ལ་ཀཱ་ར་ནྟ་དྷཱ་ཏུ

པཱ་ལ ར་ཀྑ་ཎེ. ‘‘ར་ཀྑ་ཎཾ, ཏཱ་ཎཾ, གོ་པ་ནཾ, ཨ་ཝ་ནཾ, པཱ་ལ་ནཾ, ར་ཀྑཱ, ར་ཀྑ་ཎཱ, གུ་ཏྟི’’ ཨི་ཙྩེ་ཏེ པ་རི་ཡཱ་ཡཱ. པཱ་ལེ་ཏི, པཱ་ལ་ཡ་ཏི. པཱ་ལ་ཀོ, བུ་དྡྷ་པཱ་ལོ. ཨ་མྦ་པཱ་ལཱི ག་ཎི་ཀཱ. ས་མོ བྷ་ཝ་ཏུ པཱ་ལི་ནཱ. པཱ་ལི་ཏོ, པཱ་ལ་ནཾ, པཱ་ལི༹.

ཨེ་ཏྠ པཱ་ལཱི༹ཏི ཨ་ཏྠཾ པཱ་ལེ་ཏཱི་ཏི པཱ་ལི༹, ལསྶ ལ༹ཏྟཾ. ཨ་ཐ ཝཱ ཨ་ནྟོ་ད་ཀཾ ར་ཀྑ་ཎ་ཊྛེ་ན མ་ཧ་ཏོ ཏ་ལཱ༹་ཀ་སྶ ཐི་རཱ མ་ཧ་ཏཱི་ཏི པཱ་ལི༹ ཝི་ཡཱ་ཏི པཱ་ལི༹, པ་རི་ཡ་ཏྟི་དྷ་མྨོ. ཨ་པ་རོ ན་ཡོ པ་ཀ་ཊྛཱ་ནཾ ཨུ་ཀྐ་ཊྛཱ་ནཾ སཱི་ལཱ་དི་ཨ་ཏྠཱ་ནཾ བོ་དྷ་ན་ཏོ ས་བྷཱ་ཝ་ནི་རུ་ཏྟི་བྷཱ་ཝ་ཏོ བུ་དྡྷཱ་དཱི་ཧི བྷཱ་སི་ཏ་ཏྟཱ ཙ པ་ཀ་ཊྛཱ་ནཾ ཝ་ཙ་ན་པྤ་བ་ནྡྷཱ་ནཾ ཨཱ་ལཱི༹་ཏི པཱ་ལི༹.

པཱ་ལི༹ས་དྡོ པཱ་ལི༹་དྷ་མྨེ, ཏ་ལཱ༹་ཀ་པཱ་ལི༹་ཡ་མྤི ཙ;

དི་སྶ་ཏེ པ་ནྟི་ཡ་ཉྩེ་ཝ, ཨི་ཏི ཉེ་ཡྻཾ ཝི་ཛཱ་ན་ཏཱ.

ཨ་ཡ་ཉྷི ‘‘པཱ་ལི༹་ཡཱ ཨ་ཏྠ་མུ་པ་པ་རི་ཀྑ་ནྟཱི’’ཏི་ཨཱ་དཱི་སུ པ་རི་ཡ་ཏྟི་དྷ་མྨ་ས་ངྑཱ་ཏེ པཱ་ལི༹་དྷ་མྨེ དི་སྶ་ཏི. ‘‘མ་ཧ་ཏོ ཏ་ལཱ༹་ཀ་སྶ པཱ་ལཱི༹’’ཏི་ཨཱ་དཱི་སུ ཏ་ལཱ༹་ཀ་པཱ་ལི༹་ཡཾ. ‘‘པཱ་ལི༹་ཡཱ ནི་སཱི་དིཾ་སཱུ’’ཏི་ཨཱ་དཱི་སུ པ་ནྟི་ཡཾ, པ་ཊི་པཱ་ཊི་ཡཱ ནི་སཱི་དིཾ་སཱུ་ཏི ཨ་ཏྠོ. ཨི་མ་སྨིཾ པ་ན་ཏྠེ དྷཱ་ཏུ་ཡཱ ཀི་ཙྩཾ ན་ཏྠི. པཱ་ཊི་པ་དི་ཀོ ཧི པ་ནྟི་ཝཱ་ཙ་ཀོ པཱ་ལི༹ས་དྡོ.

ཏི་ལ སི་ནེ་ཧ་ནེ. ཏེ་ལེ་ཏི, ཏེ་ལ་ཡ་ཏི. ཏེ་ལཾ, ཏི་ལོ, ཏི་ལཾ.

ཏ་ཏྠ ཏི་ལོཏི ཏི་ལ་ག་ཙྪོ. ཏི་ལནྟི ཏ་པྥ་ལཾ. ཏ་ཏོ པ་ན ནི་ཀྑ་ནྟོ སི་ནེ་ཧོ ཏེ་ལཾ. སོ ཧི ‘‘ཏི་ལཱ་ནཾ ཨི་ད་ནྟི ཏེ་ལ’’ནྟི ཝུ་ཙྩ་ཏི. ཡ་དི ཨེ་ཝཾ ‘‘སཱ་ས་པ་ཏེ་ལ’’ནྟི་ཨཱ་དི་ཝ་ཙ་ནཾ ན ཡུ་ཛྫེ་ཡྻཱ་ཏི? ནོ ན ཡུ་ཛྫ་ཏི, ‘‘ཏི་ལ་སི་ནེ་ཧ་ནེ’’ཏི ཨེ་ཝཾ ཝུ་ཏྟཱ་ཡ ཏི་ལདྷཱ་ཏུ་ཡཱ སཱ་མ་ཉྙ་ཏོ ཡ་སྶ ཀ་སྶ་ཙི སི་ནེ་ཧ་སྶ ཝ་ཙ་ན་ཏོ. ཏེ་ན ‘‘སཱ་ས་པ་ཏེ་ལཾ, མ་དྷུ་ཀ་ཏེ་ལ’’ནྟི་ཨཱ་ད་ཡོ སཱ་ས་ནེ པ་ཡོ་གཱ དི་སྶ་ནྟི. མ་ཡཾ པ་ན ཏི་ལདྷཱ་ཏུ་ཝ་སེ་ན ནི་པྥ་ནྣཱ་ནཾ ཏི་ལ་ག་ཙྪ་ཏ་པྥ་ལ་ཝཱ་ཙ་ཀཱ་ནཾ ‘‘ཏི་ལོ, ཏི་ལ’’ནྟི ས་དྡ་རཱུ་པཱ་ནཾ པ་ཀཱ་ས་ན་མུ་ཁེ་ན ‘‘ཏི་ལཱ་ནཾ ཨི་ད་ནྟི ཏེ་ལ’’ནྟི ཝ་དཱ་མ, ན པ་ན ཏེ་ན ཝ་ཙ་ནེ་ན སཱ་ས་པཱ་དཱི་ནཾ སི་ནེ་ཧ་སྶ ཨ་ཏེ་ལ་ཏྟཾ ཝ་དཱ་མ. ཨ་ཐ ཀི་ཉྩ་ར་ཧཱི་ཏི ཙེ? ཏ་དྡྷི་ཏ་ཝི་དྷཱ་ནེ ཝི་ཉྙུ་ནཾ ཀོ་ས་ལླ་ཏྠཾ ཏི་ལས་དྡཾ པ་ཊི་ཙྩ ‘‘ཏི་ལཱ་ནཾ ཨི་ད་ནྟི ཏེ་ལ’’ནྟི ཝ་དཱ་མ. སི་ནེ་ཧ་ས་ངྑཱ་ཏ་སྶ སཱ་ས་པཱ་དཱི་ནཾ ཏེ་ལ་སྶ ཝ་ཙ་ནཾ ན ཛ་ཧཱ་མ, ཏ་སྨཱ ཨུ་དཱ་ཧ་ར་ཎ་པྤ་ཀཱ་ས་ནེ ‘‘ཏི་ལོ, ཏི་ལཾ, ཏེ་ལ’’ནྟི ཨ་ཝ་ཏྭཱ ‘‘ཏེ་ལཾ, ཏི་ལོ, ཏི་ལ’’ནྟི ཨ་མྷེ་ཧི ཝུ་ཏྟཾ. ཨི་ད་ཉྷི ཝ་ཙ་ནཾ ཏེ་ལ་སྶ སཱ་མ་ཉྙ་ཏོ སི་ནེ་ཧེ པ་ཝ་ཏྟིཾ དཱི་པེ་ཏི. ཏེ་ནེ་ཝ ཙ སཱ་ས་ནེ ‘‘ཏི་ལ་ཏེ་ལཾ, སཱ་ས་པ་ཏེ་ལ’’ནྟི་ཨཱ་དི་ནཱ ཝི་སེ་ས་ཝ་ཙ་ན་མྤི དི་སྶ་ཏཱི་ཏི ནི་ཊྛ་མེ་ཏྠཱ་ཝ་ག་ནྟ་བྦཾ. ཨ་པི་ཙ ཏེ་ལས་དྡོ ཡེ་བྷུ་ཡྻེ་ན ཏི་ལ་ཏེ་ལེ ཝ་ཏྟ་ཏི, ཡ་ཐཱ མི་གས་དྡོ ཧ་རི་ཎ་མི་གེ་ཏི་པི ད་ཊྛ་བྦཾ.

ཛ་ལ ཨ་པ་ཝཱ་ར་ཎེ. ཛཱ་ལེ་ཏི, ཛཱ་ལ་ཡ་ཏི. ཛཱ་ལཾ, ཛཱ་ལཱ. ཛཱ་ལནྟི མ་ཙྪ་ཛཱ་ལཾ. ཛཱ་ལཱཏི ཨ་གྒི་ཛཱ་ལཱ.

ཁ་ལ སོ་ཙེ་ཡྻེ. སོ་ཙེ་ཡྻཾ སུ་ཙི་བྷཱ་ཝོ. ཁཱ་ལེ་ཏི, ཁཱ་ལ་ཡ་ཏི. པ་ཀྑཱ་ལེ་ཏི, པ་ཀྑཱ་ལ་ཡ་ཏི.

ཏ་ལ པ་ཏི་ཊྛཱ་ཡཾ. ཏཱ་ལེ་ཏི, ཏཱ་ལ་ཡ་ཏི. ཏཱ་ལོ, ཏ་ལཾ.

ཨེ་ཏྠ ཏཱ་ལོཏི ཏི་ཎ་རཱ་ཛ་རུ་ཀྑོ. ཏ་ལནྟི པཱ་ཎི་ཏ་ལ་བྷཱུ་མི་ཏ་ལཱ་དི. ཏ་ཉྷི ཏཱ་ལ་ཡ་ཏི པ་ཏི་ཊྛཱ་ཏི ཨེ་ཏྠ ཝ་ཏྠུ་ཛཱ་ཏ་ནྟི ཏ་ལཾ.

ཏུ་ལ ཨུ་མྨཱ་ནེ. ཏོ་ལེ་ཏི, ཏོ་ལ་ཡ་ཏི.

དུ་ལ ཨུ་ཀྑེ་པེ. ཨུ་ཀྑེ་པོ ཨུ་དྡྷཾ ཁི་པ་ནཾ. དོ་ལེ་ཏི, དོ་ལ་ཡ་ཏི. དོ་ལཱ.

ཨེ་ཏྠ ཙ དོ་ལི་ཡ་ཏི ཨུ་ཀྑི་པི་ཡ་ཏི ཡ་ཏྠ ནི་པ་ནྣོ དཱ་ར་ཀོ, ཡ་ཐཱ་ནི་པ་ནྣ་ཀོ ཝཱ་ཏི དོ་ལཱ.

ཝུ་ལ ནི་མྨ་ཛྫ་ནེ. ཝོ་ལེ་ཏི, ཝོ་ཡ་ལ་ཏི.

མཱི་ལ ནི་མཱི་ལ་ནེ. མཱི་ལེ་ཏི, མཱི་ལ་ཡ་ཏི. མཱི་ལ་ནཾ, ཨུ་མྨཱི་ལ་ནཾ, ནི་མཱི་ལ་ནཾ.

མཱུ་ལ རོ་ཧ་ནེ. མཱུ་ལེ་ཏི, མཱུ་ལ་ཡ་ཏི. མཱུ་ལཾ. ཨེ་སཱ ཧི ཡ་དཱ པ་ཏི་ཊྛཱ་ཡཾ ཝ་ཏྟ་ཏི, ཏ་དཱ བྷཱུ་ཝཱ་དིག་ཎི་ཀཱ, ‘‘མཱུ་ལ་ཏཱི’’ཏི ཙ་སྶཱ རཱུ་པཾ.

ཏ་ཏྠ མཱུ་ལནྟི མཱུ་ལ་ཡ་ཏི རཱུ་ཧ་ཏི རུ་ཀྑཱ་དི ཨེ་ཏེ་ནཱ་ཏི མཱུ་ལཾ. ཨ་ཐ ཝཱ མཱུ་ལ་ཡ་ཏི ཚི་ནྣོ་པི ཀོ་ཙི ཨེ་ཏེ་ན ཨ་ཙྪི་ནྣེ་ན པུ་ན་དེ་ཝ རཱུ་ཧ་ཏཱི་ཏི མཱུ་ལཾ. ཝུ་ཏྟ་ཉྷི –

‘‘ཡ་ཐཱ་པི མཱུ་ལེ ཨ་ནུ་པ་དྡ་ཝེ ད་ལ༹ྷེ,

ཚི་ནྣོ་པི རུ་ཀྑོ པུ་ན་དེ་ཝ རཱུ་ཧ་ཏི;

ཨེ་ཝ་མྤི ཏ་ཎྷཱ་ནུ་ས་ཡེ ཨ་ནཱུ་ཧ་ཏེ,

ནི་བྦ་ཏྟ་ཏི དུ་ཀྑ་མི་དཾ པུ་ན་པྤུ་ན’’ནྟི;

མཱུ་ལས་དྡ་སྶ ཨ་ཏྠུ་དྡྷཱ་རོ ཧེ་ཊྛཱ བྷཱུ་ཝཱ་དིག་ཎེ ཝུ་ཏྟོ.

ཀ་ལ པི་ལ ཁེ་པེ. ཀཱ་ལེ་ཏི, ཀཱ་ལ་ཡ་ཏི. ཀཱ་ལོ. པི་ལེ་ཏི, པི་ལ་ཡ་ཏི.

ཨེ་ཏྠ ཀཱ་ལོཏི ས་མ་ཡོ་པི མ་ཙྩུ་པི. ཏ་ཏྲ ས་མ་ཡོ ཏེ་སཾ ཏེ་སཾ ས་ཏྟཱ་ནཾ ཨཱ་ཡུཾ ཀཱ་ལ་ཡ་ཏི ཁེ་པེ་ཏི དི་ཝ་སེ དི་ཝ་སེ ཨ་པྤཾ ཨ་པྤཾ ཀ་རོ་ཏཱི་ཏི ཀཱ་ལོ་ཏི ཝུ་ཙྩ་ཏི. ཝུ་ཏྟ་མྤི ཙེ་ཏཾ –

‘‘ཀཱ་ལོ གྷ་ས་ཏི བྷཱུ་ཏཱ་ནི, ས་བྦཱ་ནེ་ཝ ས་ཧ་ཏྟ་ནཱ;

ཡོ ཙ ཀཱ་ལ་གྷ་སོ བྷཱུ་ཏོ, ས་བྷཱུ་ཏ་པ་ཙ་ནིཾ་པ་ཙཱི’’ཏི.

མ་ཙྩུ པ་ན ཀཱ་ལ་ཡ་ཏི ཏེ་སཾ ཏེ་སཾ ས་ཏྟཱ་ནཾ ཛཱི་ཝི་ཏཾ ཁེ་པེ་ཏི ས་མུ་ཙྪེ་ད་ཝ་སེ་ན ནཱ་སེ་ཏཱི་ཏི ཀཱ་ལོ་ཏི ཝུ་ཙྩ་ཏི. ཏེ་ནཱ་ཧུ ཨ་ཊྛ་ཀ་ཐཱ་ཙ་རི་ཡཱ ‘‘ཀཱ་ལོཏི མ་ཙྩུ. ཀཱ་ལ་ཡ་ཏི ས་ཏྟཱ་ནཾ ཛཱི་ཝི་ཏཾ ནཱ་སེ་ཏཱི་ཏི ཀཱ་ལོ. ཀཱ་ལེ་ན མ་ཙྩུ་ནཱ ཀ་ཏོ ནཱ་སི་ཏོ་ཏི ཀཱ་ལ་ཀ་ཏོ’’ཏི. ‘‘མ་ར་ཎཾ ཧི་ནྡཾ མ་ཙྩུ མ་ཊྚུ ཙུ་ཏི ཀཱ་ལོ ཨ་ནྟ་ཀོ ནི་ཀྑེ་པོ’’ཏི མ་ར་ཎ་སྶཱ་བྷི་དྷཱ་ནཱ་ནི.

སུ་ལླ ས་ཛྫ་ནེ. སུ་ལླེ་ཏི, སུ་ལླ་ཡ་ཏི.

ཨི་ལ པེ་ར་ཎེ. ཨི་ལེ་ཏི, ཨི་ལ་ཡ་ཏི.

ཝ་ལ བྷ་ར་ཎེ. ཝཱ་ལེ་ཏི, ཝཱ་ལ་ཡ་ཏི. ཝཱ་ལོ.

ལ་ལ ཨི་ཙྪཱ་ཡཾ. ལ་ལེ་ཏི, ལ་ལ་ཡ་ཏི.

ད་ལ ཝི་དཱ་ར་ཎེ. དཱ་ལེ་ཏི, དཱ་ལ་ཡ་ཏི, པ་དཱ་ལེ་ཏི, པ་དཱ་ལ་ཡ་ཏི. ཀུ་དཱ་ལོ.

ཀ་ལ ག་ཏི་ས་ངྑྱཱ་ནེ་སུ. ཀཱ་ལེ་ཏི, ཀཱ་ལ་ཡ་ཏི. ཀཱ་ལོ, ཀ་ལཱ. ཀ་ལཱཏི ཨ་ཝ་ཡ་ཝོ. སཱ ཧི ཀཱ་ལ་ཡི་ཏ་བྦཱ ས་ངྑཱ་ཡི་ཏ་བྦཱ་ཏི ཀ་ལཱ.

སཱི་ལ ཨུ་པ་དྷཱ་ར་ཎེ. ཨུ་པ་དྷཱ་ར་ཎཾ བྷུ་སོ དྷཱ་ར་ཎཾ, པ་ཏི་ཊྛཱ་ཝ་སེ་ན ཨཱ་དྷཱ་ར་བྷཱ་ཝོ. སཱི་ལེ་ཏི, སཱི་ལ་ཡ་ཏི. སཱི་ལཾ, སཱི་ལ་ནཾ.

ཨེ་ཏྠ སཱི་ལནྟི སཱི་ལེ་ཏི ཨུ་པ་དྷཱ་རེ་ཏི ཏཾ་ས་མ་ངྒཱི་པུ་གྒ་ལཾ ཨ་པཱ་ཡེ་སུ ཨུ་པྤ་ཏྟི་ནི་ཝཱ་ར་ཎ་ཝ་སེ་ན བྷུ་སོ དྷཱ་རེ་ཏཱི་ཏི སཱི་ལཾ. ཨ་ཐ ཝཱ་སཱི་ལི་ཡ་ཏི ཨུ་པ་ཙཱ་རི་ཡ་ཏི ས་པྤུ་རི་སེ་ཧི ཧ་ད་ཡ་མཾ་ས་ནྟ་རཾ ཨུ་པ་ནེ་ཏྭཱ དྷཱ་རི་ཡ་ཏཱི་ཏི སཱི་ལཾ. སཱི་ལ་ནནྟི བྷཱུ་ཝཱ་དིག་ཎེ ཨ་ཝི་པྤ་ཀི་ཎྞ་ཏཱ་ས་ངྑཱ་ཏཾ ས་མཱ་དྷཱ་ནཾ ཝུ་ཙྩ་ཏི. ཏ་ཏྠ ‘‘སཱི་ལ་ཏཱི’’ཏི རཱུ་པཾ, ཨི་དྷ པ་ན ཨཱ་དྷཱ་ར་བྷཱ་ཝ་ས་ངྑཱ་ཏཾ ཨུ་པ་དྷཱ་ར་ཎཾ ཝུ་ཙྩ་ཏི. ཨེ་ཏྠ ཙ ‘‘སཱི་ལེ་ཏི, སཱི་ལ་ཡ་ཏཱི’’ཏི རཱུ་པཱ་ནི. ཨ་ཊྛ་ཀ་ཐཱ་སུ ཧི ‘‘ཀུ་ས་ལཱ་ནཾ དྷ་མྨཱ་ནཾ པ་ཏི་ཊྛཱ་ཝ་སེ་ན ཨཱ་དྷཱ་ར་བྷཱ་ཝོ ཨུ་པ་དྷཱ་ར་ཎ’’ནྟི ཝུ་ཏྟོ.

ཝེ་ལ ཀཱ་ལོ་པ་དེ་སེ. ཝེ་ལེ་ཏི, ཝེ་ལ་ཡ་ཏི. ཝེ་ལཱ. ཀེ་ཙི ‘‘ཝེ་ལ ཨི་ཏི དྷཱ་ཏུ་ས་དྡོ ན ཧོ་ཏཱི’’ཏི ཝ་ད་ནྟི, ཏཾ ན ག་ཧེ་ཏ་བྦཾ, པོ་རཱ་ཎེ་ཧི ས་དྡ་ས་ཏྠ་ཝི་དཱུ་ཧི ‘‘ཝེ་ལ་ཡ་ཏཱི’’ཏི རཱུ་པ་སྶ ད་སྶི་ཏ་ཏྟཱ.

པ་ལ མཱུ་ལ ལ་ཝ་ན་པ་ཝ་ནེ་སུ. ལ་ཝ་ནཾ ཚེ་ད་ནཾ, པ་ཝ་ནཾ སོ་དྷ་ནཾ. པཱ་ལེ་ཏི, པཱ་ལ་ཡ་ཏི. པ་ལཾ. པ་ལཾ ནཱ་མ མཱ་ན་ཝི་སེ་སོ. ལོ་ཀ་སྶ ཝི་མ་ཏིཾ པཱ་ལེ་ཏི ལུ་ནཱ་ཏི སོ་དྷེ་ཏི ཙཱ་ཏི པ་ལཾ. མཱུ་ལེ་ཏི, མཱུ་ལ་ཡ་ཏི. ས་དྡ་ས་ཏྠ་ཝི་དཱུ པ་ན ‘‘མཱུ་ལ་ཡ་ཏི ཀེ་དཱ་རཾ, མཱུ་ལ་ཡ་ཏི དྷ་ཉྙ’’ནྟི པ་ཡོ་གཾ ཝ་ད་ནྟི.

ཐཱུ་ལ པ་རི་བྲཱུ་ཧ་ནེ. པ་རི་བྲཱུ་ཧ་ནཾ ཝ་ཌྜྷ་ནཾ. ཐཱུ་ལེ་ཏི, ཐཱུ་ལ་ཡ་ཏི. ཐཱུ་ལོ པུ་རི་སོ. ཐཱུ་ལཱ ཛ་ཝེ་ན ཧཱ་ཡ་ནྟི.

པ་ལ ག་ཏི་ཡཾ. པ་ལེ་ཏི, པ་ལ་ཡ་ཏི. ཨ་ཏྠཾ པ་ལེ་ཏི ན ཨུ་པེ་ཏི ས་ངྑཾ. པ་ལེ་ཏི ར་ས་མཱ་དཱ་ཡ. ཡ་ཐཱ སུ་ཏྟ་གུ་ལ༹ཾ ཡ་ཏྟ་ཀེ་ཧི སུ་ཏྟེ་ཧི ཝེ་ཋི་ཏཾ, ཏ་ཏྟ་ཀེ་ཧི ཨེ་ཝ པ་ལ་ཡ་ཏི.

ཙི་ངྒུ་ལ པ་རི་བྦྷ་མ་ནེ. ཙི་ངྒུ་ལེ་ཏི, ཙི་ངྒུ་ལ་ཡ་ཏི. ཙི་ངྒུ་ལ་ཡི་ཏྭཱ. ཨ་ཏྲཱ་ཡཾ པཱ་ལི༹ ‘‘ཡཱ་ཝ་ཏི་ཀཱ ཨ་བྷི་ས་ངྑཱ་ར་སྶ ག་ཏི, ཏཱ་ཝ་ཏི་ཀཾ ག་ནྟྭཱ ཙི་ངྒུ་ལ་ཡི་ཏྭཱ བྷཱུ་མི་ཡཾ པ་པ་ཏཱི’’ཏི. ཏ་ཏྠ ཙི་ངྒུ་ལ་ཡི་ཏྭཱཏི པ་རི་བྦྷ་མི་ཏྭཱ.

ལཀཱ་ར་ནྟ་དྷཱ་ཏུ་རཱུ་པཱ་ནི.