༤. ཙ་ཏུ་ཀྐ་ནི་དྡེ་སོ
(༡) ཙ་ཏྟཱ་རོ ཨཱ་ས་ཝཱ
༩༣༧. ཏ་ཏྠ ཀ་ཏ་མེ ཙ་ཏྟཱ་རོ ཨཱ་ས་ཝཱ? ཀཱ་མཱ་ས་ཝོ, བྷ་ཝཱ་ས་ཝོ, དི་ཊྛཱ་ས་ཝོ, ཨ་ཝི་ཛྫཱ་ས་ཝོ.
(ཀ) ཀཱ་མཱ་ས་ཝོ
ཏ་ཏྠ ཀ་ཏ་མོ ཀཱ་མཱ་ས་ཝོ? ཡོ ཀཱ་མེ་སུ ཀཱ་མ་ཙྪ་ནྡོ ཀཱ་མ་རཱ་གོ ཀཱ་མ་ན་ནྡཱི ཀཱ་མ་ཏ་ཎྷཱ ཀཱ་མ་སི་ནེ་ཧོ ཀཱ་མ་པ་རི་ལཱ༹་ཧོ ཀཱ་མ་མུ་ཙྪཱ ཀཱ་མ་ཛ྄ཛྷོ་སཱ་ནཾ – ཨ་ཡཾ ཝུ་ཙྩ་ཏི ‘‘ཀཱ་མཱ་ས་ཝོ’’.
(ཁ) བྷ་ཝཱ་ས་ཝོ
ཏ་ཏྠ ཀ་ཏ་མོ བྷ་ཝཱ་ས་ཝོ? ཡོ བྷ་ཝེ་སུ བྷ་ཝ་ཙྪ་ནྡོ…པེ… བྷ་ཝ་ཛ྄ཛྷོ་སཱ་ནཾ – ཨ་ཡཾ ཝུ་ཙྩ་ཏི ‘‘བྷ་ཝཱ་ས་ཝོ’’.
(ག) དི་ཊྛཱ་ས་ཝོ
ཏ་ཏྠ ཀ་ཏ་མོ དི་ཊྛཱ་ས་ཝོ? ‘‘ས་སྶ་ཏོ ལོ་ཀོ’’ཏི ཝཱ, ‘‘ཨ་ས་སྶ་ཏོ ལོ་ཀོ’’ཏི ཝཱ, ‘‘ཨ་ནྟ་ཝཱ ལོ་ཀོ’’ཏི ཝཱ, ‘‘ཨ་ན་ནྟ་ཝཱ ལོ་ཀོ’’ཏི ཝཱ, ‘‘ཏཾ ཛཱི་ཝཾ ཏཾ ས་རཱི་ར’’ནྟི ཝཱ, ‘‘ཨ་ཉྙཾ ཛཱི་ཝཾ ཨ་ཉྙཾ ས་རཱི་ར’’ནྟི ཝཱ, ‘‘ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ‘‘ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ‘‘ཧོ་ཏི ཙ ན ཙ ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ‘‘ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘དི་ཊྛཱ་ས་ཝོ’’. ས་བྦཱ་པི མི་ཙྪཱ་དི་ཊྛི དི་ཊྛཱ་ས་ཝོ.
(གྷ) ཨ་ཝི་ཛྫཱ་ས་ཝོ
ཏ་ཏྠ ཀ་ཏ་མོ ཨ་ཝི་ཛྫཱ་ས་ཝོ? དུ་ཀྑེ ཨ་ཉྙཱ་ཎཾ, དུ་ཀྑ་ས་མུ་ད་ཡེ ཨ་ཉྙཱ་ཎཾ, དུ་ཀྑ་ནི་རོ་དྷེ ཨ་ཉྙཱ་ཎཾ, དུ་ཀྑ་ནི་རོ་དྷ་གཱ་མི་ནི་ཡཱ པ་ཊི་པ་དཱ་ཡ ཨ་ཉྙཱ་ཎཾ, པུ་བྦ་ནྟེ ཨ་ཉྙཱ་ཎཾ, ཨ་པ་ར་ནྟེ ཨ་ཉྙཱ་ཎཾ, པུ་བྦ་ནྟཱ་པ་ར་ནྟེ ཨ་ཉྙཱ་ཎཾ, ཨི་ད་པྤ་ཙྩ་ཡ་ཏཱ པ་ཊི་ཙྩ་ས་མུ་པྤ་ནྣེ་སུ དྷ་མྨེ་སུ ཨ་ཉྙཱ་ཎཾ. ཡཾ ཨེ་ཝ་རཱུ་པཾ ཨ་ཉྙཱ་ཎཾ ཨ་ད་སྶ་ནཾ…པེ… ཨ་ཝི་ཛྫཱ་ལ་ངྒཱི མོ་ཧོ ཨ་ཀུ་ས་ལ་མཱུ་ལཾ – ཨ་ཡཾ ཝུ་ཙྩ་ཏི ‘‘ཨ་ཝི་ཛྫཱ་ས་ཝོ’’. ཨི་མེ ཙ་ཏྟཱ་རོ ཨཱ་ས་ཝཱ.
(༢-༥) ཙ་ཏྟཱ་རོ ག་ནྠཱ་དཱི
༩༣༨. ཏ་ཏྠ ཀ་ཏ་མེ ཙ་ཏྟཱ་རོ ག་ནྠཱ …པེ… ཙ་ཏྟཱ་རོ ཨོ་གྷཱ…པེ… ཙ་ཏྟཱ་རོ ཡོ་གཱ…པེ… ཙ་ཏྟཱ་རི ཨུ་པཱ་དཱ་ནཱ་ནི? ཀཱ་མུ་པཱ་དཱ་ནཾ, དི་ཊྛུ་པཱ་དཱ་ནཾ, སཱི་ལ་བྦ་ཏུ་པཱ་དཱ་ནཾ, ཨ་ཏྟ་ཝཱ་དུ་པཱ་དཱ་ནཾ.
(ཀ) ཀཱ་མུ་པཱ་དཱ་ནཾ
ཏ་ཏྠ ཀ་ཏ་མཾ ཀཱ་མུ་པཱ་དཱ་ནཾ? ཡོ ཀཱ་མེ་སུ ཀཱ་མ་ཙྪ་ནྡོ…པེ… ཀཱ་མ་ཛ྄ཛྷོ་སཱ་ནཾ – ཨི་དཾ ཝུ་ཙྩ་ཏི ‘‘ཀཱ་མུ་པཱ་དཱ་ནཾ’’.
(ཁ) དི་ཊྛུ་པཱ་དཱ་ནཾ
ཏ་ཏྠ ཀ་ཏ་མཾ དི་ཊྛུ་པཱ་དཱ་ནཾ? ‘‘ན་ཏྠི དི་ནྣཾ, ན་ཏྠི ཡི་ཊྛཾ…པེ… ཡེ ཨི་མ་ཉྩ ལོ་ཀཾ པ་ར་ཉྩ ལོ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ནྟཱི’’ཏི. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨི་དཾ ཝུ་ཙྩ་ཏི ‘‘དི་ཊྛུ་པཱ་དཱ་ནཾ’’. ཋ་པེ་ཏྭཱ སཱི་ལ་བྦ་ཏུ་པཱ་དཱ་ན་ཉྩ ཨ་ཏྟ་ཝཱ་དུ་པཱ་དཱ་ན་ཉྩ ས་བྦཱ་པི མི་ཙྪཱ་དི་ཊྛི དི་ཊྛུ་པཱ་དཱ་ནཾ.
(ག) སཱི་ལ་བྦ་ཏུ་པཱ་དཱ་ནཾ
ཏ་ཏྠ ཀ་ཏ་མཾ སཱི་ལ་བྦ་ཏུ་པཱ་དཱ་ནཾ? ཨི་ཏོ བ་ཧི་དྡྷཱ ས་མ་ཎ་བྲཱ་ཧྨ་ཎཱ་ནཾ སཱི་ལེ་ན སུ་དྡྷི ཝ་ཏེ་ན སུ་དྡྷི སཱི་ལ་བྦ་ཏེ་ན སུ་དྡྷཱི་ཏི. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨི་དཾ ཝུ་ཙྩ་ཏི ‘‘སཱི་ལ་བྦ་ཏུ་པཱ་དཱ་ནཾ’’.
(གྷ) ཨ་ཏྟ་ཝཱ་དུ་པཱ་དཱ་ནཾ
ཏ་ཏྠ ཀ་ཏ་མཾ ཨ་ཏྟ་ཝཱ་དུ་པཱ་དཱ་ནཾ? ཨི་དྷ ཨ་སྶུ་ཏ་ཝཱ པུ་ཐུ་ཛྫ་ནོ ཨ་རི་ཡཱ་ནཾ ཨ་ད་སྶཱ་ཝཱི ཨ་རི་ཡ་དྷ་མྨ་སྶ ཨ་ཀོ་ཝི་དོ ཨ་རི་ཡ་དྷ་མྨེ ཨ་ཝི་ནཱི་ཏོ, ས་པྤུ་རི་སཱ་ནཾ ཨ་ད་སྶཱ་ཝཱི ས་པྤུ་རི་ས་དྷ་མྨ་སྶ ཨ་ཀོ་ཝི་དོ ས་པྤུ་རི་ས་དྷ་མྨེ ཨ་ཝི་ནཱི་ཏོ – རཱུ་པཾ ཨ་ཏྟ་ཏོ ས་མ་ནུ་པ་སྶ་ཏི རཱུ་པ་ཝ་ནྟཾ ཝཱ ཨ་ཏྟཱ་ནཾ ཨ་ཏྟ་ནི ཝཱ རཱུ་པཾ རཱུ་པ་སྨིཾ ཝཱ ཨ་ཏྟཱ་ནཾ. ཝེ་ད་ནཾ…པེ… ས་ཉྙཾ…པེ… ས་ངྑཱ་རེ…པེ… ཝི་ཉྙཱ་ཎཾ ཨ་ཏྟ་ཏོ ས་མ་ནུ་པ་སྶ་ཏི ཝི་ཉྙཱ་ཎ་ཝ་ནྟཾ ཝཱ ཨ་ཏྟཱ་ནཾ ཨ་ཏྟ་ནི ཝཱ ཝི་ཉྙཱ་ཎཾ ཝི་ཉྙཱ་ཎ་སྨིཾ ཝཱ ཨ་ཏྟཱ་ནཾ. ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨི་དཾ ཝུ་ཙྩ་ཏི ‘‘ཨ་ཏྟ་ཝཱ་དུ་པཱ་དཱ་ནཾ’’. ཨི་མཱ་ནི ཙ་ཏྟཱ་རི ཨུ་པཱ་དཱ་ནཱ་ནི.
(༦) ཙ་ཏྟཱ་རོ ཏ་ཎྷུ་པྤཱ་དཱ
༩༣༩. ཏ་ཏྠ ཀ་ཏ་མེ ཙ་ཏྟཱ་རོ ཏ་ཎྷུ་པྤཱ་དཱ? ཙཱི་ཝ་ར་ཧེ་ཏུ ཝཱ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, པི་ཎྜ་པཱ་ཏ་ཧེ་ཏུ ཝཱ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, སེ་ནཱ་ས་ན་ཧེ་ཏུ ཝཱ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི, ཨི་ཏི་བྷ་ཝཱ་བྷ་ཝ་ཧེ་ཏུ ཝཱ བྷི་ཀྑུ་ནོ ཏ་ཎྷཱ ཨུ་པྤ་ཛྫ་མཱ་ནཱ ཨུ་པྤ་ཛྫ་ཏི – ཨི་མེ ཙ་ཏྟཱ་རོ ཏ་ཎྷུ་པྤཱ་དཱ.
(༧) ཙ་ཏྟཱ་རི ཨ་ག་ཏི་ག་མ་ནཱ་ནི
ཏ་ཏྠ ཀ་ཏ་མཱ་ནི ཙ་ཏྟཱ་རི ཨ་ག་ཏི་ག་མ་ནཱ་ནི? ཚ་ནྡཱ་ག་ཏིཾ ག་ཙྪ་ཏི, དོ་སཱ་ག་ཏིཾ ག་ཙྪ་ཏི, མོ་ཧཱ་ག་ཏིཾ ག་ཙྪ་ཏི, བྷ་ཡཱ་ག་ཏིཾ ག་ཙྪ་ཏི. ཡཱ ཨེ་ཝ་རཱུ་པཱ ཨ་ག་ཏི ཨ་ག་ཏི་ག་མ་ནཾ ཚ་ནྡ་ག་མ་ནཾ ཝ་གྒ་ག་མ་ནཾ ཝཱ་རི་ག་མ་ནཾ – ཨི་མཱ་ནི ཙ་ཏྟཱ་རི ཨ་ག་ཏི་ག་མ་ནཱ་ནི.
(༨) ཙ་ཏྟཱ་རོ ཝི་པ་རི་ཡཱ་སཱ
ཏ་ཏྠ ཀ་ཏ་མེ ཙ་ཏྟཱ་རོ ཝི་པ་རི་ཡཱ་སཱ? ཨ་ནི་ཙྩེ ‘‘ནི་ཙྩ’’ནྟི ས་ཉྙཱ་ཝི་པ་རི་ཡཱ་སོ ཙི་ཏྟ་ཝི་པ་རི་ཡཱ་སོ དི་ཊྛི་ཝི་པ་རི་ཡཱ་སོ, དུ་ཀྑེ ‘‘སུ་ཁ’’ནྟི ས་ཉྙཱ་ཝི་པ་རི་ཡཱ་སོ ཙི་ཏྟ་ཝི་པ་རི་ཡཱ་སོ དི་ཊྛི་ཝི་པ་རི་ཡཱ་སོ, ཨ་ན་ཏྟ་ནི ‘‘ཨ་ཏྟཱ’’ཏི ས་ཉྙཱ་ཝི་པ་རི་ཡཱ་སོ ཙི་ཏྟ་ཝི་པ་རི་ཡཱ་སོ དི་ཊྛི་ཝི་པ་རི་ཡཱ་སོ, ཨ་སུ་བྷེ ‘‘སུ་བྷ’’ནྟི ས་ཉྙཱ་ཝི་པ་རི་ཡཱ་སོ ཙི་ཏྟ་ཝི་པ་རི་ཡཱ་སོ དི་ཊྛི་ཝི་པ་རི་ཡཱ་སོ – ཨི་མེ ཙ་ཏྟཱ་རོ ཝི་པ་རི་ཡཱ་སཱ.
(༩) ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ
ཏ་ཏྠ ཀ་ཏ་མེ ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ? ཨ་དི་ཊྛེ དི་ཊྛ་ཝཱ་དི་ཏཱ, ཨ་སྶུ་ཏེ སུ་ཏ་ཝཱ་དི་ཏཱ, ཨ་མུ་ཏེ མུ་ཏ་ཝཱ་དི་ཏཱ, ཨ་ཝི་ཉྙཱ་ཏེ ཝི་ཉྙཱ་ཏ་ཝཱ་དི་ཏཱ – ཨི་མེ ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ.
(༡༠) ཨ་པ་རེ་པི ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ
ཏ་ཏྠ ཀ་ཏ་མེ ཨ་པ་རེ་པི ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ? དི་ཊྛེ ཨ་དི་ཊྛ་ཝཱ་དི་ཏཱ, སུ་ཏེ ཨ་སྶུ་ཏ་ཝཱ་དི་ཏཱ, མུ་ཏེ ཨ་མུ་ཏ་ཝཱ་དི་ཏཱ, ཝི་ཉྙཱ་ཏེ ཨ་ཝི་ཉྙཱ་ཏ་ཝཱ་དི་ཏཱ – ཨི་མེ ཙ་ཏྟཱ་རོ ཨ་ན་རི་ཡ་ཝོ་ཧཱ་རཱ.
(༡༡) ཙ་ཏྟཱ་རི དུ་ཙྩ་རི་ཏཱ་ནི
ཏ་ཏྠ ཀ་ཏ་མཱ་ནི ཙ་ཏྟཱ་རི དུ་ཙྩ་རི་ཏཱ་ནི? པཱ་ཎཱ་ཏི་པཱ་ཏོ, ཨ་དི་ནྣཱ་དཱ་ནཾ, ཀཱ་མེ་སུ་མི་ཙྪཱ་ཙཱ་རོ, མུ་སཱ་ཝཱ་དོ – ཨི་མཱ་ནི ཙ་ཏྟཱ་རི དུ་ཙྩ་རི་ཏཱ་ནི.
(༡༢) ཨ་པ་རཱ་ནི་པི ཙ་ཏྟཱ་རི དུ་ཙྩ་རི་ཏཱ་ནི
ཏ་ཏྠ ཀ་ཏ་མཱ་ནི ཨ་པ་རཱ་ནི་པི ཙ་ཏྟཱ་རི དུ་ཙྩ་རི་ཏཱ་ནི? མུ་སཱ་ཝཱ་དོ, པི་སུ་ཎཱ ཝཱ་ཙཱ, ཕ་རུ་སཱ ཝཱ་ཙཱ, ས་མྥ་པྤ་ལཱ་པོ – ཨི་མཱ་ནི ཙ་ཏྟཱ་རི དུ་ཙྩ་རི་ཏཱ་ནི.
(༡༣) ཙ་ཏྟཱ་རི བྷ་ཡཱ་ནི
ཏ་ཏྠ ཀ་ཏ་མཱ་ནི ཙ་ཏྟཱ་རི བྷ་ཡཱ་ནི? ཛཱ་ཏི་བྷ་ཡཾ, ཛ་རཱ་བྷ་ཡཾ, བྱཱ་དྷི་བྷ་ཡཾ, མ་ར་ཎ་བྷ་ཡཾ – ཨི་མཱ་ནི ཙ་ཏྟཱ་རི བྷ་ཡཱ་ནི.
(༡༤) ཨ་པ་རཱ་ནི་པི ཙ་ཏྟཱ་རི བྷ་ཡཱ་ནི
ཏ་ཏྠ ཀ་ཏ་མཱ་ནི ཨ་པ་རཱ་ནི་པི ཙ་ཏྟཱ་རི བྷ་ཡཱ་ནི? རཱ་ཛ་བྷ་ཡཾ, ཙོ་ར་བྷ་ཡཾ, ཨ་གྒི་བྷ་ཡཾ, ཨུ་ད་ཀ་བྷ་ཡཾ – ཨི་མཱ་ནི ཙ་ཏྟཱ་རི བྷ་ཡཱ་ནི.
ཏ་ཏྠ ཀ་ཏ་མཱ་ནི ཨ་པ་རཱ་ནི་པི ཙ་ཏྟཱ་རི བྷ་ཡཱ་ནི? ཨཱུ་མི་བྷ་ཡཾ, ཀུ་མྦྷཱི་ལ་བྷ་ཡཾ [ཀུ་མྦྷཱི་ར་བྷ་ཡཾ, ཀུ་མྦྷཱི་ལ༹་བྷ་ཡཾ (?) (ཀུ་མྦྷ + ཨཱི་ར + ཨ = བྷ་ཡ)], ཨཱ་ཝ་ཊྚ་བྷ་ཡཾ, སུ་སུ་ཀཱ་བྷ་ཡཾ – ཨི་མཱ་ནི ཙ་ཏྟཱ་རི བྷ་ཡཱ་ནི.
ཏ་ཏྠ ཀ་ཏ་མཱ་ནི ཨ་པ་རཱ་ནི་པི ཙ་ཏྟཱ་རི བྷ་ཡཱ་ནི? ཨ་ཏྟཱ་ནུ་ཝཱ་ད་བྷ་ཡཾ, པ་རཱ་ནུ་ཝཱ་ད་བྷ་ཡཾ, ད་ཎྜ་བྷ་ཡཾ, དུ་གྒ་ཏི་བྷ་ཡཾ – ཨི་མཱ་ནི ཙ་ཏྟཱ་རི བྷ་ཡཱ་ནི.
(༡༥) ཙ་ཏ་སྶོ དི་ཊྛི་ཡོ
ཏ་ཏྠ ཀ་ཏ་མཱ ཙ་ཏ་སྶོ དི་ཊྛི་ཡོ? ‘‘ས་ཡ་ངྐ་ཏཾ སུ་ཁ་དུ་ཀྑ’’ནྟི ས་ཙྩ་ཏོ ཐེ་ཏ་ཏོ དི་ཊྛི ཨུ་པྤ་ཛྫ་ཏི, ‘‘པ་ར་ངྐ་ཏཾ སུ་ཁ་དུ་ཀྑ’’ནྟི ས་ཙྩ་ཏོ ཐེ་ཏ་ཏོ དི་ཊྛི ཨུ་པྤ་ཛྫ་ཏི, ‘‘ས་ཡ་ངྐ་ཏ་ཉྩ པ་ར་ངྐ་ཏ་ཉྩ སུ་ཁ་དུ་ཀྑ’’ནྟི ས་ཙྩ་ཏོ ཐེ་ཏ་ཏོ དི་ཊྛི ཨུ་པྤ་ཛྫ་ཏི, ‘‘ཨ་ས་ཡ་ངྐཱ་རཾ ཨ་པ་ར་ངྐཱ་རཾ ཨ་དྷི་ཙྩ་ས་མུ་པྤ་ནྣཾ སུ་ཁ་དུ་ཀྑ’’ནྟི ས་ཙྩ་ཏོ ཐེ་ཏ་ཏོ དི་ཊྛི ཨུ་པྤ་ཛྫ་ཏི – ཨི་མཱ ཙ་ཏ་སྶོ དི་ཊྛི་ཡོ.
ཙ་ཏུ་ཀྐཾ.