(༡༠) ༥. ཀ་ཀུ་དྷ་ཝ་གྒོ
༡-༢. ས་མྤ་དཱ་སུ་ཏྟ་དྭ་ཡ་ཝ་ཎྞ་ནཱ
༩༡-༩༢. པ་ཉྩ་མ་སྶ པ་ཋ་མེ པ་ཉྩ ས་མྤ་དཱ མི་སྶི་ཀཱ ཀ་ཐི་ཏཱ. དུ་ཏི་ཡེ པུ་རི་མཱ ཙ་ཏ་སྶོ མི་སྶི་ཀཱ, པ་ཉྩ་མཱི ལོ་ཀི་ཀཱ་ཝ.
༣. བྱཱ་ཀ་ར་ཎ་སུ་ཏྟ་ཝ་ཎྞ་ནཱ
༩༣. ཏ་ཏི་ཡེ ཨ་ཉྙཱ་བྱཱ་ཀ་ར་ཎཱ་ནཱིཏི ཨ་ར་ཧ་ཏྟ་བྱཱ་ཀ་ར་ཎཱ་ནི. མ་ནྡ་ཏྟཱཏི མ་ནྡ་བྷཱ་ཝེ་ན ཨ་ཉྙཱ་ཎེ་ན. མོ་མཱུ་ཧ་ཏྟཱཏི ཨ་ཏི་མཱུ་ལ༹ྷ་བྷཱ་ཝེ་ན. ཨ་ཉྙཾ བྱཱ་ཀ་རོ་ཏཱིཏི ཨ་ར་ཧ་ཏྟཾ པ་ཏྟོ་སྨཱི་ཏི ཀ་ཐེ་ཏི. ཨི་ཙྪཱ་པ་ཀ་ཏོཏི ཨི་ཙྪཱ་ཡ ཨ་བྷི་བྷཱུ་ཏོ. ཨ་དྷི་མཱ་ནེ་ནཱཏི ཨ་དྷི་ག་ཏ་མཱ་ནེ་ན. ས་མྨ་དེ་ཝཱཏི ཧེ་ཏུ་ནཱ ན་ཡེ་ན ཀཱ་ར་ཎེ་ནེ་ཝ.
༤-༥. ཕཱ་སུ་ཝི་ཧཱ་ར་སུ་ཏྟཱ་དི་ཝ་ཎྞ་ནཱ
༩༤-༩༥. ཙ་ཏུ་ཏྠེ ཕཱ་སུ་ཝི་ཧཱ་རཱཏི སུ་ཁ་ཝི་ཧཱ་རཱ. པ་ཉྩ་མེ ཨ་ཀུ་པྤནྟི ཨ་ར་ཧ་ཏྟཾ.
༦. སུ་ཏ་དྷ་ར་སུ་ཏྟ་ཝ་ཎྞ་ནཱ
༩༦. ཚ་ཊྛེ ཨ་པྤ་ཊྛོཏི ཨ་པྤ་ས་མཱ་ར་མྦྷོ. ཨ་པྤ་ཀི་ཙྩོཏི ཨ་པྤ་ཀ་ར་ཎཱི་ཡོ. སུ་བྷ་རོཏི སུ་ཁེ་ན བྷ་རི་ཏ་བྦོ སུ་པོ་སོ. སུ་ས་ནྟོ་སོཏི ཏཱི་ཧི ས་ནྟོ་སེ་ཧི སུ་ཊྛུ ས་ནྟོ་སོ. ཛཱི་ཝི་ཏ་པ་རི་ཀྑཱ་རེ་སཱུཏི ཛཱི་ཝི་ཏ་ས་མྦྷཱ་རེ་སུ. ཨ་པྤཱ་ཧཱ་རོཏི མ་ནྡཱ་ཧཱ་རོ. ཨ་ནོ་ད་རི་ཀ་ཏྟནྟི ན ཨོ་ད་རི་ཀ་བྷཱ་ཝཾ ཨ་མ་ཧ་གྒྷ་ས་བྷཱ་ཝཾ ཨ་ནུ་ཡུ་ཏྟོ. ཨ་པྤ་མི་དྡྷོཏི ན བ་ཧུ་ནི་དྡོ. ས་ཏྟ་མ་ཊྛ་མཱ་ནི ཨུ་ཏྟཱ་ན་ཏྠཱ་ནི.
༩. སཱི་ཧ་སུ་ཏྟ་ཝ་ཎྞ་ནཱ
༩༩. ན་ཝ་མེ ས་ཀྐ་ཙྩ་ཉྙེ་ཝ དེ་ཏི ནོ ཨ་ས་ཀྐ་ཙྩནྟི ཨ་ན་ཝ་ཉྙཱ་ཡ ཨ་ཝི་ར་ཛ྄ཛྷི་ཏྭཱ་ཝ དེ་ཏི, ནོ ཨ་ཝ་ཉྙཱ་ཡ ཝི་ར་ཛ྄ཛྷི་ཏྭཱ. མཱ མེ ཡོ་གྒ་པ་ཐོ ན་སྶཱཏི མ་ཡཱ ཀ་ཏ་ཡོ་གྒ་པ་ཐོ མ་ཡ྄ཧཾ མཱ ན་སྶ་ཏུ, ‘‘ཨེ་ཀོ སཱི་ཧོ ཨུ་ཊྛཱ་ཡ བི་ལཱ༹་རཾ པ་ཧ་ར་ནྟོ ཝི་ར་ཛ྄ཛྷི་ཏྭཱ པ་ཧ་རཱི’’ཏི ཨེ་ཝཾ ཝ་ཏྟཱ་རོ མཱ ཧོ་ནྟཱུ་ཏི ཨ་ཏྠོ. ཨ་ནྣ་བྷཱ་ར་ནེ་སཱ་དཱ་ནནྟི ཨེ་ཏྠ ཨ་ནྣཾ ཝུ་ཙྩ་ཏི ཡ་ཝ་བྷ་ཏྟཾ, ཏཾ བྷཱ་རོ ཨེ་ཏེ་ས་ནྟི ཨ་ནྣ་བྷཱ་རཱ. ཡཱ་ཙ་ཀཱ་ནཾ ཨེ་ཏཾ ནཱ་མཾ. ནེ་སཱ་དཱ ཝུ་ཙྩ་ནྟི སཱ་ཀུ་ཎི་ཀཱ. ཨི་ཏི ས་བྦ་པ་ཙྪི་མཱ་ཡ ཀོ་ཊི་ཡཱ ཨེ་ཏེ་སཾ ཡཱ་ཙ་ཀ་ནེ་སཱ་དཱ་ན་མྤི ས་ཀྐ་ཙྩ་མེ་ཝ དེ་སེ་ཏི.
༡༠. ཀ་ཀུ་དྷ་ཐེ་ར་སུ་ཏྟ་ཝ་ཎྞ་ནཱ
༡༠༠. ད་ས་མེ ཨ་ཏྟ་བྷཱ་ཝ་པ་ཊི་ལཱ་བྷོཏི ས་རཱི་ར་པ་ཊི་ལཱ་བྷོ. དྭེ ཝཱ ཏཱི་ཎི ཝཱ མཱ་ག་དྷ་ཀཱ་ནི གཱ་མ་ཀྑེ་ཏྟཱ་ནཱིཏི ཨེ་ཏྠ མཱ་ག་དྷི་ཀཾ གཱ་མ་ཀྑེ་ཏྟཾ ཨ་ཏྠི ཁུ་དྡ་ཀཾ, ཨ་ཏྠི མ་ཛ྄ཛྷི་མཾ, ཨ་ཏྠི མ་ཧ་ནྟཾ. ཁུ་དྡ་ཀཾ གཱ་མ་ཀྑེ་ཏྟཾ ཨི་ཏོ ཙ་ཏྟཱ་ལཱི་སཾ ཨུ་ས་བྷཱ་ནི, ཨི་ཏོ ཙ་ཏྟཱ་ལཱི་ས་ནྟི གཱ་ཝུ་ཏཾ ཧོ་ཏི, མ་ཛ྄ཛྷི་མཾ ཨི་ཏོ གཱ་ཝུ་ཏཾ, ཨི་ཏོ གཱ་ཝུ་ཏ་ནྟི ཨ་ཌྜྷ་ཡོ་ཛ་ནཾ ཧོ་ཏི, མ་ཧ་ནྟཾ ཨི་ཏོ དི་ཡ་ཌྜྷ་གཱ་ཝུ་ཏཾ, ཨི་ཏོ དི་ཡ་ཌྜྷ་གཱ་ཝུ་ཏ་ནྟི ཏི་གཱ་ཝུ་ཏཾ ཧོ་ཏི. ཏེ་སུ ཁུ་དྡ་ཀེ་ན གཱ་མ་ཀྑེ་ཏྟེ་ན ཏཱི་ཎི, ཁུ་དྡ་ཀེ་ན ཙ མ་ཛ྄ཛྷི་མེ་ན ཙ དྭེ གཱ་མ་ཀྑེ་ཏྟཱ་ནི ཏ་སྶ ཨ་ཏྟ་བྷཱ་ཝོ. ཏི་གཱ་ཝུ་ཏ་ཉྷི་སྶ ས་རཱི་རཾ. པ་རི་ཧ་རི་སྶཱ་མཱིཏི པ་ཊི་ཛ་གྒི་སྶཱ་མི གོ་པ་ཡི་སྶཱ་མི. ར་ཀྑ་སྶེ་ཏནྟི ར་ཀྑ་སྶུ ཨེ་ཏཾ. མོ་གྷ་པུ་རི་སོཏི ཏུ་ཙྪ་པུ་རི་སོ. ནཱ་སྶ་སྶཱཏི ན ཨེ་ཏ་སྶ བྷ་ཝེ་ཡྻ. ས་མུ་དཱ་ཙ་རེ་ཡྻཱ་མཱཏི ཀ་ཐེ་ཡྻཱ་མ. ས་མྨ་ནྣ་ཏཱིཏི ས་མྨཱ་ནཾ ཀ་རོ་ཏི. ཡཾ ཏུ་མོ ཀ་རི་སྶ་ཏི ཏུ་མོ་ཝ ཏེ་ན པ་ཉྙཱ་ཡི་སྶ་ཏཱིཏི ཡཾ ཨེ་ས ཀ་རི་སྶ་ཏི, ཨེ་སོ་ཝ ཏེ་ན ཀ་མྨེ་ན པཱ་ཀ་ཊོ བྷ་ཝི་སྶ་ཏི. སེ་སཾ ས་བྦ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
ཀ་ཀུ་དྷ་ཝ་གྒོ པ་ཉྩ་མོ.