༥. པ་ཉྩ་ཀ་ནི་དྡེ་སོ
(༡) པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི
༩༤༠. ཏ་ཏྠ ཀ་ཏ་མཱ་ནི པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི? ས་ཀྐཱ་ཡ་དི་ཊྛི, ཝི་ཙི་ཀི་ཙྪཱ, སཱི་ལ་བྦ་ཏ་པ་རཱ་མཱ་སོ, ཀཱ་མ་ཙྪ་ནྡོ, བྱཱ་པཱ་དོ – ཨི་མཱ་ནི པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི.
(༢) པ་ཉྩུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི
ཏ་ཏྠ ཀ་ཏ་མཱ་ནི པ་ཉྩུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི? རཱུ་པ་རཱ་གོ, ཨ་རཱུ་པ་རཱ་གོ, མཱ་ནོ, ཨུ་དྡྷ་ཙྩཾ, ཨ་ཝི་ཛྫཱ – ཨི་མཱ་ནི པ་ཉྩུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི.
(༣) པ་ཉྩ མ་ཙྪ་རི་ཡཱ་ནི
ཏ་ཏྠ ཀ་ཏ་མཱ་ནི པ་ཉྩ མ་ཙྪ་རི་ཡཱ་ནི? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མཱ་ནི པ་ཉྩ མ་ཙྪ་རི་ཡཱ་ནི.
(༤) པ་ཉྩ ས་ངྒཱ
ཏ་ཏྠ ཀ་ཏ་མེ པ་ཉྩ ས་ངྒཱ? རཱ་ག་ས་ངྒོ, དོ་ས་ས་ངྒོ, མོ་ཧ་ས་ངྒོ, མཱ་ན་ས་ངྒོ, དི་ཊྛི་ས་ངྒོ – ཨི་མེ པ་ཉྩ ས་ངྒཱ.
(༥) པ་ཉྩ ས་ལླཱ
ཏ་ཏྠ ཀ་ཏ་མེ པ་ཉྩ ས་ལླཱ? རཱ་ག་ས་ལླཾ, དོ་ས་ས་ལླཾ, མོ་ཧ་ས་ལླཾ, མཱ་ན་ས་ལླཾ, དི་ཊྛི་ས་ལླཾ – ཨི་མེ པ་ཉྩ ས་ལླཱ.
(༦) པ་ཉྩ ཙེ་ཏོ་ཁི་ལཱ
༩༤༡. ཏ་ཏྠ ཀ་ཏ་མེ པ་ཉྩ ཙེ་ཏོ་ཁི་ལཱ? ས་ཏྠ་རི ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི, དྷ་མྨེ ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི, ས་ངྒྷེ ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི, སི་ཀྑཱ་ཡ ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི, ས་བྲ་ཧྨ་ཙཱ་རཱི་སུ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ – ཨི་མེ པ་ཉྩ ཙེ་ཏོ་ཁི་ལཱ.
(༧) པ་ཉྩ ཙེ་ཏ་སོ ཝི་ནི་བ་ནྡྷཱ
ཏ་ཏྠ ཀ་ཏ་མེ པ་ཉྩ ཙེ་ཏ་སོ ཝི་ནི་བ་ནྡྷཱ? ཀཱ་མེ ཨ་ཝཱི་ཏ་རཱ་གོ ཧོ་ཏི ཨ་ཝི་ག་ཏ་ཙྪ་ནྡོ ཨ་ཝི་ག་ཏ་པེ་མོ ཨ་ཝི་ག་ཏ་པི་པཱ་སོ ཨ་ཝི་ག་ཏ་པ་རི་ལཱ༹་ཧོ ཨ་ཝི་ག་ཏ་ཏ་ཎྷོ; ཀཱ་ཡེ ཨ་ཝཱི་ཏ་རཱ་གོ ཧོ་ཏི… རཱུ་པེ ཨ་ཝཱི་ཏ་རཱ་གོ ཧོ་ཏི… ཡཱ་ཝ་ད་ཏྠཾ ཨུ་ད་རཱ་ཝ་དེ་ཧ་ཀཾ བྷུ་ཉྫི་ཏྭཱ སེ་ཡྻ་སུ་ཁཾ པ་སྶ་སུ་ཁཾ མི་དྡྷ་སུ་ཁཾ ཨ་ནུ་ཡུ་ཏྟོ ཝི་ཧ་ར་ཏི; ཨ་ཉྙ་ཏ་རཾ དེ་ཝ་ནི་ཀཱ་ཡཾ པ་ཎི་དྷཱ་ཡ བྲ་ཧྨ་ཙ་རི་ཡཾ ཙ་ར་ཏི – ‘‘ཨི་མི་ནཱ་ཧཾ སཱི་ལེ་ན ཝཱ ཝ་ཏེ་ན ཝཱ ཏ་པེ་ན ཝཱ བྲ་ཧྨ་ཙ་རི་ཡེ་ན ཝཱ དེ་ཝོ ཝཱ བྷ་ཝི་སྶཱ་མི དེ་ཝ་ཉྙ་ཏ་རོ ཝཱ’’ཏི – ཨི་མེ པ་ཉྩ ཙེ་ཏ་སོ་ཝི་ནི་བ་ནྡྷཱ.
(༨) པ་ཉྩ ནཱི་ཝ་ར་ཎཱ་ནི
ཏ་ཏྠ ཀ་ཏ་མཱ་ནི པ་ཉྩ ནཱི་ཝ་ར་ཎཱ་ནི? ཀཱ་མ་ཙྪ་ནྡ་ནཱི་ཝ་ར་ཎཾ, བྱཱ་པཱ་ད་ནཱི་ཝ་ར་ཎཾ, ཐི་ན་མི་དྡྷ་ནཱི་ཝ་ར་ཎཾ, ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ, ཝི་ཙི་ཀི་ཙྪཱ་ནཱི་ཝ་ར་ཎཾ – ཨི་མཱ་ནི པ་ཉྩ ནཱི་ཝ་ར་ཎཱ་ནི.
(༩) པ་ཉྩ ཀ་མྨཱ་ནི ཨཱ་ན་ནྟ་རི་ཀཱ་ནི
ཏ་ཏྠ ཀ་ཏ་མཱ་ནི པ་ཉྩ ཀ་མྨཱ་ནི ཨཱ་ན་ནྟ་རི་ཀཱ་ནི? མཱ་ཏཱ ཛཱི་ཝི་ཏཱ ཝོ་རོ་པི་ཏཱ ཧོ་ཏི, པི་ཏཱ ཛཱི་ཝི་ཏཱ ཝོ་རོ་པི་ཏོ ཧོ་ཏི, ཨ་ར་ཧ་ནྟོ ཛཱི་ཝི་ཏཱ ཝོ་རོ་པི་ཏོ ཧོ་ཏི, དུ་ཊྛེ་ན ཙི་ཏྟེ་ན ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དི་ཏཾ ཧོ་ཏི, ས་ངྒྷོ བྷི་ནྣོ ཧོ་ཏི – ཨི་མཱ་ནི པ་ཉྩ ཀ་མྨཱ་ནི ཨཱ་ན་ནྟ་རི་ཀཱ་ནི.
(༡༠) པ་ཉྩ དི་ཊྛི་ཡོ
ཏ་ཏྠ ཀ་ཏ་མཱ པ་ཉྩ དི་ཊྛི་ཡོ? ‘‘ས་ཉྙཱི ཨ་ཏྟཱ ཧོ་ཏི ཨ་རོ་གོ པ་རཾ མ་ར་ཎཱ’’ཏི ཨི་ཏྠེ་ཀེ ཨ་བྷི་ཝ་ད་ནྟི, ‘‘ཨ་ས་ཉྙཱི ཨ་ཏྟཱ ཧོ་ཏི ཨ་རོ་གོ པ་རཾ མ་ར་ཎཱ’’ཏི ཨི་ཏྠེ་ཀེ ཨ་བྷི་ཝ་ད་ནྟི, ‘‘ནེ་ཝ་ས་ཉྙཱི་ནཱ་ས་ཉྙཱི ཨ་ཏྟཱ ཧོ་ཏི ཨ་རོ་གོ པ་རཾ མ་ར་ཎཱ’’ཏི ཨི་ཏྠེ་ཀེ ཨ་བྷི་ཝ་ད་ནྟི, ས་ཏོ ཝཱ པ་ན ས་ཏྟ་སྶ ཨུ་ཙྪེ་དཾ ཝི་ནཱ་སཾ ཝི་བྷ་ཝཾ པ་ཉྙཱ་པེ་ནྟི, དི་ཊྛ་དྷ་མྨ་ནི་བྦཱ་ནཾ ཝཱ པ་ནེ་ཀེ ཨ་བྷི་ཝ་ད་ནྟི – ཨི་མཱ པ་ཉྩ དི་ཊྛི་ཡོ.
(༡༡) པ་ཉྩ ཝེ་རཱ
༩༤༢. ཏ་ཏྠ ཀ་ཏ་མེ པ་ཉྩ ཝེ་རཱ? པཱ་ཎཱ་ཏི་པཱ་ཏོ, ཨ་དི་ནྣཱ་དཱ་ནཾ, ཀཱ་མེ་སུ་མི་ཙྪཱ་ཙཱ་རོ, མུ་སཱ་ཝཱ་དོ, སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཱ – ཨི་མེ པ་ཉྩ ཝེ་རཱ.
(༡༢) པ་ཉྩ བྱ་ས་ནཱ
ཏ་ཏྠ ཀ་ཏ་མེ པ་ཉྩ བྱ་ས་ནཱ? ཉཱ་ཏི་བྱ་ས་ནཾ, བྷོ་ག་བྱ་ས་ནཾ, རོ་ག་བྱ་ས་ནཾ, སཱི་ལ་བྱ་ས་ནཾ, དི་ཊྛི་བྱ་ས་ནཾ – ཨི་མེ པ་ཉྩ བྱ་ས་ནཱ.
(༡༣) པ་ཉྩ ཨ་ཀྑ་ནྟི་ཡཱ ཨཱ་དཱི་ན་ཝཱ
ཏ་ཏྠ ཀ་ཏ་མེ པ་ཉྩ ཨ་ཀྑ་ནྟི་ཡཱ ཨཱ་དཱི་ན་ཝཱ? བ་ཧུ་ནོ ཛ་ན་སྶ ཨ་པྤི་ཡོ ཧོ་ཏི ཨ་མ་ནཱ་པོ, ཝེ་ར་བ་ཧུ་ལོ ཙ ཧོ་ཏི, ཝ་ཛྫ་བ་ཧུ་ལོ ཙ, ས་མྨཱུ་ལ༹ྷོ ཀཱ་ལ་ངྐ་རོ་ཏི, ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ཏི – ཨི་མེ པ་ཉྩ ཨ་ཀྑ་ནྟི་ཡཱ ཨཱ་དཱི་ན་ཝཱ.
(༡༤) པ་ཉྩ བྷ་ཡཱ་ནི
ཏ་ཏྠ ཀ་ཏ་མཱ་ནི པ་ཉྩ བྷ་ཡཱ་ནི? ཨཱ་ཛཱི་ཝ་ཀ་བྷ་ཡཾ, ཨ་སི་ལོ་ཀ་བྷ་ཡཾ, པ་རི་ས་སཱ་ར་ཛྫ་བྷ་ཡཾ, མ་ར་ཎ་བྷ་ཡཾ, དུ་གྒ་ཏི་བྷ་ཡཾ – ཨི་མཱ་ནི པ་ཉྩ བྷ་ཡཱ་ནི.
(༡༥) པ་ཉྩ དི་ཊྛ་དྷ་མྨ་ནི་བྦཱ་ན་ཝཱ་དཱ
༩༤༣. ཏ་ཏྠ ཀ་ཏ་མེ པ་ཉྩ དི་ཊྛ་དྷ་མྨ་ནི་བྦཱ་ན་ཝཱ་དཱ?
(ཀ) ཨི་དྷེ་ཀ་ཙྩོ ས་མ་ཎོ ཝཱ བྲཱ་ཧྨ་ཎོ ཝཱ ཨེ་ཝཾ་ཝཱ་དཱི ཧོ་ཏི ཨེ་ཝཾ་དི་ཊྛི [ཨེ་ཝཾ་དི་ཊྛི (སྱཱ.)] – ‘‘ཡ་ཏོ ཁོ, བྷོ, ཨ་ཡཾ ཨ་ཏྟཱ པ་ཉྩ་ཧི ཀཱ་མ་གུ་ཎེ་ཧི ས་མ་པྤི་ཏོ ས་མ་ངྒཱི་བྷཱུ་ཏོ པ་རི་ཙཱ་རེ་ཏི, ཨེ་ཏྟཱ་ཝ་ཏཱ ཁོ, བྷོ, ཨ་ཡཾ ཨ་ཏྟཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏཱི’’ཏི. ཨི་ཏྠེ་ཀེ ས་ཏོ ས་ཏྟ་སྶ པ་ར་མ་དི་ཊྛ་དྷ་མྨ་ནི་བྦཱ་ནཾ པ་ཉྙ་པེ་ནྟི.
(ཁ) ཏ་མ་ཉྙོ ཨེ་ཝ་མཱ་ཧ – ‘‘ཨ་ཏྠི ཁོ, བྷོ, ཨེ་སོ ཨ་ཏྟཱ ཡཾ ཏྭཾ ཝ་དེ་སི ནེ་སོ ན་ཏྠཱི་ཏི ཝ་དཱ་མི. ནོ ཙ ཁོ, བྷོ, ཨ་ཡཾ ཨ་ཏྟཱ ཨེ་ཏྟཱ་ཝ་ཏཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏི. ཏཾ ཀི་སྶ ཧེ་ཏུ? ཀཱ་མཱ ཧི, བྷོ, ཨ་ནི་ཙྩཱ དུ་ཀྑཱ ཝི་པ་རི་ཎཱ་མ་དྷ་མྨཱ. ཏེ་སཾ ཝི་པ་རི་ཎཱ་མ་ཉྙ་ཐཱ་བྷཱ་ཝཱ ཨུ་པྤ་ཛྫ་ནྟི སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ. ཡ་ཏོ ཁོ, བྷོ, ཨ་ཡཾ ཨ་ཏྟཱ ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, ཨེ་ཏྟཱ་ཝ་ཏཱ ཁོ, བྷོ, ཨ་ཡཾ ཨ་ཏྟཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏཱི’’ཏི. ཨི་ཏྠེ་ཀེ ས་ཏོ ས་ཏྟ་སྶ པ་ར་མ་དི་ཊྛ་དྷ་མྨ་ནི་བྦཱ་ནཾ པ་ཉྙ་པེ་ནྟི.
(ག) ཏ་མ་ཉྙོ ཨེ་ཝ་མཱ་ཧ – ‘‘ཨ་ཏྠི ཁོ, བྷོ, ཨེ་སོ ཨ་ཏྟཱ ཡཾ ཏྭཾ ཝ་དེ་སི. ནེ་སོ ན་ཏྠཱི་ཏི ཝ་དཱ་མི. ནོ ཙ ཁོ, བྷོ, ཨ་ཡཾ ཨ་ཏྟཱ ཨེ་ཏྟཱ་ཝ་ཏཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏི. ཏཾ ཀི་སྶ ཧེ་ཏུ? ཡ་དེ་ཝ ཏ་ཏྠ ཝི་ཏ་ཀྐི་ཏཾ ཝི་ཙཱ་རི་ཏཾ ཨེ་ཏེ་ན ཨེ་ཏཾ ཨོ་ལཱ༹་རི་ཀཾ ཨ་ཀྑཱ་ཡ་ཏི. ཡ་ཏོ ཁོ, བྷོ, ཨ་ཡཾ ཨ་ཏྟཱ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, ཨེ་ཏྟཱ་ཝ་ཏཱ ཁོ, བྷོ, ཨ་ཡཾ ཨ་ཏྟཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏཱི’’ཏི. ཨི་ཏྠེ་ཀེ ས་ཏོ ས་ཏྟ་སྶ པ་ར་མ་དི་ཊྛ་དྷ་མྨ་ནི་བྦཱ་ནཾ པ་ཉྙ་པེ་ནྟི.
(གྷ) ཏ་མ་ཉྙོ ཨེ་ཝ་མཱ་ཧ – ‘‘ཨ་ཏྠི ཁོ, བྷོ, ཨེ་སོ ཨ་ཏྟཱ ཡཾ ཏྭཾ ཝ་དེ་སི. ནེ་སོ ན་ཏྠཱི་ཏི ཝ་དཱ་མི. ནོ ཙ ཁོ, བྷོ, ཨ་ཡཾ ཨ་ཏྟཱ ཨེ་ཏྟཱ་ཝ་ཏཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏི. ཏཾ ཀི་སྶ ཧེ་ཏུ? ཡ་དེ་ཝ ཏ་ཏྠ པཱི་ཏི་ག་ཏཾ ཙེ་ཏ་སོ ཨུ་པྤི་ལཱ་ཝི་ཏཾ, ཨེ་ཏེ་ན ཨེ་ཏཾ ཨོ་ལཱ༹་རི་ཀཾ ཨ་ཀྑཱ་ཡ་ཏི. ཡ་ཏོ ཁོ, བྷོ, ཨ་ཡཾ ཨ་ཏྟཱ པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, ཨེ་ཏྟཱ་ཝ་ཏཱ ཁོ, བྷོ, ཨ་ཡཾ ཨ་ཏྟཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏཱི’’ཏི. ཨི་ཏྠེ་ཀེ ས་ཏོ ས་ཏྟ་སྶ པ་ར་མ་དི་ཊྛ་དྷ་མྨ་ནི་བྦཱ་ནཾ པ་ཉྙ་པེ་ནྟི.
(ང) ཏ་མ་ཉྙོ ཨེ་ཝ་མཱ་ཧ – ‘‘ཨ་ཏྠི ཁོ, བྷོ, ཨེ་སོ ཨ་ཏྟཱ ཡཾ ཏྭཾ ཝ་དེ་སི. ནེ་སོ ན་ཏྠཱི་ཏི ཝ་དཱ་མི. ནོ ཙ ཁོ, བྷོ, ཨ་ཡཾ ཨ་ཏྟཱ ཨེ་ཏྟཱ་ཝ་ཏཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏི. ཏཾ ཀི་སྶ ཧེ་ཏུ? ཡ་དེ་ཝ ཏ་ཏྠ སུ་ཁ་པཱི་ཏི ཙེ་ཏ་སོ ཨཱ་བྷོ་གོ, ཨེ་ཏེ་ན ཨེ་ཏཾ ཨོ་ལཱ༹་རི་ཀཾ ཨ་ཀྑཱ་ཡ་ཏི. ཡ་ཏོ ཁོ, བྷོ, ཨ་ཡཾ ཨ་ཏྟཱ སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི, ཨེ་ཏྟཱ་ཝ་ཏཱ ཁོ, བྷོ, ཨ་ཡཾ ཨ་ཏྟཱ པ་ར་མ་དི་ཊྛ་དྷ་མྨ་ནི་བྦཱ་ན་པྤ་ཏྟོ ཧོ་ཏཱི’’ཏི. ཨི་ཏྠེ་ཀེ ས་ཏོ ས་ཏྟ་སྶ པ་ར་མ་དི་ཊྛ་དྷ་མྨ་ནི་བྦཱ་ནཾ པ་ཉྙ་པེ་ནྟི. ཨི་མེ པ་ཉྩ དི་ཊྛ་དྷ་མྨ་ནི་བྦཱ་ན་ཝཱ་དཱ.
པ་ཉྩ་ཀཾ.