(༨) ༣. ཡོ་དྷཱ་ཛཱི་ཝ་ཝ་གྒོ
༡. པ་ཋ་མ་ཙེ་ཏོ་ཝི་མུ་ཏྟི་ཕ་ལ་སུ་ཏྟ་ཝ་ཎྞ་ནཱ
༧༡. ཏ་ཏི་ཡ་སྶ པ་ཋ་མེ ཡ་ཏོ ཁོ, བྷི་ཀྑ་ཝེཏི ཧེ་ཊྛཱ ཝུ་ཏྟ་ན་ཡེ་ན ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པ་ཏྟ་སྶ བྷི་ཀྑུ་ནོ ཨི་དཱ་ནི ཝ་ཎྞ་བྷ་ཎ་ན་ཏྠཾ ཨི་དཾ ཨཱ་ར་དྡྷཾ. ཏ་ཏྠ ཡ་ཏོ ཁོཏི ཡ་དཱ ཁོ. ཨུ་ཀྑི་ཏྟ་པ་ལི་གྷོཏི ཨ་ཝི་ཛྫཱ་པ་ལི་གྷཾ ཨུ་ཀྑི་པི་ཏྭཱ ཨ་པ་ནེ་ཏྭཱ ཋི་ཏོ. སཾ་ཀི་ཎྞ་པ་རི་ཁོཏི སཾ་སཱ་ར་པ་རི་ཁཾ སཾ་ཀི་རི་ཏྭཱ ཝི་ནཱ་སེ་ཏྭཱ ཋི་ཏོ. ཨ་བྦཱུ་ལ༹ྷེ་སི་ཀོཏི ཏ་ཎྷཱ་ས་ངྑཱ་ཏཾ ཨེ་སི་ཀཱ་ཐ་མྦྷཾ ཨ་བྦུ་ཡ྄ཧ ལུ་ཉྩི་ཏྭཱ ཋི་ཏོ. ནི་ར་གྒ་ལོ༹ཏི ནཱི་ཝ་ར་ཎ་ཀ་ཝཱ་ཊཾ ཨུ་གྒྷཱ་ཊེ་ཏྭཱ ཋི་ཏོ. པ་ནྣ་དྡྷ་ཛོ པ་ནྣ་བྷཱ་རོཏི མཱ་ན་དྡྷ་ཛ་ཉྩ ཁ་ནྡྷཱ་བྷི་ས་ངྑཱ་ར་ཀི་ལེ་ས་བྷཱ་ར་ཉྩ པཱ་ཏེ་ཏྭཱ ཨོ་ཏཱ་རེ་ཏྭཱ ཋི་ཏོ. ཝི་སཾ་ཡུ་ཏྟོཏི ཝ་ཊྚེ་ན ཝི་སཾ་ཡུ་ཏྟོ. སེ་སཾ པཱ་ལི༹་ན་ཡེ་ནེ་ཝ ཝེ་དི་ཏ་བྦཾ. ཨེ་ཏྟཱ་ཝ་ཏཱ བྷ་ག་ཝ་ཏཱ མ་གྒེ་ན ཀི་ལེ་སེ ཁེ་པེ་ཏྭཱ ནི་རོ་དྷ་ས་ཡ་ན་ཝ་ར་ག་ཏ་སྶ ནི་བྦཱ་ནཱ་ར་མྨ་ཎཾ ཕ་ལ་ས་མཱ་པ་ཏྟིཾ ཨ་པྤེ་ཏྭཱ ཝི་ཧ་ར་ཏོ ཁཱི་ཎཱ་ས་ཝ་སྶ ཀཱ་ལོ ད་སྶི་ཏོ.
ཡ་ཐཱ ཧི དྭེ ན་ག་རཱ་ནི ཨེ་ཀཾ ཙོ་ར་ན་ག་རཾ ཨེ་ཀཾ ཁེ་མ་ན་ག་རཾ. ཨ་ཐ ཨེ་ཀ་སྶ མ་ཧཱ་ཡོ་དྷ་སྶ ཨེ་ཝཾ བྷ་ཝེ་ཡྻ – ‘‘ཡཱ་ཝི་མཾ ཙོ་ར་ན་ག་རཾ ཏི་ཊྛ་ཏི, ཏཱ་ཝ ཁེ་མ་ན་ག་རཾ བྷ་ཡ་ཏོ ན མུ་ཙྩ་ཏི, ཙོ་ར་ན་ག་རཾ ཨ་ན་ག་རཾ ཀ་རི་སྶཱ་མཱི’’ཏི ས་ནྣཱ་ཧཾ ཀ་ཏྭཱ ཁ་གྒཾ ག་ཧེ་ཏྭཱ ཙོ་ར་ན་ག་རཾ ཨུ་པ་ས་ངྐ་མི་ཏྭཱ ན་ག་ར་དྭཱ་རེ ཨུ་སྶཱ་པི་ཏེ ཨེ་སི་ཀཱ་ཐ་མྦྷེ ཁ་གྒེ་ན ཚི་ནྡི་ཏྭཱ ས་དྡྷིཾ དྭཱ་ར་བཱ་ཧཱ་ཧི ཀ་ཝཱ་ཊཾ བྷི་ནྡི་ཏྭཱ པ་ལི་གྷཾ ཨུ་ཀྑི་པི་ཏྭཱ པཱ་ཀཱ་རཾ བྷི་ནྡི་ཏྭཱ པ་རི་ཁཾ ཝི་ཀི་རི་ཏྭཱ ན་ག་ར་སོ་བྷ་ཏྠཱ་ཡ ཨུ་སྶི་ཏེ དྷ་ཛེ པཱ་ཏེ་ཏྭཱ ན་ག་རཾ ཨ་གྒི་ནཱ ཛྷཱ་པེ་ཏྭཱ ཁེ་མ་ན་ག་རཾ པ་ཝི་སི་ཏྭཱ པཱ་སཱ་དཾ ཨཱ་རུ་ཡ྄ཧ ཉཱ་ཏི་ག་ཎ་པ་རི་ཝུ་ཏོ སུ་ར་ས་བྷོ་ཛ་ནཾ བྷུ་ཉྫེ་ཡྻ. ཨེ་ཝཾ ཙོ་ར་ན་ག་རཾ ཝི་ཡ ས་ཀྐཱ་ཡོ, ཁེ་མ་ན་ག་རཾ ཝི་ཡ ནི་བྦཱ་ནཾ, མ་ཧཱ་ཡོ་དྷོ ཝི་ཡ ཡོ་གཱ་ཝ་ཙ་རོ. ཏ་སྶེ་ཝཾ ཧོ་ཏི – ‘‘ཡཱ་ཝ ས་ཀྐཱ་ཡ་ཝ་ཊྚཾ ཝ་ཊྚ་ཏི, ཏཱ་ཝ དྭ་ཏྟིཾ་ས་ཀ་མྨ་ཀཱ་ར་ཎཱ་ཨ་ཊྛ་ན་ཝུ་ཏི་རོ་ག་པ་ཉྩ་ཝཱི་ས་ཏི་མ་ཧཱ་བྷ་ཡེ་ཧི པ་རི་མུ་ཙྩ་ནཾ ན་ཏྠཱི’’ཏི. སོ མ་ཧཱ་ཡོ་དྷོ ས་ནྣཱ་ཧཾ ཝི་ཡ སཱི་ལ་ས་ནྣཱ་ཧཾ ཀ་ཏྭཱ པ་ཉྙཱ་ཁ་གྒཾ ག་ཧེ་ཏྭཱ ཁ་གྒེ་ན ཨེ་སི་ཀཱ་ཐ་མྦྷེ ཝི་ཡ ཨ་ར་ཧ་ཏྟ་མ་གྒེ་ན ཏ་ཎྷེ་སི་ཀཾ ལུ་ཉྩི་ཏྭཱ, སོ ཡོ་དྷོ ས་དྭཱ་ར་བཱ་ཧ་ཀཾ ན་ག་ར་ཀ་ཝཱ་ཊཾ ཝི་ཡ པ་ཉྩོ་ར་མྦྷཱ་གི་ཡ་སཾ་ཡོ་ཛ་ན་ཨ་གྒ་ལ༹ཾ ཨུ་གྒྷཱ་ཊེ་ཏྭཱ, སོ ཡོ་དྷོ པ་ལི་གྷཾ ཝི་ཡ ཨ་ཝི་ཛྫཱ་པ་ལི་གྷཾ ཨུ་ཀྑི་པི་ཏྭཱ, སོ ཡོ་དྷོ པཱ་ཀཱ་རཾ བྷི་ནྡ་ནྟོ པ་རི་ཁཾ ཝི་ཡ ཀ་མྨཱ་བྷི་ས་ངྑཱ་རཾ བྷི་ནྡ་ནྟོ ཛཱ་ཏི་སཾ་སཱ་ར་པ་རི་ཁཾ ཝི་ཀི་རི་ཏྭཱ, སོ ཡོ་དྷོ ན་ག་རཾ སོ་བྷ་ཏྠཱ་ཡ ཨུ་སྶཱ་པི་ཏ་དྡྷ་ཛེ ཝི་ཡ མཱ་ན་དྡྷ་ཛེ པཱ་ཏེ་ཏྭཱ ས་ཀྐཱ་ཡ་ན་ག་རཾ ཛྷཱ་པེ་ཏྭཱ, སོ ཡོ་དྷོ ཁེ་མ་ན་ག་རེ ཨུ་པ་རི་པཱ་སཱ་དེ སུ་བྷོ་ཛ་ནཾ ཝི་ཡ ཀི་ལེ་ས་པ་རི་ནི་བྦཱ་ན་ན་ག་རཾ པ་ཝི་སི་ཏྭཱ ཨ་མ་ཏཾ ནི་རོ་དྷཱ་ར་མྨ་ཎཾ ཕ་ལ་ས་མཱ་པ་ཏྟི་སུ་ཁཾ ཨ་ནུ་བྷ་ཝ་མཱ་ནོ ཀཱ་ལཾ ཝཱི་ཏི་ནཱ་མེ་ཏི.
༢. དུ་ཏི་ཡ་ཙེ་ཏོ་ཝི་མུ་ཏྟི་ཕ་ལ་སུ་ཏྟ་ཝ་ཎྞ་ནཱ
༧༢. དུ་ཏི་ཡེ ཨ་ནི་ཙྩ་ས་ཉྙཱཏི ཁ་ནྡྷ་པ་ཉྩ་ཀཾ ཧུ་ཏྭཱ ཨ་བྷཱ་ཝཱ་ཀཱ་རེ་ན ཨ་ནི་ཙྩ་ནྟི ཨུ་པྤ་ཛྫ་ན་ཀ་ས་ཉྙཱ. ཨ་ནི་ཙྩེ དུ་ཀྑ་ས་ཉྙཱཏི ཡ་ད་ནི་ཙྩཾ, ཏཾ པ་ཊི་པཱི་ལ༹་ནཱ་ཀཱ་རེ་ན དུ་ཀྑ་ནྟི ཨུ་པྤ་ཛྫ་ན་ཀ་ས་ཉྙཱ. དུ་ཀྑེ ཨ་ན་ཏྟ་ས་ཉྙཱཏི ཡཾ དུ་ཀྑཾ, ཏཾ ཨ་ཝ་ས་ཝ་ཏྟ་ནཱ་ཀཱ་རེ་ན ཨ་ན་ཏྟཱ་ཏི ཨུ་པྤ་ཛྫ་ན་ཀ་ས་ཉྙཱ. སེ་སཾ ཧེ་ཊྛཱ ཝུ་ཏྟ་ན་ཡ་མེ་ཝ. ཨི་མེ་སུ པ་ན དྭཱི་སུ་པི སུ་ཏྟེ་སུ ཝི་པ་སྶ་ནཱ་ཕ་ལཾ ནཱ་མ ཀ་ཐི་ཏ་ནྟི.
༣. པ་ཋ་མ་དྷ་མྨ་ཝི་ཧཱ་རཱི་སུ་ཏྟ་ཝ་ཎྞ་ནཱ
༧༣. ཏ་ཏི་ཡེ དི་ཝ་སཾ ཨ་ཏི་ནཱ་མེ་ཏཱིཏི དི་ཝ་སཾ ཨ་ཏི་ཀྐཱ་མེ་ཏི. རི་ཉྩ་ཏི པ་ཊི་ས་ལླཱ་ནནྟི ཨེ་ཀཱི་བྷཱ་ཝཾ ཝི་སྶ་ཛྫེ་ཏི. དེ་སེ་ཏཱིཏི ཀ་ཐེ་ཏི པ་ཀཱ་སེ་ཏི. དྷ་མྨ་པ་ཉྙ་ཏྟི་ཡཱཏི དྷ་མྨ་སྶ པ་ཉྙཱ་པ་ནཱ་ཡ. དྷ་མྨཾ པ་རི་ཡཱ་པུ་ཎཱ་ཏཱིཏི ན་ཝ་ངྒ་ཝ་སེ་ན ཙ་ཏུ་ས་ཙྩ་དྷ་མྨཾ པ་རི་ཡཱ་པུ་ཎཱ་ཏི ཝ་ལ༹་ཉྫེ་ཏི ཀ་ཐེ་ཏི. ན རི་ཉྩ་ཏི པ་ཊི་ས་ལླཱ་ནནྟི ཨེ་ཀཱི་བྷཱ་ཝཾ ན ཝི་སྶ་ཛྫེ་ཏི. ཨ་ནུ་ཡུ་ཉྫ་ཏི ཨ་ཛ྄ཛྷ་ཏྟཾ ཙེ་ཏོ་ས་མ་ཐནྟི ནི་ཡ་ཀ་ཛ྄ཛྷ་ཏྟེ ཙི་ཏྟ་ས་མཱ་དྷིཾ ཨཱ་སེ་ཝ་ཏི བྷཱ་ཝེ་ཏི, ས་མ་ཐ་ཀ་མྨ་ཊྛཱ་ནེ ཡུ་ཏྟ་པྤ་ཡུ་ཏྟོ ཧོ་ཏི.
ཧི་ཏེ་སི་ནཱཏི ཧི་ཏཾ ཨེ་ས་ནྟེ་ན. ཨ་ནུ་ཀ་མྤ་ཀེ་ནཱཏི ཨ་ནུ་ཀ་མྤ་མཱ་ནེ་ན. ཨ་ནུ་ཀ་མྤཾ ཨུ་པཱ་དཱ་ཡཱཏི ཨ་ནུ་ཀ་མྤཾ ཙི་ཏྟེ་ན པ་རི་གྒ་ཧེ་ཏྭཱ, པ་ཊི་ཙྩཱ་ཏི་པི ཝུ་ཏྟཾ ཧོ་ཏི. ཀ་ཏཾ ཝོ ཏཾ མ་ཡཱཏི ཏཾ མ་ཡཱ ཨི་མེ པ་ཉྩ པུ་གྒ་ལེ དེ་སེ་ནྟེ་ན ཏུ་མྷཱ་ཀཾ ཀ་ཏཾ. ཨེ་ཏྟ་ཀ་མེ་ཝ ཧི ཨ་ནུ་ཀ་མྤ་ཀ་སྶ ས་ཏྠུ ཀི་ཙྩཾ ཡ་དི་དཾ ཨ་ཝི་པ་རཱི་ཏ་དྷ་མྨ་དེ་ས་ནཱ, ཨི་ཏོ པ་རཾ པ་ན པ་ཊི་པ་ཏྟི ནཱ་མ སཱ་ཝ་ཀཱ་ནཾ ཀི་ཙྩཾ. ཏེ་ནཱ་ཧ – ཨེ་ཏཱ་ནི བྷི་ཀྑུ རུ་ཀྑ་མཱུ་ལཱ་ནི…པེ… ཨ་མྷཱ་ཀཾ ཨ་ནུ་སཱ་ས་ནཱིཏི. ཏ་ཏྠ ཙ རུ་ཀྑ་མཱུ་ལཱ་ནཱིཏི ཨི་མི་ནཱ རུ་ཀྑ་མཱུ་ལ་སེ་ནཱ་ས་ནཾ ད་སྶེ་ཏི. སུ་ཉྙཱ་གཱ་རཱ་ནཱིཏི ཨི་མི་ནཱ ཛ་ན་ཝི་ཝི་ཏྟ་ཊྛཱ་ནཾ. ཨུ་བྷ་ཡེ་ནཱ་པི ཙ ཡོ་གཱ་ནུ་རཱུ་པཾ སེ་ནཱ་ས་ན་མཱ་ཙི་ཀྑ་ཏི, དཱ་ཡ་ཛྫཾ ནི་ཡྻཱ་ཏེ་ཏི. ཛྷཱ་ཡ་ཐཱཏི ཨཱ་ར་མྨ་ཎཱུ་པ་ནི་ཛ྄ཛྷཱ་ནེ་ན ཨ་ཊྛ་ཏིཾ་སཱ་ར་མྨ་ཎཱ་ནི, ལ་ཀྑ་ཎཱུ་པ་ནི་ཛ྄ཛྷཱ་ནེ་ན ཙ ཨ་ནི་ཙྩཱ་དི་ཏོ ཁ་ནྡྷཱ་ཡ་ཏ་ནཱ་དཱི་ནི ཨུ་པ་ནི་ཛ྄ཛྷཱ་ཡ་ཐ, ས་མ་ཐ་ཉྩ ཝི་པ་སྶ་ན་ཉྩ ཝ་ཌྜྷེ་ཐཱ་ཏི ཝུ་ཏྟཾ ཧོ་ཏི. མཱ པ་མཱ་ད་ཏྠཱཏི མཱ པ་མ་ཛྫི་ཏྠ. མཱ པ་ཙྪཱ ཝི་པྤ་ཊི་སཱ་རི་ནོ ཨ་ཧུ་ཝ་ཏྠཱཏི ཡེ ཧི པུ་བྦེ ད་ཧ་ར་ཀཱ་ལེ ཨཱ་རོ་གྱ་ཀཱ་ལེ ས་ཏྟ་ས་པྤཱ་ཡཱ་དི་ས་མྤ་ཏྟི་ཀཱ་ལེ ས་ཏྠུ ས་མྨུ་ཁཱི་བྷཱ་ཝ་ཀཱ་ལེ ཙ ཡོ་ནི་སོ་མ་ན་སི་ཀཱ་ར་ཝི་ར་ཧི་ཏཱ ར་ཏྟི་ནྡི་ཝཾ མ་ངྐུ་ལ་བྷ་ཏྟཱ ཧུ་ཏྭཱ སེ་ཡྻ་སུ་ཁ་མི་དྡྷ་སུ་ཁ་མ་ནུ་ཡུ་ཏྟཱ པ་མ་ཛྫ་ནྟི, ཏེ པ་ཙྪཱ ཛ་རཱ་ཀཱ་ལེ རོ་ག་ཀཱ་ལེ མ་ར་ཎ་ཀཱ་ལེ ཝི་པ་ཏྟི་ཀཱ་ལེ ས་ཏྠུ པ་རི་ནི་བྦཱ་ན་ཀཱ་ལེ ཙ ཏཾ པུ་བྦེ པ་མཱ་ད་ཝི་ཧཱ་རཾ ཨ་ནུ་སྶ་ར་ནྟཱ ས་པྤ་ཊི་ས་ནྡྷི་ཀཱ་ལ་ཀི་རི་ཡ་ཉྩ བྷཱ་རི་ཡཾ ས་མྤ་སྶ་མཱ་ནཱ ཝི་པྤ་ཊི་སཱ་རི་ནོ ཧོ་ནྟི. ཏུ་མྷེ པ་ན ཏཱ་དི་སཱ མཱ ཨ་ཧུ་ཝ་ཏྠཱ་ཏི ཨེ་ཏ་མ་ཏྠཾ ད་སྶེ་ནྟོ ཨཱ་ཧ – ‘‘མཱ པ་ཙྪཱ ཝི་པྤ་ཊི་སཱ་རི་ནོ ཨ་ཧུ་ཝ་ཏྠཱ’’ཏི. ཨ་ཡཾ ཝོ ཨ་མྷཱ་ཀཾ ཨ་ནུ་སཱ་ས་ནཱིཏི ཨ་ཡཾ ཨ་མྷཱ་ཀཾ ས་ནྟི་ཀཱ ‘‘ཛྷཱ་ཡ་ཐ མཱ པ་མཱ་ད་ཏྠཱ’’ཏི ཏུ་མྷཱ་ཀཾ ཨ་ནུ་སཱ་ས་ནཱི, ཨོ་ཝཱ་དོ་ཏི ཝུ་ཏྟཾ ཧོ་ཏི.
༤. དུ་ཏི་ཡ་དྷ་མྨ་ཝི་ཧཱ་རཱི་སུ་ཏྟ་ཝ་ཎྞ་ནཱ
༧༤. ཙ་ཏུ་ཏྠེ ཨུ་ཏྟ་རི ཙ་སྶ པ་ཉྙཱ་ཡ ཨ་ཏྠཾ ན་པྤ་ཛཱ་ནཱ་ཏཱིཏི ཏ་ཏོ པ་རི་ཡ་ཏྟི་ཏོ ཨུ་ཏྟ་རི ཏ་སྶ དྷ་མྨ་སྶ ས་ཧ་ཝི་པ་སྶ་ནཱ་ཡ མ་གྒ་པ་ཉྙཱ་ཡ ཨ་ཏྠཾ ན་པྤ་ཛཱ་ནཱ་ཏི, ཙ་ཏྟཱ་རི ས་ཙྩཱ་ནི ན པ་སྶ་ཏི ན་པྤ་ཊི་ཝི་ཛ྄ཛྷ་ཏཱི་ཏི ཨ་ཏྠོ. སེ་ས་ཝཱ་རེ་སུ་པི ཨེ་སེ་ཝ ན་ཡོ. ཨེ་ཝ་མེ་ཏེ་སུ དྭཱི་སུ་པི སུ་ཏྟེ་སུ བ་ཧུ་སྶུ་ཏ་བྷི་ཀྑུ ཝི་པ་སྶ་ནཱ་ཀ་མྨི་ཀོ སོ་ཏཱ་པ་ནྣོ ས་ཀ་དཱ་གཱ་མཱི ཨ་ནཱ་གཱ་མཱི ཁཱི་ཎཱ་ས་ཝོ་ཏི ཚ ཛ་ནཱ དྷ་མྨ་ཝི་ཧཱ་རི་ནོ ནཱ་མཱ་ཏི ཝེ་དི་ཏ་བྦཱ.
༥. པ་ཋ་མ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ
༧༥. པ་ཉྩ་མེ ཡོ་དྷཱ་ཛཱི་ཝཱཏི ཡུ་དྡྷཱུ་པ་ཛཱི་ཝི་ནོ. ར་ཛ་གྒནྟི ཧ་ཏྠི་ཨ་སྶཱ་དཱི་ནཾ པཱ་ད་པྤ་ཧཱ་ར་བྷི་ནྣཱ་ཡ བྷཱུ་མི་ཡཱ ཨུ་གྒ་ཏཾ ར་ཛ་ཀྑ་ནྡྷཾ. ན ས་ནྠ་མྦྷ་ཏཱིཏི ས་ནྠ་མྦྷི་ཏྭཱ ཋཱ་ཏུཾ ན ས་ཀྐོ་ཏི. ས་ཧ་ཏི ར་ཛ་གྒནྟི ར་ཛ་ཀྑ་ནྡྷཾ དི་སྭཱ་པི ཨ་དྷི་ཝཱ་སེ་ཏི. དྷ་ཛ་གྒནྟི ཧ་ཏྠི་ཨ་སྶ་དཱི་ནཾ པི་ཊྛེ་སུ ཝཱ ར་ཐེ་སུ ཝཱ ཨུ་སྶཱ་པི་ཏཱ་ནཾ དྷ་ཛཱ་ནཾ ཨ་གྒཾ. ཨུ་སྶཱ་ར་ཎནྟི ཧ་ཏྠི་ཨ་སྶ་ར་ཐཱ་ན་ཉྩེ་ཝ བ་ལ་ཀཱ་ཡ་སྶ ཙ ཨུ་ཙྩཱ་ས་དྡ་མ་ཧཱ་ས་དྡཾ. ས་མྤ་ཧཱ་རེཏི ས་མཱ་ག་ཏེ ཨ་པྤ་མ་ཏྟ་ཀེ་པི པ་ཧཱ་རེ. ཧ་ཉྙ་ཏཱིཏི ཝི་ཧ་ཉྙ་ཏི ཝི་གྷཱ་ཏཾ ཨཱ་པ་ཛྫ་ཏི. བྱཱ་པ་ཛྫ་ཏཱིཏི ཝི་པ་ཏྟིཾ ཨཱ་པ་ཛྫ་ཏི, པ་ཀ་ཏི་བྷཱ་ཝཾ ཛ་ཧ་ཏི. ས་ཧ་ཏི ས་མྤ་ཧཱ་རནྟི དྭེ ཏ་ཡོ པ་ཧཱ་རེ པ་ཏྭཱ་པི ས་ཧ་ཏི ཨ་དྷི་ཝཱ་སེ་ཏི. ཏ་མེ་ཝ ས་ངྒཱ་མ་སཱི་སནྟི ཏཾ་ཡེ་ཝ ཛ་ཡ་ཀྑ་ནྡྷཱ་ཝཱ་ར་ཊྛཱ་ནཾ. ཨ་ཛ྄ཛྷཱ་ཝ་ས་ཏཱིཏི ས་ཏྟཱ་ཧ་མ་ཏྟཾ ཨ་བྷི་བྷ་ཝི་ཏྭཱ ཨཱ་ཝ་ས་ཏི. ཀིཾ ཀཱ་ར་ཎཱ? ལ་དྡྷ་པ་ཧཱ་རཱ་ནཾ པ་ཧཱ་ར་ཛ་གྒ་ན་ཏྠ་ཉྩེ་ཝ ཀ་ཏ་ཀ་མྨཱ་ནཾ ཝི་སེ་སཾ ཉ་ཏྭཱ ཋཱ་ན་ནྟ་ར་དཱ་ན་ཏྠ་ཉྩ ཨི་སྶ་རི་ཡ་སུ་ཁཱ་ནུ་བྷ་ཝ་ན་ཏྠ་ཉྩ.
ཨི་དཱ་ནི ཡ་སྨཱ ས་ཏྠུ ཡོ་དྷཱ་ཛཱི་ཝེ་ཧི ཀི་ཙྩཾ ན་ཏྠི, ཨི་མ་སྨིཾ པ་ན སཱ་ས་ནེ ཏ་ཐཱ་རཱུ་པེ པ་ཉྩ པུ་གྒ་ལེ ད་སྶེ་ཏུཾ ཨི་དཾ ཨོ་པ་མྨཾ ཨཱ་བྷ་ཏཾ. ཏ་སྨཱ ཏེ པུ་གྒ་ལེ ད་སྶེ་ནྟོ ཨེ་ཝ་མེ་ཝ ཁོཏི་ཨཱ་དི་མཱ་ཧ. ཏ་ཏྠ སཾ་སཱི་ད་ཏཱིཏི མི་ཙྪཱ་ཝི་ཏ་ཀྐ་སྨིཾ སཾ་སཱི་ད་ཏི ཨ་ནུ་པྤ་ཝི་ས་ཏི. ན ས་ཀྐོ་ཏི བྲ་ཧྨ་ཙ་རི་ཡཾ ས་ནྡྷཱ་རེ་ཏུནྟི བྲ་ཧྨ་ཙ་རི་ཡ་ཝཱ་སཾ ཨ་ནུ་པ་ཙྪི་ཛྫ་མཱ་ནཾ གོ་པེ་ཏུཾ ན ས་ཀྐོ་ཏི. སི་ཀྑཱ་དུ་བྦ་ལྱཾ ཨཱ་ཝི་ཀ་ཏྭཱཏི སི་ཀྑཱ་ཡ དུ་བྦ་ལ་བྷཱ་ཝཾ པ་ཀཱ་སེ་ཏྭཱ. ཀི་མ་སྶ ར་ཛ་གྒ་སྨིནྟི ཀིཾ ཏ་སྶ པུ་གྒ་ལ་སྶ ར་ཛ་གྒཾ ནཱ་མཱ་ཏི ཝ་ད་ཏི. ཨ་བྷི་རཱུ་པཱཏི ཨ་བྷི་རཱུ་པ་ཝ་ཏཱི. ད་སྶ་ནཱི་ཡཱཏི ད་སྶ་ན་ཡོ་གྒཱ. པཱ་སཱ་དི་ཀཱཏི ད་སྶ་ནེ་ནེ་ཝ ཙི་ཏྟ་པྤ་སཱ་དཱ་ཝ་ཧཱ. པ་ར་མཱ་ཡཱཏི ཨུ་ཏྟ་མཱ་ཡ. ཝ་ཎྞ་པོ་ཀྑ་ར་ཏཱ་ཡཱཏི ས་རཱི་ར་ཝ་ཎྞེ་ན ཙེ་ཝ ཨ་ངྒ་ས་ཎྛཱ་ནེ་ན ཙ. ཨཱུ་ཧ་ས་ཏཱིཏི ཨ་ཝ་ཧ་ས་ཏི. ཨུ་ལླ་པ་ཏཱིཏི ཀ་ཐེ་ཏི. ཨུ་ཛ྄ཛྷ་གྒྷ་ཏཱིཏི པཱ་ཎིཾ པ་ཧ་རི་ཏྭཱ མ་ཧཱ་ཧ་སི་ཏཾ ཧ་ས་ཏི. ཨུ་པྤ་ཎྜེ་ཏཱིཏི ཨུ་པྤ་ཎྜ་ན་ཀ་ཐཾ ཀ་ཐེ་ཏི. ཨ་བྷི་ནི་སཱི་ད་ཏཱིཏི ཨ་བྷི་བྷ་ཝི་ཏྭཱ ས་ནྟི་ཀེ ཝཱ ཨེ་ཀཱ་ས་ནེ ཝཱ ནི་སཱི་ད་ཏི. དུ་ཏི་ཡ་པ་དེ་པི ཨེ་སེ་ཝ ན་ཡོ. ཨ་ཛ྄ཛྷོ་ཏྠ་ར་ཏཱིཏི ཨ་ཝ་ཏྠ་ར་ཏི. ཝི་ནི་ཝེ་ཋེ་ཏྭཱ ཝི་ནི་མོ་ཙེ་ཏྭཱཏི ག་ཧི་ཏ་ཊྛཱ་ན་ཏོ ཏ་སྶཱ ཧ་ཏྠཾ ཝི་ནི་བྦེ་ཋེ་ཏྭཱ ཙེ་ཝ མོ་ཙེ་ཏྭཱ ཙ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི. ཨི་མ་སྨིཾ སུ་ཏྟེ ཝ་ཊྚ་ཝི་ཝ་ཊྚཾ ཀ་ཐི་ཏཾ.
༦. དུ་ཏི་ཡ་ཡོ་དྷཱ་ཛཱི་ཝ་སུ་ཏྟ་ཝ་ཎྞ་ནཱ
༧༦. ཚ་ཊྛེ ཨ་སི་ཙ་མྨཾ ག་ཧེ་ཏྭཱཏི ཨ་སི་ཉྩ ཙ་མྨ་ཉྩ ག་ཧེ་ཏྭཱ. དྷ་ནུ་ཀ་ལཱ་པཾ ས་ནྣ་ཡ྄ཧི་ཏྭཱཏི དྷ་ནུ་ཉྩ ས་ར་ཀ་ལཱ་པ་ཉྩ ས་ནྣ་ཡ྄ཧི་ཏྭཱ. ཝི་ཡཱུ་ལ༹ྷནྟི ཡུ་དྡྷ་ས་ནྣི་ཝེ་ས་ཝེ་སེ་ན ཋི་ཏཾ. ས་ངྒཱ་མཾ ཨོ་ཏ་ར་ཏཱིཏི མ་ཧཱ་ཡུ་དྡྷཾ ཨོ་ཏ་ར་ཏི. ཨུ་སྶ་ཧ་ཏི ཝཱ་ཡ་མ་ཏཱིཏི ཨུ་སྶཱ་ཧ་ཉྩ ཝཱ་ཡཱ་མ་ཉྩ ཀ་རོ་ཏི. ཧ་ན་ནྟཱིཏི གྷཱ་ཏེ་ནྟི. པ་རི་ཡཱ་པཱ་དེ་ནྟཱིཏི པ་རི་ཡཱ་པཱ་ད་ཡ་ནྟི. ཨུ་པ་ལི་ཀྑ་ནྟཱིཏི ཝི་ཛ྄ཛྷ་ནྟི. ཨ་པ་ནེ་ནྟཱིཏི ས་ཀ་སེ་ནཾ ག་ཧེ་ཏྭཱ ག་ཙྪ་ནྟི. ཨ་པ་ནེ་ཏྭཱ ཉཱ་ཏ་ཀཱ་ནཾ ནེ་ནྟཱིཏི ས་ཀ་སེ་ནཾ ནེ་ཏྭཱ ཏ་ཏོ ཉཱ་ཏ་ཀཱ་ནཾ ས་ནྟི་ཀཾ ནེ་ནྟི. ནཱི་ཡ་མཱ་ནོཏི ཨ་ཏྟ་ནོ གེ་ཧཾ ཝཱ སེ་ས་ཉཱ་ཏི་ས་ནྟི་ཀཾ ཝཱ ནི་ཡྻ་མཱ་ནོ. ཨུ་པ་ཊྛ་ཧ་ནྟི པ་རི་ཙ་ར་ནྟཱིཏི པ་ཧཱ་ར་སོ་དྷ་ན་ཝ་ཎ་ཀ་པྤ་ནཱ་དཱི་ནི ཀ་རོ་ནྟཱ ཛ་གྒ་ནྟི གོ་པ་ཡ་ནྟི.
ཨ་ར་ཀྑི་ཏེ་ནེ་ཝ ཀཱ་ཡེ་ནཱཏི ཨ་ར་ཀྑི་ཏེ་ན ཀཱ་ཡ་དྭཱ་རེ་ན. ཨ་ར་ཀྑི་ཏཱ་ཡ ཝཱ་ཙཱ་ཡཱཏི ཨ་ར་ཀྑི་ཏེ་ན ཝ་ཙཱི་དྭཱ་རེ་ན. ཨ་ར་ཀྑི་ཏེ་ན ཙི་ཏྟེ་ནཱཏི ཨ་ར་ཀྑི་ཏེ་ན མ་ནོ་དྭཱ་རེ་ན. ཨ་ནུ་པ་ཊྛི་ཏཱ་ཡ ས་ཏི་ཡཱཏི ས་ཏིཾ སུ་པ་ཊྛི་ཏཾ ཨ་ཀ་ཏྭཱ. ཨ་སཾ་ཝུ་ཏེ་ཧི ཨི་ནྡྲི་ཡེ་ཧཱིཏི མ་ན་ཙྪ་ཊྛེ་ཧི ཨི་ནྡྲི་ཡེ་ཧི ཨ་པི་ཧི་ཏེ་ཧི ཨ་གོ་པི་ཏེ་ཧི. རཱ་གོ ཙི་ཏྟཾ ཨ་ནུ་དྡྷཾ་སེ་ཏཱིཏི རཱ་གོ ཨུ་པྤ་ཛྫ་མཱ་ནོ་ཝ ས་མ་ཐ་ཝི་པ་སྶ་ནཱ་ཙི་ཏྟཾ དྷཾ་སེ་ཏི, དཱུ་རེ ཁི་པ་ཏི. རཱ་ག་པ་རི་ཡུ་ཊྛི་ཏོ་མྷི, ཨཱ་ཝུ་སོ, རཱ་ག་པ་རེ་ཏོཏི ཨ་ཧཾ, ཨཱ་ཝུ་སོ, རཱ་གེ་ན ར་ཏྟོ, རཱ་གེ་ན ཨ་ནུ་ག་ཏོ.
ཨ་ཊྛི་ཀ་ངྐ་ལཱུ་པ་མཱཏི་ཨཱ་དཱི་སུ ཨ་ཊྛི་ཀ་ངྐ་ལཱུ་པ་མཱ ཨ་པྤ་སྶཱ་ད་ཊྛེ་ན. མཾ་ས་པེ་སཱུ་པ་མཱ བ་ཧུ་སཱ་དྷཱ་ར་ཎ་ཊྛེ་ན. ཏི་ཎུ་ཀྐཱུ་པ་མཱ ཨ་ནུ་ད་ཧ་ན་ཊྛེ་ན. ཨ་ངྒཱ་ར་ཀཱ་སཱུ་པ་མཱ མ་ཧཱ་བྷི་ཏཱ་པ་ཊྛེ་ན. སུ་པི་ན་ཀཱུ་པ་མཱ ཨི་ཏྟ་ར་པ་ཙྩུ་པ་ཊྛཱ་ན་ཊྛེ་ན. ཡཱ་ཙི་ཏ་ཀཱུ་པ་མཱ ཏཱ་ཝ་ཀཱ་ལི་ཀ་ཊྛེ་ན. རུ་ཀྑ་ཕ་ལཱུ་པ་མཱ ས་བྦ་ངྒ་པ་ཙྩ་ངྒ་པ་ལི་བྷ་ཉྫ་ན་ཊྛེ་ན. ཨ་སི་སཱུ་ནཱུ་པ་མཱ ཨ་དྷི་ཀུ་ཊྚ་ན་ཊྛེ་ན. ས་ཏྟི་སཱུ་ལཱུ་པ་མཱ ཝི་ནི་ཝི་ཛ྄ཛྷ་ན་ཊྛེ་ན. ས་པྤ་སི་རཱུ་པ་མཱ སཱ་ས་ངྐ་ས་པྤ་ཊི་བྷ་ཡ་ཊྛེ་ན. ཨུ་སྶ་ཧི་སྶཱ་མཱིཏི ཨུ་སྶཱ་ཧཾ ཀ་རི་སྶཱ་མི. དྷཱ་ར་ཡི་སྶཱ་མཱིཏི ས་མ་ཎ་བྷཱ་ཝཾ དྷཱ་ར་ཡི་སྶཱ་མི. ཨ་བྷི་ར་མི་སྶཱ་མཱིཏི ཨ་བྷི་ར་ཏིཾ ཨུ་པྤཱ་དེ་སྶཱ་མི ན ཨུ་ཀྐ་ཎྛི་སྶཱ་མི. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝ. ཨི་མ་སྨིཾ སུ་ཏྟེ ཝ་ཊྚ་ཝི་ཝ་ཊྚཾ ཀ་ཐི་ཏ་ནྟི.
༧. པ་ཋ་མ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༧༧. ས་ཏྟ་མེ ཨཱ་ར་ཉྙ་ཀེ་ནཱཏི ཨ་ར་ཉྙ་ཝཱ་སི་ནཱ. ཨ་པྤ་ཏྟ་སྶཱཏི ཨ་ས་མྤ་ཏྟ་སྶ ཛྷཱ་ན་ཝི་པ་སྶ་ནཱ་མ་གྒ་ཕ་ལ་པྤ་བྷེ་ད་སྶ ཝི་སེ་ས་སྶ པ་ཏྟི་ཡཱ. སེ་ས་པ་དེ་སུ་པི ཨེ་སེ་ཝ ན་ཡོ. སོ མ་མ་སྶ ཨ་ནྟ་རཱ་ཡོཏི སོ མ་མ ཛཱི་ཝི་ཏ་ནྟ་རཱ་ཡོ ཙ བྲ་ཧྨ་ཙ་རི་ཡ་ནྟ་རཱ་ཡོ ཙ, པུ་ཐུ་ཛྫ་ན་ཀཱ་ལ་ཀི་རི་ཡཾ ཀ་རོ་ནྟ་སྶ ས་གྒ་ནྟ་རཱ་ཡོ ཙ མ་གྒ་ནྟ་རཱ་ཡོ ཙ བྷ་ཝེ་ཡྻ. ཧ་ནྡཱཏི ཝ་ཝ་སྶ་གྒ་ཏྠེ ནི་པཱ་ཏོ. ཝཱི་རི་ཡཾ ཨཱ་ར་བྷཱ་མཱིཏི དུ་ཝི་དྷ་མྤི ཝཱི་རི་ཡཾ ཀ་རོ་མི. ས་ཏྠ་ཀཱཏི ས་ཏྠཾ ཝི་ཡ ས་ནྡྷི་བ་ནྡྷ་ན་ཙྪེ་ད་ཀ་ཝཱ་ཏཱ. ཝཱ་ལེ༹་ཧཱིཏི ཀ་ཀྑ་ལེ༹་ཧི. མཱ་ཎ་ཝེ་ཧཱིཏི ཙོ་རེ་ཧི. ཀ་ཏ་ཀ་མྨེ་ཧི ཝཱ ཨ་ཀ་ཏ་ཀ་མྨེ་ཧི ཝཱཏི ཨེ་ཏྠ ཙོ་རི་ཀཾ ཀ་ཏྭཱ ནི་ཀྑ་ནྟཱ ཀ་ཏ་ཀ་མྨཱ ནཱ་མ, ཙོ་རི་ཀཾ ཀཱ་ཏུཾ ག་ཙྪ་ནྟཱ ཨ་ཀ་ཏ་ཀ་མྨཱ ནཱ་མ. ཏ་ཏྠ ཀ་ཏ་ཀ་མྨཱ ཀ་མྨ་སྶ ནི་པྥ་ནྣ་ཏྟཱ ས་ཏྟཱ་ནཾ ག་ལ་ལོ་ཧི་ཏཾ ག་ཧེ་ཏྭཱ དེ་ཝ་ཏཱ་ནཾ བ་ལིཾ ཀ་རོ་ནྟི, ཨ་ཀ་ཏ་ཀ་མྨཱ ‘‘ཨེ་ཝཾ ནོ ཀ་མྨཾ ནི་པྥ་ཛྫི་སྶ་ཏཱི’’ཏི པ་ཋ་མ་ཏ་རཾ ཀ་རོ་ནྟི. ཨི་དཾ ས་ནྡྷཱ་ཡ ཏེ མཾ ཛཱི་ཝི་ཏཱ ཝོ་རོ་པེ་ཡྻུནྟི ཝུ་ཏྟཾ. ཝཱ་ལཱ༹ ཨ་མ་ནུ་སྶཱཏི ཀ་ཀྑ་ལཱ༹ དུ་ཊྛཱ ཡ་ཀྑཱ་ད་ཡོ ཨ་མ་ནུ་སྶཱ.
༨. དུ་ཏི་ཡ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༧༨. ཨ་ཊྛ་མེ པུ་རཱ མཾ སོ དྷ་མྨོ ཨཱ་ག་ཙྪ་ཏཱིཏི ཡཱ་ཝ སོ དྷ་མྨོ མཾ ན ཨུ་པ་ག་ཙྪ་ཏི, ཏཱ་ཝ ཨ་ཧཾ པུ་རེ་ཏ་ར་མེ་ཝ ཝཱི་རི་ཡཾ ཨཱ་ར་བྷཱ་མཱི་ཏི ཨ་ཏྠོ. ཁཱི་རོ་ད་ཀཱི་བྷཱུ་ཏཱཏི ཁཱི་རོ་ད་ཀཾ ཝི་ཡ བྷཱུ་ཏཱ ཨེ་ཀཱི་བྷཱ་ཝཾ ཨུ་པ་ག་ཏཱ. པི་ཡ་ཙ་ཀྑཱུ་ཧཱིཏི མེ་ཏྟ་ཙ་ཀྑཱུ་ཧི.
༩. ཏ་ཏི་ཡ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༧༩. ན་ཝ་མེ དྷ་མྨ་ས་ནྡོ་སཱ ཝི་ན་ཡ་ས་ནྡོ་སོཏི དྷ་མྨ་ས་ནྡོ་སེ་ན ཝི་ན་ཡ་ས་ནྡོ་སོ ཧོ་ཏི. ཀ་ཐཾ པ་ན དྷ་མྨ་སྨིཾ དུ་སྶ་ནྟེ ཝི་ན་ཡོ དུ་སྶ་ཏི ནཱ་མ? ས་མ་ཐ་ཝི་པ་སྶ་ནཱ་དྷ་མྨེ་སུ ག་བྦྷཾ ཨ་གྒ་ཎྷ་ནྟེ་སུ པ་ཉྩ་ཝི་དྷོ ཝི་ན་ཡོ ན ཧོ་ཏི, ཨེ་ཝཾ དྷ་མྨེ དུ་སྶ་ནྟེ ཝི་ན་ཡོ དུ་སྶ་ཏི. དུ་སྶཱི་ལ་སྶ པ་ན སཾ་ཝ་ར་ཝི་ན་ཡོ ནཱ་མ ན ཧོ་ཏི, ཏ་སྨིཾ ཨ་ས་ཏི ས་མ་ཐ་ཝི་པ་སྶ་ནཱ ག་བྦྷཾ ན ག་ཎྷཱ་ཏི. ཨེ་ཝཾ ཝི་ན་ཡ་ས་ནྡོ་སེ་ན་པི དྷ་མྨ་ས་ནྡོ་སོ ཝེ་དི་ཏ་བྦོ. ཨ་བྷི་དྷ་མྨ་ཀ་ཐནྟི སཱི་ལཱ་དི་ཨུ་ཏྟ་མ་དྷ་མྨ་ཀ་ཐཾ. ཝེ་ད་ལླ་ཀ་ཐནྟི ཝེ་ད་པ་ཊི་སཾ་ཡུ་ཏྟཾ ཉཱ་ཎ་མི་སྶ་ཀ་ཀ་ཐཾ. ཀ་ཎྷ་དྷ་མྨཾ ཨོ་ཀྐ་མ་མཱ་ནཱཏི ར་ནྡྷ་ག་ཝེ་སི་ཏཱ་ཡ ཨུ་པཱ་ར་མྦྷ་པ་རི་ཡེ་ས་ན་ཝ་སེ་ན ཀཱ་ལ༹་ཀ་དྷ་མྨཾ ཨོ་ཀྐ་མ་མཱ་ནཱ. ཨ་པི་ཙ དུ་ཊྛ་ཙི་ཏྟེ་ན པུ་གྒ་ལཾ གྷ་ཊྚེ་ནྟཱ་པི ཏཾ ཀ་ཎྷ་དྷ་མྨཾ ཨ་ཏྟ་ནོ ད་ཧ་ནྟཱ་པི ལཱ་བྷ་ས་ཀྐཱ་ར་ཏྠཾ ཀ་ཐེ་ནྟཱ་པི ཀ་ཎྷ་དྷ་མྨཾ ཨོ་ཀྐ་མ་ནྟི་ཡེ་ཝ.
ག་མྦྷཱི་རཱཏི པཱ་ལི༹་ག་མྦྷཱི་རཱ. ག་མྦྷཱི་ར་ཏྠཱཏི ཨ་ཏྠ་ག་མྦྷཱི་རཱ. ལོ་ཀུ་ཏྟ་རཱཏི ལོ་ཀུ་ཏྟ་ར་དྷ་མྨ་དཱི་པ་ཀཱ. སུ་ཉྙ་ཏཱ་པ་ཊི་སཾ་ཡུ་ཏྟཱཏི ཁ་ནྡྷ་དྷཱ་ཏུ་ཨཱ་ཡ་ཏ་ན་པ་ཙྩ་ཡཱ་ཀཱ་ར་པ་ཊི་སཾ་ཡུ་ཏྟཱ. ན ཨ་ཉྙཱ ཙི་ཏྟཾ ཨུ་པ་ཊྛ་པེ་སྶ་ནྟཱིཏི ཛཱ་ན་ན་ཏྠཱ་ཡ ཙི་ཏྟཾ ན ཋ་པེ་སྶ་ནྟི. ཨུ་གྒ་ཧེ་ཏ་བྦཾ པ་རི་ཡཱ་པུ་ཎི་ཏ་བྦནྟི ཨུ་གྒ་ཧེ་ཏ་བྦེ ཙ ཝ་ལ༹་ཉྫེ་ཏ་བྦེ ཙ. ཀ་ཝི་ཏཱཏི སི་ལོ་ཀཱ་དི་བ་ནྡྷ་ན་ཝ་སེ་ན ཀ་ཝཱི་ཧི ཀ་ཏཱ. ཀཱ་ཝེ་ཡྻཱཏི ཏ་སྶེ་ཝ ཝེ་ཝ་ཙ་ནཾ. བཱ་ཧི་ར་ཀཱཏི སཱ་ས་ན་ཏོ བ་ཧི་དྡྷཱ ཋི་ཏཱ. སཱ་ཝ་ཀ་བྷཱ་སི་ཏཱཏི བཱ་ཧི་ར་སཱ་ཝ་ཀེ་ཧི བྷཱ་སི་ཏཱ. སེ་ས་མེ་ཏྠ ཧེ་ཊྛཱ ཝུ་ཏྟ་ན་ཡ་ཏྟཱ སུ་ཝི་ཉྙེ་ཡྻ་ཏྟཱ ཙ ཨུ་ཏྟཱ་ན་ཏྠ་མེ་ཝ.
༡༠. ཙ་ཏུ་ཏྠ་ཨ་ནཱ་ག་ཏ་བྷ་ཡ་སུ་ཏྟ་ཝ་ཎྞ་ནཱ
༨༠. ད་ས་མེ ཀ་ལྱཱ་ཎ་ཀཱ་མཱཏི སུ་ནྡ་ར་ཀཱ་མཱ. ར་ས་གྒཱ་ནཱིཏི ཨུ་ཏྟ་མ་ར་སཱ་ནི. སཾ་ས་ཊྛཱ ཝི་ཧ་རི་སྶ་ནྟཱིཏི པ་ཉྩ་ཝི་དྷེ་ན སཾ་ས་གྒེ་ན སཾ་ས་ཊྛཱ ཝི་ཧ་རི་སྶ་ནྟི. ས་ནྣི་དྷི་ཀཱ་ར་པ་རི་བྷོ་གནྟི ས་ནྣི་དྷི་ཀ་ཏ་སྶ པ་རི་བྷོ་གཾ. ཨོ་ལཱ༹་རི་ཀ་མྤི ནི་མི་ཏྟནྟི ཨེ་ཏྠ པ་ཐ་ཝིཾ ཁ་ཎ་ནྟོ་པི ཁ་ཎཱ་ཧཱི་ཏི ཨཱ་ཎཱ་པེ་ནྟོ་པི པ་ཐ་ཝི་ཡཾ ཨོ་ལཱ༹་རི་ཀཾ ནི་མི་ཏྟཾ ཀ་རོ་ཏི ནཱ་མ. ཏི་ཎ་ཀ་ཊྛ་སཱ་ཁཱ་པ་ལཱ་སཾ ཚི་ནྡ་ནྟོ་པི ཚི་ནྡཱ་ཏི ཨཱ་ཎཱ་པེ་ནྟོ་པི ཧ་རི་ཏ་གྒེ ཨོ་ལཱ༹་རི་ཀཾ ནི་མི་ཏྟཾ ཀ་རོ་ཏི ནཱ་མ. ཨཱ་ཛཱི་ཝ་ཏྠཱ་ཡ པ་ཎྞ་ནི་ཝཱ་པ་ཨཱ་དཱི་ནི གཱ་ཧཱ་པེ་ནྟོ ཕ་ལཱ་ནི ཨོ་ཙི་ན་ནྟེ ཝཱ ཨོ་ཙི་ནཱ་པེ་ནྟེ་ན ཝ་ཏྟ་བྦ་མེ་ཝ ན་ཏྠི. ཨི་མེ་སུ ཙ་ཏཱུ་སུ སུ་ཏྟེ་སུ ས་ཏྠཱ་རཱ སཱ་ས་ནེ ཝུ་དྡྷི་པ་རི་ཧཱ་ནི ཀ་ཐི་ཏཱ་ཏི.
ཡོ་དྷཱ་ཛཱི་ཝ་ཝ་གྒོ ཏ་ཏི་ཡོ.