༢. དུ་ཏི་ཡ་པ་ཎྞཱ་ས་ཀཾ
(༦) ༡. པུ་ཉྙཱ་བྷི་ས་ནྡ་ཝ་གྒོ
༡. པ་ཋ་མ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ
༥༡. དུ་ཏི་ཡ་སྶ པ་ཋ་མེ པུ་ཉྙཱ་བྷི་ས་ནྡཱཏི པུ་ཉྙ་སྶ ཨ་བྷི་ས་ནྡཱ, པུ་ཉྙ་པྤ་ཏྟི་ཡོ་ཏི ཨ་ཏྠོ. ཀུ་ས་ལཱ་བྷི་ས་ནྡཱཏི ཏ་སྶེ་ཝ ཝེ་ཝ་ཙ་ནཾ. ཏེ པ་ནེ་ཏེ སུ་ཁཾ ཨཱ་ཧ་ར་ནྟཱི་ཏི སུ་ཁ་སྶཱ་ཧཱ་རཱ. སུ་ཊྛུ ཨ་གྒཱ་ནཾ རཱུ་པཱ་དཱི་ནཾ དཱ་ཡ་ཀཱ་ཏི སོ་ཝ་གྒི་ཀཱ. སུ་ཁོ ནེ་སཾ ཝི་པཱ་ཀོ་ཏི སུ་ཁ་ཝི་པཱ་ཀཱ. ས་གྒེ ཨུ་པ་པ་ཏྟི ས་གྒོ, ས་གྒཱ་ཡ སཾ་ཝ་ཏྟ་ནྟཱི་ཏི ས་གྒ་སཾ་ཝ་ཏྟ་ནི་ཀཱ. ཙཱི་ཝ་རཾ པ་རི་བྷུ་ཉྫ་མཱ་ནོཏི ཙཱི་ཝ་ར་ཏྠཱ་ཡ ཝ་ཏྠཾ ལ་བྷི་ཏྭཱ སཱུ་ཙི་སུ་ཏྟཱ་དཱི་ནཾ ཨ་བྷཱ་ཝེ་ན ཏཾ ནི་ཀྑི་པ་ནྟོ་པི ཀ་རོ་ནྟོ་པི པཱ་རུ་པ་ནྟོ་པི ཛི་ཎྞ་ཀཱ་ལེ པ་ཙྩ་ཏྠ་ར་ཎཾ ཀ་རོ་ནྟོ་པི པ་ཙྩ་ཏྠ་རི་ཏུ་མྤི ཨ་ས་ཀྐུ་ཎེ་ཡྻཾ བྷཱུ་མ་ཏྠ་ར་ཎཾ ཀ་རོ་ནྟོ་པི བྷཱུ་མ་ཏྠ་ར་ཎ་སྶ ཨ་ན་ནུ་ཙྪ་ཝི་ཀཾ ཕཱ་ལེ་ཏྭཱ པཱ་ད་པུ་ཉྪ་ནཾ ཀ་རོ་ནྟོ་པི ‘‘པ་རི་བྷུ་ཉྫ་མཱ་ནོ’’ཏྭེ་ཝ ཝུ་ཙྩ་ཏི. ཡ་དཱ པ་ན ‘‘པཱ་ད་པུ་ཉྪ་ན་མྤི ན ས་ཀྐཱ ཨི་ད’’ནྟི ས་མྨ་ཛྫི་ཏྭཱ ཚ་ཌྜི་ཏཾ ཧོ་ཏི, ཏ་དཱ པ་རི་བྷུ་ཉྫ་མཱ་ནོ ནཱ་མ ན ཧོ་ཏི. ཨ་པྤ་མཱ་ཎཾ ཙེ་ཏོ་ས་མཱ་དྷིནྟི ཨ་ར་ཧ་ཏྟ་ཕ་ལ་ས་མཱ་དྷིཾ. ཨ་པྤ་མཱ་ཎོ ཏ་སྶ པུ་ཉྙཱ་བྷི་ས་ནྡོཏི ཨི་མི་ནཱ དཱ་ཡ་ཀ་སྶ པུ་ཉྙ་ཙེ་ཏ་ནཱ་ཡ ཨ་པྤ་མཱ་ཎ་ཏཾ ཀ་ཐེ་ཏི. ཏ་སྶ ཧི ‘‘ཁཱི་ཎཱ་ས་ཝོ མེ ཙཱི་ཝ་རཾ པ་རི་བྷུ་ཉྫ་ཏཱི’’ཏི པུ་ན་པྤུ་ནཾ ཨ་ནུ་སྶ་ར་ཎ་ཝ་སེ་ན པ་ཝ་ཏྟཱ པུ་ཉྙ་ཙེ་ཏ་ནཱ ཨ་པྤ་མཱ་ཎཱ ཧོ་ཏི. ཏཾ ས་ནྡྷཱ་ཡེ་ཏཾ ཝུ་ཏྟཾ. པི་ཎྜ་པཱ་ཏཱདཱི་སུ པ་ན ཡོ པི་ཎྜ་པཱ་ཏཾ པ་རི་བྷུ་ཉྫི་ཏྭཱ ས་ཏྟཱ་ཧ་མྤི ཏེ་ནེ་ཝ ཡཱ་པེ་ཏི, ཨ་ཉྙཾ ན པ་རི་བྷུ་ཉྫ་ཏི, སོ ས་ཏྟཱ་ཧ་མྤི ཏཾ་ཡེ་ཝ པི་ཎྜ་པཱ་ཏཾ པ་རི་བྷུ་ཉྫ་མཱ་ནོ ནཱ་མ ཧོ་ཏི. ཨེ་ཀ་སྨིཾ པ་ན སེ་ནཱ་ས་ནེ ར་ཏྟི་ཊྛཱ་ན་དི་ཝཱ་ཊྛཱ་ནཱ་དཱི་སུ ཙ་ངྐ་མ་ནྟོ་པི ཡཱ་ཝ ཏཾ སེ་ནཱ་ས་ནཾ པ་ཧཱ་ཡ ཨ་ཉྙཾ ན ག་ཎྷཱ་ཏི, ཏཱ་ཝ པ་རི་བྷུ་ཉྫ་མཱ་ནོ ནཱ་མ ཧོ་ཏི. ཨེ་ཀེ་ན པ་ན བྷེ་ས་ཛྫེ་ན བྱཱ་དྷི་མྷི ཝཱུ་པ་ས་ནྟེ ཡཱ་ཝ ཨ་ཉྙཾ བྷེ་ས་ཛྫཾ ན པ་རི་བྷུ་ཉྫ་ཏི, ཏཱ་ཝ་དེ་ཝ པ་རི་བྷུ་ཉྫ་མཱ་ནོ ནཱ་མ ཧོ་ཏི.
བ་ཧུ་བྷེ་ར་ཝནྟི བ་ཧཱུ་ཧི བྷེ་ར་ཝཱ་ར་མྨ་ཎེ་ཧི ས་མ་ནྣཱ་ག་ཏཾ. ར་ཏ་ན་ཝ་རཱ་ནནྟི ས་ཏྟ་ནྣ་མྤི ཝ་ར་ར་ཏ་ནཱ་ནཾ. ཨཱ་ལ་ཡནྟི ནི་ཝཱ་ས་ཊྛཱ་ནཾ. པུ་ཐཱུ ས་ཝ་ནྟཱིཏི བ་ཧུ་ཀཱ ཧུ་ཏྭཱ ས་ནྡ་མཱ་ནཱ. སེ་ས་མེ་ཏྠ ཨུ་ཏྟཱ་ན་མེ་ཝ.
༢. དུ་ཏི་ཡ་པུ་ཉྙཱ་བྷི་ས་ནྡ་སུ་ཏྟ་ཝ་ཎྞ་ནཱ
༥༢. དུ་ཏི་ཡེ ཨ་རི་ཡ་ཀ་ནྟེ་ཧཱིཏི མ་གྒ་ཕ་ལ་ས་མྤ་ཡུ་ཏྟེ་ཧི. ཏཱ་ནི ཧི ཨ་རི་ཡཱ་ནཾ ཀ་ནྟཱ་ནི ཧོ་ནྟི པི་ཡཱ་ནི མ་ནཱ་པཱ་ནི. སེ་སཾ སུ་ཏྟ་ནྟེ ཏཱ་ཝ ཡཾ ཝ་ཏྟ་བྦཾ སི་ཡཱ, ཏཾ ཝི་སུ་དྡྷི་མ་གྒེ (ཝི་སུ་དྡྷི. ༡.༡༢༤ ཨཱ་ད་ཡོ) ཝུ་ཏྟ་མེ་ཝ.
གཱ་ཐཱ་སུ པ་ན ས་དྡྷཱཏི སོ་ཏཱ་པ་ནྣ་སྶ ས་དྡྷཱ ཨ་དྷི་པྤེ་ཏཱ. སཱི་ལ་མྤི སོ་ཏཱ་པ་ནྣ་སྶ སཱི་ལ་མེ་ཝ. ཨུ་ཛུ་བྷཱུ་ཏ་ཉྩ ད་སྶ་ནནྟི ཀཱ་ཡ་ཝ་ངྐཱ་དཱི་ནཾ ཨ་བྷཱ་ཝེ་ན ཁཱི་ཎཱ་ས་ཝ་སྶ ད་སྶ་ནཾ ཨུ་ཛུ་བྷཱུ་ཏ་ད་སྶ་ནཾ ནཱ་མ. ཨཱ་ཧཱུཏི ཀ་ཐ་ཡ་ནྟི. པ་སཱ་དནྟི བུ་དྡྷ་དྷ་མྨ་ས་ངྒྷེ་སུ པ་སཱ་དཾ. དྷ་མྨ་ད་སྶ་ནནྟི ཙ་ཏུ་ས་ཙྩ་དྷ་མྨ་ད་སྶ་ནཾ.
༣. པ་ཋ་མ་སཾ་ཝཱ་ས་སུ་ཏྟ་ཝ་ཎྞ་ནཱ
༥༣. ཏ་ཏི་ཡེ ས་མྦ་ཧུ་ལཱ་པི ཁོ ག་ཧ་པ་ཏཱི ཙ ག་ཧ་པ་ཏཱ་ནི་ཡོ ཙཱཏི བ་ཧུ་ཀཱ ག་ཧ་པ་ཏ་ཡོ ཙ ག་ཧ་པ་ཏཱ་ནི་ཡོ ཙ ཨཱ་ཝཱ་ཧ་ཝི་ཝཱ་ཧ་ཀ་ར་ཎ་ཏྠཱ་ཡ ག་ཙྪ་ནྟཱ ཏ་མེ་ཝ མ་གྒཾ པ་ཊི་པ་ནྣཱ ཧོ་ནྟི. སཾ་ཝཱ་སཱཏི ས་ཧ་ཝཱ་སཱ ཨེ་ཀ་ཏོ་ཝཱ་སཱ. ཚ་ཝོ ཚ་ཝཱ་ཡཱཏི གུ་ཎ་མ་ར་ཎེ་ན མ་ཏ་ཏྟཱ ཚ་ཝོ གུ་ཎ་མ་ར་ཎེ་ནེ་ཝ མ་ཏཱ་ཡ ཚ་ཝཱ་ཡ ས་དྡྷིཾ. དེ་ཝི་ཡཱ ས་དྡྷིནྟི གུ་ཎེ་ཧི དེ་ཝི་བྷཱུ་ཏཱ་ཡ ས་དྡྷིཾ. དུ་སྶཱི་ལོཏི ནི་སྶཱི་ལོ. པཱ་པ་དྷ་མྨོཏི ལཱ་མ་ཀ་དྷ་མྨོ. ཨ་ཀྐོ་ས་ཀ་པ་རི་བྷཱ་ས་ཀོཏི ད་ས་ཧི ཨ་ཀྐོ་ས་ཝ་ཏྠཱུ་ཧི ཨ་ཀྐོ་ས་ཀོ, བྷ་ཡཾ ད་སྶེ་ཏྭཱ ས་ནྟ་ཛྫ་ནེ་ན པ་རི་བྷཱ་ས་ཀོ. ཨེ་ཝཾ ས་བྦ་ཏྠ ཨ་ཏྠོ ཝེ་དི་ཏ་བྦོ.
ཀ་ད་རི་ཡཱཏི ཐ་དྡྷ་མ་ཙྪ་རི་ནོ. ཛཱ་ནི་པ་ཏ་ཡོཏི ཛ་ཡ་མྤ་ཏི་ཀཱ. ཝ་ད་ཉྙཱུཏི ཡཱ་ཙ་ཀཱ་ནཾ ཝ་ཙ་ན་སྶ ཨ་ཏྠཾ ཛཱ་ན་ནྟི. ས་ཉྙ་ཏཱཏི སཱི་ལ་སཾ་ཡ་མེ་ན ས་མ་ནྣཱ་ག་ཏཱ. དྷ་མྨ་ཛཱི་ཝི་ནོཏི དྷ་མྨེ ཋ་ཏྭཱ ཛཱི་ཝི་ཀཾ ཀ་པྤེ་ནྟཱི་ཏི དྷ་མྨ་ཛཱི་ཝི་ནོ. ཨ་ཏྠཱ་སཾ པ་ཙུ་རཱ ཧོ་ནྟཱིཏི ཝ་ཌྜྷི་ས་ངྑཱ་ཏཱ ཨ་ཏྠཱ ཨེ་ཏེ་སཾ བ་ཧཱུ ཧོ་ནྟི. ཕཱ་སུ་ཀཾ ཨུ་པ་ཛཱ་ཡ་ཏཱིཏི ཨ་ཉྙ་མ་ཉྙཾ ཕཱ་སུ་ཝི་ཧཱ་རོ ཛཱ་ཡ་ཏི. ཀཱ་མ་ཀཱ་མི་ནོཏི ཀཱ་མེ ཀཱ་མ་ཡ་མཱ་ནཱ.
༤. དུ་ཏི་ཡ་སཾ་ཝཱ་ས་སུ་ཏྟ་ཝ་ཎྞ་ནཱ
༥༤. ཙ་ཏུ་ཏྠེ ཀ་མྨ་པ་ཐ་ཝ་སེ་ན དེ་ས་ནཱ པ་ཝ་ཏྟི་ཏཱ. སེ་སཾ ཏཱ་དི་ས་མེ་ཝ. ཨི་མེ་སུ པ་ན དྭཱི་སུ་པི སུ་ཏྟེ་སུ ཨ་གཱ་རི་ཀ་པ་ཊི་པ་དཱ ཀ་ཐི་ཏཱ. སོ་ཏཱ་པ་ནྣ་ས་ཀ་དཱ་གཱ་མཱི་ན་མྤི ཝ་ཊྚ་ཏི.
༥-༦. ས་མ་ཛཱི་ཝཱི་སུ་ཏྟ་དྭ་ཡ་ཝ་ཎྞ་ནཱ
༥༥-༥༦. པ་ཉྩ་མེ ཏེ་ནུ་པ་ས་ངྐ་མཱིཏི ཀི་མ་ཏྠཾ ཨུ་པ་ས་ངྐ་མི? ཨ་ནུ་གྒ་ཎྷ་ན་ཏྠཾ. ཏ་ཐཱ་ག་ཏོ ཧི ཏཾ ར་ཊྛཾ པཱ་པུ་ཎ་ནྟོ ཨི་མེ་སཾ་ཡེ་ཝ དྭི་ནྣཾ ས་ངྒ་ཎྷ་ན་ཏྠཱ་ཡ པཱ་པུ་ཎཱ་ཏི. ན་ཀུ་ལ་པི་ཏཱ ཀི་ར པ་ཉྩ ཛཱ་ཏི་ས་ཏཱ་ནི ཏ་ཐཱ་ག་ཏ་སྶ པི་ཏཱ ཨ་ཧོ་སི, པ་ཉྩ ཛཱ་ཏི་ས་ཏཱ་ནི མ་ཧཱ་པི་ཏཱ, པ་ཉྩ ཛཱ་ཏི་ས་ཏཱ་ནི ཙཱུ་ལ༹་པི་ཏཱ. ན་ཀུ་ལ་མཱ་ཏཱ་པི པ་ཉྩ ཛཱ་ཏི་ས་ཏཱ་ནི ཏ་ཐཱ་ག་ཏ་སྶ མཱ་ཏཱ ཨ་ཧོ་སི, པ་ཉྩ ཛཱ་ཏི་ས་ཏཱ་ནི མ་ཧཱ་མཱ་ཏཱ, པ་ཉྩ ཛཱ་ཏི་ས་ཏཱ་ནི ཙཱུ་ལ༹་མཱ་ཏཱ. ཏེ ས་ཏྠུ དི་ཊྛ་ཀཱ་ལ་ཏོ པ་ཊྛཱ་ཡ པུ་ཏྟ་སི་ནེ་ཧཾ པ་ཊི་ལ་བྷི་ཏྭཱ ‘‘ཧ་ནྟཱ་ཏ, ཧ་ནྟཱ་ཏཱ’’ཏི ཝ་ཙྪ་ཀཾ དི་སྭཱ ཝ་ཙྪ་གི་དྡྷི་ནཱི གཱ་ཝཱི ཝི་ཡ ཝི་ར་ཝ་མཱ་ནཱ ཨུ་པ་ས་ངྐ་མི་ཏྭཱ པ་ཋ་མ་ད་སྶ་ནེ་ནེ་ཝ སོ་ཏཱ་པ་ནྣཱ ཛཱ་ཏཱ. ནི་ཝེ་ས་ནེ པ་ཉྩ་ས་ཏཱ་ནཾ བྷི་ཀྑཱུ་ནཾ ཨཱ་ས་ནཱ་ནི ས་དཱ པ་ཉྙ་ཏྟཱ་ནེ་ཝ ཧོ་ནྟི. ཨི་ཏི བྷ་ག་ཝཱ ཏེ་སཾ ཨ་ནུ་གྒ་ཎྷ་ན་ཏྠཱ་ཡ ཨུ་པ་ས་ངྐ་མི. ཨ་ཏི་ཙ་རི་ཏཱཏི ཨ་ཏི་ཀྐ་མི་ཏཱ. ཨ་བྷི་ས་མྤ་རཱ་ཡ་ཉྩཱཏི པ་ར་ལོ་ཀེ ཙ. ས་མ་ས་དྡྷཱཏི ས་དྡྷཱ་ཡ ས་མཱ ཨེ་ཀ་ས་དི་སཱ. སཱི་ལཱདཱི་སུ་པི ཨེ་སེ་ཝ ན་ཡོ. ཚ་ཊྛཾ ཀེ་ཝ་ལཾ བྷི་ཀྑཱུ་ནཾ དེ་སི་ཏཾ. སེ་ས་མེ་ཏྠ ཏཱ་དི་ས་མེ་ཝ.
༧. སུ་པྤ་ཝཱ་སཱ་སུ་ཏྟ་ཝ་ཎྞ་ནཱ
༥༧. ས་ཏྟ་མེ པ་ཛྫ་ནི་ཀནྟི ཏ་སྶ ནི་ག་མ་སྶ ནཱ་མཾ. ཀོ་ལི་ཡཱ་ནནྟི ཀོ་ལ་རཱ་ཛ་ཀུ་ལཱ་ནཾ. ཨཱ་ཡུཾ ཁོ པ་ན ད་ཏྭཱཏི ཨཱ་ཡུ་དཱ་ནཾ ད་ཏྭཱ. ཨཱ་ཡུ་སྶ བྷཱ་གི་ནཱི ཧོ་ཏཱིཏི ཨཱ་ཡུ་བྷཱ་ག་པ་ཊི་ལཱ་བྷི་ནཱི ཧོ་ཏི, ཨཱ་ཡུཾ ཝཱ བྷ་ཛ་ནི་ཀཱ ཧོ་ཏི, ཨཱ་ཡུ་པྤ་ཊི་ལཱ་བྷི་ནཱི་ཏི ཨ་ཏྠོ. སེ་ས་པ་དེ་སུ་པི ཨེ་སེ་ཝ ན་ཡོ.
ར་ས་སཱ ཨུ་པེ་ཏནྟི ར་སེ་ན ཨུ་པེ་ཏཾ ར་ས་ས་མྤ་ནྣཾ. ཨུ་ཛྫུ་ག་ཏེ་སཱུཏི ཀཱ་ཡ་ཝ་ངྐཱ་དི་ར་ཧི་ཏ་ཏྟཱ ཨུ་ཛུ་ཀ་མེ་ཝ ག་ཏེ་སུ ཁཱི་ཎཱ་ས་ཝེ་སུ. ཙ་ར་ཎཱུ་པ་པ་ནྣེ་སཱུཏི པ་ཉྩ་ད་ས་ཧི ཙ་ར་ཎ་དྷ་མྨེ་ཧི ས་མ་ནྣཱ་ག་ཏེ་སུ. མ་ཧ་གྒ་ཏེ་སཱུཏི མ་ཧ་ཏྟཾ ག་ཏེ་སུ. ཁཱི་ཎཱ་ས་ཝཱ་ན་ཉྙེ་ཝེ་ཏཾ ནཱ་མཾ. པུ་ཉྙེ་ན པུ་ཉྙཾ སཾ་ས་ནྡ་མཱ་ནཱཏི པུ་ཉྙེ་ན ས་དྡྷིཾ པུ་ཉྙཾ གྷ་ཊ་ཡ་མཱ་ནཱ. མ་ཧ་པྥ་ལཱ ལོ་ཀ་ཝི་དཱུ་ན ཝ་ཎྞི་ཏཱཏི ཨེ་ཝ་རཱུ་པཱ དཱ་ན་ས་ངྑཱ་ཏཱ ད་ཀྑི་ཎཱ ཏི་ཝི་དྷ་ལོ་ཀཾ ཝི་དི་ཏཾ ཀ་ཏྭཱ ཋི་ཏ་ཏྟཱ ལོ་ཀ་ཝི་དཱུ་ནཾ བུ་དྡྷཱ་ནཾ ཝ་ཎྞི་ཏཱ, བུ་དྡྷེ་ཧི པ་ས་ཏྠཱ་ཏི ཨ་ཏྠོ. ཡ་ཉྙ་མ་ནུ་སྶ་ར་ནྟཱཏི ཡ་ཉྙཾ དཱ་ནཾ ཨ་ནུ་སྶ་ར་ནྟཱ. ཝེ་ད་ཛཱ་ཏཱཏི ཏུ་ཊྛི་ཛཱ་ཏཱ.
༨. སུ་ད་ཏྟ་སུ་ཏྟ་ཝ་ཎྞ་ནཱ
༥༨. ཨ་ཊྛ་མེ ས་ཉྙ་ཏཱ་ནནྟི ཀཱ་ཡ་ཝཱ་ཙཱ་ཧི སཾ་ཡ་ཏཱ་ནཾ. པ་ར་ད་ཏྟ་བྷོ་ཛི་ནནྟི པ་རེ་ཧི དི་ནྣ་མེ་ཝ བྷུ་ཉྫི་ཏྭཱ ཡཱ་པེ་ནྟཱ་ནཾ. ཀཱ་ལེ་ནཱཏི ཡུ་ཏྟ་པྤ་ཏྟ་ཀཱ་ལེ་ན. ས་ཀྐ་ཙྩ ད་དཱ་ཏཱིཏི ས་ཧ་ཏྠཱ ས་ཀྐཱ་རཾ ཀ་ཏྭཱ ད་དཱ་ཏི. ཙ་ཏྟཱ་རི ཋཱ་ནཱ་ནི ཨ་ནུ་པྤ་ཝེ་ཙྪ་ཏཱིཏི ཙ་ཏྟཱ་རི ཀཱ་ར་ཎཱ་ནི ཨ་ནུ་པྤ་ཝེ་སེ་ཏི ད་དཱ་ཏི. ཡ་ས་ཝཱ ཧོ་ཏཱིཏི མ་ཧཱ་པ་རི་ཝཱ་རོ ཧོ་ཏི. ན་ཝ་མཾ ཀེ་ཝ་ལཾ བྷི་ཀྑཱུ་ནཾ ཀ་ཐི་ཏཾ. སེ་ས་མེ་ཏྠ ཏཱ་དི་ས་མེ་ཝ.
༡༠. གི་ཧི་སཱ་མཱི་ཙི་སུ་ཏྟ་ཝ་ཎྞ་ནཱ
༦༠. ད་ས་མེ གི་ཧི་སཱ་མཱི་ཙི་པ་ཊི་པ་དནྟི གི་ཧཱི་ནཾ ཨ་ནུ་ཙྪ་ཝི་ཀཾ པ་ཊི་པ་ཏྟིཾ. པ་ཙྩུ་པ་ཊྛི་ཏོ ཧོ་ཏཱིཏི ཨ་ཏི་ཧ་རི་ཏྭཱ དཱ་ཏུ་ཀཱ་མ་ཏཱ་ཡ པ་ཏི་ཨུ་པ་ཊྛི་ཏོ ཧོ་ཏི ཨུ་པ་ག་ཏོ, བྷི་ཀྑུ་ས་ངྒྷ་སྶ ཙཱི་ཝ་རཾ དེ་ཏཱི་ཏི ཨ་ཏྠོ.
ཨུ་པ་ཊྛི་ཏཱཏི ཨུ་པ་ཊྛཱ་ཡ་ཀོ. ཏེ་སཾ དི་ཝཱ ཙ ར་ཏྟོ ཙཱཏི ཡེ ཨེ་ཝཾ ཙ་ཏཱུ་ཧི པ་ཙྩ་ཡེ་ཧི ཨུ་པ་ཊྛ་ཧ་ནྟི, ཏེ་སཾ དི་ཝཱ ཙ ར་ཏྟི་ཉྩ པ་རི་ཙྩཱ་ག་ཝ་སེ་ན ཙ ཨ་ནུ་སྶ་ར་ཎ་ཝ་སེ་ན ཙ ས་དཱ པུ་ཉྙཾ པ་ཝ་ཌྜྷ་ཏི. ས་གྒ་ཉྩ ཀ་མ་ཏི་ཊྛཱ་ནནྟི ཏཱ་དི་སོ ཙ བྷ་དྡ་ཀཾ ཀ་མྨཾ ཀ་ཏྭཱ ས་གྒ་ཊྛཱ་ནཾ ཨུ་པ་ག་ཙྪ་ཏི. ཨི་མེ་སུ ཙ་ཏཱུ་སུ་པི སུ་ཏྟེ་སུ ཨཱ་གཱ་རི་ཡ་པ་ཊི་པ་དཱ ཀ་ཐི་ཏཱ. སོ་ཏཱ་པ་ནྣ་ས་ཀ་དཱ་གཱ་མཱི་ན་མྤི ཝ་ཊྚ་ཏི.
པུ་ཉྙཱ་བྷི་ས་ནྡ་ཝ་གྒོ པ་ཋ་མོ.
(༧) ༢. པ་ཏྟ་ཀ་མྨ་ཝ་གྒོ
༡. པ་ཏྟ་ཀ་མྨ་སུ་ཏྟ་ཝ་ཎྞ་ནཱ
༦༡. དུ་ཏི་ཡ་སྶ པ་ཋ་མེ ཨ་ནི་ཊྛ་པ་ཊི་ཀྑེ་པེ་ན ཨི་ཊྛཱ. མ་ནེ ཀ་མ་ནྟི པ་ཝི་ས་ནྟཱི་ཏི ཀ་ནྟཱ. མ་ནཾ ཨ་པྤཱ་ཡ་ནྟི པ་ཝ་ཌྜྷེ་ནྟཱི་ཏི མ་ནཱ་པཱ. དུ་ལླ་བྷཱཏི པ་ར་མ་དུ་ལླ་བྷཱ. བྷོ་གཱཏི བྷུ་ཉྫི་ཏ་བྦཱ རཱུ་པཱ་ད་ཡོ ཝི་ས་ཡཱ. ས་ཧ་དྷ་མྨེ་ནཱཏི དྷ་མྨེ་ནེ་ཝ ས་དྡྷིཾ ཨུ་པྤ་ཛྫ་ནྟུ, མཱ དྷ་མྨཱུ་པ་གྷཱ་ཏཾ ཀ་ཏྭཱ ཨ་དྷ་མྨེ་ནཱ་ཏི. ཨ་ཐ་ཝཱ ས་ཧ་དྷ་མྨེ་ནཱཏི ས་ཀཱ་ར་ཎེ་ན, ཏེ་ན ཏེ་ན སེ་ནཱ་པ་ཏི་སེ་ཊྛི་ཊྛཱ་ནཱ་དི་ཀཱ་ར་ཎེ་ན ས་དྡྷིཾ་ཡེ་ཝ ཨུ་པྤ་ཛྫ་ནྟཱུ་ཏི ཨ་ཏྠོ. ཡ་སོཏི པ་རི་ཝཱ་ར་ས་མྤ་ཏྟི. ས་ཧ ཉཱ་ཏཱི་བྷཱིཏི ཉཱ་ཏ་ཀེ་ཧི ས་དྡྷིཾ. ས་ཧ ཨུ་པ་ཛ྄ཛྷཱ་ཡེ་ཧཱིཏི སུ་ཁ་དུ་ཀྑེ་སུ ཨུ་པ་ནི་ཛ྄ཛྷཱ་ཡི་ཏ་བྦ་ཏྟཱ ཨུ་པ་ཛ྄ཛྷཱ་ཡ་ས་ངྑཱ་ཏེ་ཧི ས་ནྡི་ཊྛ་ས་མྦྷ་ཏྟེ་ཧི ས་དྡྷིཾ.
ཨ་ཀི་ཙྩཾ ཀ་རོ་ཏཱིཏི ཨ་ཀཱ་ཏ་བྦཾ ཀ་རོ་ཏི. ཀི་ཙྩཾ ཨ་པ་རཱ་དྷེ་ཏཱིཏི ཀ་ཏྟ་བྦ་ཡུ་ཏྟ་ཀཾ ཀི་ཙྩཾ ཨ་ཀ་རོ་ནྟོ ཏཾ ཨ་པ་རཱ་དྷེ་ཏི ནཱ་མ. དྷཾ་ས་ཏཱིཏི པ་ཏ་ཏི པ་རི་ཧཱ་ཡ་ཏི. ཨ་བྷི་ཛ྄ཛྷཱ་ཝི་ས་མ་ལོ་བྷནྟི ཨ་བྷི་ཛ྄ཛྷཱ་ས་ངྑཱ་ཏཾ ཝི་ས་མ་ལོ་བྷཾ. པ་ཛ་ཧ་ཏཱིཏི ནུ་ད་ཏི ནཱི་ཧ་ར་ཏི. མ་ཧཱ་པ་ཉྙོཏི མ་ཧ་ནྟ་པ་ཉྙོ. པུ་ཐུ་པ་ཉྙོཏི པུ་ཐུ་ལ་པ་ཉྙོ. ཨཱ་པཱ་ཏ་ད་སོཏི ཏཾ ཏཾ ཨ་ཏྠཾ ཨཱ་པཱ་ཏེ་ཏི ཏ་མེ་ཝ པ་སྶ་ཏི, སུ་ཁུ་མ་མྤི་སྶ ཨ་ཏྠ་ཛཱ་ཏཾ ཨཱ་པཱ་ཏཾ ཨཱ་ག་ཙྪ་ཏི་ཡེ་ཝཱ་ཏི ཨ་ཏྠོ.
ཨུ་ཊྛཱ་ན་ཝཱི་རི་ཡཱ་དྷི་ག་ཏེ་ཧཱིཏི ཨུ་ཊྛཱ་ན་ས་ངྑཱ་ཏེ་ན ཝཱི་རི་ཡེ་ན ཨ་དྷི་ག་ཏེ་ཧི. བཱ་ཧཱ་བ་ལ་པ་རི་ཙི་ཏེ་ཧཱིཏི བཱ་ཧཱ་བ་ལེ་ན པ་རི་ཙི་ཏེ་ཧི ཝ་ཌྜྷི་ཏེ་ཧི. སེ་དཱ་ཝ་ཀྑི་ཏྟེ་ཧཱིཏི ཨ་ཝ་ཀྑི་ཏྟ་སེ་དེ་ཧི, སེ་དཾ མུ་ཉྩི་ཏྭཱ ཝཱ་ཡཱ་མེ་ན པ་ཡོ་གེ་ན ས་མ་དྷི་ག་ཏེ་ཧཱི་ཏི ཨ་ཏྠོ. དྷ་མྨི་ཀེ་ཧཱིཏི དྷ་མྨ་ཡུ་ཏྟེ་ཧི. དྷ་མྨ་ལ་དྡྷེ་ཧཱིཏི ད་ས་ཀུ་ས་ལ་ཀ་མྨ་པ་ཐ་དྷ་མྨེ ཨ་ཀོ་པེ་ཏྭཱ ལ་དྡྷེ་ཧི. པ་ཏྟ་ཀ་མྨཱ་ནཱིཏི ཡུ་ཏྟ་ཀ་མྨཱ་ནི ཨ་ནུ་ཙྪ་ཝི་ཀ་ཀ་མྨཱ་ནི. སུ་ཁེ་ཏཱིཏི སུ་ཁི་ཏཾ ཀ་རོ་ཏི. པཱི་ཎེ་ཏཱིཏི པཱི་ཎི་ཏཾ བ་ལ་ས་མྤ་ནྣཾ ཀ་རོ་ཏི. ཋཱ་ན་ག་ཏཾ ཧོ་ཏཱིཏི ཀཱ་ར་ཎ་ག་ཏཾ ཧོ་ཏི. ཀིཾ པ་ན ཏ་ནྟི? ཙ་ཏཱུ་སུ པ་ཏྟ་ཀ་མྨེ་སུ ཨེ་ཀཾ བྷོ་གེ་ཧི ཀ་ཏྟ་བྦ་ཀ་མྨཾ བྷོ་ག་ཛཱ་ཏ་མེ་ཝ ཋཱ་ན་ག་ཏཾ. པ་ཏྟ་ག་ཏནྟི ཡུ་ཏྟ་པྤ་ཏྟ་ཊྛཱ་ན་ག་ཏཾ. ཨཱ་ཡ་ཏ་ན་སོ པ་རི་བྷུ་ཏྟནྟི ཀཱ་ར་ཎེ་ནེ་ཝ པ་རི་བྷུ་ཏྟཾ བྷོ་ག་ཛཱ་ཏཾ ཧོ་ཏི.
པ་རི་ཡོ་དྷཱ་ཡ སཾ་ཝ་ཏྟ་ཏཱིཏི པི་ད་ཧི་ཏྭཱ ཝ་ཏྟ་ཏི. ཡ་ཐཱ ཨ་གྒི་ཨཱ་དཱི་ཧི ཨུ་པྤ་ནྣཱ་སུ ཨཱ་པ་དཱ་སུ, ཨེ་ཝཾ ཨཱ་དི་ཏྟ་གེ་ཧ་ནི་བྦཱ་པ་ནཱ་དཱི་ནཾ ཨ་ཏྠཱ་ཡ དྷ་ན་པ་རི་ཙྩཱ་གཾ ཀ་ཏྭཱ ཏཱ་སཾ ཨཱ་པ་དཱ་ནཾ མ་གྒཾ པི་ད་ཧ་ཏི ནི་ཝཱ་རེ་ཏི. སོ་ཏྠིཾ ཨ་ཏྟཱ་ནཾ ཀ་རོ་ཏཱིཏི ནི་རུ་པ་དྡ་ཝཾ ཁེ་མཾ ཨ་ཏྟཱ་ནཾ ཀ་རོ་ཏི. ཉཱ་ཏི་བ་ལིནྟི ཉཱ་ཏ་ཀཱ་ནཾ བ་ལིཾ. ཨ་ཏི་ཐི་བ་ལིནྟི ཨཱ་ག་ནྟུ་ཀཱ་ནཾ བ་ལིཾ. པུ་བྦ་པེ་ཏ་བ་ལིནྟི པ་ར་ལོ་ཀ་ག་ཏཱ་ནཾ ཉཱ་ཏ་ཀཱ་ནཾ བ་ལིཾ. རཱ་ཛ་བ་ལིནྟི ར་ཉྙོ ཀ་ཏྟ་བྦ་ཡུ་ཏྟ་ཀཾ རཱ་ཛ་བ་ལིཾ. དེ་ཝ་ཏཱ་བ་ལིནྟི དེ་ཝ་ཏཱ་ནཾ ཀ་ཏྟ་བྦ་བ་ལིཾ. ས་བྦ་མེ་ཏཾ ཏེ་སཾ ཏེ་སཾ ཡ་ཐཱ་ནུ་ཙྪ་ཝི་ཀ་ཝ་སེ་ན དཱ་ཏ་བྦ་དཱ་ན་སྶ ཨ་དྷི་ཝ་ཙ་ནཾ.
ཁ་ནྟི་སོ་ར་ཙྩེ ནི་ཝི་ཊྛཱཏི ཨ་དྷི་ཝཱ་ས་ན་ཀྑ་ནྟི་ཡ་ཉྩ སུ་སཱི་ལ་ཏཱ་ཡ ཙ ནི་ཝི་ཊྛཱ. ཨེ་ཀ་མ་ཏྟཱ་ནཾ ད་མེ་ནྟཱིཏི ཨེ་ཀཾ ཨ་ཏྟ་ནོ་ཝ ཨ་ཏྟ་བྷཱ་ཝཾ ཨི་ནྡྲི་ཡ་ད་མེ་ན ད་མེ་ནྟི. ས་མེ་ནྟཱིཏི ཨ་ཏྟ་ནོ ཙི་ཏྟཾ ཀི་ལེ་ས་ཝཱུ་པ་ས་མ་ནེ་ན ས་མེ་ནྟི. པ་རི་ནི་བྦཱ་པེ་ནྟཱིཏི ཀི་ལེ་ས་པ་རི་ནི་བྦཱ་ནེ་ནེ་ཝ པ་རི་ནི་བྦཱ་པེ་ནྟི. ཨུ་དྡྷ་གྒི་ཀནྟི་ཨཱ་དཱི་སུ ཨུ་པ་རཱུ་པ་རི་བྷཱུ་མཱི་སུ ཕ་ལ་དཱ་ན་ཝ་སེ་ན ཨུ་དྡྷ་མ་གྒ་མ་སྶཱ་ཏི ཨུ་དྡྷ་གྒི་ཀཱ. ས་གྒ་སྶ ཧི་ཏཱ་ཏི ཏ་ཏྲུ་པ་པ་ཏྟི་ཛ་ན་ན་ཏོ སོ་ཝ་གྒི་ཀཱ. ནི་བྦ་ཏྟ་ནི་བྦ་ཏྟ་ཊྛཱ་ནེ སུ་ཁོ་ཝ ཝི་པཱ་ཀོ ཨ་སྶཱ་ཏི སུ་ཁ་ཝི་པཱ་ཀཱ. སུ་ཊྛུ ཨ་གྒཱ་ནཾ དི་བྦ་ཝ་ཎྞཱ་དཱི་ནཾ ད་ས་ནྣཾ ཝི་སེ་སཱ་ནཾ ནི་བྦ་ཏྟ་ན་ཏོ ས་གྒ་སཾ་ཝ་ཏྟ་ནི་ཀཱ, ཨེ་ཝ་རཱུ་པཾ ད་ཀྑི་ཎཾ པ་ཏི་ཊྛཱ་པེ་ཏཱི་ཏི ཨ་ཏྠོ.
ཨ་རི་ཡ་དྷ་མྨེ ཋི་ཏོཏི པ་ཉྩ་སཱི་ལ་དྷ་མྨེ པ་ཏི་ཊྛི་ཏོ. པེ་ཙྩ ས་གྒེ པ་མོ་ད་ཏཱིཏི པ་ར་ལོ་ཀཾ ག་ནྟྭཱ ཡ་ཏྠ ས་གྒེ པ་ཊི་ས་ནྡྷིཾ ག་ཎྷཱ་ཏི, ཏ་ཏྠ མོ་ད་ཏི. སོ་ཏཱ་པ་ནྣ་ས་ཀ་དཱ་གཱ་མི་ནོ ཝཱ ཧོ་ནྟུ ཨ་ནཱ་གཱ་མཱི ཝཱ, ས་བྦེ་སཾ ཨ་ཡཾ པ་ཊི་པ་དཱ ལ་བྦྷ་ཏེ་ཝཱ་ཏི.
༢. ཨཱ་ན་ཎྱ་སུ་ཏྟ་ཝ་ཎྞ་ནཱ
༦༢. དུ་ཏི་ཡེ ཨ་དྷི་ག་མ་ནཱི་ཡཱ་ནཱིཏི པ་ཏྟ་བྦཱ་ནི. ཀཱ་མ་བྷོ་གི་ནཱཏི ཝ་ཏྠུ་ཀཱ་མེ ཙ ཀི་ལེ་ས་ཀཱ་མེ ཙ པ་རི་བྷུ་ཉྫ་ནྟེ་ན. ཨ་ཏྠི་སུ་ཁཱདཱི་སུ ཨ་ཏྠཱི་ཏི ཨུ་པྤ་ཛྫ་ན་ཀ་སུ་ཁཾ ཨ་ཏྠི་སུ་ཁཾ ནཱ་མ. བྷོ་གེ པ་རི་བྷུ་ཉྫ་ནྟ་སྶ ཨུ་པྤ་ཛྫ་ན་ཀ་སུ་ཁཾ བྷོ་ག་སུ་ཁཾ ནཱ་མ. ཨ་ན་ཎོ་སྨཱི་ཏི ཨུ་པྤ་ཛྫ་ན་ཀ་སུ་ཁཾ ཨཱ་ན་ཎྱ་སུ་ཁཾ ནཱ་མ. ནི་དྡོ་སོ ཨ་ན་ཝ་ཛྫོ་སྨཱི་ཏི ཨུ་པྤ་ཛྫ་ན་ཀ་སུ་ཁཾ ཨ་ན་ཝ་ཛྫ་སུ་ཁཾ ནཱ་མ.
བྷུ་ཉྫནྟི བྷུ་ཉྫ་མཱ་ནོ. པ་ཉྙཱ ཝི་པ་སྶ་ཏཱིཏི པ་ཉྙཱ་ཡ ཝི་པ་སྶ་ཏི. ཨུ་བྷོ བྷཱ་གེཏི དྭེ ཀོ་ཊྛཱ་སེ, ཧེ་ཊྛི་མཱ་ནི ཏཱི་ཎི ཨེ་ཀཾ ཀོ་ཊྛཱ་སཾ, ཨ་ན་ཝ་ཛྫ་སུ་ཁཾ ཨེ་ཀཾ ཀོ་ཊྛཱ་ས་ནྟི ཨེ་ཝཾ པ་ཉྙཱ་ཡ པ་སྶ་མཱ་ནོ དྭེ ཀོ་ཊྛཱ་སེ ཛཱ་ནཱ་ཏཱི་ཏི ཨ་ཏྠོ. ཨ་ན་ཝ་ཛྫ་སུ་ཁ་སྶེ་ཏནྟི ཨེ་ཏཾ ཏི་ཝི་དྷ་མྤི སུ་ཁཾ ཨ་ན་ཝ་ཛྫ་སུ་ཁ་སྶ སོ་ལ༹་སིཾ ཀ་ལཾ ནཱ་གྒྷ་ཏཱི་ཏི.
༣. བྲ་ཧྨ་སུ་ཏྟ་ཝ་ཎྞ་ནཱ
༦༣. ཏ་ཏི་ཡཾ ཏི་ཀ་ནི་པཱ་ཏེ ཝ་ཎྞི་ཏ་མེ་ཝ. ས་པུ་བྦ་དེ་ཝ་ཏཱ་ནཱིཏི པ་ད་མ་ཏྟ་མེ་ཝ ཨེ་ཏྠ ཝི་སེ་སོ་ཏི. ཙ་ཏུ་ཏྠེ ས་བྦཾ ཨུ་ཏྟཱ་ན་ཏྠ་མེ་ཝ.
༥. རཱུ་པ་སུ་ཏྟ་ཝ་ཎྞ་ནཱ
༦༥. པ་ཉྩ་མེ རཱུ་པེ པ་མཱ་ཎཾ ག་ཧེ་ཏྭཱ པ་ས་ནྣོ རཱུ་པ་པྤ་མཱ་ཎོ ནཱ་མ. རཱུ་པ་པྤ་ས་ནྣོཏི ཏ་སྶེ་ཝ ཨ་ཏྠ་ཝ་ཙ་ནཾ. གྷོ་སེ པ་མཱ་ཎཾ ག་ཧེ་ཏྭཱ པ་ས་ནྣོ གྷོ་ས་པྤ་མཱ་ཎོ ནཱ་མ. ཙཱི་ཝ་ར་ལཱུ་ཁ་པ་ཏྟ་ལཱུ་ཁེ་སུ པ་མཱ་ཎཾ ག་ཧེ་ཏྭཱ པ་ས་ནྣོ ལཱུ་ཁ་པྤ་མཱ་ཎོ ནཱ་མ. དྷ་མྨེ པ་མཱ་ཎཾ ག་ཧེ་ཏྭཱ པ་ས་ནྣོ དྷ་མྨ་པྤ་མཱ་ཎོ ནཱ་མ. ཨི་ཏ་རཱ་ནི ཏེ་སཾ་ཡེ་ཝ ཨ་ཏྠ་ཝ་ཙ་ནཱ་ནི. ས་བྦ་ས་ཏྟེ ཙ ཏ་ཡོ ཀོ་ཊྛཱ་སེ ཀ་ཏྭཱ དྭེ ཀོ་ཊྛཱ་སཱ རཱུ་པ་པྤ་མཱ་ཎཱ, ཨེ་ཀོ ན རཱུ་པ་པྤ་མཱ་ཎོ. པ་ཉྩ ཀོ་ཊྛཱ་སེ ཀ་ཏྭཱ ཙ་ཏྟཱ་རོ ཀོ་ཊྛཱ་སཱ གྷོ་ས་པྤ་མཱ་ཎཱ, ཨེ་ཀོ ན གྷོ་ས་པྤ་མཱ་ཎོ. ད་ས ཀོ་ཊྛཱ་སེ ཀ་ཏྭཱ ན་ཝ ཀོ་ཊྛཱ་སཱ ལཱུ་ཁ་པྤ་མཱ་ཎཱ, ཨེ་ཀོ ན ལཱུ་ཁ་པྤ་མཱ་ཎོ. ས་ཏ་ས་ཧ་སྶཾ ཀོ་ཊྛཱ་སེ ཀ་ཏྭཱ པ་ན ཨེ་ཀོ ཀོ་ཊྛཱ་སོ་ཝ དྷ་མྨ་པྤ་མཱ་ཎོ, སེ་སཱ ན དྷ་མྨ་པྤ་མཱ་ཎཱ་ཏི ཝེ་དི་ཏ་བྦཱ.
རཱུ་པེ པ་མཱ་ཎིཾ་སཱུཏི ཡེ རཱུ་པཾ དི་སྭཱ པ་ས་ནྣཱ, ཏེ རཱུ་པེ པ་མཱ་ཎིཾ་སུ ནཱ་མ, པ་སཱི་དིཾ་སཱུ་ཏི ཨ་ཏྠོ. གྷོ་སེ་ན ཨ་ནྭ་གཱུཏི གྷོ་སེ་ན ཨ་ནུ་ག་ཏཱ, གྷོ་ས་པྤ་མཱ་ཎཾ ག་ཧེ་ཏྭཱ པ་ས་ནྣཱ་ཏི ཨ་ཏྠོ. ཚ་ནྡ་རཱ་ག་ཝ་སཱུ་པེ་ཏཱཏི ཚ་ནྡ་སྶ ཙ རཱ་ག་སྶ ཙ ཝ་སཾ ཨུ་པེ་ཏཱ. ཨ་ཛ྄ཛྷ་ཏྟ་ཉྩ ན ཛཱ་ནཱ་ཏཱིཏི ནི་ཡ་ཀ་ཛ྄ཛྷ་ཏྟེ ཏ་སྶ གུ་ཎཾ ན ཛཱ་ནཱ་ཏི. བ་ཧི་དྡྷཱ ཙ ན པ་སྶ་ཏཱིཏི བ་ཧི་དྡྷཱ་པི་སྶ པ་ཊི་པ་ཏྟིཾ ན པ་སྶ་ཏི. ས་མ་ནྟཱ་ཝ་ར་ཎོཏི ས་མ་ནྟ་ཏོ ཨཱ་ཝཱ་རི་ཏོ, ས་མ་ནྟཱ ཝཱ ཨཱ་ཝ་ར་ཎ་མ་སྶཱ་ཏི ས་མ་ནྟཱ་ཝ་ར་ཎོ. གྷོ་སེ་ན ཝུ་ཡ྄ཧ་ཏཱིཏི གྷོ་སེ་ན ནི་ཡ་ཏི, ན གུ་ཎེ་ན. ཨ་ཛ྄ཛྷ་ཏྟ་ཉྩ ན ཛཱ་ནཱ་ཏི, བ་ཧི་དྡྷཱ ཙ ཝི་པ་སྶ་ཏཱིཏི ནི་ཡ་ཀ་ཛ྄ཛྷ་ཏྟེ གུ་ཎཾ ན ཛཱ་ནཱ་ཏི, བ་ཧི་དྡྷཱ པ་ན་སྶ པ་ཊི་པ་ཏྟིཾ པ་སྶ་ཏི. བ་ཧི་དྡྷཱ ཕ་ལ་ད་སྶཱ་ཝཱིཏི ཏ་སྶ པ་རེ་ཧི ཀ་ཏཾ བ་ཧི་དྡྷཱ ས་ཀྐཱ་ར་ཕ་ལཾ པ་སྶ་ནྟོ. ཝི་ནཱི་ཝ་ར་ཎ་ད་སྶཱ་ཝཱིཏི ཝི་ཝ་ཊ་ད་སྶཱ་ཝཱི. ན སོ གྷོ་སེ་ན ཝུ་ཡ྄ཧ་ཏཱིཏི སོ གྷོ་སེ་ན ན ནཱི་ཡ་ཏི.
༦. ས་རཱ་ག་སུ་ཏྟ་ཝ་ཎྞ་ནཱ
༦༦. ཚ་ཊྛེ མོ་ཧ་ཛཾ ཙཱ་པ་ཝི་དྡ་སཱུཏི མོ་ཧ་ཛཾ ཙཱ་པི ཨ་ཝི་དྡ་སཱུ ཨ་པ་ཎྜི་ཏཱ. ས་ཝི་གྷཱ་ཏནྟི ས་དུ་ཀྑཾ. དུ་ཁུ་དྲ་ཡནྟི ཨཱ་ཡ་ཏི་ཉྩ དུ་ཀྑ་ཝ་ཌྜྷི་དཱ་ཡ་ཀཾ. ཨ་ཙ་ཀྑུ་ཀཱཏི པ་ཉྙཱ་ཙ་ཀྑུ་ར་ཧི་ཏཱ. ཡ་ཐཱ དྷ་མྨཱ ཏ་ཐཱ ས་ནྟཱཏི ཡ་ཐཱ རཱ་གཱ་ད་ཡོ དྷ་མྨཱ ཋི་ཏཱ, ཏ་ཐཱ ས་བྷཱ་ཝཱ་ཝ ཧུ་ཏྭཱ. ན ཏ་སྶེ་ཝ་ནྟི མ་ཉྙ་རེཏི མ་ཡཾ ཨེ་ཝཾ་ས་ནྟཱ ཨེ་ཝཾ་ས་བྷཱ་ཝཱ་ཏི ཏ་སྶ ན མ་ཉྙ་རེ, ན མ་ཉྙ་ནྟཱི་ཏི ཨ་ཏྠོ. ཨི་མ་སྨིཾ སུ་ཏྟེ་པི གཱ་ཐཱ་སུ་པི ཝ་ཊྚ་མེ་ཝ ཀ་ཐི་ཏཾ.
༧. ཨ་ཧི་རཱ་ཛ་སུ་ཏྟ་ཝ་ཎྞ་ནཱ
༦༧. ས་ཏྟ་མེ ཨི་མཱ་ནི ཙ་ཏྟཱ་རི ཨ་ཧི་རཱ་ཛ་ཀུ་ལཱ་ནཱིཏི ཨི་དཾ ད་ཊྛ་ཝི་སཱ་ནེ་ཝ ས་ནྡྷཱ་ཡ ཝུ་ཏྟཾ. ཡེ ཧི ཀེ་ཙི ད་ཊྛ་ཝི་སཱ, ས་བྦེ་ཏེ ཨི་མེ་སཾ ཙ་ཏུ་ནྣཾ ཨ་ཧི་རཱ་ཛ་ཀུ་ལཱ་ནཾ ཨ་བྦྷ་ནྟ་ར་ག་ཏཱ་ཝ ཧོ་ནྟི. ཨ་ཏྟ་གུ་ཏྟི་ཡཱཏི ཨ་ཏྟ་ནོ གུ་ཏྟ་ཏྠཱ་ཡ. ཨ་ཏྟ་ར་ཀྑཱ་ཡཱཏི ཨ་ཏྟ་ནོ ར་ཀྑ་ཎ་ཏྠཱ་ཡ. ཨ་ཏྟ་པ་རི་ཏྟཱ་ཡཱཏི ཨ་ཏྟ་ནོ པ་རི་ཏྟཱ་ཎ་ཏྠཱ་ཡ. པ་རི་ཏྟཾ ནཱ་མ ཨ་ནུ་ཛཱ་ནཱ་མཱི་ཏི ཨ་ཏྠོ.
ཨི་དཱ་ནི ཡ་ཐཱ ཏཾ པ་རི་ཏྟཾ ཀཱ་ཏ་བྦཾ, ཏཾ ད་སྶེ་ནྟོ ཝི་རཱུ་པ་ཀྑེ་ཧི མེཏི་ཨཱ་དི་མཱ་ཧ. ཏ་ཏྠ ཝི་རཱུ་པ་ཀྑེ་ཧཱིཏི ཝི་རཱུ་པ་ཀྑ་ནཱ་ག་ཀུ་ལེ་ཧི. སེ་སེ་སུ་པི ཨེ་སེ་ཝ ན་ཡོ. ཨ་པཱ་ད་ཀེ་ཧཱིཏི ཨ་པཱ་ད་ཀ་ས་ཏྟེ་ཧི. སེ་སེ་སུ་པི ཨེ་སེ་ཝ ན་ཡོ. ས་བྦེ ས་ཏྟཱཏི ཨི་ཏོ པུ་བྦེ ཨེ་ཏྟ་ཀེ་ན ཋཱ་ནེ་ན ཨོ་དི་སྶ་ཀ་མེ་ཏྟཾ ཀ་ཐེ་ཏྭཱ ཨི་དཱ་ནི ཨ་ནོ་དི་སྶ་ཀ་མེ་ཏྟཾ ཀ་ཐེ་ཏུཾ ཨི་ད་མཱ་ར་དྡྷཾ. ཏ་ཏྠ ས་ཏྟཱ པཱ་ཎཱ བྷཱུ་ཏཱཏི ས་བྦཱ་ནེ་ཏཱ་ནི པུ་གྒ་ལ་ཝེ་ཝ་ཙ་ནཱ་ནེ་ཝ. བྷ་དྲཱ་ནི པ་སྶ་ནྟཱུཏི བྷ་དྲཱ་ནི ཨཱ་ར་མྨ་ཎཱ་ནི པ་སྶ་ནྟུ. མཱ ཀ་ཉྩི པཱ་པ་མཱ་ག་མཱཏི ཀ་ཉྩི ས་ཏྟཾ པཱ་པ་ཀཾ ལཱ་མ་ཀཾ མཱ ཨཱ་ག་ཙྪ་ཏུ. ཨ་པྤ་མཱ་ཎོ བུ་དྡྷོཏི ཨེ་ཏྠ བུ་དྡྷོཏི བུ་དྡྷ་གུ་ཎཱ ཝེ་དི་ཏ་བྦཱ. ཏེ ཧི ཨ་པྤ་མཱ་ཎཱ ནཱ་མ. སེ་ས་པ་ད་དྭ་ཡེ་པི ཨེ་སེ་ཝ ན་ཡོ. པ་མཱ་ཎ་ཝ་ནྟཱ་ནཱིཏི གུ་ཎ་པྤ་མཱ་ཎེ་ན ཡུ་ཏྟཱ་ནི. ཨུ་ཎྞ་ནཱ་བྷཱིཏི ལོ་མ་ས་ནཱ་བྷི་ཀོ མ་ཀྐ་ཊ་ཀོ. ས་ར་བཱུཏི གྷ་ར་གོ་ལི་ཀཱ. ཀ་ཏཱ མེ ར་ཀྑཱ, ཀ་ཏཱ མེ པ་རི་ཏྟཱཏི མ་ཡཱ ཨེ་ཏྟ་ཀ་སྶ ཛ་ན་སྶ ར་ཀྑཱ ཙ པ་རི་ཏྟཱ་ཎ་ཉྩ ཀ་ཏཾ. པ་ཊི་ཀྐ་མ་ནྟུ བྷཱུ་ཏཱ་ནཱིཏི ས་བྦེ་པི མེ ཀ་ཏ་པ་རི་ཏྟཱ་ཎཱ ས་ཏྟཱ ཨ་པ་ག་ཙྪ་ནྟུ, མཱ མཾ ཝི་ཧེ་ཋ་ཡིཾ་སཱུ་ཏི ཨ་ཏྠོ.
༨. དེ་ཝ་ད་ཏྟ་སུ་ཏྟ་ཝ་ཎྞ་ནཱ
༦༨. ཨ་ཊྛ་མེ ཨ་ཙི་ར་པ་ཀྐ་ནྟེ དེ་ཝ་ད་ཏྟེཏི ས་ངྒྷཾ བྷི་ནྡི་ཏྭཱ ན་ཙི་ར་པ་ཀྐ་ནྟེ. པ་རཱ་བྷ་ཝཱ་ཡཱཏི ཨ་ཝ་ཌྜྷི་ཡཱ ཝི་ནཱ་སཱ་ཡ. ཨ་སྶ་ཏ་རཱིཏི ཝ་ལ༹་ཝཱ་ཡ ཀུ་ཙྪི་སྨིཾ ག་དྲ་བྷ་སྶ ཛཱ་ཏཱ. ཨ་ཏྟ་ཝ་དྷཱ་ཡ ག་བྦྷཾ ག་ཎྷཱ་ཏཱིཏི ཏཾ ཨ་སྶེ་ན ས་དྡྷིཾ ས་མྤ་ཡོ་ཛེ་ནྟི, སཱ ག་བྦྷཾ ག་ཎྷི་ཏྭཱ ཀཱ་ལེ ས་མྤ་ཏྟེ ཝི་ཛཱ་ཡི་ཏུཾ ན་ས་ཀྐོ་ནྟཱི པཱ་དེ་ཧི བྷཱུ་མིཾ པ་ཧ་ར་ནྟཱི ཏི་ཊྛ་ཏི. ཨ་ཐ་སྶཱ ཙ་ཏྟཱ་རོ པཱ་དེ ཙ་ཏཱུ་སུ ཁཱ་ཎཱུ་སུ བ་ནྡྷི་ཏྭཱ ཀུ་ཙྪིཾ ཕཱ་ལེ་ཏྭཱ པོ་ཏ་ཀཾ ནཱི་ཧ་ར་ནྟི. སཱ ཏ་ཏྠེ་ཝ མ་ར་ཏི. ཏེ་ནེ་ཏཾ ཝུ་ཏྟཾ.
༩. པ་དྷཱ་ན་སུ་ཏྟ་ཝ་ཎྞ་ནཱ
༦༩. ན་ཝ་མེ ཀི་ལེ་སཱ་ནཾ སཾ་ཝ་ར་ཏྠཱ་ཡ པ་ཝེ་ས་ན་དྭཱ་རཾ པི་ད་ཧ་ན་ཏྠཱ་ཡ པ་དྷཱ་ནཾ སཾ་ཝ་ར་པྤ་དྷཱ་ནཾ, པ་ཛ་ཧ་ན་ཏྠཱ་ཡ པ་དྷཱ་ནཾ པ་ཧཱ་ན་པྤ་དྷཱ་ནཾ, ཀུ་ས་ལཱ་ནཾ དྷ་མྨཱ་ནཾ བྲཱུ་ཧ་ན་ཏྠཱ་ཡ ཝ་ཌྜྷ་ན་ཏྠཱ་ཡ པ་དྷཱ་ནཾ བྷཱ་ཝ་ནཱ་པྤ་དྷཱ་ནཾ, ཏེ་སཾ་ཡེ་ཝ ཨ་ནུ་ར་ཀྑ་ཎ་ཏྠཱ་ཡ པ་དྷཱ་ནཾ ཨ་ནུ་ར་ཀྑ་ཎཱ་པྤ་དྷཱ་ནཾ.
༡༠. ཨ་དྷ་མྨི་ཀ་སུ་ཏྟ་ཝ་ཎྞ་ནཱ
༧༠. ད་ས་མེ ཨ་དྷ་མྨི་ཀཱ ཧོ་ནྟཱིཏི པོ་རཱ་ཎ་ཀ་རཱ་ཛཱུ་ཧི ཋ་པི་ཏཾ ད་ས་བྷཱ་ག་བ་ལི་ཉྩེ་ཝ ཨ་པ་རཱ་དྷཱ་ནུ་རཱུ་པ་ཉྩ ད་ཎྜཾ ཨ་གྒ་ཧེ་ཏྭཱ ཨ་ཏི་རེ་ཀ་བ་ལི་ནོ ཙེ་ཝ ཨ་ཏི་རེ་ཀ་ད་ཎྜ་སྶ ཙ ག་ཧ་ཎེ་ན ཨ་དྷ་མྨི་ཀཱ. རཱ་ཛཱ་ཡུ་ཏྟཱཏི ར་ཉྙོ ཛ་ན་པ་དེ་སུ ཀི་ཙྩ་སཾ་ཝི་དྷཱ་ཡ་ཀཱ ཨཱ་ཡུ་ཏྟ་ཀ་པུ་རི་སཱ. བྲཱ་ཧྨ་ཎ་ག་ཧ་པ་ཏི་ཀཱཏི ཨ་ནྟོ་ན་ག་ར་ཝཱ་སི་ནོ བྲཱ་ཧྨ་ཎ་ག་ཧ་པ་ཏ་ཡོ. ནེ་ག་མ་ཛཱ་ན་པ་དཱཏི ནི་ག་མ་ཝཱ་སི་ནོ ཙེ་ཝ ཛ་ན་པ་ད་ཝཱ་སི་ནོ ཙ. ཝི་ས་མནྟི ཝི་ས་མཱ ཧུ་ཏྭཱ, ཨ་ས་མ་ཡེ་ན ཝཱ་ཡ་ནྟཱི་ཏི ཨ་ཏྠོ. ཝི་ས་མཱཏི ན ས་མཱ, ཨ་ཏི་ཐ་དྡྷཱ ཝཱ ཨ་ཏི་མུ་དུ་ཀཱ ཝཱ་ཏི ཨ་ཏྠོ. ཨ་པ་ཉྫ་སཱཏི མ་གྒ་ཏོ ཨ་པ་ག་ཏཱ, ཨུ་མྨ་གྒ་གཱ་མི་ནོ ཧུ་ཏྭཱ ཝཱ་ཡ་ནྟཱི་ཏི ཨ་ཏྠོ. དེ་ཝ་ཏཱ པ་རི་ཀུ་པི་ཏཱ བྷ་ཝ་ནྟཱིཏི ཝཱ་ཏེ་སུ ཧི ཝི་ས་མེ་སུ ཨ་པ་ཉྫ་སེ་སུ ཝཱ་ཡ་ནྟེ་སུ རུ་ཀྑཱ བྷི་ཛྫ་ནྟི, ཝི་མཱ་ནཱ་ནི བྷི་ཛྫ་ནྟི. ཏ་སྨཱ དེ་ཝ་ཏཱ པ་རི་ཀུ་པི་ཏཱ བྷ་ཝ་ནྟི, ཏཱ དེ་ཝ་སྶ ས་མྨཱ ཝ་སྶི་ཏུཾ ན དེ་ནྟི. ཏེ་ན ཝུ་ཏྟཾ དེ་ཝོ ན ས་མྨཱ དྷཱ་རཾ ཨ་ནུ་པྤ་ཝེ་ཙྪ་ཏཱིཏི. ཝི་ས་མ་པཱ་ཀཱ་ནི ས་སྶཱ་ནི བྷ་ཝ་ནྟཱིཏི ཨེ་ཀ་སྨིཾ ཋཱ་ནེ ག་བྦྷཱི་ནི ཧོ་ནྟི, ཨེ་ཀ་སྨིཾ ས་ཉྫཱ་ཏ་ཁཱི་རཱ་ནི, ཨེ་ཀཾ ཋཱ་ནཾ པ་ཙྩ་ཏཱི་ཏི ཨེ་ཝཾ ཝི་ས་མཾ པཱ་ཀཱ་ནི ས་སྶཱ་ནི བྷ་ཝ་ནྟི.
ས་མཾ ན་ཀྑ་ཏྟཱ་ནི ཏཱ་ར་ཀ་རཱུ་པཱ་ནི པ་རི་ཝ་ཏྟ་ནྟཱིཏི ཡ་ཐཱ ཀ་ཏྟི་ཀ་པུ་ཎྞ་མཱ ཀ་ཏྟི་ཀ་ན་ཀྑ་ཏྟ་མེ་ཝ ལ་བྷ་ཏི, མི་ག་སི་ར་པུ་ཎྞ་མཱ མི་ག་སི་ར་ན་ཀྑ་ཏྟ་མེ་ཝཱ་ཏི ཨེ་ཝཾ ཏ་སྨིཾ ཏ་སྨིཾ མཱ་སེ སཱ སཱ པུ་ཎྞ་མཱ ཏཾ ཏཾ ན་ཀྑ་ཏྟ་མེ་ཝ ལ་བྷ་ཏི, ཏ་ཐཱ ས་མྨཱ པ་རི་ཝ་ཏྟ་ནྟི. ས་མཾ ཝཱ་ཏཱ ཝཱ་ཡ་ནྟཱིཏི ཨ་ཝི་ས་མཱ ཧུ་ཏྭཱ ས་མ་ཡ་སྨིཾ་ཡེ་ཝ ཝཱ་ཡ་ནྟི, ཚ མཱ་སེ ཨུ་ཏྟ་རཱ ཝཱ་ཏཱ, ཚ མཱ་སེ་ད་ཀྑི་ཎཱ་ཏི ཨེ་ཝཾ ཏེ་སཾ ཏེ་སཾ ཛ་ན་པ་དཱ་ནཾ ཨ་ནུ་རཱུ་པེ ས་མ་ཡེ ཝཱ་ཡ་ནྟི. ས་མཱཏི ས་མ་པྤ་ཝ་ཏྟི་ནོ ནཱ་ཏི་ཐ་དྡྷཱ ནཱ་ཏི་མུ་དཱུ. པ་ཉྫ་སཱཏི མ་གྒ་པྤ་ཊི་པ་ནྣཱ, མ་གྒེ་ནེ་ཝ ཝཱ་ཡ་ནྟི, ནོ ཨ་མ་གྒེ་ནཱ་ཏི ཨ་ཏྠོ.
ཛི་མྷཾ ག་ཙྪ་ཏཱིཏི ཀུ་ཊི་ལཾ ག་ཙྪ་ཏི, ཨ་ཏི་ཏྠཾ ག་ཎྷཱ་ཏི. ནེ་ཏྟེ ཛི་མྷཾ ག་ཏེ ས་ཏཱིཏི ན་ཡ་ཏཱི་ཏི ནེ་ཏྟཱ. ཏ་སྨིཾ ནེ་ཏྟེ ཛི་མྷཾ ག་ཏེ ཀུ་ཊི་ལཾ ག་ནྟྭཱ ཨ་ཏི་ཏྠཾ ག་ཎྷ་ནྟེ ཨི་ཏ་རཱ་པི ཨ་ཏི་ཏྠ་མེ་ཝ ག་ཎྷ་ནྟཱི་ཏི ཨ་ཏྠོ. ནེ་ཏེ་ཏི་པི པཱ་ཋོ. དུ་ཀྑཾ སེ་ཏཱིཏི དུ་ཀྑཾ ས་ཡ་ཏི, དུ་ཀྑི་ཏཾ ཧོ་ཏཱི་ཏི ཨ་ཏྠོ.
པ་ཏྟ་ཀ་མྨ་ཝ་གྒོ དུ་ཏི་ཡོ.
(༨) ༣. ཨ་པ་ཎྞ་ཀ་ཝ་གྒོ
༡. པ་དྷཱ་ན་སུ་ཏྟ་ཝ་ཎྞ་ནཱ
༧༡. ཏ་ཏི་ཡ་ཝ་གྒ་སྶ པ་ཋ་མེ ཨ་པ་ཎྞ་ཀ་པྤ་ཊི་པ་དནྟི ཨ་ཝི་ར་དྡྷ་པྤ་ཊི་པ་དཾ. ཡོ་ནི ཙ་སྶ ཨཱ་ར་དྡྷཱ ཧོ་ཏཱིཏི ཀཱ་ར་ཎ་ཉྩ་སྶ པ་རི་པུ་ཎྞཾ ཧོ་ཏི. ཨཱ་ས་ཝཱ་ནཾ ཁ་ཡཱ་ཡཱཏི ཨ་ར་ཧ་ཏྟ་ཏྠཱ་ཡ. དུ་ཏི་ཡཾ ཨུ་ཏྟཱ་ན་མེ་ཝ.
༣. ས་པྤུ་རི་ས་སུ་ཏྟ་ཝ་ཎྞ་ནཱ
༧༣. ཏ་ཏི་ཡེ ཨ་ཝ་ཎྞོཏི ཨ་གུ་ཎོ. པཱ་ཏུ ཀ་རོ་ཏཱིཏི ཀ་ཐེ་ཏི, པཱ་ཀ་ཊཾ ཀ་རོ་ཏི. པ་ཉྷཱ་བྷི་ནཱི་ཏོཏི པ་ཉྷ་ཏྠཱ་ཡ ཨ་བྷི་ནཱི་ཏོ. ཨ་ཧཱ་པེ་ཏྭཱ ཨ་ལ་མྦི་ཏྭཱཏི ཨ་པ་རི་ཧཱི་ནཾ ཨ་ལ་མྦི་ཏཾ ཀ་ཏྭཱ. ཨེ་ཏྠ ཙ ཨ་ས་པྤུ་རི་སོ པཱ་པི་ཙྪ་ཏཱ་ཡ ཨ་ཏྟ་ནོ ཨ་ཝ་ཎྞཾ ཚཱ་དེ་ཏི, ས་པྤུ་རི་སོ ལ་ཛྫི་ཏཱ་ཡ ཨ་ཏྟ་ནོ ཝ་ཎྞཾ. ཨི་དཱ་ནི ཡ་སྨཱ ཨ་ས་པྤུ་རི་སོ ཧི་རོ་ཏྟ་པྤ་ར་ཧི་ཏོ སཾ་ཝཱ་སེ་ན ཨ་ཝ་ཛཱ་ནཱ་ཏི, ས་པྤུ་རི་སོ པ་ན ཧི་རོ་ཏྟ་པྤ་ས་མ་ནྣཱ་ག་ཏོ སཾ་ཝཱ་སེ་ནཱ་པི ནཱ་ཝ་ཛཱ་ནཱ་ཏི. ཏ་སྨཱ ཨ་ས་པྤུ་རི་ས་བྷཱ་ཝ་སཱ་དྷ་ཀཾ ཨ་དྷུ་ནཱ་ག་ཏ་ཝ་དྷུ་ཀོ་པ་མྨཾ ད་སྶེ་ཏུཾ སེ་ཡྻ་ཐཱ་པི, བྷི་ཀྑ་ཝེ, ཝ་དྷུ་ཀཱཏི་ཨཱ་དི་མཱ་ཧ. ཏ་ཏྠ ཝ་དྷུ་ཀཱཏི སུ་ཎི་སཱ. ཏི་བྦནྟི བ་ཧ་ལཾ. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝཱ་ཏི.
༤-༥. ཨ་གྒ་སུ་ཏྟ་དྭ་ཡ་ཝ་ཎྞ་ནཱ
༧༤-༧༥. ཙ་ཏུ་ཏྠེ སཱི་ལ་གྒནྟི ཨ་གྒ་པྤ་ཏྟཾ ཨུ་ཏྟ་མ་སཱི་ལཾ. ཨེ་སེ་ཝ ན་ཡོ ས་བྦ་ཏྠ. པ་ཉྩ་མེ རཱུ་པ་གྒནྟི ཡཾ རཱུ་པཾ ས་མྨ་སི་ཏྭཱ ཨ་ར་ཧ་ཏྟཾ པཱ་པུ་ཎཱ་ཏི, ཨི་དཾ རཱུ་པ་གྒཾ ནཱ་མ. སེ་སེ་སུ་པི ཨེ་སེ་ཝ ན་ཡོ. བྷ་ཝ་གྒནྟི ཨེ་ཏྠ པ་ན ཡ་སྨིཾ ཨ་ཏྟ་བྷཱ་ཝེ ཋི་ཏོ ཨ་ར་ཧ་ཏྟཾ པཱ་པུ་ཎཱ་ཏི, ཨེ་ཏཾ བྷ་ཝ་གྒཾ ནཱ་མཱ་ཏི.
༦. ཀུ་སི་ནཱ་ར་སུ་ཏྟ་ཝ་ཎྞ་ནཱ
༧༦. ཚ་ཊྛེ ཨུ་པ་ཝ་ཏྟ་ནེཏི པཱ་ཙཱི་ན་ག་ཏཱ་ཡ སཱ་ལ་པ་ནྟི་ཡཱ ཨུ་ཏྟ་རེ་ན ནི་ཝ་ཏྟི་ཏྭཱ ཋི་ཏཱ་ཡ ཝེ་མ་ཛ྄ཛྷ་ཊྛཱ་ནེ. ཨ་ནྟ་རེ་ན ཡ་མ་ཀ་སཱ་ལཱ་ནནྟི དྭི་ནྣཾ སཱ་ལ་རུ་ཀྑཱ་ནཾ ཨ་ནྟ་རེ. ཀ་ངྑཱཏི དྭེ་ལ༹ྷ་ཀཾ. ཝི་མ་ཏཱིཏི ཝི་ནི་ཙྪི་ཏུཾ ཨ་ས་མ་ཏྠ་ཏཱ. ‘‘བུ་དྡྷོ ནུ ཁོ ན བུ་དྡྷོ ནུ ཁོ, དྷ་མྨོ ནུ ཁོ ན དྷ་མྨོ ནུ ཁོ, ས་ངྒྷོ ནུ ཁོ ན ས་ངྒྷོ ནུ ཁོ, མ་གྒོ ནུ ཁོ ན མ་གྒོ ནུ ཁོ, པ་ཊི་པ་དཱ ནུ ཁོ ན པ་ཊི་པ་དཱ ནུ ཁོ’’ཏི ཡ་སྶ སཾ་ས་ཡོ ཨུ་པྤ་ཛྫེ་ཡྻ, ཏཾ ཝོ ཝ་དཱ་མི པུ་ཙྪ་ཐ, བྷི་ཀྑ་ཝེ་ཏི ཨ་ཡ་མེ་ཏྠ ས་ངྑེ་པ་ཏྠོ. ས་ཏྠུ་གཱ་ར་ཝེ་ན་པི ན པུ་ཙྪེ་ཡྻཱ་ཐཱཏི ‘‘མ་ཡཾ ས་ཏྠུ ས་ནྟི་ཀེ པ་བྦ་ཛི་མྷ, ཙ་ཏྟཱ་རོ པ་ཙྩ་ཡཱ་པི ནོ ས་ཏྠུ ས་ནྟ་ཀཱ་ཝ. ཏེ མ་ཡཾ ཨེ་ཏྟ་ཀཾ ཀཱ་ལཾ ཀ་ངྑཾ ཨ་ཀ་ཏྭཱ ན ཨ་ར་ཧཱ་མ ཨ་ཛྫ པ་ཙྪི་མེ ཀཱ་ལེ ཀ་ངྑཾ ཀཱ་ཏུ’’ནྟི ས་ཙེ ཨེ་ཝཾ ས་ཏྠ་རི གཱ་ར་ཝེ་ན ན པུ་ཙྪ་ཐ. ས་ཧཱ་ཡ་ཀོ་པི, བྷི་ཀྑ་ཝེ, ས་ཧཱ་ཡ་ཀ་སྶ ཨཱ་རོ་ཙེ་ཏཱུཏི ཏུ་མྷཱ་ཀཾ ཡོ ཡ་སྶ བྷི་ཀྑུ་སྶ ས་ནྡི་ཊྛོ ས་མྦྷ་ཏྟོ, སོ ཏ་སྶ ཨཱ་རོ་ཙེ་ཏུ, ཨ་ཧཾ ཨེ་ཀ་སྶ བྷི་ཀྑུ་སྶ ཀ་ཐེ་སྶཱ་མི, ཏ་སྶ ཀ་ཐཾ སུ་ཏྭཱ ས་བྦེ ནི་ཀྐ་ངྑཱ བྷ་ཝ་ཐཱ་ཏི ད་སྶེ་ཏི. ཨེ་ཝཾ པ་ས་ནྣོཏི ཨེ་ཝཾ ས་དྡ་ཧཱ་མི ཨ་ཧ་ནྟི ཨ་ཏྠོ. ཉཱ་ཎ་མེ་ཝཱཏི ནི་ཀྐ་ངྑ་བྷཱ་ཝ་པ་ཙྩ་ཀྑ་ཀ་ར་ཎ་ཉཱ་ཎཾ་ཡེ་ཝ ཨེ་ཏྠ ཏ་ཐཱ་ག་ཏ་སྶ, ན ས་དྡྷཱ་མ་ཏྟ་ནྟི ཨ་ཏྠོ. ཨི་མེ་ས་ཉྷི, ཨཱ་ན་ནྡཱཏི ཨི་མེ་སཾ ཨ་ནྟོ་སཱ་ཎི་ཡཾ ནི་སི་ནྣཱ་ནཾ པ་ཉྩ་ནྣཾ བྷི་ཀྑུ་ས་ཏཱ་ནཾ. ཡོ པ་ཙྪི་མ་ཀོཏི ཡོ གུ་ཎ་ཝ་སེ་ན པ་ཙྪི་མ་ཀོ, ཨཱ་ན་ནྡ་ཏྠེ་རཾ་ཡེ་ཝ ས་ནྡྷཱ་ཡཱ་ཧ.
༧. ཨ་ཙི་ནྟེ་ཡྻ་སུ་ཏྟ་ཝ་ཎྞ་ནཱ
༧༧. ས་ཏྟ་མེ ཨ་ཙི་ནྟེ་ཡྻཱ་ནཱིཏི ཙི་ནྟེ་ཏུཾ ཨ་ཡུ་ཏྟཱ་ནི. ན ཙི་ནྟེ་ཏ་བྦཱ་ནཱིཏི ཨ་ཙི་ནྟེ་ཡྻ་ཏྟཱ་ཡེ་ཝ ན ཙི་ནྟེ་ཏ་བྦཱ་ནི. ཡཱ་ནི ཙི་ནྟེ་ནྟོཏི ཡཱ་ནི ཀཱ་ར་ཎཱ་ནི ཙི་ནྟེ་ནྟོ. ཨུ་མྨཱ་ད་སྶཱཏི ཨུ་མྨ་ཏྟ་ཀ་བྷཱ་ཝ་སྶ. ཝི་གྷཱ་ཏ་སྶཱཏི དུ་ཀྑ་སྶ. བུ་དྡྷ་ཝི་ས་ཡོཏི བུ་དྡྷཱ་ནཾ ཝི་ས་ཡོ, ས་བྦ་ཉྙུ་ཏ་ཉྙཱ་ཎཱ་དཱི་ནཾ བུ་དྡྷ་གུ་ཎཱ་ནཾ པ་ཝ་ཏྟི ཙ ཨཱ་ནུ་བྷཱ་ཝོ ཙ. ཛྷཱ་ན་ཝི་ས་ཡོཏི ཨ་བྷི་ཉྙཱ་ཛྷཱ་ན་ཝི་ས་ཡོ. ཀ་མྨ་ཝི་པཱ་ཀོཏི དི་ཊྛ་དྷ་མྨ་ཝེ་ད་ནཱི་ཡཱ་དཱི་ནཾ ཀ་མྨཱ་ནཾ ཝི་པཱ་ཀོ. ལོ་ཀ་ཙི་ནྟཱཏི ‘‘ཀེ་ན ནུ ཁོ ཙ་ནྡི་མ་སཱུ་རི་ཡཱ ཀ་ཏཱ, ཀེ་ན མ་ཧཱ་པ་ཐ་ཝཱི, ཀེ་ན མ་ཧཱ་ས་མུ་དྡོ, ཀེ་ན ས་ཏྟཱ ཨུ་པྤཱ་དི་ཏཱ, ཀེ་ན པ་བྦ་ཏཱ, ཀེ་ན ཨ་མྦ་ཏཱ་ལ་ནཱ་ལི༹་ཀེ་རཱ་ད་ཡོ’’ཏི ཨེ་ཝ་རཱུ་པཱ ལོ་ཀ་ཙི་ནྟཱ.
༨. ད་ཀྑི་ཎ་སུ་ཏྟ་ཝ་ཎྞ་ནཱ
༧༨. ཨ་ཊྛ་མེ ད་ཀྑི་ཎཱ་ཝི་སུ་དྡྷི་ཡོཏི དཱ་ན་ས་ངྑཱ་ཏཱ་ཡ ད་ཀྑི་ཎཱ་ཡ ཝི་སུ་ཛ྄ཛྷ་ན་ཀཱ་ར་ཎཱ་ནི. དཱ་ཡ་ཀ་ཏོ ཝི་སུ་ཛ྄ཛྷ་ཏཱིཏི མ་ཧ་པྥ་ལ་བྷཱ་ཝེ་ན ཝི་སུ་ཛ྄ཛྷ་ཏི, མ་ཧ་པྥ་ལཱ ཧོ་ཏཱི་ཏི ཨ་ཏྠོ. ཀ་ལྱཱ་ཎ་དྷ་མྨོཏི སུ་ཙི་དྷ་མྨོ. པཱ་པ་དྷ་མྨོཏི ལཱ་མ་ཀ་དྷ་མྨོ. དཱ་ཡ་ཀ་ཏོ ཝི་སུ་ཛ྄ཛྷ་ཏཱིཏི ཨེ་ཏྠ ཝེ་སྶ་ནྟ་ར་མ་ཧཱ་རཱ་ཛཱ ཀ་ཐེ་ཏ་བྦོ. སོ ཧི ཛཱུ་ཛ་ཀ་བྲཱ་ཧྨ་ཎ་སྶ དཱ་ར་ཀེ ད་ཏྭཱ མ་ཧཱ་པ་ཐ་ཝིཾ ཀ་མྤེ་སི. པ་ཊི་གྒཱ་ཧ་ཀ་ཏོ ཝི་སུ་ཛ྄ཛྷ་ཏཱིཏི ཨེ་ཏྠ ཀ་ལྱཱ་ཎཱི་ན་དཱི་མུ་ཁ་དྭཱ་ར་ཝཱ་སཱི ཀེ་ཝ་ཊྚོ ཀ་ཐེ་ཏ་བྦོ. སོ ཀི་ར དཱི་གྷ་སུ་མ་ཏྠེ་ར་སྶ ཏི་ཀྑ་ཏྟུཾ པི་ཎྜ་པཱ་ཏཾ ད་ཏྭཱ མ་ར་ཎ་མ་ཉྩེ ནི་པ་ནྣོ ‘‘ཨ་ཡྻ་སྶ མཾ དཱི་གྷ་སུ་མ་ཏྠེ་ར་སྶ དི་ནྣ་པི་ཎྜ་པཱ་ཏོ ཨུ་དྡྷ་ར་ཏཱི’’ཏི ཨཱ་ཧ. ནེ་ཝ དཱ་ཡ་ཀ་ཏོཏི ཨེ་ཏྠ ཝ་ཌྜྷ་མཱ་ན་ཝཱ་སཱི ལུ་དྡ་ཀོ ཀ་ཐེ་ཏ་བྦོ. སོ ཀི་ར པེ་ཏ་ད་ཀྑི་ཎཾ དེ་ནྟོ ཨེ་ཀ་སྶ དུ་སྶཱི་ལ་སྶེ་ཝ ཏ་ཡོ ཝཱ་རེ ཨ་དཱ་སི. ཏ་ཏི་ཡ་ཝཱ་རེ ‘‘ཨ་མ་ནུ་སྶོ དུ་སྶཱི་ལོ མཾ ཝི་ལུ་མྤ་ཏཱི’’ཏི ཝི་ར་ཝི. ཨེ་ཀ་སྶ སཱི་ལ་ཝ་ཏོ བྷི་ཀྑུ་ནོ ད་ཏྭཱ པཱ་པི་ཏ་ཀཱ་ལེ་ཡེ་ཝ་སྶ པཱ་པུ་ཎི. དཱ་ཡ་ཀ་ཏོ ཙེ་ཝ ཝི་སུ་ཛ྄ཛྷ་ཏི པ་ཊི་གྒཱ་ཧ་ཀ་ཏོ ཙཱཏི ཨེ་ཏྠ ཨ་ས་དི་ས་དཱ་ནཾ ཀ་ཐེ་ཏ་བྦ་ནྟི.
༩. ཝ་ཎི་ཛྫ་སུ་ཏྟ་ཝ་ཎྞ་ནཱ
༧༩. ན་ཝ་མེ ཏཱ་དི་སཱ ཝཱཏི ཏཾ་ས་དི་སཱ་ཝ ཏཾ་ས་རི་ཀྑ་ཀཱ་ཝ. ཚེ་ད་གཱ་མི་ནཱི ཧོ་ཏཱིཏི ཚེ་དཾ ག་ཙྪ་ཏི. ཡཾ པ་ཏྠི་ཏཾ, ཏཾ ས་བྦཾ ན་སྶ་ཏཱི་ཏི ཨ་ཏྠོ. ན ཡ་ཐཱ་དྷི་པྤཱ་ཡཱ ཧོ་ཏཱིཏི ཡ་ཐཱ་ཛ྄ཛྷཱ་ས་ཡཱ ན ཧོ་ཏི. པ་རཱ་དྷི་པྤཱ་ཡཱ ཧོ་ཏཱིཏི པ་ར་ཛ྄ཛྷཱ་ས་ཡཱ ཨ་ཛ྄ཛྷཱ་ས་ཡ་ཏོ ཨ་དྷི་ཀ་ཏ་ར་ཕ་ལཱ ཧོ་ཏི. ས་མ་ཎཾ ཝཱ བྲཱ་ཧྨ་ཎཾ ཝཱཏི ཨེ་ཏྠ ས་མི་ཏ་པཱ་པ་བཱ་ཧི་ཏ་པཱ་པ་ཏཱ་ཧི ས་མ་ཎ་བྲཱ་ཧྨ་ཎ་ཏཱ ཝེ་དི་ཏ་བྦཱ. ཝ་ད་ཏུ, བྷ་ནྟེ, པ་ཙྩ་ཡེ་ནཱཏི, བྷ་ནྟེ, ཙ་ཏུ་བྦི་དྷེ་ན ཙཱི་ཝ་རཱ་དི་ནཱ པ་ཙྩ་ཡེ་ན ཝ་དེ་ཡྻཱ་སཱི་ཏི ཨེ་ཝཾ པ་ཝཱ་རེ་ཏི ནི་མ་ནྟེ་ཏི. ཡེ་ན པ་ཝཱ་རེ་ཏཱིཏི པ་རི་ཙྪི་ནྡི་ཏྭཱ ཡ་ཏྟ་ཀེ་ན པ་ཝཱ་རེ་ཏི. ཏཾ ན དེ་ཏཱིཏི ཏཾ ས་བྦ་སོ་ཝ ན དེ་ཏི. ན ཡ་ཐཱ་དྷི་པྤཱ་ཡཾ དེ་ཏཱིཏི ཡ་ཐཱ ཏ་སྶ ཨ་ཛ྄ཛྷཱ་ས་ཡོ, ཨེ་ཝཾ དཱ་ཏུཾ ན ས་ཀྐོ་ཏི, ཧཱ་པེ་ཏྭཱ ཨ་པྤ་ཀཾ དེ་ཏི. ཡ་ཐཱ་དྷི་པྤཱ་ཡཾ དེ་ཏཱིཏི ཡ་ཏྟ་ཀཾ སོ ཨི་ཙྪ་ཏི, ཏ་ཏྟ་ཀ་མེ་ཝ དེ་ཏི. པ་རཱ་དྷི་པྤཱ་ཡཾ དེ་ཏཱིཏི ཨ་པྤ་ཀཾ པ་ཝཱ་རེ་ཏྭཱ ཨ་ཝ་ཏྠ་རི་ཏྭཱ བ་ཧུཾ དེ་ཏི.
༡༠. ཀ་མྦོ་ཛ་སུ་ཏྟ་ཝ་ཎྞ་ནཱ
༨༠. ད་ས་མེ ནེ་ཝ ས་བྷཱ་ཡཾ ནི་སཱི་ད་ཏཱིཏི ཝི་ནི་ཙྪ་ཡ་ཀ་ར་ཎ་ཏྠཾ ཝི་ནི་ཙྪ་ཡ་ས་བྷཱ་ཡཾ ནེ་ཝ ནི་སཱི་ད་ཏི. ན ཀ་མྨ་ནྟཾ པ་ཡོ་ཛེ་ཏཱིཏི ཀ་སི་ཝ་ཎི་ཛྫཱ་དི་མ་ཧཱ་ཀ་མྨ་ནྟཾ ན་པྤ་ཡོ་ཛེ་ཏི. ན ཀ་མྦོ་ཛཾ ག་ཙྪ་ཏཱིཏི བྷོ་གེ ས་མྦྷ་ར་ཎ་ཏྠཱ་ཡ ཀ་མྦོ་ཛ་ར་ཊྛཾ ན ག་ཙྪ་ཏི. དེ་ས་ནཱ་མ་ཏྟ་མེ་ཝ ཙེ་ཏཾ, ཡཾ ཀི་ཉྩི ཏི་རོ་ར་ཊྛཾ ན ག་ཙྪ་ཏཱི་ཏི ཨ་ཏྠོ. ཀོ་དྷ་ནོཏི་ཨཱ་དཱི་སུ ཀོ་དྷ་ན་ཏཱ་ཡ ཀོ་དྷ་པ་རི་ཡུ་ཊྛི་ཏོ ཨ་ཏྠཱ་ན་ཏྠཾ ན ཛཱ་ནཱ་ཏི, ཨི་སྶུ་ཀི་ཏཱ་ཡ པ་ར་ས་མྤ་ཏྟིཾ ན ས་ཧ་ཏི, མ་ཙྪ་རི་ཏཱ་ཡ དྷ་ནཾ ད་ཏྭཱ ཀི་ཙྩཾ ཀཱ་ཏུཾ ན ས་ཀྐོ་ཏི, ནི་པྤ་ཉྙ་ཏཱ་ཡ ཀི་ཙྩཾ སཾ་ཝི་དྷཱ་ཏུཾ ན ས་ཀྐོ་ཏི. ཏ་སྨཱ ཨེ་ཏཱ་ནི ས་བྷཱ་ནི་སཱི་ད་ནཱ་དཱི་ནི ན ཀ་རོ་ཏཱི་ཏི.
ཨ་པ་ཎྞ་ཀ་ཝ་གྒོ ཏ་ཏི་ཡོ.
(༩) ༤. མ་ཙ་ལ་ཝ་གྒོ
༡-༥. པཱ་ཎཱ་ཏི་པཱ་ཏཱ་དི་སུ་ཏྟ་པ་ཉྩ་ཀ་ཝ་ཎྞ་ནཱ
༨༡-༨༥. ཙ་ཏུ་ཏྠ་སྶ པ་ཋ་མཱ་དཱི་ནི ཨུ་ཏྟཱ་ན་ཏྠཱ་ནེ་ཝ. པ་ཉྩ་མེ ‘‘ནཱི་ཙེ ཀུ་ལེ པ་ཙྩཱ་ཛཱ་ཏོ’’ཏི་ཨཱ་དི་ཀེ་ན ཏ་མེ་ན ཡུ་ཏྟོ་ཏི ཏ་མོ. ཀཱ་ཡ་དུ་ཙྩ་རི་ཏཱ་དཱི་ཧི པུ་ན ནི་ར་ཡ་ཏ་མཱུ་པ་ག་མ་ན་ཏོ ཏ་མ་པ་རཱ་ཡ་ཎོ. ཨི་ཏི ཨུ་བྷ་ཡེ་ན་པི ཁ་ནྡྷ་ཏ་མོ་ཝ ཀ་ཐི་ཏོ ཧོ་ཏི. ‘‘ཨ་ཌྜྷེ ཀུ་ལེ པ་ཙྩཱ་ཛཱ་ཏོ’’ཏི་ཨཱ་དི་ཀེ་ན ཛོ་ཏི་ནཱ ཡུ་ཏྟ་ཏོ ཛོ་ཏི, ཨཱ་ལོ་ཀ་བྷཱུ་ཏོ་ཏི ཝུ་ཏྟཾ ཧོ་ཏི. ཀཱ་ཡ་སུ་ཙ་རི་ཏཱ་དཱི་ཧི པུ་ན ས་གྒུ་པྤ་ཏྟི་ཛོ་ཏི་བྷཱ་ཝཱུ་པ་ག་མ་ན་ཏོ ཛོ་ཏི་པ་རཱ་ཡ་ཎོ. ཨི་མི་ནཱ ན་ཡེ་ན ཨི་ཏ་རེ་པི དྭེ ཝེ་དི་ཏ་བྦཱ.
ཝེ་ན་ཀུ་ལེཏི ཝི་ལཱི་ཝ་ཀཱ་ར་ཀུ་ལེ. ནེ་སཱ་ད་ཀུ་ལེཏི མི་ག་ལུ་དྡ་ཀཱ་དཱི་ནཾ ཀུ་ལེ. ར་ཐ་ཀཱ་ར་ཀུ་ལེཏི ཙ་མྨ་ཀཱ་ར་ཀུ་ལེ. པུ་ཀྐུ་ས་ཀུ་ལེཏི པུ་པྥ་ཚ་ཌྜ་ཀ་ཀུ་ལེ. ཀ་སི་ར་ཝུ་ཏྟི་ཀེཏི དུ་ཀྑ་ཝུ་ཏྟི་ཀེ. དུ་བྦ་ཎྞོཏི པཾ་སུ་པི་སཱ་ཙ་ཀོ ཝི་ཡ ཛྷཱ་མ་ཁཱ་ཎུ་ཝ་ཎྞོ. དུ་དྡ་སི་ཀོཏི ཝི་ཛཱ་ཏ་མཱ་ཏུ་ཡཱ་པི ཨ་མ་ནཱ་པ་ད་སྶ་ནོ. ཨོ་ཀོ་ཊི་མ་ཀོཏི ལ་ཀུ་ཎྜ་ཀོ. ཀཱ་ཎོཏི ཨེ་ཀ་ཙྪི་ཀཱ་ཎོ ཝཱ ཨུ་བྷ་ཡ་ཙྪི་ཀཱ་ཎོ ཝཱ. ཀུ་ཎཱིཏི ཨེ་ཀ་ཧ་ཏྠ་ཀུ་ཎཱི ཝཱ ཨུ་བྷ་ཡ་ཧ་ཏྠ་ཀུ་ཎཱི ཝཱ. ཁ་ཉྫོཏི ཨེ་ཀ་པཱ་ད་ཁ་ཉྫོ ཝཱ ཨུ་བྷ་ཡ་པཱ་ད་ཁ་ཉྫོ ཝཱ. པ་ཀྑ་ཧ་ཏོཏི ཧ་ཏ་པ་ཀྑོ པཱི་ཋ་ས་པྤཱི. པ་དཱི་པེ་ཡྻ་སྶཱཏི ཏེ་ལ་ཀ་པ་ལླཱ་དི་ནོ དཱི་པ་ཨུ་པ་ཀ་ར་ཎ་སྶ. ཨེ་ཝཾ ཁོ, བྷི་ཀྑ་ཝེཏི ཨེ་ཏྠ ཨེ་ཀོ པུ་གྒ་ལོ བ་ཧི་དྡྷཱ ཨཱ་ལོ་ཀཾ ཨ་དི་སྭཱ མཱ་ཏུ ཀུ་ཙྪི་མྷི་ཡེ་ཝ ཀཱ་ལཾ ཀ་ཏྭཱ ཨ་པཱ་ཡེ་སུ ནི་བྦ་ཏྟ་ནྟོ ས་ཀ་ལ་མྤི ཀ་པྤཾ སཾ་ས་ར་ཏི. སོ་པི ཏ་མོ་ཏ་མ་པ་རཱ་ཡ་ཎོ་ཝ. སོ པ་ན ཀུ་ཧ་ཀ་པུ་གྒ་ལོ བྷ་ཝེ་ཡྻ. ཀུ་ཧ་ཀ་སྶ ཧི ཨེ་ཝ་རཱུ་པཱ ནི་པྥ་ཏྟི ཧོ་ཏཱི་ཏི ཝུ་ཏྟཾ.
ཨེ་ཏྠ ཙ ‘‘ནཱི་ཙེ ཀུ་ལེ’’ཏི་ཨཱ་དཱི་ཧི ཨཱ་ག་མ་ན་ཝི་པ་ཏྟི ཙེ་ཝ པ་ཙྩུ་པྤ་ནྣ་པ་ཙྩ་ཡ་ཝི་པ་ཏྟི ཙ ད་སྶི་ཏཱ. ‘‘ད་ལི་དྡེ’’ཏི་ཨཱ་དཱི་ཧི པ་ཝ་ཏྟ་པ་ཙྩ་ཡ་ཝི་པ་ཏྟི, ‘‘ཀ་སི་ར་ཝུ་ཏྟི་ཀེ’’ཏི་ཨཱ་དཱི་ཧི ཨཱ་ཛཱི་ཝུ་པཱ་ཡ་ཝི་པ་ཏྟི, ‘‘དུ་བྦ་ཎྞོ’’ཏི་ཨཱ་དཱི་ཧི ཨ་ཏྟ་བྷཱ་ཝ་ཝི་པ་ཏྟི, ‘‘བ་ཧྭཱ་བཱ་དྷོ’’ཏི་ཨཱ་དཱི་ཧི དུ་ཀྑ་ཀཱ་ར་ཎ་ས་མཱ་ཡོ་གོ, ‘‘ན ལཱ་བྷཱི’’ཏི་ཨཱ་དཱི་ཧི སུ་ཁ་ཀཱ་ར་ཎ་ཝི་པ་ཏྟི ཙེ་ཝ ཨུ་པ་བྷོ་ག་ཝི་པ་ཏྟི ཙ, ‘‘ཀཱ་ཡེ་ན དུ་ཙྩ་རི་ཏ’’ནྟི་ཨཱ་དཱི་ཧི ཏ་མ་པ་རཱ་ཡ་ཎ་བྷཱ་ཝ་སྶ ཀཱ་ར་ཎ་ས་མཱ་ཡོ་གོ, ‘‘ཀཱ་ཡ་སྶ བྷེ་དཱ’’ཏི་ཨཱ་དཱི་ཧི ས་མྤ་རཱ་ཡི་ཀ་ཏ་མཱུ་པ་ག་མོ. སུ་ཀྐ་པ་ཀྑོ ཝུ་ཏྟ་པ་ཊི་པ་ཀྑ་ན་ཡེ་ན ཝེ་དི་ཏ་བྦོ.
༦. ཨོ་ཎ་ཏོ་ཎ་ཏ་སུ་ཏྟ་ཝ་ཎྞ་ནཱ
༨༦. ཚ་ཊྛེ ཨོ་ཎ་ཏོ་ཎ་ཏོཏི ཨི་དཱ་ནི ནཱི་ཙ་ཀོ ཨཱ་ཡ་ཏི་མྤི ནཱི་ཙ་ཀོ བྷ་ཝི་སྶ་ཏི. ཨོ་ཎ་ཏུ་ཎྞ་ཏོཏི ཨི་དཱ་ནི ནཱི་ཙོ ཨཱ་ཡ་ཏིཾ ཨུ་ཙྩོ བྷ་ཝི་སྶ་ཏི. ཨུ་ཎྞ་ཏོ་ཎ་ཏོཏི ཨི་དཱ་ནི ཨུ་ཙྩོ ཨཱ་ཡ་ཏིཾ ནཱི་ཙོ བྷ་ཝི་སྶ་ཏི. ཨུ་ཎྞ་ཏུ་ཎྞ་ཏོཏི ཨི་དཱ་ནི ཨུ་ཙྩོ ཨཱ་ཡ་ཏི་མྤི ཨུ་ཙྩོ བྷ་ཝི་སྶ་ཏི. ཝི་ཏྠཱ་རོ པ་ན ནེ་སཾ པུ་རི་མ་སུ་ཏྟ་ན་ཡེ་ནེ་ཝ ཝེ་དི་ཏ་བྦོ.
༧. པུ་ཏྟ་སུ་ཏྟ་ཝ་ཎྞ་ནཱ
༨༧. ས་ཏྟ་མེ ས་མ་ཎ་མ་ཙ་ལོཏི ས་མ་ཎ་ཨ་ཙ་ལོ, མ་ཀཱ་རོ པ་ད་ས་ནྡྷི་ཀ་རོ, ནི་ཙྩ་ལ་ས་མ་ཎོ་ཏི ཨ་ཏྠོ. ཨི་མི་ནཱ ས་ཏྟ་ཝི་དྷ་མྤི སེ་ཁཾ ད་སྶེ་ཏི. སོ ཧི སཱ་ས་ནེ མཱུ་ལ་ཛཱ་ཏཱ་ཡ ས་དྡྷཱ་ཡ པ་ཏི་ཊྛི་ཏ་ཏྟཱ ཨ་ཙ་ལོ ནཱ་མ. ས་མ་ཎ་པུ་ཎྜ་རཱི་ཀོཏི པུ་ཎྜ་རཱི་ཀ་ས་དི་སོ ས་མ་ཎོ. པུ་ཎྜ་རཱི་ཀཾ ནཱ་མ ཨཱུ་ན་ས་ཏ་པ་ཏྟཾ ས་རོ་རུ་ཧཾ. ཨི་མི་ནཱ སུ་ཀྑ་ཝི་པ་སྶ་ཀ་ཁཱི་ཎཱ་ས་ཝཾ ད་སྶེ་ཏི. སོ ཧི ཛྷཱ་ནཱ་བྷི་ཉྙཱ་ནཾ ཨ་བྷཱ་ཝེ་ན ཨ་པ་རི་པུ་ཎྞ་གུ་ཎ་ཏྟཱ ས་མ་ཎ་པུ་ཎྜ་རཱི་ཀོ ནཱ་མ ཧོ་ཏི. ས་མ་ཎ་པ་དུ་མོཏི པ་དུ་མ་ས་དི་སོ ས་མ་ཎོ. པ་དུ་མཾ ནཱ་མ པ་རི་པུ་ཎྞ་ས་ཏ་པ་ཏྟཾ ས་རོ་རུ་ཧཾ. ཨི་མི་ནཱ ཨུ་བྷ་ཏོ་བྷཱ་ག་ཝི་མུ་ཏྟཾ ཁཱི་ཎཱ་ས་ཝཾ ད་སྶེ་ཏི. སོ ཧི ཛྷཱ་ནཱ་བྷི་ཉྙཱ་ནཾ བྷཱ་ཝེ་ན པ་རི་པུ་ཎྞ་གུ་ཎ་ཏྟཱ ས་མ་ཎ་པ་དུ་མོ ནཱ་མ ཧོ་ཏི. ས་མ་ཎེ་སུ ས་མ་ཎ་སུ་ཁུ་མཱ་ལོཏི ས་བྦེ་སུ་པི ཨེ་ཏེ་སུ ས་མ་ཎེ་སུ སུ་ཁུ་མཱ་ལ་ས་མ་ཎོ མུ་དུ་ཙི་ཏྟ་ས་རཱི་རོ ཀཱ་ཡི་ཀ་ཙེ་ཏ་སི་ཀ་དུ་ཀྑ་ར་ཧི་ཏོ ཨེ་ཀ་ནྟ་སུ་ཁཱི. ཨེ་ཏེ་ན ཨ་ཏྟཱ་ན་ཉྩེ་ཝ ཨ་ཏྟ་ས་དི་སེ ཙ ད་སྶེ་ཏི.
ཨེ་ཝཾ མཱ་ཏི་ཀཾ ནི་ཀྑི་པི་ཏྭཱ ཨི་དཱ་ནི པ་ཊི་པཱ་ཊི་ཡཱ ཝི་བྷ་ཛ་ནྟོ ཀ་ཐ་ཉྩ, བྷི་ཀྑ་ཝེཏི་ཨཱ་དི་མཱ་ཧ. ཏ་ཏྠ སེ་ཁོཏི ས་ཏྟ་ཝི་དྷོ་པི སེ་ཁོ. པཱ་ཊི་པ་དོཏི པ་ཊི་པ་ནྣ་ཀོ. ཨ་ནུ་ཏྟ་རཾ ཡོ་ག་ཀྑེ་མཾ པ་ཏྠ་ཡ་མཱ་ནོ ཝི་ཧ་ར་ཏཱིཏི ཨ་ར་ཧ་ཏྟཾ པ་ཏྠ་ཡ་ནྟོ ཝི་ཧ་ར་ཏི. མུ་དྡྷཱ་ཝ་སི་ཏྟ་སྶཱཏི མུ་དྡྷ་ནི ཨ་ཝ་སི་ཏྟ་སྶ, ཀ་ཏཱ་བྷི་སེ་ཀ་སྶཱ་ཏི ཨ་ཏྠོ. ཨཱ་བྷི་སེ་ཀོཏི ཨ་བྷི་སེ་ཀཾ ཀཱ་ཏུཾ ཡུ་ཏྟོ. ཨ་ན་བྷི་སི་ཏྟོཏི ན ཏཱ་ཝ ཨ་བྷི་སི་ཏྟོ. མ་ཙ་ལ་པྤ་ཏྟོཏི ར་ཉྙོ ཁ་ཏྟི་ཡ་སྶ མུ་དྡྷཱ་ཝ་སི་ཏྟ་སྶ པུ་ཏྟ་བྷཱ་ཝེ་ན ཙེ་ཝ པུ་ཏྟེ་སུ ཛེ་ཊྛ་ཀ་བྷཱ་ཝེ་ན ཙ ན ཏཱ་ཝ ཨ་བྷི་སི་ཏྟ་བྷཱ་ཝེ་ན ཙ ཨ་བྷི་སེ་ཀ་པྤ་ཏྟི་ཨ་ཏྠཱ་ཡ ཨ་ཙ་ལ་པྤ་ཏྟོ ནི་ཙྩ་ལ་པ་ཏྟོ. མ་ཀཱ་རོ ནི་པཱ་ཏ་མ་ཏྟཾ. ཀཱ་ཡེ་ན ཕུ་སི་ཏྭཱཏི ནཱ་མ་ཀཱ་ཡེ་ན ཕུ་སི་ཏྭཱ.
ཡཱ་ཙི་ཏོ་ཝ བ་ཧུ་ལཾ ཙཱི་ཝ་རཾ པ་རི་བྷུ་ཉྫ་ཏཱིཏི ‘‘ཨི་དཾ, བྷ་ནྟེ, པ་རི་བྷུ་ཉྫ་ཐཱ’’ཏི ཨེ་ཝཾ དཱ་ཡ་ཀེ་ཧི ཡཱ་ཙ་མཱ་ནེ་ཧེ་ཝ ཨུ་པ་ནཱི་ཏཾ ཙཱི་ཝ་རཾ བ་ཧུཾ པ་རི་བྷུ་ཉྫ་ཏི, ཀི་ཉྩི་དེ་ཝ ཨ་ཡཱ་ཙི་ཏཾ, བཱ་ཀུ་ལ་ཏྠེ་རོ ཝི་ཡ. པི་ཎྜ་པཱ་ཏཾ ཁ་དི་ར་ཝ་ན་མ་གྒེ སཱི་ཝ་ལི་ཏྠེ་རོ ཝི་ཡ. སེ་ནཱ་ས་ནཾ ཨ་ཊྛ་ཀ་ནཱ་ག་ར་སུ་ཏྟེ (མ. ནི. ༢.༡༧ ཨཱ་ད་ཡོ; ཨ. ནི. ༡༡.༡༦ ཨཱ་ད་ཡོ) ཨཱ་ན་ནྡ་ཏྠེ་རོ ཝི་ཡ. གི་ལཱ་ན་པ་ཙྩ་ཡཾ པི་ལི་ནྡ་ཝ་ཙྪ་ཐེ་རོ ཝི་ཡ. ཏྱ་སྶཱཏི ཏེ ཨ་སྶ. མ་ནཱ་པེ་ནེ་ཝཱཏི མ་ནཾ ཨ་ལླཱི་ཡ་ན་ཀེ་ན. ས་མུ་དཱ་ཙ་ར་ནྟཱིཏི ཀ་ཏྟ་བྦ་ཀི་ཙྩཱ་ནི ཀ་རོ་ནྟི པ་ཝ་ཏྟ་ནྟི ཝཱ. ཨུ་པ་ཧཱ་རཾ ཨུ་པ་ཧ་ར་ནྟཱིཏི ཀཱ་ཡི་ཀ་ཙེ་ཏ་སི་ཀ་ཨུ་པ་ཧཱ་རཾ ཨུ་པ་ཧ་ར་ནྟི ཨུ་པ་ནཱི་ཡ་ནྟི. ས་ནྣི་པཱ་ཏི་ཀཱ་ནཱིཏི ཏི་ཎྞ་མྤི ས་ནྣི་པཱ་ཏེ་ན ནི་བྦ་ཏྟཱ་ནི. ཨུ་ཏུ་པ་རི་ཎཱ་མ་ཛཱ་ནཱིཏི ཨུ་ཏུ་པ་རི་ཎཱ་མ་ཏོ ཨ་ཏི་སཱི་ཏ་ཨ་ཏི་ཨུ་ཎྷ་ཨུ་ཏུ་ཏོ ཛཱ་ཏཱ་ནི. ཝི་ས་མ་པ་རི་ཧཱ་ར་ཛཱ་ནཱིཏི ཨ་ཙྩཱ་ས་ན་ཨ་ཏི་ཊྛཱ་ནཱ་དི་ཀཱ ཝི་ས་མ་པ་རི་ཧཱ་ར་ཏོ ཛཱ་ཏཱ་ནི. ཨོ་པ་ཀྐ་མི་ཀཱ་ནཱིཏི ཝ་དྷ་བ་ནྡྷ་ནཱ་དི་ཨུ་པ་ཀྐ་མེ་ན ནི་བྦ་ཏྟཱ་ནི. ཀ་མྨ་ཝི་པཱ་ཀ་ཛཱ་ནཱིཏི ཝི་ནཱ་པི ཨི་མེ་ཧི ཀཱ་ར་ཎེ་ཧི ཀེ་ཝ་ལཾ པུ་བྦེ ཀ་ཏ་ཀ་མྨ་ཝི་པཱ་ཀ་ཝ་སེ་ནེ་ཝ ཛཱ་ཏཱ་ནི. ཙ་ཏུ་ནྣཾ ཛྷཱ་ནཱ་ནནྟི ཨེ་ཏྠ ཁཱི་ཎཱ་ས་ཝཱ་ན་མྤི བུ་དྡྷཱ་ན་མྤི ཀི་རི་ཡ་ཛ྄ཛྷཱ་ནཱ་ནེ་ཝ ཨ་དྷི་པྤེ་ཏཱ་ནི. སེ་སཾ ཨུ་ཏྟཱ་ན་ཏྠ་མེ་ཝཱ་ཏི.
༨. སཾ་ཡོ་ཛ་ན་སུ་ཏྟ་ཝ་ཎྞ་ནཱ
༨༨. ཨ་ཊྛ་མེ སཱ་ས་ནེ ལ་དྡྷ་པྤ་ཏི་ཊྛ་ཏྟཱ སོ་ཏཱ་པ་ནྣོ་ཝ ས་མ་ཎ་མ་ཙ་ལོཏི ཝུ་ཏྟོ, ནཱ་ཏི་བ་ཧུ་གུ་ཎ་ཏྟཱ ན བ་ཧུ་པ་ཏྟཾ ཝི་ཡ ས་རོ་རུ་ཧཾ ས་ཀ་དཱ་གཱ་མཱི ས་མ་ཎ་པུ་ཎྜ་རཱི་ཀོཏི, ཏ་ཏོ བ་ཧུ་ཏ་ར་གུ་ཎ་ཏྟཱ ས་ཏ་པ་ཏྟཾ ཝི་ཡ ས་རོ་རུ་ཧཾ ཨ་ནཱ་གཱ་མཱི ས་མ་ཎ་པ་དུ་མོཏི, ཐ་དྡྷ་བྷཱ་ཝ་ཀ་རཱ་ནཾ ཀི་ལེ་སཱ་ནཾ ས་བྦ་སོ ས་མུ་ཙྪི་ནྣ་ཏྟཱ མུ་དུ་བྷཱ་ཝ་པྤ་ཏྟོ ཁཱི་ཎཱ་ས་ཝོ ས་མ་ཎ་སུ་ཁུ་མཱ་ལོཏི.
༩. ས་མྨཱ་དི་ཊྛི་སུ་ཏྟ་ཝ་ཎྞ་ནཱ
༨༩. ན་ཝ་མེ ས་མྨཱ་དི་ཊྛི་ཀོཏི་ཨཱ་དཱི་ཧི ཨ་ཊྛ་ངྒི་ཀ་མ་གྒ་ཝ་སེ་ན པ་ཋ་མ་སུ་ཏྟེ ཝི་ཡ ས་ཏྟ སེ་ཁཱ ག་ཧི་ཏཱ. དུ་ཏི་ཡ་ཝཱ་རེ ད་ས་ངྒི་ཀ་མ་གྒ་ཝ་སེ་ན ཝཱ ཨ་ར་ཧ་ཏྟ་ཕ་ལ་ཉཱ་ཎ་ཨ་ར་ཧ་ཏྟ་ཕ་ལ་ཝི་མུ་ཏྟཱི་ཧི ས་དྡྷིཾ, ཨ་ཊྛ་ངྒི་ཀ་མ་གྒ་ཝ་སེ་ན ཝཱ སུ་ཀྑ་ཝི་པ་སྶ་ཀ་ཁཱི་ཎཱ་ས་ཝོ ཀ་ཐི་ཏོ, ཏ་ཏི་ཡ་ཝཱ་རེ ཨུ་བྷ་ཏོ་བྷཱ་ག་ཝི་མུ་ཏྟོ, ཙ་ཏུ་ཏྠ་ཝཱ་རེ ཏ་ཐཱ་ག་ཏོ ཙ ཏ་ཐཱ་ག་ཏ་ས་དི་ས་ཁཱི་ཎཱ་ས་ཝོ ཙཱ་ཏི. ཨི་ཏི ཨི་དཾ སུ་ཏྟཾ པ་ཋ་མ་སུ་ཏྟེ ཀ་ཐི་ཏ་པུ་གྒ་ལཱ་ནཾ ཝ་སེ་ནེ་ཝ ཀ་ཐི་ཏཾ, དེ་ས་ནཱ་མ་ཏྟ་མེ་ཝ པ་ནེ་ཏྠ ནཱ་ན་ནྟི.
༡༠. ཁ་ནྡྷ་སུ་ཏྟ་ཝ་ཎྞ་ནཱ
༩༠. ད་ས་མེ པ་ཋ་མ་ཝཱ་རེ ཨ་ར་ཧ་ཏྟ་ཏྠཱ་ཡ པ་ཡོ་གཾ ཨ་ནཱ་ར་བྷི་ཏྭཱ ཋི་ཏོ པ་མཱ་ད་ཝི་ཧཱ་རཱི སེ་ཁ་པུ་གྒ་ལོ ཀ་ཐི་ཏོ. དུ་ཏི་ཡ་ཝཱ་རེ ཨ་ནུ་པྤཱ་དི་ཏ་ཛ྄ཛྷཱ་ནོ ཨཱ་ར་དྡྷ་ཝི་པ་སྶ་ཀོ ཨ་པྤ་མཱ་ད་ཝི་ཧཱ་རཱི སེ་ཁ་པུ་གྒ་ལོ ཀ་ཐི་ཏོ. ཏ་ཏི་ཡ་ཝཱ་རེ ཨཱ་ར་དྡྷ་ཝི་པ་སྶ་ཀོ ཨ་པྤ་མཱ་ད་ཝི་ཧཱ་རཱི ཨ་ཊྛ་ཝི་མོ་ཀྑ་ལཱ་བྷཱི སེ་ཁ་པུ་གྒ་ལོ ཀ་ཐི་ཏོ, ཙ་ཏུ་ཏྠ་ཝཱ་རེ པ་ར་མ་སུ་ཁུ་མཱ་ལ་ཁཱི་ཎཱ་ས་ཝོ་ཏི.
མ་ཙ་ལ་ཝ་གྒོ ཙ་ཏུ་ཏྠོ.
(༡༠) ༥. ཨ་སུ་ར་ཝ་གྒོ
༡. ཨ་སུ་ར་སུ་ཏྟ་ཝ་ཎྞ་ནཱ
༩༡. པ་ཉྩ་མ་སྶ པ་ཋ་མེ ཨ་སུ་རོཏི ཨ་སུ་ར་ས་དི་སོ བཱི་བྷ་ཙྪོ. དེ་ཝོཏི དེ་ཝ་ས་དི་སོ གུ་ཎ་ཝ་སེ་ན ཨ་བྷི་རཱུ་པོ པཱ་སཱ་དི་ཀོ.
༢. པ་ཋ་མ་ས་མཱ་དྷི་སུ་ཏྟ་ཝ་ཎྞ་ནཱ
༩༢. དུ་ཏི་ཡེ ཨ་ཛ྄ཛྷ་ཏྟཾ ཙེ་ཏོ་ས་མ་ཐ་སྶཱཏི ནི་ཡ་ཀ་ཛ྄ཛྷ་ཏྟེ ཨ་པྤ་ནཱ་ཙི་ཏྟ་ས་མཱ་དྷི་སྶ. ཨ་དྷི་པ་ཉྙཱ་དྷ་མྨ་ཝི་པ་སྶ་ནཱ་ཡཱཏི ས་ངྑཱ་ར་པ་རི་གྒཱ་ཧ་ཀ་ཝི་པ་སྶ་ནཱ་ཉཱ་ཎ་སྶ. ཏ་ཉྷི ཨ་དྷི་པ་ཉྙཱ་ས་ངྑཱ་ཏ་ཉྩ, པ་ཉྩ་ཀྑ་ནྡྷ་ས་ངྑཱ་ཏེ་སུ ཙ དྷ་མྨེ་སུ ཝི་པ་སྶ་ནཱ་བྷཱུ་ཏཾ, ཏ་སྨཱ ‘‘ཨ་དྷི་པ་ཉྙཱ་དྷ་མྨ་ཝི་པ་སྶ་ནཱ’’ཏི ཝུ་ཙྩ་ཏཱི་ཏི.
༣. དུ་ཏི་ཡ་ས་མཱ་དྷི་སུ་ཏྟ་ཝ་ཎྞ་ནཱ
༩༣. ཏ་ཏི་ཡེ ཡོ་གོ ཀ་ར་ཎཱི་ཡོཏི ཡུ་ཏྟ་པྤ་ཡུ་ཏྟ་ཏཱ ཀ་ཏྟ་བྦཱ. ཚ་ནྡོཏི ཀ་ཏྟུ་ཀ་མྱ་ཏཱ་ཚ་ནྡོ. ཝཱ་ཡཱ་མོཏི པ་ཡོ་གོ. ཨུ་སྶཱ་ཧོཏི ཏ་ཏོ ཨ་དྷི་མ་ཏྟ་ཏ་རཾ ཝཱི་རི་ཡཾ. ཨུ་སྶོ་ལ༹ྷཱིཏི པ་ངྐ་ལ་གྒ་ས་ཀ་ཊ་ཨུ་དྡྷ་ར་ཎ་ས་དི་སཾ མ་ཧཱ་ཝཱི་རི་ཡཾ. ཨ་པྤ་ཊི་ཝཱ་ནཱིཏི ཨ་ནི་ཝ་ཏྟ་ན་ཏཱ.
༤. ཏ་ཏི་ཡ་ས་མཱ་དྷི་སུ་ཏྟ་ཝ་ཎྞ་ནཱ
༩༤. ཙ་ཏུ་ཏྠེ ཨེ་ཝཾ ཁོ, ཨཱ་ཝུ་སོ, ས་ངྑཱ་རཱ ད་ཊྛ་བྦཱཏི་ཨཱ་དཱི་སུ, ཨཱ་ཝུ་སོ, ས་ངྑཱ་རཱ ནཱ་མ ཨ་ནི་ཙྩ་ཏོ ད་ཊྛ་བྦཱ, ཨ་ནི་ཙྩ་ཏོ ས་མྨ་སི་ཏ་བྦཱ, ཨ་ནི་ཙྩ་ཏོ པ་སྶི་ཏ་བྦཱ. ཏ་ཐཱ དུ་ཀྑ་ཏོ, ཨ་ན་ཏྟ་ཏོ་ཏི ཨེ་ཝཾ ཨ་ཏྠོ ད་ཊྛ་བྦོ. ཨེ་ཝཾ ཁོ, ཨཱ་ཝུ་སོ, ཙི་ཏྟཾ ས་ཎྛ་པེ་ཏ་བྦནྟི་ཨཱ་དཱི་སུ་པི པ་ཋ་མ་ཛ྄ཛྷཱ་ན་ཝ་སེ་ན, ཨཱ་ཝུ་སོ, ཙི་ཏྟཾ ས་ཎྛ་པེ་ཏ་བྦཾ པ་ཋ་མ་ཛ྄ཛྷཱ་ན་ཝ་སེ་ན ས་ནྣི་སཱ་དེ་ཏ་བྦཾ, པ་ཋ་མ་ཛ྄ཛྷཱ་ན་ཝ་སེ་ན ཨེ་ཀོ་དི ཀཱ་ཏ་བྦཾ, པ་ཋ་མ་ཛ྄ཛྷཱ་ན་ཝ་སེ་ན ས་མཱ་ད་ཧི་ཏ་བྦཾ. ཏ་ཐཱ དུ་ཏི་ཡ་ཛ྄ཛྷཱ་ནཱ་དི་ཝ་སེ་ནཱ་ཏི ཨེ་ཝཾ ཨ་ཏྠོ ད་ཊྛ་བྦོ. ཨི་མེ་སུ ཏཱི་སུ་པི སུ་ཏྟེ་སུ ས་མ་ཐ་ཝི་པ་སྶ་ནཱ ལོ་ཀི་ཡ་ལོ་ཀུ་ཏྟ་རཱ་ཝ ཀ་ཐི་ཏཱ.
༥. ཚ་ཝཱ་ལཱ་ཏ་སུ་ཏྟ་ཝ་ཎྞ་ནཱ
༩༥. པ་ཉྩ་མེ ཚ་ཝཱ་ལཱ་ཏནྟི སུ་སཱ་ནེ ཨ་ལཱ་ཏཾ. མ་ཛ྄ཛྷེ གཱུ་ཐ་ག་ཏནྟི མ་ཛ྄ཛྷ་ཊྛཱ་ནེ གཱུ་ཐ་མ་ཀྑི་ཏཾ. ནེ་ཝ གཱ་མེ ཀ་ཊྛ་ཏྠཾ ཕ་ར་ཏཱིཏི ཀཱུ་ཊ་གོ་པཱ་ན་སི་ཐ་མྦྷ་སོ་པཱ་ནཱ་དཱི་ནཾ ཨ་ཏྠཱ་ཡ ཨ་ནུ་པ་ནེ་ཡྻ་ཏཱ་ཡ གཱ་མེ ན ཀ་ཊྛ་ཏྠཾ སཱ་དྷེ་ཏི, ཁེ་ཏྟ་ཀུ་ཊི་པཱ་དཾ ཝཱ མ་ཉྩ་པཱ་དཾ ཝཱ ཀཱ་ཏུཾ ཨ་ནུ་པ་ནེ་ཡྻ་ཏཱ་ཡ ན ཨ་ར་ཉྙེ ཀ་ཊྛ་ཏྠཾ སཱ་དྷེ་ཏི. དྭཱི་སུ ཀོ་ཊཱི་སུ ག་ཡ྄ཧ་མཱ་ནཾ ཧ་ཏྠཾ ཌ་ཧ་ཏི, མ་ཛ྄ཛྷེ ག་ཡ྄ཧ་མཱ་ནཾ གཱུ་ཐེ་ན མ་ཀྑེ་ཏི. ཏ་ཐཱུ་པ་མནྟི ཏཾ་ས་རི་ཀྑ་ཀཾ. ཨ་བྷི་ཀྐ་ནྟ་ཏ་རོཏི སུ་ནྡ་ར་ཏ་རོ. པ་ཎཱི་ཏ་ཏ་རོཏི ཨུ་ཏྟ་མ་ཏ་རོ. ག་ཝཱ ཁཱི་རནྟི གཱ་ཝི་ཏོ ཁཱི་རཾ. ཁཱི་ར་མྷཱ ད་དྷཱིཏི་ཨཱ་དཱི་སུ པ་རཾ པ་རཾ པུ་རི་མ་ཏོ པུ་རི་མ་ཏོ ཨ་གྒཾ, ས་པྤི་མ་ཎྜོ པ་ན ཏེ་སུ ས་བྦེ་སུ་པི ཨ་གྒ་མེ་ཝ. ཨ་གྒོཏི་ཨཱ་དཱི་སུ གུ་ཎེ་ཧི ཨ་གྒོ ཙེ་ཝ སེ་ཊྛོ ཙ པ་མུ་ཁོ ཙ ཨུ་ཏྟ་མོ ཙ པ་ཝ་རོ ཙཱ་ཏི ཝེ་དི་ཏ་བྦོ. ཚ་ཝཱ་ལཱ་ཏཱུ་པ་མཱ་ཡ ན དུ་སྶཱི་ལོ པུ་གྒ་ལོ ཀ་ཐི་ཏོ, ཨ་པྤ་སྶུ་ཏོ པ་ན ཝི་སྶ་ཊྛ་ཀ་མྨ་ནྟོ གོ་ཎ་ས་དི་སོ པུ་གྒ་ལོ ཀ་ཐི་ཏོ་ཏི ཝེ་དི་ཏ་བྦོ. ཚ་ཊྛེ ས་བྦཾ ཨུ་ཏྟཱ་ན་ཏྠ་མེ་ཝ.
༧. ཁི་པྤ་ནི་ས་ནྟི་སུ་ཏྟ་ཝ་ཎྞ་ནཱ
༩༧. ས་ཏྟ་མེ ཁི་པྤ་ནི་ས་ནྟཱིཏི ཁི་པྤ་ནི་སཱ་མ་ནོ སཱི་གྷཾ ཛཱ་ནི་ཏུཾ ས་མ་ཏྠོ. སུ་ཏཱ་ན་ཉྩ དྷ་མྨཱ་ནནྟི སུ་ཏ་པྤ་གུ་ཎཱ་ནཾ ཏ་ནྟི་དྷ་མྨཱ་ནཾ. ཨ་ཏྠཱུ་པ་པ་རི་ཀྑཱིཏི ཨ་ཏྠཾ ཨུ་པ་པ་རི་ཀྑ་ཀོ. ཨ་ཏྠ་མ་ཉྙཱ་ཡ དྷ་མྨ་མ་ཉྙཱ་ཡཱཏི ཨ་ཊྛ་ཀ་ཐ་ཉྩ པཱ་ལི༹་ཉྩ ཛཱ་ནི་ཏྭཱ. དྷ་མྨཱ་ནུ་དྷ་མྨ་པྤ་ཊི་པ་ནྣོ ཧོ་ཏཱིཏི ན་ཝ་ལོ་ཀུ་ཏྟ་ར་དྷ་མྨཱ་ནཾ ཨ་ནུ་རཱུ་པ་དྷ་མྨ་བྷཱུ་ཏཾ ས་སཱི་ལ་ཀཾ པུ་བྦ་བྷཱ་ག་པྤ་ཊི་པ་དཾ པ་ཊི་པ་ནྣོ ཧོ་ཏི. ནོ ཙ ཀ་ལྱཱ་ཎ་ཝཱ་ཙོཏི ན སུ་ནྡ་ར་ཝ་ཙ་ནོ. ན ཀ་ལྱཱ་ཎ་ཝཱ་ཀྐ་ར་ཎོཏི ན སུ་ནྡ་ར་ཝ་ཙ་ན་གྷོ་སོ ཧོ་ཏི. པོ་རི་ཡཱཏི་ཨཱ་དཱི་ཧི ས་དྡྷིཾ ནོ-ཀཱ་རོ ཡོ་ཛེ་ཏ་བྦོ་ཡེ་ཝ. གུ་ཎ་པ་རི་པུ་ཎྞཱ་ཡ ཨ་པ་ལི་བུ་དྡྷཱ་ཡ ཨ་དོ་སཱ་ཡ ཨ་ག་ལི༹་ཏ་པ་ད་བྱ་ཉྫ་ནཱ་ཡ ཨ་ཏྠཾ ཝི་ཉྙཱ་པེ་ཏུཾ ས་མ་ཏྠཱ་ཡ ཝཱ་ཙཱ་ཡ ས་མ་ནྣཱ་ག་ཏོ ན ཧོ་ཏཱི་ཏི ཨ་ཏྠོ. ཨི་མི་ནཱ ཨུ་པཱ་ཡེ་ན ས་བྦ་ཏྠ ཨ་ཏྠོ ཝེ་དི་ཏ་བྦོ.
༨. ཨ་ཏྟ་ཧི་ཏ་སུ་ཏྟ་ཝ་ཎྞ་ནཱ
༩༨-༩༩. ཨ་ཊྛ་མཾ པུ་གྒ་ལ་ཛ྄ཛྷཱ་ས་ཡ་ཝ་སེ་ནཱ་པི ད་ས་བ་ལ་སྶ དེ་ས་ནཱ་ཉཱ་ཎ་ཝི་ལཱ་སེ་ནཱ་པི ཀ་ཐི་ཏཾ, ན་ཝ་མཾ པ་ཉྩ་ཝེ་ར་ཝ་སེ་ན.
༡༠. པོ་ཏ་ལི་ཡ་སུ་ཏྟ་ཝ་ཎྞ་ནཱ
༡༠༠. ད་ས་མེ ཀཱ་ལེ་ནཱཏི ཡུ་ཏྟ་པྤ་ཏྟ་ཀཱ་ལེ་ན. ཁ་མ་ཏཱིཏི རུ་ཙྩ་ཏི. ཡ་དི་དཾ ཏ་ཏྠ ཏ་ཏྠ ཀཱ་ལ་ཉྙུ་ཏཱཏི ཡཱ ཨེ་སཱ ཏ་ཏྠ ཏ་ཏྠ ཀཱ་ལཾ ཛཱ་ན་ནཱ. ཏཾ ཏཾ ཀཱ་ལཾ ཉ་ཏྭཱ ཧི ཨ་ཝ་ཎྞཱ་ར་ཧ་སྶ ཨ་ཝ་ཎྞ་ཀ་ཐ་ནཾ ཝ་ཎྞཱ་ར་ཧ་སྶ ཙ ཝ་ཎྞ་ཀ་ཐ་ནཾ པ་ཎྜི་ཏཱ་ནཾ པ་ཀ་ཏཱི་ཏི ད་སྶེ་ཏི.
ཨ་སུ་ར་ཝ་གྒོ པ་ཉྩ་མོ.
དུ་ཏི་ཡ་པ་ཎྞཱ་ས་ཀཾ ནི་ཊྛི་ཏཾ.