ཨཱ་ཡཱ་ཙ་ན་ཀཱ་ར་ཎཾ

ཀ་སྨཱ པ་ན ཏེ ཏཾ ཨཱ་ཡཱ་ཙིཾ་སཱུ་ཏི? ཝུ་ཙྩ་ཏེ, མ་ཧཱ་ཝི་ཧཱ་ར་ཝཱ་སི་ནོ ཧི ཨཱ་དི་ཏོ་ཡེ་ཝ པ་ཊྛཱ་ཡ པི་ཊ་ཀ་ཏྟ་ཡཾ ཡ་ཐཱ ཏཱི་སུ ས་ངྒཱི་ཏཱི་སུ པཱ་ལི༹་བྷཱ་སཱ་ཡ ས་ངྒཱི་ཏཾ, ཡ་ཐཱ ཙ ཝ་ཊྚ་གཱ་མ་ཎི་རཱ་ཛཀཱ་ལེ (༤༥༥-༤༦༧-བུ-ཝ) པོ་ཏྠ་ཀེ་སུ ཨཱ་རོ་པི་ཏཾ, ཏ་ཐཱ པོ་རཱ་ཎཾ པཱ་ལི༹་པི་ཊ་ཀ་མེ་ཝ ཨུ་གྒ་ཎྷ་ནྟི ཙེ་ཝ ཝཱ་ཙེ་ནྟི ཙ, ན ས་ཀྐ་ཏཱ་རོ་པི་ཏ་པི་ཊ་ཀཾ. ཨ་ཊྛ་ཀ་ཐཱ་ཡོ ཙ ཏི་ཝ་སྶ་ས་ཏ་མ་ཏྟ་ཏོ པུ་རེ ཀ་ཏཱ. ཏ་ཐཱ ཧི ཨ་ཊྛ་ཀ་ཐཱ་སུ ཝ་ས་བྷ་རཱ་ཛཀཱ་ལ་ཏོ (༦༠༩-༦༥༣-བུ-༠) པ་ཙྪཱ སཱི་ཧ་ལི༹་ཀ་ཏྠེ་རཱ་ན་ཉྩེ་ཝ ཨ་ཉྙེ་ས་ཉྩ ཝ་ཏྠུ ན དི་སྶ་ཏི ཋ་པེ་ཏྭཱ མ་ཧཱ་སེ་ནརཱ་ཛ་ཝ་ཏྠུཾ [པཱ་རཱ. ཨ་ཊྛ. ༢.༢༣༦-༢༣༧], ཡཱ་ཝ ཨཱ་ཙ་རི་ཡ་བུ་དྡྷ་གྷོ་ས་ཀཱ་ལཱ་པི ཙ ཏཱ ཨེ་ཝ པོ་རཱ་ཎ་ཊྛ་ཀ་ཐཱ་ཡོ ཨ་ཏྠི ན ཨ་བྷི་ན་ཝཱི་ཀ་ཏཱ. ཏེ་ན ཏེ་སཾ པི་ཊ་ཀེ་སུ ཡེ་བྷུ་ཡྻེ་ན ཛ་ནཱ པ་རི་ཙ་ཡཾ ཀཱ་ཏུཾ ཨ་ས་ཉྫཱ་ཏཱ་བྷི་ལཱ་སཱ ཧོ་ནྟི ཨ་ས་ཉྫཱ་ཏུ་སྶཱ་ཧཱ. དཱི་པ་ནྟ་རེ་སུ ཙ ཨ་ཏྟ་ནོ པི་ཊ་ཀཾ པ་ཏྠ་རཱ་པེ་ཏུཾ ན ས་ཀྐོ་ནྟི ཨ་ཊྛ་ཀ་ཐཱ་ནཾ དཱི་པ་བྷཱ་སཱ་ཡ ཨ་བྷི་ས་ངྑ་ཏ་ཏྟཱ. ཨ་བྷ་ཡ་གི་རི་ཝཱ་སི་ནོ པ་ན ཝ་ཊྚ་གཱ་མ་ཎི་རཱ་ཛ་ཀཱ་ལ་ཏོ པ་ཊྛཱ་ཡ ས་ཀྐ་ཏ་བྷཱ་སཱ་རོ་པི་ཏཾ དྷ་མྨ་རུ་ཙི་ནི་ཀཱ་ཡཱ་དི་པི་ཊ་ཀ་མྤི མ་ཧཱ་ཡཱ་ན་པི་ཊ་ཀ་མྤི ན་ཝཾ ན་ཝཾ པ་རི་ཡཱ་པུ་ཎ་ནྟི ཙེ་ཝ ཝཱ་ཙེ་ནྟི ཙ, ཏེ་ན ཏེ་སཾ པི་ཊ་ཀེ་སུ ཡེ་བྷུ་ཡྻེ་ན ཛ་ནཱ པ་རི་ཙ་ཡཾ ཀཱ་ཏུཾ ས་ཉྫཱ་ཏཱ་བྷི་ལཱ་སཱ ཧོ་ནྟི ས་ཉྫཱ་ཏུ་སྶཱ་ཧཱ, ན་ཝཾ ན་ཝ་མེ་ཝ ཧི ས་ཏྟཱ པི་ཡཱ་ཡ་ནྟི. ཏ་ཏོ་ཡེ་ཝ ཏེ དཱི་པ་ནྟ་རེ་སུ་པི ཨ་ཏྟ་ནོ ཝཱ་དཾ པ་ཏྠ་རཱ་པེ་ཏུཾ ས་ཀྐོ་ནྟི. ཏ་སྨཱ ཏེ མ་ཧཱ་ཝི་ཧཱ་ར་ཝཱ་སི་ནོ ཐེ་རཱ ཨ་ཏྟ་ནོ སཱི་ཧ་ལ༹་ཊྛ་ཀ་ཐཱ་ཡོ པཱ་ལི༹་བྷཱ་སཱ་ཡ ཨ་བྷི་ས་ངྑ་རི་ཏུ་ཀཱ་མཱ ཏ་ཐཱ ཀཱ་ཏུཾ ས་མ་ཏྠཾ ཨཱ་ཙ་རི་ཡ་བུ་དྡྷ་གྷོ་ས་ཏྠེ་ར་སྶ ཉཱ་ཎ་པྤ་བྷཱ་ཝ་ཝི་སེ་སཾ ཡ་ཐཱ་ཝུ་ཏྟ་གུ་ཎ་ས་མྤ་ནྣ་བྷཱ་ཝ་ཉྩ ཉ་ཏྭཱ ཨཱ་ཡཱ་ཙིཾ་སཱུ་ཏི ཝེ་དི་ཏ་བྦཾ.