(༩) ༤. ཐེ་ར་ཝ་གྒོ
༡. ར་ཛ་ནཱི་ཡ་སུ་ཏྟ་ཝ་ཎྞ་ནཱ
༨༡. ཙ་ཏུ་ཏྠ་སྶ པ་ཋ་མེ ར་ཛ་ནཱི་ཡེ་སཱུཏི རཱ་ག་སྶ པ་ཙྩ་ཡེ་སུ ཨཱ་ར་མྨ་ཎེ་སུ. སེ་སེ་སུ་པི ཨེ་སེ་ཝ ན་ཡོ.
༢. ཝཱི་ཏ་རཱ་ག་སུ་ཏྟ་ཝ་ཎྞ་ནཱ
༨༢. དུ་ཏི་ཡེ མ་ཀྑཱིཏི གུ་ཎ་མ་ཀྑ་ཀོ. པ་ལཱ༹་སཱིཏི ཡུ་ག་གྒཱ་ཧ་ལ་ཀྑ་ཎེ་ན པ་ལཱ༹་སེ་ན ས་མ་ནྣཱ་ག་ཏོ.
༣. ཀུ་ཧ་ཀ་སུ་ཏྟ་ཝ་ཎྞ་ནཱ
༨༣. ཏ་ཏི་ཡེ ཀུ་ཧ་ཀོཏི ཏཱི་ཧི ཀུ་ཧ་ན་ཝ་ཏྠཱུ་ཧི ས་མ་ནྣཱ་ག་ཏོ. ལ་པ་ཀོཏི ལཱ་བྷ་ས་ནྣི་སྶི་ཏཱ་ཡ ལ་པ་ནཱ་ཡ ས་མ་ནྣཱ་ག་ཏོ. ནེ་མི་ཏྟི་ཀོཏི ནི་མི་ཏྟ་ཀི་རི་ཡ་ཀཱ་ར་ཀོ. ནི་པྤེ་སི་ཀོཏི ནི་པྤེ་ས་ན་ཀ་ཏཱ་ཡ ས་མ་ནྣཱ་ག་ཏོ. ལཱ་བྷེ་ན ཙ ལཱ་བྷཾ ནི་ཛི་གཱི་སི་ཏཱཏི ལཱ་བྷེ་ན ལཱ་བྷ་ག་ཝེ་ས་ཀོ. སུ་ཀྐ་པ་ཀྑོ ཝུ་ཏྟ་ཝི་པ་ལླཱ་ས་ཝ་སེ་ན ཝེ་དི་ཏ་བྦོ. ཙ་ཏུ་ཏྠཾ ཨུ་ཏྟཱ་ན་མེ་ཝ.
༥. ཨ་ཀྑ་མ་སུ་ཏྟ་ཝ་ཎྞ་ནཱ
༨༥. པ་ཉྩ་མེ ཨ་ཀྑ་མོ ཧོ་ཏི རཱུ་པཱ་ནནྟི རཱུ་པཱ་ར་མྨ་ཎཱ་ནཾ ཨ་ན་དྷི་ཝཱ་ས་ཀོ ཧོ་ཏི, ཏ་དཱ་ར་མྨ་ཎེ་ཧི རཱ་གཱ་དཱི་ཧི ཨ་བྷི་བྷུ་ཡྻ་ཏི. ཨེ་སེ་ཝ ན་ཡོ ས་བྦ་ཏྠ.
༦. པ་ཊི་ས་མྦྷི་དཱ་པྤ་ཏྟ་སུ་ཏྟ་ཝ་ཎྞ་ནཱ
༨༦. ཚ་ཊྛེ ཨ་ཏྠ་པ་ཊི་ས་མྦྷི་དཱ་པྤ་ཏྟོཏི པ་ཉྩ་སུ ཨ་ཏྠེ་སུ པ་བྷེ་ད་ག་ཏཾ ཉཱ་ཎཾ པ་ཏྟོ. དྷ་མྨ་པ་ཊི་ས་མྦྷི་དཱ་པྤ་ཏྟོཏི ཙ་ཏུ་བྦི་དྷེ དྷ་མྨེ པ་བྷེ་ད་ག་ཏཾ ཉཱ་ཎཾ པ་ཏྟོ. ནི་རུ་ཏྟི་པ་ཊི་ས་མྦྷི་དཱ་པྤ་ཏྟོཏི དྷ་མྨ་ནི་རུ་ཏྟཱི་སུ པ་བྷེ་ད་ག་ཏཾ ཉཱ་ཎཾ པ་ཏྟོ. པ་ཊི་བྷཱ་ན་པ་ཊི་ས་མྦྷི་དཱ་པྤ་ཏྟོཏི ཏེ་སུ ཏཱི་སུ ཉཱ་ཎེ་སུ པ་བྷེ་ད་ག་ཏཾ ཉཱ་ཎཾ པ་ཏྟོ. སོ པ་ན ཏཱ་ནི ཏཱི་ཎི ཉཱ་ཎཱ་ནེ་ཝ ཛཱ་ནཱ་ཏི, ན ཏེ་སཾ ཀི་ཙྩཾ ཀ་རོ་ཏི. ཨུ་ཙྩཱ་ཝ་ཙཱ་ནཱིཏི མ་ཧ་ནྟ་ཁུ་དྡ་ཀཱ་ནི. ཀིཾ་ཀ་ར་ཎཱི་ཡཱ་ནཱིཏི ཨི་ཏི ཀ་ཏྟ་བྦཱ་ནི.
༧. སཱི་ལ་ཝ་ནྟ་སུ་ཏྟ་ཝ་ཎྞ་ནཱ
༨༧. ས་ཏྟ་མཾ ཨུ་ཏྟཱ་ན་ཏྠ་མེ་ཝ. སཱི་ལཾ པ་ནེ་ཏྠ ཁཱི་ཎཱ་ས་ཝ་སཱི་ལ་མེ་ཝ, བཱ་ཧུ་ས་ཙྩ་མྤི ཁཱི་ཎཱ་ས་ཝ་བཱ་ཧུ་ས་ཙྩ་མེ་ཝ, ཝཱ་ཙཱ་པི ཁཱི་ཎཱ་ས་ཝ་སྶ ཀ་ལྱཱ་ཎ་ཝཱ་ཙཱ་ཝ, ཛྷཱ་ནཱ་ནི་པི ཀི་རི་ཡ་ཛ྄ཛྷཱ་ནཱ་ནེ་ཝ ཀ་ཐི་ཏཱ་ནཱི་ཏི ཝེ་དི་ཏ་བྦཱ་ནི.
༨. ཐེ་ར་སུ་ཏྟ་ཝ་ཎྞ་ནཱ
༨༨. ཨ་ཊྛ་མེ ཐེ་རོཏི ཐི་ར་བྷཱ་ཝ་པྤ་ཏྟོ. ར་ཏྟ་ཉྙཱུཏི པ་བྦ་ཛི་ཏ་དི་ཝ་ས་ཏོ པ་ཊྛཱ་ཡ ཨ་ཏི་ཀྐ་ནྟཱ་ནཾ བ་ཧཱུ་ནཾ ར་ཏྟཱི་ནཾ ཉཱ་ཏཱ. ཉཱ་ཏོཏི པ་ཉྙཱ་ཏོ པཱ་ཀ་ཊོ. ཡ་ས་སྶཱིཏི ཡ་ས་ནི་སྶི་ཏོ. མི་ཙྪཱ་དི་ཊྛི་ཀོཏི ཨ་ཡཱ་ཐཱ་ཝ་དི་ཊྛི་ཀོ. ས་དྡྷ་མྨཱ ཝུ་ཊྛཱ་པེ་ཏྭཱཏི ད་ས་ཀུ་ས་ལ་ཀ་མྨ་པ་ཐ་དྷ་མྨ་ཏོ ཝུ་ཊྛཱ་པེ་ཏྭཱ. ཨ་ས་དྡྷ་མྨེ པ་ཏི་ཊྛཱ་པེ་ཏཱིཏི ཨ་ཀུ་ས་ལ་ཀ་མྨ་པ་ཐེ་སུ པ་ཏི་ཊྛཱ་པེ་ཏི.
༩. པ་ཋ་མ་སེ་ཁ་སུ་ཏྟ་ཝ་ཎྞ་ནཱ
༨༩. ན་ཝ་མེ སེ་ཁ་སྶཱཏི སི་ཀྑ་ཀ་སྶ ས་ཀ་ར་ཎཱི་ཡ་སྶ. པ་རི་ཧཱ་ནཱ་ཡཱཏི ཨུ་པ་རི་གུ་ཎེ་ཧི པ་རི་ཧཱ་ན་ཏྠཱ་ཡ. ཀ་མྨཱ་རཱ་མ་ཏཱཏི ན་ཝ་ཀ་མྨེ ར་མ་ན་ཀ་བྷཱ་ཝོ. བྷ་སྶཱ་རཱ་མ་ཏཱཏི ཨཱ་ལཱ་པ་ས་ལླཱ་པེ ར་མ་ན་ཀ་བྷཱ་ཝོ. ནི་དྡཱ་རཱ་མ་ཏཱཏི ནི་དྡཱ་ཡ་ནེ ར་མ་ན་ཀ་བྷཱ་ཝོ. ས་ངྒ་ཎི་ཀཱ་རཱ་མ་ཏཱཏི ག་ཎ་ས་ངྒ་ཎི་ཀཱ་ཡ ར་མ་ན་ཀ་བྷཱ་ཝོ. ཡ་ཐཱ་ཝི་མུ་ཏྟཾ ཙི་ཏྟཾ ན པ་ཙྩ་ཝེ་ཀྑ་ཏཱིཏི ཡ་ཐཱ ཡཾ ཙི་ཏྟཾ ཝི་མུ་ཏྟཾ, ཡེ ཙ དོ་སཱ པ་ཧཱི་ནཱ, གུ་ཎཱ ཙ པ་ཊི་ལ་དྡྷཱ, ཏེ པ་ཙྩ་ཝེ་ཀྑི་ཏྭཱ ཨུ་པ་རི་གུ་ཎ་པ་ཊི་ལཱ་བྷཱ་ཡ ཝཱ་ཡཱ་མཾ ན ཀ་རོ་ཏཱི་ཏི ཨ་ཏྠོ. ཨི་ཏི ཨི་མ་སྨིཾ སུ་ཏྟེ ས་ཏྟ་ནྣཾ སེ་ཁཱ་ནཾ ཨུ་པ་རི་གུ་ཎེ་ཧི པ་རི་ཧཱ་ནི་ཀཱ་ར་ཎ་ཉྩ ཝུ་དྡྷི་ཀཱ་ར་ཎ་ཉྩ ཀ་ཐི་ཏཾ. ཡ་ཉྩ ནཱ་མ སེ་ཁ་སྶ པ་རི་ཧཱ་ན་ཀཱ་ར་ཎཾ, ཏཾ པུ་ཐུ་ཛྫ་ན་སྶ པ་ཋ་མ་མེ་ཝ ཧོ་ཏཱི་ཏི.
༡༠. དུ་ཏི་ཡ་སེ་ཁ་སུ་ཏྟ་ཝ་ཎྞ་ནཱ
༩༠. ད་ས་མེ ཝི་ཡ་ཏྟོཏི བྱ་ཏྟོ ཚེ་ཀོ. ཀིཾ་ཀ་ར་ཎཱི་ཡེ་སཱུཏི ཨི་ཏི ཀ་ཏྟ་བྦེ་སུ. ཙེ་ཏོ་ས་མ་ཐནྟི ས་མཱ་དྷི་ཀ་མྨ་ཊྛཱ་ནཾ. ཨ་ན་ནུ་ལོ་མི་ཀེ་ནཱཏི སཱ་ས་ན་སྶ ཨ་ན་ནུ་ཙྪ་ཝི་ཀེ་ན. ཨ་ཏི་ཀཱ་ལེ་ནཱཏི ཨ་ཏི་པཱ་ཏོ་ཝ. ཨ་ཏི་དི་ཝཱཏི དི་ཝཱ ཝུ་ཙྩ་ཏི མ་ཛ྄ཛྷ་ནྷི་ཀོ, ཏཾ ཨ་ཏི་ཀྐ་མི་ཏྭཱ. ཨཱ་བྷི་ས་ལླེ་ཁི་ཀཱཏི ཨ་ཏི་ཝི་ཡ ཀི་ལེ་ས་ས་ལླེ་ཁི་ཀཱ. ཙེ་ཏོ་ཝི་ཝ་ར་ཎ་ས་པྤཱ་ཡཱཏི ཙི་ཏྟ་ཝི་ཝ་ར་ཎ་ས་ངྑཱ་ཏཱ་ནཾ ས་མ་ཐ་ཝི་པ་སྶ་ནཱ་ནཾ ས་པྤཱ་ཡཱ. ཨ་པྤི་ཙྪ་ཀ་ཐཱཏི ཨ་པྤི་ཙྪཱ ཧོ་ཐཱ་ཏི ཀ་ཐ་ན་ཀ་ཐཱ. ས་ནྟུ་ཊྛི་ཀ་ཐཱཏི ཙ་ཏཱུ་ཧི པ་ཙྩ་ཡེ་ཧི ས་ནྟུ་ཊྛཱ ཧོ་ཐཱ་ཏི ཀ་ཐ་ན་ཀ་ཐཱ. པ་ཝི་ཝེ་ཀ་ཀ་ཐཱཏི ཏཱི་ཧི ཝི་ཝེ་ཀེ་ཧི ཝི་ཝི་ཏྟཱ ཧོ་ཐཱ་ཏི ཀ་ཐ་ན་ཀ་ཐཱ. ཨ་སཾ་ས་གྒ་ཀ་ཐཱཏི པ་ཉྩ་ཝི་དྷེ་ན སཾ་ས་གྒེ་ན ཨ་སཾ་ས་ཊྛཱ ཧོ་ཐཱ་ཏི ཀ་ཐ་ན་ཀ་ཐཱ. ཝཱི་རི་ཡཱ་ར་མྦྷ་ཀ་ཐཱཏི དུ་ཝི་དྷཾ ཝཱི་རི་ཡཾ ཨཱ་ར་བྷ་ཐཱ་ཏི ཀ་ཐ་ན་ཀ་ཐཱ. སཱི་ལ་ཀ་ཐཱདཱི་སུ སཱི་ལཾ ཨཱ་ར་བྦྷ ཀ་ཐཱ སཱི་ལ་ཀ་ཐཱ. ས་མཱ་དྷིཾ ཨཱ་ར་བྦྷ, པ་ཉྙཾ ཨཱ་ར་བྦྷ, པ་ཉྩ་ཝི་དྷཾ ཝི་མུ་ཏྟིཾ ཨཱ་ར་བྦྷ, ཨེ་ཀཱུ་ན་ཝཱི་ས་ཏི་པ་ཙྩ་ཝེ་ཀྑ་ཎ་ས་ངྑཱ་ཏཾ ཝི་མུ་ཏྟི་ཉཱ་ཎ་ད་སྶ་ནཾ ཨཱ་ར་བྦྷ ཀ་ཐཱ ཝི་མུ་ཏྟི་ཉཱ་ཎ་ད་སྶ་ན་ཀ་ཐཱ. ན ནི་ཀཱ་མ་ལཱ་བྷཱིཏི་ཨཱ་དཱི་སུ ན ཨི་ཙྪི་ཏི་ཙྪི་ཏ་ལཱ་བྷཱི, དུ་ཀྑ་ལཱ་བྷཱི ན ཝི་པུ་ལ་ལཱ་བྷཱི་ཏི ཨ་ཏྠོ. སེ་སཾ ཨུ་ཏྟཱ་ན་ཏྠ་མེ་ཝཱ་ཏི.
ཐེ་ར་ཝ་གྒོ ཙ་ཏུ་ཏྠོ.