༢. ཨཱ་ར་བྷ་ཏི་སུ་ཏྟ་ཝ་ཎྞ་ནཱ

༡༤༢. དུ་ཏི་ཡེ ཨཱ་ར་བྷ་ཏི ཙ ཝི་པྤ་ཊི་སཱ་རཱི ཙ ཧོ་ཏཱིཏི ཨཱ་པ་ཏྟི་ཝཱི་ཏི་ཀྐ་མ་ན་ཝ་སེ་ན ཨཱ་ར་བྷ་ཏི ཙེ་ཝ, ཏ་པྤ་ཙྩ་ཡཱ ཙ ཝི་པྤ་ཊི་སཱ་རཱི ཧོ་ཏི. ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིནྟི ཨ་ར་ཧ་ཏྟ་ས་མཱ་དྷི་ཉྩེ་ཝ ཨ་ར་ཧ་ཏྟ་ཕ་ལ་ཉཱ་ཎ་ཉྩ. ན་པྤ་ཛཱ་ནཱ་ཏཱིཏི ཨ་ན་དྷི་ག་ཏ་ཏྟཱ ན ཛཱ་ནཱ་ཏི. ཨཱ་ར་བྷ་ཏི ན ཝི་པྤ་ཊི་སཱ་རཱི ཧོ་ཏཱིཏི ཨཱ་པ་ཏྟིཾ ཨཱ་པ་ཛྫ་ཏི, ཝུ་ཊྛི་ཏ་ཏྟཱ པ་ན ན ཝི་པྤ་ཊི་སཱ་རཱི ཧོ་ཏི. ནཱ་ར་བྷ་ཏི ཝི་པྤ་ཊི་སཱ་རཱི ཧོ་ཏཱིཏི ས་ཀིཾ ཨཱ་པ་ཏྟིཾ ཨཱ་པ་ཛྫི་ཏྭཱ ཏ་ཏོ ཝུ་ཊྛཱ་ཡ པ་ཙྪཱ ཀི་ཉྩཱ་པི ནཱ་པ་ཛྫ་ཏི, ཝི་པྤ་ཊི་སཱ་རཾ པ་ན ཝི་ནོ་དེ་ཏུཾ ན ས་ཀྐོ་ཏི. ནཱ་ར་བྷ་ཏི ན ཝི་པྤ་ཊི་སཱ་རཱི ཧོ་ཏཱིཏི ན ཙེ་ཝ ཨཱ་པ་ཏྟིཾ ཨཱ་པ་ཛྫ་ཏི, ན ཙ ཝི་པྤ་ཊི་སཱ་རཱི ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ…པེ… ནི་རུ་ཛ྄ཛྷ་ནྟཱིཏི ཨ་ར་ཧ་ཏྟཾ པ་ན ཨ་པྤ་ཏྟོ ཧོ་ཏི. པ་ཉྩ་མ་ན་ཡེ་ན ཁཱི་ཎཱ་ས་ཝོ ཀ་ཐི་ཏོ.

ཨཱ་ར་མྦྷ་ཛཱཏི ཨཱ་པ་ཏྟི་ཝཱི་ཏི་ཀྐ་མ་ས་མྦྷ་ཝཱ. ཝི་པྤ་ཊི་སཱ་ར་ཛཱཏི ཝི་པྤ་ཊི་སཱ་ར་ཏོ ཛཱ་ཏཱ. པ་ཝ་ཌྜྷ་ནྟཱིཏི པུ་ན་པྤུ་ནཾ ཨུ་པྤ་ཛྫ་ནེ་ན ཝ་ཌྜྷ་ནྟི. ཨཱ་ར་མྦྷ་ཛེ ཨཱ་ས་ཝེ པ་ཧཱ་ཡཱཏི ཝཱི་ཏི་ཀྐ་མ་ས་མྦྷ་ཝེ ཨཱ་ས་ཝེ ཨཱ་པ་ཏྟི་དེ་ས་ནཱ་ཡ ཝཱ ཨཱ་པ་ཏྟི་ཝུ་ཊྛཱ་ནེ་ན ཝཱ པ་ཛ་ཧི་ཏྭཱ. པ་ཊི་ཝི་ནོ་དེ་ཏྭཱཏི སུ་དྡྷ་ནྟེ ཋི་ཏ་བྷཱ་ཝ་པ་ཙྩ་ཝེ་ཀྑ་ཎེ་ན ནཱི་ཧ་རི་ཏྭཱ. ཙི་ཏྟཾ པ་ཉྙ་ཉྩ བྷཱ་ཝེ་ཏཱུཏི ཝི་པ་སྶ་ནཱ་ཙི་ཏྟ་ཉྩ ཏཾ་ས་མྤ་ཡུ་ཏྟཾ པ་ཉྙ་ཉྩ བྷཱ་ཝེ་ཏུ. སེ་སཾ ཨི་མི་ནཱ ཨུ་པཱ་ཡེ་ནེ་ཝ ཝེ་དི་ཏ་བྦ་ནྟི.