༡༦. ཨི་ནྡྲི་ཡ་པ་ཙྩ་ཡོ

ཏི་ཝི་དྷོ ཨི་ནྡྲི་ཡ་པ་ཙྩ་ཡོ ས་ཧ་ཛཱ་ཏི་ནྡྲི་ཡ་པ་ཙྩ་ཡོ པུ་རེ ཛཱ་ཏི་ནྡྲི་ཡ་པ་ཙྩ་ཡོ རཱུ་པ་ཛཱི་ཝི་ཏི་ནྡྲི་ཡ་པ་ཙྩ་ཡོ.

ཏ་ཏྠ པ་ནྣ་ར་སི་ནྡྲི་ཡ་དྷ་མྨཱ ས་ཧ་ཛཱ་ཏི་ནྡྲི་ཡ་པ་ཙྩ་ཡོ ནཱ་མ, ཛཱི་ཝི་ཏི་ནྡྲི་ཡཾ མ་ནི་ནྡྲི་ཡཾ སུ་ཁི་ནྡྲི་ཡཾ དུ་ཀྑི་ནྡྲི་ཡཾ སོ་མ་ན་སྶི་ནྡྲི་ཡཾ དོ་མ་ན་སྶི་ནྡྲི་ཡཾ ཨུ་པེ་ཀྑི་ནྡྲི་ཡཾ ས་དྡྷི་ནྡྲི་ཡཾ ཝཱི་རི་ཡི་ནྡྲི་ཡཾ ས་ཏི་ནྡྲི་ཡཾ ས་མཱ་དྷི་ནྡྲི་ཡཾ པ་ཉྙི་ནྡྲི་ཡཾ ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ ཨ་ཉྙི་ནྡྲི་ཡཾ ཨ་ཉྙཱ་ཏཱ་ཝི་ནྡྲི་ཡ་ནྟི. ཏེ་ཧི ས་ཧ་ཛཱ་ཏཱ ཙི་ཏྟ་ཙེ་ཏ་སི་ཀ་དྷ་མྨཱ ཙ རཱུ་པ་དྷ་མྨཱ ཙ ཏ་སྶ པ་ཙྩ་ཡུ་པྤ་ནྣཱ.

པ་ཉྩི་ནྡྲི་ཡ་རཱུ་པཱ་ནི པུ་རེ་ཛཱ་ཏི་ནྡྲི་ཡ་པ་ཙྩ་ཡོ, ཙ་ཀྑུ་ནྡྲི་ཡཾ སོ་ཏི་ནྡྲི་ཡཾ གྷཱ་ནི་ནྡྲི་ཡཾ ཛི་ཝ྄ཧི་ནྡྲི་ཡཾ ཀཱ་ཡི་ནྡྲི་ཡཾ. པ་ཉྩ་ཝི་ཉྙཱ་ཎ་ཙི་ཏྟ ཙེ་ཏ་སི་ཀ དྷ་མྨཱ ཏ་སྶ པ་ཙྩ་ཡུ་པྤ་ནྣཱ.

ཨེ་ཀཾ རཱུ་པ་ཛཱི་ཝི་ཏི་ནྡྲི་ཡཾ རཱུ་པ་ཛཱི་ཝི་ཏི་ནྡྲི་ཡ་པ་ཙྩ་ཡོ. ས་བྦཱ་ནི ཀ་མྨ་ཛ རཱུ་པཱ་ནི ཛཱི་ཝི་ཏ་རཱུ་པ་ཝ་ཛྫི་ཏཱ་ནི ཏ་སྶ པ་ཙྩ་ཡུ་པྤ་ནྣཱ་ནི.

ཀེ་ན་ཊྛེ་ན ཨི་ནྡྲི་ཡ་ནྟི. ཨི་སྶ་རི་ཡ་ཊྛེ་ན ཨི་ནྡྲི་ཡཾ. ཏ་ཏྠ ཀ་ཏྠ ཨི་སྶ་རི་ཡ་ནྟི. ཨ་ཏྟ་ནོ ཨ་ཏྟ་ནོ པ་ཙྩ་ཡུ་པྤ་ནྣེ་སུ དྷ་མྨེ་སུ ཨི་སྶ་རི་ཡཾ. ཀ་སྨིཾ ཀ་སྨིཾ ཀི་ཙྩེ ཨི་སྶ་རི་ཡ་ནྟི. ཨ་ཏྟ་ནོ ཨ་ཏྟ་ནོ ཀི་ཙྩེ ཨི་སྶ་རི་ཡཾ. ནཱ་མ་ཛཱི་ཝི་ཏཾ ས་མྤ་ཡུ་ཏྟ་དྷ་མྨཱ་ནཾ ཛཱི་ཝ་ན་ཀི་ཙྩེ ཨི་སྶ་རི་ཡཾ. ཛཱི་ཝ་ན་ཀི་ཙྩེ་ཏི ཨཱ་ཡུ་ཝ་ཌྜྷ་ན་ཀི་ཙྩེ, ས་ནྟ་ཏི་ཋི་ཏི་ཡཱ ཙི་ར་ཀཱ་ལ་ཋི་ཏི་ཀི་ཙྩེ་ཏི ཨ་ཏྠོ. མ་ནི་ནྡྲི་ཡཾ ཨཱ་ར་མྨ་ཎ་གྒ་ཧ་ཎ་ཀི་ཙྩེ ས་མྤ་ཡུ་ཏྟ་དྷ་མྨཱ་ནཾ ཨི་སྶ་རི་ཡཾ. ཨ་ཝ་སེ་སོ ཨི་ནྡྲི་ཡ་ཊྛོ པུ་བྦེ ཨི་ནྡྲི་ཡ་ཡ་མ་ཀ་དཱི་པ་ནི་ཡཾ ཝུ་ཏྟོ་ཡེ་ཝ.

ཨེ་ཏྠ ཝ་དེ་ཡྻ, དྭེ ཨི་ཏྠི་ནྡྲི་ཡ་པུ་རི་སི་ནྡྲི་ཡ་དྷ་མྨཱ ཨི་ནྡྲི་ཡ་བྷཱུ་ཏཱ ས་མཱ་ནཱ་པི ཀ་སྨཱ ཨི་ནྡྲི་ཡ་པ་ཙྩ་ཡེ ཝི་སུཾ ན ག་ཧི་ཏཱ་ཏི. པ་ཙྩ་ཡ་ཀི་ཙྩ་སྶ ཨ་བྷཱ་ཝ་ཏོ. ཏི་ཝི་དྷ་ཉྷི པ་ཙྩ་ཡ་ཀི་ཙྩཾ ཛ་ན་ན་ཀི་ཙྩ་ཉྩ ཨུ་པ་ཏྠ་མྦྷ་ན་ཀི་ཙྩ་ཉྩ ཨ་ནུ་པཱ་ལ་ན་ཀི་ཙྩ་ཉྩ. ཏ་ཏྠ ཡོ པ་ཙྩ་ཡོ པ་ཙྩ་ཡུ་པྤ་ནྣ་དྷ་མྨ་སྶ ཨུ་པྤཱ་དཱ་ཡ པ་ཙྩ་ཡོ ཧོ་ཏི, ཡ་སྨིཾ ཨ་ས་ཏི པ་ཙྩ་ཡུ་པྤ་ནྣོ དྷ་མྨོ ན ཨུ་པྤ་ཛྫ་ཏི, ཏ་སྶ པ་ཙྩ་ཡ་ཀི་ཙྩཾ ཛ་ན་ན་ཀི་ཙྩཾ ནཱ་མ. ཡ་ཐཱ ཨ་ན་ནྟ་ར་པ་ཙྩ་ཡོ. ཡོ པ་ཙྩ་ཡོ པ་ཙྩ་ཡུ་པྤ་ནྣ་དྷ་མྨ་སྶ ཋི་ཏི་ཡཱ ཙ ཝུ་ཌྜྷི་ཡཱ ཙ ཝི་རུ་ལ༹ྷི་ཡཱ ཙ པ་ཙྩ་ཡོ ཧོ་ཏི, ཡ་སྨིཾ ཨ་ས་ཏི པ་ཙྩ་ཡུ་པྤ་ནྣོ དྷ་མྨོ ན ཏི་ཊྛ་ཏི ན ཝ་ཌྜྷ་ཏི ན ཝི་རཱུ་ཧ་ཏི, ཏ་སྶ པ་ཙྩ་ཡ་ཀི་ཙྩཾ ཨུ་པ་ཏྠ་མྦྷ་ན་ཀི་ཙྩཾ ནཱ་མ. ཡ་ཐཱ པ་ཙྪཱ་ཛཱ་ཏ་པ་ཙྩ་ཡོ. ཡོ པ་ཙྩ་ཡོ པ་ཙྩ་ཡུ་པྤ་ནྣ་སྶ དྷ་མྨ་སྶ པ་ཝ་ཏྟི་ཡཱ པ་ཙྩ་ཡོ ཧོ་ཏི, ཡེ་ན ཝི་ནཱ པ་ཙྩ་ཡུ་པྤ་ནྣོ དྷ་མྨོ ཙི་ར་ཀཱ་ལཾ ན པ་ཝ་ཏྟ་ཏི, ས་ནྟ་ཏི ག་མ་ནཾ ཚི་ཛྫ་ཏི, ཏ་སྶ པ་ཙྩ་ཡ ཀི་ཙྩཾ ཨ་ནུ་པཱ་ལ་ན་ཀི་ཙྩཾ ནཱ་མ. ཡ་ཐཱ རཱུ་པ ཛཱི་ཝི་ཏི་ནྡྲི་ཡ་པ་ཙྩ་ཡོ. ཨེ་ཏེ པ་ན དྭེ ཨི་ནྡྲི་ཡ་དྷ་མྨཱ ཏེ་སུ ཏཱི་སུ པ་ཙྩ་ཡ ཀི་ཙྩེ་སུ ཨེ་ཀ་ཀི་ཙྩཾ་པི ན་སཱ་དྷེ་ནྟི, ཏ་སྨཱ ཨེ་ཏེ དྭེ དྷ་མྨཱ ཨི་ནྡྲི་ཡ པ་ཙྩ་ཡེ ཝི་སུཾ ན ག་ཧི་ཏཱ་ཏི.

ཨེ་ཏཾ ས་ནྟེ ཨེ་ཏེ དྭེ དྷ་མྨཱ ཨི་ནྡྲི་ཡཱ་ཏི་པི ན ཝ་ཏྟ་བྦཱ་ཏི. ནོ ན ཝ་ཏྟ་བྦཱ. ཀ་སྨཱ. ཨི་ནྡྲི་ཡ་ཀི་ཙྩ་ས་བྦྷཱ་ཝ་ཏོ་ཏི. ཀིཾ པ་ན ཨེ་ཏེ་སཾ ཨི་ནྡྲི་ཡ་ཀི་ཙྩ་ནྟི. ལི་ངྒ་ནི་མི་ཏྟ་ཀུ་ཏྟ་ཨཱ་ཀ་པྤེ་སུ ཨི་སྶ་ར་ཏཱ ཨི་ནྡྲི་ཡ ཀི་ཙྩཾ. ཏ་ཐཱ ཧི ཡ་སྶ པུ་གྒ་ལ་སྶ པ་ཊི་ས་ནྡྷི་ཀྑ་ཎེ ཨི་ཏྠི་ནྡྲི་ཡ་རཱུ་པཾ ཨུ་པྤ་ཛྫ་ཏི, ཏ་སྶ ས་ནྟཱ་ནེ ཙ་ཏཱུ་ཧི ཀ་མྨཱ་དཱི་ཧི པ་ཙྩ་ཡེ་ཧི ཨུ་པྤ་ནྣཱ པ་ཉྩ་ཀྑ་ནྡྷ དྷ་མྨཱ ཨི་ཏྠི་བྷཱ་ཝཱ་ཡ པ་རི་ཎ་མ་ནྟི, སོ ཨ་ཏྟ་བྷཱ་ཝོ ཨེ་ཀ་ནྟེ་ན ཨི་ཏྠི་ལི་ངྒ ཨི་ཏྠི་ནི་མི་ཏྟ ཨི་ཏྠི་ཀུ་ཏྟ ཨི་ཏྠཱ་ཀ་པྤ་ཡུ་ཏྟོ ཧོ་ཏི, ནོ ཨ་ཉྙ་ཐཱ. ན ཙ ཨི་ཏྠི་ནྡྲི་ཡ་རཱུ་པཾ ཏེ པ་ཉྩ་ཀྑ་ནྡྷ་དྷ་མྨེ ཛ་ནེ་ཏི, ན ཙ ཨུ་པ་ཏྠ་མྦྷ་ཏི, ནཱ་པི ཨ་ནུ་པཱ་ལེ་ཏི, ཨ་ཐ ཁོ ཏེ དྷ་མྨཱ ཨ་ཏྟ་ནོ ཨ་ཏྟ་ནོ པ་ཙྩ་ཡེ་ཧི ཨུ་པྤ་ཛྫ་མཱ་ནཱ ཨེ་ཝ་ཉྩེ་ཝ་ཉྩ ཨུ་པྤ་ཛྫ་ནྟཱུ་ཏི ཨཱ་ཎཾ ཋ་པེ་ནྟཾ ཝི་ཡ ཏེ་སུ ཨ་ཏྟ་ནོ ཨ་ནུ་བྷཱ་ཝཾ པ་ཝ་ཏྟེ་ཏི. ཏེ ཙ དྷ་མྨཱ ཏ་ཐེ་ཝ ཨུ་པྤ་ཛྫ་ནྟི, ནོ ཨ་ཉྙ་ཐཱ་ཏི. ཨ་ཡཾ ཨི་ཏྠི་ནྡྲི་ཡ་རཱུ་པ་སྶ ཨི་ཏྠི་ལི་ངྒཱ་དཱི་སུ ཨི་སྶ་ར་ཏཱ. ཨེ་ས ན་ཡོ པུ་རི་སི་ནྡྲི་ཡ་རཱུ་པ་སྶ པུ་རི་ས་ལི་ངྒཱ་དཱི་སུ ཨི་སྶ་ར་ཏཱ་ཡཾ. ཨེ་ཝཾ ཨེ་ཏེ དྭེ དྷ་མྨཱ ལི་ངྒཱ་དཱི་སུ ཨི་ནྡྲི་ཡ་ཀི་ཙྩ ས་བྦྷཱ་ཝ་ཏོ ཨི་ནྡྲི་ཡཱ ནཱ་མ ཧོ་ནྟཱི་ཏི.

ཧ་ད་ཡ་ཝ་ཏྠུ་རཱུ་པཾ པ་ན དྭི་ནྣཾ ཝི་ཉྙཱ་ཎ་དྷཱ་ཏཱུ་ནཾ ནི་སྶ་ཡ་ཝ་ཏྠུ་ཀི་ཙྩཾ སཱ་དྷ་ཡ་མཱ་ནཾ་པི ཏཱ་སུ ཨི་ནྡྲི་ཡ་ཀི་ཙྩཾ ན སཱ་དྷེ་ཏི. ན ཧི བྷཱ་ཝི་ཏ ཙི་ཏྟ་སྶ པུ་གྒ་ལ་སྶ ཧ་ད་ཡ་རཱུ་པེ པ་ས་ནྣེ་ཝཱ ཨ་པྤ་ས་ནྣེ ཝཱ ཛཱ་ཏེ་པི མ་ནོ་ཝི་ཉྙཱ་ཎ་དྷཱ་ཏུ་ཡོ ཏ་ད་ནུ་ཝ་ཏྟི་ཀཱ ཧོ་ནྟཱི་ཏི. ཨི་ནྡྲི་ཡ པ་ཙྩ་ཡ་དཱི་པ་ནཱ ནི་ཊྛི་ཏཱ.