༡༥. པ་ནྣ་ར་ས་མ་ཝ་གྒོ
༡. པ་ཙྩ་ཡ་ཏཱ་ཀ་ཐཱ་ཝ་ཎྞ་ནཱ
༧༡༡-༧༡༧. ཨི་དཱ་ནི པ་ཙྩ་ཡ་ཏཱ་ཀ་ཐཱ ནཱ་མ ཧོ་ཏི. ཏ་ཏྠ ཡོ དྷ་མྨོ ཧེ་ཏུ་པ་ཙྩ་ཡེ་ན པ་ཙྩ་ཡོ, སོ ཡེ་སཾ ཧེ་ཏུ་པ་ཙྩ་ཡེ་ན པ་ཙྩ་ཡོ, ཏེ་ས་ཉྙེ་ཝ ཡ་སྨཱ ཨཱ་ར་མྨ་ཎཱ་ན་ནྟ་ར་ས་མ་ན་ནྟ་ར་པ་ཙྩ་ཡེ་ན པ་ཙྩ་ཡོ ན ཧོ་ཏི, ཡོ ཝཱ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ, སོ ཡ་སྨཱ ཏེ་སཾ་ཡེ་ཝ ཨ་ན་ནྟ་ར་ས་མ་ན་ནྟ་ར་པ་ཙྩ་ཡེ་ན པ་ཙྩ་ཡོ ན ཧོ་ཏི, ཏ་སྨཱ པ་ཙྩ་ཡ་ཏཱ ཝ་ཝ་ཏྠི་ཏཱ་ཏི ཡེ་སཾ ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
པ་ཙྩ་ཡ་ཏཱ་ཀ་ཐཱ་ཝ་ཎྞ་ནཱ.
༢. ཨ་ཉྙ་མ་ཉྙ་པ་ཙྩ་ཡ་ཀ་ཐཱ་ཝ་ཎྞ་ནཱ
༧༡༨-༧༡༩. ཨི་དཱ་ནི ཨ་ཉྙ་མ་ཉྙ་པ་ཙྩ་ཡ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ས་མ་ཡེ ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’ཏི ཨ་ཡ་མེ་ཝ ཏ་ནྟི, ‘‘ས་ངྑཱ་ར་པ་ཙྩ་ཡཱ་པི ཨ་ཝི་ཛྫཱ’’ཏི ཨ་ཡཾ ན་ཏྠི, ཏ་སྨཱ ཨ་ཝི་ཛྫཱ་ཝ ས་ངྑཱ་རཱ་ནཾ པ་ཙྩ་ཡོ, ན པ་ན ས་ངྑཱ་རཱ ཨ་ཝི་ཛྫཱ་ཡཱ་ཏི ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ; ཏེ ས་ནྡྷཱ་ཡ ཨ་ཝི་ཛྫཱ་ས་ངྑཱ་རཱ་དཱི་ནཾ ཨ་ཉྙ་མ་ཉྙ་པ་ཙྩ་ཡ་ཏཱ་པི ཨ་ཏྠཱི་ཏི ད་སྶེ་ཏུཾ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཝི་ཛྫཱ ས་ངྑཱ་རེ་ནཱཏི ཨེ་ཏྠ ཨ་པུ་ཉྙཱ་བྷི་ས་ངྑཱ་རོ་ཝ ག་ཧི་ཏོ. ཏ་སྨཱ ས་ངྑཱ་ར་པ་ཙྩ་ཡཱ་པི ཨ་ཝི་ཛྫཱ་ཏི ཨེ་ཏྠ ས་ཧ་ཛཱ་ཏ་ཨ་ཉྙ་མ་ཉྙ་ཨ་ཏྠི་ཨ་ཝི་ག་ཏ་ས་མྤ་ཡུ་ཏྟ་ཝ་སེ་ན པ་ཙྩ་ཡ་ཏཱ ཝེ་དི་ཏ་བྦཱ. ཨུ་པཱ་དཱ་ན་པ་ཙྩ་ཡཱ་པི ཏ་ཎྷཱཏི ཨེ་ཏྠ ཋ་པེ་ཏྭཱ ཀཱ་མུ་པཱ་དཱ་ནཾ སེ་སཱ་ནི ཏཱི་ཎི ཨུ་པཱ་དཱ་ནཱ་ནི ཨ་ཝི་ཛྫཱ་ཡ ས་ངྑཱ་རཱ ཝི་ཡ ཏ་ཎྷཱ་ཡ པ་ཙྩ་ཡཱ ཧོ་ནྟཱི་ཏི ཝེ་དི་ཏ་བྦཱ་ནི. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ཛ་རཱ་མ་ར་ཎ་པ་ཙྩ་ཡཱཏི པུ་ཙྪཱ པ་ར་ཝཱ་དི་སྶ, ནཱ་མ་རཱུ་པཾ ཝི་ཉྙཱ་ཎ་པ་ཙྩ་ཡཱཏི ས་ཀ་ཝཱ་དི་སྶཱ་ཏི.
ཨ་ཉྙ་མ་ཉྙ་པ་ཙྩ་ཡ་ཀ་ཐཱ་ཝ་ཎྞ་ནཱ.
༣. ཨ་དྡྷཱ་ཀ་ཐཱ་ཝ་ཎྞ་ནཱ
༧༢༠-༧༢༡. ཨི་དཱ་ནི ཨ་དྡྷཱ་ཀ་ཐཱ ནཱ་མ ཧོ་ཏི. ཏ་ཏྠ ‘‘ཏཱི་ཎི་མཱ་ནི, བྷི་ཀྑ་ཝེ, ཀ་ཐཱ་ཝ་ཏྠཱུ་ནཱི’’ཏི (ཨ. ནི. ༣.༦༨) སུ་ཏྟཾ ནི་སྶཱ་ཡ ཀཱ་ལ་ས་ངྑཱ་ཏོ ཨ་དྡྷཱ ནཱ་མ པ་རི་ནི་པྥ་ནྣོ ཨ་ཏྠཱི་ཏི ཡེ་སཾ ལ་དྡྷི; ཏེ་སཾ ‘‘ཨ་དྡྷཱ ནཱ་མ ཀོ་ཙི པ་རི་ནི་པྥ་ནྣོ ན་ཏྠི ཨ་ཉྙ་ཏྲ ཀཱ་ལ་པ་ཉྙ་ཏྟི་མ་ཏྟཱ. རཱུ་པཱ་ད་ཡོ པ་ན ཁ་ནྡྷཱ་ཝ པ་རི་ནི་པྥ་ནྣཱ’’ཏི ཝི་བྷཱ་གཾ ད་སྶེ་ཏུཾ ཨ་དྡྷཱ པ་རི་ནི་པྥ་ནྣོཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ས་ཙེ སོ པ་རི་ནི་པྥ་ནྣོ, རཱུ་པཱ་དཱི་སུ ཨ་ནེ་ན ཨ་ཉྙ་ཏ་རེ་ན བྷ་ཝི་ཏ་བྦ’’ནྟི ཙོ་དེ་ཏུཾ རཱུ་པནྟི་ཨཱ་དི་མཱ་ཧ. ཨི་ཏ་རོ པ་ཊི་ཀྑི་པ་ཏི. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ཨ་དྡྷཱ་ཀ་ཐཱ་ཝ་ཎྞ་ནཱ.
༤. ཁ་ཎ་ལ་ཡ་མུ་ཧུ་ཏྟ་ཀ་ཐཱ་ཝ་ཎྞ་ནཱ
༧༢༢-༧༢༣. ཁ་ཎ་ལ་ཡ་མུ་ཧུ་ཏྟ་ཀ་ཐཱ་སུ་པི ཨེ་སེ་ཝ ན་ཡོ. ས་བྦེ་པི ཧེ་ཏེ ཁ་ཎཱ་ད་ཡོ ཨ་དྡྷཱ་པ་རི་ཡཱ་ཡཱ ཨེ་ཝཱ་ཏི.
ཁ་ཎ་ལ་ཡ་མུ་ཧུ་ཏྟ་ཀ་ཐཱ་ཝ་ཎྞ་ནཱ.
༥. ཨཱ་ས་ཝ་ཀ་ཐཱ་ཝ་ཎྞ་ནཱ
༧༢༤-༧༢༥. ཨི་དཱ་ནི ཨཱ་ས་ཝ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཙ་ཏཱུ་ཧི ཨཱ་ས་ཝེ་ཧི ཨུ་ཏྟ་རི ཨ་ཉྙོ ཨཱ་ས་ཝོ ནཱ་མ ན་ཏྠི, ཡེ་ན ཙ་ཏྟཱ་རོ ཨཱ་ས་ཝཱ སཱ་ས་ཝཱ སི་ཡུཾ, ཏ་སྨཱ ཙ་ཏྟཱ་རོ ཨཱ་ས་ཝཱ ཨ་ནཱ་ས་ཝཱ་ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཏེ ཨཱ་ས་ཝཱ ཨ་ནཱ་ས་ཝཱ, ཨེ་ཝཾ ས་ནྟེ ཏེ་ཧི མ་གྒཱ་དི་ལ་ཀྑ་ཎ་པྤ་ཏྟེ་ཧི བྷ་ཝི་ཏ་བྦ’’ནྟི ཙོ་དེ་ཏུཾ མ་གྒོཏི་ཨཱ་དི་མཱ་ཧ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཨཱ་ས་ཝ་ཀ་ཐཱ་ཝ་ཎྞ་ནཱ.
༦. ཛ་རཱ་མ་ར་ཎ་ཀ་ཐཱ་ཝ་ཎྞ་ནཱ
༧༢༦-༧༢༧. ཨི་དཱ་ནི ཛ་རཱ་མ་ར་ཎ་ཀ་ཐཱ ནཱ་མ ཧོ་ཏི. ཏ་ཏྠ ཛ་རཱ་མ་ར་ཎཾ ནཱ་མ ཨ་པ་རི་ནི་པྥ་ནྣ་ཏྟཱ ལོ་ཀི་ཡ་ནྟི ཝཱ ལོ་ཀུ་ཏྟ་ར་ནྟི ཝཱ ན ཝ་ཏྟ་བྦཾ. ‘‘ལོ་ཀི་ཡཱ དྷ་མྨཱ ལོ་ཀུ་ཏྟ་རཱ དྷ་མྨཱ’’ཏི ཧི དུ་ཀེ ཛ་རཱ་མ་ར་ཎཾ ནེ་ཝ ལོ་ཀི་ཡ་པ་དེ, ན ལོ་ཀུ་ཏྟ་ར་པ་དེ ནི་དྡི་ཊྛཾ. ཏ་ཏྠ ཡེ་སཾ ཨི་མཾ ལ་ཀྑ་ཎཾ ཨ་ནཱ་དི་ཡི་ཏྭཱ ལོ་ཀུ་ཏྟ་རཱ་ནཾ དྷ་མྨཱ་ནཾ ཛ་རཱ་མ་ར་ཎཾ ལོ་ཀུ་ཏྟ་ར་ནྟི ལ་དྡྷི, སེ་ཡྻ་ཐཱ་པི མ་ཧཱ་ས་ངྒྷི་ཀཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ཛ་རཱ་མ་ར་ཎ་ཀ་ཐཱ་ཝ་ཎྞ་ནཱ.
༧. ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ
༧༢༨-༧༢༩. ཨི་དཱ་ནི ས་ཉྙཱ་ཝེ་ད་ཡི་ཏ་ཀ་ཐཱ ནཱ་མ ཧོ་ཏི. ཏ་ཏྠ ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི ནཱ་མ ན ཀོ་ཙི དྷ་མྨོ, ཙ་ཏུ་ནྣཾ པ་ན ཁ་ནྡྷཱ་ནཾ ནི་རོ་དྷོ. ཨི་ཏི སཱ ནེ་ཝ ལོ་ཀི་ཡཱ ན ལོ་ཀུ་ཏྟ་རཱ. ཡ་སྨཱ པ་ན ལོ་ཀི་ཡཱ ན ཧོ་ཏི, ཏ་སྨཱ ལོ་ཀུ་ཏྟ་རཱ་ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ་ཡེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་སཾ པུ་རི་མ་ཀ་ཐཱ་ས་དི་ས་མེ་ཝཱ་ཏི.
ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ.
༨. དུ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ
༧༣༠-༧༣༡. ཨི་དཱ་ནི ཡ་སྨཱ སཱ ལོ་ཀུ་ཏྟ་རཱ ན ཧོ་ཏི, ཏ་སྨཱ ལོ་ཀི་ཡཱ་ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ, ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་སཾ པུ་རི་མ་ས་དི་ས་མེ་ཝཱ་ཏི.
དུ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ.
༩. ཏ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ
༧༣༢. ཨི་དཱ་ནི ཡ་སྨཱ ‘‘ཨ་སུ་ཀོ མ་ར་ཎ་དྷ་མྨོ, ཨ་སུ་ཀོ ན མ་ར་ཎ་དྷ་མྨོ’’ཏི ས་ཏྟཱ་ནཾ མ་ར་ཎ་དྷ་མྨ་ཏཱ་ཡ ནི་ཡཱ་མོ ན་ཏྠཱི་ཏི ས་ཉྙཱ་ཝེ་ད་ཡི་ཏ་ནི་རོ་དྷཾ ས་མཱ་པ་ནྣོ་པི ཀཱ་ལཾ ཀ་རེ་ཡྻཱ་ཏི ཡེ་སཾ ལ་དྡྷི, སེ་ཡྻ་ཐཱ་པི རཱ་ཛ་གི་རི་ཀཱ་ནཾ; ཏེ་སཾ ས་མཱ་པ་ནྣཱ་ཡ་པི མ་ར་ཎ་དྷ་མྨ་ཏཱ་ཡ མ་ར་ཎ་ས་མ་ཡ་ཉྩ ཨ་མ་ར་ཎ་ས་མ་ཡ་ཉྩ ད་སྶེ་ཏུཾ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ཡ་སྨཱ ཀཱ་ལཾ ཀ་རོ་ནྟ་སྶ ནཱ་མ མ་ར་ཎ་ནྟི་ཀེ་ཧི ཕ་སྶཱ་དཱི་ཧི བྷ་ཝི་ཏ་བྦཾ, ཏ་སྨཱ ཏེ་ནཱ་ཀཱ་རེ་ན ཙོ་དེ་ཏུཾ ཨ་ཏྠཱིཏི་ཨཱ་དི་མཱ་ཧ.
ཨ་ཕ་སྶ་ཀ་སྶ ཀཱ་ལ་ཀི་རི་ཡཱཏི་ཨཱ་དཱི་ནི པུ་ཊྛོ སེ་ས་ས་ཏྟེ ས་ནྡྷཱ་ཡ པ་ཊི་ཀྑི་པ་ཏི ཝི་སཾ ཀ་མེ་ཡྻཱཏི་ཨཱ་དཱི་ནི པུ་ཊྛོ ས་མཱ་པ་ཏྟི་ཨཱ་ནུ་བྷཱ་ཝཾ ས་ནྡྷཱ་ཡ པ་ཊི་ཀྑི་པ་ཏི. དུ་ཏི་ཡ་ཝཱ་རེ ས་རཱི་ར་པ་ཀ་ཏིཾ ས་ནྡྷཱ་ཡ པ་ཊི་ཛཱ་ནཱ་ཏི. ཨེ་ཝཾ ས་ནྟེ པ་ན ས་མཱ་པ་ཏྟི་ཨཱ་ནུ་བྷཱ་ཝོ ནཱ་མ ན ཧོ་ཏི, ཏེ་ནེ་ཝ ན ནི་རོ་དྷ་ས་མཱ་པ་ནྣོཏི ཨ་ནུ་ཡུ་ཉྫ་ཏི.
༧༣༣-༧༣༤. ན ཀཱ་ལཾ ཀ་རེ་ཡྻཱཏི པུ་ཙྪཱ པ་ར་ཝཱ་དི་སྶ. ཨ་ཏྠི སོ ནི་ཡཱ་མོཏི པ་ར་ཝཱ་དི་སྶ པ་ཉྷེ པ་ན ཡ་སྨཱ ཨེ་ཝ་རཱུ་པོ ནི་ཡཱ་མོ ནཱ་མ ན་ཏྠི, ཏ་སྨཱ པ་ཊི་ཀྑི་པ་ཏི. ཙ་ཀྑུ་ཝི་ཉྙཱ་ཎ་ས་མ་ངྒཱི་ཏི་ཨཱ་དི ས་ཀ་ཝཱ་དི་ནཱ ‘‘ནི་ཡཱ་མེ ཨ་ས་ནྟེ་པི མ་ར་ཎ་ས་མ་ཡེ་ནེ་ཝ མ་ར་ཏི, ནཱ་ས་མ་ཡེ་ནཱ’’ཏི ད་སྶེ་ཏུཾ ཝུ་ཏྟཾ. ཏ་ཏྲཱ་ཡ་མ་དྷི་པྤཱ་ཡོ – ཡ་དི ནི་ཡཱ་མཱ་བྷཱ་ཝེ་ན ཀཱ་ལ་ཀི་རི་ཡཱ བྷ་ཝེ་ཡྻ, ཙ་ཀྑུ་ཝི་ཉྙཱ་ཎ་ས་མ་ངྒི་ནོ་པི བྷ་ཝེ་ཡྻ. ཏ་ཏོ ‘‘པ་ཉྩ་ཧི ཝི་ཉྙཱ་ཎེ་ཧི ན ཙ་ཝ་ཏི, ན ཨུ་པ་པ་ཛྫ་ཏཱི’’ཏི སུ་ཏྟ་ཝི་རོ་དྷོ སི་ཡཱ. ཡ་ཐཱ པ་ན ཙ་ཀྑུ་ཝི་ཉྙཱ་ཎ་ས་མ་ངྒི་སྶ ཀཱ་ལ་ཀི་རི་ཡཱ ན ཧོ་ཏི, ཏ་ཐཱ ནི་རོ་དྷ་ས་མཱ་པ་ནྣ་སྶཱ་པཱི་ཏི.
ཏ་ཏི་ཡ་ས་ཉྙཱ་ཝེ་ད་ཡི་ཏ་ཀ་ཐཱ་ཝ་ཎྞ་ནཱ.
༡༠. ཨ་ས་ཉྙ་ས་ཏྟུ་པི་ཀཱ་ཀ་ཐཱ་ཝ་ཎྞ་ནཱ
༧༣༥. ཨི་དཱ་ནི ཨ་ས་ཉྙ་ས་ཏྟུ་པི་ཀཱ་ཀ་ཐཱ ནཱ་མ ཧོ་ཏི. ཏ་ཏྠ ས་ཉྙཱ་ཝི་རཱ་ག་ཝ་སེ་ན པ་ཝ་ཏྟ་བྷཱ་ཝ་ནཱ ཨ་ས་ཉྙ་ས་མཱ་པ་ཏྟི་པི ནི་རོ་དྷ་ས་མཱ་པ་ཏྟི་པི ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི ནཱ་མ. ཨི་ཏི དྭེ ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི་ཡོ ལོ་ཀི་ཡཱ ཙ ལོ་ཀུ་ཏྟ་རཱ ཙ. ཏ་ཏྠ ལོ་ཀི་ཡཱ པུ་ཐུ་ཛྫ་ན་སྶ ཨ་ས་ཉྙ་ས་ཏྟུ་པི་ཀཱ ཧོ་ཏི, ལོ་ཀུ་ཏྟ་རཱ ཨ་རི་ཡཱ་ནཾ, སཱ ཙ ནཱ་ས་ཉྙ་ས་ཏྟུ་པི་ཀཱ. ཨི་མཾ པ་ན ཝི་བྷཱ་གཾ ཨ་ཀ་ཏྭཱ ཨ་ཝི་སེ་སེ་ན ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི ཨ་ས་ཉྙ་ས་ཏྟུ་པི་ཀཱ་ཏི ཡེ་སཾ ལ་དྡྷི, སེ་ཡྻ་ཐཱ་པི ཧེ་ཏུ་ཝཱ་དཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ཡ་སྨཱ ཨ་ས་ཉྙ་ས་མཱ་པ་ཏྟིཾ ས་མཱ་པ་ནྣ་སྶ ཨ་ལོ་བྷཱ་ད་ཡོ ཨ་ཏྠི, ན ནི་རོ་དྷ་ས་མཱ་པ་ཏྟིཾ, ཏ་སྨཱ ཏེ་སཾ ཝ་སེ་ན ཙོ་དེ་ཏུཾ ཨ་ཏྠཱིཏི་ཨཱ་དི་མཱ་ཧ.
༧༣༦. ཨི་དྷཱ་པི ཨ་ས་ཉྙཱིཏི པ་ཉྷེ ཨི་དྷ ས་ཉྙཱ་ཝི་རཱ་ག་ཝ་སེ་ན ས་མཱ་པ་ནྣ་ཏྟཱ ཨ་ས་ཉྙི་ཏཱ ཨ་ནུ་ཉྙཱ་ཏཱ, ཏ་ཏྲཱ་པི ཨ་ས་ཉྙ་ས་ཏྟེ་ནེ་ཝ. ཏ་སྨཱ ཨི་མཾ པ་ཊི་ཉྙཾ ག་ཧེ་ཏྭཱ ལ་དྡྷིཾ པ་ཏི་ཊྛ་པེ་ནྟེ་ན ཚ་ལེ་ན པ་ཏི་ཊྛཱ་པི་ཏཱ ཧོ་ཏི. ཨི་དྷ ཝཱ ནི་རོ་དྷ་ས་མཱ་པ་ཏྟིཾ ས་ནྡྷཱ་ཡ ཨ་ས་ཉྙི་ཏཱ ཨ་ནུ་ཉྙཱ་ཏཱ. ཏ་ཏྲཱ་པི ཨི་ཏོ ཙུ་ཏ་སྶ ཨ་ནཱ་གཱ་མི་ནོ ནི་རོ་དྷ་ས་མཱ་པ་ཏྟི་མེ་ཝ ཏ་སྨཱ་པི ཨི་མཱ་ཡ པ་ཊི་ཉྙཱ་ཡ པ་ཏི་ཊྛཱ་པི་ཏཱ ལ་དྡྷི ཨ་པྤ་ཏི་ཊྛི་ཏཱ་ཡེ་ཝཱ་ཏི.
ཨ་ས་ཉྙ་ས་ཏྟུ་པི་ཀཱ་ཀ་ཐཱ་ཝ་ཎྞ་ནཱ.
༡༡. ཀ་མྨཱུ་པ་ཙ་ཡ་ཀ་ཐཱ་ཝ་ཎྞ་ནཱ
༧༣༧. ཨི་དཱ་ནི ཀ་མྨཱུ་པ་ཙ་ཡ་ཀ་ཐཱ ནཱ་མ ཧོ་ཏི. ཏ་ཏྠ ཡེ་སཾ ཀ་མྨཱུ་པ་ཙ་ཡོ ནཱ་མ ཀ་མྨ་ཏོ ཨ་ཉྙོ ཙི་ཏྟ་ཝི་པྤ་ཡུ་ཏྟོ ཨ་བྱཱ་ཀ་ཏོ ཨ་ནཱ་ར་མྨ་ཎོ་ཏི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ན་ཉྩེ་ཝ ས་མྨི་ཏི་ཡཱ་ན་ཉྩ; ཏེ ས་ནྡྷཱ་ཡ ཨ་ཉྙཾ ཀ་མྨནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཨ་ཐ ནཾ ‘‘ཡ་དི ཀ་མྨ་ཏོ ཨ་ཉྙོ ཀ་མྨཱུ་པ་ཙ་ཡོ, ཕ་སྶཱ་དི་ཏོ་པི ཨ་ཉྙེ་ན ཕ་སྶཱུ་པ་ཙ་ཡཱ་དི་ནཱ བྷ་ཝི་ཏ་བྦ’’ནྟི ཙོ་དེ་ཏུཾ ཨ་ཉྙོ ཕ་སྶོཏི་ཨཱ་དི་མཱ་ཧ. ཨི་ཏ་རོ ལ་དྡྷི་ཡཱ ཨ་བྷཱ་ཝེ་ན པ་ཊི་ཀྑི་པ་ཏི.
༧༣༨-༧༣༩. ཀ་མྨེ་ན ས་ཧ་ཛཱ་ཏོཏི པ་ཉྷེ་སུ ཙི་ཏྟ་ཝི་པྤ་ཡུ་ཏྟཾ ས་ནྡྷཱ་ཡ པ་ཊི་ཀྑི་པ་ཏི, ཙི་ཏྟ་ས་མྤ་ཡུ་ཏྟཾ ས་ནྡྷཱ་ཡ པ་ཊི་ཛཱ་ནཱ་ཏི. ཀུ་ས་ལོཏི པ་ཉྷེ་སུ་པི ཙི་ཏྟ་ཝི་པྤ་ཡུ་ཏྟཾ ས་ནྡྷཱ་ཡ པ་ཊི་ཛཱ་ནཱ་ཏི. པ་ར་ཏོ ཨ་ཀུ་ས་ལོཏི་པ་ཉྷེ་སུ་པི ཨེ་སེ་ཝ ན་ཡོ.
༧༤༠. སཱ་ར་མྨ་ཎོཏི པུ་ཊྛོ པ་ན ཨེ་ཀ་ནྟཾ ཨ་ནཱ་ར་མྨ་ཎ་མེ་ཝ ཨི་ཙྪ་ཏི, ཏ་སྨཱ པ་ཊི་ཀྑི་པ་ཏི. ཙི་ཏྟཾ བྷི་ཛྫ་མཱ་ནནྟི ཡ་དཱ ཙི་ཏྟཾ བྷི་ཛྫ་མཱ་ནཾ ཧོ་ཏི, ཏ་དཱ ཀ་མྨཾ བྷི་ཛྫ་ཏཱི་ཏི ཨ་ཏྠོ. བྷུ་མྨ་ཏྠེ ཝཱ པ་ཙྩ་ཏྟཾ, ཙི་ཏྟེ བྷི་ཛྫ་མཱ་ནེ་ཏི ཨ་ཏྠོ. ཨ་ཡ་མེ་ཝ ཝཱ པཱ་ཋོ. ཏ་ཏྠ ཡ་སྨཱ ས་མྤ་ཡུ་ཏྟོ བྷི་ཛྫ་ཏི, ཝི་པྤ་ཡུ་ཏྟོ ན བྷི་ཛྫ་ཏི, ཏ་སྨཱ པ་ཊི་ཛཱ་ནཱ་ཏི ཙེ་ཝ པ་ཊི་ཀྑི་པ་ཏི ཙ.
༧༤༡. ཀ་མྨ་མྷི ཀ་མྨཱུ་པ་ཙ་ཡོཏི ཀ་མྨེ ས་ཏི ཀ་མྨཱུ་པ་ཙ་ཡོ, ཀ་མྨེ ཝཱ པ་ཏི་ཊྛི་ཏེ ཀ་མྨཱུ་པ་ཙ་ཡོ, ཀ་མྨཱུ་པ་ཙ་ཡ་ཏོ་ཝ ཝི་པཱ་ཀོ ནི་བྦ་ཏྟ་ཏི. ཏ་སྨིཾ པ་ན ཀ་མྨེ ནི་རུ་དྡྷེ ཡཱ་ཝ ཨཾ་ཀུ་རུ་པྤཱ་དཱ བཱི་ཛཾ ཝི་ཡ ཡཱ་ཝ ཝི་པཱ་ཀུ་པྤཱ་དཱ ཀ་མྨཱུ་པ་ཙ་ཡོ ཏི་ཊྛ་ཏཱི་ཏི་སྶ ལ་དྡྷི, ཏ་སྨཱ པ་ཊི་ཛཱ་ནཱ་ཏི. ཏ་ཉྙེ་ཝ ཀ་མྨཾ, སོ ཀ་མྨཱུ་པ་ཙ་ཡོ, སོ ཀ་མྨ་ཝི་པཱ་ཀོཏི ཡ་སྨཱ ཀ་མྨ་མྷི ཀ་མྨཱུ་པ་ཙ་ཡོ, སོ ཙ ཡཱ་ཝ ཝི་པཱ་ཀུ་པྤཱ་དཱ ཏི་ཊྛ་ཏཱི་ཏི་སྶ ལ་དྡྷི, ཏ་སྨཱ ནཾ ཏེ་སཾ ཏི་ཎྞ་མྤི ཨེ་ཀ་ཏྟཾ པུ་ཙྪ་ཏི ཝི་པཱ་ཀོ སཱ་ར་མྨ་ཎོཏི ཨི་དཾ ཝི་པཱ་ཀོ ཝི་ཡ ཝི་པཱ་ཀ་དྷ་མྨ་དྷ་མྨོ་པི ཨཱ་ར་མྨ་ཎ་པ་ཊི་བ་དྡྷོ་ཡེ་ཝཱ་ཏི ཙོ་ད་ན་ཏྠཾ པུ་ཙྪ་ཏི. ཨི་ཏ་རོ པ་ན ལ་དྡྷི་ཝ་སེ་ནེ་ཀཾ པ་ཊི་ཛཱ་ནཱ་ཏི, ཨེ་ཀཾ པ་ཊི་ཀྑི་པ་ཏི. པ་ཊི་ལོ་མེ་པི ཨེ་སེ་ཝ ན་ཡོ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.
ཀ་མྨཱུ་པ་ཙ་ཡ་ཀ་ཐཱ་ཝ་ཎྞ་ནཱ.
པ་ནྣ་ར་ས་མོ ཝ་གྒོ.
ཏ་ཏི་ཡ་པ་ཎྞཱ་ས་ཀོ ས་མ་ཏྟོ.