(༢༡༠) ༣. ཨཱ་ནེ་ཉྫ་ཀ་ཐཱ

༨༩༦. ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ན་ནུ ཨ་ར་ཧཱ པ་ཀ་ཏི་ཙི་ཏྟེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ཧ་ཉྩི ཨ་ར་ཧཱ པ་ཀ་ཏི་ཙི་ཏྟེ ཋི་ཏོ པ་རི་ནི་བྦཱ་ཡ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི’’ཏི.

ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ཨ་ར་ཧཱ ཀི་རི་ཡ་མ་ཡེ ཙི་ཏྟེ ཋི་ཏོ པ་རི་ནི་བྦཱ་ཡ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ར་ཧཱ ཝི་པཱ་ཀ་ཙི་ཏྟེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ཝི་པཱ་ཀ་ཙི་ཏྟེ ཋི་ཏོ པ་རི་ནི་བྦཱ་ཡ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི’’ཏི.

ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ཨ་ར་ཧཱ ཀི་རི་ཡཱ་བྱཱ་ཀ་ཏེ ཙི་ཏྟེ ཋི་ཏོ པ་རི་ནི་བྦཱ་ཡ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ར་ཧཱ ཝི་པཱ་ཀཱ་བྱཱ་ཀ་ཏེ ཙི་ཏྟེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ཝི་པཱ་ཀཱ་བྱཱ་ཀ་ཏེ ཙི་ཏྟེ ཋི་ཏོ པ་རི་ནི་བྦཱ་ཡ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི’’ཏི.

ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི་ཏི? ཨཱ་མ་ནྟཱ. ན་ནུ བྷ་ག་ཝཱ ཙ་ཏུ་ཏྠ་ཛ྄ཛྷཱ་ནཱ ཝུ་ཊྛ་ཧི་ཏྭཱ ས་མ་ན་ནྟ་རཱ པ་རི་ནི་བྦུ་ཏོ་ཏི [དཱི. ནི. ༢.༢༡༩]? ཨཱ་མ་ནྟཱ. ཧ་ཉྩི བྷ་ག་ཝཱ ཙ་ཏུ་ཏྠ་ཛ྄ཛྷཱ་ནཱ ཝུ་ཊྛ་ཧི་ཏྭཱ ས་མ་ན་ནྟ་རཱ པ་རི་ནི་བྦུ་ཏོ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ར་ཧཱ ཨཱ་ནེ་ཉྫེ ཋི་ཏོ པ་རི་ནི་བྦཱ་ཡ་ཏཱི’’ཏི.

ཨཱ་ནེ་ཉྫ་ཀ་ཐཱ ནི་ཊྛི་ཏཱ.