༨. ཙཱི་ཝ་ར་ཀྑ་ནྡྷ་ཀ
ཛཱི་ཝ་ཀ་ཝ་ཏྠུ
པུ་ཙྪཱ – ག་ཧ་པ་ཏི་ཙཱི་ཝ་རཾ ཨཱ་ཝུ་སོ སཱ་དི་ཡི་ཏུཾ བྷ་ག་ཝ་ཏཱ ཀ་ཏྠ ཨ་ནུ་ཉྙཱ་ཏཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཨ་ནུ་ཉྙཱ་ཏཾ.
ཝི་སྶ་ཛྫ་ནཱ – རཱ་ཛ་ག་ཧེ བྷ་ནྟེ ཛཱི་ཝ་ཀཾ ཀོ་མཱ་ར་བྷ་ཙྩཾ ཨཱ་ར་བྦྷ ཨ་ནུ་ཉྙཱ་ཏཾ, ཛཱི་ཝ་ཀོ བྷ་ནྟེ ཀོ་མཱ་ར་བྷ་ཙྩོ བྷི་ཀྑཱུ་ནཾ ག་ཧ་པ་ཏི་ཙཱི་ཝ་རཾ ཨ་ནུ་ཛཱ་ནི་ཏུཾ བྷ་ག་ཝ་ནྟཾ ཡཱ་ཙི, ཏ་སྨིཾ བྷ་ནྟེ ཝ་ཏྠུ་སྨིཾ ཨ་ནུ་ཉྙཱ་ཏཾ.
པུ་ཙྪཱ – ཚ ཨཱ་ཝུ་སོ ར་ཛ་ནཱ་ནི བྷ་ག་ཝ་ཏཱ ཀ་ཏྠ ཨ་ནུ་ཉྙཱ་ཏཱ་ནི, ཀི་སྨིཾ ཝ་ཏྠུ་སྨིཾ ཨ་ནུ་ཉྙཱ་ཏཱ་ནི.
ཝི་སྶ་ཛྫ་ནཱ – རཱ་ཛ་ག་ཧེ བྷ་ནྟེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཨ་ནུ་ཉྙཱ་ཏཱ་ནི, ས་མྦ་ཧུ་ལཱ བྷ་ནྟེ བྷི་ཀྑཱུ ཚ་ཀ་ཎེ་ན་པི པ་ཎྜུ་མ་ཏྟི་ཀཱ་ཡ་པི ཙཱི་ཝ་རཾ ར་ཛིཾ་སུ, ཙཱི་ཝ་རཾ དུ་བྦ་ཎྞཾ ཧོ་ཏི, ཏ་སྨིཾ བྷ་ནྟེ ཝ་ཏྠུ་སྨིཾ ཨ་ནུ་ཉྙཱ་ཏཱ་ནི.
པུ་ཙྪཱ – ཨ་ཙྪི་ནྣ་ཀཱ་ནི ཨཱ་ཝུ་སོ ཙཱི་ཝ་རཱ་ནི དྷཱ་རེ་ནྟ་སྶ དུ་ཀྐ་ཊཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – རཱ་ཛ་ག་ཧེ བྷ་ནྟེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ པ་ཉྙ་ཏྟཾ, ས་མྦ་ཧུ་ལཱ བྷ་ནྟེ བྷི་ཀྑཱུ ཨ་ཙྪི་ནྣ་ཀཱ་ནི ཙཱི་ཝ་རཱ་ནི དྷཱ་རེ་སུཾ ད་ནྟ་ཀ་སཱ་ཝཱ་ནི, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ཀ་དཱ ཨཱ་ཝུ་སོ བྷ་ག་ཝཱ ཨ་ནུ་ཉྙཱ་སི ཚི་ནྣ་ཀཾ ས་ངྒྷཱ་ཊིཾ ཚི་ནྣ་ཀཾ ཨུ་ཏྟ་རཱ་ས་ངྒཾ ཚི་ནྣ་ཀཾ ཨ་ནྟ་ར་ཝཱ་ས་ཀཾ.
ཝི་སྶ་ཛྫ་ནཱ – ད་ཀྑི་ཎཱ་གི་རི་ཏོ བྷ་ནྟེ པ་ཙྪཱ་ག་ཏ་ཀཱ་ལེ བྷ་ག་ཝཱ ཨ་ནུ་ཉྙཱ་སི ཚི་ནྣ་ཀཾ ས་ངྒྷཱ་ཊིཾ ཚི་ནྣ་ཀཾ ཨུ་ཏྟ་རཱ་ས་ངྒཾ ཚི་ནྣ་ཀཾ ཨ་ནྟ་ར་ཝཱ་ས་ཀཾ.
པུ་ཙྪཱ – ཨ་གྒ་ལ༹ཾ ཙ ཨཱ་ཝུ་སོ ཏུ་ནྣ་ཉྩ ཨོ་ཝ་ཊྚི་ཀ་ཉྩ ཀ་ཎྜུ་ས་ཀ་ཉྩ ད་ལ༹ྷཱི་ཀ་མྨ་ཉྩ བྷ་ག་ཝ་ཏཱ ཀ་ཏྠ ཨ་ནུ་ཉྙཱ་ཏཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཨ་ནུ་ཉྙཱ་ཏཾ.
ཝི་སྶ་ཛྫ་ནཱ – བཱ་རཱ་ཎ་སི་ཡཾ བྷ་ནྟེ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཨ་ནུ་ཉྙཱ་ཏཾ, ཨ་ཉྙ་ཏ་རོ བྷ་ནྟེ བྷི་ཀྑུ ཨ་གྒ་ལ༹ཾ ཨ་ཙྪུ་པེ་སི, ཏ་སྨིཾ བྷ་ནྟེ ཝ་ཏྠུ་སྨིཾ ཨ་ནུ་ཉྙཱ་ཏཾ.
པུ་ཙྪཱ – ཝ་སྶི་ཀ་སཱ་ཊི་ཀཱ ཙ ཨཱ་ཝུ་སོ ཨཱ་ག་ནྟུ་ཀ་བྷ་ཏྟ་ཉྩ ག་མི་ཀ་བྷ་ཏྟ་ཉྩ གི་ལཱ་ན་བྷ་ཏྟ་ཉྩ གི་ལཱ་ནུ་པ་ཊྛཱ་ཀ་བྷ་ཏྟ་ཉྩ གི་ལཱ་ན་བྷེ་ས་ཛྫ་ཉྩ དྷུ་ཝ་ཡཱ་གུ ཙ བྷི་ཀྑུ་ནི་ས་ངྒྷ་སྶ ཨུ་ད་ཀ་སཱ་ཊི་ཀཱ་ཙཱ་ཏི ཨི་མཱ ཨ་ཊྛ བྷ་ག་ཝ་ཏཱ ཀ་ཏྠ ཨ་ནུ་ཉྙཱ་ཏཱ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ ཨ་ནུ་ཉྙཱ་ཏཱ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཝི་སཱ་ཁཾ མི་གཱ་ར་མཱ་ཏ་རཾ ཨཱ་ར་བྦྷ ཨ་ནུ་ཉྙཱ་ཏཱ, ཝི་སཱ་ཁཱ བྷ་ནྟེ མི་གཱ་ར་མཱ་ཏཱ བྷ་ག་ཝ་ནྟཾ ཨ་ཊྛ་ཝ་རཱ་ནི ཡཱ་ཙི, ཏ་སྨིཾ བྷ་ནྟེ ཝ་ཏྠུ་སྨིཾ ཨ་ནུ་ཉྙཱ་ཏཱ.
པུ་ཙྪཱ – བྷ་ག་ཝ་ཏཱ ཨཱ་ཝུ་སོ མཱ་ཏཱ་པི་ཏཱུ་ནཾ དཱ་ནཾ ཨ་ནུ་ཛཱ་ནི་ཏྭཱ ས་དྡྷཱ་དེ་ཡྻཾ ཝི་ནི་པཱ་ཏེ་ནྟ་སྶ དུ་ཀྐ་ཊཾ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ པ་ཉྙ་ཏྟཾ, ཨ་ཉྙ་ཏ་ར་སྶ བྷ་ནྟེ བྷི་ཀྑུ་ནོ བ་ཧུཾ ཙཱི་ཝ་རཾ ཨུ་པྤ་ནྣཾ ཨ་ཧོ་སི, སོ ཙ ཏཾ་ཙཱི་ཝ་རཾ མཱ་ཏཱ་པི་ཏཱུ་ནཾ དཱ་ཏུ་ཀཱ་མོ ཨ་ཧོ་སི, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
མཱ་ཏཱ་པི་ཏ་རོ་ཏི ཁོ བྷི་ཀྑ་ཝེ ད་ད་མཱ་ནེ ཀིཾ ཝ་དེ་ཡྻཱ་མ, ཨ་ནུ་ཛཱ་ནཱ་མི བྷི་ཀྑ་ཝེ མཱ་ཏཱ་པི་ཏཱུ་ནཾ དཱ་ཏུཾ, ན ཙ བྷི་ཀྑ་ཝེ ས་དྡྷཱ་དེ་ཡྻཾ ཝི་ནི་པཱ་ཏེ་ཏ་བྦཾ, ཡོ ཝི་ནི་པཱ་ཏེ་ཡྻ ཨཱ་པ་ཏྟི དུ་ཀྐ་ཊ་སྶ –
པུ་ཙྪཱ – ཨ་ཉྙ་ཏྲ ཝ་སྶཾ ཝུ་ཊྛེ་ན ཨཱ་ཝུ་སོ ཨ་ཉྙ་ཏྲ ཙཱི་ཝ་ར་བྷཱ་གཾ སཱ་དི་ཡ་ནྟ་སྶ དུ་ཀྐ་ཊཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཨཱ་ཡ་སྨ་ནྟཾ ཨུ་པ་ན་ནྡཾ ས་ཀྱ་པུ་ཏྟཾ ཨཱ་ར་བྦྷ པ་ཉྙ་ཏྟཾ, ཨཱ་ཡ་སྨཱ བྷ་ནྟེ ཨུ་པ་ན་ནྡོ ས་ཀྱ་པུ་ཏྟོ ཨ་ཉྙ་ཏྲ ཝ་སྶཾ ཝུ་ཊྛོ ཨ་ཉྙ་ཏྲ ཙཱི་ཝ་ར་བྷཱ་གཾ སཱ་དི་ཡི, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ཨ་ནཱ་ཐ་ཀཾ ཨཱ་ཝུ་སོ བྷི་ཀྑུཾ གི་ལཱ་ནཾ ན ཨུ་པ་ཊྛ་ཧ་ནྟ་སྶ དུ་ཀྐ་ཊཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ པ་ཉྙ་ཏྟཾ, བྷ་ག་ཝ་ཏི བྷ་ནྟེ སཱ་ཝ་ཏྠི་ཡཾ ཝི་ཧ་ར་ཏི ཨ་ཉྙ་ཏ་ར་སྶ བྷི་ཀྑུ་ནོ ཀུ་ཙྪི་ཝི་ཀཱ་རཱ་བཱ་དྷོ ཨ་ཧོ་སི, སོ ས་ཀེ མུ་ཏྟ་ཀ་རཱི་སེ པ་ལི་པ་ནྣོ ས་ཡི, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ན་གྒི་ཡཾ ཨཱ་ཝུ་སོ ཏི་ཏྠི་ཡ་ས་མཱ་དཱ་ནཾ ས་མཱ་དི་ཡ་ནྟ་སྶ ཐུ་ལླ་ཙྩ་ཡཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ པ་ཉྙ་ཏྟཾ, ཨ་ཉྙ་ཏ་རོ བྷ་ནྟེ བྷི་ཀྑུ ན་གྒི་ཡཾ ཏི་ཏྠི་ཡ་ས་མཱ་དཱ་ནཾ ས་མཱ་དི་ཡི, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ས་བྦ་ནཱི་ལ་ཀཱ་ནི ཝཱ ཨཱ་ཝུ་སོ ཙཱི་ཝ་རཱ་ནི ས་བྦ་པཱི་ཏ་ཀཱ་ནི ཝཱ ས་བྦ་ལོ་ཧི་ཏ་ཀཱ་ནི ཝཱ ས་བྦ་མ་ཉྫི་ཊྛ་ཀཱ་ནི ཝཱ ས་བྦ་ཀ་ཎྷཱ་ནི་ཝཱ་ཏི ཨེ་ཝ་རཱུ་པཱ་ནི ཙཱི་ཝ་རཱ་ནི དྷཱ་རེ་ནྟ་སྶ དུ་ཀྐ་ཊཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཚ་བྦ་གྒི་ཡེ བྷི་ཀྑཱུ ཨཱ་ར་བྦྷ པ་ཉྙ་ཏྟཾ, ཚ་བྦ་གྒི་ཡཱ བྷ་ནྟེ བྷི་ཀྑཱུ ས་བྦ་ནཱི་ལ་ཀཱ་དཱི་ནི ཙཱི་ཝ་རཱ་ནི དྷཱ་རེ་སུཾ, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ཀ་ཉྩུ་ཀཾ ཝཱ ཨཱ་ཝུ་སོ ཝེ་ཋ་ནཾ ཝཱ དྷཱ་རེ་ནྟ་སྶ དུ་ཀྐ་ཊཾ བྷ་ག་ཝ་ཏཱ ཀ་ཏྠ པ་ཉྙ་ཏྟཾ, ཀཾ ཨཱ་ར་བྦྷ ཀི་སྨིཾ ཝ་ཏྠུ་སྨིཾ པ་ཉྙ་ཏྟཾ.
ཝི་སྶ་ཛྫ་ནཱ – སཱ་ཝ་ཏྠི་ཡཾ བྷ་ནྟེ ཚ་བྦ་གྒི་ཡེ་ཝ བྷི་ཀྑཱུ ཨཱ་ར་བྦྷ པ་ཉྙ་ཏྟཾ, ཚ་བྦ་གྒི་ཡཱ བྷ་ནྟེ བྷི་ཀྑཱུ ཀ་ཉྩུ་ཀ་མྤི དྷཱ་རེ་སུཾ ཝེ་ཋ་ན་མྤི དྷཱ་རེ་སུཾ, ཏ་སྨིཾ བྷ་ནྟེ ཝ་ཏྠུ་སྨིཾ པ་ཉྙ་ཏྟཾ.
པུ་ཙྪཱ – ཙཱི་ཝ་ར་ས་ཉྙུ་ཏྟཾ པུ་ཙྪི་སྶཾ, ས་ནི་དཱ་ནཾ ས་ནི་དྡེ་སཾ. ས་མུ་ཀྐ་ཊྛ་པ་དཱ་ནཾ ཨཱ་ཝུ་སོ ཀ་ཏི ཨཱ་པ་ཏྟི་ཡོ.
ཝི་སྶ་ཛྫ་ནཱ – ཙཱི་ཝ་ར་ས་ཉྙུ་ཏྟཾ ཝི་སྶ་ཛྫི་སྶཾ, ས་ནི་དཱ་ནཾ ས་ནི་དྡེ་སཾ. ས་མུ་ཀྐ་ཊྛ་པ་དཱ་ནཾ བྷ་ནྟེ ཏི་སྶོ ཨཱ་པ་ཏྟི་ཡོ.