༣. ཀཱ་ར་ཀ་ཀ་ཎྜ
ཨ་ཐ ཝི་བྷ་ཏྟཱི་ན+མ་ཏྠ་བྷེ་དཱ ཝུ་ཙྩ་ནྟེ.
ཏ་ཏྠ ཨེ་ཀ་མྤི ཨ་ཏྠཾ ཀ་མྨཱ་དི་ཝ་སེ་ན ཨེ་ཀ་ཏྟཱ་དི་ཝ་སེ་ན ཙ ཝི་བྷ་ཛ་ནྟཱི་ཏི ཝི་བྷ་ཏྟི་ཡོ, སྱཱ་ད་ཡོ. ཏཱ པ་ན པ་ཋ་མཱ་དི་བྷེ་དེ་ན ས་ཏྟ་ཝི་དྷཱ. ཏཱ ཡ་ཐཱ ‘‘པ་ཋ་མཱ+ཏྠ་མ་ཏྟེ’’ཏི པ་ཋ་མཱ་ཝི་བྷ་ཏྟི ཧོ་ཏི. སི་སྶ ཨོ་ཀཱ་ར+ལོ་པ+ཨ-མཱ་དེ་སེ་སུ ན་རོ ཨི་ཏྠཱི ན་པུཾ་ས་ཀཾ.
ས་ཀ་ཏྠ+ད་བྦ+ལི་ངྒཱ་ནི, སཾ་ཁྱཱ+ཀ་མྨཱ་དི་པ་ཉྩ་ཀཾ;
ནཱ་མ་ཏྠོ ཏ་སྶ སཱ་མ་ཉྙ-མ་ཏྠ་མ་ཏྠཾ པ་ཝུ་ཙྩ་ཏེ.
སོ ནཱ་མ་ཏྠོ ཙ –
ཛཱ་ཏི ཀྲི་ཡཱ གུ་ཎོ ད་བྦཾ, ཏ་ཐཱ ནཱ་མ་ནྟི པ་ཉྩ་དྷཱ;
ས་དྡ་སྶ+ཏྠོ ས ས་དྡོ་པི, པ་ཉྩ་དྷཱ་ཝ+ཏྲ བྷི་ཛྫ་ཏེ.
ཀ་ཐཾ ཛཱ་ཏི་ས་དྡོ གུ་ཎ་ས་དྡོ་ཏྱཱ་དི་ནཱ.
བྷི་ནྣེ་སྭ+བྷི་ནྣ་དྷཱི+ས་དྡཱ, ས་བ་ལཱ་དཱི་སུ ཡ་བྦ་ལཱ;
ཝ་ཏྟ་ནྟེ ཛཱ་ཏི ཨེ་སཱ+སྶ, མཱ་ལཱ སུ་ཏྟ+མི་ཝཱ+ནྭི་ཏཱ.
ཨ་ད་བྦ་བྷཱུ་ཏཾ ཀ་ཏྟཱ་དི-ཀཱ་ར་ཀ་གྒཱ་མ་སཱ་དྷི་ཡཾ;
པ་ད་ཏྠཾ ཀ་ཏྟུ་ཀ་མྨ་ཊྛཾ, ཀྲི་ཡ+མི་ཙྪ་ནྟི ཏ་བྦི་དཱུ.
ད་བྦ་སྶི་ཏོ ཏ་ཏོ བྷི་ནྣོ, ནི་མི་ཏྟོ ཏ་པྤ་ཏཱི་ཏི་ཡཱ;
ཝི་ན་སྶ་ན་ས་བྷཱ་ཝོ ཙ, ནི་གྒུ་ཎོ་ཝ གུ་ཎོ+ཙྩ་ཏེ.
ཨེ་ཏྠ པ་ཊོ སུ་ཀྐོ་ཏི ཝི་ན་སྶ་ན་ས་བྷཱ་ཝོ ཙ ཙ་ས་དྡེ་ན ཝི་པུ་ལོ ཨཱ་ཀཱ་སོ་ཏི ཨ་ཝི་ན་སྶ་ན་ས་བྷཱ་ཝོ ཙ ཨ་ཏྟ་ནི ཝི་སུཾ གུ་ཎ་ར་ཧི་ཏོ གུ་ཎོ+ཙྩ་ཏེ ཏྱ་ཏྠོ.
ཡཾ ཡཾ ཝི་སེ་སྶ་ཏེ ཀི་ཉྩི, ཏཾ ཏཾ ད་བྦ+མི་ཧོ+ཙྩ་ཏེ;
ཛཱ་ཏྱཱ་དི་ནོ་པྱ+ཏོ ཏཱ་དི, ད་བྦ་ཏྟཾ པ་རི་ཀ་པྤ་ཏེ.
ཨེ་ཏྠ གོ་ཛཱ་ཏི ཨ་སྶ་ཛཱ་ཏཱི་ཏི ཝུ་ཏྟེ ཛཱ་ཏི ད་བྦཾ. ནཱི་ལོ གུ་ཎོ་ཏི ཙ གུ་ཎོ ད་བྦཾ. པ་ཙ་ན་ཀྲི་ཡཱ་ཏི ཙ ག་མ་ནཱ་དི་ཀྲི་ཡཱ་ཏོ ཝི་སེ་སི་ཡ་ཏཱི་ཏི ཀྲི་ཡཱ་ཝ ད་བྦཾ.
ནཱ་མ་རཱུ་པེ་ན ས་ད་བྦེ, ཀྭ་ཙི ས་ཉྙཱི ཀ་ཐཱི་ཡ་ཏེ;
ནཱ་མ་ནྟི ཏཾ ཡ་ཐཱ ཙི་ཏྟོ, ས་ཉྙཱ ས་དྡོ ཏུ ཏ་དྡྷ་ནཱི.
ནཱ་མ་སྶ ད་བྦ་ཏྟེ་པི ཙི་ཏྟོ་ཏྱཱ་དི ནཱ་མེ་ནེ་ཝ པ་སི་ཛ྄ཛྷ་ཏི, ནོ གྷ་ཊ+པ་ཊཱ་ད་ཡོ་ཝ ད་བྦ་ཏྟེ་ན, ཏ་སྨཱ ནཱ་མ+མི་ཏི ས་ཉྙཱི ཀ་ཐཱི་ཡ་ཏེ, ཏཾ་ཝཱ་ཙ་ཀ་ཏྟཱ ཏ་བྦ་ཏཱི ཙི་ཏྟཱ་དི ས་ཉྙཱ་ས་དྡོ་ཏི ནི་ཙྪི་ཡ་ཏེ་ཡྻ+དྷི་པྤཱ་ཡོ.
ཨ་ཡཾ པ་ཉྩ་ཝི་དྷོ་པི ཨ་ཏྠོ ས་དྡ་ཏྠོ ཙེ་ཝ སཱ་མ་ཏྠི་ཡཱ ག་མྱ་མཱ་ན་ཏྠོ ཙཱ་ཏི དུ་བྦི་དྷོ. ཏ་ཐཱ ཧི ‘‘པཱི་ནོ དི་ཝཱ ན བྷུ་ཉྫེ་ཡྻ’’མི་ཏི བྷུ་ཏྟི་ནི་རཱ་ཀ་ཏི ས་དྡ་ཏྠོ. ར་ཏྟི་བྷུ་ཏྟི ཏུ སཱ་མ་ཏྠི་ཡཱ+ཝ་ག་མྱ་ཏེ. ཏེ་ནེ+ཏཾ ཝུ་ཙྩ་ཏི –
ཨ་ཏྠ་པྤ་ཏཱི་ཏི་ཡཾ ས་དྡ-བྱཱ་པཱ་རོ ཏི་ཝི་དྷོ བྷ་ཝེ;
མུ་ཁྱོ ལ་ཀྑ་ཎ+བྱ་ཉྫ་ན-ས་བྷཱ་ཝོ ཙཱ་ཏི ཨེ་ཏྠ ཏུ.
མུ་ཁྱོ ཏུ ནི་ར་ནྟ་ར་ཏྠེ, ལ་ཀྑ་ཎོ ཏུ ཏི་རོ་ཧི་ཏེ;
ཨ་ཏྠེ+ཏ་རོ ཏུ ཝཱ་ཀྱ་སྶ, ཨ་ཏྠེ་ཡེ་ཝ པ་ཝ་ཏྟ་ཏི.
‘‘མ་ཉྩེ’’ཏི ནི་ར་ནྟ་ར་ཏྠེ ཝ་ཏྟ་མཱ་ནོ མུ་ཁྱོ, ‘‘མ་ཉྩཱ ཨུ་གྒྷོ་ས་ནྟཱི’’ཏི ཏི་རོ་ཧི་ཏ་ཏྠེ ཝ་ཏྟ་མཱ་ནོ ལ་ཀྑ་ཎོ, གཱ་ཐཱ་དི་ས་ཀ་ལ་ཝཱ་ཀྱ་སྶ+ཏྠེ ཝ་ཏྟ་མཱ་ནོ བྱ་ཉྫ་ན་ས་བྷཱ་ཝོ.
བྱཱ་པཱ་ར་སྶ པ་བྷེ་དེ་ན, ཏི་དྷཱ ས་དྡོ་པི ཝཱ་ཙ་ཀོ;
ལ་ཀྑ་ཎི་ཀོ བྱ་ཉྫ་ཀོ་ཏི, ཏ་ད་ཏྠོ་པི ཏི་དྷཱ མ་ཏོ.
ཝ་ཙྩོ ལ་ཀྑ་ཎི་ཀོ བྱ་ངྒྱོ, ཙེ་ཝཾ ས་དྡོ སུ་ཝཱ་ཙ་ཀོ;
ཝུ་ཏྟ་ཀ་མེ་ན ཛཱ་ཏྱཱ་དི-བྷེ་དེ་ན པ་ཉྩ་དྷཱ བྷ་ཝེ་ཏི.
༣༨. ཨཱ་མ་ནྟ་ཎེ –
ཏི ཨཱ་མ་ནྟ་ཎཱ་དྷི་ཀེ ཨ་ཏྠ་མ་ཏྟེ པ་ཋ་མཱ་ཝི་བྷ་ཏྟི ཧོ་ཏི. བྷོ ན་ར, བྷོ ཨི་ཏྠི, བྷོ ན་པུཾ་ས་ཀ.
ས་དྡེ་ནཱ+བྷི་མུ་ཁཱི་ཀཱ་རོ, ཝི་ཛྫ་མཱ་ན་སྶ ཝ་ཏྠུ་ནོ;
ཨཱ་མ་ནྟ་ཎཾ ཝི་དྷཱ་ཏ་བྦེ, ན་ཏྠི ‘‘རཱ་ཛཱ བྷ་ཝེ’’ཏི+དཾ.
ཀྲི་ཡཱ ནི་མི་ཏྟཾ ཀཱ་ར་ཀ་ནྟུ ཀ་མྨ, ཀ་ཏྟུ, ཀ་ར་ཎ, ས་མྤ་དཱ་ན, ཨ་ཝ་དྷི, ཨཱ་དྷཱ་ར་བྷེ་དེ་ན ཚ་བྦི་དྷཾ, ཏཾ ཡ་ཐཱ –
༢,༢. ཀ་མྨེ དུ་ཏི་ཡཱ
ཀ་རཱི་ཡ་ཏི ཀ་ཏྟུ་ཀི་རི་ཡཱ་ཡ ས་མྦ་ནྡྷཱི་ཡ་ཏཱི་ཏི ཀ་མྨཾ, ཏ་སྨིཾ ཀ་མྨ་ཀཱ་ར་ཀེ དུ་ཏི་ཡཱ་ཝི་བྷ་ཏྟི ཧོ་ཏི. ཏཾ ཏི་ཝི་དྷཾ ནི་བྦ་ཏྟི, ཝི་ཀ་ཏི, པ་ཏྟི བྷེ་དེ་ན, ཏ་ཏྠ ནི་བྦ་ཏྟི་ཀ་མྨེ མཱ་ཏཱ པུ་ཏྟཾ ཝི་ཛཱ་ཡ་ཏི, ཨཱ་ཧཱ་རོ སུ་ཁཾ ཛ་ན་ཡ་ཏི, ཀ་ཊཾ ཀ་རོ་ཏི ད་ཏྟོ. ཝི་ཀ་ཏི་ཡཾ ཀ་ཊྛ+མ་ངྒཱ་རཾ ཀ་རོ་ཏི, སུ་ཝ་ཎྞཾ ཀ་ཊ་ཀཾ ཀ་རོ་ཏི, ཝཱི་ཧ་ཡོ ལུ་ནཱ་ཏི. པ་ཏྟི་ཡཾ ད་ཏྟོ གྷ་རཾ པ་ཝི་ས་ཏི, ཨཱ་དི་ཙྩཾ པ་སྶ་ཏི, དྷ་མྨཾ སུ་ཎཱ་ཏི, པ་ཎྜི་ཏེ པ་ཡི་རུ་པཱ་ས་ཏི.
ཝུ་ཏྟ་ཉྩ –
ནི་བྦ་ཏྟི+ཝི་ཀ་ཏི+པ་ཏྟི-བྷེ་དཱ ཀ་མྨཾ ཏི་དྷཱ མ་ཏཾ;
ཀ་ཏྟུ་ཀྲི་ཡཱ་བྷི་ག་མྨ་ནྟཾ, སུ་ཁ+མ་ངྒཱ་རཾ+གྷ་རཾ ཡ་ཐཱ་ཏི.
ཀ་ཊཾ ཀ་རོ་ཏི ཝི་པུ་ལཾ ད་སྶ་ནཱི་ཡ་ནྟི ཨ་ཏྠེ་ཝ གུ་ཎ་ཡུ་ཏྟ་སྶ ཀ་མྨ་ཏཱ, ཝི་པུ་ལཾ ཀ་རོ་ཏི, ད་སྶ་ནཱི་ཡཾ ཀ་རོ་ཏཱི་ཏི ཀྲི་ཡཱ་ཡ ས་མྦ་ནྡྷི་ཡ་མཱ་ན་ཏྟཱ. ཨོ་ད་ནོ པ་ཙྩ་ཏེ་ཏི ཨོ་ད་ན་ས་དྡ་ཏོ ཀ་མྨ་ཏཱ ན་པྤ་ཏཱི་ཡ་ཏེ, ཀི་ཉྩ་ར་ཧི ཨཱ་ཁྱཱ་ཏ་ཏོ.
ཨི་ཙྪི་ཏ་ཀ་མྨཾ ཡ་ཐཱ-གཱ་ཝུཾ པ་ཡོ དོ་ཧ་ཏི, གོ་མ་ནྟཾ གཱ་ཝཾ ཡཱ་ཙ་ཏི, གཱ་ཝ+མ་ཝ རུ་ནྡྷ་ཏི ཝ་ཛཾ, མཱ་ཎ་ཝ་ཀཾ མ་གྒཾ པུ་ཙྪ་ཏི, གོ་མ་ནྟཾ གཱ་ཝཾ བྷི་ཀྑ་ཏེ, རུ་ཀྑ+མ་ཝ་ཙི་ནཱ་ཏི ཕ་ལཱ་ནི, རུ་ཀྑཱ་ཏྱ་ཏྠོ. སི་སྶཾ དྷ་མྨཾ བྲཱུ་ཏེ. ཨེ་ཏྠ པ་ཡོ, གཱ་ཝཾ ཨི་ཙྩཱ་དི ཨི་ཙྪི་ཏཾ, གཱ་ཝུཾ, གོ་མ་ནྟ+མི་ཙྩཱ་དི ཨ་ནི་ཙྪི་ཏཾ. ཨེ་ཝ+མ་ནི་ཙྪི་ཏེ་པི ཀ་ཎྚ་ཀཾ མ་དྡ་ཏི, ཝི་སཾ གི་ལ་ཏི. ཡཾ ནེ་ཝི+ཙྪི་ཏཾ, ནཱ་པི ཨ་ནི་ཙྪི་ཏཾ, ཏ་ཏྲཱ་པི གཱ་མཾ ག་ཙྪ་ནྟོ རུ་ཀྑ་མཱུ་ལ+མུ་པ་ས་པྤ་ཏི.
ཨཱ་དྷཱ་རེ ཨ་དྷི་སི+ཋཱ+སཱ་ནཾ པ་ཡོ་གེ ཙ, པ་ཐ་ཝིཾ ཨ་དྷི་སེ་སྶ་ཏི, གཱ་མ+མ་དྷི་ཏི་ཊྛ་ཏི, རུ་ཀྑ+མ་ཛ྄ཛྷཱ་ས་ཏེ་ཏི. ཨེ་ཏྠ པ་ཐ་ཝི་ནྟི པ་ཐ་ཝི་ཡ་ནྟི ཨ་ཏྠོ. ཨེ་ཝ+མ་བྷི, ནི་པུ་བྦ་ཝི་ས་སྶཱ་པི, དྷ་མྨ+མ་བྷི་ནི་ཝི་ས་ཏེ, དྷ་མྨེ ཝཱ. ཏ་ཐཱ ཨུ་པ, ནྭ+ཛ྄ཛྷཱ+པུ་བྦ་ཝ་ས་ཏི་སྶ, གཱ་མ+མུ་པ་ཝ་ས་ཏི, གཱ་མ+མ་ནུ་ཝ་ས་ཏི, ཝི་ཧཱ་ར+མ་དྷི་ཝ་ས་ཏི, གཱ་མ+མཱ་ཝ་ས་ཏི, ཨ་གཱ་རཾ ཨ་ཛ྄ཛྷ་ཝ་ས་ཏི, ཨེ་ཏྠ གཱ་མ་ནྟི གཱ་མེ་ཏྱ་ཏྠོ. ཏ་ཐཱ ཏ་པྤཱ་ནཱ+ཙཱ་རེ་པི, ན་དིཾ པི་བ་ཏི, གཱ་མཾ ཙ་ར་ཏི, ན་དི་ཡཾ་ཏྱ་ཏྠོ. ས་ཙེ མཾ ནཱ་ལ་པི་སྶ་ཏཱི་ཏི མ་ཡཱ ས་དྡྷིཾ་ཏྱ་ཏྠོ. ཝི་ཧི་ཏཱ་ཝ པ་ཊི-ཡོ་གེ་པི དུ་ཏི་ཡཱ, པ་ཊི་བྷ་ནྟུ ཏཾ ཙུ་ནྡ བོ་ཛ྄ཛྷ་ངྒཱ, ཏ་མྤ་ཊི བོ་ཛ྄ཛྷ་ངྒཱ བྷཱ་ས་ནྟཱུ་ཏི ཨ་ཏྠོ. ཨུ་པ་མཱ མཾ པ་ཏི་བྷཱ་ཏི, ཨུ་པ་མཱ མཾ ཨུ་པ་ཊྛཱ་ཏི་ཏྱ་ཏྠོ. དྷཱ་ཏུ་ནཱ་ཡུ་ཏྟེ ‘‘ཏ་སྶ ན་པྤ་ཊི་བྷཱ་ཏཱི’’ཏི ཚ་ཊྛཱི.
༣. ཀཱ་ལ་དྡྷཱ་ན+མ་ཙྩ་ནྟ་སཾ་ཡོ་གེ
ཀཱ་ལ་དྡྷཱ་ནཾ ད་བྦ+གུ་ཎ+ཀྲི་ཡཱ་ཧི ཨ་ཙྩ་ནྟ་སཾ་ཡོ་གེ ཏེ་ཧི ཀཱ་ལ་དྡྷཱ་ན་ཝཱ་ཙཱི་ཧི དུ་ཏི་ཡཱ ཧོ་ཏི. ཀཱ་ལེ-ས་ཏྟཱ་ཧཾ ག་ཝ་པཱ་ནཾ, མཱ་སཾ མཾ་སོ་ད་ནཾ, ས་ར་དཾ ར་མ་ཎཱི་ཡཱ ན་དཱི, ས་བྦ་ཀཱ་ལཾ ར་མ་ཎཱི་ཡཾ ན་ནྡ་ནཾ, ཏ་ཡོ མཱ་སེ ཨ་བྷི་དྷ་མྨཾ དེ་སེ་ཏི. ཨ་དྡྷ་ནི-ཡོ་ཛ་ནཾ ཝ་ན་རཱ་ཛི, ཡོ་ཛ་ནཾ དཱི་གྷོ པ་བྦ་ཏོ, ཀོ་སཾ ས་ཛ྄ཛྷཱ་ཡ་ཏི.
པུ་བྦ་ནྷ་ས་མ་ཡཾ ནི་ཝཱ་སེ་ཏྭཱ, ཨེ་ཀཾ ས་མ་ཡཾ བྷ་ག་ཝཱ, ཨི་མཾ ར་ཏྟིཾ ཙ་ཏྟཱ་རོ མ་ཧཱ་རཱ་ཛཱ་ནོ་ཏི ཨེ་ཝ་མཱ་དཱི་སུ ཀཱ་ལ་ཝཱ་ཙཱི་ཧི ཨ་ཙྩ་ནྟ་སཾ་ཡོ་གེ དུ་ཏི་ཡཱ, བ་ཧུ་ལཾ་ཝི་དྷཱ་ནཱ ཝི་བྷ་ཏྟི་ཝི་པ་ལླཱ་སོ ཝཱ. མཱ་སེ་ནཱ+ནུ་ཝཱ་ཀོ+དྷཱི་ཏོ, ཀོ་སེ་ནཱ+ནུ་ཝཱ་ཀོ+དྷཱི་ཏོ་ཏི ཀ་ར་ཎ་ཏྠེ ཏ་ཏི་ཡཱ.
༤. ག་ཏི་བོ་དྷཱ་ཧཱ་ར་ས་དྡ་ཏྠཱ་ཀ་མྨ་ཀ་བྷ་ཛྫཱ་དཱི་ནཾ པ་ཡོ་ཛྫེ
ག་ཏྱ་ཏྠཱ་ནཾ བོ་དྷ་ཏྠཱ་ནཾ ཨཱ་ཧཱ་ར་ཏྠཱ་ནཾ ས་དྡ་ཏྠཱ་ན+མ་ཀ་མྨ་ཀཱ་ནཾ བྷ་ཛྫཱ་དཱི་ན་ཉྩ པ་ཡོ་ཛྫེ ཀ་ཏྟ་རི དུ་ཏི་ཡཱ ཧོ་ཏི. ད་ཏྟོ ག་མ་ཡ་ཏི མཱ་ཎ་ཝ་ཀཾ གཱ་མཾ, ཡཱ་པ་ཡ་ཏི ཝཱ. གུ་རུ བོ་དྷ་ཡ་ཏི མཱ་ཎ་ཝ་ཀཾ དྷ་མྨཾ, ཝེ་ད་ཡ་ཏི ཝཱ. མཱ་ཏཱ བྷོ་ཛ་ཡ་ཏི པུ་ཏྟ+མོ་ད་ནཾ, ཨཱ་ས་ཡ་ཏི ཝཱ. གུ་རུ ཨ་ཛ྄ཛྷཱ་པ་ཡ་ཏི སི་སྶཾ ཝེ་དཾ, པཱ་ཋ་ཡ་ཏི ཝཱ. པ་ཡོ་ཛྫ་ཏོ+ཉྙ་ཏྲ ཀ་མྨེ དུ་ཏི་ཡཱ. པོ་སོ ཨཱ་ས་ཡ་ཏི ད་ཏྟཾ, སཱ་ཡ་ཡ་ཏི ཝཱ. པོ་སོ ཨ་ཉྙཾ བྷ་ཛྫཱ་པེ་ཏི, ཨ་ཉྙཾ ཀོ་ཊྚཱ་པེ་ཏི, ཨ་ཉྙཾ ས་ནྠ་རཱ་པེ་ཏི.
༥. ཧ་རཱ་དཱི་ནཾ ཝཱ
ཧ་རཱ་དཱི་ནཾ པ་ཡོ་ཛྫེ ཀ་ཏྟ་རི དུ་ཏི་ཡཱ ཧོ་ཏི ཝཱ. པོ་སོ ཧཱ་རེ་ཏི བྷཱ་རཾ ད་ཏྟཾ, ད་ཏྟེ་ནེ་ཏི ཝཱ. ད་སྶ་ཡ་ཏེ ཛ་ནཾ རཱ་ཛཱ, ཛ་ནེ་ནེ་ཏི ཝཱ. ཨ་བྷི་ཝཱ་ད་ཡ་ཏེ གུ་རུཾ ད་ཏྟཾ, ད་ཏྟེ་ནེ་ཏི ཝཱ. ཨ་ཛ྄ཛྷོ་ཧཱ་རེ་ཏི ས་ཏྟུཾ ད་ཏྟཾ, ད་ཏྟེ་ནེ་ཏི ཝཱ. ཀཱ་རེ་ཏི ད་ཏྟོ ད་ཏྟཾ, ད་ཏྟེ་ནེ་ཏི ཝཱ. པ་ཀྑེ ས་བྦ་ཏྲ ཀ་ཏྟ་རི ཏ་ཏི་ཡཱ.
༦. ན ཁཱ་དཱ་དཱི་ནཾ
ཁཱ་དཱ་དཱི་ནཾ པ་ཡོ་ཛྫེ ཀ་ཏྟ་རི དུ་ཏི་ཡཱ ན ཧོ་ཏི. ག་ཏྱ་ཏྠཱ་དཱི་སུ ཀྭ་ཙི པ་ཊི་སེ་དྷ་ཏྠ+མི་དཾ. ཁཱ་ད་ཡ་ཏི ད་ཏྟོ ད་ཏྟེ་ན, ཨཱ་ད་ཡ་ཏི ད་ཏྟེ་ན, ཨ་ཝ྄ཧཱ་པ་ཡ་ཏི ད་ཏྠེ་ན, ས་དྡཱ་ཡ་ཡ་ཏི ད་ཏྟེ་ན, ནཱ་ཡ་ཡ་ཏི ད་ཏྟེ་ན, ཀ་ནྡ་ཡ་ཏི ད་ཏྟེ་ན.
༧. ཛྷཱ་དཱི་ཧི ཡུ་ཏྟཱ
དྷི་ཨཱ་དཱི་ཧི ཡུ་ཏྟ་ཏོ དུ་ཏི་ཡཱ ཧོ་ཏི. དྷི+ར་ཏྠུ+མཾ པུ་ཏི་ཀཱ་ཡཾ, ཨ་ནྟ་རཱ ཙ རཱ་ཛ་ག་ཧཾ ཨ་ནྟ་རཱ ཙ ནཱ་ལ་ནྡཾ, རཱ་ཛ་ག་ཧ་སྶ ཙ ནཱ་ལ་ནྡ་སྶ ཙ ཝི་ཝ་ར་བྷཱུ་ཏེ མ་ཛ྄ཛྷེ་ཏི ཨ་ཏྠོ. ས་མཱ་དྷཱ་ན+མ་ནྟ་རེ་ན, མུ་ཙ་ལི་ནྡ+མ་བྷི་ཏོ ས་རཾ. ཚ་ཊྛྱ་ཏྠེ+ཡཾ དུ་ཏི་ཡཱ.
༨. ལ་ཀྑ་ཎི་ཏྠ་མྦྷཱུ་ཏ་ཝི་ཙྪཱ་སྭ+བྷི་ནཱ
ལ་ཀྑ་ཎཱ་དཱི་སྭ+ཏྠེ་སུ ཨ་བྷི་ནཱ ཡུ་ཏྟ་མྷཱ དུ་ཏི་ཡཱ ཧོ་ཏི. རུ་ཀྑ+མ་བྷི་ཝི་ཛྫོ་ཏ་ཏེ ཙ་ནྡོ, ཨེ་ཏྠ རུ་ཀྑོ ལ་ཀྑ་ཎཾ, ཙ་ནྡོ ལ་ཀྑི་ཏ་བྦོ, ཏ་ཏྲ ཨ་བྷི་ནཱ རུ་ཀྑ་སྶ ལ་ཀྑ་ཎ་ཝུ་ཏྟི་ཏཱ པ་ཀཱ་སཱི་ཡ་ཏཱི་ཏི རུ་ཀྑོ ཨ་བྷི་ནཱ ཡུ་ཏྟོ ནཱ་མ. སཱ་དྷུ དེ་ཝ་ད་ཏྟོ མཱ་ཏ་ར+མ་བྷི, མཱ་ཏ་རི སཱ་དྷུ་ཏྟཾ པ་ཏྟོ་ཏྱ་ཏྠོ. རུ་ཀྑཾ རུ་ཀྑཾ་ཨ་བྷི ཝི་ཛྫོ་ཏ་ཏེ ཙ་ནྡོ, རུ་ཀྑེ རུ་ཀྑེ་ཏྱ་ཏྠོ.
༩. པ་ཏི་པ་རཱི་ཧི བྷཱ་གེ ཙ
པ་ཏི་པ་རཱི་ཧི ཡུ་ཏྟ་ཏོ ལ་ཀྑ་ཎཱ་དཱི་སུ བྷཱ་གེ ཙ+ཏྠེ དུ་ཏི་ཡཱ ཧོ་ཏི. རུ་ཀྑཾ་པ་ཏི ཝི་ཛྫོ་ཏ་ཏེ, སཱ་དྷུ དེ་ཝ་ད་ཏྟོ མཱ་ཏ་རཾ་པ་ཏི, རུ་ཀྑཾ རུ་ཀྑཾ་པ་ཏི ཏི་ཊྛ་ཏི, ཡ+དེ་ཏྠ མཾ པ་ཏི སི་ཡཱ, ཡོ མ་མ བྷཱ་གོ, སོ དཱི་ཡ་ཏུ་ཏྱ་ཏྠོ. ཨེ་ཝཾ རུ་ཀྑཾ་པ་རི་ཏྱཱ་དི་པི.
༡༠. ཨ་ནུ་ནཱ་ཏི
ལ་ཀྑ་ཎཱ་དཱི་སུ དུ་ཏི་ཡཱ. རུ་ཀྑ་མ་ནུ ཝི་ཛྫོ་ཏ་ཏེ, ས་ཙྩ་ཀི་རི་ཡ+མ་ནུ ཝ་སྶི, ཧེ་ཏུ ཙ ལ་ཀྑ་ཎཾ བྷ་ཝ་ཏི, སཱ་དྷུ དེ་ཝ་ད་ཏྟོ མཱ་ཏ་ར+མ་ནུ, རུ་ཀྑཾ རུ་ཀྑ+མ་ནུ ཝི་ཛྫོ་ཏ་ཏེ, ཡ་དེ་ཏྠ མཾ་ཨ་ནུ སི་ཡཱ.
༡༡. ས་ཧ་ཏྠེ
ས་ཧ་ཏྠེ ཨ་ནུ་ནཱ ཡུ་ཏྟ་མྷཱ དུ་ཏི་ཡཱ. པ་བྦ་ཏ+མ་ནུ ཏི་ཊྛ་ཏི, པ་བྦ་ཏེ་ན ས་ཧ ཏྱ་ཏྠོ.
༡༢. ཧཱི་ནེ
ཧཱི་ན་ཏྠེ ཨ་ནུ་ནཱ ཡུ་ཏྟ་མྷཱ དུ་ཏི་ཡཱ. ཨ་ནུ་སཱ་རི་པུ་ཏྟཾ པ་ཉྙ་ཝ་ནྟོ བྷི་ཀྑཱུ, སཱ་རི་པུ་ཏྟ་ཏོ པ་ཉྙཱ་ཡ ཧཱི་ནཱ་ཏྱ་ཏྠོ.
༡༣. ཨུ་པེ་ན
ཧཱི་ན་ཏྠེ ཨུ་པེ་ན ཡུ་ཏྟ་མྷཱ དུ་ཏི་ཡཱ. ཨུ་པ་སཱ་རི་པུ་ཏྟཾ པ་ཉྙ་ཝ་ནྟོ.
༡༦. ཀ་ཏྟུ་ཀ་ར་ཎེ་སུ ཏ་ཏི་ཡཱ
ཀ་ཏྟ་རི ཀ་ར་ཎེ ཙ ཀཱ་ར་ཀེ ཏ་ཏི་ཡཱ ཧོ་ཏི. ཛི་ནེ་ན དེ་སི་ཏོ དྷ་མྨོ, བུ་དྡྷེ་ན ཛི་ཏོ མཱ་རོ, ཨ་ཧི་ནཱ ད་ཊྛོ ན་རོ. ཡ་ཏྠ ཀཱ་ར་ཎ་ཀཱ་ར་ཎ་མྤི ཀཱ་ར་ཎ་ཝ་སེ་ན ཝུ་ཙྩ་ཏི, ཏ་ཏྠཱ་པི ཏ་ཏི་ཡཱ, ཙོ་རེ་ཧི གཱ་མོ ད་ཌྜྷོ, ཏི་ཎེ་ཧི བྷ་ཏྟཾ སི་དྡྷཾ, ས་དྡྷེ་ཧི ཀཱ་རི་ཏཱ ཝི་ཧཱ་རཱ.
ཨ་ཏྟ་པ་དྷཱ་ནོ ཀི་རི་ཡཾ, ཡོ ནི་བྦ་ཏྟེ་ཏི ཀཱ་ར་ཀོ;
ཨ་པ་ཡུ་ཏྟོ པ་ཡུ་ཏྟོ ཝཱ, ས ཀ་ཏྟཱ་ཏི པ་ཝུ་ཙྩ་ཏི.
ཀ་ར་ཎེ-ཏཾ པ་ན དུ་ཝི་དྷཾ ཨ་ཛ྄ཛྷ་ཏྟི་ཀ་བཱ་ཧི་ར་ཝ་སེ་ན, ཡ་ཐཱ ཧ་ཏྠེ་ན ཀ་མྨཾ ཀ་རོ་ཏི, ཙ་ཀྑུ་ནཱ རཱུ་པཾ པ་སྶ་ཏི, མ་ན་སཱ དྷ་མྨཾ ཝི་ཉྙཱ་ཡ་ཏི. ད་ཏྟེ་ན ཝི་ཧ་ཡོ ལུ་ནཱ་ཏི, ཨ་གྒི་ནཱ ཀུ་ཊིཾ ཛྷཱ་པེ་ཏི.
བཱ་ཧི་ར་ཉྩ ཏ་ཐཱ+ཛ྄ཛྷ་ཏྟཾ, ཀ་ར་ཎཾ དུ་ཝི་དྷཾ ཡ་ཐཱ;
ཝཱི་ཧིཾ ལུ་ནཱ་ཏི ད་ཏྟེ་ན, ནེ་ཏྟེ་ན ཙ་ནྡ+མི་ཀྑ་ཏེ.
པ་ཀ་ཏི་ཡཱ ཨ་བྷི་རཱུ་པོ, གོ་ཏྟེ་ན གོ་ཏ་མོ ཨི་ཙྩཱ་དི བྷཱུ་དྷཱ་ཏུ་སྶ ས་མྦྷ་ཝཱ ཀ་ར་ཎེ ཏ་ཏི་ཡཱ. ཏ་ཐཱ སཱ་རི་པུ་ཏྟོ་ཏི ནཱ་མེ་ན ཝི་སྶུ་ཏོ, ཛཱ་ཏི་ཡཱ ཁ་ཏྟི་ཡོ བུ་དྡྷོ, ཛཱ་ཏི་ཡཱ ས་ཏྟ་ཝ་སྶི་ཀོ, སི་པྤེ་ན ན་ལ༹་ཀཱ་རོ སོ, ཨེ་ཀཱུ་ན་ཏིཾ་སོ ཝ་ཡ་སཱ, ཨེ་ཝཾ ས་མེ་ན དྷཱ་ཝ་ཏི, ཝི་ས་མེ་ན དྷཱ་ཝ་ཏི, དྭི་དོ་ཎེ་ན དྷ་ཉྙཾ ཀི་ཎཱ་ཏི.
༡༧. ས་ཧ་ཏྠེ་ན
ས་ཧ་ཏྠེ་ན ཡོ་གེ ཏ་ཏི་ཡཱ སི་ཡཱ. ཏ་ཏི་ཡཱ་པི ཚ་ཊྛཱི་ཝ ཨ་པྤ་དྷཱ་ནེ ཨེ་ཝ བྷ་ཝ་ཏི. པུ་ཏྟེ་ན ས་ཧཱ+ག་ཏོ, པུ་ཏྟེ་ན ས་དྡྷིཾ ཨཱ་ག་ཏོ, ཝི་ཏ་ཀྐེ་ན ས་ཧ ཝ་ཏྟ་ཏི, པུ་ཏྟེ་ན ས་ཧ ཐཱུ་ལོ, ནི་སཱི་དི བྷ་ག་ཝཱ ས་དྡྷིཾ བྷི་ཀྑུ་ས་ངྒྷེ་ན, ས་ཧ་སྶེ་ན ས་མཾ མི་ཏཱ, ས་བྦེ་ཧི མེ པི་ཡེ་ཧི མ་ནཱ་པེ་ཧི ནཱ་ནཱ་བྷཱ་ཝོ.
༡༨. ལ་ཀྑ་ཎེ
ལ་ཀྑ་ཎེ ཝ་ཏྟ་མཱ་ན་ཏོ ཏ་ཏི་ཡཱ. བྷི་ནྣེ་ན སཱི་སེ་ན པ་གྒྷ་ར་ནྟེ་ན ལོ་ཧི་ཏེ་ན པ་ཊཱི་ཝི་སྶ་ཀེ ཨུ་ཛ྄ཛྷཱ་པེ་སི, ཨཱུ་ན་པ་ཉྩ་བ་ནྡྷ་ནེ་ན པ་ཏྟེ་ན ཨ་ཉྙཾ ན་ཝཾ པ་ཏྟཾ ཙེ་ཏཱ་པེ་ཡྻ, ཏི་ད་ཎྜ་ཀེ་ན པ་རི་བྦཱ་ཛ་ཀ+མ་དྡ་ཀྑི, ཨ་ཀྑི་ནཱ ཀཱ་ཎོ, ཧ་ཏྠེ་ན ཀུ་ཎཱི, པཱ་དེ་ན ཁ་ཉྫོ, པི་ཊྛི་ཡཱ ཁུ་ཛྫོ. ཏེ་ན ཧི ཝི་ཀ་ལ་ངྒེ་ན ཝི་ཀ་ལ་ངྒི་ནོ ཝི་ཀཱ་རོ ལ་ཀྑི་ཡ་ཏེ.
༡༩. ཧེ་ཏུ་མྷི
ཝཱ་སཱ་དི་ལ་ཀྑ་ཎ་ཀྲི་ཡཱ་ཡ ཧེ་ཏུ་ཏོ ཏ་ཏི་ཡཱ. ཨ་ནྣེ་ན ཝ་ས་ཏི, ཝི་ཛྫཱ་ཡ ཝ་ས་ཏི, ན ཛ་ཙྩཱ ཝ་ས་ལོ ཧོ་ཏི, ཀ་མྨུ་ནཱ ཝ་ས་ལོ ཧོ་ཏི, དཱ་ནེ་ན བྷོ་ག་ཝཱ, ཨཱ་ཙཱ་རེ་ན ཀུ་ལཾ, ཏེ་ན པཱ་ཎི ཀཱ་མ་ད་དོ.
༢༠. པ་ཉྩ་མཱི+ཎེ ཝཱ
ཨི་ཎེ ཧེ་ཏུ་མྷི པ་ཉྩ་མཱི ཝཱ. ས་ཏ་སྨཱ བ་དྡྷོ, ས་ཏེ་ན ཝཱ.
༢༡. གུ་ཎེ
པ་ར་ངྒ་བྷཱུ་ཏེ ཧེ་ཏུ་མྷི པ་ཉྩ་མཱི ཧོ་ཏི ཝཱ. ཛ་ལ༹་ཏྟཱ བ་དྡྷོ, ཛ་ལ༹་ཏྟེ་ན་ཝཱ, པ་ཉྙཱ་ཡ མུ་ཏྟོ, ཧུ་ཏྭཱ ཨ་བྷཱ་ཝ་ཏོ ཨ་ནི་ཙྩཱ, ས་ངྑཱ་ར་ནི་རོ་དྷཱ ཝི་ཉྙཱ་ཎ་ནི་རོ་དྷོ. བ་ཧུ་ལཾ་ཝི་དྷཱ་ནཱ ས་ཏྟ་མྱ་ཏྠེ་ཧི་པི, ཏེ་ན ས་མ་ཡེ་ན, ཀཱ་ལེ་ན དྷ་མྨ་སཱ་ཀ་ཙྪཱ, པུ་ར་ཏྠི་མེ་ན དྷ་ཏ་ར་ཊྛོ, ད་ཀྑི་ཎེ་ན ཝི་རཱུ་ལ༹ྷ་ཀོ, ཨུ་ཏྟ་རེ་ན ཀ་པི་ལ་ཝ་ཏྠུ, ཡེ་ན བྷ་ག་ཝཱ, ཏེ་ནུ་པ་ས་ངྐ་མི, སོ ཝོ མ་མ+ཙྩ་ཡེ་ན ས་ཏྠཱ་ཏི. མཱ་སེ་ན བྷུ་ཉྫ་ཏི, ཨེ་ཀཱ་ཧེ་ནེ་ཝ བཱ་རཱ་ཎ་སིཾ པཱ་ཝི་སི, ན་ཝ་ཧི མཱ་སེ་ཧི ཝི་ཧཱ་རཾ ཀཱ་རཱ་པེ་སི, ཀ་ཧཱ་པ་ཎེ་ན ཨཱུ་ནོ, དྷ་ནེ་ན ཝི་ཀ་ལོ, ཨ་སི་ནཱ ཀ་ལ་ཧོ, ཨཱ་ཙཱ་རེ་ན ནི་པུ་ཎོ, གུ་ལེ༹་ན མི་སྶ་ཀཾ, ཝཱ་ཙཱ་ཡ ས་ཁི་ལོ, མ་ཎི་ནཱ ཨ་ཏྠོ, དྷ་ནེ་ན ཨ་ཏྠོ, ཡོ་ཛ་ནེ་ན ག་ཙྪ་ཏི ཨི་ཙྩཱ་དི ཧེ་ཏུ་མྷི ཀ་ར་ཎེ ཝཱ ཏ་ཏི་ཡཱ. ཨ་ཏྟ་ནཱ་ཝ ཨ་ཏྟཱ་ནཾ ས་མྨ་ནྣ་ཏཱི་ཏི པ་ཙྩ་ཏྟེ བ་ཧུ་ལཾ་ཝི་དྷཱ་ནཱ ཀ་ཏྟ་རི ཏ་ཏི་ཡཱ. ཨེ་ཝཾ ཏི་ལེ་ཧི ཁེ་ཏྟེ ཝ་པ་ཏཱི་ཏི ཀ་མྨ་ཏྠེ, སུ་མུ་ཏྟཱ མ་ཡཾ ཏེ་ན མ་ཧཱ་ས་མ་ཎེ་ནཱ་ཏི པ་ཉྩ་མྱ་ཏྠེ ཙ.
༢༤. ཙ་ཏུ་ཏྠཱི ས་མྤ་དཱ་ནེ
ཨ་ཙེ་ཏ་ནཾ ས་ཙེ་ཏ་ནཾ ཝཱ པ་ཊི་གྒཱ་ཧ་ཀ་བྷཱ་ཝེ་ནཱ+པེ་ཀྑི་ཏཾ, ཏཾ ས་མྤ་དཱ་ནཾ, ཏ་ཉྩ དཱ-དཱ་ནེ་ཏི དྷཱ་ཏུ་ཏོ བྱ་པྤེ་ན ཡུ་ཏྟ་མེ་ཝ, ཏ་ཏྠ ཙ་ཏུ་ཏྠཱི ཧོ་ཏི. ཏ་ཉྩ དཱི་ཡ་མཱ་ན་སྶ ཝ་ཏྠུ་ནོ ཨ་ནི་ཝཱ་ར་ཎ+ཛ྄ཛྷེ་ས་ནཱ+ནུ་མ་ཏི་ཏོ ཏི་ཝི་དྷོ, ཡ་ཐཱ བུ་དྡྷ་སྶ པུ་པྥཾ དེ་ཏི, བོ་དྷི་རུ་ཀྑ་སྶ ཛ་ལཾ དེ་ཏི, ཡཱ་ཙ་ཀ་སྶ དྷ་ནཾ དེ་ཏི, བྷི་ཀྑཱུ་ནཾ དཱ་ནཾ དེ་ཏི.
ཨ་ནི་རཱ་ཀ་ར་ཎཱ+རཱ་དྷ-ན+བྦྷ་ནུ་ཉྙ་ཝ་སེ་ན ཧི;
ས་མྤ་དཱ་ནཾ ཏི་དྷཱ ཝུ་ཏྟཾ, རུ་ཀྑ+ཡཱ་ཙ་ཀ+བྷི་ཀྑ་ཝོ.
ཨཱ་དྷཱ་ར་ཝི་ཝ་ཀྑཱ་ཡཾ ས་ཏྟ་མཱི་པི, ས་ངྒྷེ གོ་ཏ་མི དེ་ཧི, ས་ངྒྷེ དི་ནྣེ ཨ་ཧ་ཉྩེ་ཝ པཱུ་ཛི་ཏོ བྷ་ཝི་སྶཱ་མི, ཡཱ པ་ལཱ་ལ་མ་ཡཾ མཱ་ལཾ, ནཱ་རཱི ད་ཏྭཱ་ན ཙེ་ཏི་ཡེ་ཏི.
༢༥. ཏཱ་ད་ཏྠྱེ
ཏཱ་ད་ཏྠྱེ ཙ་ཏུ་ཏྠཱི སི་ཡཱ. ཏ་ད་ཏྠ་སྶ བྷཱ་ཝེ, ཏཱ་ད་ཏྠྱཾ, ཏ་སྨིཾ ཏ་ད་ཏྠ་བྷཱ་ཝེ ཛོ་ཏ་ནཱི་ཡེ་ཝ ཙ་ཏུ་ཏྠཱི སི་ཡཱ. ཏ་ད་ཏྠ་སྶ བྷཱ་ཝོ་ཏི ནི་མི་ཏྟ་ནི་མི་ཏྟཱི་ས་མྦ་ནྡྷེ ཚ་ཊྛཱི, ཏ་སྨཱ ཚ་ཊྛཱ་པ་ཝཱ་དོ+ཡཾ. ས་མེ་པི ནི་མི་ཏྟ་ནི་མི་ཏྟཱི་ནཾ ས་མྦ་ནྡྷེ ནི་མི་ཏྟ་བྷཱུ་ཏ་ཡཱུ་པ་ཏོ་ཝ ཙ་ཏུ་ཏྠཱི, ནོ ནི་མི་ཏྟཱི་བྷཱུ་ཏ་དཱ་རུ་ཏོ. ཡཱུ་པཱ་ཡ དཱ་རུ, པཱ་ཀཱ་ཡ ཝ་ཛ་ཏི, བུ་དྡྷ་སྶ་ཏྠཱ་ཡ ཛཱི་ཝི་ཏཾ པ་རི་ཙྩ་ཛཱ་མི, ནེ་ཝ ད་ཝཱ་ཡ, ན མ་དཱ་ཡ, ཨཱུ་ན་སྶ པཱ་རི་པཱུ་རི་ཡཱ, ཨ་ཏྠཱ་ཡ ཧི་ཏཱ་ཡ སུ་ཁཱ་ཡ སཾ་ཝ་ཏྟ་ཏི, ལོ་ཀཱ་ནུ་ཀ་མྤཱ་ཡ, ཕཱ་སུ ཝི་ཧཱ་རཱ་ཡ.
ཨི་ཙྩཱ་ཡཾ ཀ་ཙྩཱ་ཡ་ནེ ཨུ་པ་རི ཝ་ཀྑ་མཱ་ན་སྶ ཙ་ཏུ་ཏྠཱི་ཏི སཱ་དྷི་ཏ་ཏྟཱ ཨི་དྷ ཚ་ཊྛཱི་ཏི དཱི་པ་ན་ཏྠཾ ཝུ་ཙྩ་ཏེ –
ཀ་སྶ སཱ་དུ ན་རུ་ཙྩ་ཏི, མཱ ཨ་ཡ་སྨ་ནྟཱ་ན་མྤི ས་ངྒྷ་བྷེ་དོ རུ་ཙྩི་ཏྠ, ཁ་མ་ཏི ས་ངྒྷ་སྶ, བྷ་ཏྟ+མ་སྶ ན་ཙྪཱ་དེ་ཏཱི་ཏི ཚ་ཊྛཱི ས་མྦ་ནྡྷ་ཝ་ཙ་ནི་ཙྪཱ་ཡཾ, ན ཙེ+ཝཾ ཝི་རོ་དྷོ སི་ཡཱ, ས་དི་ས་རཱུ་པ་ཏྟཱ, ཨེ་ཝཾ་ཝི་དྷེ་སུ ཙ ས་མྦ་ནྡྷ་སྶ ས་དྡི་ཀཱ་ནུ་མ་ཏ་ཏྟཱ. ཏ་ཐཱ ཧི བྷཱ་ག་ཝུ་ཏྟི་ཡཱ ‘‘ཨུ་པ་པ་ད་ཝི་བྷ་ཏྟི ཚ་ཊྛི་ཡཱ+པ་ཝཱ་དཱ’’ཏི ཝུ་ཏྟཾ, ས་དྡ་ནྟ་རེ ཝི་ཧི་ཏཱ ཝི་བྷ་ཏྟི ཨུ་པ་པ་ད་ཝི་བྷ་ཏྟི.
ཀ་སྶ ཝཱ ཏྭཾ དྷ་མྨཾ རོ་ཙེ་སཱི་ཏི ཨ་ཏྠ་མ་ཏྟེ པ་ཋ་མཱ, ཀ་སྶ ཝཱ ཏུ་ཡ྄ཧ་ནྟི ཨ་ཝ་ཏྭཱ ཀ་སྶ ཝཱ ཏྭཾ དྷ་མྨཾ རོ་ཙེ་སཱི་ཏི ཨ་ཏྠ་མ་ཏྟེ པ་ཋ་མཱ་ཝ་སེ་ན བྱ་བྷི་ཙཱ་ར་ད་སྶ་ནཱ. ཨེ་ཝ+མ་ཉྙཱ་པི ཝི་ཉྙེ་ཡྻཱ, པ་ར་ཏོ་པི ཡ་ཐཱ་ག་མཾ.
ར་ཉྙོ ས་ཏཾ དྷཱ་རེ་ཏི ར་ཉྙོ ཚ་ཏྟཾ དྷཱ་རེ་ཏཱི་ཏི ས་མྦ་ནྡྷེ ཚ་ཊྛཱི་ཝ. སི་ལཱ་གྷ=ཀ་ཐ་ནེ, ཨེ་ཝཾ ར་ཉྙོ སི་ལཱ་གྷ་ཏེ ཨི་ཙྩཱ་དི, ཐུ་ཏིཾ ཀ་རོ་ཏཱི་ཏྱ་ཏྠོ. ཧ་ནུ=ཨ་པ་ན་ཡ་ནེ, ར་ཉྙོ ཧ་ནུ་ཏེ, ཝ་ཉྩེ་ཏཱི་ཏྱ་ཏྠོ. ཨུ་པ་ཏི་ཊྛེ་ཡྻ ས་ཀྱ་པུ་ཏྟཱ་ནཾ ཝ་ཌྜྷ་ཀཱི, ཨུ་པ་ག་ཙྪེ་ཡྻཱ་ཏྱ་ཏྠོ. ས་པ=ཨ་ཀྐོ་སེ, མ་ཡ྄ཧཾ ས་པ་ཏེ, ས་ཙྩཾ ཀུ་རུ་ཏེ་ཏྱ་ཏྠོ. དྷ་ར=དྷཱ་ར་ཎེ, སུ་ཝ་ཎྞཾ ཏེ དྷཱ་ར་ཡ་ཏེ, ཨི་ཎཾ ཏེ དྷཱ་ར་ཡ་ཏི, ཨ་སྶ ར་ཉྙོ ནཱ་གཾ དྷཱ་ར་ཡཱ་མ. པི་ཧ=ཨི་ཙྪཱ་ཡཾ, དེ་ཝཱ་པི ཏ་སྶ པི་ཧ་ཡ་ནྟི ཏཱ་དི་ནོ, ཏེ་སཾ པི་ཧ་ཡ་ནྟི ས་མྦུ་དྡྷཱ་ནཾ ས་ཏཱི་མ་ཏཾ, པི་ཧ་ཡ་ནྟི=པ་ཏྠེ་ནྟི. ཏ་སྶ ཀུ་ཛ྄ཛྷ མ་ཧཱ་ཝཱི་ར, ཡ་དི+ཧཾ ཏ་སྶ པ་ཀུ་པྤེ་ཡྻཾ, དུ་བྷ་ཡ་ཏི དི་སཱ་ནཾ མེ་གྷོ, ཡོ མི་ཏྟཱ་ནཾ ན དཱུ་བྷ་ཏི, ཡོ ཨ་པྤ་དུ་ཊྛ་སྶ ན་ར་སྶ དུ་སྶ་ཏི. ཨི་སྶ=ཨི་སྶཱ་ཡཾ, ཏི་ཏྠི་ཡཱ ཨི་སྶ་ཡ་ནྟི ས་མ་ཎཱ་ནཾ. ཨུ་སཱུ་ཡ=དོ་སཱ་ཝི་ཀ་ར་ཎེ, དུ་ཛྫ་ནཱ གུ་ཎ་ཝ་ནྟཱ་ནཾ ཨུ་སྶཱུ་ཡ་ནྟི, ཀཱ ཨུ་སུ་ཡཱ ཝི་ཛཱ་ན་ཏཾ. ཨི་དྷ+སི་དྷ+རཱ་དྷ+སཱ་དྷ=སཾ་སི་དྡྷི་ཡཾ, ཨཱ་རཱ་དྷོ མེ ར་ཉྙོ, ར་ཉྙོ བྷཱ་གྱ+མཱ་ར་ཛ྄ཛྷ་ཏི, ཀྱཱ+ཧཾ ཨ་ཡྻཱ་ནཾ ཨ་པ་ར་ཛ྄ཛྷཱ་མི, ཨཱ་ཡ་སྨ་ཏོ ཨུ་པཱ་ལི་ཏྠེ་ར་སྶ ཨུ་པ་ས་མྤ་དཱ་པེ་ཀྑོ ཨུ་པ་ཏི་སྶོ. བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ, ཨཱ་སུ་ཎ་ནྟི བུ་དྡྷ་སྶ བྷི་ཀྑཱུ, ཏ་སྶ བྷི་ཀྑུ་ནོ ཛ་ནོ་ཨ་ནུ་གི་ཎཱ་ཏི, པ་ཏི་གི་ཎཱ་ཏི, སཱ་དྷུ་ཀཱ་ར་དཱ་ནཱ་དི་ནཱ ཏཾ ཨུ་སྶ་ཧ་ཏཱི་ཏྱ་ཏྠོ. ཨཱ་རོ་ཙ་ཡཱ་མི ཝོ བྷི་ཀྑ་ཝེ, པ་ཊི་ཝེ་ད་ཡཱ་མི ཝོ, ཨཱ་མ་ནྟ་ཡཱ་མི ཏེ མ་ཧཱ་རཱ་ཛ, དྷ་མྨཾ ཏེ དེ་སི་སྶཱ་མི, དེ་སེ་ཏུ བྷ་ནྟེ བྷ་ག་ཝཱ དྷ་མྨཾ བྷི་ཀྑཱུ་ནཾ, ཡ་ཐཱ ནོ བྷ་ག་ཝཱ བྱཱ་ཀ་རེ་ཡྻ, ནི་རུ་ཏྟིཾ ཏེ པ་ཝ་ཀྑཱ་མི, ཨ་ལཾ མེ ར་ཛྫཾ, ཨ་ལཾ བྷི་ཀྑུ པ་ཏྟ་སྶ, ཨ་ལཾ མ་ལློ མ་ལླ་སྶ, ཨ་ར་ཧ་ཏི མ་ལློ མ་ལླ་སྶ, ཨ་ལཾ ཏེ ཨི་དྷ ཝཱ་སེ་ན, ཀིཾ མེ ཨེ་ཀེ་ན ཏི་ཎྞེ་ནཱ་ཏི ས་བྦ་ཏྠ ས་མྦ་ནྡྷེ ཚ་ཊྛཱི.
ཨེ་ཝཾ ཨཱ་ཡུ བྷོ་ཏོ ཧོ་ཏུ, ཙི་རཾ ཛཱི་ཝི་ཏཾ, བྷ་དྡཾ, ཀ་ལྱཱ་ཎཾ, ཨ་ཏྠཾ, པ་ཡོ་ཛ་ནཾ, ཀུ་ས་ལཾ, ཨ་ནཱ་མ་ཡཾ, ཧི་ཏཾ, པ་ཏྠཾ, སུ་ཁཾ, སཱ་ཏཾ, བྷོ་ཏོ ཧོ་ཏུ, སཱ་དྷུ ས་མྨུ་ཏི མེ ཏ་སྶ, པུ་ཏྟ་སྶཱ+ཝི་ཀ་རེ་ཡྻ གུ་ཡ྄ཧ+མ་ཏྠཾ, ཏ་སྶ མེ ས་ཀྐོ པཱ་ཏུ་ར་ཧོ་སི, ཏ་སྶ པ་ཧི་ཎེ་ཡྻ, བྷི་ཀྑཱུ་ནཾ དཱུ་ཏཾ པཱ་ཧེ་སི, ཀ་པྤ་ཏི ས་མ་ཎཱ་ནཾ ཨཱ་ཡོ་གོ, ཨེ་ཀ་སྶ དྭི་ནྣཾ ཏི་ཎྞཾ ཝཱ པ་ཧོ་ཏི, ཨུ་པ་མཾ ཏེ ཀ་རི་སྶཱ་མི, ཨ་ཉྫ་ལིཾ་ཏེ པ་གྒ་ཎྷཱ་མི, ཏ་སྶ ཕཱ་སུ, ལོ་ཀ་སྶ+ཏྠོ, ན་མོ ཏེ པུ་རི་སཱ་ཛ་ཉྙ, སོ་ཏྠི ཏ་སྶ, ས་མ་ཏྠོ མ་ལློ མ་ལླ་སྶ, ཏ་སྶ ཧི་ཏཾ, ཏ་སྶ སུ་ཁཾ, སྭཱ་ག་ཏཾ ཏེ མ་ཧཱ་རཱ་ཛཱ་ཏི ས་བྦ་ཏྠ ས་མྦ་ནྡྷེ ཚ་ཊྛཱི.
༢༦. པ་ཉྩ་མྱ+ཝ་དྷི་སྨཱ
པ་ད་ཏྠཱ་ཝ་དྷི་སྨཱ པ་ཉྩ་མཱི་ཝི་བྷ་ཏྟི ཧོ་ཏི.
ས་མེ་པྱ+པ་ག་མེ དྭི་ནྣཾ, པུ་བྦ་རཱུ་པཱ ཡ+ད་ཙྩུ་ཏཾ;
ཝུ་ཙྩ་ཏེ ཏ+ད་པཱ་དཱ་ནཾ, ཏཾ ཙ་ལཱ་ཙ་ལ་ཏོ དྭི་དྷཱ;
ཡ་ཐཱ+སྶཱ དྷཱ་ཝ་ཏཱ པོ་སོ, པ་ཏོ, རུ་ཀྑཱ་ཕ་ལ་ནྟི ཙ.
ཏ་ཏྠ ཙ་ལཱ་ཝ་དྷི དྷཱ་ཝ་ཏཱ ཨ་སྶཱ པུ་རི་སོ པ་ཏ་ཏི, ཨ་ཙ་ལཱ་ཝ་དྷི པ་བྦ་ཏཱ ཨོ་ཏ་ར་ནྟི ཝ་ན་ཙཱ་ར་ཀཱ་ཏི.
ཏ་ཉྩ ཨ་ཝ་དྷི ཝི་ས་ཡ་ཀྲི་ཡཱ་ཝི་སེ་ས་སྶ ནི་དྡི་ཊྛ་ཏྟཱ ནི་དྡི་ཊྛ་ཝི་ས་ཡཾ, ཡ་ཏྠ ཨ་པ ཨ་པ་ག་མ་ན་ཀྲི་ཡཾ ཨུ་པཱ་ཏྟཾ=ཨ་ཛ྄ཛྷཱ་ཧ་ཊཾ ཝི་ས་ཡཾ ཀ་ཏྭཱ པ་ཝ་ཏྟ་ཏི, ཏཾ ཨུ་པཱ་ཏྟཾ. ཡཾ ཀེ་ན་ཙི གུ་ཎེ་ན ཨུ་ཀྐཾ་སི་ཡ་ཏི, ཏཾ ཨ་ནུ་མེ་ཡྻཾ. ཡ་ཐཱ གཱ་མཱ ཨ་པེ་ནྟི མུ་ན་ཡོ, ན་ག་རཱ ནི་གྒ་ཏོ རཱ་ཛཱ, པཱ་པཱ ཙི་ཏྟཾ ནི་ཝཱ་རེ་ནྟི. ཝ་ལཱ་ཧ་ཀཱ ཝི་ཛྫོ་ཏ་ཏེ, ཀུ་སུ་ལ་ཏོ པ་ཙ་ཏཱི་ཏི. ཨེ་ཏྠ ཙ ཝ་ལཱ༹་ཧ་ཀཱ ནི་ཀྑ་མྨ, ཀུ་སུ་ལ་ཏོ ཨ་པ་ནེ་ཏྭཱ་ཏི ཙ པུ་བྦ་ཀྲི་ཡཱ ཨ་ཛ྄ཛྷཱ་ཧ་རཱི་ཡ་ཏི. མ་ཐུ་རཱ པཱ་ཊ་ལི་པུ་ཏྟ་ཀེ་ཧི ཨ་བྷི་རཱུ་པཱ་ཏི ཨ་ནུ་མཱི་ཡ་ཏི. ཝུ་ཏྟ་ཉྷི –
ནི་དྡི་ཊྛ་ཝི་ས་ཡཾ ཀི་ཉྩི, ཨུ་པཱ་ཏྟ་ཝི་ས་ཡཾ ཏ་ཐཱ;
ཨ་ནུ་མེ་ཡྻ་ཝི་ས་ཡ་ཉྩེ་ཏི, ཏི་དྷཱ+ཧུ ཨ་ཝ་དྷིཾ བུ་དྷཱ་ཏི.
བྷ་ཡ་ཧེ་ཏུ་མྷི-ཙོ་རཱ བྷ་ཡཾ ཛཱ་ཡ་ཏི, ཏ་ཎྷཱ་ཡ ཛཱ་ཡ་ཏི བྷ་ཡཾ, པཱ་པ་ཏོ ཨུ་ཏྟ་ས་ཏི, ན་ཏྠི སོ་ཀོ ཀུ་ཏོ བྷ་ཡཾ. ཨ་ཀྑཱ་ཏ་རི-ཨུ་པ་ཛ྄ཛྷཱ་ཡཱ སི་ཀྑཾ ག་ཎྷཱ་ཏི, ཨཱ་ཙ་རི་ཡ་མྷཱ ཨ་དྷཱི་ཏོ སུ་ཎཱ་ཏི ཝཱ. བུ་དྡྷ་སྨཱ པ་རཱ་ཛེ་ནྟི ཨ་ཉྙ་ཏི་ཏྠི་ཡཱ, པ་རཱ་ཛི་ཏཱ བྷ་ཝ་ནྟཱི་ཏྱ་ཏྠོ. ཧི་མ་ཝ་ཏཱ པ་བྷ་ཝ་ཏི ག་ངྒཱ, ཨ་ཙི་ར་ཝ་ཏི་ཡཱ པ་བྷ་ཝ་ནྟི ཀུ་ནྣ་དི་ཡོ. ཨུ་ར་སྨཱ ཛཱ་ཏོ པུ་ཏྟོ, ཀ་མྨ་ཏོ ཛཱ་ཏཾ ཨི་ནྡྲི་ཡཾ, ཨུ་པ་ཛ྄ཛྷཱ་ཡཱ ཨ་ནྟ་ར་དྷཱ་ཡ་ཏི སི་སྶོ, མཱ་ཏཱ་པི་ཏཱུ་ཧི ཨ་ནྟ་ར་དྷཱ་ར་ཡ་ཏི པུ་ཏྟོ, ནི་ལཱི་ཡ་ཏཱི་ཏྱ་ཏྠོ. དཱུ་ར་ཏྠ་ཡོ་གེ་ཀཱི་ཝ་དཱུ་རོ ཨི་ཏོ ན་ལ༹་ཀཱ་ར་གཱ་མོ, ཏ་ཏོ ཧ་ཝེ དཱུ་ར་ཏ་རཾ ཝ་ད་ནྟི, གཱ་མ་ཏོ ནཱ་ཏི་དཱུ་རེ, ཨཱ་ར་ཀཱ ཏེ མོ་གྷ་པུ་རི་སཱ ཨི་མ་སྨཱ དྷ་མྨ་ཝི་ན་ཡཱ, ཨཱ་ར་ཀཱ ཏེ་ཧི བྷ་ག་ཝཱ དཱུ་ར་ཏོ་ཝ ན་མ་སྶ་ནྟི, ཨ་དྡ་ས དཱུ་ར་ཏོ་ཝ ཨཱ་ག་ཙྪ་ནྟཾ. ཨ་ནྟི་ཀ་ཏྠ་ཡོ་གེ-ཨ་ནྟི་ཀཾ གཱ་མཱ, ཨཱ་ས་ནྣཾ གཱ་མཱ, ས་མཱི་པཾ གཱ་མཱ. པ་རི་མཱ་ཎེ-ཨི་ཏོ མ་ཐུ་རཱ་ཡ ཙ་ཏཱུ་སུ ཡོ་ཛ་ནེ་སུ སཾ་ཀ་སྶཾ, རཱ་ཛ་ག་ཧ་ཏོ པ་ཉྩ་ཙ་ཏྟཱ་ལཱི་ས་ཡོ་ཛ་ན་མ་ཏྠ་ཀེ སཱ་ཝ་ཏྠི. ཀཱ་ལ་པ་རི་མཱ་ཎེ-ཨི་ཏོ ཨེ་ཀ་ན་ཝུ་ཏི་ཀ་པྤ་མ་ཏྠ་ཀེ, ཨི་ཏོ ཝ་སྶ་ས་ཏ་ས་ཧ་སྶ་སྶ ཨ་ཙྩ་ཡེ་ན བུ་དྡྷོ ལོ་ཀེ ཨུ་པྤ་ཛྫི་སྶ་ཏི. པཱ་སཱ་དཱ སཾ་ཀ་མེ་ཡྻ, པཱ་སཱ་དཾ ཨ་བྷི་རུ་ཧི་ཏྭཱ སཾ་ཀ་མེ་ཡྻཱ་ཏི ཨ་ཏྠོ, ཏ་ཐཱ ཧ་ཏྠི་ཀྑ་ནྡྷཱ སཾ་ཀ་མེ་ཡྻ, ཨ་བྷི་དྷ་མྨཱ པུ་ཙྪ་ནྟི, ཨ་བྷི་དྷ་མྨཾ སུ་ཏྭཱ་ཏི ཨ་ཏྠོ, ཨཱ་ས་ནཱ ཝུ་ཊྛ་ཧེ་ཡྻ. དི་ས་ཏྠ་ཝཱ་ཙཱི་ཧི ཡོ་གེ-ཨི་ཏོ སཱ པུ་རི་མཱ དི་སཱ, ཨི་ཏོ སཱ ད་ཀྑི་ཎཱ དི་སཱ, ཨ་ཝཱི་ཙི་ཏོ ཡཱ་ཝ བྷ་ཝ་གྒཾ, ཨུ་དྡྷཾ པཱ་ད་ཏ་ལཱ, ཨ་དྷོ ཀེ་ས་མ་ཏྠ་ཀཱ. ཝི་བྷ་ཛ་ནེ-ཡ་ཏོ པ་ཎཱི་ཏ་ཏ་རོ ཝཱ ཝི་སི་ཊྛ་ཏ་རོ ཝཱ ན་ཏྠི, ཨ་ཏྟ་ད་ནྟོ ཏ་ཏོ ཝ་རཾ, ཀི་ཉྩཱ་པི དཱ་ན་ཏོ སཱི་ལཾ ཝ་རཾ, ཏ་ཏོ མ་ཡཱ བ་ཧུ་ཏ་རཾ སུ་ཏཾ, སཱི་ལ་མེ་ཝ སུ་ཏཱ སེ་ཡྻོ. ཨཱ་ར་ཏི་པྤ་ཡོ་གེ-ཨཱ་ར་ཏི ཝི་ར་ཏི པཱ་པཱ, པཱ་ཎཱ་ཏི་པཱ་ཏཱ ཝེ་ར་མ་ཎི, ཨ་དི་ནྣཱ་དཱ་ནཱ པ་ཊི་ཝི་ར་ཏོ, ཨ་པྤ་ཊི་ཝི་ར་ཏཱ མུ་སཱ་ཝཱ་དཱ. སུ་དྡྷ་ཏྠ་ཡོ་གེ-ལོ་བྷ་ནཱི་ཡེ་ཧི དྷ་མྨེ་ཧི སུ་དྡྷོ, མཱ་ཏུ་ཏོ ཙ པི་ཏུ་ཏོ ཙ སུ་དྡྷོ ཨ་ནུ་པ་ཀྐུ་ཊྛོ. པ་མོ་ཙ་ན་ཏྠ་ཡོ་གེ-པ་རི་མུ་ཏྟོ དུ་ཀྑ་སྨཱ་ཏི ཝ་དཱ་མི, མུ་ཏྟོ+སྨི མཱ་ར་བ་ནྡྷ་ནཱ, ན ཏེ མུ་ཙྩ་ནྟི མ་ཙྩུ་ནཱ, མུ་ཏྟོ+ཧཾ+ས་བྦ་པཱ་སེ་ཧི. ཝི་ཝེ་ཙ་ནེ-ཝི་ཝི་ཙྩེ་ཝ ཀཱ་མེ་ཧི, ཝི་ཝི་ཙྩ ཨ་ཀུ་ས་ལེ་ཧི དྷ་མྨེ་ཧི. པ་མཱ་ཎ་ཏྠེ-ཨཱ་ཡཱ་མ་ཏོ ཙ ཝི་ཏྠཱ་ར་ཏོ ཙ ཡོ་ཛ་ནཾ, ག་མྦྷཱི་ར་ཏོ ཙ པུ་ཐུ་ལ་ཏོ ཙ ཡོ་ཛ་ནཾ ཙ་ནྡ་བྷཱ་གཱ་ཡ པ་རི་མཱ་ཎཾ, པ་རི་ཀྑེ་པ་ཏོ ན་ཝ་ཡོ་ཛ་ན་ས་ཏ་པ་རི་མཱ་ཎོ མ་ཛ྄ཛྷི་མ་དེ་སོ. པུ་བྦཱ་དི་ཡོ་གེ-པུ་བྦེ་ཝ མེ བྷི་ཀྑ་ཝེ ས་མྦོ་དྷཱ, ཨི་ཏོ པུ་བྦེ ནཱ་ཧོ་སི, ཏ་ཏོ པ་རཾ པ་ཙྩ་ནྟི་མཱ ཛ་ན་པ་དཱ, ཏ་ཏོ ཨ་པ་རེ་ན ས་མ་ཡེ་ན. པ་ཉྷེ-ཀུ་ཏོ+སི ཏྭཾ, ཀུ་ཏོ བྷ་ཝཾ, པཱ་ཊ་ལི་པུ་ཏྟ་ཏོ. ཀི་ཙྪཱ ལ་དྡྷ་ནྟི གུ་ཎེ པ་ཉྩ་མཱི, ཀི་ཙྪེ་ན མེ ཨ་དྷི་ག་ཏ་ནྟི ཧེ་ཏུ་མྷི ཀ་ར་ཎེ ཝཱ ཏ་ཏི་ཡཱ, ཨེ་ཝཾ ཐོ་ཀཱ མུ་ཏྟོ, ཐོ་ཀེ་ན མུ་ཏྟོ་ཏི.
ཀ་ཐཾ ‘‘ཐོ་ཀཾ ཙ་ལ་ཏཱི’’ཏི, ཀྲི་ཡཱ་ཝི་སེ་ས་ནེ ཀ་མྨ་ནི དུ་ཏི་ཡཱ, ཐོ་ཀཾ ཙ་ལ་ནཾ ཀ་རོ་ཏཱི་ཏྱ་ཏྠོ, ཐོ་ཀ་ནྟི ཙ་ལ་ན་ཀྲི་ཡཱ་ཡ ཝི་སེ་ས་ན་ཏྟཱ ཀྲི་ཡཱ་ཝི་སེ་ས་ནཾ.
ཀྲི་ཡཱ་ཝི་སེ་ས་ནཾ ནཱ་མ, ཀ་མྨ་ཏྟེ+ཀ་ཏྟ་ས་ཎྛི་ཏཱ;
ནྱཱ་ཡ་སི་དྡྷཾ ཡ་ཏོ ཏ་སྨཱ, ཏ་ད་ཏྠཾ ན ཝི་སུཾ ཝི་དྷི.
ནྱཱ་ཡ་སི་དྡྷཾ་ཝ=ཙ་ལ་ན་ནྟི ཡ་སྨཱ བྷཱ་ཝེ ཨ་ནོ, ཏ་སྨཱ བྷཱ་ཝ་སྶེ+ཀ་ཏྟཱ ཨེ་ཀ་ཝ་ཙ་ན་ནྟི ཉཱ་ཡཱ ཨེ་ཀ་ཏྟ་ཉྩ, བྷཱ་ཝེ ཨ་ན་ཏྟཱ ན་པུཾ་ས་ཀ་ཏྟ་ཉྩ, ཀ་རོ་ཏི་ཀྲི་ཡཱ་ཡ ས་མྦ་ནྡྷེ་ན ཀ་མྨ་ཏྟ་ཉྩ སི་ཛ྄ཛྷ་ཏཱི་ཏི. ཀ་ར+བྷཱུ་དྷཱ་ཏ་ཝོ ཙ –
ཀཱ་རི་ཡ་རཱུ་པཱ་བྷི་དྷཱ་ཏྭ་ཏྠཱ, ས་བྦེ ས་ཏྟཱ་ཡ ཡུ་ཛྫ་རེ;
ཏ་ཏོ ཀྲི་ཡཱ ཙ བྷཱ་ཝོ ཙ, སཱ་མ་ཉྙཾ ཏེ་སུ ག་མྱ་ཏེ –
ཏི ཝུ་ཏྟ་ཏྟཱ ཡུ་ཛྫ་ནྟི.
ཐོ་ཀ་ཏྠེ-ཐོ་ཀཱ མུ་ཙྩ་ཏི. ས་བྦ་ཏྠ ས་ཝི་ས་ཡེ པ་ཉྩ་མཱི. ཨེ་ཏྠ ‘‘ཝི་ཝ་ཀྑཱ ལོ་ཀི་ཀཱ སཱ ཙ, ན ས་ཀྐཱ ཨ་ནི་ཝ་ཏྟི་ཏུཾ’’ཏི ཝུ་ཏྟ་ཏྟཱ ཨ་ནི་ཊྛ་པྤ་ས་ངྒོ ན སི་ཡཱ. མ་རི་ཡཱ་དཱ་ཡཾ-ཨཱ་པ་བྦ་ཏཱ ཁེ་ཏྟཾ. ཨ་བྷི་ཝི་དྷི་མྷི-ཨཱ་བྲ་ཧྨ་ལོ་ཀཱ ས་དྡོ ཨ་བྦྷུ་གྒ་ཙྪ་ཏི, པ་བྦ་ཏཾ ཝ་ཛྫེ་ཏྭཱ, བྲ་ཧྨ་ལོ་ཀ་མྷི བྱཱ་པེ་ཏྭཱ་ཏི ཙ ཨ་ཏྠོ. ཨེ་ཏྠ ཝ་ཛྫ་མཱ་ན་སཱི་མཱ མ་རི་ཡཱ་དཱ, ག་ཡ྄ཧ་མཱ་ན་སཱི་མཱ ཨ་བྷི་ཝི་དྷི.
༢༧. ཨ་པ་པ་རཱི་ཧི ཝ་ཛྫ་ནེ
ཝ་ཛྫ་ནེ ཝ་ཏྟ་མཱ་ནེ་ཧཱི ཨ་པ་པ་རཱི་ཧི ཡོ་གེ པ་ཉྩ་མཱི ཧོ་ཏི. ཨ་པ་སཱ་ལཱ་ཡ ཨཱ་ཡ་ནྟི ཝཱ་ཎི་ཛཱ, པ་རི་སཱ་ལཱ་ཡ ཨཱ་ཡ་ནྟི ཝཱ་ཎི་ཛཱ, སཱ་ལཾ ཝ་ཛྫེ་ཏྭཱ་ཏི ཨ་ཏྠོ.
༢༨. པ་ཊི་ནི་དྷི་པ་ཏི་དཱ་ནེ་སུ པ་ཏི་ནཱ
པ་ཊི་ནི་དྷི་མྷི པ་ཏི་དཱ་ནེ ཙ ཝ་ཏྟ་མཱ་ནེ་ན པ་ཏི་ནཱ ཡོ་གེ ནཱ་མ་སྨཱ པ་ཉྩ་མཱི ཧོ་ཏི. བུ་དྡྷ་སྨཱ པ་ཏི སཱ་རི་པུ་ཏྟོ, གྷ་ཏ+མ་སྶ ཏེ་ལ་སྨཱ པ་ཏི ད་དཱ་ཏི.
༢༩. རི་ཏེ དུ་ཏི་ཡཱ ཙ
རི་ཏེ་ས་དྡ་ཡོ་གེ ནཱ་མ་སྨཱ དུ་ཏི་ཡཱ ཧོ་ཏི པ་ཉྩ་མཱི ཙ. རི་ཏེ ས་དྡྷ་མྨཱ, རི་ཏེ ས་དྡྷ་མྨཾ.
༣༠. ཝི་ནཱ+ཉྙ་ཏྲ ཏ་ཏི་ཡཱ ཙ
ཝི་ནཱ+ཉྙ་ཏྲ་ཡོ་གེ ནཱ་མ་སྨཱ ཏ་ཏི་ཡཱ དུ་ཏི་ཡཱ པ་ཉྩ་མཱི ཙ. ཝི་ནཱ ཝཱ་ཏེ་ན, ཝི་ནཱ ཝཱ་ཏཾ, ཝི་ནཱ ཝཱ་ཏ་སྨཱ. ཨ་ཉྙ་ཏྲ ཨེ་ཀེ་ན པི་ཎྜ་པཱ་ཏ་ནཱི་ཧཱ་ར་ཀེ་ན, ཨ་ཉྙ་ཏྲ དྷ་མྨཾ, ཨ་ཉྙ་ཏྲ དྷ་མྨཱ.
༣༡. པུ་ཐ་ནཱ་ནཱ་ཧི
ཨེ་ཏེ་ཧི ཡོ་གེ ཏ་ཏི་ཡཱ ཧོ་ཏི པ་ཉྩ་མཱི ཙ. བྷི་ནྣ་ཡོ་ག་ཀ་ར་ཎཾ དུ་ཏི་ཡཱ་ནི་ཝ་ཏྟ་ན་ཏྠཾ. པུ་ཐ་གེ་ཝ ཛ་ནེ་ན, པུ་ཐ་གེ་ཝ ཛ་ན་སྨཱ, ཛ་ནེ་ན ནཱ་ནཱ, ཛ་ན་སྨཱ ནཱ་ནཱ.
༣༩. ཚ་ཊྛཱི ས་མྦ་ནྡྷེ
ས་མྦ་ནྡྷེ ཚ་ཊྛཱི ཧོ་ཏི. ར་ཉྙོ པུ་རི་སོ་ཏི ཝུ་ཏྟེ ཡ་སྨཱ རཱ་ཛཱ ད་དཱ་ཏི, པུ་རི་སོ ག་ཎྷཱ་ཏི, ཏ་སྨཱ རཱ་ཛ་པུ་རི་སོ་ཏི ཝི་ཉྙཱ་ཡ་ཏི. ཨེ་ཝ་མེ་ཝ ཡོ ཡ་སྶ ཨཱ་ཡ་ཏྟོ སེ་ཝ་ཀཱ་དི་བྷཱ་ཝེ་ན བྷ་ཎྜ་བྷཱ་ཝེ་ན ཝཱ ས་མཱི་པ+ས་མཱུ་ཧཱ+ཝ་ཡ་ཝ+ཝི་ཀཱ་ར+ཀཱ་རི་ཡ+ཨ་ཝ་ཏྠཱ+ཛཱ་ཏི+གུ་ཎ+ཀྲི་ཡཱ་དི་ཝ་སེ་ན ཝཱ, ཋཱ་ནཱི་ཝ་སེ་ན ཝཱ, ཨཱ་ག་མཱི་ཝ་སེ་ན ཝཱ, སོ ཏི་ཝི་དྷོ་པི ཨ་ཏྠོ ས་མྦ་ནྡྷོ ནཱ་མ. ཝུ་ཏྟ་ཉྷི –
ཀྲི་ཡཱ་ཀཱ་ར་ཀ་ས་ཉྫཱ་ཏོ, ཨ་སྶེ+དཾ་བྷཱ་ཝ་ཧེ་ཏུ་ཀོ;
ས་མྦ་ནྡྷོ ནཱ་མ སོ ཨ་ཏྠོ, ཏ་ཏྠ ཚ་ཊྛཱི ཝི་དྷཱི་ཡ་ཏེ.
པཱ་ར་ཏ་ནྟྱ་ཉྷི ས་མྦ་ནྡྷོ, ཏ་ཏྠ ཚ་ཊྛཱི བྷ་ཝེ ཏི་ཏོ;
ཨུ་པཱ་དྷི+ཋཱ་ནྱཱ+ག་མི་ཏོ, ན ཝི་སེ་སྶཱ་དི་ཏོ ཏི་ཏོ་ཏི.
ཨུ་པཱ་དྷི་ས་ངྑཱ་ཏ་ཝི་སེ་ས་ན་ཏོ ཏཱ་ཝ-ར་ཉྙོ པུ་རི་སོ. ཨེ་ཏྠ ཙ བྲཱ་ཧྨ་ཎཱ་དི་སཱ་མི་ཏོ ནི་ཝ་ཏྟེ་ཏཱི་ཏི རཱ་ཛཱ ཝི་སེ་ས་ནཾ, པུ་རི་སོ ཏེ་ན ཝི་སེ་སི་ཡ་ཏཱི་ཏི ཝི་སེ་སྶོ. བྷ་ཎྜ་ས་མྦ་ནྡྷ་ཏོ-པ་ཧུ་ཏཾ མེ དྷ་ནཾ ས་ཀྐ, ཨེ་ཀ་སྶ པ་ཊི་ཝཱི་སོ, བྷི་ཀྑུ་སྶ པ་ཏྟ་ཙཱི་ཝ་རཾ. ས་མཱི་པ་ཏོ-ཨ་མྦ་ཝ་ན་སྶ ཨ་ཝི་དཱུ་རེ, ནི་བྦཱ་ན་སྶེ་ཝ ས་ནྟི་ཀེ. ས་མཱུ་ཧེ-སུ་ཝ་ཎྞ་སྶ རཱ་སི, བྷི་ཀྑཱུ་ནཾ ས་མཱུ་ཧོ. ཨ་ཝ་ཡ་ཝེ-མ་ནུ་སྶ་སྶེ་ཝ ཏེ སཱི་སཾ, རུ་ཀྑ་སྶ སཱ་ཁཱ. ཝི་ཀཱ་རེ-སུ་ཝ་ཎྞ་སྶ ཝི་ཀ་ཏི, བྷ་ཊྛ་དྷ་ཉྙཱ་ནཾ ས་ཏྟུ. ཀཱ་རི་ཡེ-ཡ་ཝ་སྶ ཨ་ངྐུ་རོ, མེ་གྷ་སྶ ས་དྡོ, པུ་ཏྟཱ་པི ཏ་སྶ བ་ཧ་ཝོ, ཀ་མྨཱ་ནཾ ཕ་ལཾ ཝི་པཱ་ཀོ. ཨ་ཝ་ཏྠཱ་ཡཾ-ཁ་ནྡྷཱ་ནཾ པཱ་ཏུ་བྷཱ་ཝོ, ཛ་རཱ, བྷེ་དོ ཝཱ. ཛཱ་ཏི་ཡཾ-མ་ནུ་སྶ་སྶ བྷཱ་ཝོ, མ་ནུ་སྶཱ་ནཾ ཛཱ་ཏི. གུ་ཎེ-སུ་ཝ་ཎྞ་སྶ ཝ་ཎྞོ, ཝ་ཎྞོ ན ཁཱི་ཡེ་ཐ ཏ་ཐཱ་ག་ཏ་སྶ བུ་དྡྷ་སྶ གུ་ཎ་གྷོ་སོ, པུ་པྥཱ་ནཾ ག་ནྡྷོ, ཕ་ལཱ་ནཾ ར་སོ, ཙི་ཏྟ་སྶ ཕུ་ས་ནཱ, སི་པྤི་ཀཱ་ནཾ ས་ཏཾ ན་ཏྠི, ཏི་ལཱ་ནཾ མུ་ཊྛི, ཏེ་སཾ ས་མཱ་ཡོ་གོ, ས་ནྡྷི་ནོ ཝི་མོ་ཀྑོ, ཏ་ཐཱ་ག་ཏ་སྶ པ་ཉྙཱ་པཱ་ར་མིཾ ཨཱ་ར་བྦྷ, སུ་ཁཾ ཏེ, དུ་ཀྑཾ ཏེ, ཙེ་ཏ་སོ པ་རི་ཝི་ཏ་ཀྐོ ཨུ་ད་པཱ་དི, པ་ཉྙཱ་ཡ པ་ཊུ་བྷཱ་ཝོ, རཱུ་པ་སྶ ལ་ཧུ་ཏཱ, མུ་དུ་ཏཱ ཝཱ, ཨུ་པ་ཙ་ཡོ ཝཱ. ཀྲི་ཡཱ་ས་མྦ་ནྡྷེ-པཱ་ད་སྶ ཨུ་ཀྑེ་པ་ནཾ, ཨ་ཝ་ཀྑེ་པ་ནཾ ཝཱ, ཧ་ཏྠ་སྶ ས་མི་ཉྫ་ནཾ, དཱ་ནཾ, པ་སཱ་ར་ཎཾ, དྷཱ་ཏཱུ་ནཾ ག་མ་ནཾ, ཋཱ་ནཾ, ནི་ས་ཛྫཱ, ས་ཡ་ནཾ ཝཱ, ཏ་ཐཱ་ག་ཏ་སྶ ནཱ་མ་གོ་ཏྟཱ་དི, ཏ་སྶ ཀཱ་ར་ཎཾ, ཏ་སྶ མཱ་ཏཱ་པི་ཏ་རོ, ཏ་སྶ པུ་ར་ཏོ པཱ་ཏུ་ར་ཧོ་སི, ན་ག་ར་སྶ ད་ཀྑི་ཎ་ཏོ, ཝ་སྶཱ་ནཾ ཏ་ཏི་ཡེ མཱ་སེ, ན ཏ་སྶ ཨུ་པ་མཱ, ཀུ་ཝེ་ར་སྶ བ་ལི ཨི་ཙྩཱ་དི. ཨ་པི ཙ –
གཱ་ཝ་སྶ ཛཱ་ཏི, དྷ་ཝ་ལོ, ག་ཏི, སི་ངྒཾ, ནཱ་མ་ནྟི+དྷ;
ད་བྦ་སྶཱ་པི ཙ ཛཱ་ཏྱཱ་དི, ཝི་སེ་སྶཱ ཧོ་ནྟི ཀཱ་མ་ཏོ.
གོ་ཏྟ་ཉྩ ས་བ་ལོ་དི་སྶ, པཱ་ཀ+མ་ནྣ་སྶ སུ་ཀྐ་ཏཱ;
པ་ཊ་སྶ, སི་ངྒཾ་མེ་ཎྜ་སྶ, ནཱ+ཉྙེ་སཾ་ཏི ཝི་སེ་སྶ་ཏེ.
ཋཱ་ནི་ཏོ-ཡུ་ཝ་ཎྞཱ་ན+མེ་ཨོ ལུ་ཏྟཱ. ཨཱ་ག་མི་ཏོ-སུ་ཉ ས་སྶ. སཱ་མི་ཡོ་གེ-དེ་ཝཱ་ན+མི་ནྡོ, མི་གཱ་ནཾ རཱ་ཛཱ. རུ་ཛཱ་དི་ཡོ་གེ-དེ་ཝ་ད་ཏྟ་སྶ རུ་ཛ་ཏི, ཏ་སྶ རོ་གོ ཨུ་པྤ་ཛྫི, མ་ཧཱ་སེ་ནཱ་པ་ཏཱི་ནཾ ཨུ་ཛ྄ཛྷཱ་པེ་ཏ་བྦཾ, ར་ཛ་ཀ་སྶ ཝ་ཏྠཾ ད་དཱ་ཏི, མུ་སཱ་ཝཱ་ད་སྶ ཨོ་ཏྟ་པྤཾ ཨི་ཙྩཱ་དི. ཡ་ཛ་སྶ ཡོ་གེ-པུ་པྥ་སྶ བུ་དྡྷ་སྶ ཡ་ཛ་ཏི, པུ་པྥེ་ནཱ་ཏྱ་ཏྠོ. ཨེ་ཝཾ གྷ་ཏ་སྶ ཨ་གྒིཾ ཛུ་ཧ་ཏི. སུ་ཧི་ཏ་ཏྠེ-པ་ཏྟཾ ཨོ་ད་ན་སྶ པཱུ་རེ་ཏྭཱ, པཱུ་རཾ ནཱ་ནཱ་པ་ཀཱ་ར་སྶ ཨ་སུ་ཙི་ནོ, པཱུ་རཾ ཧི་ར་ཉྙ་སུ་ཝ་ཎྞ་སྶ, པཱུ་ར་ཏི བཱ་ལོ པཱ་པ་སྶ. ཀི་ཏ་ཀ་པྤ་ཡོ་གེ-བ་ཧུ་ལཾ་ཝི་དྷཱ་ནཱ ཚ་ཊྛཱི, ར་ཉྙོ ས་མྨ་ཏོ, པཱུ་ཛི་ཏོ, ས་ཀྐ་ཏོ, ཨ་པ་ཙི་ཏོ, མཱ་ནི་ཏོ ཝཱ, ཨ་མ་ཏཾ ཏེ་སཾ བྷི་ཀྑ་ཝེ ཨ་པ་རི་བྷུ་ཏྟཾ, ཡེ་སཾ ཀཱ་ཡ་ག་ཏཱ ས་ཏི ཨ་པ་རི་བྷུ་ཏྟཱ, སཱ་དྷུ་ས་མྨ་ཏོ བ་ཧུ་ཛ་ན་སྶ, སུ་པྤ་ཊི་ཝི་དྡྷཱ བུ་དྡྷཱ་ནཾ དྷ་མྨ་དྷཱ་ཏུ, དྷ་མྨ་སྶ གུ་ཏྟོ མེ་དྷཱ་ཝཱི. ཀ་མྨ་ཏྠེ-ཏ་སྶ བྷ་ཝ་ནྟི ཝ་ཏྟཱ་རོ, ས་ཧ་སཱ ཀ་མྨ་སྶ ཀ་ཏྟཱ་རོ, ཨ་མ་ཏ་སྶ དཱ་ཏཱ, བྷི་ནྣཱ་ནཾ ས་ནྡྷཱ་ཏཱ, ས་ཧི་ཏཱ་ནཾ ཨ་ནུ་པྤ་དཱ་ཏཱ, བོ་དྷེ་ཏཱ པ་ཛཱ་ཡ, ཀ་མྨ་སྶ ཀཱ་ར་ཀོ ན་ཏྠི, ཝི་པཱ་ཀ་སྶ ཙ ཝེ་ད་ཀོ, ཨ་ཝི་སཾ་ཝཱ་ད་ཀོ ལོ་ཀ་སྶ, ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ པ་སཱ་དོ. ས་ར་ཏི+ཙྪཱ་ཡོ་གེ-མཱ་ཏུ ས་ར་ཏི, ན ཏེ་སཾ ཀོ་ཙི ས་ར་ཏི, ས་ཏྟཱ་ནཾ ཀ་མྨ་པ་ཙྩ་ཡཱ, པུ་ཏྟ་སྶ ཨི་ཙྪ་ཏི. ཀ་རོ་ཏི་སྶ (ཡོ་གེ) – ཨུ་ད་ཀ་སྶ པ་ཏི་ཀུ་རུ་ཏེ, ཀ་ཎྜ་སྶ པ་ཏི་ཀུ་རུ་ཏེ, ཨ་བྷི་ས་ངྑ་རོ་ཏཱི་ཏྱ་ཏྠོ. པ་ཉྩ་མི་ཡ་ཏྠེ པ་རི་ཧཱ་ནི་བྷ་ཡ་ཏྠ་ཡོ་གེ་པི ཚ་ཊྛཱི, ཨ་སྶ་ཝ་ན་ཏཱ་ཡ དྷ་མྨ་སྶ པ་རི་ཡཱ་ཡ་ནྟི, ཀི་ནྣུ ཁོ ཨ་ཧཾ ཏ་སྶ སུ་ཁ་སྶ བྷཱ་ཡཱ་མི, ས་བྦེ ཏ་ས་ནྟི ད་ཎྜ་སྶ, ས་བྦེ བྷཱ་ཡ་ནྟི མ་ཙྩུ་ནོ, བྷཱི་ཏོ ཙ་ཏུ་ནྣཾ ཨཱ་སཱི་ཝི་སཱ་ནཾ གྷོ་ར་ཝི་སཱ་ནཾ ཨི་ཙྩཱ་དི.
༤༠. ཏུ་ལྱ་ཏྠེ་ན ཝཱ ཏ་ཏི་ཡཱ
ཏུ་ལྱ་ཏྠེ་ན ཡོ་གེ ཝཱ ཚ་ཊྛཱི ཧོ་ཏི ཏ་ཏི་ཡཱ ཙ. པི་ཏུ ཏུ་ལྱོ, པི་ཏ་རཱ ཝཱ, མཱ་ཏུ ཏུ་ལྱོ, མཱ་ཏ་རཱ ཝཱ.
༣༢. ས་ཏྟ་མྱཱ+དྷཱ་རེ
ཀ་ཏྟུ་ཀ་མྨ་ཊྛཱ་ནཾ ནི་ས་ཛྫ+པ་ཙ་ནཱ་དི་ཀྲི་ཡཱ་ནཾ ཡོ ཨཱ་དྷཱ་རོ, ཏཾ ཨཱ་དྷཱ་ར་ཀཱ་ར་ཀཾ ནཱ་མ. ཀ་ཐཾ ཀ་ཊེ ནི་སཱི་ད་ཏི དེ་ཝ་ད་ཏྟོ, ཐཱ་ལི་ཡཾ ཨོ་ད་ནཾ པ་ཙ་ཏི, དེ་ཝ་ད་ཏྟ+ཏ་ཎྜུ་ལཱ་ནཾ ཀ་ཏྟུ+ཀ་མྨཱ་ནཾ དྷཱ་ར་ཎ་ཏོ ཏ་ད་ཊྛ་ཨཱ་ས་ན+པ་ཙ་ན་ཀྲི་ཡཾ ཀ་ཊ+ཐཱ་ལི་ཡོ དྷཱ་རེ་ནྟི ནཱ་མ, ཏ་སྨིཾ ས་ཏྟ་མཱི་ཝི་བྷ་ཏྟི ཧོ་ཏི.
སོ བྱཱ་པི་ཀོ, ཨོ་པ་སི་ལེ་སི་ཀོ, ཝེ་ས་ཡི་ཀོ, སཱ་མཱི་པི་ཀོ་ཏི ཙ་ཏུ་བྦི་དྷོ. ཏ་ཏྠ ཡོ ཨཱ་དྷེ་ཡྻ་སྶ ནི་སྶེ་སཱ་དྷཱ་ར་བྷཱུ་ཏོ, སོ བྱཱ་པི་ཀོ, ཡ་ཐཱ ཏི་ལེ་སུ ཏེ་ལཾ ཨ་ཏྠི, ཁཱི་རེ་སུ ཛ་ལཾ, ད་དྷི་མྷི ས་པྤི. པ་ཙྩེ་ཀ་སི་དྡྷཱ་ནཾ བྷཱ་ཝཱ་ནཾ ཡཾ ཨཱ་དྷེ་ཡྻ་བྷཱ་ཝེ་ན ཨུ་པ་སི་ལེ་ས་ནཾ ཨ་ལླཱི་ཡ་ནཾ ཨ་ཏྠི, སོ ཨོ་པ་སི་ལེ་སི་ཀོ. ཡ་ཐཱ ཨཱ་ས་ནེ ནི་སི་ནྣོ ས་ངྒྷོ, ཐཱ་ལི་ཡཾ ཨོ་ད་ནཾ པ་ཙ་ཏི, གྷ་ཊེ ཨུ་ད་ཀ+མ་ཏྠི, དཱུ་རེ ཋི་ཏོ, ས་མཱི་པེ ཋི་ཏོ. ཡ་ཏྠ ས་མཱི་པེ ས་མཱི་པཱི་ཝོ་ཧཱ་རཾ ཀ་ཏྭཱ ཏ་དཱ་ཡ་ཏྟ་ཏཱ་དཱི་པ་ན་ཏྠཾ ཨཱ་དྷཱ་ར་བྷཱ་ཝོ ཨུ་པ་ཙ་རཱི་ཡ་ཏི, ཏཾ སཱ་མཱི་པི་ཀཾ, ཡ་ཐཱ ག་ངྒཱ་ཡཾ གྷོ་སོ, ག་ངྒཱ་ཡ ས་མཱི་པེ ཝ་ཛོ་ཏྱ་ཏྠོ. སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ. ཡ་ཏྠ ཨ་ཉྙ་ཐཱ་བྷཱ་ཝ་ཝ་སེ་ན དེ་ས་ནྟ་རཱ་ཝ་ཙྪེ་ད་ཝ་སེ་ན ཝཱ ཨཱ་དྷཱ་ར་པ་རི་ཀ་པྤོ, སོ ཝེ་ས་ཡི་ཏོ. ཡ་ཐཱ ཨཱ་ཀཱ་སེ ས་ཀུ་ཎཱ ཙ་ར་ནྟི, བྷཱུ་མི་ཡཾ མ་ནུ་སྶཱ, ཛ་ལེ མ་ཙྪཱ, པཱ་སཱ་དེ་སུ པ་ཏི་ཏོ, པཱ་པ་སྨིཾ ར་མ་ཏཱི མ་ནོ, པ་ས་ནྣོ བུ་དྡྷ་སཱ་ས་ནེ, པ་ཉྙཱ་ཡ སཱ་དྷུ, ཝི་ན་ཡེ ནི་པུ་ཎོ, མཱ་ཏ་རི སཱ་དྷུ, པི་ཏ་རི ནི་པུ་ཎོ.
ཀི་རི་ཡཱ ཀ་ཏྟུ+ཀ་མྨ་ཊྛཱ, ཨཱ་དྷཱ་རཱི་ཡ་ཏི ཡེ་ན སོ;
ཨཱ་དྷཱ་རོ ཙ་ཏུ་དྷཱ ཝུ་ཏྟོ, བྱཱ་པ་ཀཱ་དི་པྤ་བྷེ་ད་ཏོ.
བྱཱ་པ་ཀོ ཏི་ལ་ཁཱི་རཱ་དི, ཀ་ཊོ ཨོ་པ་སི་ལེ་སི་ཀོ;
སཱ་མཱི་པི་ཀོ ཏུ ག་ངྒཱ་དི, ཨཱ་ཀཱ་སོ ཝི་ས་ཡོ མ་ཏོ.
༣༣. ནི་མི་ཏྟེ
ནི་མི་ཏྟ་ཏྠེ ས་ཏྟ་མཱི ཧོ་ཏི. ཨ་ཛི་ན་མྷི ཧ་ཉྙ་ཏེ དཱི་པི, ཀུ་ཉྫ་རོ ད་ནྟེ་སུ ཧ་ཉྙ་ཏེ, ཨ་ཎུ་མ་ཏྟེ་སུ ཝ་ཛྫེ་སུ བྷ་ཡ་ད་སྶཱ་ཝཱི, ས་མྤ་ཛཱ་ན་མུ་སཱ་ཝཱ་དེ པཱ་ཙི་ཏྟི་ཡཾ. ས་བྦ་ཏྠ ནི་མི་ཏྱ་ཏྠོ.