ཝི་སུ་དྡྷི་མ་གྒ་སྶ ཀ་ར་ཎཾ

ཏེ་སུ ཏཱ་ཝ ཝི་སུ་དྡྷི་མ་གྒཾ ཨཱ་ཙ་རི་ཡ་བུ་དྡྷ་གྷོ་སོ ས་ངྒྷ་པཱ་ལ་ཏྠེ་རེ་ན ཨ་ཛ྄ཛྷེ་སི་ཏོ མ་ཧཱ་ཝི་ཧཱ་ར་སྶ ད་ཀྑི་ཎ་བྷཱ་གེ པ་དྷཱ་ན་གྷ་རེ མ་ཧཱ་ནི་ག་མ་སྶཱ་མི་ནོ པཱ་སཱ་དེ [པ་རི. ཨ་ཊྛ. ནི་ག་མ་ན་ཀ་ཐཱ] ཝ་ས་ནྟོ ཨ་ཀཱ་སི. ཨེ་ཏྟཱ་ཝ་ཏཱ ཙ ‘‘སོ པ་ནེ་ས ཝི་སུ་དྡྷི་མ་གྒོ ཀེ་ན ཀ་ཏོ, ཀ་དཱ ཀ་ཏོ, ཀ་ཏྠ ཀ་ཏོ, ཀ་སྨཱ ཀ་ཏོ’’ཏི ཨི་མེ་སཾ པ་ཉྷཱ་ན་མ་ཏྠོ ཝི་ཏྠཱ་རེ་ན ཝི་བྷཱ་ཝི་ཏོ ཧོ་ཏི.

ཨི་དཱ་ནི ཀི་མ་ཏྠཾ ཀ་ཏོ་ཏི་ཨཱ་དཱི་ནཾ པ་ཉྷཱ་ན་མ་ཏྠཾ པ་ཀཱ་ས་ཡི་སྶཱ་མ. ཏ་ཏྠ ཀི་མ་ཏྠཾ ཀ་ཏོཏི ཨེ་ཏ་སྶ པ་ན པ་ཉྷ་སྶ ཨ་ཏྠོ ཨཱ་ཙ་རི་ཡེ་ནེ་ཝ པ་ཀཱ་སི་ཏོ. ཀ་ཐཾ?

‘‘སུ་དུ་ལླ་བྷཾ ལ་བྷི་ཏྭཱ་ན, པ་བྦ་ཛྫཾ ཛི་ན་སཱ་ས་ནེ;

སཱི་ལཱ་དི་ས་ངྒ་ཧཾ ཁེ་མཾ, ཨུ་ཛུཾ མ་གྒཾ ཝི་སུ་དྡྷི་ཡཱ.

ཡ་ཐཱ་བྷཱུ་ཏཾ ཨ་ཛཱ་ན་ནྟཱ, སུ་དྡྷི་ཀཱ་མཱ་པི ཡེ ཨི་དྷ;

ཝི་སུ་དྡྷིཾ ནཱ་དྷི་ག་ཙྪ་ནྟི, ཝཱ་ཡ་མ་ནྟཱ་པི ཡོ་གི་ནོ.

ཏེ་སཾ པཱ་མོ་ཛྫ་ཀ་ར་ཎཾ, སུ་ཝི་སུ་དྡྷ་ཝི་ནི་ཙྪ་ཡཾ;

མ་ཧཱ་ཝི་ཧཱ་ར་ཝཱ་སཱི་ནཾ, དེ་ས་ནཱ་ན་ཡ་ནི་སྶི་ཏཾ.

ཝི་སུ་དྡྷི་མ་གྒཾ བྷཱ་སི་སྶཾ, ཏཾ མེ ས་ཀྐ་ཙྩ བྷཱ་ས་ཏོ;

ཝི་སུ་དྡྷི་ཀཱ་མཱ ས་བྦེ་པི, ནི་སཱ་མ་ཡ་ཐ སཱ་དྷ་ཝོ’’ཏི [ཝི་སུ་དྡྷི. ༡.༢].

ཏ་སྨཱ ཨེ་ས ཝི་སུ་དྡྷི་མ་གྒོ ཝི་སུ་དྡྷི་ས་ངྑཱ་ཏ་ནི་བྦཱ་ན་ཀཱ་མཱ་ནཾ སཱ་དྷུ་ཛ་ནཱ་ནཾ སཱི་ལ་ས་མཱ་དྷི་པ་ཉྙཱ་ས་ངྑཱ་ཏ་སྶ ཝི་སུ་དྡྷི་མ་གྒ་སྶ ཡཱ་ཐཱ་ཝ་ཏོ ཛཱ་ན་ན་ཏྠཱ་ཡ ཀ་ཏོ་ཏི པ་དྷཱ་ན་པྤ་ཡོ་ཛ་ན་ཝ་སེ་ན ཝེ་དི་ཏ་བྦོ. ཨ་པྤ་དྷཱ་ན་པྤ་ཡོ་ཛ་ན་ཝ་སེ་ན པ་ན ཙ་ཏཱུ་སུ ཨཱ་ག་མ་ཊྛ་ཀ་ཐཱ་སུ ག་ནྠ་ས་ལླ་ཧུ་ཀ་བྷཱ་ཝ་ཏྠཱ་ཡ་པི ཀ་ཏོ་ཏི ཝེ་དི་ཏ་བྦོ. ཏ་ཐཱ ཧི ཝུ་ཏྟཾ ཨཱ་ག་མ་ཊྛ་ཀ་ཐཱ་སུ –

‘‘མ་ཛ྄ཛྷེ ཝི་སུ་དྡྷི་མ་གྒོ, ཨེ་ས ཙ་ཏུ་ནྣ་མྤི ཨཱ་ག་མཱ་ན་ཉྷི;

ཋ་ཏྭཱ པ་ཀཱ་ས་ཡི་སྶ་ཏི, ཏ་ཏྠ ཡ་ཐཱ་བྷཱ་སི་ཏ་མ་ཏྠཾ;

ཨི་ཙྩེ་ཝ མེ ཀ་ཏོ’’ཏི [དཱི. ནི. ཨ་ཊྛ. ༡.ག་ནྠཱ་ར་མྦྷ་ཀ་ཐཱ].