༢. དུ་ཀ་ནི་དྡེ་སོ
(༡) ཀོ་དྷོ ཙ ཨུ་པ་ནཱ་ཧོ ཙ
༨༩༡. (ཀ) ཏ་ཏྠ ཀ་ཏ་མོ ཀོ་དྷོ? ཡོ ཀོ་དྷོ ཀུ་ཛ྄ཛྷ་ནཱ ཀུ་ཛ྄ཛྷི་ཏ་ཏྟཾ དོ་སོ དུ་སྶ་ནཱ དུ་སྶི་ཏ་ཏྟཾ བྱཱ་པ་ཏྟི བྱཱ་པ་ཛྫ་ནཱ བྱཱ་པ་ཛྫི་ཏ་ཏྟཾ ཝི་རོ་དྷོ པ་ཊི་ཝི་རོ་དྷོ ཙ་ཎྜི་ཀྐཾ ཨ་སུ་རོ་པོ ཨ་ན་ཏྟ་མ་ན་ཏཱ ཙི་ཏྟ་སྶ – ཨ་ཡཾ ཝུ་ཙྩ་ཏི ‘‘ཀོ་དྷོ’’.
(ཁ) ཏ་ཏྠ ཀ་ཏ་མོ ཨུ་པ་ནཱ་ཧོ? པུ་བྦ་ཀཱ་ལཾ ཀོ་དྷོ, ཨ་པ་ར་ཀཱ་ལཾ ཨུ་པ་ནཱ་ཧོ. ཡོ ཨེ་ཝ་རཱུ་པོ ཨུ་པ་ནཱ་ཧོ ཨུ་པ་ན་ཡ྄ཧ་ནཱ ཨུ་པ་ན་ཡ྄ཧི་ཏ་ཏྟཾ ཨ་ཊྛ་པ་ནཱ ཋ་པ་ནཱ ས་ཎྛ་པ་ནཱ ཨ་ནུ་སཾ་ས་ནྡ་ནཱ ཨ་ནུ་པྤ་བ་ནྡྷ་ནཱ ད་ལ༹ྷཱི་ཀ་མྨཾ ཀོ་དྷ་སྶ – ཨ་ཡཾ ཝུ་ཙྩ་ཏི ‘‘ཨུ་པ་ནཱ་ཧོ’’.
(༢) མ་ཀྑོ ཙ པ་ལཱ༹་སོ ཙ
༨༩༢. (ཀ) ཏ་ཏྠ ཀ་ཏ་མོ མ་ཀྑོ? ཡོ མ་ཀྑོ མ་ཀྑཱ་ཡ་ནཱ མ་ཀྑཱ་ཡི་ཏ་ཏྟཾ [མ་ཀྑི་ཡ་ནཱ མ་ཀྑི་ཡི་ཏ་ཏྟཾ (སཱི. ཀ.)] ནི་ཊྛུ་རི་ཡཾ ནི་ཊྛུ་རི་ཡ་ཀ་མྨཾ – ཨ་ཡཾ ཝུ་ཙྩ་ཏི ‘‘མ་ཀྑོ’’.
(ཁ) ཏ་ཏྠ ཀ་ཏ་མོ པ་ལཱ༹་སོ? ཡོ པ་ལཱ༹་སོ པ་ལཱ༹་སཱ་ཡ་ནཱ [པ་ལཱ་སཱ་ཡ་ནཱ པ་ལཱ་སཱ་ཡི་ཏ་ཏྟཾ (སྱཱ.)] པ་ལཱ༹་སཱ་ཧཱ་རོ ཝི་ཝཱ་ད་ཊྛཱ་ནཾ ཡུ་ག་གྒཱ་ཧོ ཨ་པྤ་ཊི་ནི་སྶ་གྒོ – ཨ་ཡཾ ཝུ་ཙྩ་ཏི ‘‘པ་ལཱ༹་སོ’’.
(༣) ཨི་སྶཱ ཙ མ་ཙྪ་རི་ཡ་ཉྩ
༨༩༣. (ཀ) ཏ་ཏྠ ཀ་ཏ་མཱ ཨི་སྶཱ? ཡཱ པ་ར་ལཱ་བྷ་ས་ཀྐཱ་ར་ག་རུ་ཀཱ་ར་མཱ་ན་ན་ཝ་ནྡ་ན་པཱུ་ཛ་ནཱ་སུ ཨི་སྶཱ ཨི་སྶཱ་ཡ་ནཱ ཨི་སྶཱ་ཡི་ཏ་ཏྟཾ ཨུ་སཱུ་ཡཱ ཨུ་སཱུ་ཡ་ནཱ ཨུ་སཱུ་ཡི་ཏ་ཏྟཾ – ཨ་ཡཾ ཝུ་ཙྩ་ཏི ‘‘ཨི་སྶཱ’’.
(ཁ) ཏ་ཏྠ ཀ་ཏ་མཾ མ་ཙྪ་རི་ཡཾ? པ་ཉྩ མ་ཙྪ་རི་ཡཱ་ནི – ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ. ཡཾ ཨེ་ཝ་རཱུ་པཾ མ་ཙྪེ་རཾ མ་ཙྪ་རཱ་ཡ་ནཱ མ་ཙྪ་རཱ་ཡི་ཏ་ཏྟཾ ཝེ་ཝི་ཙྪཾ ཀ་ད་རི་ཡཾ ཀ་ཊུ་ཀ་ཉྩུ་ཀ་ཏཱ ཨ་གྒ་ཧི་ཏ་ཏྟཾ [པ་གྒ་ཧི་ཏ་ཏྟཾ (སཱི. ཀ.) དྷ. ས. ༡༡༢༧] ཙི་ཏྟ་སྶ – ཨི་དཾ ཝུ་ཙྩ་ཏི ‘‘མ་ཙྪ་རི་ཡཾ’’.
(༤) མཱ་ཡཱ ཙ སཱ་ཋེ་ཡྻ་ཉྩ
༨༩༤. (ཀ) ཏ་ཏྠ ཀ་ཏ་མཱ མཱ་ཡཱ? ཨི་དྷེ་ཀ་ཙྩོ ཀཱ་ཡེ་ན དུ་ཙྩ་རི་ཏཾ ཙ་རི་ཏྭཱ, ཝཱ་ཙཱ་ཡ དུ་ཙྩ་རི་ཏཾ ཙ་རི་ཏྭཱ, མ་ན་སཱ དུ་ཙྩ་རི་ཏཾ ཙ་རི་ཏྭཱ ཏ་སྶ པ་ཊི་ཙྪཱ་ད་ན་ཧེ་ཏུཾ པཱ་པི་ཀཾ ཨི་ཙྪཾ པ་ཎི་ད་ཧ་ཏི. ‘‘མཱ མཾ ཛ་ཉྙཱ’’ཏི ཨི་ཙྪ་ཏི. ‘‘མཱ མཾ ཛ་ཉྙཱ’’ཏི ས་ངྐ་པྤེ་ཏི. ‘‘མཱ མཾ ཛ་ཉྙཱ’’ཏི ཝཱ་ཙཾ བྷཱ་ས་ཏི. ‘‘མཱ མཾ ཛ་ཉྙཱ’’ཏི ཀཱ་ཡེ་ན པ་ར་ཀྐ་མ་ཏི. ཡཱ ཨེ་ཝ་རཱུ་པཱ མཱ་ཡཱ མཱ་ཡཱ་ཝི་ཏཱ ཨ་ཙྩཱ་ས་རཱ ཝ་ཉྩ་ནཱ ནི་ཀ་ཏི ཝི་ཀི་ར་ཎཱ པ་རི་ཧ་ར་ཎཱ གཱུ་ཧ་ནཱ པ་རི་གཱུ་ཧ་ནཱ ཚཱ་ད་ནཱ པ་ཊི་ཙྪཱ་ད་ནཱ ཨ་ནུ་ཏྟཱ་ནཱི་ཀ་མྨཾ ཨ་ནཱ་ཝི་ཀ་མྨཾ ཝོ་ཙྪཱ་ད་ནཱ པཱ་པ་ཀི་རི་ཡཱ – ཨ་ཡཾ ཝུ་ཙྩ་ཏི ‘‘མཱ་ཡཱ’’.
(ཁ) ཏ་ཏྠ ཀ་ཏ་མཾ སཱ་ཋེ་ཡྻཾ? ཨི་དྷེ་ཀ་ཙྩོ ས་ཋོ ཧོ་ཏི པ་རི་ས་ཋོ. ཡཾ ཏ་ཏྠ ས་ཋཾ ས་ཋ་ཏཱ སཱ་ཋེ་ཡྻཾ ཀ་ཀྐ་ར་ཏཱ ཀ་ཀྐ་རི་ཡཾ [ཀ་ཀྑ་ལ༹་ཏཱ ཀ་ཀྑ་ལི༹་ཡཾ (སྱཱ.)] པ་རི་ཀྑ་ཏྟ་ཏཱ པཱ་རི་ཀྑ་ཏྟི་ཡཾ – ཨི་དཾ ཝུ་ཙྩ་ཏི ‘‘སཱ་ཋེ་ཡྻཾ’’.
(༥) ཨ་ཝི་ཛྫཱ ཙ བྷ་ཝ་ཏ་ཎྷཱ ཙ
༨༩༥. (ཀ) ཏ་ཏྠ ཀ་ཏ་མཱ ཨ་ཝི་ཛྫཱ? ཡཾ ཨ་ཉྙཱ་ཎཾ ཨ་ད་སྶ་ནཾ…པེ… ཨ་ཝི་ཛྫཱ་ལ་ངྒཱི མོ་ཧོ ཨ་ཀུ་ས་ལ་མཱུ་ལཾ – ཨ་ཡཾ ཝུ་ཙྩ་ཏི ‘‘ཨ་ཝི་ཛྫཱ’’.
(ཁ) ཏ་ཏྠ ཀ་ཏ་མཱ བྷ་ཝ་ཏ་ཎྷཱ? ཡོ བྷ་ཝེ་སུ བྷ་ཝ་ཙྪ་ནྡོ བྷ་ཝ་རཱ་གོ བྷ་ཝ་ན་ནྡཱི བྷ་ཝ་ཏ་ཎྷཱ བྷ་ཝ་སི་ནེ་ཧོ བྷ་ཝ་པ་རི་ལཱ༹་ཧོ བྷ་ཝ་མུ་ཙྪཱ བྷ་ཝ་ཛ྄ཛྷོ་སཱ་ནཾ – ཨ་ཡཾ ཝུ་ཙྩ་ཏི ‘‘བྷ་ཝ་ཏ་ཎྷཱ’’.
(༦) བྷ་ཝ་དི་ཊྛི ཙ ཝི་བྷ་ཝ་དི་ཊྛི ཙ
༨༩༦. (ཀ) ཏ་ཏྠ ཀ་ཏ་མཱ བྷ་ཝ་དི་ཊྛི? ‘‘བྷ་ཝི་སྶ་ཏི ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘བྷ་ཝ་དི་ཊྛི’’.
(ཁ) ཏ་ཏྠ ཀ་ཏ་མཱ ཝི་བྷ་ཝ་དི་ཊྛི? ‘‘ན བྷ་ཝི་སྶ་ཏི ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ཝི་བྷ་ཝ་དི་ཊྛི.
(༧) ས་སྶ་ཏ་དི་ཊྛི ཙ ཨུ་ཙྪེ་ད་དི་ཊྛི ཙ
༨༩༧. (ཀ) ཏ་ཏྠ ཀ་ཏ་མཱ ས་སྶ་ཏ་དི་ཊྛི? ‘‘ས་སྶ་ཏོ ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘ས་སྶ་ཏ་དི་ཊྛི’’.
(ཁ) ཏ་ཏྠ ཀ་ཏ་མཱ ཨུ་ཙྪེ་ད་དི་ཊྛི? ‘‘ཨུ་ཙྪི་ཛྫི་སྶ་ཏི ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘ཨུ་ཙྪེ་ད་དི་ཊྛི’’.
(༨) ཨ་ནྟ་ཝཱ་དི་ཊྛི ཙ ཨ་ན་ནྟ་ཝཱ་དི་ཊྛི ཙ
༨༩༨. (ཀ) ཏ་ཏྠ ཀ་ཏ་མཱ ཨ་ནྟ་ཝཱ་དི་ཊྛི? ‘‘ཨ་ནྟ་ཝཱ ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘ཨ་ནྟ་ཝཱ་དི་ཊྛི’’.
(ཁ) ཏ་ཏྠ ཀ་ཏ་མཱ ཨ་ན་ནྟ་ཝཱ་དི་ཊྛི? ‘‘ཨ་ན་ནྟ་ཝཱ ཨ་ཏྟཱ ཙ ལོ་ཀོ ཙཱ’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘ཨ་ན་ནྟ་ཝཱ་དི་ཊྛི’’.
(༩) པུ་བྦ་ནྟཱ་ནུ་དི་ཊྛི ཙ ཨ་པ་ར་ནྟཱ་ནུ་དི་ཊྛི ཙ
༨༩༩. (ཀ) ཏ་ཏྠ ཀ་ཏ་མཱ པུ་བྦ་ནྟཱ་ནུ་དི་ཊྛི? པུ་བྦ་ནྟཾ ཨཱ་ར་བྦྷ ཡཱ ཨུ་པྤ་ཛྫ་ཏི དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘པུ་བྦ་ནྟཱ་ནུ་དི་ཊྛི’’.
(ཁ) ཏ་ཏྠ ཀ་ཏ་མཱ ཨ་པ་ར་ནྟཱ་ནུ་དི་ཊྛི? ཨ་པ་ར་ནྟཾ ཨཱ་ར་བྦྷ ཡཱ ཨུ་པྤ་ཛྫ་ཏི དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘ཨ་པ་ར་ནྟཱ་ནུ་དི་ཊྛི’’.
(༡༠) ཨ་ཧི་རི་ཀ་ཉྩ ཨ་ནོ་ཏྟ་པྤ་ཉྩ
༩༠༠. (ཀ) ཏ་ཏྠ ཀ་ཏ་མཾ ཨ་ཧི་རི་ཀཾ? ཡཾ ན ཧི་རཱི་ཡ་ཏི ཧི་རི་ཡི་ཏ་བྦེ་ན, ན ཧི་རཱི་ཡ་ཏི པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ – ཨི་དཾ ཝུ་ཙྩ་ཏི ‘‘ཨ་ཧི་རི་ཀཾ’’.
(ཁ) ཏ་ཏྠ ཀ་ཏ་མཾ ཨ་ནོ་ཏྟ་པྤཾ? ཡཾ ན ཨོ་ཏྟ་པྤ་ཏི ཨོ་ཏྟ་པྤི་ཏ་བྦེ་ན ན ཨོ་ཏྟ་པྤ་ཏི པཱ་པ་ཀཱ་ནཾ ཨ་ཀུ་ས་ལཱ་ནཾ དྷ་མྨཱ་ནཾ ས་མཱ་པ་ཏྟི་ཡཱ – ཨི་དཾ ཝུ་ཙྩ་ཏི ‘‘ཨ་ནོ་ཏྟ་པྤཾ’’.
(༡༡) དོ་ཝ་ཙ་སྶ་ཏཱ ཙ པཱ་པ་མི་ཏྟ་ཏཱ ཙ
༩༠༡. (ཀ) ཏ་ཏྠ ཀ་ཏ་མཱ དོ་ཝ་ཙ་སྶ་ཏཱ? ས་ཧ་དྷ་མྨི་ཀེ ཝུ་ཙྩ་མཱ་ནེ དོ་ཝ་ཙ་སྶཱ་ཡཾ དོ་ཝ་ཙ་སྶི་ཡཾ དོ་ཝ་ཙ་སྶ་ཏཱ ཝི་པྤ་ཊི་ཀུ་ལ་གྒཱ་ཧི་ཏཱ ཝི་པ་ཙྩ་ནཱི་ཀ་སཱ་ཏ་ཏཱ ཨ་ནཱ་ད་རི་ཡཾ ཨ་ནཱ་ད་ར་ཏཱ ཨ་གཱ་ར་ཝ་ཏཱ ཨ་པྤ་ཏི་སྶ་ཝ་ཏཱ – ཨ་ཡཾ ཝུ་ཙྩ་ཏི ‘‘དོ་ཝ་ཙ་སྶ་ཏཱ’’.
(ཁ) ཏ་ཏྠ ཀ་ཏ་མཱ པཱ་པ་མི་ཏྟ་ཏཱ? ཡེ ཏེ པུ་གྒ་ལཱ ཨ་སྶ་དྡྷཱ དུ་སྶཱི་ལཱ ཨ་པྤ་སྶུ་ཏཱ མ་ཙྪ་རི་ནོ དུ་པྤ་ཉྙཱ, ཡཱ ཏེ་སཾ སེ་ཝ་ནཱ ནི་སེ་ཝ་ནཱ སཾ་སེ་ཝ་ནཱ བྷ་ཛ་ནཱ ས་མྦྷ་ཛ་ནཱ བྷ་ཏྟི ས་མྦྷ་ཏྟི ས་མྤ་ཝ་ངྐ་ཏཱ – ཨ་ཡཾ ཝུ་ཙྩ་ཏི ‘‘པཱ་པ་མི་ཏྟ་ཏཱ’’.
(༡༢) ཨ་ན་ཛྫ་ཝོ ཙ ཨ་མ་དྡ་ཝོ ཙ
༩༠༢. (ཀ) ཏ་ཏྠ ཀ་ཏ་མོ ཨ་ན་ཛྫ་ཝོ? ཡོ ཨ་ན་ཛྫ་ཝོ ཨ་ན་ཛྫ་ཝ་ཏཱ ཛི་མྷ་ཏཱ ཝ་ངྐ་ཏཱ ཀུ་ཊི་ལ་ཏཱ – ཨ་ཡཾ ཝུ་ཙྩ་ཏི ‘‘ཨ་ན་ཛྫ་ཝོ’’.
(ཁ) ཏ་ཏྠ ཀ་ཏ་མོ ཨ་མ་དྡ་ཝོ? ཡཱ ཨ་མུ་དུ་ཏཱ ཨ་མ་དྡ་ཝ་ཏཱ ཀ་ཀྑ་ལི༹་ཡཾ ཕཱ་རུ་སི་ཡཾ ཀ་ཀྑ་ལ༹་ཏཱ ཀ་ཋི་ན་ཏཱ [ཀ་ཐི་ན་ཏཱ (སྱཱ. ཀ.)] ཨུ་ཛུ་ཙི་ཏྟ་ཏཱ ཨ་མུ་དུ་ཏཱ – ཨ་ཡཾ ཝུ་ཙྩ་ཏི ‘‘ཨ་མ་དྡ་ཝོ’’.
(༡༣) ཨ་ཀྑ་ནྟི ཙ ཨ་སོ་ར་ཙྩ་ཉྩ
༩༠༣. (ཀ) ཏ་ཏྠ ཀ་ཏ་མཱ ཨ་ཀྑ་ནྟི? ཡཱ ཨ་ཀྑ་ནྟི ཨ་ཀྑ་མ་ན་ཏཱ ཨ་ན་དྷི་ཝཱ་ས་ན་ཏཱ ཙ་ཎྜི་ཀྐཾ ཨ་སུ་རོ་པོ ཨ་ན་ཏྟ་མ་ན་ཏཱ ཙི་ཏྟ་སྶ – ཨ་ཡཾ ཝུ་ཙྩ་ཏི ‘‘ཨ་ཀྑ་ནྟི’’.
(ཁ) ཏ་ཏྠ ཀ་ཏ་མཾ ཨ་སོ་ར་ཙྩཾ? ཀཱ་ཡི་ཀོ ཝཱི་ཏི་ཀྐ་མོ ཝཱ་ཙ་སི་ཀོ ཝཱི་ཏི་ཀྐ་མོ ཀཱ་ཡི་ཀ་ཝཱ་ཙ་སི་ཀོ ཝཱི་ཏི་ཀྐ་མོ – ཨི་དཾ ཝུ་ཙྩ་ཏི ‘‘ཨ་སོ་ར་ཙྩཾ’’. ས་བྦ་མྤི དུ་སྶཱི་ལྱཾ ཨ་སོ་ར་ཙྩཾ.
(༡༤) ཨ་སཱ་ཁ་ལྱ་ཉྩ ཨ་པྤ་ཊི་ས་ནྠཱ་རོ ཙ
༩༠༤. (ཀ) ཏ་ཏྠ ཀ་ཏ་མཾ ཨ་སཱ་ཁ་ལྱཾ? ཡཱ སཱ ཝཱ་ཙཱ ཀ་ཎྜ་ཀཱ ཀ་ཀྐ་སཱ པ་ར་ཀ་ཊུ་ཀཱ པ་རཱ་བྷི་ས་ཛྫ་ནཱི ཀོ་དྷ་སཱ་མ་ནྟཱ ཨ་ས་མཱ་དྷི་སཾ་ཝ་ཏྟ་ནི་ཀཱ ཏ་ཐཱ་རཱུ་པིཾ ཝཱ་ཙཾ བྷཱ་སི་ཏཱ ཧོ་ཏི. ཡཱ ཏ་ཏྠ ཨ་ས་ཎྷ་ཝཱ་ཙ་ཏཱ ཨ་ས་ཁི་ལ་ཝཱ་ཙ་ཏཱ ཕ་རུ་ས་ཝཱ་ཙ་ཏཱ – ཨི་དཾ ཝུ་ཙྩ་ཏི ‘‘ཨ་སཱ་ཁ་ལྱཾ’’.
(ཁ) ཏ་ཏྠ ཀ་ཏ་མོ ཨ་པྤ་ཊི་ས་ནྠཱ་རོ [ཨ་པྤ་ཊི་ས་ནྡྷཱ་རོ (ཀ.)]? དྭེ པ་ཊི་ས་ནྠཱ་རཱ – ཨཱ་མི་ས་པ་ཊི་ས་ནྠཱ་རོ ཙ དྷ་མྨ་པ་ཊི་ས་ནྠཱ་རོ ཙ. ཨི་དྷེ་ཀ་ཙྩོ ཨ་པྤ་ཊི་ས་ནྠཱ་ར་ཀོ ཧོ་ཏི ཨཱ་མི་ས་པ་ཊི་ས་ནྠཱ་རེ་ན ཝཱ དྷ་མྨ་པ་ཊི་ས་ནྠཱ་རེ་ན ཝཱ – ཨ་ཡཾ ཝུ་ཙྩ་ཏི ‘‘ཨ་པྤ་ཊི་ས་ནྠཱ་རོ’’.
(༡༥) ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ ཙ བྷོ་ཛ་ནེ ཨ་མ་ཏྟ་ཉྙུ་ཏཱ ཙ
༩༠༥. (ཀ) ཏ་ཏྠ ཀ་ཏ་མཱ ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ? ཨི་དྷེ་ཀ་ཙྩོ ཙ་ཀྑུ་ནཱ རཱུ་པཾ དི་སྭཱ ནི་མི་ཏྟ་གྒཱ་ཧཱི ཧོ་ཏི ཨ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ ཙ་ཀྑུ་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ ན པ་ཊི་པ་ཛྫ་ཏི, ན ར་ཀྑ་ཏི ཙ་ཀྑུ་ནྡྲི་ཡཾ, ཙ་ཀྑུ་ནྡྲི་ཡེ ན སཾ་ཝ་རཾ ཨཱ་པ་ཛྫ་ཏི. སོ་ཏེ་ན ས་དྡཾ སུ་ཏྭཱ…པེ… གྷཱ་ནེ་ན ག་ནྡྷཾ གྷཱ་ཡི་ཏྭཱ…པེ… ཛི་ཝ྄ཧཱ་ཡ ར་སཾ སཱ་ཡི་ཏྭཱ…པེ… ཀཱ་ཡེ་ན ཕོ་ཊྛ་བྦཾ ཕུ་སི་ཏྭཱ…པེ… མ་ན་སཱ དྷ་མྨཾ ཝི་ཉྙཱ་ཡ ནི་མི་ཏྟ་གྒཱ་ཧཱི ཧོ་ཏི ཨ་ནུ་བྱ་ཉྫ་ན་གྒཱ་ཧཱི. ཡ་ཏྭཱ་དྷི་ཀ་ར་ཎ་མེ་ནཾ མ་ནི་ནྡྲི་ཡཾ ཨ་སཾ་ཝུ་ཏཾ ཝི་ཧ་ར་ནྟཾ ཨ་བྷི་ཛ྄ཛྷཱ་དོ་མ་ན་སྶཱ པཱ་པ་ཀཱ ཨ་ཀུ་ས་ལཱ དྷ་མྨཱ ཨ་ནྭཱ་སྶ་ཝེ་ཡྻུཾ, ཏ་སྶ སཾ་ཝ་རཱ་ཡ ན པ་ཊི་པ་ཛྫ་ཏི, ན ར་ཀྑ་ཏི མ་ནི་ནྡྲི་ཡཾ, མ་ནི་ནྡྲི་ཡེ ན སཾ་ཝ་རཾ ཨཱ་པ་ཛྫ་ཏི. ཡཱ ཨི་མེ་སཾ ཚ་ནྣཾ ཨི་ནྡྲི་ཡཱ་ནཾ ཨ་གུ་ཏྟི ཨ་གོ་པ་ནཱ ཨ་ནཱ་ར་ཀྑོ ཨ་སཾ་ཝ་རོ – ཨ་ཡཾ ཝུ་ཙྩ་ཏི ‘‘ཨི་ནྡྲི་ཡེ་སུ ཨ་གུ་ཏྟ་དྭཱ་ར་ཏཱ’’.
(ཁ) ཏ་ཏྠ ཀ་ཏ་མཱ བྷོ་ཛ་ནེ ཨ་མ་ཏྟ་ཉྙུ་ཏཱ? ཨི་དྷེ་ཀ་ཙྩོ ཨ་པྤ་ཊི་ས་ངྑཱ ཨ་ཡོ་ནི་སོ ཨཱ་ཧཱ་རཾ ཨཱ་ཧཱ་རེ་ཏི ད་ཝཱ་ཡ མ་དཱ་ཡ མ་ཎྜ་ནཱ་ཡ ཝི་བྷཱུ་ས་ནཱ་ཡ. ཡཱ ཏ་ཏྠ ཨ་ས་ནྟུ་ཊྛི་ཏཱ ཨ་མ་ཏྟ་ཉྙུ་ཏཱ ཨ་པྤ་ཊི་ས་ངྑཱ བྷོ་ཛ་ནེ – ཨ་ཡཾ ཝུ་ཙྩ་ཏི ‘‘བྷོ་ཛ་ནེ ཨ་མ་ཏྟ་ཉྙུ་ཏཱ.’’
(༡༦) མུ་ཊྛ་སྶ་ཙྩ་ཉྩ ཨ་ས་མྤ་ཛ་ཉྙ་ཉྩ
༩༠༦. (ཀ) ཏ་ཏྠ ཀ་ཏ་མཾ མུ་ཊྛ་སྶ་ཙྩཾ? ཡཱ ཨ་སྶ་ཏི ཨ་ན་ནུ་སྶ་ཏི ཨ་པྤ་ཊི་སྶ་ཏི ཨ་སྶ་ཏི ཨ་སྶ་ར་ཎ་ཏཱ ཨ་དྷཱ་ར་ཎ་ཏཱ པི་ལཱ་པ་ན་ཏཱ ས་མྨུ་ས་ན་ཏཱ – ཨི་དཾ ཝུ་ཙྩ་ཏི ‘‘མུ་ཊྛ་སྶ་ཙྩཾ’’.
(ཁ) ཏ་ཏྠ ཀ་ཏ་མཾ ཨ་ས་མྤ་ཛ་ཉྙཾ? ཡཾ ཨ་ཉྙཱ་ཎཾ ཨ་ད་སྶ་ནཾ…པེ… ཨ་ཝི་ཛྫཱ་ལ་ངྒཱི མོ་ཧོ ཨ་ཀུ་ས་ལ་མཱུ་ལཾ – ཨི་དཾ ཝུ་ཙྩ་ཏི ‘‘ཨ་ས་མྤ་ཛ་ཉྙཾ’’.
(༡༧) སཱི་ལ་ཝི་པ་ཏྟི ཙ དི་ཊྛི་ཝི་པ་ཏྟི ཙ
༩༠༧. (ཀ) ཏ་ཏྠ ཀ་ཏ་མཱ སཱི་ལ་ཝི་པ་ཏྟི? ཡོ ཀཱ་ཡི་ཀོ ཝཱི་ཏི་ཀྐ་མོ ཝཱ་ཙ་སི་ཀོ ཝཱི་ཏི་ཀྐ་མོ ཀཱ་ཡི་ཀ་ཝཱ་ཙ་སི་ཀོ ཝཱི་ཏི་ཀྐ་མོ – ཨ་ཡཾ ཝུ་ཙྩ་ཏི ‘‘སཱི་ལ་ཝི་པ་ཏྟི’’. ས་བྦ་མྤི དུ་སྶཱི་ལྱཾ སཱི་ལ་ཝི་པ་ཏྟི.
(ཁ) ཏ་ཏྠ ཀ་ཏ་མཱ དི་ཊྛི་ཝི་པ་ཏྟི? ‘‘ན་ཏྠི དི་ནྣཾ, ན་ཏྠི ཡི་ཊྛཾ…པེ… ཡེ ཨི་མ་ཉྩ ལོ་ཀཾ པ་ར་ཉྩ ལོ་ཀཾ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དེ་ནྟཱི’’ཏི – ཡཱ ཨེ་ཝ་རཱུ་པཱ དི་ཊྛི དི་ཊྛི་ག་ཏཾ…པེ… ཝི་པ་རི་ཡཱ་ས་གྒཱ་ཧོ – ཨ་ཡཾ ཝུ་ཙྩ་ཏི ‘‘དི་ཊྛི་ཝི་པ་ཏྟི’’. ས་བྦཱ་པི མི་ཙྪཱ་དི་ཊྛི དི་ཊྛི་ཝི་པ་ཏྟི.
(༡༨) ཨ་ཛ྄ཛྷ་ཏྟ་སཾ་ཡོ་ཛ་ན་ཉྩ བ་ཧི་དྡྷཱ་སཾ་ཡོ་ཛ་ན་ཉྩ
༩༠༨. (ཀ) ཏ་ཏྠ ཀ་ཏ་མཾ ཨ་ཛ྄ཛྷ་ཏྟ་སཾ་ཡོ་ཛ་ནཾ? པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི – ཨ་ཛ྄ཛྷ་ཏྟ་སཾ་ཡོ་ཛ་ནཾ. (ཁ) པ་ཉྩུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི – བ་ཧི་དྡྷཱ་སཾ་ཡོ་ཛ་ནཾ.
དུ་ཀཾ.