༥. རོ་ཧི་ཏ་སྶ་ཝ་གྒོ
༡. ས་མཱ་དྷི་བྷཱ་ཝ་ནཱ་སུ་ཏྟ་ཝ་ཎྞ་ནཱ
༤༡. པ་ཉྩ་མ་སྶ པ་ཋ་མེ ཉཱ་ཎ་ད་སྶ་ན་པྤ་ཊི་ལཱ་བྷཱ་ཡཱཏི དི་བྦ་ཙ་ཀྑུ་ཉཱ་ཎ་ད་སྶ་ན་སྶ པ་ཊི་ལཱ་བྷཱ་ཡ. དི་ཝཱ་ས་ཉྙཾ ཨ་དྷི་ཊྛཱ་ཏཱིཏི དི་ཝཱ་ཏི ཨེ་ཝཾ ས་ཉྙཾ ཨ་དྷི་ཊྛཱ་ཏི. ཡ་ཐཱ དི་ཝཱ ཏ་ཐཱ ར་ཏྟིནྟི ཡ་ཐཱ དི་ཝཱ ཨཱ་ལོ་ཀ་ས་ཉྙཱ མ་ན་སི ཀ་ཏཱ, ཏ་ཐེ་ཝ ཏཾ ར་ཏྟི་མྤི མ་ན་སི ཀ་རོ་ཏི. དུ་ཏི་ཡ་པ་དེ་པི ཨེ་སེ་ཝ ན་ཡོ. ས་པྤ་བྷཱ་སནྟི དི་བྦ་ཙ་ཀྑུ་ཉཱ་ཎོ་བྷཱ་སེ་ན ས་ཧོ་བྷཱ་སཾ. ཀི་ཉྩཱ་པི ཨཱ་ལོ་ཀ་ས་དི་སཾ ཀ་ཏཾ, ཨ་ཏྠོ པ་ནེ་ཏྠ ན ཨེ་ཝཾ ས་ལླ་ཀྑེ་ཏ་བྦོ. དི་བྦ་ཙ་ཀྑུ་ཉཱ་ཎཱ་ལོ་ཀོ ཧི ཨི་དྷཱ་དྷི་པྤེ་ཏོ.
ཝི་དི་ཏཱཏི པཱ་ཀ་ཊཱ ཧུ་ཏྭཱ. ཀ་ཐཾ པ་ན ཝེ་ད་ནཱ ཝི་དི་ཏཱ ཨུ་པྤ་ཛྫ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟཱི་ཏི? ཨི་དྷ བྷི་ཀྑུ ཝ་ཏྠུཾ པ་རི་གྒ་ཎྷཱ་ཏི, ཨཱ་ར་མྨ་ཎཾ པ་རི་གྒ་ཎྷཱ་ཏི. ཏ་སྶ པ་རི་གྒ་ཧི་ཏ་ཝ་ཏྠཱ་ར་མྨ་ཎ་ཏཱ་ཡ ཏཱ ཝེ་ད་ནཱ ‘‘ཨེ་ཝཾ ཨུ་པྤ་ཛྫི་ཏྭཱ ཨེ་ཝཾ ཋ་ཏྭཱ ཨེ་ཝཾ ནི་རུ་ཛ྄ཛྷ་ནྟཱི’’ཏི ཝི་དི་ཏཱ ཨུ་པྤ་ཛྫ་ནྟི, ཝི་དི་ཏཱ ཏི་ཊྛ་ནྟི, ཝི་དི་ཏཱ ཨ་བྦྷ་ཏྠཾ ག་ཙྪ་ནྟི ནཱ་མ. ས་ཉྙཱ་ཝི་ཏ་ཀྐེ་སུཔི ཨེ་སེ་ཝ ན་ཡོ.
ཨུ་ད་ཡ་བྦ་ཡཱ་ནུ་པ་སྶཱིཏི ཨུ་ད་ཡ་ཉྩ ཝ་ཡ་ཉྩ པ་སྶ་ནྟོ. ཨི་ཏི རཱུ་པནྟི ཨེ་ཝཾ རཱུ་པཾ ཨེ་ཏྟ་ཀཾ རཱུ་པཾ ན ཨི་ཏོ པ་རཾ རཱུ་པཾ ཨ་ཏྠཱི་ཏི. ཨི་ཏི རཱུ་པ་སྶ ས་མུ་ད་ཡོཏི ཨེ་ཝཾ རཱུ་པ་སྶ ཨུ་པྤཱ་དོ. ཨ་ཏྠ་ངྒ་མོཏི པ་ན བྷེ་དོ ཨ་དྷི་པྤེ་ཏོ. ཝེ་ད་ནཱ་དཱི་སུཔི ཨེ་སེ་ཝ ན་ཡོ. ཨི་ད་ཉྩ པ་ན མེ་ཏཾ, བྷི་ཀྑ་ཝེ, ས་ནྡྷཱ་ཡ བྷཱ་སི་ཏནྟི, བྷི་ཀྑ་ཝེ, ཡཾ མ་ཡཱ ཨེ་ཏཾ པུ་ཎྞ་ཀ་པ་ཉྷེ ‘‘ས་ངྑཱ་ཡ ལོ་ཀ་སྨི’’ནྟི་ཨཱ་དི བྷཱ་སི་ཏཾ, ཏཾ ཨི་དཾ ཕ་ལ་ས་མཱ་པ་ཏྟིཾ ས་ནྡྷཱ་ཡ བྷཱ་སི་ཏ་ནྟི ཨ་ཏྠོ.
ཏ་ཏྠ ས་ངྑཱ་ཡཱཏི ཉཱ་ཎེ་ན ཛཱ་ནི་ཏྭཱ. ལོ་ཀ་སྨིནྟི ས་ཏྟ་ལོ་ཀེ. པ་རོ་པ་རཱ་ནཱིཏི ཨུ་ཙྩཱ་ཝ་ཙཱ་ནི ཨུ་ཏྟ་མཱ་དྷ་མཱ་ནི. ཨི་ཉྫི་ཏནྟི ཙ་ལི་ཏཾ. ན་ཏྠི ཀུ་ཧི་ཉྩི ལོ་ཀེཏི ལོ་ཀ་སྨིཾ ཀ་ཏྠ་ཙི ཨེ་ཀ་ཀྑ་ནྡྷེ་པི ཨེ་ཀཱ་ཡ་ཏ་ནེ་པི ཨེ་ཀ་དྷཱ་ཏུ་ཡཱ་པི ཨེ་ཀཱ་ར་མྨ་ཎེ་པི ན་ཏྠི. ས་ནྟོཏི པ་ཙྩ་ནཱི་ཀ་ཀི་ལེ་ས་ཝཱུ་པ་ས་མེ་ན ས་ནྟོ. ཝི་དྷཱུ་མོཏི ཀོ་དྷ་དྷཱུ་མེ་ན ཝི་ག་ཏ་དྷཱུ་མོ. ཨེ་ཝ་མེ་ཏྠ སུ་ཏྟ་ནྟེ མ་གྒེ་ཀ་གྒ་ཏ་མྤི ཀ་ཐེ་ཏྭཱ གཱ་ཐཱ་ཡ ཕ་ལ་ས་མཱ་པ་ཏྟི་ཡེ་ཝ ཀ་ཐི་ཏཱ་ཏི.
༢. པ་ཉྷ་བྱཱ་ཀ་ར་ཎ་སུ་ཏྟ་ཝ་ཎྞ་ནཱ
༤༢. དུ་ཏི་ཡེ ཡོ ཙ ཏེ་སཾ ཏ་ཏྠ ཏ་ཏྠ, ཛཱ་ནཱ་ཏི ཨ་ནུ་དྷ་མྨ་ཏནྟི ཡོ ཨེ་ཏེ་སཾ པ་ཉྷཱ་ནཾ ཏ་སྨིཾ ཏ་སྨིཾ ཋཱ་ནེ བྱཱ་ཀ་ར་ཎཾ ཛཱ་ནཱ་ཏི. ཙ་ཏུ་པ་ཉྷ་སྶ ཀུ་ས་ལོ, ཨཱ་ཧུ བྷི་ཀྑུཾ ཏ་ཐཱ་ཝི་དྷནྟི ཏ་ཐཱ་ཝི་དྷཾ བྷི་ཀྑུཾ ཏེ་སུ ཙ་ཏཱུ་སུ པ་ཉྷེ་སུ ཀུ་ས་ལོ་ཏི ཨེ་ཝཾ ཝ་ད་ནྟི. དུ་རཱ་ས་དོ དུ་པྤ་ས་ཧོཏི པ་རེ་ཧི གྷ་ཊྚེ་ཏུཾ ཝཱ ཨ་བྷི་བྷ་ཝི་ཏུཾ ཝཱ ན ས་ཀྐཱ. ག་མྦྷཱི་རོཏི ས་ཏྟ་སཱི་ད་ནྟ་ར་མ་ཧཱ་ས་མུ་དྡོ ཝི་ཡ ག་མྦྷཱི་རོ. དུ་པྤ་དྷཾ་སི་ཡོཏི དུ་མྨོ་ཙཱ་པ་ཡོ, ག་ཧི་ཏ་གྒ་ཧ་ཎཾ ཝི་སྶ་ཛྫཱ་པེ་ཏུཾ ན ས་ཀྐཱ་ཏི ཨ་ཏྠོ. ཨ་ཏྠེ ཨ་ན་ཏྠེ ཙཱཏི ཝ་ཌྜྷི་ཡ་ཉྩ ཨ་ཝ་ཌྜྷི་ཡ་ཉྩ. ཨ་ཏྠཱ་བྷི་ས་མ་ཡཱཏི ཨ་ཏྠ་ས་མཱ་ག་མེ་ན. དྷཱི་རོ པ་ཎྜི་ཏོ་ཏི པ་ཝུ་ཙྩ་ཏཱིཏི དྷི་ཏི་ས་མྤ་ནྣོ པུ་གྒ་ལོ ‘‘པ་ཎྜི་ཏོ ཨ་ཡ’’ནྟི ཨེ་ཝཾ པ་ཝུ་ཙྩ་ཏི.
༣-༤. ཀོ་དྷ་ག་རུ་སུ་ཏྟ་དྭ་ཡ་ཝ་ཎྞ་ནཱ
༤༣-༤༤. ཏ་ཏི་ཡེ ཀོ་དྷ་ག་རུ ན ས་དྡྷ་མྨ་ག་རཱུཏི ཀོ་དྷཾ གཱ་ར་ཝེ་ན ག་རུཾ ཀ་ཏྭཱ ག་ཎྷཱ་ཏི, ན ས་དྡྷ་མྨཾ, ས་དྡྷ་མྨཾ པ་ན ཨ་གཱ་ར་ཝེ་ན ལཱ་མ་ཀཾ ཀ་ཏྭཱ ག་ཎྷཱ་ཏི. སེ་ས་པ་དེ་སུ་པི ཨེ་སེ་ཝ ན་ཡོ.
ཝི་རཱུ་ཧ་ནྟཱིཏི ཝ་ཌྜྷ་ནྟི, ས་ཉྫཱ་ཏ་མཱུ་ལཱ་ཡ ཝཱ ས་དྡྷཱ་ཡ པ་ཏི་ཊྛ་ཧ་ནྟི ཨ་ཙ་ལཱ བྷ་ཝ་ནྟི. ཙ་ཏུ་ཏྠེ ཀོ་དྷ་ག་རུ་ཏཱཏི ཀོ་དྷ་མྷི ས་གཱ་ར་ཝ་ཏཱ. ཨེ་ས ན་ཡོ ས་བྦ་ཏྠ.
༥. རོ་ཧི་ཏ་སྶ་སུ་ཏྟ་ཝ་ཎྞ་ནཱ
༤༥. པ་ཉྩ་མེ ཡ་ཏྠཱཏི ཙ་ཀྐ་ཝཱ་ལ༹་ལོ་ཀ་སྶ ཨེ་ཀོ་ཀཱ་སེ བྷུ་མྨཾ. ན ཙ་ཝ་ཏི ན ཨུ་པ་པ་ཛྫ་ཏཱིཏི ཨི་དཾ ཨ་པ་རཱ་པ་རཾ ཙུ་ཏི་པ་ཊི་ས་ནྡྷི་ཝ་སེ་ན ག་ཧི་ཏཾ. ག་མ་ནེ་ནཱཏི པ་ད་ག་མ་ནེ་ན. ལོ་ཀ་སྶ ཨ་ནྟནྟི ས་ཏྠཱ ས་ངྑཱ་ར་ལོ་ཀ་སྶ ཨ་ནྟཾ ས་ནྡྷཱ་ཡ ཝ་ད་ཏི. ཉཱ་ཏེ་ཡྻནྟི་ཨཱ་དཱི་སུ ཉཱ་ཏ་བྦཾ ད་ཊྛ་བྦཾ པ་ཏྟ་བྦ་ནྟི ཨ་ཏྠོ. ཨི་ཏི དེ་ཝ་པུ་ཏྟེ་ན ཙ་ཀྐ་ཝཱ་ལ༹་ལོ་ཀ་སྶ ཨ་ནྟོ པུ་ཙྪི་ཏོ, ས་ཏྠཱ་རཱ ས་ངྑཱ་ར་ལོ་ཀ་སྶ ཀ་ཐི་ཏོ. སོ པ་ན ‘‘ཨ་ཏྟ་ནོ པ་ཉྷེ་ན ས་དྡྷིཾ ས་ཏྠུ བྱཱ་ཀ་ར་ཎཾ ས་མེ་ཏཱི’’ཏི ས་ཉྙཱ་ཡ ས་མྤ་ཧཾ་ས་ནྟོ ཨ་ཙྪ་རི་ཡནྟི་ཨཱ་དི་མཱ་ཧ.
ད་ལ༹ྷ་དྷ་མྨཱཏི ད་ལ༹ྷ་དྷ་ནུ ཨུ་ཏྟ་མ་པྤ་མཱ་ཎེ་ན དྷ་ནུ་ནཱ ས་མ་ནྣཱ་ག་ཏོ. དྷ་ནུ་གྒ་ཧོཏི དྷ་ནུ་ཨཱ་ཙ་རི་ཡོ. སི་ཀྑི་ཏོཏི དྭཱ་ད་ས ཝ་སྶཱ་ནི དྷ་ནུ་སི་པྤཾ སི་ཀྑི་ཏོ. ཀ་ཏ་ཧ་ཏྠོཏི ཨུ་ས་བྷ་པྤ་མཱ་ཎེ་པི ཝཱ་ལ་གྒཾ ཝི་ཛ྄ཛྷི་ཏུཾ ས་མ་ཏྠ་བྷཱ་ཝེ་ན ཀ་ཏ་ཧ་ཏྠོ. ཀ་ཏཱུ་པཱ་ས་ནོཏི ཀ་ཏ་ས་ར་ཀྑེ་པོ ད་སྶི་ཏ་སི་པྤོ. ཨ་ས་ནེ་ནཱཏི ཀ་ཎྜེ་ན. ཨ་ཏི་པཱ་ཏེ་ཡྻཱཏི ཨ་ཏི་ཀྐ་མེ་ཡྻ. ཡཱ་ཝ་ཏཱ སོ ཏཱ་ལ་ཙྪཱ་དིཾ ཨ་ཏི་ཀྐ་མེ་ཡྻ, ཏཱ་ཝ་ཏཱ ཀཱ་ལེ་ན ཨེ་ཀཾ ཙ་ཀྐ་ཝཱ་ལ༹ཾ ཨ་ཏི་ཀྐ་མཱ་མཱི་ཏི ཨ་ཏྟ་ནོ ཛ་ཝ་ས་མྤ་ཏྟིཾ ད་སྶེ་ཏི.
པུ་ར་ཏྠི་མཱ ས་མུ་དྡཱ པ་ཙྪི་མོཏི ཡ་ཐཱ པུ་ར་ཏྠི་མཱ ས་མུ་དྡཱ པ་ཙྪི་མ་ས་མུ་དྡོ དཱུ་རེ, ཨེ་ཝཾ མེ དཱུ་རེ པ་ད་ཝཱི་ཏི་ཧཱ་རོ ཨ་ཧོ་སཱི་ཏི ཝ་ད་ཏི. སོ ཀི་ར པཱ་ཙཱི་ན་ཙ་ཀྐ་ཝཱ་ལ༹་མུ་ཁ་ཝ་ཊྚི་ཡཾ ཋི་ཏོ པཱ་དཾ པ་སཱ་རེ་ཏྭཱ པ་ཙྪི་མ་ཙ་ཀྐ་ཝཱ་ལ༹་མུ་ཁ་ཝ་ཊྚིཾ ཨ་ཏི་ཀྐ་མ་ཏི, པུ་ན དུ་ཏི་ཡ་པཱ་དཾ པ་སཱ་རེ་ཏྭཱ པ་ར་ཙ་ཀྐ་ཝཱ་ལ༹་མུ་ཁ་ཝ་ཊྚིཾ ཨ་ཏི་ཀྐ་མ་ཏི. ཨི་ཙྪཱ་ག་ཏནྟི ཨི་ཙྪཱ ཨེ་ཝ. ཨ་ཉྙ་ཏྲེ་ཝཱཏི ནི་པྤ་པ་ཉྩ་ཏཾ ད་སྶེ་ཏི. བྷི་ཀྑཱ་ཙཱ་ར་ཀཱ་ལེ ཀི་རེ་ས ནཱ་ག་ལ་ཏཱ་ད་ནྟ་ཀ་ཊྛཾ ཁཱ་དི་ཏྭཱ ཨ་ནོ་ཏ་ཏྟེ མུ་ཁཾ དྷོ་ཝི་ཏྭཱ ཀཱ་ལེ ས་མྤ་ཏྟེ ཨུ་ཏྟ་ར་ཀུ་རུ་མྷི པི་ཎྜཱ་ཡ ཙ་རི་ཏྭཱ ཙ་ཀྐ་ཝཱ་ལ༹་མུ་ཁ་ཝ་ཊྚི་ཡཾ ནི་སི་ནྣོ བྷ་ཏྟ་ཀི་ཙྩཾ ཀ་རོ་ཏི, ཏ་ཏྠ མུ་ཧུ་ཏྟཾ ཝི་སྶ་མི་ཏྭཱ པུ་ན ཛ་ཝ་ཏི. ཝ་སྶ་ས་ཏཱ་ཡུ་ཀོཏི ཏ་དཱ དཱི་གྷཱ་ཡུ་ཀ་ཀཱ་ལོ ཧོ་ཏི, ཨ་ཡཾ པ་ན ཝ་སྶ་ས་ཏཱ་ཝ་སི་ཊྛེ ཨཱ་ཡུ་མྷི ག་མ་ནཾ ཨཱ་ར་བྷི. ཝ་སྶ་ས་ཏ་ཛཱི་ཝཱིཏི ཏཾ ཝ་སྶ་ས་ཏཾ ཨ་ན་ནྟ་རཱ་ཡེ་ན ཛཱི་ཝ་ནྟོ. ཨ་ནྟ་རཱ་ཡེ་ཝ ཀཱ་ལ་ངྐ་ཏོཏི ཙ་ཀྐ་ཝཱ་ལ༹་ལོ་ཀ་སྶ ཨ་ནྟཾ ཨ་པྤ་ཏྭཱ ཨ་ནྟ་རཱ་ཝ མ་ཏོ. སོ པ་ན ཏ་ཏྠ ཀཱ་ལཾ ཀ་ཏྭཱ་པི ཨཱ་ག་ནྟྭཱ ཨི་མ་སྨིཾ་ཡེ་ཝ ཙ་ཀྐ་ཝཱ་ལེ༹ ནི་བྦ་ཏྟི.
ཨ་པྤ་ཏྭཱཏི ས་ངྑཱ་ར་ལོ་ཀ་སྶ ཨ་ནྟཾ ཨ་པྤ་ཏྭཱ. དུ་ཀྑ་སྶཱཏི ཝ་ཊྚ་དུ་ཀྑ་སྶ. ཨ་ནྟ་ཀི་རི་ཡནྟི པ་རི་ཡ་ནྟ་ཀ་ར་ཎཾ. ཀ་ལེ༹་ཝ་རེཏི ཨ་ཏྟ་བྷཱ་ཝེ. ས་ས་ཉྙི་མྷི ས་མ་ན་ཀེཏི ས་ས་ཉྙེ ས་ཙི་ཏྟ་ཀེ. ལོ་ཀནྟི དུ་ཀྑ་ས་ཙྩཾ. ལོ་ཀ་ས་མུ་ད་ཡནྟི ས་མུ་ད་ཡ་ས་ཙྩཾ. ལོ་ཀ་ནི་རོ་དྷནྟི ནི་རོ་དྷ་ས་ཙྩཾ. པ་ཊི་པ་དནྟི མ་གྒ་ས་ཙྩཾ. ཨི་ཏི ‘‘ནཱ་ཧཾ, ཨཱ་ཝུ་སོ, ཨི་མཱ་ནི ཙ་ཏྟཱ་རི ས་ཙྩཱ་ནི ཏི་ཎ་ཀ་ཊྛཱ་དཱི་སུ པ་ཉྙ་པེ་མི, ཨི་མ་སྨིཾ པ་ན ཙ་ཏུ་མ་ཧཱ་བྷཱུ་ཏི་ཀེ ཀཱ་ཡ་སྨིཾ་ཡེ་ཝ པ་ཉྙ་པེ་མཱི’’ཏི ད་སྶེ་ཏི. ས་མི་ཏཱ་ཝཱིཏི ས་མི་ཏ་པཱ་པོ. ནཱ་སཱི་ས་ཏཱིཏི ན པ་ཏྠེ་ཏི. ཚ་ཊྛཾ ཨུ་ཏྟཱ་ན་ཏྠ་མེ་ཝཱ་ཏི.
༧. སུ་ཝི་དཱུ་ར་སུ་ཏྟ་ཝ་ཎྞ་ནཱ
༤༧. ས་ཏྟ་མེ སུ་ཝི་དཱུ་ར་ཝི་དཱུ་རཱ་ནཱིཏི ཀེ་ན་ཙི པ་རི་ཡཱ་ཡེ་ན ཨ་ནཱ་ས་ནྣཱ་ནི ཧུ་ཏྭཱ སུ་ཝི་དཱུ་རཱ་ནེ་ཝ ཝི་དཱུ་རཱ་ནི. ན་བྷ་ཉྩ, བྷི་ཀྑ་ཝེ, པ་ཐ་ཝཱི ཙཱཏི ཨཱ་ཀཱ་ས་ཉྩ མ་ཧཱ་པ་ཐ་ཝཱི ཙ. ཏ་ཏྠ ཀི་ཉྩཱ་པི པ་ཐ་ཝི་ཏོ ཨཱ་ཀཱ་སཾ ནཱ་མ ན དཱུ་རེ, དྭ་ངྒུ་ལ་མ་ཏྟེ་པི ཧོ་ཏི. ཨ་ཉྙ་མ་ཉྙཾ ཨ་ལ་གྒ་ན་ཊྛེ་ན པ་ན ‘‘སུ་ཝི་དཱུ་ར་ཝི་དཱུ་རེ’’ཏི ཝུ་ཏྟཾ. ཝེ་རོ་ཙ་ནོཏི སཱུ་རི་ཡོ. ས་ཏ་ཉྩ, བྷི་ཀྑ་ཝེ, དྷ་མྨོཏི ཙ་ཏུ་ས་ཏི་པ་ཊྛཱ་ནཱ་དི་བྷེ་དོ ས་ཏྟ་ཏིཾ་ས་བོ་དྷི་པ་ཀྑི་ཡ་དྷ་མྨོ. ཨ་ས་ཏ་ཉྩ དྷ་མྨོཏི དྭཱ་ས་ཊྛི་དི་ཊྛི་ག་ཏ་བྷེ་དོ ཨ་སྶ་དྡྷ་མྨོ.
པ་བྷ་ངྐ་རོཏི ཨཱ་ལོ་ཀ་ཀ་རོ. ཨ་བྱཱ་ཡི་ཀོ ཧོ་ཏཱིཏི ཨ་ཝི་ག་ཙྪ་ན་ས་བྷཱ་ཝོ ཧོ་ཏི. ས་ཏཾ ས་མཱ་ག་མོཏི པ་ཎྜི་ཏཱ་ནཾ མི་ཏྟ་ས་ནྠ་ཝ་ཝ་སེ་ན ས་མཱ་ག་མོ. ཡཱ་ཝཱ་པི ཏི་ཊྛེ་ཡྻཱཏི ཡ་ཏྟ་ཀཾ ཨ་དྡྷཱ་ནཾ ཏི་ཊྛེ་ཡྻ. ཏ་ཐེ་ཝ ཧོ་ཏཱིཏི ཏཱ་དི་སོ་ཝ ཧོ་ཏི, པ་ཀ་ཏིཾ ན ཛ་ཧ་ཏི. ཁི་པྤཾ ཧི ཝེ་ཏཱིཏི སཱི་གྷཾ ཝི་ག་ཙྪ་ཏི.
༨. ཝི་སཱ་ཁ་སུ་ཏྟ་ཝ་ཎྞ་ནཱ
༤༨. ཨ་ཊྛ་མེ པ་ཉྩཱ་ལ་པུ་ཏྟོཏི པ་ཉྩཱ་ལ་བྲཱ་ཧྨ་ཎི་ཡཱ པུ་ཏྟོ. པོ་རི་ཡཱ ཝཱ་ཙཱ་ཡཱཏི པ་རི་པུ་ཎྞ་ཝཱ་ཙཱ་ཡ. ཝི་སྶ་ཊྛཱ་ཡཱཏི ཨ་པ་ལི་བུ་དྡྷཱ་ཡ. ཨ་ནེ་ལ་ག་ལཱ་ཡཱཏི ནི་དྡོ་སཱ་ཡ ཙེ་ཝ ཨ་ག་ལི༹་ཏཱ་ཡ ཙ ཨ་པ་ཏི་ཏ་པ་ད་བྱ་ཉྫ་ནཱ་ཡ. པ་རི་ཡཱ་པ་ནྣཱ་ཡཱཏི ཝི་ཝ་ཊྚ་པ་རི་ཡཱ་པ་ནྣཱ་ཡ. ཨ་ནི་སྶི་ཏཱ་ཡཱཏི ཝ་ཊྚཾ ཨ་ནི་སྶི་ཏཱ་ཡ. ཝི་ཝ་ཊྚ་ནི་སྶི་ཏ་མེ་ཝ ཀ་ཏྭཱ ཀ་ཐེ་ཏི, ཝ་ཊྚ་ནི་སྶི་ཏཾ ཀ་ཏྭཱ ན ཀ་ཐེ་ཏཱི་ཏི ཨ་ཡ་མེ་ཏྠ ཨ་དྷི་པྤཱ་ཡོ.
ནཱ་བྷཱ་ས་མཱ་ནནྟི ན ཨ་ཀ་ཐེ་ནྟཾ. ཨ་མ་ཏཾ པ་དནྟི ནི་བྦཱ་ན་པ་དཾ. བྷཱ་ས་ཡེཏི ཨོ་བྷཱ་སེ་ཡྻ. ཛོ་ཏ་ཡེཏི ཏ་སྶེ་ཝ ཝེ་ཝ་ཙ་ནཾ. པ་གྒ་ཎྷེ ཨི་སི་ནཾ དྷ་ཛནྟི ཨ་བྦྷུ་གྒ་ཏ་ཊྛེ་ན ན་ཝ་ལོ་ཀུ་ཏྟ་ར་དྷ་མྨོ ཨི་སཱི་ནཾ དྷ་ཛོ ནཱ་མ ཝུ་ཙྩ་ཏི, ཏ་མེ་ཝ པ་གྒ་ཎྷེ་ཡྻ ཨུ་ཀྑི་པེ་ཡྻ, ཨུ་ཙྩཾ ཀ་ཏྭཱ ཀ་ཐེ་ཡྻཱ་ཏི ཨ་ཏྠོ. ན་ཝ་ལོ་ཀུ་ཏྟ་ར་དྷ་མྨ་དཱི་པ་ཀཾ སུ་བྷཱ་སི་ཏཾ དྷ་ཛོ ཨེ་ཏེ་ས་ནྟི སུ་བྷཱ་སི་ཏ་དྷ་ཛཱ. ཨི་ས་ཡོཏི བུ་དྡྷཱ་ད་ཡོ ཨ་རི་ཡཱ. དྷ་མྨོ ཧི ཨི་སི་ནཾ དྷ་ཛོཏི ཧེ་ཊྛཱ ཝུ་ཏྟ་ན་ཡེ་ནེ་ཝ ལོ་ཀུ་ཏྟ་ར་དྷ་མྨོ ཨི་སཱི་ནཾ དྷ་ཛོ ནཱ་མཱ་ཏི.
༩. ཝི་པ་ལླཱ་ས་སུ་ཏྟ་ཝ་ཎྞ་ནཱ
༤༩. ན་ཝ་མེ ས་ཉྙཱ་ཝི་པ་ལླཱ་སཱཏི ས་ཉྙཱ་ཡ ཝི་པ་ལླ་ཏྠ་བྷཱ་ཝཱ, ཙ་ཏ་སྶོ ཝི་པ་རཱི་ཏ་ས་ཉྙཱ་ཡོ་ཏི ཨ་ཏྠོ. སེ་ས་པ་ད་དྭ་ཡེ་པི ཨེ་སེ་ཝ ན་ཡོ. ཨ་ནི་ཙྩེ, བྷི་ཀྑ་ཝེ, ནི་ཙྩ་ནྟི ས་ཉྙཱ་ཝི་པ་ལླཱ་སོཏི ཨ་ནི་ཙྩེ ཝ་ཏྠུ་སྨིཾ ‘‘ནི་ཙྩཾ ཨི་ད’’ནྟི ཨེ་ཝཾ ག་ཧེ་ཏྭཱ ཨུ་པྤ་ཛྫ་ན་ཀ་ས་ཉྙཱ, ས་ཉྙཱ་ཝི་པ་ལླཱ་སོ་ཏི ཨ་ཏྠོ. ཨི་མི་ནཱ ན་ཡེ་ན ས་བྦ་པ་དེ་སུ ཨ་ཏྠོ ཝེ་དི་ཏ་བྦོ.
ཨ་ན་ཏྟ་ནི ཙ ཨ་ཏྟཱཏི ཨ་ན་ཏྟ་ནི ‘‘ཨ་ཏྟཱ’’ཏི ཨེ་ཝཾ་ས་ཉྙི་ནོ་ཏི ཨ་ཏྠོ. མི་ཙྪཱ་དི་ཊྛི་ཧ་ཏཱཏི ན ཀེ་ཝ་ལཾ ས་ཉྙི་ནོ་ཝ, ས་ཉྙཱ་ཡ ཝི་ཡ ཨུ་པྤ་ཛྫ་མཱ་ནཱ་ཡ མི་ཙྪཱ་དི་ཊྛི་ཡཱ་པི ཧ་ཏཱ. ཁི་ཏྟ་ཙི་ཏྟཱཏི ཏེ ས་ཉྙཱ་དི་ཊྛི་ཡོ ཝི་ཡ ཨུ་པྤ་ཛྫ་མཱ་ནེ་ན ཁི་ཏྟེ་ན ཙི་ཏྟེ་ན ས་མ་ནྣཱ་ག་ཏཱ. ཝི་ས་ཉྙི་ནོཏི དེ་ས་ནཱ་མ་ཏྟ་མེ་ཏཾ, ཝི་པ་རཱི་ཏ་ས་ཉྙཱ་ཙི་ཏྟ་དི་ཊྛི་ནོ་ཏི ཨ་ཏྠོ. ཏེ ཡོ་ག་ཡུ་ཏྟཱ མཱ་ར་སྶཱཏི ཏེ མཱ་ར་སྶ ཡོ་གེ ཡུ་ཏྟཱ ནཱ་མ ཧོ་ནྟི. ཨ་ཡོ་ག་ཀྑེ་མི་ནོཏི ཙ་ཏཱུ་ཧི ཡོ་གེ་ཧི ཁེ་མཾ ནི་བྦཱ་ནཾ ཨ་པྤ་ཏྟཱ. ས་ཏྟཱཏི པུ་གྒ་ལཱ. བུ་དྡྷཱཏི ཙ་ཏུ་ས་ཙྩ་བུ་དྡྷཱ. ཨི་མཾ དྷ་མྨནྟི ཙ་ཏུ་ས་ཙྩ་དྷ་མྨཾ. ས་ཙི་ཏྟཾ པ་ཙྩ་ལ་དྡྷཱཏི ས་ཀཾ ཙི་ཏྟཾ པ་ཊི་ལ་བྷི་ཏྭཱ. ཨ་ནི་ཙྩ་ཏོ ད་ཀྑུནྟི ཨ་ནི་ཙྩ་བྷཱ་ཝེ་ན ཨ་དྡ་སཾ་སུ. ཨ་སུ་བྷ་ཏ་དྡ་སུནྟི ཨ་སུ་བྷཾ ཨ་སུ་བྷ་ཏོ་ཡེ་ཝ ཨ་དྡ་སཾ་སུ. ས་མྨཱ་དི་ཊྛི་ས་མཱ་དཱ་ནཱཏི ག་ཧི་ཏ་ས་མྨཱ་ད་སྶ་ནཱ. ས་བྦཾ དུ་ཀྑཾ ཨུ་པ་ཙྩ་གུནྟི ས་ཀ་ལཾ ཝ་ཊྚ་དུ་ཀྑཾ ས་མ་ཏི་ཀྐ་ནྟཱ.
༡༠. ཨུ་པ་ཀྐི་ལེ་ས་སུ་ཏྟ་ཝ་ཎྞ་ནཱ
༥༠. ད་ས་མེ ཨུ་པ་ཀྐི་ལེ་སཱཏི ཝི་རོ་ཙི་ཏུཾ ཨ་ད་ཏྭཱ ཨུ་པ་ཀྐི་ལི་ཊྛ་བྷཱ་ཝ་ཀ་ར་ཎེ་ན ཨུ་པ་ཀྐི་ལེ་སཱ. མ་ཧི་ཀཱཏི ཧི་མཾ. དྷཱུ་མོ ར་ཛོཏི དྷཱུ་མོ ཙ ར་ཛོ ཙ. རཱ་ཧཱུཏི པུ་རི་མཱ ཏ་ཡོ ཨ་ས་མྤ་ཏྟ་ཨུ་པ་ཀྐི་ལེ་སཱ, རཱ་ཧུ པ་ན ས་མྤ་ཏྟ་ཨུ་པ་ཀྐི་ལེ་ས་ཝ་སེ་ན ཀ་ཐི་ཏོ་ཏི ཝེ་དི་ཏ་བྦོ. ས་མ་ཎ་བྲཱ་ཧྨ་ཎཱ ན ཏ་པ་ནྟི ན བྷཱ་ས་ནྟི ན ཝི་རོ་ཙ་ནྟཱིཏི གུ་ཎ་པྤ་ཏཱ་པེ་ན ན ཏ་པ་ནྟི, གུ་ཎོ་བྷཱ་སེ་ན ན བྷཱ་ས་ནྟི, གུ་ཎ་ཝི་རོ་ཙ་ནེ་ན ན ཝི་རོ་ཙ་ནྟི. སུ་རཱ་མེ་ར་ཡ་པཱ་ནཱ ཨ་པྤ་ཊི་ཝི་ར་ཏཱཏི པ་ཉྩ་ཝི་དྷཱ་ཡ སུ་རཱ་ཡ ཙ་ཏུ་བྦི་དྷ་སྶ མེ་ར་ཡ་སྶ ཙ པཱ་ན་ཏོ ཨ་ཝི་ར་ཏཱ.
ཨ་ཝི་ཛྫཱ་ནི་ཝུ་ཏཱཏི ཨ་ཝི་ཛྫཱ་ཡ ནི་ཝཱ་རི་ཏཱ པི་ཧི་ཏཱ. པི་ཡ་རཱུ་པཱ་བྷི་ན་ནྡི་ནོཏི པི་ཡ་རཱུ་པཾ སཱ་ཏ་རཱུ་པཾ ཨ་བྷི་ན་ནྡ་མཱ་ནཱ ཏུ་སྶ་མཱ་ནཱ. སཱ་དི་ཡ་ནྟཱིཏི ག་ཎྷ་ནྟི. ཨ་ཝི་དྡ་སཱུཏི ཨ་ནྡྷ་བཱ་ལཱ. ས་ནེ་ཏྟི་ཀཱཏི ཏ་ཎྷཱ་ཡོ་ཏྟེ་ནེ་ཝ ས་ཡོ་ཏྟཱ. ཀ་ཊ་སིནྟི ཨ་ཏྟ་བྷཱ་ཝཾ. གྷོ་རནྟི ཀ་ཀྑ་ལ༹ཾ. ཨི་མ་སྨིཾ སུ་ཏྟེ་པི གཱ་ཐཱ་སུ་པི ཝ་ཊྚ་མེ་ཝ ཀ་ཐི་ཏ་ནྟི.
རོ་ཧི་ཏ་སྶ་ཝ་གྒོ པ་ཉྩ་མོ.