ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ
པ་ཊྛཱ་ནུ་དྡེ་ས དཱི་པ་ནཱི་པཱ་ཋ
༡. ཧེ་ཏུ་པ་ཙྩ་ཡོ
ཀ་ཏ་མོ ཧེ་ཏུ་པ་ཙྩ་ཡོ. ལོ་བྷོ ཧེ་ཏུ་པ་ཙྩ་ཡོ. དོ་སོ, མོ་ཧོ, ཨ་ལོ་བྷོ, ཨ་དོ་སོ, ཨ་མོ་ཧོ ཧེ་ཏུ པ་ཙྩ་ཡོ.
ཀ་ཏ་མེ དྷ་མྨཱ ཧེ་ཏུ་པ་ཙྩ་ཡ་སྶ པ་ཙྩ་ཡུ་པྤ་ནྣཱ. ལོ་བྷ ས་ཧ་ཛཱ་ཏཱ ཙི་ཏྟ་ཙེ་ཏ་སི་ཀཱ དྷ་མྨཱ ཙ རཱུ་པ་ཀ་ལཱ་པཱ་དྷ་མྨཱ ཙ དོ་ས་ས་ཧ ཛཱ་ཏཱ མོ་ཧ་ས་ཧ་ཛཱ་ཏཱ ཨ་ལོ་བྷ་ས་ཧ་ཛཱ་ཏཱ ཨ་དོ་ས་ས་ཧ ཛཱ་ཏཱ ཨ་མོ་ཧ་ས་ཧ་ཛཱ་ཏཱ ཙི་ཏྟ་ཙེ་ཏ་སི་ཀཱ དྷ་མྨཱ ཙ རཱུ་པ་ཀ་ལཱ་པཱ དྷ་མྨཱ ཙ ཧེ་ཏུ་པ་ཙྩ་ཡ་ཏོ ཨུ་པྤ་ནྣཱ ཧེ་ཏུ་པ་ཙྩ་ཡུ་པྤ་ནྣཱ དྷ་མྨཱ.
ས་ཧ་ཛཱ་ཏ་རཱུ་པ་ཀ་ལཱ་པཱ ནཱ་མ ས་ཧེ་ཏུ་ཀ་པ་ཊི་ས་ནྡྷི་ཀྑ་ཎེ ཀ་མྨ་ཛ་རཱུ་པཱ་ནི ཙ པ་ཝ་ཏྟི་ཀཱ་ལེ ས་ཧེ་ཏུ་ཀ་ཙི་ཏྟ་ཛ་རཱུ་པཱ་ནི ཙ. ཏ་ཏྠ པ་ཊི་ས་ནྡྷི་ཀྑ་ཎོ ནཱ་མ པ་ཊི་ས་ནྡྷི་ཙི་ཏྟ་སྶ ཨུ་པྤཱ་ད་ཀྑ་ཎོ. པ་ཝ་ཏྟི་ཀཱ་ལོ ནཱ་མ པ་ཊི་ས་ནྡྷི་ཙི་ཏྟ་སྶ ཋི་ཏི་ཀྑ་ཎ་ཏོ པ་ཊྛཱ་ཡ ཡཱ་ཝ ཙུ་ཏི་ཀཱ་ལཾ ཝུ་ཙྩ་ཏི.
ཀེ་ན་ཊྛེ་ན ཧེ་ཏུ, ཀེ་ན་ཊྛེ་ན པ་ཙྩ་ཡོ་ཏི. མཱུ་ལ་ཊྛེ་ན ཧེ་ཏུ, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ་ཏི. ཏ་ཏྠ མཱུ་ལ་ཡ་མ་ཀེ ཝུ་ཏྟཱ་ནཾ ལོ་བྷཱ་དཱི་ནཾ མཱུ་ལ་དྷ་མྨཱ་ནཾ མཱུ་ལ་བྷཱ་ཝོ མཱུ་ལ་ཊྛོ ནཱ་མ. སོ མཱུ་ལ་ཊྛོ མཱུ་ལ་ཡ་མ་ཀ་དཱི་པ་ནི་ཡཾ ཨ་མྷེ་ཧི རུ་ཀྑོ་པ་མཱ་ཡ དཱི་པི་ཏོ་ཡེ་ཝ.
ཨ་པི ཙ ཨེ་ཀོ པུ་རི་སོ ཨེ་ཀི་སྶཾ ཨི་ཏྠི་ཡཾ པ་ཊི་བ་དྡྷ ཙི་ཏྟོ ཧོ་ཏི. སོ ཡཱ་ཝ ཏཾ ཙི་ཏྟཾ ན ཛ་ཧ་ཏི, ཏཱ་ཝ ཏཾ ཨི་ཏྠིཾ ཨཱ་ར་བྦྷ ཏ་སྶ པུ་རི་ས་སྶ ལོ་བྷ་ས་ཧ་ཛཱ་ཏཱ་ནི ཀཱ་ཡ་ཝ་ཙཱི་མ་ནོ་ཀ་མྨཱ་ནི ཙ ལོ་བྷ་ས་མུ་ཊྛི་ཏཱ་ནི ཙི་ཏྟ་ཛ་རཱུ་པཱ་ནི ཙ ཙི་ར་ཀཱ་ལཾ་པི པ་ཝ་ཏྟ་ནྟི. ས་བྦཱ་ནི ཙ ཏཱ་ནི ཙི་ཏྟ་ཙེ་ཏ་སི་ཀ་རཱུ་པཱ་ནི ཏ་སྶཾ ཨི་ཏྠི་ཡཾ ར་ཛྫ་ན་ལོ་བྷ་མཱུ་ལ་ཀཱ་ནི ཧོ་ནྟི. སོ ལོ་བྷོ ཏེ་སཾ མཱུ་ལ་ཊྛེ་ན ཧེ་ཏུ ཙ, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ ཙ. ཏ་སྨཱ ཧེ་ཏུ་པ་ཙྩ་ཡོ. ཨེ་ས ན་ཡོ སེ་སཱ་ནི ར་ཛྫ་ནཱི་ཡ་ཝ་ཏྠཱུ་ནི ཨཱ་ར་བྦྷ་ར་ཛྫ་ན་ཝ་སེ་ན ཨུ་པྤ་ནྣེ་སུ ལོ་བྷེ་སུ, དུ་སྶ་ནཱི་ཡ་ཝ་ཏྠཱུ་ནི ཨཱ་ར་བྦྷ དུ་སྶ་ན་ཝ་སེ་ན ཨུ་པྤ་ནྣེ་སུ དོ་སེ་སུ, མུ་ཡ྄ཧ་ནཱི་ཡ་ཝ་ཏྠཱུ་ནི ཨཱ་ར་བྦྷ མུ་ཡ྄ཧ་ན་ཝ་སེ་ན ཨུ་པྤ་ནྣེ་སུ མོ་ཧེ་སུ ཙ.
ཏ་ཏྠ ཡ་ཐཱ རུ་ཀྑ་སྶ མཱུ་ལཱ་ནི ས་ཡཾ ཨ་ནྟོ་པ་ཐ་ཝི་ཡཾ སུ་ཊྛུ པ་ཏི་ཊྛ་ཧི་ཏྭཱ པ་ཐ་ཝི་ར་ས་ཉྩ ཨཱ་པོ་ར་ས་ཉྩ ག་ཧེ་ཏྭཱ ཏཾ རུ་ཀྑཾ ཡཱ་ཝ ཨ་གྒཱ ཨ་བྷི་ཧ་ར་ནྟི, ཏེ་ན རུ་ཀྑོ ཙི་ར་ཀཱ་ལཾ ཝ་ཌྜྷ་མཱ་ནོ ཏི་ཊྛ་ཏི. ཏ་ཐཱ ལོ་བྷོ ཙ ཏ་སྨིཾ ཏ་སྨིཾ ཝ་ཏྠུ་མྷི ར་ཛྫ་ན་ཝ་སེ་ན སུ་ཊྛུ པ་ཏི་ཊྛ་ཧི་ཏྭཱ ཏ་སྶ ཏ་སྶ ཝ་ཏྠུ་སྶ པི་ཡ་རཱུ་པ་ར་ས་ཉྩ སཱ་ཏ་རཱུ་པ་ར་ས་ཉྩ ག་ཧེ་ཏྭཱ ས་མྤ་ཡུ་ཏྟ་དྷ་མྨེ ཡཱ་ཝ ཀཱ་ཡ་ཝ་ཙཱི་ཝཱི་ཏི་ཀྐ་མཱ ཨ་བྷི་ཧ་ར་ཏི, ཀཱ་ཡ ཝཱི་ཏི་ཀྐ་མཾ ཝཱ ཝ་ཙཱི་ཝཱི་ཏི་ཀྐ་མཾ ཝཱ པཱ་པེ་ཏི. ཏ་ཐཱ དོ་སོ ཙ དུ་སྶ་ན ཝ་སེ་ན ཨ་པྤི་ཡ་རཱུ་པ་ར་ས་ཉྩ ཨ་སཱ་ཏ་རཱུ་པ་ར་ས་ཉྩ ག་ཧེ་ཏྭཱ, མོ་ཧོ ཙ མུ་ཡ྄ཧ་ན་ཝ་སེ་ན ནཱ་ནཱ་ར་མྨ་ཎེ་སུ ནི་ར་ཏྠ་ཀ་ཙི་ཏྟཱ་ཙཱ་ར་ར་སཾ ཝ་ཌྜྷེ་ཏྭཱ་ཏི ཝ་ཏྟ་བྦཾ. ཨེ་ཝཾ ཨ་བྷི་ཧ་ར་ནྟཱ ཏ་ཡོ དྷ་མྨཱ ར་ཛྫ་ནཱི་ཡཱ་དཱི་སུ ཝ་ཏྠཱུ་སུ ས་མྤ་ཡུ་ཏྟ་དྷ་མྨེ མོ་ད་མཱ་ནེ པ་མོ་ད་མཱ་ནེ ཀ་རོ་ནྟོ ཝི་ཡ ཙི་ར ཀཱ་ལཾ པ་ཝ་ཏྟེ་ནྟི. ས་མྤ་ཡུ་ཏྟ་དྷ་མྨཱ ཙ ཏ་ཐཱ པ་ཝ་ཏྟ་ནྟི. ས་མྤ་ཡུ་ཏྟ དྷ་མྨེ་སུ ཙ ཏ་ཐཱ པ་ཝ་ཏྟ་མཱ་ནེ་སུ ས་ཧ་ཛཱ་ཏ་རཱུ་པ་ཀ་ལཱ་པཱ་པི ཏ་ཐཱ པ་ཝ་ཏྟ་ནྟི་ཡེ་ཝ. ཏ་ཏྠ ས་མྤ་ཡུ་ཏྟ་དྷ་མྨེ ཨ་བྷི་ཧ་ར་ཏཱི་ཏི དྭེ པི་ཡ་རཱུ་པ སཱ་ཏ་རཱུ་པ་ར་སེ ས་མྤ་ཡུ་ཏྟ་དྷ་མྨཱ་ནཾ ས་ནྟི་ཀཾ པཱ་པེ་ཏཱི་ཏི ཨ་ཏྠོ.
སུ་ཀྐ་པ་ཀྑེ སོ པུ་རི་སོ ཡ་དཱ་ཀཱ་མེ་སུ ཨཱ་དཱི་ན་ཝཾ པ་སྶ་ཏི, ཏ་དཱ སོ ཏཾ ཙི་ཏྟཾ་ཛ་ཧ་ཏི, ཏཾ ཨི་ཏྠིཾ ཨཱ་ར་བྦྷ ཨ་ལོ་བྷོ ས་ཉྫཱ ཡ་ཏི. པུ་བྦེ ཡ་སྨིཾ ཀཱ་ལེ ཏཾ ཨི་ཏྠིཾ ཨཱ་ར་བྦྷ ལོ་བྷ་མཱུ་ལ་ཀཱ་ནི ཨ་སུ་དྡྷཱ་ནི ཀཱ་ཡ་ཝ་ཙཱི་མ་ནོ་ཀ་མྨཱ་ནི ཝ་ཏྟ་ནྟི. ཨི་དཱ་ནི ཏ་སྨིཾ ཀཱ་ལེ་པི ཨ་ལོ་བྷ་མཱུ་ལ་ཀཱ་ནི སུ་དྡྷཱ་ནི ཀཱ་ཡ་ཝ་ཙཱི་མ་ནོ་ཀ་མྨཱ་ནི ཝ་ཏྟ་ནྟི. པ་བྦ་ཛི་ཏ སཱི་ལ་སཾ་ཝ་རཱ་ནི ཝཱ ཛྷཱ་ན་པ་རི་ཀ་མྨཱ་ནི ཝཱ ཨ་པྤ་ནཱ་ཛྷཱ་ནཱ་ནི ཝཱ ཝ་ཏྟ་ནྟི. སོ ཨ་ལོ་བྷོ ཏེ་སཾ མཱུ་ལ་ཊྛེ་ན ཧེ་ཏུ ཙ ཧོ་ཏི, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ་ཙ. ཏ་སྨཱ ཧེ་ཏུ་པ་ཙྩ་ཡོ. ཨེ་ས ན་ཡོ སེ་སེ་སུ ལོ་བྷ པ་ཊི་པ་ཀྑེ་སུ ཨ་ལོ་བྷེ་སུ, དོ་ས་པ་ཊི་པ་ཀྑེ་སུ ཨ་དོ་སེ་སུ, མོ་ཧ པ་ཊི་པ་ཀྑེ་སུ ཨ་མོ་ཧེ་སུ ཙ.
ཏ་ཏྠ རུ་ཀྑ་མཱུ་ལཱ་ནི ཝི་ཡ ཨ་ལོ་བྷོ ལོ་བྷ་ནེ་ཡྻ་ཝ་ཏྠཱུ་སུ ལོ་བྷཾ པ་ཧཱ་ཡ ལོ་བྷ་ཝི་ཝེ་ཀ་སུ་ཁ་ར་སཾ ཝ་ཌྜྷེ་ཏྭཱ ཏེ་ན སུ་ཁེ་ན ས་མྤ་ཡུ་ཏྟ་དྷ་མྨེ མོ་ད་མཱ་ནེ པ་མོ་ད་མཱ་ནེ ཀ་རོ་ནྟོ ཝི་ཡ ཡཱ་ཝ ཛྷཱ་ན་ས་མཱ་པ་ཏྟི་སུ་ཁཱ ཝཱ ཡཱ་ཝ མ་གྒ་ཕ་ལ་སུ་ཁཱ ཝཱ ཝ་ཌྜྷཱ་པེ་ཏི. ཏ་ཐཱ ཨ་དོ་སོ ཙ དོ་ས་ནེ་ཡྻ་ཝ་ཏྠཱུ་སུ དོ་ས་ཝི་ཝེ་ཀ་སུ་ཁ་ར་སཾ ཝ་ཌྜྷེ་ཏྭཱ, ཨ་མོ་ཧོ ཙ མོ་ཧ་ནེ་ཡྻ་ཝ་ཏྠཱུ་སུ མོ་ཧ་ཝི་ཝེ་ཀ་སུ་ཁ་ར་སཾ ཝ་ཌྜྷེ་ཏྭཱ་ཏི ཝ་ཏྟ་བྦཾ. ཨེ་ཝཾ ཝ་ཌྜྷཱ་པེ་ནྟཱ ཏ་ཡོ དྷ་མྨཱ ཀུ་ས་ལེ་སུ དྷ་མྨེ་སུ ས་མྤ་ཡུ་ཏྟ་དྷ་མྨེ མོ་ད་མཱ་ནེ པ་མོ་ད་མཱ་ནེ ཀ་རོ་ནྟོ ཝི་ཡ ཙི་ར ཀཱ་ལཾ་པི པ་ཝ་ཏྟེ་ནྟི. ས་མྤ་ཡུ་ཏྟ་དྷ་མྨཱ ཙ ཏ་ཐཱ པ་ཝ་ཏྟ་ནྟི. ས་མྤ་ཡུ་ཏྟ དྷ་མྨེ་སུ ཙ ཏ་ཐཱ པ་ཝ་ཏྟ་མཱ་ནེ་སུ ས་ཧ་ཛཱ་ཏ་རཱུ་པ་ཀ་ལཱ་པཱ་པི ཏ་ཐཱ པ་ཝ་ཏྟ་ནྟི་ཡེ་ཝ.
ཏ་ཏྠ ལོ་བྷ་ཝི་ཝེ་ཀ་སུ་ཁ་ར་ས་ནྟི ཝི་ཝི་ཙྩ་ནཾ ཝི་ག་མ་ནཾ ཝི་ཝེ་ཀོ. ལོ་བྷ་སྶ ཝི་ཝེ་ཀོ ལོ་བྷ་ཝི་ཝེ་ཀོ. ལོ་བྷ་ཝི་ཝེ་ཀེ སུ་ཁཾ ལོ་བྷ་ཝི་ཝེ་ཀ་སུ་ཁཾ. ལོ་བྷ་ཝི་ཝེ་ཀཾ པ་ཊི་ཙྩ ཨུ་པྤ་ནྣ་སུ་ཁ་ནྟི ཝུ་ཏྟཾ ཧོ་ཏི. ཏ་དེ་ཝ ར་སོ ལོ་བྷ་ཝི་ཝེ་ཀ་སུ་ཁ་ར་སོ་ཏི ས་མཱ་སོ. ཨ་ཡཾ ཨ་བྷི་དྷ་མྨེ པ་ཊྛཱ་ན་ན་ཡོ.
ཧ་ཏྟ་ནྟ་ན་ཡོ པ་ན ཨ་ཝི་ཛྫཱ་ས་ངྑཱ་ཏོ མོ་ཧོ ཙ ཏ་ཎྷཱ་ས་ངྑཱ་ཏོ ལོ་བྷོ ཙཱ་ཏི དྭེ དྷ་མྨཱ ས་བྦེ་སཾ་པི ཝ་ཊྚ་དུ་ཀྑ་དྷ་མྨཱ་ནཾ མཱུ་ལཱ་ནི ཧོ་ནྟི. དོ་སོ པ་ན ལོ་བྷ་སྶ ནི་སྶ་ནྡ་བྷཱུ་ཏཾ པཱ་པ་མཱུ་ལཾ ཧོ་ཏི. ཝི་ཛྫཱ་ས་ངྑཱ་ཏོ ཨ་མོ་ཧོ ཙ ནི་ཀྑ་མ་དྷཱ་ཏུ་ས་ངྑཱ་ཏོ ཨ་ལོ་བྷོ ཙཱ་ཏི དྭེ དྷ་མྨཱ ཝི་ཝ་ཊྚ་དྷ་མྨཱ་ནཾ མཱུ་ལཱ་ནི ཧོ་ནྟི. ཨ་དོ་སོ པ་ན ཨ་ལོ་བྷ་སྶ ནི་སྶ་ནྡ་བྷཱུ་ཏཾ ཀ་ལྱཱ་ཎ་མཱུ་ལཾ ཧོ་ཏི. ཨེ་ཝཾ ཚ་བྦི་དྷཱ་ནི མཱུ་ལཱ་ནི ས་ཧ་ཛཱ་ཏཱ་ནཾ་པི ཨ་ས་ཧ་ཛཱ་ཏཱ་ནཾ་པི ནཱ་མ་རཱུ་པ་དྷ་མྨཱ་ནཾ པ་ཙྩ་ཡཱ ཧོ་ནྟཱི་ཏི. ཨ་ཡཾ སུ་ཏྟ་ནྟེ་སུ ན་ཡོ. ཧེ་ཏུ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༢. ཨཱ་ར་མྨ་ཎ་པ་ཙྩ་ཡོ
ཀ་ཏ་མོ ཨཱ་ར་མྨ་ཎ་པ་ཙྩ་ཡོ. ས་བྦེ་པི ཙི་ཏྟ་ཙེ་ཏ་སི་ཀཱ དྷ་མྨཱ ས་བྦེ་པི རཱུ་པ་དྷ་མྨཱ ས་བྦཾ་པི ནི་བྦཱ་ནཾ ས་བྦཱ་པི པ་ཉྙ་ཏྟི་ཡོ ཨཱ་ར་མྨ་ཎ པ་ཙྩ་ཡོ. ན ཧི སོ ནཱ་མ ཨེ་ཀོ་པི དྷ་མྨོ ཨ་ཏྠི, ཡོ ཙི་ཏྟ ཙེ་ཏ་སི་ཀཱ་ནཾ ཨཱ་ར་མྨ་ཎཾ ན ཧོ་ཏི. ས་ངྑེ་པ་ཏོ པ་ན ཨཱ་ར་མྨ་ཎཾ ཚ་བྦི་དྷཾ ཧོ་ཏི རཱུ་པཱ་ར་མྨ་ཎཾ ས་དྡཱ་ར་མྨ་ཎཾ ག་ནྡྷཱ་ར་མྨ་ཎཾ ར་སཱ་ར་མྨ་ཎཾ ཕོ་ཊྛ་བྦཱ་ར་མྨ་ཎཾ དྷ་མྨཱ་ར་མྨ་ཎ་ནྟི.
ཀ་ཏ་མེ དྷ་མྨཱ ཨཱ་ར་མྨ་ཎ་པ་ཙྩ་ཡ་སྶ པ་ཙྩ་ཡུ་པྤ་ནྣཱ. ས་བྦེ་པི ཙི་ཏྟ ཙེ་ཏ་སི་ཀཱ་དྷ་མྨཱ ཨཱ་ར་མྨ་ཎ་པ་ཙྩ་ཡ་སྶ པ་ཙྩ་ཡུ་པྤ་ནྣཱ. ན ཧི ཀི་ཉྩི ཙི་ཏྟཾ ནཱ་མ ཨ་ཏྠི, ཡཾ ཙི་ཏྟཾ བྷཱུ་ཏེ་ན ཝཱ ཨ་བྷཱུ་ཏེ་ན ཝཱ ཨཱ་ར་མྨ་ཎེ་ན ཝི་ནཱ པ་ཝ་ཏྟ་ཏི.
ཏ་ཏྠ པ་ཙྩུ་པྤ་ནྣཾ རཱུ་པཱ་ར་མྨ་ཎཾ དུ་ཝི་དྷ་སྶ ཙ་ཀྑུ་ཝི་ཉྙཱ་ཎ་ཙི་ཏྟ་སྶ ཨཱ་ར་མྨ་ཎ་པ་ཙྩ་ཡོ. པ་ཙྩུ་པྤ་ནྣཾ ས་དྡཱ་ར་མྨ་ཎཾ དུ་ཝི་དྷ་སྶ སོ་ཏ་ཝི་ཉྙཱ་ཎ ཙི་ཏྟ་སྶ. པ་ཙྩུ་པྤ་ནྣཾ ག་ནྡྷཱ་ར་མྨ་ཎཾ དུ་ཝི་དྷ་སྶ གྷཱ་ན་ཝི་ཉྙཱ་ཎ་ཙི་ཏྟ་སྶ. པ་ཙྩུ་པྤ་ནྣཾ ར་སཱ་ར་མྨ་ཎཾ དུ་ཝི་དྷ་སྶ ཛི་ཝ྄ཧཱ་ཝི་ཉྙཱ་ཎ་ཙི་ཏྟ་སྶ. པ་ཙྩུ་པྤ་ནྣཾ ཏི་ཝི་དྷཾ ཕོ་ཊྛ་བྦཱ་ར་མྨ་ཎཾ དུ་ཝི་དྷ་སྶ ཀཱ་ཡ་ཝི་ཉྙཱ་ཎ་ཙི་ཏྟ་སྶ. པ་ཙྩུ་པྤ་ནྣཱ་ནི ཏཱ་ནི པ་ཉྩཱ་ར་མྨ་ཎཱ་ནི ཏི་ཝི་དྷ་སྶ མ་ནོ་དྷཱ་ཏུ་ཙི་ཏྟ་སྶ ཨཱ་ར་མྨ་ཎ་པ་ཙྩ་ཡོ. ས་བྦཱ་ནི ཏཱ་ནི ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ནི པ་ཉྩཱ་ར་མྨ་ཎཱ་ནི ཝཱ ས་བྦཱ་ནི ཏེ་ཀཱ་ལི་ཀཱ་ནི ཀཱ་ལ་ཝི་མུ་ཏྟཱ་ནི དྷ་མྨཱ་ར་མྨ་ཎཱ་ནི ཝཱ ཚ ས་ཏྟ་ཏི་ཝི་དྷཱ་ནཾ མ་ནོ་ཝི་ཉྙཱ་ཎ་ཙི་ཏྟཱ་ནཾ ཡ་ཐཱ་ར་ཧཾ ཨཱ་ར་མྨ་ཎ་པ་ཙྩ་ཡོ.
ཀེ་ན་ཊྛེ་ན ཨཱ་ར་མྨ་ཎཾ, ཀེ་ན་ཊྛེ་ན པ་ཙྩ་ཡོ་ཏི. ཙི་ཏྟ ཙེ་ཏ་སི་ཀེ་ཧི ཨཱ་ལ་མྦི་ཏ་བྦ་ཊྛེ་ན ཨཱ་ར་མྨ་ཎཾ, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ་ཏི.
ཨཱ་ལ་མྦི་ཏ་བྦ་ཊྛེ་ནཱ་ཏི ཙེ་ཏྠ ཨཱ་ལ་མྦ་ཎ་ཀི་རི་ཡཱ ནཱ་མ ཙི་ཏྟ ཙེ་ཏ་སི་ཀཱ་ནཾ ཨཱ་ར་མྨ་ཎ་གྒ་ཧ་ཎ་ཀི་རི་ཡཱ, ཨཱ་ར་མྨ་ཎུ་པཱ་དཱ་ན ཀི་རི་ཡཱ.
ཡ་ཐཱ ཧི ལོ་ཀེ ཨ་ཡོ་དྷཱ་ཏུཾ ཀཱ་མེ་ཏི ཨི་ཙྪ་ཏཱི་ཏི ཨ་ཏྠེ་ན ཨ་ཡོ་ཀ་ནྟ་ཀོ ནཱ་མ ལོ་ཧ་དྷཱ་ཏུ་ཝི་སེ་སོ ཨ་ཏྠི. སོ ཨ་ཡོ་ཁ་ནྡྷ་ས་མཱི་པཾ ས་མྤ་ཏྟོ ཏཾ ཨ་ཡོ་ཁ་ནྡྷཾ ཀཱ་མེ་ནྟོ ཝི་ཡ ཨི་ཙྪ་ནྟོ ཝི་ཡ ཨ་ཡོ་ཁ་ནྡྷཱ་བྷི་མུ་ཁོ ཙ་ཉྩ་ལ་ཏི. ས་ཡཾ ཝཱ ཏཾ ཨ་ཡོ་ཁ་ནྡྷཾ ཨུ་པ་ག་ཙྪ་ཏི. ཨ་ཡོ་ཁ་ནྡྷཾ ཝཱ ཨ་ཏྟཱ་བྷི་མུ་ཁཾ ཨཱ་ཀ་ཌྜྷ་ཏི, ཨ་ཡོ་ཁ་ནྡྷོ ཏ་ད་བྷི་མུ་ཁོ ཙ་ཉྩ་ལ་ཏི, ཏཾ ཝཱ ཨུ་པ་ག་ཙྪ་ཏི. ཨ་ཡཾ ཨ་ཡོ་ཀ་ནྟ་ཀ་སྶ ཨཱ་ལ་མྦ་ཎ་ཀི་རི་ཡཱ ནཱ་མ. ཨེ་ཝ་མེ་ཝ ཙི་ཏྟ་ཙེ་ཏ་སི་ཀཱ་ནཾ ཨཱ་ར་མྨ་ཎེ་སུ ཨཱ་ལ་མྦ་ཎ་ཀི་རི་ཡཱ ད་ཊྛ་བྦཱ. ན ཀེ་ཝ་ལཾ ཨཱ་ར་མྨ་ཎེ་སུ ཨཱ་ལ་མྦ་ཎ མ་ཏྟཾ ཧོ་ཏི. ཨ་ཐ ཁོ ཙི་ཏྟ་ཙེ་ཏ་སི་ཀཱ དྷ་མྨཱ ས་ཏྟ་ས་ནྟཱ་ནེ ཨུ་པྤ་ཛྫ་མཱ་ནཱ ཚ་སུ དྭཱ་རེ་སུ ཨཱ་ར་མྨ་ཎཱ་ནཾ ཨཱ་པཱ་ཏཱ་ག་མ་ནེ ཨེ་ཝ ཁ་ཎེ ཁ་ཎེ ཨུ་པྤ་ཛྫ་ནྟི. ཨུ་པྤ་ཛྫི་ཏྭཱ ཙ ཁ་ཎེ ཁ་ཎེ ནི་རུ་ཛ྄ཛྷ་ནྟི.
ཡ་ཐཱ ཏཾ བྷེ་རི་ཏ་ལེ བྷེ་རི་ས་དྡཱ ཨུ་པྤ་ཛྫ་མཱ་ནཱ ཏ་ཏྠ ཏ་ཏྠ ཧ་ཏྠེ་ན པ་ཧ་ར་ཎ་ཀཱ་ལེ ཨེ་ཝ ཁ་ཎེ ཁ་ཎེ ཨུ་པྤ་ཛྫ་ནྟི, ཨུ་པྤ་ཛྫི་ཏྭཱ ཙ ཁ་ཎེ ཁ་ཎེ ནི་རུ་ཛ྄ཛྷ་ནྟི. ཝཱི་ཎཱ་ས་དྡཱ ཨུ་པྤ་ཛྫ་མཱ་ནཱ ཝཱི་ཎཱ་ཏ་ནྟཱི་སུ ཏ་ཏྠ ཏ་ཏྠ ཝཱི་ཎཱ་ད་ནྟ་ཀེ་ན པ་ཧ་ར་ཎ་ཀཱ་ལེ ཨེ་ཝ ཁ་ཎེ ཁ་ཎེ ཨུ་པྤ་ཛྫ་ནྟི, ཨུ་པྤ་ཛྫི་ཏྭཱ ཙ ཁ་ཎེ ཁ་ཎེ ནི་རུ་ཛ྄ཛྷ་ནྟཱི་ཏི. ནི་དྡཱ་ཡ་ནྟ་སྶ བྷ་ཝ་ངྒ་ཙི་ཏྟ་པྤ་ཝ་ཏྟི ཀཱ་ལེ་པི པུ་བྦ་བྷ་ཝེ མ་ར་ཎཱ་ས་ནྣ་ཀཱ་ལེ ཚ་སུ དྭཱ་རེ་སུ ཨཱ་པཱ་ཏ མཱ་ག་ཏཱ་ནི ཀ་མྨ ཀ་མྨ་ནི་མི་ཏྟ ག་ཏི་ནི་མི་ཏྟཱ་ནི ཨེ་ཝ བྷ་ཝ་ངྒ་ཙི་ཏྟཱ་ནཾ ཨཱ་ར་མྨ་ཎ་པ་ཙྩ་ཡོ་ཏི. ཨཱ་ར་མྨ་ཎ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༣. ཨ་དྷི་པ་ཏི་པ་ཙྩ་ཡོ
དུ་ཝི་དྷོ ཨ་དྷི་པ་ཏི་པ་ཙྩ་ཡོ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ས་ཧ ཛཱ་ཏཱ་དྷི་པ་ཏི་པ་ཙྩ་ཡོ ཙ. ཏ་ཏྠ ཀ་ཏ་མོ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ. ཨཱ་ར་མྨ་ཎ་པ་ཙྩ་ཡེ ཝུ་ཏྟེ་སུ ཨཱ་ར་མྨ་ཎེ་སུ ཡཱ་ནི ཨཱ་ར་མྨ་ཎཱ་ནི ཨ་ཏི་ཨི་ཊྛཱ་ནི ཧོ་ནྟི ཨ་ཏི་ཀ་ནྟཱ་ནི ཨ་ཏི་མ་ནཱ་པཱ་ནི ག་རུ་ཀ་ཏཱ་ནི. ཏཱ་ནི ཨཱ་ར་མྨ་ཎཱ་ནི ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ. ཏ་ཏྠ ཨ་ཏི་ཨི་ཊྛཱ་ནཱི་ཏི ས་བྷཱ་ཝ་ཏོ ཨི་ཊྛཱ་ནི ཝཱ ཧོ་ནྟུ ཨ་ནི་ཊྛཱ་ནི ཝཱ, ཏེ་ན ཏེ་ན པུ་གྒ་ལེ་ན ཨ་ཏི་ཨི་ཙྪི་ཏཱ་ནི ཨཱ་ར་མྨ་ཎཱ་ནི ཨི་དྷ ཨ་ཏི་ཨི་ཊྛཱ་ནི ནཱ་མ.
ཏཱ་ནི པ་ན དྷ་མྨ་ཏོ དྭེ དོ་ས་མཱུ་ལ་ཙི་ཏྟུ་པྤཱ་དེ ཙ དྭེ མོ་མཱུ་ཧ ཙི་ཏྟུ་པྤཱ་དེ ཙ དུ་ཀྑ་ས་ཧ་ག་ཏ་ཀཱ་ཡ་ཝི་ཉྙཱ་ཎ་ཙི་ཏྟུ་པྤཱ་དེ ཙ ཋ་པེ་ཏྭཱ ཨ་ཝ་སེ་སཱ་ནི ས་བྦཱ་ནི ཀཱ་མཱ་ཝ་ཙ་ར་ཙི་ཏྟ་ཙེ་ཏ་སི་ཀཱ་ནི ཙ རཱུ་པཱ་རཱུ་པ ལོ་ཀུ་ཏྟ་ར་ཙི་ཏྟ་ཙེ་ཏ་སི་ཀཱ་ནི ཙ ས་བྦཱ་ནི ཨ་ཏི་ཨི་ཊྛ་རཱུ་པཱ་ནི ཙ ཧོ་ནྟི.
ཏེ་སུ་པི ཀཱ་མཱ་ར་མྨ་ཎཱ་ནི ག་རུཾ ཀ་རོ་ནྟ་སྶེ་ཝ ཨཱ་ར་མྨ་ཎཱ དྷི་པ་ཏི་པ་ཙྩ་ཡོ. ག་རུཾ ཨ་ཀ་རོ་ནྟ་སྶ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ན ཧོ་ཏི. ཛྷཱ་ན་ལཱ་བྷི་ནོ པ་ན ཨ་ཏྟ་ནཱ པ་ཊི་ལ་དྡྷཱ་ནི མ་ཧ་གྒ་ཏ་ཛྷཱ་ནཱ་ནི ཨ་རི་ཡ་སཱ་ཝ་ཀཱ ཙ ཨ་ཏྟ་ནཱ པ་ཊི་ལ་དྡྷེ ལོ་ཀུ་ཏྟ་ར་དྷ་མྨེ ག་རུཾ ཨ་ཀ་རོ་ནྟཱ ནཱ་མ ན་ཏྠི.
ཀ་ཏ་མེ དྷ་མྨཱ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ. ཨ་ཊྛ ལོ་བྷ མཱུ་ལ་ཙི་ཏྟཱ་ནི ཨ་ཊྛ ཀཱ་མཱ་ཝ་ཙ་ར་ཀུ་ས་ལ་ཙི་ཏྟཱ་ནི ཙ་ཏྟཱ་རི ཀཱ་མཱ་ཝ་ཙ་ར ཉཱ་ཎ་ས་མྤ་ཡུ་ཏྟ་ཀི་རི་ཡ་ཙི་ཏྟཱ་ནི ཨ་ཊྛ ལོ་ཀུ་ཏྟ་ར་ཙི་ཏྟཱ་ནི ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ.
ཏ་ཏྠ ལོ་ཀི་ཡཱ་ནི ཚ་ལཱ༹་ར་མྨ་ཎཱ་ནི ལོ་བྷ་མཱུ་ལ་ཙི་ཏྟཱ་ནཾ པ་ཙྩ་ཡོ. ས་ཏྟ་ར་ས ལོ་ཀི་ཡ་ཀུ་ས་ལཱ་ནི ཙ་ཏུ་ནྣཾ ཉཱ་ཎ་ཝི་པྤ་ཡུ་ཏྟ ཀུ་ས་ལཱ་ནཾ. ཏཱ་ནི ཀུ་ས་ལཱ་ནི་ཙེ་ཝ ཧེ་ཊྛི་མ་མ་གྒ་ཕ་ལཱ་ནི ཙ ནི་བྦཱ་ན་ཉྩ ཙ་ཏུ་ནྣཾ ཉཱ་ཎ་ས་མྤ་ཡུ་ཏྟ་ཀུ་ས་ལཱ་ནཾ. ཨ་ར་ཧ་ཏྟ་མ་གྒ་ཕ་ལཱ་ནི ཙ ནི་བྦཱ་ན་ཉྩ ཙ་ཏུ་ནྣཾ ཉཱ་ཎ་ས་མྤ་ཡུ་ཏྟ་ཀི་རི་ཡཱ་ནཾ. ནི་བྦཱ་ནཾ ཨ་ཊྛ་ནྣཾ ལོ་ཀུ་ཏྟ་ར ཙི་ཏྟཱ་ན་ནྟི.
ཀེ་ན་ཊྛེ་ན ཨཱ་ར་མྨ་ཎཾ, ཀེ་ན་ཊྛེ་ན ཨ་དྷི་པ་ཏི. ཨཱ་ལ་མྦི ཏ་བྦ་ཊྛེ་ན ཨཱ་ར་མྨ་ཎཾ, ཨཱ་དྷི་པ་ཙྩ་ཊྛེ་ན ཨ་དྷི་པ་ཏི. ཀོ ཨཱ་དྷི་པ་ཙྩ་ཊྛོ. ཨ་ཏྟཱ་ནཾ ག་རུཾ ཀ་ཏྭཱ པ་ཝ་ཏྟེ་སུ ཙི་ཏྟ་ཙེ་ཏ་སི་ཀེ་སུ ཨི་སྶ་ར་བྷཱ་ཝོ ཨཱ་དྷི་པ་ཙྩ་ཊྛོ. ལོ་ཀེ སཱ་མི་ཀཱ ཝི་ཡ ཨཱ་ར་མྨ་ཎཱ་དྷི་པ་ཏི་པ་ཙྩ་ཡ དྷ་མྨཱ ད་ཊྛ་བྦཱ, དཱ་སཱ ཝི་ཡ པ་ཙྩ་ཡུ་པྤ་ནྣ་དྷ་མྨཱ ད་ཊྛ་བྦཱ.
སུ་ཏ་སོ་མ་ཛཱ་ཏ་ཀེ རཱ་ཛཱ པོ་རི་སཱ་དོ མ་ནུ་སྶ་མཾ་སཾ ག་རུཾ ཀ་རོ་ནྟོ མ་ནུ་སྶ་མཾ་ས་ཧེ་ཏུ ར་ཛྫཾ པ་ཧཱ་ཡ ཨ་ར་ཉྙེ ཝི་ཙ་ར་ཏི. ཏ་ཏྠ མ་ནུ་སྶ་མཾ་སེ ག་ནྡྷ་ར་ས དྷ་མྨཱ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ. ར་ཉྙོ པོ་རི་སཱ་ད་སྶ ལོ་བྷ་མཱུ་ལ་ཙི་ཏྟཾ པ་ཙྩ་ཡུ་པྤ་ནྣ་དྷ་མྨོ. རཱ་ཛཱ སུ་ཏ སོ་མོ ས་ཙྩ་དྷ་མྨཾ ག་རུཾ ཀ་ཏྭཱ ས་ཙྩ་དྷ་མྨ་ཧེ་ཏུ ར་ཛྫ་ས་མྤ་ཏྟི་ཉྩ ཉཱ་ཏི ས་ངྒྷ་ཉྩ ཨ་ཏྟ་ནོ ཛཱི་ཝི་ཏ་ཉྩ ཚ་ཊྚེ་ཏྭཱ པུ་ན ར་ཉྙོ པོ་རི་སཱ་ད་སྶ ཧ་ཏྠཾ ཨུ་པ་ག་ཏོ. ཏ་ཏྠ ས་ཙྩ་དྷ་མྨོ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ. ར་ཉྙོ སུ་ཏ་སོ་མ་སྶ ཀུ་ས་ལ་ཙི་ཏྟཾ པ་ཙྩ་ཡུ་པྤ་ནྣ་དྷ་མྨོ. ཨེ་ས་ན་ཡོ ས་བྦེ་སུ ག་རུ་ཀ་ཏེ་སུ ཨཱ་ར་མྨ་ཎེ་སུ.
ཀ་ཏ་མོ ས་ཧ་ཛཱ་ཏཱ་དྷི་པ་ཏི་པ་ཙྩ་ཡོ. ཨ་དྷི་པ་ཏི་བྷཱ་ཝཾ པ་ཏྟཱ ཙ་ཏྟཱ་རོ དྷ་མྨཱ ཨ་དྷི་པ་ཏི་པ་ཙྩ་ཡོ, ཚ་ནྡོ ཙི་ཏྟཾ ཝཱི་རི་ཡཾ ཝཱི་མཾ་སཱ.
ཀ་ཏ་མེ དྷ་མྨཱ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ. ཨ་དྷི་པ་ཏི ས་མྤ་ཡུ་ཏྟཱ ཙི་ཏྟ་ཙེ་ཏ་སི་ཀཱ ཙ ཨ་དྷི་པ་ཏི་ས་མུ་ཊྛི་ཏཱ ཙི་ཏྟ་ཛ་རཱུ་པ་དྷ་མྨཱ ཙ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ.
ཀེ་ན་ཊྛེ་ན ས་ཧ་ཛཱ་ཏོ, ཀེ་ན་ཊྛེ་ན ཨ་དྷི་པ་ཏི.
ས་ཧུ་པྤཱ་ད་ན་ཊྛེ་ན ས་ཧ་ཛཱ་ཏོ, ས་ཧ་ཛཱ་ཏཱ་ནཾ དྷ་མྨཱ་ནཾ ཨ་བྷི་བྷ་ཝ་ན་ཊྛེ་ན ཨ་དྷི་པ་ཏི. ཏ་ཏྠ ས་ཧུ་པྤཱ་ད་ན་ཊྛེ་ནཱ་ཏི ཡོ དྷ་མྨོ ས་ཡཾ ཨུ་པྤ་ཛྫ་མཱ་ནོ ཨ་ཏྟ་ནཱ ས་ཧ་ཛཱ་ཏ་དྷ་མྨེ ཙ ཨ་ཏྟ་ནཱ ས་ཧེ་ཝ ཨུ་པྤཱ་དེ་ཏི, ཏ་སྶ ཨ་ཏྟ་ནཱ ས་ཧ་ཛཱ་ཏ་དྷ་མྨཱ་ནཾ ས་ཧུ་པྤཱ་ད་ན་ཊྛེ་ན.
ཨ་བྷི་བྷ་ཝ་ན་ཊྛེ་ནཱ་ཏི ཨ་ཛ྄ཛྷོ་ཏྠ་ར་ཎ་ཊྛེ་ན. ཡ་ཐཱ རཱ་ཛཱ ཙ་ཀྐ་ཝ་ཏྟི ཨ་ཏྟ་ནོ པུ་ཉྙི་དྡྷི་ཡཱ ས་ཀ་ལ་དཱི་པ་ཝཱ་སི་ནོ ཨ་བྷི་བྷ་ཝ་ནྟོ ཨ་ཛ྄ཛྷོ་ཏྠ་ར་ནྟོ ཨ་ཏྟ་ནོ ཝ་སེ ཝ་ཏྟཱ་པེ་ཏི, ས་ཀ་ལ་དཱི་པ་ཝཱ་སི་ནོ ཙ ཏ་སྶ ཝ་སེ ཝ་ཏྟ་ནྟི. ཏ་ཐཱ ཨ་དྷི་པ་ཏི་ཊྛཱ་ན་པ་ཏྟཱ ཨི་མེ ཙ་ཏྟཱ་རོ དྷ་མྨཱ ཨ་ཏྟ་ནོ ཨ་ཏྟ་ནོ ཝི་ས་ཡེ ས་ཧ་ཛཱ་ཏ་དྷ་མྨེ ཨ་བྷི་བྷ་ཝ་ནྟཱ ཨ་ཛ྄ཛྷོ་ཏྠ་ར་ནྟཱ ཨ་ཏྟ་ནོ ཝ་སེ ཝ་ཏྟཱ་པེ་ནྟི, ས་ཧ་ཛཱ་ཏ་དྷ་མྨཱ ཙ ཏེ་སཾ ཝ་སེ ཝ་ཏྟ་ནྟི. ཡ་ཐཱ ཝཱ སི་ལཱ་ཐ་མྦྷེ པ་ཐ་ཝི་དྷཱ་ཏུ ཨུ་ད་ཀ་ཀྑ་ནྡྷེ ཨཱ་པོ་དྷཱ་ཏུ ཨ་གྒི་ཀྑ་ནྡྷེ ཏེ་ཛོ་དྷཱ་ཏུ ཝཱ་ཏ་ཀྑ་ནྡྷེ ཝཱ་ཡོ་དྷཱ་ཏུ ཨ་ཏྟ་ནཱ ས་ཧ་ཛཱ་ཏཱ ཏི་སྶོ དྷཱ་ཏུ་ཡོ ཨ་བྷི་བྷ་ཝ་ནྟཱ ཨ་ཛ྄ཛྷོ་ཏྠ་ར་ནྟཱ ཨ་ཏྟ་ནོ ག་ཏིཾ ག་མཱ་པེ་ནྟི, ས་ཧ་ཛཱ་ཏ་དྷཱ་ཏུ་ཡོ ཙ ཏཱ་སཾ ག་ཏིཾ ག་ཙྪ་ནྟི, ཨེ་ཝ་མེ་ཝ ཨ་དྷི་པ་ཏི་ཊྛཱ་ན་པ་ཏྟཱ ཨི་མེ ཙ་ཏྟཱ་རོ དྷ་མྨཱ ཨ་ཏྟ་ནོ བ་ལེ་ན ས་ཧ་ཛཱ་ཏ་དྷ་མྨེ ཨ་ཏྟ་ནོ ག་ཏིཾ ག་མཱ་པེ་ནྟི, ས་ཧ་ཛཱ་ཏ་དྷ་མྨཱ ཙ ཏེ་སཾ ག་ཏིཾ ག་ཙྪ་ནྟི, ཨེ་ཝཾ ས་ཧ་ཛཱ་ཏ་དྷ་མྨཱ་ནཾ ཨ་བྷི་བྷ་ཝ་ན་ཊྛེ་ན.
ཨེ་ཏྠ ཝ་དེ་ཡྻུཾ, ཡ་དི ས་ཧ་ཛཱ་ཏ་དྷ་མྨཱ་ནཾ ཨ་བྷི་བྷ་ཝ་ན་ཊྛེ་ན ཨ་དྷི་པ་ཏི་ནཱ་མ སི་ཡཱ. ཨེ་ཝཾ ས་ཏི ཏི་ཊྛ་ཏུ ཚ་ནྡོ, ལོ་བྷོ ཨེ་ཝ ཨ་དྷི་པ་ཏི་ནཱ་མ སི་ཡཱ, སོ ཧི ཚ་ནྡ་ཏོ་པི བ་ལ་ཝ་ཏ་རོ ཧུ་ཏྭཱ ས་ཧ ཛཱ་ཏ་དྷ་མྨེ ཨ་བྷི་བྷ་ཝ་ནྟོ པ་ཝ་ཏྟ་ཏཱི་ཏི. ཝུ་ཙྩ་ཏེ, བཱ་ལ་པུ་ཐུ་ཛྫ་ནེ་སུ ཨེ་ཝ ལོ་བྷོ ཚ་ནྡ་ཏོ བ་ལ་ཝ་ཏ་རོ ཧོ་ཏི, པ་ཎྜི་ཏེ་སུ པ་ན ཚ་ནྡོ ཨེ་ཝ ལོ་བྷ་ཏོ བ་ལ་ཝ་ཏ་རོ ཧུ་ཏྭཱ ས་ཧ་ཛཱ་ཏ་དྷ་མྨེ ཨ་བྷི བྷ་ཝ་ནྟོ པ་ཝ་ཏྟ་ཏི. ས་ཙེ ཧི ལོ་བྷོ ཨེ་ཝ ཚ་ནྡ་ཏོ བ་ལ་ཝ་ཏ་རོ སི་ཡཱ, ཀ་ཐཾ ཨི་མེ ས་ཏྟཱ ལོ་བྷ་སྶ ཧ་ཏྠ་ག་ཏཱ བྷ་ཝ་ས་མྤ་ཏྟི བྷོ་ག་ས་མྨ་ཏྟི་ཡོ ཚ་ཊྚེ་ཏྭཱ ནེ་ཀྑ་མྨ་དྷ་མྨེ པཱུ་རེ་ཏྭཱ ཝ་ཊྚ་དུ་ཀྑ་ཏོ ནི་སྶ་རེ་ཡྻུཾ. ཡ་སྨཱ པ་ན ཚ་ནྡོ ཨེ་ཝ ལོ་བྷ་ཏོ བ་ལ་ཝ་ཏ་རོ ཧོ་ཏི, ཏ་སྨཱ ཨི་མེ ས་ཏྟཱ ལོ་བྷ་སྶ ཧ་ཏྠ་ག་ཏཱ བྷ་ཝ་ས་མྤ་ཏྟི བྷོ་ག་ས་མྤ་ཏྟི་ཡོ ཚ་ཊྚེ་ཏྭཱ ནེ་ཀྑ་མྨ་དྷ་མྨེ པཱུ་རེ་ཏྭཱ ཝ་ཊྚ་དུ་ཀྑ་ཏོ ནི་སྶ་ར་ནྟི. ཏ་སྨཱ ཚ་ནྡོ ཨེ་ཝ ལོ་བྷ་ཏོ བ་ལ་ཝ་ཏ་རོ ཧོ་ཏི, ཚ་ནྡོ ཨེ་ཝ ཨ་དྷི་པ་ཏི, ན ལོ་བྷོ་ཏི. ཨེ་ས ན་ཡོ དོ་སཱ་དཱི་སུ་པཱི་ཏི.
ཏ་ཏྠ ལོ་ཀེ མ་ཧ་ནྟེ་སུ སུ་དུ་ཀྐ་རེ་སུ པུ་རི་ས་ཀ་མྨེ་སུ པ་ཙྩུ་པ་ཊྛི་ཏེ་སུ ཨི་མེ ཙ་ཏྟཱ་རོ དྷ་མྨཱ ཀ་མྨ་སི་དྡྷི་ཡཱ སཾ་ཝ་ཏྟ་ནྟི. ཀ་ཐཾ.
ཧཱི་ན་ཙྪ་ནྡཱ བ་ཧུ་ཛྫ་ནཱ མ་ཧ་ནྟཱ་ནི སུ་དུ་ཀྐ་རཱ་ནི པུ་རི་ས་ཀ་མྨཱ་ནི དི་སྭཱ ནི་ཝ་ཏྟ་ཙྪ་ནྡཱ ཧོ་ནྟི. ཀཱ་ཏུཾ ན ཨི་ཙྪ་ནྟི, ཨ་མྷཱ་ཀཾ ཨ་ཝི་ས་ཡོ་ཏི ནི་ར་པེ་ཀྑཱ ཋ་པེ་ནྟི. ཚ་ནྡཱ་དྷི་ཀོ པ་ན ཏཱ་དི་སཱ་ནི པུ་རི་ས་ཀ་མྨཱ་ནི དི་སྭཱ ཨུ་གྒ་ཏ་ཙྪ་ནྡོ ཧོ་ཏི, ཨ་ཏི་ཝི་ཡ ཀཱ་ཏུཾ ཨི་ཙྪ་ཏི, མ་མ ཝི་ས་ཡོ ཨེ་སོ་ཏི ཨ་དྷི་ཊྛཱ་ནཾ ག་ཙྪ་ཏི. སོ ཚ་ནྡེ་ན ཨ་བྷི་ཀ་ཌྜྷི་ཏོ ཡཱ་ཝ ཏཾ ཀ་མྨཾ ན སི་ཛ྄ཛྷ་ཏི, ཏཱ་ཝ ཨ་ནྟ་རཱ ཏཾ ཀ་མྨཾ ཚ་ཊྚེ་ཏུཾ ན ས་ཀྐོ་ཏི. ཨེ་ཝ་ཉྩ ས་ཏི ཨ་ཏི་མ་ཧ་ནྟཾ་པི ཏཾ ཀ་མྨཾ ཨེ་ཀ་སྨིཾ ཀཱ་ལེ སི་དྡྷཾ བྷ་ཝི་སྶ་ཏི.
ཧཱི་ན་ཝཱི་རི་ཡཱ ཙ བ་ཧུ་ཛྫ་ནཱ ཏཱ་དི་སཱ་ནི ཀ་མྨཱ་ནི དི་སྭཱ ནི་ཝ་ཏྟ ཝཱི་རི་ཡཱ ཧོ་ནྟི, ཨི་དཾ མེ ཀ་མྨཾ ཀ་རོ་ནྟ་སྶ བ་ཧུཾ ཀཱ་ཡ་དུ་ཀྑཾ ཝཱ ཙེ་ཏོ་དུ་ཀྑཾ ཝཱ བྷ་ཝི་སྶ་ཏཱི་ཏི ནི་ཝ་ཏྟ་ནྟི. ཝཱི་རི་ཡཱ་དྷི་ཀོ པ་ན ཏཱ་དི་སཱ་ནི པུ་རི་ས་ཀ་མྨཱ་ནི དི་སྭཱ ཨུ་གྒ་ཏ་ཝཱི་རི་ཡོ ཧོ་ཏི, ཨི་དཱ་ནེ་ཝ ཨུ་ཊྛ་ཧི་ཏྭཱ ཀཱ་ཏུཾ ཨི་ཙྪ་ཏི. སོ ཙི་ར་ཀཱ་ལཾ་པི ཏཾ ཀ་མྨཾ ཀ་རོ་ནྟོ བ་ཧུཾ ཀཱ་ཡ་དུ་ཀྑཾ ཝཱ ཙེ་ཏོ་དུ་ཀྑཾ ཝཱ ཨ་ནུ་བྷ་ཝ་ནྟོ་པི ཏ་སྨིཾ ཝཱི་རི་ཡ ཀ་མྨེ ན་ནི་བྦི་ནྡ་ཏི, མ་ཧ་ནྟེ་ན ཀ་མྨ་ཝཱི་རི་ཡེ་ན ཝི་ནཱ བྷ་ཝི་ཏུཾ ན ས་ཀྐོ་ཏི, ཏཱ་དི་སེ་ན ཝཱི་རི་ཡེ་ན ར་ཏྟི་དི་ཝཾ ཁེ་པེ་ནྟོ ཙི་ཏྟ་སུ་ཁཾ ཝི་ནྡ་ཏི. ཨེ་ཝ་ཉྩ ས་ཏི ཨ་ཏི་མ་ཧ་ནྟཾ་པི ཏཾ ཀ་མྨཾ ཨེ་ཀ་སྨིཾ ཀཱ་ལེ སི་དྡྷཾ བྷ་ཝི་སྶ་ཏི.
ཧཱི་ན་ཙི་ཏྟཱ ཙ བ་ཧུ་ཛྫ་ནཱ ཏཱ་དི་སཱ་ནི ཀ་མྨཱ་ནི དི་སྭཱ ནི་ཝ་ཏྟ་ཙི་ཏྟཱ ཧོ་ནྟི. པུ་ན ཨཱ་ར་མྨ་ཎཾ་པི ན ཀ་རོ་ནྟི. ཙི་ཏྟཱ་དྷི་ཀོ པ་ན ཏཱ་དི་སཱ་ནི ཀ་མྨཱ་ནི དི་སྭཱ ཨུ་གྒ་ཏ་ཙི་ཏྟོ ཧོ་ཏི, ཙི་ཏྟཾ ཝི་ནོ་དེ་ཏུཾ་པི ན ས་ཀྐོ་ཏི, ནི་ཙྩ་ཀཱ་ལཾ ཏ་ཏྠ ནི་བ་ནྡྷ་ཙི་ཏྟོ ཧོ་ཏི. སོ ཙི་ཏྟ་ཝ་སི་ཀོ ཧུ་ཏྭཱ ཙི་ར་ཀཱ་ལཾ་པི ཏཾ ཀ་མྨཾ ཀ་རོ་ནྟོ བ་ཧུཾ ཀཱ་ཡ་དུ་ཀྑཾ་ཝཱ་པཱི་ཏི་ཨཱ་དི་ནཱ ཚ་ནྡཱ་དྷི་པ་ཏི་ན་ཡེ་ན ཝ་ཏྟ་བྦཾ.
མ་ནྡ་པ་ཉྙཱ ཙ བ་ཧུ་ཛྫ་ནཱ ཏཱ་དི་སཱ་ནི ཀ་མྨཱ་ནི དི་སྭཱ ནི་ཝ་ཏྟ་པ་ཉྙཱ ཧོ་ནྟི, ཀ་མྨཱ་ནཾ ཨཱ་དི་མྤི ན པ་སྶ་ནྟི, ཨ་ནྟ་པི ན པ་སྶ་ནྟི, ཨ་ནྡྷ་ཀཱ་རེ པ་ཝི་ས་ནྟཱ ཝི་ཡ ཧོ་ནྟི, ཏཱ་ནི ཀ་མྨཱ་ནི ཀཱ་ཏུཾ ཙི་ཏྟཾ་པི ན ན་མ་ཏི. པ་ཉྙཱ་དྷི་ཀོ པ་ན ཏཱ་དི་སཱ་ནི ཀ་མྨཱ་ནི དི་སྭཱ ཨུ་གྒ་ཏ་པ་ཉྙོ ཧོ་ཏི, ཀ་མྨཱ་ནཾ ཨཱ་དིཾ་པི པ་སྶ་ཏི, ཨ་ནྟཾ་པི པ་སྶ་ཏི, ཕ་ལཾ་པི པ་སྶ་ཏི, ཨཱ་ནི་སཾ་སཾ་པི པ་སྶ་ཏི. སུ་ཁེ་ན ཀ་མྨ་སི་དྡྷི་ཡཱ ནཱ་ནཱ་ཨུ་པཱ་ཡཾ་པི པ་སྶ་ཏི. སོ ཙི་ར་ཀཱ་ལཾ་པི ཏཾ ཀ་མྨཾ ཀ་རོ་ནྟོ་ཏི་ཨཱ་དི་ནཱ ཝཱི་རི་ཡཱ་དྷི་པ་ཏི་ན་ཡེ་ན ཝ་ཏྟ་བྦཾ. ཨི་དྷ པ་ན མ་ཧ་ཏི་ཡཱ ཀ་མྨ་ཝཱི་མཾ་སཱ་ཡཱ་ཏི ཙ ཏཱ་དི་སི་ཡཱ ཀ་མྨ ཝཱི་མཾ་སཱ་ཡཱ་ཏི ཙ ཝ་ཏྟ་བྦཾ.
ཨེ་ཝཾ ལོ་ཀེ མ་ཧ་ནྟེ་སུ སུ་དུ་ཀྐ་རེ་སུ པུ་རི་ས་ཀ་མྨེ་སུ པ་ཙྩུ་པ་ཊྛི་ཏེ་སུ ཨི་མེ ཙ་ཏྟཱ་རོ དྷ་མྨཱ ཀ་མྨ་སི་དྡྷི་ཡཱ སཾ་ཝ་ཏྟ་ནྟི. ཨི་མེ་ས་ཉྩ ཙ་ཏུ་ནྣཾ ཨ་དྷི་པ་ཏཱི་ནཾ ཝི་ཛྫ་མཱ་ན་ཏྟཱ ལོ་ཀེ པུ་རི་ས་ཝི་སེ་སཱ ནཱ་མ དི་སྶ་ནྟི, ས་བྦ་ཉྙུ་བུ་དྡྷཱ ནཱ་མ དི་སྶ་ནྟི, ས་བྦ་ཉྙུ་བོ་དྷི་ས་ཏྟཱ ནཱ་མ དི་སྶ་ནྟི, པ་ཙྩེ་ཀ་བུ་དྡྷཱ ནཱ་མ དི་སྶ་ནྟི, པ་ཙྩེ་ཀ་བོ་དྷི་ས་ཏྟཱ་ནཱ་མ དི་སྶ་ནྟི, ཨ་གྒ་སཱ་ཝ་ཀཱ་ནཱ་མ མ་ཧཱ་སཱ་ཝ་ཀཱ ནཱ་མ སཱ་ཝ་ཀ་བོ་དྷི་ས་ཏྟཱ ནཱ་མ དི་སྶ་ནྟི. ལོ་ཀེ་པི ཨེ་ཝ་རཱུ་པཱ་ནཾ པུ་རི་ས་ཝི་སེ་སཱ་ནཾ ཝ་སེ་ན ས་ཏྟ ལོ་ཀ་སྶ ཨ་ཏྠཱ་ཡ ཧི་ཏཱ་ཡ སུ་ཁཱ་ཡ པ་ཉྙཱ་སི་པྤ་ཝི་སེ་སཱ ཙ པ་རི་བྷོ་ག་ཝ་ཏྠུ་ཝི་སེ་སཱ ཙ དི་སྶ་ནྟཱི་ཏི. ཨ་དྷི་པ་ཏི་པ་ཙྩ་ཡ་དཱི་པ་ནཱ ནི་ཊྛི་ཏཱ.
༤. ཨ་ན་ནྟ་ར་པ་ཙྩ་ཡོ
ཀ་ཏ་མོ ཨ་ན་ནྟ་ར་པ་ཙྩ་ཡོ. ཨ་ན་ནྟ་རེ ཁ་ཎེ ནི་རུ་དྡྷོ ཙི་ཏྟ ཙེ་ཏ་སི་ཀ་དྷ་མྨ་ས་མཱུ་ཧོ ཨ་ན་ནྟ་ར་པ་ཙྩ་ཡོ.
ཀ་ཏ་མོ དྷ་མྨོ ཨ་ན་ནྟ་ར་པ་ཙྩ་ཡ་སྶ པ་ཙྩ་ཡུ་པྤ་ནྣོ. པ་ཙྪི་མེ ཨ་ན་ནྟ་རེ ཨེ་ཝ ཁ་ཎེ ཨུ་པྤ་ནྣོ ཙི་ཏྟ་ཙེ་ཏ་སི་ཀ་དྷ་མྨ་ས་མཱུ་ཧོ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣོ.
ཨེ་ཀ་སྨིཾ བྷ་ཝེ པ་ཊི་ས་ནྡྷི་ཙི་ཏྟཾ པ་ཋ་མ་བྷ་ཝ་ངྒ་ཙི་ཏྟ་སྶ ཨ་ན་ནྟ་ར པ་ཙྩ་ཡོ, པ་ཋ་མ བྷ་ཝ་ངྒ་ཙི་ཏྟཾ དུ་ཏི་ཡ་བྷ་ཝ་ངྒ་ཙི་ཏྟ་སྶ ཨ་ན་ནྟ་ར་པ་ཙྩ་ཡོ་ཏི་ཨཱ་དི་ནཱ ཝ་ཏྟ་བྦོ.
ཡ་དཱ པ་ན དྷ་མྨ་ཡ་མ་ཀེ སུ་དྡྷཱ་ཝཱ་སཱ་ནཾ དུ་ཏི་ཡེ ཨ་ཀུ་ས་ལེ ཙི་ཏྟེ ཝ་ཏྟ་མཱ་ནེ་ཏི ཝུ་ཏྟ་ན་ཡེ་ན ཏ་སྶ ས་ཏྟ་སྶ ཨ་ཏྟ་ནོ ཨ་བྷི་ན་ཝཾ ཨ་ཏྟ་བྷཱ་ཝཾ ཨཱ་ར་བྦྷ ཨེ་ཏཾ མ་མ ཨེ་སོ་ཧ་མ་སྨི ཨེ་སོ མེ ཨ་ཏྟཱ་ཏི པ་ཝ་ཏྟཾ བྷ་ཝ་ནི་ཀ་ནྟི་ཀ ཏ་ཎྷཱ་ས་ཧ་ག་ཏ་ཙི་ཏྟཾ ཨུ་པྤ་ཛྫ་ཏི. ཏ་དཱ པ་ཋ་མཾ དྭི་ཀྑ་ཏྟུཾ བྷ་ཝ་ངྒཾ ཙ་ལ་ཏི. ཏ་ཏོ མ་ནོ་དྭཱ་རཱ་ཝ་ཛྫ་ན་ཙི་ཏྟཾ ཨུ་པྤ་ཛྫ་ཏི. ཏ་ཏོ ས་ཏྟ བྷ་ཝ་ནི་ཀ་ནྟི་ཀ་ཛ་ཝ་ནཱ་ནི ཨུ་པྤ་ཛྫ་ནྟི. ཏ་ཏོ པ་རཾ བྷ་ཝ་ངྒ་ཝཱ་རོ.
ཨ་པི ཙ སོ ས་ཏྟོ ཏ་དཱ པ་ཙྩུ་པྤ་ནྣ་བྷ་ཝེ ཀི་ཉྩི ན ཛཱ་ནཱ་ཏི, པུ་བྦ་བྷ་ཝེ ཨ་ཏྟ་ནཱ ཨ་ནུ་བྷཱུ་ཏཾ ཨཱ་ར་མྨ་ཎཾ ཨ་ནུ་སྶ་ར་མཱ་ནོ ཨ་ཙྪ་ཏི. ཝ་ཏྠུ་སྶ པ་ན ཨ་ཏི་དུ་བྦ་ལ་ཏྟཱ ཏ་ཉྩ ཨཱ་ར་མྨ་ཎཾ ཨ་པ་རི་བྱ་ཏྟ་མེ་ཝ ཧོ་ཏི. ཏཾ ཨཱ་ར་བྦྷ ཨུ་དྡྷ་ཙྩ་ས་ཧ་ག་ཏ་ཙི་ཏྟ་མེ་ཝ བ་ཧུ་ལཾ པ་ཝ་ཏྟ་ཏི.
ཡ་དཱ ག་བྦྷོ ཐོ་ཀཾ ཝ་ཌྜྷ་མཱ་ནོ ཧོ་ཏི ཨ་ཏི་རེ་ཀ་དྭེ་མཱ་སཾ ག་ཏོ, ཏ་དཱ ཙ་ཀྑཱ་དཱི་ནི ཨི་ནྡྲི་ཡཱ་ནི པ་རི་པུ་ཎྞཱ་ནི ཧོ་ནྟི. ཨེ་ཝཾ ས་ནྟེ་པི མཱ་ཏུ་ག་བྦྷེ ཨཱ་ལོ་ཀཱ་དཱི་ནཾ པ་ཙྩ་ཡཱ་ནཾ ཨ་བྷཱ་ཝ་ཏོ ཙ་ཀྑུ་ཝི་ཉྙཱ་ཎཱ་དཱི་ནི ཙ་ཏྟཱ་རི ཝི་ཉྙཱ་ཎཱ་ནི ནུ་པྤ་ཛྫ་ནྟི, ཀཱ་ཡ་ཝི་ཉྙཱ་ཎ་མ་ནོ་ཝི་ཉྙཱ་ཎཱ་ནི ཨེ་ཝ ཨུ་པྤ་ཛྫ་ནྟི. སོ ས་ཏྟོ མཱ་ཏུ་ཡཱ ཨི་རི་ཡཱ་པ་ཐ་པ་རི་ཝ་ཏྟ་ནཱ་དཱི་སུ བ་ཧཱུ་ནི དུ་ཀྑ་དོ་མ་ན་སྶཱ་ནི པ་ཙྩ་ནུ་བྷོ་ཏི. ཝི་ཛཱ་ཡ་ན་ཀཱ་ལེ པ་ན བྷུ་སཾ དུ་ཀྑཾ ནི་ག་ཙྪ་ཏི་ཡེ་ཝ. ཝི་ཛཱ་ཡི་ཏྭཱ་པི ཡཱ་ཝ ཝ་ཏྠུ་རཱུ་པཱ་ནི མུ་དཱུ་ནི ཧོ་ནྟི, པ་རི་པཱ་ཀཾ ན ག་ཙྪ་ནྟི, ཏཱ་ཝ སོ ཨ་ཏི་མ་ནྡ་རཱུ་པོ ཨུ་ཏྟཱ་ན་སེ་ཡྻ་ཀོ ཧུ་ཏྭཱ ཨ་ཙྪ་ཏི. ན ཀི་ཉྩི པ་ཙྩུ་པྤ་ནྣཾ ཨཱ་ར་མྨ་ཎཾ ས་ལླ་ཀྑེ་ཏི. ཡེ་བྷུ་ཡྻེ་ན པུ་རི་མ བྷ་ཝཱ་ནུ་སཱ་རཱི ཨེ་ཝ ཏ་སྶ ཝི་ཉྙཱ་ཎཾ ཧོ་ཏི. ས་ཙེ སོ ནི་ར་ཡ བྷ་ཝ་ཏོ ཨཱ་ག་ཏོ ཧོ་ཏི, སོ ཝི་རཱུ་པ་མུ་ཁ་བ་ཧུ་ལོ ཧོ་ཏི. པུ་རི་མཱ་ནི ནི་ར་ཡཱ་ར་མྨ་ཎཱ་ནི ཨཱ་ར་བྦྷ ཁ་ཎེ ཁ་ཎེ ཝི་རཱུ་པ་མུ་ཁ་མ་སྶ པ་ཉྙཱ་ཡ་ཏི. ཨ་ཐ དེ་ཝ་ལོ་ཀ་ཏོ ཨཱ་ག་ཏོ ཧོ་ཏི, དི་བྦཱ་ནི ཨཱ་ར་མྨ་ཎཱ་ནི ཨཱ་ར་བྦྷ ཝི་པྤ་ས་ནྣ་མུ་ཁ་བ་ཧུ་ལོ ཧོ་ཏི, ཁ་ཎེ ཁ་ཎེ མི་ཧི་ཏ་མུ་ཁ་མ་སྶ པ་ཉྙཱ་ཡ་ཏི.
ཡ་དཱ པ་ན ཝ་ཏྠུ་རཱུ་པཱ་ནི ཏི་ཀྑཱ་ནི ཧོ་ནྟི, པ་རི་པཱ་ཀཾ ག་ཙྪ་ནྟི. ཝི་ཉྙཱ་ཎཱ་ནི ཙ་སྶ སུ་ཝི་ས་དཱ་ནི པ་ཝ་ཏྟ་ནྟི. ཏ་དཱ ཨ་མ་ནྡ་རཱུ་པོ ཧུ་ཏྭཱ ཀཱི་ལ༹་ནྟོ ལཱི་ལ༹་ནྟོ མོ་ད་ནྟོ པ་མོ་ད་ནྟོ ཨ་ཙྪ་ཏི. པ་ཙྩུ་པྤ་ནྣེ ཨཱ་ར་མྨ་ཎཱ་ནི ས་ལླ་ཀྑེ་ཏི. མཱ་ཏུ་བྷཱ་སཾ ས་ལླ་ཀྑེ་ཏི. ཨི་དྷ ལོ་ཀཱ་ནུ་སཱ་རཱི ཝི་ཉྙཱ་ཎ་མ་སྶ བ་ཧུ་ལཾ པ་ཝ་ཏྟ་ཏི. པུ་རི་མ་ཛཱ་ཏིཾ པ་མུ་སྶ་ཏི.
ཀིཾ པ་ན ས་བྦོ་པི ས་ཏྟོ ཨི་མ་སྨིཾ ཋཱ་ནེ ཨེ་ཝ པུ་རི་མཾ ཛཱ་ཏིཾ པ་མུ་སྶ་ཏཱི་ཏི ཙེ. ན ས་བྦོ་པི ས་ཏྟོ ཨི་མ་སྨིཾ ཋཱ་ནེ ཨེ་ཝ པ་མུ་སྶ་ཏི. ཀོ་ཙི ཨ་ཏི་རེ་ཀ་ཏ་རཾ ག་མྦྷ་ཝཱ་ས་དུ་ཀྑེ་ན པ་རི་པཱི་ལི༹་ཏོ ག་བྦྷེ ཨེ་ཝ པ་མུ་སྶ་ཏི. ཀོ་ཙི ཝི་ཛཱ་ཡ་ན་ཀཱ་ལེ, ཀོ་ཙི ཨི་མ་སྨིཾ ཋཱ་ནེ པ་མུ་སྶ་ཏི. ཀོ་ཙི ཨི་ཏོ་པ་ར་མྤི ད་ཧ་ར་ཀཱ་ལེ ན པ་མུ་སྶ་ཏི. ཝུ་ཌྜྷ་ཀཱ་ལེ ཨེ་ཝ པ་མུ་སྶ་ཏི. ཀོ་ཙི ཡཱ་ཝ་ཛཱི་ཝཾ་པི ན པ་མུ་སྶ་ཏི. དྭེ ཏ་ཡོ བྷ་ཝེ ཨ་ནུ་སྶ་ར་ནྟོ་པི ཨ་ཏྠི་ཡེ་ཝ. ཨི་མེ ཛཱ་ཏི་སྶ་ར་ས་ཏྟཱ ནཱ་མ ཧོ་ནྟི.
ཏ་ཏྠ ཝི་ཛཱ་ཡ་ན་ཀཱ་ལ་ཏོ པ་ཊྛཱ་ཡ ཚ་དྭཱ་རི་ཀ་ཝཱི་ཐི་ཙི་ཏྟཱ་ནི པ་ཝ་ཏྟ་ནྟི. པ་ཙྩུ་པྤ་ནྣཱ་ར་མྨ་ཎཾ ས་ལླ་ཀྑ་ཎ་ཏོ པ་ཊྛཱ་ཡ ཚ་དྭཱ་རི་ཀ་ཝཱི་ཐི ཙི་ཏྟཱ་ནི པ་རི་པུ་ཎྞཱ་ནི པ་ཝ་ཏྟ་ནྟི. ས་བྦ་ཏྠ་པི པུ་རི་མཾ པུ་རི་མཾ ཨ་ན་ནྟ་རེ ནི་རུ་དྡྷཾ ཙི་ཏྟཾ པ་ཙྪི་མ་སྶ པ་ཙྪི་མ་སྶ ཨ་ན་ནྟ་རེ ཨུ་པྤ་ནྣ་སྶ ཙི་ཏྟ་སྶ ཨ་ན་ནྟ་ར པ་ཙྩ་ཡོ ཧོ་ཏི. ཨ་ཡ་ཉྩ ཨ་ན་ནྟ་ར་པ་ཙྩ་ཡོ ནཱ་མ ཨ་ན་མ་ཏ་གྒེ སཾ་སཱ་རེ ཨེ་ཀ་སྶ ས་ཏྟ་སྶ ཨེ་ཀ་པྤ་བ་ནྡྷོ ཨེ་ཝ ཧོ་ཏི. ཡ་དཱ ས་ཏྟོ ཨ་ར་ཧ་ཏྟ མ་གྒཾ ལ་བྷི་ཏྭཱ ཁ་ནྡྷ་པ་རི་ནི་བྦཱ་ནཾ པཱ་པུ་ཎཱ་ཏི, ཏ་དཱ ཨེ་ཝ སོ པ་བ་ནྡྷོ ཚི་ཛྫ་ཏི.
ཀེ་ན་ཊྛེ་ན ཨ་ན་ནྟ་རོ, ཀེ་ན་ཊྛེ་ན པ་ཙྩ་ཡོ་ཏི. ཨ་ཏྟ་ནོ ཨ་ན་ནྟ་རེ ཨ་ཏྟ་ས་དི་ས་སྶ དྷ་མྨ་ནྟ་ར་སྶ ཨུ་པྤཱ་ད་ན་ཊྛེ་ན ཨ་ན་ནྟ་རོ, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ. ཏ་ཏྠ ཨ་ཏྟ་ས་དི་ས་སྶཱ་ཏི སཱ་ར་མྨ་ཎ བྷཱ་ཝེ་ན ཨ་ཏྟ་ནཱ ས་དི་ས་སྶ. སཱ་ར་མྨ་ཎ་བྷཱ་ཝེ་ནཱ་ཏི ཙ ཡོ དྷ་མྨོ ཨཱ་ར་མྨ་ཎེ་ན ཝི་ནཱ ན པ་ཝ་ཏྟ་ཏི, སོ སཱ་ར་མྨ་ཎོ ནཱ་མ, ཨེ་ཝཾ སཱ་ར་མྨ་ཎ་བྷཱ་ཝེ་ན. དྷ་མྨ་ནྟ་ར་སྶ ཨུ་པྤཱ་ད་ན་ཊྛེ་ནཱ་ཏི པུ་རི་མ་སྨིཾ ཙི་ཏྟེ ནི་རུ་དྡྷེ་པི ཏ་སྶ ཙི་ནྟ་ན་ཀི་རི་ཡཱ་ཝེ་གོ ན ཝཱུ་པ་ས་མྨ་ཏི, པ་ཙྪི་མཾ ཙི་ཏྟཾ ཨུ་པྤཱ་དེ་ཏྭཱ ཨེ་ཝ ཝཱུ་པ་ས་མྨ་ཏི, ཨེ་ཝཾ པ་ཙྪི་མ་སྶ དྷ་མྨ་ནྟ་ར་སྶ ཨུ་པྤཱ་ད་ན་ཊྛེ་ན.
ཏ་ཏྠ པུ་རི་མཱ པུ་རི་མཱ མཱ་ཏུ་པ་ར་མྤ་རཱ ཝི་ཡ ཨ་ན་ནྟ་ར་པ་ཙྩ་ཡ་པ་ར་མྤ་རཱ ད་ཊྛ་བྦཱ. པ་ཙྪི་མཱ པ་ཙྪི་མཱ དྷཱི་ཏུ་པ་ར་མྤ་རཱ ཝི་ཡ ཏ་སྶ པ་ཙྩ་ཡུ་པྤ་ནྣ་པ་ར་མྤ་རཱ ད་ཊྛ་བྦཱ. ཨེ་ཝཾ ས་ནྟེ ཨ་ར་ཧ་ནྟཱ་ནཾ ས་བྦ་པ་ཙྪི་མཾ པ་རི་ནི་བྦཱ་ན་ཙི་ཏྟ་མྤི པུ་ན པ་ཊི་ས་ནྡྷི་ཙི་ཏྟ་ས་ངྑཱ་ཏཾ དྷ་མྨ་ནྟ་རཾ ཨུ་པྤཱ་དེ་ཡྻཱ་ཏི. ན ཨུ་པྤཱ་དེ་ཡྻ. ཀ་སྨཱ, ཏ་དཱ ཀ་མྨ་ཀི་ལེ་ས་ཝེ་གཱ་ནཾ ས་བྦ་སོ པ་ཊི་པྤ་སྶ་དྡྷི་བྷཱ་ཝེ་ན ཨ་ཙྩ་ནྟ་ས་ནྟ་ཏ་ར་ཏྟཱ ཏ་སྶ ཙི་ཏྟ་སྶཱ་ཏི. ཨ་ན་ནྟ་ར་པ་ཙྩ་ཡ དཱི་པ་ནཱ ནི་ཊྛི་ཏཱ.
༥. ས་མ་ན་ནྟ་ར་པ་ཙྩ་ཡོ
པ་ཙྩ་ཡ་དྷ་མྨ་ཝི་བྷཱ་གོ ཙ པ་ཙྩ་ཡུ་པྤ་ནྣ་དྷ་མྨ་ཝི་བྷཱ་གོ ཙ ཨ་ན་ནྟ་པ་ཙྩ་ཡ ས་དི་སོ.
ཀེ་ན་ཊྛེ་ན ས་མ་ན་ནྟ་རོ་ཏི. སུ་ཊྛུ ཨ་ན་ནྟ་ར་ཊྛེ་ན ས་མ་ན་ནྟ་རོ. ཡ་ཐཱ སི་ལཱ་ཐ་མྦྷཱ་དཱི་སུ རཱུ་པ་ཀ་ལཱ་པཱ ཨེ་ཀཱ་བ་དྡྷཱ ས་མཱ་ནཱ་པི རཱུ་པ དྷ་མྨ་བྷཱ་ཝེ་ན ས་ཎྛཱ་ན ཛཱ་ཏི་ཀ་ཏྟཱ མ་ཛ྄ཛྷེ པ་རི་ཙྪེ་ད་རཱུ་པ་ས་ཧི་ཏཱ ཨེ་ཝ ཧོ་ནྟི. དྭི་ནྣཾ རཱུ་པ་ཀ་ལཱ་པཱ་ནཾ མ་ཛ྄ཛྷེ ཨ་ནྟ་རཾ ནཱ་མ ཝི་ཝ་རཾ ནཱ་མ ཨ་ཏྠི་ཡེ་ཝ. ན ཏ་ཐཱ པུ་རི་མ་པ་ཙྪི་མཱ་ནཾ དྭི་ནྣཾ ཙི་ཏྟ་ཙེ་ཏ་སི་ཀ ཀ་ལཱ་པཱ་ནཾ མ་ཛ྄ཛྷེ. ཏེ པ་ན ཨ་རཱུ་པ་དྷ་མྨ་བྷཱ་ཝེ་ན ཨ་ས་ཎྛཱ་ན ཛཱ་ཏི་ཀ་ཏྟཱ མ་ཛ྄ཛྷེ པ་རི་ཙྪེ་ད་དྷ་མྨ་སྶ ནཱ་མ ཀ་སྶ་ཙི ཨཱ་ཀཱ་ས་ཝི་ཝ་ར་སྶ ཨ་བྷཱ་ཝ་ཏོ ས་བྦ་སོ ཨ་ནྟ་ར ར་ཧི་ཏཱ ཨེ་ཝ ཧོ་ནྟི. ལོ་ཀ་སྶ་པི དྭི་ནྣཾ ཀ་ལཱ་པཱ་ནཾ ཨ་ནྟ་རཾ ནཱ་མ ན དི་སྶ་ཏི. ཏ་ཏོ ཨི་མེ ས་ཏྟཱ ཙི་ཏྟཾ ནཱ་མ ནི་ཙྩཾ དྷུ་ཝཾ ཐཱ་ཝ་རཾ ཨ་ཝི་པ་རི་ཎཱ་མ་དྷ་མྨ་ནྟི ཨེ་ཝཾ ཙི་ཏྟེ ནི་ཙྩ་ས་ཉྙི་ནོ ཧོ་ནྟི. ཨེ་ཝཾ སུ་ཊྛུ ཨ་ན་ནྟ་ར་ཊྛེ་ན ས་མ་ན་ནྟ་རོ. ཨ་ན་ནྟ་ར་ཊྛེ་ནཱ་ཏི ཙ ཨ་ཏྟ་ནོ ཨ་ན་ནྟ་རེ ཨ་ཏྟ་ས་དི་ས་སྶ དྷ་མྨ་ནྟ་ར་སྶ ཨུ་པྤཱ་ད་ན་ཊྛེ་ནཱ་ཏི པུ་བྦེ ཝུ་ཏྟ་མེ་ཝ.
ཨེ་ཝཾ ས་ནྟེ ནི་རོ་དྷ་ས་མཱ་པ་ཏྟི་ཀཱ་ལེ པུ་རི་མ་ཙི་ཏྟཾ ནཱ་མ ནེ་ཝ ས་ཉྙཱ་ནཱ་ས་ཉྙཱ་ཡ་ཏ་ན་ཙི་ཏྟཾ, པ་ཙྪི་མ་ཙི་ཏྟཾ ནཱ་མ ཨ་རི་ཡ་ཕ་ལ་ཙི་ཏྟཾ, དྭི་ནྣཾ ཙི་ཏྟཱ་ནཾ ཨ་ནྟ་རེ ཨེ་ཀ་ར་ཏྟི་དི་ཝ་མྤི དྭེ་ར་ཏྟི་དི་ཝཱ་ནི་པི.ལ. ས་ཏྟ་ར་ཏྟི་དི་ཝཱ་ནི་པི ཨ་ཙི་ཏྟ་ཀོ ཧོ་ཏི. ཨ་ས་ཉྙ་ས་ཏྟ་བྷཱུ་མི་ཡཾ་པི པུ་རི་མེ ཀཱ་མ་བྷ་ཝེ ཙུ་ཏི་ཙི་ཏྟཾ པུ་རི་མ་ཙི་ཏྟཾ ནཱ་མ. པ་ཙྪི་མེ ཀཱ་མ་བྷ་ཝེ པ་ཊི་ས་ནྡྷི་ཙི་ཏྟཾ པ་ཙྪི་མ་ཙི་ཏྟཾ ནཱ་མ, དྭི་ནྣཾ ཙི་ཏྟཱ་ནཾ ཨ་ནྟ་རེ ཨ་ས་ཉྙ་ས་ཏྟ་བྷ་ཝེ པ་ཉྩ་ཀ་པྤ་ས་ཏཱ་ནི པུ་གྒ་ལོ ཨ་ཙི་ཏྟ་ཀོ ཏི་ཊྛ་ཏི. ཏ་ཏྠ དྭེ པུ་རི་མ་ཙི་ཏྟཱ་ནི ཨ་ཏྟ་ནོ ཨ་ན་ནྟ་རེ ཨ་ཏྟ་ས་དི་ས་སྶ དྷ་མྨ་ནྟ་ར་སྶ ཨུ་པྤཱ་ད་ན་པ་ཙྩ་ཡ་ས་ཏྟི་ར་ཧི་ཏཱ་ནི ཧོ་ནྟཱི་ཏི. ན ཧོ་ནྟི. མ་ཧ་ནྟེ་ཧི པ་ན བྷཱ་ཝ་ནཱ་པ་ཎི་དྷི་བ་ལེ་ཧི པ་ཊི་བཱ་ཧི་ཏ་ཏྟཱ པུ་རི་མ་ཙི་ཏྟཱ་ནི ཙ ནི་རུ་ཛ྄ཛྷ་མཱ་ནཱ་ནི ཨ་ན་ནྟ་རེ དྷ་མྨ་ནྟ་ར་སྶ ཨུ་པྤཱ་ད་ན ས་ཏྟི་ས་ཧི་ཏཱ་ནི ཨེ་ཝ ནི་རུ་ཛ྄ཛྷ་ནྟི. པ་ཙྪི་མ་ཙི་ཏྟཱ་ནི ཙ ཨུ་པྤ་ཛྫ་མཱ་ནཱ་ནི ཏ་སྨིཾ ཁ་ཎེ ཨེ་ཀཱ་བ་དྡྷ་བྷཱ་ཝེ་ན ཨ་ནུ་པྤ་ཛྫི་ཏྭཱ ཙི་ར་ཀཱ་ལེ ཨེ་ཝ ཨུ་པྤ་ཛྫ་ནྟི. ན ཙ ཨེ་ཏྟ་ཀ་མ་ཏྟེ་ན པུ་རི་མ་ཙི་ཏྟཱ་ནཾ ཨ་ན་ནྟ་རེ དྷ་མྨ་ནྟ་ར་སྶ ཨུ་པྤཱ་ད་ན ས་ཏྟི་ནཱ་མ ན་ཏྠཱི་ཏི ཙ, ཏེ ཨ་ན་ནྟ་ར་པ་ཙྩ་ཡ་དྷ་མྨཱ ནཱ་མ ན ཧོ་ནྟཱི་ཏི ཙ ས་ཀྐཱ ཝ་ཏྟུཾ. ཡ་ཐཱ ཏཾ ར་ཉྙོ ཡོ་དྷཱ ནཱ་མ ཨ་ཏྠི, ཀ་དཱ་ཙི རཱ་ཛཱ ཀཱ་ལཾ ཉ་ཏྭཱ ཏུ་མྷེ ཨི་དཱ་ནི མཱ་ཡུ་ཛ྄ཛྷ་ཐ, ཡུ་དྡྷ་ཀཱ་ལོ ན ཧོ་ཏི, ཨ་སུ་ཀ་སྨིཾ ཀཱ་ལེ ཨེ་ཝ ཡུ་ཛ྄ཛྷ་ཐཱ་ཏི ཝ་དེ་ཡྻ. ཏེ ཙ ཏ་དཱ ཨ་ཡུ་ཛ྄ཛྷ་མཱ་ནཱ ཝི་ཙ་རེ་ཡྻུཾ. ཨེ་ཝཾ ས་ནྟེ་པི ཏེ་སཾ ཡུ་ཛ྄ཛྷ་ན་ས་ཏྟི ནཱ་མ ན་ཏྠཱི་ཏི ཙ, ཏེ ཡོ་དྷཱ ནཱ་མ ན ཧོ་ནྟཱི་ཏི ཙ ན ས་ཀྐཱ ཝ་ཏྟུ་ནྟི.
ཨེ་ཏྠ ཝ་དེ་ཡྻུཾ, ཨི་མ་སྨིཾ པ་ཙྩ་ཡེ ཏེ པ་ན ཨ་རཱུ་པ་དྷ་མྨ་བྷཱ་ཝེ་ན ཨ་ས་ཎྛཱ་ན ཛཱ་ཏི་ཀ་ཏྟཱ མ་ཛ྄ཛྷེ་པ་རི་ཙྪེ་ད་དྷ་མྨ་སྶ ནཱ་མ ཀ་སྶ་ཙི ཨ་བྷཱ་ཝ་ཏོ ས་བྦ་སོ ཨ་ནྟ་ར་ར་ཧི་ཏཱ ཨེ་ཝ ཧོ་ནྟཱི་ཏི ཝུ་ཏྟཾ. ཨེ་ཝཾ ས་ནྟེ པུ་བྦེ ཨཱ་ར་མྨ་ཎ པ་ཙྩ་ཡེ བྷེ་རི་ས་དྡ་ཝཱི་ཎཱ་ས་དྡོ་པ་མཱ་ཧི ཡོ ཙི་ཏྟཱ་ནཾ ཁ་ཎེ ཁ་ཎེ ཨུ་པྤཱ་དོ ཙ ནི་རོ་དྷོ ཙ ཝུ་ཏྟོ, སོ ཨ་མྷེ་ཧི ཀ་ཐཾ པ་ཙྩེ་ཏ་བྦོ་ཏི. ཨ་ཉྙ་མ་ཉྙ་ཝི་རུ་དྡྷཱ་ནཾ ནཱ་ནཱ་ཙི་ཏྟཱ་ནཾ ཁ་ཎ་མ་ཏྟེ་པི པུ་བྦཱ་པ་ར པ་རི་ཝ་ཏྟ་ན་སྶ ལོ་ཀེ པ་ཉྙཱ་ཡ་ན་ཏོ. ཨ་ཡ་མ་ཏྠོ པུ་བྦེ ཙི་ཏྟ ཡ་མ་ཀ་དཱི་པ་ནི་ཡཾ ཝི་ཏྠཱ་ར་ཏོ ཝུ་ཏྟོ་ཡེ་ཝཱ་ཏི. ས་མ་ན་ནྟ་ར་པ་ཙྩ་ཡ དཱི་པ་ནཱ ནི་ཊྛི་ཏཱ.
༦. ས་ཧ་ཛཱ་ཏ་པ་ཙྩ་ཡོ
པ་ཙྩ་ཡ་དྷ་མྨ་ཝི་བྷཱ་གོ ཙ པ་ཙྩ་ཡུ་པྤ་ནྣ་དྷ་མྨ་ཝི་བྷཱ་གོ་ཙ ཝུ་ཙྩ་ཏི. ཨེ་ཀ་ཏོ ཨུ་པྤ་ནྣཱ ས་བྦེ་པི ཙི་ཏྟ་ཙེ་ཏ་སི་ཀཱ དྷ་མྨཱ ཨ་ཉྙ་མ་ཉྙཾ ས་ཧ་ཛཱ་ཏ པ་ཙྩ་ཡཱ ཙ ཧོ་ནྟི ས་ཧ་ཛཱ་ཏ་པ་ཙྩ་ཡུ་པྤ་ནྣཱ ཙ. པ་ཊི་ས་ནྡྷི་ནཱ་མ་ཀྑ་ནྡྷཱ ཙ པ་ཊི་ས་ནྡྷི་ས་ཧ་ཛཱ་ཏཾ ཧ་ད་ཡ་ཝ་ཏྠུ ཙ ཨ་ཉྙ་མ་ཉྙཾ ས་ཧ་ཛཱ་ཏ་པ་ཙྩ་ཡཱ ཙ ཧོ་ནྟི ས་ཧ་ཛཱ་ཏ་པ་ཙྩ་ཡུ་པྤ་ནྣཱ ཙ. ས་བྦཱ་ནི མ་ཧཱ་བྷཱུ་ཏཱ་ནི་པི ཨ་ཉྙ་མ་ཉྙཾ ས་ཧ་ཛཱ་ཏ་པ་ཙྩ་ཡཱ ཙ ཧོ་ནྟི པ་ཙྩ་ཡུ་པྤ་ནྣ་དྷ་མྨཱ ཙ. པ་ཊི་ས་ནྡྷི་ཙི་ཏྟ་སྶ ཨུ་པྤཱ་ད་ཀྑ་ཎེ ས་བྦཱ་ནི ཀ་མྨ་ཛ་རཱུ་པཱ་ནི ཙ པ་ཝ་ཏྟི་ཀཱ་ལེ ཏ་སྶ ཏ་སྶ ཙི་ཏྟ་སྶ ཨུ་པྤཱ་ད་ཀྑ་ཎེ ཏེ་ན ཏེ་ན ཙི་ཏྟེ་ན ཛཱ་ཏཱ་ནི ས་བྦཱ་ནི ཙི་ཏྟ་ཛ་རཱུ་པཱ་ནི ཙ ས་ཧ་ཛཱ་ཏ་ཙི་ཏྟ་སྶ པ་ཙྩ་ཡུ་པྤ་ནྣཱ་ནི ནཱ་མ. ས་བྦཱ་ནི ཨུ་པཱ་དཱ་རཱུ་པཱ་ནི ས་ཧ་ཛཱ་ཏ་མ་ཧཱ་བྷཱུ་ཏཱ་ནཾ པ་ཙྩ་ཡུ་པྤ་ནྣཱ་ནི ནཱ་མ.
ཀེ་ན་ཊྛེ་ན ས་ཧ་ཛཱ་ཏོ, ཀེ་ན་ཊྛེ་ན པ་ཙྩ་ཡོ. ས་ཧ ཛཱ་ན་ན་ཊྛེ་ན ས་ཧ་ཛཱ་ཏོ, ཨུ་པ་ཀཱ་ར་ཀ་ཊྛེ་ན པ་ཙྩ་ཡོ. ཏ་ཏྠ ས་ཧ་ཛཱ་ན་ན་ཊྛེ་ནཱ་ཏི ཡོ དྷ་མྨོ ཛཱ་ཡ་མཱ་ནོ ཨ་ཏྟ་ནོ པ་ཙྩ་ཡུ་པྤ་ནྣེ་ཧི དྷ་མྨེ་ཧི ས་ཧེ་ཝ ས་ཡ་ཉྩ ཛཱ་ཡ་ཏི ཨུ་པྤ་ཛྫ་ཏི, ཨ་ཏྟ་ནོ པ་ཙྩ་ཡུ་པྤ་ནྣེ ཙ དྷ་མྨེ ཨ་ཏྟ་ནཱ ས་ཧེ་ཝ ཛ་ནེ་ཏི ཨུ་པྤཱ་དེ་ཏི, ཏ་སྶ སོ ཨ་ཏྠོ ས་ཧ་ཛཱ་ན་ན་ཊྛོ ནཱ་མ.
ཡ་ཐཱ སཱུ་རི་ཡོ ནཱ་མ ཨུ་ད་ཡ་ནྟོ སཱུ་རི་ཡཱ་ཏ་པེ ཙ སཱུ་རི་ཡཱ ལོ་ཀེ ཙ ཨ་ཏྟ་ནཱ ས་ཧེ་ཝ ཛ་ན་ཡ་ནྟོ ཨུ་དེ་ཏི. ཡ་ཐཱ ཙ པ་དཱི་པོ ནཱ་མ ཛ་ལ་ནྟོ པ་དཱི་པཱ་ཏ་པེ ཙ པ་དཱི་པཱ་ལོ་ཀེ ཙ ཨ་ཏྟ་ནཱ ས་ཧེ་ཝ ཛ་ན་ཡ་ནྟོ ཛ་ལ་ཏི. ཨེ་ཝ་མེ་ཝཾ ཨ་ཡཾ པ་ཙྩ་ཡ་དྷ་མྨོ ཨུ་པྤ་ཛྫ་མཱ་ནོ ཨ་ཏྟ་ནོ པ་ཙྩ་ཡུ་པྤ་ནྣ་དྷ་མྨེ ཨ་ཏྟ་ནཱ ས་ཧེ་ཝ ཨུ་པྤཱ་དེ་ཏི. ཏ་ཏྠ སཱུ་རི་ཡོ ཝི་ཡ ཨེ་ཀ་མེ་ཀོ ནཱ་མ དྷ་མྨོ, སཱུ་རི་ཡཱ་ཏ་པཱ ཝི་ཡ ཏཾ་ས་མྤ་ཡུ་ཏྟ་དྷ་མྨཱ, སཱུ་རི་ཡཱ་ལོ་ཀཱ ཝི་ཡ ས་ཧ་ཛཱ་ཏ་རཱུ་པ་དྷ་མྨཱ. ཏ་ཐཱ སཱུ་རི་ཡོ ཝི་ཡ ཨེ་ཀ་མེ་ཀོ མ་ཧཱ་བྷཱུ་ཏ་རཱུ་པ་དྷ་མྨོ, སཱུ་རི་ཡཱ་ཏ་པཱ ཝི་ཡ ས་ཧ་ཛཱ་ཏ་མ་ཧཱ་བྷཱུ་ཏ་དྷ་མྨཱ, སཱུ་རི་ཡཱ་ལོ་ཀཱ ཝི་ཡ ས་ཧ་ཛཱ་ཏ་ཨུ་པཱ་དཱ་རཱུ་པ་དྷ་མྨཱ, ཨེ་ས ན་ཡོ པ་དཱི་པུ་པ་མཱ་ཡ་པཱི་ཏི. ས་ཧ་ཛཱ་ཏ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༧. ཨ་ཉྙ་མ་ཉྙ་པ་ཙྩ་ཡོ
ས་ཧ་ཛཱ་ཏ་པ་ཙྩ་ཡེ ཝི་བྷ་ཏྟེ་སུ དྷ་མྨེ་སུ ཡོ ཡོ པ་ཙྩ་ཡ དྷ་མྨོ་ཏི ཝུ་ཏྟོ, སོ སོ ཨེ་ཝ ཨི་དྷ པ་ཙྩ་ཡ་དྷ་མྨོ ཙེ་ཝ པ་ཙྩ་ཡུ་པྤ་ནྣ དྷ་མྨོ ཙ ཧོ་ཏི. ས་བྦེ་པི ཙི་ཏྟ་ཙེ་ཏ་སི་ཀཱ དྷ་མྨཱ ཨ་ཉྙ་མ་ཉྙ་སྶ པ་ཙྩ་ཡ་དྷ་མྨཱ ཙ ཧོ་ནྟི ཨ་ཉྙ་མ་ཉྙ་སྶ པ་ཙྩ་ཡུ་པྤ་ནྣ་དྷ་མྨཱ. ས་ཧ་ཛཱ་ཏཱ ཙ་ཏྟཱ་རོ མ་ཧཱ་བྷཱུ་ཏཱ ཨ་ཉྙ་མ་ཉྙ་སྶ པ་ཙྩ་ཡ་དྷ་མྨཱ ཙ ཧོ་ནྟི ཨ་ཉྙ་མ་ཉྙ་སྶ པ་ཙྩ་ཡུ་པྤ་ནྣ་དྷ་མྨཱ ཙ. པ་ཊི་ས་ནྡྷི་ནཱ་མ་ཀྑ་ནྡྷཱ ཙ པ་ཊི་ས་ནྡྷི ས་ཧ་ཛཱ་ཏཾ ཧ་ད་ཡ་ཝ་ཏྠུ་རཱུ་པ་ཉྩ ཨ་ཉྙ་མ་ཉྙ་སྶ པ་ཙྩ་ཡ་དྷ་མྨཱ ཙ ཧོ་ནྟི ཨ་ཉྙ་མ་ཉྙ་སྶ པ་ཙྩ་ཡུ་པྤ་ནྣ་དྷ་མྨཱ ཙ. ཨ་ཏྠོ སུ་ཝི་ཉྙེ་ཡྻོ་ཡེ་ཝ.
ཡ་ཐཱ ཨ་ཉྙ་མ་ཉྙཾ ནི་སྶཱ་ཡ ཨུ་སྶཱ་པི་ཏཱ ཏ་ཡོ ད་ཎྜཱ ཨ་ཉྙ་མ་ཉྙ་སྶ ནི་སྶ་ཡཱ ཙ ཧོ་ནྟི, ཨ་ཉྙ་མ་ཉྙཾ ནི་སྶི་ཏཱ ཙ. ཏེ་སུ ཨེ་ཀ་མེ་ཀ་སྨིཾ ཨུ་སྶི་ཏེ ས་བྦེ ཨུ་སྶི་ཏཱ ཧོ་ནྟི, ཨེ་ཀ་མེ་ཀ་སྨིཾ པ་ཏ་ནྟེ ས་བྦེ པ་ཏ་ནྟི. ཨེ་ཝཾ ཨ་ཉྙ་མ་ཉྙ་དྷ་མྨཱ ཙ ད་ཊྛ་བྦཱ.
ཨེ་ཏྠ ཝ་དེ་ཡྻུཾ, ས་བྦེ ཙེ་ཏ་སི་ཀཱ དྷ་མྨཱ ཙི་ཏྟ་པ་ཙྩ་ཡཾ ཨ་ལ་བྷ མཱ་ནཱ ཨུ་པྤ་ཛྫི་ཏུཾ ན ས་ཀྐོ་ནྟཱི་ཏི ཡུ་ཏྟཾ. ཀ་སྨཱ. ཕུ་ས་ནཱ་དཱི་ནཾ ཙེ་ཏ་སི་ཀ ཀི་ཙྩཱ་ནཾ ཝི་ཛཱ་ན་ན་ཀི་ཙྩ་པུ་བྦ་ངྒ་མ་ཏྟཱ, མ་ནོ་པུ་བྦ་ངྒ་མཱ་ཏི ཧི ཝུ་ཏྟཾ. ཙི་ཏྟཾ པ་ན ཙེ་ཏ་སི་ཀ་པ་ཙྩ་ཡཾ ཨ་ལ་བྷ་མཱ་ནཾ ཨུ་པྤ་ཛྫི་ཏུཾ ན ས་ཀྐོ་ཏཱི་ཏི ན ཡུ་ཛྫེ་ཡྻཱ་ཏི. ཝུ་ཙྩ་ཏེ, ཙེ་ཏ་སི་ཀ་དྷ་མྨཱ ནཱ་མ ཙི་ཏྟ་སྶ ས་ཧཱ་ཡ་ངྒཱ་ནི ཧོ་ནྟི. ཏ་སྨཱ ཏེ་ཧི ཝི་ནཱ ཙི་ཏྟ་མྤི ཨུ་པྤ་ཛྫི་ཏུཾ ན ས་ཀྐོ་ཏི་ཡེ་ཝ. ཨེ་སེ་ཝ ན་ཡོ ཙ་ཏཱུ་སུ མ་ཧཱ་བྷཱུ་ཏེ་སུ་པཱི་ཏི. ཨུ་པཱ་དཱ་རཱུ་པཱ་ནི པ་ན མ་ཧཱ་བྷཱུ་ཏཱ་ནཾ ནི་སྶ་ནྡ་མ་ཏྟ་ཏྟཱ ས་ཧཱ་ཡ་ངྒཱ་ནི ན ཧོ་ནྟཱི་ཏི. ན་ནུ ཨཱ་ཧཱ་ར་རཱུ་པ་ཉྩ ཛཱི་ཝི་ཏ་རཱུ་པ་ཉྩ པ་ཙྩ་ཡ་ཝི་སེ་ས་ཏྟཱ ས་ཧཱ་ཡ་ངྒཾ ཧོ་ཏཱི་ཏི. ཝུ་ཙྩ་ཏེ, ཋི་ཏི་ཡཱ ཨེ་ཝ ས་ཧཱ་ཡ་ངྒཾ ཧོ་ཏི. ན ཨུ་པྤཱ་དེ. ཨི་དྷ པ་ན ཨུ་པྤཱ་དེ ས་ཧཱ་ཡ་ངྒཾ ཨ་དྷི་པྤེ་ཏ་ནྟི. ཨ་ཉྙ་མ་ཉྙ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༨. ནི་སྶ་ཡ་པ་ཙྩ་ཡོ
ཏི་ཝི་དྷོ ནི་སྶ་ཡ་པ་ཙྩ་ཡོ, ས་ཧ་ཛཱ་ཏ་ནི་སྶ་ཡོ ཝ་ཏྠུ པུ་རེ་ཛཱ་ཏ་ནི་སྶ་ཡོ ཝ་ཏྠཱ་ར་མྨ་ཎ་པུ་རེ་ཛཱ་ཏ་ནི་སྶ་ཡོ.
ཏ་ཏྠ ཀ་ཏ་མོ ས་ཧ་ཛཱ་ཏ་ནི་སྶ་ཡོ. ས་བྦོ ས་ཧ་ཛཱ་ཏ པ་ཙྩ་ཡོ ས་ཧ་ཛཱ་ཏ་ནི་སྶ་ཡོ. ཏ་སྨཱ ཏ་ཏྠ པ་ཙྩ་ཡ་ཝི་བྷཱ་གོ ཙ པ་ཙྩ་ཡུ་པྤ་ནྣ་ཝི་བྷཱ་གོ ཙ ས་ཧ་ཛཱ་ཏ་པ་ཙྩ་ཡེ ཝུ་ཏྟ་ན་ཡེ་ན ཝེ་དི་ཏ་བྦོ.
ཀ་ཏ་མོ པ་ན ཝ་ཏྠུ་པུ་རེ་ཛཱ་ཏ་ནི་སྶ་ཡོ. ཚ ཝ་ཏྠཱུ་ནི ཙ་ཀྑུ ཝ་ཏྠུ སོ་ཏ་ཝ་ཏྠུ གྷཱ་ན་ཝ་ཏྠུ ཛི་ཝ྄ཧཱ་ཝ་ཏྠུ ཀཱ་ཡ་ཝ་ཏྠུ ཧ་ད་ཡ་ཝ་ཏྠུ. ཨི་མཱ་ནི ཚ་ཝ་ཏྠཱུ་ནི པ་ཝ་ཏྟི་ཀཱ་ལེ ས་ཏྟཱ་ནཾ ཝི་ཉྙཱ་ཎ་དྷཱ་ཏཱུ་ནཾ ཝ་ཏྠུ་པུ་རེ ཛཱ་ཏ་ནི་སྶ་ཡོ.
ཝ་ཏྠུ་རཱུ་པ་མེ་ཝ པུ་རེ་ཛཱ་ཏཾ ཧུ་ཏྭཱ ནི་སྶ་ཡོ ཝ་ཏྠུ་པུ་རེ་ཛཱ་ཏ ནི་སྶ་ཡོ. ཏ་ཏྠ ཙི་ཏྟ་ཙེ་ཏ་སི་ཀཱ་ནཾ ནི་སྶ་ཡ་ཊྛཱ་ན་ཊྛེ་ན ཝ་ཏྠུ ནཱ་མ. པུ་རེ་ཛཱ་ཏ་ནྟི ཨ་ཏྟ་ནོ ཨ་ཏྟ་ནོ པ་ཙྩ་ཡུ་པྤ་ནྣ་སྶ དྷ་མྨ་སྶ ཨུ་པྤ་ཏྟི་ཀྑ་ཎ་ཏོ པུ་རི་མེ ཁ་ཎེ ཛཱ་ཏཾ.
ཏ་ཏྠ པ་ཊི་ས་ནྡྷི་ཙི་ཏྟཾ ཏ་དཱ པུ་རེ་ཛཱ་ཏ་སྶ ཝ་ཏྠུ་རཱུ་པ་སྶ ཨ་བྷཱ་ཝ་ཏོ ཨ་ཏྟ་ནཱ ས་ཧུ་པྤ་ནྣ་མེ་ཝ ཧ་ད་ཡ་ཝ་ཏྠུ་རཱུ་པཾ ནི་སྶཱ་ཡ ཨུ་པྤ་ཛྫ་ཏི. པ་ཋ་མ བྷ་ཝ་ངྒ་ཙི་ཏྟཾ པ་ན པ་ཊི་ས་ནྡྷི་ཙི་ཏྟེ་ན ས་ཧུ་པྤ་ནྣ་ཧ་ད་ཡ ཝ་ཏྠུ་རཱུ་པཾ ནི་སྶཱ་ཡ ཨུ་པྤ་ཛྫ་ཏི. དུ་ཏི་ཡ་བྷ་ཝ་ངྒ་ཙི་ཏྟཾ པ་ཋ་མ་བྷ་ཝ་ངྒ་ཙི་ཏྟེ་ན ས་ཧུ་པྤ་ནྣཾ ནི་སྶཱ་ཡ ཨུ་པྤ་ཛྫ་ཏི. ཨེ་ཝཾ ཏ་ཏི་ཡ་བྷ་ཝ་ངྒ་ཙི་ཏྟཾ དུ་ཏི་ཡ བྷ་ཝ་ངྒ་ཙི་ཏྟེ་ན ས་ཧུ་པྤ་ནྣ་ནྟི་ཨཱ་དི་ནཱ ཡཱ་ཝ་མ་ར་ཎཱ་ས་ནྣ་ཀཱ་ལཱ དྭི་ནྣཾ མ་ནོ་དྷཱ་ཏུ་མ་ནོ་ཝི་ཉྙཱ་ཎ་དྷཱ་ཏཱུ་ནཾ ཝ་ཏྠུ་པུ་རེ་ཛཱ་ཏ་ནི་སྶ་ཡོ ཝེ་དི་ཏ་བྦོ.
ཡ་ཐཱ ཝཱི་ཎཱ་ས་དྡཱ ནཱ་མ ཝཱི་ཎཱ་ཏ་ནྟཱི་སུ ཝཱི་ཎཱ་ད་ཎྜ་ཀེ་ཧི པ་ཧ་ར་ཎ་ཝེ་གེ་ན ཨེ་ཝ ཛཱ་ཡ་ནྟི, ནོ ཨ་ཉྙ་ཐཱ. ཏ་ཐཱ པ་ཉྩ་ཝི་ཉྙཱ་ཎཱ་ནི ནཱ་མ པ་ཉྩ་ཝ་ཏྠུ་ས་ངྑཱ་ཏེ་སུ པ་ཉྩ་དྭཱ་རེ་སུ པ་ཉྩ་ནྣཾ ཨཱ་ར་མྨ་ཎཱ་ནཾ ཨཱ་པཱ་ཏཱ ག་མ་ན་ཝེ་གེ་ན ཨེ་ཝ ཛཱ་ཡ་ནྟི, ནོ ཨ་ཉྙ་ཐཱ.
ཨཱ་པཱ་ཏཱ་ག་མ་ན་ཉྩ ཏེ་སཾ དྭཱ་རཱ་ར་མྨ་ཎཱ་ནཾ ཋི་ཏི་པ་ཏྟ་ཀཱ་ལེ ཨེ་ཝ ཧོ་ཏི. ཨཱ་པཱ་ཏཱ་ག་མ་ན་པ་ཙྩ་ཡཱ ཙ དྭི་ཀྑ་ཏྟུཾ བྷ་ཝ་ངྒཾ ཙ་ལ་ཏི. བྷ་ཝ་ངྒ་ཙ་ལ་ན པ་ཙྩ་ཡཱ ཙ ཨཱ་ཝ་ཛྫ་ནཾ ཨུ་པྤ་ཛྫ་ཏི. ཨཱ་ཝ་ཛྫ་ན་པ་ཙྩ་ཡཱ ཙ ཏཱ་ནི པ་ཉྩ་ཝི་ཉྙཱ་ཎཱ་ནི ཨུ་པྤ་ཛྫ་ནྟི. ཏ་སྨཱ ཙ་ཀྑཱ་དཱི་ནི པ་ཉྩ་ཝ་ཏྠཱུ་ནི པུ་རེ ཨ་ཏཱི་ཏ་བྷ་ཝ་ངྒ་ཙི་ཏྟ་སྶ ཨུ་པྤཱ་ད་ཀྑ་ཎེ ཨུ་པྤ་ནྣཱ་ནི ཨེ་ཝ པ་ཉྩ་ཝི་ཉྙཱ་ཎ་དྷཱ་ཏཱུ་ནཾ ཝ་ཏྠུ་པུ་རེ་ཛཱ་ཏ་པ་ཙྩ་ཡཱ ཧོ་ནྟི.
མ་ར་ཎཱ་ས་ནྣ་ཀཱ་ལེ པ་ན ས་བྦཱ་ནི ཚ ཝ་ཏྠཱུ་ནི ཙུ་ཏི་ཙི་ཏྟ་ཏོ པུ་རེ ས་ཏྟ་ར་ས་མ་སྶ བྷ་ཝ་ངྒ་ཙི་ཏྟ་སྶ ཨུ་པྤཱ་ད་ཀྑ་ཎེ ཨེ་ཝ ཨུ་པྤ་ཛྫ་ནྟི, ཏ་ཏོ པ་རཾ ན ཨུ་པྤ་ཛྫ་ནྟི. ཏ་སྨཱ མ་ར་ཎཱ་ས་ནྣ་ཀཱ་ལེ བྷ་ཝ་ངྒ་ཙི་ཏྟཱ་ནི ཙ ས་བྦཱ་ནི ཚ་དྭཱ་རི་ཀ་ཝཱི་ཐི་ཙི་ཏྟཱ་ནི ཙ ཙུ་ཏི་ཙི་ཏྟ་ཉྩ པུ་རེ་ཏ་རཾ ཨུ་པྤ་ནྣཱ་ནི ཏཱ་ནི་ཡེ་ཝ ཨ་ཏྟ་ནོ ཨ་ཏྟ་ནོ ཝ་ཏྠཱུ་ནི ནི་སྶཱ་ཡ ཨུ་པྤ་ཛྫ་ནྟི. ཨ་ཡཾ ཝ་ཏྠུ་པུ་རེ་ཛཱ་ཏ ནི་སྶ་ཡོ.
ཀ་ཏ་མོ པ་ན ཝ་ཏྠཱ་ར་མྨ་ཎ་པུ་རེ་ཛཱ་ཏ་ནི་སྶ་ཡོ. ཡ་དཱ ཨ་ཏྟ་ནོ ཨ་ཛ྄ཛྷ་ཏྟཾ ཝ་ཏྠུ་རཱུ་པཾ ཨཱ་ར་བྦྷ ཡཾ རཱུ་པཾ ནི་སྶཱ་ཡ མ་མ མ་ནོ་ཝི་ཉྙཱ་ཎཾ ཝ་ཏྟ་ཏི, ཨེ་ཏཾ མ་མ ཨེ་སོ ཧ་མ་སྨི ཨེ་སོ མེ ཨ་ཏྟཱ་ཏི ཨེ་ཝཾ ཏ་ཎྷཱ་མཱ་ན དི་ཊྛཱི་ཧི ག་ཧ་ཎ་ཝ་སེ་ན ཝཱ ཨེ་ཏཾ ཨ་ནི་ཙྩཾ ཨེ་ཏཾ དུ་ཀྑཾ ཨེ་ཏཾ ཨ་ན་ཏྟཱ་ཏི ཨེ་ཝཾ ས་མྨ་ས་ན་ཝ་སེ་ན ཝཱ ཨཱ་ཝ་ཛྫ་ནཱ་དཱི་ནི མ་ནོ་དྭཱ་རི་ཀ་ཝཱི་ཐི ཙི་ཏྟཱ་ནི པ་ཝ་ཏྟ་ནྟི. ཏ་དཱ ཏཾ ཏཾ ཝ་ཏྠུ་རཱུ་པཾ པ་ཙྩེ་ཀཾ ཏེ་སཾ ནི་སྶ་ཡ་ཝ་ཏྠུ ཙ ཧོ་ཏི ཏེ་སཾ ཨཱ་ར་མྨ་ཎ་ཉྩ. ཏ་སྨཱ ཏཾ ཏཾ ཧ་ད་ཡ་རཱུ་པཾ ཏ་སྶ ཏ་སྶ ཙི་ཏྟུ་པྤཱ་ད་སྶ ཝ་ཏྠཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡོ ཧོ་ཏི. ཨ་ཡཾ ཝ་ཏྠཱ་ར་མྨ་ཎ པུ་རེ་ཛཱ་ཏ་ནི་སྶ་ཡོ. ཨེ་ཝཾ ནི་སྶ་ཡ་པ་ཙྩ་ཡོ ཏི་ཝི་དྷོ ཧོ་ཏི.
ཨི་དྷ སུ་ཏྟ་ནྟ་ནི་སྶ་ཡོ་པི ཝ་ཏྟ་བྦོ. ཨི་མེ མ་ནུ་སྶཱ ཝཱ ཏི་ར་ཙྪཱ་ན་ག་ཏཱ ཝཱ རུ་ཀྑཱ་ད་ཡོ ཝཱ མ་ཧཱ་པ་ཐ་ཝི་ཡཾ པ་ཏི་ཊྛི་ཏཱ, མ་ཧཱ པ་ཐ་ཝཱི ཙ ཧེ་ཊྛཱ མ་ཧཱ་ཨུ་ད་ཀ་ཀྑ་ནྡྷེ, མ་ཧཱ་ཨུ་ད་ཀ་ཀྑ་ནྡྷོ ཙ ཧེ་ཊྛཱ མ་ཧཱ་ཝཱ་ཏ་ཀྑ་ནྡྷེ, མ་ཧཱ་ཝཱ་ཏ་ཀྑ་ནྡྷོ ཙ ཧེ་ཊྛཱ ཨ་ཛ་ཊཱ་ཀཱ་སེ, མ་ནུ་སྶཱ གེ་ཧེ་སུ, བྷི་ཀྑཱུ ཝི་ཧཱ་རེ་སུ, དེ་ཝཱ དི་བྦ་ཝི་མཱ་ནེ་སཱུ་ཏི་ཨཱ་དི་ནཱ ས་བྦཾ ལོ་ཀ་པྤ་ཝ་ཏྟིཾ ཉ་ཏྭཱ ནི་སྶ་ཡ་པ་ཙྩ་ཡོ ཝེ་དི་ཏ་བྦོ. ནི་སྶ་ཡ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༩. ཨུ་པ་ནི་སྶ་ཡ་པ་ཙྩ་ཡོ
ཏི་ཝི་དྷོ ཨུ་པ་ནི་སྶ་ཡ་པ་ཙྩ་ཡོ, ཨཱ་ར་མྨ་ཎཱུ་པ་ནི་སྶ་ཡོ ཨ་ན་ནྟ་རཱུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ. ཏ་ཏྠ ཨཱ་ར་མྨ་ཎཱུ་པ ནི་སྶ་ཡོ ཨཱ་ར་མྨ་ཎཱ་དྷི་པ་ཏི་པ་ཙྩ་ཡ་ས་དི་སོ, ཨ་ན་ནྟ་རཱུ་པ་ནི་སྶ་ཡོ ཨ་ན་ནྟ་ར་པ་ཙྩ་ཡ་ས་དི་སོ.
ཀ་ཏ་མོ པ་ཀ་ཏཱུ་པ་ནི་སྶ་ཡོ. ས་བྦེ་པི ཨ་ཏཱི་ཏཱ་ནཱ་ག་ཏ པ་ཙྩུ་པྤ་ནྣཱ ཨ་ཛ྄ཛྷ་ཏྟ་བ་ཧི་དྡྷཱ་བྷཱུ་ཏཱ ཙི་ཏྟ་ཙེ་ཏ་སི་ཀ་རཱུ་པ་དྷ་མྨཱ ཙ ནི་བྦཱ་ན་ཉྩ པ་ཉྙ་ཏྟི ཙ ས་བྦེ་སཾ པ་ཙྩུ་པྤ་ནྣཱ་ནཾ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ ཡ་ཐཱ་ར་ཧཾ པ་ཀ་ཏཱུ་པ་ནི་སྶ་ཡོ.
ཏ་ཏྠ ཨ་ཏཱི་ཏོ པ་རི་ནི་བྦུ་ཏོ ཨ་མྷཱ་ཀཾ བུ་དྡྷོ ཙ དྷ་མྨོ ཙ ཨ་རི་ཡ་སཱ་ཝ་ཀ་ས་ངྒྷོ ཙ ས་མྨུ་ཏི་ས་ངྒྷ་པ་ར་མྤ་རཱ ཙ ཨ་མྷཱ་ཀཾ པ་ཙྪི་མ ཛ་ནཱ་ནཾ ཀུ་ས་ལུ་པྤ་ཏྟི་ཡཱ པ་ཀ་ཏཱུ་པ་ནི་སྶ་ཡ་པ་ཙྩ་ཡོ. ཏ་ཐཱ ལོ་ཀེ ཨ་ཏཱི་ཏཱ ཀཱ་ལ་ངྐ་ཏཱ མཱ་ཏཱ་པི་ཏ་རོ ཙ ཨཱ་ཙ་རི་ཡཱ ཙ པ་ཎྜི་ཏ་ས་མ་ཎ་བྲཱ་ཧྨ་ཎཱ ཙ པཱ་ཀ་ཊཱ ནཱ་ནཱ་ཏི་ཏྠཱ་ཙ་རི་ཡཱ ཙ མ་ཧི་དྡྷི་ཀཱ མ་ཧཱ་ནུ་བྷཱ་ཝཱ པོ་རཱ་ཎ་ཀ་རཱ་ཛཱ་ནོ ཙ པ་ཙྪི་མ་ཀཱ་ནཾ ཛ་ནཱ་ནཾ ཀུ་ས་ལུ་པྤ་ཏྟི་ཡཱ ཝཱ ཨ་ཀུ་ས་ལུ་པྤ་ཏྟི་ཡཱ ཝཱ སུ་ཁ་དུ་ཀྑུ་པྤ་ཏྟི་ཡཱ ཝཱ པ་ཀ་ཏཱུ་པ་ནི་སྶ་ཡོ. ཏ་ཐཱ ཧི ཏེ པ་ཙྪི་མ་ཀཱ་ནཾ ཛ་ནཱ་ནཾ ཨ་ཏྠཱ་ཡ ནཱ་ནཱ་ས་དྡྷ་མྨ་པ་ཉྙ་ཏྟི་ཡོ ཝཱ ནཱ་ནཱ་ཨ་ས་དྡྷ་མྨ་པ་ཉྙ་ཏྟི་ཡོ ཝཱ ནཱ་ནཱ་ལོ་ཀཱུ་པ་ཀ་ར་ཎཱ་ནི ཝཱ པུ་རེ པ་ཊྛ་པེ་སུཾ. པ་ཙྪི་མ་ཛ་ནཱ ཙ ཏེ་ཧི པ་ཊྛ་པི་ཏེ་སུ དཱ་ན་སཱི་ལཱ་དི་དྷ་མྨེ་སུ ཝཱ ལོ་ཀ་ཙཱ་རི་ཏྟ ཀུ་ལ་གོ་ཏྟ་ཙཱ་རི་ཏྟ དྷ་མྨེ་སུ ཝཱ ནཱ་ནཱ་དི་ཊྛི་ཝཱ་དེ་སུ ཝཱ ནཱ་ནཱ་ཀ་མྨཱ་ཡ་ཏ་ན་སི་པྤཱ་ཡ་ཏ་ན ཝི་ཛྫཱ་ཋཱ་ནེ་སུ ཝཱ ཡ་ཐཱ་པ་ཊྛ་པི་ཏེ་སུ གཱ་མ་ནི་ག་མ་ན་ག་ར་ཁེ་ཏྟ་ཝ་ཏྠུ ཏ་ལཱ༹་ཀ་པོ་ཀྑ་ར་ཎི་ཨཱ་ཝཱ་ཊཱ་དཱི་སུ ཝཱ གེ་ཧ་ར་ཐ་ས་ཀ་ཊ་ནཱ་ཝཱ ས་མྤོ་ཏ་ས་མྦ་ནྡྷཱ་དཱི་སུ ཝཱ ཛཱ་ཏ་རཱུ་པ་ར་ཛ་ཏ་མ་ཎི་མུ་ཏྟཱ་དཱི་སུ ཝཱ དཱ་ཡ་ཛྫཾ པ་ཊི་པ་ཛྫ་ནྟཱ ལོ་ཀེ ཝ་ཌྜྷ་ནྟི.
ཨ་ནཱ་ག་ཏོ་པི མེ་ཏྟེ་ཡྻོ ནཱ་མ བུ་དྡྷོ ཙ ཏ་སྶ དྷ་མྨོ ཙ ཏ་སྶ ས་ངྒྷོ ཙ ཨེ་ཏ་ར་ཧི བ་ཧུ་ཛྫ་ནཱ་ནཾ པཱ་ར་མི་པུ་ཉྙ་པྤ་ཝ་ཏྟི་ཡཱ པ་ཀ་ཏཱུ་པ་ནི་སྶ་ཡ་པ་ཙྩ་ཡོ. ཏ་ཐཱ ཨི་མ་སྨིཾ བྷ་ཝེ ཙ པ་ཙྪི་མེ ཀཱ་ལེ པ་ཊི་ལ་བྷི་སྶ་མཱ་ནཱ ཨི་སྶ་རི་ཡ་ཊྛཱ་ན་དྷ་ན་དྷ་ཉྙ་ས་མྤ་ཏྟི་ཡོ པུ་རི་མེ ཀཱ་ལེ ཋི་ཏཱ་ནཾ མ་ཧཱ་ཛ་ནཱ་ནཾ ནཱ་ནཱ་བྷི་ས་ངྑཱ་རུ་པྤ་ཏྟི་ཡཱ པ་ཀ་ཏཱུ་པ་ནི་སྶ་ཡ པ་ཙྩ་ཡོ. ཨ་ནཱ་ག་ཏ་བྷ་ཝེ ཙ ཨ་ནུ་བྷ་ཝི་སྶ་མཱ་ནཱ བྷ་ཝ་ས་མྤ་ཏྟི བྷོ་ག ས་མྤ་ཏྟི་ཡོ མ་གྒ་ཕ་ལ་ནི་བྦཱ་ན་ས་མྤ་ཏྟི་ཡོ ཙ ཨེ་ཏ་ར་ཧི པ་ཙྩུ་པྤ་ནྣ་བྷ་ཝེ ཋི་ཏཱ་ནཾ དཱ་ན་སཱི་ལཱ་དི་པུ་ཉྙ་ཀི་རི་ཡུ་པྤ་ཏྟི་ཡཱ པ་ཀ་ཏཱུ་པ་ནི་སྶ་ཡ་པ་ཙྩ་ཡོ. ཡ་ཐཱ ཧི ལོ་ཀེ ཧེ་མ་ནྟེ ཀཱ་ལེ དྷ་ཉྙ་པྥ་ལཱ་ནི ལ་བྷི་སྶཱ་མཱ་ཏི ཝ་སྶི་ཀེ ཀཱ་ལེ ཀ་སྶ་ན་ཝ་པྤ་ན་ཀ་མྨཱ་ནི ཨཱ་ར་བྷ་ནྟི, ཀ་མྨེ སི་དྡྷེ ཏཾ ཏཾ དྷ་ནཾ ལ་བྷི་སྶཱ་མཱ་ཏི པུ་བྦ་བྷཱ་གེ ཏཾ ཏཾ ཝཱི་རི་ཡ་ཀ་མྨཾ ཝཱ ཏཾ ཏཾ པ་ཉྙཱ་ཀ་མྨཾ ཝཱ ཨཱ་ར་བྷ་ནྟི. ཏ་ཏྠ དྷ་ཉྙ་པྥ་ལ་པྤ་ཊི་ལཱ་བྷོ ཙ ཏཾ ཏཾ དྷ་ན་པྤ་ཊི ལཱ་བྷོ་ཙ ཏཾ ཏཾ ཀ་མྨཱ་ར་མྦྷ་སྶ ཨ་ནཱ་ག་ཏ་པ་ཀ་ཏཱུ་པ་ནི་སྶ་ཡ་པ་ཙྩ་ཡོ ཏཾ ཏཾ ཀ་མྨཱ་ར་མྦྷོ ཙ དྷ་ཉྙ་པྥ་ལ་པྤ་ཊི་ལཱ་བྷ་སྶ ཙ ཏཾ ཏཾ དྷ་ན་པྤ་ཊི ལཱ་བྷ་སྶ ཙ ཨ་ཏཱི་ཏ་པ་ཀ་ཏཱུ་པ་ནི་སྶ་ཡ་པ་ཙྩ་ཡོ. ཨེ་ཝ་མེ་ཝ པ་ཙྪི་མེ ཨ་ནཱ་ག་ཏེ ཀཱ་ལེ ནཱ་ནཱ་ཀ་མྨ་པྥ་ལཱ་ནི ས་མྤ་སྶ་ནྟཱ པ་ཏྠ་ཡ་ནྟཱ མ་ཧཱ་ཛ་ནཱ པུ་རི་མེ པ་ཙྩུ་པྤ་ནྣེ ཀཱ་ལེ ནཱ་ནཱ་པུ་ཉྙ་ཀ་མྨཱ་ནི ཨཱ་ར་བྷ་ནྟི. ཏ་ཏྠ པུ་ཉྙ་པྥ་ལཱ་ནི པུ་ཉྙ་ཀ་མྨཱ་ནཾ ཨ་ནཱ་ག་ཏ་པ་ཀ་ཏཱུ་པ་ནི་སྶ་ཡ་པ་ཙྩ་ཡོ. པུ་ཉྙ་ཀ་མྨཱ་ནི པུ་ཉྙ་པྥ་ལཱ་ནཾ ཨ་ཏཱི་ཏ་པ་ཀ་ཏཱུ་པ་ནི་སྶ་ཡ་པ་ཙྩ་ཡོ. ཏ་སྨཱ ཨ་ནཱ་ག་ཏ་པ་ཀ་ཏཱུ་པ་ནི་སྶ་ཡོ་པི ཨ་ཏཱི་ཏ་པ་ཀ་ཏཱུ་པ་ནི་སྶ་ཡོ ཝི་ཡ ཨ་ཏི་མ་ཧ་ནྟོ པ་ཙྩ་ཡོ ཧོ་ཏི.
པ་ཙྩུ་པྤ་ནྣཱ བུ་དྡྷཱ་ཡོ པ་ཙྩ་ཡཱ པ་ཙྩུ་པྤ་ནྣཱ་ནཾ མ་ནུ་སྶ་དེ་ཝ་བྲ་ཧྨཱ་ནཾ པ་ཙྩུ་པྤ་ནྣཱ མཱ་ཏཱ་པི་ཏ་རོ པ་ཙྩུ་པྤ་ནྣཱ་ནཾ པུ་ཏྟ་དྷཱི་ཏཱ་དཱི་ནཾ པ་ཙྩུ་པྤ་ནྣ་པ་ཀ་ཏཱུ་པ ནི་སྶ་ཡོ ནཱ་མ. སོ སུ་པཱ་ཀ་ཊོ་ཡེ་ཝ.
ཨ་ཛ྄ཛྷ་ཏྟ་བྷཱུ་ཏཱ པ་ཀ་ཏཱུ་པ་ནི་སྶ་ཡ་དྷ་མྨཱ ནཱ་མ བུ་དྡྷཱ་དཱི་སུ ས་ཝི་ཉྙཱ་ཎ་ཀ་ས་ནྟཱ་ནེ་སུ ཨུ་པྤ་ནྣཱ པ་ཙྩ་ཡ་དྷ་མྨཱ. བ་ཧི་དྡྷཱ་བྷཱུ་ཏཱ པ་ཀ་ཏཱུ་པ་ནི་སྶ་ཡ་དྷ་མྨཱ ནཱ་མ ས་ཏྟཱ་ནཾ པ་ཏི་ཊྛཱ་ན་བྷཱུ་ཏཱ པ་ཐ་ཝི་པ་བྦ་ཏ་ན་དཱི ས་མུ་དྡཱ་ད་ཡོ ཏེ་སཾ ཏེ་སཾ ས་ཏྟཱ་ནཾ བ་ཧཱུ་པ་ཀཱ་རཱ ཨ་ར་ཉྙ་ཝ་ན་རུ་ཀྑ ཏི་ཎ་པུ་བྦ་ཎྞཱ་པ་ར་ཎྞཱ་ད་ཡོ ཙ་ནྡ་སཱུ་རི་ཡ་ག་ཧ་ན་ཀྑ་ཏྟཱ་ད་ཡོ ཝ་སྶོ་ད་ཀ་ཨ་གྒི་ཝཱ་ཏ་སཱི་ཏ་ཨུ་ཎྷཱ་ད་ཡོ ཙ ས་བྦེ་པི ཏེ ས་ཏྟཱ་ནཾ ཀུ་ས་ལུ་པྤ་ཏྟི་ཡཱ ཝཱ ཨ་ཀུ་ས་ལུ་པྤ་ཏྟི་ཡཱ ཝཱ སུ་ཁུ་པྤ་ཏྟི་ཡཱ ཝཱ དུ་ཀྑུ་པྤ་ཏྟི་ཡཱ ཝཱ བ་ལ་ཝ་པ་ཙྩ་ཡཱ ཧོ་ནྟི.
ཨི་མེ ཛ་ནཱ དི་ཊྛེ་ཝ དྷ་མྨེ པ་རི་ནི་བྦཱ་ཡི་སྶཱ་མཱ་ཏི བོ་དྷི་པ་ཀྑི་ཡ དྷ་མྨེ ཝཱ བྷཱ་ཝེ་ནྟི, ཨ་ནཱ་ག་ཏེ བུ་དྡྷ་ཀཱ་ལེ པ་རི་ནི་བྦཱ་ཡི་སྶཱ་མཱ་ཏི པཱ་ར་མཱི་དྷ་མྨེ ཝཱ པ་རི་པཱུ་རེ་ནྟི. ཏ་ཏྠ ནི་བྦཱ་ནཾ ཏེ་སཾ དྷ་མྨཱ་ནཾ ཨུ་པྤ་ཏྟི་ཡཱ བ་ལ་ཝ་པ་ཙྩ་ཡོ ཧོ་ཏི.
ལོ་ཀེ ནཱ་ནཱ་ཝོ་ཧཱ་ར་བྷཱུ་ཏཱ ནཱ་མ་པ་ཉྙ་ཏྟི་ཡོ ཙ བུ་དྡྷ སཱ་ས་ནེ ཏི་པི་ཊ་ཀ་པ་རི་ཡ་ཏྟི་དྷ་མྨ་བྷཱུ་ཏཱ ནཱ་མ་པ་ཉྙ་ཏྟི་ཡོ ཙ ཏེ་སཾ ཏེ་སཾ ཨ་ཏྠཱ་ནཾ ཛཱ་ན་ན་ཏྠཱ་ཡ བ་ལ་ཝ་པ་ཙྩ་ཡོ.
ཏ་ཏྠ ས་ངྑ་ཏ་དྷ་མྨཱ ནཱ་མ པ་ཙྩ་ཡེ ས་ཏི ཨུ་པྤ་ཛྫ་ནྟི, ཨ་ས་ཏི ནུ་པྤ་ཛྫ་ནྟི. ཨུ་པྤ་ཛྫི་ཏྭཱ་པི པ་ཙྩ་ཡེ ས་ཏི ཏི་ཊྛ་ནྟི, ཨ་ས་ཏི ན ཏི་ཊྛ་ནྟི. ཏ་སྨཱ ཏེ་སཾ ཨུ་པྤ་ཏྟི་ཡཱ ཝཱ ཋི་ཏི་ཡཱ ཝཱ པ་ཙྩ་ཡོ ནཱ་མ ཨི་ཙྪི་ཏ་བྦོ. ནི་བྦཱ་ནཾ པ་ན པ་ཉྙ་ཏྟི ཙ ཨ་ས་ངྑ་ཏ་དྷ་མྨཱ ཧོ་ནྟི ཨ་ཛཱ་ཏི་དྷ་མྨཱ ཨ་ནུ་པྤཱ་ད་དྷ་མྨཱ ནི་ཙྩ དྷ་མྨཱ དྷུ་ཝ་དྷ་མྨཱ. ཏ་སྨཱ ཏེ་སཾ ཨུ་པྤཱ་དཱ་ཡ ཝཱ ཋི་ཏི་ཡཱ ཝཱ པ་ཙྩ་ཡོ ནཱ་མ ན་ཏྠཱི་ཏི.
ཀུ་ས་ལོ ཀུ་ས་ལ་སྶ ཨུ་པ་ནི་སྶ་ཡོ. ས་དྡྷཾ ཨུ་པ་ནི་སྶཱ་ཡ དཱ་ནཾ དེ་ཏི, སཱི་ལཾ ས་མཱ་དི་ཡ་ཏཱི་ཏི་ཨཱ་དི་ནཱ སུ་པཱ་ཀ་ཊོ. ཏ་ཐཱ རཱ་གཾ ཨུ་པ་ནི་སྶཱ་ཡ པཱ་ཎཾ ཧ་ན་ཏི, ཨ་དི་ནྣཾ ཨཱ་དི་ཡ་ཏཱི་ཏི་ཨཱ་དི་ནཱ ས་པྤཱ་ཡཾ ཨུ་ཏུཾ ས་པྤཱ་ཡཾ བྷོ་ཛ་ནཾ ཨུ་པ་ནི་སྶཱ་ཡ ཀཱ་ཡི་ཀཾ སུ་ཁཾ པ་ཙྩ་ནུ་བྷོ་ཏཱི་ཏི་ཨཱ་དི་ནཱ ཙ ཨ་ཀུ་ས་ལོ ཨ་ཀུ་ས་ལ་སྶ, ཨ་བྱཱ་ཀ་ཏོ ཨ་བྱཱ་ཀ་ཏ་སྶ ཨུ་པ་ནི་སྶ་ཡོ་པི སུ་པཱ་ཀ་ཊོ.
ཀུ་ས་ལོ པ་ན ཨ་ཀུ་ས་ལ་སྶ་པི བ་ལ་ཝཱུ་པ་ནི་སྶ་ཡོ. དཱ་ནཾ ད་ཏྭཱ ཏེ་ན དཱ་ནེ་ན ཨ་ཏྟཱ་ནཾ ཨུ་ཀྐཾ་སེ་ཏི, པ་རཾ ཝ་མྦྷེ་ཏི. ཏ་ཐཱ སཱི་ལ ས་མྤ་ནྣོ ཧུ་ཏྭཱ ས་མཱ་དྷི་ས་མྤ་ནྣོ ཧུ་ཏྭཱ པ་ཉྙཱ་ས་མྤ་ནྣོ ཧུ་ཏྭཱ ཨ་ཏྟཱ་ནཾ ཨུ་ཀྐཾ་སེ་ཏི, པ་རཾ ཝ་མྦྷེ་ཏི.
ཀུ་ས་ལོ ཨ་བྱཱ་ཀ་ཏ་སྶ་པི བ་ལ་ཝཱུ་པ་ནི་སྶ་ཡོ. ས་བྦཱ་ནི ཙ་ཏུ་བྷཱུ་མི་ཀ་ཀུ་ས་ལ་ཀ་མྨཱ་ནི ཝཱ ཀ་མྨ་པ་རི་ཝཱ་རཱ་ནི ཀུ་ས་ལཱ་ནི ཝཱ ཀཱ་ལ་ནྟ་རེ ཙ་ཏུ་བྷཱུ་མི་ཀཱ་ནཾ ཝི་པཱ་ཀཱ་བྱཱ་ཀ་ཏཱ་ནཾ བ་ལ་ཝཱུ་པ་ནི་སྶ་ཡོ. དཱ་ན་པཱ་ར་མིཾ པཱུ་རེ་ནྟཱ པཱུ་ར་ཎ་ཀཱ་ལེ བ་ཧུཾ ཀཱ་ཡི་ཀ་དུ་ཀྑཾ པ་ཙྩ་ནུ་བྷ་ཝ་ནྟི. ཏ་ཐཱ སཱི་ལ་པཱ་ར་མིཾ ནི་ཀྑ་མ་པཱ་ར་མིཾ པ་ཉྙཱ་པཱ་ར་མིཾ ཝཱི་རི་ཡ་པཱ་ར་མིཾ ཁ་ནྟི་པཱ་ར་མིཾ ས་ཙྩ་པཱ་ར་མིཾ ཨ་དྷི་ཊྛཱ་ན་པཱ་ར་མིཾ མེ་ཏྟཱ་པཱ་ར་མིཾ ཨུ་པེ་ཀྑཱ པཱ་ར་མིཾ. ཨེ་སེ་ཝ ན་ཡོ ཛྷཱ་ན་བྷཱ་ཝ་ནཱ མ་གྒ་བྷཱ་ཝ་ནཱ་སུ་པི.
ཨ་ཀུ་ས་ལོ ཀུ་ས་ལ་སྶ་པི བ་ལ་ཝཱུ་པ་ནི་སྶ་ཡོ. ཨི་དྷེ་ཀ་ཙྩོ པཱ་པཾ ཀ་ཏྭཱ པ་ཙྪཱ ཝི་པྤ་ཊི་སཱ་རཱི ཧུ་ཏྭཱ ཏ་སྶ པཱ་པ་སྶ པ་ཧཱ་ནཱ་ཡ དཱ་ན་སཱི་ལ་ཛྷཱ་ན་མ་གྒ་ཀུ་ས་ལཱ་ནི ས་མྤཱ་དེ་ཏི. ཏཾ པཱ་པཾ ཏེ་སཾ ཀུ་ས་ལཱ་ནཾ བ་ལ་ཝཱུ་པ་ནི་སྶ་ཡོ.
ཨ་ཀུ་ས་ལོ ཨ་བྱཱ་ཀ་ཏ་སྶ་པི བ་ལ་ཝཱུ་པ་ནི་སྶ་ཡོ. ཨི་དྷ བ་ཧཱུ ཛ་ནཱ དུ་ཙྩ་རི་ཏཱ་ནི ཀ་ཏྭཱ ཙ་ཏཱུ་སུ ཨ་པཱ་ཡེ་སུ པ་ཏི་ཏྭཱ ཨ་པཱ་ཡ་དུ་ཀྑཾ པ་ཙྩ་ནུ་བྷ་ཝ་ནྟི. དི་ཊྛ་དྷ་མྨེ་པི ཀེ་ཙི ཨ་ཏྟ་ནོ ཝཱ པ་ར་སྶ ཝཱ དུ་ཙྩ་རི་ཏ་ཀ་མྨ པ་ཙྩ་ཡཱ བ་ཧུཾ དུ་ཀྑཾ པ་ཙྩ་ནུ་བྷ་ཝ་ནྟི. ཀེ་ཙི དུ་ཙྩ་རི་ཏ་ཀ་མྨེ་ན དྷ་ནཾ ལ་བྷི་ཏྭཱ སུ་ཁཾ པ་ཙྩ་ནུ་བྷ་ཝ་ནྟི. བ་ཧུ་ཛྫ་ནཱ རཱ་ག་མཱུ་ལ་ཀཾ བ་ཧུཾ དུ་ཀྑཾ པ་ཙྩ་ནུ་བྷ་ཝ་ནྟི, དོ་ས་མཱུ་ལ་ཀཾ དི་ཊྛི་མཱུ་ལ་ཀཾ མཱ་ན་མཱུ་ལ་ཀ་ནྟི.
ཨ་བྱཱ་ཀ་ཏོ ཀུ་ས་ལ་སྶ་པི བ་ལ་ཝཱུ་པ་ནི་སྶ་ཡོ. དྷ་ན ས་མྤ་ཏྟི་ཡཱ དཱ་ནཾ དེ་ཏི, སཱི་ལཾ པཱུ་རེ་ཏི, པ་ཉྙཾ པཱུ་རེ་ཏི, བྷཱ་ཝ་ནཱ་ས་པྤཱ་ཡཾ ཨཱ་ཝཱ་སཾ ཝཱ ལེ་ཎཾ ཝཱ གུ་ཧཾ་ཝཱ རུ་ཀྑཾ ཝཱ ཨ་ར་ཉྙཾ ཝཱ པ་བྦ་ཏཾ ཝཱ གོ་ཙ་ར་གཱ་མཾ ཝཱ ཨུ་ཏུ་ས་པྤཱ་ཡཾ ཝཱ ཨཱ་ཧཱ་ར་ས་པྤཱ་ཡཾ ཝཱ ལ་བྷི་ཏྭཱ ཏཾ ཏཾ བྷཱ་ཝ་ནཾ བྷཱ་ཝེ་ཏི.
ཨ་བྱཱ་ཀ་ཏོ ཨ་ཀུ་ས་ལ་སྶ་པི བ་ལ་ཝཱུ་པ་ནི་སྶ་ཡོ. ལོ་ཀེ ཙ་ཀྑུ་ས་མྤ་དཾ ནི་སྶཱ་ཡ བ་ཧཱུ་ནི ད་སྶ་ན་མཱུ་ལཱ་ནི ཨ་ཀུ་ས་ལཱ་ནི ཨུ་པྤ་ཛྫ་ནྟི. ཨེ་ས ན་ཡོ སོ་ཏ་ས་མྤ་དཱ་དཱི་སུ. ཏ་ཐཱ ཧ་ཏྠ་ས་མྤ་དཾ པཱ་ད་ས་མྤ་དཾ ས་ཏྠ་ས་མྤ་དཾ ཨཱ་ཝུ་དྷ་ས་མྤ་ད་ནྟི་ཨཱ་དི་ནཱ་པི ཝ་ཏྟ་བྦོ. ཨེ་ཝཾ ཨུ་པ་ནི་སྶ་ཡོ ཏི་ཝི་དྷོ ཧོ་ཏི.
ཨི་དྷ སུ་ཏྟ་ནྟཱུ་པ་ནི་སྶ་ཡོ་པི ཝ་ཏྟ་བྦོ. ཀ་ལྱཱ་ཎ་མི་ཏྟཾ ཨུ་པ ནི་སྶཱ་ཡ པཱ་པ་མི་ཏྟཾ ཨུ་པ་ནི་སྶཱ་ཡ གཱ་མཾ ཨུ་པ་ནི་སྶཱ་ཡ ཨ་ར་ཉྙཾ ཨུ་པ་ནི་སྶཱ་ཡཱ་ཏི་ཨཱ་དི་ནཱ བ་ཧཱུ་སུ ཋཱ་ནེ་སུ ཨཱ་ག་ཏོ. ཨ་པི ཙ པ་ཉྩ་ནི་ཡཱ་མ་དྷ་མྨཱ ས་ཏྟ་ལོ་ཀ ས་ངྑཱ་ར་ལོ་ཀ ཨོ་ཀཱ་ས་ལོ་ཀ ས་ངྑཱ་ཏཱ་ནཾ ཏི་ཎྞཾ ལོ་ཀཱ་ནཾ ཨ་ཝི་ཙྪི་ནྣ་པྤ་ཝ་ཏྟི་ཡཱ བ་ལ་ཝ་པ་ཙྩ་ཡཱ ཧོ་ནྟི. ཨ་ཡ་ཉྩ ཨ་ཏྠོ ནི་ཡཱ་མ་དཱི་པ་ནི་ཡཾ ཨ་མྷེ་ཧི ཝི་ཏྠཱ་ར་ཏོ དཱི་པི་ཏོ་ཏི.
ཀེ་ན་ཊྛེ་ན ཨཱ་ར་མྨ་ཎཱུ་པ་ནི་སྶ་ཡོ་ཏི. ཨ་དྷི་པ་ཏི་བྷཱུ་ཏཾ ཨཱ་ར་མྨ་ཎ་མེ་ཝ ཨཱ་ར་མྨ་ཎི་ཀ་དྷ་མྨཱ་ནཾ བ་ལ་ཝ་ནི་སྶ་ཡ་ཊྛེ་ན ཨཱ་ར་མྨ་ཎཱུ་པ ནི་སྶ་ཡོ.
ཀེ་ན་ཊྛེ་ན ཨ་ན་ནྟ་རཱུ་པ་ནི་སྶ་ཡོ་ཏི. པུ་རི་མཾ ཨ་ན་ནྟ་ར་ཙི་ཏྟ་མེ་ཝ པ་ཙྪི་མ་སྶ ཨ་ན་ནྟ་ར་ཙི་ཏྟ་སྶ ཨུ་པྤ་ཛྫ་ན་ཏྠཱ་ཡ བ་ལ་ཝ་ནི་སྶ་ཡ་ཊྛེ་ན ཨ་ན་ནྟ་རཱུ་པ་ནི་སྶ་ཡོ. མཱ་ཏཱ ཝི་ཡ པུ་རི་མ་ཙི་ཏྟཾ, པུ་ཏྟོ ཝི་ཡ པ་ཙྪི་མ་ཙི་ཏྟཾ. ཡ་ཐཱ མཱ་ཏཱ ཨ་ཏྟ་ནོ ཨ་ན་ནྟ་རེ པུ་ཏྟ་སྶ ཨུ་པྤ་ཛྫ་ན་ཏྠཱ་ཡ བ་ལ་ཝཱུ་པ ནི་སྶ་ཡོ ཧོ་ཏི, ཏ་ཐཱ པུ་རི་མ་ཙི་ཏྟཾ པ་ཙྪི་མ་ཙི་ཏྟ་སྶ ཨུ་པྤ་ཛྫ་ན་ཏྠཱ་ཡཱ་ཏི.
ཀེ་ན་ཊྛེ་ན པ་ཀ་ཏཱུ་པ་ནི་སྶ་ཡོ་ཏི. པ་ཀ་ཏི་ཡཱ་ཝ ལོ་ཀེ པ་ཎྜི་ཏཱ་ནཾ པཱ་ཀ་ཊོ ཨུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ.
ཨེ་ཏྠ ཙ ཨ་ན་ནྟ་རཱུ་པ་ནི་སྶ་ཡཱ་ནུ་བྷཱ་ཝོ ཨ་ན་ནྟ་ར་ཙི་ཏྟེ ཨེ་ཝ ཕ་ར་ཏི. པ་ཀ་ཏཱུ་པ་ནི་སྶ་ཡཱ་ནུ་བྷཱ་ཝོ པ་ན དཱུ་རེ་པི ཕ་ར་ཏི་ཡེ་ཝ. ཏ་ཐཱ ཧི ཨི་མ་སྨིཾ བྷ་ཝེ པུ་རི་མེ་སུ དི་ཝ་སེ་སུ ཝཱ མཱ་སེ་སུ ཝཱ སཾ་ཝ་ཙྪ་རེ་སུ ཝཱ དི་ཊྛ་སུ་ཏ་གྷཱ་ཡི་ཏ་སཱ་ཡི་ཏ་ཕུ་སི་ཏ་ཝི་ཉྙཱ་ཏཱ་ནི ཨཱ་ར་མྨ་ཎཱ་ནི པ་ཙྪཱ་ཏ་ཐཱ་རཱུ་པེ པ་ཙྩ་ཡེ ས་ཏི ཝ་སྶ་ས་ཏེ་པི མ་ནོ་དྭཱ་རེ ཨཱ་པཱ་ཏཾ ཨཱ་ག་ཙྪ་ནྟི. ཨི་དཾ ནཱ་མ པུ་བྦེ མ་ཡཱ དི་ཊྛཾ སུ་ཏ་ནྟི་ཨཱ་དི་ནཱ ས་ཏྟཱ ཨ་ནུ་སྶ་ར་ནྟི. ཨོ་པ་པཱ་ཏི་ཀ་ས་ཏྟཱ པ་ན པུ་རི་མ་བྷ་ཝཾ་པི ཨ་ནུ་སྶ་ར་ནྟི. ཏ་ཐཱ མ་ནུ་སྶེ་སུ་པི ཨ་པྤེ་ཀ་ཙྩེ ཛཱ་ཏི་སྶ་ར་ས་ཉྙཱ་ལཱ་བྷི་ནོ. ཏ་ཐཱ པུ་བྦེ ཨ་ནེ་ཀ་ས་ཏ་ས་ཧ་སྶེ་སུ དི་ཊྛཱ་དཱི་སུ ཝ་ཏྠཱུ་སུ པ་ཙྪཱ ཨེ་ཀ་སྨིཾ ཁ་ཎེ ཨེ་ཀཾ ཝ་ཏྠུཾ དི་སྭཱ ཝཱ སུ་ཏྭཱ ཝཱ ཏ་སྨིཾ ཨེ་ཝ ཁ་ཎེ བ་ཧཱུ་སུ་པི ཏེ་སུ མ་ནོ་ཝི་ཉྙཱ་ཎ་ས་ནྟཱ་ནཾ ཕ་ར་མཱ་ནཾ པ་ཝ་ཏྟ་ཏཱི་ཏི. ཨུ་པ་ནི་སྶ་ཡ་པ་ཙྩ་ཡ དཱི་པ་ནཱ ནི་ཊྛི་ཏཱ.
༡༠. པུ་རེ་ཛཱ་ཏ་པ་ཙྩ་ཡོ
ཏི་ཝི་དྷོ པུ་རེ་ཛཱ་ཏ་པ་ཙྩ་ཡོ. ཝ་ཏྠུ་པུ་རེ་ཛཱ་ཏ་པ་ཙྩ་ཡོ ཙ ཨཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡོ ཙ ཝ་ཏྠཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡོ ཙ.
ཏ་ཏྠ ཝ་ཏྠུ་པུ་རེ་ཛཱ་ཏོ ཙ ཝ་ཏྠཱ་ར་མྨ་ཎ་པུ་རེ་ཛཱ་ཏོ ཙ པུ་བྦེ ནི་སྶ་ཡ་པ་ཙྩ་ཡེ ནི་སྶ་ཡ་ནཱ་མེ་ན ཝུ་ཏྟཱ ཨེ་ཝ.
ཨཱ་ར་མྨ་ཎ་པུ་རེ་ཛཱ་ཏོ ནཱ་མ པ་ཙྩུ་པྤ་ནྣཱ་ནི ཨ་ཊྛཱ་ར་ས་ནི་པྥ་ནྣ་རཱུ་པཱ་ནི ཨེ་ཝ. ཏེ་སུ་པི པ་ཙྩུ་པྤ་ནྣཱ་ནི རཱུ་པ་ས་དྡཱ་དཱི་ནི པ་ཉྩཱ་ར་མྨ་ཎཱ་ནི པ་ཉྩ་ནྣཾ པ་ཉྩ་ཝི་ཉྙཱ་ཎ ཝཱི་ཐི་ཙི་ཏྟཱ་ནཾ ནི་ཡ་མ་ཏོ ཨཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡཱ ཧོ་ནྟི. ཡ་ཐཱ ཧི ཝཱི་ཎཱ་ས་དྡཱ ནཱ་མ ཝཱི་ཎཱ་ཏ་ནྟཱི་སུ ཝཱི་ཎཱ་ད་ཎྜ་ཀེ་ན པ་ཧ་ར་ཎ པ་ཙྩ་ཡཱ ཨེ་ཝ ཨུ་པྤ་ཛྫ་ནྟི. ཨེ་ཝ་ཉྩ ས་ཏི ཏེ ས་དྡཱ པུ་རེ་ཛཱ་ཏཱ་ཧི ཝཱི་ཎཱ་ཏ་ནྟི ཝཱི་ཎཱ་ད་ཎྜ་ཀེ་ཧི ཝི་ནཱ ཨུ་པྤ་ཛྫི་ཏུཾ ན ས་ཀྐོ་ནྟི. ཨེ་ཝ་མེ་ཝཾ པ་ཉྩ ཝི་ཉྙཱ་ཎ ཝཱི་ཐི་ཙི་ཏྟཱ་ནི་པི པ་ཉྩ་སུ ཝ་ཏྠུ་དྭཱ་རེ་སུ པ་ཉྩ་ནྣཾ ཨཱ་ར་མྨ་ཎཱ་ནཾ ཨཱ་པཱ་ཏཱ་ག་མ་ན པ་ཙྩ་ཡཱ ཨེ་ཝ ཨུ་པྤ་ཛྫ་ནྟི. ཨཱ་པཱ་ཏཱ་ག་མ་ན་ཉྩ ཏེ་སཾ དྭི་ནྣཾ ཋི་ཏི་པ་ཏྟ་ཀཱ་ལེ ཨེ་ཝ ཧོ་ཏི. ན ཀེ་ཝ་ལ་ཉྩ ཏ་སྨིཾ ཀཱ་ལེ ཏཱ་ནི པ་ཉྩཱ་ར་མྨ་ཎཱ་ནི ཏེ་སུ པ་ཉྩ་ཝ་ཏྠཱུ་སུ ཨེ་ཝ ཨཱ་པཱ་ཏ་མཱ་ག་ཙྪ་ནྟི. ཨ་ཐ ཁོ བྷ་ཝ་ངྒ་མ་ནོ་དྭཱ་རེ་པི ཨཱ་པཱ་ཏཾ ཨཱ་ག་ཙྪ་ནྟི་ཡེ་ཝ. ཏ་སྨིཾ ཨཱ་པཱ་ཏ་ག་མ་ན་ཏྟཱ ཨེ་ཝ ཏཾ བྷ་ཝ་ངྒ་མྤི དྭི་ཀྑ་ཏྟུཾ ཙ་ལི་ཏྭཱ ཨུ་པ་ཙྪི་ཛྫ་ཏི, བྷ་ཝ་ངྒུ་པ་ཙྪེ་དེ ཨེ་ཝ ཏཱ་ནི ཝཱི་ཐི་ཙི་ཏྟཱ་ནི ཨུ་པྤ་ཛྫ་ནྟི. ཨེ་ཝ་ཉྩ ས་ཏི ཏཱ་ནི ཝཱི་ཐི་ཙི་ཏྟཱ་ནི པུ་རེ་ཛཱ་ཏེ་ཧི ཝ་ཏྠུ དྭཱ་རཱ་ར་མྨ་ཎེ་ཧི ཝི་ནཱ ཨུ་པྤ་ཛྫི་ཏུཾ ན ས་ཀྐོ་ནྟཱི་ཏི. ཏཱ་ནི པ་ན ས་བྦཱ་ནི་པི ཨ་ཊྛཱ་ར་ས་ནི་པྥ་ནྣ་རཱུ་པཱ་ནི ནི་རུ་དྡྷཱ་ནི ཧུ་ཏྭཱ ཨ་ཏཱི་ཏཱ་ནི་པི ཧོ་ནྟི, ཨ་ནུ་པྤ་ནྣཱ་ནི ཧུ་ཏྭཱ ཨ་ནཱ་ག་ཏཱ་ནི་པི ཧོ་ནྟི. ཨུ་པྤ་ནྣཱ་ནི ཧུ་ཏྭཱ པ་ཙྩུ་པྤ་ནྣཱ་ནི་པི ཧོ་ནྟི. ས་བྦཱ་ནི་པི མ་ནོ་ཝི་ཉྙཱ་ཎ་ཝཱི་ཐི་ཙི་ཏྟཱ་ནཾ ཨཱ་ར་མྨ་ཎཱ་ནི ཧོ་ནྟི. ཏེ་སུ པ་ཙྩུ་པྤ་ནྣཱ་ནི ཨེ་ཝ ཏེ་སཾ ཨཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡཱ ཧོ་ནྟི. ཡ་དཱ དཱུ་རེ ཝཱ པ་ཊི་ཙྪ་ནྣེ ཝཱ ཋི་ཏཾ ཏཾ ཏཾ ཨཱ་ར་མྨ་ཎ་ཝ་ཏྠུཾ མ་ན་སཱ ཨེ་ཝ ཨཱ་ར་མྨ་ཎཾ ཀ་རོ་ཏི, ཏ་དཱ ཏཾ ཏཾ ཝ་ཏྠུ ས་ཙེ ཏ་ཏྠ ཏ་ཏྠ ཝི་ཛྫ་མཱ་ནཾ ཧོ་ཏི, པ་ཙྩུ་པྤ་ནྣཾ ནཱ་མ ཧོ་ཏི. པུ་རེ་ཛཱ་ཏ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༡. པ་ཙྪཱ་ཛཱ་ཏ་པ་ཙྩ་ཡོ
པ་ཙྪི་མཾ པ་ཙྪི་མཾ པ་ཙྩུ་པྤ་ནྣཾ ཙི་ཏྟཾ པུ་རེ་ཛཱ་ཏ་སྶ པ་ཙྩུ་པྤ་ནྣ་སྶ ཙ་ཏུ ས་མུ་ཊྛཱ་ནི་ཀ་སྶ རཱུ་པ་ཀཱ་ཡ་སྶ ཝུ་ཌྜྷི་ཝི་རུ་ལ༹ྷི་ཡཱ པ་ཙྪཱ་ཛཱ་ཏ་པ་ཙྩ་ཡོ. ཡ་ཐཱ ཏཾ པ་ཙྪི་མ་ཝ་སྶེ་སུ ཨ་ནུ་ཝ་སྶཾ ཝ་སྶ་མཱ་ནཱ་ནི ཝ་སྶོ་ད་ཀཱ་ནི པུ་རི་མ་ཝ་སྶེ་སུ ཛཱ་ཏཱ་ནཾ རུ་ཀྑ་པོ་ཏ་ཀཱ་ནཾ ཝུ་ཌྜྷི་ཝི་རུ་ལ༹ྷི་ཡཱ པ་ཙྪཱ་ཛཱ་ཏ པ་ཙྩ་ཡཱ ཧོ་ནྟཱི་ཏི.
ཏ་ཏྠ པ་ཙྪི་མཾ པ་ཙྪི་མཾ ཙི་ཏྟ་ནྟི པ་ཋ་མ་བྷ་ཝ་ངྒ་ཏོ པ་ཊྛཱ་ཡ ཡཱ་ཝ ཙུ་ཏི ཙི་ཏྟཱ ས་བྦཾ ཙི་ཏྟཾ ཝུ་ཙྩ་ཏི. པུ་རེ་ཛཱ་ཏ་སྶཱ་ཏི པ་ཊི་ས་ནྡྷི་ཙི་ཏྟེ་ན ས་ཧུ་པྤ་ནྣཾ ཀ་མྨ་ཛ་རཱུ་པ་ཀཱ་ཡཾ ཨཱ་དིཾ ཀ་ཏྭཱ ཨ་ཛ྄ཛྷ་ཏྟ་ས་ནྟཱ་ན་པ་རི་ཡཱ་པ་ནྣོ ས་བྦོ ཙ་ཏུ་ས་མུ་ཊྛཱ་ནི་ཀ་རཱུ་པ་ཀཱ་ཡོ ཝུ་ཙྩ་ཏི.
པ་ཊི་ས་ནྡྷི་ཙི་ཏྟེ་ན ས་ཧུ་པྤ་ནྣ་སྶ ཀ་མྨ་ཛ་རཱུ་པ་ཀཱ་ཡ་སྶ པ་ཋ་མ བྷ་ཝ་ངྒཱ་དཱི་ནི པ་ནྣ་ར་ས་བྷ་ཝ་ངྒ་ཙི་ཏྟཱ་ནི པ་ཙྪཱ་ཛཱ་ཏ་པ་ཙྩ་ཡཱ ཧོ་ནྟི. པ་ཊི་ས་ནྡྷི ཙི་ཏྟཾ པ་ན ཏེ་ན ཀཱ་ཡེ་ན ས་ཧུ་པྤ་ནྣ་ཏྟཱ པ་ཙྪ་ཛཱ་ཏཾ ན ཧོ་ཏི. སོ་ལ༹་ས་མ་བྷ་ཝ་ངྒ་ཙི་ཏྟ་ཉྩ ཏ་སྶ ཀཱ་ཡ་སྶ བྷི་ཛྫ་ན་ཀྑེ་ཏྟེ ཨུ་པྤ་ནྣ་ཏྟཱ པ་ཙྩ་ཡོ ན ཧོ་ཏི. ཏ་སྨཱ པ་ནྣ་ར་ས་བྷ་ཝ་ངྒ་ཙི་ཏྟཱ་ནཱི་ཏི ཝུ་ཏྟཾ.
པ་ཊི་ས་ནྡྷི་ཙི་ཏྟ་སྶ ཋི་ཏི་ཀྑ་ཎེ པ་ན དྭེ རཱུ་པ་ཀཱ་ཡཱ ཨུ་པྤ་ཛྫ་ནྟི ཀ་མྨ་ཛ་རཱུ་པ་ཀཱ་ཡོ ཙ ཨུ་ཏུ་ཛ་རཱུ་པ་ཀཱ་ཡོ་ཙ. ཏ་ཐཱ བྷ་ངྒ་ཀྑ་ཎེ་པི. པ་ཋ་མ་བྷ་ཝ་ངྒ་སྶ ཨུ་པྤཱ་ད་ཀྑ་ཎེ པ་ན ཏ་ཡོ རཱུ་པ་ཀཱ་ཡཱ ཨུ་པྤ་ཛྫ་ནྟི ཀ་མྨ་ཛ་རཱུ་པ་ཀཱ་ཡོ ཙ ཨུ་ཏུ་ཛ་རཱུ་པ་ཀཱ་ཡོ ཙ ཙི་ཏྟ་ཛ་རཱུ་པ་ཀཱ་ཡོ ཙ. ཡ་དཱ བ་ཧི་དྡྷཱ་ཧཱ་ར་པྥ་ར་ཎཾ ལ་བྷི་ཏྭཱ ཨ་ཛ྄ཛྷ་ཏྟཱ་ཧཱ་རོ ཨཱ་ཧཱ་ར་ཛ་རཱུ་པ་ཀཱ་ཡཾ ཛ་ནེ་ཏི, ཏ་ཏོ པ་ཊྛཱ་ཡ ཙ་ཏུ་ས་མུ་ཊྛཱ་ནི་ཀཱ ཙ་ཏྟཱ་རོ རཱུ་པ་ཀཱ་ཡཱ དཱི་པ ཛཱ་ལཱ ཝི་ཡ པ་ཝ་ཏྟ་ནྟི. ཏེ ཨུ་པྤཱ་ད་ཀྑ་ཎཾ ཨ་ཏི་ཀྐ་མྨ ཡཱ་ཝ ཋི་ཏི་བྷཱ་ཝེ་ན དྷ་ར་ནྟི, ཏཱ་ཝ པ་ནྣ་ར་ས་ཙི་ཏྟཱ་ནི ཏེ་སཾ ཀཱ་ཡཱ་ནཾ པ་ཙྪཱ་ཛཱ་ཏ་པ་ཙྩ་ཡཱ ཧོ་ནྟི་ཡེ་ཝ.
ཝུ་ཌྜྷི་ཝི་རུ་ལ༹ྷི་ཡཱ་ཏི ཙ་ཏུ་ས་མུ་ཊྛཱ་ནི་ཀ་རཱུ་པ་ས་ནྟ་ཏི་ཡཱ ཨུ་པ་རཱུ་པ་རི ཝུ་ཌྜྷི་ཡཱ ཙ ཝི་རུ་ལ༹ྷི་ཡཱ ཙ. ཏ་ཐཱ་ཧི པུ་རི་མཱ པུ་རི་མཱ ཙ་ཏྟཱ་རོ རཱུ་པ་ཀཱ་ཡཱ ས་ཙེ པ་ཙྪཱ་ཛཱ་ཏ པ་ཙྩ་ཡཾ པུ་ན་པྤུ་ནཾ ལ་བྷ་ནྟི, ཨེ་ཝཾ ས་ཏི ཏེ ནི་རུ་ཛ྄ཛྷ་ནྟཱ་པི པ་ཙྪཱ་རཱུ་པ་ས་ནྟ་ཏི་པ་ར་མྤ་རཱ་ནཾ ཝུ་ཌྜྷི་ཡཱ ཙ ཝི་རུ་ལ༹ྷི་ཡཱ ཙ ཝེ་པུ་ལླཱ་ཡ ཙ བ་ལ་ཝ པ་ཙྩ་ཡཱ ཧུ་ཏྭཱ ནི་རུ་ཛ྄ཛྷ་ནྟཱི་ཏི. པ་ཙྪཱ་ཛཱ་ཏ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༢. ཨཱ་སེ་ཝ་ན་པ་ཙྩ་ཡོ
དྭཱ་ད་ས ཨ་ཀུ་ས་ལ་ཙི་ཏྟཱ་ནི ས་ཏྟ་ར་ས ལོ་ཀི་ཡ་ཀུ་ས་ལ ཙི་ཏྟཱ་ནི ཨཱ་ཝ་ཛྫ་ན་དྭ་ཡ་ཝ་ཛྫི་ཏཱ་ནི ཨ་ཊྛཱ་ར་ས་ཀི་རི་ཡ་ཙི་ཏྟཱ་ནཱི་ཏི ས་ཏྟ ཙ་ཏྟཱ་ལཱི་སཾ ལོ་ཀི་ཡ་ཛ་ཝ་ན་ཙི་ཏྟཱ་ནི ཨཱ་སེ་ཝ་ན་པ་ཙྩ་ཡོ. ཏེ་སུ ནི་ར་ནྟ་ར་པྤ་ཝ་ཏྟཾ ཛ་ཝ་ན་ས་ནྟ་ཏིཾ པ་ཏྭཱ པུ་རི་མཾ པུ་རི་མཾ ཛ་ཝ་ན་ཙི་ཏྟཾ ཨཱ་སེ་ཝ་ན པ་ཙྩ་ཡོ. ཙ་ཏཱུ་ཧི མ་གྒ་ཙི་ཏྟེ་ཧི པ་ཙྪི་མཾ པ་ཙྪི་མཾ ཙི་ཏྟཾ ཨཱ་སེ་ཝ་ན་པ་ཙྩ་ཡུ་པྤ་ནྣཾ.
ཀེ་ན་ཊྛེ་ན ཨཱ་སེ་ཝ་ན་ནྟི. ཨུ་པ་རཱུ་པ་རི་པ་གུ་ཎ་བྷཱ་ཝ་ཝ་ཌྜྷ་ན་ཏྠཾ་ཐཱ་མ བ་ལ་ཝ་ཌྜྷ་ན་ཏྠ་ཉྩ པ་རི་ཝཱ་ས་གྒཱ་ཧཱ་པ་ན་ཊྛེ་ན.
ཏ་ཏྠ པ་གུ་ཎ་བྷཱ་ཝོ་ཏི པུ་ན་པྤུ་ནཾ ས་ཛ྄ཛྷཱ་ཡི་ཏ་སྶ པཱ་ལི༹་པཱ་ཋ་སྶ སུ་ཁེ་ན པ་ཝ་ཏྟ་ནཾ ཝི་ཡ ཛ་ཝ་ན་ཊྛཱ་ན་ཛ་ཝ་ན་ཀི་ཙྩ་ས་ངྑཱ་ཏེ ཋཱ་ན་ཀི་ཙྩ་ཝི་སེ་སེ པ་ཙྪི་མ པ་ཙྪི་མ་ཙི་ཏྟ་སྶ སུ་ཁེ་ན པ་ཝ་ཏྟ་ནཾ. པ་རི་ཝཱ་སོ ནཱ་མ ཀོ་སེ་ཡྻ་ཝ་ཏྠཾ པུ་ན་པྤུ་ནཾ སུ་ག་ནྡྷེ་ན པ་རི་ཝཱ་ས་ནཾ ཝི་ཡ ཙི་ཏྟ་ས་ནྟཱ་ནེ པུ་ན་པྤུ་ནྣཾ ར་ཛྫ་ན་དུ་སྶ་ནཱ་དི་ནཱ ཝཱ ཨ་ར་ཛྫ་ན ཨ་དུ་སྶ་ནཱ་དི་ནཱ ཝཱ པ་རི་ཝཱ་ས་ནཾ. པུ་རི་མ་སྨིཾ ཛ་ཝ་ན་ཙི་ཏྟེ ནི་རུ་དྡྷེ་པི ཏ་སྶ ཛ་ཝ་ན་ཝེ་གོ ན ནི་རུ་ཛ྄ཛྷ་ཏི, པ་ཙྪི་མཾ ཙི་ཏྟ་ས་ནྟཱ་ནཾ ཕ་ར་མཱ་ནོ པ་ཝ་ཏྟ་ཏི་ཡེ་ཝ. ཏ་སྨཱ པ་ཙྪི་མཾ པ་ཙྪི་མཾ ཛ་ཝ་ན་ཙི་ཏྟཾ ཨུ་པྤ་ཛྫ་མཱ་ནཾ ཏེ་ན ཝེ་གེ་ན པ་གྒ་ཧི་ཏཾ བ་ལ་ཝ་ཏ་རཾ ཧུ་ཏྭཱ ཨུ་པྤ་ཛྫ་ཏི. ཨེ་ཝཾ པུ་རི་མ་ཙི་ཏྟཾ ཨ་ཏྟ་ནོ པ་རི་ཝཱ་སཾ པ་ཙྪི་མ་ཙི་ཏྟཾ ག་ཎྷཱ་པེ་ཏི. པ་ཙྪི་མ་ཉྩ ཙི་ཏྟཾ པུ་རི་མ་སྶ ཙི་ཏྟ་སྶ པ་རི་ཝཱ་སཾ ག་ཧེ་ཏྭཱ པ་ཝ་ཏྟ་ཏི. ཨེ་ཝཾ ས་ནྟེ་པི སོ ཨཱ་སེ་ཝ་ན་ཝེ་གོ པ་ཀ་ཏི་ཡཱ ས་ཏྟ་ཧི ཙི་ཏྟ་ཝཱ་རེ་ཧི པ་རི་ཀྑ་ཡཾ ག་ཙྪ་ཏི, ཏ་ཏོ པ་རཾ ཏ་དཱ་ར་མྨ་ཎ་ཝི་པཱ་ཀ ཙི་ཏྟཾ ཝཱ ཨུ་པྤ་ཛྫ་ཏི, བྷ་ཝ་ངྒ ཙི་ཏྟ་ཝཱ་རོ ཝཱ པ་ཝ་ཏྟ་ཏི.
ཨི་དྷ སུ་ཏྟ་ནྟཱ་སེ་ཝ་ན་པ་ཙྩ་ཡོ་པི ཝ་ཏྟ་བྦོ. ས་ཏི་པ་ཊྛཱ་ནཾ བྷཱ་ཝེ་ཏི, ས་མྨ་པྤ་དྷཱ་ནཾ བྷཱ་ཝེ་ཏི, ས་ཏི་ས་མྦོ་ཛ྄ཛྷ་ངྒཾ བྷཱ་ཝེ་ཏི, དྷ་མྨ ཝི་ཙ་ཡ་ས་མྦོ་ཛ྄ཛྷ་ངྒཾ བྷཱ་ཝེ་ཏི, ས་མྨཱ་དི་ཊྛིཾ བྷཱ་ཝེ་ཏི, ས་མྨཱ་ས་ངྐ་པྤཾ བྷཱ་ཝེ་ཏཱི་ཏི་ཨཱ་དི་ནཱ བ་ཧཱུ་སུ ཋཱ་ནེ་སུ ཝུ་ཏྟོ. ཏ་ཏྠ བྷཱ་ཝེ་ཏཱི་ཏི ཨེ་ཀཾ་པི དི་ཝ་སཾ བྷཱ་ཝེ་ཏི, ས་ཏྟ་པི དི་ཝ་སཱ་ནི བྷཱ་ཝེ་ཏི, ཨེ་ཀཾ་པི མཱ་སཾ བྷཱ་ཝེ་ཏི, ས་ཏྟ་པི མཱ་སཱ་ནི བྷཱ་ཝེ་ཏི, ཨེ་ཀཾ་པི སཾ་ཝ་ཙྪ་རཾ བྷཱ་ཝེ་ཏི, ས་ཏྟ་པི སཾ་ཝ་ཙྪ་རཱ་ནི བྷཱ་ཝེ་ཏཱི་ཏི ཨ་ཏྠོ.
པུ་རི་མ་པུ་རི་མེ་སུ བྷ་ཝེ་སུ ཨཱ་སེ་ཝི་ཏཱ་ནི བྷཱ་ཝི་ཏཱ་ནི བ་ཧུ་ལཱི ཀ་ཏཱ་ནི ཀུ་ས་ལཱ་ནི ཝཱ ཨ་ཀུ་ས་ལཱ་ནི ཝཱ པ་ཙྪི་མ་པ་ཙྪི་མེ་སུ བྷ་ཝེ་སུ བ་ལ་ཝ་ཏ་རཱ་ནཾ ཀུ་ས་ལཱ་ནཾ ཝཱ ཨ་ཀུ་ས་ལཱ་ནཾ ཝཱ ཨུ་པྤ་ཏྟི་ཡཱ ཨཱ་སེ་ཝ་ན པ་ཙྩ་ཡོ.
ཀཱ་ལ་ནྟ་རེ ཝཱ བྷ་ཝ་ནྟ་རེ ཝཱ ཏཱ་དི་སཱ་ནཾ ཀུ་ས་ལཱ་ཀུ་ས་ལཱ་ནཾ ཨུ་པྤ་ཏྟི་ཡཱ པ་ཙྩ་ཡོ ཨུ་པ་ནི་སྶ་ཡ་པ་ཙྩ་ཡོ ནཱ་མ. ཏེ་སཾ་ཡེ་ཝ བ་ལ་ཝ་ཏ་ར་ཏྠཱ་ཡ པ་ཙྩ་ཡོ ཨཱ་སེ་ཝ་ན་པ་ཙྩ་ཡོ ནཱ་མ.
ལོ་ཀེ་པི མ་ཧ་ནྟེ་སུ ཙི་ཏྟ་བྷཱ་ཝ་ནཱ་ཀ་མྨེ་སུ ཝཱ་ཙཱ བྷཱ་ཝ་ནཱ་ཀ་མྨེ་སུ ཀཱ་ཡ་བྷཱ་ཝ་ནཱ་ཀ་མྨེ་སུ ཨ་ངྒ་པ་ཙྩ་ངྒ་བྷཱ་ཝ་ནཱ་ཀ་མྨེ་སུ ཀ་མྨཱ་ཡ་ཏ་ན་སི་པྤཱ་ཡ་ཏ་ན་ཝི་ཛྫཱ་ཋཱ་ནེ་སུ ཙ ཨཱ་སེ་ཝ་ནཱ བྷཱ་ཝ་ནཱ བ་ཧུ་ལཱི་ཀ་མྨཱ་ནཾ ནི་སྶ་ནྡ་གུ་ཎཱ ནཱ་མ ས་ནྡི་སྶ་ནྟི་ཡེ་ཝ.
ས་བྦེ་སཾ ཁ་ཎི་ཀ་དྷ་མྨཱ་ནཾ མ་ཛ྄ཛྷེ ཨེ་ཝ་རཱུ་པ་སྶ ཨཱ་སེ་ཝ་ན པ་ཙྩ་ཡ་སྶ ཝི་ཛྫ་མཱ་ན་ཏྟཱ པུ་རི་ས་བ་ལ་པུ་རི་ས་ཐཱ་མཱ་ནཾ ཨུ་པ་རཱུ་པ་རི ཝ་ཌྜྷ་ན ཝ་སེ་ན ཙི་ར་ཀཱ་ལཾ པ་ཝ་ཏྟི་ཏཱ་ནི པུ་རི་ས་ཀ་མྨཱ་ནི ནི་པྥ་ཏྟིཾ པཱ་པུ་ཎ་ནྟི, ས་བྦ་ཉྙུ་བུ་དྡྷ་བྷཱ་ཝཾ་པི ག་ཙྪ་ནྟི. ཨཱ་སེ་ཝ་ན་པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༣. ཀ་མྨ་པ་ཙྩ་ཡོ
དུ་ཝི་དྷོ ཀ་མྨ་པ་ཙྩ་ཡོ ས་ཧ་ཛཱ་ཏ་ཀ་མྨ་པ་ཙྩ་ཡོ ནཱ་ནཱ་ཀྑ་ཎི་ཀ ཀ་མྨ་པ་ཙྩ་ཡོ.
ཏ་ཏྠ ཁ་ཎ་ཏྟ་ཡ་ས་མ་ངྒི བྷཱུ་ཏཱ ས་བྦཱ་པི ཀུ་ས་ལཱ་ཀུ་ས་ལཱ བྱཱ་ཀ་ཏ་ཙེ་ཏ་ནཱ ས་ཧ་ཛཱ་ཏ་ཀ་མྨ པ་ཙྩ་ཡོ. ཙེ་ཏ་ནཱ་ས་མྤ་ཡུ་ཏྟཱ ས་བྦེ་པི ཙི་ཏྟ་ཙེ་ཏ་སི་ཀཱ དྷ་མྨཱ་ཙ པ་ཊི་ས་ནྡྷི་ཙི་ཏྟེ་ན ས་ཧུ་པྤ་ནྣཱ ཀ་མྨ་ཛ་རཱུ་པ་དྷ་མྨཱ ཙ པ་ཝ་ཏྟི་ཀཱ་ལེ ས་བྦེ་པི ཙི་ཏྟ་ཛ་རཱུ་པ་དྷ་མྨཱ ཙ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ.
ཨ་ཏཱི་ཏཱ ཀུ་ས་ལཱ་ཀུ་ས་ལ་ཙེ་ཏ་ནཱ ནཱ་ནཱ་ཀྑ་ཎི་ཀ་ཀ་མྨ པ་ཙྩ་ཡོ. བཱ་ཏྟིཾ་ས་ཝི་དྷཱ ལོ་ཀི་ཡ་ཝི་པཱ་ཀ ཙི་ཏྟ་ཙེ་ཏ་སི་ཀཱ དྷ་མྨཱ ཙ ས་བྦེ ཀ་མྨ་ཛ་རཱུ་པ་དྷ་མྨཱ ཙ ཏ་སྶ པ་ཙྩ་ཡ་སྶ པ་ཙྩ་ཡུ་པྤ་ནྣཱ.
ཀེ་ན་ཊྛེ་ན ཀ་མྨ་ནྟི. ཀི་རི་ཡཱ་ཝི་སེ་ས་ཊྛེ་ན ཀ་མྨཾ. ཙེ་ཏ་ནཱ ཧི ཀི་རི་ཡཱ ཝི་སེ་སོ ཧོ་ཏི ས་བྦ་ཀ་མྨེ་སུ ཛེ་ཊྛ་ཀ་ཏྟཱ. ཏཱ ཧི ས་བྦེ་སུ ཀཱ་ཡ་ཝ་ཙཱི་མ་ནོ་ཀ་མྨེ་སུ པ་ཙྩུ་པ་ཊྛི་ཏེ་སུ ཏ་སྶ ཏ་སྶ ཀ་མྨ་སྶ ནི་པྥ་ཏྟ་ཏྠཱ་ཡ ས་མྤ་ཡུ་ཏྟ་དྷ་མྨེ ཙེ་ཏེ་ཏི ཀ་པྤེ་ཏི སཾ་ཝི་ད་ཧ་ཏི, ཨེ་ཀ་ཏོ ཨུ་ཊྛཱ་པེ་ཏི, ཏ་སྨཱ ས་བྦ་ཀ་མྨེ་སུ ཛེ་ཊྛ་ཀཱ ཧོ་ཏི. ཨི་ཏི ཀི་རི་ཡཱ་ཝི་སེ་ས་ཊྛེ་ན ཀ་མྨཾ ནཱ་མ. ཀ་རོ་ནྟི ཨེ་ཏེ་ནཱ་ཏི ཝཱ ཀ་མྨཾ. ཀིཾ ཀ་རོ་ནྟི. ཀཱ་ཡི་ཀ་ཀི་རི་ཡཾ་པི ཀ་རོ་ནྟི, ཝཱ་ཙ་སི་ཀ་ཀི་རི་ཡཾ་པི ཀ་རོ་ནྟི, མཱ་ན་སི་ཀ་ཀི་རི་ཡཾ་པི ཀ་རོ་ནྟི. ཏ་ཏྠ ཀཱ་ཡི་ཀ་ཀི་རི་ཡཱ ནཱ་མ ག་མ་ན་ཋཱ་ན ནི་ས་ཛྫཱ་ད་ཡོ ཨ་བྷི་ཀྐ་མ་ན་པ་ཊི་ཀྐ་མ་ནཱ་ད་ཡོ ཨ་ནྟ་མ་སོ ཨ་ཀྑི་ད་ལཱ་ནཾ ཨུ་ཀྑི་པ་ན་ནི་ཀྑི་པ་ནཱ་ནི་པི. ཝཱ་ཙ་སི་ཀ་ཀི་རི་ཡཱ ནཱ་མ ཝཱ་ཙཱ་པ་ཝ་ཏྟ་ན་ཀི་རི་ཡཱ. མཱ་ན་སི་ཀ་ཀི་རི་ཡཱ ནཱ་མ སུ་ཙི་ནྟི་ཏ དུ་ཙི་ནྟི་ཏ་ཀི་རི་ཡཱ, ཨ་ནྟ་མ་སོ པ་ཉྩ ཝི་ཉྙཱ་ཎཱ་ནཾ ད་སྶ་ན་ཀི་ཙྩ་ས་ཝ་ན་ཀི་ཙྩཱ་དཱི་ནི་པི. ས་བྦཱ་པི ཨི་མཱ ཀི་རི་ཡཱ་ཡོ ཨེ་ཏཱ་ཡ ཙེ་ཏ་ནཱ་ཡ ས་ཏྟཱ ཀ་རོ་ནྟི, སཾ་ཝི་ད་ཧ་ནྟི, ཏ་སྨཱ སཱ ཙེ་ཏ་ནཱ ཀ་མྨཾ ནཱ་མ.
ཨ་ཏྟ་ནོ པ་ཙྩ་ཡུ་པྤ་ནྣེ་ན ས་ཧ ཛཱ་ཡ་ཏཱི་ཏི ས་ཧ་ཛཱ་ཏཾ. ས་ཧ་ཛཱ་ཏ་ཉྩ ཏཾ ཀ་མྨ་ཉྩཱ་ཏི ས་ཧ་ཛཱ་ཏ་ཀ་མྨཾ. ས་ཧ་ཛཱ་ཏ་ཀ་མྨཾ ཧུ་ཏྭཱ པ་ཙྩ་ཡོ ས་ཧ་ཛཱ་ཏ་ཀ་མྨ པ་ཙྩ་ཡོ. ས་ཧ་ཛཱ་ཏ་ཀ་མྨ་བྷཱ་ཝེ་ན པ་ཙྩ་ཡོ་ཏི ཝུ་ཏྟཾ ཧོ་ཏི.
ཨ་ཉྙོ ཀ་མྨ་སྶ ཨུ་པྤ་ཏྟི་ཀྑ་ཎོ ཨ་ཉྙོ ཝི་པཱ་ཀ་སྶ ཨུ་པྤ་ཏྟི་ཀྑ་ཎོ་ཏི ཨེ་ཝཾ ཝི་སུཾ ཝི་སུཾ ཨུ་པྤ་ཏྟི་ཀྑ་ཎོ ཨེ་ཏ་སྶཱ་ཏི ནཱ་ནཱ་ཀྑ་ཎི་ཀཾ. ནཱ་ནཱ་ཀྑ་ཎི་ཀ་ཉྩ ཏཾ ཀ་མྨ་ཉྩཱ་ཏི ནཱ་ནཱ་ཀྑ་ཎི་ཀ་ཀ་མྨཾ. ནཱ་ནཱ་ཀྑ་ཎི་ཀ་ཀ་མྨཾ ཧུ་ཏྭཱ པ་ཙྩ་ཡོ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡོ. ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡ་བྷཱ་ཝེ་ན པ་ཙྩ་ཡོ་ཏི ཝུ་ཏྟཾ ཧོ་ཏི. ཨ་རི་ཡ་མ་གྒ་ས་མྤ་ཡུ་ཏྟཱ ཙེ་ཏ་ནཱ ཨ་ཏྟ་ནོ ནི་རུ་དྡྷཱ་ན་ནྟ་རེ ཨེ་ཝ ཨ་རི་ཡ་ཕ་ལ་ཝི་པཱ་ཀཾ ཛ་ནེ་ཏི, སཱ་པི ནཱ་ནཱ་ཀྑ་ཎི་ཀཱ ཨེ་ཝ ཧོ་ཏི.
ཨེ་ཏྠ ཙ ཨེ་ཀཱ དཱ་ན་ཀུ་ས་ལ་ཙེ་ཏ་ནཱ ཨ་ཏྟ་ནཱ ས་ཧ་ཛཱ་ཏཱ་ནཾ ཙི་ཏྟ་ཙེ་ཏ་སི་ཀཱ་ན་ཉྩ ཀཱ་ཡི་ཀ་ཝཱ་ཙ་སི་ཀ་ཀི་རི་ཡཱ་བྷཱུ་ཏཱ་ནཾ ཙི་ཏྟ་ཛ་རཱུ་པཱ་ན་ཉྩ ས་ཧ་ཛཱ་ཏ་ཀ་མྨ་པ་ཙྩ་ཡོ. ཏཱ་ཡ ཙེ་ཏ་ནཱ་ཡ ཨཱ་ཡ་ཏིཾ ཀཱ་ལ་ནྟ་རེ ཨུ་པྤ་ཛྫ་མཱ་ན་སྶ ཝི་པཱ་ཀ་ཀྑ་ནྡྷ་སྶ ཙ ཀ་མྨ་ཛ་རཱུ་པ་ཀྑ་ནྡྷ་སྶ ཙ ནཱ་ནཱ་ཀྑ་ཎི་ཀ ཀ་མྨ་པ་ཙྩ་ཡོ. ཨེ་ཝཾ ཨེ་ཀཱ ཀ་མྨ་པ་ཐ་པ་ཏྟཱ སུ་ཙ་རི་ཏ་དུ་ཙྩ་རི་ཏ་ཙེ་ཏ་ནཱ དྭཱི་སུ ཀཱ་ལེ་སུ་དྭི་ནྣཾ པ་ཙྩ་ཡུ་པྤ་ནྣཱ་ནཾ དྭཱི་ཧི པ་ཙྩ་ཡ་ས་ཏྟཱི་ཧི པ་ཙྩ་ཡོ ཧོ་ཏཱི་ཏི.
ཨེ་ཏྠ ཙ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ ཀ་མྨ་ནྟི ཀི་རི་ཡཱ་ཝི་སེ་སོ. སོ པ་ན ཙེ་ཏ་ནཱ་ཡ ནི་རུ་དྡྷཱ་ཡ་པི ཨ་ནི་རུ་ཛ྄ཛྷི་ཏྭཱ ཏཾ ཙི་ཏྟ་ས་ནྟཱ་ནཾ ཨ་ནུ་ག་ཙྪ་ཏི་ཡེ་ཝ. ཡ་དཱ ཝི་པ་ཙྩི་ཏུཾ ཨོ་ཀཱ་སཾ ལ་བྷ་ཏི, ཏ་དཱ སོ ཀི་རི་ཡཱ ཝི་སེ་སོ ཙུ་ཏི་ན་ནྟ་རེ ཨེ་ཀོ ཨ་ཏྟ་བྷཱ་ཝོ ཧུ་ཏྭཱ ཝི་པ་ཙྩ་ཏི པཱ་ཏུ་བྷ་ཝ་ཏི. ཨོ་ཀཱ་སཾ པ་ན ཨ་ལ་བྷ་མཱ་ནཱ བྷ་ཝ་ས་ཏཾ་པི བྷ་ཝ་ས་ཧ་སྶཾ་པི བྷ་ཝ་ས་ཏ་ས་ཧ་སྶཾ་པི ཏཾ ས་ནྟཱ་ནཾ ཨ་ནུ་ག་ཙྪ་ཏི་ཡེ་ཝ. མ་ཧ་གྒ་ཏ་ཀ་མྨཾ པ་ན ལ་དྡྷོ་ཀཱ་སེ ས་ཏི དུ་ཏི་ཡ་བྷ་ཝེ བྲ་ཧྨ་ལོ་ཀེ ཨེ་ཀོ བྲ་ཧྨ་ཏྟ་བྷཱ་ཝོ ཧུ་ཏྭཱ ཝི་པ་ཙྩ་ཏི པཱ་ཏུ་བྷ་ཝ་ཏི. སུ་པ་རི་པ་ཀྐ་ཀ་མྨ་ཏྟཱ པ་ན དུ་ཏི་ཡ་བྷ་ཝེ་ཡེ་ཝ ཁཱི་ཡ་ཏི, ཏ་ཏོ པ་རཾ ནཱ་ནུ་ག་ཙྪ་ཏཱི་ཏི. ཀ་མྨ་པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༤. ཝི་པཱ་ཀ་པ་ཙྩ་ཡོ
ཚ་ཏྟིཾ་ས་ཝི་དྷཱ ཝི་པཱ་ཀ་བྷཱུ་ཏཱ ས་ཧ་ཛཱ་ཏ་ཙི་ཏྟ་ཙེ་ཏ་སི་ཀཱ དྷ་མྨཱ ཝི་པཱ་ཀ པ་ཙྩ་ཡོ. ཏེ་ཡེ་ཝ ཨ་ཉྙ་མ་ཉྙ་ཉྩ པ་ཊི་ས་ནྡྷི་ཀྑ་ཎེ ཀ་མྨ་ཛ་རཱུ་པཱ་ནི ཙ པ་ཝ་ཏྟི་ཀྑ་ཎེ ཝི་པཱ་ཀ ཙི་ཏྟ་ཛཱ་ཏཱ་ནི ཙི་ཏྟ་ཛ་རཱུ་པཱ་ནི ཙ ཝི་པཱ་ཀ་པ་ཙྩ་ཡུ་པྤ་ནྣཱ.
ཀེ་ན་ཊྛེ་ན ཝི་པཱ་ཀོ་ཏི. ཝི་པ་ཙྩ་ན་ཊྛེ་ན ཝི་པཱ་ཀོ. ཝི་པ་ཙྩ་ནཾ ནཱ་མ མུ་དུ་ཏ་རུ་ཎ་བྷཱ་ཝཾ ཨ་ཏི་ཀྐ་མྨ ཝི་པ་ཀྐ་བྷཱ་ཝཾ ཨཱ་པ་ཛྫ་ནཾ. ཀ་སྶ པ་ན དྷ་མྨ་སྶ མུ་དུ་ཏ་རུ་ཎ་བྷཱ་ཝོ, ཀ་སྶ ཝི་པ་ཀྐ་བྷཱ་ཝོ་ཏི. ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡ ས་ངྑཱ་ཏ་སྶ ཨ་ཏཱི་ཏ་ཀ་མྨ་སྶ མུ་དུ་ཏ་རུ་ཎ་བྷཱ་ཝོ, ཏ་སྶེ་ཝ ཀ་མྨ་སྶ ཝི་པ་ཀྐ་བྷཱ་ཝོ.
ཏ་ཏྠ ཨེ་ཀ་སྶ ཀ་མྨ་སྶ ཙ་ཏ་སྶོ ཨ་ཝ་ཏྠཱ་ཡོ ཧོ་ནྟི ཙེ་ཏ་ནཱ ཝ་ཏྠཱ ཀ་མྨཱ་ཝ་ཏྠཱ ནི་མི་ཏྟཱ་ཝ་ཏྠཱ ཝི་པཱ་ཀཱ་ཝ་ཏྠཱ་ཏི.
ཏ་ཏྠ ཏཱ་ཡ ཙེ་ཏ་ནཱ་ཡ ནི་རུ་དྡྷཱ་ཡ་པི ཏ་སྶཱ ཀི་རི་ཡཱ ཝི་སེ་སོ ན ནི་རུ་ཛ྄ཛྷ་ཏི, ཏཾ ཙི་ཏྟ་ས་ནྟཱ་ནཾ ཨ་ནུ་ག་ཙྪ་ཏི་ཡེ་ཝ. ཨ་ཡཾ ཀ་མྨཱ་ཝ་ཏྠཱ ནཱ་མ.
ནི་མི་ཏྟཱ་ཝ་ཏྠཱ་ཏི ཏཾ ཀ་མྨཾ ཡ་དཱ ཝི་པ་ཙྩི་ཏུཾ ཨོ་ཀཱ་སཾ ལ་བྷ་ཏི, ཏ་དཱ མ་ར་ཎཱ་ས་ནྣ་ཀཱ་ལེ ཏ་སྶ པུ་གྒ་ལ་སྶ ཏ་མེ་ཝ ཀ་མྨཾ ཝཱ པ་ཙྩུ་པ་ཊྛཱ་ཏི, སོ པུ་གྒ་ལོ ཏ་དཱ དཱ་ནཾ དེ་ནྟོ ཝི་ཡ སཱི་ལཾ ར་ཀྑ་ནྟོ ཝི་ཡ པཱ་ཎ་གྷཱ་ཏཾ ཝཱ ཀ་རོ་ནྟོ ཝི་ཡ ཧོ་ཏི. ཀ་མྨ་ནི་མི་ཏྟཾ ཝཱ པ་ཙྩུ་པ་ཊྛཱ་ཏི, དཱ་ན ཝ་ཏྠུ་ཨཱ་དི་ཀཾ ཝཱ ས་ཏྠཱ་དི་ཀཾ ཝཱ ཨ་ཉྙཾ ཝཱ་པི པུ་བྦེ ཏ་སྶ ཀ་མྨ་སྶ ཨུ་པ་ཀ་ར་ཎ་བྷཱུ་ཏཾ ཨཱ་ར་མྨ་ཎཾ ཏ་དཱ ཏ་སྶ པུ་གྒ་ལ་སྶ ཧ་ཏྠ་ག་ཏཾ ཝི་ཡ ཧོ་ཏི. ག་ཏི་ནི་མི་ཏྟཾ ཝཱ པ་ཙྩུ་པ་ཊྛཱ་ཏི, དི་བྦ་ཝི་མཱ་ནཱ་དི་ཀཾ ཝཱ ནི་ར་ཡ་གྒི་ཛཱ་ལཱ་དི་ཀཾ ཝཱ ཨུ་པྤ་ཛྫ་མཱ་ན་བྷ་ཝེ ཨུ་པ་ལ་བྷི་ཏ་བྦཾ ཝཱ ཨ་ནུ་བྷ་ཝི་ཏ་བྦཾ ཝཱ ཨཱ་ར་མྨ་ཎཾ ཏ་དཱ དི་སྶ་མཱ་ནཾ ཧོ་ཏི. ཨ་ཡཾ ནི་མི་ཏྟཱ ཝ་ཏྠཱ ནཱ་མ.
ཝི་པཱ་ཀཱ་ཝ་ཏྠཱ་ཏི ས་ཙེ སོ པུ་གྒ་ལོ ཏ་ཐཱ པ་ཙྩུ་པ་ཊྛི་ཏཾ ཏཾ ཀ་མྨཾ ཝཱ ཀ་མྨ་ནི་མི་ཏྟཾ ཝཱ ག་ཏི་ནི་མི་ཏྟཾ ཝཱ ཨེ་ཀཾ ཨཱ་ར་མྨ་ཎཾ ཨ་མུ་ཉྩ་མཱ་ནོ མ་ར་ཏི, ཏ་དཱ ཏཾ ཀ་མྨཾ ཏ་སྨིཾ་བྷ་ཝེ ཝི་པ་ཙྩ་ཏི, ཏཾ ཀ་མྨཾ ཏ་སྨིཾ་བྷ་ཝེ ཨེ་ཀོ ཨ་ཏྟ་བྷཱ་ཝོ ཧུ་ཏྭཱ པཱ་ཏུ་བྷ་ཝ་ཏི. ཏ་ཏྠ པུ་རི་མཱ་སུ ཏཱི་སུ ཨ་ཝ་ཏྠཱ་སུ ཏཾ ཀ་མྨཾ མུ་དུ་ཏ་རུ་ཎ་བྷཱུ་ཏཾ ཧོ་ཏི, པ་ཙྪི་མཾ པ་ན ཝི་པཱ་ཀཱ་ཝ་ཏྠཾ པ་ཏྭཱ ཝི་པ་ཀྐ་བྷཱུ་ཏཾ ཧོ་ཏི. ཏེ་ན ཝུ་ཏྟཾ ཝི་པ་ཙྩ་ནཾ ནཱ་མ མུ་དུ་ཏ་རུ་ཎ་བྷཱ་ཝཾ ཨ་ཏི་ཀྐ་མྨ ཝི་པ་ཀྐ་བྷཱ་ཝཾ ཨཱ་པ་ཛྫ་ན་ནྟི. ཨེ་ཝཾ ཝི་པ་ཀྐ་བྷཱ་ཝཾ ཨཱ་པ་ནྣོ ཙི་ཏྟ ཙེ་ཏ་སི་ཀ་དྷ་མྨ་ས་མཱུ་ཧོ ཝི་པཱ་ཀོ ནཱ་མ.
ཏ་ཏྠ ཡ་ཐཱ ཨ་མྦ་པྥ་ལཱ་ནི ནཱ་མ ཡ་དཱ ཝི་པ་ཀྐ་བྷཱ་ཝཾ ཨཱ་པ་ཛྫ་ནྟི, ཏ་དཱ ས་བྦ་སོ སི་ནི་དྡྷ་རཱུ་པཱ་ནི ཧོ་ནྟི. ཨེ་ཝ་མེ་ཝཾ ཝི་པཱ་ཀ་དྷ་མྨཱ ནཱ་མ ནི་རུ་སྶཱ་ཧཱ ནི་བྱཱ་པཱ་རཱ ཧུ་ཏྭཱ ས་བྦ་སོ ས་ནྟ་རཱུ་པཱ ཧོ་ནྟི. ཏེ་སཾ ས་ནྟ་རཱུ་པ་ཏྟཱ་ཡེ་ཝ བྷ་ཝ་ངྒ་ཙི་ཏྟཱ་ནཾ ཨཱ་ར་མྨ་ཎཾ ཨ་ཝི་བྷཱུ་ཏཾ ཧོ་ཏི, བྷ་ཝ་ངྒ་ཏོ ཝུ་ཊྛཱ་ན་ཀཱ་ལེ ཏཾ ཨཱ་ར་མྨ་ཎཾ ན ཛཱ་ནཱ་ཏི. ཏ་ཐཱ་ཧི ར་ཏྟི་ཡཾ ནི་དྡཱ་ཡ་ནྟ་སྶ པུ་རི་མ་བྷ་ཝེ མ་ར་ཎཱ་ས་ནྣ་ཀཱ་ལེ ཡ་ཐཱ་ག་ཧི་ཏཾ ཀ་མྨཱ་དི་ཀཾ ཨཱ་ར་མྨ་ཎཾ ཨཱ་ར་བྦྷ བྷ་ཝ་ངྒ་སོ་ཏཾ པ་ཝ་ཏྟ་མཱ་ནཾ་པི ཏ་སྶ བྷ་ཝ་ངྒ་སོ་ཏ་སྶ ཏཾ ཨཱ་ར་མྨ་ཎཾ ཨཱ་ར་བྦྷ ཨི་དཾ ནཱ་མ མེ པུ་རི་མ་བྷ་ཝེ ཨཱ་ར་མྨ་ཎཾ དི་ཊྛ་ནྟི ཀ་སྶ་ཙི ཛཱ་ན་ན་ཝཱི་ཐི་ཙི་ཏྟ་སྶ ཨུ་པྤ་ཏྟི་ཡཱ པ་ཙྩ་ཡོ ན ཧོ་ཏི. སོ པུ་གྒ་ལོ ནི་དྡཱ་ཡ་ན་ཀཱ་ལེ་པི ཨུ་ཊྛཱ་ན་ཀཱ་ལེ་པི པུ་རི་མ་བྷ་ཝ་སི་དྡྷཾ ཏཾ ནི་མི་ཏྟཾ ན ཛཱ་ནཱ་ཏི. ཨེ་ཝཾ ནི་རུ་སྶཱ་ཧ་ནི་བྱཱ་པཱ་ར་ས་ནྟ་རཱུ་པ བྷཱ་ཝེ་ན ཨུ་པ་ཀཱ་ར་ཀ་ཏཱ ཝི་པཱ་ཀ་པ་ཙྩ་ཡ་ཏཱ ནཱ་མཱ་ཏི. ཝི་པཱ་ཀ པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༥. ཨཱ་ཧཱ་ར་པ་ཙྩ་ཡོ
དུ་ཝི་དྷོ ཨཱ་ཧཱ་ར་པ་ཙྩ་ཡོ རཱུ་པཱ་ཧཱ་ར་པ་ཙྩ་ཡོ ཨ་རཱུ་པཱ་ཧཱ་ར པ་ཙྩ་ཡོ.
ཏ་ཏྠ རཱུ་པཱ་ཧཱ་ར་པ་ཙྩ་ཡོ ནཱ་མ ཀ་བ་ལཱི༹་ཀཱ་རཱ་ཧཱ་ར་ས་ངྑཱ་ཏཾ ཨོ་ཛ རཱུ་པཾ ཝུ་ཙྩ་ཏི. སོ ཙ ཨ་ཛ྄ཛྷ་ཏྟཱ་ཧཱ་རོ བ་ཧི་དྡྷཱ་ཧཱ་རོ་ཏི དུ་ཝི་དྷོ. ཀ་བ་ལཱི༹་ཀཱ་རཱ་ཧཱ་ར་བྷ་ཀྑཱ་ནཾ ས་ཏྟཱ་ནཾ ས་བྦེ་པི ཙ་ཏུ་ས་མུ་ཊྛཱ་ནི་ཀ་རཱུ་པ་དྷ་མྨཱ ཏ་སྶ དུ་ཝི་དྷ་སྶ རཱུ་པཱ་ཧཱ་ར་སྶ པ་ཙྩ་ཡུ་པྤ་ནྣཱ.
ཨ་རཱུ་པཱ་ཧཱ་རོ པ་ན ཏི་ཝི་དྷོ ཕ་སྶཱ་ཧཱ་རོ མ་ནོ་ས་ཉྩེ་ཏ་ནཱ ཧཱ་རོ ཝི་ཉྙཱ་ཎཱ་ཧཱ་རོ ཙ. ཏ་ཡོ་པེ་ཏེ དྷ་མྨཱ ས་ཧ་ཛཱ་ཏཱ་ནཾ ནཱ་མ་རཱུ་པ་དྷ་མྨཱ་ནཾ ཨཱ་ཧཱ་ར་པ་ཙྩ་ཡོ ཧོ་ནྟི. ས་ཧ་ཛཱ་ཏཱ ཙ ནཱ་མ་རཱུ་པ དྷ་མྨཱ ཏེ་སཾ པ་ཙྩ་ཡུ་པྤ་ནྣཱ.
ཀེ་ན་ཊྛེ་ན ཨཱ་ཧཱ་རོ་ཏི. བྷུ་སཾ ཧ་ར་ཎ་ཊྛེ་ན ཨཱ་ཧཱ་རོ. བྷུ་སཾ ཧ་ར་ཎ་ཊྛེ་ནཱ་ཏི་ཙ ད་ལ༹ྷཾ པ་ཝ་ཏྟཱ་པ་ན་ཊྛེ་ན, ཙི་ར་ཀཱ་ལཾ ཋི་ཏི་ཡཱ ཝུ་ཌྜྷི་ཡཱ ཝི་རུ་ལ༹ྷི་ཡཱ ཝེ་པུ་ལླཱ་ཡ ཨུ་པ་ཏྠ་མྦྷ་ན་ཊྛེ་ནཱ་ཏི ཝུ་ཏྟཾ ཧོ་ཏི. ཛ་ན་ན་ཀི་ཙྩ་ཡུ་ཏྟོ་པི ཨཱ་ཧཱ་རོ ཨུ་པ་ཏྠ་མྦྷ་ན་ཀི་ཙྩ་པྤ་དྷཱ་ནོ ཧོ་ཏཱི་ཏི.
ཏ་ཏྠ དུ་ཝི་དྷོ རཱུ་པཱ་ཧཱ་རོ ཨ་ཛ྄ཛྷ་ཏྟ་ས་ནྟཱ་ནེ ཙ་ཏུ་ས་མུ་ཊྛཱ་ནི་ཀཾ རཱུ་པ་ཀཱ་ཡཾ ཨུ་པ་བྲཱུ་ཧ་ཡ་ནྟོ བྷུ་སཾ ཧ་ར་ཏི, ད་ལ༹ྷཾ པ་ཝ་ཏྟེ་ཏི, ཙི་རཾ ཨ་དྡྷཱ་ནཾ ག་མེ་ཏི, ཏཾ ཏཾ ཨཱ་ཡུ་ཀ་པྤ་པ་རི་ཡོ་སཱ་ནཾ པཱ་པེ་ཏཱི་ཏི ཨཱ་ཧཱ་རོ.
ཕ་སྶཱ་ཧཱ་རོ ཨཱ་ར་མྨ་ཎེ་སུ ཨི་ཊྛཱ་ནི་ཊྛ་ར་སཾ ནཱི་ཧ་ར་ནྟོ ས་མྤ་ཡུ་ཏྟ་དྷ་མྨེ བྷུ་སཾ ཧ་ར་ཏི. མ་ནོ་ས་ཉྩེ་ཏ་ནཱ་ཧཱ་རོ ཀཱ་ཡ་ཝ་ཙཱི མ་ནོ་ཀ་མྨེ་སུ ཨུ་སྶཱ་ཧཾ ཛ་ནེ་ནྟོ ས་མྤ་ཡུ་ཏྟ་དྷ་མྨེ བྷུ་སཾ ཧ་ར་ཏི. ཝི་ཉྙཱ་ཎཱ་ཧཱ་རོ ཨཱ་ར་མྨ་ཎ་ཝི་ཛཱ་ན་ན་ཊྛེ་ན པུ་བྦ་ངྒ་མ་ཀི་ཙྩཾ ཝ་ཧ་ནྟོ ས་མྤ་ཡུ་ཏྟ་དྷ་མྨེ བྷུ་སཾ ཧ་ར་ཏི, ད་ལ༹ྷཾ པ་ཝ་ཏྟེ་ཏི, ཙི་རཾ ཨ་དྡྷཱ་ནཾ ག་མེ་ཏཱི་ཏི ཨཱ་ཧཱ་རོ. ས་མྤ་ཡུ་ཏྟ་དྷ་མྨེ བྷུ་སཾ ཧ་ར་ནྟོ ས་ཧ་ཛཱ་ཏ་རཱུ་པ་དྷ་མྨེ་པི བྷུ་སཾ ཧ་ར་ཏི་ཡེ་ཝ.
ཨི་དྷ སུ་ཏྟ་ནྟ་ན་ཡོ་པི ཝ་ཏྟ་བྦོ. ཡ་ཐཱ ས་ཀུ་ཎཱ ནཱ་མ ཙ་ཀྑཱུ་ཧི དི་སཱ་ཝི་དི་སཾ ཝི་བྷཱ་ཝེ་ཏྭཱ པ་ཏྟེ་ཧི རུ་ཀྑ་ཏོ རུ་ཀྑཾ ཝ་ན་ཏོ ཝ་ནཾ ཨཱ་ཀཱ་སེ་ན པ་ཀྑ་ནྡི་ཏྭཱ ཏུ་ཎྜ་ཀེ་ཧི ཕ་ལཱ་ཕ་ལཱ་ནི ཏུ་དི་ཏྭཱ ཡཱ་ཝ་ཛཱི་ཝཾ ཨ་ཏྟཱ་ནཾ ཡཱ་པེ་ནྟི. ཏ་ཐཱ ཨི་མེ ས་ཏྟཱ ཚ་ཧི ཝི་ཉྙཱ་ཎེ་ཧི ཨཱ་ར་མྨ་ཎཱ་ནི ཝི་བྷཱ་ཝེ་ཏྭཱ ཚ་ཧི མ་ནོ་ས་ཉྩེ་ཏ་ནཱ་ཧཱ་རེ་ཧི ཨཱ་ར་མྨ་ཎ་ཝ་ཏྠུ་པྤ་ཊི་ལཱ་བྷ་ཏྠཱ་ཡ ཨུ་སྶུ་ཀྐ་ནཾ ཀ་ཏྭཱ ཚ་ཧི ཕ་སྶཱ་ཧཱ་རེ་ཧི ཨཱ་ར་མྨ་ཎེ་སུ ར་སཾ པཱ་ཏུ་བྷ་ཝ་ནྟཾ ཀ་ཏྭཱ སུ་ཁ་དུ་ཀྑཾ ཨ་ནུ་བྷ་ཝ་ནྟི. ཝི་ཉྙཱ་ཎེ་ཧི ཝཱ ཨཱ་ར་མྨ་ཎཱ་ནི ཝི་བྷཱ་ཝེ་ཏྭཱ ནཱ་མ་རཱུ་པ ས་མྤ་ཏྟིཾ སཱ་དྷེ་ནྟི. ཕ་སྶེ་ཧི ཨཱ་ར་མྨ་ཎེ་སུ ར་སཾ པཱ་ཏུ་བྷ་ཝ་ནྟཾ ཀ་ཏྭཱ ཨཱ་ར་མྨ་ཎ་ར་སཱ་ནུ་བྷ་ཝ་ནཾ ཝེ་ད་ནཾ ས་མྤཱ་དེ་ཏྭཱ ཏ་ཎྷཱ་ཝེ་པུ་ལླཾ ཨཱ་པ་ཛྫ་ནྟི. ཙེ་ཏ་ནཱ་ཧི ཏ་ཎྷཱ་མཱུ་ལ་ཀཱ་ནི ནཱ་ནཱ་ཀ་མྨཱ་ནི པ་ས་ཝེ་ཏྭཱ བྷ་ཝ་ཏོ བྷ་ཝཾ སཾ་ས་ར་ནྟི. ཨེ་ཝཾ ཨཱ་ཧཱ་ར་དྷ་མྨཱ་ནཾ མ་ཧ་ནྟཾ ཨཱ་ཧཱ་ར་ཀི་ཙྩཾ ཝེ་དི་ཏ་བྦ་ནྟི. ཨཱ་ཧཱ་ར་པ་ཙྩ་ཡ་དཱི་པ་ནཱ ནི་ཊྛི་ཏཱ.
༡༦. ཨི་ནྡྲི་ཡ་པ་ཙྩ་ཡོ
ཏི་ཝི་དྷོ ཨི་ནྡྲི་ཡ་པ་ཙྩ་ཡོ ས་ཧ་ཛཱ་ཏི་ནྡྲི་ཡ་པ་ཙྩ་ཡོ པུ་རེ ཛཱ་ཏི་ནྡྲི་ཡ་པ་ཙྩ་ཡོ རཱུ་པ་ཛཱི་ཝི་ཏི་ནྡྲི་ཡ་པ་ཙྩ་ཡོ.
ཏ་ཏྠ པ་ནྣ་ར་སི་ནྡྲི་ཡ་དྷ་མྨཱ ས་ཧ་ཛཱ་ཏི་ནྡྲི་ཡ་པ་ཙྩ་ཡོ ནཱ་མ, ཛཱི་ཝི་ཏི་ནྡྲི་ཡཾ མ་ནི་ནྡྲི་ཡཾ སུ་ཁི་ནྡྲི་ཡཾ དུ་ཀྑི་ནྡྲི་ཡཾ སོ་མ་ན་སྶི་ནྡྲི་ཡཾ དོ་མ་ན་སྶི་ནྡྲི་ཡཾ ཨུ་པེ་ཀྑི་ནྡྲི་ཡཾ ས་དྡྷི་ནྡྲི་ཡཾ ཝཱི་རི་ཡི་ནྡྲི་ཡཾ ས་ཏི་ནྡྲི་ཡཾ ས་མཱ་དྷི་ནྡྲི་ཡཾ པ་ཉྙི་ནྡྲི་ཡཾ ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཾ ཨ་ཉྙི་ནྡྲི་ཡཾ ཨ་ཉྙཱ་ཏཱ་ཝི་ནྡྲི་ཡ་ནྟི. ཏེ་ཧི ས་ཧ་ཛཱ་ཏཱ ཙི་ཏྟ་ཙེ་ཏ་སི་ཀ་དྷ་མྨཱ ཙ རཱུ་པ་དྷ་མྨཱ ཙ ཏ་སྶ པ་ཙྩ་ཡུ་པྤ་ནྣཱ.
པ་ཉྩི་ནྡྲི་ཡ་རཱུ་པཱ་ནི པུ་རེ་ཛཱ་ཏི་ནྡྲི་ཡ་པ་ཙྩ་ཡོ, ཙ་ཀྑུ་ནྡྲི་ཡཾ སོ་ཏི་ནྡྲི་ཡཾ གྷཱ་ནི་ནྡྲི་ཡཾ ཛི་ཝ྄ཧི་ནྡྲི་ཡཾ ཀཱ་ཡི་ནྡྲི་ཡཾ. པ་ཉྩ་ཝི་ཉྙཱ་ཎ་ཙི་ཏྟ ཙེ་ཏ་སི་ཀ དྷ་མྨཱ ཏ་སྶ པ་ཙྩ་ཡུ་པྤ་ནྣཱ.
ཨེ་ཀཾ རཱུ་པ་ཛཱི་ཝི་ཏི་ནྡྲི་ཡཾ རཱུ་པ་ཛཱི་ཝི་ཏི་ནྡྲི་ཡ་པ་ཙྩ་ཡོ. ས་བྦཱ་ནི ཀ་མྨ་ཛ རཱུ་པཱ་ནི ཛཱི་ཝི་ཏ་རཱུ་པ་ཝ་ཛྫི་ཏཱ་ནི ཏ་སྶ པ་ཙྩ་ཡུ་པྤ་ནྣཱ་ནི.
ཀེ་ན་ཊྛེ་ན ཨི་ནྡྲི་ཡ་ནྟི. ཨི་སྶ་རི་ཡ་ཊྛེ་ན ཨི་ནྡྲི་ཡཾ. ཏ་ཏྠ ཀ་ཏྠ ཨི་སྶ་རི་ཡ་ནྟི. ཨ་ཏྟ་ནོ ཨ་ཏྟ་ནོ པ་ཙྩ་ཡུ་པྤ་ནྣེ་སུ དྷ་མྨེ་སུ ཨི་སྶ་རི་ཡཾ. ཀ་སྨིཾ ཀ་སྨིཾ ཀི་ཙྩེ ཨི་སྶ་རི་ཡ་ནྟི. ཨ་ཏྟ་ནོ ཨ་ཏྟ་ནོ ཀི་ཙྩེ ཨི་སྶ་རི་ཡཾ. ནཱ་མ་ཛཱི་ཝི་ཏཾ ས་མྤ་ཡུ་ཏྟ་དྷ་མྨཱ་ནཾ ཛཱི་ཝ་ན་ཀི་ཙྩེ ཨི་སྶ་རི་ཡཾ. ཛཱི་ཝ་ན་ཀི་ཙྩེ་ཏི ཨཱ་ཡུ་ཝ་ཌྜྷ་ན་ཀི་ཙྩེ, ས་ནྟ་ཏི་ཋི་ཏི་ཡཱ ཙི་ར་ཀཱ་ལ་ཋི་ཏི་ཀི་ཙྩེ་ཏི ཨ་ཏྠོ. མ་ནི་ནྡྲི་ཡཾ ཨཱ་ར་མྨ་ཎ་གྒ་ཧ་ཎ་ཀི་ཙྩེ ས་མྤ་ཡུ་ཏྟ་དྷ་མྨཱ་ནཾ ཨི་སྶ་རི་ཡཾ. ཨ་ཝ་སེ་སོ ཨི་ནྡྲི་ཡ་ཊྛོ པུ་བྦེ ཨི་ནྡྲི་ཡ་ཡ་མ་ཀ་དཱི་པ་ནི་ཡཾ ཝུ་ཏྟོ་ཡེ་ཝ.
ཨེ་ཏྠ ཝ་དེ་ཡྻ, དྭེ ཨི་ཏྠི་ནྡྲི་ཡ་པུ་རི་སི་ནྡྲི་ཡ་དྷ་མྨཱ ཨི་ནྡྲི་ཡ་བྷཱུ་ཏཱ ས་མཱ་ནཱ་པི ཀ་སྨཱ ཨི་ནྡྲི་ཡ་པ་ཙྩ་ཡེ ཝི་སུཾ ན ག་ཧི་ཏཱ་ཏི. པ་ཙྩ་ཡ་ཀི་ཙྩ་སྶ ཨ་བྷཱ་ཝ་ཏོ. ཏི་ཝི་དྷ་ཉྷི པ་ཙྩ་ཡ་ཀི་ཙྩཾ ཛ་ན་ན་ཀི་ཙྩ་ཉྩ ཨུ་པ་ཏྠ་མྦྷ་ན་ཀི་ཙྩ་ཉྩ ཨ་ནུ་པཱ་ལ་ན་ཀི་ཙྩ་ཉྩ. ཏ་ཏྠ ཡོ པ་ཙྩ་ཡོ པ་ཙྩ་ཡུ་པྤ་ནྣ་དྷ་མྨ་སྶ ཨུ་པྤཱ་དཱ་ཡ པ་ཙྩ་ཡོ ཧོ་ཏི, ཡ་སྨིཾ ཨ་ས་ཏི པ་ཙྩ་ཡུ་པྤ་ནྣོ དྷ་མྨོ ན ཨུ་པྤ་ཛྫ་ཏི, ཏ་སྶ པ་ཙྩ་ཡ་ཀི་ཙྩཾ ཛ་ན་ན་ཀི་ཙྩཾ ནཱ་མ. ཡ་ཐཱ ཨ་ན་ནྟ་ར་པ་ཙྩ་ཡོ. ཡོ པ་ཙྩ་ཡོ པ་ཙྩ་ཡུ་པྤ་ནྣ་དྷ་མྨ་སྶ ཋི་ཏི་ཡཱ ཙ ཝུ་ཌྜྷི་ཡཱ ཙ ཝི་རུ་ལ༹ྷི་ཡཱ ཙ པ་ཙྩ་ཡོ ཧོ་ཏི, ཡ་སྨིཾ ཨ་ས་ཏི པ་ཙྩ་ཡུ་པྤ་ནྣོ དྷ་མྨོ ན ཏི་ཊྛ་ཏི ན ཝ་ཌྜྷ་ཏི ན ཝི་རཱུ་ཧ་ཏི, ཏ་སྶ པ་ཙྩ་ཡ་ཀི་ཙྩཾ ཨུ་པ་ཏྠ་མྦྷ་ན་ཀི་ཙྩཾ ནཱ་མ. ཡ་ཐཱ པ་ཙྪཱ་ཛཱ་ཏ་པ་ཙྩ་ཡོ. ཡོ པ་ཙྩ་ཡོ པ་ཙྩ་ཡུ་པྤ་ནྣ་སྶ དྷ་མྨ་སྶ པ་ཝ་ཏྟི་ཡཱ པ་ཙྩ་ཡོ ཧོ་ཏི, ཡེ་ན ཝི་ནཱ པ་ཙྩ་ཡུ་པྤ་ནྣོ དྷ་མྨོ ཙི་ར་ཀཱ་ལཾ ན པ་ཝ་ཏྟ་ཏི, ས་ནྟ་ཏི ག་མ་ནཾ ཚི་ཛྫ་ཏི, ཏ་སྶ པ་ཙྩ་ཡ ཀི་ཙྩཾ ཨ་ནུ་པཱ་ལ་ན་ཀི་ཙྩཾ ནཱ་མ. ཡ་ཐཱ རཱུ་པ ཛཱི་ཝི་ཏི་ནྡྲི་ཡ་པ་ཙྩ་ཡོ. ཨེ་ཏེ པ་ན དྭེ ཨི་ནྡྲི་ཡ་དྷ་མྨཱ ཏེ་སུ ཏཱི་སུ པ་ཙྩ་ཡ ཀི་ཙྩེ་སུ ཨེ་ཀ་ཀི་ཙྩཾ་པི ན་སཱ་དྷེ་ནྟི, ཏ་སྨཱ ཨེ་ཏེ དྭེ དྷ་མྨཱ ཨི་ནྡྲི་ཡ པ་ཙྩ་ཡེ ཝི་སུཾ ན ག་ཧི་ཏཱ་ཏི.