༡༠. ད་ས་ཀ་ནི་དྡེ་སོ
༨༠༩. (༡) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ཋཱ་ན་ཉྩ ཋཱ་ན་ཏོ ཨ་ཊྛཱ་ན་ཉྩ ཨ་ཊྛཱ་ན་ཏོ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ དི་ཊྛི་ས་མྤ་ནྣོ པུ་གྒ་ལོ ཀ་ཉྩི ས་ངྑཱ་རཾ ནི་ཙྩ་ཏོ ཨུ་པ་ག་ཙྪེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་ཐུ་ཛྫ་ནོ ཀ་ཉྩི ས་ངྑཱ་རཾ ནི་ཙྩ་ཏོ ཨུ་པ་ག་ཙྪེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ དི་ཊྛི་ས་མྤ་ནྣོ པུ་གྒ་ལོ ཀ་ཉྩི ས་ངྑཱ་རཾ སུ་ཁ་ཏོ ཨུ་པ་ག་ཙྪེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་ཐུ་ཛྫ་ནོ ཀ་ཉྩི ས་ངྑཱ་རཾ སུ་ཁ་ཏོ ཨུ་པ་ག་ཙྪེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ དི་ཊྛི་ས་མྤ་ནྣོ པུ་གྒ་ལོ ཀ་ཉྩི དྷ་མྨཾ ཨ་ཏྠ་ཏོ ཨུ་པ་ག་ཙྪེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་ཐུ་ཛྫ་ནོ ཀ་ཉྩི དྷ་མྨཾ ཨ་ཏྠ་ཏོ ཨུ་པ་ག་ཙྪེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ དི་ཊྛི་ས་མྤ་ནྣོ པུ་གྒ་ལོ མཱ་ཏ་རཾ ཛཱི་ཝི་ཏཱ ཝོ་རོ་པེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་ཐུ་ཛྫ་ནོ མཱ་ཏ་རཾ ཛཱི་ཝི་ཏཱ ཝོ་རོ་པེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ དི་ཊྛི་ས་མྤ་ནྣོ པུ་གྒ་ལོ པི་ཏ་རཾ ཛཱི་ཝི་ཏཱ ཝོ་རོ་པེ་ཡྻ…པེ… ཨ་ར་ཧ་ནྟཾ ཛཱི་ཝི་ཏཱ ཝོ་རོ་པེ་ཡྻ…པེ… པ་དུ་ཊྛེ་ན ཙི་ཏྟེ་ན ཏ་ཐཱ་ག་ཏ་སྶ ལོ་ཧི་ཏཾ ཨུ་པྤཱ་དེ་ཡྻ…པེ… ས་ངྒྷཾ བྷི་ནྡེ་ཡྻ…པེ… ཨ་ཉྙཾ ས་ཏྠཱ་རཾ ཨུ་དྡི་སེ་ཡྻ…པེ… ཨ་ཊྛ་མཾ བྷ་ཝཾ ནི་བྦ་ཏྟེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་ཐུ་ཛྫ་ནོ ཨ་ཊྛ་མཾ བྷ་ཝཾ ནི་བྦ་ཏྟེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཨེ་ཀི་སྶཱ ལོ་ཀ་དྷཱ་ཏུ་ཡཱ དྭེ ཨ་ར་ཧ་ནྟོ ས་མྨཱ་ས་མྦུ་དྡྷཱ ཨ་པུ་བྦཾ ཨ་ཙ་རི་མཾ ཨུ་པྤ་ཛྫེ་ཡྻུཾ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཨེ་ཀི་སྶཱ ལོ་ཀ་དྷཱ་ཏུ་ཡཱ ཨེ་ཀོ ཨ་ར་ཧཾ ས་མྨཱ་ས་མྦུ་དྡྷོ ཨུ་པྤ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཨེ་ཀི་སྶཱ ལོ་ཀ་དྷཱ་ཏུ་ཡཱ དྭེ རཱ་ཛཱ་ནོ ཙ་ཀྐ་ཝ་ཏྟཱི [ཙ་ཀྐ་ཝ་ཏྟི (སཱི. སྱཱ.)] ཨ་པུ་བྦཾ ཨ་ཙ་རི་མཾ ཨུ་པྤ་ཛྫེ་ཡྻུཾ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཨེ་ཀི་སྶཱ ལོ་ཀ་དྷཱ་ཏུ་ཡཱ ཨེ་ཀོ རཱ་ཛཱ ཙ་ཀྐ་ཝ་ཏྟཱི ཨུ་པྤ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཨི་ཏྠཱི ཨ་ར་ཧཾ ཨ་སྶ ས་མྨཱ་ས་མྦུ་དྡྷོ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་རི་སོ ཨ་ར་ཧཾ ཨ་སྶ ས་མྨཱ་ས་མྦུ་དྡྷོ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཨི་ཏྠཱི རཱ་ཛཱ ཨ་སྶ ཙ་ཀྐ་ཝ་ཏྟཱི, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་རི་སོ རཱ་ཛཱ ཨ་སྶ ཙ་ཀྐ་ཝ་ཏྟཱི, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཨི་ཏྠཱི ས་ཀྐ་ཏྟཾ ཀ་རེ་ཡྻ, མཱ་ར་ཏྟཾ ཀ་རེ་ཡྻ, བྲ་ཧྨ་ཏྟཾ ཀ་རེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ པུ་རི་སོ ས་ཀྐ་ཏྟཾ ཀ་རེ་ཡྻ, མཱ་ར་ཏྟཾ ཀ་རེ་ཡྻ, བྲ་ཧྨ་ཏྟཾ ཀ་རེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཀཱ་ཡ་དུ་ཙྩ་རི་ཏ་སྶ ཨི་ཊྛོ ཀ་ནྟོ མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཀཱ་ཡ་དུ་ཙྩ་རི་ཏ་སྶ ཨ་ནི་ཊྛོ ཨ་ཀ་ནྟོ ཨ་མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཝ་ཙཱི་དུ་ཙྩ་རི་ཏ་སྶ…པེ… ཡཾ མ་ནོ་དུ་ཙྩ་རི་ཏ་སྶ ཨི་ཊྛོ ཀ་ནྟོ མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཝ་ཙཱི་དུ་ཙྩ་རི་ཏ་སྶ…པེ… ཡཾ མ་ནོ་དུ་ཙྩ་རི་ཏ་སྶ ཨ་ནི་ཊྛོ ཨ་ཀ་ནྟོ ཨ་མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཀཱ་ཡ་སུ་ཙ་རི་ཏ་སྶ ཨ་ནི་ཊྛོ ཨ་ཀ་ནྟོ ཨ་མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཀཱ་ཡ་སུ་ཙ་རི་ཏ་སྶ ཨི་ཊྛོ ཀ་ནྟོ མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཝ་ཙཱི་སུ་ཙ་རི་ཏ་སྶ…པེ… ཡཾ མ་ནོ་སུ་ཙ་རི་ཏ་སྶ ཨ་ནི་ཊྛོ ཨ་ཀ་ནྟོ ཨ་མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཝ་ཙཱི་སུ་ཙ་རི་ཏ་སྶ…པེ… ཡཾ མ་ནོ་སུ་ཙ་རི་ཏ་སྶ ཨི་ཊྛོ ཀ་ནྟོ མ་ནཱ་པོ ཝི་པཱ་ཀོ ནི་བྦ་ཏྟེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཀཱ་ཡ་དུ་ཙྩ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཀཱ་ཡ་དུ་ཙྩ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཝ་ཙཱི་དུ་ཙྩ་རི་ཏ་ས་མ་ངྒཱི…པེ… ཡཾ མ་ནོ་དུ་ཙྩ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཝ་ཙཱི་དུ་ཙྩ་རི་ཏ་ས་མ་ངྒཱི…པེ… ཡཾ མ་ནོ་དུ་ཙྩ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི.
‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཀཱ་ཡ་སུ་ཙ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཀཱ་ཡ་སུ་ཙ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཨ་ཊྛཱ་ན་མེ་ཏཾ ཨ་ན་ཝ་ཀཱ་སོ ཡཾ ཝ་ཙཱི་སུ་ཙ་རི་ཏ་ས་མ་ངྒཱི…པེ… ཡཾ མ་ནོ་སུ་ཙ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫེ་ཡྻ, ནེ་ཏཾ ཋཱ་ནཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཋཱ་ན་ཉྩ ཁོ ཨེ་ཏཾ ཝི་ཛྫ་ཏི ཡཾ ཝ་ཙཱི་སུ་ཙ་རི་ཏ་ས་མ་ངྒཱི …པེ… ཡཾ མ་ནོ་སུ་ཙ་རི་ཏ་ས་མ་ངྒཱི ཏ་ནྣི་དཱ་ནཾ ཏ་པྤ་ཙྩ་ཡཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫེ་ཡྻ, ཋཱ་ན་མེ་ཏཾ ཝི་ཛྫ་ཏཱི’’ཏི པ་ཛཱ་ནཱ་ཏི. ‘‘ཡེ ཡེ དྷ་མྨཱ ཡེ་སཾ ཡེ་སཾ དྷ་མྨཱ་ནཾ ཧེ་ཏཱུ པ་ཙྩ་ཡཱ ཨུ་པཱ་དཱ་ཡ ཏཾ ཏཾ ཋཱ་ནཾ, ཡེ ཡེ དྷ་མྨཱ ཡེ་སཾ ཡེ་སཾ དྷ་མྨཱ་ནཾ ན ཧེ་ཏཱུ ཨ་པྤ་ཙྩ་ཡཱ ཨུ་པཱ་དཱ་ཡ ཏཾ ཏཾ ཨ་ཊྛཱ་ན’’ནྟི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ཋཱ་ན་ཉྩ ཋཱ་ན་ཏོ ཨ་ཊྛཱ་ན་ཉྩ ཨ་ཊྛཱ་ན་ཏོ ཡ་ཐཱ་བྷཱུ་ཏཾ ཉཱ་ཎཾ.
༨༡༠. (༢) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ནཾ ཀ་མྨ་ས་མཱ་དཱ་ནཱ་ནཾ ཋཱ་ན་སོ ཧེ་ཏུ་སོ ཝི་པཱ་ཀཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ པ་ཛཱ་ནཱ་ཏི – ‘‘ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ག་ཏི་ས་མྤ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ཨུ་པ་དྷི་ས་མྤ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ཀཱ་ལ་ས་མྤ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི པ་ཡོ་ག་ས་མྤ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི.
‘‘ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ག་ཏི་ཝི་པ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ཨུ་པ་དྷི་ཝི་པ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི ཀཱ་ལ་ཝི་པ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི པཱ་པ་ཀཱ་ནི ཀ་མྨ་ས་མཱ་དཱ་ནཱ་ནི པ་ཡོ་ག་ཝི་པ་ཏྟིཾ ཨཱ་ག་མྨ ཝི་པ་ཙྩ་ནྟི.
‘‘ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ག་ཏི་ཝི་པ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ཨུ་པ་དྷི་ཝི་པ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ཀཱ་ལ་ཝི་པ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི པ་ཡོ་ག་ཝི་པ་ཏྟི་པ་ཊི་བཱ་ལ༹ྷཱ་ནི ན ཝི་པ་ཙྩ་ནྟི.
‘‘ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ག་ཏི་ས་མྤ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ཨུ་པ་དྷི་ས་མྤ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི ཀཱ་ལ་ས་མྤ་ཏྟིཾ ཨཱ་ག་མྨ ཝི་པ་ཙྩ་ནྟི. ཨ་ཏྠེ་ཀ་ཙྩཱ་ནི ཀ་ལྱཱ་ཎཱ་ནི ཀ་མྨ་ས་མཱ་དཱ་ནཱ་ནི པ་ཡོ་ག་ས་མྤ་ཏྟིཾ ཨཱ་ག་མྨ ཝི་པ་ཙྩ་ནྟཱི’’ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ནཾ ཀ་མྨ་ས་མཱ་དཱ་ནཱ་ནཾ ཋཱ་ན་སོ ཧེ་ཏུ་སོ ཝི་པཱ་ཀཾ ཡ་ཐཱ་བྷཱུ་ཏཾ ཉཱ་ཎཾ.
༨༡༡. (༣) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ས་བྦ་ཏྠ་གཱ་མི་ནིཾ པ་ཊི་པ་དཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ ནི་ར་ཡ་གཱ་མཱི’’ཏི [ནི་ར་ཡ་གཱ་མི་ནཱི་ཏི (སྱཱ.)] པ་ཛཱ་ནཱ་ཏི, ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ ཏི་ར་ཙྪཱ་ན་ཡོ་ནི་གཱ་མཱི’’ཏི [ཏི་ར་ཙྪཱ་ན་གཱ་མི་ནཱི་ཏི (སྱཱ.) ཨེ་ཝ་མུ་པ་རི་པི. ཨ་ཊྛ་ཀ་ཐཱ ཨོ་ལོ་ཀེ་ཏ་བྦཱ] པ་ཛཱ་ནཱ་ཏི, ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ པེ་ཏྟི་ཝི་ས་ཡ་གཱ་མཱི’’ཏི པ་ཛཱ་ནཱ་ཏི, ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ མ་ནུ་སྶ་ལོ་ཀ་གཱ་མཱི’’ཏི པ་ཛཱ་ནཱ་ཏི, ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ དེ་ཝ་ལོ་ཀ་གཱ་མཱི’’ཏི པ་ཛཱ་ནཱ་ཏི, ‘‘ཨ་ཡཾ མ་གྒོ ཨ་ཡཾ པ་ཊི་པ་དཱ ནི་བྦཱ་ན་གཱ་མཱི’’ཏི པ་ཛཱ་ནཱ་ཏཱི་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ས་བྦ་ཏྠ་གཱ་མི་ནིཾ པ་ཊི་པ་དཾ ཡ་ཐཱ་བྷཱུ་ཏཾ ཉཱ་ཎཾ.
༨༡༢. (༤) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ཨ་ནེ་ཀ་དྷཱ་ཏུ་ནཱ་ནཱ་དྷཱ་ཏུ་ལོ་ཀཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ཁ་ནྡྷ་ནཱ་ན་ཏྟཾ པ་ཛཱ་ནཱ་ཏི, ཨཱ་ཡ་ཏ་ན་ནཱ་ན་ཏྟཾ པ་ཛཱ་ནཱ་ཏི, དྷཱ་ཏུ་ནཱ་ན་ཏྟཾ པ་ཛཱ་ནཱ་ཏི, ཨ་ནེ་ཀ་དྷཱ་ཏུ་ནཱ་ནཱ་དྷཱ་ཏུ་ལོ་ཀ་ནཱ་ན་ཏྟཾ པ་ཛཱ་ནཱ་ཏཱི་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ཨ་ནེ་ཀ་དྷཱ་ཏུ་ནཱ་ནཱ་དྷཱ་ཏུ་ལོ་ཀཾ ཡ་ཐཱ་བྷཱུ་ཏཾ ཉཱ་ཎཾ.
༨༡༣. (༥) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ས་ཏྟཱ་ནཾ ནཱ་ནཱ་དྷི་མུ་ཏྟི་ཀ་ཏཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ པ་ཛཱ་ནཱ་ཏི – ‘‘ས་ནྟི ས་ཏྟཱ ཧཱི་ནཱ་དྷི་མུ་ཏྟི་ཀཱ, ས་ནྟི ས་ཏྟཱ པ་ཎཱི་ཏཱ་དྷི་མུ་ཏྟི་ཀཱ. ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི. པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི.
‘‘ཨ་ཏཱི་ཏ་མྤི ཨ་དྡྷཱ་ནཾ ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝིཾ་སུ བྷ་ཛིཾ་སུ པ་ཡི་རུ་པཱ་སིཾ་སུ, པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝིཾ་སུ བྷ་ཛིཾ་སུ པ་ཡི་རུ་པཱ་སིཾ་སུ.
‘‘ཨ་ནཱ་ག་ཏ་མྤི ཨ་དྡྷཱ་ནཾ ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝི་སྶ་ནྟི བྷ་ཛི་སྶ་ནྟི པ་ཡི་རུ་པཱ་སི་སྶ་ནྟི, པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝི་སྶ་ནྟི བྷ་ཛི་སྶ་ནྟི པ་ཡི་རུ་པཱ་སི་སྶ་ནྟཱི’’ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ས་ཏྟཱ་ནཾ ནཱ་ནཱ་དྷི་མུ་ཏྟི་ཀ་ཏཾ ཡ་ཐཱ་བྷཱུ་ཏཾ ཉཱ་ཎཾ.
༨༡༤. (༦) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ པ་ར་ས་ཏྟཱ་ནཾ པ་ར་པུ་གྒ་ལཱ་ནཾ ཨི་ནྡྲི་ཡ་པ་རོ་པ་རི་ཡ་ཏྟཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ས་ཏྟཱ་ནཾ ཨཱ་ས་ཡཾ པ་ཛཱ་ནཱ་ཏི, ཨ་ནུ་ས་ཡཾ པ་ཛཱ་ནཱ་ཏི, ཙ་རི་ཏཾ པ་ཛཱ་ནཱ་ཏི, ཨ་དྷི་མུ་ཏྟིཾ པ་ཛཱ་ནཱ་ཏི, ཨ་པྤ་ར་ཛ་ཀྑེ མ་ཧཱ་ར་ཛ་ཀྑེ ཏི་ཀྑི་ནྡྲི་ཡེ མུ་དི་ནྡྲི་ཡེ སྭཱ་ཀཱ་རེ དྭཱ་ཀཱ་རེ སུ་ཝི་ཉྙཱ་པ་ཡེ དུ་ཝི་ཉྙཱ་པ་ཡེ བྷ་བྦཱ་བྷ་བྦེ ས་ཏྟེ པ་ཛཱ་ནཱ་ཏི.
༨༡༥. ཀ་ཏ་མོ ཙ ས་ཏྟཱ་ནཾ ཨཱ་ས་ཡོ? ‘‘ས་སྶ་ཏོ ལོ་ཀོ’’ཏི ཝཱ, ‘‘ཨ་ས་སྶ་ཏོ ལོ་ཀོ’’ཏི ཝཱ, ‘‘ཨ་ནྟ་ཝཱ ལོ་ཀོ’’ཏི ཝཱ, ‘‘ཨ་ན་ནྟ་ཝཱ ལོ་ཀོ’’ཏི ཝཱ, ‘‘ཏཾ ཛཱི་ཝཾ ཏཾ ས་རཱི་ར’’ནྟི ཝཱ, ‘‘ཨ་ཉྙཾ ཛཱི་ཝཾ ཨ་ཉྙཾ ས་རཱི་ར’’ནྟི ཝཱ, ‘‘ཧོ་ཏི ཏ་ཐཱ་ག་ཏོ པ་རཾ མ་ར་ཎཱ་ཏི ཝཱ, ‘‘ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ‘‘ཧོ་ཏི ཙ ན ཙ ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ‘‘ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་རཾ མ་ར་ཎཱ’’ཏི ཝཱ, ཨི་ཏི བྷ་ཝ་དི་ཊྛི་ས་ནྣི་སྶི་ཏཱ ཝཱ ས་ཏྟཱ ཧོ་ནྟི ཝི་བྷ་ཝ་དི་ཊྛི་ས་ནྣི་སྶི་ཏཱ ཝཱ. ཨེ་ཏེ ཝཱ པ་ན ཨུ་བྷོ ཨ་ནྟེ ཨ་ནུ་པ་ག་མྨ ཨི་ད་པྤ་ཙྩ་ཡ་ཏཱ པ་ཊི་ཙྩ་ས་མུ་པྤ་ནྣེ་སུ དྷ་མྨེ་སུ ཨ་ནུ་ལོ་མི་ཀཱ ཁ་ནྟི པ་ཊི་ལ་དྡྷཱ ཧོ་ཏི ཡ་ཐཱ་བྷཱུ་ཏཾ ཉཱ་ཎཾ. ཨ་ཡཾ ས་ཏྟཱ་ནཾ ཨཱ་ས་ཡོ.
༨༡༦. ཀ་ཏ་མོ ཙ ས་ཏྟཱ་ནཾ ཨ་ནུ་ས་ཡོ? ས་ཏྟཱ་ནུ་ས་ཡཱ – ཀཱ་མ་རཱ་གཱ་ནུ་ས་ཡོ, པ་ཊི་གྷཱ་ནུ་ས་ཡོ, མཱ་ནཱ་ནུ་ས་ཡོ, དི་ཊྛཱ་ནུ་ས་ཡོ, ཝི་ཙི་ཀི་ཙྪཱ་ནུ་ས་ཡོ, བྷ་ཝ་རཱ་གཱ་ནུ་ས་ཡོ, ཨ་ཝི་ཛྫཱ་ནུ་ས་ཡོ. ཡཾ ལོ་ཀེ པི་ཡ་རཱུ་པཾ སཱ་ཏ་རཱུ་པཾ ཨེ་ཏྠ ས་ཏྟཱ་ནཾ རཱ་གཱ་ནུ་ས་ཡོ ཨ་ནུ་སེ་ཏི. ཡཾ ལོ་ཀེ ཨ་པྤི་ཡ་རཱུ་པཾ ཨ་སཱ་ཏ་རཱུ་པཾ ཨེ་ཏྠ ས་ཏྟཱ་ནཾ པ་ཊི་གྷཱ་ནུ་ས་ཡོ ཨ་ནུ་སེ་ཏི. ཨི་ཏི ཨི་མེ་སུ དྭཱི་སུ དྷ་མྨེ་སུ ཨ་ཝི་ཛྫཱ་ནུ་པ་ཏི་ཏཱ. ཏ་དེ་ཀ་ཊྛོ མཱ་ནོ ཙ དི་ཊྛི ཙ ཝི་ཙི་ཀི་ཙྪཱ ཙ ད་ཊྛ་བྦཱ. ཨ་ཡཾ ས་ཏྟཱ་ནཾ ཨ་ནུ་ས་ཡོ.
༨༡༧. ཀ་ཏ་མ་ཉྩ ས་ཏྟཱ་ནཾ ཙ་རི་ཏཾ? པུ་ཉྙཱ་བྷི་ས་ངྑཱ་རོ, ཨ་པུ་ཉྙཱ་བྷི་ས་ངྑཱ་རོ, ཨཱ་ནེ་ཉྫཱ་བྷི་ས་ངྑཱ་རོ, པ་རི་ཏྟ་བྷཱུ་མ་ཀོ ཝཱ མ་ཧཱ་བྷཱུ་མ་ཀོ ཝཱ – ཨི་དཾ ས་ཏྟཱ་ནཾ ཙ་རི་ཏཾ.
༨༡༨. ཀ་ཏ་མཱ ཙ ས་ཏྟཱ་ནཾ ཨ་དྷི་མུ་ཏྟི? ས་ནྟི ས་ཏྟཱ ཧཱི་ནཱ་དྷི་མུ་ཏྟི་ཀཱ, ས་ནྟི ས་ཏྟཱ པ་ཎཱི་ཏཱ་དྷི་མུ་ཏྟི་ཀཱ. ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི. པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝ་ནྟི བྷ་ཛ་ནྟི པ་ཡི་རུ་པཱ་ས་ནྟི.
ཨ་ཏཱི་ཏ་མྤི ཨ་དྡྷཱ་ནཾ ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝིཾ་སུ བྷ་ཛིཾ་སུ པ་ཡི་རུ་པཱ་སིཾ་སུ. པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝིཾ་སུ བྷ་ཛིཾ་སུ པ་ཡི་རུ་པཱ་སིཾ་སུ.
ཨ་ནཱ་ག་ཏ་མྤི ཨ་དྡྷཱ་ནཾ ཧཱི་ནཱ་དྷི་མུ་ཏྟི་ཀཱ ས་ཏྟཱ ཧཱི་ནཱ་དྷི་མུ་ཏྟི་ཀེ ས་ཏྟེ སེ་ཝི་སྶ་ནྟི བྷ་ཛི་སྶ་ནྟི པ་ཡི་རུ་པཱ་སི་སྶ་ནྟི. པ་ཎཱི་ཏཱ་དྷི་མུ་ཏྟི་ཀཱ ས་ཏྟཱ པ་ཎཱི་ཏཱ་དྷི་མུ་ཏྟི་ཀེ ས་ཏྟེ སེ་ཝི་སྶ་ནྟི བྷ་ཛི་སྶ་ནྟི པ་ཡི་རུ་པཱ་སི་སྶ་ནྟི. ཨ་ཡཾ ས་ཏྟཱ་ནཾ ཨ་དྷི་མུ་ཏྟི.
༨༡༩. ཀ་ཏ་མེ ཏེ ས་ཏྟཱ མ་ཧཱ་ར་ཛ་ཀྑཱ? ད་ས ཀི་ལེ་ས་ཝ་ཏྠཱུ་ནི – ལོ་བྷོ, དོ་སོ, མོ་ཧོ, མཱ་ནོ, དི་ཊྛི, ཝི་ཙི་ཀི་ཙྪཱ, ཐི་ནཾ, ཨུ་དྡྷ་ཙྩཾ, ཨ་ཧི་རི་ཀཾ, ཨ་ནོ་ཏྟ་པྤཾ. ཡེ་སཾ ས་ཏྟཱ་ནཾ ཨི་མཱ་ནི ད་ས ཀི་ལེ་ས་ཝ་ཏྠཱུ་ནི ཨཱ་སེ་ཝི་ཏཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨུ་སྶ་ད་ག་ཏཱ་ནི, ཨི་མེ ཏེ ས་ཏྟཱ མ་ཧཱ་ར་ཛ་ཀྑཱ.
༨༢༠. ཀ་ཏ་མེ ཏེ ས་ཏྟཱ ཨ་པྤ་ར་ཛ་ཀྑཱ? ཡེ་སཾ ས་ཏྟཱ་ནཾ ཨི་མཱ་ནི ད་ས ཀི་ལེ་ས་ཝ་ཏྠཱུ་ནི ཨ་ནཱ་སེ་ཝི་ཏཱ་ནི ཨ་བྷཱ་ཝི་ཏཱ་ནི ཨ་བ་ཧུ་ལཱི་ཀ་ཏཱ་ནི ཨ་ནུ་སྶ་ད་ག་ཏཱ་ནི, ཨི་མེ ཏེ ས་ཏྟཱ ཨ་པྤ་ར་ཛ་ཀྑཱ.
༨༢༡. ཀ་ཏ་མེ ཏེ ས་ཏྟཱ མུ་དི་ནྡྲི་ཡཱ? པ་ཉྩི་ནྡྲི་ཡཱ་ནི – ས་དྡྷི་ནྡྲི་ཡཾ, ཝཱི་རི་ཡི་ནྡྲི་ཡཾ, ས་ཏི་ནྡྲི་ཡཾ, ས་མཱ་དྷི་ནྡྲི་ཡཾ, པ་ཉྙི་ནྡྲི་ཡཾ. ཡེ་སཾ ས་ཏྟཱ་ནཾ ཨི་མཱ་ནི པ་ཉྩི་ནྡྲི་ཡཱ་ནི ཨ་ནཱ་སེ་ཝི་ཏཱ་ནི ཨ་བྷཱ་ཝི་ཏཱ་ནི ཨ་བ་ཧུ་ལཱི་ཀ་ཏཱ་ནི ཨ་ནུ་སྶ་ད་ག་ཏཱ་ནི, ཨི་མེ ཏེ ས་ཏྟཱ མུ་དི་ནྡྲི་ཡཱ.
༨༢༢. ཀ་ཏ་མེ ཏེ ས་ཏྟཱ ཏི་ཀྑི་ནྡྲི་ཡཱ? ཡེ་སཾ ས་ཏྟཱ་ནཾ ཨི་མཱ་ནི པ་ཉྩི་ནྡྲི་ཡཱ་ནི ཨཱ་སེ་ཝི་ཏཱ་ནི བྷཱ་ཝི་ཏཱ་ནི བ་ཧུ་ལཱི་ཀ་ཏཱ་ནི ཨུ་སྶ་ད་ག་ཏཱ་ནི, ཨི་མེ ཏེ ས་ཏྟཱ ཏི་ཀྑི་ནྡྲི་ཡཱ.
༨༢༣. ཀ་ཏ་མེ ཏེ ས་ཏྟཱ དྭཱ་ཀཱ་རཱ? ཡེ ཏེ ས་ཏྟཱ པཱ་པཱ་ས་ཡཱ པཱ་པཱ་ནུ་ས་ཡཱ པཱ་པ་ཙ་རི་ཏཱ པཱ་པཱ་དྷི་མུ་ཏྟི་ཀཱ མ་ཧཱ་ར་ཛ་ཀྑཱ མུ་དི་ནྡྲི་ཡཱ, ཨི་མེ ཏེ ས་ཏྟཱ དྭཱ་ཀཱ་རཱ.
༨༢༤. ཀ་ཏ་མེ ཏེ ས་ཏྟཱ སྭཱ་ཀཱ་རཱ? ཡེ ཏེ ས་ཏྟཱ ཀ་ལྱཱ་ཎཱ་ས་ཡཱ ཀ་ལྱཱ་ཎ་ཙ་རི་ཏཱ ཀ་ལྱཱ་ཎཱ་དྷི་མུ་ཏྟི་ཀཱ ཨ་པྤ་ར་ཛ་ཀྑཱ ཏི་ཀྑི་ནྡྲི་ཡཱ, ཨི་མེ ཏེ ས་ཏྟཱ སྭཱ་ཀཱ་རཱ.
༨༢༥. ཀ་ཏ་མེ ཏེ ས་ཏྟཱ དུ་ཝི་ཉྙཱ་པ་ཡཱ? ཡེ ཙ ཏེ ས་ཏྟཱ དྭཱ་ཀཱ་རཱ, ཏེ་ཝ ཏེ ས་ཏྟཱ དུ་ཝི་ཉྙཱ་པ་ཡཱ. ཡེ ཙ ཏེ ས་ཏྟཱ སྭཱ་ཀཱ་རཱ, ཏེ་ཝ ཏེ ས་ཏྟཱ སུ་ཝི་ཉྙཱ་པ་ཡཱ.
༨༢༦. ཀ་ཏ་མེ ཏེ ས་ཏྟཱ ཨ་བྷ་བྦཱ? ཡེ ཏེ ས་ཏྟཱ ཀ་མྨཱ་ཝ་ར་ཎེ་ན ས་མ་ནྣཱ་ག་ཏཱ ཀི་ལེ་སཱ་ཝ་ར་ཎེ་ན ས་མ་ནྣཱ་ག་ཏཱ ཝི་པཱ་ཀཱ་ཝ་ར་ཎེ་ན ས་མ་ནྣཱ་ག་ཏཱ ཨ་སྶ་དྡྷཱ ཨ་ཙྪ་ནྡི་ཀཱ དུ་པྤ་ཉྙཱ ཨ་བྷ་བྦཱ ནི་ཡཱ་མཾ ཨོ་ཀྐ་མི་ཏུཾ ཀུ་ས་ལེ་སུ དྷ་མྨེ་སུ ས་མྨ་ཏྟཾ, ཨི་མེ ཏེ ས་ཏྟཱ ཨ་བྷ་བྦཱ.
༨༢༧. ཀ་ཏ་མེ ཏེ ས་ཏྟཱ བྷ་བྦཱ? ཡེ ཏེ ས་ཏྟཱ ན ཀ་མྨཱ་ཝ་ར་ཎེ་ན ས་མ་ནྣཱ་ག་ཏཱ ན ཀི་ལེ་སཱ་ཝ་ར་ཎེ་ན ས་མ་ནྣཱ་ག་ཏཱ ན ཝི་པཱ་ཀཱ་ཝ་ར་ཎེ་ན ས་མ་ནྣཱ་ག་ཏཱ ས་དྡྷཱ ཚ་ནྡི་ཀཱ པ་ཉྙ་ཝ་ནྟོ བྷ་བྦཱ ནི་ཡཱ་མཾ ཨོ་ཀྐ་མི་ཏུཾ ཀུ་ས་ལེ་སུ དྷ་མྨེ་སུ ས་མྨ་ཏྟཾ, ཨི་མེ ཏེ ས་ཏྟཱ བྷ་བྦཱ་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ པ་ར་ས་ཏྟཱ་ནཾ པ་ར་པུ་གྒ་ལཱ་ནཾ ཨི་ནྡྲི་ཡ་པ་རོ་པ་རི་ཡ་ཏྟཾ ཡ་ཐཱ་བྷཱུ་ཏཾ ཉཱ་ཎཾ.
༨༢༨. (༧) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ཛྷཱ་ན་ཝི་མོ་ཀྑ་ས་མཱ་དྷི་ས་མཱ་པ་ཏྟཱི་ནཾ སཾ་ཀི་ལེ་སཾ ཝོ་དཱ་ནཾ ཡ་ཐཱ་བྷཱུ་ཏཾ ཉཱ་ཎཾ? ཛྷཱ་ཡཱི་ཏི. ཙ་ཏྟཱ་རོ ཛྷཱ་ཡཱི. ཨ་ཏྠེ་ཀ་ཙྩོ ཛྷཱ་ཡཱི ས་མྤ་ཏྟི་ཡེ་ཝ [ས་མྤ་ཏྟི་ཡེ་ཝ (ཀ.)] ས་མཱ་ནཾ ཝི་པ་ཏྟཱི་ཏི པ་ཙྩེ་ཏི, ཨ་ཏྠེ་ཀ་ཙྩོ ཛྷཱ་ཡཱི ཝི་པ་ཏྟིཾ་ཡེ་ཝ [ཝི་པ་ཏྟི་ཡེ་ཝ (ཀ.)] ས་མཱ་ནཾ ས་མྤ་ཏྟཱི་ཏི པ་ཙྩེ་ཏི, ཨ་ཏྠེ་ཀ་ཙྩོ ཛྷཱ་ཡཱི ས་མྤ་ཏྟི་ཡེ་ཝ ས་མཱ་ནཾ ས་མྤ་ཏྟཱི་ཏི པ་ཙྩེ་ཏི, ཨ་ཏྠེ་ཀ་ཙྩོ ཛྷཱ་ཡཱི ཝི་པ་ཏྟི་ཡེ་ཝ ས་མཱ་ནཾ ཝི་པ་ཏྟཱི་ཏི པ་ཙྩེ་ཏི – ཨི་མེ ཙ་ཏྟཱ་རོ ཛྷཱ་ཡཱི.
ཨ་པ་རེ་པི ཙ་ཏྟཱ་རོ ཛྷཱ་ཡཱི. ཨ་ཏྠེ་ཀ་ཙྩོ ཛྷཱ་ཡཱི ད་ནྡྷཾ ས་མཱ་པ་ཛྫ་ཏི ཁི་པྤཾ ཝུ་ཊྛཱ་ཏི, ཨ་ཏྠེ་ཀ་ཙྩོ ཛྷཱ་ཡཱི ཁི་པྤཾ ས་མཱ་པ་ཛྫ་ཏི ད་ནྡྷཾ ཝུ་ཊྛཱ་ཏི, ཨ་ཏྠེ་ཀ་ཙྩོ ཛྷཱ་ཡཱི ད་ནྡྷཾ ས་མཱ་པ་ཛྫ་ཏི ད་ནྡྷཾ ཝུ་ཊྛཱ་ཏི, ཨ་ཏྠེ་ཀ་ཙྩོ ཛྷཱ་ཡཱི ཁི་པྤཾ ས་མཱ་པ་ཛྫ་ཏི ཁི་པྤཾ ཝུ་ཊྛཱ་ཏི – ཨི་མེ ཙ་ཏྟཱ་རོ ཛྷཱ་ཡཱི.
ཨ་པ་རེ་པི ཙ་ཏྟཱ་རོ ཛྷཱ་ཡཱི. ཨ་ཏྠེ་ཀ་ཙྩོ ཛྷཱ་ཡཱི ས་མཱ་དྷི་སྨིཾ ས་མཱ་དྷི་ཀུ་ས་ལོ ཧོ་ཏི, ན ས་མཱ་དྷི་སྨིཾ ས་མཱ་པ་ཏྟི་ཀུ་ས་ལོ; ཨ་ཏྠེ་ཀ་ཙྩོ ཛྷཱ་ཡཱི ས་མཱ་དྷི་སྨིཾ ས་མཱ་པ་ཏྟི་ཀུ་ས་ལོ ཧོ་ཏི, ན ས་མཱ་དྷི་སྨིཾ ས་མཱ་དྷི་ཀུ་ས་ལོ; ཨ་ཏྠེ་ཀ་ཙྩོ ཛྷཱ་ཡཱི ས་མཱ་དྷི་སྨིཾ ས་མཱ་དྷི་ཀུ་ས་ལོ ཙ ཧོ་ཏི, ས་མཱ་དྷི་སྨིཾ ས་མཱ་པ་ཏྟི་ཀུ་ས་ལོ ཙ; ཨ་ཏྠེ་ཀ་ཙྩོ ཛྷཱ་ཡཱི ནེ་ཝ ས་མཱ་དྷི་སྨིཾ ས་མཱ་དྷི་ཀུ་ས་ལོ ཧོ་ཏི, ན ས་མཱ་དྷི་སྨིཾ ས་མཱ་པ་ཏྟི་ཀུ་ས་ལོ – ཨི་མེ ཙ་ཏྟཱ་རོ ཛྷཱ་ཡཱི.
‘‘ཛྷཱ་ན’’ནྟི. ཙ་ཏྟཱ་རི ཛྷཱ་ནཱ་ནི – པ་ཋ་མཾ ཛྷཱ་ནཾ, དུ་ཏི་ཡཾ ཛྷཱ་ནཾ, ཏ་ཏི་ཡཾ ཛྷཱ་ནཾ, ཙ་ཏུ་ཏྠཾ ཛྷཱ་ནཾ.
‘‘ཝི་མོ་ཀྑོ’’ཏི. ཨ་ཊྛ ཝི་མོ་ཀྑཱ. རཱུ་པཱི རཱུ་པཱ་ནི པ་སྶ་ཏི – ཨ་ཡཾ པ་ཋ་མོ ཝི་མོ་ཀྑོ.
ཨ་ཛ྄ཛྷ་ཏྟཾ ཨ་རཱུ་པ་ས་ཉྙཱི བ་ཧི་དྡྷཱ རཱུ་པཱ་ནི པ་སྶ་ཏི – ཨ་ཡཾ དུ་ཏི་ཡོ ཝི་མོ་ཀྑོ.
སུ་བྷ་ནྟེ་ཝ ཨ་དྷི་མུ་ཏྟོ ཧོ་ཏི – ཨ་ཡཾ ཏ་ཏི་ཡོ ཝི་མོ་ཀྑོ.
ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘‘ཨ་ན་ནྟོ ཨཱ་ཀཱ་སོ’’ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ ཙ་ཏུ་ཏྠོ ཝི་མོ་ཀྑོ.
ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘‘ཨ་ན་ནྟཾ ཝི་ཉྙཱ་ཎ’’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ པ་ཉྩ་མོ ཝི་མོ་ཀྑོ.
ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘‘ན་ཏྠི ཀི་ཉྩི’’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ ཚ་ཊྛོ ཝི་མོ་ཀྑོ.
ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ ས་ཏྟ་མོ ཝི་མོ་ཀྑོ.
ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་ར་ཏི – ཨ་ཡཾ ཨ་ཊྛ་མོ ཝི་མོ་ཀྑོ.
‘‘ས་མཱ་དྷཱི’’ཏི. ཏ་ཡོ ས་མཱ་དྷཱི – ས་ཝི་ཏ་ཀྐ་ས་ཝི་ཙཱ་རོ ས་མཱ་དྷི, ཨ་ཝི་ཏ་ཀྐ་ཝི་ཙཱ་ར་མ་ཏྟོ ས་མཱ་དྷི, ཨ་ཝི་ཏ་ཀྐ་ཨ་ཝི་ཙཱ་རོ ས་མཱ་དྷི.
‘‘ས་མཱ་པ་ཏྟཱི’’ཏི. ན་ཝ ཨ་ནུ་པུ་བྦ་ཝི་ཧཱ་ར་ས་མཱ་པ་ཏྟི་ཡོ – པ་ཋ་མ་ཛ྄ཛྷཱ་ན་ས་མཱ་པ་ཏྟི, དུ་ཏི་ཡ་ཛ྄ཛྷཱ་ན་ས་མཱ་པ་ཏྟི, ཏ་ཏི་ཡ་ཛ྄ཛྷཱ་ན་ས་མཱ་པ་ཏྟི, ཙ་ཏུ་ཏྠ་ཛ྄ཛྷཱ་ན་ས་མཱ་པ་ཏྟི, ཨཱ་ཀཱ་སཱ་ན་ཉྩཱ་ཡ་ཏ་ན་ས་མཱ་པ་ཏྟི, ཝི་ཉྙཱ་ཎ་ཉྩཱ་ཡ་ཏ་ན་ས་མཱ་པ་ཏྟི, ཨཱ་ཀི་ཉྩ་ཉྙཱ་ཡ་ཏ་ན་ས་མཱ་པ་ཏྟི, ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་མཱ་པ་ཏྟི, ས་ཉྙཱ་ཝེ་ད་ཡི་ཏ་ནི་རོ་དྷ་ས་མཱ་པ་ཏྟི.
‘‘སཾ་ཀི་ལེ་ས’’ནྟི ཧཱ་ན་བྷཱ་གི་ཡོ དྷ་མྨོ. ‘‘ཝོ་དཱ་ན’’ནྟི ཝི་སེ་ས་བྷཱ་གི་ཡོ དྷ་མྨོ. ‘‘ཝུ་ཊྛཱ་ན’’ནྟི. ཝོ་དཱ་ན་མྤི ཝུ་ཊྛཱ་ནཾ, ཏ་མྷཱ ཏ་མྷཱ ས་མཱ་དྷི་མྷཱ ཝུ་ཊྛཱ་ན་མྤི ཝུ་ཊྛཱ་ན་ནྟི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ཛྷཱ་ན་ཝི་མོ་ཀྑ་ས་མཱ་དྷི་ས་མཱ་པ་ཏྟཱི་ནཾ སཾ་ཀི་ལེ་སཾ ཝོ་དཱ་ནཾ ཝུ་ཊྛཱ་ནཾ ཡ་ཐཱ་བྷཱུ་ཏཾ ཉཱ་ཎཾ.
༨༢༩. (༨) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ པུ་བྦེ་ནི་ཝཱ་སཱ་ནུ་སྶ་ཏི ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་ར་ཏི, སེ་ཡྻ་ཐི་དཾ – ཨེ་ཀ་མྤི ཛཱ་ཏིཾ དྭེ་པི ཛཱ་ཏི་ཡོ ཏི་སྶོ་པི ཛཱ་ཏི་ཡོ ཙ་ཏ་སྶོ་པི ཛཱ་ཏི་ཡོ པ་ཉྩ་པི ཛཱ་ཏི་ཡོ ད་ས་པི ཛཱ་ཏི་ཡོ ཝཱི་ས་མྤི ཛཱ་ཏི་ཡོ ཏིཾ་ས་མྤི ཛཱ་ཏི་ཡོ ཙ་ཏྟཱ་ལཱི་ས་མྤི ཛཱ་ཏི་ཡོ པ་ཉྙཱ་ས་མྤི ཛཱ་ཏི་ཡོ ཛཱ་ཏི་ས་ཏ་མྤི ཛཱ་ཏི་ས་ཧ་སྶ་མྤི ཛཱ་ཏི་ས་ཏ་ས་ཧ་སྶ་མྤི ཨ་ནེ་ཀེ་པི སཾ་ཝ་ཊྚ་ཀ་པྤེ ཨ་ནེ་ཀེ་པི ཝི་ཝ་ཊྚ་ཀ་པྤེ ཨ་ནེ་ཀེ་པི སཾ་ཝ་ཊྚ་ཝི་ཝ་ཊྚ་ཀ་པྤེ ‘‘ཨ་མུ་ཏྲཱ་སིཾ ཨེ་ཝཾ་ནཱ་མོ ཨེ་ཝཾ་གོ་ཏྟོ ཨེ་ཝཾ་ཝ་ཎྞོ ཨེ་ཝ་མཱ་ཧཱ་རོ ཨེ་ཝཾ་སུ་ཁ་དུ་ཀྑ་པྤ་ཊི་སཾ་ཝེ་དཱི ཨེ་ཝ་མཱ་ཡུ་པ་རི་ཡ་ནྟོ, སོ ཏ་ཏོ ཙུ་ཏོ ཨ་མུ་ཏྲ ཨུ་ད་པཱ་དིཾ; ཏ་ཏྲཱ་པཱ་སིཾ ཨེ་ཝཾ་ནཱ་མོ ཨེ་ཝཾ་གོ་ཏྟོ ཨེ་ཝཾ་ཝ་ཎྞོ ཨེ་ཝ་མཱ་ཧཱ་རོ ཨེ་ཝཾ་སུ་ཁ་དུ་ཀྑ་པྤ་ཊི་སཾ་ཝེ་དཱི ཨེ་ཝ་མཱ་ཡུ་པ་རི་ཡ་ནྟོ, སོ ཏ་ཏོ ཙུ་ཏོ ཨི་དྷཱུ་པ་པ་ནྣོ’’ཏི. ཨི་ཏི སཱ་ཀཱ་རཾ ས་ཨུ་དྡེ་སཾ ཨ་ནེ་ཀ་ཝི་ཧི་ཏཾ པུ་བྦེ་ནི་ཝཱ་སཾ ཨ་ནུ་སྶ་ར་ཏཱི་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ པུ་བྦེ་ནི་ཝཱ་སཱ་ནུ་སྶ་ཏི ཡ་ཐཱ་བྷཱུ་ཏཾ ཉཱ་ཎཾ.
༨༣༠. (༩) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ས་ཏྟཱ་ནཾ ཙུ་ཏཱུ་པ་པཱ་ཏཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏི – ‘‘ཨི་མེ ཝ་ཏ བྷོ་ནྟོ ས་ཏྟཱ ཀཱ་ཡ་དུ་ཙྩ་རི་ཏེ་ན ས་མ་ནྣཱ་ག་ཏཱ ཝ་ཙཱི་དུ་ཙྩ་རི་ཏེ་ན ས་མ་ནྣཱ་ག་ཏཱ མ་ནོ་དུ་ཙྩ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨུ་པ་ཝཱ་ད་ཀཱ མི་ཙྪཱ་དི་ཊྛི་ཀཱ མི་ཙྪཱ་དི་ཊྛི་ཀ་མྨ་ས་མཱ་དཱ་ནཱ. ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ནྣཱ. ཨི་མེ ཝཱ པ་ན བྷོ་ནྟོ ས་ཏྟཱ ཀཱ་ཡ་སུ་ཙ་རི་ཏེ་ན ས་མ་ནྣཱ་ག་ཏཱ ཝ་ཙཱི་སུ་ཙ་རི་ཏེ་ན ས་མ་ནྣཱ་ག་ཏཱ མ་ནོ་སུ་ཙ་རི་ཏེ་ན ས་མ་ནྣཱ་ག་ཏཱ ཨ་རི་ཡཱ་ནཾ ཨ་ནུ་པ་ཝཱ་ད་ཀཱ ས་མྨཱ་དི་ཊྛི་ཀཱ ས་མྨཱ་དི་ཊྛི་ཀ་མྨ་ས་མཱ་དཱ་ནཱ. ཏེ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ནྣཱ’’ཏི. ཨི་ཏི དི་བྦེ་ན ཙ་ཀྑུ་ནཱ ཝི་སུ་དྡྷེ་ན ཨ་ཏི་ཀྐ་ནྟ་མཱ་ནུ་ས་ཀེ་ན ས་ཏྟེ པ་སྶ་ཏི ཙ་ཝ་མཱ་ནེ ཨུ་པ་པ་ཛྫ་མཱ་ནེ ཧཱི་ནེ པ་ཎཱི་ཏེ སུ་ཝ་ཎྞེ དུ་བྦ་ཎྞེ སུ་ག་ཏེ དུ་གྒ་ཏེ ཡ་ཐཱ་ཀ་མྨཱུ་པ་གེ ས་ཏྟེ པ་ཛཱ་ནཱ་ཏཱི་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ས་ཏྟཱ་ནཾ ཙུ་ཏཱུ་པ་པཱ་ཏཾ ཡ་ཐཱ་བྷཱུ་ཏཾ ཉཱ་ཎཾ.
༨༣༡. (༡༠) ཏ་ཏྠ ཀ་ཏ་མཾ ཏ་ཐཱ་ག་ཏ་སྶ ཨཱ་ས་ཝཱ་ནཾ ཁ་ཡཾ ཡ་ཐཱ་བྷཱུ་ཏཾ ཉཱ་ཎཾ? ཨི་དྷ ཏ་ཐཱ་ག་ཏོ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏཱི་ཏི. ཡཱ ཏ་ཏྠ པ་ཉྙཱ པ་ཛཱ་ན་ནཱ…པེ… ཨ་མོ་ཧོ དྷ་མྨ་ཝི་ཙ་ཡོ ས་མྨཱ་དི་ཊྛི – ཨི་དཾ ཏ་ཐཱ་ག་ཏ་སྶ ཨཱ་ས་ཝཱ་ནཾ ཁ་ཡཾ ཡ་ཐཱ་བྷཱུ་ཏཾ ཉཱ་ཎ་ནྟི.
ད་ས་ཀཾ.
ཉཱ་ཎ་ཝི་བྷ་ངྒོ ནི་ཊྛི་ཏོ.