༣. ཏ་ཏི་ཡ་པ་ཎྞཱ་ས་ཀཾ
(༡༡) ༡. ཕཱ་སུ་ཝི་ཧཱ་ར་ཝ་གྒོ
༡. སཱ་ར་ཛྫ་སུ་ཏྟ་ཝ་ཎྞ་ནཱ
༡༠༡. ཏ་ཏི་ཡ་སྶ པ་ཋ་མེ ཝེ་སཱ་ར་ཛྫ་ཀ་ར་ཎཱཏི ཝི་སཱ་ར་ད་བྷཱ་ཝཱ་ཝ་ཧཱ. སཱ་ར་ཛྫཾ ཧོ་ཏཱིཏི དོ་མ་ན་སྶཾ ཧོ་ཏི.
༢. ཨུ་སྶ་ངྐི་ཏ་སུ་ཏྟ་ཝ་ཎྞ་ནཱ
༡༠༢. དུ་ཏི་ཡེ ཨུ་སྶ་ངྐི་ཏ་པ་རི་ས་ངྐི་ཏོཏི ཨུ་སྶ་ངྐི་ཏོ ཙ པ་རི་ས་ངྐི་ཏོ ཙ. ཨ་པི ཨ་ཀུ་པྤ་དྷ་མྨོ་པཱིཏི ཨ་པི ཨ་ཀུ་པྤ་དྷ་མྨོ ཁཱི་ཎཱ་ས་ཝོ ས་མཱ་ནོ་པི པ་རེ་ཧི པཱ་པ་བྷི་ཀྑཱུ་ཧི ཨུ་སྶ་ངྐི་ཏ་པ་རི་ས་ངྐི་ཏོ ཧོ་ཏཱི་ཏི ཨ་ཏྠོ. ཝེ་སི་ཡཱ་གོ་ཙ་རོཏི་ཨཱ་དཱི་སུ ཝེ་སི་ཡཱ ཝུ་ཙྩ་ནྟི རཱུ་པཱུ་པ་ཛཱི་ཝི་ནི་ཡོ, ཏཱ གོ་ཙ་རོ ཨ་སྶཱ་ཏི ཝེ་སི་ཡཱ་གོ་ཙ་རོ, ཏཱ་སཾ གེ་ཧཾ ཨ་བྷི་ཎྷ་ག་མ་ནོ་ཏི ཨ་ཏྠོ. སེ་ས་པ་དེ་སུ་པི ཨེ་སེ་ཝ ན་ཡོ. ཏ་ཏྠ པ་ན ཝི་དྷ་ཝཱཏི མ་ཏ་པ་ཏི་ཀཱ. ཐུ་ལླ་ཀུ་མཱ་རི་ཀཱཏི མ་ཧ་ལླི་ཀ་ཀུ་མཱ་རི་ཀཱ་ཡོ.
༣. མ་ཧཱ་ཙོ་ར་སུ་ཏྟ་ཝ་ཎྞ་ནཱ
༡༠༣. ཏ་ཏི་ཡེ ཨི་ཏོ བྷོ་གེ་ན པ་ཊི་ས་ནྠ་རི་སྶཱ་མཱིཏི ཨི་ཏོ མ་མ སཱ་པ་ཏེ་ཡྻ་ཏོ བྷོ་གཾ ག་ཧེ་ཏྭཱ ཏེ་ན པ་ཊི་ས་ནྠཱ་རཾ ཀ་རི་སྶཱ་མི, ཏ་སྶ ཙ མ་མ ཙ ཨ་ནྟ་རཾ པི་ད་ཧི་སྶཱ་མཱི་ཏི ཨ་ཏྠོ. ག་ཧ་ཎཱ་ནཱིཏི པ་ར་ས་ནྟ་ཀཱ་ནཾ བྷ་ཎྜཱ་ནཾ ག་ཧ་ཎཱ་ནི. གུ་ཡ྄ཧ་མ་ནྟཱཏི གུ་ཧི་ཏ་བྦ་མ་ནྟཱ. ཨ་ནྟ་གྒཱ་ཧི་ཀཱ་ཡཱཏི ས་སྶ་ཏཾ ཝཱ ཨུ་ཙྪེ་དཾ ཝཱ ག་ཧེ་ཏྭཱ ཋི་ཏཱ་ཡ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝ. ཙ་ཏུ་ཏྠེ ས་བྦཾ ཧེ་ཊྛཱ ཝུ་ཏྟ་ན་ཡ་མེ་ཝ.
༥. ཕཱ་སུ་ཝི་ཧཱ་ར་སུ་ཏྟ་ཝ་ཎྞ་ནཱ
༡༠༥. པ་ཉྩ་མེ མེ་ཏྟཾ ཀཱ་ཡ་ཀ་མྨནྟི མེ་ཏྟ་ཙི་ཏྟེ་ན པ་ཝ་ཏྟི་ཏཾ ཀཱ་ཡ་ཀ་མྨཾ. ཨཱ་ཝི ཙེ་ཝ ར་ཧོ ཙཱཏི ས་མྨུ་ཁེ ཙེ་ཝ པ་ར་མྨུ་ཁེ ཙ. ཨི་ཏ་རེ་སུ་པི ཨེ་སེ་ཝ ན་ཡོ. ཡཱ་ནི ཏཱ་ནི སཱི་ལཱ་ནཱིཏི་ཨཱ་དི ཙ་ཏུ་པཱ་རི་སུ་དྡྷི་སཱི་ལ་ཝ་སེ་ན ཝུ་ཏྟཾ. ས་མཱ་དྷི་སཾ་ཝ་ཏྟ་ནི་ཀཱ་ནཱིཏི མ་གྒ་ས་མཱ་དྷི་ཕ་ལ་ས་མཱ་དྷི་ནི་བྦ་ཏྟ་ཀཱ་ནི. སཱི་ལ་སཱ་མ་ཉྙ་ག་ཏོཏི ས་མཱ་ན་སཱི་ལ་ཏཾ ག་ཏོ, ཨེ་ཀ་ས་དི་ས་སཱི་ལོ ཧུ་ཏྭཱ་ཏི ཨ་ཏྠོ. ཏ་ཀྐ་ར་སྶཱཏི ཡོ ནཾ ཀ་རོ་ཏི, ཏ་སྶ. ཨི་ཏི ཨི་མ་སྨིཾ སུ་ཏྟེ སཱི་ལཾ མི་སྶ་ཀཾ ཀ་ཐི་ཏཾ, དི་ཊྛི ཝི་པ་སྶ་ནཱ་ས་མྨཱ་དི་ཊྛཱི་ཏི.
༦. ཨཱ་ན་ནྡ་སུ་ཏྟ་ཝ་ཎྞ་ནཱ
༡༠༦. ཚ་ཊྛེ ནོ ཙ པ་རཾ ཨ་དྷི་སཱི་ལེ ས་མྤ་ཝ་ཏྟཱ ཧོ་ཏཱིཏི པ་རཾ སཱི་ལ་བྷཱ་ཝེ་ན ན ག་ར་ཧ་ཏི ན ཨུ་པ་ཝ་ད་ཏི. ཨ་ཏྟཱ་ནུ་པེ་ཀྑཱིཏི ཨ་ཏྟ་ནོ་ཝ ཀ་ཏཱ་ཀ་ཏཾ ཛཱ་ན་ན་ཝ་སེ་ན ཨ་ཏྟཱ་ནཾ ཨ་ནུ་པེ་ཀྑི་ཏཱ. ནོ པ་རཱ་ནུ་པེ་ཀྑཱིཏི པ་ར་སྶ ཀ་ཏཱ་ཀ་ཏེ་སུ ཨ་བྱཱ་ཝ་ཊོ. ཨ་པ་ཉྙཱ་ཏོཏི ཨ་པཱ་ཀ་ཊོ ཨ་པྤ་པུ་ཉྙོ. ཨ་པ་ཉྙཱ་ཏ་ཀེ་ནཱཏི ཨ་པ་ཉྙཱ་ཏ་བྷཱ་ཝེ་ན ཨ་པཱ་ཀ་ཊ་ཏཱ་ཡ མ་ནྡ་པུ་ཉྙ་ཏཱ་ཡ. ནོ པ་རི་ཏ་སྶ་ཏཱིཏི པ་རི་ཏཱ་སཾ ནཱ་པ་ཛྫ་ཏི. ཨི་ཏི ཨི་མ་སྨིཾ སུ་ཏྟེ ཁཱི་ཎཱ་ས་ཝོ་ཝ ཀ་ཐི་ཏོ.
༧-༨. སཱི་ལ་སུ་ཏྟཱ་དི་ཝ་ཎྞ་ནཱ
༡༠༧-༡༠༨. ས་ཏྟ་མེ སཱི་ལ་ས་མཱ་དྷི་པ་ཉྙཱ མི་སྶི་ཀཱ ཀ་ཐི་ཏཱ, ཝི་མུ་ཏྟི ཨ་ར་ཧ་ཏྟ་ཕ་ལཾ, ཝི་མུ་ཏྟི་ཉཱ་ཎ་ད་སྶ་ནཾ པ་ཙྩ་ཝེ་ཀྑ་ཎ་ཉཱ་ཎཾ ལོ་ཀི་ཡ་མེ་ཝ. ཨ་ཊྛ་མེ་པི ཨེ་སེ་ཝ ན་ཡོ. པ་ཙྩ་ཝེ་ཀྑ་ཎ་ཉཱ་ཎཾ པ་ནེ་ཏྠ ཨ་སེ་ཁ་སྶ པ་ཝ་ཏྟ་ཏྟཱ ཨ་སེ་ཁ་ནྟི ཝུ་ཏྟཾ.
༩-༡༠. ཙཱ་ཏུ་དྡི་ས་སུ་ཏྟཱ་དི་ཝ་ཎྞ་ནཱ
༡༠༩-༡༡༠. ན་ཝ་མེ ཙཱ་ཏུ་དྡི་སོཏི ཙ་ཏཱུ་སུ དི་སཱ་སུ ཨ་པྤ་ཊི་ཧ་ཏ་ཙཱ་རོ. ཨི་མ་སྨི་མྤི སུ་ཏྟེ ཁཱི་ཎཱ་ས་ཝོ་ཝ ཀ་ཐི་ཏོ. ད་ས་མེ ཨ་ལནྟི ཡུ་ཏྟོ. ཨི་དྷཱ་པི ཁཱི་ཎཱ་ས་ཝོ་ཝ ཀ་ཐི་ཏོ.
ཕཱ་སུ་ཝི་ཧཱ་ར་ཝ་གྒོ པ་ཋ་མོ.
(༡༢) ༢. ཨ་ནྡྷ་ཀ་ཝི་ནྡ་ཝ་གྒོ
༡. ཀུ་ལཱུ་པ་ཀ་སུ་ཏྟ་ཝ་ཎྞ་ནཱ
༡༡༡. དུ་ཏི་ཡ་སྶ པ་ཋ་མེ ཨ་ས་ནྠ་ཝ་ཝི་སྶཱ་སཱིཏི ཨ་ཏྟ་ནཱ ས་དྡྷིཾ ས་ནྠ་ཝཾ ཨ་ཀ་རོ་ནྟེ་སུ ཝི་སྶཱ་སཾ ཨ་ནཱ་པ་ཛྫ་ནྟེ་སུ་ཡེ་ཝ ཝི་སྶཱ་སཾ ཀ་རོ་ཏི. ཨ་ནི་སྶ་ར་ཝི་ཀ་པྤཱིཏི ཨ་ནི་སྶ་རོ་ཝ ས་མཱ་ནོ ‘‘ཨི་མཾ དེ་ཐ, ཨི་མཾ ག་ཎྷ་ཐཱ’’ཏི ཨི་སྶ་རོ ཝི་ཡ ཝི་ཀ་པྤེ་ཏི. ཝི་སྶ་ཊྛུ་པ་སེ་ཝཱིཏི ཝི་སྶ་ཊྛཱ་ནི བྷི་ནྣ་ཀུ་ལཱ་ནི གྷ་ཊ་ན་ཏྠཱ་ཡ ཨུ་པ་སེ་ཝ་ཏི. ཨུ་པ་ཀ་ཎྞ་ཀ་ཛ་པྤཱིཏི ཀ་ཎྞ་མཱུ་ལེ མ་ནྟཾ ག་ཎྷཱ་ཏི. སུ་ཀྐ་པ་ཀྑོ ཝུ་ཏྟ་ཝི་པ་རི་ཡཱ་ཡེ་ན ཝེ་དི་ཏ་བྦོ.
༢. པ་ཙྪཱ་ས་མ་ཎ་སུ་ཏྟ་ཝ་ཎྞ་ནཱ
༡༡༢. དུ་ཏི་ཡེ པ་ཏྟ་པ་རི་ཡཱ་པ་ནྣཾ ན ག་ཎྷཱ་ཏཱིཏི ཨུ་པ་ཛ྄ཛྷཱ་ཡེ ནི་ཝ་ཏྟི་ཏྭཱ ཋི་ཏེ ཨ་ཏྟ་ནོ ཏུ་ཙྪ་པ་ཏྟཾ ད་ཏྭཱ ཏ་སྶ པ་ཏྟཾ ན ག་ཎྷཱ་ཏི, ཏ་ཏོ ཝཱ དཱི་ཡ་མཱ་ནཾ ན ག་ཎྷཱ་ཏི. ན ནི་ཝཱ་རེ་ཏཱིཏི ཨི་དཾ ཝ་ཙ་ནཾ ཨཱ་པ་ཏྟི་ཝཱི་ཏི་ཀྐ་མ་ཝ་ཙ་ནཾ ནཱ་མཱ་ཏི ན ཛཱ་ནཱ་ཏི. ཉ་ཏྭཱ ཝཱ་པི, ‘‘བྷ་ནྟེ, ཨེ་ཝ་རཱུ་པཾ ནཱ་མ ཝ་ཏྟུཾ ན ཝ་ཊྚ་ཏཱི’’ཏི ན ནི་ཝཱ་རེ་ཏི. ཀ་ཐཾ ཨོ་པཱ་ཏེ་ཏཱིཏི ཏ་སྶ ཀ་ཐཾ བྷི་ནྡི་ཏྭཱ ཨ་ཏྟ་ནོ ཀ་ཐཾ པ་ཝེ་སེ་ཏི. ཛ་ལོ༹ཏི ཛ་ཌོ. ཨེ་ལ༹་མཱུ་གོཏི པ་གྒྷ་རི་ཏ་ཁེ་ལ༹་མུ་ཁོ. ཏ་ཏི་ཡཾ ཨུ་ཏྟཱ་ན་མེ་ཝ.
༤. ཨ་ནྡྷ་ཀ་ཝི་ནྡ་སུ་ཏྟ་ཝ་ཎྞ་ནཱ
༡༡༤. ཙ་ཏུ་ཏྠེ སཱི་ལ་ཝཱ ཧོ་ཐཱཏི སཱི་ལ་ཝ་ནྟཱ ཧོ་ཐ. ཨཱ་ར་ཀྑ་ས་ཏི་ནོཏི དྭཱ་ར་ར་ཀྑི་ཀཱ་ཡ ས་ཏི་ཡཱ ས་མ་ནྣཱ་ག་ཏཱ. ནི་པ་ཀྐ་ས་ཏི་ནོཏི དྭཱ་ར་ར་ཀྑ་ན་ཀེ་ནེ་ཝ ཉཱ་ཎེ་ན ས་མ་ནྣཱ་ག་ཏ་སྶ་ཏི་ནོ. ས་ཏཱ་ར་ཀྑེ་ན ཙེ་ཏ་སཱ ས་མ་ནྣཱ་ག་ཏཱཏི ས་ཏཱ་ར་ཀྑེ་ན ཙི་ཏྟེ་ན ས་མ་ནྣཱ་ག་ཏཱ. ཨ་པྤ་བྷ་སྶཱཏི ཨ་པྤ་ཀ་ཐཱ. ས་མྨཱ་དི་ཊྛི་ཀཱཏི ཀ་མྨ་སྶ་ཀ་ཏ་ཛ྄ཛྷཱ་ན-ཝི་པ་སྶ་ནཱ་མ་གྒ-ཕ་ལ་ཝ་སེ་ན པ་ཉྩ་ཝི་དྷཱ་ཡ ས་མྨཱ་དི་ཊྛི་ཡཱ ས་མ་ནྣཱ་ག་ཏཱ. ཨ་པི་ཙ པ་ཙྩ་ཝེ་ཀྑ་ཎ་ཉཱ་ཎ་མྤི ས་མྨཱ་དི་ཊྛི་ཡེ་ཝཱ་ཏི ཝེ་དི་ཏ་བྦཱ.
༥. མ་ཙྪ་རི་ནཱི་སུ་ཏྟ་ཝ་ཎྞ་ནཱ
༡༡༥. པ་ཉྩ་མེ ཨཱ་ཝཱ་ས་མ་ཙྪ་རི་ནཱིཏི ཨཱ་ཝཱ་སཾ མ་ཙྪ་རཱ་ཡ་ཏི, ཏ་ཏྠ ཨ་ཉྙེ་སཾ ཝཱ་སཾ ན ས་ཧ་ཏི. ཀུ་ལ་མ་ཙྪ་རི་ནཱིཏི ཨུ་པ་ཊྛཱ་ཀ་ཀུ་ལཾ མ་ཙྪ་རཱ་ཡ་ཏི, ཨ་ཉྙེ་སཾ ཏ་ཏྠ ཨུ་པ་ས་ངྐ་མ་ནཾ ན ས་ཧ་ཏི. ལཱ་བྷ་མ་ཙྪ་རི་ནཱིཏི ལཱ་བྷཾ མ་ཙྪ་རཱ་ཡ་ཏི, ཨ་ཉྙེ་སཾ ཏཾ ཨུ་པྤ་ཛྫ་ནྟཾ ན ས་ཧ་ཏི. ཝ་ཎྞ་མ་ཙྪ་རི་ནཱིཏི གུ་ཎཾ མ་ཙྪ་རཱ་ཡ་ཏི, ཨ་ཉྙེ་སཾ གུ་ཎ་ཀ་ཐཾ ན ས་ཧ་ཏི. དྷ་མྨ་མ་ཙྪ་རི་ནཱིཏི པ་རི་ཡ་ཏྟི་དྷ་མྨཾ མ་ཙྪ་རཱ་ཡ་ཏི, ཨ་ཉྙེ་སཾ དཱ་ཏུཾ ན ཨི་ཙྪ་ཏི.
༦-༧. ཝ་ཎྞ་ནཱ་སུ་ཏྟཱ་དི་ཝ་ཎྞ་ནཱ
༡༡༦-༡༡༧. ཚ་ཊྛེ ས་དྡྷཱ་དེ་ཡྻཾ ཝི་ནི་པཱ་ཏེ་ཏཱིཏི པ་རེ་ཧི ས་དྡྷཱ་ཡ དི་ནྣ་པི་ཎྜ་པཱ་ཏ་ཏོ ཨ་གྒཾ ཨ་གྒ་ཧེ་ཏྭཱ པ་ར་སྶ དེ་ཏི. ས་ཏྟ་མེ ཨི་སྶུ་ཀི་ནཱིཏི ཨི་སྶཱ་ཡ ས་མ་ནྣཱ་ག་ཏཱ. སེ་སཾ ས་བྦ་ཏྠ ཨུ་ཏྟཱ་ན་མེ་ཝཱ་ཏི.
ཨ་ནྡྷ་ཀ་ཝི་ནྡ་ཝ་གྒོ དུ་ཏི་ཡོ.
(༡༣) ༣. གི་ལཱ་ན་ཝ་གྒོ
༤. དུ་ཏི་ཡ་ཨུ་པ་ཊྛཱ་ཀ་སུ་ཏྟ་ཝ་ཎྞ་ནཱ
༡༢༤. ཏ་ཏི་ཡ་སྶ ཙ་ཏུ་ཏྠེ ན་པྤ་ཊི་བ་ལོཏི ཀཱ་ཡ་བ་ལེ་ན ཙ ཉཱ་ཎ་བ་ལེ་ན ཙ ཨ་ས་མ་ནྣཱ་ག་ཏོ. ཨཱ་མི་ས་ནྟ་རོཏི ཨཱ་མི་ས་ཧེ་ཏུ་ཀོ ཙཱི་ཝ་རཱ་དཱི་ནི པ་ཙྩཱ་སཱི་ས་མཱ་ནོ.
༥-༦. ཨ་ནཱ་ཡུ་སྶཱ་སུ་ཏྟ་དྭ་ཡ་ཝ་ཎྞ་ནཱ
༡༢༥-༡༢༦. པ་ཉྩ་མེ ཨ་ནཱ་ཡུ་སྶཱཏི ཨཱ་ཡུ་པ་ཙྪེ་ད་ནཱ, ན ཨཱ་ཡུ་ཝ་ཌྜྷ་ནཱ. ཚ་ཊྛེ་པི ཨེ་སེ་ཝ ན་ཡོ.
༧. ཝ་པ་ཀཱ་ས་སུ་ཏྟ་ཝ་ཎྞ་ནཱ
༡༢༧. ས་ཏྟ་མེ ནཱ་ལཾ ས་ངྒྷ་མྷཱ ཝ་པ་ཀཱ་སི་ཏུནྟི ས་ངྒྷ་ཏོ ནི་ཀྑ་མི་ཏྭཱ ཨེ་ཀ་ཀོ ཝ་སི་ཏུཾ ན ཡུ་ཏྟོ. ཀཱ་མ་ཉྩེ་ས ས་ངྒྷ་མ་ཛ྄ཛྷེ་པི ཝ་སི་ཏུཾ ཨ་ཡུ་ཏྟོ་ཝ ཨ་ས་ངྒྷ་སོ་བྷ་ན་ཏཱ་ཡ, ཨོ་ཝཱ་དཱ་ནུ་སཱ་ས་ནི་པྤ་ཊི་བ་དྡྷ་ཏྟཱ པ་ན ནི་པྤ་རི་ཡཱ་ཡེ་ནེ་ཝ ས་ངྒྷ་མྷཱ ཝ་པ་ཀཱ་སི་ཏུཾ ན ཡུ་ཏྟོ. ཨ་ལཾ ས་ངྒྷ་མྷཱ ཝ་པ་ཀཱ་སི་ཏུནྟི ཙཱ་ཏུ་དྡི་ས་ཏྟཱ ས་ངྒྷ་མྷཱ ནི་ཀྑ་མྨ ཨེ་ཀ་ཀོ ཝ་སི་ཏུཾ ཡུ་ཏྟོ, ས་ངྒྷ་སོ་བྷ་ན་ཏཱ་ཡ པ་ན ས་ངྒྷེ་པི ཝ་སི་ཏུཾ ཡུ་ཏྟོ་ཡེ་ཝ. ཨ་ཊྛ་མཾ ཨུ་ཏྟཱ་ན་ཏྠ་མེ་ཝ.
༩. པ་རི་ཀུ་པྤ་སུ་ཏྟ་ཝ་ཎྞ་ནཱ
༡༢༩. ན་ཝ་མེ ཨཱ་པཱ་ཡི་ཀཱཏི ཨ་པཱ་ཡ་གཱ་མི་ནོ. ནེ་ར་ཡི་ཀཱཏི ནི་ར་ཡ་གཱ་མི་ནོ. པ་རི་ཀུ་པྤཱཏི པ་རི་ཀུ་པྤ་ན་ས་བྷཱ་ཝཱ པུ་རཱ་ཎ་ཝ་ཎ་ས་དི་སཱ. ཨ་ཏེ་ཀི་ཙྪཱཏི ཨ་ཀ་ཏྟ་བྦ་པ་རི་ཀ་མྨཱ. ད་ས་མཾ ཨུ་ཏྟཱ་ན་ཏྠ་མེ་ཝཱ་ཏི.
གི་ལཱ་ན་ཝ་གྒོ ཏ་ཏི་ཡོ.
(༡༤) ༤. རཱ་ཛ་ཝ་གྒོ
༡. པ་ཋ་མ་ཙ་ཀྐཱ་ནུ་ཝ་ཏྟ་ན་སུ་ཏྟ་ཝ་ཎྞ་ནཱ
༡༣༡. ཙ་ཏུ་ཏྠ་སྶ པ་ཋ་མེ དྷ་མྨེ་ནཱཏི ད་ས་ཀུ་ས་ལ་དྷ་མྨེ་ན. ཙ་ཀྐནྟི ཨཱ་ཎཱ་ཙ་ཀྐཾ. ཨ་ཏྠ་ཉྙཱུཏི ར་ཛྫ་ཏྠཾ ཛཱ་ནཱ་ཏི. དྷ་མྨ་ཉྙཱུཏི པ་ཝེ་ཎི་དྷ་མྨཾ ཛཱ་ནཱ་ཏི. མ་ཏྟ་ཉྙཱུཏི ད་ཎྜེ ཝཱ བ་ལ་མྷི ཝཱ པ་མཱ་ཎཾ ཛཱ་ནཱ་ཏི. ཀཱ་ལ་ཉྙཱུཏི ར་ཛྫ་སུ་ཁཱ་ནུ་བྷ་ཝ་ན་ཀཱ་ལཾ, ཝི་ནི་ཙྪ་ཡ་ཀ་ར་ཎ་ཀཱ་ལཾ, ཛ་ན་པ་ད་ཙཱ་རི་ཀཱ་ཀཱ་ལ་ཉྩ ཛཱ་ནཱ་ཏི. པ་རི་ས་ཉྙཱུཏི ཨ་ཡཾ པ་རི་སཱ ཁ་ཏྟི་ཡ་པ་རི་སཱ, ཨ་ཡཾ བྲཱ་ཧྨ་ཎ་ཝེ་སྶ་སུ་དྡ་ས་མ་ཎ་པ་རི་སཱ་ཏི ཛཱ་ནཱ་ཏི.
ཏ་ཐཱ་ག་ཏ་ཝཱ་རེ ཨ་ཏྠ་ཉྙཱུཏི པ་ཉྩ ཨ་ཏྠེ ཛཱ་ནཱ་ཏི. དྷ་མྨ་ཉྙཱུཏི ཙ་ཏྟཱ་རོ དྷ་མྨེ ཛཱ་ནཱ་ཏི. མ་ཏྟ་ཉྙཱུཏི ཙ་ཏཱུ་སུ པ་ཙྩ་ཡེ་སུ པ་ཊི་གྒ་ཧ་ཎ་པ་རི་བྷོ་ག་མ་ཏྟཾ ཛཱ་ནཱ་ཏི. ཀཱ་ལ་ཉྙཱུཏི ཨ་ཡཾ ཀཱ་ལོ པ་ཊི་ས་ལླཱི་ན་སྶ, ཨ་ཡཾ ས་མཱ་པ་ཏྟི་ཡཱ, ཨ་ཡཾ དྷ་མྨ་དེ་ས་ནཱ་ཡ, ཨ་ཡཾ ཛ་ན་པ་ད་ཙཱ་རི་ཀཱ་ཡཱ་ཏི ཨེ་ཝཾ ཀཱ་ལཾ ཛཱ་ནཱ་ཏི. པ་རི་ས་ཉྙཱུཏི ཨ་ཡཾ པ་རི་སཱ ཁ་ཏྟི་ཡ་པ་རི་སཱ…པེ… ཨ་ཡཾ ས་མ་ཎ་པ་རི་སཱ་ཏི ཛཱ་ནཱ་ཏི. ཨ་ནུ་ཏྟ་རནྟི ན་ཝ་ཧི ལོ་ཀུ་ཏྟ་ར་དྷ་མྨེ་ཧི ཨ་ནུ་ཏྟ་རཾ. དྷ་མྨ་ཙ་ཀྐནྟི སེ་ཊྛ་ཙ་ཀྐཾ.
༢. དུ་ཏི་ཡ་ཙ་ཀྐཱ་ནུ་ཝ་ཏྟ་ན་སུ་ཏྟ་ཝ་ཎྞ་ནཱ
༡༣༢. དུ་ཏི་ཡེ པི་ཏ་རཱ པ་ཝ་ཏྟི་ཏཾ ཙ་ཀྐནྟི ཙ་ཀྐ་ཝ་ཏྟི་མྷི པ་བྦ་ཛི་ཏེ ཝཱ ཀཱ་ལ་ཀ་ཏེ ཝཱ ཙ་ཀྐ་ར་ཏ་ནཾ ས་ཏྟཱ་ཧ་མ་ཏྟཾ ཋ་ཏྭཱ ཨ་ནྟ་ར་དྷཱ་ཡ་ཏི, ཀ་ཐ་མེ་ས ཏཾ ཨ་ནུ་པྤ་ཝ་ཏྟེ་ཏི ནཱ་མ? པི་ཏུ པ་ཝེ་ཎི་ཡཾ ཋ་ཏྭཱ ཙ་ཀྐ་ཝ་ཏྟི་ཝ་ཏྟཾ པཱུ་རེ་ཏྭཱ ཙ་ཀྐ་ཝ་ཏྟི་ར་ཛྫཾ ཀཱ་རེ་ནྟོ་པི པི་ཏ་རཱ པ་ཝ་ཏྟི་ཏ་མེ་ཝ ཨ་ནུ་པྤ་ཝ་ཏྟེ་ཏི ནཱ་མ.
༣. དྷ་མྨ་རཱ་ཛཱ་སུ་ཏྟ་ཝ་ཎྞ་ནཱ
༡༣༣. ཏ་ཏི་ཡཾ ཏི་ཀ་ནི་པཱ་ཏེ ཝུ་ཏྟ་ན་ཡ་མེ་ཝ. སེ་ཝི་ཏ་བྦཱ་སེ་ཝི་ཏ་བྦེ པ་ནེ་ཏྠ པ་ཙྪི་མ་པ་ད་དྭ་ཡ་མེ་ཝ ཝི་སེ་སོ. ཏ་ཏྠ ས་མྨཱ་ཨཱ་ཛཱི་ཝོ སེ་ཝི་ཏ་བྦོ, མི་ཙྪཱ་ཨཱ་ཛཱི་ཝོ ན སེ་ཝི་ཏ་བྦོ. ས་པྤཱ་ཡོ གཱ་མ་ནི་ག་མོ སེ་ཝི་ཏ་བྦོ, ཨ་ས་པྤཱ་ཡོ ན སེ་ཝི་ཏ་བྦོ.
༤. ཡ་སྶཾ་དི་སཾ་སུ་ཏྟ་ཝ་ཎྞ་ནཱ
༡༣༤. ཙ་ཏུ་ཏྠེ ཨུ་བྷ་ཏོཏི དྭཱི་ཧི་པི པ་ཀྑེ་ཧི. མཱ་ཏི་ཏོ ཙ པི་ཏི་ཏོ ཙཱཏི ཡ་སྶ ཧི མཱ་ཏཱ ཁ་ཏྟི་ཡཱ, མཱ་ཏུ་མཱ་ཏཱ ཁ་ཏྟི་ཡཱ, ཏ་སྶཱ་པི མཱ་ཏཱ ཁ་ཏྟི་ཡཱ. པི་ཏཱ ཁ་ཏྟི་ཡོ, པི་ཏུ་པི་ཏཱ ཁ་ཏྟི་ཡོ, ཏ་སྶ་པི པི་ཏཱ ཁ་ཏྟི་ཡོ. སོ ཨུ་བྷ་ཏོ སུ་ཛཱ་ཏོ མཱ་ཏི་ཏོ ཙ པི་ཏི་ཏོ ཙ. སཾ་སུ་དྡྷ་ག་ཧ་ཎི་ཀོཏི སཾ་སུ་དྡྷཱ་ཡ མཱ་ཏུ་ཀུ་ཙྪི་ཡཱ ས་མ་ནྣཱ་ག་ཏོ. ‘‘ས་མ་ཝེ་པཱ་ཀི་ནི་ཡཱ ག་ཧ་ཎི་ཡཱ’’ཏི ཨེ་ཏྠ པ་ན ཀ་མྨ་ཛ་ཏེ་ཛོ་དྷཱ་ཏུ ག་ཧ་ཎཱི་ཏི ཝུ་ཙྩ་ཏི. ཡཱ་ཝ ས་ཏྟ་མཱ པི་ཏཱ་མ་ཧ་ཡུ་གཱཏི ཨེ་ཏྠ པི་ཏུ་པི་ཏཱ པི་ཏཱ་མ་ཧོ, པི་ཏཱ་མ་ཧ་སྶ ཡུ་གཾ པི་ཏཱ་མ་ཧ་ཡུ་གཾ. ཡུ་ག་ནྟི ཨཱ་ཡུ་པྤ་མཱ་ཎཾ ཝུ་ཙྩ་ཏི. ཨ་བྷི་ལཱ་པ་མ་ཏྟ་མེ་ཝ ཙེ་ཏཾ, ཨ་ཏྠ་ཏོ པ་ན པི་ཏཱ་མ་ཧོ་ཡེ་ཝ པི་ཏཱ་མ་ཧ་ཡུ་གཾ. ཏ་ཏོ ཨུ་དྡྷཾ ས་བྦེ་པི པུ་བྦ་པུ་རི་སཱ པི་ཏཱ་མ་ཧ་གྒ་ཧ་ཎེ་ནེ་ཝ ག་ཧི་ཏཱ. ཨེ་ཝཾ ཡཱ་ཝ ས་ཏྟ་མོ པུ་རི་སོ, ཏཱ་ཝ སཾ་སུ་དྡྷ་ག་ཧ་ཎི་ཀོ, ཨ་ཐ ཝཱ ཨ་ཀྑི་ཏྟོ ཨ་ནུ་པ་ཀྐུ་ཊྛོ ཛཱ་ཏི་ཝཱ་དེ་ནཱ་ཏི ད་སྶེ་ཏི. ཨ་ཀྑི་ཏྟོཏི ‘‘ཨ་པ་ནེ་ཐ ཨེ་ཏཾ, ཀིཾ ཨི་མི་ནཱ’’ཏི ཨེ་ཝཾ ཨ་ཀྑི་ཏྟོ ཨ་ན་ཝ་ཀྑི་ཏྟོ. ཨ་ནུ་པ་ཀྐུ་ཊྛོཏི ན ཨུ་པ་ཀྐུ་ཊྛོ ན ཨ་ཀྐོ་སཾ ཝཱ ནི་ནྡཾ ཝཱ པ་ཏྟ་པུ་བྦོ. ཀེ་ན ཀཱ་ར་ཎེ་ནཱ་ཏི? ཛཱ་ཏི་ཝཱ་དེ་ན, ‘‘ཨི་ཏི་པི ཧཱི་ན་ཛཱ་ཏི་ཀོ ཨེ་སོ’’ཏི ཨེ་ཝ་རཱུ་པེ་ན ཝ་ཙ་ནེ་ནཱ་ཏི ཨ་ཏྠོ.
ཨ་ཌྜྷོཏི་ཨཱ་དཱི་སུ ཡོ ཀོ་ཙི ཨ་ཏྟ་ནོ ས་ནྟ་ཀེ་ན ཝི་བྷ་ཝེ་ན ཨ་ཌྜྷོ ཧོ་ཏི. ཨི་དྷ པ་ན ན ཀེ་ཝ་ལཾ ཨ་ཌྜྷོ་ཡེ་ཝ, མ་ཧ་དྡྷ་ནོ མ་ཧ་ཏཱ ཨ་པ་རི་མཱ་ཎ་ས་ངྑེ་ན དྷ་ནེ་ན ས་མ་ནྣཱ་ག་ཏོ་ཏི ཨ་ཏྠོ. པ་ཉྩ་ཀཱ་མ་གུ་ཎ་ཝ་སེ་ན མ་ཧ་ནྟཱ ཨུ་ལཱ༹་རཱ བྷོ་གཱ ཨ་སྶཱ་ཏི མ་ཧཱ་བྷོ་གོ. པ་རི་པུ་ཎྞ་ཀོ་ས་ཀོ་ཊྛཱ་གཱ་རོཏི ཀོ་སོ ཝུ་ཙྩ་ཏི བྷ་ཎྜཱ་གཱ་རཾ, ནི་ད་ཧི་ཏྭཱ ཋ་པི་ཏེ་ན དྷ་ནེ་ན པ་རི་པུ་ཎྞ་ཀོ་སོ, དྷ་ཉྙེ་ན ཙ པ་རི་པུ་ཎྞ་ཀོ་ཊྛཱ་གཱ་རོ་ཏི ཨ་ཏྠོ. ཨ་ཐ ཝཱ ཙ་ཏུ་བྦི་དྷོ ཀོ་སོ ཧ་ཏྠཱི ཨ་སྶཱ ར་ཐཱ ར་ཊྛ་ནྟི, ཏི་ཝི་དྷཾ ཀོ་ཊྛཱ་གཱ་རཾ དྷ་ན་ཀོ་ཊྛཱ་གཱ་རཾ དྷ་ཉྙ་ཀོ་ཊྛཱ་གཱ་རཾ ཝ་ཏྠ་ཀོ་ཊྛཱ་གཱ་ར་ནྟི. ཏཾ ས་བྦ་མྤི པ་རི་པུ་ཎྞ་མ་སྶཱ་ཏི པ་རི་པུ་ཎྞ་ཀོ་ས་ཀོ་ཊྛཱ་གཱ་རོ. ཨ་སྶ་ཝཱ་ཡཱཏི ཀ་སྶ་ཙི བ་ཧུ་མྤི དྷ་ནཾ དེ་ནྟ་སྶ སེ་ནཱ ན སུ་ཎཱ་ཏི, སཱ ཨ་ན་སྶ་ཝཱ ནཱ་མ ཧོ་ཏི. ཀ་སྶ་ཙི ཨ་དེ་ནྟ་སྶཱ་པི སུ་ཎཱ་ཏི་ཡེ་ཝ, ཨ་ཡཾ ཨ་སྶ་ཝཱ ནཱ་མ. ཨོ་ཝཱ་ད་པ་ཊི་ཀ་རཱ་ཡཱཏི ‘‘ཨི་དཾ ཝོ ཀ་ཏྟ་བྦ, ཨི་དཾ ན ཀ་ཏྟ་བྦ’’ནྟི དི་ནྣ་ཨོ་ཝཱ་ད་ཀ་རཱ་ཡ. པ་ཎྜི་ཏོཏི པ་ཎྜི་ཙྩེ་ན ས་མ་ནྣཱ་ག་ཏོ. བྱ་ཏྟོཏི པ་ཉྙཱ་ཝེ་ཡྻ་ཏྟི་ཡེ་ན ཡུ་ཏྟོ. མེ་དྷཱ་ཝཱིཏི ཋཱ་ནུ་པྤ་ཏྟི་ཀ་པ་ཉྙཱ་ཡ ས་མ་ནྣཱ་ག་ཏོ. པ་ཊི་བ་ལོཏི ས་མ་ཏྠོ. ཨ་ཏྠེ ཙི་ནྟེ་ཏུནྟི ཝ་ཌྜྷི་ཨ་ཏྠེ ཙི་ནྟེ་ཏུཾ. སོ ཧི པ་ཙྩུ་པྤ་ནྣ་ཨ་ཏྠ་ཝ་སེ་ནེ་ཝ ‘‘ཨ་ཏཱི་ཏེ་པི ཨེ་ཝཾ ཨ་ཧེ་སུཾ, ཨ་ནཱ་ག་ཏེ་པི ཨེ་ཝཾ བྷ་ཝི་སྶ་ནྟཱི’’ཏི ཙི་ནྟེ་ཏི. ཝི་ཛི་ཏཱ་ཝཱི་ནནྟི ཝི་ཛི་ཏ་ཝི་ཛ་ཡཱ་ནཾ, མ་ཧ་ནྟེ་ན ཝཱ ཝི་ཛ་ཡེ་ན ས་མ་ནྣཱ་ག་ཏཱ་ནཾ. ཝི་མུ་ཏྟ་ཙི་ཏྟཱ་ནནྟི པ་ཉྩ་ཧི ཝི་མུ་ཏྟཱི་ཧི ཝི་མུ་ཏྟ་མཱ་ན་སཱ་ནཾ.
༥-༦. པ་ཏྠ་ནཱ་སུ་ཏྟ་དྭ་ཡ་ཝ་ཎྞ་ནཱ
༡༣༥-༡༣༦. པ་ཉྩ་མེ ནེ་ག་མ་ཛཱ་ན་པ་ད་སྶཱཏི ནི་ག་མ་ཝཱ་སི་ནོ ཙ ར་ཊྛ་ཝཱ་སི་ནོ ཙ ཛ་ན་སྶ. ཧ་ཏྠི་སྨིནྟི་ཨཱ་དཱི་ཧི ཧ་ཏྠི་ཨ་སྶ་ར་ཐ་ཐ་རུ་དྷ་ནུ་ལེ་ཁ་མུ་དྡཱ་ག་ཎ་ནཱ་དཱི་ནི སོ་ལ༹་ས མ་ཧཱ་སི་པྤཱ་ནི ད་སྶི་ཏཱ་ནི. ཨ་ན་ཝ་ཡོཏི ས་མ་ཏྠོ པ་རི་པུ་ཎྞོ. སེ་ས་མེ་ཏྠ ཧེ་ཊྛཱ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཚ་ཊྛེ ཨོ་པ་ར་ཛྫནྟི ཨུ་པ་རཱ་ཛ་བྷཱ་ཝཾ.
༧. ཨ་པྤཾ་སུ་པ་ཏི་སུ་ཏྟ་ཝ་ཎྞ་ནཱ
༡༣༧. ས་ཏྟ་མེ པུ་རི་སཱ་དྷི་པྤཱ་ཡཱཏི ཨ་སྶ་དྡྷ་མྨ་ཝ་སེ་ན པུ་རི་སེ ཨུ་པྤ་ནྣཱ་དྷི་པྤཱ་ཡཱ པུ་རི་ས་ཛ྄ཛྷཱ་ས་ཡཱ. ཨཱ་དཱ་ནཱ་དྷི་པྤཱ་ཡོཏི ཨི་དཱ་ནི ག་ཧེ་ཏུཾ ས་ཀྑི་སྶཱ་མི, ཨི་དཱ་ནི ས་ཀྑི་སྶཱ་མཱི་ཏི ཨེ་ཝཾ ག་ཧ་ཎཱ་དྷི་པྤཱ་ཡོ. ཝི་སཾ་ཡོ་གཱ་དྷི་པྤཱ་ཡོཏི ཨི་དཱ་ནི ནི་བྦཱ་ནཾ པཱ་པུ་ཎི་སྶཱ་མི, ཨི་དཱ་ནི པཱ་པུ་ཎི་སྶཱ་མཱི་ཏི ཨེ་ཝཾ ནི་བྦཱ་ན་ཛ྄ཛྷཱ་ས་ཡོ.
༨. བྷ་ཏྟཱ་ད་ཀ་སུ་ཏྟ་ཝ་ཎྞ་ནཱ
༡༣༨. ཨ་ཊྛ་མེ བྷ་ཏྟཱ་ད་ཀོཏི བྷ་ཏྟ་ཀྑཱ་ད་ཀོ, བ་ཧུ་བྷ་ཏྟ་བྷུ་ཉྫོ་ཏི ཨ་ཏྠོ. ཨོ་ཀཱ་ས་ཕ་ར་ཎོཏི ཨོ་ཀཱ་སཾ ཕ་རི་ཏྭཱ ཨ་ཉྙེ་སཾ ས་མྦཱ་དྷཾ ཀ་ཏྭཱ ཋཱ་ནེ་ན ཨོ་ཀཱ་ས་ཕ་ར་ཎོ. ཏ་ཏྠ ཏ་ཏྠ ལ་ཎྜཾ སཱ་རེ་ཏི པཱ་ཏེ་ཏཱི་ཏི ལ་ཎྜ་སཱ་ར་ཎོ. ཨེ་ཏྟ་ཀཱ ཧ་ཏྠཱི་ཏི ག་ཎ་ན་ཀཱ་ལེ ས་ལཱ་ཀཾ ག་ཎྷཱ་ཏཱི་ཏི ས་ལཱ་ཀ་གྒཱ་ཧཱི. ནི་སཱི་ད་ན་ས་ཡ་ན་ཝ་སེ་ན མ་ཉྩ་པཱི་ཋཾ མ་དྡ་ཏཱི་ཏི མ་ཉྩ་པཱི་ཋ་མ་དྡ་ནོ. བྷི་ཀྑུ་ག་ཎ་ན་ཀཱ་ལེ ས་ལཱ་ཀཾ ག་ཎྷཱ་ཏཱི་ཏི ས་ལཱ་ཀ་གྒཱ་ཧཱི.
༩. ཨ་ཀྑ་མ་སུ་ཏྟ་ཝ་ཎྞ་ནཱ
༡༣༩. ན་ཝ་མེ ཧ་ཏྠི་ཀཱ་ཡནྟི ཧ་ཏྠི་གྷ་ཊཾ. སེ་སེ་སུ་པི ཨེ་སེ་ཝ ན་ཡོ. ས་ངྒཱ་མེ ཨ་ཝ་ཙ་ར་ནྟཱི་ཏི ས་ངྒཱ་མཱ་ཝ་ཙ་རཱ. ཨེ་ཀི་སྶཱ ཝཱ ཏི་ཎོ་ད་ཀ་ད་ཏྟི་ཡཱ ཝི་མཱ་ནི་ཏོཏི ཨེ་ཀ་དི་ཝ་སཾ ཨེ་ཀེ་ན ཏི་ཎོ་ད་ཀ་དཱ་ནེ་ན ཝི་མཱ་ནི་ཏོ, ཨེ་ཀ་དི་ཝ་ས་མ་ཏྟཾ ཨ་ལ་དྡྷ་ཏི་ཎོ་ད་ཀོ་ཏི ཨ་ཏྠོ. ཨི་ཏོ པ་ར་མྤི ཨེ་སེ་ཝ ན་ཡོ. ན ས་ཀྐོ་ཏི ཙི་ཏྟཾ ས་མཱ་ད་ཧི་ཏུནྟི ཨཱ་ར་མྨ་ཎེ ཙི་ཏྟཾ ས་མྨཱ ཋ་པེ་ཏུཾ ན ས་ཀྐོ་ཏི. སེ་ས་མེ་ཏྠ ཨུ་ཏྟཱ་ན་མེ་ཝ. ཨི་མ་སྨིཾ པ་ན སུ་ཏྟེ ཝ་ཊྚ་ཝི་ཝ་ཊྚཾ ཀ་ཐི་ཏ་ནྟི ཝེ་དི་ཏ་བྦཾ.
༡༠. སོ་ཏ་སུ་ཏྟ་ཝ་ཎྞ་ནཱ
༡༤༠. ད་ས་མེ དུ་རུ་ཏྟཱ་ནནྟི ན སུ་ཊྛུ ཝུ་ཏྟཱ་ནཾ དོ་ས་ཝ་སེ་ན པ་ཝ་ཏྟི་ཏཱ་ནཾ ཕ་རུ་ས་ཝ་ཙ་ནཱ་ནཾ. དུ་རཱ་ག་ཏཱ་ནནྟི དུ་ཀྑུ་པྤཱ་ད་ནཱ་ཀཱ་རེ་ན སོ་ཏ་དྭཱ་རཾ ཨཱ་ག་ཏཱ་ནཾ. ཝ་ཙ་ན་པ་ཐཱ་ནནྟི ཝ་ཙ་ནཱ་ནཾ. དུ་ཀྑཱ་ནནྟི དུ་ཀྑ་མཱ་ནཾ. ཏི་བྦཱ་ནནྟི བ་ཧ་ལཱ་ནཾ ཏཱ་པ་ན་ས་བྷཱ་ཝཱ་ནཾ ཝཱ. ཁ་རཱ་ནནྟི ཕ་རུ་སཱ་ནཾ. ཀ་ཊུ་ཀཱ་ནནྟི ཏི་ཁི་ཎཱ་ནཾ. ཨ་སཱ་ཏཱ་ནནྟི ཨ་མ་དྷུ་རཱ་ནཾ. ཨ་མ་ནཱ་པཱ་ནནྟི མ་ནཾ ཨ་པྤཱ་ཡི་ཏུཾ ཝ་ཌྜྷེ་ཏུཾ ཨ་ས་མ་ཏྠཱ་ནཾ. པཱ་ཎ་ཧ་རཱ་ནནྟི ཛཱི་ཝི་ཏ་ཧ་རཱ་ནཾ. ཡཱ སཱ དི་སཱཏི ས་བྦ་ས་ངྑཱ་ར་ས་མ་ཐཱ་དི་ཝ་སེ་ན དི་སྶ་ཏི ཨ་པ་དི་སྶ་ཏཱི་ཏི ནི་བྦཱ་ནཾ དི་སཱ་ཏི ཝེ་དི་ཏ་བྦཾ. ཡ་སྨཱ པ་ན ཏཾ ཨཱ་ག་མྨ ས་བྦེ ས་ངྑཱ་རཱ ས་མ་ཐཾ ག་ཙྪ་ནྟི, ཏ་སྨཱ ས་བྦ་ས་ངྑཱ་ར་ས་མ་ཐོཏི ཝུ་ཏྟཾ. སེ་སཾ ས་བྦ་ཏྠ ཨུ་ཏྟཱ་ན་མེ་ཝ. ཨི་མ་སྨིཾ པ་ན སུ་ཏྟེ སཱི་ལ་ས་མཱ་དྷི་པ་ཉྙཱ མི་སྶི་ཀཱ ཀ་ཐི་ཏཱ་ཏི.
རཱ་ཛ་ཝ་གྒོ ཙ་ཏུ་ཏྠོ.
(༡༥) ༥. ཏི་ཀ་ཎྜ་ཀཱི་ཝ་གྒོ
༡. ཨ་ཝ་ཛཱ་ནཱ་ཏི་སུ་ཏྟ་ཝ་ཎྞ་ནཱ
༡༤༡. པ་ཉྩ་མ་སྶ པ་ཋ་མེ སཾ་ཝཱ་སེ་ནཱཏི ཨེ་ཀ་ཏོ་ཝཱ་སེ་ན. ཨཱ་དེ་ཡྻ་མུ་ཁོཏི ཨཱ་དི་ཡ་ན་མུ་ཁོ, ག་ཧ་ཎ་མུ་ཁོ་ཏི ཨ་ཏྠོ. ཏ་མེ་ནཾ ད་ཏྭཱ ཨ་ཝ་ཛཱ་ནཱ་ཏཱིཏི ‘‘ཨ་ཡཾ དི་ནྣཾ པ་ཊི་གྒ་ཧེ་ཏུ་མེ་ཝ ཛཱ་ནཱ་ཏཱི’’ཏི ཨེ་ཝཾ ཨ་ཝ་མ་ཉྙ་ཏི. ཏ་མེ་ནཾ སཾ་ཝཱ་སེ་ན ཨ་ཝ་ཛཱ་ནཱ་ཏཱིཏི ཨ་པྤ་མ་ཏྟ་ཀེ ཀི་སྨི་ཉྩི་དེ་ཝ ཀུ་ཛ྄ཛྷི་ཏྭཱ ‘‘ཛཱ་ནཱ་མ་ཧཾ ཏ་ཡཱ ཀ་ཏ་ཀ་མྨཾ, ཨེ་ཏྟ་ཀཾ ཨ་དྡྷཱ་ནཾ ཨ་ཧཾ ཀིཾ ཀ་རོ་ནྟོ ཝ་སིཾ, ན་ནུ ཏུ་ཡ྄ཧ་མེ་ཝ ཀ་ཏཱ་ཀ་ཏཾ ཝཱི་མཾ་ས་ནྟོ’’ཏི་ཨཱ་དཱི་ནི ཝ་ཏྟཱ ཧོ་ཏི. ཨ་ཐ ཨི་ཏ་རོ ‘‘ཨ་དྡྷཱ ཀོ་ཙི མ་ཡ྄ཧཾ དོ་སོ བྷ་ཝི་སྶ་ཏཱི’’ཏི ཀི་ཉྩི པ་ཊི་པྥ་རི་ཏུཾ ན ས་ཀྐོ་ཏི. ཏཾ ཁི་པྤ་ཉྙེ་ཝ ཨ་དྷི་མུ་ཙྩི་ཏཱ ཧོ་ཏཱིཏི ཏཾ ཝ་ཎྞཾ ཝཱ ཨ་ཝ་ཎྞཾ ཝཱ སཱི་གྷ་མེ་ཝ ས་དྡ་ཧ་ཏི. ས་དྡ་ཧ་ན་ཊྛེ་ན ཧི ཨཱ་དཱ་ནེ་ན ཨེ་ས ཨཱ་དི་ཡ་ན་མུ་ཁོ་ཏི ཝུ་ཏྟོ. ཨཱ་དྷེ་ཡྻ་མུ་ཁོཏི པཱ་ལི༹་ཡཱ པ་ན ཋ་པི་ཏ་མུ་ཁོ་ཏི ཨ་ཏྠོ. མ་གྒེ ཁ་ཊ་ཨཱ་ཝཱ་ཊོ ཝི་ཡ ཨཱ་ག་ཏཱ་ག་ཏཾ ཨུ་ད་ཀཾ ཝ་ཎྞཾ ཝཱ ཨ་ཝ་ཎྞཾ ཝཱ ས་དྡ་ཧ་ན་ཝ་སེ་ན ས་མྤ་ཊི་ཙྪི་ཏུཾ ཋ་པི་ཏ་མུ་ཁོ་ཏི ཝུ་ཏྟཾ ཧོ་ཏི.
ཨི་ཏྟ་ར་ས་དྡྷོཏི པ་རི་ཏྟ་ཀ་ས་དྡྷོ. ཀུ་ས་ལཱ་ཀུ་ས་ལེ དྷ་མྨེ ན ཛཱ་ནཱ་ཏཱིཏི་ཨཱ་དཱི་སུ ཀུ་ས་ལེ དྷ་མྨེ ‘‘ཨི་མེ ཀུ་ས་ལཱ’’ཏི ན ཛཱ་ནཱ་ཏི, ཨ་ཀུ་ས་ལེ དྷ་མྨེ ‘‘ཨི་མེ ཨ་ཀུ་ས་ལཱ’’ཏི ན ཛཱ་ནཱ་ཏི. ཏ་ཐཱ སཱ་ཝ་ཛྫེ ས་དོ་ས་དྷ་མྨེ ‘‘ཨི་མེ སཱ་ཝ་ཛྫཱ’’ཏི, ཨ་ན་ཝ་ཛྫེ ཙ ནི་དྡོ་ས་དྷ་མྨེ ‘‘ཨི་མེ ཨ་ན་ཝ་ཛྫཱ’’ཏི, ཧཱི་ནེ ཧཱི་ནཱ་ཏི, པ་ཎཱི་ཏེ པ་ཎཱི་ཏཱ་ཏི. ཀ་ཎྷ་སུ་ཀྐ་ས་པྤ་ཊི་བྷཱ་གེཏི ‘‘ཨི་མེ ཀ་ཎྷཱ སུ་ཀྐེ པ་ཊི་བཱ་ཧེ་ཏྭཱ ཋི་ཏ་ཏྟཱ ས་པྤ་ཊི་བྷཱ་གཱ ནཱ་མ, ཨི་མེ ཙ སུ་ཀྐཱ ཀ་ཎྷེ པ་ཊི་བཱ་ཧི་ཏྭཱ ཋི་ཏ་ཏྟཱ ས་པྤ་ཊི་བྷཱ་གཱ’’ཏི ན ཛཱ་ནཱ་ཏི.
༢. ཨཱ་ར་བྷ་ཏི་སུ་ཏྟ་ཝ་ཎྞ་ནཱ
༡༤༢. དུ་ཏི་ཡེ ཨཱ་ར་བྷ་ཏི ཙ ཝི་པྤ་ཊི་སཱ་རཱི ཙ ཧོ་ཏཱིཏི ཨཱ་པ་ཏྟི་ཝཱི་ཏི་ཀྐ་མ་ན་ཝ་སེ་ན ཨཱ་ར་བྷ་ཏི ཙེ་ཝ, ཏ་པྤ་ཙྩ་ཡཱ ཙ ཝི་པྤ་ཊི་སཱ་རཱི ཧོ་ཏི. ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིནྟི ཨ་ར་ཧ་ཏྟ་ས་མཱ་དྷི་ཉྩེ་ཝ ཨ་ར་ཧ་ཏྟ་ཕ་ལ་ཉཱ་ཎ་ཉྩ. ན་པྤ་ཛཱ་ནཱ་ཏཱིཏི ཨ་ན་དྷི་ག་ཏ་ཏྟཱ ན ཛཱ་ནཱ་ཏི. ཨཱ་ར་བྷ་ཏི ན ཝི་པྤ་ཊི་སཱ་རཱི ཧོ་ཏཱིཏི ཨཱ་པ་ཏྟིཾ ཨཱ་པ་ཛྫ་ཏི, ཝུ་ཊྛི་ཏ་ཏྟཱ པ་ན ན ཝི་པྤ་ཊི་སཱ་རཱི ཧོ་ཏི. ནཱ་ར་བྷ་ཏི ཝི་པྤ་ཊི་སཱ་རཱི ཧོ་ཏཱིཏི ས་ཀིཾ ཨཱ་པ་ཏྟིཾ ཨཱ་པ་ཛྫི་ཏྭཱ ཏ་ཏོ ཝུ་ཊྛཱ་ཡ པ་ཙྪཱ ཀི་ཉྩཱ་པི ནཱ་པ་ཛྫ་ཏི, ཝི་པྤ་ཊི་སཱ་རཾ པ་ན ཝི་ནོ་དེ་ཏུཾ ན ས་ཀྐོ་ཏི. ནཱ་ར་བྷ་ཏི ན ཝི་པྤ་ཊི་སཱ་རཱི ཧོ་ཏཱིཏི ན ཙེ་ཝ ཨཱ་པ་ཏྟིཾ ཨཱ་པ་ཛྫ་ཏི, ན ཙ ཝི་པྤ་ཊི་སཱ་རཱི ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ…པེ… ནི་རུ་ཛ྄ཛྷ་ནྟཱིཏི ཨ་ར་ཧ་ཏྟཾ པ་ན ཨ་པྤ་ཏྟོ ཧོ་ཏི. པ་ཉྩ་མ་ན་ཡེ་ན ཁཱི་ཎཱ་ས་ཝོ ཀ་ཐི་ཏོ.
ཨཱ་ར་མྦྷ་ཛཱཏི ཨཱ་པ་ཏྟི་ཝཱི་ཏི་ཀྐ་མ་ས་མྦྷ་ཝཱ. ཝི་པྤ་ཊི་སཱ་ར་ཛཱཏི ཝི་པྤ་ཊི་སཱ་ར་ཏོ ཛཱ་ཏཱ. པ་ཝ་ཌྜྷ་ནྟཱིཏི པུ་ན་པྤུ་ནཾ ཨུ་པྤ་ཛྫ་ནེ་ན ཝ་ཌྜྷ་ནྟི. ཨཱ་ར་མྦྷ་ཛེ ཨཱ་ས་ཝེ པ་ཧཱ་ཡཱཏི ཝཱི་ཏི་ཀྐ་མ་ས་མྦྷ་ཝེ ཨཱ་ས་ཝེ ཨཱ་པ་ཏྟི་དེ་ས་ནཱ་ཡ ཝཱ ཨཱ་པ་ཏྟི་ཝུ་ཊྛཱ་ནེ་ན ཝཱ པ་ཛ་ཧི་ཏྭཱ. པ་ཊི་ཝི་ནོ་དེ་ཏྭཱཏི སུ་དྡྷ་ནྟེ ཋི་ཏ་བྷཱ་ཝ་པ་ཙྩ་ཝེ་ཀྑ་ཎེ་ན ནཱི་ཧ་རི་ཏྭཱ. ཙི་ཏྟཾ པ་ཉྙ་ཉྩ བྷཱ་ཝེ་ཏཱུཏི ཝི་པ་སྶ་ནཱ་ཙི་ཏྟ་ཉྩ ཏཾ་ས་མྤ་ཡུ་ཏྟཾ པ་ཉྙ་ཉྩ བྷཱ་ཝེ་ཏུ. སེ་སཾ ཨི་མི་ནཱ ཨུ་པཱ་ཡེ་ནེ་ཝ ཝེ་དི་ཏ་བྦ་ནྟི.
༣. སཱ་ར་ནྡ་ད་སུ་ཏྟ་ཝ་ཎྞ་ནཱ
༡༤༣. ཏ་ཏི་ཡེ ཀཱ་མཱ་དྷི་མུ་ཏྟཱ་ནནྟི ཝ་ཏྠུ་ཀཱ་མ་ཀི་ལེ་ས་ཀཱ་མེ་སུ ཨ་དྷི་མུ་ཏྟཱ་ནཾ. དྷ་མྨཱ་ནུ་དྷ་མྨ་པྤ་ཊི་པ་ནྣོཏི ན་ཝ་ལོ་ཀུ་ཏྟ་ར་དྷ་མྨ་ཏྠཱ་ཡ ས་ཧ་སཱི་ལ་ཀཾ པུ་བྦ་བྷཱ་ག་པྤ་ཊི་པ་དཾ པ་ཊི་པ་ནྣོ པ་ཊི་པ་ཏྟི་པཱུ་ར་ཀོ པུ་གྒ་ལོ དུ་ལླ་བྷོ ལོ་ཀ་སྨིཾ.
༤. ཏི་ཀ་ཎྜ་ཀཱི་སུ་ཏྟ་ཝ་ཎྞ་ནཱ
༡༤༤. ཙ་ཏུ་ཏྠེ ཨ་པྤ་ཊི་ཀཱུ་ལེཏི ཨ་པྤ་ཊི་ཀཱུ་ལཱ་ར་མྨ་ཎེ. པ་ཊི་ཀཱུ་ལ་ས་ཉྙཱིཏི པ་ཊི་ཀཱུ་ལ་ནྟི ཨེ་ཝཾ་ས་ཉྙཱི. ཨེ་ས ན་ཡོ ས་བྦ་ཏྠ. ཀ་ཐཾ པ་ནཱ་ཡཾ ཨེ་ཝཾ ཝི་ཧ་ར་ཏཱི་ཏི? ཨི་ཊྛ་སྨིཾ ཝ་ཏྠུ་སྨིཾ པ་ན ཨ་སུ་བྷཱ་ཡ ཝཱ ཕ་ར་ཏི, ཨ་ནི་ཙྩ་ཏོ ཝཱ ཨུ་པ་སཾ་ཧ་ར་ཏི. ཨེ་ཝཾ ཏཱ་ཝ ཨ་པྤ་ཊི་ཀཱུ་ལེ པ་ཊི་ཀཱུ་ལ་ས་ཉྙཱི ཝི་ཧ་ར་ཏི. ཨ་ནི་ཊྛ་སྨིཾ ཝ་ཏྠུ་སྨིཾ མེ་ཏྟཱ་ཡ ཝཱ ཕ་ར་ཏི, དྷཱ་ཏུ་ཏོ ཝཱ ཨུ་པ་སཾ་ཧ་ར་ཏི. ཨེ་ཝཾ པ་ཊི་ཀཱུ་ལེ ཨ་པྤ་ཊི་ཀཱུ་ལ་ས་ཉྙཱི ཝི་ཧ་ར་ཏི. ཨུ་བྷ་ཡ་སྨིཾ པ་ན པུ་རི་མ་ན་ཡ་སྶ ཙ པ་ཙྪི་མ་ན་ཡ་སྶ ཙ ཝ་སེ་ན ཏ་ཏི་ཡ་ཙ་ཏུ་ཏྠ་ཝཱ་རཱ ཝུ་ཏྟཱ, ཚ་ལ༹་ངྒུ་པེ་ཀྑཱ་ཝ་སེ་ན པ་ཉྩ་མོ. ཚ་ལ༹་ངྒུ་པེ་ཀྑཱ ཙེ་སཱ ཁཱི་ཎཱ་ས་ཝ་སྶ ཨུ་པེ་ཀྑཱ་ས་དི་སཱ, ན པ་ན ཁཱི་ཎཱ་ས་ཝུ་པེ་ཀྑཱ. ཏ་ཏྠ ཨུ་པེ་ཀྑ་ཀོ ཝི་ཧ་རེ་ཡྻཱཏི མ་ཛ྄ཛྷ་ཏྟ་བྷཱ་ཝེ ཋི་ཏོ ཝི་ཧ་རེ་ཡྻ. ཀྭ་ཙ་ནཱིཏི ཀི་སྨི་ཉྩི ཨཱ་ར་མྨ་ཎེ. ཀ་ཏྠ་ཙཱིཏི ཀི་སྨི་ཉྩི པ་དེ་སེ. ཀི་ཉྩ་ནཏི ཀོ་ཙི ཨ་པྤ་མ་ཏྟ་ཀོ་པི. ཨི་ཏི ཨི་མ་སྨིཾ སུ་ཏྟེ པ་ཉྩ་སུ ཋཱ་ནེ་སུ ཝི་པ་སྶ་ནཱ་ཝ ཀ་ཐི་ཏཱ. ཏཾ ཨཱ་ར་དྡྷ་ཝི་པ་སྶ་ཀོ བྷི་ཀྑུ ཀཱ་ཏུཾ ས་ཀྐོ་ཏི, ཉཱ་ཎ་ཝཱ པ་ཉྙུ་ཏྟ་རོ བ་ཧུ་སྶུ་ཏ་ས་མ་ཎོ་པི ཀཱ་ཏུཾ ས་ཀྐོ་ཏི. སོ་ཏཱ་པ་ནྣ་ས་ཀ་དཱ་གཱ་མི་ཨ་ནཱ་གཱ་མི་ནོ ཀཱ་ཏུཾ ས་ཀྐོ་ནྟི་ཡེ་ཝ, ཁཱི་ཎཱ་ས་ཝེ ཝ་ཏྟ་བྦ་མེ་ཝ ན་ཏྠཱི་ཏི. པ་ཉྩ་མཾ ཨུ་ཏྟཱ་ན་མེ་ཝ.
༦. མི་ཏྟ་སུ་ཏྟ་ཝ་ཎྞ་ནཱ
༡༤༦. ཚ་ཊྛེ ཀ་མྨ་ནྟཾ ཀཱ་རེ་ཏཱིཏི ཁེ་ཏྟཱ་དི་ཀ་མྨ་ནྟཾ ཀཱ་རེ་ཏི. ཨ་དྷི་ཀ་ར་ཎཾ ཨཱ་དི་ཡ་ཏཱིཏི ཙ་ཏྟཱ་རི ཨ་དྷི་ཀ་ར་ཎཱ་ནི ཨཱ་དི་ཡ་ཏི. པཱ་མོ་ཀྑེ་སུ བྷི་ཀྑཱུ་སཱུཏི དི་སཱ་པཱ་མོ་ཀྑེ་སུ བྷི་ཀྑཱུ་སུ. པ་ཊི་ཝི་རུ་དྡྷོ ཧོ་ཏཱིཏི པ་ཙྩ་ནཱི་ཀ་གྒཱ་ཧི་ཏཱ་ཡ ཝི་རུ་དྡྷོ ཧོ་ཏི. ཨ་ན་ཝ་ཏྠ་ཙཱ་རི་ཀནྟི ཨ་ན་ཝ་ཏྠཱ་ན་ཙཱ་རི་ཀཾ.
༧. ཨ་ས་པྤུ་རི་ས་དཱ་ན་སུ་ཏྟ་ཝ་ཎྞ་ནཱ
༡༤༧. ས་ཏྟ་མེ ཨ་ས་ཀྐ་ཙྩཾ དེ་ཏཱིཏི ན ས་ཀྐ་རི་ཏྭཱ སུ་ཙིཾ ཀ་ཏྭཱ དེ་ཏི. ཨ་ཙི་ཏྟཱི་ཀ་ཏྭཱ དེ་ཏཱིཏི ཨ་ཙི་ཏྟཱི་ཀཱ་རེ་ན ཨ་གཱ་ར་ཝ་ཝ་སེ་ན དེ་ཏི. ཨ་པ་ཝི་དྡྷཾ དེ་ཏཱིཏི ན ནི་ར་ནྟ་རཾ དེ་ཏི, ཨ་ཐ ཝཱ ཚ་ཌྜེ་ཏུ་ཀཱ་མོ ཝི་ཡ དེ་ཏི. ཨ་ནཱ་ག་མ་ན་དི་ཊྛི་ཀོ དེ་ཏཱིཏི ཀ་ཏ་སྶ ནཱ་མ ཕ་ལཾ ཨཱ་ག་མི་སྶ་ཏཱི་ཏི ན ཨེ་ཝཾ ཨཱ་ག་མ་ན་དི་ཊྛིཾ ན ཨུ་པྤཱ་དེ་ཏྭཱ དེ་ཏི.
སུ་ཀྐ་པ་ཀྑེ ཙི་ཏྟཱི་ཀ་ཏྭཱ དེ་ཏཱིཏི དེ་ཡྻ་དྷ་མྨེ ཙ ད་ཀྑི་ཎེ་ཡྻེ་སུ ཙ ཙི་ཏྟཱི་ཀཱ་རཾ ཨུ་པ་ཊྛ་པེ་ཏྭཱ དེ་ཏི. ཏ་ཏྠ དེ་ཡྻ་དྷ་མྨཾ པ་ཎཱི་ཏཾ ཨོ་ཛ་ཝ་ནྟཾ ཀ་ཏྭཱ དེ་ནྟོ དེ་ཡྻ་དྷ་མྨེ ཙི་ཏྟཱི་ཀཱ་རཾ ཨུ་པ་ཊྛ་པེ་ཏི ནཱ་མ. པུ་གྒ་ལཾ ཝི་ཙི་ནི་ཏྭཱ དེ་ནྟོ ད་ཀྑི་ཎེ་ཡྻེ་སུ ཙི་ཏྟཱི་ཀཱ་རཾ ཨུ་པ་ཊྛ་པེ་ཏི ནཱ་མ. ས་ཧ་ཏྠཱ དེ་ཏཱིཏི ཨཱ་ཎ་ཏྟི་ཡཱ པ་ར་ཧ་ཏྠེ་ན ཨ་ད་ཏྭཱ ‘‘ཨ་ན་མ་ཏ་གྒེ སཾ་སཱ་རེ ཝི་ཙ་ར་ནྟེ་ན མེ ཧ་ཏྠ་པཱ་དཱ་ནཾ ཨ་ལ་དྡྷ་ཀཱ་ལ་སྶ པ་མཱ་ཎཾ ནཱ་མ ན་ཏྠི, ཝ་ཊྚ་མོ་ཀྑཾ བྷ་ཝ་ནི་སྶ་ར་ཎཾ ཀ་རི་སྶཱ་མཱི’’ཏི ས་ཧ་ཏྠེ་ནེ་ཝ དེ་ཏི. ཨཱ་ག་མ་ན་དི་ཊྛི་ཀོཏི ‘‘ཨ་ནཱ་ག་ཏ་བྷ་ཝ་སྶ པ་ཙྩ་ཡོ བྷ་ཝི་སྶ་ཏཱི’’ཏི ཀ་མྨ་ཉྩ ཝི་པཱ་ཀ་ཉྩ ས་དྡ་ཧི་ཏྭཱ དེ་ཏཱི་ཏི.
༨. ས་པྤུ་རི་ས་དཱ་ན་སུ་ཏྟ་ཝ་ཎྞ་ནཱ
༡༤༨. ཨ་ཊྛ་མེ ས་དྡྷཱ་ཡཱཏི དཱ་ན་ཉྩ དཱ་ན་ཕ་ལ་ཉྩ ས་དྡ་ཧི་ཏྭཱ. ཀཱ་ལེ་ནཱཏི ཡུ་ཏྟ་པྤ་ཏྟ་ཀཱ་ལེ་ན. ཨ་ན་གྒ་ཧི་ཏ་ཙི་ཏྟོཏི ཨ་གྒ་ཧི་ཏ་ཙི་ཏྟོ མུ་ཏྟ་ཙཱ་གོ ཧུ་ཏྭཱ. ཨ་ནུ་པ་ཧ་ཙྩཱཏི ཨ་ནུ་པ་གྷཱ་ཏེ་ཏྭཱ གུ་ཎེ ཨ་མ་ཀྑེ་ཏྭཱ. ཀཱ་ལཱ་ག་ཏཱ ཙ་སྶ ཨ་ཏྠཱ པ་ཙུ་རཱ ཧོ་ནྟཱིཏི ཨ་ཏྠཱ ཨཱ་ག་ཙྪ་མཱ་ནཱ ཝ་ཡོ་ཝུ་ཌྜྷ་ཀཱ་ལེ ཨ་ནཱ་ག་ནྟྭཱ ཡུ་ཏྟ་པྤ་ཏྟ་ཀཱ་ལེ པ་ཋ་མ་ཝ་ཡ་སྨིཾ་ཡེ་ཝ ཨཱ་ག་ཙྪ་ནྟི ཙེ་ཝ བ་ཧཱུ ཙ ཧོ་ནྟི.
༩. པ་ཋ་མ་ས་མ་ཡ་ཝི་མུ་ཏྟ་སུ་ཏྟ་ཝ་ཎྞ་ནཱ
༡༤༩. ན་ཝ་མེ ས་མ་ཡ་ཝི་མུ་ཏྟ་སྶཱཏི ཨ་པྤི་ཏ་པྤི་ཏ་ཀྑ་ཎེ་ཡེ་ཝ ཝི་ཀྑ་མྦྷི་ཏེ་ཧི ཀི་ལེ་སེ་ཧི ཝི་མུ་ཏྟ་ཏྟཱ ས་མ་ཡ་ཝི་མུ་ཏྟི་ས་ངྑཱ་ཏཱ་ཡ ལོ་ཀི་ཡ་ཝི་མུ་ཏྟི་ཡཱ ཝི་མུ་ཏྟ་ཙི་ཏྟ་སྶ. ད་ས་མཾ ཨུ་ཏྟཱ་ན་ཏྠ་མེ་ཝ.
ཏི་ཀ་ཎྜ་ཀཱི་ཝ་གྒོ པ་ཉྩ་མོ.
ཏ་ཏི་ཡ་པ་ཎྞཱ་ས་ཀཾ ནི་ཊྛི་ཏཾ.