༤. ས་མཱ་ས་ཀ་ཎྜ
ཨ་ཐ ནཱ་མ་མེ་ཝ ཨ་ཉྙ་མ་ཉྙ་ས་མྦ་ནྡྷཱི་ནཾ ས་མཱ་སོ་ཏི ནཱ་མ་ནི་སྶི་ཏ་ཏྟཱ, ས་ཡ་ཉྩ ནཱ་མི་ཀ་ཏྟཱ ནཱ་མཱ་ན་ནྟ་རཾ ས་མཱ་སོ ཝུ་ཙྩ་ཏེ.
སོ ཙ ས་ཉྙཱ་ཝ་སེ་ན ཚ་བྦི་དྷོ ཨ་བྱ་ཡཱི་བྷཱ་ཝོ ཀ་མྨ་དྷཱ་ར་ཡོ དི་གུ ཏ་པྤུ་རི་སོ བ་ཧུ་བྦཱི་ཧི དྭ་ནྡོ ཙཱ་ཏི.
ཨ་བྱ་ཡཱི་བྷཱ་ཝ་ས་མཱ་ས
ཏ་ཏྲ པ་ཋ་མཾ ཨ་བྱ་ཡཱི་བྷཱ་ཝ་ས་མཱ་སོ ཝུ་ཙྩ་ཏེ;
སོ ཙ ནི་ཙྩ་ས་མཱ་སོ་ཏི ཨ་སྶ་པ་ད་ཝི་གྒ་ཧོ.
‘‘ཨུ་པ་ན་ག་རཾ’’ཨི་ཏཱི་དྷ – ཨུ་པས་དྡ་ཏོ པ་ཋ་མེ་ཀ་ཝ་ཙ་ནཾ སི, ཏ་སྶ ཨུ་པ་ས་གྒ་པ་ར་ཏྟཱ ‘‘ས་བྦཱ་ས་མཱ་ཝུ་སོ་པ་ས་གྒ་ནི་པཱ་ཏཱ་དཱི་ཧི ཙཱ’’ཏི ལོ་པོ, ན་ག་རས་དྡ་ཏོ ཚ་ཊྛེ་ཀ་ཝ་ཙ་ནཾ ས, ན་ག་ར་སྶ ས་མཱི་པ་ནྟི ཨ་ཉྙ་པ་དེ་ན ཝི་གྒ་ཧེ –
‘‘ནཱ་མཱ་ནཾ ས་མཱ་སོ ཡུ་ཏྟ་ཏྠོ’’ཏི ས་མཱ་ས་ཝི་དྷཱ་ནེ ས་བྦ་ཏྠ ཝ་ཏྟ་ཏེ.
༣༣༠. ཨུ་པ་ས་གྒ་ནི་པཱ་ཏ་པུ་བྦ་ཀོ ཨ་བྱ་ཡཱི་བྷཱ་ཝོ.
ཨུ་པ་ས་གྒཔུ་བྦ་ཀོ, ནི་པཱ་ཏཔུ་བྦ་ཀོ ཙ ནཱ་མི་ཀོ ཡུ་ཏྟ་ཏྠོ ཏེ་ཧེ་ཝ ཨ་ཏྟ་པུ་བྦ་ཀེ་ཧི ཨུ་པ་ས་གྒ་ནི་པཱ་ཏེ་ཧི ས་ཧ ནི་ཙྩཾ ས་མ་སཱི་ཡ་ཏེ, སོ ཙ ས་མཱ་སོ ཨ་བྱ་ཡཱི་བྷཱ་ཝས་ཉྙོ ཧོ་ཏི. ཨི་དྷ ཨ་བྱ་ཡཱི་བྷཱ་ཝཱ་དི་ས་ཉྙཱ་ཝི་དྷཱ་ཡ་ཀ་སུ་ཏྟཱ་ནེ་ཝ ཝཱ ས་ཉྙཱ་ཝི་དྷཱ་ན་མུ་ཁེ་ན ས་མཱ་ས་ཝི་དྷཱ་ཡ་ཀཱ་ནཱི་ཏི ད་ཊྛ་བྦཱ་ནི.
ཏ་ཏྠ ཨ་བྱ་ཡམི་ཏི ཨུ་པ་ས་གྒ་ནི་པཱ་ཏཱ་ནཾ ས་ཉྙཱ, ལི་ངྒ་ཝ་ཙ་ན་བྷེ་དེ་པི བྱ་ཡ་ར་ཧི་ཏ་ཏྟཱ, ཨ་བྱ་ཡཱ་ནཾ ཨ་ཏྠཾ ཝི་བྷཱ་ཝ་ཡ་ཏཱི་ཏི ཨ་བྱ་ཡཱི་བྷཱ་ཝོ ཨ་བྱ་ཡ་ཏྠ་པུ་བྦ་ངྒ་མ་ཏྟཱ, ཨ་ན་བྱ་ཡཾ ཨ་བྱ་ཡཾ བྷ་ཝ་ཏཱི་ཏི ཝཱ ཨ་བྱ་ཡཱི་བྷཱ་ཝོ. པུ་བྦ་པ་ད་ཏྠ་པྤ་དྷཱ་ནོ ཧི ཨ་བྱ་ཡཱི་བྷཱ་ཝོ, ཨེ་ཏྠ ཙ ‘‘ཨུ་པ་ས་གྒ་ནི་པཱ་ཏ་པུ་བྦ་ཀོ’’ཏི ཝུ་ཏྟ་ཏྟཱ ཨུ་པ་ས་གྒ་ནི་པཱ་ཏཱ་ན་མེ་ཝ པུ་བྦ་ནི་པཱ་ཏོ.
༣༣༡. ནཱ་མཱ་ནཾ ས་མཱ་སོ ཡུ་ཏྟ་ཏྠོ.
ཏེ་སཾ ནཱ་མཱ་ནཾ པ་ཡུ་ཛྫ་མཱ་ན་པ་ད་ཏྠཱ་ནཾ ཡོ ཡུ་ཏྟ་ཏྠོ, སོ ས་མཱ་ས་ས་ཉྙོ ཧོ་ཏི, ཏ་ད་ཉྙཾ ཝཱ་ཀྱ་མི་ཏི རུ་ལ༹ྷཾ.
ནཱ་མཱ་ནི སྱཱདི་ཝི་བྷ་ཏྱ་ནྟཱ་ནི, ས་མ་སྶ་ཏེ་ཏི ས་མཱ་སོ, ས་ངྑི་པི་ཡ་ཏཱི་ཏི ཨ་ཏྠོ.
ཝུ་ཏྟ་ཉྷི
‘‘ས་མཱ་སོ པ་ད་ས་ངྑེ་པོ, པ་ད་པྤ་ཙྩ་ཡ་སཾ་ཧི་ཏཾ;
ཏ་དྡྷི་ཏཾ ནཱ་མ ཧོ་ཏེ་ཝཾ, ཝི་ཉྙེ་ཡྻཾ ཏེ་ས་མ་ནྟ་ར’’ནྟི.
དུ་ཝི་དྷ་ཉྩ་སྶ ས་མ་ས་ནཾ ས་དྡ་ས་མ་ས་ན་མ་ཏྠ་ས་མ་ས་ན་ཉྩ, ཏ་དུ་བྷ་ཡ་མྤི ལུ་ཏྟ་ས་མཱ་སེ པ་རི་པུ་ཎྞ་མེ་ཝ ལ་བྦྷ་ཏི. ཨ་ལུ་ཏྟ་ས་མཱ་སེ པ་ན ཨ་ཏྠ་ས་མ་ས་ན་མེ་ཝ ཝི་བྷ་ཏྟི་ལོ་པཱ་བྷཱ་ཝ་ཏོ, ཏ་ཏྠཱ་པི ཝཱ ཨེ་ཀ་པ་ད་ཏྟཱུ་པ་ག་མ་ན་ཏོ དུ་ཝི་དྷ་མྤི ལ་བྦྷ་ཏེ་ཝ. དྭེ ཧི ས་མཱ་ས་སྶ པ་ཡོ་ཛ་ནཱ་ནི ཨེ་ཀ་པ་ད་ཏྟ་མེ་ཀ་ཝི་བྷ་ཏྟི་ཏྟ་ཉྩཱ་ཏི.
ཡུ་ཏྟོ ཨ་ཏྠོ ཡུ་ཏྟ་ཏྟོ, ཨ་ཐ ཝཱ ཡུ་ཏྟོ ས་ངྒ་ཏོ, ས་མྦ་ནྡྷོ ཝཱ ཨ་ཏྠོ ཡ་སྶ སོ་ཡཾ ཡུ་ཏྟ་ཏྠོ, ཨེ་ཏེ་ན ས་ངྒ་ཏ་ཏྠེ་ན ཡུ་ཏྟ་ཏྠཝ་ཙ་ནེ་ན བྷི་ནྣ་ཏྠཱ་ནཾ ཨེ་ཀ་ཏྠཱི་བྷཱ་ཝོ ས་མཱ་ས་ལ་ཀྑ་ཎ་ནྟི ཝུ་ཏྟཾ ཧོ་ཏི. ཨེ་ཏྠ ཙ ‘‘ནཱ་མཱ་ན’’ནྟི ཝ་ཙ་ནེ་ན ‘‘དེ་ཝ་ད་ཏྟོ པ་ཙ་ཏཱི’’ཏི་ཨཱ་དཱི་སུ ཨཱ་ཁྱཱ་ཏེ་ན ས་མཱ་སོ ན ཧོ་ཏཱི་ཏི ད་སྶེ་ཏི. ས་མྦ་ནྡྷ་ཏྠེ་ན པ་ན ཡུ་ཏྟ་ཏྠགྒ་ཧ་ཎེ་ན ‘‘བྷ་ཊོ ར་ཉྙོ པུ་ཏྟོ དེ་ཝ་ད་ཏྟ་སྶཱ’’ཏི་ཨཱ་དཱི་སུ ཨ་ཉྙ་མ་ཉྙཱ་ན་པེ་ཀྑེ་སུ, ‘‘དེ་ཝ་ད་ཏྟ་སྶ ཀ་ཎྷཱ ད་ནྟཱ’’ཏི་ཨཱ་དཱི་སུ ཙ ཨ་ཉྙ་སཱ་པེ་ཀྑེ་སུ ཨ་ཡུ་ཏྟ་ཏྠ་ཏཱ་ཡ ས་མཱ་སོ ན ཧོ་ཏཱི་ཏི དཱི་པེ་ཏི.
‘‘ཨ་ཏྠ་ཝ་སཱ ཝི་བྷ་ཏྟི་ཝི་པ་རི་ཎཱ་མོ’’ཏི ཝི་པ་རི་ཎཱ་མེ་ན ‘‘ཡུ་ཏྟ་ཏྠཱ་ན’’ནྟི ཝ་ཏྟ་ཏེ.
༣༣༢. ཏེ་སཾ ཝི་བྷ་ཏྟི་ཡོ ལོ་པཱ ཙ.
ཨི་དྷ པ་ད་ནྟ་རེ་ན ཝཱ ཏ་དྡྷི་ཏ་པྤ་ཙྩ་ཡེ་ཧི ཝཱ ཨཱ་ཡཱདི་པྤ་ཙྩ་ཡེ་ཧི ཝཱ ཨེ་ཀ་ཏྠཱི་བྷཱུ་ཏཱ ཡུ་ཏྟ་ཏྠཱ ནཱ་མ, ཏེ་ན ‘‘ཏེ་སཾ ཡུ་ཏྟ་ཏྠཱ་ནཾ ས་མཱ་སཱ་ནཾ, ཏ་དྡྷི་ཏཱཡཱདི་པྤ་ཙྩ་ཡ་ནྟཱ་ན་ཉྩ ཝི་བྷ་ཏྟི་ཡོ ལོ་པ་ནཱི་ཡཱ ཧོ་ནྟཱི’’ཏི ཨ་ཏྠོ. ས་མཱ་སགྒ་ཧ་ཎཱ་དྷི་ཀཱ་རེ པ་ན ས་ཏི ཏེ་སཾག་ཧ་ཎེ་ན ཝཱ ཏ་དྡྷི་ཏཱཡཱདི་པྤ་ཙྩ་ཡ་ནྟ ཝི་བྷ་ཏྟི་ལོ་པོ. ཙགྒ་ཧ་ཎཾ ‘‘པ་བྷ་ངྐ་རོ’’ཏི་ཨཱ་དཱི་སུ ལོ་པ་ནི་ཝ་ཏྟ་ན་ཏྠཾ.
ཝི་པ་རི་ཎཱ་མེ་ན ‘‘ལུ་ཏྟཱ་སུ, ཝི་བྷ་ཏྟཱི་སཱུ’’ཏི ཝ་ཏྟ་ཏེ, ཡུ་ཏྟ་ཏྠགྒ་ཧ་ཎ་ཉྩ.
༣༣༣. པ་ཀ་ཏི ཙ་སྶ ས་ར་ནྟ་སྶ.
ལུ་ཏྟཱ་སུ ཝི་བྷ་ཏྟཱི་སུ ས་ར་ནྟ་སྶ ཨ་སྶ ཡུ་ཏྟ་ཏྠ་བྷཱུ་ཏ་སྶ ཏི་ཝི་དྷ་སྶ་པི ལི་ངྒ་སྶ པ་ཀ་ཏི་བྷཱ་ཝོ ཧོ་ཏི. ཙས་དྡེ་ན ཀིཾ་ས་མུ་ད་ཡ ཨི་ད་པྤ་ཙྩ་ཡ་ཏཱདཱི་སུ ནི་གྒ་ཧཱི་ཏ་ནྟ་སྶ་པི. ནི་མི་ཏྟཱ་བྷཱ་ཝེ ནེ་མི་ཏྟ་ཀཱ་བྷཱ་ཝ་སྶ ཨི་དྷ ཨ་ནི་ཙྪི་ཏ་ཏྟཱ ཨ་ཡ་མ་ཏི་དེ་སོ.
ས་ཀ་ཏྠ་ཝི་ར་ཧེ་ནི་དྷ ས་མཱ་ས་སྶ ཙ ལི་ངྒ་བྷཱ་ཝཱ་བྷཱ་ཝཱ ཝི་བྷ་ཏྟུ་པྤ་ཏྟི་ཡ་མ་ས་མྤ་ཏྟཱ་ཡཾ ནཱ་མ་བྱ་པ་དེ་སཱ་ཏི་དེ་ས་མཱ་ཧ.
༣༣༤. ཏ་དྡྷི་ཏ་ས་མཱ་ས་ཀི་ཏ་ཀཱ ནཱ་མཾ་ཝཱ’ཏ་ཝེ་ཏུ་ནཱ་དཱི་སུ ཙ.
ཏ་དྡྷི་ཏ་ནྟཱ, ཀི་ཏ་ནྟཱ, ས་མཱ་སཱ ཙ ནཱ་མ་མི་ཝ ད་ཊྛ་བྦཱ ཏ་ཝེ་ཏུ་ན ཏྭཱ་ན ཏྭཱདི་པྤ་ཙྩ་ཡ་ནྟེ ཝ་ཛྫེ་ཏྭཱ. ཙགྒ་ཧ་ཎཾ ཀི་ཙྩ་པྤ་ཙྩ་ཡཨཱ་ཨཱི་ཨི་ནཱིཨི་ཏྠི་པྤ་ཙྩ་ཡ་ནྟཱ་དི་སྶ་པི ནཱ་མ་བྱ་པ་དེ་ས་ཏྠཾ. ཨི་དྷ ས་མཱ་སགྒ་ཧ་ཎཾ ཨ་ཏྠ་ཝ་ཏཾ ས་མུ་དཱ་ཡཱ་ནཾ ནཱ་མ་བྱ་པ་དེ་སོ ས་མཱ་ས་སྶེ་ཝཱ་ཏི ནི་ཡ་མ་ཏྠ་ནྟི ཨ་པ་རེ.
‘‘ཨ་བྱ་ཡཱི་བྷཱ་ཝོ’’ཏི ཝ་ཏྟ་ཏེ.
༣༣༥. སོ ན་པུཾ་ས་ཀ་ལི་ངྒོ.
སོ ཨ་བྱ་ཡཱི་བྷཱ་ཝ་ས་མཱ་སོ ན་པུཾ་ས་ཀ་ལི་ངྒོ་ཝ ད་ཊྛ་བྦོ་ཏི ན་པུཾ་ས་ཀ་ལི་ངྒ་ཏྟཾ. ཨེ་ཏྠ ཧི ས་ཏི་པི ལི་ངྒཱ་ཏི་དེ་སེ ‘‘ཨ་དྷི་པ་ཉྙ’’ནྟི་ཨཱ་དཱི་སུ ‘‘ཨ་དྷི་ཉཱ་ཎཾ’’ནྟི་ཨཱ་དི རཱུ་པ་པྤ་ས་ངྒོ ན ཧོ་ཏི ས་དྡ་ནྟ་ར་ཏྟཱ, ‘‘ཏི་པ་ཉྙ’’ནྟི་ཨཱ་དཱི་སུ ཝི་ཡཱ་ཏི ད་ཊྛ་བྦཾ, ན ཙཱ་ཡཾ ཨ་ཏི་དེ་སོ, སུ་ཏྟེ ཨ་ཏི་དེ་ས་ལི་ངྒ་སྶ ཨི་ཝས་དྡ་སྶ ཨ་ད་སྶ་ན་ཏོ. པུ་རེ ཝི་ཡ སྱཱ་དྱུ་པྤ་ཏྟི.
‘‘ཀྭ་ཙཱི’’ཏི ཝ་ཏྟ་ཏེ.
༣༣༦. ཨཾ ཝི་བྷ་ཏྟཱི་ན་མ་ཀཱ་ར་ནྟཱ ཨ་བྱ་ཡཱི་བྷཱ་ཝཱ.
ཏ་སྨཱ ཨ་ཀཱ་ར་ནྟཱ ཨ་བྱ་ཡཱི་བྷཱ་ཝཱ པ་རཱ་སཾ ཝི་བྷ་ཏྟཱི་ནཾ ཀྭ་ཙི ཨཾ ཧོ་ཏི, སེ་སཾ ནེ་ཡྻཾ.
ཏཾ ཨུ་པ་ན་ག་རཾ, ན་ག་ར་སྶ ས་མཱི་པཾ ཏི་ཊྛ་ཏཱི་ཏི ཨ་ཏྠོ. ཏཱ་ནི ཨུ་པ་ན་ག་རཾ, ཨཱ་ལ་པ་ནེ་པེ་ཝཾ, ཏཾ ཨུ་པ་ན་ག་རཾ པ་སྶ, ཏཱ་ནི ཨུ་པ་ན་ག་རཾ.
ན པ་ཉྩ་མྱཱ་ཡ་མ་མྦྷཱ་ཝོ, ཀྭ་ཙཱིཏི ཨ་དྷི་ཀཱ་ར་ཏོ;
ཏ་ཏི་ཡཱ་ས་ཏྟ་མཱི་ཚ་ཊྛཱི-ན་ནྟུ ཧོ་ཏི ཝི་ཀ་པྤ་ཏོ.
ཏེ་ན ཨུ་པ་ན་ག་རཾ ཀ་ཏཾ, ཨུ་པ་ན་ག་རེ་ན ཝཱ, ཏེ་ཧི ཨུ་པ་ན་ག་རཾ, ཨུ་པ་ན་ག་རེ་ཧི ཝཱ, ཏ་སྶ ཨུ་པ་ན་ག་རཾ དེ་ཧི, ཏེ་སཾ ཨུ་པ་ན་ག་རཾ, ཨུ་པ་ན་ག་རཱ ཨཱ་ན་ཡ, ཨུ་པ་ན་ག་ར་མྷཱ ཨུ་པ་ན་ག་ར་སྨཱ, ཨུ་པ་ན་ག་རེ་ཧི, ཨུ་པ་ན་ག་རཾ ས་ནྟ་ཀཾ, ཨུ་པ་ན་ག་ར་སྶ ཝཱ, ཏེ་སཾ ཨུ་པ་ན་ག་རཾ, ཨུ་པ་ན་ག་རཱ་ནཾ ཝཱ, ཨུ་པ་ན་ག་རཾ ནི་དྷེ་ཧི, ཨུ་པ་ན་ག་ར་མྷི ཨུ་པ་ན་ག་ར་སྨིཾ, ཨུ་པ་ན་ག་རཾ ཨུ་པ་ན་ག་རེ་སུ ཝཱ. ཨེ་ཝཾ ཨུ་པ་ཀུ་མྦྷཾ.
ཨ་བྷཱ་ཝེ – ད་ར་ཐཱ་ནཾ ཨ་བྷཱ་ཝོ ནི་དྡ་ར་ཐཾ, ནི་མྨ་ས་ཀཾ.
པ་ཙྪཱ་ཨ་ཏྠེ – ར་ཐ་སྶ པ་ཙྪཱ ཨ་ནུ་ར་ཐཾ, ཨ་ནུ་ཝཱ་ཏཾ.
ཡོ་གྒ་ཏཱ་ཡཾ – ཡ་ཐཱ་ས་རཱུ་པཾ, ཨ་ནུ་རཱུ་པཾ, རཱུ་པ་ཡོ་གྒ་ནྟི ཨ་ཏྠོ.
ཝི་ཙྪཱ་ཡཾ – ཨ་ཏྟཱ་ན་མ་ཏྟཱ་ནཾ པ་ཏི པ་ཙྩ་ཏྟཾ, ཨ་དྡྷ་མཱ་སཾ ཨ་དྡྷ་མཱ་སཾ ཨ་ནུ ཨ་ནྭ་དྡྷ་མཱ་སཾ.
ཨ་ནུ་པུ་བྦི་ཡཾ – ཛེ་ཊྛཱ་ནཾ ཨ་ནུ་པུ་བྦོ ཨ་ནུ་ཛེ་ཊྛཾ.
པ་ཊི་ལོ་མེ – སོ་ཏ་སྶ པ་ཊི་ལོ་མཾ པ་ཊི་སོ་ཏཾ, པ་ཊི་པ་ཐཾ, པ་ཏི་ཝཱ་ཏཾ, ཨ་ཏྟཱ་ནཾ ཨ་དྷི་ཀི་ཙྩ པ་ཝ་ཏྟཱ ཨ་ཛ྄ཛྷ་ཏྟཾ.
པ་རི་ཡཱ་དཱ་བྷི་ཝི་དྷཱི་སུ ཨཱ་པཱ་ཎ་ཀོ་ཊི་ཡཱ ཨཱ་པཱ་ཎ་ཀོ་ཊི་ཀཾ, ‘‘ཀྭ་ཙི ས་མཱ་ས་ནྟ་ག་ཏཱ་ན་མ་ཀཱ་ར་ནྟོ’’ཏི ཀཔྤ་ཙྩ་ཡོ, ཨཱ་ཀུ་མཱ་རེ་ཧི ཡ་སོ ཀ་ཙྩཱ་ཡ་ན་སྶ ཨཱ་ཀུ་མཱ་རཾ.
ས་མི་དྡྷི་ཡཾ – བྷི་ཀྑཱ་ཡ ས་མི་དྡྷཱི་ཏི ཨ་ཏྠེ ས་མཱ་སེ་ཝ ན་པུཾ་ས་ཀ་ལི་ངྒ་ཏྟེ ཙ ཀ་ཏེ –
‘‘ས་མཱ་ས་སྶ, ཨ་ནྟོ’’ཏི ཙ ཝ་ཏྟ་ཏེ.
༣༣༧. ས་རོ ར་སྶོ ན་པུཾ་ས་ཀེ.
ན་པུཾ་ས་ཀེ ཝ་ཏྟ་མཱ་ན་སྶ ས་མཱ་ས་སྶ ཨ་ནྟོ ས་རོ ར་སྶོ ཧོ་ཏི. ཨེ་ཏྠ ཙ ཨ་བྱ་ཡཱི་བྷཱ་ཝགྒ་ཧ་ཎཾ ནཱ་ནུ་ཝ་ཏྟེ་ཏ་བྦཾ, ཏེ་ན དི་གུ་དྭ་ནྡ་བ་ཧུ་བྦཱི་ཧཱི་སུ་པི ན་པུཾ་ས་ཀེ ཝ་ཏྟ་མཱ་ན་སྶ ས་མཱ་ས་ནྟ་སྶ་ར་སྶ ར་སྶ་ཏྟཾ སི་དྡྷཾ ཧོ་ཏི. ‘‘ཨཾ ཝི་བྷ་ཏྟཱི་ན’’མི་ཙྩཱ་དི་ནཱ ཨམཱ་དེ་སོ, སུ་བྷི་ཀྑཾ. ག་ངྒཱ་ཡ ས་མཱི་པེ ཝ་ཏྟ་ཏཱི་ཏི ཨུ་པ་ག་ངྒཾ, མ་ཎི་ཀཱ་ཡ ས་མཱི་པཾ ཨུ་པ་མ་ཎི་ཀཾ.
ཨི་ཏྠཱི་སུ ཨ་མི་ཀི་ཙྩཱ་ཏི ཨ་ཏྠེ ས་མཱ་ས་ན་པུཾ་ས་ཀ་ར་སྶ་ཏྟཱ་དཱི་སུ ཀ་ཏེ་སུ –
‘‘ཨ་བྱ་ཡཱི་བྷཱ་ཝཱ, ཝི་བྷ་ཏྟཱི་ན’’ནྟི ཙ ཝ་ཏྟ་ཏེ.
༣༣༨. ཨ་ཉྙ་སྨཱ ལོ་པོ ཙ.
ཨཀཱ་ར་ནྟ་ཏོ ཨ་ཉྙ་སྨཱ ཨ་བྱ་ཡཱི་བྷཱ་ཝ་ས་མཱ་སཱ པ་རཱ་སཾ ཝི་བྷ་ཏྟཱི་ནཾ ལོ་པོ ཙ ཧོ་ཏི. ཨ་དྷི་ཏྟི, ཨི་ཏྠཱི་སུ ཨ་དྷི་ཀི་ཙྩ ཀ་ཐཱ པ་ཝ་ཏྟ་ཏཱི་ཏི ཨ་ཏྠོ. ཨ་དྷི་ཏྠི པ་སྶ, ཨ་དྷི་ཏྠི ཀ་ཏཾ ཨི་ཙྩཱ་དི, ཨེ་ཝཾ ཨ་དྷི་ཀུ་མཱ་རི, ཝ་དྷུ་ཡཱ ས་མཱི་པཾ ཨུ་པ་ཝ་དྷུ, གུ་ནྣཾ ས་མཱི་པཾ ཨུ་པ་གུ, ཨོཀཱ་ར་སྶ ར་སྶ་ཏྟཾ ཨུཀཱ་རོ. ཨེ་ཝཾ ཨུ་པ་ས་གྒ་པུ་བྦ་ཀོ.
ནི་པཱ་ཏ་པུ་བྦ་ཀོ ཡ་ཐཱ – ཝུ་ཌྜྷཱ་ནཾ པ་ཊི་པཱ་ཊི, ཡེ ཡེ ཝུ་ཌྜྷཱ ཝཱ ཡ་ཐཱ་ཝུ་ཌྜྷཾ, པ་ད་ཏྠཱ་ན་ཏི་ཀྐ་མེ – ཡ་ཐཱ་ཀྐ་མཾ, ཡ་ཐཱ་ས་ཏྟི, ཡ་ཐཱ་བ་ལཾ ཀ་རོ་ཏི, བ་ལ་མ་ན་ཏི་ཀྐ་མི་ཏྭཱ ཀ་རོ་ཏཱི་ཏི ཨ་ཏྠོ. ཛཱི་ཝ་སྶ ཡ་ཏྟ་ཀོ པ་རི་ཙྪེ་དོ ཡཱ་ཝ་ཛཱི་ཝཾ, ཡཱ་ཝ་ཏཱ་ཡུ་ཀཾ, ཀཔྤ་ཙྩ་ཡོ. ཡ་ཏྟ་ཀེ་ན ཨ་ཏྠོ ཡཱ་ཝ་ད་ཏྠཾ, པ་བྦ་ཏ་སྶ པ་ར་བྷཱ་གོ ཏི་རོ་པ་བྦ་ཏཾ, ཏི་རོ་པཱ་ཀཱ་རཾ, ཏི་རོ་ཀུ་ཊྚཾ, པཱ་སཱ་ད་སྶ ཨ་ནྟོ ཨ་ནྟོ་པཱ་སཱ་དཾ, ཨ་ནྟོ་ན་ག་རཾ, ཨ་ནྟོ་ཝ་སྶཾ, ན་ག་ར་སྶ བ་ཧི བ་ཧི་ན་ག་རཾ, པཱ་སཱ་ད་སྶ ཨུ་པ་རི ཨུ་པ་རི་པཱ་སཱ་དཾ, ཨུ་པ་རི་མ་ཉྩཾ, མ་ཉྩ་སྶ ཧེ་ཊྛཱ ཧེ་ཊྛཱ་མ་ཉྩཾ, ཧེ་ཊྛཱ་པཱ་སཱ་དཾ, བྷ་ཏྟ་སྶ པུ་རེ པུ་རེ་བྷ་ཏྟཾ, ཨེ་ཝཾ པ་ཙྪཱ་བྷ་ཏྟཾ.
སཱ་ཀ་ལླ་ཏྠེ – ས་ཧ མ་ཀྑི་ཀཱ་ཡ ས་མ་ཀྑི་ཀཾ བྷུ་ཉྫ་ཏི, ན ཀི་ཉྩི པ་རི་ཝ་ཛྫེ་ཏཱི་ཏི ཨ་ཏྠོ. ‘‘ཏེ་སུ ཝུ་དྡྷཱི’’ཏི་ཨཱ་དི་ནཱ ས་ཧས་དྡ་སྶ སཱདེ་སོ. ག་ངྒཱ་ཡ ཨོ་རཾ ཨོ་ར་ག་ངྒ་མི་ཙྩཱ་དི.
ཨ་བྱ་ཡཱི་བྷཱ་ཝ་ས་མཱ་སོ ནི་ཊྛི་ཏོ.
ཀ་མྨ་དྷཱ་ར་ཡ་ས་མཱ་ས
ཨ་ཐ ཀ་མྨ་དྷཱ་ར་ཡ་ས་མཱ་སོ ཝུ་ཙྩ་ཏེ.
སོ ཙ ན་ཝ་ཝི་དྷོ ཝི་སེ་ས་ན་པུ་བྦ་པ་དོ ཝི་སེ་ས་ནུ་ཏྟ་ར་པ་དོ ཝི་སེ་ས་ནོ་བྷ་ཡ་པ་དོ ཨུ་པ་མཱ་ནུ་ཏྟ་ར་པ་དོ ས་མྦྷཱ་ཝ་ནཱ་པུ་བྦ་པ་དོ ཨ་ཝ་དྷཱ་ར་ཎ་པུ་བྦ་པ་དོ ནནི་པཱ་ཏ་པུ་བྦ་པ་དོ ཀུཔུ་བྦ་པ་དོ པཱདི་པུ་བྦ་པ་དོ ཙཱ་ཏི.
ཏ་ཏྠ ཝི་སེ་ས་ན་པུ་བྦ་པ་དོ ཏཱ་ཝ – ‘‘མ་ཧ་ནྟ པུ་རི་ས’’ཨི་ཏཱི་དྷ ཨུ་བྷ་ཡ་ཏྠ པ་ཋ་མེ་ཀ་ཝ་ཙ་ནཾ སི, ཏུ་ལྱཱ་དྷི་ཀ་ར་ཎ་བྷཱ་ཝ་པྤ་སི་དྡྷ་ཏྠཾ ཙས་དྡ ཏས་དྡ་པྤ་ཡོ་གོ, མ་ཧ་ནྟོ ཙ སོ པུ་རི་སོ ཙཱ་ཏི ཝི་གྒ་ཧེ –
ཨི་ཏོ པ་རཾ ‘‘ཝི་བྷཱ་སཱ རུ་ཀྑ་ཏི་ཎ’’ཨི་ཙྩཱ་དི་ཏོ ‘‘ཝི་བྷཱ་སཱ’’ཏི ས་མཱ་ས་ཝི་དྷཱ་ནེ ས་བྦ་ཏྠ ཝ་ཏྟ་ཏེ.
༣༣༩. དྭི་པ་དེ ཏུ་ལྱཱ་དྷི་ཀ་ར་ཎེ ཀ་མྨ་དྷཱ་ར་ཡོ.
དྭེ པ་དཱ་ནི ནཱ་མི་ཀཱ་ནི ཏུ་ལྱཱ་དྷི་ཀ་ར་ཎཱ་ནི ཨ་ཉྙ་མ་ཉྙེ་ན ས་ཧ ཝི་བྷཱ་སཱ ས་མ་སྱ་ནྟེ, ཏ་སྨིཾ དྭི་པ་དེ ཏུ་ལྱཱ་དྷི་ཀ་ར་ཎེ ས་ཏི སོ ས་མཱ་སོ ཀ་མྨ་དྷཱ་ར་ཡ་ས་ཉྙོ ཙ ཧོ་ཏི.
དྭེ པ་དཱ་ནི དྭི་པ་དཾ, ཏུ་ལྱཾ ས་མཱ་ནཾ ཨ་དྷི་ཀ་ར་ཎཾ ཨ་ཏྠོ ཡ་སྶ པ་ད་དྭ་ཡ་སྶ ཏཾ ཏུ་ལྱཱ་དྷི་ཀ་ར་ཎཾ, ཏ་སྨིཾ དྭི་པ་དེ ཏུ་ལྱཱ་དྷི་ཀ་ར་ཎེ. བྷི་ནྣ་པྤ་ཝ་ཏྟི་ནི་མི་ཏྟཱ་ནཾ དྭི་ནྣཾ པ་དཱ་ནཾ ཝི་སེ་ས་ན་ཝི་སེ་སི་ཏ་བྦ་བྷཱ་ཝེ་ན ཨེ་ཀ་སྨིཾ ཨ་ཏྠེ པ་ཝ་ཏྟི ཏུ་ལྱཱ་དྷི་ཀ་ར་ཎ་ཏཱ. ཀ་མྨ་མི་ཝ དྭ་ཡཾ དྷཱ་ར་ཡ་ཏཱི་ཏི ཀ་མྨ་དྷཱ་ར་ཡོ. ཡ་ཐཱ ཧི ཀ་མྨཾ ཀྲི་ཡ་ཉྩ པ་ཡོ་ཛ་ན་ཉྩ དྭ་ཡཾ དྷཱ་ར་ཡ་ཏི, ཀ་མྨེ ས་ཏི ཀྲི་ཡཱ་ཡ, པ་ཡོ་ཛ་ན་སྶ ཙ ས་མྦྷ་ཝ་ཏོ, ཏ་ཐཱ ཨ་ཡཾ ས་མཱ་སོ ཨེ་ཀ་སྶ ཨ་ཏྠ་སྶ དྭེ ནཱ་མཱ་ནི དྷཱ་ར་ཡ་ཏི, ཏ་སྨིཾ ས་མཱ་སེ ས་ཏི ཨེཀ་ཏྠ་ཛོ་ཏ་ཀ་སྶ ནཱ་མ་དྭ་ཡ་སྶ ས་མྦྷ་ཝ་ཏོ.
པུ་རེ ཝི་ཡ ས་མཱ་ས་ས་ཉྙཱ་ཝི་བྷ་ཏྟི་ལོ་པ་པ་ཀ་ཏི་བྷཱ་ཝཱ, ས་མཱ་སེ་ནེ་ཝ ཏུ་ལྱཱ་དྷི་ཀ་ར་ཎ་བྷཱ་ཝ་སྶ ཝུ་ཏྟ་ཏྟཱ ‘‘ཝུ་ཏྟ་ཏྠཱ་ན་མ་པྤ་ཡོ་གོ’’ཏི ཙས་དྡ ཏས་དྡཱ་ན་མ་པྤ་ཡོ་གོ.
༣༤༠. མ་ཧ་ཏཾ མ་ཧཱ ཏུ་ལྱཱ་དྷི་ཀ་ར་ཎེ པ་དེ.
མ་ཧ་ནྟ ས་དྡ་སྶ མ་ཧཱ ཧོ་ཏི ཏུ་ལྱཱ་དྷི་ཀ་ར་ཎེ ཨུ་ཏྟ་ར་པ་དེ པ་རེ. མ་ཧ་ཏནྟི བ་ཧུ་ཝ་ཙ་ན་གྒ་ཧ་ཎེ་ན ཀྭ་ཙི མ་ཧཨཱ་དེ་སོ ཙ, ཨེ་ཏྠ ཙ ཝི་སེ་ས་ན་སྶ པུ་བྦ་ནི་པཱ་ཏོ ཝི་སེ་ས་ན་བྷཱུ་ཏ་སྶ པུ་བྦ་པ་ད་སྶ མ་ཧཱདེ་ས་ཝི་དྷཱ་ན་ཏོ་ཝ ཝི་ཉྙཱ་ཡ་ཏི.
‘‘ཀ་མྨ་དྷཱ་ར་ཡོ, དི་གཱུ’’ཏི ཙ ཝ་ཏྟ་ཏེ.
༣༤༡. ཨུ་བྷེ ཏ་པྤུ་རི་སཱ.
ཨུ་བྷེ ཀ་མྨ་དྷཱ་ར་ཡ་དི་གུ་ས་མཱ་སཱ ཏ་པྤུ་རི་ས་ས་ཉྙཱ ཧོ་ནྟི.
ཏ་སྶ པུ་རི་སོ ཏ་པྤུ་རི་སོ, ཏ་པྤུ་རི་ས་ས་དི་ས་ཏྟཱ ཨ་ཡ་མྤི ས་མཱ་སོ ཨ་ནྭ་ཏྠ་ས་ཉྙཱ་ཡ ཏ་པྤུ་རི་སོཏི ཝུ་ཏྟོ. ཡ་ཐཱ ཧི ཏ་པྤུ་རི་སས་དྡོ གུ་ཎ་མ་ཏི་ཝ་ཏྟོ, ཏ་ཐཱ ཨ་ཡཾ ས་མཱ་སོ་པི. ཨུ་ཏྟ་ར་པ་ད་ཏྠ་པྤ་དྷཱ་ནོ ཧི ཏ་པྤུ་རི་སོ་ཏི. ཏ་ཏོ ནཱ་མ་བྱ་པ་དེ་སོ སྱཱ་དྱུ་པྤ་ཏྟི. ཨ་ཡཾ པ་ན ཏ་པྤུ་རི་སོ ཨ་བྷི་དྷེ་ཡྻ་ཝ་ཙ་ནོ, པ་ར་ལི་ངྒོ ཙ.
མ་ཧཱ་པུ་རི་སོ, མ་ཧཱ་པུ་རི་སཱ ཨི་ཙྩཱ་དི པུ་རི་སས་དྡ་ས་མཾ, ཨེ་ཝཾ མ་ཧཱ་ཝཱི་རོ, མ་ཧཱ་མུ་ནི, མ་ཧ་ནྟ་ཉྩ ཏཾ བ་ལ་ཉྩཱ་ཏི མ་ཧཱ་བ་ལཾ, མ་ཧ་བྦྷ་ཡཾ, མ་ཧཨཱ་དེ་སོ. ས་ནྟོ ཙ སོ པུ་རི་སོ ཙཱ་ཏི ས་པྤུ་རི་སོ, ‘‘ས་ནྟ་ས་དྡ་སྶ སོ བྷེ བོ ཙ་ནྟེ’’ཏི ཨེ་ཏྠ ཙས་དྡེ་ན ས་ནྟས་དྡ་སྶ ས་མཱ་སེ ཨབྷཀཱ་རེ་པི སཱདེ་སོ, ཏ་ཐཱ པུ་བྦ་པུ་རི་སོ, པ་ར་པུ་རི་སོ, པ་ཋ་མ་པུ་རི་སོ, མ་ཛ྄ཛྷི་མ་པུ་རི་སོ, ཨུ་ཏྟ་མ་པུ་རི་སོ, ད་ནྟ་པུ་རི་སོ, པ་ར་མ་པུ་རི་སོ, ཝཱི་ར་པུ་རི་སོ, སེ་ཏ་ཧ་ཏྠཱི, ཀ་ཎྷ་ས་པྤོ, ནཱི་ལུ་པྤ་ལཾ, ལོ་ཧི་ཏ་ཙ་ནྡ་ནཾ.
ཀྭ་ཙི ཝི་བྷཱ་སཱ་དྷི་ཀཱ་ར་ཏོ ན བྷ་ཝ་ཏི, ཡ་ཐཱ – པུ་ཎྞོ མ་ནྟཱ་ནི་པུ་ཏྟོ, ཙི་ཏྟོ ག་ཧ་པ་ཏི, ས་ཀྐོ དེ་ཝ་རཱ་ཛཱ་ཏི.
པུ་མཱ ཙ སོ ཀོ་ཀི་ལོ ཙཱ་ཏི ཨ་ཏྠེ ས་མཱ་སེ ཀ་ཏེ –
‘‘ལོ་པ’’ནྟི ཝ་ཏྟ་ཏེ.
༣༤༢. པུ་མ་སྶ ལི་ངྒཱ་དཱི་སུ ས་མཱ་སེ་སུ.
པུ་མཨི་ཙྩེ་ཏ་སྶ ཨ་ནྟོ ཨཀཱ་རོ ལོ་པ་མཱ་པ་ཛྫ་ཏེ ལི་ངྒཱདཱི་སུ པ་ར་པ་དེ་སུ ས་མཱ་སེ་སུ, ‘‘ཨཾ་མོ ནི་གྒ་ཧཱི་ཏཾ ཛྷ་ལ་པེ་ཧཱི’’ཏི མཀཱ་ར་སྶ ནི་གྒ་ཧཱི་ཏཾ. པུ་ངྐོ་ཀི་ལོ. ཨེ་ཝཾ པུ་ནྣཱ་གོ.
ཁ་ཏྟི་ཡཱ ཙ སཱ ཀ་ཉྙཱ ཙཱ་ཏི ཝི་གྒ་ཡ྄ཧ ས་མཱ་སེ ཀ་ཏེ –
‘‘ཏུ་ལྱཱ་དྷི་ཀ་ར་ཎེ, པ་དེ, ཨི་ཏྠི་ཡཾ བྷཱ་སི་ཏ་པུ་མི་ཏྠཱི པུ་མཱ་ཝ ཙེ’’ཏི ཙ ཝ་ཏྟ་ཏེ.
༣༤༣. ཀ་མྨ་དྷཱ་ར་ཡ་ས་ཉྙེ ཙ.
ཀ་མྨ་དྷཱ་ར་ཡ་ས་ཉྙེ ཙ ས་མཱ་སེ ཨི་ཏྠི་ཡཾ ཝ་ཏྟ་མཱ་ནེ ཏུ་ལྱཱ་དྷི་ཀ་ར་ཎེ ཨུ་ཏྟ་ར་པ་དེ པ་རེ པུ་བྦ་བྷཱུ་ཏོ ཨི་ཏྠི་ཝཱ་ཙ་ཀོ ས་དྡོ པུ་བྦེ བྷཱ་སི་ཏ་པུ་མཱ ཙེ, སོ པུ་མཱ ཨི་ཝ ད་ཊྛ་བྦོ་ཏི པུ་བྦ་པ་དེ ཨི་ཏྠི་པྤ་ཙྩ་ཡ་སྶ ནི་ཝ་ཏྟི ཧོ་ཏི.
ཁ་ཏྟི་ཡ་ཀ་ཉྙཱ, ཁ་ཏྟི་ཡ་ཀ་ཉྙཱ་ཡོ ཨི་ཙྩཱ་དི. ཨེ་ཝཾ ར་ཏྟ་ལ་ཏཱ, དུ་ཏི་ཡ་བྷི་ཀྑཱ, བྲཱ་ཧྨ་ཎཱི ཙ སཱ དཱ་རི་ཀཱ ཙཱ་ཏི བྲཱ་ཧྨ་ཎ་དཱ་རི་ཀཱ, ནཱ་ག་མཱ་ཎ་ཝི་ཀཱ.
པུ་བྦ་པ་ད་སྶེ་ཝཱ་ཡཾ པུ་མྦྷཱ་ཝཱ་ཏི་དེ་སོ, ཏེ་ན ‘‘ཁ་ཏྟི་ཡ་ཀུ་མཱ་རཱི ཀུ་མཱ་ར་ས་མ་ཎཱི ཏ་རུ་ཎ་བྲཱ་ཧྨ་ཎཱི’’ཏི་ཨཱ་དཱི་སུ ཨུ་ཏྟ་ར་པ་དེ་སུ ཨི་ཏྠི་པྤ་ཙྩ་ཡ་སྶ ན ནི་ཝ་ཏྟི ཧོ་ཏི.
ཨི་ཏྠི་ཡམི་ཙྩེ་ཝ ཀིཾ? ཀུ་མཱ་རཱི་ར་ཏ་ནཾ, ས་མ་ཎཱི་པ་དུ་མཾ.
བྷཱ་སི་ཏ་པུ་མཱཏི ཀིཾ? ག་ངྒཱ་ན་དཱི, ཏ་ཎྷཱ་ན་དཱི, པ་ཐ་ཝཱི་དྷཱ་ཏུ. ‘‘ན་ནྡཱ་པོ་ཀྑ་ར་ཎཱི, ན་ནྡཱ་དེ་ཝཱི’’ཏི་ཨཱ་དཱི་སུ པ་ན ས་ཉྙཱ་ས་དྡ་ཏྟཱ ན ཧོ་ཏི.
ཏ་ཐཱ པུ་ར་ཏྠི་མོ ཙ སོ ཀཱ་ཡོ ཙཱ་ཏི པུ་ར་ཏྠི་མ་ཀཱ་ཡོ, ཨེ་ཏྠ ཙ ཀཱ་ཡེ་ཀ་དེ་སོ ཀཱ་ཡས་དྡོ. ཨེ་ཝཾ པ་ཙྪི་མ་ཀཱ་ཡོ, ཧེ་ཊྛི་མ་ཀཱ་ཡོ, ཨུ་པ་རི་མ་ཀཱ་ཡོ, ས་བྦ་ཀཱ་ཡོ, པུ་རཱ་ཎ་ཝི་ཧཱ་རོ, ན་ཝཱ་ཝཱ་སོ, ཀ་ཏ་ར་ནི་ཀཱ་ཡོ, ཀ་ཏ་མ་ནི་ཀཱ་ཡོ, ཧེ་ཏུ་པྤ་ཙྩ་ཡོ, ཨ་བ་ཧུ་ལཾ བ་ཧུ་ལཾ ཀ་ཏ་ནྟི བ་ཧུ་ལཱི་ཀ་ཏཾ, ཛཱི་ཝི་ཏ་པྤ་དྷཱ་ནཾ ན་ཝ་ཀཾ ཛཱི་ཝི་ཏ་ན་ཝ་ཀཾ ཨི་ཙྩཱ་དི.
ཝི་སེ་ས་ནུ་ཏྟ་ར་པ་དེ ཛི་ན་ཝ་ཙ་ནཱ་ནུ་པ་རོ་དྷ་ཏོ ཐེ་རཱ་ཙ་རི་ཡ་པ་ཎྜི་ཏཱ་དི ཝི་སེ་ས་ནཾ པ་ར་ཉྩ བྷ་ཝ་ཏི. ཡ་ཐཱ – སཱ་རི་པུ་ཏྟོ ཙ སོ ཐེ་རོ ཙཱ་ཏི སཱ་རི་པུ་ཏྟ་ཏྠེ་རོ. ཨེ་ཝཾ མ་ཧཱ་མོ་གྒ་ལླཱ་ན་ཏྠེ་རོ, མ་ཧཱ་ཀ་སྶ་པ་ཏྠེ་རོ, བུ་དྡྷ་གྷོ་སཱ་ཙ་རི་ཡོ, དྷ་མྨ་པཱ་ལཱ་ཙ་རི་ཡོ, ཨཱ་ཙ་རི་ཡ་གུ་ཏྟི་ལོ་ཏི ཝཱ, མ་ཧོ་ས་དྷོ ཙ སོ པ་ཎྜི་ཏོ ཙཱ་ཏི མ་ཧོ་ས་དྷ་པ་ཎྜི་ཏོ. ཨེ་ཝཾ ཝི་དྷུ་ར་པ་ཎྜི་ཏོ, ཝ་ཏྠུ་ཝི་སེ་སོ.
ཝི་སེ་ས་ནོ་བྷ་ཡ་པ་དོ ཡ་ཐཱ – སཱི་ཏ་ཉྩ ཏཾ ཨུ་ཎྷ་ཉྩཱ་ཏི སཱི་ཏུ་ཎྷཾ, སི་ནི་དྡྷོ ཙ སོ ཨུ་ཎྷོ ཙཱ་ཏི སི་ནི་དྡྷུ་ཎྷོ, མཱ་སོ. ཁ་ཉྫོ ཙ སོ ཁུ་ཛྫོ ཙཱ་ཏི ཁ་ཉྫ་ཁུ་ཛྫོ. ཨེ་ཝཾ ཨ་ནྡྷ་བ་དྷི་རོ, ཀ་ཏཱ་ཀ་ཏཾ, ཚི་དྡཱ་ཝ་ཚི་དྡཾ, ཨུ་ཙྩཱ་ཝ་ཙཾ, ཚི་ནྣ་བྷི་ནྣཾ, སི་ཏྟ་ས་མྨ་ཊྛཾ, ག་ཏ་པ་ཙྩཱ་ག་ཏཾ.
ཨུ་པ་མཱ་ནུ་ཏྟ་ར་པ་དེ ཨ་བྷི་དྷཱ་ནཱ་ནུ་རོ་དྷ་ཏོ ཨུ་པ་མཱ་ན་བྷཱུ་ཏཾ ཝི་སེ་ས་ནཾ པ་རཾ བྷ་ཝ་ཏི. ཡ་ཐཱ – སཱི་ཧོ ཝི་ཡ སཱི་ཧོ, མུ་ནི ཙ སོ སཱི་ཧོ ཙཱ་ཏི མུ་ནི་སཱི་ཧོ. ཨེ་ཝཾ མུ་ནི་ཝ་ས་བྷོ, མུ་ནི་པུ་ངྒ་ཝོ, བུ་དྡྷ་ནཱ་གོ, བུ་དྡྷཱ་དི་ཙྩོ, རཾ་སི ཝི་ཡ རཾ་སི, ས་དྡྷ་མྨོ ཙ སོ རཾ་སི ཙཱ་ཏི ས་དྡྷ་མྨ་རཾ་སི. ཨེ་ཝཾ ཝི་ན་ཡ་སཱ་ག་རོ, པུ་ཎྜ་རཱི་ཀ་མི་ཝ པུ་ཎྜ་རཱི་ཀོ, ས་མ་ཎོ ཙ སོ པུ་ཎྜ་རཱི་ཀོ ཙཱ་ཏི ས་མ་ཎ་པུ་ཎྜ་རཱི་ཀོ, ས་མ་ཎ་པ་དུ་མོ. ཙ་ནྡོ ཝི་ཡ ཙ་ནྡོ, མུ་ཁ་ཉྩ ཏཾ ཙ་ནྡོ ཙཱ་ཏི མུ་ཁ་ཙ་ནྡོ. ཨེ་ཝཾ མུ་ཁ་པ་དུ་མཾ ཨི་ཙྩཱ་དི.
ས་མྦྷཱ་ཝ་ནཱ་པུ་བྦ་པ་དོ ཡ་ཐཱ – དྷ་མྨོ ཨི་ཏི བུ་དྡྷི དྷ་མྨ་བུ་དྡྷི. ཨེ་ཝཾ དྷ་མྨ་ས་ཉྙཱ, དྷ་མྨ་ས་ངྑཱ་ཏོ, དྷ་མྨ་ས་མྨ་ཏོ, པཱ་ཎ་ས་ཉྙི་ཏཱ, ཨ་སུ་བྷ་ས་ཉྙཱ, ཨ་ནི་ཙྩ་ས་ཉྙཱ, ཨ་ན་ཏྟ་ས་ཉྙཱ, དྷཱ་ཏུ་ས་ཉྙཱ, དྷཱི་ཏུ་ས་ཉྙཱ, ཨ་ཏྟ་ས་ཉྙཱ, ཨ་ཏྠི་ས་ཉྙཱ, ཨ་ཏྟ་དི་ཊྛི ཨི་ཙྩཱ་དི.
ཨ་ཝ་དྷཱ་ར་ཎ་པུ་བྦ་པ་དོ ཡ་ཐཱ – གུ་ཎོ ཨེ་ཝ དྷ་ནཾ གུ་ཎ་དྷ་ནཾ. ཨེ་ཝཾ ས་དྡྷཱ་དྷ་ནཾ, སཱི་ལ་དྷ་ནཾ, པ་ཉྙཱ་དྷ་ནཾ, ཙ་ཀྑུ ཨེ་ཝ ཨི་ནྡྲི་ཡཾ ཙ་ཀྑུ་ནྡྲི་ཡཾ. ཨེ་ཝཾ ཙ་ཀྑཱ་ཡ་ཏ་ནཾ, ཙ་ཀྑུ་དྷཱ་ཏུ, ཙ་ཀྑུ་དྭཱ་རཾ, རཱུ་པཱ་ར་མྨ་ཎ་མི་ཙྩཱ་དི.
ན་ནི་པཱ་ཏ་པུ་བྦ་པ་དོ ཡ་ཐཱ – ན བྲཱ་ཧྨ་ཎོ་ཏི ཨ་ཏྠེ ཀ་མྨ་དྷཱ་ར་ཡ་ས་མཱ་སེ, ཝི་བྷ་ཏྟི་ལོ་པཱ་དི་མྷི ཙ ཀ་ཏེ –
‘‘ཨུ་བྷེ ཏ་པྤུ་རི་སཱ’’ཏི ཏ་པྤུ་རི་ས་ས་ཉྙཱ.
༣༤༤. ཨ་ཏྟཾ ན་སྶ ཏ་པྤུ་རི་སེ.
ནསྶ ནི་པཱ་ཏ་པ་ད་སྶ ཏ་པྤུ་རི་སེ ཨུ་ཏྟ་ར་པ་དེ པ་རེ ས་བྦ་སྶེ་ཝ ཨཏྟཾ ཧོ་ཏི. ཏ་པྤུ་རི་སེ་ཀ་དེ་ས་ཏྟཱ ཏ་པྤུ་རི་སོ, ཨ་བྲཱ་ཧྨ་ཎོ.
ན ནི་སེ་དྷོ ས་ཏོ ཡུ་ཏྟོ,
དེ་སཱ་དི་ནི་ཡ་མཾ ཝི་ནཱ;
ཨ་ས་ཏོ ཙཱ་ཕ་ལོ ཏ་སྨཱ,
ཀ་ཐ་མ་བྲཱ་ཧྨ་ཎོ་ཏི ཙེ?
ནི་སེ་དྷ་ཏྠཱ་ནུ་ཝཱ་དེ་ན, པ་ཊི་སེ་དྷ་ཝི་དྷི ཀྭ་ཙི;
པ་ར་སྶ མི་ཙྪཱ་ཉཱ་ཎ་ཏྟཱ-ཁྱཱ་པ་ནཱ་ཡོ་པ་པ་ཛྫ་ཏེ.
དུ་ཝི་དྷོ ཙ་སྶ་ཏྠོ པ་ས་ཛྫ་པྤ་ཊི་སེ་དྷ་པ་རི་ཡུ་དཱ་ས་ཝ་སེ་ན.
ཏ་ཏྠ ཡོ ‘‘ཨ་སཱུ་རི་ཡ་པ་སྶཱ རཱ་ཛ་དཱ་རཱ’’ཏི་ཨཱ་དཱི་སུ ཝི་ཡ ཨུ་ཏྟ་ར་པ་ད་ཏྠ་སྶ ས་བྦ་ཐཱ ཨ་བྷཱ་ཝཾ དཱི་པེ་ཏི, སོ པ་ས་ཛྫ་པྤ་ཊི་སེ་དྷ་ཝཱ་ཙཱི ནཱ་མ. ཡོ པ་ན ‘‘ཨ་བྲཱ་ཧྨ་ཎ ཨ་མ་ནུ་སྶཱ’’ཏི་ཨཱ་དཱི་སུ ཝི་ཡ ཨུ་ཏྟ་ར་པ་ད་ཏྠཾ པ་རི་ཡུ་དཱ་སི་ཏྭཱ ཏཾ་ས་དི་སེ ཝ་ཏྠུ་མྷི ཀཱ་རི་ཡཾ པ་ཊི་པཱ་ད་ཡ་ཏི, སོ པ་རི་ཡུ་དཱ་ས་ཝཱ་ཙཱི ནཱ་མ.
ཝུ་ཏྟ་ཉྩ
‘‘པ་ས་ཛྫ་པྤ་ཊི་སེ་དྷ་སྶ, ལ་ཀྑ་ཎཾ ཝ་ཏྠུ་ན་ཏྠི་ཏཱ;
ཝ་ཏྠུ་ཏོ ཨ་ཉྙ་ཏྲ ཝུ་ཏྟི, པ་རི་ཡུ་དཱ་ས་ལ་ཀྑ་ཎ’’ནྟི.
ནནྭེ་ཝཾ ས་ནྟེ་པི ‘‘ཨ་བྲཱ་ཧྨ་ཎོ’’ཏི་ཨཱ་དཱི་སུ ཀ་ཐ་མུ་ཏྟ་ར་པ་ད་ཏྠ་པྤ་དྷཱ་ན་ཏཱ སི་ཡཱ་ཏི?
ཝུ་ཙྩ་ཏེ – བྲཱ་ཧྨ་ཎཱདི་ས་དྡཱ་ནཾ བྲཱ་ཧྨ་ཎཱ་དི་ཨ་ཏྠ་སྶེ་ཝ ཏཾ་ས་དི་སཱ་དི་ཨ་ཏྠ་སྶཱ་པི ཝཱ་ཙ་ཀ་ཏྟཱ, བྲཱ་ཧྨ་ཎཱདི་ས་དྡཱ ཧི ཀེ་ཝ་ལཱ་བྲཱ་ཧྨ་ཎཱ་དི་ཨ་ཏྠེ་སྭེ་ཝ པཱ་ཀ་ཊཱ, བྷཱུས་དྡོ ཝི་ཡ་ས་ཏྟཱ་ཡཾ, ཡ་དཱ ཏེ པ་ན ཨ་ཉྙེ་ན ས་དི་སཱ་དི་ཝཱ་ཙ་ཀེ་ན ནཨི་ཏི ནི་པཱ་ཏེ་ན ཡུ་ཛྫ་ནྟི, ཏ་དཱ ཏཾ་ས་དི་ས་ཏ་ད་ཉྙ་ཏ་བྦི་རུ་དྡྷ་ཏ་ད་བྷཱ་ཝེ་སུ་པི ཝ་ཏྟ་ནྟི, བྷཱུས་དྡོ ཝི་ཡ ཨ་ནྭ་བྷིཡཱ་དི་ཡོ་གེ ཨ་ནུ་བྷ་ཝ་ན་ཨ་བྷི་བྷ་ཝ་ནཱ་དཱི་སུ, ཏ་སྨཱ ཨུ་ཏྟ་ར་པ་ད་ཏྠ་ཛོ་ཏ་ཀོ་ཡེ་ཝེ་ཏྠ ནཨི་ཏི ནི་པཱ་ཏོ་ཏི ན དོ་སོ, ཏེ་ན ཨ་བྲཱ་ཧྨ་ཎོ་ཏི བྲཱ་ཧྨ་ཎ་ས་དི་སོ་ཏི ཝུ་ཏྟཾ ཧོ་ཏི. ཨེ་ཝཾ ཨ་མ་ནུ་སྶོ, ཨ་སྶ་མ་ཎོ.
ཨ་ཉྙ་ཏྠེ – ན བྱཱ་ཀ་ཏཱ ཨ་བྱཱ་ཀ་ཏཱ, ཨ་སཾ་ཀི་ལི་ཊྛཱ, ཨ་པ་རི་ཡཱ་པ་ནྣཱ.
ཝི་རུ་དྡྷ་ཏྠེ – ན ཀུ་ས་ལཱ ཨ་ཀུ་ས་ལཱ, ཀུ་ས་ལ་པ་ཊི་པ་ཀྑཱ་ཏི ཨ་ཏྠོ. ཨེ་ཝཾ ཨ་ལོ་བྷོ, ཨ་མི་ཏྟོ.
པ་ས་ཛྫ་པྤ་ཊི་སེ་དྷེ – ན ཀ་ཏྭཱ ཨ་ཀ་ཏྭཱ, ཨ་ཀཱ་ཏུ་ན པུ་ཉྙཾ ཨ་ཀ་རོ་ནྟོ.
‘‘ན་སྶ, ཏ་པྤུ་རི་སེ’’ཏི ཙ ཝ་ཏྟ་ཏེ.
༣༤༥. ས་རེ ཨ་ན.
ནཨི་ཙྩེ་ཏ་སྶ པ་ད་སྶ ཏ་པྤུ་རི་སེ ཨུ་ཏྟ་ར་པ་དེ ཨ་ན ཧོ་ཏི ས་རེ པ་རེ.
ན ཨ་སྶོ ཨ་ན་སྶོ, ན ཨ་རི་ཡོ ཨ་ན་རི་ཡོ. ཨེ་ཝཾ ཨ་ནི་སྶ་རོ, ཨ་ནི་ཊྛོ, ཨ་ནུ་པ་ཝཱ་དོ, ན ཨཱ་དཱ་ཡ ཨ་ནཱ་དཱ་ཡ, ཨ་ནོ་ལོ་ཀེ་ཏྭཱ ཨི་ཙྩཱ་དི.
ཀུ་པུ་བྦ་པ་དོ ཡ་ཐཱ – ཀུ་ཙྪི་ཏ་མ་ནྣ་ནྟི ནི་ཙྩ་ས་མཱ་ས་ཏྟཱ ཨ་ཉྙ་པ་དེ་ན ཝི་གྒ་ཧོ, ཀ་མྨ་དྷཱ་ར་ཡ་ས་མཱ་སེ ཀ་ཏེ –
‘‘ཏ་པྤུ་རི་སེ, ས་རེ’’ཏི ཙ ཝ་ཏྟ་ཏེ.
༣༤༦. ཀ་ད་ད ཀུ་སྶ.
ཀུཨི་ཙྩེ་ཏ་སྶ ནི་པཱ་ཏ་སྶ ཏ་པྤུ་རི་སེ ཨུ་ཏྟ་ར་པ་དེ ཀ་ད ཧོ་ཏི ས་རེ པ་རེ. ཀ་ད་ནྣཾ. ཨེ་ཝཾ ཀ་ད་ས་ནཾ.
ས་རེཏི ཀིཾ? ཀུ་དཱ་རཱ, ཀུ་པུ་ཏྟཱ, ཀུ་དཱ་སཱ, ཀུ་དི་ཊྛི.
‘‘ཀུ་སྶཱ’’ཏི ཝ་ཏྟ་ཏེ.
༣༤༧. ཀཱ་པྤ་ཏྠེ་སུ ཙ.
ཀུཨི་ཙྩེ་ཏ་སྶ ཨ་པྤ་ཏྠེ ཝ་ཏྟ་མཱ་ན་སྶ ཀཱ ཧོ་ཏི ཏ་པྤུ་རི་སེ ཨུ་ཏྟ་ར་པ་དེ པ་རེ. བ་ཧུ་ཝ་ཙ་ནུ་ཙྩཱ་ར་ཎ་ཏོ ཀུ་ཙྪི་ཏ་ཏྠེ ཙ ཀྭ་ཙི ཏ་པྤུ་རི་སེ. ཨ་པྤ་ཀཾ ལ་ཝ་ཎཾ ཀཱ་ལ་ཝ་ཎཾ. ཨེ་ཝཾ ཀཱ་པུ་པྥཾ, ཀུ་ཙྪི་ཏོ པུ་རི་སོ ཀཱ་པུ་རི་སོ, ཀུ་པུ་རི་སོ ཝཱ.
པཱ་དི་པུ་བྦ་པ་དོ ཙ ནི་ཙྩ་ས་མཱ་སོ་ཝ, པ་དྷཱ་ནཾ ཝ་ཙ་ནཾ པཱ་ཝ་ཙ་ནཾ, བྷུ་སཾ ཝ་དྡྷཾ པ་ཝ་དྡྷཾ, ས་རཱི་རཾ, ས་མཾ, ས་མྨཱ ཝཱ ཨཱ་དྷཱ་ནཾ ས་མཱ་དྷཱ་ནཾ, ཝི་ཝི་དྷཱ མ་ཏི ཝི་མ་ཏི, ཝི་ཝི་དྷོ ཀ་པྤོ ཝི་ཀ་པྤོ, ཝི་སི་ཊྛོ ཝཱ ཀ་པྤོ ཝི་ཀ་པྤོ, ཨ་དྷི་ཀོ དེ་ཝོ ཨ་ཏི་དེ་ཝོ. ཨེ་ཝཾ ཨ་དྷི་དེ་ཝོ, ཨ་དྷི་སཱི་ལཾ, སུ་ནྡ་རོ ག་ནྡྷོ སུ་ག་ནྡྷོ, ཀུ་ཙྪི་ཏོ ག་ནྡྷོ དུ་གྒ་ནྡྷོ, སོ་བྷ་ནཾ ཀ་ཏཾ སུ་ཀ་ཏཾ, ཨ་སོ་བྷ་ནཾ ཀ་ཏཾ དུ་ཀྐ་ཊཾ ཨི་ཙྩཱ་དི.
ཡེ ཨི་དྷ ཨ་ཝི་ཧི་ཏ་ལ་ཀྑ་ཎཱ ནཱ་མ་ནི་པཱ་ཏོ་པ་ས་གྒཱ, ཏེ་སཾ ‘‘ནཱ་མཱ་ནཾ ས་མཱ་སོ’’ཏི ཡོ་ག་ཝི་བྷཱ་གེ་ན ས་མཱ་སོ ད་ཊྛ་བྦོ. ཡ་ཐཱ – ཨ་པུ་ན་གེ་ཡྻཱ གཱ་ཐཱ, ཨ་ཙ་ནྡ་མུ་ལློ་ཀི་ཀཱ་ནི མུ་ཁཱ་ནི, ཨ་སྶ་དྡྷ་བྷོ་ཛཱི, ཨ་ལ་ཝ་ཎ་བྷོ་ཛཱི་ཏི་ཨཱ་དཱི་སུ ཨ་ཡུ་ཏྟ་ཏྠ་ཏྟཱ ནཱ་ཉྙེ་ན ས་མཱ་སོ.
ཏ་ཐཱ དི་ཊྛོ པུ་བྦ་ནྟི དི་ཊྛ་པུ་བྦོ ཏ་ཐཱ་ག་ཏཾ. ཨེ་ཝཾ སུ་ཏ་པུ་བྦོ དྷ་མྨཾ, ག་ཏ་པུ་བྦོ མ་གྒཾ, ཀ་མྨ་ནི དི་ཊྛཱ པུ་བྦ་ནྟི དི་ཊྛ་པུ་བྦཱ དེ་ཝཱ ཏེ་ན. ཨེ་ཝཾ སུ་ཏ་པུ་བྦཱ དྷ་མྨཱ, ག་ཏ་པུ་བྦཱ དི་སཱ, པ་ཧཱ་རོ, པ་རཱ་བྷ་ཝོ, ཝི་ཧཱ་རོ, ཨཱ་ཧཱ་རོ, ཨུ་པ་ཧཱ་རོ ཨི་ཙྩཱ་དི.
ཀ་མྨ་དྷཱ་ར་ཡ་ས་མཱ་སོ.
དི་གུ་ས་མཱ་ས
ཨ་ཐ དི་གུ་ས་མཱ་སོ ཝུ་ཙྩ་ཏེ.
ཏ་ཡོ ལོ་ཀཱ ས་མཱ་ཧ་ཊཱ ཙི་ཏྟེ་ན ས་མྤི་ཎྜི་ཏཱ, ཏི་ཎྞཾ ལོ་ཀཱ་ནཾ ས་མཱ་ཧཱ་རོ་ཏི ཝཱ ཨ་ཏྠེ –
‘‘ནཱ་མཱ་ནཾ ས་མཱ་སོ ཡུ་ཏྟ་ཏྠོ’’ཏི ཝ་ཏྟ་མཱ་ནེ ‘‘དྭི་པ་དེ’’ཏི་ཨཱ་དི་ནཱ ཀ་མྨ་དྷཱ་ར་ཡ་ས་མཱ་སོ, ཏ་ཏོ ས་མཱ་ས་ས་ཉྙཱ་ཡཾ, ཝི་བྷ་ཏྟི་ལོ་པེ, པ་ཀ་ཏི་བྷཱ་ཝེ ཙ ཀ་ཏེ –
‘‘ཀ་མྨ་དྷཱ་ར་ཡོ’’ཏི ཝ་ཏྟ་ཏེ.
༣༤༨. ས་ངྑྱཱ་པུ་བྦོ དི་གུ.
ས་ངྑྱཱ་པུ་བྦོ ཀ་མྨ་དྷཱ་ར་ཡ་ས་མཱ་སོ དི་གུ་ས་ཉྙོ ཧོ་ཏི.
དྭེ གཱ་ཝོ དི་གུ, དི་གུ་ས་དི་ས་ཏྟཱ ཨ་ཡ་མྤི ས་མཱ་སོ དི་གཱུཏི ཝུ་ཏྟོ. ཨ་ཐ ཝཱ ས་ངྑྱཱ་པུ་བྦ་ཏྟ་ན་པུཾ་ས་ཀེ་ཀ་ཏྟ་ས་ངྑཱ་ཏེ་ཧི དྭཱི་ཧི ལ་ཀྑ་ཎེ་ཧི ག་ཏོ ཨ་ཝ་ག་ཏོ་ཏི དི་གཱུ་ཏི ཝུ་ཙྩ་ཏི, དྭཱི་ཧི ཝཱ ལ་ཀྑ་ཎེ་ཧི ག་ཙྪ་ཏི པ་ཝ་ཏྟ་ཏཱི་ཏི དི་གུ. ཨེ་ཏྠ ཙ ‘‘ས་ངྑྱཱ་པུ་བྦོ’’ཏི ཝུ་ཏྟ་ཏྟཱ ས་ངྑྱཱ་ས་དྡ་སྶེ་ཝ པུ་བྦ་ནི་པཱ་ཏོ, ‘‘ཨུ་བྷེ ཏ་པྤུ་རི་སཱ’’ཏི ཏ་པྤུ་རི་ས་ས་ཉྙཱ.
‘‘ན་པུཾ་ས་ཀ་ལི་ངྒོ’’ཏི ཝ་ཏྟ་ཏེ.
༣༤༩. དི་གུ་སྶེ་ཀ་ཏྟཾ.
དི་གུ་སྶ ས་མཱ་ས་སྶ ཨེ་ཀ་ཏྟཾ ཧོ་ཏི, ན་པུཾ་ས་ཀ་ལི་ངྒ་ཏྟ་ཉྩ.
ས་མཱ་ཧཱ་ར་དི་གུ་སྶེ་ཏཾ ག་ཧ་ཎཾ, ཏ་ཏྠ ས་བྦ་ཏྠེ་ཀ་ཝ་ཙ་ན་མེ་ཝ ཧོ་ཏི, ཨ་ཉྙ་ཏྲ པ་ན བ་ཧུ་ཝ་ཙ་ན་མྤི, ནཱ་མ་བྱ་པ་དེ་ས་སྱཱ་དྱུ་པྤ་ཏྟི ཨམཱ་དེ་སཱ་དི.
ཏི་ལོ་ཀཾ, ཧེ ཏི་ལོ་ཀ, ཏི་ལོ་ཀཾ, ཏི་ལོ་ཀེ་ན, ཏི་ལོ་ཀ་སྶ, ཏི་ལོ་ཀཱ ཏི་ལོ་ཀ་སྨཱ ཏི་ལོ་ཀ་མྷཱ, ཏི་ལོ་ཀ་སྶ, ཏི་ལོ་ཀེ ཏི་ལོ་ཀ་མྷི ཏི་ལོ་ཀ་སྨིཾ.
ཨེ་ཝཾ ཏ་ཡོ ད་ཎྜཱ ཏི་ད་ཎྜཾ, ཏཱི་ཎི མ་ལཱ་ནི ས་མཱ་ཧ་ཊཱ་ནི, ཏི་ཎྞཾ མ་ལཱ་ནཾ ས་མཱ་ཧཱ་རོ་ཏི ཝཱ ཏི་མ་ལཾ, ཏི་ལ་ཀྑ་ཎཾ, ཙ་ཏུ་སྶ་ཙྩཾ, ཙ་ཏ་སྶོ དི་སཱ ཙ་ཏུ་དྡི་སཾ, ‘‘ས་རོ ར་སྶོ ན་པུཾ་ས་ཀེ’’ཏི ར་སྶ་ཏྟཾ, པ་ཉྩ་སི་ཀྑཱ་པ་དཾ, ས་ལཱ༹་ཡ་ཏ་ནཾ, ས་ཏྟཱ་ཧཾ, ཨ་ཊྛ་སཱི་ལཾ, ན་ཝ་ལོ་ཀུ་ཏྟ་རཾ, ད་ས་སཱི་ལཾ, ས་ཏ་ཡོ་ཛ་ནཾ.
ཏ་ཐཱ – དྭེ ར་ཏྟི་ཡོ དྭི་ར་ཏྟཾ, ཏི་སྶོ ར་ཏྟི་ཡོ ཏི་ར་ཏྟཾ, དྭེ ཨ་ངྒུ་ལི་ཡོ དྭ་ངྒུ་ལཾ, ས་ཏྟ གོ་དཱ་ཝ་རི་ཡོ, ཏཱ་སཾ ས་མཱ་ཧཱ་རོ་ཏི ཝཱ ས་ཏྟ་གོ་དཱ་ཝ་རཾ.
ཨེ་ཏྠ ཙ ར་ཏྟི ཨ་ངྒུ་ལི གོ་དཱ་ཝ་རཱི་ན་མ་ནྟ་སྶ –
༣༥༠. ཀྭ་ཙི ས་མཱ་ས་ནྟ་ག་ཏཱ་ན་མ་ཀཱ་ར་ནྟོ.
རཱ་ཛཱ་དི་ག་ཎ་སྶེ་ཏཾ ག་ཧ་ཎཾ, ཏེ་ན ས་མཱ་ས་ནྟ་ག་ཏཱ་ནཾ རཱ་ཛཱ་དཱིནཾ ནཱ་མཱ་ནཾ ཨ་ནྟོ ཀྭ་ཙི ཨཀཱ་རོ ཧོ་ཏཱི་ཏི ཨ་ཏྠོ. ཀཱ་རགྒ་ཧ་ཎེ་ན བ་ཧུ་བྦཱི་ཧཱ་དི་མྷི ས་མཱ་ས་ནྟེ ཀྭ་ཙི ཀཔྤ་ཙྩ་ཡོ ཧོ་ཏི, སུ་ར་བྷི སུ དུ པཱུ་ཏཱིཧི ག་ནྡྷནྟ་སྶི་ཀཱ་རོ ཙ.
ཨ་ཐ ཝཱ ཨ ཙ ཀོ ཙ ཨ་ཀཱ, རཀཱ་རོ པ་ད་ས་ནྡྷི་ཀ་རོ, ཏེ་ན ཀྭ་ཙི ས་མཱ་ས་ནྟ་ག་ཏཱ་ན་མ་ནྟོ ཧུ་ཏྭཱ ཨ ཀ ཨི་ཙྩེ་ཏེ པ་ཙྩ་ཡཱ ཧོ་ནྟཱི་ཏི ཨ་ཏྠོ. ཏེ་ན པ་ཉྩ གཱ་ཝོ ས་མཱ་ཧ་ཊཱ་ཏི ཨ་ཏྠེ ས་མཱ་སཱ་དིཾ ཀ་ཏྭཱ ས་མཱ་ས་ནྟེ ཨཔྤ་ཙྩ་ཡེ, ‘‘ཨོ ས་རེ ཙཱ’’ཏི ཨ་ཝཱདེ་སེ ཙ ཀ་ཏེ ‘‘པ་ཉྩ་ག་ཝ’’ནྟི་ཨཱ་དི ཙ སི་ཛ྄ཛྷ་ཏི. ‘‘དྭི་ར་ཏྟ’’ནྟི་ཨཱ་དཱི་སུ པ་ན ཨཔྤ་ཙྩ་ཡེ ཀ་ཏེ པུ་བྦ་ས་ར་སྶ ‘‘ས་ར་ལོ་པོ’’ཏི་ཨཱ་དི་ནཱ ལོ་པོ.
ཨ་ས་མཱ་ཧཱ་ར་དི་གུ ཡ་ཐཱ – ཨེ་ཀོ ཙ སོ པུ་གྒ་ལོ ཙཱ་ཏི ཨེ་ཀ་པུ་གྒ་ལོ. ཨེ་ཝཾ ཨེ་ཀ་དྷ་མྨོ, ཨེ་ཀ་པུ་ཏྟོ, ཏ་ཡོ བྷ་ཝཱ ཏི་བྷ་ཝཱ, ཙ་ཏ་སྶོ དི་སཱ ཙ་ཏུ་དྡི་སཱ, ད་ས་ས་ཧ་སྶ་ཙ་ཀྐ་ཝཱ་ལཱ༹་ནི ཨི་ཙྩཱ་དི.
དི་གུ་ས་མཱ་སོ.
ཏ་པྤུ་རི་ས་ས་མཱ་ས
ཨ་ཐ ཏ་པྤུ་རི་ས་ས་མཱ་སོ ཝུ་ཙྩ་ཏེ.