༡༥. སཱ་མི་ཏྠེ+དྷི་ནཱ

སཱ་མི་བྷཱ་ཝ་ཏྠེ ཨ་དྷི་ནཱ ཡུ་ཏྟ་མྷཱ ས་ཏྟ་མཱི ཧོ་ཏི. ཨ་དྷི་བྲ་ཧྨ་ད་ཏྟེ པ་ཉྩཱ་ལཱ, ཨ་དྷི་པ་ཉྩཱ་ལེ་སུ བྲ་ཧྨ་ད་ཏྟོ, བྲ་ཧྨ་ད་ཏྟི་སྶ་རཱ པ་ཉྩཱ་ལཱ་ཏི ཨ་ཏྠོ. ཨ་དྷི་དེ་ཝེ་སུ བུ་དྡྷོ, ས་མྨུ་ཏི་དེ་ཝཱ་དཱི་ཧི བུ་དྡྷོ ཨ་དྷི་ཀོ་ཏྱ་ཏྠོ.

ཨེ་ཏྠ ཙ ཡ་ཐཱ་ཝུ་ཏྟེ་སུ ཨ་ཏྠེ་སུ ཨ་ཡཾ བྷེ་དོ –

ཀཱ་ར་ཀཾ སཱ་དྷ་ཀཾ ནི་བྦ་ཏྟ་ཀཾ ཀྲི་ཡཱ་ནི་མི་ཏྟ་ནྟི ཨ་ཏྠ་ཏོ ཨེ་ཀ་མེ་ཝ, ཏ་ཉྩ ད་ཎྜོ, དྷ་ཝ་ལོ, པ་ཙ་ནཾ, ཙི་ཏྟོ, གོ་ཏི ད་བྦ+གུ་ཎ+ཀྲི་ཡཱ+ནཱ་མ+ཛཱ་ཏི་བྷེ་དེ་ན པ་ཉྩ་ཝི་དྷ་མྤི ཀ་མྨ+ཀ་ཏྟཱ་དི་ཝ་སེ་ན ཚ་བྦི་དྷཾ, ཏཾ ས་ཏྟི་ཀཱ་ར་ཀཾ, ཏ་དཱ་དྷཱ་ར་བྷཱུ་ཏ་ད་བྦཱ་ད་ཡོ ཏ་ཏྲ་ཊྛ་ཀཱ་ར་ཀཾ, ན མུ་ཁྱ་ཏོ. མུ་ཁྱ་ཏོ ཙེ ཧོ་ནྟི, ཏེ་སཾ ས་ཏྟི་ད་བྦཱ་ནཾ ཨ་ཉྙ་མ་ཉྙ་བྱཱ་ཝ་ཊ་རཱུ་པ་ཏྟཱ ཡོ ཨཱ་དྷཱ་རོ, སོ ཨཱ་དྷཱ་རོ་ཡེ་ཝ, ཀི་སྨི་ཉྩི་ཀཱ་ལེ ཀ་ར་ཎཾ ཝཱ ཀ་ཏྟུ་རཱུ་པ་བྷཱུ་ཏོ ཝཱ ན ཧོ་ཏི, ཏ་སྨཱ ཐཱ་ལི པ་ཙ་ཏི, ཐཱ་ལི་ཡཱ པ་ཙ་ཏི, ཐཱ་ལི་ཡཾ པ་ཙ་ཏཱི་ཏྱཱ་དི་ནཱ ཨེ་ཀ་སྶ ཝ་ཏྠུ་ནོ ཀ་ཏྟུ+ཀ་ར་ཎཱ+དྷཱ་ར་བྷེ་དོ ན སི་ཡཱ. ས་ཏྟི་པ་ཀྑེ པ་ན ད་བྦཱ་དཱི་ནཾ ཨ་ནེ་ཀ་ས་ཏྟི་ཡཱ ཨཱ་དྷཱ་ར་ཏྟཱ ས་ཏྟི་ཡཱ ད་བྦཱ་ད་ཡོ ཝི་ཝ་ཀྑི་ཏཱ ཏཾ ཏཾ ཀཱ་ར་ཀཾ ཧོ་ཏཱི་ཏི ད་བྦཱ་དཱི་ནཾ ཨ་བྷེ་དེ་པི ཀཱ་ར་ཀ་བྷེ་དོ ཡུ་ཛྫ་ཏེ. ཝུ་ཏྟ་ཉྷི –

ཝི་ཙི་ཏྟ་ཀ་ཏྟུ་ཨཱ་དཱི་ཧི, སཾ་ཡོ་གཱ ཨེ་ཀ་ཝ་ཏྠུ་ནོ;

ནཱ་ནཱ་ཏྟཾ ཡུ་ཛྫ་ཏེ ནཱ་ཊྱ-བྷེ་དེ་ན ན་ཊ་ཀ་སྶི+ཝཱ་ཏི.

ཐཱ་ལི ཝ་ཏྠུ་ཏོ ཨེ་ཀཱ ཙེ་ད་པི ས་ཏྟི་ཀཱ་ར་ཀ་བྷཱུ་ཏ་ཀ་ཏྟུ+ཀ་ར་ཎཱ+དྷཱ་རཱ་དཱི་ནཾ བྷེ་དེ་ན བྷེ་ད+མུ་པ་ཡཱ་ཏི, ཀི་མི་ཝ རཱ་མ+རཱ་ཝ་ཎཱ་དི་ཝེ་ས་དྷཱ་རཱི་ན་ཊ་ཀོ ཏེ་སཾ ནཱ་མ་ཝ་སེ་ན རཱ་མོ, རཱ་ཝ་ཎོ་ཏི བྷེ་ད+མུ་པ་ཡཱ་ཏི, ཏ+མི་ཝཱ་ཏི ཨ་དྷི་པྤཱ་ཡོ.

པུ་ན+ར་པི –

ཡ་ཐེ+ཀོ་པི པ་ཊོ སུ་ཏྟ, པཱི་ཏཱ་དི་གུ་ཎ་སཾ་ཡུ་ཏོ;

སུ་ཀྐོ པ་ཊོ་ཏི པཱི་ཏོ་ཏི, བྷེ་དཾ ཡཱ་ཏྱེ+ཝ་མེ་ཝ+ཡཾ.

ཨེ་ཏྠ ཙ ས་ཏྟི་བྷཱུ་ཏ་ཀ་ཏྟཱ་ད་ཡོ མུ་ཁྱ་ཀཱ་ར་ཀཾ, ཏཾ་ཡོ་གེ་ན ད་བྦ་བྷཱུ་ཏ་ཐཱ་ལཱི གུ་ཎ་ཀཱ་ར་ཀཾ, ཏེ ཙ ཀ་ཐཾ ཀྲི་ཡཱ་ཡ ཀཱ་ར་ཀཱ ཧོ་ནྟི. ཀ་ཏྟཱ ཨ་ཏྟ་ནཱ པ་ཏི་ཊྛི་ཏཱ་ཡ ཧ་ས་ཏི+ན་ཙྩ་ཏི་ཙྩཱ་དི་ཀྲི་ཡཱ་ཡ ནི་མི་ཏྟཾ ཧོ་ཏི. ཀ་མྨ་ཉྩ ཨ་ཏྟ་ནཱ པ་ཏི་ཊྛི་ཏ་ཀྲི་ཡཱ་ཡ ཏ་ད་ཏྠ་བྷཱུ་ཏ་ཨི་ནྡྷ་ནཱ་དཱི་ནི པ་ཝ་ཏྟེ་ནྟཾ ‘‘ཨོ་ད་ནཾ པ་ཙ་ཏཱི’’ཏྱཱ་དོ ནི་མི་ཏྟཾ. ‘ཀ་ཊྛེ་ཧི པ་ཙྩ་ཏཱི’ཏྱཱ་དོ ཀ་ཊྛཱ་ནི ཛ་ལ་ན་ཀྲི་ཡཱ་ཡ སཱ་དྷེ་ཏ་བྦ་པཱ་ཀ་སྶ ཨ་ངྒ་བྷཱ་ཝེ་ན ནི་མི་ཏྟཾ. ‘ཕ་ར་སུ་ནཱ ཚི་ནྡ་ཏཱི’ཏྱཱ་དོ ཕ་ར་སུ ཙ ཀ་ཊྛཱ་ནཾ དྭི་དྷཱ་པ་ཝ་ཏྟི་ཡཱ ནི་མི་ཏྟཾ. ཀ་མྨ་ཉྩ ཀྲི་ཡཱ་ཡ ས་མྦ་ནྡྷཱི་ཡ་མཱ་ན་བྱཱ་པྱེ ས་ཏི ནི་མི་ཏྟ་བྷཱ་ཝེ་ན ཀྲི་ཡཱ་ཡ ནི་མི་ཏྟཾ. ཏ་ཐཱ ས་མྤ་དཱ་ནཱ+ཝ་དྷི+ཨཱ་དྷཱ་རཱ་ནཾ ‘གཱ་ཝོ ད་དཱ་ཏི’ ‘གཱ་མ་སྨཱ ཨ་པ་ན་ཡ་ཏི’ ‘ཐཱ་ལི་ཡཾ པ་ཙ་ཏཱི’ཏྱཱ་དཱི་སུ གོ་དཱ་ནཱ+པ་ན་ཡ་ན+པ་ཙ་ན་ཀྲི་ཡཱ་ནཾ ནི་མི་ཏྟ་ཏྟཱ ཀྲི་ཡཱ་ཡ ནི་མི་ཏྟཱ་ནི ཧོ་ནྟི. ཏེ་སཾ ཡ་ཐཱ་ས་ཀཾ ཀྲི་ཡཱ་ཡ པ་ཝ་ཏྟ་ཀོ ཀ་ཏྟཱ, ཏ་སྨཱ ས ཨེ་ཝ པ་དྷཱ་ནོ ཀ་ཏྟཱ་ཏི ཝོ་ཧཱ་རཾ ལ་བྷ་ཏི, ཨ་ཉྙེ་སཾ ཀ་ར་ཎཱ་དཱི་ནཾ ཀ་ཏྟུ་བྷཱ་ཝེ ས་ཏི་པི ཨ་པྤ་དྷཱ་ན་ཏྟཱ ཏཾ ན ལ་བྷ་ཏི.

ཙོ་ད་ཀེ་ན ཝུ་ཏྟ་ཉྷི –

ན་ནུ སཱ་མ་གྱ་མཱི་ནཱ་ཡཾ, ཀྲི་ཡཱ་སི་དྡྷི ཀ་ཐཾ ཝ་ད;

ཨེ་ཀ་སྶ ཀ་ཏྟུ་ནོ ཨེ་ཝ, ས་བྦེ་སཾ ཀ་ཏྟུ་ཏཾ ཝི་ནཱ.

ས་བྦེ་སཾ ཀ་ར་ཎཱ་དཱི་ནཾ, ཀ་ཏྟུ་ཏཱ་ཡ ཝི་ཡོ་ག་ཏོ;

ཀ་ར་ཎཱ་དཱི་ནཾ ཨ་བྷཱ་ཝ་ཏྟཱ, ཀཱ་ར་ཀཾ ན ཧི ཚ་བྦི་དྷ་ནྟི.

ཝུ་ཙྩ་ཏེ –

ཡ་དྱ་པྱ+ཏྠི ཧི ཀ་ཏྟུ་ཏྟཾ, ས་བྷཱ་ཝཱ ཀ་ར་ཎཱ་དི་སུ;

ཀྲི་ཡཱ་སི་དྡྷྱཱ ཏ་ཐཱ་པྱེ+ཏ+མ་པྤ་དྷཱ་ནཾ པ་ར་ངྒ་ཏོ.

ཨེ་ཏཾ ས་བྷཱ་ཝ་ཏོ ཨུ་པ་ལ་བྦྷ་མཱ་ནཾ ཀ་ར་ཎཱ་དཱི་སུ ཀ་ཏྟུ་ཏྟཾ པ་རེ་སཾ ཀ་ར་ཎཱ་དཱི་ནཾ ཛ་ལ་ན+དྷཱ་ར་ཎཱ་དི་ཀྲི་ཡཱ་ཡ ཨ་ངྒཾ ཨུ་པཱ་ཡ་ཏི ཨ་པྤ་དྷཱ་ན་ནྟི ཨ་དྷི་པྤཱ་ཡོ.

ཀཱ་ར་ཀཾ ཚ་བྦི་དྷཾ ས་ཉྙཱ-ཝ་སཱ ཚ་བྦཱི་ས་ཏི་ཝི་དྷཾ;

པ་བྷེ་དཱ ས་ཏྟ་དྷཱ ཀ་མྨཾ, ཀ་ཏྟཱ པ་ཉྩ་ཝི་དྷོ བྷ་ཝེ.

ཀ་ར་ཎཾ དུ་ཝི་དྷཾ ཧོ་ཏི, ས་མྤ་དཱ་ནཾ ཏི་དྷཱ མ་ཏཾ;

ཨ་པཱ་དཱ་ནཾ པ་ཉྩ་ཝི་དྷཾ, ཨཱ་དྷཱ་རོ ཏུ ཙ་ཏུ་བྦི་དྷོ.

ཝི་བྷ་ཏྟི་ཡོ པ་ན –

པ་ཙྩ་ཏྟ+མུ་པ་ཡོ་ག་ཉྩ, ཀ་ར་ཎཾ ས་མྤ་དཱ་ནི་ཡཾ;

ནི་སྶ་ཀྐཾ སཱ་མི་ཝ་ཙ་ནཾ, བྷུ་མྨ+མཱ་ལ་པ་ན+ཊྛ་མཾ་ཏི.

ཨི་ཏི པ་ཡོ་ག་སི་དྡྷི་ཡཾ ཀཱ་ར་ཀ་ཀ་ཎྜོ ཏ་ཏི་ཡོ.