༩. ག་ནྡྷ་ཛཱ་ཏ་སུ་ཏྟ་ཝ་ཎྞ་ནཱ

༨༠. ན་ཝ་མེ ཨེ་ཏ་ད་ཝོ་ཙཱཏི པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ད་ས་བ་ལ་སྶ ཝ་ཏྟཾ ད་སྶེ་ཏྭཱ ཨ་ཏྟ་ནོ དི་ཝཱ་ཝི་ཧཱ་ར་ཊྛཱ་ནཾ ག་ནྟྭཱ ‘‘ཨི་མ་སྨིཾ ལོ་ཀེ མཱུ་ལ་ག་ནྡྷོ ནཱ་མ ཨ་ཏྠི, སཱ་ར་ག་ནྡྷོ ནཱ་མ ཨ་ཏྠི, པུ་པྥ་ག་ནྡྷོ ནཱ་མ ཨ་ཏྠི. ཨི་མེ པ་ན ཏ་ཡོ་པི ག་ནྡྷཱ ཨ་ནུ་ཝཱ་ཏཾ་ཡེ་ཝ ག་ཙྪ་ནྟི, ན པ་ཊི་ཝཱ་ཏཾ. ཨ་ཏྠི ནུ ཁོ ཀི་ཉྩི, ཡ་སྶ པ་ཊི་ཝཱ་ཏ་མྤི ག་ནྡྷོ ག་ཙྪ་ཏཱི’’ཏི ཙི་ནྟེ་ཏྭཱ ཨ་ཊྛ་ནྣཾ ཝ་རཱ་ནཾ ག་ཧ་ཎ་ཀཱ་ལེ་ཡེ་ཝ ཀ་ངྑུ་པྤ་ཏྟི་ས་མ་ཡེ ཨུ་པ་ས་ངྐ་མ་ན་ཝ་ར་སྶ ག་ཧི་ཏ་ཏྟཱ ཏ་ཀྑ་ཎཾ་ཡེ་ཝ དི་ཝཱ་ཊྛཱ་ན་ཏོ ཝུ་ཊྛཱ་ཡ ས་ཏྠུ ས་ནྟི་ཀཾ ག་ནྟྭཱ ཝ་ནྡི་ཏྭཱ ཨེ་ཀ་མ་ནྟཾ ནི་སི་ནྣོ ཨུ་པྤ་ནྣཱ་ཡ ཀ་ངྑཱ་ཡ ཝི་ནོ་ད་ན་ཏྠཾ ཨེ་ཏཾ ‘‘ཏཱི་ཎི་མཱ་ནི, བྷ་ནྟེ’’ཏི་ཨཱ་དི་ཝ་ཙ་ནཾ ཨ་ཝོ་ཙ. ཏ་ཏྠ ག་ནྡྷ་ཛཱ་ཏཱ་ནཱིཏི ག་ནྡྷ་ཛཱ་ཏི་ཡོ. མཱུ་ལ་ག་ནྡྷོཏི མཱུ་ལ་ཝ་ཏྠུ་ཀོ ག་ནྡྷོ, ག་ནྡྷ་ས་མྤ་ནྣཾ ཝཱ མཱུ་ལ་མེ་ཝ མཱུ་ལ་ག་ནྡྷོ. ཏ་སྶ ཧི ག་ནྡྷོ ཨ་ནུ་ཝཱ་ཏཾ ག་ཙྪ་ཏི. ག་ནྡྷ་སྶ པ་ན ག་ནྡྷོ ནཱ་མ ན་ཏྠི. སཱ་ར་ག་ནྡྷ་པུ་པྥ་ག་ནྡྷེ་སུཔི ཨེ་སེ་ཝ ན་ཡོ. ཨ་ཏྠཱ་ན་ནྡ, ཀི་ཉྩི ག་ནྡྷ་ཛཱ་ཏནྟི ཨེ་ཏྠ ས་ར་ཎ་ག་མ་ནཱ་ད་ཡོ གུ་ཎ་ཝ་ཎྞ་བྷཱ་ས་ན་ཝ་སེ་ན དི་སཱ་གཱ་མི་ཏཱ་ཡ ག་ནྡྷ་ས་དི་ས་ཏྟཱ ག་ནྡྷཱ, ཏེ་སཾ ཝ་ཏྠུ་བྷཱུ་ཏོ པུ་གྒ་ལོ ག་ནྡྷ་ཛཱ་ཏཾ ནཱ་མ. ག་ནྡྷོ ག་ཙྪ་ཏཱིཏི ཝ་ཎྞ་བྷཱ་ས་ན་ཝ་སེ་ན ག་ཙྪ་ཏི. སཱི་ལ་ཝཱཏི པ་ཉྩ་སཱི་ལེ་ན ཝཱ ད་ས་སཱི་ལེ་ན ཝཱ སཱི་ལ་ཝཱ. ཀ་ལྱཱ་ཎ་དྷ་མྨོཏི ཏེ་ནེ་ཝ སཱི་ལ་དྷ་མྨེ་ན ཀ་ལྱཱ་ཎ་དྷ་མྨོ སུ་ནྡ་ར་དྷ་མྨོ. ཝི་ག་ཏ་མ་ལ་མ་ཙྪེ་རེ་ནཱཏི་ཨཱ་དཱི་ནཾ ཨ་ཏྠོ ཝི་སུ་དྡྷི་མ་གྒེ (ཝི་སུ་དྡྷི. ༡.༡༦༠) ཝི་ཏྠཱ་རི་ཏོ་ཝ. དི་སཱ་སཱུཏི ཙ་ཏཱུ་སུ དི་སཱ་སུ ཙ་ཏཱུ་སུ ཨ་ནུ་དི་སཱ་སུ. ས་མ་ཎ་བྲཱ་ཧྨ་ཎཱཏི ས་མི་ཏ་པཱ་པ་བཱ་ཧི་ཏ་པཱ་པཱ ས་མ་ཎ་བྲཱ་ཧྨ་ཎཱ.

ན པུ་པྥ་ག་ནྡྷོ པ་ཊི་ཝཱ་ཏ་མེ་ཏཱིཏི ཝ་སྶི་ཀ་པུ་པྥཱ་དཱི་ནཾ ག་ནྡྷོ པ་ཊི་ཝཱ་ཏཾ ན ག་ཙྪ་ཏི. ན ཙ་ནྡ་ནཾ ཏ་ག་ར་མ་ལླི་ཀཱ ཝཱཏི ཙ་ནྡ་ན་ཏ་ག་ར་མ་ལླི་ཀཱ་ན་མྤི ག་ནྡྷོ པ་ཊི་ཝཱ་ཏཾ ན ག་ཙྪ་ཏཱི་ཏི ཨ་ཏྠོ. དེ་ཝ་ལོ་ཀེ་པི ཕུ་ཊ་སུ་མ་ནཱ ནཱ་མ ཧོ་ཏི, ཏ་སྶཱ པུ་པྥི་ཏ་དི་ཝ་སེ ག་ནྡྷོ ཡོ་ཛ་ན་ས་ཏཾ ཨ་ཛ྄ཛྷོ་ཏྠ་ར་ཏི. སོ་པི པ་ཊི་ཝཱ་ཏཾ ཝི་ད་ཏྠི་མ་ཏྟ་མྤི ར་ཏ་ན་མ་ཏྟ་མྤི ག་ནྟུཾ ན ས་ཀྐོ་ཏཱི་ཏི ཝ་ད་ནྟི. ས་ཏ་ཉྩ ག་ནྡྷོ པ་ཊི་ཝཱ་ཏ་མེ་ཏཱིཏི ས་ཏ་ཉྩ པ་ཎྜི་ཏཱ་ནཾ བུ་དྡྷ་པ་ཙྩེ་ཀ་བུ་དྡྷ་བུ་དྡྷ་པུ་ཏྟཱ་ནཾ སཱི་ལཱ་དི་གུ་ཎ་ག་ནྡྷོ པ་ཊི་ཝཱ་ཏཾ ག་ཙྪ་ཏི. ས་བྦཱ དི་སཱ ས་པྤུ་རི་སོ པ་ཝཱ་ཡ་ཏཱིཏི ས་པྤུ་རི་སོ པ་ཎྜི་ཏོ སཱི་ལཱ་དི་གུ་ཎ་ག་ནྡྷེ་ན ས་བྦཱ དི་སཱ པ་ཝཱ་ཡ་ཏི, ས་བྦཱ དི་སཱ ག་ནྡྷེ་ན ཨ་ཝ་ཏྠ་ར་ཏཱི་ཏི ཨ་ཏྠོ.