༡༤. ཙུ་དྡ་ས་མ་ཝ་གྒོ

༡. ཀུ་ས་ལཱ་ཀུ་ས་ལ་པ་ཊི་ས་ནྡ་ཧ་ན་ཀ་ཐཱ་ཝ་ཎྞ་ནཱ

༦༨༦-༦༩༠. ཨི་དཱ་ནི ཀུ་ས་ལཱ་ཀུ་ས་ལ་པ་ཊི་ས་ནྡ་ཧ་ན་ཀ་ཐཱ ནཱ་མ ཧོ་ཏི. ཏ་ཏྠ ཀུ་ས་ལཾ ཝཱ ཨ་ཀུ་ས་ལ་སྶ, ཨ་ཀུ་ས་ལཾ ཝཱ ཀུ་ས་ལ་སྶ ཨ་ན་ནྟ་རཱ ཨུ་པྤ་ཛྫ་ན་ཀཾ ནཱ་མ ན་ཏྠཱི་ཏི ཏེ་སཾ ཨ་ཉྙ་མ་ཉྙཾ པ་ཊི་ས་ནྡྷཱ་ནཾ ན ཡུ་ཛྫ་ཏི. ཡེ པ་ན ཡ་སྨཱ ཨེ་ཀ་ཝ་ཏྠུ་སྨི་ཉྙེ་ཝ ར་ཛྫ་ཏི ཝི་ར་ཛྫ་ཏི ཙ, ཏ་སྨཱ ཏཾ ཨ་ཉྙ་མ་ཉྙཾ པ་ཊི་ས་ནྡ་ཧ་ཏཱི་ཏི ལ་དྡྷིཾ ག་ཧེ་ཏྭཱ ཋི་ཏཱ, སེ་ཡྻ་ཐཱ་པི མ་ཧཱ་ས་ངྒྷི་ཀཱ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ; པ་ཊི་ཉྙཱ ཨི་ཏ་ར་སྶ. ཨཱ་ཝ་ཊྚ་ནཱ པ་ཎི་དྷཱིཏི ཨུ་བྷ་ཡཾ ཨཱ་ཝ་ཛྫ་ན་སྶེ་ཝ ནཱ་མཾ. ཏ་ཉྷི བྷ་ཝ་ངྒཾ ཨཱ་ཝ་ཊྚེ་ཏཱི་ཏི ཨཱ་ཝ་ཊྚ་ནཱ. བྷ་ཝ་ངྒཱ་ར་མྨ་ཎ་ཏོ ཨ་ཉྙ་སྨིཾ ཨཱ་ར་མྨ་ཎེ ཙི་ཏྟཾ པ་ཎི་ད་ཧ་ཏི ཋ་པེ་ཏཱི་ཏི པ་ཎི་དྷི. ཀུ་ས་ལཾ ཨ་ནཱ་ཝ་ཊྚེ་ནྟ་སྶཱཏི ཡཾ ཏཾ ཨ་ཀུ་ས་ལཱ་ན་ནྟ་རཾ པ་ཊི་ས་ནྡ་ཧ་ནྟཾ ཀུ་ས་ལཾ ཨུ་པྤ་ཛྫ་ཏི, ཏཾ ཨ་ནཱ་ཝ་ཊྚེ་ནྟ་སྶ ཨུ་པྤ་ཛྫ་ཏཱི་ཏི པུ་ཙྪ་ཏི. ཨི་ཏ་རོ པ་ན ཝི་ནཱ ཨཱ་ཝ་ཛྫ་ནེ་ན ཀུ་ས་ལ་སྶ ཨུ་པྤ་ཏྟིཾ ཨ་པ་སྶ་ནྟོ པ་ཊི་ཀྑི་པ་ཏི. ཀུ་ས་ལཾ ཨ་ཡོ་ནི་སོ མ་ན་སི་ཀ་རོ་ཏོཏི ཨི་དཾ ཡ་དི ཨ་ཀུ་ས་ལཱ་ན་ནྟ་རཾ ཀུ་ས་ལཾ ཨུ་པྤ་ཛྫེ་ཡྻ, ཨ་ཀུ་ས་ལ་སྶེ་ཝ ཨཱ་ཝ་ཛྫ་ནེ་ན ཨ་ཡོ་ནི་སོ མ་ན་སི་ཀ་རོ་ཏོ ཨུ་པྤ་ཛྫེ་ཡྻཱ་ཏི ཙོ་ད་ན་ཏྠཾ ཝུ་ཏྟཾ. སེ་སཾ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ན་ནུ ཡ་སྨིཾ་ཡེ་ཝ ཝ་ཏྠུ་སྨིནྟི ཝ་ཙ་ནཾ ཨེ་ཀཱ་ར་མྨ་ཎེ ས་རཱ་ག་ཝི་རཱ་གུ་པྤ་ཏྟིཾ དཱི་པེ་ཏི, ན ཀུ་ས་ལཱ་ཀུ་ས་ལཱ་ནཾ ཨ་ན་ནྟ་ར་ཏཾ, ཏ་སྨཱ ཨ་སཱ་དྷ་ཀ་ནྟི.

ཀུ་ས་ལཱ་ཀུ་ས་ལ་པ་ཊི་ས་ནྡ་ཧ་ན་ཀ་ཐཱ་ཝ་ཎྞ་ནཱ.

༢. ས་ལཱ༹་ཡ་ཏ་ནུ་པྤ་ཏྟི་ཀ་ཐཱ་ཝ་ཎྞ་ནཱ

༦༩༡-༦༩༢. ཨི་དཱ་ནི ས་ལཱ༹་ཡ་ཏ་ནུ་པྤ་ཏྟི་ཀ་ཐཱ ནཱ་མ ཧོ་ཏི. ཏ་ཏྠ ཨུ་པ་པ་ཏྟེ་སི་ཡེ་ན པ་ཊི་ས་ནྡྷི་ཙི་ཏྟེ་ན ས་ཧེ་ཝ ཨོ་པ་པཱ་ཏི་ཀཱ་ནཾ ས་ལཱ༹་ཡ་ཏ་ནཾ ཨུ་པྤ་ཛྫ་ཏི. ག་བྦྷ་སེ་ཡྻ་ཀཱ་ནཾ ཨ་ཛ྄ཛྷ་ཏྟི་ཀཱ་ཡ་ཏ་ནེ་སུ མ་ནཱ་ཡ་ཏ་ན་ཀཱ་ཡཱ་ཡ་ཏ་ནཱ་ནེ་ཝ པ་ཊི་ས་ནྡྷི་ཀྑ་ཎེ ཨུ་པྤ་ཛྫ་ནྟི. སེ་སཱ་ནི ཙ་ཏྟཱ་རི ས་ཏྟ་ས་ཏྟ་ཏི་ར་ཏྟི་མྷི. ཏཱ་ནི ཙ ཁོ ཡེ་ན ཀ་མྨུ་ནཱ པ་ཊི་ས་ནྡྷི ག་ཧི་ཏཱ, ཏ་སྶེ་ཝ ཨ་ཉྙ་སྶ ཝཱ ཀ་ཏ་ཏྟཱ་ཏི ཨ་ཡཾ ས་ཀ་ས་མ་ཡེ ཝཱ་དོ. ཡེ་སཾ པ་ན ཨེ་ཀ་ཀ་མྨ་ས་མྦྷ་ཝ་ཏྟཱ ས་མྤ་ནྣ་སཱ་ཁཱ་ཝི་ཊ་པཱ་ནཾ རུ་ཀྑཱ་དཱི་ནཾ ཨཾ་ཀུ་རོ ཝི་ཡ བཱི་ཛ་མ་ཏྟཾ ས་ལཱ༹་ཡ་ཏ་ནཾ མཱ་ཏུ་ཀུ་ཙྪི་སྨིཾ པ་ཊི་ས་ནྡྷི་ཀྑ་ཎེ་ཡེ་ཝ ཨུ་པྤ་ཛྫ་ཏཱི་ཏི ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ནཾ; ཏེ ས་ནྡྷཱ་ཡ ས་ལཱ༹་ཡ་ཏ་ནནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ས་བྦ་ངྒ་པ་ཙྩ་ངྒཱིཏི་ཨཱ་དི ས་ལཱ༹་ཡ་ཏ་ནེ ས་ཏི ཨེ་ཝ་རཱུ་པོ ཧུ་ཏྭཱ ཨོ་ཀྐ་མེ་ཡྻཱ་ཏི ཙོ་ད་ན་ཏྠཾ ཝུ་ཏྟཾ. མཱ་ཏུ་ཀུ་ཙྪི་ག་ཏ་སྶཱཏི པུ་ཙྪཱ པ་ར་ཝཱ་དི་སྶ. པ་ར་ཏོ མཱ་ཏུ་ཀུ་ཙྪི་ག་ཏ་སྶ པ་ཙྪཱ ཀེ་སཱཏི པུ་ཙྪཱ ས་ཀ་ཝཱ་དི་སྶ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.

ས་ལཱ༹་ཡ་ཏ་ནུ་པྤ་ཏྟི་ཀ་ཐཱ་ཝ་ཎྞ་ནཱ.

༣. ཨ་ན་ནྟ་ར་པ་ཙྩ་ཡ་ཀ་ཐཱ་ཝ་ཎྞ་ནཱ

༦༩༣-༦༩༧. ཨི་དཱ་ནི ཨ་ན་ནྟ་ར་པ་ཙྩ་ཡ་ཀ་ཐཱ ནཱ་མ ཧོ་ཏི. ཏ་ཏྠ ན་ཙྩ་གཱི་ཏཱ་དཱི་སུ རཱུ་པ་ད་སྶ་ན་ས་དྡ་ས་ཝ་ནཱ་དཱི་ནཾ ལ་ཧུ་པ་རི་ཝ་ཏྟི་ཏཾ དི་སྭཱ ‘‘ཨི་མཱ་ནི ཝི་ཉྙཱ་ཎཱ་ནི ཨ་ཉྙ་མ་ཉྙ་སྶ ཨ་ན་ནྟ་རཱ ཨུ་པྤ་ཛྫ་ནྟཱི’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ཙ་ཀྑུ་ཝི་ཉྙཱ་ཎ་སྶཱཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སོ་ཏ་ཝི་ཉྙཱ་ཎཾ རཱུ་པཱ་ར་མྨ་ཎཾ་ཡེ་ཝཱཏི ཡ་དི ཙ་ཀྑུ་ཝི་ཉྙཱ་ཎ་སྶ ཨ་ན་ནྟ་རཱ ཨུ་པྤ་ཛྫེ་ཡྻ, ཝི་པཱ་ཀ་མ་ནོ་དྷཱ་ཏུ ཝི་ཡ རཱུ་པཱ་ར་མྨ་ཎཾ སི་ཡཱ་ཏི ཙོ་དེ་ཏུཾ ཝུ་ཏྟཾ. ཙ་ཀྑུ་ཉྩ པ་ཊི་ཙྩ རཱུ་པེ ཙ ཨུ་པྤ་ཛྫ་ཏི སོ་ཏ་ཝི་ཉྙཱ་ཎནྟི པ་ཉྷེ་སུ སུ་ཏྟཱ་བྷཱ་ཝེ་ན པ་ཊི་ཀྑི་པི་ཏྭཱ ཨ་ན་ནྟ་རུ་པྤ་ཏྟིཾ ས་ལླ་ཀྑེ་ནྟོ ལ་དྡྷི་ཝ་སེ་ན པ་ཊི་ཛཱ་ནཱ་ཏི. ཏ་ཉྙེ་ཝ ཙ་ཀྑུ་ཝི་ཉྙཱ་ཎཾ ཏཾ སོ་ཏ་ཝི་ཉྙཱ་ཎནྟི ཡ་ཐཱ པ་ཋ་མ་ཛ་ཝ་ནཱ་ན་ནྟ་རཾ དུ་ཏི་ཡ་ཛ་ཝ་ནཾ མ་ནོ་ཝི་ཉྙཱ་ཎ་བྷཱ་ཝེ་ན ཏ་ཉྙེ་ཝ ཧོ་ཏི, ཀིཾ ཏེ ཏ་ཐཱ ཨེ་ཏ་མྤི དྭ་ཡཾ ཨེ་ཀ་མེ་ཝཱ་ཏི པུ་ཙྪ་ཏི. ཨི་མི་ནཱ ན་ཡེ་ན ས་བྦ་ཝཱ་རེ་སུ ཨ་ཏྠོ ཝེ་དི་ཏ་བྦོ. ན་ཙྩ་ཏི གཱ་ཡ་ཏཱིཏི་ཨཱ་དི་ཝ་ཙ་ནཾ ཨཱ་ར་མྨ་ཎ་ས་མོ་དྷཱ་ནེ ལ་ཧུ་པ་རི་ཝ་ཏྟི་ཏཱ་ཡ ཝོ་ཀི་ཎྞ་བྷཱ་ཝཾ དཱི་པེ་ཏི, ན ཨ་ན་ནྟ་ར་པ་ཙྩ་ཡ་ཏཾ, ཏ་སྨཱ ཨ་སཱ་དྷ་ཀ་ནྟི.

ཨ་ན་ནྟ་ར་པ་ཙྩ་ཡ་ཀ་ཐཱ་ཝ་ཎྞ་ནཱ.

༤. ཨ་རི་ཡ་རཱུ་པ་ཀ་ཐཱ་ཝ་ཎྞ་ནཱ

༦༩༨-༦༩༩. ཨི་དཱ་ནི ཨ་རི་ཡ་རཱུ་པ་ཀ་ཐཱ ནཱ་མ ཧོ་ཏི. ཏ་ཏྠ ས་མྨཱ་ཝཱ་ཙཱ་ཀ་མྨ་ནྟཱ རཱུ་པཾ, ཏ་ཉྩ ཁོ ‘‘ས་བྦཾ རཱུ་པཾ ཙ་ཏྟཱ་རི ཙ མ་ཧཱ་བྷཱུ་ཏཱ་ནི ཙ་ཏུ་ནྣ་ཉྩ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ་རཱུ་པ’’ནྟི (མ. ནི. ༣.༦༧) ཝ་ཙ་ན་ཏོ ཨུ་པཱ་དཱ་ཡ་རཱུ་པ་ནྟི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ ས་ནྡྷཱ་ཡ ཨ་རི་ཡ་རཱུ་པཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡཱཏི པུ་ཙྪཱ ས་ཀ་ཝཱ་དི་སྶ. ཏ་ཏྠ ཨ་རི་ཡཱ་ནཾ རཱུ་པཾ, ཨ་རི་ཡཾ ཝཱ རཱུ་པ་ནྟི ཨ་རི་ཡ་རཱུ་པཾ. ཨཱ་མ་ནྟཱཏི ལ་དྡྷི་ཡཾ ཋ་ཏྭཱ པ་ཊི་ཉྙཱ ཨི་ཏ་ར་སྶ. ཀུ་ས་ལནྟི པུ་ཊྛོ ལ་དྡྷི་ཝ་སེ་ནེ་ཝ པ་ཊི་ཛཱ་ནཱ་ཏི. ཨ་ནཱ་ས་ཝ་པུ་ཙྪཱ་དཱི་སུ་པི ཨེ་སེ་ཝ ན་ཡོ. ཡཾ ཀི་ཉྩི རཱུ་པནྟི སུ་ཏྟཾ ཋ་པེ་ཏྭཱ བྷཱུ་ཏཱ་ནི སེ་ས་རཱུ་པ་སྶ ཨུ་པཱ་དཱ་བྷཱ་ཝཾ དཱི་པེ་ཏི, ན ས་མྨཱ་ཝཱ་ཙཱ་ཀ་མྨ་ནྟཱ་ནཾ. ཏེ་ས་ཉྷི རཱུ་པ་མ་ཏྟ་ཉྙེ་ཝ ཨ་སི་དྡྷཾ, ཀུ་ཏོ ཨུ་པཱ་དཱ་རཱུ་པ་ཏཱ; ཏ་སྨཱ ཨ་སཱ་དྷ་ཀ་ནྟི.

ཨ་རི་ཡ་རཱུ་པ་ཀ་ཐཱ་ཝ་ཎྞ་ནཱ.

༥. ཨ་ཉྙོ ཨ་ནུ་ས་ཡོ་ཏི་ཀ་ཐཱ་ཝ་ཎྞ་ནཱ

༧༠༠-༧༠༡. ཨི་དཱ་ནི ཨ་ཉྙོ ཨ་ནུ་ས་ཡོ་ཏི་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ པུ་ཐུ་ཛྫ་ནོ ཀུ་ས་ལཱ་བྱཱ་ཀ་ཏེ ཙི་ཏྟེ ཝ་ཏྟ་མཱ་ནེ སཱ་ནུ་ས་ཡོ་ཏི ཝ་ཏྟ་བྦོ, ན པ་རི་ཡུ་ཊྛི་ཏོ་ཏི ཏ་སྨཱ ཨ་ཉྙོ ཨ་ནུ་ས་ཡོ, ཨ་ཉྙཾ པ་རི་ཡུ་ཊྛཱ་ན་ནྟི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ; ཏེ ས་ནྡྷཱ་ཡ ཨ་ཉྙོ ཀཱ་མ་རཱ་གཱ་ནུ་ས་ཡོཏི པུ་ཙྪཱ ས་ཀ་ཝཱ་དི་སྶ པ་ཊི་ཉྙཱ ཨི་ཏ་ར་སྶ. སེ་སཾ ཧེ་ཊྛཱ ཨ་ནུ་ས་ཡ་ཀ་ཐཱ་ཡཾ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. སཱ་ནུ་ས་ཡོཏི་ཨཱ་དི པ་ན ཏ་སྨིཾ ས་མ་ཡེ ཨ་ནུ་ས་ཡ་སྶ ཨ་པྤ་ཧཱི་ན་ཏྟཱ སཱ་ནུ་ས་ཡོ་ཏི ཝ་ཏྟ་བྦ་ཏཾ, ཨ་ནུ་པྤ་ནྣ་ཏྟཱ ཙ པ་རི་ཡུ་ཊྛི་ཏོ་ཏི ཨ་ཝ་ཏྟ་བྦ་ཏཾ དཱི་པེ་ཏི, ན ཨ་ནུ་ས་ཡ་པ་རི་ཡུ་ཊྛཱ་ནཱ་ནཾ ཨ་ཉྙ་ཏྟཾ, ཏ་སྨཱ ཨ་སཱ་དྷ་ཀ་ནྟི.

ཨ་ཉྙོ ཨ་ནུ་ས་ཡོ་ཏི་ཀ་ཐཱ་ཝ་ཎྞ་ནཱ.

༦. པ་རི་ཡུ་ཊྛཱ་ནཾ ཙི་ཏྟ་ཝི་པྤ་ཡུ་ཏྟ་ནྟི་ཀ་ཐཱ་ཝ་ཎྞ་ནཱ

༧༠༢. ཨི་དཱ་ནི པ་རི་ཡུ་ཊྛཱ་ནཾ ཙི་ཏྟ་ཝི་པྤ་ཡུ་ཏྟ་ནྟི་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཨ་ནི་ཙྩཱ་དི་ཏོ མ་ན་སི་ཀ་རོ་ཏོ་པི རཱ་གཱ་ད་ཡོ ཨུ་པྤ་ཛྫ་ནྟི. ཝུ་ཏྟ་མྤི ཙེ་ཏཾ – ‘‘ཨ་པྤེ་ཀ་དཱ, བྷོ བྷཱ་ར་དྭཱ་ཛ, ཨ་སུ་བྷ་ཏོ མ་ན་སི་ཀ་རི་སྶཱ་མཱི་ཏི སུ་བྷ་ཏོ་ཝ མ་ན་སི་ཀ་རོ་ཏཱི’’ཏི (སཾ. ནི. ༤.༡༢༧). ཏ་སྨཱ པ་རི་ཡུ་ཊྛཱ་ནཾ ཙི་ཏྟ་ཝི་པྤ་ཡུ་ཏྟ་ནྟི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ནཾ་ཡེ་ཝ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.

པ་རི་ཡུ་ཊྛཱ་ནཾ ཙི་ཏྟ་ཝི་པྤ་ཡུ་ཏྟ་ནྟི་ཀ་ཐཱ་ཝ་ཎྞ་ནཱ.

༧. པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ

༧༠༣-༧༠༥. ཨི་དཱ་ནི པ་རི་ཡཱ་པ་ནྣ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ ཀཱ་མ་རཱ་གོ ཀཱ་མ་དྷཱ་ཏུཾ ཨ་ནུ་སེ་ཏི, ཀཱ་མ་དྷཱ་ཏུ་པ་རི་ཡཱ་པ་ནྣོ་ཏི ཙ ཝུ་ཙྩ་ཏི, ཏ་སྨཱ རཱུ་པ་རཱ་གཱ་རཱུ་པ་རཱ་གཱ་པི རཱུ་པ་དྷཱ་ཏུ་ཨ་རཱུ་པ་དྷཱ་ཏུ་ཡོ ཨ་ནུ་སེ་ནྟི. རཱུ་པ་དྷཱ་ཏུ་ཨ་རཱུ་པ་དྷཱ་ཏུ་པ་རི་ཡཱ་པ་ནྣཱ་ཡེ་ཝ ཙ ནཱ་མ ཧོ་ནྟཱི་ཏི ཡེ་སཾ ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ན་ཉྩེ་ཝ ས་མྨི་ཏི་ཡཱ་ན་ཉྩ; ཏེ ས་ནྡྷཱ་ཡ རཱུ་པ་རཱ་གོཏི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. ཏ་ཏྠ ཨ་ནུ་སེ་ཏཱིཏི ཡ་ཐཱ ཀཱ་མ་རཱ་གོ ཀཱ་མ་ཝི་ཏ་ཀྐ་ས་ངྑཱ་ཏཾ ཀཱ་མ་དྷཱ་ཏུཾ ས་ཧ་ཛཱ་ཏ་ཝ་སེ་ན ཨ་ནུ་སེ་ཏི, ཀིཾ ཏེ ཨེ་ཝཾ རཱུ་པ་རཱ་གོ རཱུ་པ་དྷཱ་ཏུ་ནྟི པུ་ཙྪ་ཏི. པ་རི་ཡཱ་པ་ནྣོཏི ཡ་ཐཱ ཙ སོ ཏི་ཝི་དྷཱ་ཡ ཀཱ་མ་དྷཱ་ཏུ་ཡཱ ཀི་ལེ་ས་ཀཱ་མ་ཝ་སེ་ན པ་རི་ཡཱ་པ་ནྣ་ཏྟཱ ཀཱ་མ་དྷཱ་ཏུ་པ་རི་ཡཱ་པ་ནྣོ, ཀིཾ ཏེ ཨེ་ཝཾ རཱུ་པ་རཱ་གོ་པི རཱུ་པ་དྷཱ་ཏུ་པ་རི་ཡཱ་པ་ནྣོ་ཏི པུ་ཙྪ་ཏི. ཨི་ཏ་རོ པ་ན་སྶ ཨ་དྷི་པྤཱ་ཡཾ ཨ་ས་ལླ་ཀྑེ་ནྟོ ཀེ་ཝ་ལཾ ལ་དྡྷི་ཝ་སེ་ན ཨཱ་མ་ནྟཱ་ཏི པ་ཊི་ཛཱ་ནཱ་ཏི. ཨ་ཐ ནཾ ཏ་མ་ཏྠཾ ས་ལླ་ཀྑཱ་པེ་ཏུཾ ཀུ་ས་ལ་ཝི་པཱ་ཀ་ཀི་རི་ཡ་ས་ངྑཱ་ཏེ་ཧི ས་མཱ་པ་ཏྟེ་སི་ཡཱ་དཱི་ཧི སཾ་ས་ནྡི་ཏྭཱ པུ་ཙྪི་ཏུཾ ས་མཱ་པ་ཏྟེ་སི་ཡོཏི་ཨཱ་དི་མཱ་ཧ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏི. ན་ནུ ཀཱ་མ་རཱ་གོཏི་ཨཱ་དི་ཝ་ཙ་ན་མྤི ཀཱ་མ་རཱ་ག་སྶེ་ཝ ཀཱ་མ་དྷཱ་ཏུ་ཡཾ ཨ་ནུ་ས་ཡ་བྷཱ་ཝཾ པ་རི་ཡཱ་པ་ནྣ་ཏ་ཉྩ དཱི་པེ་ཏི, ན ཨི་ཏ་རེ་སཾ ཨི་ཏ་ར་དྷཱ་ཏཱུ་སཱུ་ཏི.

པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ.

༨. ཨ་བྱཱ་ཀ་ཏ་ཀ་ཐཱ་ཝ་ཎྞ་ནཱ

༧༠༦-༧༠༨. ཨི་དཱ་ནི ཨ་བྱཱ་ཀ་ཏ་ཀ་ཐཱ ནཱ་མ ཧོ་ཏི. ཏ་ཏྠ ཝི་པཱ་ཀ་ཀི་རི་ཡ་རཱུ་པ་ནི་བྦཱ་ན་ས་ངྑཱ་ཏཾ ཙ་ཏུ་བྦི་དྷཾ ཨ་བྱཱ་ཀ་ཏཾ ཨ་ཝི་པཱ་ཀ་ཏྟཱ ཨ་བྱཱ་ཀ་ཏ་ནྟི ཝུ་ཏྟཾ. དི་ཊྛི་ག་ཏཾ ‘‘ས་སྶ་ཏོ ལོ་ཀོ་ཏི ཁོ, ཝ་ཙྪ, ཨ་བྱཱ་ཀ་ཏ་མེ་ཏ’’ནྟི (སཾ. ནི. ༤.༤༡༦ ཐོ་ཀཾ ཝི་ས་དི་སཾ) ས་སྶ་ཏཱ་དི་བྷཱ་ཝེ་ན ཨ་ཀ་ཐི་ཏ་ཏྟཱ. ཡེ་སཾ པ་ན ཨི་མཾ ཝི་བྷཱ་གཾ ཨ་གྒ་ཧེ་ཏྭཱ པུ་རི་མཱ་བྱཱ་ཀ་ཏཾ ཝི་ཡ དི་ཊྛི་ག་ཏ་མྤི ཨ་བྱཱ་ཀ་ཏ་ནྟི ལ་དྡྷི, སེ་ཡྻ་ཐཱ་པི ཨ་ནྡྷ་ཀཱ་ན་ཉྩེ་ཝ ཨུ་ཏྟ་རཱ་པ་ཐ་ཀཱ་ན་ཉྩ; ཏེ་སཾ ཏཾ ཝི་བྷཱ་གཾ ད་སྶེ་ཏུཾ དི་ཊྛི་ག་ཏཾ ཨ་བྱཱ་ཀ་ཏནྟི པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.

ཨ་བྱཱ་ཀ་ཏ་ཀ་ཐཱ་ཝ་ཎྞ་ནཱ.

༩. ཨ་པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ

༧༠༩-༧༡༠. ཨི་དཱ་ནི ཨ་པ་རི་ཡཱ་པ་ནྣ་ཀ་ཐཱ ནཱ་མ ཧོ་ཏི. ཏ་ཏྠ ཡ་སྨཱ པུ་ཐུ་ཛྫ་ནོ ཛྷཱ་ན་ལཱ་བྷཱི ཀཱ་མེ་སུ ཝཱི་ཏ་རཱ་གོ་ཏི ཝ་ཏྟ་བྦོ ཧོ་ཏི, ན པ་ན ཝི་ག་ཏ་དི་ཊྛི་ཀོ་ཏི, ཏ་སྨཱ དི་ཊྛི་ག་ཏཾ ཨ་པ་རི་ཡཱ་པ་ནྣ་ནྟི ཡེ་སཾ ལ་དྡྷི, སེ་ཡྻ་ཐཱ་པི པུ་བྦ་སེ་ལི་ཡཱ་ནཾ; ཏེ ས་ནྡྷཱ་ཡ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ. སེ་ས་མེ་ཏྠ ཡ་ཐཱ་པཱ་ལི༹་མེ་ཝ ནི་ཡྻཱ་ཏཱི་ཏི.

ཨ་པ་རི་ཡཱ་པ་ནྣ་ཀ་ཐཱ་ཝ་ཎྞ་ནཱ.

ཙུ་དྡ་ས་མོ ཝ་གྒོ.