ་གྒ་ཕ་ལཱ་ནེ་ཝ ས་ངྒྷོ ནཱ་མ, ན ཙ ཏཱ་ནི ཀི་ཉྩི བྷུ་ཉྫ་ནྟི, ཏ་སྨཱ ན ཝ་ཏྟ་བྦཾ ས་ངྒྷོ བྷུ་ཉྫ་ཏི, པི་ཝ་ཏི, ཁཱ་ད་ཏི, སཱ་ཡ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཏེ་སཾ་ཡེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ས་ངྒྷོ ན བྷུ་ཉྫེ་ཡྻ, ས་ངྒྷ་བྷ་ཏྟཱ་དི་ཀ་ར་ཎཾ ནི་ར་ཏྠ་ཀཾ བྷ་ཝེ་ཡྻཱ’’ཏི ཙོ་དེ་ཏུཾ ན་ནུ ཨ་ཏྠི ཀེ་ཙི ས་ངྒྷ་བྷ་ཏྟཱ་ནི ཀ་རོ་ནྟཱིཏི་ཨཱ་དི་མཱ་ཧ. ག་ཎ་བྷོ་ཛ་ནནྟི་ཨཱ་དི ‘‘ཡ་དི ས་ངྒྷོ ན བྷུ་ཉྫེ་ཡྻ, ཀ་སྶ ག་ཎ་བྷོ་ཛ་ནཱ་དཱི་ནི སི་ཡུ’’ནྟི ཙོ་ད་ན་ཏྠཾ ཝུ་ཏྟཾ. ཨ་ཊྛ པཱ་ནཱ་ནཱིཏི ཨི་ད་མྤི ‘‘ཡ་དི ས་ངྒྷོ ན པི་ཝེ་ཡྻ, ཀ་སྶེ་ཏཱ་ནི པཱ་ནཱ་ནི ས་ཏྠཱ ཨ་ནུ་ཛཱ་ནེ་ཡྻཱ’’ཏི ཙོ་ད་ན་ཏྠཾ ཝུ་ཏྟཾ. སེ་ས་མི་དྷཱ་པི ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦ་ནྟི.
ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ་ཝ་ཎྞ་ནཱ.
༩. ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ་ཝ་ཎྞ་ནཱ
༧༩༧-༧༩༨. ཨི་དཱ་ནི ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ ནཱ་མ ཧོ་ཏི. ཏ་ཏྲཱ་པི ‘‘མ་གྒ་ཕ་ལཱ་ནེ་ཝ ས་ངྒྷོ ནཱ་མ, ན ཙ ས་ཀྐཱ ཏེ་སཾ ཀི་ཉྩི དཱ་ཏུཾ, ན ཙ ཏེ་ཧི པ་ཊི་གྒ་ཎྷི་ཏུཾ, ནཱ་པི ཏེ་སཾ དཱ་ནེ་ན ཀོ་ཙི ཨུ་པ་ཀཱ་རོ ཨི་ཛ྄ཛྷ་ཏི, ཏ་སྨཱ ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཏེ་སཾ་ཡེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨཱ་ཧུ་ནེ་ཡྻོཏི་ཨཱ་དི ‘‘ཡ་དི ས་ངྒྷ་སྶ དི་ནྣཾ མ་ཧ་པྥ་ལཾ ན བྷ་ཝེ་ཡྻ, ན ནཾ ས་ཏྠཱ ཨེ་ཝཾ ཐོ་མེ་ཡྻཱ’’ཏི ད་སྶ་ན་ཏྠཾ ཝུ་ཏྟཾ. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ་ཝ་ཎྞ་ནཱ.
༡༠. ན ཝ་ཏྟ་བྦཾ བུ་དྡྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ་ཝ་ཎྞ་ནཱ
༧༩༩. ཨི་དཱ་ནི ན ཝ་ཏྟ་བྦཾ བུ་དྡྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ ནཱ་མ ཧོ་ཏི. ཏ་ཏྠ ‘‘བུ་དྡྷོ བྷ་ག་ཝཱ ན ཀི་ཉྩི པ་རི་བྷུ་ཉྫ་ཏི, ལོ་ཀཱ་ནུ་ཝ་ཏྟ་ན་ཏྠཾ པ་ན པ་རི་བྷུ་ཉྫ་མཱ་ནཾ ཝི་ཡ ཨ་ཏྟཱ་ནཾ ད་སྶེ་ཏི, ཏ་སྨཱ ནི་རུ་པ་ཀཱ་ར་ཏྟཱ ན ཝ་ཏྟ་བྦཾ ཏ་སྨིཾ དི་ནྣཾ མ་ཧ་པྥ་ལ’’ནྟི ཡེ་སཾ ལ་དྡྷི, སེ་ཡྻ་ཐཱ་པི ཏེ་སཾ་ཡེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. དྭི་པ་དཱ་ནཾ ཨ་གྒོཏི་ཨཱ་དི ‘‘མ་ནུ་སྶ་དུ་སྶཱི་ལེ་པི དཱ་ནཾ ས་ཧ་སྶ་གུ་ཎཾ ཧོ་ཏི, ཀི་མ་ངྒཾ པ་ན ཨེ་ཝ་རཱུ་པེ ཨ་གྒ་པུ་གྒ་ལེ’’ཏི ད་སྶ་ན་ཏྠཾ ཝུ་ཏྟཾ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ན ཝ་ཏྟ་བྦཾ བུ་དྡྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ་ཝ་ཎྞ་ནཱ.
༡༡. ད་ཀྑི་ཎཱ་ཝི་སུ་དྡྷི་ཀ་ཐཱ་ཝ་ཎྞ་ནཱ
༨༠༠-༨༠༡. ཨི་དཱ་ནི ད་ཀྑི་ཎཱ་ཝི་སུ་དྡྷི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཡ་དི པ་ཊི་གྒཱ་ཧ་ཀ་ཏོ ད་ཀྑི་ཎཱ ཝི་སུ་ཛ྄ཛྷེ་ཡྻ, མ་ཧ་པྥ་ལཱ བྷ་ཝེ་ཡྻ. དཱ་ཡ་ཀེ་ན དཱ་ནཾ དི་ནྣཾ, པ་ཊི་གྒཱ་ཧ་ཀེ་ན ཝི་པཱ་ཀོ ནི་བྦ་ཏྟི་ཏོ་ཏི ཨ་ཉྙོ ཨ་ཉྙ་སྶ ཀཱ་ར་ཀོ བྷ་ཝེ་ཡྻ, པ་རཾ་ཀ་ཏཾ སུ་ཁ་དུ་ཀྑཾ ཨཱ་པ་ཛྫེ་ཡྻ, ཨ་ཉྙོ ཀ་རེ་ཡྻ, ཨ་ཉྙོ པ་ཊི་སཾ་ཝེ་དེ་ཡྻ. ཏ་སྨཱ དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ, དཱ་ཡ་ཀ་སྶེ་ཝ ཙི་ཏྟ་ཝི་སུ་དྡྷི ཝི་པཱ་ཀ་དཱ་ཡི་ཀཱ ཧོ་ཏཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨཱ་ཧུ་ནེ་ཡྻཱཏི་ཨཱ་དི ‘‘ཡ་དི པ་ཊི་གྒཱ་ཧ་ཀ་ཏོ དཱ་ནཾ ན ཝི་སུ་ཛ྄ཛྷེ་ཡྻ, ཀི་མ་སྶ ཨཱ་ཧུ་ནེ་ཡྻཱ་དི་བྷཱ་ཝོ ཀ་རེ་ཡྻཱ’’ཏི ད་སྶ་ན་ཏྠཾ ཝུ་ཏྟཾ. ཨ་ཉྙོ ཨ་ཉྙ་སྶ ཀཱ་ར་ཀོཏི ཡ་དི དཱ་ཡ་ཀ་སྶ དཱ་ན་ཙེ་ཏ་ནཱ པ་ཊི་གྒཱ་ཧ་ཀེ་ན ཀ་ཏཱ བྷ་ཝེ་ཡྻ, ཡུ་ཏྟ་རཱུ་པཾ སི་ཡཱ. ཏ་སྶ པ་ན དཱ་ན་ཙེ་ཏ་ནཱ པ་རི་སུ་དྡྷཱ པ་ཊི་གྒཱ་ཧ་ཀ་ས་ངྑཱ་ཏཾ ཝ་ཏྠུཾ པ་ཊི་ཙྩ མ་ཧཱ་ཝི་པཱ་ཀ་ཊྛེ་ན ཝི་སུ་ཛ྄ཛྷ་ཏི, ཏ་སྨཱ ཨ་ཙོ་ད་ནཱ ཨེ་སཱ ‘‘པ་ཊི་གྒཱ་ཧ་ཀ་ཏོ དཱ་ནཾ ཝི་སུ་ཛ྄ཛྷ་ཏཱི’’ཏི.
ད་ཀྑི་ཎཱ་ཝི་སུ་དྡྷི་ཀ་ཐཱ་ཝ་ཎྞ་ནཱ.
ས་ཏྟ་ར་ས་མོ ཝ་གྒོ.