༥. པ་ཉྩ་མ་པ་ཎྞཱ་ས་ཀཾ
(༢༡) ༡. ཀི་མི་ལ་ཝ་གྒོ
༡. ཀི་མི་ལ་སུ་ཏྟ་ཝ་ཎྞ་ནཱ
༢༠༡. པ་ཉྩ་མ་སྶ པ་ཋ་མེ ཀི་མི་ལཱ་ཡནྟི ཨེ་ཝཾ་ནཱ་མ་ཀེ ན་ག་རེ. ནི་ཙུ་ལ་ཝ་ནེཏི མུ་ཙ་ལི་ནྡ་ཝ་ནེ. ཨེ་ཏ་ད་ཝོ་ཙཱཏི ཨ་ཡཾ ཀི་ར ཐེ་རོ ཏ་སྨིཾ་ཡེ་ཝ ན་ག་རེ སེ་ཊྛི་པུ་ཏྟོ ས་ཏྠུ ས་ནྟི་ཀེ པ་བྦ་ཛི་ཏྭཱ པུ་བྦེ་ནི་ཝཱ་ས་ཉཱ་ཎཾ པ་ཊི་ལ་བྷི. སོ ཨ་ཏྟ་ནཱ ནི་ཝུ་ཏྠཾ ཁ་ནྡྷ་ས་ནྟཱ་ནཾ ཨ་ནུ་སྶ་ར་ནྟོ ཀ་སྶ་པ་ད་ས་བ་ལ་སྶ སཱ་ས་ནོ་ས་ཀྐ་ན་ཀཱ་ལེ པ་བྦ་ཛི་ཏྭཱ ཙ་ཏཱུ་སུ པ་རི་སཱ་སུ སཱ་ས་ནེ ཨ་གཱ་ར་ཝཾ ཀ་རོ་ནྟཱི་སུ ནི་སྶེ་ཎིཾ བ་ནྡྷི་ཏྭཱ པ་བྦ་ཏཾ ཨཱ་རུ་ཡ྄ཧ ཏ་ཏྠ ས་མ་ཎ་དྷ་མྨཾ ཀ་ཏྭཱ ཨ་ཏྟ་ནོ ནི་ཝུ་ཏྠ་བྷཱ་ཝཾ ཨ་དྡ་ས. སོ ‘‘ས་ཏྠཱ་རཾ ཨུ་པ་ས་ངྐ་མི་ཏྭཱ ཏཾ ཀཱ་ར་ཎཾ པུ་ཙྪི་སྶཱ་མཱི’’ཏི ཨེ་ཏཾ ‘‘ཀོ ནུ ཁོ, བྷ་ནྟེ’’ཏི་ཨཱ་དི་ཝ་ཙ་ནཾ ཨ་ཝོ་ཙ.
ས་ཏྠ་རི ཨ་གཱ་ར་ཝཱ ཝི་ཧ་ར་ནྟི ཨ་པྤ་ཏི་སྶཱཏི ས་ཏྠ་རི གཱ་ར་ཝ་ཉྩེ་ཝ ཛེ་ཊྛ་ཀ་བྷཱ་ཝ་ཉྩ ཨ་ནུ་པ་ཊྛ་པེ་ཏྭཱ ཝི་ཧ་ར་ནྟི. སེ་སེ་སུ་པི ཨེ་སེ་ཝ ན་ཡོ. ཏ་ཏྠ ཙེ་ཏི་ཡ་ངྒ་ཎཱ་དཱི་སུ ཚ་ཏྟཾ དྷཱ་རེ་ཏྭཱ ཨུ་པཱ་ཧ་ནཱ ཨཱ་རུ་ཡ྄ཧ ཝི་ཙ་ར་ནྟོ ནཱ་ན་པྤ་ཀཱ་ར་ཉྩ ནི་ར་ཏྠ་ཀ་ཀ་ཐཾ ཀ་ཐེ་ནྟོ ས་ཏྠ་རི ཨ་གཱ་ར་ཝོ ཝི་ཧ་ར་ཏི ནཱ་མ. དྷ་མྨ་སྶ་ཝ་ན་གྒེ པ་ན ནི་སཱི་དི་ཏྭཱ ནི་དྡཱ་ཡ་ནྟོ ཙེ་ཝ ནཱ་ན་པྤ་ཀཱ་ར་ཉྩ ནི་ར་ཏྠ་ཀ་ཀ་ཐཾ ཀ་ཐེ་ནྟོ དྷ་མྨེ ཨ་གཱ་ར་ཝོ ཝི་ཧ་ར་ཏི ནཱ་མ. ས་ངྒྷ་མ་ཛ྄ཛྷེ བཱ་ཧཱ་ཝི་ཀྑེ་པ་ཀཾ ནཱ་ན་ཏྟ་ཀ་ཐཾ ཀ་ཐེ་ནྟོ ཐེ་ར་ན་ཝ་མ་ཛ྄ཛྷི་མེ་སུ ཙ ཙི་ཏྟཱི་ཀཱ་རཾ ཨ་ཀ་རོ་ནྟོ ས་ངྒྷེ ཨ་གཱ་ར་ཝོ ཝི་ཧ་ར་ཏི ནཱ་མ. སི་ཀྑཾ ཨ་པ་རི་པཱུ་རེ་ནྟོ སི་ཀྑཱ་ཡ ཨ་གཱ་ར་ཝོ ཝི་ཧ་ར་ཏི ནཱ་མ. ཨ་ཉྙ་མ་ཉྙཾ ཀ་ལ་ཧ་བྷ་ཎྜ་ནཱ་དཱི་ནི ཀ་རོ་ནྟོ ཨ་ཉྙ་མ་ཉྙཾ ཨ་གཱ་ར་ཝོ ཝི་ཧ་ར་ཏི ནཱ་མ. དུ་ཏི་ཡཾ ཨུ་ཏྟཱ་ན་ཏྠ་མེ་ཝ.
༣. ཨ་སྶཱ་ཛཱ་ནཱི་ཡ་སུ་ཏྟ་ཝ་ཎྞ་ནཱ
༢༠༣-༢༠༤. ཏ་ཏི་ཡེ ཨ་ཛྫ་ཝེ་ནཱཏི ཨུ་ཛུ་བྷཱ་ཝེ་ན ཨ་ཝ་ངྐ་ག་མ་ནེ་ན. ཛ་ཝེ་ནཱཏི པ་ད་ཛ་ཝེ་ན. མ་དྡ་ཝེ་ནཱཏི ས་རཱི་ར་མུ་དུ་ཏཱ་ཡ. ཁ་ནྟི་ཡཱཏི ཨ་དྷི་ཝཱ་ས་ན་ཀྑ་ནྟི་ཡཱ. སོ་ར་ཙྩེ་ནཱཏི སུ་ཙི་སཱི་ལ་ཏཱ་ཡ. བྷི་ཀྑུ་ཝཱ་རེ ཨ་ཛྫ་ཝནྟི ཉཱ་ཎ་སྶ ཨུ་ཛུ་ཀ་ག་མ་ནཾ. ཛ་ཝོཏི སཱུ་རཾ ཧུ་ཏྭཱ ཉཱ་ཎ་སྶ ག་མ་ན་བྷཱ་ཝོ. མ་དྡ་ཝནྟི སཱི་ལ་མ་དྡ་ཝཾ. ཁ་ནྟཱིཏི ཨ་དྷི་ཝཱ་ས་ན་ཀྑ་ནྟི་ཡེ་ཝ. སོ་ར་ཙྩཾ སུ་ཙི་སཱི་ལ་ཏཱ་ཡེ་ཝ. ཙ་ཏུ་ཏྠེ པ་ཉྩ བ་ལཱ་ནི མི་སྶ་ཀཱ་ནི ཀ་ཐི་ཏཱ་ནི.
༥. ཙེ་ཏོ་ཁི་ལ་སུ་ཏྟ་ཝ་ཎྞ་ནཱ
༢༠༥. པ་ཉྩ་མེ ཙེ་ཏོ་ཁི་ལཱཏི ཙི་ཏྟ་སྶ ཐ་དྡྷ་བྷཱ་ཝཱ, ཀ་ཙ་ཝ་ར་བྷཱ་ཝཱ, ཁཱ་ཎུ་ཀ་བྷཱ་ཝཱ. ས་ཏྠ་རི ཀ་ངྑ་ཏཱིཏི ས་ཏྠུ ས་རཱི་རེ ཝཱ གུ་ཎེ ཝཱ ཀ་ངྑ་ཏི. ས་རཱི་རེ ཀ་ངྑ་མཱ་ནོ ‘‘དྭ་ཏྟིཾ་ས་ཝ་ར་པུ་རི་ས་ལ་ཀྑ་ཎ་པ་ཊི་མ་ཎྜི་ཏཾ ནཱ་མ ས་རཱི་རཾ ཨ་ཏྠི ནུ ཁོ ན་ཏྠཱི’’ཏི ཀ་ངྑ་ཏི, གུ་ཎེ ཀ་ངྑ་མཱ་ནོ ‘‘ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣ་ཛཱ་ན་ན་ས་མ་ཏྠཾ ས་བྦ་ཉྙུ་ཏ་ཉྙཱ་ཎཾ ཨ་ཏྠི ནུ ཁོ ན་ཏྠཱི’’ཏི ཀ་ངྑ་ཏི. ཝི་ཙི་ཀི་ཙྪ་ཏཱིཏི ཝི་ཙི་ན་ནྟོ ཀི་ཙྪ་ཏི, དུ་ཀྑཾ ཨཱ་པ་ཛྫ་ཏི, ཝི་ནི་ཙྪེ་ཏུཾ ན ས་ཀྐོ་ཏི. ནཱ་དྷི་མུ་ཙྩ་ཏཱིཏི ཨེ་ཝ་མེ་ཏ་ནྟི ཨ་དྷི་མོ་ཀྑཾ ན པ་ཊི་ལ་བྷ་ཏི. ན ས་མྤ་སཱི་ད་ཏཱིཏི གུ་ཎེ་སུ ཨོ་ཏ་རི་ཏྭཱ ནི་བྦི་ཙི་ཀི་ཙྪ་བྷཱ་ཝེ་ན པ་སཱི་དི་ཏུཾ ཨ་ནཱ་ཝི་ལོ བྷ་ཝི་ཏུཾ ན ས་ཀྐོ་ཏི. ཨཱ་ཏ་པྤཱ་ཡཱཏི ཀི་ལེ་ས་ས་ནྟཱ་པ་ཀ་ཝཱི་རི་ཡ་ཀ་ར་ཎ་ཏྠཱ་ཡ. ཨ་ནུ་ཡོ་གཱ་ཡཱཏི པུ་ན་པྤུ་ནཾ ཡོ་གཱ་ཡ. སཱ་ཏ་ཙྩཱ་ཡཱཏི ས་ཏ་ཏ་ཀི་རི་ཡཱ་ཡ. པ་དྷཱ་ནཱ་ཡཱཏི པ་ད་ཧ་ན་ཏྠཱ་ཡ. ཨ་ཡཾ པ་ཋ་མོ ཙེ་ཏོ་ཁི་ལོཏི ཨ་ཡཾ ས་ཏྠ་རི ཝི་ཙི་ཀི་ཙྪཱ་ས་ངྑཱ་ཏོ པ་ཋ་མོ ཙི་ཏྟ་སྶ ཐ་དྡྷ་བྷཱ་ཝོ ཨེ་ཝ་མེ་ཏ་སྶ བྷི་ཀྑུ་ནོ ཨ་པྤ་ཧཱི་ནོ ཧོ་ཏི.
དྷ་མྨེཏི པ་རི་ཡ་ཏྟི་དྷ་མྨེ ཙ པ་ཊི་ཝེ་དྷ་དྷ་མྨེ ཙ. པ་རི་ཡ་ཏྟི་དྷ་མྨེ ཀ་ངྑ་མཱ་ནོ ‘‘ཏེ་པི་ཊ་ཀཾ བུ་དྡྷ་ཝ་ཙ་ནཾ ཙ་ཏུ་རཱ་སཱི་ཏི་དྷ་མྨ་ཀྑ་ནྡྷ་ས་ཧ་སྶཱ་ནཱི་ཏི ཝ་ད་ནྟི, ཨ་ཏྠི ནུ ཁོ ཨེ་ཏཾ ན་ཏྠཱི’’ཏི ཀ་ངྑ་ཏི. པ་ཊི་ཝེ་དྷ་དྷ་མྨེ ཀ་ངྑ་མཱ་ནོ ‘‘ཝི་པ་སྶ་ནཱ་ནི་སྶ་ནྡོ མ་གྒོ ནཱ་མ, མ་གྒ་ནི་སྶ་ནྡཾ ཕ་ལཾ ནཱ་མ, ས་བྦ་ས་ངྑཱ་ར་པ་ཊི་ནི་སྶ་གྒོ ནི་བྦཱ་ནཾ ནཱ་མཱ་ཏི ཝ་ད་ནྟི, ཏཾ ཨ་ཏྠི ནུ ཁོ ན་ཏྠཱི’’ཏི ཀ་ངྑ་ཏི. ས་ངྒྷེ ཀ་ངྑ་ཏཱིཏི ‘‘ཨུ་ཛུ་པྤ་ཊི་པ་ནྣོ’’ཏི་ཨཱ་དཱི་ནཾ པ་དཱ་ནཾ ཝ་སེ་ན ‘‘ཨེ་ཝ་རཱུ་པཾ པ་ཊི་པ་དཾ པ་ཊི་པ་ནྣོ ཙ་ཏྟཱ་རོ མ་གྒ་ཊྛཱ ཙ་ཏྟཱ་རོ ཕ་ལ་ཊྛཱ་ཏི ཨ་ཊྛ་ནྣཾ པུ་གྒ་ལཱ་ནཾ ས་མཱུ་ཧ་བྷཱུ་ཏོ ས་ངྒྷོ ནཱ་མ ཨ་ཏྠི ནུ ཁོ ན་ཏྠཱི’’ཏི ཀ་ངྑ་ཏི. སི་ཀྑཱ་ཡ ཀ་ངྑ་མཱ་ནོ ‘‘ཨ་དྷི་སཱི་ལ་སི་ཀྑཱ ནཱ་མ ཨ་དྷི་ཙི་ཏྟ་ཨ་དྷི་པ་ཉྙཱ་སི་ཀྑཱ ནཱ་མཱ་ཏི ཝ་ད་ནྟི, སཱ ཨ་ཏྠི ནུ ཁོ ན་ཏྠཱི’’ཏི ཀ་ངྑ་ཏི. ཨ་ཡཾ པ་ཉྩ་མོཏི ཨ་ཡཾ ས་བྲ་ཧྨ་ཙཱ་རཱི་སུ ཀོ་པ་ས་ངྑཱ་ཏོ པ་ཉྩ་མོ ཙི་ཏྟ་སྶ ཐ་དྡྷ་བྷཱ་ཝོ ཀ་ཙ་ཝ་ར་བྷཱ་ཝོ ཁཱ་ཎུ་ཀ་བྷཱ་ཝོ.
༦. ཝི་ནི་བ་ནྡྷ་སུ་ཏྟ་ཝ་ཎྞ་ནཱ
༢༠༦. ཚ་ཊྛེ ཙེ་ཏ་སོ་ཝི་ནི་བ་ནྡྷཱཏི ཙི་ཏྟཾ ཝི་ནི་བ་ནྡྷི་ཏྭཱ མུ་ཊྛི་ཡཾ ཀ་ཏྭཱ ཝི་ཡ ག་ཎྷ་ནྟཱི་ཏི ཙེ་ཏ་སོ་ཝི་ནི་བ་ནྡྷཱ. ཀཱ་མེཏི ཝ་ཏྠུ་ཀཱ་མེ་པི ཀི་ལེ་ས་ཀཱ་མེ་པི. ཀཱ་ཡེཏི ཨ་ཏྟ་ནོ ཀཱ་ཡེ. རཱུ་པེཏི བ་ཧི་དྡྷཱ་རཱུ་པེ. ཡཱ་ཝ་ད་ཏྠནྟི ཡ་ཏྟ་ཀཾ ཨི་ཙྪ་ཏི, ཏ་ཏྟ་ཀཾ. ཨུ་ད་རཱ་ཝ་དེ་ཧ་ཀནྟི ཨུ་ད་ར་པཱུ་རཾ. ཏ་ཉྷི ཨུ་ད་རཾ ཨ་ཝ་དེ་ཧ་ན་ཏོ ཨུ་ད་རཱ་ཝ་དེ་ཧ་ཀ་ནྟི ཝུ་ཙྩ་ཏི. སེ་ཡྻ་སུ་ཁནྟི མ་ཉྩ་པཱི་ཋ་སུ་ཁཾ, ཨུ་ཏུ་སུ་ཁཾ ཝཱ. པ་སྶ་སུ་ཁནྟི ཡ་ཐཱ ས་མྤ་རི་ཝ་ཏྟ་ཀཾ ས་ཡ་ནྟ་སྶ ད་ཀྑི་ཎ་པ་སྶ ཝཱ་མ་པ་སྶཱ་ནཾ སུ་ཁཾ ཧོ་ཏི, ཨེ་ཝཾ ཨུ་པྤ་ནྣ་སུ་ཁཾ. མི་དྡྷ་སུ་ཁནྟི ནི་དྡཱ་སུ་ཁཾ. ཨ་ནུ་ཡུ་ཏྟོཏི ཡུ་ཏྟ་པྤ་ཡུ་ཏྟོ ཝི་ཧ་ར་ཏི. པ་ཎི་དྷཱ་ཡཱཏི པ་ཏྠ་ཡི་ཏྭཱ. སཱི་ལེ་ནཱཏི་ཨཱ་དཱི་སུ སཱི་ལནྟི ཙ་ཏུ་པཱ་རི་སུ་དྡྷི་སཱི་ལཾ. ཝ་ཏནྟི ཝ་ཏ་ས་མཱ་དཱ་ནཾ. ཏ་པོཏི ཏ་པ་ཙ་ར་ཎཾ. བྲ་ཧྨ་ཙ་རི་ཡནྟི མེ་ཐུ་ན་ཝི་ར་ཏི. དེ་ཝོ ཝཱ བྷ་ཝི་སྶཱ་མཱིཏི མ་ཧེ་ས་ཀྑ་དེ་ཝོ ཝཱ བྷ་ཝི་སྶཱ་མི. དེ་ཝ་ཉྙ་ཏ་རོ ཝཱཏི ཨ་པྤེ་ས་ཀྑ་དེ་ཝེ་སུ ཝཱ ཨ་ཉྙ་ཏ་རོ་ཏི.
༧-༨. ཡཱ་གུ་སུ་ཏྟཱ་དི་ཝ་ཎྞ་ནཱ
༢༠༧-༢༠༨. ས་ཏྟ་མེ ཝཱ་ཏཾ ཨ་ནུ་ལོ་མེ་ཏཱིཏི ཝཱ་ཏཾ ཨ་ནུ་ལོ་མེ་ཏྭཱ ཧ་ར་ཏི. ཝ་ཏྠིཾ སོ་དྷེ་ཏཱིཏི དྷ་མ་ནི་ཡོ སུ་དྡྷཱ ཀ་རོ་ཏི. ཨཱ་མཱ་ཝ་སེ་སཾ པཱ་ཙེ་ཏཱིཏི ས་ཙེ ཨཱ་མཱ་ཝ་སེ་ས་ཀཾ ཧོ་ཏི, ཏཾ པཱ་ཙེ་ཏི. ཨ་ཊྛ་མེ ཨ་ཙ་ཀྑུ་སྶནྟི ན ཙ་ཀྑཱུ་ནཾ ཧི་ཏཾ, ཙ་ཀྑུཾ ཝི་སུ་དྡྷཾ ན ཀ་རོ་ཏི.
༩. གཱི་ཏ་སྶ་ར་སུ་ཏྟ་ཝ་ཎྞ་ནཱ
༢༠༩. ན་ཝ་མེ ཨཱ་ཡ་ཏ་ཀེ་ནཱཏི དཱི་གྷེ་ན, པ་རི་པུ་ཎྞ་པ་ད་བྱ་ཉྫ་ན་ཀཾ གཱ་ཐཱ་ཝ་ཏྟ་ཉྩ ཝི་ནཱ་སེ་ཏྭཱ པ་ཝ་ཏྟེ་ན. ས་ར་ཀུ་ཏྟི་མྤི ནི་ཀཱ་མ་ཡ་མཱ་ན་སྶཱཏི ཨེ་ཝཾ གཱི་ཏ་སྶ་རོ ཀཱ་ཏ་བྦོ་ཏི ས་ར་ཀི་རི་ཡཾ པ་ཏྠ་ཡ་མཱ་ན་སྶ. ས་མཱ་དྷི་སྶ བྷ་ངྒོ ཧོ་ཏཱིཏི ས་མ་ཐ་ཝི་པ་སྶ་ནཱ་ཙི་ཏྟ་སྶ ཝི་ནཱ་སོ ཧོ་ཏི.
༡༠. མུ་ཊྛ་སྶ་ཏི་སུ་ཏྟ་ཝ་ཎྞ་ནཱ
༢༡༠. ད་ས་མེ དུ་ཀྑཾ སུ་པ་ཏཱིཏི ནཱ་ནཱ་ཝི་དྷཾ སུ་པི་ནཾ པ་སྶ་ནྟོ དུ་ཀྑཾ སུ་པ་ཏི. དུ་ཀྑཾ པ་ཊི་བུ་ཛ྄ཛྷ་ཏཱིཏི པ་ཊི་བུ་ཛ྄ཛྷ་ནྟོ་པི ཨུ་ཏྟ་སི་ཏྭཱ ས་ལོ་མ་ཧཾ་སོ པ་ཊི་བུ་ཛ྄ཛྷ་ཏི. ཨི་མ་སྨིཾ སུ་ཏྟེ ས་ཏི་ས་མྤ་ཛ་ཉྙཾ མི་སྶ་ཀཾ ཀ་ཐི་ཏཾ.
ཀི་མི་ལ་ཝ་གྒོ པ་ཋ་མོ.
(༢༢) ༢. ཨ་ཀྐོ་ས་ཀ་ཝ་གྒོ
༡. ཨ་ཀྐོ་ས་ཀ་སུ་ཏྟ་ཝ་ཎྞ་ནཱ
༢༡༡. དུ་ཏི་ཡ་སྶ པ་ཋ་མེ ཨ་ཀྐོ་ས་ཀ་པ་རི་བྷཱ་ས་ཀོཏི ད་ས་ཧི ཨ་ཀྐོ་ས་ཝ་ཏྠཱུ་ཧི ཨ་ཀྐོ་ས་ཀོ, བྷ་ཡ་ད་སྶ་ནེ་ན པ་རི་བྷཱ་ས་ཀོ. ཚི་ནྣ་པ་རི་པ་ནྠོཏི ལོ་ཀུ་ཏྟ་ར་པ་རི་པ་ནྠ་སྶ ཚི་ནྣ་ཏྟཱ ཚི་ནྣ་པ་རི་པ་ནྠོ. རོ་གཱ་ཏ་ངྐནྟི རོ་གོ་ཡེ་ཝ ཀི་ཙྪ་ཛཱི་ཝི་ཀཱ་ཡཱ་ཝ་ཧ་ན་ཏོ རོ་གཱ་ཏ་ངྐོ ནཱ་མ.
༢. བྷ་ཎྜ་ན་ཀཱ་ར་ཀ་སུ་ཏྟ་ཝ་ཎྞ་ནཱ
༢༡༢. དུ་ཏི་ཡེ ཨ་དྷི་ཀ་ར་ཎ་ཀཱ་ར་ཀོཏི ཙ་ཏུ་ནྣཾ ཨ་དྷི་ཀ་ར་ཎཱ་ནཾ ཨ་ཉྙ་ཏ་ར་སྶ ཀཱ་ར་ཀོ. ཨ་ན་དྷི་ག་ཏནྟི པུ་བྦེ ཨ་པྤ་ཏྟ་ཝི་སེ་སཾ.
༣. སཱི་ལ་སུ་ཏྟ་ཝ་ཎྞ་ནཱ
༢༡༣. ཏ་ཏི་ཡེ དུ་སྶཱི་ལོཏི ཨ་སཱི་ལོ ནི་སྶཱི་ལོ. སཱི་ལ་ཝི་པ་ནྣོཏི ཝི་པ་ནྣ་སཱི་ལོ བྷི་ནྣ་སཾ་ཝ་རོ. པ་མཱ་དཱ་དྷི་ཀ་ར་ཎནྟི པ་མཱ་ད་ཀཱ་ར་ཎཱ. ཨི་ད་ཉྩ སུ་ཏྟཾ ག་ཧ་ཊྛཱ་ནཾ ཝ་སེ་ན ཨཱ་ག་ཏཾ, པ་བྦ་ཛི་ཏཱ་ན་མྤི པ་ན ལ་བྦྷ་ཏེ་ཝ. ག་ཧ་ཊྛོ ཧི ཡེ་ན ཡེ་ན སི་པྤ་ཊྛཱ་ནེ་ན ཛཱི་ཝི་ཀཾ ཀ་པྤེ་ཏི, ཡ་དི ཀ་སི་ཡཱ, ཡ་དི ཝ་ཎི་ཛྫཱ་ཡ, པཱ་ཎཱ་ཏི་པཱ་ཏཱ་དི་ཝ་སེ་ན པ་མ་ཏྟོ ཏཾ ཏཾ ཡ་ཐཱ་ཀཱ་ལཾ ས་མྤཱ་དེ་ཏུཾ ན ས་ཀྐོ་ཏི, ཨ་ཐ་སྶ མཱུ་ལཾ ཝི་ན་སྶ་ཏི. མཱ་གྷཱ་ཏ་ཀཱ་ལེ་པི པཱ་ཎཱ་ཏི་པཱ་ཏཾ ཨ་དི་ནྣཱ་དཱ་ནཱ་དཱི་ནི ཙ ཀ་རོ་ནྟོ ད་ཎྜ་ཝ་སེ་ན མ་ཧ་ཏིཾ བྷོ་ག་ཛཱ་ནིཾ ནི་ག་ཙྪ་ཏི. པ་བྦ་ཛི་ཏོ དུ་སྶཱི་ལོ པ་མཱ་ད་ཀཱ་ར་ཎཱ སཱི་ལ་ཏོ བུ་དྡྷ་ཝ་ཙ་ན་ཏོ ཛྷཱ་ན་ཏོ ས་ཏྟ་ཨ་རི་ཡ་དྷ་ན་ཏོ ཙ ཛཱ་ནིཾ ནི་ག་ཙྪ་ཏི. ག་ཧ་ཊྛ་སྶ ‘‘ཨ་སུ་ཀོ ཨ་སུ་ཀ་ཀུ་ལེ ཛཱ་ཏོ དུ་སྶཱི་ལོ པཱ་པ་དྷ་མྨོ པ་རི་ཙྩ་ཏྟ་ཨི་དྷ་ལོ་ཀ་པ་ར་ལོ་ཀོ ས་ལཱ་ཀ་བྷ་ཏྟ་མ་ཏྟ་མྤི ན དེ་ཏཱི’’ཏི ཙ་ཏུ་པ་རི་ས་མ་ཛ྄ཛྷེ པཱ་པ་ཀོ ཀི་ཏྟི་ས་དྡོ ཨ་བྦྷུ་གྒ་ཙྪ་ཏི. པ་བྦ་ཛི་ཏ་སྶ ‘‘ཨ་སུ་ཀོ ནཱ་ས་ཀྑི སཱི་ལཾ ར་ཀྑི་ཏུཾ བུ་དྡྷ་ཝ་ཙ་ནཾ ག་ཧེ་ཏུཾ, ཝེ་ཛྫ་ཀ་མྨཱ་དཱི་ཧི ཛཱི་ཝ་ཏི, ཚ་ཧི ཨ་གཱ་ར་ཝེ་ཧི ས་མ་ནྣཱ་ག་ཏོ’’ཏི ཨེ་ཝཾ ཨ་བྦྷུ་གྒ་ཙྪ་ཏི.
ཨ་ཝི་སཱ་ར་དོཏི ག་ཧ་ཊྛོ ཏཱ་ཝ ‘‘ཨ་ཝ་སྶཾ བ་ཧཱུ་ནཾ ས་ནྣི་པཱ་ཏ་ཊྛཱ་ནེ ཀོ་ཙི མ་མ ཀ་མྨཾ ཛཱ་ནི་སྶ་ཏི, ཨ་ཐ མཾ ནི་གྒ་ཎྷི་སྶ་ནྟི ཝཱ, རཱ་ཛ་ཀུ་ལ་སྶ ཝཱ ད་སྶ་ནྟཱི’’ཏི ས་བྷ་ཡོ ཨུ་པ་ས་ངྐ་མ་ཏི. མ་ངྐུ་བྷཱུ་ཏོ ཙ པ་ཏི་ཏ་ཀྑ་ནྡྷོ ཨ་དྷོ་མུ་ཁོ ཨ་ངྒུ་ཊྛ་ཀེ་ན བྷཱུ་མིཾ ཀ་ས་ནྟོ ནི་སཱི་ད་ཏི, ཝི་སཱ་ར་དོ ཧུ་ཏྭཱ ཀ་ཐེ་ཏུཾ ན ས་ཀྐོ་ཏི. པ་བྦ་ཛི་ཏོ་པི ‘‘བ་ཧཱུ བྷི་ཀྑཱུ ས་ནྣི་པ་ཏི་ཏཱ, ཨ་ཝ་སྶཾ ཀོ་ཙི མ་མ ཀ་མྨཾ ཛཱ་ནི་སྶ་ཏི, ཨ་ཐ མེ ཨུ་པོ་ས་ཐ་མྤི པ་ཝཱ་ར་ཎ་མྤི ཋ་པེ་ཏྭཱ སཱ་མ་ཉྙཱ ཙཱ་ཝེ་ཏྭཱ ནི་ཀྐ་ཌྜྷི་སྶ་ནྟཱི’’ཏི ས་བྷ་ཡོ ཨུ་པ་ས་ངྐ་མ་ཏི, ཝི་སཱ་ར་དོ ཧུ་ཏྭཱ ཀ་ཐེ་ཏུཾ ན ས་ཀྐོ་ཏི. ཨེ་ཀ་ཙྩོ པ་ན དུ་སྶཱི་ལོ་པི ད་པྤི་ཏོ ཝི་ཡ ཙ་ར་ཏི, སོ་པི ཨ་ཛ྄ཛྷཱ་ས་ཡེ་ན མ་ངྐུ ཧོ་ཏི་ཡེ་ཝ.
ས་མྨཱུ་ལ༹ྷོ ཀཱ་ལཾ ཀ་རོ་ཏཱིཏི ཏ་སྶ ཧི མ་ར་ཎ་མ་ཉྩེ ནི་པ་ནྣ་སྶ དུ་སྶཱི་ལ་ཀ་མྨཾ ས་མཱ་དཱ་ཡ ཝ་ཏྟི་ཏ་ཊྛཱ་ནཾ ཨཱ་པཱ་ཐཾ ཨཱ་ག་ཙྪ་ཏི. སོ ཨུ་མྨཱི་ལེ་ཏྭཱ ཨི་དྷ་ལོ་ཀཾ པ་སྶ་ཏི, ནི་མྨཱི་ལེ་ཏྭཱ པ་ར་ལོ་ཀཾ. ཏ་སྶ ཙ་ཏྟཱ་རོ ཨ་པཱ་ཡཱ ཨུ་པ་ཊྛ་ཧ་ནྟི, ས་ཏྟི་ས་ཏེ་ན སཱི་སེ པ་ཧ་རི་ཡ་མཱ་ནོ ཝི་ཡ ཧོ་ཏི. སོ ‘‘ཝཱ་རེ་ཐ ཝཱ་རེ་ཐཱ’’ཏི ཝི་ར་ཝ་ནྟོ མ་ར་ཏི. ཏེ་ན ཝུ་ཏྟཾ – ‘‘ས་མྨཱུ་ལ༹ྷོ ཀཱ་ལཾ ཀ་རོ་ཏཱི’’ཏི. པ་ཉྩ་མ་པ་དཾ ཨུ་ཏྟཱ་ན་མེ་ཝ. ཨཱ་ནི་སཾ་ས་ཀ་ཐཱ ཝུ་ཏྟ་ཝི་པ་རི་ཡཱ་ཡེ་ན ཝེ་དི་ཏ་བྦཱ.
༤. བ་ཧུ་བྷཱ་ཎི་སུ་ཏྟ་ཝ་ཎྞ་ནཱ
༢༡༤. ཙ་ཏུ་ཏྠེ བ་ཧུ་བྷཱ་ཎི་སྨིནྟི པ་ཉྙཱ་ཡ ཨ་པ་རི་ཙྪི་ནྡི་ཏྭཱ བ་ཧུཾ བྷ་ཎ་ནྟེ. མ་ནྟ་བྷཱ་ཎི་སྨིནྟི མ་ནྟཱ ཝུ་ཙྩ་ཏི པ་ཉྙཱ, ཏཱ་ཡ པ་རི་ཙྪི་ནྡི་ཏྭཱ བྷ་ཎ་ནྟེ.
༥. པ་ཋ་མ་ཨ་ཀྑ་ནྟི་སུ་ཏྟ་ཝ་ཎྞ་ནཱ
༢༡༥. པ་ཉྩ་མེ ཝེ་ར་བ་ཧུ་ལོཏི པུ་གྒ་ལ་ཝེ་རེ་ན་པི ཨ་ཀུ་ས་ལ་ཝེ་རེ་ན་པི བ་ཧུ་ཝེ་རོ. ཝ་ཛྫ་བ་ཧུ་ལོཏི དོ་ས་བ་ཧུ་ལོ.
༦. དུ་ཏི་ཡ་ཨ་ཀྑ་ནྟི་སུ་ཏྟ་ཝ་ཎྞ་ནཱ
༢༡༦. ཚ་ཊྛེ ལུ་དྡོཏི དཱ་རུ་ཎོ ཀ་ཀྑ་ལོ༹. ཝི་པྤ་ཊི་སཱ་རཱིཏི མ་ངྐུ་བྷཱ་ཝེ་ན ས་མ་ནྣཱ་ག་ཏོ.
༧.པ་ཋ་མ་ཨ་པཱ་སཱ་དི་ཀ་སུ་ཏྟ་ཝ་ཎྞ་ནཱ
༢༡༧. ས་ཏྟ་མེ ཨ་པཱ་སཱ་དི་ཀེཏི ཨ་པཱ་སཱ་དི་ཀེ་ཧི ཀཱ་ཡ་ཀ་མྨཱ་དཱི་ཧི ས་མ་ནྣཱ་ག་ཏེ. པཱ་སཱ་དི་ཀེཏི པ་སཱ་དཱ་ཝ་ཧེ པ་རི་སུ་དྡྷ་ས་མཱ་ཙཱ་རེ. ཨ་ཊྛ་མ་ན་ཝ་མཱ་ནི ཨུ་ཏྟཱ་ན་ཏྠཱ་ནེ་ཝ.
༡༠. མ་དྷུ་རཱ་སུ་ཏྟ་ཝ་ཎྞ་ནཱ
༢༢༠. ད་ས་མེ པ་ཉྩི་མེ, བྷི་ཀྑ་ཝེ, ཨཱ་དཱི་ན་ཝཱ མ་དྷུ་རཱ་ཡནྟི ཨེ་ཀཾ ས་མ་ཡཾ བྷ་ག་ཝཱ བྷི་ཀྑུ་ས་ངྒྷ་པ་རི་ཝུ་ཏོ ཙཱ་རི་ཀཾ ཙ་ར་མཱ་ནོ མ་དྷུ་རཱ་ན་ག་རཾ ས་མྤཱ་པུ་ཎི་ཏྭཱ ཨ་ནྟོ་ན་ག་རཾ པ་ཝི་སི་ཏུཾ ཨཱ་ར་བྷི. ཨ་ཐེ་ཀཱ མི་ཙྪཱ་དི་ཊྛི་ཀཱ ཡ་ཀྑི་ནཱི ཨ་ཙེ་ལཱ ཧུ་ཏྭཱ དྭེ ཧ་ཏྠེ པ་སཱ་རེ་ཏྭཱ ཛི་ཝ྄ཧཾ ནི་ལླཱ་ལེ་ཏྭཱ ད་ས་བ་ལ་སྶ པུ་ར་ཏོ ཨ་ཊྛཱ་སི. ས་ཏྠཱ ཨ་ནྟོ་ན་ག་རཾ ཨ་པྤ་ཝི་སི་ཏྭཱ ཏ་ཏོ་ཝ ནི་ཀྑ་མི་ཏྭཱ ཝི་ཧཱ་རཾ ཨ་ག་མཱ་སི. མ་ཧཱ་ཛ་ནོ ཁཱ་ད་ནཱི་ཡ་བྷོ་ཛ་ནཱི་ཡ་ཉྩེ་ཝ ས་ཀྐཱ་ར་ས་མྨཱ་ན་ཉྩ ཨཱ་དཱ་ཡ ཝི་ཧཱ་རཾ ག་ནྟྭཱ བུ་དྡྷ་པྤ་མུ་ཁ་སྶ བྷི་ཀྑུ་ས་ངྒྷ་སྶ དཱ་ནཾ ཨ་དཱ་སི. ས་ཏྠཱ ཏ་སྶ ན་ག་ར་སྶ ནི་གྒ་ཎྷ་ན་ཏྠཱ་ཡ ཨི་མཾ སུ་ཏྟཾ ཨཱ་ར་བྷི. ཏ་ཏྠ ཝི་ས་མཱཏི ན ས་མ་ཏ་ལཱ. བ་ཧུ་ར་ཛཱཏི ཝཱ་ཏ་པ་ཧ་ར་ཎ་ཀཱ་ལེ ཨུ་དྡྷ་ཏེ་ན ར་ཛ་ཀྑ་ནྡྷེ་ན པ་རི་ཡོ་ན་དྡྷཱ ཝི་ཡ ཧོ་ཏི. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
ཨ་ཀྐོ་ས་ཀ་ཝ་གྒོ དུ་ཏི་ཡོ.
(༢༣) ༣. དཱི་གྷ་ཙཱ་རི་ཀ་ཝ་གྒོ
༡. པ་ཋ་མ་དཱི་གྷ་ཙཱ་རི་ཀ་སུ་ཏྟ་ཝ་ཎྞ་ནཱ
༢༢༡. ཏ་ཏི་ཡ་སྶ པ་ཋ་མེ ཨ་ན་ཝ་ཏྠ་ཙཱ་རི་ཀནྟི ཨ་ཝ་ཝ་ཏྠི་ཏ་ཙཱ་རི་ཀཾ. སུ་ཏཾ ན པ་རི་ཡོ་ད་པེ་ཏཱིཏི ཡ་མྤི་སྶ སུ་ཏཾ ཨ་ཏྠི, ཏཾ པ་རི་ཡོ་ད་པེ་ཏུཾ ན ས་ཀྐོ་ཏི. སུ་ཏེ་ནེ་ཀ་ཙྩེ་ན ཨ་ཝི་སཱ་ར་དོ ཧོ་ཏཱིཏི ཐོ་ཀ་ཐོ་ཀེ་ན སུ་ཏེ་ན ཝི་ཛྫ་མཱ་ནེ་ནཱ་པི ཉཱ་ཎེ་ན སོ་མ་ན་སྶ་པྤ་ཏྟོ ན ཧོ་ཏི. ས་མ་ཝ་ཏྠ་ཙཱ་རེཏི ས་མ་ཝ་ཏྠི་ཏ་ཙཱ་རེ. དུ་ཏི་ཡཾ ཨུ་ཏྟཱ་ན་ཏྠ་མེ་ཝ.
༣-༤. ཨ་ཏི་ནི་ཝཱ་ས་སུ་ཏྟཱ་དི་ཝ་ཎྞ་ནཱ
༢༢༣-༢༢༤. ཏ་ཏི་ཡེ བ་ཧུ་བྷ་ཎྜོཏི བ་ཧུ་པ་རི་ཀྑཱ་རོ. བ་ཧུ་བྷེ་ས་ཛྫོཏི ས་པྤི་ན་ཝ་ནཱི་ཏཱ་དཱི་ནཾ བ་ཧུ་ཏཱ་ཡ བ་ཧུ་བྷེ་ས་ཛྫོ. བྱ་ཏྟོཏི བྱཱ་ས་ཏྟོ. སཾ་ས་ཊྛོཏི པ་ཉྩ་ཝི་དྷེ་ན སཾ་ས་གྒེ་ན སཾ་ས་ཊྛོ ཧུ་ཏྭཱ. ཨ་ན་ནུ་ལོ་མི་ཀེ་ནཱཏི སཱ་ས་ན་སྶ ཨ་ན་ནུ་ཙྪ་ཝི་ཀེ་ན. ཙ་ཏུ་ཏྠེ ཝ་ཎྞ་མ་ཙྪ་རཱིཏི གུ་ཎ་མ་ཙྪ་རཱི. དྷ་མྨ་མ་ཙྪ་རཱིཏི པ་རི་ཡ་ཏྟི་མ་ཙྪ་རཱི.
༥-༦. ཀུ་ལཱུ་པ་ཀ་སུ་ཏྟཱ་དི་ཝ་ཎྞ་ནཱ
༢༢༥-༢༢༦. པ་ཉྩ་མེ ཨ་ནཱ་མ་ནྟ་ཙཱ་རེ ཨཱ་པ་ཛྫ་ཏཱིཏི ‘‘ནི་མ་ནྟི་ཏོ ས་བྷ་ཏྟོ ས་མཱ་ནོ ས་ནྟཾ བྷི་ཀྑུཾ ཨ་ནཱ་པུ་ཙྪཱ པུ་རེ་བྷ་ཏྟཾ ཝཱ པ་ཙྪཱ་བྷ་ཏྟཾ ཝཱ ཀུ་ལེ་སུ ཙཱ་རི་ཏྟཾ ཨཱ་པ་ཛྫེ་ཡྻཱ’’ཏི སི་ཀྑཱ་པ་དེ (པཱ་རཱ. ༢༩༤) ཝུ་ཏྟཾ ཨཱ་པ་ཏྟིཾ ཨཱ་པ་ཛྫ་ཏི. ར་ཧོ ནི་ས་ཛྫཱ་ཡཱཏི་ཨཱ་དཱི་ནི་པི ཏེ་སཾ ཏེ་སཾ སི་ཀྑཱ་པ་དཱ་ནཾ ཝ་སེ་ན ཝེ་དི་ཏ་བྦཱ་ནི. ཚ་ཊྛེ ཨ་ཏི་ཝེ་ལནྟི ཨ་ཏི་ཀྐ་ནྟ་པ་མཱ་ཎ་ཀཱ་ལཾ. ས་ཏྟ་མཾ ཨུ་ཏྟཱ་ན་མེ་ཝ.
༨. ཨུ་སྶཱུ་ར་བྷ་ཏྟ་སུ་ཏྟ་ཝ་ཎྞ་ནཱ
༢༢༨. ཨ་ཊྛ་མེ ཨུ་སྶཱུ་ར་བྷ་ཏྟེཏི ཨ་ཏི་དི་ཝཱ་པ་ཙ་ན་བྷ་ཏྟེ. ན ཀཱ་ལེ་ན པ་ཊི་པཱུ་ཛེ་ནྟཱིཏི ཡཱ་གུ་ཀཱ་ལེ ཡཱ་གུཾ, ཁ་ཛྫ་ཀ་ཀཱ་ལེ ཁ་ཛྫ་ཀཾ, བྷོ་ཛ་ན་ཀཱ་ལེ བྷོ་ཛ་ནཾ ཨ་པ་ཙ་ནྟཱ ཡུ་ཏྟ་པྤ་ཡུ་ཏྟ་ཀཱ་ལ་སྶ ཨ་ཏི་ནཱ་མི་ཏ་ཏྟཱ ན ཀཱ་ལེ་ན པ་ཊི་པཱུ་ཛེ་ནྟི, ཨ་ཏྟ་ནོ ཙི་ཏྟེ་ནེ་ཝ དེ་ནྟི ནཱ་མ. ཏ་ཏོ ཏེ་པི ཏེ་སུ ཨ་ཏྟ་ནོ གེ་ཧཾ ཨཱ་ག་ཏེ་སུ ཏ་ཐེ་ཝ ཀ་རོ་ནྟི. ཀུ་ལ་པ་ཝེ་ཎི་ཡཱ ཨཱ་ག་ཏཱ བ་ལི་པ་ཊི་གྒཱ་ཧི་ཀཱ དེ་ཝ་ཏཱ་པི ཡུ་ཏྟ་པྤ་ཡུ་ཏྟ་ཀཱ་ལེ་ན ལཱ་བྷཾ ལ་བྷ་མཱ་ནཱ་ཡེ་ཝ ར་ཀྑ་ནྟི གོ་པ་ཡ་ནྟི པཱི་ལ༹ཾ ཨ་ཀ་ཏྭཱ. ཨ་ཀཱ་ལེ ལ་བྷ་མཱ་ནཱ པ་ན ‘‘ཨི་མེ ཨ་མྷེ་སུ ཨ་ནཱ་ད་རཱ’’ཏི ཨཱ་ར་ཀྑཾ ན ཀ་རོ་ནྟི.
ས་མ་ཎ་བྲཱ་ཧྨ་ཎཱ་པི ‘‘ཨེ་ཏེ་སཾ གེ་ཧེ བྷོ་ཛ་ན་ཝེ་ལཱ་ཡ བྷོ་ཛ་ནཾ ན ཧོ་ཏི, ཋི་ཏ་མ་ཛ྄ཛྷ་ནྷི་ཀེ དེ་ནྟཱི’’ཏི མ་ངྒ་ལཱ་མ་ངྒ་ལེ་སུ ཀཱ་ཏ་བྦཾ ན ཀ་རོ་ནྟི. ཝི་མུ་ཁཱ ཀ་མྨཾ ཀ་རོ་ནྟཱིཏི ‘‘པཱ་ཏོ ཀི་ཉྩི ན ལ་བྷཱ་མ, ཁུ་དཱ་ཡ པ་ཊི་པཱི་ལི༹་ཏཱ ཀ་མྨཾ ཀཱ་ཏུཾ ན ས་ཀྐོ་མཱ’’ཏི ཀ་མྨཾ ཝི་སྶ་ཛྫེ་ཏྭཱ ནི་སཱི་ད་ནྟི. ཨ་ནོ་ཛ་ཝ་ནྟཾ ཧོ་ཏཱིཏི ཨ་ཀཱ་ལེ བྷུ་ཏྟཾ ཨོ་ཛཾ ཧ་རི་ཏུཾ ན ས་ཀྐོ་ཏི. སུ་ཀྐ་པ་ཀྑོ ཝུ་ཏྟ་ཝི་པ་ལླཱ་སེ་ན ཝེ་དི་ཏ་བྦོ.
༩. པ་ཋ་མ་ཀ་ཎྷ་ས་པྤ་སུ་ཏྟ་ཝ་ཎྞ་ནཱ
༢༢༩. ན་ཝ་མེ ས་བྷཱི་རཱུཏི ས་ནི་དྡོ མ་ཧཱ་ནི་དྡཾ ནི་དྡཱ་ཡ་ཏི. ས་པྤ་ཊི་བྷ་ཡོཏི ཏཾ ནི་སྶཱ་ཡ བྷ་ཡཾ ཨུ་པྤ་ཛྫ་ཏི, ཏ་སྨཱ ས་པྤ་ཊི་བྷ་ཡོ. མི་ཏྟ་དུ་བྦྷཱིཏི པཱ་ན་བྷོ་ཛ་ན་དཱ་ཡ་ཀ་མྤི མི་ཏྟཾ དུ་བྦྷ་ཏི ཧིཾ་ས་ཏི. མཱ་ཏུ་གཱ་མེ་པི ཨེ་སེ་ཝ ན་ཡོ.
༡༠. དུ་ཏི་ཡ་ཀ་ཎྷ་ས་པྤ་སུ་ཏྟ་ཝ་ཎྞ་ནཱ
༢༣༠. ད་ས་མེ གྷོ་ར་ཝི་སོཏི ཀ་ཀྑ་ལ༹་ཝི་སོ. དུ་ཛྫི་ཝ྄ཧོཏི དྭི་དྷཱ བྷི་ནྣ་ཛི་ཝ྄ཧོ. གྷོ་ར་ཝི་ས་ཏཱཏི གྷོ་ར་ཝི་ས་ཏཱ་ཡ. སེ་ས་དྭ་ཡེ་པི ཨེ་སེ་ཝ ན་ཡོ.
དཱི་གྷ་ཙཱ་རི་ཀ་ཝ་གྒོ ཏ་ཏི་ཡོ.
(༢༤) ༤. ཨཱ་ཝཱ་སི་ཀ་ཝ་གྒོ
༡. ཨཱ་ཝཱ་སི་ཀ་སུ་ཏྟ་ཝ་ཎྞ་ནཱ
༢༣༡. ཙ་ཏུ་ཏྠ་སྶ པ་ཋ་མེ ན ཨཱ་ཀ་པྤ་ས་མྤ་ནྣོཏི ས་མ་ཎཱ་ཀ་པྤེ་ན ས་མྤ་ནྣོ. ཨ་བྷཱ་ཝ་ནཱི་ཡོ ཧོ་ཏཱིཏི ཝ་ཌྜྷ་ནཱི་ཡོ ན ཧོ་ཏི. དུ་ཏི་ཡཾ ཨུ་ཏྟཱ་ན་མེ་ཝ.
༣. སོ་བྷ་ན་སུ་ཏྟ་ཝ་ཎྞ་ནཱ
༢༣༣. ཏ་ཏི་ཡེ པ་ཊི་བ་ལོཏི ཀཱ་ཡ་བ་ལེ་ན ཙ ཉཱ་ཎ་བ་ལེ་ན ཙ ས་མ་ནྣཱ་ག་ཏ་ཏྟཱ པ་ཊི་བ་ལོ.
༤. བ་ཧཱུ་པ་ཀཱ་ར་སུ་ཏྟ་ཝ་ཎྞ་ནཱ
༢༣༤. ཙ་ཏུ་ཏྠེ ཁ་ཎྜ་ཕུ་ལླནྟི པ་ཏི་ཏ་ཊྛཱ་ན་ཉྩ བྷི་ནྣ་ཊྛཱ་ན་ཉྩ. པ་ཊི་ས་ངྑ་རོ་ཏཱིཏི པ་ཊི་པཱ་ཀ་ཏི་ཀཾ ཀ་རོ་ཏི. ཨཱ་རོ་ཙེ་ཏཱིཏི ཨི་དཾ པ་ཝཱ་རི་ཏ་ཀུ་ལཱ་ནཾ ཝ་སེ་ན ཝུ་ཏྟཾ.
༥. ཨ་ནུ་ཀ་མྤ་སུ་ཏྟ་ཝ་ཎྞ་ནཱ
༢༣༥. པ་ཉྩ་མེ ཨ་དྷི་སཱི་ལེ་སཱུཏི པ་ཉྩ་སུ སཱི་ལེ་སུ. དྷ་མྨ་ད་སྶ་ནེ ནི་ཝེ་སེ་ཏཱིཏི ཙ་ཏུ་ས་ཙྩ་དྷ་མྨ་ད་སྶ་ནེ པ་ཏི་ཊྛཱ་པེ་ཏི. ཨ་ར་ཧ་གྒ་ཏནྟི ས་བྦ་ས་ཀྐཱ་རཱ་ནཾ ཨ་ར་ཧེ ར་ཏ་ན་ཏྟ་ཡེ་ཝ ག་ཏཾ, ཏཱི་སུ ཝ་ཏྠཱུ་སུ ག་རུ་ཙི་ཏྟཱི་ཀཱ་རཾ ཨུ་པ་ཊྛ་པེ་ཐཱ་ཏི ཨ་ཏྠོ. ཚ་ཊྛཾ ཨུ་ཏྟཱ་ན་མེ་ཝ.
༧. དུ་ཏི་ཡ་ཨ་ཝ་ཎྞཱ་ར་ཧ་སུ་ཏྟ་ཝ་ཎྞ་ནཱ
༢༣༧. ས་ཏྟ་མེ ཨཱ་ཝཱ་ས་པ་ལི་གེ་དྷཱིཏི ཨཱ་ཝཱ་སཾ བ་ལ་ཝ་གི་དྡྷི་ཝ་སེ་ན གི་ལི་ཏྭཱ ཝི་ཡ ཋི་ཏོ. སེ་སཾ ས་བྦཾ ཨུ་ཏྟཱ་ན་མེ་ཝཱ་ཏི.
ཨཱ་ཝཱ་སི་ཀ་ཝ་གྒོ ཙ་ཏུ་ཏྠོ.
(༢༥) ༥. དུ་ཙྩ་རི་ཏ་ཝ་གྒོ
༡. པ་ཋ་མ་དུ་ཙྩ་རི་ཏ་སུ་ཏྟ་ཝ་ཎྞ་ནཱ
༢༤༡. པ་ཉྩ་མ་སྶ པ་ཋ་མེ དུ་ཙྩ་རི་ཏེ སུ་ཙ་རི་ཏེཏི ཨི་དཾ ཨ་བྷེ་ད་ཏོ ཝུ་ཏྟཾ, ཀཱ་ཡ་དུ་ཙྩ་རི་ཏེཏི་ཨཱ་དི ཀཱ་ཡ་དྭཱ་རཱ་དཱི་ནཾ ཝ་སེ་ན བྷེ་ད་ཏོ. ས་དྡྷ་མྨཱཏི ད་ས་ཀུ་ས་ལ་ཀ་མྨ་པ་ཐ་དྷ་མྨ་ཏོ. ཨ་ས་དྡྷ་མྨེཏི ཨ་ཀུ་ས་ལ་ཀ་མྨ་པ་ཐ་ས་ངྑཱ་ཏེ ཨ་སྶ་དྡྷ་མྨེ.
༩. སི་ཝ་ཐི་ཀ་སུ་ཏྟ་ཝ་ཎྞ་ནཱ
༢༤༩. ན་ཝ་མེ སི་ཝ་ཐི་ཀཱ་ཡཱཏི སུ་སཱ་ནེ. ཨཱ་རོ་ད་ནཱཏི ཨཱ་རོ་ད་ན་ཊྛཱ་ནཾ. ཨ་སུ་ཙི་ནཱཏི ཛི་གུ་ཙྪ་ནཱི་ཡེ་ན.
༡༠. པུ་གྒ་ལ་པྤ་སཱ་ད་སུ་ཏྟ་ཝ་ཎྞ་ནཱ
༢༥༠. ད་ས་མེ པུ་གྒ་ལ་པྤ་སཱ་དེཏི ཨེ་ཀ་པུ་གྒ་ལ་སྨིཾ ཨུ་པྤ་ནྣ་པྤ་སཱ་དེ. ཨ་ནྟེ ནི་སཱི་དཱ་པེ་ཏཱིཏི བྷི་ཀྑཱུ་ནཾ ཨཱ་ས་ན་པ་རི་ཡ་ནྟེ ནི་སཱི་དཱ་པེ་ཏི. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
དུ་ཙྩ་རི་ཏ་ཝ་གྒོ པ་ཉྩ་མོ.
པ་ཉྩ་མ་པ་ཎྞཱ་ས་ཀཾ ནི་ཊྛི་ཏཾ.