སཱ་ས་ན་པྤ་ཝ་ཏྟི་ཀྐ་མོ
བྷ་ག་ཝ་ཏོ ཧི པ་རི་ནི་བྦུ་ཏི་ཀཱ་ལ་ཏོ པ་ཙྪཱ ཝ་སྶ་ས་ཏ་བྦྷ་ནྟ་རེ བུ་དྡྷ་སཱ་ས་ནེ ཀོ་ཙི་པི ཝཱ་ད་བྷེ་དོ ནཱ་མ ན་ཏྠི. ཝ་སྶ་ས་ཏ་ཀཱ་ལེ པ་ན དུ་ཏི་ཡ་ས་ངྒཱི་ཏི་ཀཱ་རེ་ཧི ཐེ་རེ་ཧི ནི་ཀྐ་ཌྜྷི་ཏཱ ཝ་ཛྫི་པུ་ཏྟ་ཀཱ བྷི་ཀྑཱུ པ་ཀྑཾ ལ་བྷི་ཏྭཱ དྷ་མྨ་ཉྩ ཝི་ན་ཡ་ཉྩ ཨ་ཉྙ་ཐཱ ཀ་ཏྭཱ མ་ཧཱ་ས་ངྒཱི་ཏི་ནཱ་མེ་ན ཝི་སུཾ ས་ངྒཱི་ཏི་མ་ཀཾ་སུ. ཏ་དཱ ས་ངྒཱི་ཏི་དྭ་ཡཱ་རཱུ་ལ༹ྷ་པུ་རཱ་ཎ་དྷ་མྨ་ཝི་ན་ཡ་མེ་ཝ ས་མྤ་ཊི་ཙྪ་ནྟཱ་ནཾ ཐེ་རཱ་ནཾ ག་ཎོ ཐེ་ར་ཝཱ་དོཏི ཙ ཏ་ད་ཉྙེ་སཾ མ་ཧཱ་ས་ངྒྷི་ཀོཏི ཙ ཝོ་ཧ་རཱི་ཡ་ནྟི.
པུ་ན མ་ཧཱ་ས་ངྒྷི་ཀ་ཏོ (༡) གོ་ཀུ་ལི་ཀོ (༢) ཨེ་ཀ་བྱོ་ཧཱ་རི་ཀོཏི དྭེ ཨཱ་ཙ་རི་ཡ་ག་ཎཱ ཨུ་པྤ་ནྣཱ. པུ་ན གོ་ཀུ་ལི་ཀ་ཏོ (༣) པ་ཉྙ་ཏྟི་ཝཱ་དོ (༤) བཱ་ཧུ་ལི་ཀོ (བ་ཧུ་སྶུ་ཏི་ཀོ)ཏི དྭེ ཨུ་པྤ་ནྣཱ. པུ་ན བཱ་ཧུ་ལི་ཀ་ཏོ་པི (༥) ཙེ་ཏི་ཡ་ཝཱ་དི་ག་ཎོ ཨུ་པྤ་ནྣོ་ཏི ཨེ་ཏེ པ་ཉྩ མཱུ་ལ་བྷཱུ་ཏེ་ན མ་ཧཱ་ས་ངྒྷི་ཀེ་ན ས་ཧ ཚ པཱ་ཊི་ཡེ་ཀྐཱ ཨཱ་ཙ་རི་ཡ་ག་ཎཱ ཨ་ཧེ་སུཾ.
ཝི་སུ་དྡྷ་ཏྠེ་ར་ཝཱ་ད་ཏོ་པི (༡) མ་ཧི་སཱ་ས་ཀོ (༢) ཝ་ཛྫི་པུ་ཏྟ་ཀོཏི དྭེ ཨཱ་ཙ་རི་ཡ་ག་ཎཱ ཨུ་པྤ་ནྣཱ. པུ་ན མ་ཧི་སཱ་ས་ཀ་ཏོ (༣) ས་བྦ་ཏྠི་ཝཱ་དོ (༤) དྷ་མྨ་གུ་ཏྟི་ཀོཏི དྭེ ཨུ་པྤ་ནྣཱ. པུ་ན ས་བྦ་ཏྠི་ཝཱ་ད་ཏོ་པི (༥) ཀ་སྶ་པི་ཡོ, ཏ་ཏོ་པི (༦) ས་ངྐ་ནྟི་ཀོ, ཏ་ཏོ་པི (༧) སུ་ཏྟ་ཝཱ་དཱིཏི ཏ་ཡོ ཨུ་པྤ་ནྣཱ. ཝ་ཛྫི་པུ་ཏྟ་ཀ་ཏོ་པི (༨) དྷ་མྨོ་ཏྟ་རི་ཡོ (༩) བྷ་དྡ་ཡཱ་ནི་ཀོ (༡༠) ཚ་ནྣཱ་གཱ་རི་ཀོ (༡༡) ས་མྨི་ཏི་ཡོཏི ཙ་ཏྟཱ་རོ ཨུ་པྤ་ནྣཱ་ཏི ཏེ ཨེ་ཀཱ་ད་ས མཱུ་ལ་བྷཱུ་ཏེ་ན ཝི་སུ་དྡྷ་ཏྠེ་ར་ཝཱ་དེ་ན ས་ཧ དྭཱ་ད་ས ཨཱ་ཙ་རི་ཡ་ག་ཎཱ ཨ་ཧེ་སུཾ. ཨི་ཏི ཨི་མེ ཙ དྭཱ་ད་ས པུ་རི་མཱ ཙ ཚཱ་ཏི ཨ་ཊྛཱ་ར་ས ཨཱ་ཙ་རི་ཡ་ག་ཎཱ དུ་ཏི་ཡ་ཏ་ཏི་ཡ་ས་ངྒཱི་ཏཱི་ནཾ ཨ་ནྟ་རེ ཛཱ་ཏཱ ཨ་ཧེ་སུཾ.
ཏེ་སུ མཱུ་ལ་བྷཱུ་ཏོ ཐེ་ར་ཝཱ་ད་ག་ཎོཡེ་ཝ པོ་རཱ་ཎ་དྷ་མྨ་ཝི་ན་ཡ་ག་རུ་ཀོ ཧུ་ཏྭཱ ཨ་ནཱུ་ན་མ་ན་དྷི་ཀཾ ཀེ་ཝ་ལ་པ་རི་པུ་ཎྞཾ པ་རི་སུ་དྡྷཾ པོ་རཱ་ཎི་ཀཾ དྷ་མྨ་ཝི་ན་ཡཾ དྷཱ་རེ་སི. ཨི་ཏ་རེ པ་ན ས་ཏྟ་ར་ས བྷི་ནྣ་ག་ཎཱ པོ་རཱ་ཎི་ཀཾ དྷ་མྨ་ཝི་ན་ཡཾ ཨ་ཉྙ་ཐཱ ཨ་ཀཾ་སུ. ཏེ་ན ཏེ་སཾ དྷ་མྨ་ཝི་ན་ཡོ ཀ་ཏྠ་ཙི ཨཱུ་ནོ ཀ་ཏྠ་ཙི ཨ་དྷི་ཀོ ཧུ་ཏྭཱ ཨ་པ་རི་པུ་ཎྞོ ཙེ་ཝ ཨ་ཧོ་སི ཨ་པ་རི་སུ་དྡྷོ ཙ. ཏེ་ན ཝུ་ཏྟཾ དཱི་པ་ཝཾ་སེ པ་ཉྩ་མ་པ་རི་ཙྪེ་དེ –
༣༠. ‘‘ནི་ཀྐ་ཌྜྷི་ཏཱ པཱ་པ་བྷི་ཀྑཱུ, ཐེ་རེ་ཧི ཝ་ཛྫི་པུ་ཏྟ་ཀཱ;
ཨ་ཉྙཾ པ་ཀྑཾ ལ་བྷི་ཏྭཱ་ན, ཨ་དྷ་མྨ་ཝཱ་དཱི བ་ཧཱུ ཛ་ནཱ.
༣༡. ད་ས་ས་ཧ་སྶཱ ས་མཱ་ག་ནྟྭཱ, ཨ་ཀཾ་སུ དྷ་མྨ་ས་ངྒ་ཧཾ;
ཏ་སྨཱ་ཡཾ དྷ་མྨ་ས་ངྒཱི་ཏི, མ་ཧཱ་ས་ངྒཱི་ཏཱི་ཏི ཝུ་ཙྩ་ཏི.
༣༢. མ་ཧཱ་ས་ངྒཱི་ཏི་ཀཱ བྷི་ཀྑཱུ, ཝི་ལོ་མཾ ཨ་ཀཾ་སུ སཱ་ས་ནེ;
བྷི་ནྡི་ཏྭཱ མཱུ་ལ་ས་ངྒ་ཧཾ, ཨ་ཉྙཾ ཨ་ཀཾ་སུ ས་ངྒ་ཧཾ.
༣༣. ཨ་ཉྙ་ཏྲ ས་ངྒ་ཧི་ཏཾ སུ་ཏྟཾ, ཨ་ཉྙ་ཏྲ ཨ་ཀ་རིཾ་སུ ཏེ;
ཨ་ཏྠཾ དྷ་མྨ་ཉྩ བྷི་ནྡིཾ་སུ, ཝི་ན་ཡེ ནི་ཀཱ་ཡེ་སུ ཙ པ་ཉྩ་སུ…པེ…
༤༩. ཨ་ཏྠཾ དྷ་མྨ་ཉྩ བྷི་ནྡིཾ་སུ, ཨེ་ཀ་དེ་ས་ཉྩ ས་ངྒ་ཧཾ;
ག་ནྠ་ཉྩ ཨེ་ཀ་དེ་ས་ཉྷི, ཚ་ཌྜེ་ཏྭཱ ཨ་ཉྙཾ ཨ་ཀཾ་སུ ཏེ.
༥༠. ནཱ་མཾ ལི་ངྒཾ པ་རི་ཀྑཱ་རཾ, ཨཱ་ཀ་པྤ་ཀ་ར་ཎཱི་ཡཱ་ནི ཙ;
པ་ཀ་ཏི་བྷཱ་ཝཾ ཛ་ཧི་ཏྭཱ, ཏ་ཉྩ ཨ་ཉྙཾ ཨ་ཀཾ་སུ ཏེ.
༥༡. ས་ཏྟ་ར་ས བྷི་ནྣ་ཝཱ་དཱ, ཨེ་ཀ་ཝཱ་དོ ཨ་བྷི་ནྣ་ཀོ;
ས་བྦེ་ཝ་ཊྛཱ་ར་ས ཧོ་ནྟི, བྷི་ནྣ་ཝཱ་དེ་ན ཏེ ས་ཧ.
༥༢. ནི་གྲོ་དྷོ་ཝ མ་ཧཱ་རུ་ཀྑོ, ཐེ་ར ཝཱ་དཱ་ན་མུ་ཏྟ་མོ;
ཨ་ནཱུ་ནཾ ཨ་ན་དྷི་ཀ་ཉྩ, ཀེ་ཝ་ལཾ ཛི་ན་སཱ་ས་ནཾ;
ཀ་ཎྚ་ཀཱ ཝི་ཡ རུ་ཀྑ་མྷི, ནི་བྦ་ཏྟཱ ཝཱ་ད་སེ་ས་ཀཱ.
༥༣. པ་ཋ་མེ ཝ་སྶ་ས་ཏེ ན་ཏྠི, དུ་ཏི་ཡེ ཝ་སྶ་ས་ཏ་ནྟ་རེ;
བྷི་ནྣཱ ས་ཏྟ་ར་ས ཝཱ་དཱ, ཨུ་པྤ་ནྣཱ ཛི་ན་སཱ་ས་ནེ’’ཏི [ཀ་ཐཱ. ཨ་ཊྛ. ནི་དཱ་ན་ཀ་ཐཱ].
ཨ་སོ་ཀ་ར་ཉྙོ ཙ ཀཱ་ལེ པ་རི་ཧཱི་ན་ལཱ་བྷ་ས་ཀྐཱ་རཱ ཨ་ཉྙ་ཏི་ཏྠི་ཡཱ ལཱ་བྷ་ས་ཀྐཱ་རཾ པ་ཏྠ་ཡ་མཱ་ནཱ བྷི་ཀྑཱུ་སུ པ་བྦ་ཛི་ཏྭཱ ས་ཀཱ་ནི ས་ཀཱ་ནི དི་ཊྛི་ག་ཏཱ་ནི དཱི་པེ་ནྟི ‘‘ཨ་ཡཾ དྷ་མྨོ, ཨ་ཡཾ ཝི་ན་ཡོ, ཨི་དཾ ས་ཏྠུ་སཱ་ས་ན’’ནྟི. བྷི་ཀྑཱུ་ནཾ ས་ནྟི་ཀེ པ་བྦ་ཛྫཾ ཨ་ལ་བྷ་མཱ་ནཱ་པི ས་ཡ་མེ་ཝ ཀེ་སེ ཚི་ནྡི་ཏྭཱ ཀཱ་སཱ་ཡཱ་ནི ཝ་ཏྠཱ་ནི ཨ་ཙྪཱ་དེ་ཏྭཱ ཝི་ཧཱ་རེ་སུ ཝི་ཙ་ར་ནྟཱ ཨུ་པོ་ས་ཐ་ཀ་མྨཱ་དི་ཀ་ར་ཎ་ཀཱ་ལེ ས་ངྒྷ་མ་ཛ྄ཛྷཾ པ་ཝི་ས་ནྟི, ཏེ བྷི་ཀྑུ་ས་ངྒྷེ་ན དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ནི་གྒ་ཡ྄ཧ་མཱ་ནཱ་པི དྷ་མྨ་ཝི་ན་ཡཱ་ནུ་ལོ་མཱ་ཡ པ་ཊི་པ་ཏྟི་ཡཱ ཨ་ས་ཎྛ་ཧ་ནྟཱ ཨ་ནེ་ཀ་རཱུ་པཾ སཱ་ས་ན་སྶ ཨ་བྦུ་ད་ཉྩ མ་ལ་ཉྩ ཀ་ཎྚ་ཀ་ཉྩ ས་མུ་ཊྛཱ་པེ་ནྟི. ཀེ་ཙི ཨ་གྒིཾ པ་རི་ཙ་ར་ནྟི, ཀེ་ཙི པ་ཉྩཱ་ཏ་པེ ཏ་པ་ནྟི, ཀེ་ཙི ཨཱ་དི་ཙྩཾ ཨ་ནུ་པ་རི་ཝ་ཏྟ་ནྟི, ཀེ་ཙི དྷ་མྨ་ཉྩ ཝི་ན་ཡ་ཉྩ ཝོ་བྷི་ནྡི་སྶཱ་མཱ་ཏི ཏ་ཐཱ ཏ་ཐཱ པ་གྒ་ཎྷ་ནྟི. ཏ་དཱ བྷི་ཀྑུ་ས་ངྒྷོ ན ཏེ་ཧི ས་དྡྷིཾ ཨུ་པོ་ས་ཐཾ ཝཱ པ་ཝཱ་ར་ཎཾ ཝཱ ཨ་ཀཱ་སི, ཨ་སོ་ཀཱ་རཱ་མེ ས་ཏྟ ཝ་སྶཱ་ནི ཨུ་པོ་ས་ཐོ ཨུ་པ་ཙྪི་ཛྫི [ཀ་ཐཱ. ཨ་ཊྛ. ནི་དཱ་ན་ཀ་ཐཱ; པཱ་རཱ. ཨ་ཊྛ. ༡.ཏ་ཏི་ཡ་ས་ངྒཱི་ཏི་ཀ་ཐཱ].
ཨི་མ་ཉྩ པ་ན པ་ཝ་ཏྟིཾ ཨུ་པཱ་དཱ་ཡ ཨེ་ཝ་མྤི ས་ཀྐཱ ག་ཧེ་ཏུཾ ‘‘ས་ཏྟ་ར་ས་ནྣཾ བྷི་ནྣ་ཝཱ་ད་ག་ཎཱ་ནཾ དྷ་མྨ་ཝི་ན་ཡ་སྶ པ་ཙྪི་མ་ཀཱ་ལེ་སུ ཨ་པ་རི་སུ་དྡྷ་ཏ་ར་བྷཱ་ཝོ ཨཱི་དི་སེ་ན་པི ཀཱ་ར་ཎེ་ན ཨ་ཧོ་སཱི’’ཏི. ཀི་ཉྩཱ་པི ཧི བུ་དྡྷ་སཱ་ས་ན་བྷཱུ་ཏེ པ་རི་སུ་དྡྷ་དྷ་མྨ་ཝི་ན་ཡེ ‘‘ཀོ་ཙི་པི ནི་ཙྩོ དྷུ་ཝོ ས་སྶ་ཏོ ནཱ་མ ན་ཏྠི ཨ་ཉྙ་ཏྲ ནི་བྦཱ་ན་དྷཱ་ཏུ་ཡཱ, པ་ར་མ་ཏྠ་ཏོ ཨ་ཏྟཱ་པི ན་ཏྠི, ས་བྦེ་པི ས་ངྑཱ་རཱ ཨ་ནི་ཙྩཱ ཨ་དྡྷུ་ཝཱ ཨ་ས་སྶ་ཏཱ ཨ་ན་ཏྟཱ་ཡེ་ཝཱ’’ཏི ཨ་ཏྠོ ཨ་ཏི་ཝི་ཡ པཱ་ཀ་ཊོ ཧོ་ཏི, ཏ་ཐཱ་པི དཱ་ནི ཨ་ཐེ་ར་ཝཱ་དི་ཀཱ་ནཾ ག་ནྠེ་སུ ཙ པུ་བྦེ ཝེ་ཏུ་ལླ་ཝཱ་དཱ་དཱི་སུ ཙ ‘‘བུ་དྡྷོ ནི་ཙྩོ དྷུ་ཝོ ས་སྶ་ཏོ ཨ་ཏྟཱ’’ཏི ཙ, ‘‘ས་བྦེ་པི ས་ཏྟཱ ནི་ཙྩཱ དྷུ་ཝཱ ས་སྶ་ཏཱ ཨ་ཏྟཱ’’ཏི ཙ ཨ་ཏྠོ དི་སྶ་ཏི.
ཨ་ཐ ཨ་སོ་ཀོ དྷ་མྨ་རཱ་ཛཱ སཱ་ས་ནཾ ཝི་སོ་དྷེ་ཏུ་ཀཱ་མོ མོ་གྒ་ལི་པུ་ཏྟ་ཏི་སྶ་ཏྠེ་ར་སྶ ས་ནྟི་ཀེ པ་ཋ་མ་མེ་ཝ ས་མ་ཡཾ ཨུ་གྒ་ཎྷི་ཏྭཱ ཨེ་ཀ་ལ་དྡྷི་ཀེ ཨེ་ཀ་ལ་དྡྷི་ཀེ བྷི་ཀྑཱུ ཨེ་ཀ་ཏོ ཀཱ་རེ་ཏྭཱ ཨེ་ཀ་མེ་ཀཾ བྷི་ཀྑུ་ས་མཱུ་ཧཾ པ་ཀྐོ་སཱ་པེ་ཏྭཱ པུ་ཙྪི ‘‘ཀིཾ ཝཱ་དཱི བྷ་ནྟེ ས་མྨཱ་ས་མྦུ་དྡྷོ’’ཏི. ཏ་ཏོ ཡེ ཡེ ‘‘ས་མྨཱ་ས་མྦུ་དྡྷོ ས་སྶ་ཏ་ཝཱ་དཱི’’ཏི ཝཱ, ‘‘ཨེ་ཀ་ཙྩ་ས་སྶ་ཏ་ཝཱ་དཱི’’ཏི ཝཱ ཨེ་ཝ་མཱ་དི་ནཱ ཨ་ཏྟ་ནོ ཨ་ཏྟ་ནོ ཝཱ་དཱ་ནུ་རཱུ་པཾ མི་ཙྪཱ་ཝཱ་དཾ ཨཱ་ཧཾ་སུ, ཏེ ཏེ ‘‘ན་ཡི་མེ བྷི་ཀྑཱུ, ཨ་ཉྙ་ཏི་ཏྠི་ཡཱ ཨི་མེ’’ཏི ཏ་ཐ་ཏོ ཉ་ཏྭཱ ཏེ་སཾ སེ་ཏ་ཀཱ་ནི ཝ་ཏྠཱ་ནི ད་ཏྭཱ ཨུ་པྤ་བྦཱ་ཛེ་སི. ཏེ ས་བྦེ་པི ས་ཊྛི་ས་ཧ་སྶ་མ་ཏྟཱ ཨ་ཧེ་སུཾ.
ཨ་ཐ་ཉྙེ བྷི་ཀྑཱུ པུ་ཙྪི་ཏྭཱ ཏེ་ཧི ‘‘ཝི་བྷ་ཛྫ་ཝཱ་དཱི མ་ཧཱ་རཱ་ཛ ས་མྨཱ་ས་མྦུ་དྡྷོ’’ཏི ཝུ་ཏྟེ ‘‘སུ་དྡྷཾ དཱ་ནི བྷ་ནྟེ སཱ་ས་ནཾ, ཀ་རོ་ཏུ བྷི་ཀྑུ་ས་ངྒྷོ ཨུ་པོ་ས་ཐ’’ནྟི ཝ་ཏྭཱ ཨཱ་ར་ཀྑ་ཉྩ ད་ཏྭཱ ན་ག་རཾ པཱ་ཝི་སི. ས་མ་གྒོ ས་ངྒྷོ ས་ནྣི་པ་ཏི་ཏྭཱ ཨུ་པོ་ས་ཐཾ ཨ་ཀཱ་སི. ཏ་སྨིཾ ས་མཱ་ག་མེ མོ་གྒ་ལི་པུ་ཏྟ་ཏི་སྶ་ཏྠེ་རོ ཡཱ་ནི ཙ ཏ་དཱ ཨུ་པྤ་ནྣཱ་ནི ཝ་ཏྠཱུ་ནི ཡཱ་ནི ཙ ཨཱ་ཡ་ཏིཾ ཨུ་པྤ་ཛྫི་སྶ་ནྟི, ས་བྦེ་ས་མྤི ཏེ་སཾ པ་ཊི་བཱ་ཧ་ན་ཏྠཾ ས་ཏྠཱ་རཱ དི་ནྣ་ན་ཡ་ཝ་སེ་ནེ་ཝ ཏ་ཐཱ་ག་ཏེ་ན ཋ་པི་ཏ་མཱ་ཏི་ཀཾ ཝི་བྷ་ཛ་ནྟོ པ་ར་པྤ་ཝཱ་ད་མ་དྡ་ནཾ ཀ་ཐཱ་ཝ་ཏྠུཾ ནཱ་མ ཨ་བྷི་དྷ་མྨ་པི་ཊ་ཀེ པ་ཉྩ་མཾ པ་ཀ་ར་ཎཾ ཨ་བྷཱ་སི. ཏ་ཏོ མོ་གྒ་ལི་པུ་ཏྟ་ཏི་སྶ་ཏྠེ་ར་པྤ་མུ་ཁཱ ཏི་པི་ཊ་ཀ་པ་རི་ཡ་ཏྟི་དྷ་རཱ པ་བྷི་ནྣ་པ་ཊི་ས་མྦྷི་དཱ་པ་ཏྟཱ ས་ཧ་སྶཾ བྷི་ཀྑཱུ ཐེ་ར་ཝཱ་དི་ནོ ས་ངྒཱི་ཏི་དྭ་ཡཱ་རཱུ་ལ༹ྷཾ པ་རི་སུ་དྡྷཾ པོ་རཱ་ཎ་དྷ་མྨ་ཝི་ན་ཡཾ པུ་ན ས་ངྒཱ་ཡི་ཏྭཱ སུ་ར་ཀྑི་ཏཾ ར་ཀྑིཾ་སུ [པཱ་རཱ. ཨ་ཊྛ. ༡.ཏ་ཏི་ཡ་ས་ངྒཱི་ཏི་ཀ་ཐཱ].
ཨ་ཐ མོ་གྒ་ལི་པུ་ཏྟ་ཏི་སྶ་ཏྠེ་རོ ན་ཝ་སུ པ་ཙྩ་ནྟ་ཊྛཱ་ནེ་སུ སཱ་ས་ན་པ་ཏི་ཊྛཱ་པ་ན་ཏྠཾ ན་ཝ ནཱ་ཡ་ཀ་ཏྠེ་རེ ཨུ་ཙྩི་ནི་ཏྭཱ པེ་སེ་སི. ཏེ་སུ ཨ་ཊྛ་ཧི ཐེ་རེ་ཧི ཨ་ཏྟ་ནོ ཨ་ཏྟ་ནོ པ་ཏྟ་ཊྛཱ་ནཾ ག་ནྟྭཱ བུ་དྡྷ་སཱ་ས་ནེ པ་ཏི་ཊྛཱ་པི་ཏེ མ་ཧཱ་མ་ཧི་ནྡ་ཏྠེ་རོ ཚ་ཏྟིཾ་སཱ་དྷི་ཀ་དྭི་ས་ཏེ (༢༣༦) བུ་དྡྷ་ཝ་སྶེ ཛ་མྦུ་དཱི་པ་ཏོ སཱི་ཧ་ལ༹་དཱི་པཾ ག་ནྟྭཱ དེ་ཝཱ་ནཾ་པི་ཡ་ཏི་སྶ་རཱ་ཛཔྤ་མུ་ཁཾ དཱི་པ་ཀ་ཛ་ན་ས་མཱུ་ཧཾ པ་སཱ་དེ་ཏྭཱ བུ་དྡྷ་སཱ་ས་ནཾ ས་མྤ་ཏི་ཊྛཱ་པེ་སི, ཏེ་ན ཙ ར་ཉྙཱ དི་ནྣཾ མ་ཧཱ་མེ་གྷ་ཝ་ནུ་ཡྻཱ་ནཾ པ་ཊི་གྒ་ཧེ་ཏྭཱ ཏ་ཏྠ མ་ཧཱ་ཝི་ཧཱ་རཾ ནཱ་མ ས་ངྒྷཱ་རཱ་མཾ པ་ཏི་ཊྛཱ་པེ་སི [པཱ་རཱ. ཨ་ཊྛ. ༡.ཏ་ཏི་ཡ་ས་ངྒཱི་ཏི་ཀ་ཐཱ]. ཏ་ཏོ པ་བྷུ་ཏི སཱི་ཧ་ལ༹་དཱི་པེ བུ་དྡྷ་སཱ་ས་ནཾ ཡཱ་ཝ ཝ་ཊྚ་གཱ་མ་ཎི་རཱ་ཛཀཱ་ལཱ ནི་ཀཱ་ཡ་ནྟ་ར་ཝཱ་དཱ་ཀུ་ལ་ར་ཧི་ཏཾ ནི་མྨ་ལཾ སུ་པ་རི་སུ་དྡྷཾ ཧུ་ཏྭཱ ས་མུ་ཛྫ་ལི་ཏྠ. ཝ་ཊྚ་གཱ་མ་ཎི་རཱ་ཛ་ཀཱ་ལ་ཏོ པ་ན པ་ཊྛཱ་ཡ ནི་ཀཱ་ཡ་ནྟ་ར་ཝཱ་དཱ་པི སཱི་ཧ་ལ༹་དཱི་པ་མུ་པཱ་ག་མིཾ་སུ. ཏ་དཱ ཝི་སུ་དྡྷ་ཏྠེ་ར་ཝཱ་དི་ནོ ཡ་ཐཱ པུ་རཱ་ཎ་དྷ་མྨ་ཝི་ན་ཡོ ཏེ་ཧི ནི་ཀཱ་ཡ་ནྟ་ར་ཝཱ་དེ་ཧི ཨ་ས་མྨི་སྶོ ཨ་མ་ལཱི་ནོ པ་ཀ་ཏི་པ་རི་སུ་དྡྷོ ཧུ་ཏྭཱ ཏི་ཊྛེ་ཡྻ, ཏ་ཐཱ ཏཾ མ་ཧུ་སྶཱ་ཧེ་ན སུ་ར་ཀྑི་ཏཾ ར་ཀྑིཾ་སུ. ཀ་ཐཾ?