༣. ཏ་ཏི་ཡ་པ་ཎྞཱ་ས་ཀཾ
(༡༡) ༡. ཝ་ལཱ་ཧ་ཀ་ཝ་གྒོ
༡-༢. ཝ་ལཱ་ཧ་ཀ་སུ་ཏྟ་དྭ་ཡ་ཝ་ཎྞ་ནཱ
༡༠༡-༢. ཏ་ཏི་ཡ་པ་ཎྞཱ་ས་ཀ་སྶ པ་ཋ་མེ ཝ་ལཱ་ཧ་ཀཱཏི མེ་གྷཱ. བྷཱ་སི་ཏཱ ཧོ་ཏི ནོ ཀ་ཏྟཱཏི ‘‘ཨི་ད་ཉྩི་ད་ཉྩ ཀ་རི་སྶཱ་མཱི’’ཏི ཀེ་ཝ་ལཾ བྷཱ་ས་ཏི་ཡེ་ཝ, ན ཀ་རོ་ཏི. ཀ་ཏྟཱ ཧོ་ཏི ནོ བྷཱ་སི་ཏཱཏི ཨ་ཀ་ཐེ་ཏྭཱ་ཝ ‘‘ཨི་ད་ཉྩི་ད་ཉྩ མ་ཡཱ ཀཱ་ཏུཾ ཝ་ཊྚ་ཏཱི’’ཏི ཀ་ཏྟཱ ཧོ་ཏི. ཨེ་ཝཾ ས་བྦ་ཏྠ ཨ་ཏྠོ ཝེ་དི་ཏ་བྦོ. དུ་ཏི་ཡཾ ཨུ་ཏྟཱ་ན་ཏྠ་མེ་ཝ.
༣. ཀུ་མྦྷ་སུ་ཏྟ་ཝ་ཎྞ་ནཱ
༡༠༣. ཏ་ཏི་ཡེ ཀུ་མྦྷཱཏི གྷ་ཊཱ. ཏུ་ཙྪོ པི་ཧི་ཏོཏི རི་ཏྟ་ཀོ པི་ཧི་ཏ་མུ་ཁོ. པཱུ་རོ ཝི་ཝ་ཊོཏི ཨུ་ད་ཀ་པུ་ཎྞོ ཨ་པཱ་རུ་ཏ་མུ་ཁོ. སེ་ས་དྭ་ཡེ་པི ཨེ་སེ་ཝ ན་ཡོ.
༤. ཨུ་ད་ཀ་ར་ཧ་ད་སུ་ཏྟ་ཝ་ཎྞ་ནཱ
༡༠༤. ཙ་ཏུ་ཏྠེ ཨུ་ཏྟཱ་ནོ ག་མྦྷཱི་རོ་བྷཱ་སོཏི་ཨཱ་དཱི་སུ པུ་རཱ་ཎ་པ་ཎྞ་ར་ས་ས་མྦྷི་ནྣ་ཝ་ཎྞོ ཀཱ་ལ༹་ཨུ་ད་ཀོ ག་མྦྷཱི་རོ་བྷཱ་སོ ནཱ་མ, ཨ་ཙྪ་ཝི་པྤ་ས་ནྣ་མ་ཎི་ཝ་ཎྞ་ཨུ་ད་ཀོ ཨུ་ཏྟཱ་ནོ་བྷཱ་སོ ནཱ་མ.
༥-༦. ཨ་མྦ་སུ་ཏྟ་ཝ་ཎྞ་ནཱ
༡༠༥-༦. པ་ཉྩ་མེ ཨཱ་མཾ པ་ཀྐ་ཝ་ཎྞཱིཏི ཨཱ་མ་ཀཾ ཧུ་ཏྭཱ ཨོ་ལོ་ཀེ་ནྟཱ་ནཾ པ་ཀྐ་ས་དི་སཾ ཁཱ་ཡ་ཏི. ཨེ་ཝཾ ས་བྦ་པ་དཱ་ནི ད་ཊྛ་བྦཱ་ནི. ཚ་ཊྛཾ ཨུ་ཏྟཱ་ན་ཏྠ་མེ་ཝ.
༧. མཱུ་སི་ཀ་སུ་ཏྟ་ཝ་ཎྞ་ནཱ
༡༠༧. ས་ཏྟ་མེ ཡོ ཨཱ་ཝཱ་ཊཾ ཁ་ཎ་ཏི, ན ཙ ཏ་ཏྠ ཝ་ས་ཏི, སོ གཱ་དྷཾ ཀ་ཏྟཱ ནོ ཝ་སི་ཏཱཏི ཝུ་ཙྩ་ཏི. ཁ་ནྟཱ་ཏི་པི པཱ་ཋོ. ཨི་མི་ནཱ ན་ཡེ་ན ས་བྦ་པ་དཱ་ནི ཝེ་དི་ཏ་བྦཱ་ནི.
༨. བ་ལཱི་བ་དྡ་སུ་ཏྟ་ཝ་ཎྞ་ནཱ
༡༠༨. ཨ་ཊྛ་མེ ཡོ ཨ་ཏྟ་ནོ གོ་ག་ཎཾ མ་དྡ་ཏི, ན པ་ར་གོ་ག་ཎཾ, ཨ་ཡཾ ས་ག་ཝ་ཙ་ཎྜོ ནོ པ་ར་ག་ཝ་ཙ་ཎྜོཏི ཨེ་ཝཾ ས་བྦ་པ་དཱ་ནི ཝེ་དི་ཏ་བྦཱ་ནི. ཨུ་བྦེ་ཛེ་ཏཱ ཧོ་ཏཱིཏི གྷ་ཊྚེ་ཏྭཱ ཝི་ཛ྄ཛྷི་ཏྭཱ ཨུ་བྦེ་ག་པ་ཏྟཾ ཀ་རོ་ཏི.
༩. རུ་ཀྑ་སུ་ཏྟ་ཝ་ཎྞ་ནཱ
༡༠༩. ན་ཝ་མེ ཕེ་གྒུ ཕེ་གྒུ་པ་རི་ཝཱ་རོཏི ནི་སྶཱ་རོ ཕེ་གྒུ་རུ་ཀྑོ ཕེ་གྒུ་རུ་ཀྑེ་ཧེ་ཝ པ་རི་ཝུ་ཏོ. སཱ་ར་པ་རི་ཝཱ་རོཏི ཁ་དི་རཱ་དཱི་ཧི སཱ་ར་རུ་ཀྑེ་ཧེ་ཝ པ་རི་ཝུ་ཏོ. ཨེ་ས ན་ཡོ ས་བྦ་ཏྠ.
༡༠. ཨཱ་སཱི་ཝི་ས་སུ་ཏྟ་ཝ་ཎྞ་ནཱ
༡༡༠. ད་ས་མེ ཨཱ་ག་ཏ་ཝི་སོ ན གྷོ་ར་ཝི་སོཏི ཡ་སྶ ཝི་སཾ ཨཱ་ག་ཙྪ་ཏི, གྷོ་རཾ པ་ན ན ཧོ་ཏི, ཙི་ར་ཀཱ་ལཾ ན པཱི་ལེ༹་ཏི. སེ་ས་པ་དེ་སུ་པི ཨེ་སེ་ཝ ན་ཡོ་ཏི.
ཝ་ལཱ་ཧ་ཀ་ཝ་གྒོ པ་ཋ་མོ.
(༡༢) ༢. ཀེ་སི་ཝ་གྒོ
༡. ཀེ་སི་སུ་ཏྟ་ཝ་ཎྞ་ནཱ
༡༡༡. དུ་ཏི་ཡ་སྶ པ་ཋ་མེ ཀེ་སཱིཏི ཏ་སྶ ནཱ་མཾ. ཨ་སྶ་ད་མྨེ སཱ་རེ་ཏཱི་ཏི ཨ་སྶ་ད་མྨ་སཱ་ར་ཐི. ས་ཎྷེ་ན་པི ཝི་ནེ་ཏཱིཏི་ཨཱ་དཱི་སུ ཏ་སྶ ཨ་ནུ་ཙྪ་ཝི་ཀཾ ས་ཀྐཱ་རཾ ཀ་ཏྭཱ སུ་བྷོ་ཛ་ནཾ བྷོ་ཛེ་ཏྭཱ མ་དྷུ་ར་པཱ་ནཾ པཱ་ཡེ་ཏྭཱ མུ་དུ་ཝ་ཙ་ནེ་ན ས་མུ་དཱ་ཙ་རི་ཏྭཱ ད་མེ་ནྟོ ས་ཎྷེ་ན ད་མེ་ཏི ནཱ་མ, ཛཱ་ཎུ་བ་ནྡྷ་ན་མུ་ཁ་བ་ནྡྷ་ནཱ་དཱི་ཧི ཙེ་ཝ པ་ཏོ་ད་ཝི་ཛ྄ཛྷ་ན་ཀ་སཱ་བྷི་གྷཱ་ཏ་ཕ་རུ་ས་ཝ་ཙ་ནེ་ཧི ཙ ད་མེ་ནྟོ ཕ་རུ་སེ་ན ད་མེ་ཏི ནཱ་མ, ཀཱ་ལེ་ན ཀཱ་ལཾ ཏ་དུ་བྷ་ཡཾ ཀ་རོ་ནྟོ ས་ཎྷ་ཕ་རུ་སེ་ན ད་མེ་ཏི ནཱ་མ.
༢. ཛ་ཝ་སུ་ཏྟ་ཝ་ཎྞ་ནཱ
༡༡༢. དུ་ཏི་ཡེ ཨ་ཛྫ་ཝེ་ནཱཏི ཨུ་ཛུ་ཀ་བྷཱ་ཝེ་ན. ཛ་ཝེ་ནཱཏི པ་ད་ཝེ་གེ་ན. ཁ་ནྟི་ཡཱཏི ཨ་དྷི་ཝཱ་ས་ན་ཀྑ་ནྟི་ཡཱ. སོ་ར་ཙྩེ་ནཱཏི སུ་ཙི་བྷཱ་ཝ་སཱི་ལེ་ན. པུ་གྒ་ལ་གུ་ཎ་ངྒེ་སུ ཛ་ཝེ་ནཱཏི ཉཱ་ཎ་ཛ་ཝེ་ན. སེ་ས་མེ་ཏྠ ཨུ་ཏྟཱ་ན་ཏྠ་མེ་ཝ.
༣. པ་ཏོ་ད་སུ་ཏྟ་ཝ་ཎྞ་ནཱ
༡༡༣. ཏ་ཏི་ཡེ པ་ཏོ་ད་ཙྪཱ་ཡནྟི ཝི་ཛ྄ཛྷ་ན་ཏྠཾ ཨུ་ཀྑི་ཏྟ་སྶ པ་ཏོ་ད་སྶ ཚཱ་ཡཾ. སཾ་ཝི་ཛྫ་ཏཱིཏི ‘‘ཛ་ཝོ མེ ག་ཧེ་ཏ་བྦོ’’ཏི ས་ལླ་ཀྑ་ཎ་ཝ་སེ་ན སཾ་ཝི་ཛྫ་ཏི. སཾ་ཝེ་གཾ ཨཱ་པ་ཛྫ་ཏཱིཏི སཾ་ཝེ་གཾ པ་ཊི་པ་ཛྫ་ཏི ལོ་མ་ཝེ་དྷ་ཝི་དྡྷོཏི ལོ་མ་ཀཱུ་པེ པ་ཏོ་ད་ཝེ་དྷེ་ན ཝི་དྡྷ་མ་ཏྟོ. ཙ་མྨ་ཝེ་དྷ་ཝི་དྡྷོཏི ཚ་ཝི་ཙ་མྨཾ ཚི་ནྡ་ནྟེ་ན པ་ཏོ་ད་ཝེ་དྷེ་ན ཝི་དྡྷོ. ཨ་ཊྛི་ཝེ་དྷ་ཝི་དྡྷོཏི ཨ་ཊྛིཾ བྷི་ནྡ་ནྟེ་ན ཝེ་དྷེ་ན ཝི་དྡྷོ. ཀཱ་ཡེ་ནཱཏི ནཱ་མ་ཀཱ་ཡེ་ན. པ་ར་མ་ས་ཙྩནྟི ནི་བྦཱ་ནཾ. ས་ཙྪི་ཀ་རོ་ཏཱིཏི པ་སྶ་ཏི. པ་ཉྙཱ་ཡཱཏི ས་ཧ་ཝི་པ་སྶ་ནཱ་ཡ མ་གྒ་པ་ཉྙཱ་ཡ.
༤. ནཱ་ག་སུ་ཏྟ་ཝ་ཎྞ་ནཱ
༡༡༤. ཙ་ཏུ་ཏྠེ ཨ་ཊྛིཾ ཀ་ཏྭཱཏི ཨ་ཊྛི་ཀོ ཧུ་ཏྭཱ. ཏི་ཎ་ཝ་ནི་ནྣཱ་ད་ས་དྡཱ་ནནྟི ཨེ་ཏྠ ཏི་ཎ་ཝོཏི ཌི་ཎྜི་མོ, ནི་ནྣཱ་ད་ས་དྡོཏི ས་བྦེ་ས་མྤི ཨེ་ཀ་ཏོ་མི་སྶི་ཏོ མ་ཧཱ་ས་དྡོ. ཌཾ་སཱ་དཱི་སུ ཌཾ་སཱཏི པི་ངྒ་ལ་མ་ཀྑི་ཀཱ, མ་ཀ་སཱ མ་ཀ་སཱ་ཝ. ཁི་པྤ་ཉྙེ་ཝ ག་ནྟཱ ཧོ་ཏཱིཏི སཱི་ལ་ས་མཱ་དྷི་པ་ཉྙཱ་ཝི་མུ་ཏྟི་ཝི་མུ་ཏྟི་ཉཱ་ཎ་ད་སྶ་ནཱ་ནི པཱུ་རེ་ཏྭཱ སཱི་གྷ་མེ་ཝ ག་ནྟཱ ཧོ་ཏི.
༥. ཋཱ་ན་སུ་ཏྟ་ཝ་ཎྞ་ནཱ
༡༡༥. པ་ཉྩ་མེ ཋཱ་ནཱ་ནཱིཏི ཀཱ་ར་ཎཱ་ནི. ཨ་ན་ཏྠཱ་ཡ སཾ་ཝ་ཏྟ་ཏཱིཏི ཨ་ཧི་ཏཱ་ཡ ཨ་ཝ་ཌྜྷི་ཡཱ སཾ་ཝ་ཏྟ་ཏི. ཨེ་ཏྠ ཙ པ་ཋ་མཾ ཨོ་པཱ་ཏ་ཀྑ་ཎ་ན་མ་ཙྪ་བ་ནྡྷ་ན་ས་ནྡྷི་ཙྪེ་ད་ནཱ་དི་བྷེ་དཾ ས་དུ་ཀྑཾ ས་ཝི་གྷཱ་ཏཾ པཱ་པ་ཀ་མྨཾ ཝེ་དི་ཏ་བྦཾ, དུ་ཏི་ཡཾ ས་མ་ཛཱི་ཝི་ཀཱ་ནཾ གི་ཧཱི་ནཾ པུ་པྥ་ཙྪ་ཌྜ་ཀཱ་དི་ཀ་མྨཾ སུ་དྷཱ་ཀོ་ཊྚ་ན-གེ་ཧ་ཙྪཱ་ད་ན་ཨ་སུ་ཙི་ཊྛཱ་ན་ས་མྨ་ཛྫ་ནཱ་དི་ཀ་མྨ་ཉྩ ཝེ་དི་ཏ་བྦཾ, ཏ་ཏི་ཡཾ སུ་རཱ་པཱ་ན་ག་ནྡྷ་ཝི་ལེ་པ་ན་མཱ་ལཱ་པི་ལ༹་ནྡྷ་ནཱ་དི་ཀ་མྨ་ཉྩེ་ཝ ཨ་སྶཱ་ད་ཝ་སེ་ན པ་ཝ་ཏྟཾ པཱ་ཎཱ་ཏི་པཱ་ཏཱ་དི་ཀ་མྨ་ཉྩ ཝེ་དི་ཏ་བྦཾ, ཙ་ཏུ་ཏྠཾ དྷ་མྨ་སྶ་ཝ་ན་ཏྠཱ་ཡ ག་མ་ན་ཀཱ་ལེ སུ་དྡྷ་ཝ་ཏྠ་ཙྪཱ་ད་ན-མཱ་ལཱ་ག་ནྡྷཱ་དཱི་ནཾ ཨཱ་དཱ་ཡ ག་མ་ནཾ ཙེ་ཏི་ཡ་ཝ་ནྡ་ནཾ བོ་དྷི་ཝ་ནྡ་ནཾ མ་དྷུ་ར་དྷ་མྨ་ཀ་ཐཱ་ས་ཝ་ནཾ པ་ཉྩ་སཱི་ལ་ས་མཱ་དཱ་ན་ནྟི ཨེ་ཝ་མཱ་དཱི་སུ སོ་མ་ན་སྶ་ས་མྤ་ཡུ་ཏྟཾ ཀུ་ས་ལ་ཀ་མྨཾ ཝེ་དི་ཏ་བྦཾ. པུ་རི་ས་ཐཱ་མེཏི པུ་རི་ས་སྶ ཉཱ་ཎ་ཐཱ་མ་སྨིཾ. སེ་ས་དྭ་ཡེ་པི ཨེ་སེ་ཝ ན་ཡོ.
༦. ཨ་པྤ་མཱ་ད་སུ་ཏྟ་ཝ་ཎྞ་ནཱ
༡༡༦. ཚ་ཊྛེ ཡ་ཏོ ཁོཏི ཡ་དཱ ཁོ. ས་མྤ་རཱ་ཡི་ཀ་སྶཱཏི དེ་ས་ནཱ་མ་ཏྟ་མེ་ཏཾ, ཁཱི་ཎཱ་ས་ཝོ པ་ན ནེ་ཝ ས་མྤ་རཱ་ཡི་ཀ་སྶ, ན དི་ཊྛ་དྷ་མྨི་ཀ་སྶ མ་ར་ཎ་སྶ བྷཱ་ཡ་ཏི. སོ་ཝ ཨི་དྷ ཨ་དྷི་པྤེ་ཏོ. ཀེ་ཙི པ་ན ‘‘ས་མྨཱ་དི་ཊྛི བྷཱ་ཝི་ཏཱ་ཏི ཝ་ཙ་ན་ཏོ སོ་ཏཱ་པ་ནྣཾ ཨཱ་དིཾ ཀ་ཏྭཱ ས་བྦེ་པི ཨ་རི་ཡཱ ཨ་དྷི་པྤེ་ཏཱ’’ཏི ཝ་ད་ནྟི.
༧. ཨཱ་ར་ཀྑ་སུ་ཏྟ་ཝ་ཎྞ་ནཱ
༡༡༧. ས་ཏྟ་མེ ཨ་ཏྟ་རཱུ་པེ་ནཱཏི ཨ་ཏྟ་ནོ ཨ་ནུ་རཱུ་པེ་ན ཨ་ནུ་ཙྪ་ཝི་ཀེ་ན, ཧི་ཏ་ཀཱ་མེ་ནཱ་ཏི ཨ་ཏྠོ. ར་ཛ་ནཱི་ཡེ་སཱུཏི རཱ་ག་སྶ པ་ཙྩ་ཡ་བྷཱུ་ཏེ་སུ. དྷ་མྨེ་སཱུཏི ས་བྷཱ་ཝེ་སུ, ཨི་ཊྛཱ་ར་མྨ་ཎེ་སཱུ་ཏི ཨ་ཏྠོ. ཨེ་ཝཾ ས་བྦ་ཏྠ ན་ཡོ ཝེ་དི་ཏ་བྦོ. ན ར་ཛྫ་ཏཱིཏི དི་ཊྛི་ཝ་སེ་ན ན ར་ཛྫ་ཏི. སེ་ས་པ་དེ་སུ་པི ཨེ་སེ་ཝ ན་ཡོ. ན ཙ པ་ན ས་མ་ཎ་ཝ་ཙ་ན་ཧེ་ཏུ་པི ག་ཙྪ་ཏཱིཏི ས་མ་ཎཱ་ནཾ པ་ར་ཝཱ་དཱི་ནཾ ཝ་ཙ་ན་ཧེ་ཏུ་པི ཨ་ཏྟ་ནོ དི་ཊྛིཾ པ་ཧཱ་ཡ ཏེ་སཾ དི་ཊྛི་ཝ་སེ་ན ན ག་ཙྪ་ཏཱི་ཏི ཨ་ཏྠོ. ཨི་དྷཱ་པི ཁཱི་ཎཱ་ས་ཝོ་ཝ ཨ་དྷི་པྤེ་ཏོ.
༨-༡༠. སཾ་ཝེ་ཛ་ནཱི་ཡཱ་དི་སུ་ཏྟ་ཏྟ་ཡ་ཝ་ཎྞ་ནཱ
༡༡༨-༡༢༠. ཨ་ཊྛ་མེ ད་སྶ་ནཱི་ཡཱ་ནཱིཏི པ་སྶི་ཏ་བྦ་ཡུ་ཏྟ་ཀཱ་ནི. སཾ་ཝེ་ཛ་ནཱི་ཡཱ་ནཱིཏི སཾ་ཝེ་ག་ཛ་ན་ཀཱ་ནི. ན་ཝ་མེ ཛཱ་ཏི་བྷ་ཡནྟི ཛཱ་ཏིཾ ཨཱ་ར་བྦྷ ཨུ་པྤ་ཛྫ་ན་ཀ་བྷ་ཡཾ. སེ་ས་པ་དེ་སུ་པི ཨེ་སེ་ཝ ན་ཡོ. ད་ས་མེ ཨ་གྒི་བྷ་ཡནྟི ཨ་གྒིཾ པ་ཊི་ཙྩ ཨུ་པྤ་ཛྫ་ན་ཀ་བྷ་ཡཾ. སེ་ས་པ་དེ་སུ་པི ཨེ་སེ་ཝ ན་ཡོ.
ཀེ་སི་ཝ་གྒོ དུ་ཏི་ཡོ.
(༡༣) ༣. བྷ་ཡ་ཝ་གྒོ
༡. ཨ་ཏྟཱ་ནུ་ཝཱ་ད་སུ་ཏྟ་ཝ་ཎྞ་ནཱ
༡༢༡. ཏ་ཏི་ཡ་སྶ པ་ཋ་མེ ཨ་ཏྟཱ་ནུ་ཝཱ་ད་བྷ་ཡནྟི ཨ་ཏྟཱ་ནཾ ཨ་ནུ་ཝ་ད་ནྟ་སྶ ཨུ་པྤ་ཛྫ་ན་ཀ་བྷ་ཡཾ. པ་རཱ་ནུ་ཝཱ་ད་བྷ་ཡནྟི པ་ར་སྶ ཨ་ནུ་ཝཱ་ད་ཏོ ཨུ་པྤ་ཛྫ་ན་ཀ་བྷ་ཡཾ. ད་ཎྜ་བྷ་ཡནྟི དྭ་ཏྟིཾ་ས ཀ་མྨ་ཀཱ་ར་ཎཱ པ་ཊི་ཙྩ ཨུ་པྤ་ཛྫ་ན་ཀ་བྷ་ཡཾ. དུ་གྒ་ཏི་བྷ་ཡནྟི ཙ་ཏྟཱ་རོ ཨ་པཱ་ཡེ པ་ཊི་ཙྩ ཨུ་པྤ་ཛྫ་ན་ཀ་བྷ་ཡཾ. ཨི་དཾ ཝུ་ཙྩ་ཏི, བྷི་ཀྑ་ཝེ, ཨ་ཏྟཱ་ནུ་ཝཱ་ད་བྷ་ཡནྟི་ཨཱ་དཱི་སུ ཨ་ཏྟཱ་ནུ་ཝཱ་ད་བྷ་ཡཾ ཏཱ་ཝ པ་ཙྩ་ཝེ་ཀྑ་ནྟ་སྶ ཨ་ཛ྄ཛྷ་ཏྟཾ ཧི་རཱི ས་མུ་ཊྛཱ་ཏི, སཱ་སྶ ཏཱི་སུ དྭཱ་རེ་སུ སཾ་ཝ་རཾ ཛ་ནེ་ཏི, ཏཱི་སུ དྭཱ་རེ་སུ སཾ་ཝ་རོ ཙ་ཏུ་པཱ་རི་སུ་དྡྷི་སཱི་ལཾ ཧོ་ཏི. སོ ཏ་སྨིཾ སཱི་ལེ པ་ཏི་ཊྛཱ་ཡ ཝི་པ་སྶ་ནཾ ཝ་ཌྜྷེ་ཏྭཱ ཨ་གྒ་ཕ་ལེ པ་ཏི་ཊྛཱ་ཏི. པ་རཱ་ནུ་ཝཱ་ད་བྷ་ཡཾ པ་ན པ་ཙྩ་ཝེ་ཀྑ་ནྟ་སྶ བ་ཧི་དྡྷཱ ཨོ་ཏྟ་པྤཾ ས་མུ་ཊྛཱ་ཏི, ཏ་ད་སྶ ཏཱི་སུ དྭཱ་རེ་སུ སཾ་ཝ་རཾ ཛ་ནེ་ཏི, ཏཱི་སུ དྭཱ་རེ་སུ སཾ་ཝ་རོ ཙ་ཏུ་པཱ་རི་སུ་དྡྷི་སཱི་ལཾ ཧོ་ཏི. སོ ཏ་སྨིཾ སཱི་ལེ པ་ཏི་ཊྛཱ་ཡ ཝི་པ་སྶ་ནཾ ཝ་ཌྜྷེ་ཏྭཱ ཨ་གྒ་ཕ་ལེ པ་ཏི་ཊྛཱ་ཏི. དུ་གྒ་ཏི་བྷ་ཡཾ པ་ཙྩ་ཝེ་ཀྑ་ནྟ་སྶ ཨ་ཛ྄ཛྷ་ཏྟཾ ཧི་རཱི ས་མུ་ཊྛཱ་ཏི, སཱ་སྶ ཏཱི་སུ དྭཱ་རེ་སུ སཾ་ཝ་རཾ ཛ་ནེ་ཏི, ཏཱི་སུ དྭཱ་རེ་སུ སཾ་ཝ་རོ ཙ་ཏུ་པཱ་རི་སུ་དྡྷི་སཱི་ལཾ ཧོ་ཏི. སོ ཏ་སྨིཾ སཱི་ལེ པ་ཏི་ཊྛཱ་ཡ ཝི་པ་སྶ་ནཾ ཝ་ཌྜྷེ་ཏྭཱ ཨ་གྒ་ཕ་ལེ པ་ཏི་ཊྛཱ་ཏི.
༢. ཨཱུ་མི་བྷ་ཡ་སུ་ཏྟ་ཝ་ཎྞ་ནཱ
༡༢༢. དུ་ཏི་ཡེ ཨུ་ད་ཀོ་རོ་ཧ་ནྟ་སྶཱཏི ཨུ་ད་ཀཾ ཨོ་ཏ་ར་ནྟ་སྶ. པཱ་ཊི་ཀ་ངྑི་ཏ་བྦཱ་ནཱིཏི ཨི་ཙྪི་ཏ་བྦཱ་ནི. སུ་སུ་ཀཱ་བྷ་ཡནྟི ཙ་ཎྜ་མ་ཙྪ་བྷ་ཡཾ. མུ་ཁཱ་ཝ་ར་ཎཾ མ་ཉྙེ ཀ་རོ་ནྟཱིཏི མུ་ཁ་པི་ད་ཧ་ནཾ ཝི་ཡ ཀ་རོ་ནྟི. ཨོ་ད་རི་ཀ་ཏྟ་སྶཱཏི མ་ཧོ་ད་ར་ཏཱ་ཡ མ་ཧ་གྒྷ་ས་བྷཱ་ཝ་སྶ. ཨ་ར་ཀྑི་ཏེ་ནེ་ཝ ཀཱ་ཡེ་ནཱཏི་ཨཱ་དཱི་སུ ཀཱ་ཡ་དྭཱ་རེ ཏི་ཝི་དྷ་སྶ སཾ་ཝ་ར་སྶ ཨ་བྷཱ་ཝ་ཏོ ཨ་ར་ཀྑི་ཏེ་ན ཀཱ་ཡེ་ན. ཝ་ཙཱི་དྭཱ་རེ ཙ་ཏུ་བྦི་དྷ་སྶ སཾ་ཝ་ར་སྶ ཨ་བྷཱ་ཝ་ཏོ ཨ་ར་ཀྑི་ཏཱ་ཡ ཝཱ་ཙཱ་ཡ.
༣. པ་ཋ་མ་ནཱ་ནཱ་ཀ་ར་ཎ་སུ་ཏྟ་ཝ་ཎྞ་ནཱ
༡༢༣. ཏ་ཏི་ཡེ ཏ་ད་སྶཱ་དེ་ཏཱིཏི ཏཾ ཛྷཱ་ནཾ སུ་ཁ་སྶཱ་དེ་ན ཨ་སྶཱ་དེ་ཏི. ནི་ཀཱ་མེ་ཏཱིཏི པ་ཏྠེ་ཏི. ཝི་ཏྟིཾ ཨཱ་པ་ཛྫ་ཏཱིཏི ཏུ་ཊྛིཾ ཨཱ་པ་ཛྫ་ཏི. ཏ་ད་དྷི་མུ་ཏྟོཏི ཏ་སྨིཾ ཨ་དྷི་མུ་ཏྟོ, ཏཾ ཝཱ ཨ་དྷི་མུ་ཏྟོ. ཏ་བྦ་ཧུ་ལ་ཝི་ཧཱ་རཱིཏི ཏེ་ན ཛྷཱ་ནེ་ན བ་ཧུ་ལཾ ཝི་ཧ་ར་ནྟོ. ས་ཧ་བྱ་ཏཾ ཨུ་པ་པ་ཛྫ་ཏཱིཏི ས་ཧ་བྷཱ་ཝཾ ག་ཙྪ་ཏི, ཏ་ཏྠ ནི་བྦ་ཏྟ་ཏཱི་ཏི ཨ་ཏྠོ. ཀ་པྤོ ཨཱ་ཡུ་པྤ་མཱ་ཎནྟི ཨེ་ཏྠ པ་ཋ་མ་ཛ྄ཛྷཱ་ནཾ ཨ་ཏྠི ཧཱི་ནཾ, ཨ་ཏྠི མ་ཛ྄ཛྷི་མཾ, ཨ་ཏྠི པ་ཎཱི་ཏཾ. ཏ་ཏྠ ཧཱི་ནེ་ན ཨུ་པྤ་ནྣཱ་ནཾ ཀ་པྤ་སྶ ཏ་ཏི་ཡོ ཀོ་ཊྛཱ་སོ ཨཱ་ཡུ་པྤ་མཱ་ཎཾ, མ་ཛ྄ཛྷི་མེ་ན ཨུ་པ་ཌྜྷ་ཀ་པྤོ, པ་ཎཱི་ཏེ་ན ཀ་པྤོ. ཏཾ ས་ནྡྷཱ་ཡེ་ཏཾ ཝུ་ཏྟཾ. ནི་ར་ཡ་མྤི ག་ཙྪ་ཏཱིཏི ནི་ར་ཡ་ག་མ་ནཱི་ཡ་སྶ ཀ་མྨ་སྶ ཨ་པྤ་ཧཱི་ན་ཏྟཱ ཨ་པ་རཱ་པ་རཾ ག་ཙྪ་ཏི, ན ཨ་ན་ནྟ་ར་མེ་ཝ. ཏ་སྨིཾ་ཡེ་ཝ བྷ་ཝེ པ་རི་ནི་བྦཱ་ཡ་ཏཱིཏི ཏ་སྨིཾ་ཡེ་ཝ རཱུ་པ་བྷ་ཝེ ཋ་ཏྭཱ པ་རི་ནི་བྦཱ་ཡ་ཏི, ན ཧེ་ཊྛཱ ཨོ་ཏ་ར་ཏི. ཡ་དི་དཾ ག་ཏི་ཡཱ ཨུ་པ་པ་ཏྟི་ཡཱ ས་ཏཱིཏི ཡཾ ཨི་དཾ ག་ཏི་ཡཱ ཙ ཨུ་པ་པ་ཏྟི་ཡཱ ཙ ས་ཏི སེ་ཁ་སྶ ཨ་རི་ཡ་སཱ་ཝ་ཀ་སྶ པ་ཊི་ས་ནྡྷི་ཝ་སེ་ན ཧེ་ཊྛཱ ཨ་ནོ་ཏ་རི་ཏྭཱ ཏ་སྨིཾ་ཡེ་ཝ རཱུ་པ་བྷ་ཝེ ཨུ་པ་རི དུ་ཏི་ཡ་ཏ་ཏི་ཡཱ་དཱི་སུ ཨ་ཉྙ་ཏ་ར་སྨིཾ བྲ་ཧྨ་ལོ་ཀེ པ་རི་ནི་བྦཱ་ནཾ, པུ་ཐུ་ཛྫ་ན་སྶ པ་ན ནི་ར་ཡཱ་དི་ག་མ་ནཾ, ཨི་དཾ ནཱ་ནཱ་ཀ་ར་ཎ་ནྟི ཨ་ཏྠོ.
དྭེ ཀ་པྤཱཏི ཨེ་ཏྠཱ་པི དུ་ཏི་ཡ་ཛ྄ཛྷཱ་ནཾ ཝུ་ཏྟ་ན་ཡེ་ནེ་ཝ ཏི་ཝི་དྷཾ ཧོ་ཏི. ཏ་ཏྠ པ་ཎཱི་ཏ་བྷཱ་ཝ་ནེ་ན ནི་བྦ་ཏྟཱ་ནཾ ཨ་ཊྛ་ཀ་པྤཱ ཨཱ་ཡུ་པྤ་མཱ་ཎཾ, མ་ཛ྄ཛྷི་མེ་ན ཙ་ཏྟཱ་རོ, ཧཱི་ནེ་ན དྭེ. ཏཾ ས་ནྡྷཱ་ཡེ་ཏཾ ཝུ་ཏྟཾ. ཙ་ཏྟཱ་རོ ཀ་པྤཱཏི ཨེ་ཏྠ ཡཾ ཧེ་ཊྛཱ ཝུ་ཏྟཾ ‘‘ཀ་པྤོ, དྭེ ཀ་པྤཱ’’ཏི, ཏ་མྤི ཨཱ་ཧ་རི་ཏྭཱ ཨ་ཏྠོ ཝེ་དི་ཏ་བྦོ. ཀ་པྤོ་ཏི ཙ གུ་ཎ་སྶ་པི ནཱ་མཾ, ཏ་སྨཱ ཀ་པྤོ དྭེ ཀ་པྤཱ ཙ་ཏྟཱ་རོ ཀ་པྤཱ་ཏི ཨ་ཡ་མེ་ཏྠ ཨ་ཏྠོ ད་ཊྛ་བྦོ. ཨི་དཾ ཝུ་ཏྟཾ ཧོ་ཏི – ཡོ པ་ཋ་མཾ ཝུ་ཏྟོ ཀ་པྤོ, སོ དྭེ ཝཱ་རེ ག་ཎེ་ཏྭཱ ཨེ་ཀེ་ན གུ་ཎེ་ན དྭེ ཀ་པྤཱ ཧོ་ནྟི, དུ་ཏི་ཡེ་ན ཙ་ཏྟཱ་རོ, པུ་ན ཏེ ཙ་ཏྟཱ་རོ ཀ་པྤཱ་ཏི ཨི་མེ་ཧི ཙ་ཏཱུ་ཧི གུ་ཎེ་ཧི གུ་ཎི་ཏཱ ཨེ་ཀེ་ན གུ་ཎེ་ན ཨ་ཊྛ ཧོ་ནྟི, དུ་ཏི་ཡེ་ན སོ་ལ༹་ས, ཏ་ཏི་ཡེ་ན དྭ་ཏྟིཾ་ས, ཙ་ཏུ་ཏྠེ་ན ཙ་ཏུ་ས་ཊྛཱི་ཏི. ཨེ་ཝ་མི་དྷ པ་ཎཱི་ཏ་ཛ྄ཛྷཱ་ན་ཝ་སེ་ན ཙ་ཏུ་ས་ཊྛི ཀ་པྤཱ ག་ཧི་ཏཱ་ཏི ཝེ་དི་ཏ་བྦཱ. པ་ཉྩ ཀ་པྤ་ས་ཏཱ་ནཱིཏི ཨི་དཾ པ་ཎཱི་ཏ་སྶེ་ཝ ཨུ་པ་པ་ཏྟི་ཛ྄ཛྷཱ་ན་སྶ ཝ་སེ་ན ཝུ་ཏྟཾ. ཝེ་ཧ་པྥ་ལེ་སུ ཝཱ པ་ཋ་མ་ཛ྄ཛྷཱ་ན་བྷཱུ་མི་ཨཱ་དཱི་སུ ཝི་ཡ ཏི་ཎྞཾ བྲ་ཧྨ་ལོ་ཀཱ་ནཾ ཨ་བྷཱ་ཝ་ཏོ ཨེ་ཏྟ་ཀ་མེ་ཝ ཨཱ་ཡུ་པྤ་མཱ་ཎཾ. ཏ་སྨཱ ཨེ་ཝཾ ཝུ་ཏྟཾ.
༤. དུ་ཏི་ཡ་ནཱ་ནཱ་ཀ་ར་ཎ་སུ་ཏྟ་ཝ་ཎྞ་ནཱ
༡༢༤. ཙ་ཏུ་ཏྠེ རཱུ་པ་མེ་ཝ རཱུ་པ་ག་ཏཾ. སེ་ས་པ་དེ་སུ་པི ཨེ་སེ་ཝ ན་ཡོ. ཨ་ནི་ཙྩ་ཏོཏི་ཨཱ་དཱི་སུ ཧུ་ཏྭཱ ཨ་བྷཱ་ཝ་ཊྛེ་ན ཨ་ནི་ཙྩ་ཏོ, ཨཱ་བཱ་དྷ་ཊྛེ་ན རོ་ག་ཏོ, ཨ་ནྟོ པ་དུ་སྶ་ན་ཊྛེ་ན ག་ཎྜ་ཏོ, ཨ་ནུ་པ་ཝི་ཊྛ་ཊྛེ་ན ས་ལླ་ཏོ, ས་དུ་ཀྑ་ཊྛེ་ན ཨ་གྷ་ཏོ, ས་མྤཱི་ལ༹་ན་ཊྛེ་ན ཨཱ་བཱ་དྷ་ཏོ, ཨ་ཝི་དྷེ་ཡྻ་ཊྛེ་ན པ་ར་ཏོ, པ་ལུ་ཛྫ་ན་ཊྛེ་ན པ་ལོ་ཀ་ཏོ, ནི་སྶ་ཏྟ་ཊྛེ་ན སུ་ཉྙ་ཏོ, ཨ་ཝ་ས་ཝ་ཏྟ་ན་ཊྛེ་ན ཨ་ན་ཏྟ་ཏོ. ཨེ་ཏྠ ཙ ‘‘ཨ་ནི་ཙྩ་ཏོ པ་ལོ་ཀ་ཏོ’’ཏི དྭཱི་ཧི པ་དེ་ཧི ཨ་ནི་ཙྩ་ལ་ཀྑ་ཎཾ ཀ་ཐི་ཏཾ, ‘‘སུ་ཉྙ་ཏོ ཨ་ན་ཏྟ་ཏོ’’ཏི དྭཱི་ཧི ཨ་ན་ཏྟ་ལ་ཀྑ་ཎཾ, སེ་སེ་ཧི དུ་ཀྑ་ལ་ཀྑ་ཎཾ ཀ་ཐི་ཏ་ནྟི ཝེ་དི་ཏ་བྦཾ. ས་མ་ནུ་པ་སྶ་ཏཱིཏི ཉཱ་ཎེ་ན པ་སྶ་ཏི. ཨེ་ཝཾ པ་ཉྩ་ཀྑ་ནྡྷེ ཏི་ལ་ཀྑ་ཎཾ ཨཱ་རོ་པེ་ཏྭཱ པ་སྶ་ནྟོ ཏ་ཡོ མ་གྒེ ཏཱི་ཎི ཕ་ལཱ་ནི ས་ཙྪི་ཀ་རོ་ཏི. སུ་དྡྷཱ་ཝཱ་སཱ་ནཾ དེ་ཝཱ་ནཾ ས་ཧ་བྱ་ཏཾ ཨུ་པ་པ་ཛྫ་ཏཱིཏི ཏ་ཏྠ ཋི་ཏོ ཙ་ཏུ་ཏྠ་ཛ྄ཛྷཱ་ནཾ བྷཱ་ཝེ་ཏྭཱ ཨུ་པ་པ་ཛྫ་ཏི.
༥-༦. མེ་ཏྟཱ་སུ་ཏྟ་དྭ་ཡ་ཝ་ཎྞ་ནཱ
༡༢༥-༡༢༦. པ་ཉྩ་མེ པ་ཋ་མ་ཛ྄ཛྷཱ་ན་ཝ་སེ་ན མེ་ཏྟཱ, དུ་ཏི་ཡཱ་དི་ཝ་སེ་ན ཀ་རུ་ཎཱ་ད་ཡོ ད་སྶི་ཏཱ. ཚ་ཊྛཾ ཙ་ཏུ་ཏྠེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ.
༧. པ་ཋ་མ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༢༧. ས་ཏྟ་མེ པཱ་ཏུ་བྷཱ་ཝཱཏི པཱ་ཏུ་བྷཱ་ཝེ་ན. ཀུ་ཙྪིཾ ཨོ་ཀྐ་མ་ཏཱིཏི ཨེ་ཏྠ ཀུ་ཙྪིཾ ཨོ་ཀྐ་ནྟོ ཧོ་ཏཱི་ཏི ཨ་ཏྠོ. ཨོ་ཀྐ་ནྟེ ཧི ཏ་སྨིཾ ཨེ་ཝཾ ཧོ་ཏི, ན ཨོ་ཀྐ་མ་མཱ་ནེ. ཨ་པྤ་མཱ་ཎོཏི ཝུ་ཌྜྷི་པྤ་མཱ་ཎོ, ཝི་པུ་ལོ་ཏི ཨ་ཏྠོ. ཨུ་ལཱ༹་རོཏི ཏ་སྶེ་ཝ ཝེ་ཝ་ཙ་ནཾ. དེ་ཝཱ་ནཾ དེ་ཝཱ་ནུ་བྷཱ་ཝནྟི ཨེ་ཏྠ དེ་ཝཱ་ནཾ ཨ་ཡ་མཱ་ནུ་བྷཱ་ཝོ – ནི་ཝ་ཏྠ་ཝ་ཏྠ་སྶ པ་བྷཱ དྭཱ་ད་ས ཡོ་ཛ་ནཱ་ནི ཕ་ར་ཏི, ཏ་ཐཱ ས་རཱི་ར་སྶ, ཏ་ཐཱ ཝི་མཱ་ན་སྶ, ཏཾ ཨ་ཏི་ཀྐ་མི་ཏྭཱ་ཏི ཨ་ཏྠོ. ལོ་ཀ་ནྟ་རི་ཀཱཏི ཏི་ཎྞཾ ཏི་ཎྞཾ ཙ་ཀྐ་ཝཱ་ལཱ༹་ནཾ ཨ་ནྟ་རཱ ཨེ་ཀེ་ཀོ ལོ་ཀ་ནྟ་རི་ཀོ ཧོ་ཏི, ཏི་ཎྞཾ ས་ཀ་ཊ་ཙ་ཀྐཱ་ནཾ པ་ཏྟཱ་ནཾ ཝཱ ཨ་ཉྙ་མ་ཉྙཾ ཨཱ་ཧ་ཙྩ ཋ་པི་ཏཱ་ནཾ མ་ཛ྄ཛྷེ ཨོ་ཀཱ་སོ ཝི་ཡ. སོ པ་ན ལོ་ཀ་ནྟ་རི་ཀ་ནི་ར་ཡོ པ་རི་མཱ་ཎ་ཏོ ཨ་ཊྛ་ཡོ་ཛ་ན་ས་ཧ་སྶ་པྤ་མཱ་ཎོ ཧོ་ཏི. ཨ་གྷཱཏི ནི་ཙྩ་ཝི་ཝ་ཊཱ. ཨ་སཾ་ཝུ་ཏཱཏི ཧེ་ཊྛཱ་པི ཨ་པྤ་ཏི་ཊྛཱ. ཨ་ནྡྷ་ཀཱ་རཱཏི ཏ་མ་བྷཱུ་ཏཱ. ཨ་ནྡྷ་ཀཱ་ར་ཏི་མི་སཱཏི ཙ་ཀྑུ་ཝི་ཉྙཱ་ཎུ་པྤ་ཏྟི་ནི་ཝཱ་ར་ཎ་ཏོ ཨ་ནྡྷ་བྷཱ་ཝ་ཀ་ར་ཎ་ཏི་མི་སཱ་ཡ ས་མ་ནྣཱ་ག་ཏཱ. ཏ་ཏྠ ཀི་ར ཙ་ཀྑུ་ཝི་ཉྙཱ་ཎཾ ན ཛཱ་ཡ་ཏི. ཨེ་ཝཾ་མ་ཧི་དྡྷི་ཀཱ་ནནྟི ཙ་ནྡི་མ་སཱུ་རི་ཡཱ ཀི་ར ཨེ་ཀ་པྤ་ཧཱ་རེ་ནེ་ཝ ཏཱི་སུ དཱི་པེ་སུ པ་ཉྙཱ་ཡ་ནྟི, ཨེ་ཝཾ་མ་ཧི་དྡྷི་ཀཱ. ཨེ་ཀེ་ཀཱ་ཡ དི་སཱ་ཡ ན་ཝ ན་ཝ ཡོ་ཛ་ན་ས་ཏ་ས་ཧ་སྶཱ་ནི ཨ་ནྡྷ་ཀཱ་རཾ ཝི་དྷ་མི་ཏྭཱ ཨཱ་ལོ་ཀཾ ད་སྶེ་ནྟི, ཨེ་ཝཾ་མ་ཧཱ་ནུ་བྷཱ་ཝཱ. ཨཱ་བྷཱ ནཱ་ནུ་བྷོ་ནྟཱིཏི པ་བྷཱ ན་པྤ་ཧོ་ནྟི. ཏེ ཀི་ར ཙ་ཀྐ་ཝཱ་ལ༹་པ་བྦ་ཏ་སྶ ཝེ་མ་ཛ྄ཛྷེ་ན ཙ་ར་ནྟི ཙ་ཀྐ་ཝཱ་ལ༹་པ་བྦ་ཏ་ཉྩ ཨ་ཏི་ཀྐ་མི་ཏྭཱ ལོ་ཀ་ནྟ་ར་ནི་ར་ཡཱ. ཏ་སྨཱ ཏེ་སཾ ཏ་ཏྠ ཨཱ་བྷཱ ན་པྤ་ཧོ་ནྟི.
ཡེ་པི ཏ་ཏྠ ས་ཏྟཱཏི ཡེ་པི ཏ་སྨིཾ ལོ་ཀ་ནྟ་ར་མ་ཧཱ་ནི་ར་ཡེ ས་ཏྟཱ ཨུ་པ་པ་ནྣཱ. ཀིཾ པ་ན ཀ་མྨཾ ཀ་ཏྭཱ ཏ་ཏྠ ཨུ་པྤ་ཛྫ་ནྟཱི་ཏི? བྷཱ་རི་ཡཾ དཱ་རུ་ཎཾ མཱ་ཏཱ་པི་ཏཱུ་ནཾ དྷ་མྨི་ཀ་ས་མ་ཎ་བྲཱ་ཧྨ་ཎཱ་ན་ཉྩ ཨུ་པ་རི ཨ་པ་རཱ་དྷཾ, ཨ་ཉྙ་ཉྩ དི་ཝ་སེ དི་ཝ་སེ པཱ་ཎ་ཝ་དྷཱ་དི་སཱ་ཧ་སི་ཀ་ཀ་མྨཾ ཀ་ཏྭཱ ཨུ་པྤ་ཛྫ་ནྟི ཏ་མྦ་པ་ཎྞི་དཱི་པེ ཨ་བྷ་ཡ་ཙོ་ར་ནཱ་ག་ཙོ་རཱ་ད་ཡོ ཝི་ཡ. ཏེ་སཾ ཨ་ཏྟ་བྷཱ་ཝོ ཏི་གཱ་ཝུ་ཏི་ཀོ ཧོ་ཏི, ཝ་གྒུ་ལཱི་ནཾ ཝི་ཡ དཱི་གྷ་ན་ཁཱ ཧོ་ནྟི. ཏེ རུ་ཀྑེ ཝ་གྒུ་ལི་ཡོ ཝི་ཡ ན་ཁེ་ཧི ཙ་ཀྐ་ཝཱ་ལ༹་པ་བྦ་ཏ་པཱ་དེ ལ་གྒ་ནྟི. ཡ་དཱ སཾ་ས་པྤ་ནྟཱ ཨ་ཉྙ་མ་ཉྙ་སྶ ཧ་ཏྠ་པཱ་ས་ག་ཏཱ ཧོ་ནྟི, ཨ་ཐ ‘‘བྷ་ཀྑོ ནོ ལ་དྡྷོ’’ཏི མ་ཉྙ་མཱ་ནཱ ཏ་ཏྠ བྱཱ་ཝ་ཊཱ ཝི་པ་རི་ཝ་ཏྟི་ཏྭཱ ལོ་ཀ་ས་ནྡྷཱ་ར་ཀ་ཨུ་ད་ཀེ པ་ཏ་ནྟི, ཝཱ་ཏེ པ་ཧ་ར་ནྟེ་པི མ་དྷུ་ཀ་ཕ་ལཱ་ནི ཝི་ཡ ཚི་ཛྫི་ཏྭཱ ཨུ་ད་ཀེ པ་ཏ་ནྟི, པ་ཏི་ཏ་མ་ཏྟཱ་ཝ ཨ་ཙྩ་ནྟ་ཁཱ་རེ ཨུ་ད་ཀེ པི་ཊྛ་པི་ཎྜི ཝི་ཡ ཝི་ལཱི་ཡ་ནྟི. ཨ་ཉྙེ་པི ཀི་ར བྷོ ས་ནྟི ས་ཏྟཱཏི བྷོ ཡ་ཐཱ མ་ཡཾ མ་ཧཱ་དུ་ཀྑཾ ཨ་ནུ་བྷ་ཝཱ་མ, ཨེ་ཝཾ ཨ་ཉྙེ་པི ཀི་ར ས་ཏྟཱ ཨི་དཾ དུ་ཀྑཾ ཨ་ནུ་བྷ་ཝ་ན་ཏྠཱ་ཡ ཨི་དྷཱུ་པ་པ་ནྣཱ་ཏི ཏཾ་དི་ཝ་སཾ པ་སྶ་ནྟི. ཨ་ཡཾ པ་ན ཨོ་བྷཱ་སོ ཨེ་ཀ་ཡཱ་གུ་པཱ་ན་མ་ཏྟ་མྤི ན ཏི་ཊྛ་ཏི. ཡཱ་ཝ་ཏཱ ནི་དྡཱ་ཡི་ཏྭཱ པ་བུ་དྡྷོ ཨཱ་ར་མྨ་ཎཾ ཝི་བྷཱ་ཝེ་ཏི, ཏ་ཏྟ་ཀཾ ཀཱ་ལཾ ཧོ་ཏི. དཱི་གྷ་བྷཱ་ཎ་ཀཱ པ་ན ‘‘ཨ་ཙྪ་རཱ་ས་ངྒྷཱ་ཏ་མ་ཏྟ་མེ་ཝ ཝི་ཛྫུ་ཨོ་བྷཱ་སོ ཝི་ཡ ནི་ཙྪ་རི་ཏྭཱ ཀིཾ ཨི་ད་ནྟི བྷ་ཎ་ནྟཱ་ནཾ་ཡེ་ཝ ཨ་ནྟ་ར་དྷཱ་ཡ་ཏཱི’’ཏི ཝ་ད་ནྟི.
༨. དུ་ཏི་ཡ་ཏ་ཐཱ་ག་ཏ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༢༨. ཨ་ཊྛ་མེ ཏ་ཎྷཱ་དི་ཊྛཱི་ཧི ཨ་ལླཱི་ཡི་ཏ་བྦ་ཊྛེ་ན ཨཱ་ལ་ཡོ་ཏི པ་ཉྩ ཀཱ་མ་གུ་ཎཱ, ས་ཀ་ལ་མེ་ཝ ཝཱ ཝ་ཊྚཾ. ཨཱ་ར་མ་ནྟི ཨེ་ཏྠཱ་ཏི ཨཱ་རཱ་མོ, ཨཱ་ལ་ཡོ ཨཱ་རཱ་མོ ཨེ་ཏི་སྶཱ་ཏི ཨཱ་ལ་ཡཱ་རཱ་མཱ. ཨཱ་ལ་ཡེ ར་ཏཱ་ཏི ཨཱ་ལ་ཡ་ར་ཏཱ. ཨཱ་ལ་ཡེ ས་མྨུ་དི་ཏཱ་ཏི ཨཱ་ལ་ཡ་ས་མྨུ་དི་ཏཱ. ཨ་ནཱ་ལ་ཡེ དྷ་མྨེཏི ཨཱ་ལ་ཡ་པ་ཊི་པ་ཀྑེ ཝི་ཝ་ཊྚཱུ་པ་ནི་སྶི་ཏེ ཨ་རི་ཡ་དྷ་མྨེ. སུ་སྶཱུ་ས་ཏཱིཏི སོ་ཏུ་ཀཱ་མོ ཧོ་ཏི. སོ་ཏཾ ཨོ་ད་ཧ་ཏཱིཏི སོ་ཏཾ ཋ་པེ་ཏི. ཨ་ཉྙཱ ཙི་ཏྟཾ ཨུ་པ་ཊྛ་པེ་ཏཱིཏི ཨཱ་ཛཱ་ན་ན་ཏྠཱ་ཡ ཙི་ཏྟཾ པ་ཙྩུ་པ་ཊྛ་པེ་ཏི. མཱ་ནོཏི མ་ཉྙ་ནཱ, མ་ཉྙི་ཏ་བྦ་ཊྛེ་ན ཝཱ ས་ཀ་ལཾ ཝ་ཊྚ་མེ་ཝ. མཱ་ན་ཝི་ན་ཡེ དྷ་མྨེཏི མཱ་ན་ཝི་ན་ཡ་དྷ་མྨེ. ཨུ་པ་ས་མ་པ་ཊི་པ་ཀྑོ ཨ་ནུ་པ་ས་མོ, ཨ་ནུ་པ་ས་ནྟ་ཊྛེ་ན ཝཱ ཝ་ཊྚ་མེ་ཝ ཨ་ནུ་པ་ས་མོ ནཱ་མ. ཨོ་པ་ས་མི་ཀེཏི ཨུ་པ་ས་མ་ཀ་རེ ཝི་ཝ་ཊྚཱུ་པ་ནི་སྶི་ཏེ. ཨ་ཝི་ཛྫཱ་ཡ ག་ཏཱ ས་མ་ནྣཱ་ག་ཏཱ་ཏི ཨ་ཝི་ཛྫཱ་ག་ཏཱ. ཨ་ཝི་ཛྫ་ཎྜ་ཀོ་སེ་ན པ་རི་ཡོ་ན་དྡྷ་ཏྟཱ ཨ་ཎྜཾ ཝི་ཡ བྷཱུ་ཏཱ་ཏི ཨ་ཎྜ་བྷཱུ་ཏཱ. ས་མ་ནྟ་ཏོ ཨོ་ན་དྡྷཱ་ཏི པ་རི་ཡོ་ན་དྡྷཱ. ཨ་ཝི་ཛྫཱ་ཝི་ན་ཡེཏི ཨ་ཝི་ཛྫཱ་ཝི་ན་ཡོ ཝུ་ཙྩ་ཏི ཨ་ར་ཧ་ཏྟཾ, ཏཾ་ནི་སྶི་ཏེ དྷ་མྨེ དེ་སི་ཡ་མཱ་ནེ་ཏི ཨ་ཏྠོ. ཨི་ཏི ཨི་མ་སྨིཾ སུ་ཏྟེ ཙ་ཏཱུ་སུ ཋཱ་ནེ་སུ ཝ་ཊྚཾ, ཙ་ཏཱུ་སུ ཝི་ཝ་ཊྚཾ ཀ་ཐི་ཏཾ.
༩. ཨཱ་ན་ནྡ་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༢༩. ན་ཝ་མེ བྷི་ཀྑུ་པ་རི་སཱ ཨཱ་ན་ནྡཾ ད་སྶ་ནཱ་ཡཱཏི ཡེ བྷ་ག་ཝ་ནྟཾ པ་སྶི་ཏུ་ཀཱ་མཱ ཐེ་རཾ ཨུ་པ་ས་ངྐ་མ་ནྟི, ཡེ ཝཱ ‘‘ཨཱ་ཡ་སྨཱ ཀི་རཱ་ན་ནྡོ ས་མ་ནྟ་པཱ་སཱ་དི་ཀོ ཨ་བྷི་རཱུ་པོ ད་སྶ་ནཱི་ཡོ བ་ཧུ་སྶུ་ཏོ ས་ངྒྷ་སོ་བྷ་ནོ’’ཏི ཐེ་ར་སྶ གུ་ཎེ སུ་ཏྭཱ ཨཱ་ག་ཙྪ་ནྟི, ཏེ ས་ནྡྷཱ་ཡ ‘‘བྷི་ཀྑུ་པ་རི་སཱ ཨཱ་ན་ནྡཾ ད་སྶ་ནཱ་ཡ ཨུ་པ་ས་ངྐ་མ་ཏཱི’’ཏི ཝུ་ཏྟཾ. ཨེ་ས ན་ཡོ ས་བྦ་ཏྠ. ཨ་ཏྟ་མ་ནཱཏི ‘‘ས་ཝ་ནེ་ན ནོ ད་སྶ་ནཾ ས་མེ་ཏཱི’’ཏི ས་ཀ་མ་ནཱ ཏུ་ཊྛ་ཙི་ཏྟཱ. དྷ་མྨནྟི ‘‘ཀ་ཙྩི, ཨཱ་ཝུ་སོ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི ཡོ་ནི་སོ་མ་ན་སི་ཀཱ་ར་ཀ་མྨཾ ཀ་རོ་ཐ, ཨཱ་ཙ་རི་ཡུ་པ་ཛ྄ཛྷཱ་ཡ་ཝ་ཏྟཾ པཱུ་རེ་ཐཱ’’ཏི ཨེ་ཝ་རཱུ་པཾ པ་ཊི་ས་ནྠཱ་ར་དྷ་མྨཾ. ཏ་ཏྠ བྷི་ཀྑུ་ནཱི་སུ ‘‘ཀ་ཙྩི, བྷ་གི་ནི་ཡོ, ཨ་ཊྛ ག་རུ་དྷ་མྨེ ས་མཱ་དཱ་ཡ ཝ་ཏྟ་ཐཱ’’ཏི ཨི་ད་མྤི ནཱ་ནཱ་ཀ་ར་ཎཾ ཧོ་ཏི. ཨུ་པཱ་ས་ཀེ་སུ ‘‘སྭཱ་ག་ཏཾ, ཨུ་པཱ་ས་ཀ, ན ཏེ ཀི་ཉྩི སཱི་སཾ ཝཱ ཨ་ངྒཾ ཝཱ རུ་ཛྫ་ཏི, ཨ་རོ་གཱ ཏེ པུ་ཏྟ་བྷཱ་ཏ་རོ’’ཏི ན ཨེ་ཝཾ པ་ཊི་ས་ནྠཱ་རཾ ཀ་རོ་ཏི, ཨེ་ཝཾ པ་ན ཀ་རོ་ཏི – ‘‘ཀ་ཐཾ, ཨུ་པཱ་ས་ཀཱ, ཏཱི་ཎི ས་ར་ཎཱ་ནི པ་ཉྩ སཱི་ལཱ་ནི ར་ཀྑ་ཐ, མཱ་ས་སྶ ཨ་ཊྛ ཨུ་པོ་ས་ཐེ ཀ་རོ་ཐ, མཱ་ཏཱ་པི་ཏཱུ་ནཾ ཨུ་པ་ཊྛཱ་ན་ཝ་ཏྟཾ པཱུ་རེ་ཐ, དྷ་མྨི་ཀ་ས་མ་ཎ་བྲཱ་ཧྨ་ཎེ པ་ཊི་ཛ་གྒ་ཐཱ’’ཏི. ཨུ་པཱ་སི་ཀཱ་སུ་པི ཨེ་སེ་ཝ ན་ཡོ.
༡༠. ཙ་ཀྐ་ཝ་ཏྟི་ཨ་ཙྪ་རི་ཡ་སུ་ཏྟ་ཝ་ཎྞ་ནཱ
༡༣༠. ད་ས་མེ ཁ་ཏྟི་ཡ་པ་རི་སཱཏི ཨ་བྷི་སི་ཏྟཱ ཨ་ན་བྷི་སི་ཏྟཱ ཙ ཁ་ཏྟི་ཡཱ. ཏེ ཧི ཀི་ར ‘‘རཱ་ཛཱ ཙ་ཀྐ་ཝ་ཏྟཱི ནཱ་མ ཨ་བྷི་རཱུ་པོ པཱ་སཱ་དི་ཀོ ཧོ་ཏི, ཨཱ་ཀཱ་སེ་ན ཝི་ཙ་ར་ནྟོ ར་ཛྫཾ ཨ་ནུ་སཱ་ས་ཏི, དྷ་མྨི་ཀོ དྷ་མྨ་རཱ་ཛཱ’’ཏི ཏ་སྶ གུ་ཎ་ཀ་ཐཾ སུ་ཏྭཱ ས་ཝ་ནེ་ན ད་སྶ་ན་མྷི ས་མེ་ནྟེ ཨ་ཏྟ་མ་ནཱ ཧོ་ནྟི. བྷཱ་ས་ཏཱིཏི ‘‘ཀ་ཐཾ, ཏཱ་ཏཱ, རཱ་ཛ་དྷ་མྨཾ པཱུ་རེ་ཐ, པ་ཝེ་ཎིཾ ར་ཀྑ་ཐཱ’’ཏི པ་ཊི་ས་ནྠཱ་རཾ ཀ་རོ་ཏི. བྲཱ་ཧྨ་ཎེ་སུ པ་ན ‘‘ཀ་ཐ་ཉྩ, ཨཱ་ཙ་རི་ཡཱ, མ་ནྟེ ཝཱ་ཙེ་ཐ, ཨ་ནྟེ་ཝཱ་སི་ཀཱ མ་ནྟེ ག་ཎྷ་ནྟི, ད་ཀྑི་ཎཾ ཝཱ ཝ་ཏྠཱ་ནི ཝཱ སཱི་ལཾ ཝཱ ལ་བྷ་ཐཱ’’ཏི ཨེ་ཝཾ པ་ཊི་ས་ནྠཱ་རཾ ཀ་རོ་ཏི. ག་ཧ་པ་ཏཱི་སུ ‘‘ཀ་ཐཾ, ཏཱ་ཏཱ, ན ཝོ རཱ་ཛ་ཀུ་ལ་ཏོ ད་ཎྜེ་ན ཝཱ བ་ནྡྷ་ནེ་ན ཝཱ པཱི་ལཱ༹ ཨ་ཏྠི, ས་མྨཱ དེ་ཝོ དྷཱ་རཾ ཨ་ནུ་པྤ་ཝེ་ཙྪ་ཏི, ས་སྶཱ་ནི ས་མྤ་ཛྫ་ནྟཱི’’ཏི ཨེ་ཝཾ པ་ཊི་ས་ནྠཱ་རཾ ཀ་རོ་ཏི. ས་མ་ཎེ་སུ ‘‘ཀ་ཐཾ, བྷ་ནྟེ, ཀ་ཙྩི པ་བྦ་ཛི་ཏ་པ་རི་ཀྑཱ་རཱ སུ་ལ་བྷཱ, ས་མ་ཎ་དྷ་མྨེ ན་པྤ་མ་ཛྫ་ཐཱ’’ཏི ཨེ་ཝཾ པ་ཊི་ས་ནྠཱ་རཾ ཀ་རོ་ཏཱི་ཏི.
བྷ་ཡ་ཝ་གྒོ ཏ་ཏི་ཡོ.
(༡༤) ༤. པུ་གྒ་ལ་ཝ་གྒོ
༡. སཾ་ཡོ་ཛ་ན་སུ་ཏྟ་ཝ་ཎྞ་ནཱ
༡༣༡. ཙ་ཏུ་ཏྠ་སྶ པ་ཋ་མེ ཨུ་པ་པ་ཏྟི་པ་ཊི་ལཱ་བྷི་ཡཱ་ནཱིཏི ཡེ་ཧི ཨ་ན་ནྟ་རཱ ཨུ་པ་པ་ཏྟིཾ པ་ཊི་ལ་བྷ་ཏི. བྷ་ཝ་པ་ཊི་ལཱ་བྷི་ཡཱ་ནཱིཏི ཨུ་པ་པ་ཏྟི་བྷ་ཝ་སྶ པ་ཊི་ལཱ་བྷཱ་ཡ པ་ཙྩ་ཡཱ་ནི. ས་ཀ་དཱ་གཱ་མི་སྶཱཏི ཨི་དཾ ཨ་པྤ་ཧཱི་ན་སཾ་ཡོ་ཛ་ནེ་སུ ཨ་རི་ཡེ་སུ ཨུ་ཏྟ་མ་ཀོ་ཊི་ཡཱ ག་ཧི་ཏཾ. ཡ་སྨཱ པ་ན ཨ་ནྟ་རཱ་པ་རི་ནི་བྦཱ་ཡི་སྶ ཨ་ནྟ་རཱ ཨུ་པ་པ་ཏྟི ན་ཏྠི, ཡཾ པ་ན སོ ཏ་ཏྠ ཛྷཱ་ནཾ ས་མཱ་པ་ཛྫ་ཏི, ཏཾ ཀུ་ས་ལ་ཏྟཱ ‘‘ཨུ་པ་པ་ཏྟི་བྷ་ཝ་སྶ པ་ཙྩ་ཡོ’’ ཏེ་ཝ ས་ངྑྱཾ ག་ཙྪ་ཏི. ཏ་སྨཱ་སྶ ‘‘ཨུ་པ་པ་ཏྟི་པ་ཊི་ལཱ་བྷི་ཡཱ་ནི སཾ་ཡོ་ཛ་ནཱ་ནི པ་ཧཱི་ནཱ་ནི, བྷ་ཝ་པ་ཊི་ལཱ་བྷི་ཡཱ་ནི སཾ་ཡོ་ཛ་ནཱ་ནི ཨ་པྤ་ཧཱི་ནཱ་ནཱི’’ཏི ཝུ་ཏྟཾ. ཨོ་ར་མྦྷཱ་གི་ཡེ་སུ ཙ ཨ་པྤ་ཧཱི་ནཾ ཨུ་པཱ་དཱ་ཡ ས་ཀ་དཱ་གཱ་མི་སྶ ཨ་ཝི་སེ་སེ་ན ‘‘ཨོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི ཨ་པྤ་ཧཱི་ནཱ་ནཱི’’ཏི ཝུ་ཏྟཾ. སེ་ས་མེ་ཏྠ ཨུ་ཏྟཱ་ན་མེ་ཝ.
༢. པ་ཊི་བྷཱ་ན་སུ་ཏྟ་ཝ་ཎྞ་ནཱ
༡༣༢. དུ་ཏི་ཡེ ཡུ་ཏྟ་པྤ་ཊི་བྷཱ་ནོ ནོ མུ་ཏྟ་པྤ་ཊི་བྷཱ་ནོཏི པ་ཉྷཾ ཀ་ཐེ་ནྟོ ཡུ་ཏྟ་མེ་ཝ ཀ་ཐེ་ཏི, སཱི་གྷཾ པ་ན ན ཀ་ཐེ་ཏི, ས་ཎི་ཀ་མེ་ཝ ཀ་ཐེ་ཏཱི་ཏི ཨ་ཏྠོ. ཨི་མི་ནཱ ན་ཡེ་ན ས་བྦ་པ་དཱ་ནི ཝེ་དི་ཏ་བྦཱ་ནི.
༣. ཨུ་གྒྷ་ཊི་ཏ་ཉྙཱུ་སུ་ཏྟ་ཝ་ཎྞ་ནཱ
༡༣༣. ཏ་ཏི་ཡེ ཙ་ཏུ་ནྣ་མྤི པུ་གྒ་ལཱ་ནཾ ཨི་མི་ནཱ སུ་ཏྟེ་ན ཝི་སེ་སོ ཝེ་དི་ཏ་བྦོ –
‘‘ཀ་ཏ་མོ ཙ པུ་གྒ་ལོ ཨུ་གྒྷ་ཊི་ཏ་ཉྙཱུ, ཡ་སྶ པུ་གྒ་ལ་སྶ ས་ཧ ཨུ་དཱ་ཧ་ཊ་ཝེ་ལཱ་ཡ དྷ་མྨཱ་བྷི་ས་མ་ཡོ ཧོ་ཏི, ཨ་ཡཾ ཝུ་ཙྩ་ཏི པུ་གྒ་ལོ ཨུ་གྒྷ་ཊི་ཏ་ཉྙཱུ. ཀ་ཏ་མོ ཙ པུ་གྒ་ལོ ཝི་པ་ཉྩི་ཏ་ཉྙཱུ, ཡ་སྶ པུ་གྒ་ལ་སྶ ཝི་ཏྠཱ་རེ་ན ཨ་ཏྠེ ཝི་བྷ་ཛི་ཡ་མཱ་ནེ དྷ་མྨཱ་བྷི་ས་མ་ཡོ ཧོ་ཏི, ཨ་ཡཾ ཝུ་ཙྩ་ཏི པུ་གྒ་ལོ ཝི་པ་ཉྩི་ཏ་ཉྙཱུ. ཀ་ཏ་མོ ཙ པུ་གྒ་ལོ ནེ་ཡྻོ, ཡ་སྶ པུ་གྒ་ལ་སྶ ཨུ་དྡེ་ས་ཏོ པ་རི་པུ་ཙྪ་ཏོ ཡོ་ནི་སོ་མ་ན་སི་ཀ་རོ་ཏོ ཀ་ལྱཱ་ཎ་མི་ཏྟེ སེ་ཝ་ཏོ བྷ་ཛ་ཏོ པ་ཡི་རུ་པཱ་ས་ཏོ ཨ་ནུ་པུ་བྦེ་ན དྷ་མྨཱ་བྷི་ས་མ་ཡོ ཧོ་ཏི, ཨ་ཡཾ ཝུ་ཙྩ་ཏི པུ་གྒ་ལོ ནེ་ཡྻོ. ཀ་ཏ་མོ ཙ པུ་གྒ་ལོ པ་ད་པ་ར་མོ, ཡ་སྶ པུ་གྒ་ལ་སྶ བ་ཧུ་མྤི སུ་ཎ་ཏོ བ་ཧུ་མྤི བྷ་ཎ་ཏོ བ་ཧུ་མྤི དྷཱ་ར་ཡ་ཏོ བ་ཧུ་མྤི ཝཱ་ཙ་ཡ་ཏོ ན ཏཱ་ཡ ཛཱ་ཏི་ཡཱ དྷ་མྨཱ་བྷི་ས་མ་ཡོ ཧོ་ཏི, ཨ་ཡཾ ཝུ་ཙྩ་ཏི པུ་གྒ་ལོ པ་ད་པ་ར་མོ’’ཏི (པུ. པ. ༡༤༨-༡༥༡).
༤. ཨུ་ཊྛཱ་ན་ཕ་ལ་སུ་ཏྟ་ཝ་ཎྞ་ནཱ
༡༣༤. ཙ་ཏུ་ཏྠེ ཨུ་ཊྛཱ་ན་ཝཱི་རི་ཡེ་ནེ་ཝ དི་ཝ་སཾ ཝཱི་ཏི་ནཱ་མེ་ཏྭཱ ཏ་སྶ ནི་སྶ་ནྡ་ཕ་ལ་མ་ཏྟཾ ཀི་ཉྩི་དེ་ཝ ལ་བྷི་ཏྭཱ ཛཱི་ཝི་ཀཾ ཀ་པྤེ་ཏི, ཏཾ པ་ན ཨུ་ཊྛཱ་ནཾ ཨཱ་ག་མྨ ཀི་ཉྩི པུ་ཉྙ་ཕ་ལཾ ན་པྤ་ཊི་ལ་བྷ་ཏི, ཨ་ཡཾ ཨུ་ཊྛཱ་ན་ཕ་ལཱུ་པ་ཛཱི་ཝཱི ན ཀ་མྨ་ཕ་ལཱུ་པ་ཛཱི་ཝཱི ནཱ་མ. ཙཱ་ཏུ་མ་ཧཱ་རཱ་ཛི་ཀེ པ་ན དེ་ཝེ ཨཱ་དིཾ ཀ་ཏྭཱ ས་བྦེ་པི དེ་ཝཱ ཨུ་ཊྛཱ་ན་ཝཱི་རི་ཡེ་ན ཝི་ནཱ པུ་ཉྙ་ཕ་ལ་སྶེ་ཝ ཨུ་པ་ཛཱི་ཝ་ན་ཏོ ཀ་མྨ་ཕ་ལཱུ་པ་ཛཱི་ཝི་ནོ ན ཨུ་ཊྛཱ་ན་ཕ་ལཱུ་པ་ཛཱི་ཝི་ནོ ནཱ་མ. རཱ་ཛ་རཱ་ཛ་མ་ཧཱ་མ་ཏྟཱ་ད་ཡོ ཨུ་ཊྛཱ་ན་ཕ་ལཱུ་པ་ཛཱི་ཝི་ནོ ཙ ཀ་མྨ་ཕ་ལཱུ་པ་ཛཱི་ཝི་ནོ ཙ. ནེ་ར་ཡི་ཀ་ས་ཏྟཱ ནེ་ཝ ཨུ་ཊྛཱ་ན་ཕ་ལཱུ་པ་ཛཱི་ཝི་ནོ ན ཀ་མྨ་ཕ་ལཱུ་པ་ཛཱི་ཝི་ནོ. ཨི་མ་སྨིཾ སུ་ཏྟེ པུ་ཉྙ་ཕ་ལ་མེ་ཝ ཀ་མྨ་ཕ་ལ་ནྟི ཨ་དྷི་པྤེ་ཏཾ, ཏ་ཉྩ ཏེ་སཾ ན་ཏྠི.
༥. སཱ་ཝ་ཛྫ་སུ་ཏྟ་ཝ་ཎྞ་ནཱ
༡༣༥. པ་ཉྩ་མེ པ་ཋ་མོ ཨ་ནྡྷ་བཱ་ལ་པུ་ཐུ་ཛྫ་ནོ, དུ་ཏི་ཡོ ཨ་ནྟ་ར་ནྟ་རཱ ཀུ་ས་ལ་ཀཱ་ར་ཀོ ལོ་ཀི་ཡ་པུ་ཐུ་ཛྫ་ནོ, ཏ་ཏི་ཡོ སོ་ཏཱ་པ་ནྣོ, ས་ཀ་དཱ་གཱ་མི་ཨ་ནཱ་གཱ་མི་ནོ་པི ཨེ་ཏེ་ནེ་ཝ ས་ངྒ་ཧི་ཏཱ. ཙ་ཏུ་ཏྠོ ཁཱི་ཎཱ་ས་ཝོ. སོ ཧི ཨེ་ཀ་ནྟེ་ནེ་ཝ ཨ་ན་ཝ་ཛྫོ.
༦-༧. སཱི་ལ་སུ་ཏྟཱ་དི་ཝ་ཎྞ་ནཱ
༡༣༦-༡༣༧. ཚ་ཊྛེ པ་ཋ་མོ ལོ་ཀི་ཡ་མ་ཧཱ་ཛ་ནོ, དུ་ཏི་ཡོ སུ་ཀྑ་ཝི་པ་སྶ་ཀོ སོ་ཏཱ་པ་ནྣོ ཙ ས་ཀ་དཱ་གཱ་མཱི ཙ, ཏ་ཏི་ཡོ ཨ་ནཱ་གཱ་མཱི. སོ ཧི ཡ་སྨཱ ཏ་ངྑ་ཎི་ཀ་མྤི ཨུ་པ་པ་ཏྟི་ནི་མི་ཏྟ་ཀཾ ཛྷཱ་ནཾ པ་ཊི་ལ་བྷ་ཏི་ཡེ་ཝ, ཏ་སྨཱ སུ་ཀྑ་ཝི་པ་སྶ་ཀོ་པི ས་མཱ་དྷི་སྨིཾ པ་རི་པཱུ་ར་ཀཱ་རཱི་ཡེ་ཝ. ཙ་ཏུ་ཏྠོ ཁཱི་ཎཱ་ས་ཝོ་ཡེ་ཝ. སོ ཧི ས་བྦེ་སཾ སཱི་ལཱ་དི་པ་ཙྩ་ནཱི་ཀཱ་ནཾ པ་ཧཱི་ན་ཏྟཱ ས་བྦ་ཏྠ པ་རི་པཱུ་ར་ཀཱ་རཱི ནཱ་མ. ས་ཏྟ་མེ་པི ཚ་ཊྛེ ཝུ་ཏྟ་ན་ཡེ་ནེ་ཝ པུ་གྒ་ལ་པ་རི་ཙྪེ་དོ ཝེ་དི་ཏ་བྦོ.
༨. ནི་ཀ་ཊྛ་སུ་ཏྟ་ཝ་ཎྞ་ནཱ
༡༣༨. ཨ་ཊྛ་མེ ནི་ཀ་ཊྛ་ཀཱ་ཡོཏི ནི་གྒ་ཏ་ཀཱ་ཡོ. ཨ་ནི་ཀ་ཊྛ་ཙི་ཏྟོཏི ཨ་ནུ་པ་ཝི་ཊྛ་ཙི་ཏྟོ. ཀཱ་ཡེ་ནེ་ཝ གཱ་མ་ཏོ ནི་ཀྑ་ནྟོ, ཙི་ཏྟེ་ན ཨ་ར་ཉྙེ ཝ་ས་ནྟོ་པི གཱ་མ་མེ་ཝ པ་ཝི་ཊྛོ་ཏི ཝུ་ཏྟཾ ཧོ་ཏི. ཨི་མི་ནཱ ན་ཡེ་ན ས་བྦ་ཏྠ ཨ་ཏྠོ ཝེ་དི་ཏ་བྦོ.
༩. དྷ་མྨ་ཀ་ཐི་ཀ་སུ་ཏྟ་ཝ་ཎྞ་ནཱ
༡༣༩. ན་ཝ་མེ ཨ་ས་ཧི་ཏནྟི ཨ་ཏྠེ་ན ཨ་སཾ་ཡུ་ཏྟཾ. ན ཀུ་ས་ལཱ ཧོ་ཏཱིཏི ན ཚེ་ཀཱ ཧོ་ཏི. ས་ཧི་ཏཱ་ས་ཧི་ཏ་སྶཱཏི ཨ་ཏྠ་ནི་སྶི་ཏ་སྶ ཝཱ ཨ་ནི་སྶི་ཏ་སྶ ཝཱ. ཨེ་ཝཾ ས་བྦ་ཏྠ ཨ་ཏྠོ ཝེ་དི་ཏ་བྦོ.
༡༠. ཝཱ་དཱི་སུ་ཏྟ་ཝ་ཎྞ་ནཱ
༡༤༠. ད་ས་མེ ཨ་ཏྠ་ཏོ པ་རི་ཡཱ་དཱ་ནཾ ག་ཙྪ་ཏཱིཏི ཨ་ཊྛ་ཀ་ཐཾ པུ་ཙྪི་ཏོ པ་རི་ཡཱ་དཱ་ནཾ པ་རི་ཀྑ་ཡཾ ག་ཙྪ་ཏི, ཀ་ཐེ་ཏུཾ ན ས་ཀྐོ་ཏི. ནོ བྱ་ཉྫ་ན་ཏོཏི བྱ་ཉྫ་ནཾ པ་ན་སྶ པ་ཝ་ཏྟ་ཏི ན པ་རི་ཡཱ་དི་ཡ་ཏི. ཨེ་སེ་ཝ ན་ཡོ ས་བྦ་ཏྠཱ་ཏི.
པུ་གྒ་ལ་ཝ་གྒོ ཙ་ཏུ་ཏྠོ.
(༡༥) ༥. ཨཱ་བྷཱ་ཝ་གྒོ
༡. ཨཱ་བྷཱ་སུ་ཏྟ་ཝ་ཎྞ་ནཱ
༡༤༡. པ་ཉྩ་མ་སྶ པ་ཋ་མེ ཨཱ་བྷཱ་ས་ན་ཝ་སེ་ན ཙ་ནྡོ་ཝ ཙ་ནྡཱ་བྷཱ. སེ་ས་པ་དེ་སུ་པི ཨེ་སེ་ཝ ན་ཡོ.
༢-༥. པ་བྷཱ་སུ་ཏྟཱ་དི་ཝ་ཎྞ་ནཱ
༡༤༢-༡༤༥. དུ་ཏི་ཡཱ་དཱི་སུ་པི པ་བྷཱ་ས་ན་ཝ་སེ་ན ཙ་ནྡོ་ཝ ཙ་ནྡ་པྤ་བྷཱ. ཨཱ་ལོ་ཀ་ན་ཝ་སེ་ན ཙ་ནྡོ་ཝ ཙ་ནྡཱ་ལོ་ཀོ. ཨོ་བྷཱ་ས་ན་ཝ་སེ་ན ཙ་ནྡོ་ཝ ཙ་ནྡོ་བྷཱ་སོ. པ་ཛྫོ་ཏ་ན་ཝ་སེ་ན ཙ་ནྡོ་ཝ ཙ་ནྡ་པ་ཛྫོ་ཏོཏི. ཨེ་ཝཾ ས་བྦ་པ་དེ་སུ་པི ཨ་ཏྠོ ཝེ་དི་ཏ་བྦོ.
༦. པ་ཋ་མ་ཀཱ་ལ་སུ་ཏྟ་ཝ་ཎྞ་ནཱ
༡༤༦. ཚ་ཊྛེ ཀཱ་ལཱཏི ཡུ་ཏྟ་པྤ་ཡུ་ཏྟ་ཀཱ་ལཱ. ཀཱ་ལེ་ན དྷ་མྨ་སྶ་ཝ་ནནྟི ཡུ་ཏྟ་པྤ་ཡུ་ཏྟ་ཀཱ་ལེ དྷ་མྨ་སྶ་ཝ་ནཾ. དྷ་མྨ་སཱ་ཀ་ཙྪཱཏི པ་ཉྷ་པུ་ཙྪ་ན་ཝི་སྶ་ཛྫ་ན་ཝ་སེ་ན པ་ཝ་ཏྟཱ སཾ་ས་ནྡ་ན་ཀ་ཐཱ.
༧. དུ་ཏི་ཡ་ཀཱ་ལ་སུ་ཏྟ་ཝ་ཎྞ་ནཱ
༡༤༧. ས་ཏྟ་མེ ཀཱ་ལཱཏི ཏ་སྨིཾ ཏ་སྨིཾ ཀཱ་ལེ དྷ་མྨ་སྶ་ཝ་ནཱ་དི་ཝ་སེ་ན པ་ཝ་ཏྟཱ་ནཾ ཀུ་ས་ལ་དྷ་མྨཱ་ནཾ ཨེ་ཏཾ ཨ་དྷི་ཝ་ཙ་ནཾ. ཏེ བྷཱ་ཝི་ཡ་ནྟི ཙེ་ཝ ཨ་ནུ་པ་རི་ཝ་ཏྟི་ཡ་ནྟི ཙ. ཨཱ་ས་ཝཱ་ནཾ ཁ་ཡནྟི ཨ་ར་ཧ་ཏྟཾ. ཨ་ཊྛ་མཾ ཨུ་ཏྟཱ་ན་ཏྠ་མེ་ཝ.
༩-༡༠. སུ་ཙ་རི་ཏ་སུ་ཏྟཱ་དི་ཝ་ཎྞ་ནཱ
༡༤༩-༡༥༠. ན་ཝ་མེ ས་ཎྷཱ ཝཱ་ཙཱཏི མུ་དུ་ཀ་ཝཱ་ཙཱ. མ་ནྟ་བྷཱ་སཱཏི མ་ནྟ་ས་ངྑཱ་ཏཱ་ཡ པ་ཉྙཱ་ཡ པ་རི་ཙྪི་ནྡི་ཏྭཱ ཀ་ཐི་ཏ་ཀ་ཐཱ. ད་ས་མེ སཱི་ལ་སཱ་རོཏི སཱ་ར་ས་མྤཱ་པ་ཀཾ སཱི་ལཾ. སེ་སེ་སུ་པི ཨེ་སེ་ཝ ན་ཡོ.
ཨཱ་བྷཱ་ཝ་གྒོ པ་ཉྩ་མོ.
ཏ་ཏི་ཡ་པ་ཎྞཱ་ས་ཀཾ ནི་ཊྛི་ཏཾ.