༩. ན་ཝ་ཀ་ནི་དྡེ་སོ
(༡) ན་ཝ ཨཱ་གྷཱ་ཏ་ཝ་ཏྠཱུ་ནི
༩༦༠. ཏ་ཏྠ ཀ་ཏ་མཱ་ནི ན་ཝ ཨཱ་གྷཱ་ཏ་ཝ་ཏྠཱུ་ནི? ‘‘ཨ་ན་ཏྠཾ མེ ཨ་ཙ་རཱི’’ཏི ཨཱ་གྷཱ་ཏོ ཛཱ་ཡ་ཏི; ‘‘ཨ་ན་ཏྠཾ མེ ཙ་ར་ཏཱི’’ཏི ཨཱ་གྷཱ་ཏོ ཛཱ་ཡ་ཏི; ‘‘ཨ་ན་ཏྠཾ མེ ཙ་རི་སྶ་ཏཱི’’ཏི ཨཱ་གྷཱ་ཏོ ཛཱ་ཡ་ཏི; ‘‘པི་ཡ་སྶ མེ མ་ནཱ་པ་སྶ ཨ་ན་ཏྠཾ ཨ་ཙ་རི’’…པེ… ཨ་ན་ཏྠཾ ཙ་ར་ཏི…པེ… ཨ་ན་ཏྠཾ ཙ་རི་སྶ་ཏཱི་ཏི ཨཱ་གྷཱ་ཏོ ཛཱ་ཡ་ཏི; ཨ་པྤི་ཡ་སྶ མེ ཨ་མ་ནཱ་པ་སྶ ཨ་ཏྠཾ ཨ་ཙ་རི…པེ… ཨ་ཏྠཾ ཙ་ར་ཏི…པེ… ཨ་ཏྠཾ ཙ་རི་སྶ་ཏཱི་ཏི ཨཱ་གྷཱ་ཏོ ཛཱ་ཡ་ཏི. ཨི་མཱ་ནི ན་ཝ ཨཱ་གྷཱ་ཏ་ཝ་ཏྠཱུ་ནི.
(༢) ན་ཝ པུ་རི་ས་མ་ལཱ་ནི
༩༦༡. ཏ་ཏྠ ཀ་ཏ་མཱ་ནི ན་ཝ པུ་རི་ས་མ་ལཱ་ནི? ཀོ་དྷོ, མ་ཀྑོ, ཨི་སྶཱ, མ་ཙྪ་རི་ཡཾ, མཱ་ཡཱ, སཱ་ཋེ་ཡྻཾ, མུ་སཱ་ཝཱ་དོ, པཱ་པི་ཙྪ་ཏཱ, མི་ཙྪཱ་དི་ཊྛི – ཨི་མཱ་ནི ན་ཝ པུ་རི་ས་མ་ལཱ་ནི.
(༣) ན་ཝ་ཝི་དྷཱ མཱ་ནཱ
༩༦༢. ཏ་ཏྠ ཀ་ཏ་མེ ན་ཝ་ཝི་དྷཱ མཱ་ནཱ? ‘‘སེ་ཡྻ་སྶ སེ་ཡྻོ་ཧ་མ་སྨཱི’’ཏི མཱ་ནོ, ‘‘སེ་ཡྻ་སྶ ས་དི་སོ་ཧ་མ་སྨཱི’’ཏི མཱ་ནོ, ‘‘སེ་ཡྻ་སྶ ཧཱི་ནོ་ཧ་མ་སྨཱི’’ཏི མཱ་ནོ, ‘‘ས་དི་ས་སྶ སེ་ཡྻོ་ཧ་མ་སྨཱི’’ཏི མཱ་ནོ, ‘‘ས་དི་ས་སྶ ས་དི་སོ་ཧ་མ་སྨཱི’’ཏི མཱ་ནོ, ‘‘ས་དི་ས་སྶ ཧཱི་ནོ་ཧ་མ་སྨཱི’’ཏི མཱ་ནོ, ‘‘ཧཱི་ན་སྶ སེ་ཡྻོ་ཧ་མ་སྨཱི’’ཏི མཱ་ནོ, ‘‘ཧཱི་ན་སྶ ས་དི་སོ་ཧ་མ་སྨཱི’’ཏི མཱ་ནོ, ‘‘ཧཱི་ན་སྶ ཧཱི་ནོ་ཧ་མ་སྨཱི’’ཏི མཱ་ནོ – ཨི་མེ ན་ཝ་ཝི་དྷཱ མཱ་ནཱ.
(༤) ན་ཝ ཏ་ཎྷཱ་མཱུ་ལ་ཀཱ དྷ་མྨཱ
༩༦༣. ཏ་ཏྠ ཀ་ཏ་མེ ན་ཝ ཏ་ཎྷཱ་མཱུ་ལ་ཀཱ དྷ་མྨཱ? ཏ་ཎྷཾ པ་ཊི་ཙྩ པ་རི་ཡེ་ས་ནཱ, པ་རི་ཡེ་ས་ནཾ པ་ཊི་ཙྩ ལཱ་བྷོ, ལཱ་བྷཾ པ་ཊི་ཙྩ ཝི་ནི་ཙྪ་ཡོ, ཝི་ནི་ཙྪ་ཡཾ པ་ཊི་ཙྩ ཚ་ནྡ་རཱ་གོ, ཚ་ནྡ་རཱ་གཾ པ་ཊི་ཙྩ ཨ་ཛ྄ཛྷོ་སཱ་ནཾ, ཨ་ཛ྄ཛྷོ་སཱ་ནཾ པ་ཊི་ཙྩ པ་རི་གྒ་ཧོ, པ་རི་གྒ་ཧཾ པ་ཊི་ཙྩ མ་ཙྪ་རི་ཡཾ, མ་ཙྪ་རི་ཡཾ པ་ཊི་ཙྩ ཨཱ་ར་ཀྑོ, ཨཱ་ར་ཀྑཱ་དྷི་ཀ་ར་ཎཾ ད་ཎྜཱ་དཱ་ན-ས་ཏྠཱ་དཱ་ན-ཀ་ལ་ཧ-ཝི་གྒ་ཧ་ཝི་ཝཱ་ད-ཏུ་ཝཾ་ཏུ་ཝཾ-པེ་སུ་ཉྙ-མུ་སཱ་ཝཱ་དཱ ཨ་ནེ་ཀེ པཱ་པ་ཀཱ ཨ་ཀུ་ས་ལཱ དྷ་མྨཱ ས་མྦྷ་ཝ་ནྟི – ཨི་མེ ན་ཝ ཏ་ཎྷཱ་མཱུ་ལ་ཀཱ དྷ་མྨཱ.
(༥) ན་ཝ ཨི་ཉྫི་ཏཱ་ནི
༩༦༤. ཏ་ཏྠ ཀ་ཏ་མཱ་ནི ན་ཝ ཨི་ཉྫི་ཏཱ་ནི? ‘‘ཨ་སྨཱི’’ཏི ཨི་ཉྫི་ཏ་མེ་ཏཾ, ‘‘ཨ་ཧ་མ་སྨཱི’’ཏི ཨི་ཉྫི་ཏ་མེ་ཏཾ, ‘‘ཨ་ཡ་མ་ཧ་མ་སྨཱི’’ཏི ཨི་ཉྫི་ཏ་མེ་ཏཾ ‘‘བྷ་ཝི་སྶ’’ནྟི ཨི་ཉྫི་ཏ་མེ་ཏཾ, ‘‘རཱུ་པཱི བྷ་ཝི་སྶ’’ནྟི ཨི་ཉྫི་ཏ་མེ་ཏཾ, ‘‘ཨ་རཱུ་པཱི བྷ་ཝི་སྶ’’ནྟི ཨི་ཉྫི་ཏ་མེ་ཏཾ, ‘‘ས་ཉྙཱི བྷ་ཝི་སྶ’’ནྟི ཨི་ཉྫི་ཏ་མེ་ཏཾ, ‘‘ཨ་ས་ཉྙཱི བྷ་ཝི་སྶ’’ནྟི ཨི་ཉྫི་ཏ་མེ་ཏཾ, ‘‘ནེ་ཝ་ས་ཉྙཱི་ནཱ་ས་ཉྙཱི བྷ་ཝི་སྶ’’ནྟི ཨི་ཉྫི་ཏ་མེ་ཏཾ – ཨི་མཱ་ནི ན་ཝ ཨི་ཉྫི་ཏཱ་ནི.
(༦-༩) ན་ཝ མ་ཉྙི་ཏཱ་དཱི་ནི
༩༦༥. ཏ་ཏྠ ཀ་ཏ་མཱ་ནི ན་ཝ མ་ཉྙི་ཏཱ་ནི… ན་ཝ ཕ་ནྡི་ཏཱ་ནི… ན་ཝ པ་པ་ཉྩི་ཏཱ་ནི… ན་ཝ ས་ངྑ་ཏཱ་ནི? ‘‘ཨ་སྨཱི’’ཏི ས་ངྑ་ཏ་མེ་ཏཾ, ‘‘ཨ་ཧ་མ་སྨཱི’’ཏི ས་ངྑ་ཏ་མེ་ཏཾ, ‘‘ཨ་ཡ་མ་ཧ་མ་སྨཱི’’ཏི ས་ངྑ་ཏ་མེ་ཏཾ, ‘‘བྷ་ཝི་སྶ’’ནྟི ས་ངྑ་ཏ་མེ་ཏཾ, ‘‘རཱུ་པཱི བྷ་ཝི་སྶ’’ནྟི ས་ངྑ་ཏ་མེ་ཏཾ, ‘‘ཨ་རཱུ་པཱི བྷ་ཝི་སྶ’’ནྟི ས་ངྑ་ཏ་མེ་ཏཾ, ‘‘ས་ཉྙཱི བྷ་ཝི་སྶ’’ནྟི ས་ངྑ་ཏ་མེ་ཏཾ, ‘‘ཨ་ས་ཉྙཱི བྷ་ཝི་སྶ’’ནྟི ས་ངྑ་ཏ་མེ་ཏཾ, ‘‘ནེ་ཝ་ས་ཉྙཱི་ནཱ་ས་ཉྙཱི བྷ་ཝི་སྶ’’ནྟི ས་ངྑ་ཏ་མེ་ཏཾ – ཨི་མཱ་ནི ན་ཝ ས་ངྑ་ཏཱ་ནི.
ན་ཝ་ཀཾ.