༡༦. སོ་ལ༹་ས་མ་ཝ་གྒོ
༡. ནི་གྒ་ཧ་ཀ་ཐཱ་ཝ་ཎྞ་ནཱ
༧༤༣-༧༤༤. ཨི་དཱ་ནི ནི་གྒ་ཧ་ཀ་ཐཱ ནཱ་མ ཧོ་ཏི. ཏ་ཏྠ ཡེ ལོ་ཀེ བ་ལ་པྤ་ཏྟཱ ཝ་སཱི་བྷཱུ་ཏཱ, ཏེ ཡ་དི པ་ར་སྶ ཙི་ཏྟཾ ནི་གྒ་ཎྷི་ཏུཾ ན ས་ཀྐུ་ཎེ་ཡྻུཾ, ཀཱ ཏེ་སཾ བ་ལ་པྤ་ཏྟི, ཀོ ཝ་སཱི་བྷཱ་ཝོ. བ་ལ་པྤ་ཏྟི་ཡཱ པ་ན ཝ་སཱི་བྷཱ་ཝེ་ན ཙ ཨ་དྡྷཱ ཏེ པ་ར་སྶ ཙི་ཏྟཾ ནི་གྒ་ཎྷ་ནྟཱི་ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ; ཏེ ས་ནྡྷཱ་ཡ པ་རོ པ་ར་སྶཱཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཏ་ཏྠ ནི་གྒ་ཎྷཱ་ཏཱིཏི སཾ་ཀི་ལེ་སཱ་པ་ཏྟི་ཏོ ནི་ཝཱ་རེ་ཏི. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི. པ་གྒ་ཧ་ཀ་ཐཱ་ཡ་པི ཨེ་སེ་ཝ ན་ཡོ.
ནི་གྒ་ཧ་ཀ་ཐཱ་ཝ་ཎྞ་ནཱ.
༣. སུ་ཁཱ་ནུ་པྤ་དཱ་ན་ཀ་ཐཱ་ཝ་ཎྞ་ནཱ
༧༤༧-༧༤༨. ཨི་དཱ་ནི སུ་ཁཱ་ནུ་པྤ་དཱ་ན་ཀ་ཐཱ ནཱ་མ ཧོ་ཏི. ཏ་ཏྠ ‘‘བ་ཧཱུ་ནཾ ཝ་ཏ ནོ བྷ་ག་ཝཱ སུ་ཁ་དྷ་མྨཱ་ནཾ ཨུ་པ་ཧ་ཏྟཱ’’ཏི (མ. ནི. ༢.༡༤༨) སུ་ཏྟཾ ནི་སྶཱ་ཡ པ་རོ པ་ར་སྶ སུ་ཁཾ ཨ་ནུ་པྤ་དེ་ཏཱི་ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. དུ་ཀྑཾ ཨ་ནུ་པྤ་དེ་ཏཱིཏི པུ་ཊྛོ པ་ན ཏཱ་དི་སཾ སུ་ཏྟ་པ་དཾ ཨ་པ་སྶ་ནྟོ པ་ཊི་ཀྑི་པ་ཏི. ཨ་ཏྟ་ནོ སུ་ཁནྟི་ཨཱ་དི་པ་ཉྷེ ཡཾ ཨ་ཏྟ་ནོ པ་ར་སྶ ཝཱ, ཏཾ ཨ་ནུ་པྤ་དཱ་ཏུཾ ན ས་ཀྐཱ. ཡཾ ཏ་སྶེ་ཝ, ཀིཾ ཏ་ཏྠ ཨ་ནུ་པྤ་དཱ་ནཾ ནཱ་མཱ་ཏི པ་ཊི་ཀྑི་པ་ཏི. ནེ་ཝ་ཏྟ་ནོཏི་ཨཱ་དི་པ་ཉྷེ པ་ན ཡཾ ཨེ་ཝ་རཱུ་པཾ, ན ཏཾ ཨ་ནུ་པྤ་དི་ནྣཾ ནཱ་མ བྷ་ཝི་ཏུ་མ་ར་ཧ་ཏཱི་ཏི ལ་དྡྷི་ཡཱ་པ་ཊི་ཛཱ་ནཱ་ཏི. ནོ ཙ ཝ་ཏ རེཏི་ཏཱ་དི་ས་སྶ སུ་ཁ་སྶ ཨ་བྷཱ་ཝཱ ཝུ་ཏྟཾ. སུ་ཁ་དྷ་མྨཱ་ནཾ ཨུ་པ་ཧ་ཏྟཱཏི་ཝ་ཙ་ནཾ བྷ་ག་ཝ་ཏོ པ་རེ་སཾ སུ་ཁུ་པྤ་ཏྟི་ཡཱ པ་ཙྩ་ཡ་བྷཱ་ཝཾ དཱི་པེ་ཏི, ན ཨ་ནྣཱ་དཱི་ནཾ ཝི་ཡ སུ་ཁ་སྶ ཨ་ནུ་པྤ་དཱ་ནཾ, ཏ་སྨཱ ཨ་སཱ་དྷ་ཀ་ནྟི.
སུ་ཁཱ་ནུ་པྤ་དཱ་ན་ཀ་ཐཱ་ཝ་ཎྞ་ནཱ.
༤. ཨ་དྷི་ག་ཡ྄ཧ་མ་ན་སི་ཀཱ་ར་ཀ་ཐཱ་ཝ་ཎྞ་ནཱ
༧༤༩-༧༥༣. ཨི་དཱ་ནི ཨ་དྷི་ག་ཡ྄ཧ མ་ན་སི་ཀཱ་ར་ཀ་ཐཱ ནཱ་མ ཧོ་ཏི. ཏ་ཏྠ དུ་ཝི་དྷོ མ་ན་སི་ཀཱ་རོ ན་ཡ་ཏོ ཙ ཨཱ་ར་མྨ་ཎ་ཏོ ཙ. ཏ་ཏྠ ཨེ་ཀ་ས་ངྑཱ་ར་སྶཱ་པི ཨ་ནི་ཙྩ་ཏཱ་ཡ དི་ཊྛཱ་ཡ ས་བྦེ ས་ངྑཱ་རཱ ཨ་ནི་ཙྩཱ་ཏི ཨ་ཝ་སེ་སེ་སུ ན་ཡ་ཏོ མ་ན་སི་ཀཱ་རོ ཧོ་ཏི. ཨ་ཏཱི་ཏེ པ་ན ས་ངྑཱ་རེ མ་ན་སི་ཀ་རོ་ནྟོ ན ཨ་ནཱ་ག་ཏེ མ་ན་སི་ཀཱ་ཏུཾ ས་ཀྐོ་ཏི. ཨ་ཏཱི་ཏཱ་དཱི་སུ ཨ་ཉྙ་ཏ་རཾ མ་ན་སི་ཀ་རོ་ཏོ ཨཱ་ར་མྨ་ཎ་ཏོ མ་ན་སི་ཀཱ་རོ ཧོ་ཏི. ཏ་ཏྠ པ་ཙྩུ་པྤ་ནྣེ མ་ན་སི་ཀ་རོ་ནྟོ ཡེ་ན ཙི་ཏྟེ་ན ཏེ མ་ན་སི་ཀ་རོ་ཏི, ཏཾ པ་ཙྩུ་པྤ་ནྣ་ཀྑ་ཎེ མ་ན་སི་ཀཱ་ཏུཾ ན ས་ཀྐོ་ཏི. ཏ་ཏྠ ཡེ་སཾ ‘‘ས་བྦེ ས་ངྑཱ་རཱ ཨ་ནི་ཙྩཱ’’ཏི་ཨཱ་དི་ཝ་ཙ་ནཾ ནི་སྶཱ་ཡ ‘‘མ་ན་སི་ཀ་རོ་ནྟོ ནཱ་མ ཨ་དྷི་ག་ཡ྄ཧ ཨ་དྷི་ག་ཎྷི་ཏྭཱ ས་ངྒ་ཎྷི་ཏྭཱ ས་བྦེ ས་ངྑཱ་རེ ཨེ་ཀ་ཏོ མ་ན་སི་ཀ་རོ་ཏཱི’’ཏི ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་པ་ར་སེ་ལི་ཡཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ.
ཨ་ཐ ནཾ ཡ་སྨཱ ས་བྦེ ཨེ་ཀ་ཏོ མ་ན་སི་ཀ་རོ་ནྟེ་ན ཡེ་ན ཙི་ཏྟེ་ན ཏེ མ་ན་སི་ཀ་རོ་ཏི, ཏ་མྤི མ་ན་སི་ཀཱ་ཏ་བྦཾ ཧོ་ཏི. ཏ་སྨཱ ཏཾ་ཙི་ཏྟ་ཏཱ་ཡ ཙོ་དེ་ཏུཾ ཏེ་ན ཙི་ཏྟེ་ནཱཏི ཨཱ་ཧ. ཨི་ཏ་རོ ཨཱ་ར་མྨ་ཎཾ ཀ་ཏྭཱ ན ས་ཀྐཱ ཛཱ་ནི་ཏུ་ནྟི ས་ནྡྷཱ་ཡ པ་ཊི་ཀྑི་པ་ཏི. ཨེ་ཝཾ་ལ་ཀྑ་ཎཾ ཙི་ཏྟ་ནྟི ཉཱ་ཏ་ཏྟཱ པ་ན ཏ་མྤི ཙི་ཏྟཾ ཉཱ་ཏ་མེ་ཝ ཧོ་ཏཱི་ཏི ས་ནྡྷཱ་ཡ པ་ཊི་ཛཱ་ནཱ་ཏི. ཨ་ཐ ཝཱ ཏ་ཉྙེ་ཝ ཏ་སྶ ཨཱ་ར་མྨ་ཎཾ ན ཧོ་ཏཱི་ཏི པ་ཊི་ཀྑི་པ་ཏི. ‘‘ས་བྦེ ས་ངྑཱ་རཱ ཨ་ནི་ཙྩཱ, ཡ་དཱ པ་ཉྙཱ་ཡ པ་སྶ་ཏཱི’’ཏི་ཨཱ་དཱི་ནི ནི་སྶཱ་ཡ ཨུ་པྤ་ནྣ་ལ་དྡྷི་ཝ་སེ་ན པ་ཊི་ཛཱ་ནཱ་ཏི. སེ་ས་པ་ཉྷ་དྭ་ཡེ་པི ཨེ་སེ་ཝ ན་ཡོ. ཏེ་ན ཕ་སྶེ་ནཱཏི་ཨཱ་དཱི་སུ པ་ན ཏ་ཐཱ་རཱུ་པཾ སུ་ཏྟཾ ཨ་པ་སྶ་ནྟོ པ་ཊི་ཀྑི་པ་ཏེ་ཝ. ཨ་ཏཱི་ཏཱ་དི་པ་ཉྷེ་སུ ཧེ་ཊྛཱ ཝུ་ཏྟ་ན་ཡེ་ནེ་ཝ པ་ཊི་ཀྑེ་པ་པ་ཊི་ཉྙཱ ཝེ་དི་ཏ་བྦཱ. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི. ས་བྦེ ས་ངྑཱ་རཱཏི་ཨཱ་དི་ཝ་ཙ་ནཾ ན་ཡ་ཏོ ད་སྶ་ནཾ ས་ནྡྷཱ་ཡ ཝུ་ཏྟཾ, ན ཨེ་ཀ་ཀྑ་ཎེ ཨཱ་ར་མྨ་ཎ་ཏོ, ཏ་སྨཱ ཨ་སཱ་དྷ་ཀ་ནྟི.
ཨ་དྷི་ག་ཡ྄ཧ་མ་ན་སི་ཀཱ་ར་ཀ་ཐཱ་ཝ་ཎྞ་ནཱ.
༥. རཱུ་པཾ ཧེ་ཏཱུ་ཏི་ཀ་ཐཱ་ཝ་ཎྞ་ནཱ
༧༥༤-༧༥༦. ཨི་དཱ་ནི རཱུ་པཾ ཧེ་ཏཱུ་ཏི ཀ་ཐཱ་ནཱ་མ ཧོ་ཏི. ཏ་ཏྠ ཧེ་ཏཱུཏི ཀུ་ས་ལ་མཱུ་ལཱ་དི་ནོ ཧེ་ཏུ་ཧེ་ཏུ་སྶཱ་པི ནཱ་མཾ, ཡ་སྶ ཀ་སྶ་ཙི པ་ཙྩ་ཡ་སྶཱ་པི. ཨི་མཾ པ་ན ཝི་བྷཱ་གཾ ཨ་ཀ་ཏྭཱ ‘‘ཙ་ཏྟཱ་རོ མ་ཧཱ་བྷཱུ་ཏཱ ཧེ་ཏཱུ’’ཏི ཝ་ཙ་ན་མ་ཏྟཾ ནི་སྶཱ་ཡ ཨ་ཝི་སེ་སེ་ནེ་ཝ རཱུ་པཾ ཧེ་ཏཱུ་ཏི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ལོ་བྷོ ཧེ་ཏཱུཏི ཀིཾ ཏེ རཱུ་པཾ ཨ་ལོ་བྷ་ས་ངྑཱ་ཏོ ཧེ་ཏཱུ་ཏི པུ་ཙྪ་ཏི, ཨི་ཏ་རོ པ་ཊི་ཀྑི་པ་ཏི. སེ་སེ་སུ་པི ཨེ་སེ་ཝ ན་ཡོ. མ་ཧཱ་བྷཱུ་ཏཱ ཨུ་པཱ་དཱ་ཡ་རཱུ་པཱ་ནཾ ཨུ་པཱ་དཱ་ཡ་ཧེ་ཏཱུཏི ཨེ་ཏྠ པ་ཙྩ་ཡ་ཊྛེ་ན ཧེ་ཏུ་བྷཱ་ཝོ ཝུ་ཏྟོ, ན མཱུ་ལ་ཊྛེ་ན, ཏ་སྨཱ ཨ་སཱ་དྷ་ཀ་ནྟི.
རཱུ་པཾ ཧེ་ཏཱུ་ཏི་ཀ་ཐཱ་ཝ་ཎྞ་ནཱ.
༧༥༧-༧༥༩. ས་ཧེ་ཏུ་ཀ་ཀ་ཐཱ་ཡ་མྤི ཨི་མི་ནཱ་ཝ ན་ཡེ་ན ཨ་ཏྠོ ཝེ་དི་ཏ་བྦོ་ཏི.
རཱུ་པཾ ས་ཧེ་ཏུ་ཀ་ནྟི་ཀ་ཐཱ་ཝ་ཎྞ་ནཱ.
༧. རཱུ་པཾ ཀུ་ས་ལཱ་ཀུ་ས་ལ་ནྟི་ཀ་ཐཱ་ཝ་ཎྞ་ནཱ
༧༦༠-༧༦༤. ཨི་དཱ་ནི རཱུ་པཾ ཀུ་ས་ལཱ་ཀུ་ས་ལ་ནྟི་ཀ་ཐཱ ནཱ་མ ཧོ་ཏི. ཏ་ཏྠ ‘‘ཀཱ་ཡ་ཀ་མྨཾ ཝ་ཙཱི་ཀ་མྨཾ ཀུ་ས་ལ་མྤི ཨ་ཀུ་ས་ལ་མྤཱི’’ཏི་ཝ་ཙ་ནཾ ནི་སྶཱ་ཡ ཀཱ་ཡ་ཝ་ཙཱི་ཀ་མྨ་ས་ངྑཱ་ཏཾ ཀཱ་ཡ་ཝི་ཉྙ་ཏྟི་ཝ་ཙཱི་ཝི་ཉྙ་ཏྟི་རཱུ་པཾ ཀུ་ས་ལ་མྤི ཨ་ཀུ་ས་ལ་མྤཱི་ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧི་སཱ་ས་ཀཱ་ན་ཉྩེ་ཝ ས་མྨི་ཏི་ཡཱ་ན་ཉྩ; ཏེ ས་ནྡྷཱ་ཡ རཱུ་པཾ ཀུ་ས་ལནྟི པུ་ཙྪཱ ས་ཀ་ཝཱ་དི་སྶ པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏེ རཱུ་པཾ ཀུ་ས་ལཾ, ཨེ་ཝཾ་ཝི་དྷེ་ན ཨ་ནེ་ན བྷ་ཝི་ཏ་བྦ’’ནྟི ཙོ་དེ་ཏུཾ སཱ་ར་མྨ་ཎནྟི ཨཱ་དི་མཱ་ཧ. པ་ར་ཏོ ཨ་ཀུ་ས་ལ་པ་ཉྷེ་པི ཨེ་སེ་ཝ ན་ཡོ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
རཱུ་པཾ ཀུ་ས་ལཱ་ཀུ་ས་ལ་ནྟི་ཀ་ཐཱ་ཝ་ཎྞ་ནཱ.
༨. རཱུ་པཾ ཝི་པཱ་ཀོ་ཏི་ཀ་ཐཱ་ཝ་ཎྞ་ནཱ
༧༦༥-༧༦༧. ཨི་དཱ་ནི རཱུ་པཾ ཝི་པཱ་ཀོ་ཏི་ཀ་ཐཱ ནཱ་མ ཧོ་ཏི. ཏ་ཏྠ ཡཾ ཀ་མྨ་སྶ ཀ་ཏ་ཏྟཱ ཨུ་པྤ་ནྣཱ ཙི་ཏྟ་ཙེ་ཏ་སི་ཀཱ ཝི་ཡ ཀ་མྨ་སྶ ཀ་ཏ་ཏྟཱ ཨུ་པྤ་ནྣཾ ཏཾ རཱུ་པ་མྤི ཝི་པཱ་ཀོ་ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ན་ཉྩེ་ཝ ས་མྨི་ཏི་ཡཱ་ན་ཉྩ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏེ རཱུ་པཾ ཝི་པཱ་ཀོ, ཨེ་ཝཾ་ཝི་དྷེ་ན ཨ་ནེ་ན བྷ་ཝི་ཏ་བྦ’’ནྟི ཙོ་དེ་ཏུཾ སུ་ཁ་ཝེ་ད་ནཱི་ཡནྟི་ཨཱ་དི་མཱ་ཧ. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
རཱུ་པཾ ཝི་པཱ་ཀོ་ཏི་ཀ་ཐཱ་ཝ་ཎྞ་ནཱ.
༩. རཱུ་པཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ནྟི་ཀ་ཐཱ་ཝ་ཎྞ་ནཱ
༧༦༨-༧༧༠. ཨི་དཱ་ནི རཱུ་པཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ནྟི་ཀ་ཐཱ ནཱ་མ ཧོ་ཏི. ཏ་ཏྠ ཡཾ ཀཱ་མཱ་ཝ་ཙ་ར་ཀ་མྨ་སྶ ཀ་ཏ་ཏྟཱ རཱུ་པཾ, ཏཾ ཡ་སྨཱ ཀཱ་མཱ་ཝ་ཙ་རཾ, ཏ་སྨཱ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཀ་མྨཱ་ན་མྤི ཀ་ཏ་ཏྟཱ རཱུ་པེ་ན རཱུ་པཱ་ཝ་ཙ་རཱ་རཱུ་པཱ་ཝ་ཙ་རེ་ན བྷ་ཝི་ཏ་བྦ་ནྟི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ ཨ་ཏྠི རཱུ་པཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་རནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཧེ་ཊྛཱ ཝུ་ཏྟ་ན་ཡ་མེ་ཝཱ་ཏི.
རཱུ་པཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ནྟི་ཀ་ཐཱ་ཝ་ཎྞ་ནཱ.
༡༠. རཱུ་པཱ་རཱུ་པ་དྷཱ་ཏུ་པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ
༧༧༡-༧༧༥. ཨི་དཱ་ནི རཱུ་པ་རཱ་གོ རཱུ་པ་དྷཱ་ཏུ་པ་རི་ཡཱ་པ་ནྣོ ཨ་རཱུ་པ་རཱ་གོ ཨ་རཱུ་པ་དྷཱ་ཏུ་པ་རི་ཡཱ་པ་ནྣོ་ཏི ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཀཱ་མ་རཱ་གོ ཀཱ་མ་དྷཱ་ཏུ་པ་རི་ཡཱ་པ་ནྣོ, ཏ་སྨཱ རཱུ་པ་རཱ་གཱ་རཱུ་པ་རཱ་གེ་ཧི་པི རཱུ་པ་དྷཱ་ཏུ་ཨ་རཱུ་པ་དྷཱ་ཏུ་པ་རི་ཡཱ་པ་ནྣེ་ཧི བྷ་ཝི་ཏ་བྦ་ནྟི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་སཾ ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཀེ་ཝ་ལ་ཉྷི ཏ་ཏྠ ‘‘རཱུ་པ་དྷཱ་ཏུཾ ཨ་ནུ་སེ་ཏི, ཨ་རཱུ་པ་དྷཱ་ཏུཾ ཨ་ནུ་སེ་ཏཱི’’ཏི པ་དཾ ཝི་སེ་སོ. སཱ ཙ ལ་དྡྷི ཨ་ནྡྷ་ཀཱ་ན་ཉྩེ་ཝ ས་མྨི་ཏི་ཡཱ་ན་ཉྩ. ཨ་ཡཾ ཨ་ནྡྷ་ཀཱ་ནཾ་ཡེ་ཝཱ་ཏི.
རཱུ་པ་རཱ་གོ རཱུ་པ་དྷཱ་ཏུ་པ་རི་ཡཱ་པ་ནྣོ ཨ་རཱུ་པ་རཱ་གོ ཨ་རཱུ་པ་དྷཱ་ཏུ་པ་རི་ཡཱ་པ་ནྣོ་ཏི་ཀ་ཐཱ་ཝ་ཎྞ་ནཱ.
རཱུ་པཱ་རཱུ་པ་དྷཱ་ཏུ་པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ.
སོ་ལ༹་ས་མོ ཝ་གྒོ.