༣. པ་ཉྩ་ངྒི་ཀ་ཝ་གྒོ
༡. པ་ཋ་མ་ཨ་གཱ་ར་ཝ་སུ་ཏྟ་ཝ་ཎྞ་ནཱ
༢༡. ཏ་ཏི་ཡ་སྶ པ་ཋ་མེ ཨ་ས་བྷཱ་ག་ཝུ་ཏྟི་ཀོཏི ཨ་ས་བྷཱ་གཱ་ཡ ཝི་ས་དི་སཱ་ཡ ཛཱི་ཝི་ཏ་ཝུ་ཏྟི་ཡཱ ས་མ་ནྣཱ་ག་ཏོ. ཨཱ་བྷི་ས་མཱ་ཙཱ་རི་ཀཾ དྷ་མྨནྟི ཨུ་ཏྟ་མ་ས་མཱ་ཙཱ་ར་བྷཱུ་ཏཾ ཝ་ཏྟ་ཝ་སེ་ན པ་ཉྙ་ཏྟ་སཱི་ལཾ. སེ་ཁཾ དྷ་མྨནྟི སེ་ཁ་པ་ཎྞ་ཏྟི་སཱི་ལཾ. སཱི་ལཱ་ནཱིཏི ཙ་ཏྟཱ་རི མ་ཧཱ་སཱི་ལཱ་ནི. ས་མྨཱ་དི་ཊྛིནྟི ཝི་པ་སྶ་ནཱ་ས་མྨཱ་དི་ཊྛིཾ. ས་མྨཱ་ས་མཱ་དྷིནྟི མ་གྒ་ས་མཱ་དྷི་ཉྩེ་ཝ ཕ་ལ་ས་མཱ་དྷི་ཉྩ. ཨི་མ་སྨིཾ སུ་ཏྟེ སཱི་ལཱ་དཱི་ནི མི་སྶ་ཀཱ་ནི ཀ་ཐི་ཏཱ་ནི.
༢. དུ་ཏི་ཡ་ཨ་གཱ་ར་ཝ་སུ་ཏྟ་ཝ་ཎྞ་ནཱ
༢༢. དུ་ཏི་ཡེ སཱི་ལ་ཀྑ་ནྡྷནྟི སཱི་ལ་རཱ་སིཾ. སེ་ས་དྭ་ཡེ་པི ཨེ་སེ་ཝ ན་ཡོ. ཨི་མེ པ་ན ཏ་ཡོ་པི ཁ་ནྡྷཱ མི་སྶ་ཀཱ་ཝ ཀ་ཐི་ཏཱ་ཏི.
༣. ཨུ་པ་ཀྐི་ལེ་ས་སུ་ཏྟ་ཝ་ཎྞ་ནཱ
༢༣. ཏ་ཏི་ཡེ ན ཙ པ་བྷ་སྶ་རནྟི ན ཙ པ་བྷཱ་ཝ་ནྟཾ. པ་བྷ་ངྒུ ཙཱཏི པ་བྷི་ཛྫ་ན་ས་བྷཱ་ཝཾ. ཨ་ཡོཏི ཀཱ་ལ༹་ལོ་ཧཾ. ལོ་ཧནྟི ཋ་པེ་ཏྭཱ ཨི་དྷ ཝུ་ཏྟཱ་ནི ཙ་ཏྟཱ་རི ཨ་ཝ་སེ་སཾ ལོ་ཧཾ. ས་ཛ྄ཛྷནྟི ར་ཛ་ཏཾ. ཙི་ཏྟ་སྶཱཏི ཙཱ་ཏུ་བྷཱུ་མ་ཀ་ཀུ་ས་ལ་ཙི་ཏྟ་སྶ. ཏེ་བྷཱུ་མ་ཀ་སྶ ཏཱ་ཝ ཨུ་པ་ཀྐི་ལེ་སཱ ཧོ་ནྟུ, ལོ་ཀུ་ཏྟ་ར་སྶ ཀ་ཐཾ ཧོ་ནྟཱི་ཏི? ཨུ་པྤ་ཛྫི་ཏུཾ ཨ་པྤ་དཱ་ནེ་ན. ཡ་ད་གྒེ་ན ཧི ཨུ་པྤ་ཛྫི་ཏུཾ ན དེ་ནྟི, ཏ་ད་གྒེ་ནེ་ཝ ཏེ ལོ་ཀི་ཡ་སྶ་པི ལོ་ཀུ་ཏྟ་ར་སྶ་པི ཨུ་པ་ཀྐི་ལེ་སཱ ནཱ་མ ཧོ་ནྟི. པ་བྷ་ངྒུ ཙཱཏི ཨཱ་ར་མྨ་ཎེ ཙུ་ཎྞ་ཝི་ཙུ་ཎྞ་བྷཱ་ཝཱུ་པ་ག་མ་ནེ་ན བྷི་ཛྫ་ན་ས་བྷཱ་ཝཾ. ས་མྨཱ ས་མཱ་དྷི་ཡ་ཏི ཨཱ་ས་ཝཱ་ནཾ ཁ་ཡཱ་ཡཱཏི ཨཱ་ས་ཝཱ་ནཾ ཁ་ཡ་ས་ངྑཱ་ཏ་སྶ ཨ་ར་ཧ་ཏྟ་སྶ ཨ་ཏྠཱ་ཡ ཧེ་ཏུ་ནཱ ཀཱ་ར་ཎེ་ན ས་མཱ་དྷི་ཡ་ཏི. ཨེ་ཏྟཱ་ཝ་ཏཱ ཙི་ཏྟཾ ཝི་སོ་དྷེ་ཏྭཱ ཨ་ར་ཧ་ཏྟེ པ་ཏི་ཊྛི་ཏཾ ཁཱི་ཎཱ་ས་ཝཾ ད་སྶེ་ཏི. ཨི་དཱ་ནི་སྶ ཨ་བྷི་ཉྙཱ་པ་ཊི་ཝེ་དྷཾ ད་སྶེ་ནྟོ ཡ་སྶ ཡ་སྶ ཙཱཏི་ཨཱ་དི་མཱ་ཧ. ཏཾ ཨུ་ཏྟཱ་ན་ཏྠ་མེ་ཝཱ་ཏི.
༤. དུ་སྶཱི་ལ་སུ་ཏྟ་ཝ་ཎྞ་ནཱ
༢༤. ཙ་ཏུ་ཏྠེ ཧ་ཏཱུ་པ་ནི་སོཏི ཧ་ཏ་ཨུ་པ་ནི་སྶ་ཡོ ཧ་ཏ་ཀཱ་ར་ཎོ. ཡ་ཐཱ་བྷཱུ་ཏ་ཉཱ་ཎ་ད་སྶ་ནནྟི ནཱ་མ་རཱུ་པ་པ་རི་ཙྪེ་ད་ཉཱ་ཎཾ ཨཱ་དིཾ ཀ་ཏྭཱ ཏ་རུ་ཎ་ཝི་པ་སྶ་ནཱ. ནི་བྦི་དཱ་ཝི་རཱ་གོཏི ནི་བྦི་དཱ ཙ ཝི་རཱ་གོ ཙ. ཏ་ཏྠ ནི་བྦི་དཱ བ་ལ་ཝ་ཝི་པ་སྶ་ནཱ, ཝི་རཱ་གོ མ་གྒོ. ཝི་མུ་ཏྟི་ཉཱ་ཎ་ད་སྶ་ནནྟི ཕ་ལ་ཝི་མུ་ཏྟི ཙ པ་ཙྩ་ཝེ་ཀྑ་ཎ་ཉཱ་ཎ་ཉྩ.
༥. ཨ་ནུ་གྒ་ཧི་ཏ་སུ་ཏྟ་ཝ་ཎྞ་ནཱ
༢༥. པ་ཉྩ་མེ ས་མྨཱ་དི་ཊྛཱིཏི ཝི་པ་སྶ་ནཱ་ས་མྨཱ་དི་ཊྛི. ཙེ་ཏོ་ཝི་མུ་ཏྟི་ཕ་ལཱཏི་ཨཱ་དཱི་སུ ཙེ་ཏོ་ཝི་མུ་ཏྟཱིཏི མ་གྒ་ཕ་ལ་ས་མཱ་དྷི. པ་ཉྙཱ་ཝི་མུ་ཏྟཱིཏི ཕ་ལ་ཉཱ་ཎཾ. སཱི་ལཱ་ནུ་གྒ་ཧི་ཏཱཏི སཱི་ལེ་ན ཨ་ནུ་གྒ་ཧི་ཏཱ ཨ་ནུ་ར་ཀྑི་ཏཱ. སུ་ཏཱ་ནུ་གྒ་ཧི་ཏཱཏི བཱ་ཧུ་ས་ཙྩེ་ན ཨ་ནུ་གྒ་ཧི་ཏཱ. སཱ་ཀ་ཙྪཱ་ནུ་གྒ་ཧི་ཏཱཏི དྷ་མྨ་སཱ་ཀ་ཙྪཱ་ཡ ཨ་ནུ་གྒ་ཧི་ཏཱ. ས་མ་ཐཱ་ནུ་གྒ་ཧི་ཏཱཏི ཙི་ཏྟེ་ཀ་གྒ་ཏཱ་ཡ ཨ་ནུ་གྒ་ཧི་ཏཱ.
ཨི་མ་སྶ པ་ན་ཏྠ་སྶ ཨཱ་ཝི་བྷཱ་ཝ་ཏྠཾ མ་དྷུ་ར་མྦ་བཱི་ཛཾ རོ་པེ་ཏྭཱ ས་མ་ནྟཱ མ་རི་ཡཱ་དཾ བ་ནྡྷི་ཏྭཱ ཀཱ་ལཱ་ནུ་ཀཱ་ལཾ ཨུ་ད་ཀཾ ཨཱ་སི་ཉྩི་ཏྭཱ ཀཱ་ལཱ་ནུ་ཀཱ་ལཾ མཱུ་ལཱ་ནི སོ་དྷེ་ཏྭཱ ཀཱ་ལཱ་ནུ་ཀཱ་ལཾ པ་ཏི་ཏ་པཱ་ཎ་ཀེ ཧཱ་རེ་ཏྭཱ ཀཱ་ལཱ་ནུ་ཀཱ་ལཾ མ་ཀྐ་ཊ་ཛཱ་ལཾ ལུ་ཉྩི་ཏྭཱ ཨ་མྦཾ པ་ཊི་ཛ་གྒ་ནྟོ པུ་རི་སོ ད་སྶེ་ཏ་བྦོ. ཏ་སྶ ཧི པུ་རི་ས་སྶ མ་དྷུ་ར་མྦ་བཱི་ཛ་རོ་པ་ནཾ ཝི་ཡ ཝི་པ་སྶ་ནཱ་ས་མྨཱ་དི་ཊྛི ད་ཊྛ་བྦཱ, མ་རི་ཡཱ་ད་བ་ནྡྷ་ནཾ ཝི་ཡ སཱི་ལེ་ན ཨ་ནུ་གྒ་ཎྷ་ནཾ, ཨུ་ད་ཀཱ་སེ་ཙ་ནཾ ཝི་ཡ སུ་ཏེ་ན ཨ་ནུ་གྒ་ཎྷ་ནཾ, མཱུ་ལ་པ་རི་སོ་དྷ་ནཾ ཝི་ཡ སཱ་ཀ་ཙྪཱ་ཡ ཨ་ནུ་གྒ་ཎྷ་ནཾ, པཱ་ཎ་ཀ་ཧ་ར་ཎཾ ཝི་ཡ ཛྷཱ་ན་ཝི་པ་སྶ་ནཱ་པཱ་རི་པ་ནྠི་ཀ་སོ་དྷ་ན་ཝ་སེ་ན ས་མ་ཐཱ་ནུ་གྒ་ཎྷ་ནཾ, མ་ཀྐ་ཊ་ཛཱ་ལ་ལུ་ཉྩ་ནཾ ཝི་ཡ བ་ལ་ཝ་ཝི་པ་སྶ་ནཱ་ནུ་གྒ་ཎྷ་ནཾ, ཨེ་ཝཾ ཨ་ནུ་གྒ་ཧི་ཏ་སྶ རུ་ཀྑ་སྶ ཁི་པྤ་མེ་ཝ ཝ་ཌྜྷི་ཏྭཱ ཕ་ལ་པྤ་དཱ་ནཾ ཝི་ཡ ཨི་མེ་ཧི སཱི་ལཱ་དཱི་ཧི ཨ་ནུ་གྒ་ཧི་ཏཱ་ཡ མཱུ་ལ་ས་མྨཱ་དི་ཊྛི་ཡཱ ཁི་པྤ་མེ་ཝ མ་གྒ་ཝ་སེ་ན ཝ་ཌྜྷི་ཏྭཱ ཙེ་ཏོ་ཝི་མུ་ཏྟི་པ་ཉྙཱ་ཝི་མུ་ཏྟི་ཕ་ལ་པྤ་དཱ་ནཾ ཝེ་དི་ཏ་བྦཾ.
༦. ཝི་མུ་ཏྟཱ་ཡ་ཏ་ན་སུ་ཏྟ་ཝ་ཎྞ་ནཱ
༢༦. ཚ་ཊྛེ ཝི་མུ་ཏྟཱ་ཡ་ཏ་ནཱ་ནཱིཏི ཝི་མུ་ཙྩ་ན་ཀཱ་ར་ཎཱ་ནི. ཡ་ཏྠཱཏི ཡེ་སུ ཝི་མུ་ཏྟཱ་ཡ་ཏ་ནེ་སུ. ས་ཏྠཱ དྷ་མྨཾ དེ་སེ་ཏཱིཏི ཙ་ཏུ་ས་ཙྩ་དྷ་མྨཾ དེ་སེ་ཏི. ཨ་ཏྠ་པ་ཊི་སཾ་ཝེ་དི་ནོཏི པཱ་ལི༹་ཨ་ཏྠཾ ཛཱ་ན་ནྟ་སྶ. དྷ་མྨ་པ་ཊི་སཾ་ཝེ་དི་ནོཏི པཱ་ལི༹ཾ ཛཱ་ན་ནྟ་སྶ. པཱ་མོ་ཛྫནྟི ཏ་རུ་ཎ་པཱི་ཏི. པཱི་ཏཱིཏི ཏུ་ཊྛཱ་ཀཱ་ར་བྷཱུ་ཏཱ བ་ལ་ཝ་པཱི་ཏི. ཀཱ་ཡོཏི ནཱ་མ་ཀཱ་ཡོ. པ་སྶ་མྦྷ་ཏཱིཏི པ་ཊི་པྤ་སྶ་མྦྷ་ཏི. སུ་ཁཾ ཝེ་དེ་ཏཱིཏི སུ་ཁཾ པ་ཊི་ལ་བྷ་ཏི. ཙི་ཏྟཾ ས་མཱ་དྷི་ཡ་ཏཱིཏི ཨ་ར་ཧ་ཏྟ་ཕ་ལ་ས་མཱ་དྷི་ནཱ ས་མཱ་དྷི་ཡ་ཏི. ཨ་ཡ་ཉྷི ཏཾ དྷ་མྨཾ སུ་ཎ་ནྟོ ཨཱ་ག་ཏཱ་ག་ཏ་ཊྛཱ་ནེ ཛྷཱ་ན་ཝི་པ་སྶ་ནཱ་མ་གྒ་ཕ་ལཱ་ནི ཛཱ་ནཱ་ཏི, ཏ་སྶ ཨེ་ཝཾ ཛཱ་ན་ཏོ པཱི་ཏི ཨུ་པྤ་ཛྫ་ཏི. སོ ཏ་སྶཱ པཱི་ཏི་ཡཱ ཨ་ནྟ་རཱ ཨོ་ས་ཀྐི་ཏུཾ ན དེ་ནྟོ ཨུ་པ་ཙཱ་ར་ཀ་མྨ་ཊྛཱ་ནི་ཀོ ཧུ་ཏྭཱ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎཱ་ཏི. ཏཾ ས་ནྡྷཱ་ཡ ཝུ་ཏྟཾ – ‘‘ཙི་ཏྟཾ ས་མཱ་དྷི་ཡ་ཏཱི’’ཏི. སེ་སེ་སུ་པི ཨེ་སེ་ཝ ན་ཡོ. ཨ་ཡཾ པ་ན ཝི་སེ་སོ – ས་མཱ་དྷི་ནི་མི་ཏྟནྟི ཨ་ཊྛ་ཏིཾ་སཱ་ཡ ཨཱ་ར་མྨ་ཎེ་སུ ཨ་ཉྙ་ཏ་རོ ས་མཱ་དྷི་ཡེ་ཝ ས་མཱ་དྷི་ནི་མི་ཏྟཾ. སུ་གྒ་ཧི་ཏཾ ཧོ་ཏཱིཏི་ཨཱ་དི་སུ ཨཱ་ཙ་རི་ཡ་སྶ ས་ནྟི་ཀེ ཀ་མྨ་ཊྛཱ་ནཾ ཨུ་གྒ་ཎྷ་ནྟེ་ན སུ་ཊྛུ ག་ཧི་ཏཾ ཧོ་ཏི སུ་ཊྛུ མ་ན་སི་ཀ་ཏཾ སུ་ཊྛུ ཨུ་པ་དྷཱ་རི་ཏཾ. སུ་པྤ་ཊི་ཝི་དྡྷཾ པ་ཉྙཱ་ཡཱཏི པ་ཉྙཱ་ཡ སུ་ཊྛུ པ་ཙྩ་ཀྑཾ ཀ་ཏཾ. ཏ་སྨིཾ དྷ་མྨེཏི ཏ་སྨིཾ ཀ་མྨ་ཊྛཱ་ན་པཱ་ལི༹་དྷ་མྨེ. ཨི་ཏི ཨི་མ་སྨིཾ སུ་ཏྟེ པ་ཉྩ་པི ཝི་མུ་ཏྟཱ་ཡ་ཏ་ནཱ་ནི ཨ་ར་ཧ་ཏྟཾ པཱ་པེ་ཏྭཱ ཀ་ཐི་ཏཱ་ནཱི་ཏི.
༧. ས་མཱ་དྷི་སུ་ཏྟ་ཝ་ཎྞ་ནཱ
༢༧. ས་ཏྟ་མེ ཨ་པྤ་མཱ་ཎནྟི པ་མཱ་ཎ་ཀ་ར་དྷ་མྨ་ར་ཧི་ཏཾ ལོ་ཀུ་ཏྟ་རཾ. ནི་པ་ཀཱ པ་ཏི་སྶ་ཏཱཏི ནེ་པ་ཀྐེ་ན ཙ ས་ཏི་ཡཱ ཙ ས་མ་ནྣཱ་ག་ཏཱ ཧུ་ཏྭཱ. པ་ཉྩ ཉཱ་ཎཱ་ནཱིཏི པ་ཉྩ པ་ཙྩ་ཝེ་ཀྑ་ཎ་ཉཱ་ཎཱ་ནི. པ་ཙྩ་ཏྟ་ཉྙེ་ཝ ཨུ་པྤ་ཛྫ་ནྟཱིཏི ཨ་ཏྟ་ནི་ཡེ་ཝ ཨུ་པྤ་ཛྫ་ནྟི. ཨ་ཡཾ ས་མཱ་དྷི པ་ཙྩུ་པྤ་ནྣ་སུ་ཁོ ཙེ་ཝཱཏི་ཨཱ་དཱི་སུ ཨ་ར་ཧ་ཏྟ་ཕ་ལ་ས་མཱ་དྷི ཨ་དྷི་པྤེ་ཏོ. མ་གྒ་ས་མཱ་དྷཱི་ཏི་པི ཝ་ད་ནྟི་ཡེ་ཝ. སོ ཧི ཨ་པྤི་ཏ་པྤི་ཏ་ཀྑ་ཎེ སུ་ཁ་ཏྟཱ པ་ཙྩུ་པྤ་ནྣ་སུ་ཁོ, པུ་རི་མོ པུ་རི་མོ པ་ཙྪི་མ་སྶ པ་ཙྪི་མ་སྶ ས་མཱ་དྷི་སུ་ཁ་སྶ པ་ཙྩ་ཡ་ཏྟཱ ཨཱ་ཡ་ཏིཾ སུ་ཁ་ཝི་པཱ་ཀོ, ཀི་ལེ་སེ་ཧི ཨཱ་ར་ཀ་ཏྟཱ ཨ་རི་ཡོ, ཀཱ་མཱ་མི་ས་ཝ་ཊྚཱ་མི་ས་ལོ་ཀཱ་མི་སཱ་ནཾ ཨ་བྷཱ་ཝཱ ནི་རཱ་མི་སོ. བུ་དྡྷཱ་དཱི་ཧི མ་ཧཱ་པུ་རི་སེ་ཧི སེ་ཝི་ཏ་ཏྟཱ ཨ་ཀཱ་པུ་རི་ས་སེ་ཝི་ཏོ. ཨ་ངྒ་ས་ནྟ་ཏཱ་ཡ ཨཱ་ར་མྨ་ཎ་ས་ནྟ་ཏཱ་ཡ ས་བྦ་ཀི་ལེ་ས་ད་ར་ཐ་ས་ནྟ་ཏཱ་ཡ ཙ ས་ནྟོ, ཨ་ཏ་པྤ་ནི་ཡ་ཊྛེ་ན པ་ཎཱི་ཏོ. ཀི་ལེ་ས་པྤ་ཊི་པྤ་སྶ་དྡྷི་ཡཱ ལ་དྡྷ་ཏྟཱ ཀི་ལེ་ས་པྤ་ཊི་པྤ་སྶ་དྡྷི་བྷཱ་ཝཾ ཝཱ ལ་དྡྷ་ཏྟཱ པ་ཊི་པྤ་སྶ་དྡྷ་ལ་དྡྷོ. པ་ཊི་པྤ་སྶ་དྡྷཾ པ་ཊི་པྤ་སྶ་དྡྷཱི་ཏི ཧི ཨི་དཾ ཨ་ཏྠ་ཏོ ཨེ་ཀཾ. པ་ཊི་པྤ་སྶ་དྡྷ་ཀི་ལེ་སེ་ན ཝཱ ཨ་ར་ཧ་ཏཱ ལ་དྡྷ་ཏྟཱ་པི པ་ཊི་པྤ་སྶ་དྡྷ་ལ་དྡྷོ, ཨེ་ཀོ་དི་བྷཱ་ཝེ་ན ཨ་དྷི་ག་ཏ་ཏྟཱ ཨེ་ཀོ་དི་བྷཱ་ཝ་མེ་ཝ ཝཱ ཨ་དྷི་ག་ཏ་ཏྟཱ ཨེ་ཀོ་དི་བྷཱ་ཝཱ་དྷི་ག་ཏོ. ཨ་པྤ་གུ་ཎ་སཱ་ས་ཝ་ས་མཱ་དྷི ཝི་ཡ ས་ས་ངྑཱ་རེ་ན ས་པྤ་ཡོ་གེ་ན ཙི་ཏྟེ་ན པ་ཙྩ་ནཱི་ཀ་དྷ་མྨེ ནི་གྒ་ཡ྄ཧ ཀི་ལེ་སེ ཝཱ་རེ་ཏྭཱ ཨ་ན་དྷི་ག་ཏ་ཏྟཱ ན ས་ས་ངྑཱ་ར་ནི་གྒ་ཡ྄ཧ་ཝཱ་རི་ཏ་ག་ཏོ. ཏཾ ས་མཱ་དྷིཾ ས་མཱ་པ་ཛྫ་ནྟོ ཏ་ཏོ ཝཱ ཝུ་ཊྛ་ཧ་ནྟོ ས་ཏི་ཝེ་པུ་ལླ་པྤ་ཏྟ་ཏྟཱ ས་ཏོ་ཝ ས་མཱ་པ་ཛྫ་ཏི, ས་ཏོ་ཝ ཝུ་ཊྛ་ཧ་ཏི. ཡ་ཐཱ་པ་རི་ཙྪི་ནྣ་ཀཱ་ལ་ཝ་སེ་ན ཝཱ ས་ཏོ ས་མཱ་པ་ཛྫ་ཏི, ས་ཏོ ཝུ་ཊྛ་ཧ་ཏི. ཏ་སྨཱ ཡ་དེ་ཏྠ ‘‘ཨ་ཡཾ ས་མཱ་དྷི པ་ཙྩུ་པྤ་ནྣ་སུ་ཁོ ཙེ་ཝ ཨཱ་ཡ་ཏི་ཉྩ སུ་ཁ་ཝི་པཱ་ཀོ ཙཱ’’ཏི ཨེ་ཝཾ པ་ཙྩ་ཝེ་ཀྑ་མཱ་ན་སྶ པ་ཙྩ་ཏྟཾ་ཡེ་ཝ ཨ་པ་ར་པྤ་ཙྩ་ཡ་ཉཱ་ཎཾ ཨུ་པྤ་ཛྫ་ཏི, ཏཾ ཨེ་ཀཾ ཉཱ་ཎཾ. ཨེ་སེ་ཝ ན་ཡོ སེ་སེ་སུ. ཨེ་ཝཾ ཨི་མཱ་ནི པ་ཉྩ ཉཱ་ཎཱ་ནི པ་ཙྩ་ཏྟ་ཉྙེ་ཝ ཨུ་པྤ་ཛྫ་ནྟཱི་ཏི.
༨. པ་ཉྩ་ངྒི་ཀ་སུ་ཏྟ་ཝ་ཎྞ་ནཱ
༢༨. ཨ་ཊྛ་མེ ཨ་རི་ཡ་སྶཱཏི ཝི་ཀྑ་མྦྷ་ན་ཝ་སེ་ན པ་ཧཱི་ན་ཀི་ལེ་སེ་ཧི ཨཱ་ར་ཀཱ ཋི་ཏ་སྶ. བྷཱ་ཝ་ནཾ དེ་སེ་སྶཱ་མཱིཏི བྲཱུ་ཧ་ནཾ ཝ་ཌྜྷ་ནཾ པ་ཀཱ་ས་ཡི་སྶཱ་མི. ཨི་མ་མེ་ཝ ཀཱ་ཡནྟི ཨི་མཾ ཀ་ར་ཛ་ཀཱ་ཡཾ. ཨ་བྷི་ས་ནྡེ་ཏཱིཏི ཏེ་མེ་ཏི སྣེ་ཧེ་ཏི, ས་བྦ་ཏྠ པ་ཝ་ཏྟ་པཱི་ཏི་སུ་ཁཾ ཀ་རོ་ཏི. པ་རི་ས་ནྡེ་ཏཱིཏི ས་མ་ནྟ་ཏོ ས་ནྡེ་ཏི. པ་རི་པཱུ་རེ་ཏཱིཏི ཝཱ་ཡུ་ནཱ བྷ་སྟཾ ཝི་ཡ པཱུ་རེ་ཏི. པ་རི་པྥ་ར་ཏཱིཏི ས་མ་ནྟ་ཏོ ཕུ་ས་ཏི. ས་བྦཱ་ཝ་ཏོ ཀཱ་ཡ་སྶཱཏི ཨ་སྶ བྷི་ཀྑུ་ནོ ས་བྦ་ཀོ་ཊྛཱ་ས་ཝ་ཏོ ཀཱ་ཡ་སྶ ཀི་ཉྩི ཨུ་པཱ་དི་ནྣ་ཀ་ས་ནྟ་ཏི་པ་ཝ་ཏྟི་ཊྛཱ་ནེ ཚ་ཝི་མཾ་ས་ལོ་ཧི་ཏཱ་ནུ་ག་ཏཾ ཨ་ཎུ་མ་ཏྟ་མྤི ཋཱ་ནཾ པ་ཋ་མ་ཛ྄ཛྷཱ་ན་སུ་ཁེ་ན ཨ་ཕུ་ཊཾ ནཱ་མ ན ཧོ་ཏི.
ད་ཀྑོཏི ཚེ་ཀོ པ་ཊི་བ་ལོ ནྷཱ་ནཱི་ཡ་ཙུ་ཎྞཱ་ནི ཀཱ་ཏུ་ཉྩེ་ཝ ཡོ་ཛེ་ཏུ་ཉྩ ས་ནྣེ་ཏུ་ཉྩ. ཀཾ་ས་ཐཱ་ལེཏི ཡེ་ན ཀེ་ན་ཙི ལོ་ཧེ་ན ཀ་ཏ་བྷཱ་ཛ་ནེ. མ་ཏྟི་ཀཱ་བྷཱ་ཛ་ནཾ པ་ན ཐི་རཾ ན ཧོ་ཏི, ས་ནྣེ་ནྟ་སྶ བྷི་ཛྫ་ཏི. ཏ་སྨཱ ཏཾ ན ད་སྶེ་སི. པ་རི་པྥོ་ས་ཀཾ པ་རི་པྥོ་ས་ཀནྟི སི་ཉྩི་ཏྭཱ སི་ཉྩི་ཏྭཱ. ས་ནྣེ་ཡྻཱཏི ཝཱ་མ་ཧ་ཏྠེ་ན ཀཾ་ས་ཐཱ་ལཾ ག་ཧེ་ཏྭཱ ད་ཀྑི་ཎ་ཧ་ཏྠེ་ན པ་མཱ་ཎ་ཡུ་ཏྟཾ ཨུ་ད་ཀཾ སི་ཉྩི་ཏྭཱ སི་ཉྩི་ཏྭཱ པ་རི་མ་དྡ་ནྟོ པི་ཎྜཾ ཀ་རེ་ཡྻ. སྣེ་ཧཱ་ནུ་ག་ཏཱཏི ཨུ་ད་ཀ་སི་ནེ་ཧེ་ན ཨ་ནུ་ག་ཏཱ. སྣེ་ཧ་པ་རེ་ཏཱཏི ཨུ་ད་ཀ་སི་ནེ་ཧེ་ན པ་རི་གྒ་ཧི་ཏཱ. ས་ནྟ་ར་བཱ་ཧི་རཱཏི ས་དྡྷིཾ ཨ་ནྟོ་པ་དེ་སེ་ན ཙེ་ཝ བ་ཧི་པ་དེ་སེ་ན ཙ, ས་བྦ་ཏྠ་ཀ་མེ་ཝ ཨུ་ད་ཀ་སི་ནེ་ཧེ་ན ཕུ་ཊཱ་ཏི ཨ་ཏྠོ. ན ཙ པ་གྒྷ་རི་ཎཱིཏི ན བི་ནྡུ བི་ནྡུ ཨུ་ད་ཀཾ པ་གྒྷ་ར་ཏི, ས་ཀྐཱ ཧོ་ཏི ཧ་ཏྠེ་ན་པི དྭཱི་ཧི་པི ཨ་ངྒུ་ལཱི་ཧི ག་ཧེ་ཏུཾ ཨོ་ཝ་ཊྚི་ཀཱ་ཡ་པི ཀཱ་ཏུ་ནྟི ཨ་ཏྠོ.
དུ་ཏི་ཡ་ཛ྄ཛྷཱ་ན་སུ་ཁ་ཨུ་པ་མཱ་ཡཾ ཨུ་བྦྷི་དོ་ད་ཀོཏི ཨུ་བྦྷི་ནྣ་ཨུ་ད་ཀོ, ན ཧེ་ཊྛཱ ཨུ་བྦྷི་ཛྫི་ཏྭཱ ཨུ་གྒ་ཙྪ་ན་ཨུ་ད་ཀོ, ཨ་ནྟོ་ཡེ་ཝ པ་ན ཨུ་པྤ་ཛྫ་ན་ཨུ་ད་ཀོ་ཏི ཨ་ཏྠོ. ཨཱ་ཡ་མུ་ཁནྟི ཨཱ་ག་མ་ན་མ་གྒོ. དེ་ཝོཏི མེ་གྷོ. ཀཱ་ལེ་ན ཀཱ་ལནྟི ཀཱ་ལེ ཀཱ་ལེ, ཨ་ནྭ་ཌྜྷ་མཱ་སཾ ཝཱ ཨ་ནུ་ད་སཱ་ཧཾ ཝཱ་ཏི ཨ་ཏྠོ. དྷཱ་རནྟི ཝུ་ཊྛིཾ. ནཱ་ནུ་པྤ་ཝེ་ཙྪེ་ཡྻཱཏི ན་པྤ་ཝེ་སེ་ཡྻ, ན ཝ་སྶེ་ཡྻཱ་ཏི ཨ་ཏྠོ. སཱི་ཏཱ ཝཱ་རི་དྷཱ་རཱ ཨུ་བྦྷི་ཛྫི་ཏྭཱཏི སཱི་ཏཱ ཝཱ་རི་དྷཱ་རཱ ཏཾ ར་ཧ་དཾ པཱུ་ར་ཡ་མཱ་ནཱ ཨུ་བྦྷི་ཛྫི་ཏྭཱ. ཧེ་ཊྛཱ ཨུ་གྒ་ཙྪ་ན་ཨུ་ད་ཀ་ཉྷི ཨུ་གྒ་ནྟྭཱ བྷི་ཛྫ་ནྟཾ ཨུ་ད་ཀཾ ཁོ་བྷེ་ཏི, ཙ་ཏཱུ་ཧི དི་སཱ་ཧི པ་ཝི་ས་ན་ཨུ་ད་ཀཾ པུ་རཱ་ཎ་པ་ཎྞ་ཏི་ཎ་ཀ་ཊྛ་ད་ཎྜ་ཀཱ་དཱི་ཧི ཨུ་ད་ཀཾ ཁོ་བྷེ་ཏི. ཝུ་ཊྛི་ཨུ་ད་ཀཾ དྷཱ་རཱ་ནི་པཱ་ཏ་བུ་བྦུ་ལ༹་ཀེ་ཧི ཨུ་ད་ཀཾ ཁོ་བྷེ་ཏི, ས་ནྣི་སི་ནྣ་མེ་ཝ པ་ན ཧུ་ཏྭཱ ཨི་དྡྷི་ནི་མྨི་ཏ་མི་ཝ ཨུ་པྤ་ཛྫ་མཱ་ནཾ ཨུ་ད་ཀཾ ཨི་མཾ པ་དེ་སཾ ཕ་ར་ཏི, ཨི་མཾ ན ཕ་ར་ཏཱི་ཏི ན་ཏྠི. ཏེ་ན ཨ་ཕུ་ཊོ་ཀཱ་སོ ནཱ་མ ན ཧོ་ཏི. ཏ་ཏྠ ར་ཧ་དོ ཝི་ཡ ཀ་ར་ཛ་ཀཱ་ཡོ, ཨུ་ད་ཀཾ ཝི་ཡ དུ་ཏི་ཡ་ཛ྄ཛྷཱ་ན་སུ་ཁཾ, སེ་སཾ པུ་རི་མ་ན་ཡེ་ནེ་ཝ ཝེ་དི་ཏ་བྦཾ.
ཏ་ཏི་ཡ་ཛ྄ཛྷཱ་ན་སུ་ཁ་ཨུ་པ་མཱ་ཡཾ ཨུ་པྤ་ལཱ་ནི ཨེ་ཏྠ ས་ནྟཱི་ཏི ཨུ་པྤ་ལི་ནཱི. སེ་ས་པ་ད་དྭ་ཡེ་པི ཨེ་སེ་ཝ ན་ཡོ. ཨེ་ཏྠ ཙ སེ་ཏ་ར་ཏྟ་ནཱི་ལེ་སུ ཡཾ་ཀི་ཉྩི ཨུ་པྤ་ལ་མེ་ཝ, ཨཱུ་ན་ཀ་ས་ཏ་པ་ཏྟཾ པུ་ཎྜ་རཱི་ཀཾ, ས་ཏ་པ་ཏྟཾ པ་དུ་མཾ. པ་ཏྟ་ནི་ཡ་མཾ ཝཱ ཝི་ནཱ་པི སེ་ཏཾ པ་དུ་མཾ, ར་ཏྟཾ པུ་ཎྜ་རཱི་ཀ་ནྟི ཨ་ཡ་མེ་ཏྠ ཝི་ནི་ཙྪ་ཡོ. ཨུ་ད་ཀཱ་ནུ་གྒ་ཏཱ་ནཱིཏི ཨུ་ད་ཀ་ཏོ ན ཨུ་གྒ་ཏཱ་ནི. ཨ་ནྟོ་ནི་མུ་གྒ་པོ་སཱི་ནཱིཏི ཨུ་ད་ཀ་ཏ་ལ་སྶ ཨ་ནྟོ ནི་མུ་གྒཱ་ནི་ཡེ་ཝ ཧུ་ཏྭཱ པོ་ས་ནྟི ཝ་ཌྜྷ་ནྟཱི་ཏི ཨ་ཏྠོ. སེ་སཾ པུ་རི་མ་ན་ཡེ་ནེ་ཝ ཝེ་དི་ཏ་བྦཾ.
ཙ་ཏུ་ཏྠ་ཛ྄ཛྷཱ་ན་ཨུ་པ་མཱ་ཡཾ པ་རི་སུ་དྡྷེ་ན ཙེ་ཏ་སཱ པ་རི་ཡོ་དཱ་ཏེ་ནཱཏི ཨེ་ཏྠ ནི་རུ་པ་ཀྐི་ལེ་ས་ཊྛེ་ན པ་རི་སུ་དྡྷཾ, པ་བྷ་སྶ་ར་ཊྛེ་ན པ་རི་ཡོ་དཱ་ཏཾ ཝེ་དི་ཏ་བྦཾ. ཨོ་དཱ་ཏེ་ན ཝ་ཏྠེ་ནཱཏི ཨི་དཾ ཨུ་ཏུ་ཕ་ར་ཎ་ཏྠཾ ཝུ་ཏྟཾ. ཀི་ལི་ཊྛ་ཝ་ཏྠེ་ན ཧི ཨུ་ཏུ་ཕ་ར་ཎཾ ན ཧོ་ཏི, ཏ་ངྑ་ཎ་དྷོ་ཏ་པ་རི་སུ་དྡྷེ་ན ཨུ་ཏུ་ཕ་ར་ཎཾ བ་ལ་ཝཾ ཧོ་ཏི. ཨི་མི་སྶཱ ཧི ཨུ་པ་མཱ་ཡ ཝ་ཏྠཾ ཝི་ཡ ཀ་ར་ཛ་ཀཱ་ཡོ, ཨུ་ཏུ་ཕ་ར་ཎཾ ཝི་ཡ ཙ་ཏུ་ཏྠ་ཛ྄ཛྷཱ་ན་སུ་ཁཾ. ཏ་སྨཱ ཡ་ཐཱ སུ་ནྷཱ་ཏ་སྶ པུ་རི་ས་སྶ པ་རི་སུ་དྡྷཾ ཝ་ཏྠཾ ས་སཱི་སཾ པཱ་རུ་པི་ཏྭཱ ནི་སི་ནྣ་སྶ ས་རཱི་ར་ཏོ ཨུ་ཏུ ས་བྦ་མེ་ཝ ཝ་ཏྠཾ ཕ་ར་ཏི, ན ཀོ་ཙི ཝ་ཏྠ་སྶ ཨ་ཕུ་ཊོ་ཀཱ་སོ ཧོ་ཏི, ཨེ་ཝཾ ཙ་ཏུ་ཏྠ་ཛ྄ཛྷཱ་ན་སུ་ཁེ་ན བྷི་ཀྑུ་ནོ ཀ་ར་ཛ་ཀཱ་ཡ་སྶ ན ཀོ་ཙི ཨོ་ཀཱ་སོ ཨ་ཕུ་ཊོ ཧོ་ཏཱི་ཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ. ཙ་ཏུ་ཏྠ་ཛ྄ཛྷཱ་ན་ཙི་ཏྟ་མེ་ཝ ཝཱ ཝ་ཏྠཾ ཝི་ཡ, ཏཾ་ས་མུ་ཊྛཱ་ན་རཱུ་པཾ ཨུ་ཏུ་ཕ་ར་ཎཾ ཝི་ཡ. ཡ་ཐཱ ཧི ཀ་ཏྠ་ཙི ཀ་ཏྠ་ཙི ཨོ་དཱ་ཏ་ཝ་ཏྠེ ཀཱ་ཡཾ ཨ་ཕུ་ས་ནྟེ་པི ཏཾ་ས་མུ་ཊྛཱ་ནེ་ན ཨུ་ཏུ་ནཱ ས་བྦ་ཏྠ་ཀ་མེ་ཝ ཀཱ་ཡོ ཕུ་ཊོ ཧོ་ཏི, ཨེ་ཝཾ ཙ་ཏུ་ཏྠ་ཛ྄ཛྷཱ་ན་ས་མུ་ཊྛཱ་པི་ཏེ་ན སུ་ཁུ་མ་རཱུ་པེ་ན ས་བྦ་ཏྠ་ཀ་མེ་ཝ བྷི་ཀྑུ་ནོ ཀཱ་ཡོ ཕུ་ཊོ ཧོ་ཏཱི་ཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ.
པ་ཙྩ་ཝེ་ཀྑ་ཎ་ནི་མི་ཏྟནྟི པ་ཙྩ་ཝེ་ཀྑ་ཎ་ཉཱ་ཎ་མེ་ཝ. སུ་གྒ་ཧི་ཏཾ ཧོ་ཏཱིཏི ཡ་ཐཱ ཏེ་ན ཛྷཱ་ན་ཝི་པ་སྶ་ནཱ་མ་གྒཱ སུ་ཊྛུ ག་ཧི་ཏཱ ཧོ་ནྟི, ཨེ་ཝཾ པ་ཙྩ་ཝེ་ཀྑ་ཎ་ནི་མི་ཏྟཾ ཨ་པ་རཱ་པ་རེ་ན པ་ཙྩ་ཝེ་ཀྑ་ཎ་ནི་མི་ཏྟེ་ན སུ་ཊྛུ ག་ཧི་ཏཾ ཧོ་ཏི. ཨ་ཉྙོ ཝཱ ཨ་ཉྙནྟི ཨ་ཉྙོ ཨེ་ཀོ ཨ་ཉྙཾ ཨེ་ཀཾ, ཨ་ཏྟ་ནོ་ཡེ་ཝ ཧི ཨ་ཏྟཱ ན པཱ་ཀ་ཊོ ཧོ་ཏི. ཋི་ཏོ ཝཱ ནི་སི་ནྣནྟི ཋི་ཏ་ཀ་སྶཱ་པི ནི་སི་ནྣོ པཱ་ཀ་ཊོ ཧོ་ཏི, ཏེ་ནེ་ཝཾ ཝུ་ཏྟཾ. སེ་སེ་སུ་པི ཨེ་སེ་ཝ ན་ཡོ. ཨུ་ད་ཀ་མ་ཎི་ཀོཏི ས་མེ་ཁ་ལཱ ཨུ་ད་ཀ་ཙཱ་ཊི. ས་མ་ཏི་ཏྟི་ཀོཏི ས་མ་བྷ་རི་ཏོ. ཀཱ་ཀ་པེ་ཡྻཱཏི མུ་ཁ་ཝ་ཊྚི་ཡཾ ནི་སཱི་དི་ཏྭཱ ཀཱ་ཀེ་ན གཱི་ཝཾ ཨ་ནཱ་མེ་ཏྭཱ་ཝ པཱ་ཏ་བྦོ.
སུ་བྷཱུ་མི་ཡནྟི ས་མ་བྷཱུ་མི་ཡཾ. ‘‘སུ་བྷཱུ་མེ སུ་ཁེ་ཏྟེ ཝི་ཧ་ཏ་ཁཱ་ཎུ་ཀེ བཱི་ཛཱ་ནི པ་ཏི་ཊྛཱ་པེ་ཡྻཱ’’ཏི (དཱི. ནི. ༢.༤༣༨) ཨེ་ཏྠ པ་ན མ་ཎྜ་བྷཱུ་མི སུ་བྷཱུ་མཱི་ཏི ཨཱ་ག་ཏཱ. ཙ་ཏུ་མ་ཧཱ་པ་ཐེཏི དྭི་ནྣཾ མ་ཧཱ་མ་གྒཱ་ནཾ ཝི་ནི་ཝི་ཛ྄ཛྷི་ཏྭཱ ག་ཏ་ཊྛཱ་ནེ. ཨཱ་ཛ་ཉྙ་ར་ཐོཏི ཝི་ནཱི་ཏ་ཨ་སྶ་ར་ཐོ. ཨོ་དྷ་སྟ་པ་ཏོ་དོཏི ཡ་ཐཱ ར་ཐཾ ཨ་བྷི་རུ་ཧི་ཏྭཱ ཋི་ཏེ་ན ས་ཀྐཱ ཧོ་ཏི ག་ཎྷི་ཏུཾ, ཨེ་ཝཾ ཨཱ་ལ་མྦ་ནཾ ནི་སྶཱ་ཡ ཏི་རི་ཡ་ཏོ ཋ་པི་ཏ་པ་ཏོ་དོ. ཡོ་གྒཱ་ཙ་རི་ཡོཏི ཨ་སྶཱ་ཙ་རི་ཡོ. སྭེ་ཝ ཨ་སྶ་ད་མྨེ སཱ་རེ་ཏཱི་ཏི ཨ་སྶ་ད་མྨ་སཱ་ར་ཐི. ཡེ་ནི་ཙྪ་ཀནྟི ཡེ་ན ཡེ་ན མ་གྒེ་ན ཨི་ཙྪ་ཏི. ཡ་དི་ཙྪ་ཀནྟི ཡཾ ཡཾ ག་ཏིཾ ཨི་ཙྪ་ཏི. སཱ་རེ་ཡྻཱཏི ཨུ་ཛུ་ཀཾ པུ་ར་ཏོ པེ་སེ་ཡྻ. པ་ཙྩཱ་སཱ་རེ་ཡྻཱཏི པ་ཊི་ནི་ཝ་ཏྟེ་ཡྻ.
ཨེ་ཝཾ ཧེ་ཊྛཱ པ་ཉྩ་ཧི ཨ་ངྒེ་ཧི ས་མཱ་པ་ཏྟི་པ་རི་ཀ་མྨཾ ཀ་ཐེ་ཏྭཱ ཨི་མཱ་ཧི ཏཱི་ཧི ཨུ་པ་མཱ་ཧི པ་གུ་ཎ་ས་མཱ་པ་ཏྟི་ཡཱ ཨཱ་ནི་སཾ་སཾ ད་སྶེ་ཏྭཱ ཨི་དཱ་ནི ཁཱི་ཎཱ་ས་ཝ་སྶ ཨ་བྷི་ཉྙཱ་པ་ཊི་པཱ་ཊིཾ ད་སྶེ་ཏུཾ སོ ས་ཙེ ཨཱ་ཀ་ངྑ་ཏཱིཏི་ཨཱ་དི་མཱ་ཧ. ཏཾ ཨུ་ཏྟཱ་ན་ཏྠ་མེ་ཝཱ་ཏི.
༩. ཙ་ངྐ་མ་སུ་ཏྟ་ཝ་ཎྞ་ནཱ
༢༩. ན་ཝ་མེ ཨ་དྡྷཱ་ན་ཀྑ་མོ ཧོ་ཏཱིཏི དཱུ་རཾ ཨ་དྡྷཱ་ན་མ་གྒཾ ག་ཙྪ་ནྟོ ཁ་མ་ཏི, ཨ་དྷི་ཝཱ་སེ་ཏུཾ ས་ཀྐོ་ཏི. པ་དྷཱ་ན་ཀྑ་མོཏི ཝཱི་རི་ཡ་ཀྑ་མོ. ཙ་ངྐ་མཱ་དྷི་ག་ཏོ ས་མཱ་དྷཱིཏི ཙ་ངྐ་མཾ ཨ་དྷི་ཊྛ་ཧ་ནྟེ་ན ཨ་དྷི་ག་ཏོ ཨ་ཊྛ་ནྣཾ ས་མཱ་པ་ཏྟཱི་ནཾ ཨ་ཉྙ་ཏ་ར་ས་མཱ་དྷི. ཙི་ར་ཊྛི་ཏི་ཀོ ཧོ་ཏཱིཏི ཙི་རཾ ཏི་ཊྛ་ཏི. ཋི་ཏ་ཀེ་ན ག་ཧི་ཏ་ནི་མི་ཏྟ་ཉྷི ནི་སི་ནྣ་སྶ ན་སྶ་ཏི, ནི་སི་ནྣེ་ན ག་ཧི་ཏ་ནི་མི་ཏྟཾ ནི་པ་ནྣ་སྶ. ཙ་ངྐ་མཾ ཨ་དྷི་ཊྛ་ཧ་ནྟེ་ན ཙ་ལི་ཏཱ་ར་མྨ་ཎེ ག་ཧི་ཏ་ནི་མི་ཏྟཾ པ་ན ཋི་ཏ་སྶ་པི ནི་སི་ནྣ་སྶ་པི ནི་པ་ནྣ་སྶ་པི ན ན་སྶ་ཏཱི་ཏི.
༡༠. ནཱ་གི་ཏ་སུ་ཏྟ་ཝ་ཎྞ་ནཱ
༣༠. ད་ས་མེ ཨུ་དྡྷཾ ཨུ་གྒ་ཏ་ཏྟཱ ཨུ་ཙྩོ, རཱ་སི་བྷཱ་ཝེ་ན ཙ མ་ཧཱ ས་དྡོ ཨེ་ཏེ་ས་ནྟི ཨུ་ཙྩཱ་ས་དྡ་མ་ཧཱ་ས་དྡཱ. ཏེ་སུ ཧི ཨུ་གྒ་ཏུ་གྒ་ཏེ་སུ ཁ་ཏྟི་ཡ་མ་ཧཱ་སཱ་ལ-བྲཱ་ཧྨ་ཎ་མ་ཧཱ་སཱ་ལཱ་དཱི་སུ མ་ཧཱ་ས་ཀྐཱ་རཾ ག་ཧེ་ཏྭཱ ཨཱ་ག་ཏེ་སུ ‘‘ཨ་སུ་ཀ་སྶ ཨོ་ཀཱ་སཾ དེ་ཐ, ཨ་སུ་ཀ་སྶ ཨོ་ཀཱ་སཾ དེ་ཐཱ’’ཏི ཝུ་ཏྟེ ‘‘མ་ཡཾ པ་ཋ་མ་ཏ་རཾ ཨཱ་ག་ཏཱ, མ་ཡ྄ཧཾ པ་ཋ་མ་ཏ་རཾ ཨཱ་ག་ཏཱ, ན་ཏྠི ཨོ་ཀཱ་སོ’’ཏི ཨེ་ཝཾ ཨ་ཉྙ་མ་ཉྙཾ ཀ་ཐེ་ནྟཱ་ནཾ ས་དྡོ ཨུ་ཙྩོ ཙེ་ཝ མ་ཧཱ ཙ ཨ་ཧོ་སི. ཀེ་ཝ་ཊྚཱ མ་ཉྙེ མ་ཙྪ་ཝི་ལོ་པེཏི ཀེ་ཝ་ཊྚཱ ཝི་ཡ མ་ཙྪ་ཝི་ལོ་པེ. ཏེ་ས་ཉྷི མ་ཙྪ་པ་ཙྪིཾ ག་ཧེ་ཏྭཱ ཨཱ་ག་ཏཱ་ནཾ ཝི་ཀྐི་ཎ་ན་ཊྛཱ་ནེ ‘‘མ་ཡ྄ཧཾ དེ་ཐ མ་ཡ྄ཧཾ དེ་ཐཱ’’ཏི ཝ་ད་ཏོ མ་ཧཱ་ཛ་ན་སྶ ཨེ་ཝ་རཱུ་པོ ས་དྡོ ཧོ་ཏི. མཱི་ལ༹ྷ་སུ་ཁནྟི ཨ་སུ་ཙི་སུ་ཁཾ. མི་དྡྷ་སུ་ཁནྟི ནི་དྡཱ་སུ་ཁཾ. ལཱ་བྷ་ས་ཀྐཱ་ར་སི་ལོ་ཀ་སུ་ཁནྟི ལཱ་བྷ་ས་ཀྐཱ་ར་ཉྩེ་ཝ ཝ་ཎྞ་བྷ་ཎ་ན་ཉྩ ནི་སྶཱ་ཡ ཨུ་པྤ་ནྣ་སུ་ཁཾ.
ཏཾ་ནི་ནྣཱ་ཝ ག་མི་སྶ་ནྟཱིཏི ཏཾ ཏ་དེ་ཝ བྷ་ག་ཝ་ཏོ ག་ཏ་ཊྛཱ་ནཾ ག་མི་སྶ་ནྟི, ཨ་ནུ་བ་ནྡྷི་སྶ་ནྟི་ཡེ་ཝཱ་ཏི ཝུ་ཏྟཾ ཧོ་ཏི. ཏ་ཐཱ ཧི, བྷ་ནྟེ, བྷ་ག་ཝ་ཏོ སཱི་ལ་པ་ཉྙཱ་ཎནྟི ཡ་སྨཱ ཏ་ཐཱ་ཝི་དྷཾ ཏུ་མྷཱ་ཀཾ སཱི་ལ་ཉྩ ཉཱ་ཎ་ཉྩཱ་ཏི ཨ་ཏྠོ. མཱ ཙ མ་ཡཱ ཡ་སོཏི མ་ཡཱ ས་དྡྷིཾ ཡ་སོ་པི མཱ ས་མཱ་ག་ཙྪ་ཏུ. པི་ཡཱ་ནནྟི པི་ཡ་ཛ་ནཱ་ནཾ. ཨེ་སོ ཏ་སྶ ནི་སྶ་ནྡོཏི ཨེ་སཱ པི་ཡ་བྷཱ་ཝ་སྶ ནི་པྥ་ཏྟི. ཨ་སུ་བྷ་ནི་མི་ཏྟཱ་ནུ་ཡོ་གནྟི ཨ་སུ་བྷ་ཀ་མྨ་ཊྛཱ་ནཱ་ནུ་ཡོ་གཾ. སུ་བྷ་ནི་མི་ཏྟེཏི རཱ་ག་ཊྛཱ་ནི་ཡེ ཨི་ཊྛཱ་ར་མྨ་ཎེ. ཨེ་སོ ཏ་སྶ ནི་སྶ་ནྡོཏི ཨེ་སཱ ཏ་སྶ ཨ་སུ་བྷ་ནི་མི་ཏྟཱ་ནུ་ཡོ་ག་སྶ ནི་པྥ་ཏྟི. ཨེ་ཝ་མི་མ་སྨིཾ སུ་ཏྟེ ཨི་མེ་སུ པ་ཉྩ་སུ ཋཱ་ནེ་སུ ཝི་པ་སྶ་ནཱ་ཝ ཀ་ཐི་ཏཱ་ཏི.
པ་ཉྩ་ངྒི་ཀ་ཝ་གྒོ ཏ་ཏི་ཡོ.