༥. ས་ཏྟ་ཀྑ་ཏྟུ་པ་ར་མ་ཀ་ཐཱ་ཝ་ཎྞ་ནཱ

༥༤༡-༥༤༥. ཨི་དཱ་ནི ས་ཏྟ་ཀྑ་ཏྟུ་པ་ར་མ་ཀ་ཐཱ ནཱ་མ ཧོ་ཏི, ཏ་ཏྠ ཡ་སྨཱ ‘‘ས་ཏྟ་ཀྑ་ཏྟུ་པ་ར་མོ’’ཏི ཝུ་ཏྟཾ, ཏ་སྨཱ ‘‘ས་ཏྟ་ཀྑ་ཏྟུ་པ་ར་མོ པུ་གྒ་ལོ ས་ཏྟ་ཀྑ་ཏྟུ་པ་ར་མ་ཏཱ་ཡ ནི་ཡ་ཏོ’’ཏི ཡེ་སཾ ལ་དྡྷི, སེ་ཡྻ་ཐཱ་པི ཨུ་ཏྟ་རཱ་པ་ཐ་ཀཱ་ནཾ; ཏེ་སཾ ཋ་པེ་ཏྭཱ ‘‘ཨ་རི་ཡ་མ་གྒཾ ཨ་ཉྙོ ཏ་སྶ ནི་ཡ་མོ ན་ཏྠི, ཡེ་ན སོ ས་ཏྟ་ཀྑ་ཏྟུ་པ་ར་མ་ཏཱ་ཡ ནི་ཡ་ཏོ བྷ་ཝེ་ཡྻཱ’’ཏི ཨི་མཾ ཝི་བྷཱ་གཾ ད་སྶེ་ཏུཾ པུ་ཙྪཱ ས་ཀ་ཝཱ་དི་སྶ, པ་ཊི་ཉྙཱ ཨི་ཏ་ར་སྶ.

མཱ་ཏཱ ཛཱི་ཝི་ཏཱཏི་ཨཱ་དཱི་སུ ཨ་ཡ་མ་དྷི་པྤཱ་ཡོ – དྭེ ནི་ཡཱ་མཱ ས་མྨ་ཏྟ་ནི་ཡཱ་མོ ཙ མི་ཙྪ་ཏྟ་ནི་ཡཱ་མོ ཙ. ས་མྨ་ཏྟ་ནི་ཡཱ་མོ ཨ་རི་ཡ་མ་གྒོ. སོ ཨ་ཝི་ནི་པཱ་ཏ་དྷ་མྨ་ཏ་ཉྩེ་ཝ ཕ་ལུ་པྤ་ཏྟི་ཉྩ ནི་ཡ་མེ་ཏི. མི་ཙྪ་ཏྟ་ནི་ཡཱ་མོ ཨཱ་ན་ནྟ་རི་ཡ་ཀ་མྨཾ. ཏཾ ཨ་ན་ནྟ་རཱ ནི་ར་ཡཱུ་པ་པ་ཏྟིཾ ནི་ཡ་མེ་ཏི. ཏ་ཏྠ ས་ཏྟ་ཀྑ་ཏྟུ་པ་ར་མོ སོ་ཏཱ་པ་ཏྟི་མ་གྒེ་ན ཨ་ཝི་ནི་པཱ་ཏ་དྷ་མྨ་ཏཱ་ཡ ཙ ཕ་ལུ་པྤ་ཏྟི་ཡཱ ཙ ནི་ཡ་མི་ཏོ. སེ་ས་མ་གྒ་ནི་ཡཱ་མོ པ་ན་སྶ ན་ཏྠི ཨ་ན་དྷི་ག་ཏ་ཏྟཱ, ཨཱ་ན་ནྟ་རི་ཡ་མྤི ཀཱ་ཏུཾ སོ ཨ་བྷ་བྦོ. ཏྭཾ པ་ན་སྶ ནི་ཡཱ་མཾ ཨི་ཙྪ་སི, ཏེ་ན ཏཾ ཝ་དཱ་མ – ‘‘ཀིཾ ཏེ སོ ཨི་མི་ནཱ མི་ཙྪ་ཏྟ་ནི་ཡཱ་མེ་ན ནི་ཡ་མི་ཏོ’’ཏི.

ཨ་བྷ་བྦོ ཨ་ནྟ་རཱཏི པ་ཉྷེ་སུ ཨཱ་ན་ནྟ་རི་ཡཱ་བྷཱ་ཝཾ ས་ནྡྷཱ་ཡ པ་ཊི་ཀྑི་པ་ཏི, ས་ཏྟ་ཀྑ་ཏྟུ་པ་ར་མཾ ས་ནྡྷཱ་ཡ པ་ཊི་ཛཱ་ནཱ་ཏི. ཨ་ཏྠི སོ ནི་ཡཱ་མོཏི པ་ཉྷེ ས་ཏྟ་ཀྑ་ཏྟུ་པ་ར་མ་ཏཱ་ཡ ནི་ཡཱ་མཾ ཨ་པ་སྶ་ནྟོ པ་ཊི་ཀྑི་པ་ཏི. ཨ་ཏྠི ཏེ ས་ཏི་པ་ཊྛཱ་ནཱཏི་ཨཱ་དི ནི་ཡཱ་མ་ས་ངྑཱ་ཏེ མ་གྒ་དྷ་མྨེ ད་སྶེ་ཏུཾ ཝུ་ཏྟཾ. ཏ་སྶ པ་ན པུ་ན པ་ཋ་མ་མ་གྒཱ་ནུ་པྤ་ཏྟི་ཏོ ཏེ་པི ན་ཏྠི, ཏ་སྨཱ པ་ཊི་ཀྑི་པ་ཏི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝ. ན་ནུ སོ ས་ཏྟ་ཀྑ་ཏྟུ་པ་ར་མོཏི ཨེ་ཏྠ བྷ་ག་ཝཱ ‘‘ཨ་ཡཾ པུ་གྒ་ལོ ཨེ་ཏྟ་ཀེ བྷ་ཝེ ས་ནྡྷཱ་ཝི་ཏྭཱ པ་རི་ནི་བྦཱ་ཡི་སྶ་ཏི, ཨ་ཡཾ ཨེ་ཏྟ་ཀེ’’ཏི ཨ་ཏྟ་ནོ ཉཱ་ཎ་བ་ལེ་ན བྱཱ་ཀ་རོ་ཏི, ན བྷ་ཝ་ནི་ཡཱ་མཾ ནཱ་མ ཀི་ཉྩི ཏེ་ན ས་ཏྟ་ཀྑ་ཏྟུ་པ་ར་མོ, ཀོ་ལཾ་ཀོ་ལོ, ཨེ་ཀ་བཱི་ཛཱི ཝཱ་ཏི ཝུ་ཏྟཾ, ཏ་སྨཱ ཨ་སཱ་དྷ་ཀ་མེ་ཏ་ནྟི.

ས་ཏྟ་ཀྑ་ཏྟུ་པ་ར་མ་ཀ་ཐཱ་ཝ་ཎྞ་ནཱ.

༦༤༦-༦༤༧. ཀོ་ལཾ་ཀོ་ལ་ཨེ་ཀ་བཱི་ཛི་ཀ་ཐཱ་ཡོ་པི ཨི་མི་ནཱ་ཝུ་པཱ་ཡེ་ན ཝེ་དི་ཏ་བྦཱ.

ཀོ་ལཾ་ཀོ་ལ་ཨེ་ཀ་བཱི་ཛི་ཀ་ཐཱ་ཝ་ཎྞ་ནཱ.