༢. བ་ལ་ཝ་གྒོ
༡. ཨ་ན་ནུ་སྶུ་ཏ་སུ་ཏྟ་ཝ་ཎྞ་ནཱ
༡༡. དུ་ཏི་ཡ་སྶ པ་ཋ་མེ པུ་བྦཱ་ཧཾ, བྷི་ཀྑ་ཝེ, ཨ་ན་ནུ་སྶུ་ཏེ་སུ དྷ་མྨེ་སཱུཏི ཨ་ཧཾ, བྷི་ཀྑ་ཝེ, པུ་བྦེ ཨ་ན་ནུ་སྶུ་ཏེ་སུ ཙ་ཏཱུ་སུ ས་ཙྩ་དྷ་མྨེ་སུ. ཨ་བྷི་ཉྙཱ་ཝོ་སཱ་ན་པཱ་ར་མི་པྤ་ཏྟོ པ་ཊི་ཛཱ་ནཱ་མཱིཏི ཙ་ཏཱུ་སུ ས་ཙྩེ་སུ ཙ་ཏཱུ་ཧི མ་གྒེ་ཧི སོ་ལ༹་ས་ཝི་དྷ་སྶ ཀི་ཙྩ་སྶ ཀ་ར་ཎེ་ན ཨ་བྷི་ཛཱ་ནི་ཏྭཱ ཝོ་སཱ་ན་པཱ་ར་མིཾ ས་བྦེ་སཾ ཀི་ཙྩཱ་ནཾ ནི་ཊྛི་ཏ་ཏྟཱ ཀ་ཏ་ཀི་ཙྩ་བྷཱ་ཝཾ པཱ་རཾ པ་ཏྟོ པ་ཊི་ཛཱ་ནཱ་མཱི་ཏི མ་ཧཱ་བོ་དྷི་པ་ལླ་ངྐེ ཨ་ཏྟ་ནོ ཨཱ་ག་མ་ནཱི་ཡ་གུ་ཎཾ ད་སྶེ་ཏི. ཏ་ཐཱ་ག་ཏ་སྶཱཏི ཨ་ཊྛ་ཧི ཀཱ་ར་ཎེ་ཧི ཏ་ཐཱ་ག་ཏ་སྶ. ཏ་ཐཱ་ག་ཏ་བ་ལཱ་ནཱིཏི ཡ་ཐཱ ཏེ་ཧི ག་ནྟ་བྦཾ, ཏ་ཐེ་ཝ ག་ཏཱ་ནི པ་ཝ་ཏྟཱ་ནི ཉཱ་ཎ་བ་ལཱ་ནི. ཨཱ་ས་བྷཾ ཋཱ་ནནྟི སེ་ཊྛ་ཊྛཱ་ནཾ. སཱི་ཧ་ནཱ་དནྟི ཨ་བྷཱི་ཏ་ནཱ་དཾ. བྲ་ཧྨ་ཙ་ཀྐནྟི སེ་ཊྛ་ཙ་ཀྐཾ. པ་ཝ་ཏྟེ་ཏཱིཏི ཀ་ཐེ་ཏི.
༢. ཀཱུ་ཊ་སུ་ཏྟ་ཝ་ཎྞ་ནཱ
༡༢. དུ་ཏི་ཡེ སེ་ཁ་བ་ལཱ་ནཱིཏི སེ་ཁཱ་ནཾ ཉཱ་ཎ་བ་ལཱ་ནི. ཨ་གྒནྟི ཨུ་ཏྟ་མཾ. སེ་ས་བ་ལཱ་ནི གོ་པཱ་ན་སི་ཡོ ཀཱུ་ཊཾ ཝི་ཡ ས་ངྒ་ཎྷཱ་ཏཱི་ཏི ས་ངྒཱ་ཧི་ཀཾ. ཏཱ་ནེ་ཝ བ་ལཱ་ནི སཾ་ཧ་ཏཱ་ནི ཀ་རོ་ཏཱི་ཏི ས་ངྒྷཱ་ཏ་ནི་ཡཾ.
༣. སཾ་ཁི་ཏྟ་སུ་ཏྟ་ཝ་ཎྞ་ནཱ
༡༣. ཏ་ཏི་ཡེ ཏ་ཏྠ མུ་ཊྛ་སྶ་ཙྩེ ན ཀ་མྤ་ཏཱི་ཏི ས་ཏི་བ་ལཾ. ཨུ་དྡྷ་ཙྩེ ན ཀ་མྤ་ཏཱི་ཏི ས་མཱ་དྷི་བ་ལཾ.
༤. ཝི་ཏྠ་ཏ་སུ་ཏྟ་ཝ་ཎྞ་ནཱ
༡༤. ཙ་ཏུ་ཏྠེ ས་ཏི་ནེ་པ་ཀྐེ་ནཱཏི ཨེ་ཏྠ ནེ་པ་ཀྐཾ ཝུ་ཙྩ་ཏི པ་ཉྙཱ, སཱ ས་ཏི་ཡཱ ཨུ་པ་ཀཱ་ར་ཀ་བྷཱ་ཝེ་ན ག་ཧི་ཏཱ.
༥. ད་ཊྛ་བྦ་སུ་ཏྟ་ཝ་ཎྞ་ནཱ
༡༥. པ་ཉྩ་མེ ས་ཝི་ས་ཡ་སྨིཾ་ཡེ་ཝ ལོ་ཀི་ཡ་ལོ་ཀུ་ཏྟ་ར་དྷ་མྨེ ཀ་ཐེ་ཏུཾ ཀ་ཏྠ ཙ, བྷི་ཀྑ་ཝེ, ས་དྡྷཱ་བ་ལཾ ད་ཊྛ་བྦནྟི་ཨཱ་དི་མཱ་ཧ. ཡ་ཐཱ ཧི ཙ་ཏྟཱ་རོ སེ་ཊྛི་པུ་ཏྟཱ, རཱ་ཛཱ་ཏི རཱ་ཛ་པ་ཉྩ་མེ་སུ ས་ཧཱ་ཡེ་སུ ‘‘ན་ཀྑ་ཏྟཾ ཀཱི་ལི༹་སྶཱ་མཱ’’ཏི ཝཱི་ཐིཾ ཨོ་ཏི་ཎྞེ་སུ ཨེ་ཀ་སྶ སེ་ཊྛི་པུ་ཏྟ་སྶ གེ་ཧཾ ག་ཏ་ཀཱ་ལེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ‘‘ཨི་མེ་སཾ ཁཱ་ད་ནཱི་ཡཾ བྷོ་ཛ་ནཱི་ཡཾ དེ་ཐ, ག་ནྡྷ་མཱ་ལཱ་ལ་ངྐཱ་རཱ་དཱི་ནི དེ་ཐཱ’’ཏི གེ་ཧེ ཝི་ཙཱ་རེ་ཏི. དུ་ཏི་ཡ་ཏ་ཏི་ཡ་ཙ་ཏུ་ཏྠ་སྶ གེ་ཧཾ ག་ཏ་ཀཱ་ལེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ‘‘ཨི་མེ་སཾ ཁཱ་ད་ནཱི་ཡཾ བྷོ་ཛ་ནཱི་ཡཾ དེ་ཐ, ག་ནྡྷ་མཱ་ལཱ་ལ་ངྐཱ་རཱ་དཱི་ནི དེ་ཐཱ’’ཏི གེ་ཧེ ཝི་ཙཱ་རེ་ཏི. ཨ་ཐ ས་བྦ་པ་ཙྪཱ ར་ཉྙོ གེ་ཧཾ ག་ཏ་ཀཱ་ལེ ཀི་ཉྩཱ་པི རཱ་ཛཱ ས་བྦ་ཏྠ ཨི་སྶ་རོ, ཨི་མ་སྨིཾ པ་ན ཀཱ་ལེ ཨ་ཏྟ་ནོ གེ་ཧེ་ཡེ་ཝ ‘‘ཨི་མེ་སཾ ཁཱ་ད་ནཱི་ཡཾ བྷོ་ཛ་ནཱི་ཡཾ དེ་ཐ, ག་ནྡྷ་མཱ་ལཱ་ལ་ངྐཱ་རཱ་དཱི་ནི དེ་ཐཱ’’ཏི ཝི་ཙཱ་རེ་ཏི, ཨེ་ཝ་མེ་ཝཾ ས་དྡྷཱ་པ་ཉྩ་མེ་སུ བ་ལེ་སུ ཏེ་སུ ས་ཧཱ་ཡེ་སུ ཨེ་ཀ་ཏོ ཝཱི་ཐིཾ ཨོ་ཏ་ར་ནྟེ་སུ ཝི་ཡ ཨེ་ཀཱ་ར་མྨ་ཎེ ཨུ་པྤ་ཛྫ་མཱ་ནེ་སུ་པི ཡ་ཐཱ པ་ཋ་མ་སྶ གེ་ཧེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ཝི་ཙཱ་རེ་ཏི, ཨེ་ཝཾ སོ་ཏཱ་པ་ཏྟི་ཡ་ངྒཱ་ནི པ་ཏྭཱ ཨ་དྷི་མོ་ཀྑ་ལ་ཀྑ་ཎཾ ས་དྡྷཱ་བ་ལ་མེ་ཝ ཛེ་ཊྛ་ཀཾ ཧོ་ཏི པུ་བྦ་ངྒ་མཾ, སེ་སཱ་ནི ཏ་ད་ནྭ་ཡཱ་ནི ཧོ་ནྟི. ཡ་ཐཱ དུ་ཏི་ཡ་སྶ གེ་ཧེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ཝི་ཙཱ་རེ་ཏི, ཨེ་ཝཾ ས་མྨ་པྤ་དྷཱ་ནཱ་ནི པ་ཏྭཱ པ་གྒ་ཧ་ལ་ཀྑ་ཎཾ ཝཱི་རི་ཡ་བ་ལ་མེ་ཝ ཛེ་ཊྛ་ཀཾ ཧོ་ཏི པུ་བྦ་ངྒ་མཾ, སེ་སཱ་ནི ཏ་ད་ནྭ་ཡཱ་ནི ཧོ་ནྟི. ཡ་ཐཱ ཏ་ཏི་ཡ་སྶ གེ་ཧེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ཝི་ཙཱ་རེ་ཏི, ཨེ་ཝཾ ས་ཏི་པ་ཊྛཱ་ནཱ་ནི པ་ཏྭཱ ཨུ་པ་ཊྛཱ་ན་ལ་ཀྑ་ཎཾ ས་ཏི་བ་ལ་མེ་ཝ ཛེ་ཊྛ་ཀཾ ཧོ་ཏི པུ་བྦ་ངྒ་མཾ, སེ་སཱ་ནི ཏ་ད་ནྭ་ཡཱ་ནི ཧོ་ནྟི. ཡ་ཐཱ ཙ་ཏུ་ཏྠ་སྶ གེ་ཧེ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, གེ་ཧ་སཱ་མི་ཀོ་ཝ ཝི་ཙཱ་རེ་ཏི, ཨེ་ཝཾ ཛྷཱ་ན་ཝི་མོ་ཀྑེ པ་ཏྭཱ ཨ་ཝི་ཀྑེ་པ་ལ་ཀྑ་ཎཾ ས་མཱ་དྷི་བ་ལ་མེ་ཝ ཛེ་ཊྛ་ཀཾ ཧོ་ཏི པུ་བྦ་ངྒ་མཾ, སེ་སཱ་ནི ཏ་ད་ནྭ་ཡཱ་ནི ཧོ་ནྟི. ས་བྦ་པ་ཙྪཱ ར་ཉྙོ གེ་ཧཾ ག་ཏ་ཀཱ་ལེ པ་ན ཡ་ཐཱ ཨི་ཏ་རེ ཙ་ཏྟཱ་རོ ཏུ་ཎྷཱི ནི་སཱི་ད་ནྟི, རཱ་ཛཱ་ཝ གེ་ཧེ ཝི་ཙཱ་རེ་ཏི, ཨེ་ཝ་མེ་ཝ ཨ་རི་ཡ་ས་ཙྩཱ་ནི པ་ཏྭཱ པ་ཛཱ་ན་ན་ལ་ཀྑ་ཎཾ པ་ཉྙཱ་བ་ལ་མེ་ཝ ཛེ་ཊྛ་ཀཾ ཧོ་ཏི པུ་བྦ་ངྒ་མཾ, སེ་སཱ་ནི ཏ་ད་ནྭ་ཡཱ་ནི ཧོ་ནྟཱི་ཏི ཨེ་ཝ་མི་དྷ པ་ཉྩ བ་ལཱ་ནི མི་སྶ་ཀཱ་ནི ཀ་ཐི་ཏཱ་ནི. ཚ་ཊྛཾ ཨུ་ཏྟཱ་ན་ཏྠ་མེ་ཝ. ཨེ་ཝཾ པུ་རི་མ་ཝ་གྒེ ཙ ཨི་དྷ ཙ ཨ་ཊྛ་སུ སུ་ཏྟེ་སུ སེ་ཁ་བ་ལཱ་ནེ་ཝ ཀ་ཐི་ཏཱ་ནི. ཀ་ར་ཎྜ་ཀོ་ལ་ཝཱ་སཱི མ་ཧཱ་ད་ཏྟ་ཏྠེ་རོ པ་ནཱ་ཧ – ‘‘ཧེ་ཊྛཱ ཙ་ཏཱུ་སུ སུ་ཏྟེ་སུ སེ་ཁ་བ་ལཱ་ནི ཀ་ཐི་ཏཱ་ནི, ཨུ་པ་རི ཙ་ཏཱུ་སུ ཨ་སེ་ཁ་བ་ལཱ་ནཱི’’ཏི.
༧. པ་ཋ་མ་ཧི་ཏ་སུ་ཏྟ་ཝ་ཎྞ་ནཱ
༡༧. ས་ཏྟ་མེ སཱི་ལཱ་ད་ཡོ མི་སྶ་ཀཱ་ཝ ཀ་ཐི་ཏཱ. ཝི་མུ་ཏྟཱིཏི ཨ་ར་ཧ་ཏྟ་ཕ་ལ་ཝི་མུ་ཏྟི་ཡེ་ཝ. ཝི་མུ་ཏྟི་ཉཱ་ཎ་ད་སྶ་ནཾ པ་ཙྩ་ཝེ་ཀྑ་ཎ་ཉཱ་ཎཾ, ཏཾ ལོ་ཀི་ཡ་མེ་ཝ.
༨-༡༠. དུ་ཏི་ཡ་ཧི་ཏ་སུ་ཏྟཱ་དི་ཝ་ཎྞ་ནཱ
༡༨-༢༠. ཨ་ཊྛ་མེ དུ་སྶཱི་ལོ བ་ཧུ་སྶུ་ཏོ ཀ་ཐི་ཏོ, ན་ཝ་མེ ཨ་པྤ་སྶུ་ཏོ དུ་སྶཱི་ལོ, ད་ས་མེ བ་ཧུ་སྶུ་ཏོ ཁཱི་ཎཱ་ས་ཝོ་ཏི.
བ་ལ་ཝ་གྒོ དུ་ཏི་ཡོ.