ཛེ་ཏ་ཝ་ན་ཝཱ་སི་ནི་ཀཱ་ཡུ་པྤ་ཏྟི

པུ་ན་པི རཱ་ཛཱ ད་ཀྑི་ཎཱ་རཱ་མཝཱ་སི་མྷི ཛི་མྷ་མཱ་ན་སེ ཀུ་ཧ་ཀ་ཏི་སྶ་ཏྠེ་རེ པ་ས་ནྣོ ཧུ་ཏྭཱ ཏ་སྶ་ཏྠཱ་ཡ མ་ཧཱ་ཝི་ཧཱ་ར་སཱི་མ་བྦྷ་ནྟ་རེ ཛོ་ཏི་ཝ་ནུ་ཡྻཱ་ནེ ཛེ་ཏ་ཝ་ན་ཝི་ཧཱ་རཾ ཀཱ་རེ་ཏུ་མཱ་ར་བྷི. མ་ཧཱ་ཝི་ཧཱ་ར་ཝཱ་སི་ནོ བྷི་ཀྑཱུ ཏཾ ནི་ཝཱ་རེ་ཏུཾ ཨ་ས་ཀྐོ་ནྟཱ པུ་ན་པི ཏ་ཏོ ཨ་པ་ཀྐ་མིཾ་སུ. ཏ་དཱ་པི མ་ཧཱ་ཝི་ཧཱ་རོ ན་ཝ མཱ་སཱ་ནི བྷི་ཀྑཱུ་ཧི སུ་ཉྙོ ཨ་ཧོ་སི. རཱ་ཛཱ པ་ན ཨ་ཏྟ་ནོ ཨ་ཛ྄ཛྷཱ་ས་ཡ་ཝ་སེ་ནེ་ཝ ཏ་ཏྠ ཛེ་ཏ་ཝ་ན་ཝི་ཧཱ་རཾ ཀཱ་རེ་ཏྭཱ ཏ་སྶ ཀུ་ཧ་ཀ་ཏི་སྶ་ཏྠེ་ར་སྶ ཨ་དཱ་སི་ཡེ་ཝ. ཏ་ཏྠ ད་ཀྑི་ཎ་གི་རི་ཝི་ཧཱ་ར་ཏོ སཱ་ག་ལི་ཡཱ བྷི་ཀྑཱུ ཨཱ་ག་ནྟྭཱ ཝ་སིཾ་སུ. པ་ཙྪཱ ཙ ཏེ ཨ་མྦ་སཱ་མ་ཎེ་ར་སི་ལཱ་ཀཱ་ལར་ཉྙོ ཀཱ་ལེ (༡༠༦༧-༡༠༨༠-བུ-ཝ) ཝེ་ཏུ་ལླ་ཝཱ་དི་ནོ ཨ་ཧེ་སུཾ [མ་ཧཱ་ཝཾ་སེ ༣༧, ༣༢-གཱ་ཐཱ་དཱི་སུ, ནི་ཀཱ་ཡ་ས་ངྒ་ཧེ ༡༥-པི་ཊྛེ].

ཨེ་ཝཾ ཨཱ་ཙ་རི་ཡ་བུ་དྡྷ་གྷོ་ས་ཏྠེ་ར་སྶ སཱི་ཧ་ལ༹་དཱི་པ་མཱ་ག་མ་ན་ཀཱ་ལ་ཏོ (༩༦༥-བུ-ཝ) པུ་བྦེ་ཡེ་ཝ ཝི་སུ་དྡྷ་ཏྠེ་ར་ཝཱ་དཱི་ཧི མ་ཧཱ་ཝི་ཧཱ་ར་ཝཱ་སཱི་ཧི ཝི་རུ་དྡྷ་ས་མ་ཡཱ ཨ་བྷ་ཡ་གི་རི་ཝཱ་སི་ནོ (༤༥༥-བུ-ཝ) སཱ་ག་ལི་ཡཱ (༧༩༧-༨༡༠-བུ-ཝ) ཛེ་ཏ་ཝ་ན་ཝཱ་སི་ནོ (༨༢༩-༨༤༥-བུ-ཝ) ཙཱ་ཏི ཏ་ཡོ ནི་ཀཱ་ཡཱ ཨུ་པྤ་ནྣཱ ཨ་ཧེ་སུཾ. ཏེ་སུ པ་ན ཨ་བྷ་ཡ་གི་རི་ཝཱ་སི་ནོ་ཡེ་ཝ ཝི་སེ་ས་ཏོ པཱ་ཀ་ཊཱ ཙེ་ཝ ཧོ་ནྟི བ་ལ་ཝ་ནྟོ ཙ. ཏ་ཐཱ ཧི ཏེ ཝི་སུ་དྡྷ་ཏྠེ་ར་ཝཱ་ད་པི་ཊ་ཀ་ཉྩ ཝ་ཛྫི་པུ་ཏྟ་ཀ་པ་རི་ཡཱ་པ་ནྣ་དྷ་མྨ་རུ་ཙི་ནི་ཀཱ་ཡ་པི་ཊ་ཀ་ཉྩ མ་ཧི་སཱ་ས་ཀཱ་དི་ནི་ཀཱ་ཡ་པི་ཊ་ཀ་ཉྩ མ་ཧཱ་ཡཱ་ན་པི་ཊ་ཀ་ཉྩ ས་མྤ་ཊི་ཙྪ་ནྟི. ཏེ་སུ དྷ་མྨ་རུ་ཙི་ནི་ཀཱ་ཡ་པི་ཊ་ཀ་སྶ ས་མྤ་ཊི་ཙྪི་ཏ་བྷཱ་ཝོ པཱ་ཀ་ཊོ་ཡེ་ཝ. མ་ཧི་སཱ་ས་ཀཱ་དི་ནི་ཀཱ་ཡ་པི་ཊ་ཀ་སྶ ས་མྤ་ཊི་ཙྪི་ཏ་བྷཱ་ཝོ པ་ན ཕཱ་ཧི་ཡནྣཱ་མ་སྶ ཙི་ན་བྷི་ཀྑུ་ནོ ཨ་དྡྷཱ་ན་ཀྐ་མ་ས་ལླ་ཀྑ་ཎ་ཀ་ཐཱ་ཡ ཙེ་ཝ ཨ་ཊྛ་ཀ་ཐཱ་སུ པ་ཊི་ཀྑི་ཏྟ་ཝ་ཎྞ་པི་ཊ་ཀཱ་དི་ནཱ་མ་ཝ་སེ་ན ཙ ཝེ་དི་ཏ་བྦོ, ཏ་ཐཱ མ་ཧཱ་ཡཱ་ན་པི་ཊ་ཀ་སྶ ས་མྤ་ཊི་ཙྪི་ཏ་བྷཱ་ཝོ་པི.