བྷ་དྡཱ་ཀ་ཙྩཱ་ནཱ་ཐེ་རཱི་ཝ་ཏྠུ

༢༤༥. ཨེ་ཀཱ་ད་ས་མེ མ་ཧཱ་བྷི་ཉྙཱ་པྤ་ཏྟཱ་ནནྟི མ་ཧ་ཏི་ཡོ ཨ་བྷི་ཉྙཱ་ཡོ པ་ཏྟཱ་ནཾ, བྷ་དྡཱ ཀ་ཙྩཱ་ནཱ, ནཱ་མ ཨ་གྒཱ་ཏི ད་སྶེ་ཏི. ཨེ་ཀ་སྶ ཧི བུ་དྡྷ་སྶ ཙ་ཏྟཱ་རོ་ཝ ཛ་ནཱ མ་ཧཱ་བྷི་ཉྙཱ ཧོ་ནྟི, ན ཨ་ཝ་སེ་ས་སཱ་ཝ་ཀཱ. ཨ་ཝ་སེ་ས་སཱ་ཝ་ཀཱ ཧི ཀ་པྤ་ས་ཏ་ས་ཧ་སྶ་མེ་ཝ ཨ་ནུ་སྶ་རི་ཏུཾ ས་ཀྐོ་ནྟི, ན ཏ་ཏོ པ་རཾ. མ་ཧཱ་བྷི་ཉྙཱ་པྤ་ཏྟཱ པ་ན ཀ་པྤ་ས་ཏ་ས་ཧ་སྶཱ་དྷི་ཀཾ ཨ་ས་ངྑྱེ་ཡྻཾ ཨ་ནུ་སྶ་ར་ནྟི. ཨ་མྷཱ་ཀ་མྤི ས་ཏྠུ སཱ་ས་ནེ དྭེ ཨ་གྒ་སཱ་ཝ་ཀཱ བཱ་ཀུ་ལ་ཏྠེ་རོ བྷ་དྡཱ ཀ་ཙྩཱ་ནཱ་ཏི ཨི་མེ ཙ་ཏྟཱ་རོ ཨེ་ཏྟ་ཀཾ ཨ་ནུ་སྶ་རི་ཏུཾ ས་ཀྑིཾ་སུ. ཏ་སྨཱ ཨ་ཡཾ ཐེ་རཱི མ་ཧཱ་བྷི་ཉྙཱ་པྤ་ཏྟཱ་ནཾ ཨ་གྒཱ ནཱ་མ ཛཱ་ཏཱ. བྷ་དྡཱ ཀ་ཙྩཱ་ནཱ་ཏི ཏ་སྶཱ ནཱ་མཾ. བྷ་དྡ་ཀ་ཉྩ་ན་སྶ ཧི ཨུ་ཏྟ་མ་སུ་ཝ་ཎྞ་སྶ ཝི་ཡ ཏ་སྶཱ ས་རཱི་ར་ཝ་ཎྞོ ཨ་ཧོ་སི, སཱ ཏ་སྨཱ བྷ་དྡ་ཀ་ཉྩ་ནཱ་ཏི ནཱ་མཾ ལ་བྷི, སཱ པ་ཙྪཱ ཀ་ཙྩཱ་ནཱ་ཏྭེ་ཝ ས་ངྑཾ ག་ཏཱ. རཱ་ཧུ་ལ་མཱ་ཏཱ་ཡེ་ཏཾ ཨ་དྷི་ཝ་ཙ་ནཾ.

སཱ ཧི པ་དུ་མུ་ཏྟ་ར་བུ་དྡྷ་ཀཱ་ལེ ཧཾ་ས་ཝ་ཏི་ཡཾ ཀུ་ལ་གེ་ཧེ པ་ཊི་ས་ནྡྷིཾ ག་ཧེ་ཏྭཱ ཨ་པ་ར་བྷཱ་གེ ས་ཏྠུ དྷ་མྨ་ཀ་ཐཾ སུ་ཎ་ནྟཱི ས་ཏྠཱ་རཾ ཨེ་ཀཾ བྷི་ཀྑུ་ནིཾ མ་ཧཱ་བྷི་ཉྙཱ་པྤ་ཏྟཱ་ནཾ ཨ་གྒ་ཊྛཱ་ནེ ཋ་པེ་ནྟཾ དི་སྭཱ ཨ་དྷི་ཀཱ་ར་ཀ་མྨཾ ཀ་ཏྭཱ ཏཾ ཋཱ་ན་ནྟ་རཾ པ་ཏྠེ་སི. སཱ ཀ་པྤ་ས་ཏ་ས་ཧ་སྶཾ དེ་ཝ་མ་ནུ་སྶེ་སུ སཾ་ས་རི་ཏྭཱ ཨི་མ་སྨིཾ བུ་དྡྷུ་པྤཱ་དེ སུ་པྤ་བུ་དྡྷ་ས་ཀྐ་སྶ གེ་ཧེ པ་ཊི་ས་ནྡྷིཾ ག་ཎྷི, བྷ་དྡཱ ཀ་ཙྩཱ་ནཱ་ཏི་སྶཱ ནཱ་མཾ ཨ་ཀཾ་སུ.

སཱ ཝ་ཡ་པྤ་ཏྟཱ བོ་དྷི་ས་ཏྟ་སྶ གེ་ཧཾ ཨ་ག་མཱ་སི. སཱ ཨ་པ་ར་བྷཱ་གེ རཱ་ཧུ་ལ་ཀུ་མཱ་རཾ ནཱ་མ པུ་ཏྟཾ ཝི་ཛཱ་ཡི. ཏ་སྶ ཛཱ་ཏ་དི་ཝ་སེ་ཝ བོ་དྷི་ས་ཏྟོ ནི་ཀྑ་མི་ཏྭཱ བོ་དྷི་མ་ཎྜེ ས་བྦ་ཉྙུ་ཏཾ པ་ཏྭཱ ལོ་ཀཱ་ནུ་གྒ་ཧཾ ཀ་རོ་ནྟོ ཨ་ནུ་པུ་བྦེ་ན ཀ་པི་ལ་ཝ་ཏྠུཾ ཨཱ་ག་མྨ ཉཱ་ཏཱི་ནཾ ས་ངྒ་ཧཾ ཨ་ཀཱ་སི. ཨ་པ་ར་བྷཱ་གེ པ་རི་ནི་བྦུ་ཏེ སུ་དྡྷོ་ད་ན་མ་ཧཱ་རཱ་ཛེ མ་ཧཱ་པ་ཛཱ་པ་ཏི་གོ་ཏ་མཱི པ་ཉྩ་ཧི མཱ་ཏུ་གཱ་མ་ས་ཏེ་ཧི ས་དྡྷིཾ ས་ཏྠུ ས་ནྟི་ཀེ པ་བྦ་ཛི. རཱ་ཧུ་ལ་མཱ་ཏཱ་པི ཛ་ན་པ་ད་ཀ་ལྱཱ་ཎཱི་པི ཐེ་རི་ཡཱ ས་ནྟི་ཀཾ ག་ནྟྭཱ པ་བྦ་ཛི. སཱ པ་བྦ་ཛི་ཏ་ཀཱ་ལ་ཏོ པ་ཊྛཱ་ཡ བྷ་དྡ་ཀ་ཙྩཱ་ན་ཏྠེ་རཱི་ཏྭེ་ཝ པཱ་ཀ་ཊཱ ཨ་ཧོ་སི. སཱ ཨ་པ་ར་བྷཱ་གེ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པ་ཏྭཱ ཨ་བྷི་ཉྙཱ་སུ ཙི་ཎྞ་ཝ་སཱི ཨ་ཧོ་སི, ཨེ་ཀ་པ་ལླ་ངྐེ་ན ནི་སི་ནྣཱ ཨེ་ཀཱ་ཝ་ཛྫ་ནེ་ན ཀ་པྤ་ས་ཏ་ས་ཧ་སྶཱ་དྷི་ཀཾ ཨ་ས་ངྑྱེ་ཡྻཾ ཨ་ནུ་སྶ་ར་ཏི. ཏ་སྶཱ ཏ་སྨིཾ གུ་ཎེ པཱ་ཀ་ཊེ ཛཱ་ཏེ ས་ཏྠཱ ཛེ་ཏ་ཝ་ནེ ནི་སི་ནྣོ བྷི་ཀྑུ་ནི་ཡོ པ་ཊི་པཱ་ཊི་ཡཱ ཋཱ་ན་ནྟ་རེ ཋ་པེ་ནྟོ ཨི་མཾ ཐེ་རིཾ མ་ཧཱ་བྷི་ཉྙཱ་པྤ་ཏྟཱ་ནཾ ཨ་གྒ་ཊྛཱ་ནེ ཋ་པེ་སཱི་ཏི.